رواية الندم مابعد الخطيئة الفصل الثامن والثلاثون 38 بقلم رونق

 

دخلت للبيت وجان اتفاجئ بروان لامه ملابسها من صدك ومتهيأه وي شهد .... 

هاي وين تردين .... لبيت اهلي .... شتسوين .... اريد اروح انتهى وقت الاتفاق .... مو بكيفج الاتفاق بعده لمن يصير سنه يله ترحين لتأثرين ع شهد .... لتخاف متتاثر شهد ابد .... بس ميصير هيج ترحين لامشاكل بيناتنه ولا شي يعني شنگول شنو سبب انفصالنه .... بسيطه نكول ممتفاهمين .... روان المساله مو مثل متتصورين معقده والله لازم نكعد ونتفق وندرسها زين .... مستحيل اتحمل اكعد وياك بنفس الغرفه .... شنو السبب .... هواي اسباب اسال نفسك .... انطيني سبب واحد والبقيه عليه .... اهم سبب اخذ راحتك بالغرفه لويش اضايقك واسببلك ازعاج .... منو يكول تسببيلي ازعاج .... اني اكول 

روان فدوه اروحلج اكعدي خلي نتفاهم وبعدين ادزج والله اذا متفاهمنه .... مااكدر ابقى والله مااتحمل بحاله وحده ابقى لمن يخلص الاتفاق .... شنو احجي .... انت هنا تنام واني اروح بغرفة شهد .... تحجين صدك عود .... اي والله احجي صدك .... يعني شلون كدام اهلي انت بمكان واني بمكان .... ميكولون شي لان اصلا منخلي احد يحس بينه لان ملابسي يبقن بالغرفه واذا صار واحد شافنه نكول صدفه اتعاركنه .... ابقي رجعي ملابسج والله كريم خلي اروح ادز شهد وايات وارجع نحجي 

رحت دزيت شهد وايات ورجعت لكيتها مرجعه كلشي لمكانه بس هي ماكو اكيد راحت لغرفة شهد دخلت سبحت حتى ارتاح لان اليوم جان حيل متعب بالنسبه الي كملت ورحت يمها حتى احجي وياها بس لكيتها نايمه بسابع نومه اكيد تعبانه اليوم جان متعب بالنسبه النه كلنه عفتها ع راحتها ورحت كبل نمت 

ثاني يوم كعدت لكيت روان بالمطبخ يمكن تطبخ غده 

صباح الخير .... صباح النور .... شكاعد تسوين .... اجهز الغده اسويلك ريوك .... ياريت جوعان ولو راح ازحمج ويايه .... هذا واجبي .... راحت سوتلي بيض سلك هالمره ماكو غلط .... تعالي اكلي ويايه .... مااشتهي اكل .... شراح تسوين غده .... تمن وباميا .... بديت اكل وهي اختفت من يمي كملت ورحت للمحل للظهر رجعت لان الجو حار هم اسبح وهم اتغده وهم انام شويه 

رجعت ولكيتهم بعدهم ممتغدين اتغديت وياهم وروان كاعده همين بس مو شي اكلها ابد كملنه وشربنه جاي والكل راح لغرفته هي دخلت لغرفة شهد رحت وراها هي اتفاجات من شافتني ممكن نحجي شويه .... لا مو ممكن .... شنو السبب ..... اصلا ماكو كلام نحجي سويه .... بس اني عندي كلام وهواي .... سكتت شوفي روان اني اسف ع كلشي والله مجان قصدي هيج اسوي بس اني عقلي يوكف من العناد وشكم مره اكدت عليج لتعاندين .... هي ساكته منطقت ولا حرف احجي روان ليش ساكته .... ميفيد الكلام بعد .... لا يفيد احجي اي شي اني اتقبله والله 

