رواية خطايا واجتثاث الفصل الخمسون بقلم نور البصري
رغم أننا نؤمن بان العقل أكثر صوابآ
ألا أنه يصعب علينا التخلي عن أشياء أختارتها قلوبنا
ـــــــــــــــــــــــــــــــــــــــــــــــــــــــــ
مــاجد...
فتحت باب المخزن.. و دخلت بإيدي سطل مي.. مجرش مثلج مديت إيدي وشغلت الضوة من كد ما ثولة حتى ما فكرت تشغله و بقت هاي الأيام عايشة بالظلام ظليت واكف أباوعلها بغضب
صارلي أسبوع من يوم اللي شمرتها هنا و شردت مشايفها محتار شتصرف وياها أتركها تروح لو أبقيها بالإقامة الجبرية وجلب إنتباهي من طريقة دخولي للمكان العاصف كزوبعة غضب وسرعة خطواتي فززتها لجأت لزاوية المخزن تلملمت ببعضها وهي ترجف ورفعت إيديها تصدني وصرخت بأعلى صوتها:
ــ خليني أطلع و أروح حتى بنتي ما أطالبك بيها أرجع أختفي متشوفني بعد.
ظلت ملتصقة بزاوية المكان وبيدها تجر البردة ناحيتها وتختل عني ظليت مصدوم مستحيل اللي دأشوفه تمثيل
وگع السطل من إيدي وتناثر جريش الثلج على الأرض.. رجعت لورى عفت الباب مفتوح وطلعت لگيت نـصار.. يم باب المخزن.. واگف ومتردد.
_ سمعت صياح و.. و..
رفعت إيدي علامة أسكت:
ــ اللي جوة مستحيل تكون مـاجدة.. المليانة حياة ولك نـصار مدأفهم عبالك شايفتلها شيطان يريد ينهش بيها ما شفتها شلون أنهارت.
مسحت وجهي بتوتر ونـصار گال:
ــ أتصل بأم هبة.. خلي أبني فارس يجيبها.
ــ وين مفزع المرة و أبنك بهيج وقت بعده مراهق وبطل تعلمه يسوق.
ــ أوصي يجيبها بتكسي.
باوعتله بتردد:
_ لا.. يمعود عوف المرة وين تسوحلها بهالليل أنت أكثر واحد تعرف قصتي مرة خذلتني و خانت هي سبب دمار عائلتي بس الشفته جوة مو طبيعي شنو التعرضتله حتى توصل لمرحلة الفوبيا وسبق گوتلك مبتورة إصبع و الحجي الوصلني إنها متعرضة لتعذيب
رد علية برد ما قنعني:
ــ البعث يعذبون اليقاومهم.. وحتى لو جانت بنته تلگى الأب بنفسه متفنن بتعذيب بنته.
_ مو مقنع بس گول وگعت بيد حزبي سادي يتلذذ بتعذيبها بطريقة بشعة هو هذا مصير كل خاينة وكل هذا الصار بيها هو حوبة أهلي وخواتي.
ــ مـاجد. حكم عقلك أم هبة دوم تگول مستحيل مـاجدة تسوي كل هذا بقصد منها يجوز تهددت رغم سابقاً أم هبة تعذرت من مـاجدة.. من إجت تعرف وقتها النظام شلون جان أكيد مراقب كل خطواتها.. و جانت خايفة لا دازين مـاجدة.. تتجسس من خلالها عليك وعلى باقي الشلة من جماعتنا خاصة بعد أعتقالي وقتها آني أنحكمت إعدام بس الحمد لله صار السقوط ما تنفذ الحكم.
_ آني بس أريد أعرف مصير رحـمة.. بلة ذكن ثلاثتهن هن وعوائلهن أنعدموا ومصيرهن معروف ودنثوبلهم ونبجي فراكهم بس رحـمة.. وين ولك حتخبل رحـمة.. آخ خوية وينج؟!
نزلت دموعي سنين ما اگدر أنسى أختي جرح بگلبي:
ــ مـاجد أنت رجل دولة ترى هاي بس يوصل بلاغ من سفارتها بإختفاءها تتدخل جهات وأول شخص يشكون بي هو أنت شلك بهاي الطلابة خوية.
_ ترى مرتي صار أسبوع أتصل برجال دين وشيوخ و أسأل الكل گالوا الطلاق باطل وآني حتى أرضي ضميري راح أرجع أعقد عليها تريدني أعوفها بعد ما لگيتها أكيد لا.. راح تنحصر وبأسلوبي الأمني راح تخضع وتعترف بكل شي.
_ أنت تدور حجج بصراحة أنت دومك من ننجمع هنا تصفن وكم مرة تفلت منك كلمة شايفين واحد يحن لعدوه أنت حنيت وأشتاقيت لذيج العيون ها تنكر.. كم مرة تطفر منك هيج عبارات ومنشوراتك بالانستا وبكل مكان كولها خواطر غزل مال واحد مهموم.
بساع كوتله:
_ ولك شحن دأنشر مجرد عبارات أنت تعرف هوايتي هاي آني عشت عمري كوله بس شغل وتعب و هسة مرتاح بحياتي ليش ما أنزل غزل مو شرط المكتوب لامرأة معينة.
ضحك نـصار.. وگال:
ــ كابر.. كابر اليعشك ينجرح بس ما يكره.
ــ أنت بطران نـصار والنبي أنت بطران ولك شلون ما أكرهها ورحـمة مفقودة وما أعرف شجرالها بيد البعث لو أمي لو أبوي لو خواتي الأنعدمن ولك يزن أبن أختي المتعلق بيه وجنت حيل أحبه ولك طفل عمره 5 سنين.. لگيته وي عوائل خواتي بالمقابر الجماعية گلبي هنا ماااااااات بسبب مـاجدة.. وصعب أحيييه إلا بمعجزة براءتها.. بس حتى لو تبرأت يبقى ذنبها أبوها لـؤي.. اللي جان السبب بدمار أهلي.
_ وليش الأبن يورث ذنب أبوه؟ هاي في حال لو طلعت هي بريئة من التهم.
ــ نـصار.. شتحجي ولك آني أستنكف طـيف.. بنتي جدها لـؤي.. يعني خلي نفسك بموقفي خلي أي واحد يصير بمكاني.. يتقبل؟!
ــ والله حقك وما ألومك بس بعد ليش تذنب حسب مسولفت البنية عدها قلب وصرع فيا خوي الضربة منك يجوز تنهيها وتظل تلوم بروحك طول العمر لو طلعت بريئة قبل جنا طايشين والعقل قافل و أتهمناها وشكينا بيها بس والله وحيدة.. دوم جانت تگول ماجدة فطيرة ومتعرفوها گدي مو جنت أجرها لطريق التسخت تلگى أبوها جرها بذكاء لدروبه وخباثته.
_ الله أعلم يا ريت تطلع بريئة ينصار حتى أرتاح من جانب.
ــ رجعها بعقد جديد أفضل من هذا التشكك بالطلاق ها باطل ها لا مو باطل ولم بنتك بأمها وأخذها مني من وصف الحارس المجرم لويش؟! يعذب وهو موافقهم بالبغي والجرائم أسمع منها يا مـاجد.. لأول مرة بحياتك اگعود واسمعها.
ــ تدري خلال هاي السنين تندمت من دزتلي رسالة أخذتها وشگگتها گبال شباكها أويلي.. لو بس فاتحها يمكن جان فهمت هواي أمور واختصرت كل هالمعاناة..
_ جنت طايش متسرع مجنت بحكمة اليوم.. العسكرية ومحاربة الإره،اب و داع11 هواي فادتنا ونضجنا يخوي وكم سنة انقلت لنفس وزارة الداخلية بس رحت لمكافحة الإجرام معاملتك وي القضايا والتكتيك و هواي أمور أكيد زرعت بداخلك الفطنة والقدرة على كشف أي جريمة!.
هزيت راسي :
ــ إي و حسيت أكو سر مضموم علية من يوم الإجت مـاجدة وهالسر بداخل بيتي.
_ شلون؟!
ــ لا.. هيج ماكو شي.
