رواية قيود العوف الفصل الرابع والثلاثون بقلم ريتا
طلعت وجهي يضحك روحي مرتاحة كل شيء مار عليه عادي ومتخطي إله هذول براسي يفترون وحقدي عليهم ماچان يخلص أبد..
أتصل جهازي فتحت خط واجاني صوتة المزعج نعلعله روح صوته من يبغج ..
-مصطفىٰ: انت وييين رحت لخاطر ربك چا مو گتلي انتظرك
-عوف: يمعود طولت هواي
-مصطفىٰ: شطووولت كلها نص ساعة
-عوف: هوووواي چا انه انتظرك نص ساعة ، يله جاية للبيت انه
نص ساعة وطبگت سيارتي إتصلت عليه طلعلي فتت أول ماگعدت گال
-مصطفىٰ: بس بالحُسين دگة نااقصة يعني اجي للبيت أسبح وابدل واخر شيء اللگاك طاگني بعرض الحايط ورايح وحدك
-عوف: يابه طولت شنو عريس
-مصطفىٰ: اوووف ياريييت ينرادلها والله
-عوف: انچبب
-مصطفىٰ: اشتعل قااسم ميخالف ، سولفلي ليش رحت هيج مستعجل والگاع ماشايلتك ؟!
-عوف: للحكم النهائي للهتلية
-مصطفىٰ: ياهمة منهم ؟ هواي هتلية عندنا
-عوف: العصابة الخارطة كلش
-مصطفىٰ: جماعة فالح ؟
-عوف: اي
-مصطفىٰ: علييك الحُسيين
-عوف: وعلي
-مصطفىٰ: اي وشني الحكم ، واعترفوا ، وشني گالوا گدام القاضي ؟
-عوف: شنو حلگك طكة سهال وانفتگت عليه وحدة وحدة
-مصطفىٰ: اسف ، يله سولف
-عوف: قسم نكرو أكيد
-مصطفىٰ: يلا هو هذا المعروف مو شيء جديد ، الأدلة موجودة إذا ألف ملف وألف أثبات
-عوف: طبعاً حبيبي بالأدلة والإثباتات والمعلومات الاخذتهة كلها والملفات مع التحقيق الي اعترفوا بيه گدامي من جرجرتهم بالحچي هذن كلهن حطيتهن بيدهم يتبعن الـ ، سرقة ، جريمة ، قتل ، تجارة أطفال ونساء ، تجارة اعضاء ، أختطاف ، ابتزاز ، أعتداء ، نهب اموال
-غير هذا حتىٰ أتواصلت وي عوائل البنات الي رجعناها لأهلها وچانوا من الشهود وحچوا كل شيء
صوفر وگال
-مصطفىٰ: فضييييع ، بس يا أخي غريبين
-عوف: من ياناحية
-مصطفىٰ: لامينها كلها ومو گدها وحق ربك ، يعني انه من شفت أشكالهم وحچيهم لعبت روحي كفيلك العباس ابو فاضل رعنين يردون يسيطرون على روحهم ماكو أدري وينهم وين هاي البلاوي كلها المسوينهة
-عوف: شادين ظهرهم حبيبي اذا هاي السنوات كلها يشتغلون وماشافوا صار الهم شيء تريدهم يخافون هو ضعيف ووراه واحد قوي يستقوي بيه يسوي ألي يريده ؟ غير وراهم ظهر قوي وكل هذا الوكت چانوا مأمنين وضعهم من كل النوواحي
-مصطفىٰ: يله وهسة وينة أمانهم ؟
-عوف: لأن مو للأبد ، ماكو ظلم يبقىٰ مستمر ، وماكو مجرم مايتعاقب علىٰ جرمة لو يبقىٰ أخر يوم بعمرة ، واذا ما اتحاسب بالدنيا بعد الله يعلم شلون راح يحاسب هاي الأشكال بالاخرة
-مصطفىٰ: يشويهم شوي وعلي
-عوف: واحد اختلف على الثاني
-مصطفىٰ: سوالفهم شابعين منها من يخافون يصير واحد يذبهة على الثاني
-عوف: بعد من صاروا بأيد القانون بعد هنا لازم يرعصون عضلاتهم النفخ تفش ، هنا الحكم النهائي والقرار ماكو مفر بعد
-مصطفىٰ: عفية بلد جايبهة بس جرائم وعصابات ، يمتى أتوب هاي الوادم ولشوكت تبقىٰ الوادم تسلك هاي الطرق وانه متأكد يعرفون لابد بيوم كل واحد بيهم نهايتة هيج ؟
-عوف: مايخلصون وهاي الأشكال ماتخلص وكل ماجاها تكثر ، لأن نفسيات البشر هاي متمددة وكل ماجاها الناس تصير جشعة وما تشبع وتريد أكثر وأكثر ...