مرتضى انت دائما عصبي ومتتفاهم ودائما تضربني يعني من رحت لاهلي واجه اخو اسيل شكد حلفت الك مشفته ولا حجيت ويا مصدكتني ابد وطلعتني جذابه بس راح اثبت الك اني مو جذابه اتصلت ماادري بمنو ....هاي شتسوين .... انتظر ثواني .... حجت وفتحت سبيكر هلو شهد ... هلو رونه .... شلونج شخبارج ... الحمد لله وانت .... الحمد لله ... رهوفه شلونه .... زينه ... عمار وينه يمج .... لا والله مو يمي يم اسيل ليش خيرج ....ردت اسالج سؤال وبداعت رهوفه جاوبيني الصدك .... خيرج رونه احجي .... بالعزيمه ذاك اليوم هم دخلنه اني وياج يم علي اخو اسيل .... لا ليش اكو شي .... لا حبيبتي ماكو شي بس اكو شخص بوقتها عصب عليه وضربني ويكلي اني متاكد دخلتي .... لا والله مادخلنه ولا لمحنه شكله اصلا .... اني الصراحه هنا حسيت بدوخه لعد ابن عمار مو كلي معقوله يجذب وهو طفل ماادري والله نهت المكالمه ومااعرف شاجاوبها الصراحه 

شوفي روان اني اعرف بنفسي متسرع ومن اعصب افقد بس اني ماعندي ذنب بهذا الشي سالت ابن عمار عليج وكلي كاعده وي خالو تحجي واني من حقي اتخبل لان هذا النذل نفسه الي جان مملي عينه عليج ونفسه الي خطبج ونفسه الي حذرتج وكتلج لادخلين عليه 

انت شنو تقصد امير كلك عليه اني يم خاله .... اي والله لعد اني شلون تخبلت .... بسيطه هاي اكيد سوالف اسيل الخبيثه اني اعلمها هي وابنها الجذاب .... وهسه حاب اعرف الي سويته من حقي لو لا ... اكيد مو من حقك تجذبني وتصدك طفل المفروض انت تصدكني وتسمع مني واني هواي حلفت الك بس انت فضلت تصدك بولد صغير وتجذب مرتك .... طبعا احساس غريب انتابني من كالت مرتك اول مره تنطقها حيل فرحان بهاي اللحظه 

اني اسف واعتذر منج وشنو الي اطلبينه مني موافق عليه بس سامحيني وتعالي ارجعي للغرفه .... خلي نفرض سامحتك ع هاي زين لعد وتعصيبتك عليه بدون سبب وكسرت مكياجي كله وضربتني هم اسامحك عليهن لو شنو 

هاي بسيطه مراح اطلع اليوم وراح اخذج العصر لاي مكان يعجبج واشتري مكياج الي يعجبج لو شكد مجان 

لا مااريد اي شي منك بعد عوفني وروح لغرفتك اخذ راحتك حتى تخابر براحتك اخاف ازعجك 

لج لتتخبلين والله جنت اجذب عليج حبيت اشوفج تغارين لو لا .... اني اغار ع شنو اغار ... والله غرتي وجانت واضحه الغيره .... متوهم ع شنو اغار .... عوفج من هذا الحجي تعالي ارجعي فدوه والله مااذيج ولا اغثج ووعد مني بعد مااضربج .... مو هسه ارجع خلي افكر عود انطيني مهله .... ميحتاج تفكير تعالي هسه حتى شويه ونطلع ترحين تشترين مكياج ادري بيج مترهمين بدونه .... شنو تقصد ماارهم بدونه يعني اني مو حلوه اله اخلي مكياج 😡😡😡 تحجي بعصبيه طبعا .... ماعاش الي يكول عليج مو حلوه اصلا تموتين والله اصلا جمالج رباني ومتحتاجين مكياج والله احجي الصدك .... اكيد حلوه اني 😏بالمكياج لو بدونه 

