رواية ذاري النجوم الفصل الثاني والثلاثون 32 بقلم زهراء السراي

لا اليأس ثوبي ولا الأحزانُ تكسرني

جُرحي عنيدٌ بلسعِ النارِ يلتئمُ

اشرب دموعك واجرع مُرها عسلاً 

يغزو الشموع حريقٌ وهي تبتسمُ

والجِم همومك واسرِج ظهرها فرساً

وانهض كسيفٍ إذا النصالُ تلتحمُ

:

:

:

:

:

:

:

:

:

ليل

✥━━━༺✦༻━━━✥

فوضى وركضة بالمستشفى

بوحدة الخدج  وصرير العربات اللي تركض بالممرات بين طفل مقبل عالحياة وبين طفل فارقها

بس الفوضى الحقيقية هي اللي بداخلي

اني واني اباوع لهالروح الصغيرة بين ادية

ولأهلة المنتظرين خبر مني يااما يفرحهم

او يقتل باقي ذرات الامل بداخلهم

الخوف ياكل بسكوني وهدوئي

لان هالجسم الصغير مو مجرد مريض

هذا حلم سنين من الانتظار

ولهفة أم ذبلت وهي تنتظر ضحكة تنسيها

وجع نظرات الاتهام بأنها سبب عدم الانجاب

اباوع لصدرة اللي يرتفع وينزل بصعوبة

كأنه يصارع الهوا حتى يثبت أحقيته بالوجود

واخاف من اللحظة اللي يقرر بيها الجهاز يعلن استسلامه 

كل صوت يطلع من المونيتر هو نبضة من أعصابي وكل هبوط بالأوكسجين هو غصة بحنجرتي

اتحرك وسط هالأجهزة مثل اللي يمشي بوسط حقل ألغام النفس هنا بحساب والحركة بحساب

واللمسة لازم تكون أرق من جناح الفراشة

لأن الحالة اللي بين إيديه هشة

لدرجة إن الهوا إذا مر قوي علي ارجف 

زميلاتي الممرضات بطلات الخدج حوالية

واني افحصة واوجهم للعلاج

-دكتورة اشوفة متدهور اليوم

باوعتلة ايدة الصغيرة برفع اصابعي

لمستها واني ادعي

-لا ان شاء الله الة من اسمة نصيب

ضحكت الممرضة

-يجنن اسم شجاع

ابتسمت واني ارتب انبوبة الاوكسجين الة

-تعرفين بگد متعبانة بي امة مقررة

تسمي هالاسم

-تقهررر من القهر البارحة وگعت من الكرسي

من ركضنا ليجاي عبالها مات انفتحت ازرار العملية

وخيطوها

-حقها حلم عمرها هذا داخلة على نص ال٤٦

سبحان الله ربنا اراد يتم الحمل

رغم النزف والمضاعفات

يلة بطلات توافوني بالاخبارة بالساعات

لتنسون

طلعت تاركتة وراية صار خمس أيام

اني مجندة لشجاع بالخدج 

طلعت ولگيتها تمشي ساندها زوجها

بس شافتني وگعت دموعها

-هادكتورة فدوة بشريني بخير

-جاي يتحسن بس من يطلع اريدچ

تكونين بأحسن حال مو هيچ تعبانة

رد زوجها بدون ميرفع راسة

وهذا اللي التمستة منة خلوق مؤدب

حتى كلامة بقدر بلا زيادة

-دكتورة رافضة تاكل هم اكدي عليها

-لا ليييييش يعني شجاع من يطلع

مو يريد رضاعة شلون ترضعي وانت

ماعندچ طاقة اريدچ هاليومين تركزين

عالبروتين والالياف خضروات وسوب

ولحم وتمر حتى تتقوين والنونو من يطلع

تكدرين ترضعي 

ابتسمت تمسح بدموعها

-والله يطلع يعني زين

-منو الاحسن احنة لو رب العالمين

-ونعم بالله

-خلي كل شي على ربنا وارتاحي

-مااشوفة

مستعدة تشوووفين ابنچ الحلووو

فتحتلها التلفون باست الشاشة وسندت

راسها باكية على كتف زوجها

تركتهم معتذرة وطلعت ادعي

ربنا يگوم هالطفل بالسلامة لخاطر امة

من ولدتة چان يعاني من ​متلازمة الضائقة التنفسية

نقص مادة السورفاكتانت تخلي الرئة تنكمش ومتگدر تتوسع وهنا بدت رحلة الطفل ويا جهاز التنفس الاصطناعي الـ CPAP

دخلت للمكتب لگيت بوكس صغير بلا ماافتحة

عرفتة منة بي ككاو وحلويات ثانية

وردة برتقالية وكارد مكتوب

-اشتقت اليك فعلمني الا اشتاق

غلقت البوكس وگمت اسد المكتب

ارتاح شوووية بعد عمل يوم مضني

مددت بهدوء عالسرير الجانبي

مغمضة عيوني هاي مرت ٧ أشهر

على اللي صار مباقي للسنة الجديدة

غير ايام قليلة وثلث أشهر على محاولتة

للتفاهم وياي من اخذني من باب الجامعة

للأمتحان ماانسى الموقف اللي صار

بساعة اللي صعدني للسيارة يحاول

نحچي لكن چنت راااافضة اي كلاااام

ويا لگيتة واگف برة وكأنة عرف الموعد

واني اعرف اخذ المعلومات من وطن لو غيد

- منتظرج من الصبح هنا

فتح باب السيارة وگفت متكتفة

رافضة اصعد

-صعدي حاااااارة بس ارتاحي

-ماااصعد ومنتظرة زملائي

- زملائچ شلوووون زملاء

لگف 

گالهة وبخفة دفعني للسيارة

و قفلها اول مگعدت

دخل بسرعة ورجع قفلها

ماباوعت حتى بوجها درت

وجهي للشارع متكتفة تعبانة

وكل مشاعر الغضب معتريتني

-باعيلي ليل فهميني شتردييين طلباتج شنووو

ما رديت

-يعني نبقى بلا تفاهم

هاي ثالث شهر غيييير افتهم شتردين

مارديت على سؤالة بس سألتة

-ويييييييييين موديني

-ماااااااارجعچ لحد ماتفهميني شتردين

-نتطلگ

بس سمع الكلمة انفجر غاضب

-طلاگ ماااااكو لو لحضني لو لجهنم

گالها وانطلق بأقصى سرعة ممكنة

وبلا تفكير عطت بي واني احاول افتح الباب

-مرررررررحبا بجهنم

بلاتفكير وبسرعة لزم البريك موقف السيارة

بهلع بنص الشارع بحيث ارتد صدرة مضروب

بالستيرن مد نفسة من ناحيتي

سد الباب ومشى بطيء توقف بجانب

الشارع نفسة اللاهث واصلني

وردد الكلمة بعدم تصديق

-تفضلين تشمرين نفسچ من السيارة

وماتكونين وياي بنفس المكان

مسحت دموعي اللي  ووگعت

-وتخيل لأي مرحلة من الخذلان واصلة

فتحت باب السيارة نازلة تحت صمتة

رجعت امشي عالرصيف لباب الجامعة

احس بي ماشي وراية بالسيارة

توقفت دقايق وطلعو زملائي اثنين

وثلاثة زميلات انقسمنا بسيارتين

وتوجهنا للمطعم اخذنا طاولة چبيرة

وبدت الطلبات تنزل ثواني

ودخل هو بس اخذ بجهة المدخنين ومقابلني

عبر الحاجز الزجاج يدخن نرگيلة

كل شوية يسترق

النظرات ناحيتي واني منزلة راسي

كملنا الغدة بعد مااصر واحد من الزملاء

على دفع الحساب طلعنا راجعين

وهو مشفتة بعد وصلت البيت

غطيت بالنوم الى أن شبعت

گعدت مرتاحة بابا بالهول تلفونة

بيدة جاي يغلقة باوعلي محتار

-جايين ناس جدج وعمچ وياهم

زلم من العشيرة ليل بابا صح

الرأي الچ بس زحمة يفشلون

باوعتلة محتارة بيبي بصفة

وماما واگفة منتظرة رد

-بابا اذا متعبتكم اروح ويا

ارجع

درت وجهي روحي طالعة من القهر

يضغط على بابا بهالتصرفات

وبالمحصلة بابا يضغط علية

ثواني ودخل بابا يمي للغرفة

-هيچ تحاچيني ليل

اني تعبان منچ

-اذا تحبني لتخليني ارجع

بچيت وهو تخبل جر راسي

باس جبيني

-تعتقدين ارجعچ غصب

شلووون بابا

-مااگدر ارجع ومااريد بابا الأهانة

الوجهوها الية چبيرة غلط العمة

وتجاوزها وفشارها علية وعلى

بيبي وسكوت هاجس عنها وضربتة

الية سوت بينة سد چبير مااظن اگدر

اتجاوزة

-حقچ وماالومچ وهم الجايين نعتبرهم

خطار ونقدم الواجب والايام كفيلة بالنسيان

طلع بابا وفعلا للعصر دخلو جدو وعمو

وهاجس واثنين رياجيل كبار

وبعد كلام وسوالف اعتيادية

بيبي دخلت تسلم لأن من كبار عشيرتهم

بدة واحد منهم يحچي عن اصلاح

ذات البين وحسن المعاشرة وغيرها

انتظرت رد بابا

-جيتكم على عيني وراسي

وهاي الحجي يدري وحتى اخوي كمال

اني گلتلهم الموضوع شايل ايدي

منة القرار لصاحبة الشأن

-وبنيتنا شنو قرارها

گالها الرجال وبابا رد

-ماترجع وتعتذر منكم لأن ردتكم

بس الصاير بينهم الظاهر چبير

وكاسر كلبها ومقسيها من ناحية

زوجها

-بس تصير بين الرجال والمرة

-صح بس كل عائلة تعالج الموضوع بطريقتها

ومادام بنتي رافضة يعني الموضوع

يمس كرامتها واني اي شي يمس كرامتها

ارفضة

اعتذرو وبقو يحچون ساعة وراحو

بالليل دگ تلفوني جدو يحاچيني بضحك

-ها عرج عذبة طگ براسچ

-شلونك جدو

-الحمد لله ياجدي بس ليش

ماتردين لبيتچ

-شلون ارجع جدو شفت بعينك

-مو اگلچ ردي وطردي يجي يمي بالغرفة

وانت ببيتچ

-مو حل جدو هذا مو حل

-چا تتطلگون

-مااعرف جدو

-شلون جدي تبقون معلگين

اطيني وكت لردتچ حتى اطمنة ضال مثل

الحبلة بتوم وتطلگ

-ههههههههههه جدووو شنو هاي

-والله ياجدي حتى البيت هجرة

يگول اشوفها بكل مكان

بس كليلي يمتة تردين

-من يطيب گلبي من الصار

-مثلها حباية ومفشوگة

عرفتة يقصد بيبي ودعني وراح

وهيچ استمرينا لحد هاللحضات

فزيت على صوت تلفوني

گمت من السرير فتحت الخط الممرضة

-ها يقين شصار

-دكتورة فتح عيونة

-الله عليج

-والله صورتة الچ شوفي عالواتساب

دخلت لگيت الفيديو فتحتة

فاتح عيونة بلا تفكير توجهت للغرفة

مال الأم لگيتها گاعدة وزوجها يخلي اكل

بحلكها بس شافتني غصت خوف

-بسسسم الله شربي مييي بسرعة

شربها المي واني رحتله

-جايييتچ بخبر يجنن

فتحت الفيديو وهي حضنت الجهاز

وصوتها مزيج بين الفرح والامل والحزن

بأنها ماتگدر تحضنة

-شوووف عيونة باوع

زوجها مبتسم يتابع الفيديو

-دكتورة شنو رأيچ

-والله مسألة أيام ونخلص من شجاع ويفرغلنا

السرير لبطل ثاني مثلة ومااااشوفكم بس بالخير

تحملو انتو صبرتو يومين ثلاثة واطلعة الكم

وصار مثل مگلت تم اسبوع وبدة شجاع

يتنفس بوحدة وخرجنا تحت فرحة اهلة

وشكرهم الية ولزملائي وهيچ

اديت واجبي ويا هالطفل اللي سميتة

المعجزة وحلت ليلة رأس السنة اللي

فضلت بيهة الدوام مبادلة احد زميلاتي

الخفارة حتى ابعد تفكيري عن كل شي 

بهاليوم الممرات هدوء 

خفارة بوقت متأخر طلعت من باب المكتب

وتراجعت ليورة واني اشوفة گاعد على الكرسي المقابل لغرفة الاستراحة

مخلي رجل على رجل براحة

بيدة علاگة هدايا طالع منها ورد جوري ملون

تقدملي فتحها طلع الورد بلا كلام خلا بيدي

وباقي العلاگة بيهة علبة ككاو اني أحبة

وكيكة كلش صغيرة وكارد بنهاية العلاگ

باوعلي بنظرة مليانة عتب وگال وهو يخلي

العلاگة بيدي

-ما أجيت حتى أعطل شغلچ

أجيت حتى ابدي سنتي الجديدة بيچ

سنة خير يارب

گالها بأستعجال باس جبيني

ومشى بسرعة كأنة هارب وخايف

من ردي بقيت واگفة بمكاني

وعطر الورد يبث بگلبي وروحي

ذكريات ماضية عشناهة سوية

وتتابعت بعدها لقاءاتنا المتعمدة

هادئة بلا جدال ولا عتب 

مرات واني اسوق السيارة يتابعني

من بعيد تارك بينة مسافة أمان

مو حتى يزعجني يمكن بس حتى يشوفني

كأنة يحسسني ويبينيلي ان هو دائما موجود

مرات يجي للبيت بوقت بابا ماموجود 

مجرد يسلم على بيبي وماما يبقى گاعد ساعة

اسمع صوتة تعبان يحچي بالدوام والشغل

ويروح بلا ضغط ولا كلام

يتصل مرات على رقمي الجديد اللي

مااعرف شلون اخذة ومن يتكرر

الاتصال وماارد يتركلي رسالة

صوتية مدتها ماتتعدى الثواني مابيها

لاعتاب ولا توسل بس يگولها بانفاسة

المنهكة بكل مرة

-ليل اني غريب بدونچ

غريب حتى عن نفسي

وعلاقتي اللي صارت شبه

عملية بنوح خلتة يدز بيده

مذكرات صغيرة مرات

ومرات ثانية يدسها على ماسحة

السيارة اغلبها تذكيير بحبنا الغريب

الورقة اللي اثرت بية هي اللي كاتب

بيهة تاريخ لقاءانا بالمزرعة

وبالتخرج

واثناء علاجة وتاريخ زواجنا وكل

تاريخ مميز بينا وكاتب

-جرح اللي سببتة اكبر من ان تحتوي

هالورقة بس اتمنى هالتواريخ والسعادة

اللي عشناهة بلحظاتها تمحي ولو جزء بسيط

من سواد اللي صدر مني

ومن فترة للثانية تجيني وجبات

اكل احبها واعرف هو اللي يطلبها ويدزها

الرسائل الطويلة اللي تجي للأيميل

يحچي بيهة كأنة گاعد گبالي وكاتب بنهاية

الرسالة رفضچ للرجوع حقچ

بس رفضي لغيابچ وااااجب محتاجچ

حيل

وبشهر الخامس من السنة الجديدة

غاب هاجس واختفى لاسبوعين

وبتعنتي وعنادي ماسألت عنة

بس الصار جدو يتصل ويسألني

-المسودن ماخابرچ

-لا جدو ليش صاير شي

-دورة عندة بال………راحو وهاي

الاسابيع كل ليلتين يراسل

اخوانة يطمنة عبالي مخابرچ

وبدة ناقوس الغياب يدگ بروحي

وافتقدت وجودة حوالية

وكلما اسأل نفسي ليش هيچ

اشتاق الگاني ارجع معاندة النسيان

ورافضة أنسى الصار

ورجع وكأنة تعود على غيابي واختفى

لمدة شهرين افتقدت بيهة حتى ضلة اللي

ينعكس عالجدران وهو مار

وبيوم طلعت للدوام ويا لسعات برد الشتا

الأولى متذكرة اتصالة البارحة بلا كلام

بس أغنية رياض احمد تصدح

تبين مدى اشتياقة وصلت المستشفى

تعبانة وعيوني احسهم صارو يبحثون

عن وجودة هيچ بس لمجرد الوجود

نزلت بسرعة استلم واجبي

من الاطباء الخفر دخلت

التقيت وجه بوجه بنوح بس شافني

وجهه تغير

-صباح الخير دكتور

-صباح النور دكتورة ليل 

سمعت غرفتج مشغوولة شكلي ويه

دكتورة تيسير تمام

-تمام دكتور

-وجهج تعبان ليل الموضوع اسهل من هيج

ابتسمت بتعب وهو طلع

لغرفة الاطباء ياخذ اشيائه

يوقع ويطلع

مشيت بخطوات سريعة استلم وابصم

دخلت للردهة ريحة المعقمات المعتادة 

مافادت هالمرة بتهدئة أعصابي

فمشاعري وأعصابي حالياً

داخلة بحرب ضروس بين المنطق

والحب

مشيت خطوات وتجمدت أقدامي

على بعد أمتار شفت شخص

بظهر عريض وبدلة عسكرية

واگف بصلابة اعرفهاااااا هالوگفة

حبست أنفاسي احس الدم تراجع لوجهي

شاعل بي جمرة نار 

هاي الوگفة والأيد اللي مسنودة عالمسدس

وكأنه بوضع استعداد للاطلاق هذا

طبعه متأهب لكل شي

انحناءة الكتف بالوگفة نفسها

لا يمكن يكون غيييره بس ماألتفت

طريقي يمر من جانبه رفعت الكمامة

على وجهي ومشيت بسرعة

خاطفة الى ان عبرت الزاوية اللي

واگف بيها

طول ساعات المناوبة بعدها جنت جسد بلا 

روح ودماغي يقرأ ويكتب ويتسائل

معقووولة هووو لو عقلي من التعب

گام يتخيله بكل مكان

الساعة ثمانية اخذت اغراضي

اتجهت للمكتب دخلت بتعب خليت الجنطة

بالخزانة الصغيرة طلعت السكراب حتى ابدل

لاحتلي باقة ورد أبيض وأصفر 

مغلفة ببساطة مستفزة دورت

عالبطاقة عررفته هوو من خط ايده

المبعثر

-كبرتي بالسن وصرتي متفرزنين

وعبرتي ماسلمتي بس يلا عطرج سلم بدالج

حقج هيبة العسكري ترهب بس مو لدرجة تنسين رجلج

​ضحكت رغماً عني

ضحكة ممزوجة بدمعة محبوسة

بتعب وتفكير ولخبطة

هالسخافة وهذا الغرور المبطن بالخبث

مايملكه إلا هو

بعدة يعرف يستفزني

ويطلعني من صفنتي وسكوني

لعواصف شعوري وجلجلة صوت اعصابي

فتحت باقة الورد خليت منها وردة 

بجنطتي والباقي خليته ويه الكارد بسلة

الزبل صورته ونشرته مخصوص

حتى هو يشوف واعرف يشوف 

من الحساب الوهمي اللي متابعني منة

كتبت

-بعض الهدايا مكانها الطبيعي هو النسيان

أو سلة مهملات في ممر عابر

دقايق واجاني رده بشكل ثار أعصابي

- شفت الورد بالزبالة بس اكو وردة برتقالية

ناقصة بالباقة ويييين وديتيها

لو عجبتچ وضميتيها بين أغراضچ حتى تشميها وتتخيلين نفسچ متوسدة صدري مثل قبل

​رجع خله ايموجي نار عالستوري

وكمل باستفزازه

​-العسكرية علمتني أحسب حساب كل خطوة

وعلمتني إنو التمرد هو أول علامات الاستسلام

تدرين زين إنو ريحة هالوردة من ريحتي لذلك 

اخذتيها وعنادچ هذا مجرد محاولة فاشلة حتى تقنعين نفسچ إنچ نسيتي بس عيونچ بالمستشفى اليوم چانت تكول غير حچي يا دكتورة ليل