-ويسلك ألف طريق غلط ، ويستمر بيه لأن يقل إيمانة ويحتويه الشيطان بعد شتريدة يصير مصلح ديني
-مصطفىٰ: شيگولون ؟
-عوف: شيگولون !؟
-مصطفىٰ: الما يعرف تدابيرة حنطتة تاكل شعيرة
ضحكت واخذت سويچي وگمت ..
-مصطفىٰ: ها وين ؟
-عوف: للبيت حبيبتي
-مصطفىٰ: لا بشرفك وعلي أمي ما تدري بيك جاي ومن تسمع بيك اجيت ورحت ماترضىٰ
-عوف: اتعذر الي منها گلها عنده شغل ان شاء الله على غير يوم
-مصطفىٰ: خلي يولي شغلك أبقىٰ
-عوف: دنچببب أريد اروح اشوفهة چا تريدني أبقىٰ مگابل وجهك
-مصطفىٰ: والحُسين عيب تبيعني علمودها عوووف !!؟
-عوف: أبيعكم كلكم
-مصطفىٰ: هيچ صاررت ؟
-عوف: أي ، وشتريد ؟
-مصطفىٰ: نعلعله كل شيء ماا أريد
-عوف: يعني بنية ولد ماتريد ؟
-مصطفىٰ: لا ادور بنات ولا ولد ، ادور رضاك ابو العوف
-عوف: عفييية راضي عليك أبني
-مصطفىٰ: ممنون بعد گلبيي
-عوف: طيح الله حظ گلببك
-مصطفىٰ: وحظي لأن عرفتك امشي لكك
-عوف: ههههههه ثيمالا
*******
چنت واگفة وصافنة بجدر الدولمة اجتني رسالة منة على الواتس كاتب بيها ،
"منار بله تعالي"
طفيت الدولمة ومشيت بسرعة طلعت من المطبخ گلت اكييد محتاج شيء رحت اله للغرفة دخلت لگيتة متممد اتقربت وگفت يمة وهمست
-منار: ها قاسم ؟
-قاسم: شنو ؟
-منار: محتاج شيء ، غير دزيتلي رسالة
-قاسم: اي عندة صابونة رجلي مادري شبيهة
-منار: شبيهة ؟؟
-قاسم: ماتوغف .. شووو تعاااي
گالها وسحبني من أيدي حيل لطشني بيَه
-منار: هااا هاااا !!؟
-قاسم: رجاءاً لتعبر الحدود
رخت ملامحي وضحكت بصوووت من گالها وهو يقلد حركات وجهي من احچيها
-قاسم: ادري شنو جايتني من بغداد وما شفتج إلا مرتين شنو جاية لرغد وأمي لو جايتني وين صايرة هاي
-منار: اي لعد شتريد ابقىٰ يمك ؟
بوز شفتة وگال
-قاسم: چا مو هو هذا المفروض ؟
-منار: لا مو هو هذا
حركت روحي عنة وهو مقيدني حيل باوعت اله وگلت
-منار: شَوية اتركني
-قاسم: والزهرة ماا اهدج
-منار: هاي شنو لعد تبقيني هيچ
-قاسم: غير مرتي بس ارخي أيدية تشردين وانه ماعولت اشَوفج
-منار: خنگتنييييي قاااسم
-قاسم: اشتعل ابو قاسم هسة شمسويلج
-منار: والله ماا أروح مكان بس خفف من لزمة إيديك
-قاسم: صدك مأذيج ؟ والعباس ماا ادري جاي اتشاقة
صفنت عليه من گالها يحچي بجدية وبسرعة رخة أيديه عني ضحكت بخفة وگلت إله
-منار: شبيك ترىٰ ماا أذيتني
-قاسم: صدگ ؟
-منار: والله
-قاسم: عبالي أذيتج من لزمتج صدگ
-منار: اممم ،
-قاسم: شنوو ؟
-منار: شلون صرت ماتحس نفسك أحسن؟
-قاسم: بس من أشوفج أصير زين
-منار: واني اصير اسيا ههههههههاي
-قاسم: زين أحسن من اسيا اسيا لغافة
-منار: لا عيني اسيا وبسسس
حط وجهة بوجهي ولفحتني انفاسة وعيونة تتنقل بين عيوني گال
-قاسم: والله انه اگول انتِ وبس
-منار: تريد دولمة ؟
رجع راسة وگال
-قاسم: طيح الله حظظظ حظي
-منار: يا بس لا ما تحبهة ؟؟!