يله تعالي حتى تغسليلي ملابسي وسخات صارلج يومين هاملتني .... هسه اجي اغسلهن روح كدامي ... عفتها ورحت احس براحه مو طبيعيه وره شويه اجتي غسلت ملابسي كلهن كتلها راح انام شويه وكعديني اروح للمحل عندي شغل شويه وارجعلج حتى اطلعج .... لا مااطلع العصر روح للمحل وتعال بالليل نطلع .... اوك ع راحتج ولتتعشين نتعشه بالمطعم ... تمام .... فعلا نمت وكعدتني رحت للمحل وبالليل اجيت ولكيتها جاهزه رحنه بالبدايه للمطعم طلبت طلب غريب شويه كالت ممكن نطك صوره للاكل وخلي ايدك يم ايدي الصراحه استغربت ... كتلها اي عادي بس ممكن اعرف السبب ... حابه انزلها بصفحتي لان صديقاتي اغلبهن هيج يسوون بس اني لا ... اها فهمت بعيوني اليوم تخلين صديقاتج كلهن يحسدنج عليه ... ها شلون .... سوينه هواي حركات وطكينه صور وحده ايدي فوك ايدها ووحده كعدنه سويه وكتلها خلي سمايل فوك الوجه وحده وكلتها بايدي الصراحه عجبتني فكرة الصور حتى اتقرب الها اكثر هواي اخذنه وحسيتها فرحانه كملنه واخذتها لمحل خاص مكياج بس ياالله قطتني قطه من هاي الزينه 😂😂😂 متوقعت هيج غالي المكياج بس مو مهم فدوه الها ردت امررها بمحل ملابس رفضت كالت مااحتاج شي عندي هواي بس طلبت مني تمر يم اهلها شويه ونرجع اخذتها صدك اني بقيت يم عمار واجه ابوها هم شويه ودزوا ع عمار مطول وكال روان منتظرتك رجعنه للبيت مطولنه اصلا 

هواي حاولت اتقرب منها بس هي تبتعد ولا يمي اصلا وحيل هذا الشي كاعد يضوجني لازم اقنعها قبل ليصير سنه شكد حاولت وياها انام ع الجربايه ترفض وبيوم الي المسها تكلب خلقتها وعجزت وياها طبعا 

قررنه نسافر لتركيا اني وعمار وكرار واحمد بعد يومين نسافر فيزنه وراح نروح وحدنه يعني مو كروب شفت احتياجات اهلي ورحت لبيت عمي اتسوكت الهم وانطيت لعمي مبلغ طبعا بين فتره وفتره اني وابويه نساعدهم بس شنو گوه ويتعارك ويانه بس احنه بالاخير نكدر ننتصر ونجبره ياخذهن طبعا خطيه عمي عنده بنات وشابات وهو ماعنده راتب ولا مصدر زين بس هو بنفس الوقت عنده عزة نفسه تمنعه ياخذ من احد 

جهزتلي روان جنطتي وخليت يمها فلوس كتلها اخاف تحتاجين شي وباي وقت يعجبج ترحين يم اهلج روحي بس حاولي متباتين اذا اهلي وحدهم بس اذا اجت وحده من البنات روحي بليلة الي اريد اسافر بيها طلبت من روان انام يمها 

اكلج رونه اليوم لازم انام ع الجربايه .... لويش شكو .... لازم اريح ظهري باجر ورايه سفر والكاع مو مريحه ابد .... اي عادي تعال نام ... استغربت معقوله وافقت بهالسهوله بس فاجئتني من كالت راح انام اني جوه ... ضجت حيل تعالي نامي هنا ماكو داعي اخذت جنطتني ووالجهاز والمحفظه واتاكدت من الجواز واخذت ملابسي الي البسهن باجر ورحت لغرفة شهد منطيتها مجال تحجي ابد حيل ضجت شكد كاعد احاول وياها بس هي قافله نمت ووقت المنبه ثاني يوم سافرنه وجنه متلهفين لان لمتنه اربعتنه حلوه حيل جانت 

