رواية خطايا واجتثاث الفصل الثامن والاربعون بقلم نور البصري
مرات أكو بگلبك حجي.....
بس تنجبر ماتحجي؟
مرات عيونك ماتصب
بس تلگى گلبك يبجي.....
ـــــــــــــــــــــــــــ♡ـــــــــــــــــــــــــــ
ردت أوكع ولزمني نترت روحي منه بخوف أحس روحي دتطلع و أريد أتقيأ لا.. لا.. لا.. الكابوس عايش لـؤي.. عايش حسيت نفسي راح أختنك وهو واكف ومستغرب.
_ أسم الله خالة شبيج؟
_ وخر ولك وخر..؟! أنت عايش وحسن عظام بالمقابر.
هنا رجع لورى وكال:
ــ طلابة ثار؟ آني شعلية أبوي وخلاص الثار أخذوه منه شعلية آني خالة والله توني متزوج ومرتي حامل.
صوت وراه : صهيب شبيك؟
ألتفت : فوتي جوة..
راد يدخل و عينه على جنطة الكتف عباله عندي سلاح عافني وركض وسد الباب ختل ببيتهم يا ربي ما دأستوعب صهيب منو؟ والنوب لؤي؟ لا مستحيل هذا شاب أنطيه بالعشرين من عمره
ظليت أتكا على الحايط وأمشي وهو فتح الباب شوي يباوع حسيته طفل من الخوف حسب السمعته بالفاتحة مرت سنين.. و أنطفت نار الأجتثاث ومحد كام يقترب لعوائل الحزبيين إلا فيما ندر أو ينوخذ ثار الأب من الإبن أو الحفيد ما أتوقع هذا أبن لؤي رغم الشبه لأن ماجدة.. أكدت قتلهم وأكدت وفاتهم.
رجعت أفتر بالشوارع بدون أي سبيل ولا هدف عقلي مشغول لكيت نفسي واصلة لبداية سوك المنطقة خليت ورجعت بس من الجهة المعاكسة للشارع ما أريد أمر بالبيت المشؤوم بيت جد مـاجدة.. وآني أتمشى وصلت لبيت خالة أم مـريم.. بيت نوري اللي جنه بالمنطقة نسميه نوري النصاب أو أبو الفصول والدكات و تفاجأت طلعلي رجال شاب وكفت مصفنة بوجهه و سألته كال وين من كم سنة أشتريته ونوري النصاب أختفى يگولون منتمي لعصابات باگوا البنك وطفروا وهواية سوالف و إشاعات طلعت عليه بوكتها.
رديت : شـكراً..
فلتت.. أوف هذا شكد يحجي سألتك سؤال جان بس جاوبني وخلص طلعت نقالي من جنطتي إحنا أول ما وصلنا أشترينا شرايح تشتغل هنا بالوطن عندي رقم مـريم.. دگيت عليها وثواني وجاوبتني.
_ أكولج مريوم.. وين عنوانج رحت لبيت أمج و ماكو.
_ شبيج سـؤدد.. شنو ما تعرفين أمي ماتت من سنين ونوري طفر وذب جهاله على عـون.. ومرته الصغيرة طلقها وتزوجت غيره.
رديت عليها بعتب:
_ منين أعرف تفاصيلج إذا أنتِ الخبلة متحجين هو أنتِ من تتصلين كولها كلمتين تعتذرين وتصديها بوجهي.
_ عبالي شـيلان.. كالتلج بكل الصار.
_ شـيلان.. ملتهية بالمشتل والبرتقال الأسود المستورد والورود النادرة و النوب هسة شاغلها رجعة بـروان.. اللي حاصرها ديبتزها حتى ترجعله.
_ يا عزا شنو يبتزها والله مال أسجنه خلي يولي النذل شو مگلتلي.
_ يعمي هو أنتِ مو مريم قبل شنگولج يلة دزيلي العنوان خريطة البلد تغيرت مو نفس ذاكرتي وأنتِ أكيد مو بيت نـصير القديم دزي العنوان راح يخلص الرصيد هنا يخلص بساع.
ـــ كنكي نت على الشريحة.
أنطتني التعليمات شلون أكنك وبلغتني هي بمنطقة زراعية بس حالياً العالم بنتها بيوت وقليل بساتين بقت بيها وأنطتني العنوان عاد ترخصت هي وكالت:
_ يلة أروح كبل لا الطيور تقرر تفلت من الدروس.
_ ركزي بكلامج.
_ ها إي صح صح طلابي وصلوا أقصد
_ حلو بس بهذا الوضع بعدج تحتاجي وقت ترى.. العالم لا ترسب جهالها إذا يقبل رجلج ياخذج جاد.. جلسات نفسية قبل لنرجع بلدنا البديل.
_ أهوووو.. لا مابية شي شكراً خلي الجلسات الج آني بالدراسة أركز ومعليج يلة باي.
سدته بوجهي غميت النقال أمداج مـريم.. كنكت ورجعت للواتساب حتى أتصل بمـاجدة.. بس لكيت آخر ظهور إلها بعيد أستغفر الله حتى شريحتها اللي دزتلي رقمها وواتسابها عليها لأنها من رجعت أشترت شريحة محلية مغلق ولج جيجي وينج؟ رجعت لبيت حسين.. وآني هنا تذكرت غميت روحي بيت عمو سهيل مقابيلنا بشوي بين الجوادر إريد أفوت لكفني واحد من ولد خوالي.
