رواية الندم مابعد الخطيئة الفصل الثالث والثلاثون بقلم رونق
فتحلي اديه وجان منتظرني اتقدم عليه
وجان تفاجأنه ايات وتحضنه نقذتني
من هذا الموقف هو هم حضنها وسلم
عليها بعدها اجت شهد وهمين هو عيونه
تاكلني اكل يباوعلي ويضحك
خاله كالتلهن متنطنه مجال ولجن
خل يسلم ع مرته تره ماميت عليجن
انتن شوفن عيونه وين
جان تكول زوجة عمه لج عيني المفروض
انت تتقدمين عليه شمنتظره هو يجيج
الكل يضحك
اني حيل خجلت هو حجه كال متشوفونها
شلون خجلانه تعالي حبيبتي متتصورين
شكد مشتاقلج
يا عزه بعينك مرتضى هاي شدتحجي
اني بهاي اللحضه اذا انذبح نقطة دم متطلع
مني
اتقدمت عليه وشايله هم
شراح يسوي مرتضى بيه
بعدني ماوصلت اخذني لحضنه
وجان يفرني فر وباسني بوسه بشفتي
بس ع الخفيف متعرفين شلون مشتاقلج
اني هم كتله واني
هم مشتاقه الك هواي طبعا حجينه
هيج لان الكل يمنه ولازم نتظاهر
كدامهم بس اني حيل خجلانه بهاي
الاثناء اجه مهند
لك مرتضى الناس منتظرتك وانت .... بس شافنه سكت نزلني مرتضى
شنو طايرين الخطار خلي اسبح وارجعلهم
اخذني من ايدي يله تعالي جهزيلي
ملابسي والحمام لان عفنت بالسجن
مهند طلع خاله كالت اي خاله روحي وياه خطيه تلكينها مشتاقلج
عاف ايدي وراح لامه باس راسها
اي والله يوم بس انت الي تحسين بيه
روح ماما بس لتتاخر عيب من الولد
صعدنه سويه اني مجهزتله ملابسه
ذني ملابسك ردت انزل سحبني اله هاي وين تردين
اريد انزل وي البنات نجهز العشه
لج بابا ياعشه يعني متفتهمين زوجج
طالع من السجن هستوه وانت تردين تنزلين
لعد شاسوي
يابه اتظاهري لتسوي شي خلي اسبح
وبعدها بللي شعرج جذب وبدلي
واتظاهري انت هم سبحتي
هسه فهمت دنكت راسي
فهمتي لو اعيد
لا فهمت
وهسه سدي الباب لا يجي احد
دخل للحمام واني نزعت حجابي
انتظرته لمن يطلع طول بالحمام اخر
شي طلع ينشف بشعره ويضحك تدرين ممصدك اني يمكم
ولا احنه مصدكين
يعني اليوم راح انام سويه هنا 😜
راح ادخل اسبح
تعالي بالاول عندي شغله وياج
اتقدمت عبالي شوشيريد اشو هذا باسني ب👈👄 خلاني لااخذ ولا انطي
لحضات ووخرت عنه راح اسبح وكتي راح
يمعوده لتتمرضين لتسبحين بس بللي شعرج بالجذب
تمام
اني راح انزل قبلج عيب من الولد
اوك
فعلا دخلت للحمام بس مرهمت
بس ابلل شعري كلت خلي اسبح بس
بمي لان قبل شويه سبحت لبست غير لبس وطلعت
نشفت شعري ع السريع ونزلت عيب من
البنات لكيت الكل مخبوص بالعشه
التهيت وياهن والحمد لله عبرت ع الكل احنه سابحين سويه
اذن الاذان وبعدها صبينه العشه وكملنه هوسة العشه
عمار كلي صيحيلي شهد اريد احجي وياها
عمار الله عليك دير بالك عليها خطيه تعبانه حيل ونفسيتها زفت
لعد شمسويلها اني
صحت شهد ورجعت اني ع شغلي
بدت الناس تجي واحنه واكفين ع حيلنه ل11 بالليل يله الكل راح لبيته
شهد كالت راح اروح وي عمار
ليش مبقيتي شكم يوم ع ما تصيرين زينه