أبتسمت بمرارة ونصار.. باوعلي وكمل كلامه:
ــ بعدها تناشغ وتبجي.. ولك صياحها يوجع الگلب هاي مـاجدة.. العرفناها هيج صارت روح شوف مرتك يخوي هدأها وربك يحل قضيتكم.
هزيت راسي بالرفض:
ــ شعلية بيها البينا إنتهى آني بقيتها لخاطر البنت وهم لأن عندي حساب وياها وقضية لازم تنتهي وإلا من زمان طردتها.
_ بـراحتك..
مرت لحظات وصار هدوء.. حتى نصار إنتبه باوعلي وگال:
ــ صار هدوء ومرتك مالها صوت بس لا تخربطت گلت عندها صرع و قلب بس أنت شعليك يلة بلكت تموت ترتاح وتنتهي قضية الثأر بعدالة الله.
كلامه وترني و همست:
ــ روح أنت للولد.. لحظة وجاي وراك.
رحت بقلق بدون ما أحس بتصرفي..
و ردة فعلي اللهفة والخوف أخذوني وسبقوا خطواتي و ضحكة نصار وراي:
_ مو شعليك وين رايح لعد هههههههه يلة روح الله يهديك.
رجعت دخلت لگيتها متمددة عالگاع ترجف وتهمس بصوت مبحوح:
ــ يارب موتني.. تعبت بحياتي يارب أخذني يارب آني مكفلتك قضيتي ونفسي وأنت نجيتني بمعجزتك لأن وثقت بيك متعوفني هسة هم لا تعوفني وخلصني من سجني هذا.
گعدت عالگاع بصفها أنتبهتلي وزحفت لورى بخوف:
ــ أششش.. هدوء لا تخافين حقج تخافين لو بسنة 2003 أو بعدها بكم سنة بس حالياً الثأر صار ياخذ منحى مو دموي منحى نفسي.
وسعت عيونها بصدمة:
ــ خليني أروح فدوة..
ــ تذكرين الهرة اللگيتها مرة وأخذتها ليم بناية العمادة.
صفنت بوجهي وهزت رأسها بـ إي.
أبتسمت : هسة تذكرتها جانت هريرة تنوص وتبجي على أمها وعيونها مميزة مثل عيونج تتراجف خوف بين إيدي مثلج هسة من يومها آني شبهتها بيج حتى سميتها جيجي.
رفعت رأسها وباوعتلي بعيون محتارة متثق شنو وراي من هذا الحجي حتى آني نفسي ما أعرف ليش حجيت بس من شفت عيونها الواسعة ملونة وهي ترجف خوف تذكرت هذيج الهرة الصغيرة.
فجأة.. أنطفى الضوة صرخت بخوف:
ــ لااااا ما أحب الظلمة لاااا عفية أطلع.
همست: أشش أهدئي أنطفت الكهرباء الوطنية هسة الحارس يشغل المولد الديزل.
طلعت نقالي من جيبي وشغلت فلاش وجهت الضوة بعيونها ظلت ترمش لأن ضوء نقالي قوي بس نسيت نفسي من جديد وضعت وآني أركز بهاي العيون الحبيتها لأجلهن جريت نفس طويل ونفخته باتجاه عيونها لأن أكو خصلة شعر وكيحة وگعت عليهن و رجعت الخصلة هم وكعت هي مدت إيدها ورفعت الخصلة لفوك ودنگت رأسها وهمست بقهر:
_ رفعي راسج.. جيجي.
رفعت رأسها وهي تباوع باتجاهي بحيرة من تقلبات مزاجي وأسلوبي وياها ظليت مركز ضوة الفلاش على وجهها أزعجها بي گالت بنبرة تعبانة:
ــ مـاجد.. عيوني..
نترت بيها :
ــ مـاجد؟ ما أريد أسمع أسمي بلسانج تجرحيني هواي...
مــــــــ♡ـــــــاجدة...
حيرني شيريد لا هو قاتلني ومخلصني ولا هو اللي تاركني أروح.. بلعت ريگي بخوف من بروده النوب يوجه ضوة نقاله باتجاه عيوني وبس أغمض ينتر بية وهسة هم سواها.. فزيت من نترته وهو يصيح:
ــ ممنوع تغمضين.
أسلوبه عسكري عبالك متهم ودينفذ بيه طرق نفسية للتعذيب حتى يعترف
ــ ما أگدر والله.. رأسي وجعني.
ــ لا.. أبقي باوعي لفلاش النقال.
باوعت وهو قرب النقال على عيوني أكثر وظل يتفحص بيهن عود ليش هاي شيسموها.
همس : عيونج آاااخ.
ما فهمت شنو هالخبالات هاي.. هسة عماني بالفلاش ويصيح يتحسر على عيوني.
ــ تريد تعميهن وترتاح.
أبتسم بقهر وگال:
ــ لا.. ذني ممنوع ينعمن خاصة عيونج.
نزل الفلاش عن عيوني.
مــــــــــ♡ــــــــاجد
نزلت الفلاش عن عيونها باتجاه شفايفها والحسرة والشوق إلهن جان لحظة ضعف مني خلتني أتفحص هاي الملامح معقولة غيري گدر يوصل إلهن نزلت لايت النقال لرقبتها هم أحد باس هذا المرمر الجانت ملكي وحدي هم أحد غيري شم عطرها منا نزلت الضوة لجوة الرقبة وآني أتأمل بقهر مفاتنها بيوم من الأيام.. جانت أنوثة مليانة وهسة صايرة نحيلة.. عبالك جسم مراهقة توه يبرز.
إجت الكهرباء واشتغل الضوة واللحظة أنتهت و أنتهت وياها لحظة ضعفي وگفت على طولي وگلتلها :
ــ معلومة.. ترى الطلاق باطل.
وحچيتلها كولشي.
ــ بس أنت إجيت و شگگت الرسالة نكرت حبي و نكرت كولشي حتى ما قريت رسالتي إلك اللي بيها معاناتي وطريق هربك لو الگلادة.. ميثاق عهدنا وحبنا اللي كسرته من رديتلي المحبس والگلادة أخذتها مني.. هنا أعتبر طالق منك.
ــ هذا مو شي شرعي وتفتين بي الطلاق باطل أختاري تريدين بنتج نعقد من جديد منعاً للتشكك بس خليها معلومة ببالج ما أردج لأجل طيف أردج لخاطر البنت ما تريدين لازم أطلقج طلاق صحيح وبالمحكمة.
ردت بحدة :
ــ لا.. أو نتطلق وبنتي تريدني تجيني تزورني أو تعيش يمي.
ضحكت : لعبي غيرها جاية من هناك لهنا تريدين تقشمرين بنتي.. وتسحبيها لبلدج طـيف.. مو بغباءج و تتبعتج طـيف.. تميز بين الصح والغلط تربت صح.. عكسج.
ــ أنجب آني بابا سـهيل.. رباني أحسن
تربية.
أستفزيتها منا ورايح آني إلج وأطلع منج الحجي بالطيب أو بالقوة:
ــ مـبين هواي مترباية :
رفعت إيدها تتجاسر تضربني.. لويت إيدها دأضربها بنفس الحركة حضنتني وضمت وجهها بصدري خرب شگد أشتاقيت لحركتها من أعصب و بنتها ورثت هالطبع منها.
رجفة أخذتني.. لبعيد لأيام زواجنا لخجلها الفطري وخرتها عني بنترة وأبتعدت وكأنما تكهربت من مر طيف رحمة بعيوني الحاجز اللي بيني وبينها هو رحمة وأهلي و خواتي الانعدمن
صحت بيها :
ــ هاي وي البعثية تغويهم مو وياي آني لاعبة الدنيا طبولها على رأسي مو ذاك الساذج اللي بإسم الحب قشمرتي.
ــ لا تنسى.. أذكرك أنت السعيتلي وآني حذرتك بس مسمعت مني لا قشمرتك ولا شي أنت اللي ردت تتزوجني
حجتها وهي تباوعلي بخوف تنتظر رد فعلي على كلامها:
ــ هسة ردج طلاق بس خليها بعقلج طلاق بس طـيف.. ماكو تنسيها تولين لبلدج وترجعين لقبرج الوهمي.