-قاسم: لا ماا احبهة
-منار: لازم تحبها لأن اني احبهة
-قاسم: انتِ شايفة الشبنت الي بيهة حشىٰ نعمة الله زواع
-منار: ميبين طعمة ؟؟ وترىٰ حلو !
عقچ وجهة وگال
-قاسم: يلعب النفس
-منار: أكثر اكلة احبهة متحبها وين انت وين اني وييين
-قاسم: احنة بكل شيء مختلفين
-منار: ديله اني اخليك تحبها
-قاسم: والله تلعب روحي منها من أشم ريحتهة أسد خشمي
-منار: اني چنت واگفة يم الجدر وبيهة ريحة منها اشو ماسديت خشمك ؟
-قاسم: اااه لا صدگ ؟! شو بله تعالي تقربي خل اشم حتى أتأكد
قربت روحي منه وهو يشمشم وحط خشمة حتىٰ بشعري شفطة شفط رجعت روحي عنة قلصت عيوني وگلت اله
-منار: هاي تريد تتأكد لو مستغلني ؟
-قاسم: ههههههههههه عمي اذا ريحة الدولمة هيچ حلوة حتى بالريوگ اكلهه
ضحكت وبقيت ساكتة وهو يباوعلي الي وعيونة تتنقل بوجهي ويتنهد ...
-منار: بيك شيء ؟
-قاسم: منار
-منار: هااا
-قاسم: خلي نتزوج
بلعت ريگ وأحس تخربطت أحوالي وصرت رمشت سريع ..
-منار: شنووو ؟
-قاسم: مثل ماسمعتي منار خلي نتزوج لشوكت نبقىٰ هيچ اول وتالي نتزوج ؟
صفنت بوجهة وبقيت ساكتة وأحس الدمعة تلالي بعيني ..
عض شفتة بحيرة من شافني صرت هيچ وماا انطيتة جواب وگال
-قاسم: تمام ، لا تضوجين اعتبريني ما گلت شيء
بلعت ريگ وهزيت راسي وگمت طلعت وسديت الباب وگفت وجسمي كله يرجف خايفة وماا متقبلة الموضوع ومشاعري متخربطة ...
رفعت راسي واخذت نفسسس مسحت وجهي وحاولت أبعد التوتر عني ومشيت دخلت يمهم گعدت بس بالي اابدد مو يمهم
أحس تخرربطت اوضااعي واتشتت تفكيري ماا أدري شصار بيه غمضت عيووني واتنهدت رفعت راسي من گالت الحجية
-جميلة: رغد يمة ماشفتي أخوج خاف يريد اله شيء؟
جاوبت اني ...
-منار: ميريد شيء اني چنت موجودة يمة
-جميلة: عفية بنيتي ، الحمدلله صاير أحسن يگدر يحرك نفسة من العملية
اتنهدت ورجعت راسي علىٰ القنفة وصافنة عليهم گالت خالة امل ..
-امل: لعد احنة نرجع مادام زوجهة صار أحسن
-جميلة: وين ترجعون ؟
-امل: ههههه خية لبيتنا لعد وين
هزت راسها الحجية بنكر وگالت
-جميلة: لا والله ... ماصار الكم غير اربع أيام يمي ماشبعت منكم ولا ارضىٰ ترحون
-امل: أكرمج الله وزاد فضلج ، والله انتم ماينشبع منكم ولا من الگعدة وياكم وكرمكم وضيافتكم بس لازم نرجع بالأخير بيتنا باقي تايه مناك
وهي جاي تسولف اندگ الجرس ، عرفتة عوف من يوم الي اجينة ينام بفندق واذا اجة يدُگ الجرس ميفوت هيچي گامت رغد فتحت الباب دخل وسلم علينا كُلنا وگعد يم الحجية گالت اله ...
