رواية خطايا واجتثاث الفصل الواحد والاربعون بقلم نور البصري
شفتك وروحي تطشرت
شيلمني وانة بهل عمر
نص مني ضل عدل
والباقي يقره الفاتحة
هيج انة حاليا بشوفتك
ضلت انفاسي معلكه
جن ريشه ويلعب بيها الهوى
لا صاعده و لا طايحه..
مريم 💔
ــــــــــــــــــــــــــــــღــــــــــــــــــــــــــــ
: وخري مـريم.. هذا مو مثل الأرضي هذا محمول و بي خصوصية وأسرار وبلاوي عوفي آني أرد.
سحب الموبايل من إيدي جانت كلماته وي عمي عصام مختصرة بس ملامحه جانت تنطق بالخوف.
وجهه المخطوف وكلماته المبعثرة سد الخط و باوعلي:
: حصلت تواصل وي عمي وراح يسهل طلوعنا آني وعائلتي والله وعدته أكتب بيتي هذا بأسمه.
بحيرة أبتسمت هذا عمي طماع نعرفه من زمان ما كفاه اللي أخذه و مفتر هسة على حلالنا و مالنا.
باوعلي بنظرة اللي مغلوب على أمره.
: مريوم زهبي كل أمورنا خلاص نترك الوطن الله يشهد الفترة اللي أنحرفت بيها تبت عنها و رجعت للطريق اللي تربيت عليه بس يا حبيبتي هي ديون معلگة برگابنا والعالم تطالب بديونها بدمي.
شوفي مريمة يمكن رب العالمين غفر إلي السنين اللي تبت بيها حاولت أساعد فقرة وناس حتى أكفر عن ذنبي بس بقت قضيتي وي المتضرر مني إذا ملحكنا نطلع هو آني اللي طالبيني ثار تذكري أبد لا تسلمين جنط الفلوس لأحد ذني ضمان لحياتج وحياة أبنج وأمانج بزمنا هذا اللي ينخاف منه.
بخوف كوتله : لا تحجي هيج فدوة.
: لا تثقي بأحد حتى بعمي لا تأمني أخذي أبنج روحي للشمال لبنت خالتج هناك.
غمضت عيني وآني أبجي ياربي ما أريد موت ولا أريد يجي هيج يوم ياربي ساعدنا نطلع بأمان والله تاب.
ترك السرير وراح للكنتور طلع جنطة أوراقنا الرسمية.
سألته بصوت يرجف:
: أكولك نـصير.. أنت أحد مهددك لو بس تسبق الأمور؟
: راح نطلع مريم.. البلد صار فوضى و الحيطان إذا جان قبل الها أذانات و عيون هسة صار حتى سكاكين.
الصراع الصامت اللي داخلة بي صرت من يطلع متلثم الزم القرآن لمن يرجع.
و بدت رحلة التصفية نـصير.. باع كولشي المكتبة اللي جانت رئته اللي يتنفس بيها العمارات وتجارته جان يركض وي الزمن وهو يصفي أموره إلى أوراق نقدية يضمها الي و لأبنه ياسر.
يومية أسأله نفس السؤال.
: أحد مهددك؟ شو ما أشوف أحد دك بابنا أخاف أنت تستبق الأحداث.
: هسة يجوز ربج ممدليهم مكاني بس أول تالي آني أذنبت بحق ناس وجنت شخص أثيم.
: نـصير.. ليش نطلع خلي نروح للشمال نختل بأي محافظة.
باوعلي بحسرة وهو يلم أغراضه:
: عمي يرتبلنا برا هنا مالي مكان بعد هنا صرنا غربة ببيوتنا.
صار حبيس البيت التوتر أكل ملامحه الطلعة صارت عنده مجازفة بس القدر جان ضام إلنا الفخ الأخير بصورة مرض ياسر.
ياسر قطعة من گلبي صار نار و الصخونة أكلته لحد ما شفت عيونه تگلبت بـ الصرع الحراري نـصير.. نسى خوفه و نسى التهديد شاله وركضنا بي للطوارئ ليلة كاملة عيونه ما غفت نراقب المغذي وهو ينكط بدمنا مو بس بوريد ياسر.
الصبح من طلعنا جان الجو مشحون بريحة بارود وخوف نـصير شايل ياسر اللي بدا يضحك بوجهه ضحكة بريئة وسط غابة من الوحوش.
نـصير ألتفت علية عيونه يلتفت بكل زاوية و السيارات المصفحة والدبابات مال الإحتلال تملي الشوارع مثل الكوابيس.
: مـريم.. خفّي رجليج السرعة أمان البيت أستر ألنا.
جنت أمشي وراه بيدي علاگة الأدوية أسمع خشخشة الورق وشيش الشراب وسط هدوء الشارع القاتل نـصير عبر السايدين يريد يوصل لسيارتنا وآني توني ردت أعبر وراه.
