رواية خيط وابرة الفصل الخامس بقلم شمس العراقية
لميعه ...
ـ نصر ولك هاذ أنت يالنذل الله يأخذك وخر عني وينها أيمان عنك وخر ، يريد يبوسني بس يكرص بزندي وجر شعري ويشم بي مثل الجلب دفعته وكع على ظهره وعاط موجوع ، موت جلاب السود يالنذل أني الك إذا ما خليتهم يشربون من دمك .
نصر ـ شگد حلوه مبتاخت بيج خالي نياله عمي نياله
تنكرط مو مره ضيم بروح أبوي ضيم .
لميعه ـ من أنعل ابوك لابو أمك على هالتربيه السكط كام وعفص ركض لبرى ، وأني كعدت فحطانه ولازم أيدي أثر الكرص مالته باللحم نوب ضلوا عليه المزعطه يتحارشون بيه شهل العيشه الزقنبوت .
عفت گلشي وقفلت بابي أنه ما أسلم على روحي لازم أشوفلي صرفة حل ، لاخضير ينعاش وياه ولا الوضع يساعد ولا أهلي بيهم خير چا وين أنطي وجهي للكواويد ياهو اليلم وحده كاظها الوكت وناعل حالها
للظهر أسمع عمتي تحجي عليه وصوتها عالي ونوب أجاها عمي .
خديجه ـ كلها ترتاح ألا انه وجننت وكلت منا وبينا تشيلني وگلبها عليه وعلى بيتي وتالي أجي إيدي والجول والبيت على حطت ايدي وضال بوسخه لا تركيب لاتنظيف لا غاسله هدمه ، أدري خذيتج بس لنوم لو هاذ هم حظي الأغم ما فلح بگلشي ولج لميعه من دهر صابج ليش عايفه البيت بوسخه چا انه مو عفتج شتسوين لو فالحه بس بغرفتج كاظه فراشج ومحمومه
رزاق ـ شگو صوتج واصل لغاد فضحتينا يا مره صرنا مثل بيت مهديه دگول بيت كاوليه هرجهم شايل الولايه نعديتي خما نعديتي على شنو ثاكبه ووجهج مكظم شمالج يمره .
ـ والله من سوالف بنت أخوك لعد هذا العمل الله يرضى بي عباده ، دشوف كلشي على حطت أيدي والبنات خذيتهن يساعدن الفلاليح وهي لا كظت شغلها ولا لحكت حمواتها چا خذيناها بس للنوم .
ـ ميخالف يا أم خضير ميخالف تتعلم مع الوكت تتعلم علمنها ، بس مو يوميه هارجات البيت بصياجن .
ـ لا ما والله احجي عطايات خل تعلمها أنه ما أعلم أحد
أمشن يمه نظفن البيت وركبن الغده مرت أخوجن ما منها فايده هذا حظي وحظ أخوجن طمسله بوحده جايفة الجايفات وبيوت أهاليتهن شحلاتهن نادرات وسباعيات بس يمي الله عمى عيونهن .
سراب ـ يمه على كيفج بالحجي والله لميعه ماكو منها انطوها مجال هم خطيه بعدها ما متعوده على خضير
خديجه ـ ماتسكتين لا أهفج بهل الكرك وأهمدج شو دكومي على شغلج ، عايفتلجن البيت بوسخه والجداري فارغه وتدافعن الها عمت عينجن على هالفطاريه .
لميعه ـ سراب وسناء كلش حبابات ما متزوجات الا أيمان وأنتصار وعمتي هم فلك مدري شجاها نكلبت سواجيها عليه ، انه غير من ضيم گلبي شردت يله لما اشوفلي حل وأفتك .
طلعت وياهن عاونتهم بالشغل وعمتي عاينتلي بس ما حجت وعجيت بشغل بسرعه كملت كلشي وسراب تطبخ الغده خذيته منها واجتي عمتي وكالت .
خديجه ـ اي هيج يمه حالج من حالنا چا شمالج
لميعه ـ شحجي بگلبي بسوالف يفشلن لو حجيت منو يصدكني اضل ساكته واكولن لأمي بلكي هي تشوفلي صرفة حل .
" ودخل علينا خضير هساع رد من السراحه وبيده عصاته وعاين عالجدوره وجر رغيف خبز وكعد ياكل ويباوعلي
خضير ـ شكو تعايين على لكمتي خليني أتسمم يمه شفتيها شون تباوع عبالك مأكل من صينية الخلفوها
خديجه ـ يمه فلك شمالك أنفتگت عالبنيه ، وأكل منو يمك وعوف من أيدك فوت أسبح وتريح هسه يجهز الزاد ونصبه ونتغده .
خضير ـ هم صايره مثل جنتج والله فلا أسبح شمصخم وسابح شو يابسه من كلهن تضحك عليه بنت حبيب
خديجة ـ ولك تسودنت چا مو أخواتك كاعدات أمشي خزيتني دهر صابك كظ لسانك ييمه تفلت بسوالف
لميعه ـ طلع وگملنا وتغدينا وانه تغديت بدون نفس ماعولت أكمل وصبيت الجاي ودخل نصر يضحك وعمي وعمتي يهلون ويرحبون بي لان قبل لاأتزوج جان ساكن عدهم باوعلي ونظراته مو راحه .
خضير ـ ها ولك ما صدكت خالك يتزوج وشردت بيت أهلك .
نصر ـ لا خالي جدي وحبوبه كالوا روح البيت أهلك
رزاق ـ أي جدي عفيه عليك ويمت ما تريد تعال .
خديجه ـ اي حبوبه ما يصير بعد وأنت صرت زلمه وهم أمك تحتاجك وتعاون أبوك ، أكعد يحبوبه اشربك جايك لميعه صبي جاي لنصر .
لميعه ـ صبيتله سم وكمت وهما ضلوا كاعدين واجه خضير يحجي ويتطلب وتعذرت وصدك عذري ما مجذبه بس ضل يغلط ويحجي .
خضير ـ شنهي ما تخلص كلما اريدن تكولين عليه سليمه ما صارت هاي ولا انه محسوب على المتزوجين وهذه حقوقي واجب عليج تنطينها لو أمج ما علمتج تنطين حق زلمتج .
ـ عليك الله ما ملييت من هالسالفه وجايني بريحتك ريحة هوش وغنم وتريد مني حقوق ، وأمك گالتلك فوت الحمام أسبح ليش ما سبحت .
ـ شنهي ولج كلمة والثانيه فوت اسبح وريحتك ريحة هوش چا شبيها ريحه الهوش مو أحنه عايشين على مطال الهايشه .
ـ ما حاجيته لان يجفص لعب نفسي ودفرني بخاصرتي شتريد مني مو گتلك عليه عذر عوفني بحالي
ـ گومي جيبلي الطشت وماي وليفه واجلفي رجليه يله شنهو شغلج لعد شو ماكو كلشي منج على اقل تجلفين وسخ رجليه
ـ أجلف وسخ رجليك لا هاي العايزه والله ما أكوم ، كوم أنت أسبح وليف نفسك تراك لعبت نفسي يخضير ما صايره ولا دايره
گبل طفر عليه وخنكني بظفيرتي خضير لاتسودن كبن سوادينك عليَّ عوفني يخضير عوفني .
ـ أحطج وأكتلج هساع اذا مرتن نوب تحاجيني معلك شو دكومي على شغلج لا أكسر هالعصا على جنابج .
ـ دفعني وأنه أطلب النفس طلابه وطلعت حضرت الماي والطشت وليفه من موت الكرفك شالع گلبي هذا حظي وبختي سواك زلمه عليه .
قبل لا أدخل الغرفه شافني نصر وغمزلي بطارف حواجبه ومخلي أيديه على طركاعته ويأشرلي تقربت صوبه وطمست وجهه بالماي وما أحس غير گبل عضني من خدي قوي دفعته ووكعت وهو شرد لديوان ردت أعيط وافضحه بس ما لحكت عليه ويكولن تتبلى عليه لا لازم أحاجي امي كبل لاتكبر السالفة ويكبعنها براسي وأصير فضيحه ويعلجن بلحمي هذا واحد بايع المستحى وناويلي على نيه كشره يصخم بيها وجهي .
دخلت ولكيته منطمر على بطنه زين ما سويت عفت كلشي وتمددت بالكاع وعيني على الشباج اشوفن خيال من ورة البرده يا سالفه الكشره على رأسج يا لميعه ، گمت قفلت الباب زين ونمت من يم الحايط
اجه العصر وخضير طلع بالهوايش والغنم وكظيت عبايتي ومشيت على أهلي وأول ما دخلت تذكرته أي تذكرت صباح وعشگنا وسوالفنا اللي من ساعه التزوجت ما أجه على بالي من نار گلبي والمصيبه الانه بيها ومشاكلي أنه وخضير بس أريد بروده الكاع واسلم على نفسي ويخلص اليوم وأكظ مخدتي وأنام بس ما غاب عن روحي العشگته بعدها تحن اله بس هالمحنه ما عادت تصلح وصار نصيب أختي ، بجيت بهضم
وفزيت على صوت صالحه .
صالحه ـ لميعه شجابج خير بيج شيء علامج تبجين
لميعه ـ لا هيج ، أمي بالقصر .
ـ اي كاعده هي وحربيه .
ـ ليش أهنا من يمت أجتي
ـ من الظهر مشعان جابها .
ـ دخلت البيت وشفتها وتذكرت أخوها وهي زين تدري بعشكنا ومراسيلنا وتالي غدرت بينا ووكفت ويه أمي وخذنه مني وحرمني من عشگي ، صديت وجهي عنها وهي تصييح وراي تريد تحاجيني .
