رواية حرم الاسود الفصل السابع بقلم بتول ابو الليل
- مَن أنتِ ؟
: القوية التي تَوردت الحَياة أثر إبتسامتهُا الباكية 🤎.
____________♠___________
وكعت بالمي الجوو بارد ثلج والماي يجمد واني ماعرف اسبح بقيت اصرخ بصوت عالي واني اغرك
_ساااااعدوووني ياااناس طلعووني راح اموووت ساعدوني
اغط واطلع بالماي شبعت ماي صرت اخذ شهكاتي الاخيره صبيحه وجواهر وهواي نسوان اجن يتراكضن علئ صوت صراخي بس مايعرفن شنوو يسون
_طلعووووني رااااح اموووت
اغط واطلع اريدهم بس يطلعوني نسوان راحت تركض تحشم زلمها غمضت عيوني وستسلمت وفقده وماحسيت بأي شي بعد.
جواهر : يييييمه غررركت ييييبووو ياااناس ياااعالم ساعدونه
راحت تركض جواهر تحشم بالناس الموجوده جان آرون واكف قرب البلم منتظر الولد ياخذه سمع صراخها كام علئ حيله وهوه مستغرب وراح نحوها.
شافته اجت تركض عليه ارتعب من شكلها ودموعها راح عليها يركض
آرون ; خييير خيرر شكوو شبيج
جواهر : لبنيه لبنيييه غركت ماتتت راحت
آرون : يابنيه شتحجين انتِ
جواهر : هاي الجبتها علينه طاحت بالهور وغركت وماكدرنه نطلها.
آرون : شنوووو اليان
عافها وراح يركض بكل سرعته شاف الكل ملتم بمكان الوكعه ولا شخص داخل عليها شمر روحه وراها
وبقه يدور شافها سحبها وطلعها من الماي فاقده وشبهه الميته
خلاها علئ الارض خله راسه علئ صدرها يتاكد منهاا اذا عايشه نفسها ضعييف كلش ولا تتحرك
خله ايده علئ راسه مصدوم بقه حاير شسوي ماتت راحت من ايده
آرون : اليااان حاجيني الياااااان لاتسوين هيج اكعدي لاتموتين الياااان فتحييي عيوونج
صار يضغط علئ صدرها بلكي يجيها نفس دندك علئ شفتها يسويلها تنفس اصطناعي.
بس ماكوو فاده ضرب علئ صدرها حيل ويرجع ينطيها نفس من عنده
باخر لحظه جرت نفس قوي بقت تكح وتقيئت ماي حضنها بقوه.
آرون : الف حمد وشكر الك ربي اليان باوعيلي زينه انتِ جيبولهااا بطاااانيه رااااح تموت من البرد
شالها من الارض وراح يركض دخلها بالغرفه نزل بطانيات يغطي بيها وهيه شبهه الميته شفتها زرررركه واديها جامدات
لف البطانيات عليها حيل لزم ايدها يفرك يده بيديها وينفخ عليهن
آرون : هسه تصيرين زينه مابيج شيء هسه تدفين حجيييه وينج سوي نار فدوه وجيبها.
صبيحه : ولج جواهر بساعج سوي جمريه خليها تتدفه عليها
آرون : حجيه طلعيلها ملابس ولبسيها فدوة ملابسها مبلله راح تموت اذا تبقه هيج.
صبيحه : اطلع من الغرفه وانه هسه البسها
طلع من الغرفه وهوه متجمد من البرد ملابسه ينكطن ماي بقه يروح ويرجع يم الباب شويه وانفتح الباب دخل بسرعه لكاها بعدها فاقده كعد يمها لزم ايدها يفرك بيها
آرون : لاتموتين لاتخليني بهل اختبار الصعب ساعديني اليان ساعديني لاتعوفيني وتروحين تحملي الله يخليج
صبيحه : كوم هاك بدل ملابسك البس هاي الدشداشه مال المرحوم لاتموت انتَ موو هيه.
آرون : خليني اني ماموت هيه ماتتحمل شسوي اذا ماتت شكول الابوها شلون اتحمل هل ذنب
صبيحه : ماتموت كلشي مايصير الهاا لاتفاول علئ البنيه هسه تصبر زينه.
جابت جواهر الجمر خلته بالغرفه اخذ الدشداشه من ايد الحجيه وراح علئ حمامهم بدل ورجع كعد يمهاا طلعت صبيحه وجواهر وسدن الباب عليهم حته يدفون ثنينهم اخذ بطانيه خلاها علئ جتافه وكعد يمها يفرك بيدها.