فجأة صوت بريك سيارة! نزلوا ملثمين وحوش بلا وجوه السلاح بإيدهم جنه جزء من جسمهم جلبوا بنـصير.. رادوا يسحلوه للسيارة.
صرخة نـصير شكت صدري:
: عوفوني! شتريدون مني؟ ولك ياسر.. أبني!
شفت واحد منهم يجر ياسر من حضن أبوه و شمره بالسيارة مثل شيلة الهدوم وياسر حبيبي ياسر يمد إيدينه الصغيرة تجاهي عيونه.
جانت تسألني: ماما وين؟
: يبوووووووو! خطفوهم! ولكم يا ناس.. يا عالم.. أبني وزوجي!
ردت أعبر الشارع و سيارة لزمت بريك يمي ردت أندعم بس ما أهتميت ركضت مثل المخبلة أريد ألحك بـ غبار اللي تركته سيارتهم وكعت على وجهي بالتراب علاگة الدوة طارت وتطشرت شيش الشراب بالكاع تكسرت مثل حلمنا اللي تكسر.
: نصيررر! ياسر مريض ولكم! رجعولي أبني.. يا بوية الحكولي!
العالم تعبر من يمي وتصد كلمن خايف على روحه الشارع صار فارغ إلا من صرختي وغبار السيارة اللي أخذت كل دنياي وأختفت بوسط الزحام.
صرت ألطم على وجهي صرت ألطم و التراب صار طعمه بحلگي طعم الموت ضاع الوطن وضاع وياه نصير وياسر.
ظليت أركض بكل مكان وكل اللي آملكه حذاء ياسر اللي وكع من رجله من دخلوهم للسيارة.
: وين أروح ياربي وين أنطي وجهي ولكم يا ناس يا حكومة يا عالم لحگوا علية خطفوا وليدي ورجلي يمة ياسر ولك يمة وليدي يارب أستر علية يارب لا تفجعني.
مثل المخبلة أشرت لتكسي ودون أي مقدمات كعدت ورى حتى ما عاملته.
: فدوة أمشي بساع من ذاك الطريق.
أرجف وآني أأشر بأصبع يرجف منهارة
: يمة يا ياسر يمة.
السايق أستغرب حالي.
: خوية شبيج.
: يمة يا وليدي يمة.
آني منهارة بهستريا و أبجي حس بيه منهارة راد يفهم مني شكو حتى خاف وحس تورط بيه وكف السيارة وكال:
: لا تبليني آني صاحب بنات.
باوعتله بگلبي غصة أي هذا زمن العهد الجديد الوطن المفروض يلبس ثوب جديد ويذب ثوبه الأسود القديم
مال العهود المضت بس العهد هذا وريث العهود والبلد باقي لابس حداد على نفسه.
حاجيته بلسان يتأتأ وآني أناشغ و أنهت كوة أتنفس أحس گلبي حيوكف.
: لا تخاف لا تخاف ما أضرك أمشي مناك بلكت نلحكهم.
: أستغفر الله ربي خوية الله يعينج على ما بلاج بس وين نلكاهم أمشي بلغي المركز وهم يساعدوج آني أوصلج هناك.
ما أذكر شلون نزلت و عافني السايق وراح وحتى كروة ما أخذ ركضت للمركز و آني أبجي و لسه حذاء أبني بيدي.
: وين الضابط يمعودين لحكوني أبني ورجلي لحكوا علية.
أتخبط هنا وهناك لمن وصلوني للضابط قدمت أفادتي طلبو أوصاف:
: ملثمين و آني جنت بعدني ما عابرة الشارع أخذوه هو و......
سكتت ونشغة كسرت روحي و آني أهمس بصوت يرجف ــ وياسر.
أدك و ألطم على رجلي الملم بجروحي يمة وليدي يمة ياسر ولكم أبني المن أروح يا ربي هسة شسوو بيهم يارب أحفظهم يارب طفل ماله ذنب يارب لا تعاقبني بأبني أنت أرحم الراحمين.
طلعت من المركز وآني شبه أهذي تدرون شكد مشيت حتى نسيت أأشر تكسي ظليت أمشي وأمشي لمن تعبت حسيت حر الشمس تضرب براسي
وكفت وآني حلكي ميبس مثل التايهة آلم بكل جسمي گلبي يوجعني ودوخة وآني أحس أتمايل بمشيتي إلى أن وكعت على أسفلت الشارع
بضياع أبني ضاعت كل آمالي وأظلمت الروح والبصر حسيت خلاص حوكع ضميت فردة الحذاء بجنطتي وآني أتمايل أكثر وأكثر باغماءه طويلة
ريحة المعقمات تضربني بخشمي
وتذكرني بريحة ياسر من چنت أدهن صدره بـ الفيكس فتحت عيني السگف يفتر بيه والدنيا مغوشة أول ما لمست إيدي الچرباية فز گلبي إيدي فارغة!