حربيه ـ لميعه بس أحاجيج عكبها لاتحاجيني لميعه عليج الله أسمعيني .
لميعه ـ لما أموت لساني ما يلتوي على لسانج لما أموت ويغسلوني ويحففوني أنه ما أحاجيج ولي عن دربي ، دفعتها ومشيت لأمي ، الله يساعدج يمه
الحجيه عطايات ـ ويساعدج هلا بيج ، خيرج زعلانه رضيانه
لميعه ـ لا زعلانه ولا رضيانه أجيتج بسالفه
ـ خيرج شنهي سالفتج .
ـ بس گبل لا أحجي أريد منج تلكيلي صرفة حل لان اذا اضل أوكع بمصيبه واذا احاجي عيالي ما يصدگوني .
ـ أحجي صرگعتي گلبي وحدتجن ما وراها بس شلعان گلب .
ـ ليش لازم اخبار سميعه ما تسر خاطرج
ـ أحجي ومالج شغل بسميعه خلج بروحج.
ـ حجيتلها وصفنت ها يمه أشوفنج سگتي
ـ منين جايه بيا درب وتردين تضحكين على عقلي ولج يمه لميعه هاي دروبج حافظتها تردين تتبلين على جاهل من عمر ولج أخوج بسوالف ومكسرات ما ينلبس عليها ثوب وتخلصين روحج من خضير ، الظاهر ما نسيتي صبيح وبعدج تحنين وتونين عليه وما تقبلتي زواجج من خضير لهل السبب!
ـ يمه من صدك تحجين ، ومال نسيته لا ما نسيته وما أنساه ولا خضير يصير عليه زلمه من بعده وخطيتي بركبتج بس مال اجذب عليج بسالفه تصخم الوجه لايمه لهنا حدج أنه جايه اشكيلج همي وضيمي .
ـ ولج يا هم يا ضيم تحجين عنه قلت ما ضلت بين أيديج تردين على هالجاهل رابي عدهم وعدنا من سنين وحسبة أخوانج ، تسودتني بس تردين سالفه من جوه كاع علمود تعوفين خضير وتكعدين وتكابليني شسوي بيج .
ـ يمه فدوه أغديلج يا جاهل مو بكد حربي وحربي لو تزوجي هسه مو يحبل حرمه ، يمه زلمه زلمه وأنه اخاف على رويحتي لا يسويلي فضيحه ناقصين فضايح أنتوا جايتج واريدج منج صرفة حل وأنتِ تصدكيني ، چا المن أروح وين أنطي وجهي .
لزمتني وفرگت حلكي وتكفخ على رأسي بكل قوتها
الحجيه عطايات ـ سوالفج ودروبج هاي بطليها وكظي بيتج وديري بالج على زلمتج وعيالج وصبيح سليمه تنسينه لا أنسيج حليبي الرضعتي ورجعه لعندي ماكو كبرج يم خضير صار زلمتج رضيتي والما رضيتي غصباً على رأسج المدعبل جنج جلمود حصو ، شو أنكلعي ولي بيت عيالج لا أحطج وأكتلج وأطلع ضيم أخواتج كله بيج انه ما عولت خلصت منجن وسترتجن ببيوتجن تردن تفضحني وتسودن وجهي .
ـ دفعتني وكعت أبجي مهضومه ، لفيت ربطتي وباوعتلها بهضم وگمت أتعثر وطلعت وسمعتهن يحجن بينهم على طاري صباح وسميعه ما لحكت اسمع شيء وصاحت بيا أمي
عطايات ـ أمشي لبيتج گبل لاتغورب الدنيا يله .
لميعه ـ مشيت مهضومه منها حيل وحايره بمصبيتي أذا أمي ما صدكت بيه چا بيت عمي شلون وتطلع عمتي أضرب من أمي وصلت البيت وأنه دايخه بزماني وتعشينا وهو موجود وما شال عينه عليَّ ..
ما ضل حل گدامي غير أحاجي خضير من يهدأ بلكي لو حجيتله يوكف وياي هو يحبني واحاجي بهدوء وأفهمه
ضلينا كاعدين انه دخلت غرفتي وعمتي ضلت تدردم وراي .
خديجه ـ ما تجين تكعدين ويانا وتگابلينا ونسولف بس حابسه نفسج بهالغرفه وكاظه مخدتج لازم تشبعين من هالنوم .
لميعه ـ ما حاجيتها شگابل منج حاطه حفيدج الساقط أنكبر بغرفتي لما اشوف تاليها شون تصفى علىيه ومر الوكت وسمعت صوت خضير
خضير ـ لميعه وين ليش ما كاعده وياجن
خديجه ـ لميعه با الگن مالتها كارگه ليش شايفينها احنه روح يمه روح كون عاد تدير بالها عليك .
لميعه ـ دخل ونزع ملابسه گبل دشر غمضت عيوني وصحت بي خضير شمالك تسودنت چا هو هيج تستر
ـ وليش أتستر مو غرفتي مو حرمتي ، واليوم اريد أكظج وانام بحضنج مشتاكلج ومشتاك لريحتج الطيبه
ـ أكعد أحاجيك وبعدين أنه مو كتلك عندي عذري يا خضير چا كل شوي نعيد هالسالفه شمالك ما تمل
ـ أحسج تجذبين عليه علمودن لا أكرب صوبج لان أنتِ ما تحبيني اي ما تحبيني .
ـ خضير نصي صوتك أخواتك كاعدات عيب شيگولن علينا .
ـ مالي غرض بإخواتي أنه عليه بيج ، وشتردين مني هاي كعدت كعده يله احجي وفضيني.
ـ گربت صوبه رغم ما أحب قربه بس شجابرك عالمر غير الأمر منه وگلت بلكي هو يسندني عكب ناسي الما بيهم خير وحلفت اذا حلي سالفتي والله اجاري وأصيرن حرمته وأتحمل كل خبالاته لان من بعد أذية أهلي احس مالي نفس بهل الدنيا كلها بس أريدن يخلص يومي وأنام وأني مرتاحه مو خايفه .
ـ لميعه شمالج صفنتي بيمن تفكرين ولج أنه كلت وأكولن هسه أنتِ عاشگه واحد غيري لهذا ما تخليني اجيسج ولحد هسه مكابلتني وتفكرين بي مو منهو
ـ لزمته أكعد احاجيك ولاتسودن وعوفلي سالفة عاشگه عيب أنه حرمتك ميجوز هاالحجي هاذ ، كرب أكثر ولزمني من شعري وحجه هو فاحط
ـ چا ليش ما تنامين يمي ولا تخليني اجيسج ولا أكرب صوبج ليش حارمتني من ريحتج الطيبه واحبنها والله أنه عگب ريحة أمي ما أحب بس ريحتج لميعه الله عليج حبيني وأنه احبنج وأداريج وشتردين أجيبلج .
ـ هزيت رأسي ميخالف اللي تريده يجرالك يخضير بس عكب ما أسولف سالفتي وأريدن منك تسمعني وتوكف وياي ، ضحك وتلهف
ـ گولي حبيبة گليبي گولي والله اسمعج وشتردين
ـ حجيت وأنه حاطه أيدي على گلبي لايتسودن عليه بعدني ما گملت كلامي وجابني براجدي ولزمني من ظفيرتي وخنگني خضير شمالك تسودنت خضير ولك خضير يا يمه الزهره ، خضير أسمعني .
ـ هاذ هو هاذ هو
ـ منهو خضير
ـ هاذ التحبينه وتفكرين ، عاشگه ابن اختي يالساقطه
ـ دخيلك يإبو فاضل طبگن خبالات الرجال وتسودن ياهو الأحبنه من فلك فلكك كون ، أكولك هيج تگولي هيج أنه جايه وعايفه هلي وأستسريت بيك واريدن تصير وياي مو تصير ضدي وتگولي هاذ العاشكته يم فلك عشكيش صخام بعين العدو
ـ ولج تردين تطلعيني بفضيحه وتصخمين وجهي ويه أبن أختي وهاذ أنه المربي ما تطلع منه العوجه بس أنتِ ما مربايه وهسه أربيج وأنعل سلف سلفاج يبنت حبيب
ـ وكظني ويلزمني يكتل بيه وأنه أتوسل بي وأعيط عليه واريد اخلص روحي منه راح يموتني وصحت بي
ـ مو أنه التطلع مني العوجه عوفني بحالي عوفني جعل أيديك الكسر عوفني راح تموتني عوفني أخ يمه ولج يمه لحكيلي ......
والباب يندك قوي على صوته وعياطه شال البيت كلهن التمت وصوتهن وسمعت صوت إيمان هاي من يمت اجتي يموتن عالمشاكل يركصن بجفيه گبل بس يحضر الشر يحضرن قبله .
وعافني بعد ما موتني من الكتل وفتح الباب وأمه واخواته يردن يفهمن منه السالفه ما توقعت السالفه تكبر وصخم وجهي من حجالهن بلسانه وفضح روحه
خضير ـ يمه تحجي وتگولي نصر إبن إيمان يتحارش بيه ويكرصني وگاظها يم الشباج وعاضها ومن تنام يراقبها شفتي بنت حبيب شحجي وتطعن بعرض أبنج يإيمان نوب رجعت على نصوري تتبلى عليه بس علمودن تهج لبيت اهلها بس أنه مو زلمه إذا ما سگطتها .
