رواية قاتل متسلسل الفصل الرابع بقلم محمود الأمين
استنينا لحد ما الطب الشرعي والمعمل الجنائي خلصوا شغلهم اتنقلت جثة الدكتور عابد على المشرحة وانا عارف ان احنا مش هنستفيد من حوار الجثه دي في حاجه لانها للاسف وصلت لمرحله مش هينفع فيها تشريح
ورجعنا انا والرائد عزت على المصيبه اللي مستنيانا لما وصلنا هناك لقينا الدنيا مقلوبة دخلنا التخشيبة ولقينا شهد مضروبه بسكينه في بطنها.. ولما سالت مين اللي عمل فيها كده؟
كل اللي واقفين شاوروا على واحدة كانت واقفه قصادي كان شكلها مجرمة ست كبيرة في جرح كبير في وشها، عرفت انها ممسوكه في قضيه اتجار مواد مخدره
وكيل النيابه طلب من العسكري يجيبها على المكتب عشان نبدأ تحقيق معاها، وكنت متواجد معاه انا والرائد عزت وبدأ التحقيق
_ اسمك ايه؟!
= فوزية
_ جايه في ايه يا فوزية؟
= قضيه اتجار
_ ايه اللي حصل في التخشيبه، قتلتي البنت ليه؟!
= هي اللي عملت مشكله معايا وانا ما كانش قصدي اموتها الضربه جات فيها بالغلط
_ لا والله، انتي هتستهبلي يا روح امك ولا ايه؟!.. داخله بسكينه جوه التخشيبه وتقوليلي بالغلط، مين يا بت اللي دفعلك وقالك تعملي كده
= ما فيش حد دافعلي حاجه، انا قولتلك عملت معايا مشكله واللي حصل كان بالغلط
_ اتكلمي كويس واتعدلي بدل ما اعدلك، اللي ضحك عليكي بكلمتين وقالك ان اللي حصل كان قتل خطأ كداب، دي جريمه مع سبق الاصرار والترصد يعني فيها اعدام لكن لو اتكلمتي انا مستعد اخرجك من القضيه دي.. ها هتتكلمي ولا لا
...
فضلت ساكته شويه وكانها بتشاور نفسها فرجع وكيل النيابه اتكلم وقال
_ طيب انا هسهل الموضوع عليك احنا شاكين في واحد وانا هقول اسمه لو كان هو تاكدي على كلامي ولو كان لا يبقى تقولي مين هو بدل ما تلبسي الليله كلها لوحدك.. تمام؟
= تمام يا بيه
_ اللي طلب منك تعملي كده واحد اسمه صالح؟!
= لا يا بيه.. اللي طلب مني كده واحد اسمه كريم واداني فلوس كتير
_ اسمه كريم.. انتي متأكدة من كلامك ده؟
= طبعاً يا باشا متأكدة، بس خايفة هو ممكن يعمل في حاجه او يبعت حد يخلص عليا انا كمان
_ لا ما تخافيش، كده كل حاجه وضحت
...
وكيل النيابه رجعها تاني للتخشيبه.. واستدعى صالح عشان يتكلم معاه للمرة الاخيرة.. وفعلا حضر للمرة الأخيرة ووقف قدامنا
_ استاذ صالح انت عارف دي المره الكام اللي نستدعيك فيها؟
= والله ما بقتش اعد يا باشا.. اؤمرني؟
_ الشغاله شهد اتقتلت في التخشيبه.. عرفت ولا لسه؟
= لا حول ولا قوه الا بالله، ربنا يرحمها يا باشا بس انا هعرف منين؟!
_ اللي قتلت شهد قالت كلام خطير جداً.. قالت ان اللي طلب منها يعمل كده هو اخوك كريم اللي المفروض ميت دلوقتي ردك ايه على الكلام ده
= انا بقيت بسمع كلام يضحك اليومين دول، كريم اخويا مات وشبع موت والكلام ده من بدري انا ما اعرفش مين اللي بيعمل كده بس بجد الموضوع واخد حيز كبير من تفكيري ونفسي اللي احنا فيه ده يخلص
_ طيب يا استاذ صالح حاول تتكلم او تفيدنا باي معلومه، يعني تفتكر اخوك لو عايش هيستخبى فين؟!.. في مكان كان بيحب يقعد فيه مع نفسه انت يعني اخوه واكيد عارف
= انا عرفت قبل ما يموت بس الكلام ده ما عرفتوش منه عرفته من بواب عماره ان اخويا واخد شقه في حدايق القبه، وانا شوفت عربيته راكنه هناك ولما نزلت وسالت البواب عرفت اللي فيها بس خليت البواب ما يعرفوش ان انا عرفت
_ طيب احنا هنحتاج عنوان الشقه دي... اكتبوا هنا في ورقه
...