_ شنهي تفترين يكرم الله أزلمه موش حرمة روحي يلة يم أمج عند الحريم.
خزرته : أنت فرج؟
_ هوة.
_ إي عرفتك دومك تضوجني جنك حسين.
صوت وراي:
_ و شبيه حسين.. شو جايتنا وجايبة وياج أجنبي سكتنا وأكلنا تبن تزوجتي حتى ما شرتينا.
أبتسمت و بتحدي غثيته:
_ القاضي راضي الحاشية شعليهم عمي وزوجني.
_ ممممم عمج وشعجب ما إجه لا كال أأدي واجب.
_ إي والله يعتذر ما كدر لأن مسافر وقتها بندوات بأمريكا.
_ يلة سـؤدد.. أنتِ أزلمة كلف تسدين و توفين مكان عمج وهذا الحلو هم يكفي ويوفي.
حجاها و باوع لأبني الجان شايله يكمزه بين أيديه والظاهر ماخذه من أبوه شعجب أمن و إنطاهم (بوو)
_ شسمك يا حليو؟ طالع على خوال أمك.
ردت أعاند و أكول يشبه أبوه بس جاوبت بهذا:
_ إسمه بوب وندلعه بووو.
أستغرب الأسم وظل يستغفر:
_ بلة هذا هم أسم خير الأسماء ما حمدت بووو شنهي النوب.
رجعت باوعت لبيت سهيل اللي مقسوم بيتين وبنيانا كولش متغير.
_ هذاك بيت عمو سهيل.
أبتسم حسين:
_ إي بيت حـارث.. حالياً والبيت الزغير بصفه بيت أخته حارث صديقي الروح بالروح من إيام أستاذي سـهيل عندي معرفه بي و تجاورنا وحتى نسوانه صداقة وجهالنا هم والله أفكر أنطيه بنتي لأبنه بس شوي يكبرون.
هزيت إيدي:
_ عشتو
_ والله حجزت أبنه لبنتي.
باوعتله :
ــ ولا كالت أمي مسمي بنتك سـؤدد.. متخاف مرتك تزعل.
ضحك وكابر :
ـــ اللي سمتها تموت عليج.
_ إي مبين كد ما خوزرتني تمشي
وتبسمر من وصلت لليوم و عود هي بنت خالي سوادي.. بس اااخ بينت النفوس حتى حجيها وياي بسامير يلة أروح و دير بالك على بووو.. ترى ما ياكل هذا.
أخذت من إيده منطيه هذا الأنابيب الداخلها شكر ولمندوزي ملون ويمص بيه جريته ذبيته من إيده ظل يتباجى ويريد..
_ كخ هذا يمرضك.
رفع حاجب :
_ الله يرحم أم القواطي صارت أم و مو إي أم تهتم بالبيئة والتلوث و الصحة ترى سالفة الدعاميص سولفتها عمتي النا من زمان أم دعاميص عوفي الولد ياخذ مناعته الطبيعية تعال ولك أنت أنطيك بنتي اللي توها صارت من هسة هذا يكبر غصب إسحله هنا لبلدنا نحسن بي نسل بنتي زينب الزغيرة زرگه عليج.
باوعتله : وآني شكو خوب أمها الزرگه والله يا الله.
ضحك : بعد يا خوية هي قسمتي بالزرگ أنتِ رفضتي وكعت بالأزرگ منج ولك بوو مدري شنهي.. أسميش هذا ولك تاخذ زنيبة.
أبني صفن بوجه حسين :
_ عم..
_شيكول ترجمي وعلميه عربي هواي عنده رطين..
_ بعده مو هلكد يحجي بس هو بعد عنده لغة البلد العايش بيها أسهل من العربية وديكلك عم عبالة زنيبة أكلة.
_ لا ولك هاي زوجتك مستقبلاً أمك ما رضت بيه أدمج دمي وي دمها بخلفتنا ويجونا أحفاد من بيبي سـؤدد وجدهم حسين.
رفعت حاجب : تحلم.
و عفته ورحت دكيت باب بيت أنتصار لأن حارث.. مو على حال وي مـاجدة..
طلعتلي بنت مراهقة هاي فرح.. يمكن سولفتلي عنها ماجدة.. قبل لاتختفي بساعات:
_ هلوو آني سـؤدد.. صديقة مـاجدة.. وين أمج.
طلعتلي أنتصار.. وحضنتني تبجي:
_ هلا بيج حبيبتي تعاي فوتي خية تعاي والله هالماجدة.. ما ترتاح.
_ بس لا قتلها شو لابسة أسود.
_ جنت بفاتحة مرت خالج توني رجعت.
_ ما شفتج ها يجوز من طلعت أفتر بالمنطقة وأشوف التغيرات ومريت لبيت أم مـريم.. الله يرحمها.
دخلتني ضيفتني و سألتها:
_ كل عقلي ويا ماجي والله هذا الخبل أخاف منه ما شفتيه ورى السقوط شلون يركض بالشارع يدورها وجايب مرتزقة ويريد يقتحم البيت لو ما ستر الله جان جيجي أنقتلت من سنين.
