رواية قيود العوف الفصل الخامس والثلاثون 35 بقلم ريتا

انتوا تعرفون بقناتي بالتلي السبب شنو بعدم تنزيلي للبارتات مايحتاج اسولف بعد استمتعوا بارت طويل وراه راح نفوت بدواهي 🤏🏻

شبابات صوتوا دوسوا علىٰ النجمَة لتنسون مُهم🤏🏻

_________________________________

- اميرتي ونوري ومناري بظلمتي احببببببچ ... 

-تحبنيي ؟

-متعدي الحب بيچ انه

-منار: من يمتى تحبني ؟

-قاسم: من اول يوم شفتج بيه دخلتي براسي وماگدرت أطلعج منه بعد 

-منار: بالجامعة ؟

-قاسم: اي ، من اليوم الي انطلق بيه الحدود وتكشين بيه بأيدج عبالك گدامج ذبان 

حطيت أيدي علىٰ خدي وأحس حرارة تطلع من وجهي من الخجل وشعور حلو حاوطنيي هزيت راسي وحچيت ... 

-منار: ماچنت أفكر ولو لحظة انُ ممكن تكون تحبني

-قاسم: كل هذا الجاي يطلع مني وماتفكرين ؟

-منار: لاا أبد 

-قاسم: لا يا الله وما سألتي نفسج فد يوم ليش عقد عليه هيچ ليش يحاول يتقرب مني ساحل روحه سحل يجيبهة منا يحطها منا !؟

-منار: لا ، لأن حسيت انتَ عقدت عليه بس حتىٰ متخليني أطوف بذنب أبوية وتنقذني من موضوع الفصلية .

-قاسم: طبعاً لا شك بهذا ، بس اتخبلت من اجاني عوف وفتح الموضوع وياي عقلييي طفر من راسي انتِ ترحين فصلية كل شيء گمزز عندي 

-منار: ليش ؟

-قاسم: ماا گدرت حتى أتخيل ترحين من أيدي وشلون روحة لا ترضي الله ولا عبادة فكرت بيج من سمعت بالفصلية كل فكري صار شجاي تحس شلونها هسة ؟ وماگدرت أصبر أبد ، وبنفس الساعة أجلنا كل شغلنا وطلعنا لبغداد حتى الوقت اختصرة عوف بالسرعة

أرتفع صدري أثر تنهيدتي وأردفت 

-منار: متحس انت متندم عليه 

-قاسم:لا خالي ولا راح احس 

-منار: يعني مراح تتندم !

-قاسم: شبيج منار ليش اتندم منين تطلعين هاي السوالف انتِ 

-منار: اوووف يعني باچر إذا أهلك او الناس عرفوا بيه اني أبوية مجرم ومعدوم واهلي شاردين واني رادوني فصلية ومحد وراية كل عمامي اتبروا مني من عقدنا بدون علمهم وخوالي ميعرفوني وين الله حاطني اصلاً ، وكل هاي الهوسة والقيل والقال

-قاسم: ياقيل ياقال ليش انه منو يهمني غيرج ؟  انه أهلي الي گدامج وعرفتيهم ، غيرهم ماعندي أهل وبعدين شنو زعاطيط ونهتم لحچي العالم وأبن أمة اليفك حلگة ويحچي

                                            

              

                    

أشر على گلبة وگال ..

-قاسم: ومادام هذا قافل عليج لو شما تصيرين انتِ بعيني ما تتغيرين وما اگدر أشوفج غير " مناري ولهفة روحي الوحيدة " شتحچين انتِ 

 أستمع اله وعيوني تلمع من الفرح بكلامة اخذت نفس طوويل وأحس روحِي ارتاحت چانت تريد تسمع هيج شيء حتىٰ تهدأ الضجة الي بداخلهة ..

-منار: چنت خايفة ومترددة كل بالي انُ تريد نتزوج بس گدام الناس وعلمود متوصلني حچاية وأتاذة

-قاسم: أكسر سنونة بحلگة اليجيب طاريج بكلمة وحدة

باوعت لعضلاتة وضحكت ..

-قاسم: ليش تضحكين ؟

-منار: على هاي عضلاتك مو بس تكسر سنونة تكسرة من الطول للطول 

-قاسم: اليوصل يمچ ويغثج لو بنص حچاية أفصمة فصم 

-منار: ااممم 

صار يحرك بحواجبة ويلمح الي علىٰ شيء بس مافهمتة

-منار: شنو ؟

-قاسم: وانتِ ما الله هداج شوية ولينها من يمج بعدج تضوجين مني وما تگدرين تتقبليني وتلعب روحج 

بهت وجهي من أتذكرت ذاك اليوم من گلت اله هاي الحچاية .. 

-منار: لا .. شسمة چانت بلحظة عصبية وماچنت مفتهمة شيء من حوالي بظل الظروف الي مريت بيها ، ماچنت اقصدها 

-قاسم: لا شلج بيهة گلتيهة بعد انتِ 

-منار: مچنت اقصدها صدُگ ترىٰ والله 

-قاسم: لا انتِ ماتطيقيني بعد عليمن تضمينهة

زمخت بصوت ..

-منار: لاااااا مو گلنة لاااا 

رخت ملامحة وچانت واضحة عليه شبَه الابتسامة ..

-قاسم: يعني تنكرين !؟

-منار: اي يعني لتگول متطيقيني !!

قرب نفسة وسلهم عيونة ..

-قاسم: يعني ترديني ؟

-منار: اوووووو ماا أعرف ، مشاعري مخربطة ، ومتوترة لتسألني هيچ سؤال هسة 

-قاسم: ميخالف المهم أنُ أحس بيج ترديني لو هلگد وفاهمج وحاس بيج عادي وطبيعي عندي يقين انُ بعد الزواج راح تتغير نظرتج عليه من تعاشريني 

            

              

                    

-منار: شلون ثقة هاي 

-قاسم: مو سالفة ثقة بس من تعاشرين ابنادم تعرفينة شنو ومفاهيمج تتغير من ناحيتة أكو للأفضل وأكو للأسوء 

-منار: انطيني وقت .. 

-قاسم: الوقت واهلة كلهم ألج 

-منار: يعني مراح تضغط عليه ؟

-قاسم: أبد والله شعندنا العمر طويل

-منار: حتىٰ بعد الزواج ماراح تتطلب ؟

-قاسم: شتطلب ؟

-منار: ااحم ، يعني هيج وهيج شغلات او شيء !؟

-قاسم: ها شغلات وهيج 

-منار: اي 

-قاسم: إذا تبقين حلوة هيج ماا اضمن روحي بعد 

-منار: شنووو ؟

ضحك وگال ..

-قاسم: لا والله ماا اتطلب ولا أريد منج شيء انتِ مارايدتة

-منار: فرحتنييي والله 

-قاسم: بس شلون

-منار: شلون شنو ؟

-قاسم: شلون أعرف انتِ ترديني وهاي الشغلات چا خو مانبقى صحراء لازم فد يوم نزرع زرعة وتخضر 

-منار: ها .. اني اجيك

-قاسم: ههههههههه

-منار: شبيك تضحك شوو !

-قاسم: والله ضحكتيني من گلتي انتِ تجيني 

-منار: اي يعني من أحس نفسي مستعدة اني اجي والله مراح اتردد 

-قاسم: ربحنة ، رجلية تصير بالگبر وماا أحصل شي

-منار: اوووي قااسم كاافييي ترى بعدنة ممتزوجين !!