حيل اتونسنه وفرينه هواي اماكن ورحنه بغير عالم الصراحه تركيا حيل حلوه بكلشي 

دائما نتراسل اني وروان واتصل بيهم واطمأن ع الكل تقريبا صارلنه 10 ايام نتجول من مدينه لمدينه عمار كال باجر اروح اتسوك الي يحب يجي ويايه خلي يجي رحنه وياه الحلو الي بمحلات تركيا من احد يشتري منهم جمله اله هديه هو يختارها ع ذوقه كال عمار كل محل ع واحد يختارله هديه لزوجته اجه دوري واحتاريت شاختار لروان بعدها عجبني اختارلها كوت شتوي حيل عجبني وجان سعره غالي نصبوا عليه كلهم ويضحكون يكولون شلون انت عندك حظ الي اختاريته لمرتك سعره اضعاف الي اختاريناهن احنه 

بيومها ضحكنه هوايه طبعا الكل اشتره هدايه واني من ضمنهن اخذت للكل بس اكثر شي لروان وطلبت من عمار ياخذني وياه من يتسوك مكياج كلت اخذلها ويايه شكم شغله 

بالليل راسلتها طبعا حيل حيل حيل مشتاقلها ومن اكللها متجاوبني وتتجاهلني وهذا الشي حيل كاعد ياذيني 

روان : بعد اخر موقف من مرتضى حيل ضجت منه وحقدت عليه لان مو من حقه يضربني كل شويه بدون سبب مقنع 

رحنه للصالون اني ونرجس حيل حلوه طلعت نرجس كملتها واجه دوري حبيت تسويله تسريحه بسيطه وميك اب خفيف احسه احلى رجعنه للبيت وبدت الحفله وجانت حيل حلوه هواي جايين ناس من طرف الولد جانن متفاجأت بالميز والتحضيرات ممتوقعين هيج نسوي طبعا مرة اخو الولد حسيتها تريد تنفجر مااعرف السبب نضراتها لنرجس محبيتها بس محجيت كدام احد اخاف اني متوهمه 

بس هواي غثتني هواي تسال ليش عدكم الحفله وهاي التحضيرات منو سواها وهم عدها ابن عم غير زوجج وصدعت راسي من كثر الاسئله طبعا مقصرت وياها وعرفت شلون اخجلها واسكتها ابد ماارتاحيت الها نهائي خبرت ايات وشهد وهم طاوعني كالت حتى احنه لاحضنه تكل لشهد همه حالتهم ع كدهم شلون هيج سوو ترتيبات وراده عليها شهد كايلتها اصلا حالتهم كلش زين بس همه متواضعين ميحبون التكبر عفيه عليج خوش رد خلي تولي مبينه حقيره واخاف تخبث ع نرجس خطيه فقيره حيل 

كالت ايات اتركن الموضوع عليه اني اعرف شلون اتصرف راحت ايات وحجت وي اخت الولد الجبيره وفهمتها شنو اتصرفت مرة اخوها وطبعا ابد مقبلت ع هذا التصرف كالت اني اعرف شلون اردها بعدها اجه الولد وجان شخصيه وحلو طبعا الكل لبست عبايه لبسها الذهب وكصوا الكيكه وسوو كل الاشياء وبعدها طلع الولد بقينه وحدنه واخذنه راحتنه طبعا ركصنه هواي وفرحنه وغيرت جو ونسيت مرتضى والي سواه بيه 

بس هو هم خبيث كل شويه ودز عليه وفصلني تفصال يباوعلي من فوك لجوه واحسه اكلني بنظراته الصراحه اتوترت هوايه بس حاولت اكون طبيعيه بعدها حجيت وياه وقطعت سلسلة افكاره بس وترني اكثر بكلامه 

خلصت الحفله والكل راح حتى نرجس اخذها خطيبها وراح اني صعدت بدلت بس مغسلت وجهي لان مااصلي حبيت ابقى بي وقررت اروح وي شهد لاهلي قررت ابقى شكم يوم حتى اتوبه بعد ميعيدها مره ثانيه 