وكعدت تسولفلي:
_ سبق وطردني.. ما يقبل حتى أدخل بطيف.. بنته وآني خالتها وما يريد إي تواصل بينا وهسة طردني لأن طالبت بأختي ما أعرف شنو مصيرها الخوف والقهر أكلني عليها رحت اشتكيت بدل ما يعتقلوه ويرجعون أختي أجاني بلاغ عود آني أهدد رجل أمن هو من بداية الألفينات متطوع على الداخلية وذاك الوكت جان تعال وتطوع مو إلا خريج كلية شرطة هو بحرس الحدود وعنده مكانة بين مسؤولين بالدولة وناس واصلة ورتبته حالياً عالية ولج هددني يكول عندي معارف بالشرطة ياخذ أبني وبنتي ويعتقلهم إذا بعد فكرت مجرد تفكير أفكر أسأل عن أختي حتى بلاغي أنهمل وبدل ما آني صاحبة حق هو صار صاحب الحق.
_ مـاجد.. التافه صاير هيج!
_ خية هو منو بقى على وضعه ناس أرتفعت وناس نزلت أمانة الله العالم كولها تمدح بي و بأخلاقه و يگولون عليه شخص حقاني ونزيه بس وياي آخ هسة من أحجي دگته هاي وياي ومانعني من أختي ما أعرفها عايشة لو ميتة منو يصدك بية وهو ظالمني ومدري شسوى بأختي تدرين الكل يحبه حتى هنا بمنطقتنا يحبونه مساعد ناس هواية أحجي يگولولي أنتِ دتسقطين بأخلاق رجال خلوق ونزيه هي دولة فاسدة وهذا نزيه لا تدرجيه وياهم بعد شسوي سلمت أمري لله.
_ إنـتصار.. منو ساكن ببيت الحجي أبو شاكر جد مـاجدة.. ولج غير شفت واحد نسخة لـؤي..
_ إيييه.. من رجعنا بعد السقوط بفترة جان البيت محروك ومشلعة بيبانه والشبابيك بس تالي ترمم وواحد من ولد أبو مـاجدة.. رجع سكن بي.
قاطعتها : شنو عايشين معقولة بس مـاجدة.. أكدت موتهم إلي.
_ لا يمعودة حسب ما سمعت عنده مرة بالشمال تركمانية أعتقد أقصد بالمحافظات الشمالية الي ما خاضعه لحكم الاقليم هذا رجع هو وعائلته أمه وإخوانه رمموا البيت وخسروا فلوس وصرفوا ليش ما من شهرين أبن عمة مـاجدة.. حب وحدة من الجنوب عن طريق التواصل عوف أمك وأبوك واخواتك وأرجع زين هذا وشاف البيت بيد أولاد خالهم لـؤي.. يسكت لا طبعاً وهاي قضايا بينهم وما أعرف لوين تصفى.
_ ولج نصيرة.. صايرة جنج أم العلوم منيلج هيج معلومات.
_ ها هسة أكولج مو أبني شاغول ويشتغل بكولشي وبعد وضعنا تعرفين على تقاعد الشهيد فمتعرف على يزن.. أبن عمة مـاجدة.. وصاروا أصحاب فيسولفله.
_ هي عمة مـاجدة وين صفت بيا بلد؟
_ يي بلد خليجي ورى سنة من سفرها لرجلها خلفت ولد مسميته شاكر هسة يمكن بعمر فرح بنتي أو أكبر شوي هذا حسب ما كال أبني بقى يم أمه وأبوه أما بناتها تزوجن مناك و يزن أبنها الكبير رجع لأن أهل خطيبته ما قبلوا تسافر.
هزيت إيدي:
_ ما قبلوا تسافر بس قبلوا ينطون بنتهم لشاب دون ما يجي أب أو أم تخطب.
_ بعد سمعت تريد ترجع علمود الخطوبة هو لسة ماكو شي رسمي و يزن ملتهي يريد يطلع ولد خالة ومرت خالة التركمانية من ورث الجد.
_ الله يهدي العالم شوفي الطمع ما يدوم الله يعينج جيجي.
لزمت إيدي أنـتصار.. ودمعت:
_ سـؤود.. ما أعرف شلون أتشكرج ما عفتي مـاجدة.
بجت وردت تحجي :
_ إي والله.. خيتي تكسر الخاطر الله يدري شنو حالها ووضعها ووين صفى بيها الوكت بس لا عبالج أسكت.. إذا ما طلع أختي أروح للعاصمة وأقابل وزير لو رئيس بلكت يشوفلي حل.
_ والله أنتِ يا إنـتصار.. كولش فطيرة وذول يقابلوج؟ وأختج بالنسبة الهم لاشيء.
_ نشتكي بسفارة البلد نگول انخطفت والخاطف فلان هنا غصبن ما عليه يطلعها تتحول قضية دولية خطف مواطنة أَجنبية.
شوي وصفنت:
_ ما گلت لماجدة.. عدها أَخوان تركمان والله ما لحگنا وهم ردت ترتاح كم يوم بس آخ تحوم على ضناها وراحت تريد تشوفها أوف خيتي وينج أكولج خية سـؤدد.. بس ترجع مـاجدة.. بالسلامة نحاجيها تطالب بورثها ليش شحصلت منهم عاد تحصل ورث تسند روحها بيه بس الحقير مـاجد.. مدري وين ضمها ونكر و يگول ما أَدري وينها لو يستهزأ بية يگولي شنو العار عايشة؟
سؤدد : مستحيل ماجدة عند ماجد و هي طليقته بصفته شنو حاجز المرة بيته أو مدري وين.
جريت نفس وگوتلها:
_ مو من حق خلفة العمة.. تاخذ ورث أولاد وخلفة لـؤي.. ألهم بأملاك الحجي ورث أَبوهم لـؤي.. هي الأَملاك زين ما أخذتها الأَحزاب والحكومة.