لميعه ـ طلعت يم الباب وباوعتله ما شايفه واحد مثلك يفضح روحه بروحه ، أنه عفت أمي وأجيتك وأستسريت بيك تاليتها تروح على أمك وأخواتك وتفضحني وتطعن بيه وتطلعني انه الغلطانه والعيب بيه يا حيف الوكت الخلاك تنحسب عليه زلمه ، گبل ضربني وعمتي منعته وعاطتت بيا
خديجه ـ لهنا وحدج يبنت عطايات كافي تحملناج وجرعنا كل سوالفج وسگتنا بس مال تذبيهن التهايم على أبن بنتي وهو بكد ولد أخوج هاي ما ارضاها شنهي هالحجي هاذ تردين تمشين لأهلج وتخلصين من خضير أمشي بفالج بس مو مال تطلعين سوالف تعبانه عيب عليج يي .
لميعه ـ انه ما أتبلى على أحد وأبنج يا أيمان واحد مستفلت ومسربت كظي أبنج وربي وبعدين كابلني وأحجن انه لما خفت السالفه تكبر جان ما حجيت لخضير وشبعني من الكتل .
خديجه ـ بسج عاد صارلج ساعه حاطته وتحشين برأسه علينا لازم تحشمين أحد نوب رجعتي على هالجاهل تتبلين عليه بس علمود تولين لبيت أهلج من جان أستحيتي يعمه وفلا ينلام بيج خضير طلعتي داهيه ، نوب رجعت على أحفادي ادري سويتي هالسالفه علمود ايمان تزعل وتكطع رجلها ويصفى البيت الج بعدج ما تربعتي تردين تصيرين أم البيت .
إيمان ـ عيب عليج مو أبني العنده هاي السوالف گولي أنتن تتحارشن أكولج إي لان أنتن مو راحه والله يدري شمسويه من سالفه وتردين تبلين نصر وتطلعين روحج خوش مره بس أنه أمك ينصر أحطج واحط عشره فواكاج خاف عبالج سويتي هاي السالفه علمود أكطع رجلي من بيت أبوي لا يمه هذا بيت أهلي وبيتي وبيت أخواتي وأنتِ گن دجاج ما الج .
خديجه ـ تعال يا رزاق أسمع بنت أخوك شتحجي علينا وتطعن بإبن بنتك هاي تاليتها هيج تجازيين اليستر عليجن وعلى سوالفجن بس الصوج مني ومنك يا رزاق أسمع بنت أخوك .
لميعه ـ اجه عمي يحجي ومعصب لان الصوت عالي وهز يستحي من الصوت العالي وكظته وعمتي وتسولف اله وهو يعاين ليا ومصدوم ورجع گال
رزاق ـ يعمي لميعه هالسالفه ما تسولف وحجيتيها كدامنا أحنه عمامج وعيالج وما تحجينها كدام احد ثاني ، عيب عمي أنتِ حسبة عمتهم شنهي هالحجي هاذ وهو جاهل وين يعرف هالسوالف .
ويله فوتي غرفتج وعمتي تحاجيج وتفاهمن بينجن وما أريد بعد هالسالفه ينحجي بيها ، تزوجتي وتستري حفظي بيت زلمتج وعيالج وعوفي السوالف التعبانه ولاتخلين عقلج بعقل الجهال هما يجون ويه امهاتهم يوم يومين ويردون لأهلهم محد باقي يمج وأنتِ بنيتنا
لميعه ـ بس عمي أنه ما اذب التهايم ولا اجذب والله نصر تحرش بيه بيش احلفلكم وتصدكوني عمي والله نصر مرتين لمحته يباوعلي واليوم اجاني للبيت ليش ما تصدگوني ، ما احس الا خضير طفر عليا وجرني من شعري ودخلني الغرفه وقفل الباب واخواته يصيحين عليه
أيمان ـ ربيها يخوي ربيها عاشت إيدك وحده مسربته
رزاق ـ خديجه أبنج لايتسودن ويضربها بمنيه ويموتها ولك بويه أفتح الباب وعوف بنت عمك ولك خضير بويه
لميعه ـ موتني رجع گتلني اقوى من القبلها بس هالمره تسودن فدمره وجرني من ثوبي خضير عوفني أنه عليه عذر وحجيتلك
خضير ـ جذابه تجذبين عليه علمود لا اكرب صوبج بس هسه اخذ حقي منج غصباً عليج وعلى خشمج أبوج أني الج يا بنت حبيب اليوم اطين عيشتج ، تعالي .
ـ كرب صوبي وأني ادفع بي وأريد اخلص روحي منه وتقرب وشاف الدم نوب تخبل وتسودن بالزايد وراد يضربني دفعته أريد اخلص روحي لحگولي عمه دخيل بختج خلصيني منه راح يموتني جرني من شعري
خضير ـ اليوم لو أنه لـو أنتِ من احجي وأكولن تجذبين طلعتي صدك هذاك اليوم كلتي عليه شبساع ردت الج ولج جذابه جذابه .
لميعه ـ جعل ايدك الكسر عوفني تسودنت يالمخبل
خضير ـ منهو المخبل انه ولج انه المخبل
لميعه ـ دفعني بكل قوته عاالشباج واحس شيء دخل برأسي وشكه من الطول الطول عيوني كمت ما اشوف بيهن من الضربه والدم الفيض الغرفه وشاف الدم وركض فتح الباب .
خديجه ـ يمه الزهره موتت البت الحك يا رزاق .
لميعه ـ رادن يساعدني جريت ربطتي ولجمت شعري والجرح والدم يخر على ايدي وبالكوه اشوفن دربي وطلعت حافيه أمشي وأتعثر والكل يتصايح وراي وأنه دمي فيض الكاع وبنص الحوش صحت بيهم عوفوني عوفوني أبنكم مسودن أبنكم مسودن رايحه لأهلي شنهي ما وراي أهل ما وراي أخوان والله أكول لمشعان يطين عيشتك يخضير والله ، سلمتكم بيد الله والعباس يأخذولي حوبتي منكم .
طلعت وشافني منعم ونزل ركض عليه تخبل
منعم ـ منهو مسوي بيج هيج حاجيني لميعه امشي بويه امشي ، مشعاااااان مشعاااااان الحك أختك يمشعاااان ، خرب بشغلج يعطايات .
لميعه ـ بس دخلني الحوش وشفت مشعان اجه يركض وكعت بالكاع وبعد ما دريت وين صفت بيا الدنيا .....
لميعه ـ بالگوه فتحت عيوني بالغرفه ودكتور يحاجي مشعان ومنعم وانه رأسي ما احس بي خدران من الوجع
ومن ضيم گلبي اهجس الضربه والوجع بيها ما اثرن بيه
منعم ـ شفت بعينك هذا شغل أمي من أحاجيك وأكولك لميعه ما مرتاحه عند زلمتها لميعه أختي واعرفها ما تعيش عند خضير وتاليته يدزها النا جنازه بس اريد اعرف ليش بناتكم رخيصه عدكم وتخلون زلمهن يستجلبون عليهن گبل عروبه ماتت من قهر محمود وأهله وهسه لميعه دزها النا وبدمها بطوله شاك راسها من ركبتها ، لعد بنيه تنكتل ودمها بطولها وجرحها الا خياط ليش مشعان مشعان ليش من الله ما تخافون .
لميعه ـ باوعلي وضايج فتح الباب وطلع وضل مشعان ساكت وأنه الكاع تفتر بيه ومر الوگت وطلعوني لافين رأسي واجتي نهاوند تركض لزمتني وسندتني ودخلتني البيت ومن دخلت شفتهم كلهم مجموعين وولد مشعان حربي وباقر يحجون على جديتهم تخبلوا بعد عين عمتكم يمه رحت لطولكم ييعمه .
وگفت وباوعت لأخواني أنه داخله هالبيت وأريد منكم توكفون وياي ، أصير خدامه الكم ولنسوانكم وجهالكم بس لاتردوني لخضير ، خضير يا أخواني وعگازتي للوكت كسرني وطعن بشرفي ، كلهم عاطوا اي طعن بشرف أختكم ، طعن بشرفي يا أخوي الجبير مشعان تراضاها يتهمون بيه ، حجيتله السالفه وطكك عيونه
مشعان ـ وهسه يله تحجين هسه لميعه وطبعاً يتهمجن الولد أبنهم محد يطلع نفسه غلطان المفروض تجين تحجين النا حتى خضير ما تحجيله لان رجال ما يتحمل هالسالفه هاي صعبه عليه مو تكظينه وتخلينها بلحگها ويتسودن عليج .
لميعه ـ باوعت على أمي بس أنه حجيت ، حجيت السالفه كلها لأمي وصار عدها علم بس أمي ضربتني وطردتني وكل ظنها أنه اتبلى على الولد علمود أخلص من خضير كلت اذا أمي ما تصدكني أخواني هم ما يصدگنوني تالي خفت السالفه تكبر وتصيرلي فضيحه لان الولد أنجلب ومو راحه وكام يسوي حركات ما تنحجي يخوي والله ما تنحجي
والله العظيم بروح أختي عروبه الطمها التراب أنه ما مجذبه عليكم بحرف والله أنه نظلمت وتمرمرت وشفت الضيم وجارعته وساكته وبس أريدن بروده الكاع .
تقرب مشعان صوبي وضليت أشهك أنه بطارف دشداشتك يخوي اريدها منك ابو حربي خلصني منه ما أريده مـا ينعاش وياه واحد مسودن كلما يگبن خبالاته عليه يطگني ، باوعلي وشاف ايديه مصبوغات وگال .
مشعان ـ وروح المرحومه أخذلج حقج فوتي أرتاحي وما الج غرض بالباقي اني أحلها خليها على أخوج ، نهاوند تعالي أخذيها ترتـــاح .