صفنت بوجهي وكابرت وهي تگول:
ــ تمام لأجل بنتي.. طبعاً ومو لعيونك فلا تجي تالي وكت وتدور حقوقك كزوج.
بإستهزاء وعناد خليت إيدي على صدري وهمست:
ــ هه.. منو يدور حقوق آني ههههههه ومن منو منج أنتِ هه دگولي مشتهية رجال لازم خلصوا زلم بلدج البديل بعد ما خلصوا البعثية يا ساقطة.
وسعت عيونها بغضب ورفعت إيدها وضربتني راشدي وهي تصيح:
ــ تنجب وتاكل تبن آني أشرف منك.
أبتسمت لرد فعلها و درت أريد أطلع وگلتلها :
ــ نشوف ماجي.. نشوف وين تصفى وياج يا جيجي.
طلعت لجماعتي و عفت الباب مفتوح متگدر تهرب الفيلا كولها مأمنة مطوقة زائد هي أصلاً تخاف من الكلاب وآني كلابي مدربة تحرس كل مداخل الفيلا طول الليل لگيت الشباب يرتبون العشا و خلال الگعدة أنفتح موضوع أيام الجامعة وسوالف العشك والذكريات بالجامعة.
ــ أجيالنا أوفياء يالربع.. مو مثل جيل هسة طعطوعي عشك الموبايلات قبل جنه وين وجيل هسة وين.. هسة يدور نقطة ضعف بالبنت.. حتى يتقرب إلها وتالي يعوفها تواجه مصيرها لو تروح بـغسل عار لو إذا أهلها فري وسبورت يلفلفون السالفة ويزوجوها لأبن العم.
ــ قبل جنه نخاف نمشي وي الحبيبة لا تجيها حجاية أو تتأذى سمعتها قبل الحب يعني خطوبة وزواج جنه نكمل دراستنا وإحنا متزوجين.
ظليت أستمع لنقاشهم وآني ساكت كل تفكيري يم سجينتي ركزت بكلام نصار وهو يجاوب جلال:
ــ جلال.. أختلف وياك بالرأي بكل جيل ترى أكو الملعب وأكو الشريف اليعشك صدوك وغايته شريفة مـاجد مد إيدك وآكل شبيك مصفن.
أنتبهت لنفسي ومديت إيدي أريد آكل بس عيني غافلتني وأجت على الشباك الضوة جان مشتعل والبردة مطبوكه.
طلعت موبايلي أتصلت ببيت الحارس:
ــ هلا حجي لا ممحتاج شي بس ردت أسألك علمود أم طـيف.. تعشت؟
ــ سيدي متاكل صارلها أسبوع نودي الأكل يرجع مثل ما هو تاكل خاشوگة خاشوگتين وترجعه بس آني أگولك العصاري ندزلها كيك وكعك وية جاي تاكله.
ــ وهذا شيفيد؟ يلة خوش آني راح أهتم بتغذيتها.
سديت الخط وربعي المصانين يباوعون علية وفجأة أنفتحوا بالضحك وحازم گال وهو يغمزلي:
ــ يالربع هذا مو جان سنين كلما نلتقي بكعداتنا لو بسفرة تخييم يهدد ودمه يفور ومهضوم بس توگع بيدي أنحرها الثأر ولا العار.
سكتت ما جاوبتهم ميفهموني داخلي مشتت من شفتها ما أعرف حسيتها مسكينة بلا حول ولا قوة بس نـصار جان ذكي:
ــ الرجال مرة تخليه يهدأ ومرة تحفزه هسة الظاهر ماكو وراه ناس توزه فبدأ يراجع عقله ويحسبها صح.
خزرته وگلت بحدة:
ــ شنو قصدك دنجب يلة.
ضحك:
ــ فكر باللي تناقشنا بي لا تندفع ورى الغضب أنت رجل أمن.. ولازم تكون تكتيكي بكل خطواتك.
سكتت وباوعت لساعتي:
ــ عمروا نرگيله ما أشتهي العشا.
ظليت أأركل و عيوني عالشباك اللي بيني وبينه مسافة عشرين متر.. يعني الرؤية واضحة و شوي أنزاحت البردة لمحتها ولمحتني خزرتها بساع رجعت البردة و سدتها.
_ أكول بس لا ناوين تباتون هنا ترى صارت ساعة بالعشرة.
ضحكوا وحازم غمزلي وگال:
ــ شنو السالفة ناوي تعرس.
ــ كافي حازم.. لحيت هواي ترى
ــ هسة أخابر أخوي ينقذك جنك تريد هههههه.
وما كمل وهذا سواها صدوك :
ــ مـاجدة.. بيتنا قريب من مزرعتك ثواني و يمك أخوي الشيخ.
ــ مخيرها طلاق وتروح و ماكو طـيف أو طـيف.. و تعيد العقد بس لا مو اليوم لا تلحون عوفوها هسة تفكر بشروطي.
ضحك حازم و غمزلي:
ــ ولك أضرب الحديد وهو حامي مو تريدها تعترف النسوان عاطفيات أخذ منها الحجي وهي بين إيديك.
رفعت نظري للشباك:
ــ محتار.. أنتوا ما شفتوها من دخلت عليها فجأة وبدون تمهيد شصار بيها من فوبيا مبين متعنفة وبشدة.
حسيت بقهر معقولة أكون ظلمتها كل هاي السنين أتذكر آخر لقاء جان كارثي بينا رادتني أسمعها بس آني ما أنطيتها مجال زين رحـمة معقولة تكذب علية ونظرات فضائل الخايفة والمترددة من رجعت مـاجدة.. وهي كولش متوترة وتتعذر تخاف تاخذ طـيف.. رغم هي تدري طـيف مستحيل مـاجدة.. تگدر تستولي عليها لأن القانون وياي بس أطرح ماضي لؤي وعندي تقارير شلون أستلمت طـيف مكسرة وراسها ينزف لو ما فضائل تتلاحكلها بالمستشفيات جان ماتت بنتي وآني بالغربة و مدري.
شوي ورادوا يرحون بس حازم:
_ أخوي رمش واصل ترى لهنا وعنده إجازة يعني العقد ماله هو يصدقة بالمحكمة.
ــ أنت تحجي صدوك ولك فزعت الزلمة بالليل.
ــ هذا أفضل حل.. ترى باجر تجيك سمعة ومرة ببيتك وشنو بصفتها.
ــ مرتي مبايك ولا ناهب من أحد آني أصلاً ما طلقتها وإذا أريد أعقد عليها بس خاف يدخل الشك بداخلي بصحة الطلاق القديم.
ــ مـاجد.. أنت ناوي تبقيها يمك لو تعوفها تروح.
جريت نفس طويل وحسرة طلعت من غربيل گلبي:
ــ أبـقيها أعـوفها ما أعـرف.. حسب الحقيقة بس هم يبقى أبوها هو سبب إعدام خواتي وسبب أختفاء أختي وموت أهلي شلون أتقبلها ببيتي هاي هم صعبة.
_ فكر ببنتك أنت تگول تعلقت بيها من أول يوم شافتها مـاجد.. لا تحمل المرة ذنب أهلها ترى حسب وصفك وحالتها هسة هي ضحية مثلك لسوداوية وظلم أبوها.
نصار : آني مستغرب من الحالة اللگينا بيها لـؤي مرمي ومعدوم برأسه وبگلبه وعائلته كولهم معدومين إلا مـاجدة.. شلون طلعت؟ يا ترى منو اللي ساعدها تهرب من البيت.. بذاك اليوم و كولنا لحكناها من الشباك وبعدين عالسطح جانت موجودة بيومها.
ــ هو هذا السؤال اللي ردته يوم رحنا لبيت سـؤود.. تتذكرون سـؤود؟
رد نصار :
ــ ذكرني بيها.. منو هاي سـؤود.
ــ ولك هاي أم خشم اليابس.. اللازگة
بالأسود الضربت مهيمن بوري معدل من صارحها.. رزلته وگالتله متزوجة.