-جميلة: بله علييك ترضاها ام جُمان تريد ترجع لبيتها ؟؟
طبگ حواجبة وگال
-عوف: لا يابه
-امل: ههههه بيكم البركة يوم بس كافي والله اول مرة افارگ بيتي هلگد ..
وجهة نظرة لجُمان باوع عليه لثواني وشح نظره وگال
-عوف: انه عندي رأي ورأي الله خير
-امل: تفضل يوم ..
-عوف: ليش ما تبقون يمنة بالبصرة ؟
تنقلت عيوني بين الموجودين وثبت نظري علىٰ جُمان الي باوعت الي بنظرة خاطفة وگالت اله بأستغراب
-جُمان: شلون هاي مافهمتت ؟
-عوف: يعني ناخذ الكم بيت يمنة هنا بنفس المنطقة ، اولاً ام جُمان ليش ترجعون لبغداد انتِ مرة وحدانية ومريضة هنا تغيرين نفسيتج وتگعدين وتسولفين ، يمج الحجية ويمج رغد واحنة موجودين اعتبرينا ولدج
گالت الحجية بفرح ...
-جميلة: اي والله يا زينة من راي
هزت راسها بعدم رضا وگالت ..
-امل: لا يوم ما ترهم
-رغد: ليشش خااالة ؟؟ بالعكس انتِ تحتاجين نفسيتج تتعدل وترتاح وتخالطين وتسولفين حتىٰ تتحسنين بسُرعة وي العلاج
-امل: يا خالة اني جبت كُل عمري عاايشة ببغداد وحدي اني وبنتي هسة من تاالي وكت اعوفها وين اگدر
-جميلة: يابعد اخيتج الوحدة ماتنراد دوم ، يحتاج اله فترة بس يرتاح بيها بس مو دوم لأن تسوي حالة نفسية وتكدر الصدر ..
-عوف: وهاي ظروف الدنيا انتِ والبنات مايصير تبقون بمنطقة ومُكان حتىٰ مالكم عرف بناسها على الاقل هنا يمنة خطوتين تحتاجين شيء انه موجود وقاسم موجود والحجية ورغد كلنا موجودين يمج
-جميلة: والله نحطكم بين عيونة ، وأفرح بيكم علواه ترضون ساعة المباركة هاي
سكتت واتنهدت بعدها نطقت وگالت
-امل: والله ماا ادري ، بكيف البنات يخية
-جميلة: يااع چنتنا مكانهة يمنة بعد ، وجُمانة بنيتي ترد طلبي ؟
حكت خدي بخفة شنو اليوم ناويين عليه كُل شوي يهبطوني بالزواج ..
-جُمان: حشىٰ كلامج ماينرد ، بس حجية اني هاي السنة أرجع أكمل دراستي وجامعتي هناك يعني ماا اگدر
-عوف: سهلة هاي مو مشكلة
باوعت اله بعدم رضا وعقچت وجهة عليه حولت نظراتي عليه يباوع الها والابتسامة علىٰ وجهة رجع گال
-عوف: ميخالف فكروا علىٰ راحتكم ، بس رجعة لبغداد هاي الأيام ماكو
-جميلة: لا وين نسد الشارع عليهم
ضحكت رغد وگالت ...
-رغد: اصلاً بعد ماكو روحة لبغداد مادام حطهة براسة وراس الحجية الفكرة
باوعت لجُمان الي چانت ماراضية وواضح علىٰ وجهة شوية ونهضت طلعت ......
******
دخلت للمطبخ وأحس فورنيييي فووررر يتعمد يتعمد ينرفزني صرت أروح وارجع اباوع علىٰ الباب يمتىٰ يفوت شوي واجة يمشي برهاوة ويبتسم وگف ورجع ظهرة علىٰ الباب
باوعت اله واتكتفت زفرررت بقلة صبر وحچيت
-جُمان: شلككك بهااي السالفة عوف ؟؟!
-عوف: يا سالفة ؟؟
-جُمان: سالفة البيييت !!
باوع بأستغراب هز راسة وگال
-عوف: ليش اكو شيء غلط مجرد رأي؟؟
-جُمان: رأيك غلططط !!
-عوف: شلون بله فهمييييني ؟
زفرت بغضب وحچييت ..