: ياسر! ولكم أبني وين؟ نصيررر!
ردت أگوم وحسيت بجسمي مهدود حيله چن جبل وطايح علية الممرضة لزمتني:
: يخيتي أستهدي بالرحمن ضغطج هبط وگعتي بالشارع والناس جابتج لهنا أرتاحي شوية.
: يا راحة والروح أنخطفت وياهم يا راحة والبيت صار خالي من ضحكة وليدي؟
دفعتها وگمت رجليه ما تشيلني أتمايل مثل السكرانة من الوجع طلعت للشارع الشمس بدت تكسر بفيها الناس تمشي كلمن لاهي بمصيبته لزمت فردة الحذاء مالت ياسر ضميتها لصدري حيل شميتها بعد بيها ريحة رجليه بعد بيها أثر من ريحته الطيبة.
وصلت للبيت يا بيت؟ هذا اللي هسة صار وحشة الحيطان تباوعلي بحزن وصوت صدى صرخة ياسر بعده يتردد بالزوايا : ماما.. ماما.
دخلت للغرفة وحيدة الكانولا بيدي أحس بغربة العاب أبني بعدهن مطشرة هناك و طاسة الكمادات بعدها قميص نصير والبجامة بعدهن مشمورات بإهمال عالجرباية.
يارب أسترنا يارب وين الكاهم يارب آني وحدي.
معرف ليش أجه ببالي عـون.. أمي كالت رجع و ديدورله على مرة و أحتمال يتزوج من خواله.
أندك الباب ركضت بلكت خبر عن رجلي وأبني جان عمي نوري.
: وين رجلج نحل الموضوع عشائريًا وي الهددوه نحل موضوعه وناخذكم ويانه تعالو ببيتي.
بشفايف ترجف همست:
: خطفوهم هو وياسر.
: شنوو شتحجين أنتِ مو كال دز عالم لشيخهم توني جنت يم الشيخ مالنا أحل طلابه ناس وطرح موضوع رجلج وطلابته.
الله يكرم أحس آني أطرش بالزفة..
: آني ما أعرف بهذا الكلام ولا يسولف ولا كالي عندي كعدة عشاير و فصل و عجيب نـصير.. يدخلك بموضوعه والأعجب يا عمي أنت من فاعل طلايب تدور دكات عشائرية لحلال مشاكل العشيرة.
أستغربت الحنية بصوته.
: يله يله ما تبقين هنا قفلي بيبانج وشعندج ذهب فلوس سندات شنو عدكم جيبي أمشي يم أمج.
: عمي راحوا رجلي وأبني عمي هم أثق تساعدني ونلكاهم.
: يله بنتي إحنا أهل و رجلج أبوه الله يرحمه أبن عمي مو غرب يله يم أمج وحدج هنا ما يصير.
ظليت محتارة وين أنطي وجهي يا ربي هذا خاف آخذ الفلوس وياي ويبوكني.
: عمي ما أكدر أعوف بيتي جيب أمي يمي تبقى أذا تكدر.
باوع للبيت وكال أي ليش لا وآني هم أجي يمكم الوكت ما يتأمن حتى أعوفجن حرم وحدجن.
ظل رجل أمي بالهول يگلب الأغراض والتحف ويبتسم طلعت من حلگه حجايته باردة يحاول يبينلي مهتم:
: شلون أنخطفو ومنو أخذهم؟ مـريم.. الفلوس أقصد فلوسكم يمج مو؟ لا تروح من إيدج ذني حقج وتعبج..
مجاوبته عفته يحچي ويه الحيطان رحت لزاوية الهول گعدت على الگاع لميت رجلي لصدري وظليت أهز بجسمي وأناشغ بصوت مكتوم.
: يارب ياسر طفل ما يعرف طعم الخوف هسه وين حاطينه؟ بردان؟ جوعان؟
أستمر رجل أمي:
: والله أمج دزتني أطمن عليج كالو بمنطقتكم كاتلين واحد جبير بالأمن وخافت على رجلج تعرف سويلفاته قبل لا تعم عليه والله ما أنصدمت خطفوه هذا الأعوج الله يراوي.
باوعتله ديشمت ظليت الطم:
: عمو تشمت صخام عمي أبني شنو ذنبه.
أدك على خدي.
: شوفي بوية لملمي فليساتج ذهب أي شي ثمين أمنيهن يم أمج ترى محد ضامن شيصير وأذا لا قدر الله رجلج مرجع عمج وحماج بالخارج ترى يكعدوج على بساط الفكر.
وسعت عيني شنو من صلافه هاي.
: ترى.. ترى أبني أريده أنت تحجي بلا إحساس شنو فلوس وآني مضيعه مو بس رجلي و أبني هم والله لو أعرف أبيع البيت و اللي بي لازم أحرر رجلي وأبني يارب أسترني يارب كون عايشين وما يأذونهم.