آرون : اليان تسمعيني احجي أي شيء بس ريحي بالي فدوة
مد ايده خلاها علئ رگبتها يتأكد منهاا اذا بيها نبض سحب نفس قوي من سمع نبضاتها.
_اخ يمه
شويه دفيت يلا كدرت احجي احس جنت متجمده وبغير عالم اسمع حجي آرون مثل الصدئ والحلم وماكدر احجي وياه.
اول مافتحت عيوني هوه ابتسم بفرح اجه يمي كعد سحبني علئ حضنه وكال
آرون : الف الحمدالله خوفتيني عليج عبالي متي.
لزمت ياخت دشداشته بطرف اصابعي ماكدر حته احجي همست بصوت مخونك.
_بـ ءءءأ بردانه.
شال البطانيه مالته وغطاني بيها وضمني علئ صدره حيل غطانه ثنينه بيها .
آرون : هسه تدفين
خليت وجهي بصدره جسمي كله يرررجف واصابع ايدي احسهن قوالب مال ثلج لزم اديه الي لازمه دشداشته بيهن ضم ايدي بايده وخلاهم بيناتنه
_اني شلون مامتت ؟
آرون : الله كتبلج عمر جديد.
_شلون
رفعت راسي اباوعله نزل عيونه يباوعلي صارت عيني بعينه تأمل وجهي هواي وصفن بيه رجع شعري ورا اذني سحب نفس وكال.
آرون : متي واني انطيتج نفس
_شقصدك؟
آرون : هيج تعاي نتقرب من النار بعدني عن حضنه وراح سحب الجمريه علينه نتحمه عليها.
_آرون صدك انتَ نقذت حياتي لوو تشاقه
آرون : تتوقعين اشوفج تموتين كدام عيني واخليج ماساعدج.
_شكراً
آرون : ماكو داعي تشكريني هذا واجبي
_تَعال اخذ بطانيتك تغطه
آرون : لا ماريدها خليها عليج دافي اني
هزيت راسي بأي مديت اديه علئ الجمر ادفيهم هوه كاعد مقابيلي ويباوعلي بتركيز.
آرون : شلون وكعتي.
_مادري تسحلكت رجلي وكعت
آرون : بعد لاتتقربين من الشط
هزيت راسي بأي انفتح الباب ودخلت جواهر وهيه شايله بيدها كلاص مال حليب.
جواهر : الحمدالله علئ سلامتج خوفتينه عليج والله
_الله يسلمج
جواهر : سويتلج حليب دافي اشربي حته تصيرين زينه وتتدفه معتج .
_شكراً
اخذته من ايدها الحليب عافتنه وطلعت من الغرفه ظاهر تستحي من آرون هوه ابد ماشال عينه عليها. يباوع للجمر وصافن.
شربت شويه من الحليب ماحبه كلش بس لان بردانه شربت قدمتله لـ آرون
_تشرب
آرون : لا ماريد اشربي انتِ زين الج
_ماحب الحليب اني اشربه انتَ
اخذ من ايدي وشرب باقي الكلاص لفيت البطانيه عليه واني ارجف.
آرون : بعدج بردانه انزلج بطانيه بعد
_لٱ زينه هسه ماريد
آرون : ماشي
_طالع تضحك بالدشداشه
جان مدنك راسه ابتسم من حجيت هيج باوعلي وكال
آرون : مالت المرحوم هاي
_يامرحروم؟
آرون : رجل عمتي صبيحه
_هاا بس هيه متصير عمتك
آرون ; شلون
_هيه كالت امك وامها بنات عم يعني تحتسب جدتك.
آرون : نفس الشي
_امم زين امك وين؟
جان مبتسم اختفت ابتسامته وضاج بلع ريكه ودنك سوه نفسه يبحوش بالنار.
_ميته امك
آرون : عايشه
_لعد شبيك متحجي عنهاا
آرون : شحجي
_ليش ضجت من جبت سيرتها.
آرون : وانتِ شذكرج بامي رجاء غيري السيره ولاتدخلين بهيج امور.
_ مجرد سؤال اجه علئ بالي شبيك انفعلت
هز راسه وسكت ماعرفت ليش ضاج من جبت سيرة امه وليش ميحب يحجي عنهاا
احس عنده اسرار هواي وحياته عبارة عن غموض
رغم كلشي سواه بيه اشوف بعيونه الصدك والامان اتمنئ لوو يحجيلي شنوو قصته وليش هيج سوه بيه.