صرت احسن بهواي وماعندي شي هناك
لعد خلي احجي وي عمار قبل لترحون
عمار الله عليك دير بالك عليها لتعبوها خطيه حيل تعبانه
الله كريم
راحوا ايات ورجلها ومهند وزوجته
وشهد وعمار وجماعت مرتضى كلهم راحوا
مرتضى كعد يم عمو وخاله واني نضفت
الاستقبال وفتحت المروحه لان ريحة
الجكاير تخنك ورجعت للمطبخ كاعد ارتب بي اجه مرتضى كعد
بدون زحمه اريد جاي لان راسي حيل يوجعني
تدلل
حميت الجاي لان بي وصبيتله
بس اخلص الجاي تصعدين لفوك بدون كلام
راح اكمل مبقى شي
من صدك تعبت جان يوم متعب بالنسبه الي
كملت كلشي وصعدنه سويه
افرشيلي خل انام صارلي يومين منايم ابد
اصعد نام واني راح انام بغرفة شهد
شنو هذا الحجي روان عصب حيل واتفاجأت بردة فعله الصراحه
هالمره حجيتيها مره ثانيه مراح
اقبل وراح ازعل والله شنو تنامين
بغير غرفه اذا حس بيج احد شيكول علينه
هيج وجودي يمج يضوجج اشو انت فوك
واني بالكاع انام حتى مزاعجج فماكو داعي لهذا الحجي
مرتضى مو قصدي شي بس حبيت تاخذ
راحتك ع الجربايه لان الكاع مو مريحه ابد
صارلي شكد انام بالكاع واصلا اتعودت شنو الجديد بالموضوع
لان تعبان وجنت مسجون حبيت تاخذ راحتك
بس راحتي بوجودج يمي بالغرفه مو بغير غرفه ترحين
مثل متريد اسفه اذا ضوجتك
مو بس ضوجتيني طلعتي روحي همين
راح اكرر اعتذاري منك اسفه مراح اعيدها
واعديني وعد لوشيصير متفكرين تنامين بغير غرفه ابد
ان شاء الله
وهسه افرشيلي بدون امر عليج
صار تدلل
فرشتله اني رحت لفراشي اريد انام حيل نعسانه
مرتضى يكلب بالجهاز
هم محتاج شي لان حيل نعسانه اريد انام
نامي ممحتاج شي
اول مخليت راسي ع المخده رحت
بغير عالم كعدت الصبح ع ايد تتلمس
بوجهي بهدوء بقيت مغمضه مااريد
اشوف شي لان متاكده هذا مرتضى
مااعرف شاتصرف بهيج موقف
انداريت للجها الثانيه كلت اذا شافني انداريت يجوز يعوفني
اشو هذا اندار للجها الثانيه وهم نفس الشي حيل ارتبكت بقيت ع نومتي اخاف اكعد ويتماده اكثر
لحضات واختفت الايد الحمد لله كدرت اتنفس وره شويه سمعت الباب انسد
الحمد لله كعدت لكيت نفسي عركانه
رغم ما شته والجو بارد شفت
الساعه ب10 ضربت ع وجهي عزه شلون
باقيه لهيج وقت عيب من خاله بسرعه غسلت وبدلت ونزلت
لكيت خاله وعمو ومرتضى كاعدين بالمطبخ
صباح الخير ..... الكل صباح النور ..... اسفه خاله اخذتني النومه
لاحبيبتي عادي لتهتمين ع راحتج اكعدي لان اصلا ماعدنه شي
سالت مرتضى اسويلك ريوك
اي ياريت جوعان حتى اتريك واروح للحلاق
سويت بيض وطماطا اني لحد الان اخجل منهم ممتعوده كلي تعالي اتريكي ويايه .... مااشتهي اكل انت اني راح انظف
تعالي اكلي التنظيف مطاير حجاها بعصبيه
كعدت اكل بس انقش لان مااشتهي من الصبح
شويه وكمت رتبت المطبخ
خاله محتاجه شي اساعدج بي للغده
نظفي التمن ونگعي بالمي بكلبي كلت اكيد
انكعه بالمي قابل انكعه بالخل 🤣🤣