ظليت أدعي رب العباد وشكد لح عمي نوري أسلمه فلوس نـصير يأمنهن يمه بس ما وثقت بي تذكرت وصية نصير.
لا تأمنين بأحد روحي للشمال لزمت فردة الحذاء أبجي يا شمال أروحله وآني مضيعه أبني.
عاد قررت لازم أتحرك الدموع ما ترجع غايب واللطم ما يفك أسير لازم أدور عليهم لو بآخر الدنيا.
تركني رجل أمي وراح ورى ساعة رجع هو وياه أمي حضنتها و أبجي الحمد لله الحنن گلبه وخلاها تجي وهو ما يطيقني أذكر قبل طردني.
يمكن كسرت خاطره لأن ظليت وحدي
بس نصير حذرني أثق بأحد ونوري مو ثقة المهم أمي ثقة.
: يمة ولج يمة لحكي علية يمة ياسر ما الكاه يمة وليدي ضيعته بس حذاءه بقى يمي يمة.
أمي خلتني بحضنها وهي تبجي وياي
: گولي يالله بنيتي گولي بأسم الله أن شاء الله يرجع..
أخذت القرآن وآني أحضنه ربي لا تحرمني وليدي وهم رجعلي أبوه سالم.
أيام صمت ماكو أي أتصال هو جابلي نقال هدية عيد ميلادي وهم كال للطواريء.
الليل ما أنامه بين أحوم على أغراض والعاب أبني وبين أشم بملابسه وبين أصلي وأقرأ قرآن و أدعية وآني أنتظر الله يرحمني بخبر عنهم.
دك تلفوني وسعت عيني بفرح رقم نـصير.. بساع فتحته:
: نـصير.. وينكم مو حتى گلبي طك عليكم ياسر.. وين أريد أسمع صوته.
بس صوت عميق:
: راس رجلج وأبنج مقابل.
وذكر مبلغ كولش كبير.
: بس أتفاهم وياكم أنتم منو والله أبني طفل ورجلي ترى تاب..
ما أعرف شجاوبهم بس طلبت أسمع صوت أبني وأجاني صوته يبجي وراها صوت نـصير..
: مـريم تسمعيني أنطيهم اليردوه ياسر مريض كولش وتعب من الوضع ومكان
يمكن أنجر منه التلفون أسمع شتم وضرب وصياح نـصير.
: عوفو ياسر لا تضربوه آني آني ضربوني.
رجع الصوت العميق:
: شوفي ولج أذا ما تدفعون ألا أدزهم الج مجزرين باجة و كراعين.
ظليت أرجف خايفة وآني كوة أحجي:
أي أي والله أسوي التردوه.
: ديري بالج تبلغين ترى البلد ضايع بلا حاكم و حتى الشرطة تخاف تدخل فأنتِ أشتري رجلج وأبنج بسكوت.
: صار والله أدفع التردوه بس ذمة لا تضربونهم ياسر ممعلمته ينضرب فدوة ميتحمل ترف أبني.
أتفقنا عالمكان وكولشي هنا ركضت لأمي.
: يمة أتصلو بيه.
حجيت كولشي باوعتلي.
: شوفي مريم.. تردين تثقين ثقي بس بعون.. لا تثقين بأحد غيره هو رجع وبيته أمشي أخذج إله خلي هو يتكفل الموضوع وهو اللي تسلمي الفلوس لا تنطين شي لنوري والله ترى يبوكج ولا تكولين ما كتلج.
: أخذيني لعون.. بس يقبل؟ يساعد نـصير..
: يقبل لأجلج وأجل أبنج.
أخذتني أمي لمنطقة زراعية بيها أنولد شاعر معروف و جانت منطقة وأراضي خوال عون بمنطقة تحمل أسم الشاعر.
نزلنا التكسي بشارع رئيسي..
: تعالي نتمشى هذا أبو التكسي ولا أرتاحيتله شلون شمرنا هنا لو فايت من ذاك الشارع جان ذبنا بباب بيته.
أمشي وآني داخلي ما خليت آية ما قريتها بلكت عـون يصيرلي العون اللي أحتاجة أحرر زلمتي وأبني وما يتخلا عني.
شوف الزمن شلون خلاني بحاجته وآني بأسوء وضع التفتت لأمي أبجي:
: يمة شفتي شصار بيه أفترت دنياي دولاب وردتني لذيج مـريم.. لو وكعت بمصيبة تروح لعـون.
: والله يمة لو ماخذته شاغول وشوفي شلون كون نفسه بس هم آني يمكن أذنبت معبالي ياخذوج مني كلت ترتاح و بيت عمها تعيش بخيرهم ما تورث ضيمي بس ربج يمة وهاي حكمته.
شفت وجهها صار أصفر.