ــ هااا سـؤود أم كفشة قصدك هههههه هاي أم شعر سيم المواعين السمرة الحليوة.
ــ إي.. هي جانت وي مـاجدة.. من طفولتهن.
باوعت لمهيمن اللي فك آذاناته من جبنا سيرتها شاكسته وغمزتله:
ــ بالمناسبة.. إجتني هادة علية وين مـاجدة.. ههههههه نسيت أگولها مهيمن يسلم عليج.
مهيمن : أكلوا تبن شفهمكم بالجمال السومري أنتم تدورون شقراوات ملونات رب الفهاوة ذني آني آااخ أموت على السمر جمال وجاذبية وأناقة وجسم أنطيني سمرة مو جسمها أنثوي ومشاعرها تلهب لهب.
نـصار : عبالي أعترضت لأن ذكرك بالبوري اللي أكلته بالجامعة ودترزله و تكوله تزوجنا وخلفنا والماضي راح.
وصل الشيخ وانحطيت بموقف محرج الشباب سولفوله قضيتي باوعلي الشيخ وگال:
ــ الطلاق بي شروط شرعية وبما إنها ما تنفذت فالطلاق باطل.
حازم : شيخي.. ميخالف بعد مـاجد وسواسي بهالسالفة أنت أعقدله من جديد.
الشيخ التفت وهز رأسه بابتسامة:
ــ وينها العروس.
ضحكوا على كلمة عروس أنحرجت
و أنحطيت تحت الأمر الواقع ربعي دومهم مفشليني گمت من مكاني:
ــ لحظة شيخنا.. أسويلك طريق.
رحتلها لگيتها كاعدة بيدها فيونكة حمرة عيونها تبجي ومؤرمات ومبينه دتأخذ قرار طلاق و رحيل أبدي لو البقاء و تتحمل نحاستي و انتقامي حسب نظرها:
ــ الشيخ برى ينتظر شگوله طلاق لو عقد؟!
فتحت حلگها رادت تحجي بس سكتت
مــــــــــــــــــــــــــــاجدة
كل شوي أراقبهم من الشباك گعدتهم مو بعيدة عن المسبح القريب من جهة المخازن حتى ريحة معسل نراگيلهم دتوصلني كولش جوعانة لأن آني أصلاً قليلة الأكل ومعدتي متعودة على هذا النمط بإيدي فيونكة بنتي.. ونستلة وعصير بباكيتات صغار خلتهن أم صبا بجنطتي قبل لا أجي طلعت النستلة وعصير وضميت الباقي دأكل وفجأة سمعت صوت خطوات أقدام قريبة أستحيت وبساع رجعت النستلة و العصير بالجنطة ولزمت قرديلة بنتي حيل وآني أرجف خفت ما أعرف هذا شناويلي صرت بس أشوفه يتخيلي تعنيف لـؤي من جديد هذا كارهني و يريد ثأره مني دخل وسألني سؤال وجاوبته بتردد.
_ يعني جنت تحجي بجدية مناوي تذبحني.
باوعلي بغضب :
ــ لويش أبتلي بدمج.. وأخسر مهنتي اللي تعبت بيها علمود ثأر أگدر آخذه بطرق أخرى زين.. أنتِ ليش متأكدة إني أريد أذبحج أنتِ.. مسوية ذنب؟ وخايفة منه أقترحت عليج وخيرتج بين إما طلاق أو رجوع بالطلاق طـيف للموت متشوفينها بعد وبالرجوع تعيشين يمها عند فضائل.. جنت ناوي أنطيج أسبوع.. كامل تفكرين بس ميحتاج نأجل فقرري هسة الشيخ برى ينتظر شگوله؟
باوعت للقرديلة بإيدي بلهفة ودموعي نزلت حتى ما لحگت أتعرف على بنتي ما لحگت أحضنها وأبين لهفتي وحبي جنت مريضة..وانصدمت من شفتهم شلون مخربين تربيتها ومسوين لسانها باشط وطويل هنا إذا أبتعد راح تنتصر فضائل الباگت بنتي مني وساعتها راح أخسرها للأبد وآني.. ردت روحي من عرفت بيها بعدها عايشة.. لا أبد ما أعوفها لفضائل.. آني أم.. وراح أتحمل كولشي لخاطرها.. وهو أصلاً متزوج وماله علاقة بية مجرد عقد على الورق حتى أگدر أعيش ببيته وأكون قريبة من بنتي.
ــ آني أريد بنتي ما رجعت لهذا البلد إلا لأجلها وإلا كولشي مات بحياتي حتى الأمل مات آني أنخذلت هواي عافوني أهلي أمي وإخواني وسط الطاغوت وعافني رجلي أقاوم.. وحدي و دفعت الثمن غالي حتى أطلع سالمة بشرفي وكرامتي بس بالمقابل خسرت صحتي و....
باوعت لإصبعي بجيت :
ــ عموماً.. زمن التبرير إنتهى آني سبق كتبتلك كولشي برسالة وحتى ما كلفت نفسك تقراها ولا من إجيت.. تسمعني تنطيني مجال أدافع عن نفسي عفتني وآني بأشد الحاجة إلك ومشيت ورى تهمك وشكك وجبروتك وخذلتني فبعد خلاص أنت بالنسبة إلي أنتهيت.. وإذا رجعت لأجل ألم شملي ببنتي ما أريد بيوم إذا أنكتبلي أموت.. أموت وحيدة
كول للشيخ رجوع لأجل لم الشمل.
خلاني وطلع بلا كلام شوي و إجت أم صبا أنطتني نفس محرم الصلاة اللي أستعمله ببيتهم من أصلي صلواتي الخمس الواجبة لبسته وأنطتني قرآن
دخل يجيك الوضع باوع لأم صبا:
_ أحسنت.. هو التفرع نمونه.
بوووووم بسماااار بلعته وآني الممنونة المهم عندي ألتقي ببنتي مرة ثانية.
ــ لمي رجليج عدل أو أگولج تعالي وراي.. يلة.
أشر بإيده بأمر وعيونه تخوزر مشيت وراه و حاجيته بگلبي:
المن تخوزر هااا؟ بس دار وجهه وزمخ بيه وهو يجر الكلمة حيل وبعصبية:
ــ نعــــــــــــــــــــــم؟!
رديت عليه وآني مستعارة شوية من شجاعة وقوة سـؤود:
ــ منو يمك؟!
هز إيده وهو يدردم :
ــ عقل لو قندرة نايم برأسج حاشا نعمة الله بحياتي ما شايف ثولة مثلج.
و هم رديت عليه :
ــ مدام ثولة جان ما صدكت هاي الثولة تگدر تجرم وتخون.
وگف بمكانه و ردت أندعم بيه وأدخل فيت بظهره لزمت بريك ورجعت لورى و دار علية بسرعة رجعت خفت من رد فعله ركضت أريد أرجع للمخزن بس ما حسيت إلا أنجريت حيل من المحرم تعثرت دأوكع رجعت أم صبا مستغربة الوضع السيد الرائد الموقر جارني من المحرم وآني وگفتي صايره مايلة بس يتركني أوگع على وجهي.
هو إنتبه وهدني تگومت بالگاع وأجت ضربة بكتفي بحافة حادة بحايط المخزن ظليت أبجي وأم صبا كومتني:
ــ سيدي.. رحت عدلت الصالة اللي برى بالفيلا.
ــ تمام الشيخ والشهود بلغتوهم يدخلون هناك؟
ــ إي نعم سيدي بلغهم أبو صبا وهسة ديتوجهون..
مشى وتبعته أمشي وراه وهو معنتر علية بس آني كل فكري بنتي طـيف.. كل خطوة أخطيها تاخذني وتقربني التقي ببنتي والله أعوف كولشي بس لأجل طـيف.. دخلت وراه للصالة وأول ما شافونا وگفوا ودنگوا رؤوسهم بگلبي كولتلهم منين الأدب شلة العفطية مال جامعة كولهم.. ملتمين عرفتهم بس نـصار.. مو كالو أنعدم مممم.. والله هاي الدنيا أشكال راوتنه.