لميعه ـ من بين هذا كله أمي ما سمعت الها صوت ولا مشعان حاجاها بس سمعت منعم يحجي ما راضي على شغل أمي وأبوي ، نمت بفراشي الله شگد صارلي ما نايمه نومة مالت أوادم .
مدري شگثر نمت وكعدت على صوت وهوسة بيت أهلي والغرفه فارغه بس انه بيها حتى نهاوند ماهي يمي ، طلعت أريد اشوفهم وسمعت صوت أبوي
حبيب ـ شنهي هالحجي هاذ مشعان بكيفك تتصرف أني ابوها وأبو البيت وأنه القرر بهل القصر ومحد يتدخل ولميعه ترد لخضير وسالفتها تندرج لاتسولنا طلابه ويه بيت عمكم رزاق ما كافي خسرت أخوي ياسين بسبب اختكم سميعه من الله يأخذهن ما وراهن بس الخراب
مشعان ـ بويه خضير شاك رأسها ودمها بطولها وطاعن بشرفها ويطعن بعرضنا وشرفنا وترتبينا شتريد اكثر من هيج ، تردون يدزها بتابوت عكبها ترتاحون البنت مصيوبه بصواب ما منه الطيب وخضير مسودن شنهي دابه كلما يكبن خبالاته يحطها ويكتلها وين صايره دايره بنت حبيب تنطك ونسكت وأذا ابن عمها شنهي ما وراها أهل لو أخوان والله والخلقها وروح المرحومه خضير محد يربي ويعلمه مالت الاوادم غيري أنه .
حبيب ـ ولك مشعان لاتورث النار ويه عمك رزاق .
مشعان ـ بس هالمره خليني أنه اشتغل وطلعوا منها لان هذا اللي صار كله من شغلكم وقلة تدابيركم خلوني كاظ لساني وساكت بويه خلونيييييي ساااااااكت .
حربي ـ جدي خلها وكلنا ما نرضى عمتي ترد لخضير
حبيب ـ أنت أسگت محد رايد منك أركد بكاعك ، مشعان الحگني
مشعان ـ لاتزعل بويه ميخالف جدك ومقهور من ورى عمتك .
لميعه ـ فشل حربي خنت حيلي ، رجعت كعدت واجتني أمي وعاينت لي وصاحت بيه .
عطايات ـ أذا ما طلعتي مسويه هالسالفه كلها وخبصتي العيال ويه ولد عمهم علمود تهجين من خضير انه مو عطايات بنت كتيبه .
نهاوند ـ يمه الحكي حربي وباقر ونافع كاظين نصر بالكاع ويدگون بي راح يموتونه .
عطايات ـ يا صخام الوجه هسه أكتملت وين لكوه ركضي ولج عالديوان صيحي واحد منهم .
لميعه ـ طلعت گبل أمي وكاظه رأسي بس فرحة صدري ما توسعها كاع بعد حيلي يعين عمتكم عفيه بولد أخوي
طلعنا ورى البيت وعاينت عليهم جاضعينه ويدگون بي ونافع لازمه ويعض بي وحربي نايم عليه بوكسيات وباقر يدفر برجليه وين اليوجعه .
عطايات ـ ولا جن مشگوك رأسها طلعتي مطيوره مثل الحصان من دهر صابج لفيتي للقصر وعجيتي بالشر يمه ولج الحكي لا يطكون نافع ويموتنه غير احرك العرب كلها ولج ركضي هو مريض خنت حيلي ولك حبوبه شموديك وياهم هاذ حربي ابو الفتايل هو أخذهم رأس سليمه بس يدبج بالشر مثل عماته .
لميعه ـ ركض مشعان ومنعم سحبوا منهم وحربي يهدد ويتوعد
حربي ـ والله الك مني غيرها والله أذا ما سگطتت أنه مو ابن مشعان العار الخنيث ابو الفواين .
مشعان ـ گافي بويه گافي هذا هو يله أمشوا وأنت ولي لبيت أهلك لا احلهم عليك يتشالكونك واحدهم ذيب ، يله زلمي أمشوا ، حربي بويه كافي تحرك بدمك وحق عمتك عندي بس عوفوا الولد مالكم غرض بي خوش بويه .
لميعه ـ اجوو ورا ابوهم وباوعلي وأبتسموا ثلاثتهم حسيتهم من صدك سند ومن صددك لو گالوا هذا الشبل من هذاك الاسد ، وأمي ضلت تحجي ما سگتت
الحجيه عطايات ـ شعدكم وياه تردون تكسرون ركبته وتبلونه ولو ميت جوه إيدك دكول بغل بس تفتلتون بالشر
حربي ـ بس حبوبه نصر حجه على عمتي ويستاهل هالگتله واله مني غيرها والله .
الحجيه عطايات ـ وأنت محد موكلك محامي لعمتك ورايد منك منبص روحك وتحل مشاكل الكبار لو ما صدكت كبرت وصرت زلمه وعجييت بالشر بعد شيخلصنا احنه وبيت خضير ، شكو شاحطين وراكم نافع انه مو گايله نافع ما ترفگونه بشركم لو هابده بمنيه وموته عكبها شسوي بيكم .
مشعان ـ يمه گااااااافي وهذا أخو هذا ، گاااااافي .
لميعه ـ حربي ضل صافن على أمي وباقر سحبه ومشوا وأمي كظت نافع وتبوس بي وتحجي وتوصي بي وباقر وحربي أنداروا وضلوا صافنين على أمي شون حاضنه نافع! .
الحجيه عطايات ـ ولك حبوبه يبعد حيلي أنه مو گايلتك وموصيتك ما تروح غاد ، من تجي لما تروح الولايه تضل مگابلني وگلشي تريده يحضر لعندك ، شو تعال خما طگك سليمه
نافع ـ لا حبوبه محد طگني وأخوي حربي ما يخلي أحد يطگني .
الحجيه عطايات ـ حربي ابو الفتايل لو نصر مسويلك شيء شسوي عگبها فوت حبوبه فوت أرتاح ، نهاوند جبيبله شيء يأكله خنت حيلي جوعان هدوا حيله .
لميعه ـ اخذته يمها ونهاوند جابت صينية الاكل مرتبه وگلشي بيها وحطتها كدامه واجو حربي وباقر كعدوا بصف أمهم ووهبيه بس تعاين لحربي وباقر أحسه عادي ما مهتم بس حربي لا عيونه تراقب أمي ودلالها لنافع
وأجه مشعان وشبك حربي ويبوس بي وباقر يضحك وهو شبكه
مشعان ـ زلم بيكم حظ يعين أبوكم ، أنت جبيري زلمتي الشيخ حربي من تمشي عاالكاع تأخذ منها وصله ، دبجة زلمه وعجبتني بگتلتك لنصر حتى لو أهله هدوا علينا ميخالف يستاهل هذا اليندك بينا ندگه مو هيج بويه
باقر ـ أي بويه أحنه تربيتك .
مشعان ـ يا بعد حيلي .
الحجيه عطايات ـ أي خبلهم بعد خبلهم هو هيج يمه ليش أيمان تسگت على سالفتكم وگتلكم لأبنها شيخلصنا من بيت صگبان هم وراه أهل وعمام لو هاي ما تحسبلها حساب بس كاظلي حربي وتزامط بي ومن هسه منبصه الشيخ وتجلبه على الأوادم .
مشعان ـ يمه فضينا عاد وسالفة وكظت وصگبان خل يكظ أبنه وعكبها يگابلني شكو مسربته على بيت جده ومستجلب على خلك الله .
نهاوند گومي بويه اريد منج صينية أكل زينه واحسن من صينية الشيخ نافع شــــنو بس هو حبوبته تدلل بي وأنه هم أدلل هذولي شيوخ الميادين والدواووين زلمي وحزام ظهري ظامهم للعوز والكلفات .
نهاوند ـ تدلل عيني أنت وزلمك على عناد هذولاك الجماعه .
الحجيه عطايات ـ أمشي لا أكسر رجليج ما عليكم من حجيهم حبوبه أكل يمه مجاري الهنا يمه عافيات على گلبك وبدربج شوفيلي حربيه وين راحت حامل ومالها خلگ .
لميعه ـ مشعان هز رأسه بقهر وباوع على وهبيه وأبتسملها ولاحظت على أمي رجعت تفرق وهي من يوم يومها تحب حربيه وتعزها وأبوي هم يحبها مدري لان گرابه على رغم أمها مهديه وبينهم عدواه بس يحبونها اكثر من وهبيه غريبه وأهلها من الانبار يعني حربي وباقر خوالهم من الدليم والنعم منهم .
وأجتي حربيه وكعدت گابلت أمي ونافع وأمي تسويلها لفات وتنطيها لان حامل بداية حملها وكالت كلمه وخلت وهبيه تكوم من مكانها .
الحجيه عطايات ـ أكلي يمه أكلي أريدج تترسين القصر
وبعد هالبطن الله يكومج بالسلامه هم احبلي لا عبالج بس نافع وناجي وتسدين بطنج لا يمه القصر ينرادله زلم وأنه بس مشعان اريد اكثر نسله بيج ، هاي شبيها حرمتك عفصت وگامت علامها .
مشعان ـ من حجيج غير ، وليش القصر فارغ تترسينه! يمه جوزي بطلي تشمرين بحجيج ترى ما ارضى أحد يغث أم حربي والعندي خير وبركه بس الله يستر عليهم وهالمزامط والتهوبز بطلي الكدامج مو حجر تراني شايف وعارف گلشي وحجايه زايده ناقصه ما يصير خير والله كلشي الأ أم حربي محد يغثها .
