رواية سجين الوهم الفصل الثالث بقلم فاتن أسامة
'فوقت من شرودي علي إيد مرات عمي وهي بتهزني'
ـ ر'حيل! ر'حيل يابنتي
'بصيتلها وأنا دموعي نازلة واحدة ورا التانية بدون سيطرة مني'
= هو في إيه؟
'بصيت حواليا ملقيتش حد، وأنا لسه واقفة في مكاني
مفيش غير ليلي قاعدة وجنبها ماما بتهَديها'
ـ أنتي سرحانة في إيه؟
= هما فين وإيه إللي حصل!
= يوه؟ غريبة يابنتي مشوفتيش كل الضرب إللي حصل دلوقتي؟
'حطيت إيدي علي صدري وإتكلمت بخوف'
= مشوفتش لا
'طبطبت علي كتفي وقالت'
ـ إبراهيم يابنتي ضرب يوسف بعد ما قاله:
‹ولو هي بتحبك أوي كدا ليه جَتلي أنا الأول؟
مكنتش مالي عينها!›
بعديها ضربو بعض لحد ما دماغ يوسف جابت دـم ونقلوه المستشفي
'بصيتلها بـصدمة وأنا بسألها بتأكيد'
= يعني إبراهيم مقالش إنه هيتجوز ليلي!
'ضحكت وهي بتخبط دماغي بـلُطف'
ـ يخرب عقلك يا بعيدة، أنتي دخلتي الأمور في بعضها ليه!
|فلاش باك|
ولو هي بتحبك أوي كدا ليه جَتلي أنا الأول؟
مكنتش مالي عينها!
'ضربه بالقلم
وكان رَد يوسف عبارة عن عيون مبرقة من الصدمة
وبعد ثانية من سكوتهم وصريخ ستات العيلة
إبراهيم قرب من ليلي
مسك إيدها وبنظرة كيد أكبر قال..'
_ ليلي دي بنت عمي، وإللي يجي عليها أكنه جه عليا
وبعدين يا يوسف يا محترم، أنا في حياتي واحدة، وبحبها
ومش مستعد أكسر قلبها تاني
|باك|
ـ هو دا إللي حصل يابنتي، أنتي كويسة؟
'حطيت إيدي علي قلبي من خوفي حد يسمع صوت ضرباته العالي'
الابتسامة إترسمت علي وشي بالتدريج
أنا كنت بتخيل من خوفي!
ـ ياريته قال إنه هيتجوزني يا ر'حيل، ياريته لسه بيحبني زي ما بحبه
'حركت عيوني من مرات عمي لـ ليلي إللي ما زالت بتمثل علينا
وبعدين قولت'
= زي مانتي بتحبيه؟
ـ أهه يا ر'حيل، زي مانا بحبه، أنتي نسيتي قصة حبنا إللي الكل كان بيحلف بيها
= وأنتي نسيتي حُبي له، وبكل دم بارد خطفتيه مني!
'ماما شهقت بـصدمة، معاها مرات عمي'
'إتكلمت ليلي بـ غِل'
ـ لو بيحبك عمره ما كان حبني
'رديت بـ ضعف حاولت أداريه لكن مقدرتش'
= أنا بس عشان مكنتش زيك، مكنتش جريئة، مكنتش بلبس الأحمر والأخضر، كنت في حالي مبقدرش اقول إللي جوايا
ويوم ما أمنتك علي سري، روحتي وشدتيه ليكي، إنخدع بتمثيلك إنك بتحبيه، وأنتي كل إللي كان هامك وقتها تقوليلي: شوفي أنا إللي كسبت إزاي
'ردت بنبرة عالية وعيون مبرقة من الغضب'
ـ أيوا يا ر'حيل، أخدته منك
أيوا خليته يحبني برغم إني محبيتوش أساسا
أيوا وقعته في حُبي عشان بس أثبتلك إنك مش أحسن ولا حاجة عشان بابا وماما يحبوكي أكتر مني
'مسحت دموعها وكملت بنفس نظرة الشر'
ـ بس هو السبب
'فضلت تتلفت ما بينا وهي بتتكلم بـتوسل'
ـ والله يا ماما كنت خلاص، بعدتهم عن دماغي، وإتحوزت يوسف حبيبي
بس لما ظهر تاني معرفش إيه حصلي
حنيت لذكرياتنا سوا
فـ قولت ليه لا! ليه مخليش التمثيلية حقيقة وهو كدا كدا كان مصدقني
'وبكل قوة ماما ضربتها بالقلم
رَن في كل رُكن، وعلي الجانب التاني مرات عمي إللي وقفت بينهم'
ـ يا خسارة تربيتي فيكي يا ليلي
ـ أنتي إللي عملتي كدا يا ماما
أنتي إللي خليتيني أكرهها من تفضيلك ليها عليا
= أنتي.. أنتي محتاجة تتعالجي يا ليلي
قتلتي إبنك عشان خاطر الوَهم!