_ شلونج خوية أم طـيف.
سلموا و رديت ودرت وجهي عدا نصار أحترمه البقية جانو قبل نعتبرهم شلة السرسرية لأن من جان ماجد يبسمرني و يزحفلي أيام قبل لا ننخطب هم يتمضحكون يصوفرون فمنها كرهتهم.
كعد على القنفة يم الشيخ وأشرلي بصفة:
_ گعدي هنا.
شنو هذا صاير بس ينطي أوامر عبالك آني عسكري عنده.. ورى ما تم العقد ترخصوا ربعه راحوا كولهم وي الشيخ هو باوعلي وكال :
_ وراي.
تبعته باوع الي:
_ جـنطة كتفج؟
_ ها إي بس كول.. وين توديني ما ترجعني للمخزن.
_ شنو سالفتج وي المخزن؟
سكتت وما جاوبته.. هو عافني وراح جاب الجنطة وشمرها علية نزعت المحرم هدية أم صبا كالت خليه الج فال خير أن شاء الله خليته بجنطتي باوعلي وسكت ما حجى ولا أعترض رغم سابقاً بذمته تحجبت بس من اليوم اللي أنجر بي حجابي ما رجعت لبسته يمكن بداخلي ما جنت راغبة أتحجب و مشت بية حياة الخارج وتأقلمت مشى لسيارته وركب وفتح الباب اللي يمه وصعدت گعدت بصفه.
_ ما سلمت على أم صبا وأبو صبا وتشكرتهم أهتمامهم بية.
_ ما يحتاج
سكتت بس داخلي مخليت شتيمة ما شتمته ياها شلون حقير وكلب ونذل
بس شفايفي تتحرك بس زين سيطرت محجيت والله لو يسمعني على الشتم جان خلاني جوة تايراته ورايح راجع.. يسويني مسفوطة بالاسفلت أنتبهت أخذ فرع لمركز المدينة وراه فلكة ولمنطقة شعبية شفت بيوتها تطورت و سيارات أخر موديل بس هم أكو ناس على حالها بيتهم القديم على وضعة بس مرممه الظاهر صبغ وسوالف مرمر سقف ثانوي هالإضافات
_ شعجب ما هديت البيت وبنيته مثل باقي بيوت منطقتكم متطورة.
_ مـعليج.
بووووم صوجي أسأله عشتو دطير
سكتت وبلعت الفشلة وظليت أباوع من الجامة سألني:
_ شربتي علاج تعشيتي؟
ردت أكوله معليك بس لا آني أخلاقي مو مثله عشتووو آني ما اتجاهل ولا أفشل الواحد.
_ إي...
_ كذابة أنتِ.. حتى الهوا اللي تتنفسيه يوصلي تنفستي متبطلين كذب شلون تريديني أثق بوحدة كذابة ومجرمة وخاينة.
أهووو رجعنا للموال شعنده حسام الرسام يجر مواويل يمي عاد وصلنا خابر وفتح مايك:
_ بابا طيوفه.. فتحي الباب.
_ شعجب بابا ما سهرت للفجر بلمتكم وتمتوعتكم أنت وجماعتك.
ــ مالي خلك بابا.. شوي تعبان يلة طيوفتي فتحي الباب.
شوي و أنفتح الباب كال نزلي.. نزلت بنتي جانت واگفة ورى الباب مطلعت برى لأن جانت بدون حجاب بس تأشر بإيدها.
_ هلا بيج ماما.. تعالي دخلي هاي أحلا مفاجأة مو گوتلج بابا.. ميزعلني ينفذ طلباتي.
باوعت لمـاجد.. المبتسم بحنان لـبنته ومن شافني أباوعله أختفت الإبتسامة خزرني وگال بنبرة حادة:
_ فـوتي..
دخلت وهو سأل طـيف:
_ بابا.. عمتج كاعدة؟
_ إي بابا.. بـغرفتها.
التفت علية وبنتره حاجاني:
ــ خوش.. أنتِ وين داخلة.
ــ غير للبيت لعد وين أروح.
ــ هذا جوة بيت فضائل.. صعدي فوك.
صاحت طـيف:
ــ ياااا.. بابا يعني ماما فوك وآني؟
ــ أنتِ تبقين لعمتج.. عندكم النهار كوله بس الليل جوة يم عمتج.
دمعت عيني.. ولك هاي بنتي واگفلي وگفة أريد آخذها بحضني تقدمت عليها فاتحة إيدي بلهفة ردت بس ألمها لصدري أحظنها بس جرني ليورى ومنعني:
_ يلة.. صعدي فوك أنتِ هنا لأجل طـيف.. و تحت أمره فضائل.. بالج تسوين طلايب.
بلعتها وسكتت.. ولأجل عين تكرم ألف عين كوله لأجل طـيف..
_ آني بس أريد بنتي ترى أنت دتذلني وتهيني من تحرمني آخذها بحضني موو هو هذا الثأر اللي تدور عليه بنتي يمي ومو يمي خاف الله.. بية ترى بية حوبة والله آني أنظلمت هواي لا تصير أنت والزمن والظروف ضدي.
بجيت بحرگة وبنتي بمكانها تراقبني ولج تعاي لأمج ليش واگفة تعاي لحضني.
_ آني صاعد فوك خمس دقائق الج.
خلا وصعد هنا حضنت بنتي بكل قوتي أشمها:
ــ آاخ يمة آاخ ولج آاخ يا سنين الغربة ولج بنتي اآااخ كالتلي متي والله هي أخذتج مني ولؤي الكلب فرقني عنج
صبرت وتحملت كلت يم عمتها باجر عگبة الله يلتفتلي الله ميعوف عبده وآني منتخيه برحمته ولطفه سبحانه تعالى
أخذتها لحضني و جانت أطول مني بهواي ماخذة طول عماتها وضخامتهن أبوها مربوع بس بالنسبة إلي جانت طويلة.
تبچي وتناشغ بحضني:
ــ لا تبجين يمة ولج آني سلمت أمري لله وشردت بذاك الوكت كلت أجيبج ونهرب بس عمتج فضائل گالتلي متي وصلتني ميتة والوقت داهمنا وصعب أرجع وقتها جنت مغيبة عن الدنيا.
وخرت عنها وراويتها إيدي:
_ بيدي أخذت حقج وحق كل مظلوم وغسلت عاري بلؤي مخليت أحد غيري يفنيه.
بصدمة : ماما شنوو ما فهمت.
صوته من فوك جان خاتل يتصنت:
_ تردين تكولين أنتِ قتلتيه.
نزل بساع لزمني هزني:
_ سنين حركتي بداخلي قتلتيه قبل لا أستجوبه وين رحـمة قتلتي الأمل اللي جان عندي حتى أعرف مكان رحـمة أنتِ قتلتيه.
أبجي وهزيت راسي بـ إي:
ــ إي قتلته قتل بنتي وإخواني ومرته.. ولك مجزرة.. سوى بينا من كل عقلك تريده يضل عايش حتى يعترف هذا شيطان مو بشر.
على صوت صياحنا وعياطنا طلعت فضائل مرتبكة وگالت لـماجد:
ــ مـاجد.. شو هاي هنا شديصير؟
ــ وراح تساكنج بنفس البيت..
وسعت عينها والتوتر مبين بـ ملامحها وارتبكت وكالت :
ــ لا عفية.. خليها تروح شنو رجعتها للبيت شعدها هنا.
ــ إي وأنتِ ليش مرتبكة فضائل بهيج موقف متعود عليج تهدين هدة شرسة مو خوف وأرتباك.
ــ ها لا.. ماكو شي براحتكم أنت وبنتك بس لا تنزل يمي صعدها لفوك.
صعدت و طـيف.. ترخصت من عمتها وحتى ما أنطتها مجال ترد ولزمتني تحضني وتبوسني.
ــ اليوم أنام يمج مجودي اليوم ماما الي.
باوعلي ورفع حاجب مستهزأ:
_ كولها الج يومياً مني الج هدية.