لميعه ـ خله وگام وأمي ضاجت وباوعتلي
الحجيه عطايات ـ كله منج ساس البله لو منطيتج لصبيح وخلصانه منج ومن شرج ، گومي لحگي گوليله عمتي ما تقصد تغثك يله .
نهاوند ـ حربي باقر يله عميمه گوموا ابوكم يصيحكم تأكلون وياه ونافع ابوك يريدك يگول خل يجي ويه أخوانه
نافع ـ أي عمه أجييت .
لميعه ـ گاموا ثلاثتهم ولحكوا أبوهم وامي ضلت تكرظ بروحها وتعاين عليهم من الباب حاطهم ثلاثتهم وكاعد يأكلون ويه أبوهم حسيتها نقهرت وأجتي حربيه حاجتها وكالت
حربيه ـ عمه صاير فراكس ما ينداس
الحجيه عطايات ـ عوفي بعدين أنه احاجي اروحن اشوف وهبيه وأجي ، أكعدي تريحي تضلين تحوصين .
لميعه ـ كعدت مقابيلي ما تحملتها وگمت لغرفتنا أني وأخواتي وضاك خلكي طلعت برى شفت وهبيه كاعده تبجي نقهرت عليها شافتني مسحت دموعها لاتزعلين من أمي تراها ضاجت وكامت أدور عليج تحاجيج ومشعان ما قصر تعرفينه يحبج ويحبج ولده .
وهبيه ـ لا يمعوده ما أريد گلشي بس الله يحفظهم وأنتِ شطلعج أكعدي استجني بمكانج لاجرحج يلتهب ما يوجعج شو لاتونين منه ولا عبالك شاك رأسج انه سولفلي مشعان نعصر گلبي الله يكسر أيدك يخضير
لميعه ـ تدرين وهبيه الجرح البرأسي صح يوجع بس مو مثل جرح أمي ولجمتها اليه بگلبي صرت ما احس بالوجع ، أنه جرحي هنا بصدري شيطيبه يا وگت هضيمتي هضيمه يا أم حربي ، أمي صوبتني بصواب خضير وأزواد .
ـ الله يكون بعونج ويصلح حالج شطالع بإيدي عليج وحاطة أيدي على گلبي من ورى سالفة نصر وحربي ما يجوز منه خاف لايوم يهمده بمنية ويموته والله خايفه من تاليها لاتكبر السالفه وخايفه على ولدي اني بطرك هالأثنين غير أطك وأموت أذا واحد منهم نخدش .
ـ لا أن شاء الله ماكو الا الخير لاتفاولين عليه وكومي أمي ادور عليج سمعي صوتها تصييحج .
الحجيه عطايات ـ ولج وهبيه وين وليتي يم حربي
وهبيه ـ أجييت عمه أجييت .
لميعه ـ ضليت كاعده ورى البيت والوجع يدك برأسي بس شاده على نفسي وصابره ومحتسبه ولليل گبت العيطه وناس تهد وناس تصد وتمالخوا اهلي ويه بيت عمي رزاق وصارت بالفشك وأمي تعيط وتدعي عليه دگول أنه السبب باللي صار ما تدري رأس المصايب هي
الحجيه عطايات ـ يمه ولدي تمالخوا ويه بيت رزاق يمه غضب على يومج لميعه طركاعه ولفيتي للقصر عجيتي بالشر يمه شحجي شگول ولك منعم الحك أخوك مشعان لابتلي بخضير ويصيرن كراعينه شطولهن يمه وراه لطمات هذا وحيد خديجه شيفگها من طلابه سوده بوجهج يسميعه عساج لا ارتاحيتي ما وراجن بس الشر
مشعان ـ والله أنه كتاله والله فكني فگني والله الا اسكطه وأكعده بحضن أمه هذا العار هذا ولك يهوبز عليه فضحنا بالعرب هدني وخليني اكسره .
منعم ـ بسك عاد بسك ما نريد السالفه تكبر وتصير طلابه ويوكع بيها دم وأبن عمنا هذا
مشعان ـ من عمى العماه أذا هاذ العار الخنيث أبن عمي وأنحسب عليه نسيب والله لخاطر عمي رزاق راح اسكتله والله لخاطر شيباته والله .
لميعه ـ وضلت على هالمنوال لما صارت كعده بين بيت عمي رزاق وبين أهلي وكعدوا وأمي كاعده تتنظر وتسمع لحجيهم انه ما تحملت ورحت يمها بس شافتني رادت تطكني بس وهبيه ما خلتها ، وكفت بصف وهبيه وحاطة أيدي على گلبي لاتفض ويردوني اله والله أذبح روحي وما أرد اله .
مشعان ـ ما الكم حق يمي والأختي مشگوك رأسها ومخيط هذا ما تسمونه حق وسالفة أبنكم تندرج ونلممها ونطمها وعيب ينحجي بيها وكلمن عجينته بكصته .
لميعه ـ صار الحجي مخبوط وكلها تهوبز مو مسموع بس لح اذني صوت خضير وهو يگول
خضير ـ يا حق تحجي بي ليش أختك تعرف حق الله انه والما متزوج سوه لو باقي أعزب اشرفلي اختك ما تقبل اكرب صوبها وكلما احاجيها....
لميعه ـ قبل لا يكمل گبت العيطه وامي صاحت بينا ودخلنا داخل وعاينت من الشباج منعم ومشعان حطو خضير وكتلوا هذيج الكتله بردوا گلبي وخاطري بي وعمي رزاق تعذر منهم وأخذه يكفخ بي .
مشعان ـ لو تموت ما تشوف اظفرها ما الك جلبه مو مره ولخاطر عمي عفتك والا جان قضيت عليك يا ناقص غيره طايح الحظ وبس المح طولك كدامي اسكطك .
الحجيه عطايات ـ أرتاحيتي برد گلبج دبقي نايمه على گلبي ناقصه أني نوب عليه المطلگات والله لو تموتين يلميعه ما أخلي خضير يطلگج الا اخليج طول عمرج معلكه بإسمها وتضلين فتنه بالدار عجاجة الشر .
لميعه ـ يابه جلمتها شكثر توجع وتزرف الگلب ، ما حاجيتها ورحت الغرفتي نمت بفراشي وضليت أيام مصخنه نار ما بيه حيل أعين روحي والوجع يدك بروحي وبرأسي ما ينحمل بس حملته الأمر منه ونهاوند شالتني ودارتني وأمي شونج متگولي لا مقهوره مني لان مشعان عند ما يردني لبيت عمي بعد وسالفة خضير سدوها من هذاك اليوم ..
كاعده بغرفتي ودخل عليه مشعان
مشعان ـ شلونج لميعه
لميعه ـ هلا خويه الحمدلله زينه أنت شلونك جهالك شلونهم .
ـ الكل زينين أكول بويه لميعه جايج واريدج تمشين وياي لـ الولايه اخذج يمي بيتي وهم على واهس بنات عروبه وحدهن وبناتي وبعد أنتِ عمتهن مو احسن ما تبقين اهنا واخاف تسمعينلج حجايه تغثثج
ـ لا خويه مشكور وكثر الله خيرك خليني أهنا مرتاحه ولو ضاك خلگي عود أكولك
ـ على راحتج بويه يمت ما تردين بس گوليلي
ـ أن شاء الله وطلع ودخلت أمي عاينت عليه وابالها يم مشعان
الحجيه عطايات ـ شراد منج أخوج
لميعه ـ ما راد شيء يسأل عليا .
الحجيه عطايات ـ أي زين ، أكول مو جرح طاب گومي لحگي أختج نهاوند وعاونيها ظهر ما ضال عدها من يوم تزوجتن كل شغل عليها ، هاي التكعد وتكابلني تشتغل مو تأكل وتنام .
لميعه ـ والله اشتغل وافرع الكاع فرع وادير بدال القصر قصرين ، وازرع وافلح واكنس وانظف وكلشي اسوي بس ما ارد لخضير ابو الوسخ كبعتيني بي شگول عليج
مشيت وطلعت من يمها مهضومه كسرت رگبتي بهل الزواج المصخم ولحكت نهاوند وعاونتها واشتغل وانه ساكته وصرت احب الشغل وما احب ارد البيت عكس هذيج الأيام من جنت بنيه جنت اعارك اخواتي علمود اعوف الشغل واروح أدزله مرساله بيد حربيه وتالي حربيه أول الناس غدرت بيه .
صار كل وكتي اشتغل واخبز يضيعوني يلكوني اشتغل شلت القصر كله ونهاوند هالفتره أمي متخليها تخبز سمعت طارف خبر اكو واحد يريد يتقدملها من اصدقاء مشعان ويسولفن عليه يكولن طاك وساكن بالولايه بس ما حجن كدامي ولا كالن يمت يجي يخطبها عبالهن اغار لو أنقهر بالعكس خل تتزوج بلكي تنسعد احسن من عندي ششفت من حياتي بس الضيم والهضم .
كاعده أخبز وصالحه تشنك العجين وسمعت صوت فشك وهلاهل من بيت عمي رزاق ، أكول صالحه سمعتي الصوت لـو اذني اشركتني بيهم .
صالحة ـ اي والله يخيه المن هل الهلاهل هاي وصوت الفشك شال العرب شيل خير ، أكومن أجس نبض واجيج .
لميعه ـ روحي خيه روحي ، راحتلهن من ورى البيت وبطت كملت خبز وأجتي تضرب بإيديها هاي شعلومج
بطيتي بس لا خضير أستشهد بالحرب .