_ كولشي باقي بإسم الجد.. لذا هنا يتقسم قسام شرعي و هذا إِبن العمة طماع ميقبل و يريد ياخذ كولشي والظاهر المحكمة راح تحكمله مدري حكمتله.
ــ أَستغفر الله يا رب على طمع بني آدم بس شلون ياخذ حكم لصالحه إِلا إِذا ينتهز فرصة خاله جان رجل أَمن بالنظام السابق بس هنا شغلة ورث لنسل لـؤي.. ما أَعتقد الحكومة تحكم لصالح إِبن العمة.
حولنا الكلام ونفكر وين ممكن تكون ماجدة.. ما حصلت شي من إنـتصار.. بس كل اللي عرفته مـاجد. بيته بأرقى مكان لأن ماخذ حقوق وتعويض عن الشهداء أَخواته الراحن بالرجلين و حقوق سجين سياسي وهم ورواتب عنده ومكانة وسند بإِحدى الكتل السياسية والفهمته إنو أُخته فضائل بقت بالبيت القديم.. هنا أَكيد أَروح لبيته والعناوين أَخذتهن من إنـتصار.. حتى عنوان فضائل لأن ما أَعرف ولا أَندله حتى لو باقي البلد على البناء قديم هم ما أَندلهم وما رايحة إِلهم لأن سبق وعلاقتي بمـاجدة جانت منقطعة
هسة وين أَروح رجعت للبيت.. بيت حسين.. گعدت يم أُمي ولگيتها توكل بأبني بووو.
_ وين جنتي تخمين النسوان تسأل عليج.
_ ظال بالي يم مـاجدة وتدرين أساس جيتي وياج لأجل.. أشوف صديقات العمر سنفوراتي و أشوف مـاجدة هذا الخبل شسوى بيها أختفت وهسة من حاجيت أختها زاد خوفي أكثر.
_ سكتي عيب من النسوان كولها تلوم بيه ليش زوجتج لواحد غريب مو من أَولادنا النوب يبسمرن رجوة.. مگايلين إلها تزوجتي وعرفت من كم شهر بزواجج و تمرضت بقهر وماتت هاي مرت حسين تمشي وتبسمر بيه وتعيب زوجتج بـأَجنبي وعافت أبن خالها.
_ وي وآني شعلية بيها مدري شعليها بية والله يالله تتحسف أَعرس وأَخلفلي وليد بنية لكبرتي عمي الله يساعد القبر والملائكة عليها بالدنيا هي متنعسن وشايلتني وداكتني النوب بالآخرة من أَگولج لوما جيتي لصديقاتي ما إِجي تزعلين هسة رجيوة حلوة صارت والله يا الله.. الله يرحم أَيام متخلي بيبي تدزلج صوغة.
كرصتني : اشش بنات حسين أذاناتهن يمنا يمة يمة شلون بنات بعد أمهن بنت سوادي وكحة.
ضحكت : والله حـسين.. متصرفلة الوكحة يحطها يبيس بيها..
عليت صوتي اليوم إلا أغثهن خاصة هاي بت خالي سوادي خايبة ترحين فدوة بس لنعال محمد الله يرحمه الموت ياخذ الزين ويعوف نجيلة بنت سوادي ظليت أبسمر :
_ ايييه الموت ياخذ محمد الزين ويبقى بس النعل..
وأشرت تجاه نجله آني الج تاخذين غيبتي و تحجين علية أعلمج امداك حسين ماخذلك شاذي شسمناتها ظلت تخوزر النوب أم كرش شسمنها بسمرت
_ دراسة علمية إذا زاد محيط الخصر للمرأة عن 80 هنا معرضة للسرطان وأمراض مميته اايي يمة بنيتج آني أم خصر شطب ريحان تتحسف كل الزلم اللي خطبتني وما وافقت النوب ياريت أخذولهم قسمة زينة ههههههههه تتزوج هايشة بمرابع الريف ترعى.
هنا كالت :
ــ هاي عليمن.
رديت : يهو يمج بحذاج.
ــ جا أنتِ خبلة تحاجين رويحتج.
_ يجوز شعليج حبي.
_ عشتو..
هنا أبتسمت وباوعت لبنت حسين:
_ بيا صف وصلتي.
_ أول متوسط.
_ زين هسة سنة سنتين يبطلج الخبل أبوج وتعرسين.
ردتني أمها :
ــ شبيج خية تخوزرينا وتذبين بسامير شكو جاية متحاملة علينا وشديتي وي الفرخة بتي شني سالفتج خاف عندج حسبة ترى خاف نيتج تعوفين الأجنبي الفضلتيه على حسين.. مامش عندج بعد هنانة غسمة.
قلدت : غسمة فضيلة ههههه لا تطمني حتى لو أفكر بيوم أطلك أخذ اللي يسعالي ويريدني.
صارت حمرة:
ــ عبنج موش تسكتين و أَشوفنج تبسمرين عندج موال يم رجلي حسين شوفي ولج لا أَصرخ وألم عليج خياتي وبنات عمي وندوفج أَنتِ وشعثتج تنجبين ولج.
أمي حاجتها:
_ على كيفج حبوبة أَنتِ العلتي يم ربيعاتج والحبايب تحجين على بنتي هسة أَصيح حسين هسة يدوفج خطار ببيتج إِحنا وبنتي تشاقيج وعدها أَبو علي كل دنيتها لا عبالج بس أَنتن.. من گعدت بنتي و تبسبسن أَسمع تعيوبجن وحجيجن والغيرة منها.. تتمنن مكان بنتي عشتوو ناقصني بنات سلامة والله يسوادي الله يرحمك خوية كون عايش أَنذليت من بنتك.