وَهم إن إبراهيم ممكن يرجعلك؟
'قربت منها وأنا بضغط علي دراعها بإيدي'
= قتلتي إبنك عشان خاطر الوَهم إللي عيشتي فيه وعَيشتي إبراهيم معاكي فيه!
أنتي مجنونة والله مجنونة
'كانت هترد لكن لسانها إتجمد
وعيونها بدأت تدبل مع رجفة جسمها
وكأن عقلها أخيرًا إستوعب الكارثة إللي عملتها'
'ببطء.. حطت إيديها الإتنين علي بطنها، ولسانها بيردد بـصوت خافت'
ـ إبني.. إبني حبيبي لسه موجود مماتش
'رجعت بضهري لورا
بخطوات تقيلة.. ببعد عنها
وللحظة كان الحل إني أمشي'
مش هكمل في الوَهم دا
حُب ليلي لـ إبراهيم كان وَهم
وحُب إبراهيم ليها نتيجة وَهم
وحُبي أنا لـ إبراهيم برضو كان وَهم، عشانه محبنيش
لو كان بيحبني مكانش دا حالنا
مكناش كلنا دلوقتي سُجناء لوَهم الحُب
'طلعت بسرعة بعد ما مرات عمي وماما أخدو ليلي علي المستشفي
دخلت في حالة إنهيار وأغمي عليها'
وأنا..
أنا همشي
يمكن دا هروب
ولكن مقدرش أفضل طول مانا معرفش دا حقيقة ولا في خيالي أنا
'لميت شنطتي بعد مرور دقايق من اللخبطة والتسرع إللي كنت فيهم
مش عارفه أخدت إيه بالظبط، لكن أخدت اللازم
ومع صحبتي علي الواتساب إتفقنا
وأكدتلي إن فيه مكان زيادة في السكن إللي أخدينه هي وباقي زميلاتنا
بحكم إننا في جامعة القاهرة
وعلي السلم وأنا بطلع من شاتها، صوباعي ضغط علي الأرشيف
شات بـ إسمه 'إبراهيم'
جنبه تاريخ قديم، بقاله سنين مدخلتوش
مسحت دموعي بإيدي إللي بتتهز من خيبة الأمل وبالإيد التانية عملت بلوك
الشات إللي مكنتش بطلع منه
الغُربة إحتلتــه
بقينا إتنين أغراب بعد ما كنا بنتشارك اليوم، الحكاوي، الضحك، الهزار
حتي النَفَس كنا بنتشاركه
معرفش بيقولو إيه عند الوداع
لكن..
