رواية قاتل متسلسل الفصل الثالث بقلم محمود الأمين
القبر كان فاضي، جثه كريم مش موجودة بصيت للرائد عزت اللي كان واقف ومش فاهم حاجة وقولتله
_ جثه كريم مش موجودة.. اكيد في حد سرقها
= هو مش فيه هنا حارس للترب يا فندم، اكيد عارف حاجة
في الوقت ده قرب مننا راجل في اوائل الخمسينات لابس جلابيه وعلى ملامحه توتر وقلق.. واتكلم وقال
_ يا نهار اسود ومنيل، يخراب بيتك عبد الباسط، مين اللي فتح القبر ده والجثه راحت فين؟
= انت مين يا جدع انت؟
_ انا الحارس اللي ماسك الترب هنا، ولما شوفت عربيات الشرطه وهي داخله من الشارع جيت علشان اشوف في ايه
= طيب افتح القبر ده.. القبر بتاع الاستاذ ساهر ومعانا اذن من النيابة باستخراج الجثة
_ تحت امرك يا باشا، بس بالنسبه للجثه اللي اختفت دي انا هعمل ايه فيها دي اول مره تحصل معايا
= نبقى نشوف الموضوع ده بعدين، يلا افتح القبر
...
وفتح القبر وخرجنا جثه الاستاذ ساهر واللي للاسف كانت وصلت لمرحلة الهيكل العظمي وقتها اتكلم دكتور الطب الشرعي اللي كان معانا وقال
_ رجعها تاني يا باشا، كده مش هنعرف اذا كان مات موتة طبيعية ولا لا
= يعني ما ينفعش تحاول يا دكتور؟
_ احاول في ايه يا باشا، ده هيكل عظمي الموضوع خلاص منتهي كده
...
رجعنا الجثه للقبر تاني عشان هيكون صعب تحديد سبب الوفاة بعد ما وصلت للمرحله دي، ولكن انا متاكد ان الراجل ده ما ماتش موته طبيعية واكيد الموضوع وراه حاجات كتير
رجعت على مكتبي من تاني ووقتها اتصل بيا وكيل النيابة واتكلم وقال
_ ازيك يا باشا عامل ايه؟.. احنا اخلينا سبيل صالح مش عليه اي ادانه عشان نتحفظ عليه واللي اسمها شهد دي مجتش لحد دلوقتي وبكده هنطلع قرار ضبط واحضار ليها
= طيب وبالنسبه للمحضر اللي عاملاه مدام ولاء، واللي قالت فيه ان جوزها اختفى بعد ما كشف على الاستاذ ساهر والرساله اللي اتبعتت على تليفونها واللي واضح من اللي بعتها مش هو الدكتور اللي بعتها هو الشخص اللي ورا اختفائه
_ ده برضه مش دليل على احتجاز صالح، ولازم يكون في حاجه قويه نستند عليها
= طيب حضرتك هتطلع اذن النيابة امتى عشان نقبض على شهد؟
_ دلوقتي حالا، وفي خلال ساعه هيكون عندك
...
بعد شوية كان في ايدي اذن نيابه بالقبض على شهد الشغالة اللي اخدت اجازه بعد موت الست نعمة ومن ساعتها وهي مختفية وعرفنا عنوانها من صالح وبعدها اتحركنا على العنوان ولما وصلنا خبطنا على الباب واللي فتحت لينا الباب كانت شهد كنت فاكر انها هتتخض من وجودنا ولكن لا، وطلبت مننا اننا نتفضل وندخل
ولكن قولتلها ان في تحقيق نيابة معاها وانها لازم تيجي معانا، جهزت نفسها ولبست وبعدها اقل من ساعه كانت واقفه قدام وكيل النيابة وبدأ كلام معاها
_ مجيتيش ليه لما جالك استدعى عن النيابة؟
= كنت تعبانه يا بيه انا اسفة
_ طيب انتي عارفه انتي هنا ليه؟
= لا يا بيه.. بس يعني حابه اعرف
_انتي هنا بسبب جريمتين القتل اللي حصلوا، الست نعمة والانسه ياسمين.. كنا عاوزين نسمع اقولك بما انك الشغالة الوحيده في البيت ده
= بس انا معرفش حاجة، انا اه كنت في البيت معاهم بس من اول يوم شغل ليا هناك والست نعمه نبهت عليا اني خرسة وعامية وطرشا.. وانا كان كل دوري في البيت اني بطبخ وبنضف