التهينا بالعشه وهذا خبيث مكابلنه بالمطبخ وكاعد مدري شعنده اليوم بعدها اتعشينه كلنه هو راح يوصل بيت عمه واني لميت الجنطه طبعا مناويه اخذ الجنطه ويايه مترهم كدام اهلي بس حبيت اشوف ردة فعله شنو وجانت مفاجئه الي هواي اتوسل ابقى وقررت انام بغرفة شهد وهو وافق فعلا رحت لغرفة شهد ونمت باللحضه لان حيل تعبانه وجان اليوم متعب حيل طبعي ماانلم بسهوله بغير مكان بس ساعدني التعب ثاني كعدت كلي نشاط وحيويه لان نمت هواي كلت خلي اسوي الغده جنت حايره شنو اسوي بعدين قررت اسوي باميا بس المشكله مااعرف وماعدنه طازجه بس مجمده بحثت بالنت هواي واخر شي سويتها بس هالمره ماسخه مااعرف شكد اخلي ملح 

كعدت خاله وهي الي خلتها جانت متفاجئه منين جبت باميا كتله من المجمده طبعا هواي شجعتني ومدحت بطبخي مااعرف كاعد تجاملني لو صدك بس من صبينه محد حجه وكال طيب لو لا اني احسه مو طيب بس لا باس بي يعني هم مو معناها مو طيب ومينوكل اني ك تجربه اولى بطبخ الباميا اعتبرها كلش زين 

بعد الغده اتوسل بيه مرتضى واعتذر مني هواي وفاجأني من كلي امير كايله ع خاله بسيطه اله هو وامه وقررت اوافق بس اله اتوبه من اخذني اشتري ميك اب قطيته قطه مراح يفكر مره ثانيه يتقرب لمكياجي كمت اجيب واخلي لا ع التعين واختاريت كلها ماركات لان غاليه هو انصدم الصراحه بالسعر بس حيل بي دفع وهو الي ممنون 😂😂😂😂 هذا الشي نساني كل شي هو محجه شي واني متاكده لو شيصير مراح يتقرب لمكياجي ابد ابد طلبت منه ناخذ صور لان دائما البنات يطلبن مني وحتى ديما ونوره وصديقاتي قررت اخذ شكم صوره واخذنه هواي وحيل فرحت بيومها بعدها طلبت منه يدزني لاهلي شويه فعلا قبل ياخذني اول مدخلت دزيت ع امير طبعا ضربته راجدي لان جنت حيل افور دم من وره الجذب الكل انصدم واولهم الحيه اسيل الكل سال كتلهم حتى ميجذب مره لخ تقبلون يساله مرتضى عليه ويكله يم خالو كاعده اكيد هذا تدريس امه اشو مدت لسانها شطوله عليه 

انت جذابه وماالج حق اضربين ابني وانتي دومج تجذبين علينه واطلعين ابني كلش 

ادخلوا امي وابوي كتلهم والله العظيم هذا الولد اذا مطلع سايب وحرامي تعالوا عاتبوني بعده هالطوله وجذب وبوك اذا كبر شلون لعبت لعب اسيل بس ماسكتلها ابد دزينه ع عمار وهي تبجي وسوتها كلش كام يصيح عليها اسكتي خلي افهم سولفتله كلشي كتله صارت مشكله بيني وبين مرتضى من وره هاي الجذبه وابنك هالمره جذب ومره باك الله يستر منه اذا كبر طبعا امير نشف بدمه صاحه عمار كله تعال شرد يم بيبيته بس كله مااضربك تعال بس احجي وياك فعلا اجه وبده يحجي وياه كله والله ماما طلبت مني هيج احجي عمار وجها مينوصف ابد احسه نار مشتعله ضربه راجدي خله دمه يجري مانعرف من خشمه لو حلكه 

اسيل كامت تصيح واحرك واشعل وكله جذب تحرضون عمار علينه واله ادفعجن الثمن انتي وشهد هنا عمار فقد سحلها من شعرها وصعد بعد منعرف شنو الي صار شويه ونزل كتله عمار اني احجي من صالح الطفل ليش يتعود ع هيج اسلوب بالتالي انت تتندم كال اعرف معليج اني راح اتصرف وياهم كتله العتب ع امه الي اتعلمه هيج كلام بعدها رجعت للبيت 