درت ظهري إِلهن وأُمي هم حگرناهن شحجيت وهدت عشتو شاورت أُمي بصوت ناصي:
_ منو أبو علي.
_ أبو بوب.. ذن شيفهمن ببوب طاح حظج على هالأسم حتى رجلج كال عاجبه علي أو محمد أو إي أسم عربي والله آني ما أصيحه بوب ولا وإخوانج ولا عمج روحي غسلي لعلاوي أبنج ولحسن أخوج غديتهم.
باوعت لأختي اللي حالياً بعمر 13 مراهقة على عمي طويلة كولش عبالك بنت 18 و بارزة الجمال والأنوثة تشبه أمي جا شبية ماطلعت على أمي هي هم حظوظ.
_ أخذي بوو.. وحسن.. غسليلهم زين الأكل هنا دسم وريحة اللية تبقى بالأيدين.
بلكنه عربية مكسرة كالت أختي:
_ ما أرتاح أروح وحدي ببيت ما أعرفهم.
_ أوي فدوة للأميرة اللي تخاف عشتو شو دجيبي.
أخذتهم و أجرجر بيدهم كلمن من إيده واسحلة يمشي أمي صاحت :
_ على كيفج وي الجهال.
شــــــــــــــــــــــــــــيلان
حسيت متقيدة كولش فكرت أَأَجر منه الكوخ لأن هو الظاهر ناوي يستقر هنا
گعدت بالحدائق مال الفلا تعبانة لأن وصلت مزروعات نادرة وغالية للأسف لكينا بيها آفة وطفيلات.. هنا خفت لا تصير عدوى لذا طلبت من الوكيل يرجعهم أَو يتلفهم.
_ وين نرجعهم بعد؟
جاوبته بحسم:
ــ لعد صورهم للوكيل اللي غشنا وإِتفق وياه يرجع فلوس الصرفناهن من نقل وشحن هاي الطفيليات من فترة بيهن يعني بموطنهن الأَصلي هنا من حقنا نطالب بفلوسهن وفلوس النقل والشحن.
شوي وطلع بروان.. لابس برمودة بهذا البرد ونظارات شمس هذا بعده متأثر بوسط الوطن اللي يميل للجفاف والحر وِگف يستمع وآني أُقدم تقرير لسيد نوزاد.. توترت هو ما تدخل بس يستمع حسيت أَنفاسي أنسرقت مني وراح أَختنك .. التفتت عليه وگلت:
ــ هاا روح منا مدنگدر نشتغل.
همس وهو يباوعلي:
ــ لازمج؟
خجلت.. عضيت شفتي وحجيت عربي حتى لا يفهم نوزاد:
ــ إِنتبه.. منا الرجال أَنت ما تستحي تلميحك عيب.
ضحك وهمس بعربي مكسر:
ــ ما أَحجي عربي بطلاقة بس أَفهم كلامج فترة العشتها بالجنوب حسنت اللغة من كلامج فهمت أَنتِ فهمتي (لازمج) خطأ ههههههههه نيتج طافرة حياتي لو أَشواق جسمج و گلج نطق تخيلاتج التتمنيها أَكيد تتمني أَلزمج.
وسعت عيني وبحاجبي أَشرتله روح و تجاهلته رجعت لنوزاد أَنطيه تعليمات
ــ ذني ما يفوتن للمشتل ينقلن عدوى للمشتل هسة فوراً تدبر حالك تتخلص منهن!
أَشر براسه إِي.. وراح.
درت أُريد أَتفاهم وياه.. غلط نعيش ببيت واحد وإِحنا مطلقين هم أَخاف على سمعتي خاصة أَبوه يرجع لوسط البلد لأن حسب مسمعت گايل ما أَحب محافظات البرد والثلوج الوسط جو طبيعي وهناك ارتاحيت أكثر باوعت للجبال وذبيت حسرة وآني أُدمدم أغنية بالكردي لعدنان كريم.
(يا حبيبتي يا مدينة الشتاء
شوارعج بيضة من الثلج
بس گلبي يحترگ بانتظارج
كل ركن من أركانج يحمل ذكريات
والثلج اللي غطى أسطح البيوت
غطى وياها ضحكاتنا القديمة
البرد لاذع والسكوت بالليل يذبح
وحدي أنا وذكرياتج
نتحدى هذا الصقيع)
ذبيت حسرة درت لبروان.. صافن بية و كال:
_ الظاهر بهذا الأسبوع ينزل الثلج لازم تهيئي المشتل.
شنفت حلگي وآني أرفع خشمي:
ـــ ما تعلمني شغلي أوك.
_ ولا كأنما تحاجين راعي لگمتج و مديرج.
حسيت رجع يبتز ويضغط علية:
ــ اللي يشوف رومانسية رسائلك المطبوعة ولغة الثقافة القوية بيها ما يگول واگف تهدد بقطع رزقي ورزق بنتي.
No
No
No
جرها بصورة سريعه وكمل :
_ رزقج بيها مجال أما بنتي رزقها من رزق أبوها.