-قاسم: لا احنة متزوجين وعاقدين ورايحين ، بس راح البسج بدلة

-منار: تلبسني ؟؟

-قاسم: يلا انتِ تلبسينها 

-منار: استغفر الله اوووف كافي 

-قاسم: هو شمسوي قاااسم وكافي گاعد عاقل ويسأل المضطهد 

-منار: اممم 

حچة بحماس ولهفة .. 

-قاسم: يعني نحدد موعد العرس !؟

-منار: هااا 

-قاسم: خااااب يمعووووودة

-منار: ههههههههه اووي اتشاقة ، اي حدد بكيفك

-قاسم: يا يوم تردين انتِ ببالج يوم ؟

-منار: لا متفرق عندي 

باوعت اله مبتسم ووجهة الفرحة مبينة عليه..

            

              

                    

-منار: فرحان بيَه ؟

-قاسم: اااخ ، بس الله يدري شگد فرحت وارتاحيت روحِي استچنت 

نهض نفسة ومشىٰ خطوات وهو فرحان وعاف شغلة چنت اباوع اله وصافنة بيَه گال 

-قاسم: شو گاعدة ؟

-منار: لعد شسوي اطفر 

اجاني لزم أيدي بأيدة ونهضت صار وجهي قريب على وجهة وگال .. 

-قاسم: چا غير نگلهم بموعد زواجنا 

دفعت من صدرة وگعدت ...

-منار: شنوو ، والله ولا اروح اني استحي 

-قاسم: تستحيين ؟

-منار: اي أستحي 

-قاسم: تستحين منين غير جاي نگلهم على موعد زواجنا 

-منار: لا لا ماا اروح ، أستحي ماا

-قاسم: تستحين شنو طالعتلهم حامل بتوم

-منار: شبييييك 

-قاسم: اي غير افتهم منين مستحييية

-منار: ياا لعد شنو أطلع اگلهم على موعد عرسي وين صايرة هاي 

-قاسم: ياصبررر أيووووب

حچاها وطلع نهضت روحي مشيت وراه فتحت باب الغرفة شوية وشفتة دخل يمهم طلعت أمشي بخفة خطوة خطوة ولطشت روحي بحايط المطبخ وأسمعة يحچي وياهم ومن گالهم الهلاهل صارت تمطررر من جهة رغد والحجية وحتىٰ خالة امل هلهلت وكُلهم فرحانين هوواية وطايرين من الفرح ...

ضحكت وخجلت بس كل هذا چان بشعور راحة داحس نفسي وسط ناس غريبة عني وفرحانين بيه رغم كُل شيء ..

درت وجهي جاي أروح اندگ الجرس بقيت متصمنة بمُكاني ماا أدري طگتني فهاوة لو شنو بهلحظة ! طلع قاسم شافني واگفة باوعلي وقلص عيونة بخبث حرك حواجبة وكأنهُ يگول 

-ها اللوتييية چا مو تستحين !؟

عافني وراح فتح الباب واني طفرت يمهم سمعت صوتة وهو يضحك عالي دخل باوع لرغد وگال ..

-رغود كاسات ماي يمي مصطفىٰ 

هزت راسها وگامت طلعت اله من البراد وانطتهم اله باوعت اله الحجية وگالت 

-جميلة: يااع هذا مصيطف مشتاقة اله ولك صارلي هواي ماشايفة طرگة وجهة وين غاط المسربت هذا

-اي يمه 

-جميلة: روح روح بعدين أجي أسلم عليه 

-رغد: يامصطفىٰ ؟

-جميلة: صديقهم امه رفيجتي من گبل 

-رغد: شنو هاي چا شو صديقتج وماا أعرفهه انه 

-جميلة: ميَخالف أعرفج عليها بعدين 

باوعت لخالة امل وگالت ..

            

              

                    

-جميلة: اي ام جُمان شلونج على العلاج ماتحسين روحج احسن وأهون من گبل ؟

-امل: لا خية الحمد لله حتى جسمي احس مرتاح ومابيه وجع 

-جميلة: جُمانة دائماً حركي رجليهة 

-جُمان: ماعفت التمارين داسويهن لرجليها كُل يوم من أخذتها للطبيب لهذا اليوم 

-جميلة: شتشوفين انتِ ؟

-جُمان: والله بالبداية بصعوبة چنت اگدر اسويهن الها ابد متستجيب وياية ورجليهة ميتحركون نهائياً بس هسة احس أهون واحسن صح ماكو حركة بعدهن بس أحس مو ميتات مثل الأول بأيدي 

-رغد: يعني مثل العلاج الطبيعي دتسويلهة ؟

-جُمان: اي 

-رغد: والله كفو ، يحتاج وقت بس هواي 

-جُمان: صارلي أشهر داسويلها وبعدني مستمرة ولو يبقى أخر يوم بعمري هم أبقىٰ اسوي لحد مَا أحس بالتحسن 

چانت گاعدة يم خالة أمل وفتحت ايديها إلها حضنتها وگالت 

-امل: روح أُميمتها 

واحنة گاعدين ونسولف إتصل تلفون رغد جاوبت سولفت شوية وجحظت عيونهة وباوعت بذهول وطگتها بضحكة ..

-جميلة: يااع شبيچ يمه شجااج

بقينة نباوع الها بتساؤل وهي تخابر وتسمع گالت بضحكة ..

-رغد: اووووووف حييييل عساها بأبو زايددد ،  اي اي عوف أحس مااااي بارد ونزل على گلبييي

-جميلة: شنهييي ولچ شصصاارر 

أنوب رجعت گالت ..

-رغد: دختووووولي 

سدت التلفون والضحكة مافارگتهة وگالت ..

-رغد: هههههه يمة غرور ابنها جايب چلب بوليسي وراكض وره غرور ومعضعضها تعضعض مزلغها تزليغ

-جميلة: ياااااع المدهور منين جايبة 

-رغد: اوووف اندري بس والله عاااشت أيده يبووووووي أحس فرفحتتت 

-جُمان: غرور نفسها الي نعرفهة ؟؟

-رغد: اي هي نفسها السعلوة

-منار: شعجببب عضها الچلببب عاااد اثنينهم من نفس الصنف

-رغد: لا لچ حشىٰ الچلب عندة صفة الوفاء على الاقل 

-منار: هم صحيح 

-جميلة: ولچ خاف هسة يصير بيها داء الكلب وتصير تنبح 

-رغد: علوووواه الله يسمع منج يمه 

-جميلة: لا مايصير بيهة شيء 

-رغد: يمه عااااررررر طبعاً 

-امل: هههههه منو هاي غرور وهيچ تكرهينهة ؟

            

              

                    

-جميلة: مرت أبوهم خيه

-رغد: عدوتي بالدنيا وبالآخرة..