صالحه ـ لا يا حرب خيه ، مدري شگولج لاتزعلين خيولي
ـ على شنو ازعل غير أعرف بالأول
ـ خضير خطب يلميعه وهالأسبوع يزفونله بنت خاله
سعاد عرفتيها .
ـ هلهلت وركضت صمت حلكي ، خليني أهلهل خليني أبرد گلبي ، ساعة المباركه وبطارف شيلتي كمت ادبج وأهوس اله .
صالحه ـ ولج فضحتينا لا أخوتج يسمعونج ، فلك الله ينطيني من برود كلبج ولج خاف من حركتج تهوسين
لميعه ـ لا والله فرحانه خلي يتزوج وحده وأثنين وثلاثه ويطبق الشرع أذا يريد ما يهمني ولا يحرك شعره من گلبي أنه كلبي مات من ساعتها ، ضلت على خضير وزيجته خل أيمان تدبج على الدنبك الجانت تريده بعرس اخوها ، وحيدهن من حقهن يفرفحن .
صالحه ـ الله يمد گلبج بالصبر گومي أني أكمل عنج گومي .
لميعه ـ دخلت البيت وشفت نافع يمكن جايين من الولايه وتذكرت صباح وسميعه يا ترة شونهم هم يحبها وتحبه ولا اعرف أخبارهم محد يجيب طاريها
مشيت وگبل لا ادخل سمعت أمي تحاجي حربيه وبطاري سميعه ومشعان متعارك وياها وطاردها ومن هالحجي هاذ والهضمني أكثر من سمتعتهن يحجن وكالن سميعه حبلى! وعلى ميلاد بشهرها! .
حبلتي يسميعه خذيتي مني عشك طفولتي وأصباي عليمن أتحسب عليج لو على أمي ...
وقبل لا ارجع حربيه گالت
حربيه ـ والحمدالله مرته قلق هم حملت جانت تراجع ما يصيرلها
لميعه ـ قلق منهي چا صباح تزوج مرتن نوب على سميعه وليش تزوجت مره ثانيه لازم ما عجبنك ومحد سد مكاني بگلبك عكبيش وبعديش تزوج عشره شو لميعه وراحت من بين أيديك ضحگوا على عشگنا الما يخافون الله .
لعد نسوانك اثنينهن حبل يا صباح أي بالخير بالخير والله يعين وجع گلبي يا عشك أصباي ودفنتك بالگلب ...
____________________
سميعه
ـ طول هالفتره ما طلعت من بيتي حتى بيت أهله ما واصلته ومهديه مدري شغيرها وصارت خوش مهديه وصارت بين يوم يومين وأطس عليه الصبح وتكعد يمي اشتغل وانظف واخبز واطبخ هي مگابلتني لما يجي صباح تتغدة ويانا وسوالف وعينها عليه وكلامها شحلاته وتمدح مني كدام صباح ، سبحان من غيرها
خلتني حايرها بطبعها وأخافن منها بشر اليتغير بساع خاف منه هذا ما يتأمن هاي جلمة صبيحه دوم توصيني وتنصحني أدير بالي منها .
مهديه ـ لاتعجنين هواي وتخبزين يمه شعندج هو بطرك روحج وصباح تعبين روحج عليمن .
سميعه ـ صباح يحب خبز الحار وتعلم على خبزي .
ـ أذا هيج زين وأنتِ معدله وأم بيت .
ـ أبتسمت الها بگلبي أنساهن الج لا والله ، ودك الباب هذا يمكن غافر ادخل خاله ماكو أحد .
غافر ـ خاله أمي جانت يم الخياطه وگالت الخياطه تريد ثوب الج تاخذ قياسج
سميعه َـ اي ذكرتني هسه اجيبلك انطيته الثوب ودي للخياطه تندلها مو
غافر ـ اي خاله.
ـ أي فدوه لطولك روح وتعال أنطيك ماعون دولمه وخبز حار ، راح ورجعت أكمل خبز ومهديه كامت ، ها عمه گمتي چا ما تضلين عالغده خوش دولمه مسويه
مهديه ـ لا يمه عمج يجي ويضل بس يسأل عليه عود أمرلج ديري بالج على البطنج ولاتهلكين نفسج بالشغل
سميعه ـ بكيفج ، راحت والحمدالله ورجعت اخبز واجاني غافر ضايج ها يبعد خالتك .
غافر ـ خاله ثوبج راح مني
ـ وين راح
ـ صعدت البايسكل وخليته وراي ومن نزلت انطي الخياطه ماكو دورت عليه ورجعت اشوف الطريق ماكو
ـ يمه وين راح الثوب ، أمشي ولك شوف دربك زين شون سالفه هاي وراح يركض نبش الطريق نبش وانه لابسه عبايتي وراه لازم ما أنتبهت شون راح منك
ـ خاله عبالك قبل لا اصعد بايسكل هو ماكو لان لو وكع جان حسيت بي
ـ أي صدك أمشي نروح على أمك وصلت صبيحه وحجيت الها وضلت صافنه بوجهي علامج
ـ مهديه الها أيد بالسالفه وثوبج عدها لا ضايع ولا شي وشافت غافر ملتهي ويه صديقه وعبرت ولفته جوه عبايتها وغافر ما أنتبه الها ما ينراد الها فهم ، وكتلج جياتها الج مو زود المحبه وراها شر تغني عليج وعلى بيتج وحذرتج بس أنتِ فاهيه .
ـ بس لو تريد تضرني جان ضرت البطني موصح
ـ لا ما تضرج ولا تضر البطنج لان أبن أبنها وهم تبين هي خوش أم كدام أبنها وتريدلج الخير وتعاملج معاملة الام لبنتها وتخليج تحبلين وتولدين بالسلامه وبعدين تشوف شغلها وأذا سوتلج شيء صباح ما يصدك حتى لو يشوف بعينها لان يگول امي زينه على مرتي .
ـ من فلك فلگها وأنه اكول منين نزلت هالمحبه
ـ هاي مهديه كل سوالفها حفظناها ليش عروبه وينها مو شيبت گلبي وگلبها أخ شحجيلج وشگول على أمي ، أمشي لبيتج هسه زلمتج يرد ولما اشوفلج حل يا خوفي أخذت ثوبج تسويلج عمل لو تابعه وتكطع نسلج وما تخليج تخلفين بعد .
ـ وكعتي گلبي يصبيحه
ـ لا لاتخافين امشي هسه بعدين نحجي ، غافر وصل خالتك .
ـ رديت البيت وأبالي كلام صبيحه وضليت أيام بس أفكر وحتى حمل قلق ما أهتميت اله وصباح فرحان ويضحك ويكولن حبتلجن اثنينجن وبالي مو يمه يم سوالف مهديه .
ومرت هالأيام عالخير وماكو شيء لما يوم جاب قلق لبيت من الدوام ونزلت هي وكرشها وانه شفتها لو تخبلت واجه صباح وكبيت بي أمشي رجعها منين ما جبتها مو عدها بيت شگو جايه لبيتي انه شحجيت وياك مو گتلك ما أريد اشوف خلقتها هي بيتها وأنه بيتي .
صباح ـ هذا بيتي لاتنسسين نفسج سميعه وقلق مرتي يمت ما يعجبني أجيبها ولو أريد اسكنها وياج حلكج ما تفتحينه اني أبو البيت وأني الأقرر وبكيفي
ـ لا مو بگيفك ولاتنسى أني مرتك وشايله أبنك وهذا حق من حقوقي يكون اليه بيت يلمني أني وأبني والي حق أمنع الاريده وقلق ما أريدها بهل البيت لا من بعيد ولا قريب ، صباح تعوذ أبليس وديها لبيتها .
ـ لا شغلة عناد هالمره أبقيها وعالگلبج والا أسكنها يمج هيج وجه لوجه وتگابلج ليل بنهار أريد أشوف شهل السم العندج وقلق شمسويتلج لو شفتي نفسج شوفه وقلق مو من أعجابج .
ـ أي مو من أعجابي لا مرتك ولا أنت ولا كل أهلك وساعة السوده الصرت بيها من قسمتك ما حسيت غير كام يضرب بيه وأني أصيييح عليه وأدفع بي عوفني تنكسسر أيدك الله يأخذك مرمرتني أنت وأهلك بعدني عروس كبعتني بضره حسبي الله عليك أنت وأهلك
وأنفجرت عليه ما اعرف شحجي وهو هم ما قصر ضربني ويزيد بالضرب من أنه احجي ، تالي عافني وصاح بيه
ـ أني أعلمج أصبريلي أذا ما سويتج خدامه أني مو صباح ترفعين صوتج بوجهي وتراددين ولسانج بطول النعال أصبريلي سميعه هذا الدلال الشفتي مني أذا ما طلعت عداله معاملة الجلاب منا وجاي أعاملج .
ـ بجيييت وتمنيته يسگت ويمشي لان نار ثگبت بطني تملخت وهو يحجي وعصبي نار گبره
ـ وقلة الأحترامات هاي اني اعلمج عليها وأعلمج الأوصول هم شلون تستقبلين تاج رأسج ورأس الخلفوج ينت حبيب ولج أنتِ وحده استغفرالله ، خلف الله عليه لفيتج بيتي وسويتج أدمي ولحگتي الأوادم وصرتي تعرفين تلبسين وتكشخين بس أنتِ مو مال عين وأغاتي ما دك بالنعل صوجي ما خليتج مكفخه على أيد أمي وأخواتي الظاهر امثالج يحبن التكفخ وأني الج .
ـ ركع الباب بقوة وأني أعصر بروحي والوب وصحت بقهر صباااااج الحگي راح أمووووت صبااااح دخيلك الحگييي .