تسمرت بمكاني واني اشوف رده

فتحت الجنطة بسرعة ولگيتها فعلا

الوردة البرتقالية الوحيدة بالباقة

ضربت جبيني اكيد يفقدها وهو اللي

ارغمني على حب هاللون من الورد غصباً

رجعت بيومها للبيت والشوق بلغ

منتهاه واني اتسائل معقولة

الشوق يغلب الكرامة

دخلت لگيت بيبي منتظرتني كالعادة

بريوگها الحلو والچاي والحليب الحار

باوعتلي وشافت التعب بعيوني

-تعاااي نامي على رجلي

-تتعب رجلچ بيبي

-مو اكثر من تعب راسچ تعااااي

خليت راسي على رجلها مسحت على راسي

بهدوء

-شسوالچ

-بيبي تعبانة شفته اليوم 

ولو هو كل يوم يتهيألي والله تعبت يابيبي أحس روحي مخربطة مثل الخيط الضايع طرفه

​-يا يمه الگلب إذا احتار يعني بعده يحب 

​-هذا هو المأذيني يا بيبي 

ما أعرف أريد أرجع وأنسى كل شي صار

لو أكمل طريقي وأنهي كل شي وأنفصل عنه للأبد وجوده يربكني وغيابه يكسرني

شسوي اني بدووووامة اخاف ارجع ويتكرر

هالفعل بساعتها والله لوچان رووووحي ابترة

واتركة وماالتفت

-يابيبي ماتخلص هالدوامة راح تكبر وتكبر وتظل

مثل خورة الماي تسحبچ

تلاحگي روحچ وقرري ابوچ مل من الرايح

والراد والمسودن كل يوم جايبله كتيبة عسكر

علمود الصلح

-بعدني بيبي

-شبيچ يابيبي ليش دموعچ طاحت

ولچ لا ترخصيها خليج عزيزة

-مليت من ادعاء القوووة يابيبي مليت

وهذا گلبي لو امره بيدي چان حرررگته

-ااااااخ يابيبي الگلب مالنا علي سلطان

سنين العمر مرت والگلب بعده يغلي 

-بيبي

-يابعد عيوني

-احچيلي الصارلچ انتِ مو تگولين

قصتنا تتشابه فدوة ليييش ماتحچين

بس رؤوس اقلام سووولفيلي الصار 

-لا ياببيبي الماضي انتهى

وقصتنا تختلف 

-معقولة انتهى

تنهدت وصوته الناعم تغير

-والله ياليلة ماانتهى اله لمن نهى گلب بيبيتچ وسوا

رمااااد گومي ريحي راسچ ونامي

-وتحچيلي

-شتستفادين من سالفتي

-اخذ حكمة منها عسى ولعل تفيدني

ضحكت وهي تضربني على راسي

-گومي صلي ونامي يلة وبالليل تعاي

نامي يمي واحچيلچ الجرة على بيبتيچ

وشصار 

والتقينا بغرفة بيبي بالليل

وبدت تسردلي ولمدة ايام

حكاية  متتصدگ ولا بالخيال

لطالما سمعت عن هالقصة بس رؤوس اقلام

عمري مچنت أتخيل إنو الوجع ممكن يورث

بس لمن سمعت قصة بيبي عذبة

عرفت إنو إحنا مو بس نشيل ملامحهم

إحنا نشيل حتى أثر خطواتهم 

بيبي چانت تحچي وكأنها تنفض

غبار السنين عن گلبها

وقصتها خلتني أحس إنو معاناتي گدام اللي شافته هي مجرد سطر واحد بكتابها الضخم

الفرق بيني وبينها مو بس بالوقت

الفرق بالقوة هي واجهت ظروف لو تنحط على

جبال تهدها

بس هي وگفت مثل النخلة 

لا هزها ريح ولا كسرها جفاف

مرأة عظيمة مو لأنها مابچت ولا خضعت

بس لأنها بچت وگامت مسحت دموعها

وكملت الطريق وهي شايلة الدنيا كلها على چتافها

بقصتها شفت شلون الظروف تگدر تصقل الروح وشفت الاختلاف الجذري بين جيلنا اللي يدور حلول نفسية

وبين جيلها اللي كان هو الحل بحد ذاته

علمتني إنو المرة شجاعة مو بس بعنادها

المرأة شجاعة بـقدرتها على التجاوز

وهي تجاوزت كل شي بصبر رغم المصاعب

اللي واجهتها من اقرب الناس لگلبها

وحملت كل شي بصدرها ومايوم حچت لماما

حتى متخلي گلبها يحزن على ابوها

الفرق بين قصتي وقصتها مو بس فرق سنين

لا الفرق بالجوهر بيبي عذبة چانت تحارب بساحة معركة حقيقية

تبني من اللاشيء حياة

وتصنع من الحزن ضحكة تستر بيها وجعها

عن عيون الشامتين عظيمة بكل تفصيلة حچتها بصمودها بوجه الظروف اللي تكسر الظهر

وبقدرتها إنها تحافظ على عذوبة روحها رغم كل المرار اللي ضاگته

​أباوع على نفسي والمشاكل اللي أعيشها 

وأفكر ويني ووين بيبي

هي مدرسة بالصبر

مرأة تجاوزت حدود المستحيل

بس علمود تحمي اللي تحبهم

جانت صلبة شجاعة ومؤمنة لدرجة إنها 

خلتني احس إن كل شدة وراها فرج

فعلاً بيبي عذبة هي المعنى الحقيقي للقوة

اللي تتغلف بالحنان والدفووو

بعد مابيبي ختمت حكاياتها

بثلث ايام من السهر لحد الفجر

قبل لااطلع لدوامي لزمتني تنطيني

آخر درس اخذتة من قصتها والعاشتة

-تفاهمي ويا بيبي

-بيبي ليش ترديني اتفاهم ويا رغم السوا

رغم انتِ مارجعتي لجدي هاجس بعد الصار

-لأن اشوفچ تحبينه والسوا مو مثل سواية جدة

وهو هم مثل المسودن يحومي وراچ ويريد يرضيچ

-بس السوا مو شويه

-اطي صببببر وتنحل العگدة

-شلون بيبي وقهرتي

-خل اگلج سالفة مااااادام ماحچيتي لأمچ

وابوچ السبب ادريچ مخلية خط رجعة ويا

حضنتها وبستها

-بس الچ حچيت لأن تفهميني بيبي

-يابعد روحي يصير خير ان ان شاء الله وترجعين

-ماااااارجع

-اشوف ماتردين بهاي عيونچ

التعاين بصورته كل ساعة

صفنت عليها شلون تعرف تقره

گلبي

وهاي اني اللي ماابين ضعفي كدام

احد

ياحبيبتي يا بيبي رغم السنين المرت

بعدها تقره المكتوب بنظرة العين

لأن الوجع العاشته ويه جدو هاجس خلاها

عرافة شوگ مثل ماتگول

تعرف الينبض بالگلب قبل لا ينطق بي اللسان

​طلعت من الحمام متوضية راجعة للغرفة

وقبل لا تكبر للإحرام

دارت وجهها عليه ونطقت الكلمة الفصل اللي

خلتني اعيد ترتيب قراراتي 

​-بيبي ليلة درب العشگ ما بي ربح وخسارة

بي بس كسرة ووجع

أنا وجدچ هاجس چانت سالفتنا مثل

خورة الهوة العالية لا هو ركد ولا أنا هديت

بس إنتِ تختلفين

إنتِ ويا تختلفون بعدكم طين لين

لا تخلين العناد يخليچ تصيرين حجارة

بنفس دربچ انتِ

لاتظلون راكدين انتِ ويا سولفو

وتعاركو لحد ماتوصلون لحل بيبي 

الماي من يركد يخيس والكلب نفس الشي من 

تنحبس بي الچلمات وماتطلع ويظل ساكن ييبس 

والگلب من ييبس يموت يابيبي

​أنا بوكتها من عرس علي جدچ هاجس

و ما رجعت مو لأن ما أحبه لا والله

بس لأن الوكت فات والحچي البلعومي

خنگني وييبس گلبي

هو ماعرف يقراني

انا چنت حررررة مثل سنبلة خضرة بوسط ريح

وهو اجه بمنجله گص عروگي وخلاني يبست 

والسنبلة من تيبس ما يحييها مطر فلاح 

رغم شگد تعذر بس العذر بعد الذنب ماينفع

ولا يفيد

بس إنتِ يابيبي بعدچ خضرة وعرگچ ثابت بگاعة

وهو مسودن بيچ والمسودن دوا بس بحضن اليحبها

دارت وجهها تكبر للصلاة

واني وراها اصلي استخاريت ربي

بعد كلامها ولبست وطلعت لدوامي

بنص الطريق واتصلت بي

شويه وانفتح الخط واجاني صوته

ينطقها بتعب

-تعاليلي هاي الناس ماتعرف تلوليلي

تعاليلي تعاليلي الشمس غيرت تفاصيلي

تعاليلي واذا عندچ مطر عالغير منچ قطرة

خليلي تعاليلي

-انتَ وين

جر نفس تعبان ورد

-ببيتنا

-بيت جدو لو المشتمل مالنه 

-لا بالمشتمل 

رديت علي وجر نفس مرتاح 

-جايتك

ووصلت وصار اللي صار بعدما تخربط

وضعي بالطريق وطلعت الزائدة

سويت العملية وهو لازمني

طول أيامها وقرار بابا انطاني

عشر ايام للتفكير بعدها حلف هو يلزم

زمام الأمور ويطلگني

وهاياني متمددة عالسرير بعد مااجاني

نوح عندي علاجات ضرورية

الدنيا صبح گعد يمي بعد ماعلگ المحاليل

وأنطلق يحچي بهدوء

-ليل وصلني كلام هاجس عن قرار

ابوچ اريد احچيلچ شي لعلة يشفع لهاجس

يمچ

-شنو اليشفعلة بعد استغفالي

واهانتي

-تفكيرة بيچ هوسة بأرضائج

انت يمكن الوحيدة الشاهدة مدى

عجرفتة بوقت مرضة وعملياتة

نحس خبيث ميتنازل ويطخ للهوا هذا

اللي يتنفسة

-ماكو شي جديد وين خوفة علية نوح

وين خوووفة وهو يجرحني وتاركني

ورا بدون ميبلغني مااااعرف احسة

ميعرفني عبالة راح اعيبة بالموضوع

-لا لا ابببببد اول ماخطبچ لزمتة وگتلة

بلغ البنية حتى تكون على بينة

گال خليها للوقت واني جاي اتعالج

بلكي منا للعرس الامور تمام

بس للأسف تأخرة بفترة التحرير

وتزوجتو ووضعة الصحي ساء

وصار اللي صار ورفض يوصلچ

خبر على أمل العلاج والتدخل الجراحي

-بس مگلي واصر على هالشي

-مرادچ تنزلين من نظرة لأن كذب من البداية

-مو سبب نوح هم مو سبب

تعرررررف لحد الان مررررت سنة وهو

اعتذر عالضربة وعالتجاوز وعالاهمال

وعلى كلام عماتك بسسسسس ابد معتذر

عن موضوع العملية ومرضة لازال معتقد

هالشي خاااااص بي وهو صاحب الحق

-اني مااگدر احكم بينكم

ولا اجاي اضغط عليچ بس اگلچ

فكري ليل فكري وكافي رجعو

طلع مودعني گال ان هالفترة خاف

اداوم وماالگى عندة سفرة

وية اصدقائة راح ودخلت بيبي گعدت بصفي 

-مابرد گلبچ

-لااااااااا 

-فتحتي باب الشماتة على روحچ يابيبي

-اني

-ايييييي تعرفين اليكرهنچ راح

يدگن طبل يگولن ماترجع وفشلتة كل مرة

تردة فارغ

-وگلبي المكسور مالة حساب

-رجعي وهناااااك ادبي

مافهمت شي من بيبي ولمدة

عش ايام هو اختفى بس يدز رسائل

ونوح فعلا ماكو رحت للدوام

مجرد سجلت حظور كالو اجازة اسبوع

ورجع هاجس اجة واني مطلعتلة الى أن 

بابا أجاني عصرية گعد يمي

-شوفي بابا هاي انطيتچ بالاسبوعين زيادة

حتى تفكررررين شگلتي هسسسة

-بابا ماااريد …………

وگف عصبي لأول مرة يتجاوز بحقي

-انتتتتتتتتت غبيييية بابا تركتي بيتچ

واجيتي هاي راح تقبط سنة

متحچين الصار ومخليتة سر بنفس

الوقت رافضة ترجعين كلمة الانفصال

على لسانچ بس متردينها صدگ

صغرتيني گدام الناس وگلت ميخاااااالف

شنوووو من ذنب مسوي لدرجة متقبلين

تحچين گوووووولي

دخلت ماما وبيبي يهدن بابا بس

ماسكت

-خاينچ متزووووووج عليچ

احچي

هزيت راسي بلا وبچيت

-الظاهر اني خليتچ برااااحتچ هوووووواية

انت زعطوطة مجاي تتخذين قرار

من اليووووووم القراااااااار بيدي فهمتي

بيييييدي اني

تركني ابچي وطلع وماما وبيبي گعدو

يهدوني ويحچون وياية لثاني يوم

لاطلعت من الغرفة ولا حتى اكلت

الصبحية اندگ باب الغرفة ودخل

بابا بلا سلام گال 

-بدلي ملابسچ وطلعي للصالة

-شكو بابا

-ملابس طلعة لبسي يالله

غيرت ملابسي وطلعت قبل لا أوصل

سمعت صوت هاجس وجدو

دخلت سلمت جدو اشر لبابا

-ابو ضرغام خل الولد ياخذ مرتة

ويروح

-بس بابا …………

اشرلي بابا بيدة بمعنى سكتي

-وية زوجچ يلة

-انت مفاهم الموضوع بابا ……

-حچالي الولد كل شي هو اعترف بغلطة

گوم اخذ مرتك واطلع

-بابا شلوووون

-بابا اني مرررريض وانت بيچ وماتزيدين

عناااااد ترررردوني اموووت من التفكير والقهر

رووووحي وية زووووجچ كلااااام مااتناقش بي

بدون تفاهم مد ايدة هاجس وسحبني ويا

سحبت ايدي مقابلة بابا صاح متعصب

-لييييييل

انهضمت وطلعت ماشية گدامة

للسيارة طلع صعدت وطلع يمشي

واني دايرة وجهي للشارع

-ديري وجهچ نحچي

-مااااااا اريد احچي

-انت مو گلتي مااريد اعلمك خارطة

طريقي ولازم ترجعلي مشاعري بطريقتك

هااااااي اني احاووووووول

-تجبررررررني بهالطريقة

-ماكو طرررريقة ثانية ليل ماااااااكو

حرت وحيرتيني

-رررررررررجعة لبيت تدخلة عمتك مااااارجع

فاهمني مااااااا ارجع لو اموووووت

بلا اي كلام استدار بكل سرعتة ومشة

مسرع طلع الولاية وفهمت الخطة شنو

-رجعنيييييييي  وييين ماخذني

-للمزرعة حيرتيني ماااااكو حل ثاني غير احبسچ

واحبس نفسي وياچ لحد مانوصل لوجه

حل

-ماااااااااا أريد شي بالاجباااااااار بطل

هالأسلوب 

-مااااكو غير هالأسلوب حرررت وياچ

ماگدرت احچي اي شي بابا طبگ ويا

لسبب مااعرفة والا ماتجرأ يسوي هالشكل

صمت مطبق بينة وظلت السيارة تنهب الأرض نهب وصوت أنفاس هاجس العالية تملي

السيارة

التفتتلة

- عبالك من تسوي هيچ ارجع احبك

اصلا جاي تكرهني بيك وتكرهني بنفسي

رد ببرود مستفز

- الكره والمحبة وجهين لعملة وحدة

المهم هسة نخلص من عيون الناس وكلام أهلچ المزرعة هي المكان الوحيد اللي راح نگدر نحل

