رواية الندم مابعد الخطيئة الفصل الرابع والاربعون بقلم رونق
جان يكول احمد ولكم طلع الولد مدمرينه
دمار مسوياتله شجم سحر مو بس واحد
مسوياتله عقد لسان ومسوياتله محبه
ومسوياتله كره لاهله ولزوجته خاصه
مخليات بغرفة شهد وعامياته عمي
الرجال متخبل يكول لو باقي فتره ومجاي
جان تسودنت علني والمفاجئه الكبري الي
صدمتنه يكول بنتك ماتت مقتوله يعني مو صدفه
لا ياالله لتكولها ولك هاي مصيبه اذا صدك ومصيبه اذا درت شهد
اي والله خبلنه حجالنه حجي مو طبيعي عمار
يكول اني اكول معقوله اطيع اسيل هيج
طاعه عمياء شتطلب مني اكول اي شتريد اكول اي
كلمه لا انلغت بقاموسي
والحل ... الحل كال لازم توخر السحر دلانه
بيهن بغرفته وبغرفة شهد وعلمه ع اشياء يسويهن و بعد يومين نرجعله
روح عمي سوي الي يكلك بي كله
جان يكول عمار حتى لروان مسوين ماثر عليها السحر
شنو روان شدخلها وشلون ماثره عليه
سالني عمار وكال احجي الحقيقه روان من تبتعد عنها هي تتقرب عليك ومن تتقرب عليها انت تبتعد
اي صحيح وهذا الشي دائما مدوخني
هاي الخبيثه اكيد لان رفضنه اخوها هيج
مسويه بس لتخاف روح ويانه الاحد حتى هم يسوي الك
روان : اكثر شي خبلني بعلاقتي وي مرتضى اريده واحبه واتمنى قربه وبنفس الوقت من يتقربلي اتخبل ومااقبل
ذاك اليوم من بده يتقربلي رحت بغير عالم وذبت بين ادي وجنت مسلمه نفسي اله ع اخر حبه
بس فجأه اتحولت لشخص ثاني صار كبالي
عدو
واجتي سوالفه الموزينه كلهن كبالي دفعته ووخرت رحت للحمام بس ابجي
مااعرف شلون اطلع لان خجلانه منه شلون هيج سويت مااعرف بقيت مطوله لمن
حاجاني طلعت ونمت كبل مااكدر اواجها
هو ابتعد عني واني هم ابتعدت بس انصدمنه من سمعنه خبر وفاة رهوفه الله يرحمها
شهد موتتنه والله اني ابجي دم ع شهد بس
تكول ماعندي حض لا وي ابن عمي ولا وي اخوج واطفالي ميردوني ابد بس يشردون
مني لان اني الظاهر مو خوش ام
بقيت انام وياها واهدئ بيها بس مخبله بفراك بنتها وحقها
ولج روان عمار الي كتلها بيده ولج منعته بس بعناده اخذها حتى يقهرني بيها مايدري مو
قهرني بس موتني ع البطيئ كاعد اموت والله
لج شهد هذا امر الله الله مكاتبلج هذا الشي لازم تؤمنين بالله
دخلت بعالم معرفت افهمه ابد متقبل تحجي ويانه وماكو شي بلسانها غير اريد عمار يطلكني
اني طاوعتها بهذا الشي لان عمار دمرها خطيه واذاها حيل
شكد كاعد احاول اطلعها من جو الكآبه بس مكدرت
رحت لاهلي حبيت اعرف التفاصيل من عمار شلون وكعت رهف من الدرج وشصعدها
كل الي اساله ميعرف حتى امير يبجي يكول والله مو اني الي وكعتها هواي حاولت اخذ منه شي بس فشلت
مستحيل تصعد بوحدها لان متكدر بعدهي تزحف ومتفتهم جان من اول بايه وكعت
عمار لكيته بمنظر مينوصف ابد كاعد بغرفة شهد وحاضن ملابس رهف ويبجي يكول بيدي كتلتها اخذتها من امها غصبا ومن ورايه ماتت
امي تكول حالته متنوصف ساكن هاي الغرفه صارله هواي
حجه ويايه كلي روان فدوه قنعي شهد مااريد اطلكها ابد
والنبي احبها ومشبعت منها ولا تهنيت بيها ابد