بعد ما خدنا اقوال صالح ما كانش ينفع نروح هناك بقوه كبيره عشان ما نلفتش الانظار كان معانا قوه صغيره واتحركنا في وقت متاخر على العنوان اللي معانا الشقه كانت مضلمة كسرنا الباب ودخلنا والغريبه اننا لقينا كريم قاعد جوه وكانه مستنينا محاولش يقاوم او يهرب وقبضنا عليه عشان نبدا تحقيق معاه ونعرف هو عمل كل ده ليه
وصلنا المكتب وبدات اتكلم معاه
_ اظن انك كنت مستنينا، فيا ريت ننجز ونحكي اللي حصل من الاول للاخر، من اول موت الاستاذ ساهر لحد الوقفه اللي انت واقفها قصادي دلوقتي
= انا كان فاضل ليا مهمه واحده، اخلص على راس الافعى اللي تسبب في كل المصايب اللي حصلت، بس انتوا كنتوا اسرع مني للاسف... الموضوع بدأ من فتره كبيره لما المرضى النفسيين اللي معايا في البيت عرفوا ان ابويا كتبلي كل حاجه وابويا ما غلطش ده كان حقي انا اللي تعبت معاه في الشركه وطلعت عيني لحد ما كبرتها لكن هما شافوا ان ده ظلم ليهم، وبعدها ابويا
تعب بشكل مش طبيعي ما حدش كان عارف عنده ايه؟! وبعد ما مات انا كمان بدات تظهر عليا اعراض غريبه اعراض تعب عمري ما مريت بيها بس انا ما سبتش نفسي كده روحت وعملت تحاليل واكتشفت الكارثه مرات ابويا كانت بتحطلي في الاكل سم الزرنيخ وعرفت انها بتحط منه كميات صغيره عشان يموتني ببطء ومحدش يشك في الموضوع.. لحد ما عرفت من الشغاله اللي اسمها شهد واللي كانت بتكره مرات ابويا كره العمى عشان هي كانت السبب انها خسرت ابنها.. عرفت منها ان ابويا مات بنفس السم وان الدكتور عابد اللي عنده ضمير واللي قال ان الموضوع مش موت طبيعي وانها شبهه جنائيه خلصوا عليه قبل ما يتحرك من البيت وللاسف وقتها انا ما كنتش موجود
كنت عارف اني لو تعبت هيخلصوا عليا بس ما كنتش متوقع ان الفجر هيوصل بيه انه يدفني وانا صاحي، سمعتهم هما التلاتة وهما بيتفقوا على موتي، كانوا بيقولوا اني طولت ولما عملت نفسي تعبان لقيتهم طلعوا خبر اني مت وجاب دكتور اخد قرشين وخلصله التقرير وطلع تصريح الدفن.. بس وقتها انا كنت عامل حسابي واتفقت مع واحد من صحابي انه يجي يطفش القفل ويخرجني بعدها وده فعلا حصل.. وعشان انا كنت مأمن نفسي كنت فاتح حساب باسمي في فلوس كويسة واشتريت الشقه اللي في حدايق القبه وكان معايا نسخه من مفتاح البيت
وبعد ما الامور هديت وهما اطمنوا بدأت التنفيذ خلصت عليها هي الاول الست اللي دخلت بيتنا وخربته، وبعدها خلصت على ياسمين وما كانش فاضل غيره بس خلاص انا وهو هنتعدم سوا تعرف يا باشا طول عمري اسمع عن الشياطين واسمع انهم تحت الارض بس دي كانت اول مره اشوف شياطين على الارض، للاسف اهلي طلعوا من شياطين الانس
_ كان ممكن تيجي وتبلغ الشرطه بدل ما تاخد حقك بايدك وتضيع نفسك
= اتعودت اجيب حقي بدراعي، حتى لو النهايه هتكون كده انا راضي وكفايه اني اخذت حق ابويا الراجل اللي عاش عمره عشانه وفي الاخر قتلوه بدم بارد
....
خلص كريم كلامه واتقبض على اخوه صالح اللي ما كانش مصدق ان اخوه عايش ولما شافه قدامه كان هيتجنن
النيابة حولتهم للمحكمه ورغم ان كريم اتظلم في البداية ولكن هو قرر ياخد حقه بايده ومن قتل يقتل ولو بعد حين
اتحكم على الاتنين بالاعدام واتحكم على فوزية كمان نفس الحكم لانه قتل مع سبق الاصرار والترصد واتقفلت قضيه كنا فاكرين ان القاتل فيها من بره العيله دي كلها كنا فاكرين انه قاتل متسلسل
وصدق اللي قال الطمع قل ما جمع.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