_ طيب الكلام ده تقوليه لما حد يسالك اهل البيت دول عايشين ازاي؟!.. لكن انتي دلوقتي قدام نيابة وبيتحقق معاكي بسبب جريمتين قتل حصلوا في البيت اللي انتي بتشتغلي فيه، فسيبك من حوار انك ما كنتيش بتشوفي او بتسمعي حاجة وتعالي معايا من الاخر
= انا معرفش مين اللي قتلهم والله، وفي يوم الجريمة اللي اتقتلت في الست نعمة انا كنت نايمه وصحيت على صوت الاستاذ صالح وهو بيزعق وبينده على الانسه ياسمين
_ طيب وبالنسبه للاستاذ ساهر، مات موتة طبيعية ولا اتقتل؟
= العلم عند الله يا باشا
_ استغفر الله العظيم يا رب، انا مش عاوز اعصابي تفلت عليكي اتكلمي وقولي تعرفي ايه وشوفتي ايه في البيت ده؟.. والا والله لهلبسك كل الجرايم دي وانتي حرة فكري قبل ما تردي
= طيب في حاجة انا اعرفها، بس لو حد عرف اني بلغت حضرتك هيخلصوا مني
_اتكلمي يا شهد ومتخافيش، ايه الحاجه اللي انتي تعرفيها؟
= الاستاذ كريم.. لما اتدفن مكانش مات
_ لا مش فاهم، وضحي اكتر
= لما الاستاذ كريم جاتله الازمه القلبية، الاستاذ صالح جاب دكتور عشان يلحقوا والانسه ياسمين كانت بتقول انه الاحسن يتنقل للمستشفى ولكن الاستاذ صالح رفض، وانا مكنتش فاهمة سبب رفضه ولما الدكتور دخل وكشف عليه خرج وقال البقاء لله
لكن في الوقت ده الانسه ياسمين دخلت عليه وهي بتصرخ وسمعتها بتقول لسه عايش يا صالح، كريم لسه عايش ولكن الغريبة ان صالح كتم بوقها وقالها لا كريم مات
كدبت نفسي ورفضت اصدق اللي شوفته بعينيا، وشوفتهم وهما بينقلوه للعربية واخدت بالي ان ايده بتتحرك
_انتي متأكدة من كلامك ده؟
= ايوه يا بيه متأكدة بس ابوس ايدك ماحدش يعرف اني بلغتك بالكلام ده
_ محدش هيعرف لو كملتي، تعرفي ايه تاني؟
= ما تضغطش عليا يا بيه، والله ما اعرف حاجه تاني
_ كده انا مضطر اتحفظ عليكي لحد ما نشوف هنتصرف ازاي؟!
...
اتحفظت النيابة على شهد الشغالة، واستدعوا الاستاذ صالح تاني عشان يواجهوه بكلام شهد ولكنه بعد ما سمع الكلام فضل يضحك وانكر كل الكلام ده وقال محصلش، وقال عليها انها كانت مريضه نفسيا وكتير طلب من مرات ابوه تمشيها بس هي اللي كانت بترفض.. ولما سألته عن الدكتور اللي كشف على اخوه قال انه اسمه الدكتور سليمان وسافر كندا من شهر
كانت صدفة غريبة، كل اللي بيكشف على واحد من العيله دي بيسافر.. بس انا عند رأيي صالح ده وراها حاجه وهعرفها قريب
مكنش عندنا دليل عليه وعشان كده خرج من النيابة هو كمان
وفي الوقت ده وصلنا بلاغ عن جثه مرميه في طريق مهجور، اتحركنا على مكان البلاغ ولما وصلنا هناك لقينا نفس المنظر اللي كان في جثه الاستاذ ساهر هيكل عظمي ولكن عليه بدلة مقطعة ولما ركزت في اللبس عرفت هو مين.. الدكتور عابد جوز مدام ولاء المختفي وده كان نفس اللبس اللي ذكرته مدام ولاء في المحضر.. وزي ما كنت متوقع الراجل ده عرف حاجة تخص الاستاذ ساهر وكانت هتودي عياله ومراته في 60 داهيه وعشان كده خلصوا عليه.. بس السؤال مين اللي بيخلص على العيله دلوقتي؟.. مين اللي قتل الست نعمه والانسه ياسمين؟
في اللحظه دي تليفوني رن ورديت
_ الحق يا باشا البنت اللي حضرتك قبضت عليها وكان بيحقق معاها وكيل النيابة
= ايوه اسمها شهد مالها؟
_ اتقتلت في التخشيبه
= انت بتقول ايه.. اتقتلت.