كتله صار خاله تدللين
مرتضى كمل وكال رايح للحلاق بقينه اني وخاله نجهز بالاكل بعدها رجع
جهزتله ملابسه ودخل للحمام بعدها
نزل كال لعمو باجر ارجع لبغداد للمركز
ع مود السياره ... ان شاء الله
وراح ابيعها لان كرهتها واشتريلي
وحده ثانيه
شوف مرتضى اني لحد الان محجيت
شي منتظرك ترتاح حتى احجي وياك يعني
وين صايره سياره تنطلب هو هذا مرتضى
يعني حلوه من صديقك يشرد ويتركك
بهيج موقف هو هذا هم شخص يستحق
تثق بي وتنطي سيارتك
يابه غلطه وصارت ومتتكرر بعد واني اذا الگفه لهذا العار اله ابتلي بي
اجه يكحلها عماها يابه انت شوكت ناوي
تعقل يعني بينه حيل محاكم بعد وفصل
اوعدني معليك بي خل يولي مابي
خير مبين عليه لو بي خير منهزم
واذا ع دعمة السياره صلحها انت واسكت
لان انت تتحمل المسؤليه محد كلك انطي السياره
اني راح اصلحها وابيعها مااريدها بعد كرهتها
هذا شي راجع الك بس مسالت صديقك انساها
الله كريم
ثاني يوم كعدت لكيتها ماكو اكيد راح
لبغداد اتصلت بي كلي بالمركز اكمل
اجراءات السياره واطلع اتاخر للعصر
يله رجع وجايبها ويا
بعدها دزها للتصليح كال بس تكمل انزلها للمعارض
العطله ع وشك تخلص مبقى شي
بدت حياته ترجع مثل قبل رجع للشغل وكام بس بالليل يرجع ابقى متانيته اخاف يحتاج شي اسويله عشه
سبحت وكاعد اجفف بشعري اجه مرتضى
سلم عليه اسويلك عشه .... ياريت والله ميت جوع بس راح اسبح
اوك تخلص تلكي الاكل جاهز ... شكرا رورو
اتفاجات بي اول مره يدلعني هيج
نزلت سويتله كبه وطماطا وطرشي وخضره ردت اصعده لفوك التفتت لكيته يمي بالمطبخ محسيت عليه ابد
هاي انت هنا لويش نزلت اني ردت اصعد الاكل الك
لا هنا احسن ... رتبتهن ع الطبله .... ماكو عصير ببسي .... هسه اشوف
اكو بس مو بارد .... ميهم جيبي وتعالي اكلي وياي
لاشكرا مااريد اني متعشيه .... حتى لو تعالي اكلي وياي ع الواهس
والله مااشتهي ومااكدر اكل بهيج وقت ..... ليش عود لتكوليلي مسويه دايت
ضحكت كتله اي .... مو راح تنكطمين تحجين صدك انت يعني لو دبدوبه لو ضعيفه يحجي ويضحك
لا مو ضعيفه رشيقه اصلا ... وربج ضعيفه مو حلو حلو جسمج اذا ماشويه بيج لحمه مو حلوه هيج
بس اني عاجبني هيج مااريد اسمن وارجع مثل قبل
بس اني معاجبني وبصفتي زوجج لازم تاخذين كلامي وتسمنين شويه مو هواي
يله تعالي اكلي بدون اعذار
والله مااكدر اتقبل ولا لكمه ابد لان متعشيه وشبعانه
هيج راح تخجليني والله مااعرف اكل بوحدي اكلي شي بسيط بس لتخليني اكل بوحدي
صار ادلل بس مااكل هواي
مثل متحبين
كعدنه سويه هو ياكل ومنزل عينه مني ابد اول مره هيج يركز بيه حيل اتوترت وخجلت بقيت احجي بيني وبين نفسي معقوله بيه شي معقوله اكو شي بوجهي وممنتبها عليه
اخر شي متحملت لان حيل متوتره
ها مرتضى اكو شي بوجهي .... لا ماكو شي بي ابد
لعد لويش هيج تباوعلي ....