بي مشكلتنا

-مشكلتك انت وغلطك انتتتتتتت

-اعرف وافهم

-همزيييين لأن انت السمحت لغيرنا يتدخل بحياتنا

عمتك اللي هدمت بيتي بكلماتها

وأنت اللي هدمته بسكوتك وبمدة ايدك علية

وبالكذب والاسراررررررر

هسة جاي تمثل دور البطل اللي ينقذ الموقف

ضرب الستيرن بقوة

-ماردت اخليچ تفكرين بمووووضوعي

ردت احميچ من التفكيييير

-ههههههههه تحميني مو انت نفسك گلت

لأن مو امينة عالسر ماگتلج

-خااااااني التعبييير تعصبت انييييي مو ملاااااك

بس اقسم بالله ردت احل الموضوع واحچيلچ

- يا حماية أنت سويت مثل اللي يحمي واحد من المطر ويشمره بالنار

تركتني وحدي أواجه سم عمتك اللي تعرف سرك

وتركتني سنة كاملة أتآكل من الداخل واني

افكر شنووو سبب تصرفة وكذبة

وهسة بكل بساطة وبكلمتين لأبوية

تخلي ينجبر يرجعني

شگلتله هاجس بشنو قنعته

استدار  بسرعة ودخل بطريق ترابي الغبار غطى الجامة الخلفية وكأنما العالم الخارجي بدأ يختفي

وهو نازل للمنطقة

- گلتله الحقيقة ليل گلتله إني مقصر 

وإني مستعد أسوي أي شيء حتى أصلح اللي انكسر وگلتله إن بنته راسها يابس وما تقبل تنطي فرصة للغفران

- الغفران يحتاج أعتراف و أنت لحد هسة ما معترف إنك غلطان

تنفست تعبانة مأيسة ان يرجعني

سندت راسي عالكشن

- تدري شنو الصعب الصعب إني چنت

حاسبتك السند

بس للأسف طلعت أنت الحايط اللي مال عليه وكسر ظهري

ساد صمت رهيب بس صوت محرك السيارة يرج ويهدر وگف السيارة فجأة گدام بوابة المزرعة 

التفت علية تقرب مني وفتح الباب

نزلت وهو وراية فتح الابواب دخلنا

بس دخلنا قفل الباب سحبني الة صرنا

وجه بوجه

- المزرعة ما بيها عمتي ولا بيها أبوچ لا بيها كلام الناس بيها بس أني وأنت راح نبقى هنا يوم

يومين شهر لحد ما تفرغين كل القهر اللي بداخلچ اضربي صيحي عاتبي بس مستحيل اضيع

بعد سنة من عمرنا بالمشاكل

- الإجبار يولد انفجار وأنت أخذت جسمي للمزرعة بس روحي بقت بغرفتي بيت أبوية شلون راح تحبس يمك روح متريدك 

-احاول وحتى لو فشلت على الأقل أكون حاولت بآخر طلقة عندي ادخلي ليل

مشيت واني امسح دموعي وماببالي بس صياح بابا علية

-راح ادخل بس تذكر الحيطان اللي راح تحبسني

بيهة راح تكون شاهدة إنك خسرت ليل القديمة للأبد

وحلت بمكانها وحدة متعرف بس لغة الكرامة

والعناااااااد

-هلاااااااا بالتحدييييييات

دخلت ريحة الحطب والتراب المبلل جانت تملي المكان صار سنة مواصلة المزرعة

نزعت شالي وشمرته على السرير

وگفت اشيل عني الجاگيت باقية بس بتشيرت

نص والبنطرون احس بي دخل وسد الباب ورا ببطء وكأنما سد آخر منفذ للهوا

حسيت بي من گعد عالكرسي بجانب الشباك

واني اخلي الملابس بالكنتور بصوت هادئ ومحمل بالندم گال

-تتذكرين من اجينا هنا أول شهر من زواجنا وگلتيلي 

المزرعة هي المكان الوحيد الحبيت نبدي بي اول

حياتنا گتلچ اعتبررري نفسچ بهاليومين

ملكة

ماالتفت الة رديت بلا نفس

- لتحاول تنبش بگبور الذكريات لأن الريحة اللي راح تطلع منها هي ريحة خيبة وخذلان واهااااانة

تقرب مني بقت مسافة بسيطة تفصله عني

مد إيده بتردد راد يخليها على كتفي بس تراجعت

مبتعدة وگال بلهفة 

-والله ما ردت السالفة توصل لهنا

بس أنتِ سديتي كل الأبواب بوجهي اني مو جاي

اخنگچ هنا ولا اسجنچ ليش ماتگولين

اني عاشق ضيع الطريق وجاي يسألچ 

وين أروح حتى أرضيچ 

درت وجهي علي صرنا وجه بوجه

-تريد ترضيني رجعني لبيت أبوية

رجعني للمكان اللي يحترموني بي مو تجرني مثل السبية وتگول أحبچ بطل أساليب التملك أني مو ملك صرف لأحد

ماانسحب بالعكس تقرب خطوة وحاصرني بين

صدرة والميز الوراية صار وجهة بوجهي

لدرجة حسيت بأنفاسة تراجعت خلة عينة

بعيني وضحك

-تدرين حتى وأنتِ عصبية وعيونچ مليانة شرار

تبقين أنعم شي لمسته بحياتي

گالها وغمز  دفعتة من صدرة حتى ابعدة

-الموضوع مينحل بكلمتين حلوات

أني هسة صخرة

اعتبررررررني مااااااااحس بعد ماعصفت بية

ببرودك لتجي هسة تدور مني دفو

رفعت ايدي ابعدة حتى افوت سحب كفي

بسرعة وباسة ببطء وهمس

- حتى الصخر ينحت علي قصص حب

واسماء عاشقين

طلعت من سجن ادي بخفة ايدة فرني الة

وگالها بتوسل

-انطيني نظرة وحدة من مالات قبل

نظرة وحدة تگول بعدني عالاقل غالي عندچ

غمضت عيني رافضة اللي يگولة

-انسسسسى 

سحبت إيدي منه بقوة وكأني انچويت بنار

- لا تتصور سجني بالمزرعة والهدوء راح ينسوني 

-المزرعة مو سجن حسبيها اختبار النة

هنا نبقى لحد ما تصفى الگلوب إذا تريدين نبقى سنة ثانية بعيد عن الناس أني مستعد بس المهم ترجعين 

-رجعني وأثبتلي حبك هناك بالواقع گدام الكل مو هنا بالظلمة

-بالواقع أكو ضجيج يمنعنا نسمع بعض

هنا ماكو غير صوت گلبچ وگلبي 

-گلبك انت اني گلبي حاليا وظيفتة الوحيدة

يضخ دم وبسسسسسسسس 

تركتة ومشيت

-اريد تلفوني وراية دوام

-جدي وابوچ راح ياخذولچ اجازة

-حتى لو اريدة

-أنسي

-ملابس يعنييييييي شنو ابقى

بذني

-لا نزعيهن عادي

-وشلبس بالله

-لتلبسين شي خلينة نشوف نعمة الله

المطشرة

خزرتة وطلعت گعدت بالمطبخ اسمعة

يتصل ويسولف منتبهت دقايق وطلع

قبل ليطبگ الباب گال

-راجعلچ لتخافين

هزيت ايدي ممهتمة بقيت افتر

البيت مقفول رجعت للغرفة تمددت

من الملل وغطيت بالنوم حسيت على صوت

الباب انفتح بعد وقت طويل انفتح بهدوء

اسمع خطواتة الحذرة على ارضية الغرفة

مثل اللي يمشي على حد السيف

گعد على طرف السرير  حسيت بالفراش نزل

مد إيده بتردد أصابعه وبأسلوب ناعم مثل ملمس الحرير بدت أنامله تلمس خصلات شعري المبعثرة على المخدة

حسيت بنفسة مثل نسمة دافية مرت على وجهي لمسته لشعري جانت ناعمة هادئة وزعجتني بنفس الوقت

ردت أفتح عيوني وأگوم تاركتة بس جسمي خانني 

وثبتت بمكاني 

انتقلت أصابعه لجبيني نزلت ببطء لخدودي

بلمسة استكشافية كأنه جاي يقرأ

تعب السنة الفاتت بلمسة إيد وحدة

أحس بدفء أنفاسه صار قريب من وجهي

لمسة إيده على خدي جانت دقيقة تمر على ملامحي وكأنه جاي يرسم وجهي ويعيد تدوين ملامحة 

بس لااااااا مو اني اللي انسى

ولا اني تمر اهانتة الية مرور

الكرام  گلبي يدگ سريع من الموقف ودگات قوية لدرجة خفت يسمعها ويدري إني مو نايمة

تقرب أكثر وطبع بوسة خفيفة مثل رفة الفراشة على طرف جفني وهمس بصوت مرتاح

-شگد مشتاقلچ القرچ

تحركت وحس بية بديت انتبه سحب ايدة

وابتعد ووگف وكح وهو يشغل الاضوية 

حسستة اني فزيت فتحت عيوني وگمت

-شكو

-دنيا مغرب گعدي وتعاي طلعي غراضچ

باوعت جنطة مالتي مال السفر

وجنطة صغيرة وياهة

-هاي عمتي لمت غراضچ

طلع تلفوني من جيبة

-وهذا تلفونچ والشاحنة بالجنطة

الصغيرة

وگفت واختل توازني رجعت واكعة

عالسرير

-الله شبييييج دايخة

-هبوط عادي جنابك سحلتني ليجاي

بلا ريوگ ولا غدة وهسة وقت عشا

اجاني يگومني گمت لوحدي

سحبت الجنطة وفتحتها بيهة ملابسي

والجنطة الصغيرة جنط واحذية ومكياج وعطور

ماما هم تررريد تخلص مني

طلعتلي ملابس بيت وطلعت من

يمة للحمام لبست وطلعت صاح

-تعاي للمطبخ

دخلت المسواگ مالي الميز ملي

وواگف يقطع كبد ويا لية ويخلي

بالماعون

-عزلي المسواگ وياي وسوي زلاطة

بين مااشوي

من الجوع والهبوط ماگلت لا سويت

الگال علي وسويت الزلاطة وگعدت

تعبانة سندت راسي عالميز وهو الحقير

بلا تشيرت يفتر يشوي ويملح هاية ويبهر

ذيچ نص ساعة وخلة گدامي الصحن

تكة لحم والكبد والطماطة والفلفل والبصل المشوي

بلا كلام مديت ايدي وسميت اكل

ياكل وعينة مني سوة لفة جمع بيهة

كل شي خلاهة بيدي

-اكلي هاية ملحتها زايد

اخذتها اكل وگف جاب گلاص صب بي لبن

وقدمة ناحيتي شربت وكملت اكلي

وهو گاعد اكل شي قليل وگفت ضميت الزايد

وگعدت اغسل الصحون

واگف وراية

-ممكن اغسل

-اكو مغسلة بالحمام روح

بلا كلام حاوطني بأيدي يغسلهن

صرت بحضنة 

-مافضت

-لا بعد فد نص ساعة احتاج تعقيم لأدية

طلعت من بين ادي

-كمل تعقيم ومن تخلص صيحني

طلعت شوية وسمعت صوته وهو يحچي

-شنو السالفة وطن شنو اريد اعدمها

بالمزرعة يومين ثلاثة وراجعين

الله كريم تلفونها مفتوح اذا تريد غيد تخابرها

ودعة والتفتلي 

-نطلع برة يم الشط

-لا

-اذا تغيرين رايچ اني موجود

طلعت للمطبخ دخل وراية

وگف يم الطباخ الظاهر جاي يحظر

فحم ارگيلة كملها وطلع

طلعت اني يم الحديقة برة

مي يمر بالساجية وورد حلو

وخضار لازمة التلفون اللي دگ برقم بيبي

-الو بيبي

-ليلة بعد روحي خوما ضوجچ المسودن 

-لا بيبي بس ليش هيچ سوة بابا

-من الملامة يابيبي امچ تلومة تگلة العمر

يمشي واريدها ترسى على بر لو ترجع

لرجلها لو تتطلگ خوما تبقى معلگة

والمستحى من العالم الرايحة رادة عليچ

وانت ماترضين ومن طلعتي بقة يلوم بروحة

گال اسبوووع زمان اذا ماارتاحت اجيبها

وارجعها هنا وانعل ابو الناس وهم

خابر المسودن گالة دمعة وحدة تنزل

لو تخابرني بنصاص الليالي اخذها

واطلگها منك وبساعتها اخليك ترگع

راسك بالحايط

- ولييييش جبرني يابيبي

-جبرچ حتى يسكت امچ يابيبي شفتيها

ضغطها عالي وتبجي تگول هي هالبنية عندي

وماارتاحت بحياتها

-انت بيبي تشوفين صح اسامح وارضى

بعد السمعتة

-گلتيلة حاجتچ هاي العاتية

-ليش راح يهتم خلي مستحق

اللي صار اني زوجتة بعدني واختار يأمن

غيري هاي نهاد ماخلت شخص ماحچت يمة

-من تتعاتبون احچي

-مااعاتب ولا احچي اهانتة الية كافية

بيبي

-انا مااگدر احط ببختي وأگلچ تراضو

بعد ظلت يمچ

-الله كريم حبيبتي والله اشتاقيتلچ من هسة

-انا موجودة اذا شفتي روحچ مامرتاحة وماراضية

ردي حتى لو سلطان وريحانة ماراضين اگسم البيت

ونگعد سوة بنصي

-اني شسوووي لوما انت بحياتي

-خليها ترچية بذنچ بعد الله انا مووووجودة

خوووش ولاتزعلين من گتلچ الشمات هواي

-شلون ازعل منچ ياگلبي انت

-روحي واريد حچاياتچ چيلات يصوبن بالمچان

بس بأدب

-حبيبتي انت

راحت واني دخلت تاركتة برة ضوجة

ونت ماكو اشتركت على خطي 

ثواني اجاني اتصال انهى وبتر كل

قناعاتي بأكمال هالعلاقة

الكلمات تسللت لجوفي مثل سيل

حمم حاااااارة قطعت الباقي

من شراييني المتسمكة بهالحب

العاثر غلقت الاتصال واني احفظ

كل صورة اجتني شكوكي بهالاسبوع

چانت بمحلها بأصابع مرتجفة من اللي

شفتة فتحت

برنامج الخزنة السرية اللي عندي ضميت الصور

داخلها باوعت للصور مال الرسائل اللي وصلتني

من روان واني بتركيا واللي الظاهر

نهاد موصلتلهم الكلام بعد ماانطردت

من بيت جدو وصلت الكلام انتقاماً

مني ومن هاجس رسالتها طويلة باديتها بضحكة

-ههههههههههههههههههههههههه ها دكتورة

شفتي حوووووووبة اليتيم شتسوي

شفتي كرهچ الية والتبلي علية شسوووة

وين وصلچ بقيتي تنبشين وتنبشين وراية

وتاليتة ضاربچ بووووري معدل

همزيييييييين مااخذتة طلع عااااااااطل

هههههههههههههههههه عانس وعاطل

خل اشووووف حياتكم شلونها وانتم

مگابلين الحيااااااطين لا طفل ولا نعاااال

يلة اررررروح اكمل حياتي بسعادة

بعد ماسمعت هالاخباررررر الطازجة

طلعت من الصور على صوت تكتكة خفيفة

عالشباك

زخات مطر خفيفة طلعت راكضة

للحديقة بينما هو رجع راكض للبيت

يغطي ارگيلتة تلاگينا ابتسم ودخل

اشتد المطر ثواني وطلع بيدة

منشفة خلاهة على راسي ودخل

جوة دقايق بالمطر اتأمل رحمة رب

العالمين وعظمتة ويا زخات المطر

وضوة البرق وصوت الرعد

دخلت للمطبخ لگيتة گاعد مجدد

الأرگيلة ويدخن طلعت اجاني صوتة

-نشفي شعرچ لا تتمرضين

دخلت غيرت ملابسي بالكامل لأن الجو

اساساً بارد

ربع ساعة ودخل للغرفة اني اضفر بشعري

گعد عالسرير بصفي بيدة تلفونة شغل قرآن

بصوت هادئ وتمدد گمت اني اخذت من الكنتور

لحاف ومخدة وفراش خفيف وفرشت قريب الشباك

وتمددت بمكاني نص ساعة وبديت اغفى

وحسيت بي يخلي فراش بصفي

ويتغطى وياية تحركت اگوم

لزم ادية رافض يتركني 

-نامي اششششش لتضلين تگمزين

-وخررررررر ايدك

گعدت من الفراش طلعت برة للمطبخ

اجة وراية واگف يحمي الچاي

سوة كوبين خلاهن واحد يمي

واحد يمة اشرلي

-شربي

شربت شوية وهو گاعد هادئ

المطبخ شبه اظلم وضوة خافت يعكس على عيونة

اللي مليانات حيرة وصمت وترقب

اخذ نفساً عميق كأنة يزيح

ركام ثگيل تراكم فوگ صدرة

رشف شوية چاي وبدة يحچي بنبرة هادئة عميقة

- أريدچ تسمعيني واني أعري روحي وافكاري گدامچ لأول مرة بداية هالكابوس ماچانت

مجرد وعكة صحية عابرة

لمن انصابيت بالبداية

چنت أعتقد واتعامل وية الموضوع

كأنة عارض عابر يمكن اشفى منة بجرعة علاج

بس بعد عملية ارجاع مسار الامعاء

وعملية المثانة الطارئة ومع مرور الوقت

بدت تزداد الاعراض وبديت الفحوصات والتحاليل بدت تظهر الحقيقة المرة اللي نهشت رجولتي قبل ما تنهش جسمي