آرون : يلا اني طالع انتِ نامي حته يدفه جسمج زين
_راح تروح وتعوفني ؟
آرون : لا ماروح بعد و ماعوفج وحدج رتاحي.
_فدوة لاتخليني وتروح
آرون : والله ماعوفج يلا نامي
هزيت راسي بأي سحب الجمريه بعدها عني حته ماحترك بيها باوعلي بهدوء صفن شويه وطلع.
خربط افكاري بتصرفااته وحنيته احس نفسي تميل اله كبريائي وكرامتي تمنعني من هل شيء.
هل انسان خطفني مهما يكون غلط بحقي ولازم ماتعاطف وياه لا اخلي نفسي تنعجب بيه لفيت نفسي بالبطانيه ونمت
...
تيمور : الئ متئ تبقه كاعد هل كعده عندك شركه وشغل ومسؤليات.
جاسر : انتَ اهتم بالشغل ماكدر اركز بشي حالياً
تيمور : حجيت ويه المحامي ليوم كال اقل شيء بعد 5 ايام ويطلع من السجن وترجع اليان للبيت
جاسر : ليوم خابرني الخاطف
تيمور : أيي وشكالك؟
جاسر : كال نتفق مكان واحد انتم تخلون ** يجينه واحنه نعوف بتكم تجيكم واي غلطه منكم تموت اليان.
تيمور ; كلشي مايكدرون يسوون جبناء همه لوو مايخافون من عدنه مجان استخدمو اليان كسلاح الهم.
جاسر : مع هذا ماكدر اخاطر بحياة اليان وأسوي اي تصرف غلط
تيمور : أذا عفناه ومسوينه شيء راح يفلت بعملته ومراح نحاسبه ونعلمه ويه منوو غلط راح يشوفنه خايفين منه
جاسر : جؤ مستحيل اعوف الموضوع يخلص بهل بساطه خلي يجي اليوم الي يطلع بيه واني اعرف كلش زين شسوي وشلوون احاسبهم بطريقتي.
تيمور ; تعجبني افكارك هواي هههه
جاسر : روح هسه للشركه واهتم بالشغل واني رايح اشوف المحامي
عافه وطلع من البيت خله راسه علئ الكرسي وهوه يفكر شلون يلزم الخاطف ..؟
...
اريانا ; رتبت اغراضي بغرفتي ونزلت جوه اساعد امي بالطبخ
للظهر اجه بابا واخوي من الشغل صبينه الاكل وكعدنه نتغده سويه
خلصنه شلت الصحون اسمع امي فتحت موضوع خطبتي كدامهم وكلتلهم اجت ليوم علينه ام هيثم.
بابا ماعترض بس مسلم كلها لازم اسأل عن الولد واشوف شنوو شغله بالضبط يلا نوافق عليهم.
سويت كهوه واخذتها الهم كعدت علئ طرف القنفاات.
كاعدين ونحجي كلام عادي دزتلي صديقتي رسااله كاتبه تعالي وياي اريد اروح للمول
هيه تجهز بنيشانها تريد تزوج عضيت شفتي بحيره اخاف احجي وميخلوني اطلع خصوصاً اخوي مسلم بأخر فترا والي صارر ويه اليان منعني من الطلعه
جنت عادي اطلع بكيفي ويه صديقاتي كتبت الها خلي اسال اهلي وردلج خبر.
_امم بابا عادي اروح ويه صديقتي للمول؟
مسلم : ويين احنه شحجينه
حازم : ويه منوو بابا
_ويه صديقتي أنفال تريد تزوج وطلبت مني اساعدها بختيار نيشانها.
مسلم : ماتروحين ماتوبين انتِ هذاك اليوم جان متي بالانفجار وخطف اليان مايهمج الموضوع لوو شنووو
حازم ; روحي حبيبتي بس لاتتاخرين
مسلم : صدك تحجييي
حازم : خليها تروح انشالله مايصيرلها شيء خلي تشتري الي يعجبها هل فترا وتزوج وتتندم لأن مانفذت طلبات اختك.