والله ياعمار اذا تشوف حالتها تبقى صافن عليها رايحه بغير عالم لاتحجي وي واحد ولاتاكل ولا تشرب شحالها صايره
اني لازم احجي وياها واتفاهم مستحيل اطلكها
عمار انت اذيتها هواي وشلعت كلبها لهنا وكافي خلي اسيل هي تفيدك جنت تهدد بيها ابنتها وهسه شنو حجتك خطيه عوفها كافي ظلم
رجعت وشكد حاولت احجي وياها بس بدون فايده لحد مكال مرتضى جهزن نفسجن نروح للنجف حيل فرحنه هم شهد وهم اني من صدك محتاجين نزور
كالت اخذي رايي عمار ميصير اروح بدون اذنه
خابرت عمار وكال ع راحتها خلي تروح
رحنه وحسيت شهد شخص ثاني فرحانه وحزنانه بنفس الوقت معرفت افسر هذا الشي
كالوا نروح للمقبره احساس غريب انتابني صعب اوصفه
مرتضى يزور زوجته الله يرحمها كدامي وهذا الشي اول مره يصير
حسيت بغيره منها رغم ميته زوجته
وصلنه وشفت شهد لهفته لزوجها الله يرحمها اكثر من مرتضى طلبت تبقى وحدها بجت هواي وحجت هواي لمن فاخت وذبت همومها
اني عيوني متوجها لمرتضى اراقب حركاته كعدت قريت قران وقريت الفاتحه هو هم غسل القبر بمي وحسيت بي متلهف الها
كملنه ورحنه للزياره دخلنه اني وشهد سويه هي تبجي واني ابجي
تكله ياابا الايتام صبرني انطيني القوه حتى اكدر اوكف ع حيلي ياعلي دخيلك برد كلبي والله راح يوكف
طبعا نسيت نفسي ونسيت ادعي لنفسي اتوجهت بس لشهد دعيت الها لان خطيه دمرتني دمار
هواي بجت وهواي دعت بحيث الكل بقه صافن عليها وكل شويه وحده سالتني شبيها خطيه
كتلهن بنتها ميته خليتها ع راحتها لمن شبعت من كيفها زياره رحنه للجامع صلينه وكملنه لحضات وجان تفقد توازنها شهد انغمى عليها انخبصت جبت مي ورشيته عليها بدت تفيق بس احسها دايخه
احذتها لزاويه وخليتها تنام ع رجلي شويه حتى ترتاح
هي كاعده بس مغمضه عيونها والدمع مغركهن طبعا
شهوده حبيبتي والله حرام عليج هيج تسوين هذا امر الله واحسبيها طير من طيور الجنه وهناك تتلكاج وتسحبج للجنه
تعرفين شنو الي مخليني هيج اتاثر ....
شنو
عمار تعمد ياخذها مني وتعمد يموتها حتى يحرك كلبي ويتخلص مني بنفس الوقت
ولج انت شنحجين اذا تشوفين حالة عمار جان ماحجيتي هيج ولج والله مكابل غرفتجن وبس يبجي
فتحت عيونها روان اروحلج فدوه اندعيلي كون يبرد كلبي والله راح انفجر مااتحمل هذا كله
والله تندمت لان تزوجت عمار ومو بس هاي تندمت لان حبيته بيوم لان لو ماحبيته مجان مرتضى هيج سوه بيج ولا اني انجبرت اوافق ع عمار
بهالاثناء اجتي حجيه كعدت يمنه هي وبتها متوسطه بالعمر سلمن علينه ردينه السلام
صلت الحجيه اني وشهد بس ساكتين كل وحده صافنه بهمها
جان تكول الحجيه تعالن خاله حدرن هون اني وشهد وحده صفنت بوجه الثانيه
ويانه خاله .... اي خاله تعالن يمي ادنن
اتقربنه جان تكول لشهد شنو هاي خاله الحزن والهم الي عندج شبي رجلج وياج ماذيج مو....
ترددنه اني وشهد بالبدايه ومحجيته شي
جان تكول تعالن يمه لتخافن اني دزني عليجن امير المؤمنين
من دون هاي الناس كلها اجيت يمجن وحسيت بيجن محتاجاتني
شهد كامت تبجي ....