-جُمان: عوف اول شيء احنة ماعندنا بيت مُلك حتى تريد نبيعة وبفلوسة نجي ناخذ بيت هنا ، ولا أكو شيء يربطنا هنااا حتىٰ نبقىٰ ، ودراستي ، وجامعتي بغداد !!!
-عوف: خلصتي ؟ هنة هذن ؟
-جُمان: انت صُدگ تحچيي !!
عدل وگفتة وأتقرب وگف گدامي وگال
-عوف: ليش مُصرة علىٰ انُ تبقين ببغداد ؟؟
-جُمان: لعد ؟
-عوف: ماا أعرف إصرارج دوخني !
-جُمان: داگُلك جامعتي !؟
-عوف: انقلج للبصرة
-جُمان: راتب ابوية ؟
-عوف: اجيبة الج
-جُمان: دكاترة ماما الي داراجع عندهم !
-عوف: أخذكم لأحسن دكاترة بكل العرااق
-جُمان: اهووووو !!!
-عوف: فهميني العلة بالضبط شنووو ؟
صفنت بوجهة وهو مقلص عيونة ويباوع الي منتظر ردي
-عوف: ااي ؟
-جُمان: ماكو علة
-عوف: ترىٰ هذا كله لخاطرج ؟
ميلت راسي بأستغراب ...
-جُمان: شنوو ؟
-عوف: لخاطرج ، وعلمود صحة امج ونفسيتهة ، ماجاي أشوف وجودكم هناك مرتاحين بيه ، ولا امج مرتاحة تعبانة ومحد وياكم جااي تفتهميني ؟!
-جُمان: وهاي شدخلهة بهاي ؟؟
-عوف: يعني يرضيج ؟ امج مريضة وانتِ بس وياهة زين صار وياكم شيء لا سامح الله شلون ؟ ليش تعاندين !!
-جُمان: مجاي اعاند !!
-عوف: چا هاي شيسموونهة ؟
نفخت بحييرة غمضت عيوني وسكتت رجع گال ...
-عوف: قاسم يريد هاي الفترة يتزوجون هو ومنار
فتحت عيوني بصدمة ورديت ..
-جُمان: هااا ؟
-عوف: اي
-جُمان: علمود هيچ أقترحت هذا الاقتراح ؟
-عوف: لا مو بس علمود هاي ، هواي أشياء بأقتراحي ، بس منار من ضمنهم
-جُمان: والله ماا اعرررف !!
-عوف: تعوفينهة وحدهة وترجعين ؟ تعيشين وحدج وكل وحدة بمُكان ؟
-جُمان: انت تريدني أعيش بالبصرة وخصوصاً يم بيتكم
ابتسم وحك طرف أنفة قلص عيونة وگال بطريقة خبيثة
-عوف: أحتمال ؟
-جُمان: لا اني ماا تمشي ويَاية الاحتمالات
-عوف: اي أريدج تعيشين يمي قريبة عليه وگبال عيني
-جُمان: هم خايف عليه ؟
-عوف: طبعاً خايف عليچ ، چا ليش بالي كله يمج ؟
-جُمان: هواي مقيدني بخوفك !!
-عوف: اقيدج بخوفي وحُرصي عليج ولا اعوفج للخطر والتهلكة ،
-جُمان: ليش تخاف عليه هلگد ؟
-عوف: مو بيدي
-جُمان: بسبب الي خطفوني ؟
ضحك بخفة وگال
-عوف: مو گدامج لزمناهم ؟
-جُمان: اي اعرف ، بس حسب الي عرفتة وسمعتة انُ مو بس ألي أخذوني بعد ومتفرقين ..؟
-عوف: العرج بكبرة انگطعع ..
-جُمان: شنووو؟؟
ثبت نظرة بعيوني وگال بلهفة ..
-عوف: حگج ما ضاع رديتـه ..
رمشت بعدم فهم واستيعاب وكمل كلامة ..
-عوف: اليوم حاكموا الثلاثة الي خطفوج
اخذت نفس انشگ صدري شگ منة ..
-جُمان: شنوو عوف عفية صدُگ تحچييي !!
-عوف: والله العظيم ،
حطيت أيدي على صدري ونزلت دمعة مني ماا أعرف شنو صار الي رجفة سرت بجسمي وفرحة اتملكتني دموعي جاي تنزل بس مو دموع حزن دموع سعادة ..