: يمة آني جرجرتج وياي وأنتِ مريضة بس والله الدنيا غدرتني ومعندي أحد غيرج.
رحت لعون.. اللي جان حب مراهقتي اللي بعته علمود فلوس نـصير وعيشة القصور وتاليها القصور صارت سجني.
وصلت لبيته وگلبي يخفك ردته سند ردته عـون أسم على مسمى بس الصدمة جانت أقوى من حلمي.
البيت يلمع بالأضواء وصوت الهوسات يملي المكان عون.. اليوم عرسه! شفته من بعيد ببدلته يضحك وكراسي يم بيته وزلم هوسة ومعگلين والفرحة ما سايعته وآني واكفة بالختلة.
أختنكت : يمه عدهم عرس.
دنكت أمي:
: هو مر بيه قبل لا يصير حادث خطف رجلج وأبنج وعزمني والله يمة نسيت اليوم عرسه.
غمضت عيني:
: يمة شسوي دليني رجال معرس خوما يعوف العرس ويجي أمشي يمة أمشي.
بدا العصر يتحول غروب وآني أدور بظهري وأمي تكول:
: نحاجي يمة.
: يمة ما يجي لا تتعبين روحج يعوف العرس يجيني آني بوضع هسة حياة أو موت كل ثانية تأخير بيهن حياة أبني ورجلي مترهم أنتظر يكمل عرسه و عود أذا وافق يتكفل يسلم الفلوس للعصابة ويستلم رجلي وأبني..
رجعنا بكل قهر للبيت ولكيت نوري بالحديقة
: أدري قافلات البيت ما كلتن هذا يرجع يريد يدخل.
سكتت أمي و كلتله:
: يردون فدية و رحنا لعـون.. لكيناه يعرس.
صار وجهه أحمر:
: شفتي ذول خواله كلاب ولد كلاب شلون علموه دون علمي يزوج وأنتم ترحون لعـون.. شكو قلة زلم شوفي بوية مريومة.. عمج وحماج حصلتهم وراجعين للوطن أنتِ حضري جنط الفلوس ترى جاي نسابق الزمن.
ظليت محتارة أثق بي لو لا وصية نـصير ..ترن بإذني.
: لا تأمنين حتى بعمي بس الخوف على ياسر جان ينهش بضلوعي وآني أم ما عندي أي سبيل.
:عمو نوري يردون باجر التسليم..
: لازم نسلمهم حتى نحرر رجلج وأبنج عمج وحماج ياخذله أيام يالله يرجع
وكل هذا وقت.
أحجي بگلبي: معقولة يغدرون بطفل؟ شلون واحد يأذي طفل يارب أستر علية ورجعلي أبني سالم غانم نداء الأمومة أقوى من الحذر ممعقولة نوري طمعه يوصله غدر بحياة رجال و طفل أكيد متوصل بي لهاي الدرجة
ظليت محتارة والحيرة أنرسمت على ملامحي.
أنطيتهم كل شي و سلمت الفلوس والذهب وعيوني تناشد الله يحفظلي رجلي وأبني.
: عمي هاي الفلوس و الذهب يسد النقص بالفلوس عمي هذن حياة أبني ورجلي حياتهم صارت بين أيديك آني أروح وياك نسلم الفلوس.
: أنتِ مرة وتردين ترحين للعصابة بله خطفوج تالي يسون بيج شي لا بوية لا عفاا عليج ما تثقي بيه ذن حياة رجلج وأبنج متوصل لدرجة أضحي بروح بشر علمود فلوس وسخ دنيا.
أخذهن وآني گلبي بيدي خليته متوجسة بس معندي حل أكيد رب العالمين ما يعاقبني عقاب قاسي ونوري يغدرني.
ثاني يوم طلع نوري وهو يباوعلي ويطمني.
: بابا لا تخافي ساعة زمان وأبنج بحضنج..
: أي والله عمو وتذكر آني خليت بين أيدك حياتهم.
: أي وآني كدها آني أحل مشاكل و طلايب العالم ما أكدر أحل مشكلة بنت مرتي!
ظل يمدح بروحه هواي قبل لا يطلع أتصلوا بيه يتأكدون عن تسليم المبلغ
: أي عمي راح يتكفل راح أنطي نقالي خاف تتصلون بي تتفقون تسليم..
: ليش مو أنتِ تجين.
بخوف كتلهم:
: ما كدرت عمي هو اللي يتكفل.
: أي حركة وتصرف منج ثقي نسلمج ياهم مجزرين.
: لا والله الفلوس الكم بس حرروهم فدوة خليني أسمع صوت أبني گلبي طاك عليه
بس سده و أنطيته النقال لعمي:
: خاف يتصلون أخذه..
أخذ النقال وطلع أربع ساعات عمي ماكو ونقالي يمه حتى معرف شصار لمن المغرب رجع عمي وهو متوتر.
: وين أبني وين رجلي.