خاله الله يطيج الصبر ان شاء الله
شوفي بنيتي انت عندج تابعه الطفل ميعيش عندج ابد بغض النظر عن طريقة موته
اثنين اطفال ماتو الج مو
اي خاله وكامت تبجي ....
الله يصبرج بنيتي هاي عندج تابعه قويه هسه اعلمج شتسوين وتروح منج مستحيل يبقى الج طفل عايش اذا متسوين الي اكلج بي
وهذا رجلج مكفخاته سحوره امره مو بيده يحبج ويهواج بس من يشوفج تصيرين كباله عبالك خنزير
اكو وحده مواصفاتها حنطيه طولها متوسط اكو علامه بايده طبعا هاي مواصفات اسيل
عده نساه بايده
هاي مسويه الكم عمل قوي بينج وبين رجلج بعينه انت صفر وشنو الي تسوينه يثير اعصابه
صدك خاله يتخبل من يشوفني ....
اني فاكه حلكي اني جنت ابد مااؤومن بهاي السوالف بس من سمعت عقلي وكف كلشي حجت لشهد صحيح
كالت هذا الولد رجلج مدوهناته ميعرف راسه من رجليه حتى لامه وابو هم مسويله مخلايته ميشوف بعينه غير بس هاي الي وصفتها الجن
يمه احذرن من هاي البنيه مستعده حتى تكتل وكلشي تسوي
شوفي بنتي هسه انت مطيقينه وهو ميطيقج وكت النومه انتم اعداء ومن واحد يروح من يم الثاني هو يتندم ويكول ليش هيج سويت ويحاول يعتذر بس السحر قوي يمنعه
وانت تبقين تاكلين بروحج اكل
شنو الحل خاله والله تعبت اني اريد ارتاح
راح ترتاحين وراح تنامين الليل ونفسيتج راح تتغير بس ينراد صبر
غرفتج بدليها انت ورجلج لاتبقين بيها ابد ملابسج البيها اتبرعي بيهن كلهن اي شي يخصج بذيج الغرفه انسي لان راشات بغرقتج ومخلياتلج عمل هم بالغرفه
بحيث من يجيج ينكلب عليج هذا لتلومينهً خاله شيسوي امره مو بيده خطيه هذا رجل
زين هم مره اجه احد وراد يخنكج وانت نايمه
اي خاله بس معرفت منو
بهذا اليوم جانوا ناوين يكتلوج فد مره بس الله راد العكس
يمه احذرن من هاي البلوه
التفتت الي جان تكلي وانت يحبابه هم لايحج شراره من ذوله
هاي نفسها رايدج لاخوها قبل لتتزوجين مو ...اي صح
رادتج بس حتى تذلج وتهينج لو صايره عدهم مروايج نجوم الظهر الله حابج موافقتوا عليهم
بس من شافتج ماتردين وانخطبتي صدك سوت الج عمل
شيطاني
حتى متتقربين لزوجج ابد كاعد تنفرين منه بس يتقرب عليج ومن يروح تتندمين وتردينه يتقربلج
اي والله خاله صدك
انتن شتصيرن من بعض .... اني ماخذه اخوها وهي ماخذه اخويه
شوفن خاله اريد منجن ترحن هسه لاقرب عطار هنا بالنجف تجيبلي الاشياء الي راح اوصيجن بيها وتعالن لهنا اعلمجن شتسوون وان شاء الله راح ترتاحن وتتغير حياتجن
كعدت تقره ايات قرانيه ع راس شهد وهواي قرت ادعيه مااعرف شنو اني هم بس مو مثل شهد شهد اكثر هواي
كالت ترحن للگيم الي هنا كلله نريد كطعه هو يعرفها راح ينطيجن اياها البسنها لو تخلنها جوه المخده الي تنامن بيها
حاولن تتجنبن هاي البنيه لا تاكلن من ايدها ولا تشربن شي ابد منها وصن الجميع لان هاي خطره حيل ومتخاف الله
مستعده كلشي تسوي مو محبة برجلها هيج سوت بس بعناده لان تزوج عليها
وكف عقلنه اني وشهد ...
شكد حقيره اسيل
قررت اسولف كلشي لامي ...