رجعت للغرفه بس بديت ابيع عليه ثكل عود ممهتمه بي بس اشو بديت اراقب كل حركاته كل مالزم الجهاز اتخبل ها هسه يحجي وي حبيبته ها وي صديقته واتخبل بوقتها رغم مااكدلي جان يجذب عليه بس اني مكاعد اصدكه ابد مرات يحاول يتقرب الي واني اصده الصراحه عندي شعور غريب ومحاسته قبل هذا الوقت من يتقربلي ابتعد عنه واحاول ابعده ومن يبتعد عني اتخبل واتمنى يتقرب الي ويسمعني كلام حلو معرفت افسر هذا الشي 

حيل اضوج من يهملني وافرح من يحاول يرضيني ويتقرب عليه بس بديت اغار من كلشي يخصه اغار من يتاخر وابقى افكر اغار من يلزم جهازه ويتراسل واغار من اسمع صوت الاشعارات من توصله مرات ادخل ويا بالحفله الي يسويها بكروبات اضوج من اشوفه يتشاقه وي البنات ويضحك وياهن واضوج من يصعد وحده ويا بالحفله اشوفه ينزل منشورات ويحب يعلق هواي ومرات اشتعل نار من ادخل ع تعليقه هو وبنيه تعبر 30 تعليق طبعا ميعرف بيه مراقبته صار همي الوحيد اراقبه بالفيس هواي ابتعدت عن البنات بالكروب شهد ونوره وديما دائما اكلهن مشغوله قرروا يرحون الولد لتركيا جنت شايله هم اذا سافر مرتضى حيلعب لعب بتركيا اخلي عمار ينطيني كل تحركاته وخاصه بنات تركيا هناك حلوات ولبسهن ماشاء الله يخلي البنات يفكن حلكهن عليهن مو ادور الشباب حيل ضايجه من هاي السفره 

سافروا وصدفه يراسلني خيل ضجت يعني ماعنده وقت اصلا الي وهذا عمار خبيث من راسلته وطلبت منه يكلي عنه لعب بيه لعب وكلي انت متعوفين الولد بحاله متستحين تتجسسين عليه اذا مكتله عليج اني اعلمج عابتله فشلني كوه اتوسلت بي ميخبره والله حموت بس من التفكير اشوفه كل شويه ونزل منشور لو بث مباشر وميراسلني يكلي مشغول 😡😡😡😡 

اجتي ايات وكلتلي روحي باتي يم اهلج واني اخابر شهد حتى تجي اشوفها تخابرني وجان الرفض من شهد مثل متوقعت المهم كالوا نروح كلنه وياج نشوف شهد اخذنه عمو وبقينه من الصبح لليل حيل تونسنه بيومها حتى عمو بقيناه ويانه الكل غير جو كالت ايات راح ابقى يومين اذا تردين ابقي يم شهد خطيه كتلها ان شاء الله بعد مارجعوا بقينه اني وشهد طلبت منها تسولفلي كلشي يخصها كالت احسب لحضه لحضه شوكت يكمل بيت عمار حتى اخلص من اسيل طبعا اسيل عدها اهلها شوكت ميعجبها تروح وشوكت ميعجبها متروح وهاي المكروده مانعها تطلع وهو مموجود حيل ضجت ع شهد كتلها بس نطلك اني ومرتضى انت اطلكي 

كالت مااطلك لان ياخذ مني بنتي واني مااتحمل بدونها .... شنو بكيفه ياخذها منقبل كلنه .... مو حقكم محد يعرف عمار شكد حاقد عليه ويكرهني .... اني راح ارتاح اذا كمل بيته ع الاقل مراح اشوف اسيل 

دخلنه بالكروب اني وشهد ونوره وديما اتفقنه باجر ديما تروح لاهلها وتجي وياهم النه كلنه نجمع واذا نبات هنا بعد احس ديما اخذت الموافقه من احمد ونوره همين واتفقنه انام كلنه سويه اهم شي الحيه اسيل ماكو 

ثاني يوم اجوي بيت جدو وحيل فرحانين حتى شهد خطيه حسيتها انسانه ثانيه كدرنه انسيها ولو شويه همها 