مسلم : استغفرالله ياربي صبرني
ابتسمت وكمت بسرعه صعدت لغرفتي بدلت ونزلت
_مسلم وصلني فدوة
مسلم : اريد انام روحي الابوي يوصلج
_بابا تعبان كوم انتَ فدووة
مسلم : امشي
طلع كدامي لسيارته رحت وراه صعدت اخذني لبيت صديقتي انفال جانت تحب اخوي بالجامعه قبل لايتزوج وهوه هم يحبها بس صارت مشاكل بينهم ونفصلو عن بعض ومن تزوج اخوي هيه اجت للعرس
واخوي كالي خليها تروح وبالكوه طلعتها وخليتها تروح حته متصير مشاكل.
جانت واكفه بالباب هيه منتظرتني وكف مسلم السياره باوعلها سحب نفس قوي ودار وجهه اجت صعدت وياي بالسيارة
انفال : سلام عليكم
مسلم : وعليكم السلام
ساق مسلم حسيت بيه كلش ضاج وحقه لأن ديوصل حبيبته بيده تجهز لنيشان عرسها بس همه تركو مابينهم شي بعد بس احس بعدهم يحنون لبعض.
هيه طول الطريق دايره وجهه علئ الجام وساكته واخوي كل شويه ينظرلها بالمرايه.
وصلنه للسوك نزلنه ثنينه اول مانزله بسرعه ساق وعافنه
بقت انفال تباوع وراه عضت شفتها ودمعت عيونهاا.
_خيرر شبيج
انفال ; ماكوو شيء يلا نروح
_راح تزوجين غلط تفكرين بأخوي هوه تزوج وصار عنده ولدد
انفال : موبيدي ثقي بالله موبيدي ابتعدت عنه بس كلبي وعقلي كلهن وياه ليش خليتي يجي ليش خليتيني اشوفه جاي احاول اتخطاء الموضوع
_والله مجنت ادري بيج راح تصعدين ويانه كلشي بالي اجيج ونروح وحدنه
انفال : انسي يلا خلينه ندخل
_لاتضوجين الحب موو كلشي بالحياة
انفال : متعيشين مرتاحه بحياتج أذا متلكين حب واهتمام.
_زوجج يحبج واكيد وياه راح تكونين سعيده وياه .
انفال : انشالله
دخله للمول اشترينه ملابس هواي ملابس طلعه ملابس بيت ملابس نوم احذيه مكياج عطورات بس مكثرنه هواي لأن تريد ترجع بعد هيه وامها واختها.
خلصنه طلعنه رحنه لمطعم قريب علئ شركة تيمور بالشارع المقابيلها.
طلبنه اكل وكعدنه ناكل سويه هل حجي العصر خلصنه وطلعنه اتصلت انفال بزوجها يجي يرجعنه
انفال : هسه راح يجي كرم يرجعنه
هزيت راسي بأي شويه وطلع تيمور من باب الشركه البس نظارته شافني رفع حاجب عبر الشارع واجه علينه بلعت ريكي وبقيت اباوعله
تيمور : شتسوين هنا
_اجيت ويه صديقتي
تيمور : لعفوو مشفتج
انفال : عادي
تيمور : يلا تعالو اوصلكم راح يصير اليل
انفال : اشكرك هسه راح يجي زوجي يرجعنه.
تيمور : اريانا تعاي انتِ
_لا عادي اروح وياها
تيمور : رجال ومرته شكوو رايحه وياهم.
فشلني بلعت ريكي وهزيت راسي بأي اخذت مشترياتي ورحت وياه بقت انفال منتظره زوجها
صعدت بالصدر خليت الملابس ورا صعد هوه لبس نظاراته وساق.
مخلي ريحه تجنن من تشمها تحس نفسك بغير عالم
تيمور : اي شلونج
_الحمدالله
تيمور : ليوم جنت ويه ابوج بالشغل
_شعندك
تيمور : مو ابوج مهندس بناء واحنه عدنه مشروع جديد وكال ابوي خلي هوه يستلمه ليش يروح للغريب وهوه خاسر بشغله هسه
_شكراً علئ مساعدتكم.
تيمور : احنه اهل مابينه شكر
هزيت راسي بأي وسكتت مادري ليش اخاف من تيمور واحس افكاره شريره
تيمور : هذاك اليوم عاملتج بانانيه اعذريني
_عادي ميهمني.
تيمور : متاكده ميهمج؟
هزيت راسي بأي ابتسم طلع جكاره ودخن دار وجهه عليه وكال.