لمن شرحلي الدكتور ببرود اعصاب علمي 

شلون أن الإصابة امتدت وضربت كفاءة الجهاز التناسلي واثرت بشكل مباشر فسلجياً علية

بس ماچان موضوع تأثر قدرتي عالانجاب مطروح

مجرد ضعف جسدي بسيط وتعالج بالعلاجات

والادوية بس خلاني تحت المراقبة 

كل فترة اراجع لحد مارجعت من التحرير

قبل زواجنا ……

قاطعتة

-من چنت تگول اني وية مصعب

مارد لأن يعرف بغلطة وكمل كلامة

-من رحت وگالي متطور الوضع واحتمال تأثر بشكل مباشر وعميق على قدرتي على الإنجاب

حسيت كأن الأرض انخسفت بيه

بهاللحظة الگالة الدكتور مو مجرد تشخيص طبي

چان حكم اعدام على مستقبلنا بوقتها ردت

اگلچ وأفسخ مستقبلچ أهم

-وليش مگلتلي

-ماچنت مخطط حتى اخدعچ

ماچان زواجي منچ مؤامرة لو خطة لو غش

-بس خططت بعدها وأستمريت لحد اخر لحظات

-والله حبيتچ انت الفرحة الوحيدة التي أستحقها

بهذا العالم لمن تقدمت لخطبتچ

وتزوجنا عشت بفصام مررررير

نص مني يصرخ اني أناني ولازم اصارحچ

والنص الثاني هو الأقوى چان يرتعب

من فكرة فقدانچ كل يوم اگول لنفسي

افسخ وخل تشوف مستقبلها وية غيري

وأرجع بعدين اگول لا خل نتزوج

وراح الگة حل اتعالج وتنتهي الأزمة بدون

ماتدري ودون ماانزل من عينها

-وانت عبالك قدرتك الجنسية وعدمها راح تنزلك من عيني

قدرتك عالانجاب راح تنزلك من عيني

للأسف انت متحبني ولا تعرفني لأن لو حابني صدگ جان عرفت عقليتي شنو وتفكيري شنو

-ما اكذب عليچ چنت أركض ورة أمل وسراب

وأحاول حل الموضوع بأي ثمن حتى احافظ

على صورتي گدامچ الرجل الحبيتي بقوتة

ماچنت راح احتمل نظرة شفقة منچ

ومااگدر اشوف بعيونچ خيبة أمل 

-بسسسسس استمرررريت هاجس

استمريت بالكذب

سرك بايعة هنا وهنا حتى للغربة

واني لا

-اعررررررف غلطان غلطااااااااااان بس الخوف يحول الإنسان لمسخ لمن بدت الأيام تمر بعد مااخذتي المانع وتركتي 

وتأخر الحمل  وبدأ الضغط النفسي ينهش بية

تملكني رعب حقيقي

رعب من أنو إذا عرفتي الحقيقة راح تتركيني

وتدورين حياة طبيعية وية غيري

هذا الرعب شل تفكيري شل

-لذلك بكل فرصة چنت تأنبني وتلومني

وتنومني الليل واني ابچي بسبب غلطة

ماتعدى تصحيحها شهر واحد

مسح وجها متوتر

-التوتر والاضطراب والتعب الچنت أعيشة

العصبية المفرطة الچنت احيانا أصبها عليچ

والله مو كره ولا قسوة بس چانت درع

احمي بي سري الضعيف

-وقسووووتك علية هذا تبرررررريرها

- والله من چنت اذب اللوم عليچ

بسبب تأخر الحمل انييييي ادري بالحق ويييين

ادرررري وغلطاااااااان بس چنت انهزم من الحقيقة چنت مااگدر اواجه نفسي حتى بالمراية

- ايييييي تبرير ميشفعلك السوووويتة

بديتها وياية بأنسحابك البارد

جريمتك مكتملة الأركان

-شگوووول چنت أظلمچ حتى احمي كذبتي

اعترف كذبت حتى ابعد الشكوك عني

لأني ضعيف گدام فكرة رحيلچ

- تصررررررفاتك متمارسها بس الأرواح اللي تفتقر لشجاعة المواجهة لو تگول انتهينا بشكل صريح

اشجع من تصرفك هذا وحتى تقيني من ذل الحيرة

واني اتسائل شسويت حتى استحق منك هالتصرفات

اما الهروب من الموااااجهة والتصرفات الهزيلة

هاي خدعة الجبناء اللي يموتون الشعوووور ويخنگو

ويبتعدون ويرجعون كأنهم ماسوو شي

ضرب الطاولة بعد كلامي ومستة كلمة الجبناء

-لييييييش متفهميني هاي اني واگف اليوم گدامچ

مجرد من كل كبرياء

معترف بأني خطأت بحقچ

وبحق نفسي كل هالقسوة مجرد قناع يخفي رعبي من فقدانچ  اترجاچ افهمي عمق الهاوية اللي چنت أتخبط بيها قبل ما تحكمين عليه 

اباوعلة واحاول احلل تصرفاتة اريد اجردها

من محوريتة اللي يحاول يفرضها علية

واخلي گدام حقيقة أنانيتة المفرطة

حتى وهو يعترف بعدة يحچي عن نفسة

باوعتلة بأستفهام ورديت

-الهاووووية چنت تتخبط بووووحدك

لعد واني وين چنت

سكتت لثواني ثبتت نظراتي علي

كملت بصدق يقطررر مرارة

-للأسف حتى بقمة اعترافك وهزيمتك

بعدك أناني

بعدك متشوف غير نفسك

واگف گدامي تگول أني خفت

وأني كذبت وأني تخبطت

رعبي

قناعي

خووووفي

مسمعت منك كلمة وحدة عن الوجع اللي عيشتني بي

مسألت نفسك ليل بيا هاوية چانت عايشة

وهي تلمح نظرات اللوم بعيوووونك وعيون اهلك

مفكرت بيا سچين چنت أنذبح كل شهر واني أحس بنظراتك تتهمني بعقم اني مالي ذنب بي

حاول يمد يده بقلة حيلة

- ليل اني ……

قاطعته بإشارة حاسمة من ايدي

وصوتي يرتجف بقهر مكبوت

-لتبرر چنت تنام ببرود وتدير وجهك عني متعمد

وتخليني آكل بنفسي لحد الموت

چنت تبتر حبل الوصل بيناتنا يومية بتجاهلك

وتخليني بوسط حيرتي

أسأل نفسي شسويت شنو قصرت ويا

وبكل مرة چنت تختار بيها الهروب

چنت تختار تموتني بالبطيء 

بس حتى تحمي غرورك ورجولتك وكذبتك

انحنيت عالميز وبنبرة حادة مثل الشفرة كتلة

- الخوف والوجع مو حجة تخليك تدوس على كرامة وورح الأنسانة اللي تحبك انت ما عشت بهاوية

انت عيشتني اني بيها

وطلعت منها وحدي وهسة كلامك واعترافاتك كلها متأخرة ومتهمني 

- ليل أني چنت بسبب تفكيري عايش بجهنم الوجع اللي چنت أعيشه وأني أشوف نظرة العتب بعيونچ

قاطعتة بضحكة

-ههههههه صح تفكر بية تنهزم مني لليالي ترجع لغرفتك ببيت اهلك

تسافر تروح وتجي حتى السلام متشمرة ناحيتي

بعد ياعتب بعيوني تحچي عنة اما جهنم

فأنت چنت بجهنم اختيارية

أنت رحتلها برجليك وحبست نفسك بيها وسديت الباب

بس أني اني چنت بجهنم اللي فرضتها أنت علية

چنت أصحى نص الليل وأني أسأل نفسي

أني بشنو قصرت

غلطي واعترفت بي

اعتذار واعتذرت عنة

شنو اللي سويته حتى أستاهل هذا الجفا

چنت تخليني أحس إني ناقصة

وأنت تدري بالحق وين بس كبريائك مانعك

تعترف تركتني بلسان الشماتة عماتك

ورووووان وعمتها وغيرهم يتلاقفون موضوعنا

مثل الكرة ويذبحوني بكل مجمع ومحفل

لذلك كل اعذااااارك مهما صغتها مرفووووضة

باوعلي نظراتة غاضبة رافض لكل كلامي

طلعت تاركتة وراية بعد مااشتد صوت المطر

گعدت مجاور الشباك اتابع الزخات اللي تترك

اثرها عالجام وتنزل واني احلل كلامة

هو منكسر معترف بالذنب لكنه متوقع الغفران مني محور حديثه يدور حول دوافعه وخوفه 

كلامة كلة عن نفسة دفاعي يستجدي عطفي ويركز على معاناته الشخصية اللي هي نتيجة ذنبة من الأساس

اما اني فالعكس تماما اني مجروحة بالعمق

واعية تماماً لأنانيته ارفض أن اكون مساحة لتطهير ذنوبه صح چنت هجومية

بس حتى اكشف زيف تبريراتة

دخل بعد دقايق دفع الباب ماشي بسرعة ناحيتي

بسرعة سحب الكرسي لدرجة تمسكت بأكتافة

بسبب القوة

دارني وگعد گبالي يسأل

-يعني هيچ نهيتي الحديث بدون

متسمعيييين

-هذااااااا شوووية من هووووواية

الحچيتة موووو كافي 

گلبي مليان غضب متراكم

ميشبهني اني مو غااااضبة

ولا هااااي شخصيتي بس بسببك

اووووو بسببكم كلكم

هالغضب صار يسكني وهاي النتيجة

المتأخرة لكل شي كتمته هالغضب نتيجة

لكل مرة أجلت بيها عتااااابي وثورة

غضبي سوووواء عليك او على غيررررررك

انييييي اعتذر هالمرة لنفسي ولكل كلمة

انحشرت بحنجرتي ولكل مرة ابتسمت

بيها وعديت الامور واني بداخلي احتررررررگ

-وهسسسة يااااابة اعتبريني غبببببي وجهيني

أنتِ واني انفذ

وگفت عيني بعينة 

-مااااوجهك بس منتظرة تگلي

شييييي واحد مو اعتذار لا

ولا توسل بسسسسس شي واحد

لو تگولة اصدگ بيك بسسسس 

شييييي واحد

-غييييييييير اعرف شنوووو ليل اني

مو فتاح فااااااال ولا كشاف حتى اقرا

عقلچ شترديني اگوووووول 

بعد ذاك الاتصال والصور

چنت منتظرة بس أعتراف

يخليني أامن بي من جديد

بس كلمة وحدي تنهي هالصراع وتگول ان

هو حاسبني حبيبة وشريكة حياة

لكن لا بقى صامت مثل قبر مفتووووح

من شفت اصرارة بعدم الكلام

عرفت ان كل شي انتهى

اليومين البعدها

چانو عبارة عن محاولات لاحتوائي

جسدياً واني گاعدة داخل

المطبخ اتصل بدوامي وزملائي

دخل هو المطبخ بمحاولة للاحتكاك

بية حتى نحچي وگفت تاركتة

بس ماخطيت خطوة خارج المطبخ

الا وايدة ساحبتني و​قبل لا أنطق بحرف

قبل لا أگول كافي تمسك بوجهي

يبوسني چانت بوسة مليانة جوع

وحرمان سنة كاملة ادية تدفع صدرة

وهو متمسك بوجهي لحد الألم 

سحبت نفسي منة غصب لدرجة انشگت

شفافي تاركتة وداخلة للغرفة بسرعة لحگني

حضني قوي چان يحاول بكل طريقة يكسر المسافة البيني وبينه كلما ردت أبتعد خطوة

يمد إيده ويجرني من معصمي بقسوة توجع الإيد 

من شافني رافضة قطعا

مد إيديه الثنين وحاوط اكتافي راد يسحبني الصدره

راد يدفن راسي بوسط حظنه حتى ما أشوف عيونه وحتى يسكت لساني عن العتب

وادية عن الرفض واني ادفعة يبتعد عني عصرني بقوة لحضنة لدرجة حسيت عظامي راح تتداخل وكأنه يحاول يدمجني بي من جديد يرجعني ليل القديمة اللي تحب اي شي منة

بس أني چنت مثل الخشبة اليابسة بين إيدي ما بادلته ولا رخيت اكتافي جمدت بمكاني وأنفاسي تطلع باردة ومثقلة بعدم رضا

حسيت بجبينه من نزل على كتفي

مرتخي وكأنة يطلب راحة

لزم وجهي بأيدي الاثنين ورفع راسي

بقوة اباوع علي عبالة قربة راح يذوب العناد اللي بية جان يهمس يم شفتي بصوت رايح

- بس اسمعي گلبچ ليل

كل قطرة عرق على جبينة كل لفة من إيده

على ظهري جانت محاولة منه حتى يذكرني بهاجس الحبيب

حتى يخليني أضعف گدام حنيني اله چان يعتقد إن الكرامة تذوب بلمسة

وإن الخذلان اللي شفته من أهله ومنة يروح إذا

حاوطني بدفو انفاسة وسجن جسمة

بس هو ما فهم إن روحي من انجرحت

صار حضنه يوجعني بمكان ما يداويني 

وصار تقاربه الجسدي يحسسني بضعفي

ولهذا السبب بكل ما بية من قوة باقية

دفعت صدره بوجع وابتعدت

عن حضنة اللي يحاول يجبرني

علي فز منتفض يصيح بعصبية

-شترررررررررررردين شلوووون نرجع

اذا ماااقترب منچ

-تقترب جسدياً تنام وياااااية قصدك

هيچ تحل المووووووووضوع تعاااال يلة

نااااام وبعدها شوف خاطري انجبر

شووووفني رضيت

-بزززززعت اني واكتفيييييت ليل

حچة بهدوء يحاول يهدي نبرة صوتة

-ميصير سنة كاملة مااكتفيتي 

-لا وباچر نرجع وهاللعبة الطفولية تنتهي

ماامشي بالحبس اني ولا بالأجبار

وگف وياية هز راسة موافق

-تمام بس لأهلچ ماكو رجعة

هزيت راسي ساكتة واني بالي

يرسم نهايااااات هواية نهاية هو يعترف

بيهة ونهاية اني اسامحة بيهة بدون اعتراف

لكن صار العكس هو طلع

من الغرفة واني تمددت اجبر عيني

عالنوم بس مستحيل بحر الافكار

يخليني ارتاح امواج التفكير

تعصف بية وتسحبني بين مد

وجزر الى أن غمضت حسيت علي

يهز كتفي الصبح

-ليل گعدي الجو مغيم خل نوصل

قبل المطر 

گعدت لبست وجهزت اغراضي هو اسمعة برة

يحچي وية الحارس

-الثلاجة والمجمدة بيهن مسواگ اخذة عمي

واقفل ورانة رحمة لموتاك

طلعت سحب جنطتي خلاهة بالسيارة

صعدت بس نعسانة ومالي خلگ

سندت راسي 

باوعتلة وهو يمشي براحة ولازال مستمر

الخذلان يدگ مثل الجررررس القوووي بگلبي

معلن نهاااااية كل مشاعري ولا زال هو 

منتظر ابرد واتراجع على امل أن أرجعلة بقيت افكر

والافكار حطمتني الى أن دخلنا 

المدينة عدلت گعدتي لحد موصل البيت

نزل نزل الجنطة واني أباوع

للبيت معقولة ادخل بعد اللي صار

معقولة اهدر كرامتي واتسمى رجعت

من وحدي ومعقولة هو بعدة مستمر

بخذلانة وكأني غبييية ومستخف بية

وموقن اني راح ارجع بسبب حبي الة

فتح الباب ودخل السيارة

-نزلي

نزلت وهو يدفع بالجنطة يدخلها ويا 

گعدت عالكرسي بالمطبخ

اشرلي للغرفة

-دخلي جوة

باوعتلة وسألتة

-وشعندي داخلة 

-ليل راح نبقى بنفس الدووووووامة

وگفت واني احس بعدم أنتماء لهالبيت

كل شي احسة غريب عني حتى

قطع الاثاث اللي اختاريتها وخليتها بكل زاوية

اباوعلة مكاني بالمطبخ واني الم الگزاز اللي كسرة

وتركني مجروحة

باب الهول وهي يمشي تاركني بلا ميرد

رايح ياخذ روان للنجف

برودة وهو ميتقبل ياكل من ايدي

ولا يشرب بعد مشكلتنا

والاخيرة مكان اللي ضربني بي

باب الغرفة وهو يدفعني حتى

يرجعلي بضربة تزلزل كل حبي الة

باوعت لكل مكان لكل زاوية واني احس كل

اوراق حبي الخضرة الة صابها خريف

وانتفظت واگعة تحت اقدامي سألتة مستفهمة

-اعتذرتلي گدام الكل مثل ماهنتني گدام الكل

گلت انك غلطان اهلك اعترفو

عماتك وسمهن وتجاوزهن سكوتك كلهن ذني صححتهن

صفن بوجهي مستغرب

-واكثر من اعتذاري وتوضيحي شسوي

-تشوف نفسك هيچ  مكتفي

-بررتلچ كل شي وحچيتلچ اللي صار حرف

حرف من خطوبتنا لحد المشكلة شسوي اكثثثثثثر

أركعلچ فهيني لييييل شتردين اعبببببببدچ حتى

تررضيييين سنة ضبببببببط

سنة مافهمت طلبچ

-اني مو عصية عالفهم

سهلة روحي سهلة فهمي سهل

صعبة بس على اللي غالق على

نفسة باب الكبرياء 

-متكبببببر اني

ابتعد عصبي ويرعد افتر حوالين نفسة ورجع 

-انييييييييي المتكبر اني اللي عصيت سنة

يم اهلي ساد اي باب للصلح وتارك بيتي يصفر بي الهوى اني اللي جاي اتوسل بيج هسة

- باااااااوع بعيوني وگلي الشي اللي منتظرتك

تگووووووولة شي واحد بسسسس ينهي

هالمشكلة

​رجع بخطواته سريع علية مدلي وجهة ونزل راسة ناحيتي 

-سسسسسهلة هاااااااااچ

اخذي الراشدي وخلصيييييني

اخذي وارتاحي اخذي ثاااااااارچ

أقسم بالله مافرقتي عن جدتچ بشي

نفس الكبرياء والأنفة وعدم تجاوووووز الماضي

عقليتچ قديييييمة وگلبچ حجررررررر

ابتسمت ووگعت دموعي مانفيت تهمتة الية

بتشبيهي ببيبي بل اعتزيت بيهة

وقلبت المقارنة الراد بيهة أهانتي

لمصدر فخر 

-گلتها فعلاً اني وعذبة وجهين لنفس العمل

بس كل وحدة تحمل وجه واحد مابي ذرة غش وخداع

عذبة متساوم على كرامتها

واني ما ارجع لحِضن واحد رخصني گدام الكل

انت ردتني ليل اللي تسامح وتتغاضى وتنسى

وصدمتك هاية كلها لأن قررت استرجع حق

كرامتي المهدورة 

-كرررررررامتچ كررررررامتچ كررررررررررامتچ

سنننننننننة زمان واحنة ندووووور بمحور كامل

كرامتچ كااااااافي تخطي كااااافي

ياااااااابة هاي راسچ أبوووووووووووسة

هذا راسچ ابوووووسة مرة ثانية

هاي هييييييييييي الاف البنات تتعارك وتنضرب

وتنشتم ماطلعت زلة مني ماااااااطلعت كافي

كاااااافي اترجاچ 

نفس غريب مرتاح صدر من عندي

مريحيني مخليني موقنة ان اني سويت

العلية وزيادة

وگفت لازمة جنطتي ساحبتها

وهو گدامي

-ويييييييين ليل 

-اني مو وحدة من الالاف اللي ينهانون

ويسكتون

اني الرقم الشاذ من هالحسبة

احسبني اختلف تعرف شنو اللي چان يعنيني

اكثر من سرك اللي خفيييتة

تجاوزك علية وضربك اهانتك الية

وسكووووتك عن كلام عمتك

ووووعن هووووواية اشيييياء

-يعنييييييي اعقليييييها مرة

چبيرة اجيبها تبوووووس حذائچ

شسوووووي قاطعتها وانحرمت من الدخلة

هنا يعني مراااااااح تشوفيها بببببس كاااافي

ليل كافي عتب

#النهااااااااااااااااااايه

بسمِ اللهِ الرحمنِ الرحيمِ

✥━━━༺✦༻━━━✥

#ذاري_النجوم

#الجزء_الثاني_والثلاثون_القسم٢

:

:

:

:

:

:

واجت لحظة الرسالة فتحت الجهاز خليتة

بيدة يقرة رسالة روان وجهة بي وميتغير

وملامحة تغيم اكثر سحبت تلفوني

- عمتك ماابتعدت ولا راح تبتعد

وداااايرة بسرك تحچي وتفشي هنا

وهناااااك واني اعتذر عن هيچ

حياة احسب كل شي منتهي

تعنتك بآرائك وغلطك يمنعني

ان استمر وياك ولو لحظة

مشيت خطوات سحب الجنطة موگعها

-اتصل بأبوچ هو يتولى الأمر لأن تعبت

اقسم بذات الله تعبت

سحبت التليفون من ايدة غلقت الاتصال

ابتسامة لاحت على ملامحة عبالة تراجعت

اتصلت ببابا من تلفوني وهو مصدوم فتحت

سبيكر رد صوتة مرتجف

-زعلانة يابابا مانايم هالأيام

لأن رحتي وخاطرچ مكسوووور

-بابا تستقبلني بالبيت لو اروح لضرغام

-احطچ بنص روحي يابابا هاي هي

التردينة يصير

غلقت الأتصال وهو واگف ايدة ممسيطر

عليها من العصبية اتصل ببابا رد علي

-ها عمي قابل بكلامها

-مادام گعدتو وحچيتو ومقتنعت اذا

هي مقررة جبرتها تروح وياك وتتفاهمون

وواضح ماتفاهمتو جبت عمري وياهم

ثلاثتهم مايوم جبرتهم على شي

-يعني امررررها بيدها محد يشكمها

-حشاهة من الشكم واي امرها بيدها

بنت شابة عاقلة واعية ناضجة قراراتها

بيدها وموضوعها وحلة بيدها

-يعني ترجعلك

-بيتي وگلبي مفتوحلها

-انتهى

-في امان الله

سد بابا التلفون وهو باوعلي 

-سويت العلية وزيااااااااادة

-صح سويت العليك گدام الناس

بس اليييية كل شي مسويت

مشيت خطوات طالعة مشة بسرعة

وگف گدامي حاير شيسوي معتقد ان يمكن حل

الموضوع بالعواطف لزم كفوف ايدي حاظنهم

-ليل بعدة باب الصلح مفتوح

لا تغلقين الموضوع لهنا ليييييش من

اول مشكلة نبتعددددددد

باوعتلة واني أتراجع خطوة سندت نفسي

عالباب مال الهول

-يمكن يمك هاي أول مشكلة بحساباتك انت

ويمكن تشوفها ازمة وتعدي

بس إنت ما تدري بالمشاكل اللي تراكمت بروحي

طبقة فوگ طبقة لحد ما خنگتني إنت تشوف السطح وأنا أغرگ بالعمق 

بديتها وياية من أول الخطوبة وأني مصلوبة بالليل

على دكة الاحتياط

باقية أنتظر تكمل اتصالك الليلي بروان

من ذاك الوكت وأني أعدي وأگول انچبي 

ورجعتلي بضربة أقوى 

من تركتني ببدلة عرسي تركتني ذليلة

گدام اخوك و مكسورة الخاطر وطلعت راكض إلها ركضت وراها وتركت وراك إنسانة انذبح كبريائها بأقدس ليلة بعمرها

وحتى هنا بهاي الصالة اللي شهدت على موتي البطيء اكثر من مرة واني اطلع من غرفتي اللي يلفها

البرد بسبب تصرفاتك وملامتك الية

على شي هو ذنبك انتتتتتتتت

ولا من طلعت واني أصيح وراك

وإنت تمشي ومترد عليه

تضرب بحزني ومشاعري عرض الحايط

تروح وما يهمك شي المهم عندك تغيضني بروان تحرگ دمي وتأخذها وياك للنجف لمدينة أمير المؤمنين بس حتى تجرح شعوري وتدوس على كرامتي بمكان المفروض إله حرمته وقداسته

ولا انسى ذيج الغصة اللي عشتها بالمؤتمر

من تركتني وحدي بين الغربة

عفتني انتقاماً لسبب تافه شي ما يسوى

بس إنت ردت تكسرني

وتوريني حجمي الصغير بمراية قسوتك

وأعظمهن واكبرهن الكسرة اللي خلتني أشوف الدنيا سودة بعيني

ضربك إليه وسحلك إلي بلا حجاب وشعري بإيدك

گدام  إخوانك 

گدام الكل انهانيت

وكذبك علية والتفافك حوالية وسرك للكل ماعداي

السند والأمان اللي المفروض ألگاه 

بيك صار بالعكس سوط يجلدني

تبهذلت وانهانت كرامتي ببيتك

واني حتى لو أحبك 

فآني مأأمن بيك بعد

والحب بلا أمان مثل بيت مهدوم سگفه 

واني مامستعدة اعيش عمري مكشوفة

بلا سگف

-ماتغفريييييييين اببببببببببببد متخلين

احترام حتى لو للعشرة

فاض الحزن بروحي وبچيت بهدوء وگعت 

دموعي واني ارد

-لآخر لحظات اني منتظرررة

كلامك اللي يخليني ارجع اثق

بيك منتظرة شي واحد يخليني ارتااااح

بعد تعببببب سنة من الخذلااااان

-لفچ ودورانچ تردين اعتذار عن الشي

صارررررلي ماغلطت وياچ بي شيييي

خاص بيييية هذا

-مرضك وعملياااااااااتك وسفراتك العلاجية

بدوووون علمي تخصصصصصك لازلت

-لتگووووووووووووولين مرض مسألة

وتعالجت كاااااافي لوم ياااابة اسف لأن انهاريت

وضربتچ واسف خاف تجاوزت واسف بدال اهلي

مناااااا لألف سنة هااااااي هذا الاعتذار بسسسس

كافي ليل كافي رجعي

باوعتلة مراح نگدر نستمر

ردت افتح تلفوني ايدي داست الجهاز

انفتح طلعت الصور حتى اعرض علي

فيلم الكذب المتكامل مالتة بسسسس

شي عصر گلبي وعصف بداخلي

منعني غلقت الجهاز ذبيت نفس

ويا شهگتي وطلعت تاركتة

سحبت الجنطة طالعة وصوتة المرتجف وهو يتصل بوطن يدور سند يمنعني من المشي

لحظات واجاني وطن يركض من باب البيت الچبير ملامحه المخطوفة جانت تقرأ كل شي

سلم علية بصوت ناصي شال جنطتي وحطها بسيارته

چان يريد يسرع حتى يخلصني من هالموقف

أو يمكن حتى ما يشوف انهياري الواضح بذيچ اللحظة الكلام اللي محبوس داخل گلبي

تناثر مثل ذرات رماد بريح عالي تختفي بلا ماتنحس

​جنت أمشي وخطواتي لسيارة وطن ثابتة

وأني أعرف باليقين القاطع

اليقين اللي ما تقبله الشكوك

إنه كذب علية للمرة الثانية

چان يمثل ويتوسل ويسد بيبان ويفتح بيبان

كله بانتظار أن يلگه حل

حل يفصله على قياسه

حل يشبه أنانيته اللي مانعتة يشوف اي شي

غير مصلحتة سكتت لأن السكوت أحياناً يكون أبلغ

من الكلام 

طول الطريق گلبي احس بي رجفة قووووية

عصرتني لدرجة الصراخ

-لييييييل شبيچ

-گلبيييييييي وطن گلبببببببببببي 

انهاررريت بعد هالكلمة بنفس غير

منتظم واني اشكي الم قوي بجهة گلبي

اليسار سرعة وطن للطوارئ واتصالة بأهلي

وأهلة بعد ما اطمأن الدكتور اني مريت بنوبة

هلع اعراضها تشبه الجلطة

اجتمعو اهلي واهلة وهو

جدو وبيبي وماما وبابا وحتى ضرغام اللي ترك

دوامة راكض الي كلامهم برة وعصبية

ضرغام اللي صوتها مثل نغمات تدفي

گلبي وهو يسأل مستفهم سبب وعكتي الصحية

طلع الكل وبابا گعد يمي

حاضن راسي وصوتة الدافي يردد معتذر

-غلطت من جبرتچ اني ادري

باس جبيني ويا دخول عمو كمال وجدو

اشرلهم بابا بس سلمو بعد توصية الدكتور

زميلي بأن ارتاح ومااتعرض لأي ضغط

اما هو حاول يدخل بس الكل منعة

وصوت ضرغام بيقين قاطع گلة

-الصار كااااافي

ورجعت للبيت بگلب مكسور ودمعة

ماجفت على اطراف أهدابي طلعت من حظن

الخذلان لحظن الأمان الأول

الأهل همة جدران الطمأنينة اللي ماتهزها عواصف

ووتد قوي يربطچ بكرامتچ بوقت الشدة

:

:

:

:

:

:

:

:

:

١٢/١٢/٢٠١٩

يوم غريب مغيم بسواد

وجو بارد بثقل ورطوبة

مكتب هادئ بجدران باردة 

وطن ومصعب گبالي وهاجس بينهم

اني وبابا وضرغام عالجهة المقابلة

الهم والشيخ يتوسط هالگعدة يحچي

بكلام بلاغي بحرمة الطلاق

-فكرو ابني بعدكم بمقتبل العمر

وزواجكم قصير وتصير

اشكالات واختلافات بالآراء ببداية

العمر تگدرون تتجاوزوها بالنقاش

ماگدر يرد هو باوعلي الشيخ

-وانت بابا

نزلت راسي ورد ضرغام

-ربي يوفقك شيخنا كمل

وبدأ الشيخ يتلو آيات

بكرهة الطلاق وبغضة

بس بعد ماشاف ردي بالرفض

بدة يحچي الصيغة حتى

يگولها هاجس نظراتة چانت تتوزع

بمحاولة لأستمالة أي واحد منة

حتى ننهي الموقف لكن هيهات

كل ماترتفع نظراتة تلتقي بنظراتي

يبعدها مااعرف خجلا او يتحاشى

يلتقي بعيوني بعد اللي صار 

وارتجف صوتة بقلقلة تراجع

وعدم تصديق وهو يلفظ الصيغة

اللي بنهاياتها گالها بوجع

-إنتِ طالق

وگف بعد التوقيع والبصمات

وجدو اللي رفض يدخل بقة بالسيارة

نزل اول ماشافني طلعت

چان تعبان وواضح علي التعب

هز راسة وهو يتقربلي

-خسارة ياجدي

خساااارتة هووووووو

باس راسي يعتذر من بابا وضرغام

اللي سندة مرجعة للسيارة

بابا انتظرة يطلع حتى يطلب

منة ننهي طلاق المحكمة بهاليومين

صعدو ورجعنا للبيت رغم الصار

هو اللي ردتة بس گلبي الحزين

خفق علي وهو يداري انكسارة

عني

حاوطني الكل بدفو ماما بابا ضرغام

وفارس وبيبي والكل حوالية غيد

بأتصالها وبنات خالاتي كلهم ودعمهم

الية

بعد مانام الكل عيني مااخذت نوم

واني افتح الصور مستذكرة اتصال غيد

الية بالمزرعة واني اسألها سؤال

قبل فترة غاب بيها نوح عن الدوام

ماخذ اجازة بحجة السفر 

ماااعرف ليش اجتاحني شعور

غريب رغم چانت محاولات هاجس

مكثفة لأستمالتي حتى ارجع

بس بذات الاسبوع اختفى

وصار بس يدز رسائل واغاني

وعزف داخل گلبي لحن خذلان جديد

واحساسي وجهني للاتصال والسؤال

بغيد اول مارفعت الخط

-ها ليلة

-ام ليوووونة الحب شلونچ

-بنص الخيييير وية بنتچ انت مو گلتي

اتبناهة لچ تهمش بفدعوس ويتعاركن

عبالك اخوات

-لچ  لتخرمشها 

-ياتخرمشها ليان عضتها من اذنها وطن

من كل عقلة زعلان على ليان

-فدوووة هو وطن طفل

جريت نفس استفسر

-غيد بروح خالة سؤال

-گولي حبيبتي

-هاجس موجود بالبيت لو لا

-لا هو ونوح راحو لبغداد

-الله عليچ من يرجعون

بلغيني

-تمام

غلقت الاتصال بوقتها وهالحچي

قبل ليجيبني للمزرعة بأيام

ورجعو واتصلت گالت

هاجس ببيتكم مارجع ببيتنا

وانغلق هالموضوع رغم كلتلها

فتشيلي الغرفة عن اوراق

عن فحوصات اكو نقطة شك بداخلي

اريد انفيها واشوف 

الى أن اتصلت بية البارحة 

صوتها متغير

-هاحبيبتي

-ليل تسمعيني اني مراح اگلچ

لتدخليني بالموضوع ولا اگلچ

اخاف يعرفون اني الحچيت

بلعت ريقي بتعب وسألتها

-شنو

-ماعندي اي خوف بس مااريد

اوگع من عين وطن اريدچ انت

تسألين هاجس تسألي سؤال

وهو يرد عليچ ويگلچ الصار

واذا مارد فهاي الحقيقة دزيتها الچ

بالصور مااكذب عليچ لگيتهم

بغرفتكم بجانب ادويتة وعلاجاتة

مثل ماچنتي تظنين تماماً

ودعتها وگعدت اقرأ آخر سطور

بقصة الخيبة والكذب من الانسان اللي

اختاريتة

تقرير عملية جديد كامل بي كل الاجوبة

اللي احتاجها

-​ تعرضت **** لإصابة بالغة ادت بها

للتليفات وثم الضمور الكامل انعدم فيها انتاج

النطف لكن فعالية المريض جنسياً

لازالت كما هي لم تتأثر بينما تستمر البروستاتا والحويصلات المنوية بعملها بشكل طبيعي جداً

السائل عند ***  يبدو طبيعياً تماماً من حيث الشكل واللون والكمية

لكنه في الحقيقة سائل فارغ يخلو تماماً من الحيوانات المنوية والمريض وصل لمرحلة

​​اللانطفية الغير انسدادية

​الانسداد غير موجود والممرات سالكة

لكن المعمل داخل * تليف بسبب الصدمة وانقطاع الدم وقت الاصابة رغم التدخلات العلاجية والجراحية وبعد ​الفحص المجهري الدقيق للبحث عن أي بؤرة مجهرية صغيرة قد تكون نجت داخل  وما زالت تصنع نطفا لكن تبين تليف ال* بالكامل بذلك شخصت الحالة عقم تصفير دائم …………

وتذكرت مواجهتنا واني اطلع صور

صور تقاريرة الأخيرة اللي باخر ثانية

منعت نفسي ان اواجهة بيهة

گلبي اللي حبة ماراد يشوف انكسار

نظراتة حتى لو كذب علية

مشاعر الحب اللي بگلبي الة

منعتني اجرح كبريائة رغم حزني العميق

واني اعرف هو كذب علية للمرة الثانية

بانتظار أن يلگة حل لموضوع محسوم

رغم أنانيتة  

وقارنت بين حبي الة وحبة الي

حبة الي تحدي دائم كأنة بصراع

حبي الة هادئ دافي محتوي دائما

لذلك التضاد بينة خلانة ننفجر بخلافات

بلا رجعة اختنگت وخوفاً من نوبة هلع

جديدة اتجهت لغرفة بيبي بگعدتها الحلوة

وهي تسبح اشرتلي على رجلها 

-هنا تعاي

تمددت وهي تلف اديها الدافية

حوالية

-ابچي ليلة حتى ماتطيحين مثل ذيچ

الطيحة الدموع يابيبي مطر تغسل الگلب

طلعت حسرة من نص گلبي

ماسيطرت بعدها على دموعي

وصوتي الخافت واستني

بيبي بساعتها مواساة صامتة وهي

تنحني علية تسند راسها على

راسي لدقايق طويلة گعدت تمسح

على راسي

-تحبينة ليلة

-بيبي رجعت مهززززومة من هالزواجة

اني خسرت نفسي وهو الرابح رغم

خسارتة الظاهرية

-طيح الله حظة شربح شو انهان

وترزل من جدة ومن ابوچ وخالچ

علي وحتى جعفر رجل سهامة گالولة

انت الخسران

-خسر خسارة ظاهرية بس معنوياً اني

خسرت بيبي لييييييييش أحبة

والله اريد اكرها بس ماااگدر

اكررررره افعالة

اكره السووووا ومممسامحتة ابببببد

ابببببد بس گلبي ليش باقي بي نبضة

بأسمة

-يا بيبي چا الحب ليش سمو الوجد

چيف اليحب للموت يفكر بمحبوبة

ويضل حزين حتى لو محبوبة چلب مثل هويجس

ضحكت وهي تمسح بدموعي

وتحچي بشكل جدي

-انشدچ نشد

-گولي بيبي

-چنتي تگدري تضلين ويا

-وبساعتها اخسر كرامتي وبعينة ابقى

الغبية اللي رغم مرتيييين خان ثقتي وضحك علية

وضربني وهاني رجعتلة وراح تتكرر هالافعال وراح

يظني سهل التلاعب بية ويبقى

يدوس ويدوس بكرامتي

بسبب اني سامحت بالمرتين

-ياهووو الأحسن الكرامة لو الحب

-الكرامة داااااائما بيبي الكراااااامة هي

الابقى الذل يعني الموت على قيد الحياة

استمرت بيبي تحچي وياية

كلام عن الصبر والخسارات

الى أن نمت بحضنها هادئة

بس متعبة وكل ذرة بكياني

مجهدة

بعد ايام اني وبابا بالمحكمة

وهو وابو گاعدين هادئين

وكأن المحكمة فارغة بس احنة

بيهة حتى صوت انفاسة اللي

ينفثها واصلني بعد ساعة انتظار

اجة دورنا والحب العاصف انتهى

بمعاملات روتينية

وبصمة وتوقيع ينهي كل شي

بابا وعمو كمال سلمو على بعض

وهو باس راس بابا وابتعد مسرع

كأنة هارب من ان تلتقي عيني بعينة

وطلعت من المحكمة بنفس ثقيل

ونوبة موت مصغر طلعت 

وأني تاركة وراي رجل أحبه

بس فقدت ايماني بي واحترامي الة

وهذي أصعب نوبة موت ممكن تعيشها امرأة بـحياتها

:

:

:

:

:

:

:

:

٢٠٢٤

أغاني طفولية وهو واگف بشعرة الكيرلي

الحلو وية الاغنية يگمز

-بيبي شارك توتوووو بيبي شارك

يأشر على نفسة ويرجع بأسنانة الناعمة

يگزكز يأشر علية

-مامي شارك تتوووتووو  مامي شارك

اندار يدور على أبو ماشافة بچة بصوت

عالي ثواني وطلعلة من باب الهول جاي

من برة بيدة

لعبة شارك عملاقة چان جايبها

هدية عيد ميلادة

ركض بخطوات متعثرة يصيح بصوتة

الناعم الطفولي

-داااااادي شارك

شمر نفسة بحضنة وهو يتلمس اللعبة

ويبوسة من خدة باوعلي وضحك

-ابنچ ملعون طالع علييييچ نسخة

من تردين شيييي تمطين بأسمي مط

ترك آدم يلعب واجاني واني بارمة شعري

ملفلف بيرمن ناعم

-اندوووومي وام اندومي

نگر راسي ضاحك وكفش شعري باس خدي

وركض للحمام

-ملابسي حبيبتي

-تتدلل

رحت اطلع ملابسة من الخانة طلعتلة

تراك ورحت بباب الحمام

-تعاي ليفي ظهري

-مو زوج اني واتقشمر

-افيدچ شبيييييچ

-لك ابنك هنااااااا لا تصير واطي

ضحك عالكلمة وهو يخلي ملابسة اللي

نزعها بيدي وغمزلي ويسد الباب ويگول

-تلگين المطلوووووب بجيب

البنطرون

ماصدگت فتحت الجيب وطلعت البطاقات

من فرحتي وگعت دموعي خليت الملابس

عالكرسي منتظرتة يطلع

بس انفتح الباب شمرت نفسي بحضنة

باسني

-تطلبين شي وأتأخر شبية تخبلت

بس شنووووو فيديني وافيدچ

رفعت راسي العبلة حواجبي

-البرياني التحبة وويا بيض

عقچت وجهي وهو ضحك

-ذوووق ماعندچ هاي طرررريقة البغاااادة

القدمااااء بيض مسلوگ ومگلى ويا البرياني

بس هم متفييييد گتلچ فيديني وافيدچ

-انسسسسى وراي سهرة وية

اندومي شبع نوم الظهرررر

-اطيح حظة وحظ ابوووووو

وعلي اسحلچ واخابر عمتي اشكيچ

ضحكت اسكتة 

-كااااافي لتفضحنا

-العبببببببب ثبت عييييييييييييد

واني بحضنة سمعت صوت اندومي

يصيح جدوووووو

-جدوووووو اجة وووووخر 

گلتها حتى انهزم وگفني يحضني

-ياااااااااابة طب احنة هنا

جاي نسوي رذيلة

ارتفع صوت جدو وهو داخل

واني ضامة وجهي بكفي خجل من الموقف

وصلي سحبني من تحت جنحة وحاوطني

بذراعة

-طايح الحظ وجها صار احمر

رفعت راسي الة الرجل الوسيم رغم

العمر ضربني كلة خفيفة

-شلونچ حبيبتي

- عيوووني انت اعذرررني يومين ماشايفتك

والله ركضة الدوام يادووووب ارجع لأندومي

وللبيت

-معذوووورة بس اجيتكم اخذكم

كلنا طالعين وعازمكم عالعشا بما ان رجلچ

بخيل والله مطيح حظة

-اييييييي غير اشتغل واجمع حتى مايسموني

جوز الست

-شفت هاي سوالفة اني حاچية

-خل يولي هو من يوم يومة جحا وفلس مايصرف

هسة ترقيت بعد

شبييييك تضم بهالفلوس جوة الكاشية

وترد ليورة

ضحكت واني اغيضة

-ابببببد ميصرف ميبسها علينا بالسنة مرررة

يطلعنا

مدلي ايدة

-جيبي البطاقات بت الحباب خل اشوف

شلون ترحين لتركيا تشوفين فارس ابو راس

المستطيل

بسرعة تغيرت الموجة وصرت الزوجة المطيعة

-لااااااا ااااسفة هووووو احسن واحد بولدك

خلوق مؤدب كرررريم صراف

يقطررررر كرم وشهااااامة

هز ايدة على جنونة واشرلي وهو يبتعد ماخذ ادم وطالع

-جيبولة ملابس وتعالو حتى نطلع سوة

لا تتأخرون

بس طلعو باوعتلة

-ابووووو فليس

گلتها وانهزمت ناسية هو

العداء الاول بالمسابقات على جامعتة بأيام دراستة

وتدريبة ولياقتة المستمرة بعدني مواصلة الباب لزمني

كافشني من شعري

-من ابوي هنا تصيرين خوش

مرررررة ومن يطلع تصيرين ذبانة

مجعوصة بمضرب

-افاااااا ام ادم اني

-والنعممممممم

فتح الباب ودفعني للغرفة

-هاااااا شكوووو

-البيت فااااارغ

-ويعنيييييي

-آدم موووووو هنا

-وشنووووو

فهمت نظراتة وعرفت سوالفة

-انسسسسى ورانة طلعة

ولا انطاني مجال حضني وباسني

ثواني وخلة عينة بعيني

وطرح سؤالة مثل كل مرة

وارد علي نفس الرد بقناعة

-ليل تحبيني

-اكثر من الحب

-شنووووو

-رحمة وسكينة

بست خدة واني ابتعد اجهزلة ملابسة

لبس الملابس اللي طلعتها واني لبست

اباوعلة يمشط رحتلة عدلت شعرة

وارشلة عطر كملت وهو مبتسم 

-الله يخليك الية وتدللني

اكثر واكثر

طلع محفظتة وسحب منها بطاقة باوعتلة

فاتحة عيني

-تجيييييي ويانة

-ماردت افوتها اني وياج بيخت عالبسيفور

ونقلد حركة جاك وروز

حضني من اكتافي طالعين واني

لازلت مصدومة

-دبرت الاجازة وجاي وياكم شلون افوت

اول سفرة لأندومي ونسوووي شهر

عسل جددددددديد واطيح حظچ

واطلع العنفصة الطلعتيهة علية بوقتها

من خشمچ

-واهون عليك

كفخني وهو يرد ويسحبني طالعين

واني اضحك

-تهونين ونصصص

طلعنا غالقين الابواب تمشينا بعد شارع

الهم دخلت استقبلونا اندومي بيدهم

بدلتة وطلعتة كاشخ الهم 

-يلة هااااااك سوق انت اخوانك

هناك نلگاهم

طلعنا ادم بحضن جدة واني وخالة

ليورة وصلنا المطعم وتفاجئنا بتجهيز صغير

لعيد ميلاد ادم اللي المفروض بعد يومين

بوجود اعمامة والاطفال احلى لمة وعيد

ميلاد رجعنا بعدها بوقت متأخر آدم

نايم خليتة بسريرة بغرفتة اللي مفتوحة

على غرفتنا وگعدت ارتب بالبيت

هو گاعد يتصفح نايم عالقنفة

اشرلي عبالي يريد شي

وگعني بحضنة متمددين

وجهي بوجهة

-اذا ماعجبچ العيد ميلاد نسوي واحد

ثاني

-صدگ تحچي كافي تفكير جدة بي

وتجهيزة حبيبي رايح متعني متفق 

ويا المطعم فدووووة لگلبة

-انت قنوعة لو تحولتي ام فليس مثلي

-الأمور المعنوية تهمني اكثر من المادية

-الورقتين الاخذتيهن للمسواگ جيبيهن

وانطيچ بوسة كدفعة معنوية

بستة وگمت

-هاك البوسة والورقتين بالجييييب انساااااهن

مدلي ايدة سحبتة راجعين للغرفة متمددة

بحضنة وطبعة مثل طبع ابنة يبقى يمسد بيدي

يلة ينام

غط بالنوم وطلعت متسللة للهول افصل

شوية عن البيت وفوضى آدم طول اليوم

مشغلة فيلم مصري وكالعادة ماكو غيييرة

الحببببيب احمد زكي واتابع

عيني بلا ارادة مني صارت بصورتنا الجماعية

من ولدت آدم وهو محاوط اكتافي واني

شايلة ادم طالعين من المستشفى اخذتلنا

غيد الصورة ومن جمالها كبرتها واطرتها علگتها

انسحبت من هالصورة للتاريخ قبلها

بعد انفصالي

الرسمي من هاجس 

ومحاولتي أن أعيش من جديد 

رجعت للماضي بذكريات محاوطتني

رغم النسيان 

:

:

:

:

:

:

أيام متعبة مريرة احاول بيهة أستجمع

قووووواي حتى اكمل نقلي فبعد اللي

صار يستحيل ابقى بمكان واحد وية اي

شخص منهم صار لقائي بنوح

داخل المستشفى بوقتها محد يعرف

اني ايقنت قبل الانفصال ان هاجس

موضوع الاطفال يمة منتهي فحاول

نوح يلطف الجو من التقينة بعد فترة

طويلة صرنا وجه بوجه داخل ممرات الأدارة

باوعلي مبتسم

-شلونچ ليل

-الحمد لله

-شنو هالاوراق جاية للأدارة

-اوراق نقلي

باوعلي مستغرب اشرلي صرنا على

جهة حتى الناس تفوت

-ليش نقل ليل مكانچ هذا

باوعتلة بغصة داريت بيهة دموعي

-اريد ابتعد وماااريد صدفة تجمعني

بأي شخص بيكم

اشر على نفسة ووجهة تغير

-آني ليل

-أنت بالذات

هز راسة مو مستوعب اكره نفسي

من توگع دموعي ومااسيطر على صوتي

احتار شيسوي اشرلي

-بس على كيفچ والله اعتذرت وراح ابقى

اعتذرررر وادري غلطان

-وأستمريت بالغلط

-اني تجاوزت بحقچ الله عليچ مو انطيتچ

مساحة حتى بزعلچ مني تعاملت ويا الموضوع

بهداوة لأن اعرف جرحتچ وانت مخليتني بمكانة

أخوانچ

-فعلاً بس اكتشفت ان ماكو اخوة غير اخوة

الدم

-وسفة هاي علية ليل

-اي والله وسفة نوح بعملية هاجس الثانية

ماحسبت حسابي ولو منوهني وگايل

حتى تنطوني

حق الاختيار بأن ابقى او لا استمريت بوجهين

وانت تعرف ان موضوع الاطفال مخصوم ومنتهي

توتر ماگدر يرد وجهة تعرق خجل

ورد يقسم

-اقسم بالله وداعة اولادي

حلفني بروح امي وگال اني ابلغها

-وبلغني شتشوف انت

-مابلغچ

-هاياك تعرف وماانطيتني حق الاخوة

مثل متگول وبلغتني

-يحبچ

-بس يحب كبرياءة وغرورة واعتدادة

بنفسة أكثر

-وانت تحبي

-اكيد بس كرامتي بعد السوا أهم

ارجو ان تگلة هالمرة اني عرفت

تركتة ووگفت ردت امشي

وگفني

-عندة امل ترجعون

-هالامل لأن عبالة مااعرف بالحقيقة

بس گلة عرفت والامل خل يذرة وية

الريييييح مثل ماذر حبي الة

طلعت للأدارة اوقع اخر اوراق نقلي

تاركة وراية ذكريات سنوات بهالمكان

اصدقاء صديقات حالات عرفت اعالجها

وحالات رحمة ربنا غشتها اطفال وكبار

عرفتهم بيوم طلعت من الباب للسيارة

ودگ تلفوني بأسمة

-الو ليلة

ابتسمت فجهة ماما كلهم يسموني

هيچ على دلع بيبي الية

-هلو عادل شلونك

-الحمد لله بشري شسويتي

-مثل ماگلت بس شوفتة التوصية للمدير

وقع ويدز سلامة لدكتور سلام

-عشتي من ترحين للمستشفى تلگين

دكتور سلام بس سألي عنة اني وصيتة گتلة هاي

قريبتي دكتورة اطفال بس غبية شوية

عينكم منها خاف تخلي الكانولا بخشم الطفل

ضحكت من گلبي وهو يودعني

-يلة سبعة توكلي الموضوع منتهي وكامل

بس باشري

-شكرا والله تعبتكم انت وخالو

-اختي انت يلة في امان الله

سديت التلفون راجعة للبيت

لگيت بيبي بيدها تلفونها تحچي

وية خالو

-ولك عليوووي اگلك تاني شبيييييك ذيلك

محترگ يمممممي الشغلة لاتضل تحوس

معلييييك بي اكتله

بعصاتي يلة روح

ودعتة وصاحتلي

-الوجه منور اليوم

رفعتلها ورق النقل ابتسمت

-ها انفكيتي

-الحمد لله كملت الاسبوع الجاي

اباشر هناك 

-روحي فرحي امچ

ركضتلها بالمطبخ تگلي كبة وتدندن بأغاني

فيروز

-الحبيبة شلوووونها

-هلااااااا بشري

-تمتتتتتتتتت

-مو كتلچ هذا بلسانة نص العراق يعرفة

-ماقصرو والله هو وخالو

-اكلي حبيبتي سويتلچ كبة بلا كشمش مو ردتي

-ريييييحانة يمتى تبطلين تعامليني

معاملة اطفال

-لمن يصير عمرچ ميييية

وتوالت الأيام بعدها وصار دوامي

بعز الازمة بفترة كورونا خوف ورعب

واني اسوي غرفة بيبي مثل

المستشفى المصغر تعقيم وبخاخات رطوبة

الكل يتعامل وياهة وميتقرب منها الا بعد

ميتعقم وبكمامة 

صارت سهراتنا اني وياهة برة بالحديقة متباعدين

وهي تضحك

-خايبة اليجيبة الله هلا بي شبيچ

-اخاف عليچ حبيبتي المرض

فتاك بيبي

-ياييييمة اريد الله يحميكم انتم الاطباء

والممرضين عبنكم واگفين وگفة بنص الموت

-ياااارب يابيبي تعدي هالازمة على

خيييير وتنتهي وترجع الحياة لمجراهة

الطبيعي

ومرت الأيام سنة ٢٠٢٠ عبارة عن موجات

جنونية من الجثث والموتى بسبب الفايروس

اللي فتك بالعالم حاصد أرواح

اصدقاء وأحبة 

رغم اللي صار بقة جدو على اتصال بية

وكل فترة اتصل اطمأن علي لأن صحتة

مو مثل قبل واسأل غيد عن البقية

الا هاجس هي تعرف اني مااريد اخبارة

واني هم مااسألها وبنهاية هالسنة اجانة

خبر مرض جدو وحسب كلامها تخربط

والكل عبالة فايروس لكن اتضح

بعدها فشل كلوي بوقتها هاجس طالب

ان يتبرعلة بكلية اذا تطابقو بس الدكتور

گاللهم مراح تفيدة وهو بهالعمر

ايام آني أبچي من تصورة غيد وهو

بالغسل يقرة قرآن بصوت هادئ

بابا وبيبي يزورو واني احصن بيبي

بكماما ودرع واقي وكفوف وتعقيم

وياهة واوصيهة متبوس احد

بداية ٢٠٢١ راحو بابا وبيبي واجة

خالو علي وياهم يزورة تأخرو بيومها

ورجعو بابا چان متأثر خالو علي 

ملامحة حزينة اما بيبي فدخلت الغرفة

وماطلعت كلما ادخل الگاهة تصلي

مقبلت تتعشى دخلتلها بوقت متأخر

تسبح انتظرتها قطعت تسبيحها وباوعتلي

واني لابسة كمامتي لبستها الدرع الواقي

يلة نزعت كمامتي لزمت التعقيم رشيتلها

ورشيت الدرع ابتسمت

-تسودنتي يابيبي

-اخااااف عليچ عذابي

اليوم ماعاجبتني

-جدچ منتهي

گالتهة ونزلت راسها تسبح

وتساقطت دموعها على كفوفها الحلوة 

ولأول مرة اسمع نحيب بيبي وصوتها الناعم

وهي تنعي ابن عمها بعيدا عن الماضي

بصوت حزين باكي

-صفت بس الحمامة تنوح بالدار

وبعد ذاك العمر دار الوكت دار

صفيت وحيدتي ولا ولف بالدار

حمامة مكسرة ومگطووووع بية

حضنتها وهي تمسح بدموعها

وتردد بحزن

-هذا تالي أهلي لو مات اصفى وحدي

-بيبي رغم الصار……

ماخلتني اكمل

-الوكت يابيبي ياخذ ويا هووواي

سوالف ومنهن الگطع

السوا يم الله مسجل بس مني

مبري الذمة هو وعمي منا ليوم الدين

ماتتلاگة وجوهنا ودعيت الله بهالليلة

ربي يسهل علي وماينشلع گلبة

هينة لينة بلا تعب ولا عذاب

محااااالل وموهوب ياهاجس

ياابن عمي منا ليوم الدين

وماتتلاگة وجوهنا بذنب

محالل وموهوب عني وعن والدي

بس حگ خزعل ربك ادرى بي

رجعت بچت ذبت حسرة

-يابيبي كبرتة كبرة عمي

من اخذة مني وچان مريض

تراوالي وجه عمي بي

لزم چفي يريد يحبة يگلي

عذبة محاللتني لو متانيني عذاب

اسود گتلة محاللتك ومبريتك الذمة

عن نفسي وعن بنيتي خاف اذيتها بحگها

بگاع ابوها محالل عالراح والسويتة ومابينة

وگفة بيوم الحساب

طاحت دمعتة وضحك ونشدني

-الكلية الخلاهة خزعل هالماتت وانتهت شتگولين

رب العالمين يغفرلي بتعبي هذا ومرضي

عالسويتة ويجعل ذيچ كليتي هي

الحگ الطلبة خزعل ومانالة

-الله موجود ادعي واستغفر

والحگ عد رب العباد

وهالرديت يابيبي وانا اهجس هذا

من اخر أيامة هاجس المسودن

يتوسد ويا بالليل وعايف دوامة

يابيبي مصبح مروح

مسحت دموعها وباوعتلي

-گلبچ على گلب جدتچ ماحمل گلبچ السمعتي

مسحت دموعي الوگعت وباوعتلها

-يحب جدة هوووواية بيبي

تدرين چان مرات فجأة يطلع من بيتنا

يروح يشوفة ويجي اسألة اگلة نايم خوما

گعدتة يگلي بية واهس الا اتأكد منة يتنفس

وهو نايم يلة ارتاح

-ربي يفيض علي من بردة ويرتاح

طلعت تاركة بيبي اتصلت بغيد

صوتها متغير

-ها غيد

-منتهي ليل البيت واگف وگفة

گوة طلعت الكلمة من حنجرتي

-هاجس شلونة

-تارك الدنيا هو والولد وگاعدين

يم سرير جدو

-لا حول ولا قوة الا بالله

بالچ على بنتچ لتنزليها بالهوسة

لتتمرض وانت كمامتچ والتزمي

-والله ملتزمين كلنا

-العافية يمة والله يعز علية مااشوفة

بس تعرفين الضرف

-بيبي اليوم وصلتلة سلامچ واعتذرت

مكانچ

-حبيبتي روحي ارتاحي

ودعتها وغلقت التلفون 

وكما ان تشرق الشمس

لا بد لها من مغيب يومين بعد هالكلام وصل

الخبر توفى جدو بهدوء باحضان عائلتة

ومثل مگالت بيبي ودعت وفاتة چانت

هادئة بلا فوضى مرض سريع وغسلات

كلى متتجاوز السبعة وغاب جزء چبير

من تاريخ عائلتنا بعزاء مغلق خوفاً من العدوى

حضرتة ماما وبيبي واني لا مبتعدة عن

كل شي ممكن يعكر صفو عزائه 

واني اعرف ردات فعل عماتهم

ماردت اكون سبب بمشهد سخيف

يسوو گدام المعزين 

وانتهى كل شي بعد أيام

اتصلت بعمو كمال على تلفونة

وبعدها بوطن معزيتة بوفاة

جدة وطلبت من باب القرابة ان يسلم

التلفون لنوح وبعد ماكملت تعزية

لنوح 

سألتة والكلمة ترددت بحنجرتي

-هااجس موجود

-اي هسة اخذلة التلفون

ثواني واجاني صوتة

-الو

-البقاء لله وحده عظم الله اجركم

-واجرنا جميعا

-آخر الاحزان ربي يرحمة

ويجعل مأواه الجنة ونعيمها

تأخر بالرد ردت اغلق الخط اجاني صوتة

-وطن اطلع بعد اخوك وسد الباب

سمعت طبگة الباب واجاني صوتة

مخنوگ بعبرتة

-چان يحبچ

-واني احبة اني ماعرفت بالحياة جد

غيرة

-لآخر لحظات ظن ان بينة طريق

رجعة

-الله يرحمة

-چان يعتقد ان اني وانت امتداد لقصتة 

وية جدة

-مو كل القصص تنتهي نهايات سعيدة

-الا قصتنا چانت لازم تنتهي بسعادة

-اكرر عزائي مع السلامة

ودعتة غالقة الجهاز باترة اي حبل

وصل ممكن يفتح ابواب للماضي

والحنين وعواصف الذكريات

واكتشفت ان بعض قصص الحب

تنتهي بصداقة ولو متأخرة مثل

جدو وبيبي اللي انضافت سبحة

خامسة لسبحها  اللي تتناوب عليهم

بالتسبيح بصلاواتها الواجبة والمستحبة

گعدت مقابلها اسألها

-اليوم خمس سبح بيبي

-سبحتي انا واميرة لصلاة الفجر

وسبحة جدچ خزعل وجدچ بشير لنافلة الفجر

وسبحة سهامة ومزنة لصلاة الظهر

وسبحة اخواتي واهلي لصلاة العصر 

وسبحة لجدچ سالم وجدچ هاجس لصلاة المغرب والعشاء كلهم اسبحلهم حتى توصلهم الرحمات سووووة

ابتسمت واني اشوفها مقاسمة احبابها

حتى الدعاء وثواب التسبيح

:

:

:

:

:

:

:

منتصف ٢٠٢١

افتر بين الردهات والعزل

واصابات الاطفال رغم طفيفة لكن

متعبة لجهازهم التنفسي

طلعت تاركة الردهة اقضي بعض

الامور وصرنا وجه بوجه اني وهاجس

هو منزل كمامتة واني لابسة الدرع الواقي

تعديتة ماشية وتسرعت خطواتة وراية

ماشي

-دكتورة ليل

ثبتت بمكاني ملتفتة الة

-تفضل

-ممكن نصير على جهة

ابتعدت واگفة بممر جانبي مليان

كراسي گعدت وهو گبالي

-السلام لله

-وعليكم السلام الموضوع شنو

-عندي مصاب هنا اجيت اشوفة

-منو

-مصعب

-اها الله يشفي

-توفت ام زوجتة بكورونا

-البقاء لله اعرف 

-ماسألتي عنها

-عزيتها

-رجعي انت وياهة مالچ علاقة بية هي تحبچ

-لااا احياناً بتر العلاقات افضل

-مثل مابترتي حبل الوصل ويانة

للأخير

-واقطع اي شعرة امل للمستقبل

وگفت اريد امشي اشرلي

-انتظري 

وگفت باوعلي

-تفسير واحد اريد لموافقتچ بالبداية

عالصلح ووافقتي نرجع ورحتي وياي

للمزرعة شتغير وثرتي هالثورة

ابتسمت يبدو ان نوح مموصل الخبر

بأني عرفت بآخر كذبة

-لأن أكتشفت ان مو كل قصص الحب

لازم تستمر

اذا چان استمرارها على حساب اعصابنا

وصحتنا وكرامتنا وأنسانيتنا فالافضل

نبترها

-وتشوفين استحقيت البتر من حياتچ

واني اللي اشتريت رضاچ بكل الطرق

-مو كافي مچان كافي

مشيت واجاني سؤالي خلاني

اتوقف 

-ليل

التفتت عيني بعينة

-نعم

-كلمة ضلت ببالي تدور طوووول هالسنة ونص

مرتييييين گلتي مااريد منك بس شي

واحد گوووولة وينتهي كل شي

ونرجع بسسسس گليلي شنو

الشي الواحد الچنت غافل عنة

وچان ثمن عدم قولة هو اصرارچ

عالانفصال

باوعتلة وبهاللحظة بالذات

حسيت بالكلمات وهي تتجمد مثل الشظايا بين

شفافي كأن الحقيقة امر وأكبر من أن تقال

وأثقل من ان تضل جاثمة على صدري

واغص بيهة بكل مرة اتذكر

نطقت وأخيراً

-يوصلك كل شي عالتلفون

مشيت مسافة وگفت ورة احد الاعمدة

ورفعت الحظر عنة عالواتساب

دزيت صور التقارير وكل الحقائق

اللي چنت ضامتها من وقت طويل

​وگفت بزاوية خفية

أراقبه من ركن ميشوفة

وصلتة الرسائل فتحهن ووگف

شفتة يتلفت يذرع المكان

بعيون تايهة يدور علية بصدمة

بينما عيونة تسترق النظر للتلفون بعدم

تصديق

وفجأة خانته قواه

وكأن الگاع دارت بي

گعد بتعب منكس راسة

مثل اللي انسحبت روحة من جسمة

بعدت نظري بسرعة ومشيت مبتعدة

رافضة حتى بعد الصار اشوفة بهاللحظة بالذات

لحظة انكسارة التام 

مشيت ومشيت وخطواتي تتسارع

مثل نبض خايف موقنة ان هو

فهم أخيراً ان هي هاية نهاية الطريق

وعرف بعد فوات الأوان ان بعد الكذبة الثانية

تستحيل حتى الحقائق الموثقة

أن تصدق

ولأن لكل نهاية مبتورة بداية

جديدة بيوم صباحية لمن بدت

الحياة ترجع لكن بحدود

ماما طلبت مني نطلع لمكان

ولأن هي قليل تطلع حبيت

اخذها لمكان هادئ ترتاح بي

گعدت گبالي وفنجان گهوتها المرة

وقطعة الككاو تشرب وتاكل

ومبتسمة

-تدرين شگد فرحت بولادة أخوانچ

بس فرحتي بيچ چانت أقوى

احس روحي مرتبطة بروحچ

چنت اتمنى تجيني بنية ثانية

حتى اعيش الشعور مرتين بس

ربنا مااراد بس انت كفيتي ووفيتي

صرتيلي الاخت اللي ماعرفتها

والصديقة الوفية والبنت البارة

مديت كفي رفعت كفها بستة

وبدت تسولف

بهدوء كأنها تخاف تخدش الحزن اللي نايم بصدري لزمت إيدي  وبأصابعها الدافية بدت تمسح عليها وبصوتها الحنون اللي يشبه نسمة باردة بتموز