كلمن كعدت تسولف همها كل شخص مهما كان لابد عنده هم ديما خطيه مرة حماها شاده وياها وتكول توز عمتي وعمو عليه ودائما مشاكل تكول كاعد اتوسل باحمد حتى نطلع بوحدنه لان كاعد اعاني اما نوره هاي خطيه مرتاحه من كل النواحي بس طفل ماكو تكول هذا الشي مدمرني ع الاخير اتمنى يصير عندي طفل خطيه كرار من حقه يصير ابد واخاف يجي يوم ويتغير عليه ويفكر يتزوج لان من حقه يصير اب بس بنفس الوقت اذا فكر يتزوج مااتحمل يمكن اموت من الغيره 

اتحولن ع شهد تعالي سولفينه شلون متحمله الغيره وشلون تكدرين تسكتين 

شهد : بعد اخر موقف وي عمار من قرر يبني مصار اي شي بيناتنه تقريبا متجنبني يجي صدفه ياخذ الي يريده ويختفي لحد الان مبايت بغرفتي ابد تقريبا مرتاحه من ناحية ممضايقني ومن اهلي رادوني اجي ع مود عقد نرجس اتفاجأت من خلاني اروح وابقى وجنت حيل فرحانه غيرت جو هناك وفرحت وي البنات بس يافرحه مادامتلي من رجعت جان عمار يريدله حجه عليه اقل زله وضربني اقل شي سمعني كلام جارح الصراحه حيل كاعد اضوج ومااعرف شاتصرف اسيل متتحاجه والعود متجيسه بحجة حامل وتخاف ع نفسها بده عمار ابناء بيته تكلفه مقاول واني مبتليه بالعمال مااكدر احجي لان ياعب بيه طوبه خطيه بنتي تبهذلت وهو يشوف بعينه من يشوفها تبجي يحجي عليه عوفي البيدج وتعاليلها ومن يشوفني مخليتها بحضني واريد انيمها هم يكوم يحجي ويكلي مخليه الطفله حجه حتى تكعدين واحتاريت وي عمار شنو الي يرضي مااعرفه بيوم الي اجتنه روان وحجت لعمار ع ابنه سحلها سحيل حيل افرحت بيومها ثاني يوم وجها مورم مبين كاتلها حيل بيها 

بعدها تقرر يسافرون الصراحه فرحت لان ارتاح منه فتره واسيل هم راح تروح يم اهلها بس المشكله اني منعني اروح يم اهلي اله لمن ارجع بحجة محد يبقى يمهم كتله من تجي روان اروح هم رفض وحيل ضوجني بس شاسوي بس اعترف من راح البيت هدوء ومرتاحين حيل عمو خطيه ميقبل نسوي عشه ابد يكول اجيبلكم من بره ويوميه يجيب شكل بعدها اتصلت بيه ايات خطيه ورادتني ابات بس مقبلت ابد واعتذرت بحجة بنتي تتبهذل بس فاجئوني من اجوي كلهم وبقوا يمنه لليل حتى بابا فرحتي متنوصف ابد حيل اتونسنه بيومها وحسيت بنفسي انسانه طبيعيه اضحك واسولف ونسيت عمار اصلا طبعا طول هاي الفتره ممراسلني ابد بس مره وحده 

ها الظاهر فرحنه ومرتاحه بدون عمار متعرفين تراسليني وتطمأنين عليه كتله اخاف اراسلك وتكلي شعندج وتفشلني بقيت ادزله وميجاوبني ابد حيل اضوج من تصرفه لعمار 