دموع جاي تثبت ألي انُ الحق مايضيع ، والي أذاك الله راح يرد أله الأذية بأقسىٰ طريقة
والي يصبر ويسلم أمره لله .. راح يجبر بخاطرك هواي راح يسعدة ويرضيه ..
دقائق بس ، وگعت مني دموع فرحة چنت انتظرها بعمري ، اي چنت أنتظر عقابهم بفارغ الصبر چنت انتظر أسمع كلمة أخذوا جزاؤهم ...
-عوف: ليش تبچين ؟ مسحي دموعج محد يسوىٰ تبچين علمودة
ضحكت ورديت ...
-جُمان: دموع سعادة ، وحق ماضاع
-عوف: مايضيع الحگ ولا بيوم من الأيام ممكن أسمح بـ انُ حگج يضيع
-جُمان: زين شنوووو اتحاكموا بس لأن خطفوني !
-عوف: الحكم چان ناتج عن كل أفعالهم ، عن كل شيء سووه ، مابقىٰ شيء مدثر كل شيء وضح
اتلبكت وماعرفت حتىٰ شلون اتشكرة بس وضعي چان واضح يشرح اله شگد اني سعيدة مو بس سعيدة لأن اخذ حقي سعيدة لأن أخذ حق هواية ناس أذوهم وارتكبوا بيَهم أفعال شنيعة ما تنوووصف !!
-عوف: يلا يمعودة مسحيهن ولا تبچين يرحون فدوه لدموعج
مسحت دموعي ورفعت راسي اتنفست براااحة رااحة باوعت اله وگلت
-جُمان: شكراً عوف
رمش بثقل وهز راسة بأبتسامة ..
-عوف: ماي العين
دنسولف ورموشي بعدهي رطبة من الدموع ومنحس أله رغد فاتت للمطبخ ارتبكت وهو ياجبل ميهزك ريح باقي علىٰ وگفتة حتىٰ ما أتحرك صفنت بوجهي لثواني وفزت
-رغد: احمممم شسمة انه جاية اخذ ماي
-جُمان: أخذي حبي ، واني هم خلص كلامي وي عوف
رفع حاجبة بعدم رضا وابتسَمت اله وطلعت ....
رحت دخلت بغرفة الضيوف الي مخصصة النة نمت على ظهري وكُل شوي اتنفس بسسسعاادة وراحة مرتاحة أحس هوواية ...
فاتت عليه منار واني حلگي واصل لأذني اضحك وماا أعرف على شنو بالضبط ؟
-منار: شنو دتضحكج غزيلاتج ؟
باوعت الها وسكتت بقيت مبتسمة وسارحة رجعت ضربتني علىٰ أيدي وگالت
-منار: ولچ انتِ شبييييج تضحكييين وحدج !!
-جُمان: يبووووي حرررام !!
-منار: لا شنو سولفيلي ليش دتضحكين بشنو دتفكرين
-جُمان: ايبببااخ تردين تفوتين بعقلييي بعد وتعرفين بشنو أفكر
-منار: اي عيني صديقتج ومن حقي
نهضت نفسي وعدلت گعدتي حطيت أيدية على وجهي بأبتسامة وبديييت اسولف الها وهي كُل شوي تفز تضرب أيديها بحمااس وفرح لحد ماا خلصت السالفة رفعت أصبعها وگالت ...
-منار: عزززا عزززا كُل هذاا مسوي الج !! وبكل مرة يوگف وياج لحد متاخذين حقققج وزيييادة بعد !! عزززا وحق الله يحببببج
-جُمان: اهوووووو اسكتييي
-منار: لعد كُل الديسوي لوجه الله!!
-جُمان: أدري ترىٰ
فتحت عيونها وگالت
-منار: شنو تدريين !!
-جُمان: يعني ادري الي ديسوي علمودي
-منار: اييي ؟؟
-جُمان: اي شنو بعد يعني أعرف
غمت نفسها بأيديها وگالت
-منار: امدانييييي لعد متعترفون لبعض
-جُمان: شنعتررررف انتِ هم ؟؟
ضحكت ضحكة طويلة من كُل گلبها وغصت بيها هم وگالت...
-منار: يعني دتقنعيني انتِ معندج مشاعرج تجاهة هههههههههههه والله عليج سوووالف ياجُمان ضحكتيني هههههههه
-جُمان: وسم وزقنبووت شبيج اتهيلگتي عليه
-منار: ههههههههههههه
گلبت عيوني بملل وگلت
-جُمان: يعني ماا أعرف اني
حچيتها وأحس لخبطة صايرة عندي وهوسة انتفضت وگلت
-جُمان: اهووووو ماا أعرف ماا أعرف شنو اريييد !!