أنفتح الباب ودخلت قلق خايفه وشافتني ولطمت على خدها
قلق ـ ولج تتولدين ، صباااااح الحك سميعه تتولد شجاك عليها هو هيج ياعيني رايده منك تجيبني كتلك أخذني بيتي ما أقتنعت ، أمشي هسه أمشي لا يصيرلها شيء أمشي.
سميعه ـ اجتي سندتني وكومتني وهو شغل السياره وما احس غير صبيحه لابسه عبايتها فوك رأسي واني ابجي وهي تسكت بيه وصعدنا وطول الطريق أون راح أموت صبيحه راح أموت وأخلص وأمانة الله البطني أمانه عندج ....
صبيحه ـ أسم الله عليج لاتفاولين بالموت ما بيج شيء تكظي تكظي هسه تولدين وتنسين الوجع الله يسهل وتكومين بالسلامه .
سميعه ـ تقرأ ايات واني حاضنتها وأبجي وهي تسگت بيه حجيت مهضومه ضربني واني حامل ضربني
ـ أش اسگتي مو وگته هالحجي ومن لسانج عم عليج ما تسكتين أدري بيج بعدين نحجي مو وگته أنتِ بشده
ـ ووصلنا وأستلمني القابلات وجانت ولادة حيل صعبه لما كظت عالخير وأسمع الصراخ وحاجيتها شنو جبت
ـ بنيه مبارك عليكم شون بنيه تخبل مثل أمها
ـ أبد ما ضجت لان اجتني بنيه ونزلت دمعتي من قهر أبوها مو لان هي أجتني وحمدت ربي وشكرته وكملني واجتني صبيحه لافتها بطانيه وتباوعلها وتضحك
صبيحه ـ ولج سميعه تخبل شحلاتها گمر ومصور يمه ما شاء الله عليها ومن جمالها صباح گبل سماها نور
ومن هسه أني حجزتها لأبني نور بنتي وجنتي مو بعدين تهضميني عليها .
سميعه ـ هي صارت الج .
صبيحه ـ الله يحفظها الكم هاج بنتج نور وبالخير عليج والف الحمدلله على سلامتج وسلامتها يمه فدوه للبنات والله لو يشوفج غافر الا يقيم يمج يفرش وينام
ـ اخذتها منها وقربتها لصدري شعور ما ينوصف شميت ريحتها ريحة أنفاس وگامت تصرخ وبس أباوعلها حلوه عليمن طالعه
ـ أثنينكم حلوين عليمن تطلع بس هي أحلى منكم متشوفين گبل حجزتها لأبني لان أبني حلو وهيبه أريدله وحده حيل حلوه .
ـ الله يحفظه الج ويفرحج بي تستاهلينها وضلينا نحجي وساعة زمان لما أرتاحيت طلعنا للبيت وأني تعبانه حيل وجسمي يون عليه ودخلت غرفتي وصبيحه وقلق عزلنها ورتبن گلشي وقلق تفتر وتحضر وترتب وفرحانه وتحجي ويه صبيحه تبين إحتماعيه وبسرعه تختلط .
وطول هالفترة الي مرت صباح ذبح طليان أثنين وزعهن وفرحان ويحير شيجيب من مسواك ومهديه اجتي باركت وفرحانه ويه صباح وأنه وصبيحه وحده تباوع الثانيه
أما قلق موجوده ويانا بالبيت وصبيحه يمي بس من نزل زلمتها راحت وضلت قلق تجيني تساعدني بس اني ما اقبل اشوف نفسي زينه وكمت علي بنتي ومالي شغل بيهم وصباح أشوفه بس متجاهلته ولا هو حاجاني كلمن بحاله .
وطلعت الأربعين أثنينا ساكتين وقلق رجعت بيتها حست ما مرحب بوجودها ما نطيتها وجه ولا حاجيتها مو بيدي ما أتقبلها ومن أشوفها أختنك بس أريدها تمشي لبيتها .
مخليه نور وأرضعها ودخل هو راجع من الدوام .
صباح ـ الله يساعدج
سميعه ـ ويساعدك
ـ شلونج ونوره حبيبة أبوها شونها
ـ زينه ، تقرب باسها وباسني من رأسي
ـ حقج عليه وأني الغلطان بحقج بس أنتِ هم الصوج منج ما سگتتي عالعموم ماله داعي أعاتبج وتعاتبيني
وهسه أريدج ترجعين سميعه العرفتها الگلبها أبيض مثل الثلج والحقد تجاه قلق شيلي وما أريد هالعداوه تكبر والجهال ينضرون لاتنسين هي هم حامل وباجر عكبه جهالي أجمعهم بيت واحد يربون سوه .
ـ بجييت وحضني وأخذ نور نومها بالكاروك واجه يراضيني وتراضينا وكظت هالأيام مرات نتعارك مرات نتراضى ومرات شحلاتنا ومرات الشياطين تنكز بينا
ومرت السنوات تركض ركض وبعده الزعل بين الأهل والعمام نفس ماهو ما تغيير لا أني وصلتهم ولا هما وصلوني ولا أحد دك بابي وگالي شلونج بس أختي صبيحه هي أهلي كلهم بكل ظروفي وياي ومساندتني
هي ورجلها الما شفت منه بس كل الخير والطيب ...
وكل هالسنوات المرت قلق هم صارلها بنات أثنين لبنى ولينا وأني بس نور ما صارلي بعدها شگد راجعت ما خليت أخر شيء رحت الشيوخ وساده صبيحه خذتني كالوا وراج تابعه! وعرفنا هذا شغل مهديه بس منو يصدك بيه لو حجيت ، خلتلي بس نور وكطعت الخلفه عني مسلمتها بيد الله وأن شاء الله احبل وأكسر عيونهن بكل كعده يكولن يمه ما خلفلتك بس نور يسون الكعده سم عليه .
كاعده أغسل ملابسها مالت المدرسه وهي مخليه لاعبتها وتلعب گبالي بس تبجي وزعلانه مني تريد تطلع وما اخليها لان عدها إمتحانات
نور ـ ماما الله عليج أطلع العب
سميعه ـ وين تطلعين يا بنتي وأبوج ما يقبل يخاف عليج وماكو جهال بعمرج كلهم گبار
ـ العب ويه نافع وغافر ، وديني بيت جدي على نافع
ـ شتلعبين وياهم ولج زلم مو بكدج هذول كعدي وأستجني لاتخبليني نوره ماما ما يصير هما كبار وأنتِ صغيره وميخالف من يجي غافر أخلي يأخذج يشتريلج من دكان حجي سلمان
ـ ما أريد ، أريد نافع يشتريلي
ـ من أنعل أبوج لابو نافع شجلبتي نافع ونافع وحتى غافر ما اخلي يشتري الج دبقي هاي كعدتج ، وبعدين مو عندج املاء حفظ يمت تقرين گومي جيبي جنطتج وفتحي كتابج دشوف ، عاد باليل من يجي أبوج تندرين تعال قريني ، گومي جيبي جنطتج
جابت جنطتها ونفضت أيدي من وغف التايت وفتخت الكتاب أكعدي أحفظي لما أكمل أردلج خوش ،أي بنيتي اليوم اخر امتحان الج وتنجحين وتروحين لثالث ، هزت راسها وكعدت عالمرجوحه لابسه ثوب أحمر وبي ورد اسود قصير وظفيرتها نازله على جتافها ومبوزه زعلانه مني ، لاهيج تباوعلي شو أقري ولو گملي دراستج طلعي لعبي .
رجعت أغسل وأنفتح الباب ودخل الشر خير اللهم أجعله خير شجابك لفيت علينا
نافع ـ جابتني رجليه وجابتني نورايتي ها عميمه الگوه ، ها نواريتي شونج شبيج زعلانه منو مزعلج حاجيني، عمه طاكتها مو
ـ وأنت شگو عمه شلك دخل ، بعدين مو تريد تمشي للقريه شعجب ما رايح لحد هسه لو راحوا وما خذوك وياهم .
ـ لا أجييت أخذ نور وياي
ـ چا بكيفك تأخذها خاب ما تسكت منو كلك تروح وياك.
عدها دراسه خلها نافع لاتخرب عقلها .
ـ ميخالف أني أقريها تعالي نكعد بالمرجوحه ونقرأ
ـ اخذها وحضنها وأيده على جتافها وهي تضحك وتباوعله ، نافع عمه وخرها من حضنك وقريها ترى التخست متعلم گلبي عليَّ
ـ اي عميمه تدللي .
ـ كعد يقريها وللمغرب هو گام يله يمه تأخر الوكت رد لاهلك .
ـ عمه خل أخذها يمنا تتعشى وأجيبها
ـ لا عمه أبوها هسه يجي ما يقبل
ـ ليش بيت عمتي صبيحه تقبلين تروح وبيتنا ما ترضين
ـ بگيفي چا أنت كيفي .
ـ براحتج عمه .
ـ دنك بأسها وتأففت بقلة صبر وطلع وعينها عليها ودخل غافر هلا بهل الطول هلا يعين خالتك هلا يمه
غافر ـ هلا بيج خاله شلونج نوره شلونج قريتي
نور ـ اي نافع درسني اليوم ما أجييت ما شفتك .
غافر ـ رحت ويه أبوي اشتريت ملابس واشتريتلج هاي القراصات شوفيها حلوات
نور ـ شكراً حلوات .
سميعه ـ كلش حلوات ، أتفضل يمه
غافر ـ لا خاله أروح أمي دزتلج هذن الأغراض .
سميعه ـ اي عاشت أيدك راح ونور لازمه القراصات وتباوعله وتضحك الله يكتبه من نصيبج أن شاء الله .