كالت انصحجن خلي حجينه سر لتخبرن اي شخص لان مو من صالحجن
لان اول شي مراح يصدكوجن وثاني شي اذا عرفت راح تجدد السحر تشتغل ع البسكوت
انت لتخلين زوجج هاي الفتره يتقربلج ابد ابد مو زين لان راح تنفرين منه للموت كملي الي راح اوصيج بي وراح تشوفين الفرق
هذا الولد زوجج يحبج ويموت عليج بس انت اكو خوف داخلج وتشكين بي مو
اي صح ... لتخافين يحبج ويموت عليج ومكاعد يشوف احد غيرج كاعد اشوفكم بعيني احلى زوجين
خاله عندي بس سؤال شلون عرفتي هاي الاشياء كلهن
حجت بنتها والله جنه بره كاعدين ومندمجين اشو طفرت امي وكالت راح ادخل ازور مره ثانيه
والله يمه اكو احد اثر عليه وكلي ادخلي عرفت اكو احد محتاجني وانتن طلعتن المعنيات
اني راح ابقى متانيتجن حتى لو نص الليل روحن جيبن الاشياء وتعالن
كتبنه الاشياء جان قلم بجنطتي ودفتر صغير
بهالاثناء اجت خاله وادور علينه طبعا نسينه ارواحنه ماندري شكد اتاخرنه
سلمت وكامت تحجي علينه كتلها شهد انغمى عليها ونيمتها حتى ترتاح محجينه شي
طلعنه ولكينه مرتضى حيل قلقان علينه اتغيرت نضرتي لمرتضى كمت اشوفه بغير عين
من عرفته يحبني من صدك جنت خايفه وممتاكده منه ابد بس هسه لا بس اضحك بوجها هو صافن اكيد مستغرب
رحنه للسوك اتفقت وي شهد هي تلهي خاله واني اشتري اتصرفنه مثل الحراميه كدرنه نرهمها بدون محد يدري
شهد تكول تغيرت نفسيتي واحس بنفسي برد كلبي من ناحية بنتي
رجعنه للمره وبدت تكتب بحروزه وعلمتنه اكو قسم سبوح كل ثنين وجمعه واكو قسم حرز نشيله وقسم نرشه بغرفنه وبالبيت واكو بخور قرت عليه كالت بين يوم ويوم شعلنه واهم شي سون حرمل
طبعا كتبت بالزعفران اكو اقلام خاصه وبي زعفران بالنجف لكيناه ماقبلت تاخذ ولا ربع واستغربنه اني وشهد بقينه وحده صافنه بوجه الثانيه
زين خاله نكدر نتواصل وياج تكدرين تنطينه رقمج
اي يمه اطيهن رقمي وخلي بخابرني ويبشرني الي عرفناه هنه من النجف والمريه ماتاخذ خيره لاي واحد صدفه هيج تسوي
تكول تجيني اشاره مو بكيفي احجي وطلعت علويه صدك الله هداها النه طلبنه من خاله تجيبلنه الكطع من رحنه للسوك
شهد تكول هواي ارتاحيت واني همين
سوينه كل الي طلبته منه بديت اتغير وي مرتضى اني وشهد بدت ترجع لحياتها الطبيعيه بس قافله ع عمار تكول مستحيل افكر ارجعله ابد
تحدد موعد زواج نرجس وجنه متلهفين نغير جو حتى شهد حسيتها الها رغبه قررت البس فستان حيل قصير لون ماروني
وبدون ردن مااخذت رايي مرتضى لان ممتعوده وهي حفلة بنات يعني مو اله البس طويل
شهد طلبت مني اخبر عمار طبعا اي تواصل وي عمار ماكو هواي اجه وترفض تشوفه بس اخر مره شافته وبعد مااجه ابد
انطيته علم ووافق
كالت اني مااطلع من الباب انت روحي وي نرجس للصالون وفعلا رحنه اخذنه مرتضى وهو رجعنه بدت الحفله رغم ماابيتهم صارت حيل حلوه الحفله
هم سوينه الها الميز ورتبنا كلشي اتعاونه اني والبنات بس هاي مرة حماها مو راحه ابد مبين عليها طبعا منعنه اي وحده تصور وحلفنه بالعباس
شهد رغم وجودها ويانه بس احسها بغير عالم
كومناها كوه وركصنه وغيرنه جو كالت شهد والله جاي ع بالي هاي المره اسحولها من شعرها والعب بيها طوبه دقتني دق ماخلت شي ماحشرت نفسها بي