زوجتي وحر بيها عاجبني اباوع بوجها اكو مانع
حيل توترت اكثر .... ها اي اكو مانع ....
بعدني ممكمله كلي اششششششششششش
ولا نفس احنه متفقين بالغرفه شكل وبره
الغرفه شكل ثاني لتنسين هذا الشي
سكتت كلت هم صدك اخاف احد يسمعنه او يشوفنه
يله حبي كملي اكلج حتى نصعد
سكتت محجيت شي .... ها اشو ساكته
هيج ماكو شي ..... اممممم تمام
باجر تكمل السياره وراح انزلها للمعارض
اذا انباعت اشتري غيرها وبيوم الاشتري
ثاني يوم نروح زياره
مو الدوام حيبدي .... مومهم اخذي اجازه يومين وجمعه وسبت كلش كافي
الله كريم الصراحه اني محتاجه هيج طلعه لان ضايجه
كملنه وصعدنه طبعا مرتضى من طلع
من السجن لهسه احس تصرفاته غريبه
وعجيبه مااعرف السبب اني متاكده منه
يحب زوجته الله يرحمها ومستحيل
يفكر بيه ك زوجه بس احتمال يشفق عليه
يكول خطيه اطلكها اي اكيد هذا السبب
بس اني مستحيل اخلي يتقرب عليه ويحطمني
هو ينام جوه واني انام ع الجربايه بس
مرات اكعد صدفه الكي نايم يمي
ومن اكعد الصبح الكي بفراشه مرات
اكول حلمانه ومرات اكول لا حقيقه
مااكدر اساله لان مااريد يحرجني
من يلكيني يم خاله يتغزل بيه يكول
لازم هيج اسوي كدام اهلي طبعا اني
حيل اخجل ومرات يخجلني اكثر
من يكل لخاله شوفي الخجل الي بروان
اشتره سياره وبده الدوام اتفقنه نروح
الخميس الصبح خاله مقبلت تروح
ويانه ابد كالت من ترجعون الاسبوع
الثاني نروح اني وابوك
جهزت نفسي واخذنه ملابس راح نبقى
يومين لو 3 مااعرف
طلعنه ب8 الصبح رحنه لبغداد للامام الكاظم
كال ناذر نذر اذا تزوجنه نروح
سويه نزور بس نسيت طبعا لابسه عبايه
اتريكنه بالطريق وصلنه اجر فندق
كال خلي نرتاح وبعدين نزور
دخلنه للفندق الجو حلو رغم مابارد
كتله مرتضى عفيه اذا زرنه وخلصنه
خلي انزع العبايه والله مبهذله بيها ولحد
الان ممتعوده عليها
هاي السالفه انسيها لتجيبين طاريها ابد
العبايه استر الج بهواي
بس هنا بغداد يعني مو محافظتنه ماكو
لابسات عبايه الكل هيج تمشي وشوفة عينك بس هنا انزعها
روان سدي الموضوع نهائي
صدك ضجت وانقهرت يعني ميصير هيج يتحكم بيه
كال يله راح ياذن خلي نروح نزور ونصلي
ونتغده وبعدها نفتر بالسوك شويه
رحنه نزور بس اني ضايجه ومبين عليه
هو مهتم الي ابد وحتى مكلف نفسه
يحجي ويايه
دخلنه سويه واتفقنه ع مكان من نخرج
دخلت زرت وجانت الزياره تخبل خفيفه
مو كلش ازدحام بعدها صليت وطلعت
لكيته مرتضى منتظرني كتله اسفه اتاخرت
مو مشكله تعالي اكعدي شويه يله نطلع
تمام مثل متريد
شوفي روان لتصدكين العبايه اتأثر
ع جمال المرأه بالعكس تزيد جمالها
اكثر واكثر صحيح العبايه مو مقياس
للادب والاخلاق بس تبقى ستر للمرأه
متخلي اي انسان يتجرئ ينظرلها