دخلت البيت وصباح ما أجه عرفت راح على مرته وبناته وبايت يمهم وباليل صبيحه دزتلي غافر فرشتله بالاستقبال ونور لازمه كتابها وتباوعله ، أمشي نامي
غافر ـ قريتي زين باجر أخر يوم
نور ـ اي .
ـ يله لفراشج نامي
سميعه ـ دخلت الغرفه ونومتها بحضني والعب بشعرها الناعم مثل الحريى وصافنه عليها يارب حظج أحلى واحسن من أمج وضليت أراقبها لما نامت ...
والصبح ركضت تغسل وغافر كعدته سويتلهم الريوك وكعد يسويلها لفات وتاكل واني امشطلها لاتوسخين صدريتج .
غافر ـ على كيفج هاي سويتها الج صغيره .
سميعه ـ أوكفي يا يمه ثبتي خل اظفرلج وسمعنا الباب أنفتح يمكن صباح اجه ، وفزيت على صوته
نافع ـ صباح الخير .
سميعه ـ رفعت رأسي صباح النور هلا بيك وواكف يم حافة الباب ويباوع على غافر وفراشه ورجع باوع على نور وعكد الحواجب مزعوج وباوع لنور وأبتسملها .
نافع ـ شوكت تروح مو عندك دوام
غافر ـ دوامي ظهري .
نافع ـ نور گومي أوصلج تأخرتي .
سميعه ـ غافر يوصلها باوعتله صد وجهه عني وغافر جاوبه
غافر ـ نروح سوه نافع ، أكعد تريك ويانا .
نافع ـ تريكت ، يله أنتظركم گملوا .
سميعه ـ گملوا و طلعوا وأني أباوعلهم ومشت بينهم كل واحد لازم أيد وهي تباوعلهم وتضحك ونافع يباوع لغافر ومزعوج وضاغط على أيد نور بس غافر نظراته بس على نور وشايل كتابها ويراجع الها أهتمامه مختلف عن نافع .
رجعت البيت كملت شغلي واجتني تضحك وفرحانه
نور ـ ماما كملنا أمتحانات .
سميعه ـ باوعت من وصلج .
نور ـ غافر واشترالي وراح عنده دوام .
سميعه ـ ونافع ما شفتي
ـ لا ما شفته .
ـ مو من عوايده ، يله فوتي هسه يجي أبوج ، ودخلت غسلت ملابسها واجه صباح شالها ويفتر بيها ويبوس
صباح ـ أشتاگيت ولج اشتاكيت يا يابه يا بويه نوريتي
سميعه ـ ما واضح الشوك عليك جان أجييت .
ـ لبنى مريضه وضلييت شلونج ، منو بات يمكم
ـ كالعاده غافر عيني هو
ـ اي زين ، اكو غده جوعان ، اغير ملابسي وصبي
ـ شو ما سلمت عليه لو الشوك بس حصة قلق وبناتها
ـ رجعنا سميعه بعدني بملابسي وتعبان اتغدى وتدللي اشلع الج عيوني وشون ما مشتاق ميت على ريحتج وحضنج وهاي الفريخه نوميها لو دزيها على خالتها لان متنام الظهريات
ـ ضحك وغمزلي ومشه وتغدينا وهي عناد تريد تروح بيت خالها على نافع وابوها صافن عليها ، بابا دنيا ظهر وبيتهم بعيد شوي علينا روحي على بيت خالتج
ـ لا ما اروح انام يمك
ـ اي ليش لا تعالي بابا
ـ نومها بحضنه ويباوعلي ويضحك ومر كم يوم وجان يوم النتائج مالت نور وكاعده وأنتظرها تجيني وافرح بيها كبرت بنيتي وراح تروح الصف الثالث أبتدائي ..
وتأخرت حيل عليه البنات الوياها كلهن رجعن وهي ماكو يربي وين صارت هالبنيه ومحد بين عليه لا غافر ولا نافع ، وأنفتح الباب دخلت تركض شايله شهادتها وتضحك وراها نافع يمه بنيتي هلا هلا
نور ـ الأولى ماما الأولى .
سميعه ـ مبارك يمه مبارك شو أشوف يمه فدوه لعينج بس ليش تأخرتي ربعج كلهن ردن قبلج وين جنتي؟
نور ـ رحت بيت جدو على جديتي مهديه وباستني وانطتني معاضد ثلاثه ذهب يخبلن لبستهن اليه كالت هاي هدية نجاحج .
ـ اي زين وهذن معاضد ثلاثه منين لان لابسه سته!
ـ هذن من نافع مشتريهن اليه شوفيهن ماما شگد حلوات .
ـ ها زين ،نافع تشتري ذهب شمعرفك بسوالف البنات
ـ مو أني بس كلفت عمتي لميعه هي أخذتلها بس التوصيات مني يعني الهديه من نافع مو من عمتي
ـ ها ليش عمتك لميعه هم تطلع السوك
ـ أي هذاك اليوم أجتي وراحت هي وأمي وزهور
ـ اي شگو بيها ، يله فوتي وضميها شهادتج لما يجي ابوج شوفيها اله
ـ شافها ماما وكالي من اجي اجيبلج هديتج .
ـ وأخواتج ناجحات
ـ بس لينا ناحجه الأولى ولبنى مو أولى مو نافع شفت شهادتها
ـ أي بس بالرياضيات درجتها نازله .
ـ شعجب لما أمها معلمه ليش هيج كسلانه بعدها بالأبتدائيه وهيج
ـ أكول عميمه عندي سالفه جايج بيها
ـ گول شنهي سالفتك
ـ بمناسبة نجاح نور طالبج منج طلب وأتمنى ما ترديني خايب
ـ شنو طلبك
ـ أريد نور أخذها وياي للقريه لبيت جدي حبيب
ـ لا يمه ماكو ونور ما تتحرك من مكانها وسالفتك أنسيها
ـ عمه عود ليش ما تقبليين كلما احاجيج وتعاندين وما تخليني أخذها وياي وقبل جانت صغيره وتخافين عليها وكلت ميخالف هسه جبيره
ـ وين الكبر بعدها طفله وبعدني على عنادي وقراري ما أقبل والقريه ما توصلها بالاخص بيت جدك حبيب وهذا الموضوع حاجيتك بي وعمتك صبيحه هم حجت وياك لاتلح وتفتحه مواضيع قديمه وانت مالك دخل .
ـ بس عمه نور مالها ذنب وخلها تطلع تشوف خطيه حابستها بهل البيت حتى بيتنا كطعتي رجلها .
ـ ما حابستها مو تروح بيت جدها وعمامها وبيت خالتها ليش تخلي بيت يعتب عليها واكو درب أنت ما علمتها عليه أنت
ـ يله هذا هو بس أريد قلم محتاج نور ما عندج قلم
ـ هسه أجيبلك بارحه عمك صباح جاب من المدرسه دستته ، أنطيت لغافر وضليت أنت أوكف دخلت اجيبله وطلعت ما لكيتهم ماخذ نور وحتى شهادتها مأخذها من غضب عليك ينافع تاليته يجلطني هاالولد وين أخذتها صخام الصخمج يسميعه
صباح الا يطين عيشتي ، وطلعت وراه بلكي ألحك بي وشفت غافر وصحت عليه تعال ولك خاله الحك نافع اخذ نور ويريد يأخذها وياه للقريه لبيت جدك حبيب .
غافر ـ وشون تخلينه يأخذها يا خاله ادري مو بنتج غير عينج عليها صدك جذب خاله بربج .
سميعه ـ أركض وراه گبل لا يمشون وأوكف خل اجيب عبايتي وأجي وياك ، رجعت لما جبت عبايتي لكيته رايح وأجتني صبيحه وسولفت الها ومشينا لبيت مشعان
أكولج صبيحه انه ما أدخل أوكف يم الباب حالفه من هذاك اليوم ما أدخل ببيته، جيبي نور وخليني أولي البيتي ونافع اني اله بس أشوفه الا أشلع اذانه .
صبيحه ـ براحتج عيني .
سميعه ـ وأنفتح الباب طلعت زهور صايره مره شحلاتها سلمت علينا وبوستنا
زهور ـ شلونج عمه أدخلن اتفضلن
سميعه ـ أريد نور نافع جابها صيحيها فدوه لعينج
هسه ابوها يجي ويضل يحجي .
زهور ـ والله عمه مشوا للقريه ماكو بس أنه وناجي وبنات عمتي عروبه أبويه اخذ أمي وضمياء وصفا ونافع وغافر وياهم نور وحليم .
صبيحه ـ غافر مشه وياهم على حساب بنتج ما يفاركها أمشي نرد بيوتنا وجهالهنا وسربتانهن وكتلنا اليوم عمل شعبي هم زلمتي هم زلمتج والسبب كله من ابو المصايب نافع بس يجي اني أعلمه كوليله عمتي صبيحه تكول بس أشوفه الا أشوي على أذانه بصل
زهور ـ أن شاء الله عيني عمه يا هلا بيجن .
سميعه ـ يا صخام وجهي على هالسالفه اخ لو الزمك يا نافع يا خوفي تبات لا بس يجي صباح اخلي يلحكها ويجيبها شينومني شيصبرني والله البيت شال .
رجعت البيت گلبي مفحم من ورى نافع وسوالفه الناقصه وكعدت عالمرجوحه وصبيحه فاتت تجيب ماي فحطنا ، وتذكرت أمي وعكب هالسنين الفاتت واليوم تشوف بنتي نور ومن هذاك اليوم ما شايفتها ولا هي شايفتني واليوم تشوف بنتي! ...