من اجه الولد يحني نرجس اني اختفيت مبقيت ادري بمرتضى مايقبل ويسويلي سالفه
خلصت الحفله وبدينه ناخذ صور باجهزتنه الناس بدت تروح بقينه اني وشهد وبنات خال نرجس 2 وحده بنت خالتها بعمرنه
البنات طبعا عائله راقيه بشكل باسلوبهن وبتعاملن حيل حبابات
ردنه نسوي عشه بس اجانه الاشعار لتسوون حبيبي مرتضى حيجيب الاكل حيل فرحت وتعمدت ماانزع ملابسي ولا اغسل وجهي لمن يجي ويشوفني
دز عليه وحيل افرحت بس هو ضاج من شاف لبسي متوقعته هيج كلت هسه يفرح من يشوفني بس اطلعت غلطانه
حيل عصبب مني وضجت لان المفروض اخذ رايه صدك
بعدها رحت بدلت وغسلت وجهي
تعشينه والبنات جلبن بيه وكالن ابقي ع الواهس ويانه ونسوي حفله بيناتنه عجبتني الفكره وحبيت احرج مرتضى كدام الكل حتى ميرفض لان متاكده مايقبل
فعلا كال ابقي وحيل افرحت ميهمني بعدين يحجي عليه لو لا
رحت اركص كتلهن حصلت الموافقه وشهد تضحك عليه كالت هسه موافقه وبالبيت يطلعها من خشمج
مو مهم خلي اعيش اللحضه وبعدين الباقي
بقينه نسولف ونضحك ونركص ونسينه الدنيا كلها كعدت شهد تحجي وي نرجس ع مرة حماها تكلها اقل متاذيج خبري رجلج لو عمتج لتسكتين الها
لان راح تركبج اذا سكتي
كلنه وصيناها هي فقيره بشكل وحبابه وذيج خبيثه مبين عليها
راسلني عمار كلي كلي لشهد خلي تفتح الحضر اريد احجي وياها
كتله فدوه عمار اتركها بس اليوم لان خطيه كوه منسينها بنتها ومندمجه ويانه اخاف تضوج وتذكر واول وتالي مراح توافق كدرت اقنعه وعافها خطيه
طبعا منطيته حضر شهد بكل شي
بعدها لكيت مرتضى هواي مراسلني جاوبته واتفقنه ع مدة شهر كلت هاي الفتره راح اكمل السبوحات كلهن واكيد هاي الفتره راح نتعود ع بعض
راح اخلي ينام يمي وطبعا اني متلهفه لهذا الشي حابه اشوفه ينضبط بموعده لو لا
ثاني يوم صار الزواج رحت وياها للصالون واجه الولد اخذنه للصور رتبتها وانتظرتهم بره
طبعا اني لابسه عبايه اكول وكت خلاني بهيج مناسبه البس عبايه ☺️
كملوا كلشي ورحنه للبيت بقت شويه واجوي الزفه واخذوها راحت وياها خالتها وبنات خالتها 2
احنه رجعنه للبيت عموا رجعنه منتظرنه مرتضى
رحت كبل سبحت لان الجو حار كملت ورتبت الغرفه ونزلنه جوه اني وشهد سوينه عشه وبقينه كاعدين سويه ونسولف
حجيت وي شهد
اكلج شهوده لويش متفتحين الحضر عن عمار والله سباني سبي حاجيها حاجيها
روان فدوه اروحلج لا تددخلين ابد اطلعي منها عمار ماارجعله لو السما تنطبق ع الارض
ع راحتج شهوده
فاجأني مرتضى من فتح موضوع عمار وشهد سولفلي المقتل كله واتاكدت بوقتها كلام المره العلويه كله صحيح
اني هنا سولفتله ع المريه وشعلمتني طبعا كام يحجي عليه ليش سكتي ماتعرفين تسولفيلي
مااكدر اسولف كلت مراح تصدكني وراح تكول جذب ومااعترف بهيج سوالف
لا بالعكس السحر مذكور بالقران تعرفين هاي المقابر الي بيها كومه اغلبيتهم بالسحر يموتون من وره هاي السوالف التعبانه
بقينه نحجي بهذا الموضوع لمن ملينه وبعدها كلي ع شهد
لج عمار خطيه مدهوره حالته وجان مو بوعيه اكيد من هيج اتصرف وياها خطيه قنعيها خلي ترجعله