نظره مو زينه بس البدون عبايه راح
تكون اكثر عرضه للحرشه بسبب ملابسها
وبسبب مفاتنها الي تبرز اكثر اتمنى
تفهميني ومتضوجين مني اني هذا
طبعي ويجوز تكولين متخلف عليه بس
اني هذا عقلي وهذا تفكيري وانت مدامج
بذمتي لازم اطيعيني بكلشي
هاي هي مراح اكول شي عليك ومن حقك
هيج تصرف ويايه لان بذمتك اني
لعد لويش ضايجه
منو يكول ضايجه اصلا عادي
اي مضبوط روحي للحمامات وشوفي
وجهج زين بالمرايه والا اگولج طلع جهازه
وجان ياخذلي صوره هاج شوفي وجهج واحكمي
هاي صدك اني واضح عليه بس مو بيدي
كتله مبيها شي صورتي واصلا مضايجه
اممممم راح احاول اصدكج ويله هسه خلي نروح نتغده بالمطعم
ورحنه للسوك الي يم الامام طبعا ازدحام
السوك سحب ايدي مرتضى ولزمني ومشينه
ايدي كامت توجعني لان حيل لازمني
مرتضى ايدي توجعني يعني شيصير لو
تلزمني ع كيفك امن مراح اطير ولا راح اشرد
بابا شوفي الازدحام يعني اذا ضعتي وين الكيج
دخلني محلات ملابس يله اختاري شنو حابه اشتري
الصراحه عندي ملابس كومه لان تعرفون
هستوني متزوجه اشكال الملابس عندي كتله
ماكو داعي اشتري لان عندي كومه ملابس بعدني ملابستهن
مو مهم اختاري شي يعجبج لو اني راح اختار ع ذوقي
حبيت اشوف ذوقه ولو هو واضح ذوقه نازك
والنبي مااحتاج شي كومه عندي
اخذله فره بالمحل كلت خلي اشوف شراح
يختار طبعا بعده لازم ايدي كلي شنو رايج
بهذا التراك الصراحه عجبني حيل وردي
واسود اني هذا عجبني بس اذا معجبج
اختاري غيره
لا مااختار غيره حلو هاي هي اخذه الي
تمام هم بعد يعجبج شي ..... لا والله مااحتاج اي شي ... مثل متحبين
اكلج اني جوعان خلي نتغده وبعدين نكمل .... مثل متحبين
رحنه للمطعم تغدينه وكملنه ورجعنه للسوك كال خلي اخذ لامي دشداشه ساعديني بالاختيار اختارينه وحده بعدها اخذنه كرزات وحلويات ورجعنه للفندق كال خلي نصلي ونطلع
وين نطلع مو هستونه رجعنه ..... نروح للاعضميه .... شنسوي .... هسه تحقيق بدلي واسكتي ..... الصراحه محبيت اطلع لان بالعبايه ومبهذله بعدني ممتعوده عليها
روح وحدك تعبانه ..... تعبانه لو ضايجه .... علويش ضايجه
ع اساس متعرفين مو .... يله مو مهم ابقي اروح بوحدي اصلا اني مقرر اخذج بدون عبايه وع اعصابي هيج قررت بس سويتي جميل عليه من رفضتي ترحين
اني طفرت كول والله بدون عبايه ... اي والله بس انت مبيج حيل تعبانه لهذا السبب راح اروح بوحدي
لا مبيه شي لا تعبانه ولا شي اروح كمت من مكاني حتى اجهز نفسي
ها وين تردين .... اريد ابدل .... مو مبيج حيل وتعبانه .... لا غيرت رايي
لعد اني هم غيرت رايي اروح بوحدي احسن
لويش برطمت .... هيج يعجبني .... يعني شلون ابقى بوحدي متخاف عليه
شعليج اقفلي الباب ومعليج شي
مرتضى… .