مع السلامة يا أحن وأغلي إنسان
كان بالنسبالي في يوم من الأيام 'بيــت'
وبرغم إن البيت إتهد
لكن ما زال عندي أمل
الدنيا تجمعنا ولو لثواني أقولك فيهم قد إيه الحياة من غيرك مُرّة
|القاهــرة|
الخامس عشر من شهر مايو
'الطريق مكانش طويل كفاية أفَضي مخزون دموعي فيه'
كانت الساعة ١٠ بالليل
وعلي غير المعتاد بالنسبالي إن اليوم الحزين دا يوم الجمعة
بعد ما كان اليوم المميز بالنسبالي عشان كل العيلة بتتجمع فيه
عادة قديمة جدي عودنا عليها
لكن جُمعة النهاردة مختلفة
'وقصاد المترو من برا
العربية عطلت'
= مانا أكيد مش هركب المترو يا روح أمك أنتي
'خبطت الدريكسيون بإيدي
وبدأت أنفخ بـغضب'
= إستغفر الله العظيم الحي القيوم و أتوب إليه
'صحبتي رنت'
ـ أنتي فين
= لسه داخلة القاهرة، العربية عطلت يا منة
ـ إركبي المترو، دا حوالي تلت ساعة من عندك وتكوني عندي
= هشوف أوبر أو حاجة تانية
ـ مامتك محلفاني إني مش أخليكي تركبي أوبر من غيري عشان بتقلق عليكي
ـ إركبي المترو يا ر'حيل دلوقتي حالا
= أنا؟ لا يمكن يابنتي أنتي إتجننتي ولا إيه
|بعد مرور دقائــق|
= تذكرة لـ ** لو سمحت
_ خليهم تذكرتين
'الصوت جه من ورايا
مش غريب، حنين، قلبي يعرفه كويس'
= إبراهيم!
_ مش عيب لما تسيبي البيت وتمشي من غير ما تعرفي حد
= منة إللي رنت عليكو صح!
_ نتكلم في البيت إن شاء الله
'فَلِّت إيدي من إيده وأنا بقول بـحدة'
= إبعد عني يا إبراهيم
'تَبِّت في شنطتي وبدأت أمشي تجاه المكان إللي هركب منه
وبرغم عدم معرفتي بالمترو بشكل عام وبتلخبط فيه
لكني مشيت'
وعند موقع الركوب وقفت
= يوووه! جاي ورايا برضو
_ أنتي محسساني إني واحد بيعاكسك في الشارع
= طيب إيه رأيك بقا لو مش مشيت وسيبتني هصرخ وأقول بيعاكسني بجد بقا
'قرب خطوة'
_ والله!
= أهه والله
'قرب خطوة تانية'
_ طيب جربي كدا
= إبراهيم..
_ أنا بحبك
'الصدمة إحتلتني
معاها خدودي إللي إحمَرّت فجاة'
= أنا.. هي..؟
_ أيوا أنتي إللي كان قصدي عليها
لما قولت إني بحب واحدة ومستحيل أكسر قلبها تاني
'وبصوت مهزوز قولت..'
= تاني؟ أنت عرفت الحقيقة!
'السكوت بقا تالتنا
وبـ ضيق بسيط مسح وشه بكفوفه وقال'
_ معرفش إيه حصلي بس إللي أعرفه إني عايزك
من يوم لُقانا بعد ٣ سنين فراق
عرفت إني بحبك
لما كان نفسي أضمك وأخليكي جوايا ومتبعديش تاني
لما برضو رجعت البيت وشوفت ليلي محسيتش بـ شئ
ولو حسيت.. بتيجي صورتك قدامي وتمنع كل دا
وحُبي إتأكد أكتر
يوم ما سمعتك بتتكلمي مع واحدة صاحبتك في التليفون وبتحكيلها حكايتنا
'بلعت ريقي بصعوبة
سمعني لما كنت بتكلم مع منة وبعيطلها من شُوقي!'
= أيوا يا ر'حيل سمعت
سمعت كل حاجة
بس دلوقتي كل حاجة إتحلت
إتحررنا من الوَهم وبقينا في الواقع
والواقع بتاعي هو أنتي
أنا بحبك أنتي..
'الناس بدأو يبصولنا لما نبرة إبراهيم عِليت فجاة
وبإبتسامة.. عمو 'راجل في الخمسين من عمره'
قرب من إبراهيم وأداه بوكيه ورد أحمر'
ـ كنت جايبه لمراتي، بس مش خسارة فيك وفي حُبك ليها يابني
'أخد البوكيه منه بـحُب
وبعيون ممزوجة من الدموع بَصِّلي وقال'
_ تتجوزيني يا ر'حيل؟
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
