رواية توقيت الجريمة الفصل الثالث 3 بقلم محمود الأمين

بيت وائل كان بيتحرق، كنت واقف قدام البيت مش مصدق نفسي.. مين الشخص اللي عنده نفوذ واللي خايف ان وائل يتم استدعائه للنيابة ويقدر يعمل كده؟! 

واضح ان وائل عمل حركة قسم الشرطة دي من دماغه والحركة دي.. كانت هتكشف اللي حرض جلال يعمل كده في مرات اخوه وبناته

واللي عنده القدره يعمل كل ده هو واحد بس وذكر اسمه في القضية هيحتاج لدليل قوي والا النيابة هترفض استدعائه والشخص ده يبقى يوسف محفوظ رجل الاعمال اللي على خلاف قوي مع راشد والورق اللي مع راشد على حسب التحريات ممكن يحبس يوسف محفوظ.. ده كان تحليلي وانا واقف قدام بيت وائل وهو بيتحرق.. اصل لو جلال اخد القرار ده من نفسه، وائل يحصل فيه ده كله ليه؟ 

وصلت رجالة المطافي وقدرت تسيطر على الحريق، وبعدها وصلت رجالة الطب الشرعي والمعمل الجنائي للمكان، ولكن كالعادة فالمواقف اللي زي دي بيكون صعب عليهم جداً فحص الجثه او مسرح الجريمة.. الجثه اللي كانت قدامي على الارض ومتفحمة تماماً وبكده الشخص الوحيد اللي كان هياكد التهمة على جلال اللي مات هو كمان بيته اتحرق وجثته قدامي

وخلاص رجعت على مكتبي بعد ما القضية خلصت، القاتل هو جلال واللي عمل كده في وائل مجهول وطبعا كنا في انتظار تقرير المعمل الجنائي اللي هياكد اذا كان المكان ده اتحرق بفعل فاعل ولا اللي حصل ده طبيعي نتيجه لانفجار انبوبه مثلا

وبعد ما خلاص القضية كانت اتقفلت.. وبعد مرور شهرين يوصل بلاغ جديد لقسم الشرطة، والشخص اللي مقدم البلاغ ده اسمه شريف وبيقول ان في تهديدات بتيجي على التليفون عنده وان هو عارف مين الشخص اللي بيهدده وعشان كده جاي يعمل فيه محضر.. وشريف ده هو الشخص اللي لجأ لي راشد في موضوع دخوله المنطقة بتاعته وراشد قال وقتها اني كنت عند صاحب شريف عشان اخد منه فلوس اسهر بيها

وطلبت من الظابط اللي بيعمل المحضر لشريف انه يجيبهولي على المكتب

_ ازيك يا شريف.. عامل ايه يا بطل؟ 

= الحمد لله يا باشا في نعمة

_ انا سمعت انك عندنا هنا قولت اجيبك وارحب بيك بنفسي، وبالمره اعرف منك.. مين الشخص اللي انت جاي تعمل فيه محضر ده وبيهددك؟ 

= انا كنت هاجي واتكلم من بدري، بس انا كنت خايف على اهلي عشان كنت متهدد بيهم في البداية ولما قدرت ابعدهم الشخص ده بعتلى صور لبنتي وهي في المدرسة.. يعني بيعرفني انه يقدر يوصلهم في اي مكان. 

وعشان كده مليش غير الحكومة هي اللي تقدر تقبض عليه وتحميني منه انا واهلي 

_ ايوه مين الشخص ده؟! 

= الشخص ده يبقى راشد.. ايوه يا باشا انا جاي اقول اني شهدت شهادة زور  ومش فارقه معايا اني ادخل السجن انا كل اللي فارق معايا مراتي وعيالي هيقتلهم يباشا

_ طيب وراشد هيعمل كده ليه؟!.. فهمني الموضوع واهدى كده وان شاء الله مفيش حاجه هتحصل لاهلك 

= راشد هو اللي عمل كده في مراته وعياله، راشد هو اللي قتلهم

_ لا يا عم شريف، انا مش عايز دماغي تلف الله يباركلك انت تحكي اللي حصل من البداية وانا اوعدك اني هحمي مراتك وعيالك من اي ضرر ممكن يطولهم بس اتكلم

= راشد كان زيه زي اي بني ادم، اتجوز مراته عن حب وخلف منها بنتين وعاش معاهم احلى سنين في حياته، هو يبقى عشره عمري ومتربيين مع بعض من زمان تقدر تقول عليه انه كان الشخص ابن الاصول الجدع اللي تلاقيه في اي موقف 

لحد ما قرر انه يتجوز كان عايز يخلف ولد مش بنت خايف الايام تجري بيه ويبص يلاقي نفسه راجل عجوز وميلاقيش حد يتسند عليه وللاسف مراته الاولانية كانت كل خلفتها بنات، معرفش شاف وفاء دي امتى وحبها ازاي؟.. لكن جه في يوم وكان باين عليه الزعل وانا الشخص اللي كان بيحكيلي كل حاجة اخد جنب منى ومبقاش يكلمنى.. حاولت اوصله كذا مرة لحد ما قدرت في يوم اقعد معاه على القهوة واتكلمت معاه وفهمت من كلامه ان مراته الجديدة مبتخلفش وانها طلبت منه ميطلقهاش عشان هي مش عايزه ترجع تعيش مع اخوها السوابق تاني وهو مش عارف يتصرف ازاي