-منار: الحمد لله والشكر جدرية وغطاها
-جُمان: شلون يعني ؟؟
-منار: يعني اني هم ماا أعرف شنو أريد ، ومشاعري مخربطة ومساع فتح وياي موضوع الزواج يگُلي خلي نتزوج
-جُمان: اي حتىٰ عوف گال الي
-منار: شگااال الج يررييد يتزوجج !!
-جُمان: متسكتييين انتِ هم !! گال الي علىٰ زواجكم
زفرت نفس بضيق باوعتلي وگالت
-منار: جُمان قاسم طيب هواية ، وحباب وماا أريد اكسر بخاطرة مشفتي شلون گالها الي ومن شافني وضح عليه التوتر والتردد حتى نبرة صوتة اتغيرت ...
-جُمان: انتِ اساساً زوجتة قانونيًا وشرعاً بس الي عرفتة يردون يسوون عرس لأن عندهم أصدقاء وناس ولابد قرايب هم ..
-منار: رجفت شوفي رجفت ، أخاف مترددة ، أخاف يتزوجني وياخذ الي يريدة مني ويبطل يحبني يشمرني ، ويعايرني بأهلي لو بأبوية
-جُمان: لچ انتِ مو تووة گلتييي حباااب !!
-منار: بس متعرفين ورة الزواج شنو يصير كُل شيء يتغير تكتشفين هواية أشياء چانت ممعروفة ومُبهمة بالشريك !!
-جُمان: لتفكرين هيَچ اتوكلي على الله والله قاسم ماكو منة وأني اشوف الحب بعيونة الچ ولو ميحبج ميخطي هلخطوة ويساعدج من عمامج وظلمهم بيها ترى ماا اهتم لا لمسألة ابوج ولا اهلج بس انتِ دتفكرين بيهه
تباوعلي وساكتة ضربت أيدها
-جُمان: ولتنكرييين عفية واضح عليج انتِ هم تحبينة ومن زمان بس انتِ مشاعرج مخربطة چانت
-منار: ولا زالت ..
-جُمان: خلص منار حطي حد الموضوع وراچ وراچ قوي نفسج وصدگيني كُل الشكوك الي چانت دتمر بعقلج بعدين تكتشفينهة مجرد وهم وشيء مموجود يحبج والله ميكسر بخاطرج صدگي
-منار: أعرف وراي وراي السالفة ، خليني أفكر بس
-جُمان: تمام فكري
-منار: جُمان ليش طنگرتي من عوف فتح موضوع البيت ؟ واني شفتة صحيح كُل حجيهم صحيح
-جُمان: شلون ؟
-منار: يعني اني اذا اتزوجت تبقوون وحدكم والله مااقبل واعوف كُل شيء وارجع يمكم ومستحييل الحجية وعوف يقبلون اذا قبل چانت ام علي تفوت وتطلع على الأقل هسة ماكو يعني جُمان دتفكرييين بالموضوع خالة تعبانة مو مثل قبل قوية وهي الي تدبر امور كُل شيء !!
-دتشوفين وضعهة ، شلون تقبلين تبقون وحدكم وبس انتِ وياهة الوقت يخوف !! ومتعرفين شنو يصير والله بلحظة بصر تتغير الموازين
-جُمان: اوووف ، أعرف كل شيء ومُدركة للوضع اني
-منار: لعد ليش هيج انتفضتي واتغير وضعج ؟!
اتنهدت ورديت بتعب ..
-جُمان: منار ديگُلج بيت بنفس منطقتهم ، انتِ مستوعبة ؟ احنة بيت معندنا حتى نبيعة وعلى الاقل ننطي قسم من المبلغ ، دتشوفين بيوتهم هنا شنو وشگد غااالية شلووون ومنييين ترىٰ انييي هذا الموضوع الي شاغلني بسس مو عبالج صدُگ جامعتي وغيرها أعرف اكو حل بس چنت اتحجج بيهاا ..
-منار: احيي !! راحت من عقليي السالفة
-جُمان: لعد شعبالج يعني اني ماا أفكر بماما مداشوفهة مرتاحة هنا ومتونسة حتى نفسيتهة اتغيرت خصوصًا وي الحجية داحس حييل حييل ارتاحت وغيرت جوو بس شبيديي منار !!