ضجت منه وصعدت أباوع المشتمل باقي عالقديم حتى الصبغ نفسه ما مغيرينه عكس بيت فضائل آاخ ذكرياتي أفتر بالبيت بحنين وفتحت الدواليب.. باوعت لـملابسي بعدهن كم قطعة مندزن الي بقت معلگة ومسفطة رمشت بعيني حيل أمنع دمعتي تنزل التفتت لگيته واگف يراقب بحيرة وعيونه عالباب ملامحه مثل الشخص اللي يريد ينزل حتى يحاجي أخته ويفهم منها.
سألني:
_ فضائل بلغتج البنت ماتت.
_ إي.. ومستعدة أحلف بكتاب الله أذا ما تصدكني حلفها وحلفني.
_ يصير خير نامن على الجرباية آني أنام جوة.
ردت طـيف.. وهي تفر شفتها يمين يسار:
ــ و فيروزة.. تبقى وحدها.
_ من أبات برة بالخفارات لو عندي واجب لو أبات يمكم تخابر أخوها يجي يبات يمها ويم سنودي.
_ هاااا زين.. بس راقب القطيع لاتاكله الذيابة.. بابا.
_ أنتِ تكرهيها بس لو أعرف سبب هذا الكره بينكم.
_ ما أطيقها.
_ نامي تعبان وكافي لغوة زايدة وأنتِ كالو ممتعشية طرك الكيكات والنساتل أكلج مو صحي طـيف.. جبت مسواك فرزتيه؟
_ إي بابا أنت جوعان أنزل أسويلك عشا.
_ متعشي الحمد لله بس أريد منج تسوين لهاي شي خفيف وصحي.
مـاجدة : ما اشتهي..
_ طبعاً جنطتج ماليتها نساتل واحد من باكيت العصاير مفتوح و مجفي بالجنطه مخروش طاح بكروش لو من دخلت ضميتيه.
_ أريد أنام بس..
_ ما لازمج خمدي.
طيف : أسم الله
ــ مو كدام البنت عدل أسلوبك.
_ بقيتي بية أسلوب جيجي.
غمضت عيوني لدلع أسمي شحلاته بصوته.
_ بقت ملابسي بيت أم صبا وذني ملابس بناتهم.
_ عادي يولن.
_ جنطة ملابسي بقن يم إنـتصار.. لو تنطيني نقالي أطمن العالم
_ ما يحتاج.
عزة وصخام مستفز.
_ أحس بحر وأريد أسبح.
باوع لطـيف :
_ نزلي يم عمتج لا تنقهر خطية.
_ بس؟
_ الأيام هواي وبالتدريج تتعود عمتج رجوع أمج.
هزت راسها وأجت حضنتني حضنتها شميتها:
_ أبقي يمي طـيف.. مثل زغرج المج بحضني والوليلج.
بس هادم اللذات ومفرق الجماعات مـاجد.. ما قبل فنزلت تتلفت وهي تضحك:
_ أحسب الساعات للصبح يجي راح أعوفها يمك أمانة الله ورسوله.
ضحك أبوها وسكت أمداني و أمده حضي اليوم محترة والجو شتا.
_ شتاكم حار أكدر أسبح.
_ معرسة؟
خجلت يتعمد المستفز:
_ قابل نخيس مو إلا معرسة كبرنا على هذا.
هز إيده وذب فراشه بالكاع وكال :
_ لا تسبحي تتمرضي.
لفت أنتباهي إضافة جديدة حاطين سبلت بمكان المكيّف القديم بس مغطى بتغليف سبالت وكراكيش لاحظت المشتمل نظيف وما مهجور
تمددت وتغطيت ظليت أتگلب بفراشي محترة وهو ذب ملابسة كدامي بقى بس بالشورت خجلت منه الله يطيح حظك الما تستحي دخلي لسنين الفراق بينا شوي خجل.
بطرك الشورت يفتر ويرتبله فراش ينام عليه كمل فراشه ورجع كعد بصفي :
ــ گوعدي شوي أستفهم منج أمور.
كعدت وباوعلي :
_ سولفيلي كولشي ودربالج ذاكرتي قوية ترى سبق گولتي أمور عن رحمة من تهمتج هي عيدي كل الحجي يلة.
حجيتله كولشي ظل مصفن ومحتار :
_ يجي يوم أحلفج بكلام الله.
_ أحلف بس شرط تحلف فضائل أكيد تعرف شي رحـمة جانت مقربة منها بلكت كايلة شي ولو خيط لذا تحلفنا أثنينا والله هو ياخذ حوبة المظلوم والله عالعايل.
سكت ونزل تمدد مكانه يفكر بالقصة الحجيتها اله ومبين مصدوم.
_ أصبعي ثمن منطيت شرفي وعندي هم أوسمة شرف بظهري تريد تشوف.
منين جتني الجرئه عزة دكولة أتعرين وشوفني
يمكن ما سمع ماكو رد فعل همزين
أنطاني ظهره وهو جوة بالكاع وآني رجعت تمددت غمضت عيوني لا يا فاسد أنطيته ظهري ومرت دقايق من الهدوء درت نفسي تجاهه وتگربت لحد حافة الجرباية نايم بالگاع أباوعله أتفحص ملامحه بشوق وحنين تمنيت فراشي بصفه أنام وأحضنه وأگطع ليالي الهجر آااخ حسرة تبعتها حسرة لمن أخذني النعاس وغفيت.
صوت الجامع يأذن فزيت وقت الفجر يمكن هذا الجامع إضافة جديدة للمنطقة قبل أقرب جامع عالمنطقة جان بعد كيلو متر أكثر ظليت كاعدة أرمش أباوع للسقف أستوعب آني وين الجو دافي مو برودة مخزن الحيطان مالؤفة صور زواجي معلكه كبال عيني هنا ركزت هاي أول ليلة الي ببيتي من بعد مرور أكثر من 16 سنة.
نزلت دموعي وحمدت ربي أعرف طريقي صعب أستعيد عائلتي بس الله ما يقصر وي إنسان توكل عليه وكلفه أمره آني أؤمن و أثق بالله ما يعوفني بشدتي وصبرت سنين طويلة.
كمت على كيف لا يفز وخطيت من يمه نايم بالكاع على دوشك مدثر بثلاث بطاطين وآني ميتة حر مو ذاك البرد يمكن أحتاج شهر اتأقلم ببردهم الطبيعي
آني ملتزمه بالصلاة قبل جنت صح أزغلط أو ما أصلي بوقتها بس من بعد نجاتي التجأت لله أكثر عندي بس شغلة الحجاب ما أعرف كلما أنويها أتردد شيطان هنا مسيطر علية أعترف آني غلطانة وما أعرف لويش ما أحب الحجاب.
رحت للحمام اتفحصه بعده على حيطان مربعات صغيرة من الفرفوري البيت عايفة مثل آخر مرة تركته توضيت و لبست المحرم اللي أنطتني ياه أم صبا بس تيهت القبلة أريد أتذكرها بذاكرتي ظليت كاعدة زين هو أدري ملتزم شو مكعد يصلي دخلي أكعده والله كريم كون ما أحصل كتله رحت وكفت يم فراشة أنحنيت أهز بكتفه:
ــ عيني أبو طـيف.. أذن كوم صلي.
فتح عيونه وغمض وهو يهمس:
_ طلعت ميتة واجتني بالمنام شنو الجنة صارت تلفي شياطين.
أستغربت يحجي منعس وشبه نايم شوي فتح عيونه وانتبه كعد :
_ بيش الساعة.
باوع للساعة وفز مستعجل رجع
باوعلي :
_ عبالي بعدج مفقودة وزرتيني بالحلم وأعرف إذا شفت شخص بحلم يعني هذا طـيف لميت هو أستغربت بمحرمج الأبيض وجايتني بحلم كلت شنو الجنة هم واسطات ويطبلها شياطين.