ضحكت وسكتت خالة أمل شگد احب هاي الصفة بيها قليل تساؤلها وابد متحط نفسها بمواقف مُحرجة لحد ميجي الشخص يسولف وياهة بيه 

وهذي الصفة موجودة عند جُمان هم قليل تساؤلاتها .. يعني مرات اصفن واگول لعد اني شبيه اموت روحي لحد ماا أعرف شنو السالفة حتى نوم ماا أنام 

شوية وگامت الحجية راحت يم قاسم وصديقة بقت فترة يمهم وگالت راح مابقىٰ على الغدة 

حطينا الأكل وحطيت ماعون دولمة گدامة وهو يباوعلي وعاقچ وجهة مثل الماعاجبة 

طگيتة بخزرة واني احرك براسي وحواجبي كل معانيي صارت تتحرك بسكوت حتى الح عليه ياكل گاعدين واستحي افشل نفسيي گدامهم 

من شفتة مدياكلها طنگرت وبوزت أبتسم الي ومَد أيده اخذ دولماية حطها بحلكة وغمض عيونة أكلها وواضح عليه لعبانة نفسة 

ضحكتت بفرح أهم شيء اكلهاا ، بس شنو هذا السر العجيب الي يخلي شخص ميطيق أكله لدرجة تلعب نفسة منها وميحب حتى أسمهة ؟!

******

طلعت فتحت الشباك وصارت عيني علىٰ الحديقة والورد ابتسَمت واشتهيت أشم عطرهم سديت الشباك وطلعت بالحديقة 

حديقتهم أكثر شيء احبه من اول ما دخلت بيتهم حديقتهم بگلبييي وروحي ترفرف عليها اول متفوتون على الحديقة تضرررب عطور الورد بالخشم وتحسون بشعور لطيييف كُلش 

مشيت مبتسمة وعيني تناظر ترتيبها ، إذا أگول أكثر شيء مهتمين بيه بالبيت هي الحديقة ماا أكون داكذب ، 

گعدت بنص الورد واتنهدت ، صفنت واني بين العطور الي اتغلغلت داخل أنفي وبيَن التفكير والهوسة الي صايرة براسي ، 

ياتُرىٰ شنو نهاية وضعنة ووضع ماما ؟ راح اگدر أرجع اكمل دراستي وماما وضعهة مديتحسن بسرُعة إنما ببطىء ، ومحد بقىٰ النا بمُكانة هذاك حتىٰ الي وثقنة بيَهم واعتبرناهم من عندنا غدروا بينة وطعنونا بظهرنة ...

مابقت مَاما المرأة الي معتمدة عليها طول عمري ، صارت عليلة وفقدت نظرها وفقدت حركتها ، واذا رجعت أدرس ماما منو يبقىٰ وياها !!

فركتتت راسييي بقوة دختت دختت واني أفكر ميخلص تفكييريي وياخذني لأماكن داحاول اتنساها شگد ماا اگدر لحد ميجي وقتهة

بس التفكير اخخ يالتفكير من يحتل عقلك ميتركك ياخذك ويوديك بدواهي ، يصدعك ، يأذيك ، ينرفزك، يقلل طاقتك بكُل شيء حواليك ... 

التفتت بعيوني من حسيت باب الحديقة دينفتح عدلت حجابي وگعدتي ودخل عوف ماا أنتبه الي لأن چنت ماخذة زاوية وگاعدة بيها 

مشىٰ گبل حتى ما ألتفت نزلت راسي اخذت طابوگة صغيرونة وشمرتهة عليه ألتفت بأستغراب يباوع بس من لاحظني ابتسم أتقدم الي وگال 

            

              

                    

-لذة العين صايرة تتحارش ؟ 

-ههههههههه 

گعد قريب مني وگال

-شو گاعدة هنا اليوم ؟ 

-اي لأن احب الحديقة هاي أتنفس بأرتياح بيها

-اممم 

-شلونك ؟ 

هـز راسة وگال 

-يعني زين ، انتِ شلونج مرتاحة ؟

-الحمدلله 

گلتها وصفن بوجهي لثواني وأردفت بلهفة واضحة علىٰ صوتة ... 

-يـا يابـه شكد ولهان علىٰ هلعيون .. 

ابتسَمت ونزلت راسي بخجل ، ينبلع لساني وتنمسح كل الكلمات العربية من عقلي أول ميحچي وياية هيچ ... 

-مافكرتي ؟ 

رفعت راسي ورديت .

-بشنو ؟!

-بموضوع البيت 

-لا ، مترهم 

-شنو هي الماترهم أغاتي حتىٰ نرهمها ؟

-هواية أشياء مترهم ، لا لا مترهم أبد 

-ااخ يـابه بس لو تحچيلي الما ترهم شنو 

-لأن مترهم ! 

-أرهمها وداعة عيونچ ، بس حاچيني وفهميني العلة المانعتج ماداخل عقلي رفضج لأن ماكو شيء يجبرج على وجودج هنا ولا أكو شيء ينفع 

بقيت ساكتة بحيرة ، مستحيل أفتح وياه موضوع الفلوس واگُلة على سعر البيت ألي أعرفة خييالييي وحتى عقلي ميستوعبة منين أجيب فلوسة !!

أردف بصوت قاطع صفنتي وگال ..

-ميخالف لا تحچين انتِ بس أنا أعرف رفضج ليش

-ليش ؟ 

-بسبب الفلوس تفكرين بيهن وتفكرين شلون تاخذين بيت بهيچ سعر وشلون تسددينة 

عضيت شفتي بتوتر ورديت ..

-لا مو بس هذا الموضوع

-لچ عيني طاگات من جوانا وحافظج انه

-هههههههههه

-شوفي لذة عيني هسة مال اگلج انا الادفع هاي ماتمشي وياج 

أشر بأصابعة على راسي وگال ..

-لأن هذا عنييد ويابس ومايطخ ويقبل بسهولة أعرفج وراح تطولينهة وتزيدينها وتحطين بيها الف لولة وحجة 

            

              

                    

-اي طبعاً مراح اقبل بهذا الشيء

-اعرف لذلك عندي عرض يا لذة عيني يناسبج واذا ماناسبج نخلي يناسب غصب 

-عرض شنو ؟ 

-من راح تنتقلون هنا راح تعوفون بيتكم هذاك أكيد 

-امممم ؟! 

-اعتبري إيجار 

-منو الاعتبرة إيجار

-البيت التگعدون بيه هنا عيوني 

-يعني أعتبر نفسي مأجرتة منك لو شنو !؟

-عيناً ، بس مو تعتبرين هَو تأجرينة مني 

بقيت صافنة بوجهة وارمش رمشات سريعة ...

-أشتريت البيت؟ 

ابتسم وهز راسة واني بقيت مذهووولة وصافنة !

-تعرفني ماراح أقبل فـ رحت أشتريت البيت وصرت راعية حتىٰ أجرة منك !

-شنسوي يـابه وياچ اذا تختفي الحلول ، أخلقها

-ياا !!

-عوف: وهم ماراضية ؟!

-جُمان: مو ما راضية بس توصل لدرجة تشتري بيت وتصير راعية علمود أقبل اأجرة منك وابقىٰ يمكم 

-عوف: لخاطرج يالذة العين ، أوصل لهواي أشياء ماتتوقعينها 

-جُمان: شحچي !!

-عوف: الي يعجبج شتحچين اسمعج انه 

-جُمان: مابقىٰ كلام حتى اگولة 

-عوف: يعني الافتهمة قبلتي ؟

-جُمان: لا ، بعد أريد أفكر أكثر 

-عوف: لا صارت ولا استوت وحق هو علي چا شتفكرين بعد

-جُمان: ماا أعرف عوف بس ليش سويت هيچ توترت اني 

-عوف: يابـه غير أريدج يمي 

-جُمان: اي شنو السبب 

اتنهد وعدل گعدتة وشبك أيديه وهو يباوع ليگدام ..