_ بـروان.. شتريد مني ترى صعب أَرجعلك كولش صعب اللي بينا انقتل ومرت عليه أَكثر من 11 سنة داخلين على 12.. تريد بعد هاي السنين ترجع تلگـى شيلان الساذجة و نفس المشاعر إِلك أَنت خذلتني ما أنتظرت ولا أنطيت فرصة حتى نخلف يعني من أَتذكر شلون أَتوسل بيك تفحص ونعالج ونخلف جنت تحجي بثقة وما تقبل تعالج هنا حيل أَنجرحت لو صابر بس لو صابر مو هياتني ولدت لين أَنت أناني.
سكت ومد إِيده لزرعة يفرك بورقتها بتوتر يگطع بورقها ويذب بالكاع حيل عصبني بغضب نترت إِيده من الزرعة بعيد وضربت على كف إِيده مثل ما أَضرب طفل أَذنب.
_ إِيدك لو بس بيك خراب شنو ذنب هاي المسكينة قطعت أَوراقها هو هذا الرجال شنحصل منكم بس ذبلان حياتنا وتساقط أَوراق شبابنا مثل هاي الشجيرة اللي تعديت حدودك عليها.
_ رجعيلي.
_ جايني بعد 12 سنة تكول رجعيلي تأخرت.
_ شلون راح تخليني أَتصرف تصرفات غير إِنسانية أَسجنج وهنا ذاتياً تتحول حضانة إلينا.. إلي.
_ شوف أكولك بنتي إلينا.. خط أحمر لا تدخلها بصراعاتنا.
ضحك : سنين أَحسب الثواني أَكبر مشاريعي هنا وأَسيطر عليج حتى أَرجعج إلي ليش ما تاخذين الموضوع ببساطة ليش ما تعتبري حبي الج بعده ينبض ودأُصارع أَستعيدج.
ضحكت بقهر وگلتله:
ــ خطييية... مقهور لدرجة تجيني مرتك بطنها لخشمها و بإيدها إِبنك ولك ليش ومشاعري تروح تلعب من وراي تقبل آني أَسوي سوايتك وأَصاحب؟
رزلني :
ــ إِحجي عدل.. إِحجي عدل تصاحبين علية هسة أطيح حظج شلون منطق كلامج أولاً آني تزوجت بنت عمي يتيمة وعمي حرجني وقتها خلي نفسج مكاني رجال يعالج الروح ومحضر شهود وهاي بنتي أمانة.. أگوله ما أگدر؟ تعذرني؟ بعد شي صار وهي توفت راحت لدار حقها شفتيني وراها تزوجت؟ هذا آني كم سنة هااا؟ 12 سنة صايم أَنتظر حضرتج.
_ لو تحبني ما خذلتني لو تحبني ما هسة تبتزني وتريد تسجني بـروان.. أَأجر الكوخ وأَكعود بيه وي بنتي.
_ No, no, no
جريت الشجيرة من جذرها و شمرتها عليه رجع ورى وضحك:
_ ليش إيدج خراب خطية قتلتي روح ترى تتعاقبي عليها قطع يوم من راتبج.
باوعتله لو ما عيب جان قلدت سـؤدد من تعفط للي ميعجبها تصرفه خزرته وآني أَدخل للبيت لگيت بنتي لازمة الآيباد أبوها منزللها برنامج ومفعله على رقمه أَسمعها بعربي مكسر تحاجي أولاد خالتها مـريم.. وتضحك وهم يصنفون عليها.
_ إلينا.. يمتى تجون ضاملج هدية.
بنتي تضحك وتگوله:
_ عفية أحمد شنو هي هديتي آني من أجي إجيبلكم كولكم هدايا أبتسمت وكلتلها:
_ درسي خوش لهوة ذول.
ميلت راسي وسلمت على أحمد:
_ ولك أحمد شلون أمك.
_ هلاو خالة أمي ملتهية اليوم أصرت نصبغ البيت و طشرتنا.
_ غير ترتبكم أبني و ديرو بالكم عليها ماما أمكم تعبت بحياتها بس أنتم التعويض.
رد باهر:
ــ خالة تعالو يمنا يكولون يمكم ثلج تعالو عدنا أكضوا الشتا.
_ يا حبيبي لو ما إلتزاماتي إجي ولا تنسى حالياً إحنا مدارس.
ثاني يوم خليت العمال يهيأون المشتل للشتا نثرنا القش ونشارة خشب بالمزروعات الخارجية تحمي الجذور لا تتجمد ونصبنا أَنفاق النايلون وغطيناه بنوع من الحماية الخاص أَما المشتل الداخلي حضرنا مدافيء كهرباء لكل غرفة من غرف المشتل بـروان.. بس يباوع ما يتدخل بشغلي همزين جان رزلته كدام العمال وهو يعرفني أَختصرها فسكت.
عــــــــــــــــــــــــــــون
دخلت للبيت توني راجع من المدرسة دوام وتعب :
_ وينجن غدة لبين ما أسبح.
إجت وجدان:
_ صار
_ وين مـريم.. من تخنس أخاف؟
_ اليوم مـريم.. متحزمة تصبغ الطابق الفوك.
طبعا الطابق فوك ضفته من كم سنة:
_ تصبغ ولا غير شي نعمة وجدان.. ركزي وي مـريم.. هي وعت صح بس تبقى آثار المرض بيها.
_ هي دطلع إبداعات مرضها بالصبغ وترسم عالحيطان.
صعدت أَطمن بنفسي لگيت مكملة غرف الجهال و باهر.. مسوية السگف عبارة عن غيوم قطنية وإِضاءة والحيطان تغليف وواحد من الحيطان صبغ سمائي إما باقي الغرف كلمن ونمطه.