وكف گلبي وعيني على شفايفة أنتظر شيحجي.
: أنباكن أخذوهن ما أنطوني ياسر ولا أبوه.
ظليت أصرخ يبوووو ما أعرف أذا يحجي صدك لو هو البايكهن وطمع بيهن هذا الما عنده سند لو عندي ظهر فلا الجأ لنوري كعدت على ركبي أدك والطم آخر أمل برجعتهم خلاص أنتهى
: فدوة عمي دخيل بختك أنت ما طمعت بالفلوس مو؟ ولا تكول أنباكن.
ظليت أملش بشعري يمة وليدي راح
كضيتها أفتر منا ومنا.
رجع أتصلوا :
: فدوة أروحلكم والله ما أكدر والله أخذتم الفلوس وما رجعتوهم.
: تلعبين علينا ننتظر مصلوبين صلب تالي محد يجي هيج أبنج رخيص لو رجلج.
: والله رجل أمي يحلف أنباكن منه.
: أنباكن بجيبة شوفي ولج آني الج
: أوكف أوكف أبيع البيت بس أريد مجال هسة متوقف بسبب الضروف تحويل السند.
بس سده بوجهي ظليت الوب مزوهرة و حتى تمرضت ولكم أبني زغير
ركضت لعمي نوري أبوس أيده أتوسل بي.
: فدوة عمي فدوة أتوسل بيك الفلوس بيهن حياة أبني و رجلي.
: أنباكن.
ظليت أحوم منا ومنا محتارة وين أروح وين أنطي وجهي ياربي شسوي دليني الطريق الفلوس اللي بيهن حياة أبني ورجلي راحن وما بقى ألا كم ملك ذول مينطون مجال حتى أبيع الوضع بالبلد فوضوي هم بصعوبة أكدر أبيع.
دفعت نوري و ظليت أدك والطم :
: راح ينقتل أبني يمة لحكيني راح ياسر يمة.
وأمي تصرخ..
: الله أكبر فلوس بيهن حياة الرجال و أبنه تروح تخمطهن والله عرفتك مالك أمان و نصحتها لا تثق بيك اللي يبوك تعب وشغل أبنه ويخلي يفر أذاناته هذا ما يتأمن.
ضربها وهي مريضة.
: وخر عني و أمشي أطلع بره يله آني أبقى يم بنتي أنت أطلع نذل.
هم يتعاركون وآني روحي مسلوبة ظاله شوية و التفتت لأمي.
: يمة معقولة عـون.. دينتقم مني تعرفين بلد فوضى وعصابات وهو مو قليل شر دوم يهدد ألا أقتله أي فرصة تجي أقتله.
: ولويش يطلب فدية؟ ورجلج جان لاعب لعب تلكين واحد من اللي رجلج شاهد عليهم زور أو عالسهم و أجو ينتقمون.
: يمة ينتقمون يطلبون فدية لو يسون تصفيه فورية بس عـون.. أكيد قرر يحرك گلبي.
ما أعرف ليش شكيت بعـون هو دوم يهدد و ينتظر فرصة ينفذ تهديده
و الفوضى بالبلد أكيد تساعده بعدين شنو من صدفة توقيت عرسة بنفس أيام حادث أبني ورجلي ديتشمت أكيد
دكيت على وجهي.
: اااخ ولك عـون.. والله وسويتها ولك عووون.. تنتقم مني بيمن بأبني.
أدك على وجهي وعيوني و ممصدكة الرجال اللي ربيت ببيتهم وجان سند صار ينتقم مني هو دوم يهدد أكيد هو ورى خطفهم يصفي حسابات وحتى يبعد الشبهة طالب بفدية.. لأن لو الخاطفين من اللي نـصير.. أذاهم ما هيج مترهي يطب لبيتنا يصفي ويطلع وهواي دتصير تصفيات مباشرة شكو خطف وفدية وسوالف أفلام مصرية.
ظليت أصفك أيد بأيد أجيبها منا وأخليها هنا أريد حل أريد أعرف شلون أنقذ أبني ورجلي.
: يمة ما أعرف يجوز عـون.. مندرج لذول الجماعات اللي تقتل وتنهب بالبلد وأكيد الفلوس يحتاجوها تمويل إلهم هو أكيد حتى ينتقم ويكون قوي ينضم لهذول الناس البلا ذمة وضمير.
: أنجبي وخليلج حظ وبخت شلون فرتها عالزلمة يمج بحذاج الرجال بحال سبيلة و متركتي تتهمي باطل.
: يمة يهدد تدرين شكد هدد كم مرة أجاني للجامعة لو من نلتقي لو من يعارك نـصير.. دوم يهدده أي فرصة تجيني ألا أقتلك.
: أكلي تبن هاي تاليتها فوك ما نكرتي أفضاله علية وعليج ورحتي للمظاهر تتهمي هيج تهمة.