بدت تحجي

-حبيبتي اريد احچي وسمعيني بعقلچ

أدري بگلبچ يوجعچ من الصار

وأدري الفراق مو سهل

وكسرة الخاطر على حب جان بالنسبة ألچ

الدنيا كلها

اني أمچ وأحس بالوجع اللي بداخلچ قبل لا تطلع الآه من صدرچ

اني هسة ماالومچ ولا دا أكلچ انسي بيوم وليلة الحب الصادق ما ينسي

وعينج اللي بجت دم على اللي راح

إلها حق تفرح وتنسى

عبست ملامحي قهر وهي رجعت تشرحلي

-بس ياماما اسمعيني زين

العمر يركض ركض

واليوم اللي يروح ما يرجع

هذا الوقت اللي تگضينه بالدموع والحسرة

محسوب من عافيتچ وشبابچ

انت ذكية وتعرفين أن الدنيا 

يا ماما متوگف لخاطر أحزاننا

ولا راح تنتظرنا لحد ما نطيب

الأرض مستمرة بدورانها

تدور وتدور وماخذه وياها أحلى أيام عمرچ

وأنتي واكفة بمكانچ 

أني ما أريد الباقي من عمرچ يضيع وأنت عايشة بالماضي

اريدچ تعيشين الحاضر

تكملين طريقچ

وتوكفين على حيلچ

أنت  قوية ماما

والحياة بعد بيها شي حلو ينتظرچ

باوعتلها وهي دموعها تلوح اجفانها

گمت گعدت بصفها حضنتها

-لتبچين ياحبيبتي هاااااي اني هيچ

صايبة گلبچ الدافي بحزن

-فرحيني ليل فرحيني وفرحي

ابوچ اللي يلوم بنفسة كل

يوم يگول لو من البداية رافضهم

ماچان وصلنا لهالحال

-والله مااقصر واسسسفة لكل دمعة

وحسرة طلعت من گلبكم شتردون اني

حاااضرة واتمنى اعوضكم تعبكم وياية

بهالسنة ونص

-اذا صدگ تردين تعوضينة

فررررحينة نريد نشوفچ عروس

أريد هالعين اللي ذبلت من البچي تفرح

وأشيل بيدي جهالچ

أريدچ تصيرين أم وتضوگين طعم هالمشاعر

وتعرفين شون گلب الأم ينبض

ويه كل دگة بگلب اولادها

واني ياماما گلبي وگف حزن من يوم

اللي گلبچ انكسر

-بسسس ………

قاطعتني مكملة

-الوجع راح يبرد ماما ويبقى مجرد ذكرى

مثل مابرد وجع بيبي عذبة

ونست السوا خالي بأبوية

صفنت بوجهها ابتسمت

-عبالچن مااعرف سهامة حچتلي

كل شي بس اني محتفظة بهالسر

للموت لأن اشوف امي لهالعمر

تخاف اسمع وانقهر على ابوية

مثل ماامي كملت اريدچ تكملين

بس لازم تنطين لنفسج فرصة تعيشين

لتموتين وأنتي على قيد الحياة ماما

-أحس الصار مثل جاثوم نايم

على صدري

-بيدچ تقرين المعوذات وتبددين هالجاثوم

ياماما انت دكتورة وتعرفين

فرص الحياة تقل بالنسبة النا

كل ماكبرنا بالعمر

-اخاف ماما اخاف اتزوج وتبقى

بصدري مشاعر الة واعتبر صاحبة

ذنب وخاينة مشاعر

-وربنا وين راح

صدق النية يبدل الأحوال

بس گليلي ناوية ترجعين لهاجس

-الميت يرجع ماما

-مايرجع بس العايش يبقى

ويستمر والحي ابقى من الميت مو

هزيت راسي وهي تسألني مستفهمة

-شگد عمرچ هسة

-دخلت ٣٢

-بعمري وانت عندي

صفنت لكلامها وسرحت اشرتلي

-استخيري الله وعيشي ياماما

سميت بسم الله واحنة كايمين

بنفس الليلة بالليل بيبي طرحت علية

سؤال

-ليلة شنو رايچ بعادل ابن خالچ علي

-أعزب العائلة شبي

-يريد يتزوج

-ولو متأخر بس هو وسيم

-اذا اجاچ ترضين

صفنت بوجهها ثواني ورديت

-اني

-اي انتِ محد تستاهلة غيرچ

كلف معدل محترم روحة ولام نفسة

مارديت بس سؤال واحد طرحتة

-ليش تأخر بالزواج

-ضل يدرس كمل ذني الشهادتين الكبار

-ماجستير ودكتوراه

-اي

-ادري بيبي بس يعني هذا سبب

عدم زواجة

-اي والله هذا يشتغل اشترة بيت

سوالة شغل چبير وابو بعد ماتقاعد

يشتغل ويا

وهو موظف چبير بمدري يادايرة

ببغداد

-ومنو گالة اني اريد اتزوج

-انا گتلة

لطمت خدي وگمت

-صدگ تحچين بيبي

-اگعدي وانچبي احچي

صدگ

-مااريد اتزوج

-ضلي بيبي والوراچ والدونچ كونن

عوايل خايبة الزلم تعيييش حتى

لو ماتخلف بس الله خالق حب الخلفة

وعاجنها بطينتنا احنة النسوان

-يعني تردوني اتزوج بس حتى اخلف

-نريدچ تعيشين الدنيا مشت

والايام يابعد امچ خايبة

انا العشگت هاجس من اانا

جاهل بعد السوا باربع اشهر

اخذت جدچ وسبحان الصبة

بگلبي صب ادريچ خايفة تضلين

تفكرين بي من تعرسين وتخافين

تغضبين ربچ

بس رب العالمين عاااالم بنتيچ

ومن يمة راح ينزل سكينتة

على گلبچ وتعيشين بحلال الله

وتذكري يابيبي وگول گالت

عذابي دانشي فكرچ

اريدچ تجيني باچر وتفرحيني

طلعت تاركتها وموجات التفكير

تجيبني وتوديني تمددت بغرفتي

عيني بالسگف شريد

بالضبط

ليش متوقفة حياتي علي رغم

مستحيل الرجوع بينة

وشمنتظرة حب جديد مستحيل

اعيدها ولا گلبي ممكن يدگ لأحد

زين أتزوج زواج تقليدي وأنتظر

ان احبة

زين يمكن احنة منطين الحب هالة

وحجم اكبر من حجمة

زين واذا بقيت بدون زواج

بقيت سهرانة للفجر توضيت وصليت

واستخاريت ربنا أن يدزلي

ولو علامة تخليني اكمل

نمت وگعدت على صوت لولو

تضرب بوجهي

فزيت غيد صوتها واضح بالمطبخ يم

ماما فاتحة الباب للولو مخليتها داخلتلي

شلتها وطلعت

-هاااااا منو يمنة

بوستها وهي تضحك

-ها انرفع الحظر گمتي تبوسين

وتسلمين

-بسسسس بيبي ممنوع بسسس لا بستيها

-ههههههههههه لچ بيبي صايرة لوتية اول مدخلنا

لبست الدرع الواقي تعلمت

-تعاي احضنچ مشتاقتلچ

-حبيبتي والله اني هم شفت البيت

هادئ وماكو احد گلت لوطن وديني

-شلونة مختفي الگاطع

-دوام وشغل يادوب نشوفة

يمنى توصلچ سلامها

-الله يسلمها

گعدنا نتريگ ومن خلصنا جهزنا الغدة

وتركنا دخلنا غرفتي نسولف باوعتلي

غيد وبلسانها كلام

-اريد اسألچ سؤال 

-گولي حبيبتي

-ليش بعدچ رافضة التواصل وياهم

يمنى ونوح وكل اللي بالبيت حتى

مرت عمو كمال

-لأن النبش بالماضي ميخليني أعيش

-لتزعلين مني بس والله اگول ليش

تگطعين وياهم وهمة زينين چانو وياچ

رغم بعض الهفوات

-مو همة زينين هاي انعكاس اخلاقي

وتصرفاتي وياهم تجبرهم ان يكونون

زينين بما اني اتعامل وياهم بأخلاقي

اني مؤدبة صح وواعية صح بس مااااانسى

أبد أبد يمنى سماعة لكلام امها وكم مرة

تجرحني امها رغم علمها ان هاجس

سبب التأخير وتعرف من بداية زواجي

بس تختار السكوت

وبولادتها موقفها معلم بنص گلبي وتجاوزت

لأني مو زعطوطة ولا تفكيري سطحي

وزادت الطين بلة وهي تبلغ امها

اللي تعرفها يقيناً تكرهني

وخلت السر مثل متدعي بلسانها

رغم تعرف حقارة امها وكرهها الية

بالمحصلة بعد ماانخرب بيتي

اجتني للمستشفى بحجة الاعتذار

تشكي برود نوح وابتعادة عنها

تعرفني مااقبل اكون سبب بضياع

حياتهم وبعدهم عن بعض استغلتني

واني اعرف هالشي بس نفذت

وطلبت من نوح يرجعها حتى ماانوصم

ويگولون ليل خربت بيتها

هاييييييي يمنى

اما نوح فبالمرتين اختار الكذب

واختار مصلحة اخو على حطام

حياتي ميستحقون الصلح بالمحصلة

حياتي وروحي ونفسيتي وكرامتي

اعز عندي من صداقة قائمة عالمصلحة والكذب

-وهاجس ليييش رغم حبكم تنازلتي عن حياتچ ويا

-أسالچ سؤال من راح تجاوبيني

راح تفهمين السبب

-گولي

-لو اني اللي ميصير عندي اطفال

وخفيت هالشي عن هاجس مثل ماسوة

هو شنو راح يكون موقفة

-موقفة مثل لمن حچيتيلي ثار

علمود اخذتي مانع بدون علمة وگال

هذا شي المفروض نتشاركة

-يعني ليش الموضوع لمن يكون يخص

الرجل يكون يختلف ولازم نتحمل ونصبر

بعيداً عني چنت مستعدة اصبر

لولا استخفافة بية بس تخيلي

مدى ازدواجية هالمجتمع اكو

واحد راح يطرح هالسؤال على هاجس

لو چنت اني السبب ويگلة ليش تتركها

او عالاقل ليش تتزوج عليها وهي متخلف

لو الكل راح يگول حقة لازم تكون

عندة ذرية

-اكيد يگولون حقة

-وبما ان هو متركلي حرية الاختيار اني

قررت الابتعاد مووو علمود الاطفال

بس علمود الكذب لمرات ومرات بدون

مراعاة لمشاعري 

ابتسمت وهي تباوعلي

-اسفة لان زعجتچ بهالسؤال

-انچبي بالله مابينة اعتذارات

-وهسة يابطلة شنو رأيج

تشرفين على ولادة النونو الثاني

للعائلة

حضنتها ممصدگة وهي تشرحلي

-شوفي قبل اسبوعين يمنى حست نفسها

متاخرة شهريتها وخافت خاف حامل

جابت كارتونة اختبارات منزلية

تتشاقة وياية گالت تعاي نسوي

اثنينة واني مثل الخبلة اضحك

سويت شحچيلچ صدمتنا

اثنينا حامل

ابتسمت وچانت هاي الاشارة المحتاجتها

الكل جاي يمشي بحياتة

وجاي يعيشون ويكونون عوائل ويمنى

اللي بعمري راح تصير ام لثلاثة واني

اني شمنتظرة واني موقنة اني مستحيل

ارجع او افكر بي بعد

بالليل وبعد ماراحت غيد اتخذت القرار

الحاسم داخلة لبيبي مستخيرة رب العالمين

بأدارة دفة حياتي 

بلغت بيبي موافقتي

ثاني يوم اتصل بية عادل بالليل وهاي

اول مرة يتصل بية بشكل مباشر

بعد تداول موضوع الخطبة چنة مجرد

اولاد خال وعمة عاديين بالمناسبات

بالاعياد رسائل عادية هالمرة

الوضع اختلف حتى سلامة

-شلونچ دكتورة

-الحمد لله انت شلونك

-مرتاااااح

گالهة وضحك

-امري طلباتچ شنو

-رحمة وسكينة

صمت لثواني ورد

-بأذن الله موجودة

غيرها طلبات مادية

-ماعندي اي طلبات مادية

-كرسي جابر كرسي عامر قنفة الوليد بن طلال

ابتسمت

-الاثاث مينلبس بالرگبة

-التطلبينة حسبي تم وليردچ

الا لسانچ واني بالمقابل مااطلب

الا شي واحد

ان اكون مرتاح اني تأخرت بالزواج

الى أن حسيت نفسي مكتفي

ومرتاح من كل النواحي لذلك اريد

حياة هادئة وشفتچ خير البنات لهالحياة

-ان شاء الله

-ارتاحي وان شاء الله كم يوم

ونجيكم

غلق التلفون واني رغم نبضات الحزن

بگلبي قررت امشي وامضي بهالحياة

وفعلا بعدها بخمس أيام

انملى البيت بالاهل معلنين فرحتهم

بهالخطوة خطوبة ومشية بسيطة

رغم العدد الهائل بس من الاحباب

بسوت اوف وايت بسيط مكون من

سترة وتنورة طويلة وحجاب

لبسنا الحلقات والذهب اللي مبالغ بي

رغم طلبي البسيط عقد شيخ بنفس

اليوم وبقو هو وخالو ووامة يومين

تممنا عقد المحكمة قبل ليرحون

صبحية وبعيدا عن العيون سرق

بوسة من خدي وغمز

-الجايات نسنترهن بالشفة

طلع ضاحك وهذا اسلوبة انسان ماخذ

الحياة ببساطة واريحية

دخلت غرفتي اباوع للمراية هذا وجهي

مرتاح بس ليش مااحس بفرح

گعدت على مصلايتي ادعي واسبح

وابتهل لربنا أن يبعد شبح هاجس

وايامة عن عيوني وان مااعيش الحرام

ولو بمخيلتي

بنفس الليلة بالليل دگ تلفوني بأسم

وطن رديت

-ابو فدعوس

-تزوجتي

گالها بصوت حزين ممزوج بغضب وعدم

تصديق مارديت

-ردي تزووووجتي

-اي

سكت وبس صوت نفسة العالي ينفث

بالسماعة يريد يسيطر على انفاسة

-لييييش

گوة طلعت من شفافة الكلمة

-حتى اعيش

-واني

-هم عيش

-ماااگدرررررر انتِ شلون گدرتي

-لأن الحياة ماتتمحور عالحزن ولأنها

لازم تستمر ولأن جزء چبير من شبابي راح

بوهم

-حبي الچ وهم

-حبي الك وهم

-ليييييش ليييييش

-حب ويا اقل ضرف ينهز هذا مو حب

حب قائم عالانتقام عند الاختلاف هذا موحب

حب قائم عالكذب والخداع هذا مووووحب

-ليييش ماگادر اكمل

-لأنك الطرف الظالم بالقصة

-ردت احافظ عليچ بأي ثمن

-حتى لو الثمن ضياع حياتي

-يعني بقائچ وياي چان قائم على فكرة الاطفال

-هاي سنتين مرو ولازلت تعتقد اني

لأن اكتشفت انك عقيم تركتك

-فسررررريلي لييييش 

-للأسف مچنت فاهمني وبعدك مفاهمني

بالمرتين خدعتني بالمرتين اشتريت كبريائك

انت لآخر لحظات چنت تكذب گتلك

شييييي واحد گولة وراح ابقى وياك

انتظرتك تنطق الحقيقة وتعترفلي بالصار

بس اصرررريت واصريت وساعتها عرررفت

ان حقيقتك اغلى عندك مني مافكرت اني

راح اعرف اول وتالي چنت تشتري وقت

بلكي تلگى حل بس تشتري وقت بتعذيبي

بعد وجرح وتعجيز مشاعر

هدأ صوتة وتخللة اعتراف متأخر

بمحاولة لترقيع الماضي المؤلم

-هاياني اعترف ان امكانية ان يكون عندي اطفال

هي ثلاثة بالمية

اعترف غلطت ماعرفت شلووون ابلغچ

ولا عرفت شلون اگلچ اعترف بغلطي

رجعي ليل واني اسووووووي المستحيل

اذا على مووووضوع الطفل

-فات الآوان اعتراف متاخر تعتقد الصدمات

الكهربائية تنفع تحيي جثة شخص مدفووون من سنين

سكت ثواني ورد وهو يذب نفس قوي

وصلتني حسرتة المتأخرة على ضياع

حبنا من خلالة

-الله يوفقچ

غلق الخط وبهاللحظات بچيت

وبچيت لأيام انطيت لنفسي

مجال نفست عن حزني وبدت

تتلاشى الاوجاع وحل محلها رضا

بكل شي يقدمة رب العالمين النا

مااگول تلاشت الذكريات بس طار

جزء چبير منها ونعمة النسيان سرة

مفعولها بگلبي وذاكرتي

وبعد شهر لطيف من الاتصالات والتجهيز

البسيط انزفينا لبغداد زفة حلوة صغيرة

بفستان ناعم وية حجاب بلا مبالغة

ودخلت بيت الزوجية لشخص واعي

فاهم يعرف شيريد قدملي رحمة وسكينة

مثل ماطلبت وقدمتلة وفاء وعائلة دافية

انرزقت بآدم بعد شهر واحد بس من الزواج

بوسط فرحة الكل شهور الحمل اللي

يگولون عنها متعبة عشتها كلها

بتقلباتها بفرحها وحزنها

عشتها واني سعيدة 

لغيت الكل من ذيچ العائلة ماعدا غيد

اتصل بيها واحچي وية وطن من تلفونها

اما هو فچان جنتلمان وماحاول ابدددددد

يتصل او يعكر صفو حياتي

وتراوتلي الكلمات الاخيرة اللي 

دزها قبل زواجي وزفتي بيوم

للهالحظة احس القصيدة مثلتنا لحظة بلحظة

ﺯَﻋﻼ‌ﻥْ ﺑَﺲْ ﻳﺎ ﺯَﻋَﻞ

ْﻟﻤٌﻦ ﺗِﺮِﺩ ﻟﻠﺼِﺪِﻙ

ًﻗﺒﻞ ﺍﻟﻤﻨﺎﺩى ﺃﺟﻲ

ﻭﺷﻠﻮﻥ ﺟﻴٌﻪ ﺃﺟﻲ

ﺃﺭﻛﺾ ﺭﻛﺾ ﻣﺤﺘﺮگ

ًﻳﺎﻟﻠﺬﺗﻚ بريتي 

ﻭﻳﻦ ﺃﻟﻜًـﻪ ﻣﺜﻠﻚ ﻫﻮﻯ

ﻟﻮﻻ‌ﻙ ﻭﺍﻟﻠﻪ ﺃﺧﺘﻨگ

ﻫﻴٌﻪ ﺷﺮﺍﻛﺔ ﻧِﻔَﺲ

ﻟﻮ ﺳﻜﺖ گلبك ﺳﻜﺖ

ﻛًﻠﺒﻲﻭﻳـِﺪِگ ﻟــﻮ ﻳـِﺪِگ

َﻟﻮﻣﺎ ﻭﻛﺘﻨﻪ ﺻﻌُﺐ

ﻣﺎﺟﺎﻥ ﺃﺑﺪ ﻧﻔﺘﺮگ

ًﻛِﻠﻤَﻦْ ﻣِﺸﻪ لحالتة 

ﻭﺍﺣﺪ ﺳِﻜﻦْ ﺑﺎﻟﻐَﺮﺏ

ﻭﺍﺣﺪ ﺳِﻜﻦْ ﺑﺎﻟﺸﺮِگ

ﻛﻞ ﻫﺎﻟﻤَﺴﺎﻓَﻪ ﺍﻟﺒﻌﺪ 

ﻭِﺳﻮﺍﻟﻔَﻚْ ﺗﻨﺴﻤِﻊ

ﺟٌﻦ ﺇﺣﻨﻪ ﺤﻠﻚ بحلگ

ًﻭﺍﻟﻠﻪ ﻋﺸﻜًـﻨﺎ عشگ

ًﻳﺎﻣﻦ مگدر ﻋَﻠﻲْ

ﻏﻴﺮﻙ ﻓﺼﺎﻟﻪ ﺻﻌﺐ

ﺟﻢ ﺩﻭﺏ ﺃﺧﻴٌﻂ ﻭ اشگ

ﺣﻨﻴﺖ ﺃنا لشوفتك

ﻭﺍﺻﺒﺮﺕ ﺑﺲ ﻣﺎ ﺻﺒﺮ

گلبي ﻭﺻﺮﺥ  ﺭﺍﺡ اطگ

ﺟﺎﺑﺎﻧﻲ ﺇﻟﻚ ﻭﺇﺫﻋﻨﺖ

ﺟﻴﺘﻚ ﺑﻠﻴﻠﺔ ﺷﺘﺎ

ﻇﻠﻤﻪ ﻭﻣﻄﺮﻫﺎ ﺭَشگ

ﻭﺷﺒﻌﺪﻩ ﺻﺎﺭ ﺍﻟﺪﺭﺏ

ﺧﻮﻑ ﻭﺭﻋﻴـــﺪ ﻭﺛﻠـــــــج

ﻭﺟﻔﻮﻑ ﺇﺩﻳـــٌﻪ ﺯﺭگ

ًﺇﺑﺎﺑﻚ ﻃﺤﺖ ﻫﺎگمت

ﺿَﻤٌﻴﺖ ﺇﺩَﻳٌـــﻪ ﻭْ ﺭِﺩِﺕْ

ﻋﺎﻟﺒﺎﺏ ﺑﺎﻟﺮﻭﺡ ﺃﺩگ

ًﺑﺲ ﻛﺎﻟﻮ ﺇﻟﻤَﻦ ﺗﺪگ

ﻛﻠﻤﻦ ﻣﺸﻪ ﻟﺤﺎﻟﺘﻪ

ﻭﺍﺣﺪ ﺳﻜﻦ ﺑﺎﻟﻐﺮﺏ

ﻭﺍﺣﺪ ﺳﻜﻦ ﺑﺎﻟﺸـــــﺮگ

انسحبت ذكرياتي مبتعدة ومسرعة

للأختفاء ويا فتحة باب الهول

ودخول عادل وهو رافعلي حاجبة

-سهررررانة الواطية وتاركتني

اشرتلة يگعد بصفي

تمدد مخلي راسة على رجلي

اشرلي عالكرزات

- فد فستقة من ايدچ الحلوة

خليت بحلگة كرزات باوع للفيلم

بهاللحظة سعاد حسني بالفيلم تتذكر

احمد زكي وشلون انقتل على ايد

حسين فهمي وهي مخلية السم

بالاكل حتى تنتقملة خليت

كازو بحلگة طلعها بسررررعة باوعلي

-تردين تسمييييني لچ

ضحكت علي

-لو اريد چان سميتك بالتبسي وانت تدري

هي خلت السم لحسين فهمي بالتبسي

-ممممممنوع طبخ التبسي بالبيت

ضحكت علي رجع تمدد

-سبب حبچ لاحمد زكي شنو

-فتى احلامي

-واني

-شايب احلامي

طلع عضلاتة مستعرضها گدامي

-المووووظفات هييييچ علية اكوووام

-ايييييي عيوني يموتن عالحلوى المكشوفة

ضحك وهو يطفي التلفزيون

-گووووومي ورانة سفر عگب باچر

-يعني مجاز باچر انت

-اي حتى اشبع نوم

واشياء اخرى

كالهة ودفعني للغرفة يضحك

علية وبين سفرنا ورجوعنا

تبشرت بحملي الثاني

وية فرحة الكل وخصوصاً

ماما وبيبي اللي اشوف الرضا

بعيونهم 

آدم عادل والطفل الجاي

عائلتي واختيار ربي الجميل

الية

اكتشفت بعد التجارب ان الحب مو

مثل قصص الجدات

ينتهي دائماً بـعاشوا عيشة سعيدة

بس الحقيقة المرة تعلمتها بدموع عيني

وإنك تحب شخص بجنون

مو شرط أبداً تكمل عمرك وياه

الحب مو كافي الحب وحده ميعمر بيت

الحب ويا انعدام الكرامة مينجمعون 

لو تعيش بكرامتك لو تموت بـحب خاطئ

والحب والخداع والكذب ما يلتقون

وإذا دخل الكذب اختنگ هالحب ومات

والأنانية هي السم الي يقتل أي إحساس حلو

الحب عطاء وتضحية

والتضحية والعطاء مستحيل ينجمع ويا إنسان ما يشوف بالدنيا غير نفسه ومصلحته

أني وهاجس چان حبنا عاصف

زلزل روحي من أساسها

بس تعلمت إن عاصفة عن عاصفة تختلف

اكو عواصف رغم قوتها تكون مليانة نسمات رقيقة تطير وياها بتلات ورد وتجدد الروح وتخليها تزهر

واكو عواصف ثانية عواصف مدمرة

تجتاح كل شي بطريقها

وتقتلع حتى جذور قناعاتك 

وثوابتك

عاصفتنا أني وهاجس چانت من هالنوع

المدمر أخذت مني كرامتي وهزت ثقتي بـنفسي وچانت راح تخليني أخسر روحي لخاطر شخص

فضل الكذب والمصلحة علية

ومثل ما العاصفة تقتلع الشجرة من جذورها

عاصفته اقتلعتني من حياتي ويا 

وعلمتني إن البقاء بمكان ينهان بي گلبك هو أكبر جريمة تسويها بـحق نفسك

ولذلك فضلت نار البعد وحرگة الشوگ

على جنة البقاء تحت سقف بلا كرامة

اني فضلت روحي وانقاذ ماتبقى مني 

بدل ان اعيش بروح عريانة ومكسورة

حتى لو چنت عايشة بـقصر عاجي 

اختاريت أطلع للبرد وأحترگ بالغياب

ولا أظل بمكاني أهين نفسي وأدوس على كبريائي لخاطر وهم اسمه بقاء 

وبالأخير تحققت مقولتة

ﻛﻠﻤﻦ ﻣﺸﻪ ﻟﺤﺎﻟﺘﻪ

ﻭﺍﺣﺪ ﺳﻜﻦ ﺑﺎﻟﻐﺮﺏ

ﻭﺍﺣﺪ ﺳﻜﻦ ﺑﺎﻟﺸـــــﺮگ