: قبل لااطلع من السجن بيوم جنت متفق وي روان تتصل بيه حتى اشوف امي
طبعا الولد الي مقتول ابوه بعد مقنعناه
اخته تعترف وهو يطلع اتصل من عدنه
واتفق وي زوج اخته وراح للمحامي
وفهمه وفعلا كال راح تسلم نفسها اجه
المحامي وطلب يشوفه وبنفس الوقت
ذوله الاخوان اجوهم زياره اني فرحت
كلت خلي احجي وياهم صوت وصوره
بس ادك ومشغول ادك ومشغول حيل
ضجت وي منو هاكد مشغول اكثر من
ساعه وماكو راسلتها وهي ولا كانو اخر
شي اجوي الولد حيل ضجت الولد يكول
المحامي شجعني وكال البنيه احتمال
متنحكم تعتبر دفاع عن النفس وشجعني
وكال اتفاهمت وي اختك وعلمتها كل شي
لاتخاف باجر اخلص الاجراءات انت تطلع وهي تنسحن
طبعا هذا احسن حل الهم
بدت روان تراسلني جان تكول وي اخويه
مااخفي عليكم حسيت بغيره مو طبيعيه
حتى لو كان اخوها وحسيت بنفسي صرت
اعصاب وعصبت عليها بعدين بدت تتعذر
وغيرنه موضوع وبالليل تراسلنه وحسيت
براحه مو طبيعيه حسيت بنفسي مشتاقلها
ومشتاق لكل تفاصيلها بقيت للاذان منمت
وبعدها كعدوا الولد تريكنه وبقينه ننتظر
رحمة الله الولد اليوم يمكن تنحل سالفتهم
وهم يطلعون واني هم منتظر اتريكنه وكملنه
اول شخص طلع من عدنه هو الي مقتول ابو
وبعدها طلعوا الولد الاخوان واني ماكو بقيت
كاعد ع نار معقوله هم مااطلع يمكن اتخبل
اذن وصليت واني بالي مو يمي بس افكر
كملت وكعدت انتظر طبعا جهزت جنطتي من
الصبح صارت ب1 واخيرا اجوي صاحوني
طبعا مينوصف شعوري ابد صدك معنى الحريه هاي جنت مخنوك جوه
طبعا اني متفاجئ بعمار جاي هو واحمد
وكرار طبعا هذا كرار مااعرف شلون اجازي وكف ويايه وكفة اخو
كملنه اجراءات وطلعنه
وبالطريق نتراسل اني وروان اتمنى اوصل
باسرع وقت لان من صدك حيل حيل مشتاقلها هي وامي اكثر شي
واخيرا وصلنه لكيت بيت عمي وزوج ايات
والكل استقبلني والجكليت ع فلس تكسر
راسي من وره امي وعمه البيت مليان اني
بالي بس يم روان حاب اشوف شراح تسوي
من تشوفني اترخصت من الولد كتلهم اسبح
واجيكم طبعا نصبوا عليه نصبه من هاي الزينه اتجاهلتهم ودخلت
واخيرا دخلت ولكيتها بالمطبخ شعوري
مينوصف اول مره هيج شعوري اتجاه
روان فتحت اديه الها وذني الخبيثات
اخواتي فهمن الوضع وجان يحضنني اني
ضحكت وعيني ع روان واخيرا خلصت منهن
بالكوه وجان تجيني روان واخيرا حضنتها
وبستها حبيت استغل الوضع ومتكدر تحجي
وفعلا اتصرفت طبيعي وهذا الشي فرحني
هوايه بعدها صعدت سبحت وارتاحيت ورجعت يم الولد
حسيت بعمار يتقربلي اكثر واكثر اني فرحت
بهذا الشي كال اكلكم خلي نسويلنه سفرة
لتركيا اربعتنه الكل ايده واتفقنه نروح بالصيف كال عمار من كثر مارحت لتركيا
اتسوك كمت اندلها منطقه منطقه
كرار كال نبقى هناك ع راحتنه منروح حمله