-عوف: على الأقل مايبقىٰ بالي يمج من أنزل واجب ، وأعرف شبيج مابيج زينة لا ؟ شصاير الج شنو تردين شنو محتاجة اهلي يمج ماتضوجين ولا تبقين وحدج تهمني نفسيتج وصحتج وأريدج دوم تضحكين وروحج مرتاحة واريد وجهج گبالي أرتاح بشوفتج جُمان والله روحي ترتاح 

            

              

                    

باوع الي وأردف بصوت حنون .. 

-عوف:لچ أغاتي عيوني تقفل اذا ماتشوفج ، اجي منا وأصعد لبغداد منا بس حتى أشوفچ ويستچن عقلي !!

بلعت ريگ وحچيت الكلام الي بداخلي من زمان ..

-جُمان: ليش مهتم بيه هلكثر عوف ؟ما فد يوم انطيتني جواب أو يمكن اني مافد يوم سألتك ليش ! ليش كُل هذا الاهتمام ليش كُل هلتضحية لخاطري ليش هلمبالغة بالخوف عليه دائماً ليش اني !

-عوف: خايف من جوابي عليج جُمان جوابي الچ سطر يا إما تخطين باللون الاحمر عليه او تقرين هلسطر بقبول وتمشين بيه 

عقدت حاجبي وحركت أكتافي بعدم فهم احتلت عقلي أسئلة غريبة وتشوشت انواع الاسئلة دخلت براسي وكلامة دوخني مُبهم ممفهوم 

-جُمان: شنو يعني جوابك بيه شيء يضُرني لو شنو عوف مُمكن متحچي وياية بهلطريقة المُبهمة تشوشت أفكاري 

-عوف: "انتِ سبيشل جُمان "

تنقلت عيوني بين عيونة وأشوفة اللهفة بعيونة واللمعة من تصير عينة بعيني بقىٰ نظراتة تفترس عيوني وأردف .

-عوف: سبيشل لدرجة غيرتي قوانيني الماشي عليها كلها واختل توازني بكل شيء چنت أسوي الشيء واحسب اله الف حساب حتى الشيء العادي ادرسة من كل النواحي بس وياچ اسوي كل شيء بدون مَا أفكر 

-جُمان: لهلدرجة !

-عوف: ااخ وأكثر ، نقية وبريئة من أشوف وجهج وتصرفاتج والبرائة والنقاء الي عندج أخاف عليج مني أخاف فد يوم الوثج بتصرف مو صحيح يبدر مني خايف عليج حتى من النظرة الغلط التطلع مني ومامتعمدها 

-جُمان: مافد يوم ضريتني بتصرف غلط لو شفت منك شيء موحلو ومعيب 

-عوف: أحمد الله 

            

              

                    

-جُمان: عوف انت قلبك حنين والي قلبه حنين بعمرة ميأذي احد لا بتصرف ولا بفكرة حتىٰ 

-عوف: خايف أذيج بيوم خايف تجيج أذية مني بعمري ماخفت من شيء بس يمج أخاف حتىٰ من الكلمة الغلط الي يمكن تزعجج وتحسينها تقلل من احترامج 

-جُمان: انت مقللت من احترامي بيوم ولا هنت وجودي بكلمة من أول ماشفتك رغم متعرفني واول مرة تشوفني وچانت بأسوء حالة امر بيها بحياتي بس چان شكلك يختلف ماچنت متعاطف وياية بالعكس چان شكلك حنيين نظرتك ماحسيت بيها عطف او تخلي الانسان يحس بالكسر وينهضم ولا بكلمة حَتىٰ 

ابتسم وعيونة تلمع وگال 

-عوف: چنت أشوف الحلو بيچ ، ماشفت بيج عيب حتىٰ اهين نفسج بيه بس العيب لو لمتج على شيء مالج ذنب بيه وخطيتة على رگبتج .

-جُمان: الله يحبني وصارت مهمتك بيها اني وخلاك بطريقي 

-عوف: دوهنتيني وعلي وانه گلبي رچيچ 

ابتسمت إله بخجل گال وهو سارح بوجهي ..

-عوف: عيونچ بدم گلبي مرسومة 

رمشت بضياع وأحس من الثول والفهاوة الي طگني واني اسمع كلامة ومتسرسحة بيه راح أفشل نفسي واچفص بكلمة ماصايرة واحنة چنة خوش نسولف گلت بصوت متقطع وأني اتلفت واهفي بأيدي على وجهي 

-جُمان: الجو حار هنا سموم يذبح

-عوف: اي بس يمج السموم اليذبح

طلع جگارة ورثها وصار يزفر دخانهة بحرگة ونظرة يتنقل بملامحي ..

-عوف: جُمان وافقي على الاقترحتة عليج 

-جُمان: أشوف 

باوع الي بطرف عينة وشح نظرة ..

-عوف: ميخالف يـابه اتعايري علينا قابلين 

-جُمان: مداتعاير مداتعااايرر علييك لتگول تتعايرين عليه دااافكرر 

-عوف: چا جذب !! ماجاي تتعايرين عليه 

-جُمان: لا طبعاً بس دافكر حتى ما اتندم على قراري بعدين

-عوف: ايبَاه أخاف تتندم من قرارها 

            

              

                    

-جُمان: اي طبعاً 

-عوف: ليش تحسسيني قراراتج مال رئيس وزراء ؟

-جُمان: اااااا ؟

-عوف: والله ، على اساس ما ادري بيچ شو انتِ ماتفكرين بالسالفة تطگينهة گبل بس هلمرة تعايرتي 

نهضت روحيي ونفضت ملابسي وعيونة عليه والابتسامة أحس حاصرها ..

-جُمان: لا عيني هلمرة أفكر ، يجوز ميعجبني أبو الإيجار 

-عوف: صحيح خاف يتحارش بيج

-جُمان: كل شيء يصييير 

-عوف: اذا سواها دزيلة گوامة 

-جُمان: اووووووووف 

گلتها ومششيييت وأسمع ضحكتة ، ضحكت وأني دامشي اصلاً چنت دا أتحايل واقتنعت بموضوع الإيجار فعلاً لو بدونة ماچنت راح أقبل ابداً بس مثل ماگال راح اعتبره نفس الشيء إيجارنا نفسة راح ادفعة

ومرت الأيام وماما أقتنعت هم من گلت إلها الموضوع وگالت براحتج راحتي وياچ بـ أي مُكان تختارينة .. 

ودزيت اله اني موافقة والصدمة چان البيت مقابيل بيتهم بالضبط يعني الباب مقابل الباب بس أفتحة أشوف بيتهم 

وحددوا موعد زواج منار وقاسم الي چان يوم 9/25 والتهيت بالتحضيرات وياها كُل يوم ياخذنة قااسم نجهززز  إلها  وهذا چان سبب هم يخلينة نبقىٰ عندهم بعد ومنار متقبل اعوفهة ولو لحظة بهاي الفترة .

وحسب الي عرفتة انُ الطابق الأرضي هو اساساً لقاسم من البداية ورغم الأثاث الي يجننن بدت رغد تغير وكُله علىٰ ذووق منار تسألها وتنطيها نبذة والي يعجبهة تجيبه .. 

وفد يوم أخذنة دنجهز بس هلمرة نزل يفتر ويانة وهو لازم أيدها ويمشي بيها دنمشي وصار مقابيلنة محل نسائي مشىٰ بيها وهو لازمهة من أيدها راد يدخل بيهة وهي تجر بأيدها منه وتنتر بيها وهو قافل اله تفوت 

تقربنة يمهم كُلش وأشوف وجه منار صار أحمر من العصبية والخجل وهو يضحك ويگُلهة بصوت مسموع ..