بلعت البسمار موقفي مو مال كل شوي أرادد هزيت راسي بأي وسألته وين القبلة أشر فرشت سجادتي وتوجهت لربي بدموع قهري أشكيله همي مثل ما تعودت بسنين الغرب كملت الواجبة وبقيت كاعدة على المصلاية صافنة بالأثاث غرفة نومي بعدها شعجب ما حركهن وقتل أجمل ذكرى ليالينا وجموح عواطفنا
أبتسمت لذكريات مرت قررت من يروح أعزل ملابس الماضي من كنتوري أصلاً موديلهم أنتهى وهم رجعولي جنطة ملابسي بس معرف ليش محتفظ بكم قطعه
دنكت من رجع من الحمام بطرك الشورت وينشف بشعره.
_ شهالبرد يا الله.
همستله :
ــ الجو طبيعي أصلاً مو بارد.
باوعلي و ما جاوب ولا أهتم بس الغثيث مشتغلني بسامير.
_ ما شاء الله من يمتى الشياطين تصلي.
راددته لأن متت من أسلوبه:
_ شيطان يصلي بذمة وضمير ولا ملاك يذب تهم باطلة على خلق الله.
_ لا بلة.
_ و غلاوتك قابل أكذب عليك.
ردها بوووووم:
_ لا حشاج من الصدوك.
وكفت وآني أفتح كناتير أكيد أكو إله ملابس هنا مبين يجي على فترات لهنا لأن المشتمل نظيف مبيه غبار الهجر والسنين التفتت إله :
_ تروح للدوام؟ لو بيتك شجهزلك.
فير شعره ينشفه وباوعلي :
_ طلعي عسكري إي أروح للدوام بس ما أجي الظهر هنا أروح بيتي.
وكفت كباله:
_ وهذا مو بيتك شكد ما تتهم و تفتر بين معجباتك الطايحات حظ بلا تربية أبقى آني الأصل.
أنطاني نظرة تعجب وهو يبدل جنت خجلانه من يفتر بالشورت وأحاول مباوع بس العيون تزيغ صاير مملي وجسم متناسق كأي عسكري ااخ مشتاقتلك هواي بلكت هيج والله يهديه ويصدك بية بريئة.
رحت للمطبخ ثلاجة مشتغلة بس حديثه مو ثلاجتي العشتار هاي أسمها باسونك أجة للمطبخ:
_ تعرفين تطبخين؟
_ هاااا.
_ طبخ طبخ أكل نزغنب
أبتسمت :
_ أسم الله عليك التزغنب بعدوينك.
_ بطلي لواكة البيني وبينج دم حالياً على الأقل.
يارب أول المطر غيث بده يتشكك يعني ديدور الحقيقة بلكت يصدك بية
_ هو ددور إذا أكو توست لو ريوك جاهز.
هز ايده:
_ صلاوات شو دوخري متشوفين روحج مجلدة شنو بلدج معلمج تقشف لو عجزهم قتلهم مطبخون.
سوى هو جاي و بدة يكلي بيض وطماطة.
_ نزلي صيحي طـيف.. تتريك أوصلها مدرستها أبو الخط أمس أعتذر عنده عطلات فضائل ما تتريك تذكرين من الأول متحب ريوك.
تجاهلت فقرة فضائل ونزلت أدور وين بنتي بيا غرفة بس لكيتها مبدلة مكملة ودتلبس حجابها:
ــ بابا سوالنا ريوك يلة نتريك بنتي.
حضنتها أبوس بيها
_ ما شبعت منج
ضحكت :
ــ أجي من مدرستي وشبعي مني يلة روحي وآني جاية وراج.
وهاي الحياة الجديدة أحس مـاجد.. متربص أكثر من مرة تصير بيني وبين فضائل مشاكل وانقهر بنتي تهد وي عمتها ضدي بنتي مرة كهرباء ماكو وعمتها كلتلها حمي مي عالجولة ودخليلي ياه للحمام نزلت لكيت البنت شايلة معجانة مي فاير صرخت:
_ صخام لا تحتركين لا يوكع عليج.
هي من الصدمة خلت المعجانة عالميز بصف لعابة مشمورة هناك وحسيت المشهد يشبه ذكرى اليمه ظليت الطم أصرخ بنتي جان أحتركت وهديت على فضائل أشوفها لؤي مثله تريد تموت بنتي ونزلت عركة وياها وطلابة ومكافش من الشعر بنتي بدل متوكف وياي دفعتني عن عمتها وصيحت بوجهي:
_ جاية من تالي تآمرين تنهين و تهينين عمتي ما اسمحلج بقائج هنا لخاطري فلا تخليني اتخذ موقف بيج والنبي بعد إذا ضربتي عمتي أكول لبابا هالمرة أفوتها الج.
أعتذرت لأني غلطانة آني هديت عبالي تريد تموت بنتي.
_ أعـتذر.
وصعدت أبجي حسيت بجرح وخسارة بنتي هي باكت بنتي مني بس إحنا بزمن الحرامي يبجل والمظلوم ينداس عليه شوي إجت بنتي تباوع وتتغامز تريد تضحكني درت وجهي لا ولا أنطيج وجه ولي بت عمتج هددتها.
_ بس أبوج يصالحني إلا أحبل ببنية واكسر خشمج أحبها اربيها وتصيرلي بنية وصديقة الله ليعوزني الج.
باستني تعتذر و تضحك:
_ هسة بالأول تصالحوا عود خططي تغوريني ببنتج المستقبلية.
شــــــــــــــــــــــــــــيلان
أستمر بـروان يحاربني برزقي ويبتزني ببنتي.. والديون ما گدرت.. ما أرضخ فكرت بهذا الشي يجوز لصالح بنتي.. رحت لـمكتب عمي سابقاً حالياً مكتبه جان يخابر من دخلت.
_ إن شاء الله نستلم الأرض.. عدنا مهندسين وعدنا خبراء بناء والشغل راح يعجبك إي أوك أفضل العقد يكون بينا قانوني تمام أوك.. نتفق على موعد باجر الظهر إي.. إي صار يلة في أمان الله.
سده وباوعلي يبتسم بخبث :
_ يا هلا بأم الينا.
_ أنت محاجي صاحب المطعم الردت أشتغل بيه يعني بس عرضت الإعلان عليه أجيت أسجل رفضني وگال إحنا ما نشغل حرامية عزة آني حرامية يا بـروان.
ضحك : حب وحرب بيناتنا يا حياتي أهدئي يخسى اليطعن بأمانتج.. بس أنتِ نسيتي سبق وخونتيني وفضحتيني وسلمتوني للشرطة وآني بوقتها زدت الخير خيرين.. من توليت إدارة الأملاك چنت أمين وياكم أشتغل بذمة وضمير جان أكدر أروح لعمامي هم أهل خير وأملاك بس عفتهم كولهم لأجل أثنين عمي وأنتِ بس أنتِ بشنو قابلتيني؟ تزوجت إي بس مو مال تطلعيني منا بهيج تهمة ورغم كل هذا أنتِ رفضتي النفقة فما لگيت حيلة إلا أصيرلج الرجل الخلفي آني خيرتج و أختاري ترجعين معززة مكرمة و مدللة ببيتي.. ملكة وأم لكل أولادي مو بس لـين.. لو.. أنتِ تعرفين الباقي.
غمضت عيني وبجيت :
ــ معقولة تسجني؟
دنك مبتسم:
ــ أنتِ شتعرفين عني شنو گلبج يدليج ويكولج صدكي گلبج دوم شيلانتي.
همست : يكولي مستحيل تسجن أم بنتك.
_ إذن سمعي لگلبج أريد بنتي تتربى ببيت مو مشتت ولا مفكك تتربى وي إخوانها بنص عائلة متكاملة من أب وأم وأولاد أريد أوفر كل هذا لأولادي لذلك أضحي في سبيلهم تگدرين أنتِ هم تتركين أنانيتج وعنادج وتقررين القرار اللي ينفع الأولاد؟
ــ مـوافقة..
حجيتها وبجيت ورجعتله من جديد شفت بي أب وزوج جيد يحاول يكفر ذنبه الماضي خابرت بشرت سـؤدد من أستقرت حياتي وطمنتها بس هي قلقة على مـاجدة.. وأنتقل القلق النا كولنا بمكالمة جماعية سـؤدد و مـريم وآني.