_ لا تنسين غرف إخواني أول مرة أعرفج فنانة.
_ اليوتيوب كولشي يعلم إي أخوانك البنية تحتاج تنعزل بغرفة خاصة بيها
أما الأولاد ليش جامعهم.
_ ميكفي يا مـريم.
_ باهر.. كبر غرفته وحده.. لعد أنقل أَحمد يم باهر ونخلي كل أثنين بغرفة يبقى ياسر.. يمي ما يفاركني.
شوي إجت أختي تبجي:
_ شبيج منو ضاربج.؟
_ مو ضربني بس ياسر.. عضني.
ضحكت : هسة أطيح حظة يعضج ليش؟
فتن أخوي:
_ هي أكلت نستلته وعالت بي.
_ أويلي عمي أجيب كراتين الكم بعد تدللون.
همست مـريم:
ــ الله يخليك ويحفظك النا حياتي.
أبتسمت إلها:
_ الله يهديج مـريمة.. و يسعدج تعبتي و إجه وقت ترتاحين وادللج.
جريتها لحضني:
_ يلة نزلي سبحي من الصبغ و نتغدة ورى الغدة أعاونج نكمل غرف الزعط والله عمر مدللتهم أحسن مني دلليني هيج.
لميتها بحضني فرحان بأستقرار حياتنا..
ســـــــــــــ♡ـــــــــــــــؤدد
عقلي كوله يم مـاجدة.. خل أَنوم أبني واسف أَشوف مـاجد.. أَكيد حسب ما گالتلي إنـتصار.. الرجال ما أشتغل مدرس بتخصصه هو منتسب على حرس الحدود اللي هم صح داخلية بس شغلهم شغل الدفاع مو شرطة محلية النعرفهم حتى لبسهم عسكري وحتى يشاركون بالمعارك أو سيطرات اللي بحدود المحافظات أو البلد فهسة يجوز دوامه بعيد إذا دوامه يومي شلون شغلة هاي للعصر طلعت وصيت أَمي على أبني بووو.. النسوان ملتهية تنظف ورى ما كفت العالم وقت عصر على غروب.
_ وين ترحين خية وقت صلاة راح يصير؟
_ راجعة أن شاء الله ما أتأخر.
_ ما يجوز أول صلي الواجبه حرام خيتي.
باوعت لنورية زغيرة والله على الترمل والله يا حسين.. عفت كل جمال بنات عمامك وأخذت نجلة.. المعذربة شلون قهرتني رجعت نفذت كلامها لبست محرم وتوضيت صليت وطلعت أخذت تكسي و الوقت صار ليل بس دزيت خبر لرجلي اللي متوجس يخاف من بلد إنو مو أمان و آنخطف شاقيته خابرتله:
ــ حياتي يخطفوني على حوري لو سوري هههههه.
ورى كلام بينا هم بكلمتين وضحكة وشقى قبل بس طلب أخذ أخوي وياي
صحت لأخوي وهو بعمر مراهق يعني أسمه زلمة وياي أول روحتي لبيت لمـاجد.. دكيت الجرس بيت كبير و تصميم روماني خوش فلوس صايرة عندك والله من شفتك صورك ببروفايلك ملابسك صايرة آخر موديل كلت هذا غني صاير من ورى الباب حاجتني مرة :
_ تفضل.
_ ممكن أستاذ مـاجد.
صوت تحول للشك و الغيرة فتحت الباب لابسة حجاب و عباية راس فوك ملابسها بنية طويلة ومبينة مو جبيرة أنطيها عمر 25 سنة أو يجوز بداية 30.
_ معارف وأريده بشغلة مهمة حياة أو موت يكولون يساعد العالم والله كولها تمدح بي.
ظل أخوي يباوعلي مصدوم وهي ردت :
_ هو شحصلنا من طيبته.
خلت ودخلت لا كالت أصيحه لا كالت موجود لا ما موجود أمداج ماجدة.. هاي الأخذت مكانج عوع صح كولش حلوة خوش مختار الحلوات مجودي
باوعلي أخوي :
_ بس يا سويداد كذبتي آني مصدوم بيج تكذبين.
_ أكولك لا تطلعلي تربيتك والمدارس التعلمك ما نكذب ونواجه الحقيقة لو كانت مؤلمة شوف عيني هنا إذا ما أكذب ما راح أكبص مـاجد.. وابيس بي حتى أنقذ مـاجدة.
_ هااا يعني هنا لازم نكذب راح أكول لصديقي الجديد من أولاد أولاد خوالي أخوة مامي أكوله أخذك وياي هو كالي قنع عمتي تسحبني يمكم و گوتله لا ما يصير تعوف أهلك بس أرجع أكذب عليه و أگوله ناخذك حتى لا يلح.
_ خايب أنجب يالاثول شوف هذا آني وين و هذا وين أحم أسكت طلع العينتين.
باوعت لمـاجد.. طلعلي بگلبية بيتية أنيقة:
_ السلام عليكم أختي تفضلي أمريني.
أويلي على الزمن وقت السقوط أخر شوفتي إله مليان حقد وغضب شاب مهضوم بأهله وحقه ما ألومه بس صعب أسلمه مـاجدة.. اللي جانت ضحية أيضاً مثله من ضحايا بعث ولؤي..جريت نفس
_ شلونك مـاجد.. ما عرفتني.
ركز بيه وسكت عيونه تحولن لغضب أشبهن الكم تشبيه مجازي وعود ما أوصيكم كولو وين أكو هيج يابة مجازززز عيونه تلهب بنار تسعر غضب على حزن علية ماخذ موقف.