-وولچ شبيييج تعااي نختاار بلكت الله يفرجهة عليه وتقبلين بيوم العرس 

وهي تنتر بيه وتخزر ..

-قاااسمم وخرر والله عيب شيگولون علينا الناس

-قاسم: شيگولون ؟

-منار: وخرر لا نتعاارك بنص الناس 

-قاسم: ميخالف اگلهم يابة مرتي وماتقبل تفوت نختار !! والله بلوة بلا عجبني واحد وبقىٰ بنفسي أشوفة عليچ

-منار: والله متشوووفة عليه على هاي ملحتك متشوووفة

-قاسم: ديييلا مناااري شسسسالفة 

جر أيدها ولطشها بيه وهو يضحك لف أيديه على كتفهة ودخلهة جوة غصب چنة نباوع ونسمع ونضحك ...

            

              

                    

-رغد: هذا أخوي والله فالت 

-جُمان: والله أخوانج اثنينهم فالتين 

-رغد: هاا 

باوعت الها وبلعت ريگ حجيت بسُرعة ..

-جُمان: شوو بلاا تعااالي دنشوف هنا اكو مي أحس عطشت من التفرفر يمة 

-رغد: اي عطشتي 

حچتها وهي على وجهة ابتسَامة غريبة ..

شوية واجت منار لازمة بأيديها علاليگ وصاكة على وجهة گالت رغد ..

-رغد: اگلكم كاافي انه دختت ووراي دوام شنو هاي من الصبح افتر وهسة راح تصير الساعة بـ٩ بالليل يمتى ارتاح هاي بس تحضيراتكم هيچ والله ماكووو هيج تعب

-قاسم: يلا يابة ولا تدوخ المحامية أنوب ترفع بينة قضية

-رغد: ههههههههاي اي دير بالك وخاف مني 

وصدُگ رجعنا للبيت ومرت الأيام نفسها بالتحضيرات الي متخلص وكُل ما نشتري شيء تطلع أشياء ثانية الله يساعد العروس شگد وراها تحضضضييييرات متخلصص وتشيب الراس 

واخر يوم للتحضيرات رجعنة تعبانين وفوت قاسم كُل الأغراض الي جبناها وگال 

-قاسم: انا هاي اليومين راح انزل واجب وفد مرة اخذ أجازة من ارجع ان شاء الله نروح انا ومنار نختار الغرفة ماگدرت اجيبهة بدون ماتروح هية وتختارها بنفسها 

وباوعلهة ابتسمت اله وگالت الحجية .

-جميلة: يابعد روح امك ولكك يمة فرحانة الك الگاع ماااشايلتني والله لو حيلي الاولي اهدم الگاع من الرگص 

-قاسم: الحمدلله هم يعرف الله حجية شتهدمين فلوسنا مطشرة 

-جميلة: حچاية التنگال يمدهوور

باس ايديها وگال ...

-قاسم: يمه فرحتي بيج والله ، فرحتي بوجودج سالمة وبعافيتج بنصنا الله يديمج ويخليج ويسلمج من كل شر 

حضنتها رغد وأشوف الحب يتطاير من عيونهم ، وسعيدين بوجودها ضايفة الهم روح ونكهة بالحياة 

صفنت بيني وبين نفسي وگلت ، أنُ رب العالمين عوضهم بالحجية عن أمهم وعن كل فقد وحرمان مروا بيه سبحانك ربي ميترك فراغ أبد لابد ينطي ويجبر بشيء ثاني لابد ..

*******

هاي انه كل يوم أتأخر بيه مرض مال تأخير احط المنبه على هيچ وقت وماا أفز.. ولا لا والله أفز بس أطفي وارجع بكل صلافة انام وعبالك ماوراي شيء 

وافز من الإتصالات الي ترگع عليه وأشوف روحي متأخرة ومثل كل مرة أنحصر حصرة الكفار بنار جهنم ...

بدلت بسُرعة بسُرعة وطلعت أركض لگيت السايق واگفلي بالباب صعدت وانه كل شوي اباوع للساعة تأخرت هواي واليوم موكلي يجي على الموعد الي انطيتة اله 

            

              

                    

وصلت ونزلت أمشي سرررريع دربي ماا اشَوفة من السُرعة وعيوني أتفحص بيهن الجنطة وشجايبة وشناسية !!

جاي امشي وماا أحس اله نردمت بشيء انه روحي طالعة ومتأخرة وانكفخت هسة احس دمي فار رفعت نظري وزمختت

-رغد: ماكوو عيييووون !!

-چا ماتشوفين انتِ !

-رغد: انه جاي أمشي ماشفتني انتتت شبيييك أعمىٰ 

-وانا شنو جاي أركض حالي من حالج جاي أمشي ومانتبهت 

-رغد: باوووع باووووع من تمشششيي للي گدامك

-والله انا اگول هاي نصيحتج طبقيها على روحج أنوب نصحي بيها المقابل اشو عيونج داخلة بسابع ارض وتنصحين على الشوف

جحظت عيوني ونفخت بوجهة كملت طرريقي واني ادردم شكبرة شگدة حقة ميشوف اذا اني عبالك فارة هلگدوتني وين ابين وين يشووفني الغووورلا

اتنهدت ودخلت شفت المُحامي علاء أتقدم ناحيتي وگال

-صباح الخير رغد ، أكو بنية سألت عليج وبقت تنتظرج 

-صباح النور وينهة ؟

أشر الي عليها چانت گاعدة على الكُرسي وتهز برجلهة وصلت يمهة ابتسَمت الها وسلمت .. 

-انتِ المُحامية رغد 

-اي حبيبتي انه تفضلي 

گعدت وبدت تسردليي قضيتهة وموضوعها بقينة لفترة بين الأمور المُبهمة والواضحة افتهمتها وفهمتها علىٰ المطلوب منها إنتهت وگالت ..

-والله انا بصراحة ماا أعرفج بس چنت أدور على مُحامية وگال ألي اخوي أنُ آخت أصدقاءة مُحامية 

-تقصديني ؟

-ههههه اي 

رديت بأستغراب ..

-منو أخوج  ؟ 

ابتسمت الي وميلت راسهاا وشرت الي بأيدها ألتفت بأستغراب .. 

شفتة وعضيت شفتي بفششلة نفسسسة نفسة هلولد الي عططت بوجهة أول مفتت للمحكمة رجعت نظري إلها وگالت بأبتسامة ...

-مصطفىٰ أخوي كُلش صديق مقرب علىٰ اخوانج الروح بالروح وهم أكثر والله

عرفتة نفسة هذا الولد ألي اجة ذاك اليوم ألي امة تعرفهة الحجية بلعت ريگ وصارت الفشلة فشلتييين يبووووو تخزيتي نعلعلة روح عصبيييتج ياا رغددد ...

رديت عليها بأبتسامة مصطنعة بالگوة طلعت من الفشلة ..

-ها هههه ماا أعرفة 

-ميخااالف مادام عندنا عرف بيكم بعد نتواصل ان شاء الله ونحچي أكثر بتفاصيل القضية 

-ان شاء الله عيوني 

اترخصت مني وگامت تمشي بأتجاهة نظر الي سريع وشح نظرة عني لزمت أيده أختة وطلعوا ...