كله عمار اكيد من منروح حمله هيج بوحدنا احسن
حسيت براحه بنص اهلي مو طبيعيه لليل
البيت فرغ كلمن راح لبيته روان بقت تنظف
بس طلبت منها تصعد بس اشو هاي
استفزتني من رادت تروح تنام بغرفة شهد
طبعا اني رافض هاي الفكره لعدت اسباب من
ضمنهن مااحب تبتعد عني طبعا بيومها
نعسان لان منايم ولا لحضه من البارحه
واليوم نمت كبل بعدها جبت السياره
وصلحتها ونزلتها للمعارض خسرت بيها هواي
بس مو مهم لان كرهتها جملت فوكاها واشتريت جديده
يوميه انتظر روان تنام حتى انام يمها
اتلمس بوجها ابقى صافن عليها احس
بنفسي متعلق بيها مهتم لتفاصيلها وبنفس
الوقت احس اكو حاجز بيناتنه هي متريدني
ولا تريد تبقى ويايه اتحججت بالطلاك كتلها
خلي تعبر السنه يله نطلك حبيت اخذ وقتي بلكي تتغير وتكوم تتقبلني
اتمنى احضنها اتمنى ابوسها حيل اضعف
امامها بس مابيدي شي طبعا مااخليها تحس بيه ابد من انام يمها
قررنه نروح للزياره امي مقبلت تروح ويانه
رحنه بس اني وروان اول شي رحنه للامام الكاظم عليه السلام
طبعا روان كالبه خلقتها ع مود العبايه تريد
تنزعها بس اني رافض مااريد احد يشوفها
بدون عبايه غيري اني حتى اذا هذا الشي ضوجها
اني قررت وره الصلاه بالليل نطلع واخليها
تذبها للعبايه لان قررت نروح لمدينة الالعاب
وللمولات بس هي رفضت بسرعه وتوقعت
هذا الشي بعدين كلت خلي اللعب ع اعصابها
شويه كتلها راح اروح بوحدي وهي تخبلت
ها اخاف بوحدي ها مااخليك تروح بوحدك
شلون يعني متخليني .... والله اخاف
بوحدي .... لعد شلون قبل شويه رفضتي
ترحين .... جنت ضايجه لان البس عبايه واني ممتعوده عليها والله
كاعد تحجي وجان تنزل المخده والبطانيه وتريد تنام جوه
هاي شكاعد تسوين ... مااسوي شي بس راح راح انام
ولويش جوه .... لعد وين انام قابل سويه ع الجربايه
اي انام سويه لان ماكو فراش ولا بطانيه ثانيه
عادي انزل لجوه وجيب .... تحجين صدك مو عيب شيكولون علينه جايب صاحبته وجاي
زين عندي اقتراح الج ..... شنو ؟؟؟؟
اذا رحنه لازم انام سويه ع الجربايه .... اشو هاي طفرت ممتوقعها هيج اي موافقه بس خلي نروح
هيج الطلعه مهمه عندج
والله ضايجه ومن زمان مطالعه لمدينة الالعاب
انعل يومج صدك لو كالوا عقل المره عقل طفل وتتقشمر بسرعه
يله لعد جهزي نفسج راح اطلع اشرب جكاره وارجع الكيج جاهزه
اوك
طلعت اشرب جكاره وبعدها رجعت لكيتها بعدهي ممكمله
هاي وين صرتي لهسه مجاهزه
مابعد شي راح اكمل .... لعد هاي شكاعد تسوين بوجهج
مااسوي شي بس ميك اب خفيف .... اذا تخلين هواي ابطل
لا مااخلي هواي لتخاف
باوعت ع لبسها حلو ونازك ومستور
ومكياجها خفيف طبعا صار اكثر من نص
ساعه وهي بعدهي مجاهزه
ها روان بشري كملتي
بس الشال بقه .... وهذا شكد يطول ....