وانا كل اللي طلبته وقتها منه انه يرضى، وان اللي حصل ده حكمة من ربنا وانه مش مطالب انه يخلي وفاء على ذمته اللي هو اصلا متجوزها عشان خلفة الولد 

بس كل اللي اقدر اقوله لحضرتك ان وفاء دي شيطان في صوره بشر قدرت تبدل حال راشد، واتحول من شخص اجتماعي بيحب قعدة الناس لشخص قاعد على طول معاها حتى مراته وبناته اهمل فيهم.. وفات سنة ووقتها كان هو واخد جنب مني لكن في يوم لقيت باب البيت بيخبط ولما فتحت كان هو، كان منهار وبيعيط وبيطلب مني اني اساعده وانه في مشكلة كبيرة، واللي حكاه وقتها كان كارثة.. راشد قال انه طلع مش بيخلف وانه العيب منه هو مش من مراته وفاء والكلام ده معناه ان مراته الاولانيه بتخونه ودول مش بناته.. انا كنت رافض الكلام ده وطلبت منه يتاكد قبل ما ياخد خطوه مجنونة بس انا كنت فاكر انه اخر يعني حاجه هيعملها هيطلقها هيفضحها.. لكن يقتلها ويقتل بناته مكنتش متوقع انه ممكن يعمل كده، شهدت معاه مقابل مبلغ كبير ولكن ضميري مكنش بينيمني رجعتله فلوسه وقررت اجي اشهد بالحقيقة هددني ولسه لحد دلوقتي بيهدد وانا خايف على اهل بيتي زي ما فهمت سيادتك

... 

كلام شريف اتاخد في محضر رسمي وراح على النيابة.. واخد شريف اربع ايام على ذمه التحقيق والدنيا اتقلبت على راشد اللي كان فاكر انه هيهرب ولكن الغريب انه كان عايش حياته عادي مكنش متخيل ان شريف هيجي ويبلغ كان فاكر انه هيخاف على عيلته

اتقبض على راشد عشان يبدأ التحقيق معاه من رئيس النيابة والغريبة انه مأنكرش اي حاجه من اللي قالها شريف، واتكلم وقال

_ تعمل ايه يا باشا لو اكتشفت ان مراتك بتخونك، وان بناتك مش بناتك.. هيكون فيك عقل تفكر، وفاء مراتي التانية راحت عملت التحاليل في كذا معمل تاني وطلعت بتخلف، ولما روحت انا طلعت انا اللي مش بخلف وان عندي عقم من زمان

وعقاب الخيانة الموت.. كنت مرتب كل حاجة في اليوم ده خرجت من الورشة وانا معايا السكينة وكنت مظبط مع واحد يقطع الكهربا عن المنطقة عشان الكاميرات اللي في الشارع، طلعت فوق وخلصت عليهم وخليت شريف قال ان كنت بستلف منه فلوس وبعدها طلعت على المكان اللي سهرت فيه ورجعت على الساعه 6 الصبح كنت عايز ابقى ماسك نفسي عشان اقول ان مراتي وبناتي اتقتلوا.. ولكن تقلت في العيار حبتين لدرجة اني مسكت سلاح الجريمة بايدي وانا سكران، وللاسف اخويا جلال شافني وانا نازل من العمارة وطلب مني فلوس مقابل انه ميبلغش عني ولكن انا كنت عارف اخويا جلال بيعشق حاجه اسمها مخدرات انا اللي زقيت عليه وائل اللي تقل معاه العيار حبتين وخلاه مات اوفر دوس

وكنت متفق مع انه يبلغ وبعد ما عمل كده رجع يبتزني ويطلب فلوس أكتر من اللي اتفقنا عليها.. هيكون اغلى من مراتي والبنتين اللي انا ربيتهم خلصت عليه هو كمان وولعت في البيت

واول ما قولت خلاص الموضوع خلص وهرتاح، طلعلي شريف يقولي انا ضميري صحي ومش بنام الليل وعشان هو يعز عليا اديته فرصة ومكنتش اعرف انه هيبلغ 

بعد ما خلص كلامه.. رئيس النيابة صمم يعمل تحليل في معمل محترم لراشد.. والتحليل ده كان صدمه بالنسبه لراشد لانه اثبت انه بيخلف وان وفاء مراته ضحكت عليه وخدعته عشان يخلص على مراته الاولانيه وبناته

وراشد لما عرف الكلام ده كان هيتجنن.. وقبل اسبوع واحد من تنفيذ حكم الاعدام في راشد.. انتحر وكان كاتب انه لو رجع بالزمن عمره ما هيكرر الغلطة دي وهيرضى باللي ربنا قسمهوله ولكن هو مش قادر يعيش بعذاب الضمير وانه كل يوم بيشوف مراته وبناته قدام عينيه. 

..