بعد مااحجي وياها ابد لان اليوم فتحت الموضوع ومقبلت ابد اكمل وسدتها وكلتلي لتدخلين ابد قافله ع الطلاك
لا ماكو طلاك مو بكيفها نست حبهم ونست العشره وتريد تطلك
انت سولفيلها ع هذا الرجال الي بالناصريه وسولفيلها ع السحر وبعدين الله كريم
رجع التفت الي تعالي كليلي بديتي تحبيني انت
خجلت منه مااكدر اكله اي
لا مااحبك بعدني .... ردت اكوم من يمه سحبني اله خلاني بحضنه
خلي عيونج بعيوني وكولي مااحبك ولا اريدك
مرتضى راح وكتي باجر عندي دوام
مو مهم الدوام اهم شي احنه وحبنه
راح اصير وكح شويه مو هواي
لا حباب خلي انام وكتي راح
لا مراح تنامين بدون وكاحه انت حددي النسبه الي تعجبج
اني اختار 1%
شنووووو ايا بخيله ولج هذا الجمال كله وحلالي وتردين وكاحه 1 كولي 100 كولي 90
عزه لا مستحيل هيج حسويها 5
ايا ظالمه شنو 5 حتى بوسه مابيها
راح اروح وي عمار حتى نشوف شيسوي النه متلهف اروح حتى بعدها اصير وكح 100 واكثر
هسه صير عاقل ع ماتشوف الرجال
لا حبابه بس شويه وكاحه 50
شنو شنو 50 لا عيني 5 بس ....
حبابه لتصيرين ظالمه اريد بوسه وشمه وهاي هي ....
لا حباب ذني قليلات
صدك 😍😍😍 ....
لا يابه والله كلشي متسوي
سحبني لحضني ومنطاني مجال ابد بده يبوس ب 👈👄 لمن قطع نفسي بعدها كام يشتم بشعري
عفيه مرتضى كافي خلي انام باجر ورايه دوام
روحي نامي عفته ورحت نمت كعدت لكيته حاضني حيل ونايم كوه سحبت نفسي بدون ميحس
بعدها راحو عمار ومرتضى اخذوا فلوس للرجال الي بالناصريه وحتى يكمل شغلهم جنه متلهفين اني ويا حتى نخلص من هاي السالفه كلها
رجعوا وكالوا نهينه كلشي بقه علينه السبوحات وغيرها علمني كلشي
كال منا لاسبوع ينتهي كلشي بس عمار لا كال عمله كلش قوي وعلمه ع هواي اشياء يسويهن
بيومها طلبت منه انام يم شهد خطيه حسيتها حيل ضايجه
بالبدايه رفض بعدين قنعته
رحت يم شهد ورفضت كالت روحي يم رجلج احسن
انت معليج برجلي تعاي اكلج شي خلي نروح باجر لبيت جدو ونخلي ديما تجي لان ضايجين والله
والله ماالي واهس اطلع من الباب ....
لازم تحاولين تغيرين جو نخابر ديما هم تجي وخلي نسهر سويه
لا دخيلج مااكدر ابات يمهم ابد ....
خلي نروح من الصبح لليل ....
تمام خلي نخابر ديما ونشوفها ....
خابرتها لديما واتفقت وياها كالت خلي اشوف احمد ....
لازم تقنعينه حبابه والله ضايجين ....
ان شاء الله .... هو اصلا الثلاثاء راح يرحون لاربيل كرار ونوره
شعدهم سفره سياحيه ....
لا يمعوده راح يرحون للدكتور ع مود الطفل خطيه يشوفون شيكلهم حتى لو طفل انابيب يسوون
خطيه والله اتمنى يصير عدهم ....
اي والله حتى اني اتمنى لان من زمان اتزوجوا
بقينه نحجي وشويه وطبكته كالت اشوف احمد واخابرج
سولفت لشهد ع كرار ونوره
كالت تصدكين نوره حبيتها من كلبي لان انسانه مو طبيعيه بسيطه وحبابه تمنى الله يرزقهم بطفل خطيه
شويه وخابرتني ديما وانطتنه الموافقه حيل فرحنه اتصلنه بنوره وخبرناها وجانت الفرحه حيل واضحه عليها كالت اروح اداوم نص دوام وارجع ع مودجن
كلت الشهد ابقي احجي وي نوره واني حروح لمرتضى اخذ راييه
رحت يمه لكيته بالحمام انتظرته لمن طلع هو اتفاجئ بيه من شافني
اكيد اشتاقيتيلي ومتحملتي ع فراكي مو ....