تدخل نوري : هسة عرفت منو الباكني هذا عـون.. دزلي ناس تضربني و تبوك الجنط وألا شلون عرفوا ذن فلوس.
باوعتله بأحتقار:
: مو كلت العصابة أخذوا الفلوس ما أنطوني رجلج وأبنج أنت شكد كذاب و حقير أكيد متفق وي أبنك شفتوني بلايا ظهر وسند كلتو نكوش عالفلوس يله ردولي رجلي وأبني اللعبة خلصت.
: لا يابة تبليني النوب أروح لبيت رجوان عدهم طلابة ويردون ناس خيرة تتدخل صوجي آني تدخلت وردت أنقذ أبنج ورجلج.
خلا وطلع وآني شبه متأكدة هو ورى بوكه الفلوس وصرت ما أعرف وادمي منو متورط بخطف أبني ورجلي
وحيدة بلا سند والشكوك حيل بدت تاكل بگلبي كمت وبدلت بساع وطلعت أمي تبعتني.
: يمة وكتنا مو خوش وكت وين طالعة.
التفتت : أجيب رجلي وأبني الفاعل وعرفته منو..
: لا يمة غلطانة ما يسويها.
: يمة لا تدافعين عنه ترى عـون.. مو قليل شر وتذكري كلامي نسيتي من جان يكول والله إلا أحرك گلبج بأغلى ما عندج ومن جان يهددني بالقتل بكل فرصة يكول آني ما أخليج تتهنين.
هاي الفرصة أجته على طبق من ذهب
الخاطفين شلون عرفوا تفاصيل بيتنا وشلون عرفوا المبلغ اللي عندي بالتمام هاي من سولفت يمج عن الفلوس جان نوري يصنت ووصلها لأبنه.
أثنينهم نفس الطينة والأنكس من هاي ليش صوت الخاطف جان كأنو يعرفني يعني هيج تحسيه مدفوع علية بالذات عـون متفق وياهم هو أنطاهم المعلومات وهو اللي رسم الخطة حتى
يأخذ الفلوس و يخلص من أبني ورجلي حتى الطفل ما سلم منه يعتبرني خاينته و ياسر بذرة خيانة لازم تموت.
: والله أنتِ بلا حظ وبخت تاهمته وهو لا يمج لا بحذاج مو عيب زحمة آني حي الله مرت أبوه متكفل حتى فلوس علاجي ومصرفي بله شيكول لو هيج سمع تاهمته.
بس أستمريت آني أحلل.
: هو يدري البلد فوضى وعباله السالفة تعبر علية كعصابة مجهولة بس عينة على الفلوس كم مرة ردد ألا أكسر خشمج تهديداته فضحتة عـون.. باعنا بفلوس وسخ الدنيا!
وكفت كبال أمي وصحت:
: يمة فتحي عينج عـون.. مو بعيد عن هاي السالفة هو الراس المدبر تدرين ليش لأن الخاطف من حجى وياي بالمرة الأخيرة كال جملة عـون.. دوم يرددها كال راح أخليج تمشين و تدعمين بالحيطان مدام تلعبين علينا والفلوس ما وصلت هاي مو كلمة عصابات هاي كلمة واحد حاقد واحد يريد ينتقم مني.
كملت بقهر:
: والله يمة عـون.. ونوري أثنينهم وجهين لعملة وحدة نوري باك الفلوس و عـون.. رتب الخطف عباله ما أعرفه؟ عباله الفوضى راح تضيع أثره هو يريد يذلني يريدني أركع جواه وأبوس إيده حتى يرجعلي أبني وهو الفلوس بجيبه والضحكة بشفته هاي آني رايحه أنفذ اللي يريده حتى أرجع أبني ورجلي والفلوس ماأريدهن أريد أبني يرجع سالم.
طلعت وأمي كالت:
: شلون راح تفشلنا أنتظري خايبة أجي وياج.
بس ما أخذتها وياي آني بيته وأندليته أخذت تكسي وأنطيته العنوان بس وصلت يم بابه و أنطيت كروة لأبو التكسي ونزلت.
أكو كم شاب دخلو للبيت وناس تجي بيدها هدايا بس ما همني دكيت الباب طلعلي رجال جبير.
: تفضلي بوية..
: حجي أريد عـون؟
أستغرب كوتله.
: كوله مـريم.. أجت تنفذ شتريد منها وترجع رجلها و أبنها.
الحجي توتر وسأل:
: بوية منين تعرفينه لعـون أحجيلي بوية.
: مالي حجي وياك حجي صيحلي عـون.
دخل وشوي طلع عـون لابس دشداشة بيضة باوعتله وكتله.
: أجيت.
بس شلون ممثل بارع مثل اللي تعجب وأستغرب.
: مـريم.. شبيج أمج صار عليها شي.
الرجال الجبير بقى ما دخل أكيد يريد يعرف شكو.