عمو وخاله قرروا يزورون اهلي وهم كالوا نبقى لليل لان حلوه اللمه واهلي اصلا همه الي اصروا عليهم كالوا منا لاسبوع نروح لو لمن يجي عمار ثاني يوم اجني ديما ونوره وجانت فرحتي متنوصف ابد بالليل كعدنه سويه وبدينه نشكي همومنه من وصل الي السره معرفت شاحجي سالني ع الغيره كتلها اه يالغيره وماادراكم ما الغيره نار وتشتعل بداخلنه تخلي الواحد يموت الف موته بالدقيقه كتلهن احساسي صعب اوصفه يعني شخص تحبينه وتعزينه وتضحين بسعادتج ع موده اني ضحيت بسعادتي وافقت ع ابن عمي لخاطره حتى يطلع من السجن عيشت ابن عمي اسوء ايام ع موده وفجاه هذا الشخص يطلع حاقد وياذي متندمه لان حبيته متندمه لان وافقت ع الزواج بي متندمه ع كلشي صار ويايه 

بس شيفيد الندم حجيت الي بداخلي وحسيت هم وانزاح مني هواي واسني البنات وكللي روحي لاهلج وبنتج مستحيل ياخذها منج بس ديما كالت عمار مو طبيعي واكيد هاي الحقيره مسويتله سحر وهيج اتخبل وياج وقلب عليها وحبها اني متاكده كلشي يسوي وياخذ بنتج لان مو بوعيه ابد 

ديما اني مااعترف لا بسحر ولا بغير شي بس عمار حب ينتقم من عندي واكيد هذا الشي عنده عادي لان غايته الانتقام واصلا محبني بيوم كله جذب لااقتنع سحر ولا غير شي 

اجه دور روان يله احجي انت وليش لهسه ماكو طفل كالت اني مرتاحه من كل النواحي الحمد لله والطفل اني ومرتضى منريد هسه ابد بقينه نسولف وحلوه لمتنه بعدها اقترحت ديما كالت خلي نتبادل بالاجهزه وندز رساله موحده لكل واحد تقصد ازواجنه وكلمن تقره الرساله خلي نضحك بلكي وحده يدز رساله ممنوعه اني وروان رفضنه بس نوره وديما صممن كالن خلي نضحك اني اخاف من ردت فعل عمار 

كالن الي ميتجاوب زوجها وياها باجر نخسرها كيكه جاهزه وعشه والتنظيف عليها 

اخر شي قررن ندز هلووو حبي شلونك شخبارك مشتاقتلك موت هاي الك 😘😘😘 شكد مشتاقلي الله عليك اني متلهفه لجيتك حبيبي احسب دقيقه دقيقه شوكت تجي حتى احضنك للصبح وانام بحضنك 

اني راح اتفشل كدام البنات متاكده وروان هم مابينها وبين مرتضى اي شي بس دزن بعد اني جهاز نوره عندي ونوره عندها جهاز روان وديما عدها جهازي وجهاز ديما عند روان وصلن الرسائل الهم اني جنت ادعي كون عمار ابد ميجاوبني ولا يفتحها ابد مثل كل مره لان ميجاوبني ولا مره بقينه ننتظر تقريبا نص ساعه وبدت تجي الرسائل اول رساله نوره فتحتها وحجيت بصوت عالي 

هلو حياتي شلونج مشتاقلج وعلي يمين عليه بيوم الي اجي اله اكسر ضلوعج من كثر الحضن احسبي حسابج للصبح منام بيومها واطلع فرق السفر كله وهاي احلى بوسه 😘 الاحلى زوجه 

كامت تضحك فزت اني الحمد لله 

بعدها اجه دور ديما قرت روان الرساله هله بالحب هله بام الغالي هله بحبيبتي وام جهالي لج ذبت بالبوسه والله اتمنى هسه يمج اله اخليج تبجين ومحمد مشتهي عسل من شفايفج وينج كون هسه يمي اله اكفر بيج وحجه للصبح احسبي حسابج تنيمين ابنج للصبح مااريده يكول أه 

ضحكت كالت فزت الحمد لله .... بقينه اني وروان وحده تباوع للثانيه وجها مخطوف خطيه روان واني مااقل عنها 

عندي امل ميجاوبني قريت الفاتحه بكلبي بعدني ممكملتها وجان تجي الرساله لجهازي وجانت صدمه الي ابد ممتوقعه هيج يكول قرتها ديما جان تكول ......