لا مو مو
لعد ....
اجيت اخذ راييك بشغله .....
شنو هي يحجي وينشف بشعره
اريد باجر تاخذنه اني وشهد....
وين ....
لبيت جدو
شتسوون هناك ....
والله ضايجين وخابرنه ديما كالت راح اجي نريد نتجمع ديما ونوره وشهد واني خلي نغير جو
اجه تقدم عليه ....
يعني هسه اجيتي بس ع مود هاي السالفه
اي لويش ....
اتقرب عليه كلش عبالي تكولين مشتاقتلك حبيبي تعال بوسني حبيبي تعال نام ويايه حبيبي
ارتبكت ووترني قربه حيل ....
جوعان اروح اسويلك اكل....
اي والله ميت جوع وحاب اكلج كلج ماابقي بيج شي ابد....
عزه بعيني شلون تاكلني اني اسويلك اكل ....
سحبني اله تعال اعلمج شلون اكلج
وجان يعضني من خدي حيل كمت اصيح اخ اخ وخر عني وخر
جان يكول بعدني مشبعت تعالي سحبني وعضني بالخد الثاني هالمره اقوى كمت اصيح اخ والله اخ وخر عني
وخر جان يكول مو طيبه ابد بطلت مااريد اكلج
عابتلك والله ردت اطلع ....
سحب ايدي وين تردين ...
اريد ارجع لشهد ....
تعالي ياشهد يا صخام اني مشعول جد جدي وهي تكلي شهد
مرتضى شنو نسيت الاتفاق ....
انعل ابو الاتفاق انت زوجتي ماكو اي اتفاق بيناتنه
مو بكيفك خلي يكمل هذا الاسبوع مبقى شي
لعد تعالي عطشان جنت جوعان ومن اكلتج شبعت بقه بس العطش
حجيبلك مي واجي ....
تعالي لج انت ثوله ادري بيج تردين بس تشردين اني اعرف شلون اروي عطشي هم سحبني وباسني من 👈👄 حيل اذاني هالمره
وبده يتعمق اكثر حتى عيونه صارت حمر خفت منه كوه شردت منه محجه شي
رحت لشهد وبقت صافنه بوجهي
هاي شمسوين بيج وتضحك ....
هاي بزونه وكحه وهيج سوت بيه
لج متاكده بزونه اخاف عتوي 😂😂😂
رحت شفت خدودي كمت ابجي باجر شلون اروح هيج
اكو خافي عيوب ويحذف اثر العتوي والبزون وكل شي
اكلج هاي ثمن الموافقه مو ....
ضربت ع كصتي ولج نسيت اخذ الموافقه ....
كولي والله ....
اي والله انعل يومك مرتضى
لعد المن رحتي يافهيمه...
والله رحت ع مود الموافقه وهو نساني ....
روحي ارجعي واخذي الموافقه ....
دخيلج ماارجع هو اني كوه نفذت بريشاتي ماارجع لو شيصير
لعد والحل شنسوي منروح باجر ..
اكيد نروح
راح اخابره لو اراسله ...