_ سـؤدد؟! آني ما أنسى زملاء الدراسة ولا الأصدقاء تنحفر صورتهم داخل ذاكرتي بس متوقعتج لذا ما أجيتي بعقلي أنتِ ممكن أنتِ.
أبتسم إبتسامة خفيفة إي بالتعبير المجازي نكول خفيفة من هاي اللي تطلع بالكوة وبس مجاملة بس عيونه جانت تحجي سخرية واستهزاء بنفس إنتچى على سلايد الباب وثبته بيده خاف يسحبه الحايط ويتعور.
_ ااايه زمن كم سنة مرت 15 لو 16 سنة؟!
_ مو مهم السنين المهم.. شخبارك أحوالك.
_ بخير.
_ شنو ماكو تفضلي..
باوع لوراه مرته تروح وترجع أبتسم:
_ تفضلي.
_ لا شكرا أمي وصتني ما أدخل بيوت عالم بالليل خاصة أنت صيتك من إنـتصار وصلني عمي ما نتورط وياكم منو كدكم صاير رجل دولة ورتبة وكذا منو..
ضحك : بعدج نفس اللسان والصفاقة براحتج لا تفوتين.
_ عاد أنت والنعم من الضيافة ببابك وما تلح الا أدخل وتضيفنا.
ربع أيديه على صدره وبحيره كال:
_ من الأخير أحسج تلفين ودورين بمكان واحد؟!
_ اامممم وليش تسأل هيج سؤال أكيد ضام ضمة وما تريد تكولي أثنينا نعرف شنو يربطنا..
رفعت روحي وميلت راسي إتجاه مرتة اللي طلعت بالطارمة ورجعت.
_ حبوبة حرثتي الكاع فايتة وطالعة هههههه.
دخلت ركعت باب الداخلي حيل.
ردني : شلون راح من وراها تسوي طلابة.
ضحكت : لازم ممرتاح وي الحلوة عمي مو كلها بفقارية مـاجدة.. أكيد مبين هاي بس طلايب عرايك ترى أعرف أقيم آني.
_ هسة نرجع المطلوب شنو..
_ وين مـاجدة.. يا مـاجد؟
رفع عيونه لسكف قمرية الطارمة اللي مثبته بعواميد باب بيته ونفخ وباوعلي:
_ أنتِ أجيتيني من ورى سنين تسأليني نفس سؤالي و باب بيتكم سألته الج شنو جوابج إلي جان نفسه هو جوابي يا زميلة دراستي.
طبكت شفايفي ونططت عيوني حيل وآني أعصب عليه شلون رجعها إلي نفس الموقف و نفس السؤال و أنطاني نفس الجواب.
_ شوفي سبق كلتي عدوتي مـاجدة.. سبب دمار خوالي وخطيبي ومستحيل الفيها بيتي هسة أكولج نفس جوابج مستحيل الفيها و أرجعها إلي مصير رحمة.. ودم أخواتي وقهرة أمي وأبوي لسة بين عيوني يا زميلتي.
ما صدكته و أستمر:
_ والله سنين ببالي أنقبرت مثل أبوها وهواي إشاعات وصلت عن موتها بس مال تجيني تسأليني عنها هنا لا بيها انّ أكيد جنتي ضامتها من أجيتج أتوسل بس أريد أعرف مصير أختي ووعدت أسفرها بأمان.
باوعتله وكلت:
_ إي أمن البزون شحمة وأنت هسة دتردلياها متنطيني معلومات قتلتها ولك..
شهكت أبجي:
_ ببلد هنا تكدر بكل وسيلة تفلت من عقاب قانون بس راح أبلغ سفارة البلد الأجنبي وماجدة ترى أحدى رعايا البلد و مجنسه هنا كض روحك آني الك.
باوع لأخوي وتجاهلني:
_ شسمك يا حلو خلي أختك تخلي عقلها براسها.
صفن أخوي يحاول يستوعب:
_ عوف أخوي بحالة مصربع بالحجي ميفهم عربي مية بمية وأنت تحجي سريع يلة ولك نروح ومـاجد.. خليها بعقلك مـاجدة.. بنية أنظلمت وتعوقت وتعذبت من أقرب ناسها تريد ميدمرك أبوها إذا بنته دمرها مـاجدة.. من سنة سنتين يا الله شوي تحسنت صحتها و كوله هم كل نوبة تجيها توصلها للموت.
خليت وعفته من مرته الحرباية مستحيل يخلي مـاجدة.. هنا أَشرت تكسي وهو باقي بالباب مبتسم بس والله عيونه تحجي دواخله بين تشكك وبين غضب صوت حسرته وصلتني
بس رجعت ألتفتت لمحت يغالب دموع رجعتله :
_ مـاجد.. بس كولي عايشة؟ لو قتلتها.
مـــــــــــــ♡ـــــــــــاجد
مددتها مثل مدة الشاه وأريد أظرب ركبتها أريد أقتلها صوت بجيها رجفة جسمها وانتفاضته و الزبد اللي طلع من حلگها كوله ما همني ولا ردت أعرف شبيها.
_ يا عاااار موتي رجعتي لموتج لو مو أم بنتي طيف.. أبد ما أعفي عنج ولا أرحمج.
بس من رفعت راسي أجتي عيوني بعيونها اللي توسعن من الخوف وصرخة الصدمة اللي أنطلقت منها..