زفرت ومسحت وجهي وهمست بيني وبين نفسي ..

            

              

                    

-يا هسة شيگوووول مو عيييب انتِ شبيچ الله مطيييح حظج رغد لساانج هلطول شجاج عطتي بيه 

ورجعت گلت بيني وبين نفسي 

-يوووووه يستاهل چا مايباوع اجة مدرعم ميشوف شنو غورلا على حالة واذا صديق أخوي شنو اسكتلة غييير فات بيييه مدرعم !!

نفضت أفكاري ورجعت اكمل شغلي ومر وقت دوامي بين القضايا الي عندي والجلسات طلعت الظهر من المحكمة لگيت السايق واگف الي بألباب صعدت وياه ..

وصلت للبيت ودخلت أعرج من الكعب ماا أتوب لو تتكسر رجلية وتطلعلي طگاگات بكُل مكان ماا اعوفة وما البس غير الكعب 

من اللبسة أحس ينااسب شخصيتي الترانشوز مَا يلوگلي وماا اشتريه اصلاً بالمختصر أتحمل أذية الكعب لخاطر جمال اطلالتي يكمملهااا 

اول مدخلت شمرتة وگعدت اعصر برجلية وأونون من الوجع الي بيهن بعدني جاي اعصر بيهن واندگ الجرس غلست گلت هسة تطلع وحدة تفتح الباب انه وين اگدر من التعب مابيه انهضض روحيي بعد 

شو دگ دگة دگتين محد طلعت عطت بصوووت 

-مااااااا اگوووووم والله ماابيه حييل وييينكم بنااات

شىوي واجت منار شافتني ووگفت تضحك وهي تسمعني أون من رجلية واعصر بيهن..

-ها يا مرت اخوي حتى انتِ تضحكين ع جروحي 

-هههههههههههه ادررري شموااززيج وشجابرج علىٰ هاي الأذية متگليلي 

-احبببه احببه أتحملة ميخالف وينهم شو محد ميسمعون الجرس عوف قاسم محد موجود 

-عوف وقاسم فوگ گالوا عندهم شغلهم صعدوا من زمان ومنزلوا بعد 

-ها ، عفية منار فتحي الباب مابية امشي انه متكسرة ومتگرمة يمةةة رجليييية اتگرمن 

مشت وهي بعدهي تضحك والله حقهة اذا أنه اون واضحك على روحي كون مايشوفني قاسم والله يسويني محتوى للبيت اليوم ... 

ألتفت بنظري على الصوت الي سمعتة وشفت الي گدامي أخر بشر عيوني تشتهي تشوفهن فتحت عيوني علىٰ وسعهن ونسيت وجع رجلية والون مالتي قبل شوية ونهضضت وگفتت گبالهن وعيوني تريد تفترسهن ماا أخلص منهن شنو اشرد منا تلحگنييي هنااا 

*******

فتحت الباب وشفت نسوان أثنين ووياهن بنية شابة صغيرونة عقدت حاجبي من نظرة وحده منهن تباوع بطرف عينها عليه 

عبرني ودخلن بدون ميحچن وياية ولا كلمة سديت الباب وحمدت الله وشكرتة علىٰ نعمة العقل شمالها العالم ؟ 

مشيت بخطوات ثقيلة وراهن ووگفت بأستغراب من نهضت رغد گدامهن وگالت بغضب 

-رغد: شنو هلجرأة الموجودة عندچن لدرجة توصلن هذا البيت ؟ 

            

              

                    

ضحكت وحدة منهن وگالت ..

-اني غرور وطول عمري ماا أخاف من شيء حتى تصير عندي جرأة 

عرفتها هاي مرت ابوهم الي يكرهونهة ام البلاوي والمصايب الي سولفت النا رغد عنها ...

-رغد: اويليي بعدچ تسولفين ، عبالي من عضة الچلب صرتي تنبحين 

-غرور: لتخافين ميأثر 

-رغد: چا شگد زفت اذا عضة چلب بوليسي ماا أثرت بيج نجاستج وين واصلة اايع تعديتي صنف الچلاب انتِ 

غمضت عيونها بعصبية وقبل ماتنطق نطقت الي يمهة وگالت 

-وسن: شدعووووة رغد حبيبتي جايين نسلم ونتبارك 

-رغد: تسلمين وتباركين على شنو ؟ 

-وسن: نسلم على الحجية اشتاقينة الها ، ونبارك لقاسم يگولون هاي الأيام عرسة نسمع من الغربة واحنة اهل بيت ؟!

بقيت ماخذة ركن وواگفة أستمع الهن ومانطقت بـ ولا حچاية ردت رغد..

-رغد: وانتِ منو عاتب عليچ وجاية تتباركين ؟

-غرور: اوووه وانتِ شكو شو دوخرري دنفوت 

دفعت رغد بأيدها حيل ومشت بس سرُعان ما لزمت أيدها رغد وجرتها حيل ألتفت عليها منصدمة وگالت ..

-رغد: شووووفي ولچ غرور مو انه الي تندفع ولا انه الي تنمد ايدج عليها افتهمتيييييي اللويهة والله والويج وياها 

صاحت بصوت وراددتها الثانية وعلى اثر العيااط الي صار طلعت جُمان والحجية منصدمات من العياط والفشار الي طلع من غرور ورغد متسكت الهاا كل كلمة تردها عليها بعشرة قوية قوية هلبنية مدري من الي شافتة منها صارت هيچ وياها

وجهت نظري الهم من نزلوا وباوعت لعوف الي صاح بعصبية وبصوت يرعد رعد ..

-شششششيييل كيييلووو برابيييك ببيتيي 

نزت نزة وهي تباوع إله وصل وگف يمهة وگال 

-عوف: وللچج غروررررر تفوتييين بيتي !!

-غرور: دايسة عتبة البيت وجاية للحجية انت شكو 

-عوف: لا ترديييين بوجهههي ولچج

جحظت عيونهة وتباوع اله بحقد گالت الحجية ..

-جميلة: يمَه استهدي بالله لا تحرگ دمك علمودها هسة تروح هية شنو جيتهة اصلاً 

-غرور: تطرديني !؟

رادت تجاوب الحجية وعاط بيها بصوت ..

-عوف: امشششييي لچج طلعييي بيتي ماتفوتة برابيييگ اناا

-غرور: والله زمن ، توگف بوجه غرور يا عوف وتحچي هذا الحچي وماتنرد 

ضحك بأستهزاء ونزل أيده اشر بيها وگال 

            

              

                    

-عوف: من هلكبرني وانا اوگف بوجهج وانا الي اردج وصرت الج عظم بالبلعوم بس خذاج الكبر وصرتي تنسين  

اتغاضت عن كلامة وباوعت لقاسم وگال بأبتسامة ساخرة ..

-غرور: مبرووك يگولون ماخذ وحدة فصلييية

-قاسم: تشرررفج ولج ساافلة سدي لا اسدة الج بالنعال

رعش جسمي من عاااط بيها بصوت وأتقدم عليها مثل المخبل راد بس يلزمهة ولزمة عوف من أيدة ورجعة ليورىٰ وگال بعصبية وهو يخزر بيها وعيونة نطت ! 