_ زين ما أشتكيتي عليه؟
مريم : شتشتكي النوب تتورط هي وي مخبل أنتِ نسيتي بالجامعة جان خبل يلحگها بكل مكان ويدور واسطات يأخذها والله كولنا خفنا من أندفاعه يتزوج بنت عائلة بعثية بس سواها و أخذها اللي مثله ممكن تردعيه بشكوة الافضل يا سـؤدد مدامج بعدج بالوطن تجيبين والتر.. وآني وعـون.. ونروحله نتعناه يابة يبن الحلال وين صديقتنا يمعود بس طمنا عليها ترى نشتكي يم شسمه هذا أوكفن راسي صدع أگولجن أشوف الحايط مال غرفتي ديعبر نفط
شيلان : نفط؟ سالمين أم بـاهر!
سـؤدد : أهوووو مـريم.. أجتها الحالة طبكن.
مـريم : أنجبن يلة طلع مو نفط عيوني تشوف وحدها.
ضحكت والنبي خطية مـريم :
_ شربي علاج ولج.
سديته منهن و تمددت أراقب أولاده وبنتي يدرسون.
_ العصر نطلع نسوي رجل ثلج شتكولون.
رد أبنه الكبير : هنا أنتم جحيل..
صفنت شنو جحيل جان يحجي عربي طلق و كردي مكسر.
_ شنو جحيل.
صوت بـروان : يقصد صقيع برد يراد تتقوى لغتهم الكورديه صح من خوال عرب هم بس الأصل آني كوردي.
باسني بخدي و آنطاني ورقة :
_ شنو هاي.
ــ ما حنيتي للرجل الخفي..
فتحت الورقة وآني أقرأ و باوعتله مبتسمه كاتب غزل وحبيات :
_ رغم ماانسى بدلتني بمرة بس أحبك والله أحبك.
_ راح دوم تذكريني ولج شنو هذا العناد.
كرص خدي وهمس:
_ شلون أعوضج
_ تحبني حد كطع النفس للموت.
أبتسم وهو يحضني..
مـــــــــــــــــــــــــاجدة
حياتي ببيت ماجد قنبلة مؤقوته على إي ساعة تنفجر مر علية عشرين يوم لمن أجاني مـاجد يغلط يسب بسـؤدد
_ الجلحة تتحداني إذا ما بيتت رجالهم توقيف آني الها أم خشم يابس.
بتردد كوتله :
ــ ليش؟ خليني أتصل أطمنها.
_ أجاني بلاغ شكوة خاطف أجنبية أحدى رعاية الدولة...... و لو ما ذكائي مخلي العقد بجيبي دوم تحسبا لهيج لعب جهال جان سببتلي فضيحة وهزت مكاني كرجل أمني بدلي وعدت العقيد أجيبج وأنتِ كوليلهم مخاطفج.
شاقيته : وإذا كوتلهم خطفني.
باوعلي بجد :
ــ طلقة براسج أفجره وشيصير خلي يصير
خفت منه و كوتله:
ــ تمام جاية بس أبدل الملابس اللي جبتهن أعراض علية واللي بالكنتور موديل تسعينات
رحت لبست المانتو اللي جايبته وياي ومشطت شعري وحطيت طوك وگفت أباوع لوجهي بالمراية مو جني زايدة كم كيلو ضبيت المانتو من يم الخصر مممم جنت غصن اللبان وهسة يمكن دا أسمن إذا هو يهدد بية إذا سمع ما آكل و ملتهية بس كيك ونساتل
نزلت لكيته ينتظر ورحت وياه قدمت أفادتي وبلغوني لازم أبلغ السفارة أنو البلاغ كاذب و بعد ما كملت كولشي كعدت بصفه طلع نقالي من جكمجة السيارة وي هنا مخلي بالسيارة وآني فتشت البيت ماكو واتوسل بطيف.. الخبيثة بس أخابر صاحباتي أطمنهم متقبل والله متخون ثقة بابا الخبيثة على البابا.
_ نقالج وفكيني شركم أنتِ وسـؤدد.. مو مرة هاي لو بيدي سجن مؤبد وزيان صفر آااخ كون الله وتوكع بيدي.
مهتميت مقهور من صاحبتي خلي يولي والله أحب سـؤدد أكثر منك على الأقل جانتلي سند بزمن تخليتم عني أنت وحارث وأمي فتحت نقالي أبد ممحاول يفتحه ولا مهتم بعد أحسن ميفتش نقالات بس وصلت للبيت أنطيته النقال:
_ النت ممكن.؟
باوعلي بطرف عينه ولوى حلگه و أخذ النقال وخلا الرمز وأول ما أنفتح النت بدت تتراكع وتنزل الرسايل والشتائم أحم.. ردت أفلت من گدامه وهو واگف يستمع لصوت المسجات جر النقال من إيدي ودخل على الواتساب يقرأ شتايم سـؤدد.. ومـريم.. ذني الصديقات اللي ضفناهن للگروب من فترة قريبة أما شـيلان.. جانت دازة وينج جيجي بس لا متي والنبي أقتله.. ولچ جيجايتنا و بصمات صوتية مال بجي ظليت واگفة أتحمحم و أبرر.
_ شوف البنات شكد شقاهن ثكيل.
بصمة مـريم : ظال بالنا ولج آااخ كون الزمه الغثيث دوم أكولج بالجامعة هذا والشلة مالته فد تافه و غثيث ملكيتي الا هذا مال أطلع جناني بيه.
باوعتله أبتسم :
_ والله يا مريمة.. طباكات إي يلة مينزعل منها.
باوعلي و غمني و شمر نقال بوجهي:
_ صجيجة عليج وعليهن وينج فضائل
صاح ودخل لبيت أخته وآني صعدت فوك لكيت طـيف.. تطبخ:
_ كملت طبخ تأخرتوا..
_ درسي و عوفي الطبخ نروح مطاعم وناكل.
ضحكت: ماما متعودة بالخارج مطاعم عيني طبخي يرد الروح أعلمج ترى بابا يحب.. آكل بيت حتى لو يأكل آكل مطعم.
صعد تغدى وتمدد:
_ طـيف اليوم أبات يم مرتي.
باوعتله الغيرة نار أكابر ومبينها بس مكدر بعد هنا وكفت مو سولفتله اللي صارلي شو سكت ما حلفنا ولا حجى بالموضوع وخلي يعرف منو أنقذه هم.
_ ما تروح
ــ نعم؟
ــ ماااا.. ترووح طـيف.. كوعدي ماما صحتي تحسنت لازم أخلي نقاط على الحروف أنت تزوجت وعشت وآني متت واحييتك تعرف شلون طلعت من أعدام كل هذا ثمنه آني تعرف أستاذ سعيد.
وعددتله شخصيات الكفلتهم تهريبه ظل هو مصفن: أنفجرت بقهر بـوجهه :
ــ تحملت كولشي بسبيل تعيش وهسة تعوفني وتروح لـهاي مدري شني ردلي سنيني اللي أنباگت مني ولكم الله أكبر تهمتني بشرفي بدون دليل لا تباوعلي شنو شفتني بحفل؟ منو گالك جنت أوزع شرفي عليهم يا سيادة الرائد.. جنت أصارع الظلم وحدي أما أختك ألله يشهد هي جانت تلح وتجي وياي لمن مشى الماي من جواي لـحد ما صدمتني صدمة العمر.
ظليت أبجي و أخذت نقالي و قفلت الغرفة علية و خابرت البنات وطمنتهن وبعدها خابرت سعاد هم طمنتها بس سعاد صدمتني بـ خبر
_ شنوووو صخام الصخمني..
وكع النقال من إيدي وظليت أشهك أريد أوصل للباب أفتحه أريد أحجي مكدرت الله ينتقم منك لؤي ميت وما عفتني الله ينتقم منك شلون أباوع بعد بوجه العالم شحجي و شكول يارب ساعدني شنو من مصيبة هاي.
بساع فتحت الباب وآني أسعل مختنكة أصيح :
_ طـيف.. ماما لحكيني راح أموت....
صوت ركض مـاجد.. وطـيف.. وآني أحس خشمي طك دم من الصدمة الجديدة بحياتي صدمة تحملني عار فوك عار..