بقينة اثنينة نباوع بحيرة وسكتنة لأن نعرف السالفة مليووصة ...
ومرت الأيام عوف قليل اشوفة لأن ينزل واجب وميجي للبيت هنا يروح فندق مع العلم طابق الفوگ اله وحدة بس ميفوت وينام هنا بس كُل ميصير عندة وقت يخابرني لو يراسلني ...
واني بهاي الأيام كُل يوم اكل راس منار أكل حتى توافق وهي اصلاً تريد بس خايفة لحد ماا فد يوم زهگت مني ومنها هم وگالت
-منار: يبوووووووووو تعبببت من التفكييير !!
-جُمان: عفية اني هم زهگت وتعبت منچ ميفيد
وگفت وهي تاكل بأظافيرها بتوتر وگالت
-منار: هسة اجي
-جُمان: ويين مولييية
مجاوبتني وطلعت تهروول مدري ويين فتحت تلفوني چنت مراسلتة بس قليل كُلشش يفتح نت من ينزل واجب لگيتة داز الي رسالة
"انه بالفندق ، توني وصلت راح انام بس اگعد اجي عندي موضوع وياچ مهم كلش "
وراها كاتب
"مششتاقلج ، ماي العين "
ويمهة قلب أحمر ...
ابتسمت ودزيت اله قلب وطلعت وصدري احس تطيير بيه فراشات صايرة أشتاق اله هوواية من ينزل واجب وماا احصلة اتخببل وأريد بس اشوف رسالة منه
وصرت أفكر بكلام منار ، كُل يوم وأفكر بكُل شيء ديسوي علمودي واني مجاي اللاحظ لأن ملتهية بحياتي ومصايبهة !!
داسترجع كُل موقف ، كُل كلمة ، كُل مساندة ، مو عادي أبد مو عادي وكُل شيء داسترجعة ديخلق مشاعر بداخلي مو طبيعية تجاهة ..
******
وصلت يم باب الغرفة وگفت گدامهة وقويت نفسي وطرقت الباب طرقات خفيفة اجاني صوتة
-قاسم: تعاال
دخلت وشفتة الحاسبات يمة على الچرباية وديشتغل من هاي لـ هاي رفع راسة وأبتسم من شافني ..
-قاسم: تعاالي ليش واگفة ، ماا عبالي انتِ
اتقربت گعدت يمة سد الحاسبات وثبت نظرة عليه واني متوترة وجسمي يرجف مد أيدة لزم ايدي الترجف وهمس
-قاسم: بعد حيلي ، ليش ترجفين بردانة ؟
-منار: قاسم
-قاسم: بعد حيله
غمضت عيوني وأحس اجتني قوة لدرجة نطقتهة بسُرعة
-منار: اني موافقة على الزواج
-قاسم: هاا ؟؟
-منار: موافقة
-قاسم: بطلي كلاواتج ، ناصبة عليه
-منار: لا والنبي داحجي حقيقة
-قاسم: عليج الشريفة بنت الحسن ما تشاقين ؟
هزيت راسي بمعنى " لا "
ضحك بأستهزاء وعدم تصديق وگال
-قاسم: كلاواتج شااابع منهن
-منار: يبووووو مداچذب والله والله اني موافقة على الزواج خلينا نتزوج
بقى يرمش بوجهي سريع ...
-منار: شنو قاااسم بطلت تريييد نتزوج !!
-قاسم: ولچ ياهووو البطططل انعل يووومي اذا أبطل
-منار: لعد شبيك ساكتت
-قاسم: غير مَا مصدگ كفيلج العباس شگيتيني شگ لدرجة ماجاي استوعب أنتِ موافقة
-منار: فكرت ، وگعدت وي نفسي هواية وهذا قراري النهائي متأكدة منه ..
اخذ راسي وقبلني منه قُبلة طووويييلة ابتعد ذب نفس وگال
-قاسم: والله أعزج واغليج واحطج فوگ راسي ، وهاي عيونج انطي دم روحي لخاطر ماا ابچيها بيوم والله أدللج وانسيج كُل مر مريتي بيه بحياتج واثنينة نبدي صفحة جديدة مختلفة بيها بس انه وياچ ...
- اميرتي ونوري ومناري بظلمتي احببببببچ ...