-عوف: شگد اكرهج وتلعب نفسي من وجهج وصوتج بس مشكلتي ماا أمد أيدي على مرة ولو أنـتِ اشوفج من كل شيء الا من النسوان بس أتقي شري ولا تخليني أبديها بيج والله اسلخ جلدج ياغرور ماشوفج گدامي اذا گبن عليچ

-غرور: بسيطة يا ولد أدم هيج تحچون وياي

-عوف: امششششييي برررة لچ طلعييي الداييييحةة

-قاسم: طلعي برة لچ بعرور لا اكسرج تكسسييير وحق ربج أطلعج منا مكسرة وأخلف بقسمي الماخذة 

-غرور: هيج الحقيقة ضوجتك 

باوعت الي واني ماخذة ركن مهضومة ومصدومة من التجريح وبين عليه هذا الشيء ضحكت وگالت ..

-غرور: فصلية بس حلوة هههه

اتخببل واتسودن قاسم وعوف مثلة وأكثرر فارر فول عيونة صارت حمر بس متمالك اعصابة ولازم قااسم الي تخبل وصار يهمش يريد بس يلزمهة لازم قاسم ويشدد بقبضتة عليه حتى مايرتكب بيها جريمة لأن صدك تخببل حتى اني خفت توگع بأيديهم ويسوون بيها شيء

-عوف: والخلق السموات والأرض اذا ماتطلعونهة أرتكب بيها جريمة ماصارت بكل التاريخ ماااطايييق اشووووف وجهة ولا اسمع صوووووتهااااا اغسل البيت بدمهة اذا ماتطلععع وهذاا اخررر تحذييير

اخر كلمة نطقهة بحدة وشدد عليها اتقدمت رغد ودفعتهن ثلاثتهن وگالت بعياااط

-رغد: دمشششييي بررررة لا أقفل عليچ  واكضج وادوفج دوووف برررررة ولتفكر وحدة منچن توصل عتبة هذا البيت بعد لأن هلمرة اذا طلعتوا سالمات لخاطر قسم اخواني ع الجايات حتى القسم يطيح وانا اول البادين يلااا

فتحت الباب وطلعتهن مدافع واخر وحدة غرور دفعتها بقوة وطلعتها برة وسدت الباب حتىٰ يمكن وگعت من قوة الدفعة 

مسحت دموعي وبدون ماا ألتفت علىٰ احد بيهم أخذت طريقي وفتت للغرفة دفنت راسي بالمُخدة وصرت ابچي وراي وراي هذا الحچي بعدني ببدايتها وبديت اسمعة ويرجع عليه 

شلون راح اگدر أكمل واني هيَج اتعاير شلووون صعبببة عليييه .. 

شديت بقبضتي على المخدة وآني أسمع قاسم يعيط بصوت ويسب ويفششر مااا قاابل بالي صااار متسوودن 

            

              

                    

غفيت ودموعي علىٰ خدي ، ومر اليوم كُله واني ماطلعت من الغرفة ولا أجاوب الي يدخل ويحچي وياية دافنة نفسي بالفراش 

أحس ثقل صار على صدري ، من أتذكر نظرتها وشلون حچت بأستهزاء متتت وروحي انمردت مردد ماا أحب أحد يستهزأ بيه وينظر الي بهيچ نظرة لو مهما كان ... 

********

حطيت أيدي على گلبي وأخذت نفس ، مو يوم أنتقام خلص على أعصاب الكُل ، لك شنو هاي مو عائلة كُلها عراكة وهدادة منين متباوع يتوعدون 

لليل يلا هدأت النفوس وسكتوا شوي ، بس بقىٰ بالي يم عوف من ساعتها طلع وهو فاير فووور ميتحاچىٰ ومحد گدر يحصلة أو يتواصل وياه ... 

ومنار الي قفلت قفلة محد گدر يحچي وياها بعد ولا ترد على أحد حاضنة مُخدتهة ولافة نفسها ونايمة طول اليوم ..

تعبت من التوتر والقلق الي چنت بيهم انطيت ادوية ماما وغسلت إلها ولبستها وحطيتهة بفراشهة وذبيت نفسيي بسرعة غفيت من التعب ..

فزيت بالليل عطششانة وريگي يابس دورت على مي بالغرفة مالگيت باوعت للساعة چانت الدنيا فجر بس العطش لا ديين له اخذت شالي شمرتة على راسي واخذت تلفوني وطلعت للمطبخ 

مشيت وخففت بخطواتي من شفت ضوة جاي من المطبخ مشيت بخفة وكملت طريقي وگفت بباب المطبخ وصار الي گدامي واضح 

باوعت بأستغراب من شفتة عوف بهلوقت گاعد بالمطبخ ويمة گلاص چاي ويمة أوراق واللابتوبات اثنينهم يمه ويكتب 

 زميت شفتي بعدم معرفة ودخلت للمطبخ أنتبه لصوت الخطوات وفز بأستغرب من شافني ..

-جُمان !؟

چنت بعدني نعسانة وعيوني ذبلانة هزيت راسي وگعدت على الطاولة ..

-شنوو يـابه أغاتي انتِ جاي تحلمين وتمشين بحلمج ؟

-لاا عطشانة عوف أريد مي 

-صار 

گالها وراح للبراد وعيوني بقت متعلگة على الأوراق كُلهم كتابة وخطوط حمر جوة كُل سطر ..

بكل مرة اشوفة يشتغل ينتابني الفضول حول شنو ديسوي وشلون ديفهم داشوف خرابيط اني مداشوف شيء طبيعي ينفهم ! 

جاب الي كاسة مي حطها بأيدي وگعد ، شربتها واباوع اله صافن هزيت راسي بثقل 

-شنو ؟

-سلامتج ، شربي الماي ورجعي نامي بعدج نعسانة 

-شجااي تسوي ؟

-جاي أشتغل 

-شجاي تشتغل شنو هذا ؟

رمقني بنظرة غريبة بس بسُرعة اتعدلت نظرتة وگال بعدم مُبالاة 

-مهمة ضرورية 

-شعجب جااي للبيت ؟ مو كُل يوم تنام بالفندق ؟

            

              

                    

-اي صحيح ، بس عندي كم ملف ضروريات هنا اجيت اخذهن وشفت المطبخ فارغ گعدت أشتغل بيه 

-ههههه ماا تحب الهوسة 

-لا ماا احبها وماا أركز بشغلي اذا يمي هوسة 

-أيي أتذكر مرة دخلت عليك وانت دتشتغل چان عطت بيه بصوت وگلت هاي الغرفة من افوتها بعد محد يدخل الها ورأي والابرة من توگع تنسمع ..

-عطت بيج ؟

-اي عطت بيه وطردتني

-اااخ انعل يوووومي ع هلأدبسزيية 

-هاي علييك ؟

-لا عليه 

-ههههههههه 

-روحي عيناي روحي أغاتي انتِ لا تبقين نعسانة 

-لا ماا أريد انام بعد 

باوع للساعة وگال 

-الوقت متأخر باقية گاعدة شكو رجعي كملي نومتج 

-تؤ 

-براحتج ، تردين أسوي الج شيء ؟

-لا ، شنو جاي تسوي انت 

-جاي أشتغل 

-خلي أشتغل وياك 

-شنو تعرفين وتشتغلين وياي ؟

-ترىٰ اني دكتورة 

قلص عيونة وگال .

-اي ؟ 

-يجوز تحتاج شيء وانتَ دتشتغل 

-اها ؟ چا عندي اللابتوب مابيه شحن ودايخ تحطيلة مُغذي ؟ 

-ههههههههههههههه 

ضحكت وضحك وياي بس من كُل گلبة ضحكتة ترست وجهة أخذت نفس واني عيوني تتنقل بملامح وجهة ... 