ثواني .... خل نشوف الثواني
اشو هاي تلبس وتنزع وكل شويه وعادت
اللفه
ها روان شرايج نبطل لان بعد متسوه
والله بعد وقت الليل طويل كدامنه
نتاخر ع كيفنه
زين وباجر روحتنه لكربلاء
يله كملت والله مبقى شي
اخر خمس دقايق وراها نبطل لا كملت يله
واخيرا كملت طلعت روحي 😂😂😂
ولج اني اذا طولت خمس دقايق
اكول اتاخرت هواي وانت راح يصيرلج ساعه 😂😂😂😭
مو احنه حجاب وميك اب
طلعنه للاعضميه اتعشينه ورحنه لمدينة
الالعاب وفرينه بالمولات بعد متعبنه رجعنه للفندق لان ورانه روحه
دخلت سبحت روان واني وراها كتلها طلعينه كرزات
طلعت كرزات كعدنه ناكل سويه
شوكت نروح .... وره تسهيل رب العالمين شوكت منكعد نروح
اني راح انام نعست محتاج شي لو لا
نامي معندي شي طبعا اني تمنيت اتنام حتى اخذ راحتي وياها
نامت واتاكدت منها رحت بصفها شعور حلو واني نايم يمها اتمنى تبقى هيجً
سويت نفسي نايم حضنتها وردت انام وجان تطفر مثل المخبله
سويت نفسي نايم وكعدت هستوني
هاي شدتسوي ..... ياالله بسترك شبيج خرعتيني واني نايم
شوف نفسك شدتسوي
شاسوي ماادري نايم جنت
لو تنزل تنام بالكاع لو اني انزل انام
ليش عيني شنو نسيتي الاتفاق
لا منسيته بس مكتلك احضني ونام
اني حاضنج هاي شوكت ويمته
ع اساس ماتدري مو
ولج نايم جنت ماادري بنفسي
ما عليه هسه لو انت تنزل لو اني
مو بكيفج لا اني ولا انتي
والله معليه ماانام يمك متخليني انام
لج لتتخبلين عليه بهالليل نامي واسكتي ووعد مني مراح اتقرب يمج بس نامي
والله تجذب
والله والامام الكاظم مااجذب
اريد بس افتك منها هيج حجيت وقررت ماعليه بيها
فعلا نمنه واحنه واحد مبتعد عن الثاني
كعدنه الصبح رحنه زرنه وودعنه الامام ورجعنه للفندق اتريكنه وصلينه الظهر وانطلقنه لكربلاء
وصلنه ودخلنه للفندق لان تعبانين سبحنه وارتاحينه ونزلنه كتلها نتغده بالاول لو نزور
خلي نزور ونصلي المغرب راح ياذن وبعدها ناكل هو غده وهو عشه
تمام يله
تواعدنه جوه نلتقي دخلنه زرنه وصلينه وبقينه شويه كاعدين بالامام الحسين بعدها اتوجهنا لابو فاضل سلام الله عليه هم زرنه وصلينه المغرب والعشاء اني جعت حيل
يله روان خلي نطلع لان جعت ... اني هم متت جوع
رحنه للمطعم تعشينه وكملنه نفتر شويه بالسوك لو نروح للفندق
بكيفك
خلي نفتر ... اوك .... افترينه اكلنه موطا ورجعنه للفندق
مرتضى نفس الاتفاق البارحه متتقرب ابد واذا تقربت انزل انام بالكاع
شسالفه روان الي يسمعج ميكول زوجج
شنو هالتصرفات طبعا من صدك ضجت اخذت جهازي وباكيت الجكاير ومحفظتي
وطلعت بره الفندق صاحت ورايه مهتميت ابد
نزلت وطلعت بره شربت جكاير وبقيت
افكر كعدت بين الحرمين دكت عليه روان
هواي مهتميت ولا فتحت خط
كمت التفتت بين الامام الحسين والعباس حيل مخنوك
فعلت نت ع الخط سويت بث مباشر
بكروب داخلين بي اني واحمد وعمار
وكرار وبعد اكو ولد جماعتي هواي صار
تفاعل بي هواي البث واندمجت بي وبقينه نسولف
طبعا لا كرار ولا عمار ولا احمد موجودين
واستغربت شنو الفلم سويتلهم دعوه بس ماكو
اكو ولد صديقي سلم عليه وكلي زياره مقبوله اتشكرت منه
كلي والله اني اتذكرتك اليوم اكول
شعجب مموجود بالمستشفى الدنيا مكلوبه كلاب وانت ماكو
شكو بالمستشفى شنو الي صاير
شنو متدري معقوله
احجي ولك شكو كلشي ماادري
ها لعد ماكو شي اتشاقه وياك
ليوثي فدوه احجي لان كلبي نار صار
ماكو شي يمعود
لك احجي صبري نفذ
جان يكول .........