: لا تمثل علية كول شتريد من مـريم خشم وكسرته و إنتقام و حققته رجع أبني و نـصير.. بينكم تصفيه حسابات أعرف بس عيب تصرفك أيام مرهوبة وخايفة وأنت ضامهم.
: مـريم.. أنتٍ بيج شي.
الحجي: منو هاي عـون.. وشتريد منك.
: حجي بعدين خليني أفهم أول يالله أفهمك.
أجوهم زلم تلفت وكال حجي أخذهم للإستقبال وأنتِ تعاي ظل متعجب الحجي من جرني عـون.. من أيدي تولاني دفع لسيارته.
: بوية يهي هاي غير أفهم.
: خالي بت مرت أبوي راح أرجعها لبيتهم وأجي.
ساق السيارة حيل ودخل شارع بنص مزارع ودفعني أنزل من السيارة.
: فهميني شبيج خاف غرتي علية لأن تزوجت شنو أنتٍ من حقج تكونين عائلة وآني ممنوع أذا تغارين لويش عفتيني أصلا.
هذا شيخرط بيا حال آني.
: أنت صدوك متخجل فدوة رجع أبني و رجلي والله أبني مريض عـون.. الماضي راح وأنت تزوجت المن مجلبلي.
: مجلبلج؟
شفت بعيونه مكر وتمثيل..
:أنت شتريد آني أنفذ حتى لو تريدني.
وسع عينة ومحسيت ألا راشدي
: أنتِ وحدة..
ظليت أبجي معرف شلون حجيتها بس أبني شلون بي يارب ساعدني ماعندي غيرك.
: عـون.. خطفتهم شتريد منهم.
: والله أنتِ وحدة أدبسز وحرام علية أضيع وقتي أمشي أوصلج لبيتكم.
دفعته وكتله:
: راح أشتكي بالشرطة ألا بأيام عرسك تكضيها بالتوقيف آني الك.
ضحك : ونعيد أيام اللي رجلج كعدته توقيف قبل لا ياخذج بس آني عرست أجيتي متاخرة ترديلي ياها.
: آني الك.
رحت أتمشى أريد أرجع للشارع وأشوف سيارة بس هو وراي بسيارته
: أوصلج.
جنت أبجي وأرجف وهو كال.
: تعاي ماكو شي ما اله حل وكلمن يوكع بشر أعماله.
كلامه هذا زيد شكي أحسه مشمت
صرخت بي:
: عوفنييي ولك أبني ورجلي راحوا أذا صار عليهم شي فلا أسامحك.
ظليت أمشي وهو وراي ما جبرني أدخل سيارته بس ظل بسيارته يماشيني وظل بالشارع المبلط بسيارته ما توقف كل شوي أباوعله وأبجي رجعتله.
: عـون.. لنفرض مو أنت ورى خطفهم تكدر تساعدني أرجعهم.
صفن بوجهي.
: اللي سواه نـصير بيه مينحجي أذاني بس طفلج ماله ذنب وآني شكدر أسوي لا آني اللي أملك فلوس أحررهم كل ملكي التكسي وبيت وراتبي عود جمعت لزواجي و أقضي مستلزماتي بس متكفي الفدية اللي رادوها.
: وشمدريك شكد رادو أنت شعرفك.
: أكيد مبلغ كبير قابل تفاليس.
هم دخل الشك بعقلي.
: والله آي أشك بيك هواي دلائل تكول أنت وفوكها تشمت أحسك فرحان بمصابي بس الله كريم أذا أنت كون الله يعثرك بمصيبة وأذا مو أنت كما تدين تدان لا تشمت.
ببرود كال:
: ذاك كوستر توقف روحي لبيتكم مـريم.. وفلوسكم مو شوية حرريهم جايتني تذبين بلوة علية وكدام خوالي وأهل زوجتي.
أتجاهلته ورحت صعدت بالكوستر
وآني يم الجامة كعدت أباوعله حرك سيارته وراح.
يارب أنسدت بوجهي هو هذا عـون اللي كالت أمي راح يسوي المستحيل حتى يساعدني بس آني أشك بي هو وتهمته كدام خواله يعني حتى لو مو هو ورى خطف أبني ورجلي أكيد ورى الحجي الحجيته ما يساعدني.
رجعت للبيت مهزومة و گلبي فاير ما أعرف مصير أبني ورجلي والنقال سكت ماكو أي مكالمة بيومها تعبت ونمت تمددت حاضنه ملابس أبني ونمت.
الفجر أندك الباب دكات ثكيلة خشنة دكات توجع الگلب فزيت مفزوعة سترك يارب لكيت أمي كدامي تريد تطلع تفتح الباب بس وخرتها و طلعت للحديقة للباب الخارجي أرجف وآني أمشي وگلبي كارصني.
فتحت الباب وأنصدمت بالحقيقة....