-بقىٰ بالي يمك من رحت

-اممم 

-ليش من يخابرونك متجاوب ؟

-ماچنت فارغ .

-الحجية بقىٰ بالها يمك 

-الحجية ؟

-اي 

مسح أيديه أيد بأيد وضحك وگال ... 

-مايستوجب ، يعرفوني من ماا أجاوب الإتصال يعني لو مشغول لو حاب أخذ راحتي وما أريد احچي وي أحد بهذا الوقت . 

اتنهدت وباوعت اله بزعل ..

-جُمان: لتهتم لغرور صدكني اني شفت الخوف بعيونهة من نزلت وشافتك أعتقد مچانت متوقعة انت موجود 

باوع الي بنظرة مستغرب وكأنُ يگُلي انتِ وين تعرفينهة . حكيت طرف حاجبي وگلت .. 

-جُمان: رغد سولفتلي عنها 

هـز راسه وعاف اللابتوب أخذ جگارة ورثها ورجعة ظهرة ليورىٰ زفر الدُخان وگال ..

-عوف: مامهتم ، وماشايفها گدامي بس هذا البيت ماتفوتة أمثالها وأمثال خلفيتها ورجلها كلهم .. 

            

              

                    

-جُمان: بس رجلهة أبوك ؟

-عوف: ماعندي أبو وانا صغير أبوي مات بعيني وگلبي .

-جُمان: ميخالف يبقى أبوك حتى لو تعذبت بسببة

-عوف: ليش انتِ متوقعة بسبب الي شفتة منه وانا طفل مات بعيني ؟

-جُمان: لعد 

-عوف: لو على التعذيب والضرب والحرمان الشفتة چان تهون مو بالبال

طفة جگارتة وغمض عيونة والقهر مبين على ملامحة گال بصوت متعوب ..

-عوف: حط علة بأمي وموتها ، امي راحت من أيدية بسببة هذا الأنسان ظالم وطاغي وماعندة رحمة ولا إنسانية ماشفتة فرح أمي بكلمة فد يوم ، ولا شفتها ضحكت بسببة ماشفت بعيونها غير الحزن الي متجمع على شكل دموع تلالي ومتعلگة برمشها ..

دمعت عيوني واني استمع اله وكل كلمة تطلع منه بيها غصة وكاتمهة بگلبة كمل كلامة وهو يطرق على الطاولة بأصابعة ... 

-عوف: اي بشر يأذي أمي ما احترمة ولا يبقىٰ اله شأن عندي ولا ذرة مشاعر حب ، إلا أمي ، وهو ماقصر إذاها وضربهة ودمرهة احتار شيسوي بيها لحد مالفالها علة وياريت باوعلهة 

حط عيونة بعيوني وگال بصوت واهن ..

-حتىٰ وهي مريضة والوجع ينهش بيها نهش ووجهة الحلو ذبل ما كلف نفسة يسألها ولچ حتىٰ ماياخذ الة نظرة علىٰ وضعهة الي هو سببة 

-جُمان: ليش هلگد قاسي وياها وميحبها چان معقولة كُله لأن اتزوجهه غصب لهدرجة توصل يسوي بيهه ؟

-عوف: أناني وماعندة رحمة وخوف  ، صحيح أتزوج بأمي بالغصب بوقتها أبوه چان عايش وماچان يقبل يتزوج على امي ، وصب كل غضبة عليها ومارفت اله راية بعد زادت أنانيتة وزاد مرضة صارن أضعاف صار مريض  اذا مايضربهة ويشوفهة تتعذب مايرتاح 

-جُمان: بس أتزوج بعدين ؟ بس متغير  

-عوف: صار أسوء وانا على يقين تام انُ الأنسان الي ماعندة خوف من رب العالمين ماعندة رحمة بقلبة والي ماعندة رحمة الي تتوقعينة والي ماتتوقعينة يبدر منه لو يخاف ربه چان خافه بيها وبينا .

اخذت نفس بحزن وگلت ..

-جُمان: الحزن والكتمان والقهر والصبر على الأذية كُلهن يمرضن .. ينهشن الجسم وياكلنة من الداخل بدون ميحس الأنسان علىٰ نفسَة وبعد فوات الأوان يكتشف علتة بس بعديش 

همهم بحسرة وهو يجر بالجگاير وحدة ورة الثانية وقوري الچاي يمة يخلص الاستكان يصب اللخ بقيت صافنة بيه وعيوني تتنقل بكل حركة تصدر منة ..

-جُمان: تدري عندك وجهين مختلفين عوف ؟

رفع راسة يباوع الي بأستغراب رجعت كملت كلامي

-جُمان: واحد أبيض القلب حنين ونقي الفكر عذب المنطق وعطوف بشكل حليم صبور وسمح ومُعطي هواية وخفيف الظل ومُرحب بيه بكل الحالات 

            

              

                    

همهم وگال بهدوء ..

-عوف: اي والثاني ؟

-جُمان: الثاني قاسي وبارد باردد فطن ويوگف بين الحذر والتهور للأسف ماعنده مشاعر ومتجرد من الإحساس مزاجة متقلب وماترف عينة علىٰ اي بشر گدامة 

بانت علىٰ وجَهة ابتسامة ساخرة وگال 

-عوف: اها تحللين ست جُمان ؟

-جُمان: داحچي الاشوفة وألي اتوضح الي بهلشخص بس 

-عوف: تحليلج الثاني بيه غلط

-جُمان: شنو هو ؟

-عوف: مزاجي المتقلب مو وياچ وبكل الأحوال عيوني ترف عليچ 

ضميت وجهي بأيدية خجلانة بس أضحك مَــآ ادري شبية الله ذب عليه ضحك بحيث جسمي كُله صار يهتز 

-عوف: الله يستر هاي بسبب النعاس

رفعت راسي وحتى عيوني انترست دموع من الضحك من شافني ضحك 

-جُمان: ماعرف شجاني طلبت ضحك عندي 

-عوف: ضحكي بوية عساها ماتفارگ شفافج چا انا شرايد غير هيج

مسحت وجهي وطار النوم من عيوني صحصحت علىٰ الاخر باوعت اله رجع يشتغل فتحت تلفوني الوقت متأخر كُلش إذا احد من البيت گعد وشافني گاعدة يمة شيگول عليه 

ردت انهض ارجع لفراشي بس حسيت ريگي نشف من الضحك ردت مي عفت تلفوني على الطاولة ومشيت للبراد فتحتة داطلع كاسة مي 

فتحتة الكاسة وداشرب سمعت صوت تلفوني دگ اللتفت مستغربة إتصال بهلوقت المتأخر من منو 

باوعت اله عيونة بالتلفون ووجهة جاامد بس يعصر بفكة بقوة انسد الإتصال وصار صوت الرسائل يرگع وحدة ورة الثانية ورجع إتصل رفع التلفون حطة بوجهي وهو ديتصل وصورتة الي بواتس تارسة الشاشة بصوت حاد بكل كلمة ينطقهة يحد بيهة أكثر  

-منو هذا نور الدين العزيز لدرجة متجرأ يتصل عليچ بهذا الوقت بشكل عادي وبكل أريحية جُمان ؟ 

للحكاية خفايا 

الفصل السادس والثلاثون من هنا