يله لعد شمتانيه
راسلته وجان يضحك عليه شلون شردت ويتوعدلي وين تشردين مني الله كريم
اخر شي كلي جهزن نفسجن اخذجن الصبح من اروح للمحل وبالليل امر بيجن
ثاني يوم كعدت وجهزت الريوك وخبرنه عمو وخاله
رحت اصيح مرتضى لان لهسه نايم كعدت هم جلب بيه وكوه خلصت نزل هو واني جهزت نفسي اخذنه مرتضى ولكينه ديما قبلنه جايه
الكل فرح بينه التهينه كلنه بالمطبخ كالت خاله راح اخابر امج تجي ويانه ع الواهس فرحنه حتى شهد كالت مشتاقه لخاله هواي
تساعدنه كلنه بالغده تقريبا ب11اجتي نوره وجان وجها يضحك 24 ساعه
راحت بدلت ونزلت ويانه كبل طبعا الكل يحبها خاله وخالو وبيبي وجدو بعدها اجتي امي جابها بابا ورجع مقبل يتاخر كال اخذت اجازه زمنيه وراح ارجع
سالناه ع عمار كال ابغداد
احنه بالمطبخ وطلعنه خاله وامي وبقينه وحده نسولف ونضحك صار الاجتماع بالمطبخ احنه وبالصاله خاله وماما وبيبي
دزن ع شهد وعرفنه اكو انه بالموضوع طردناها يله روحي لذاك الاجتماع
نوره كالت والله اتمنى ترجع شهد لعمار خطيه هواي تعذبت وكله بسبب اسيل الخبيثه
اي والله صدك خطيه هواي اتعذبت بالبدايه بسبب مرتضى وبعدين بسبب اسيل
نوره كالت مرتضى شدخله بالموضوع الظاهر متعرف السالفه كعدنه سولفنه الها المقتل
اشو هاي كامت تبجي تكول خطيه شهد هواي نظلمت وعابت لمرتضى ولعمار والغسل لاسيل
ضحكنه عليها اني وديما لان تحجي بحركه
طولت شهد وياهن كملنه كلشي واذن الكل صله وخلصنه كعدنه كلنه سويه لمن اجه خالو وكرار
صبينه غده كرار وخالو وجدو وحد واحنه وحد
كملنه وذبن المواعين عليه وكمت اغسل وادردم عليهن
كملنه وصعدنه نسولف سويه وحاولنه نقنع شهد بس قافله قفله من هاي الزينه نوره كالتلها والله امنيتي اشوفكم تتحاجون انت وعمار
بقينه للعصر ندك سوالف لمن كالو اجه عمار وتفاجأنه شهد كامت ترجف
هاي شبيج شهوده ليش هيج ترجفين
مااريد اشوفه ولا اريد احجي وياه
هاي هي بس اهدئي والله منخلي يجي ابد
بعدين كعدنه قنعناها كلنه بس شوفي شيكول وممجبوره ترجعين بس اسمعي منه
شلعت كلبنه وبعد الحاح من الكل يله وافقت
عفناهم سويه وطلعنه طولوا بعدين طلع عمار وجها يفسر النتيجه
محد ساله ولا واحد حجه وياه وهو هم باللحضه راح
اتفقنه محد تحجي وياها خطيه لان حقها ترفضه الي صار مو هين
طلعت النه ومبين عليها باجيه هواي كالت خابري مرتضى خلي يجي يرجعنه
شهد عمار راح وعيب من بيت جدو من نروح هيج وقت واحنه متفقين وياهم نبقى للعشه ومرتضى راح يقلق
كوه قنعناها تبقى بس حسينه بيها بعالم ثاني
لليل اجه مرتضى رجعنه للبيت
سالني ع الي صار وسولفتله كلشي كلي روحي نامي يمها خطيه يجوز هسه ضايجه ومحتاجه تحجي وي شخص
متاكد ...
شبيج روان ليش متعجبه
اكول معقوله انت تطلب مني انام بره
ولج اني روحي طالعه ع شهد والنبي كل همي هي خطيه من اشوفها هيج تعيسه احس بذنب مو طبيعي اني لو من البدايه موافق ع عمار مصار الي صار ولا عمار اتزوج اسيل ولا كدرت تسوي سحر
فعلا هو السبب الرئيسي بلي صار بس محبيت ازيدهاعليه
مرتضى هذا الي صار هو قدر مكتوب علينه ولازم نشوفه مو انت السبب لتلوم نفسك
روحي يمها خطيه
فعلا رحت يمها وسولفتلي شنو الي دار بينها وبين عمار حسيتها ارتاحت شويه
معلقت ابد وهي جانت تطلب مني بعيونها مااحجي شي
نمنه وثاني يوم كعدت لكيت مرتضى رايح خابرته ع الغده تجي كال اي
اجه جهزنه الغده وكعدنه كلنه حتى شهد ع فجأه دك جهاز مرتضى كال هذا عمار استغربنه ممعقوله هيج يخابره
اشو بس كال الووو جان مرتضى ينخطف لونه
لا بربك تحجي صدك كول غيرها يمعود لا ياالله لتكولها فدوه كول غيرها
وين هسه اني جايكم انتظرني لونه انخطف
ها مرتضى شكو
جان يكول ..... لا عفيه مرتضى لتكولها فدوه كول غيرها