تيمور : ترا اني ماعندي علاقه ويه شذر
_ميهمني حته لو جان مابينكم شيء اهتم بحياتي وبس وللعلم اني راح تزوج
تيمور : تزوجين ؟
_اي نعم
تيمور : منو
_جيرانه وجان زميلي بالدراسه
تيمور : يعني بينكم قصة حب
_ليش تسأل هل اساله شخصك بحياتي انتَ
تيمور : جاوبي
_شنوو جاوبي منتبهه لنفسك جاي تدخل بامور ماتعنيك
تيمور : اريانا سألتج سؤال جاوبي عليه
_انتَ لوين تريد توصل شعلييك بينه علاقه مابينه.
وكف السياره ودار وجهه يباوعلي بغضب بلعت ريكي بتوتر.
تيمور : ترا احنه نقرب لبعض يعني الي حق عليج
_حق عليه؟
تيمور : استغفرلله شوفي زواج ماتزوجين
_ليش عيني
تيمور : اني جنت ناوي اخطبج ..
...
نمت بتعب كعدت تقريباً العصر لأن اني الصبح وكعت بالمي.
مصخنه وجسمي كله عركان لأن مغطيه نفسي بـ 3 بطانياات خانكه روحي خنك
كمت واني جسمي مثل السعفه يرجف الدنيا مغيمه وبيها مطر وكفت بالباب اباوع
جواهر تخبز وصبيحه وآرون كاعدين علئ صفحه فارشين فراش ويشربون جاي ويسولفون.
من طلعت آرون شافني كام من مكانه واجه عليه بسرعه لزم ايدي وكال
آرون : شلون صرتي
سحبت ايدي عنه واني دايخه ومالي خلك حته احجي.
آرون : مصخنه.
خله ايده علئ جبيني لزمني من ايدي وكعدني باب الغرفه وكال
آرون : اكعدي رايح اشوف الحجيه اذا عدها علاج واذا ماكو اروح اجيبلج.
عافني وراح علئ صبيحه حجالها عني كامت واجت يمي خلت ايدها علئ جبيني شافتني مصخنه،
صبيحه : عدي حبوب بس صارله هواي خاف انوب يمرضها اخذها وروح هنا يمنه واحد صيدلاني عده علاجات ينطيها شراب حبوب أي شيء
آرون : وين صاير
صبيحه : هناك بهذيج الصفحه بس أسال عليه كلهم وين ابو زهراء ياخذونك اله
آرون : ماشي
صبيحه : خليها تلبس شال شعرها منثوره شلون ما تمرض.
باوعلي آرون رفع شعري عن وجهي صار وراي سواه الي ظفيره.
صبيحه : بكلشي شاطر
آرون : ههه مريضه ماكدر اخليها هيج يلا انطيني شال عبايه حته اخذها
هزت راسها بأي دخلت للغرفه طلعلي عبايه بعمري ملابستها ولا حته مجربتها بيوم ولا شال.
مد ايده الي هوه واكف باوعت الايده واني عيوني احسهن مثل الجمر.
مديت ايدي ولزمت ايده كومني عثرت رجلي مثل الحضنته لف ايده علئ ظهري من ورا وخلاني مستنده عليه حاولت ابتعد مسح علئ راسي وكال
آرون : ماتكدرين تتحركين خليني اساعدج
_لاتحضني وخر
ابتعد عني رجعت خطوات واني دايخه طلعت صبيحه انطتني شال خليته علئ راسي جابتلي عبايه ماعرفت لبستها لزمها آرون ولبسنياها.
هوه لابس زي عربي واني كذالك دشداشه وعبايه وشال.
لزم ايدي ومشينه مسافه عن بيت ام جواهر.
وكفنه قرب الشط ننتظر واحد من العدهم بلم.
_بردت خلي نرجع للبيت
آرون : لأن مصخنه بردتي هسه بس ينطوج علاج تصيرين زينه
_كله منك انتَ الوصلتني لهل حالة.
آرون : هههه اني شعليه كايلج تشمرين نفسج بالشط؟
_لوو ما انتَ جايبني لهنا مجنت راح اوكع ولا اتمرض ولايصير كل هل شيء بيه .
آرون : مجبور شسوي
_مراح اسامحك طول عمري علئ هذا التصرف.
آرون : گلبج طيب تسامحيني ادري بيج
_تحلم. حلم وبس ارجع افصلك من الشغل وعد
آرون : ياناكرة الجميل فوك ما افتر بيج وخايف عليج هيج تجازيني وتفصليني من الشغل.
_ههه ناكرة الجميل لوو متحجي هل كلمه احسلك لأن تعرف كلش زين منوو ناكر الجميل.
ضاج من كلامي دار وجهه عني وهوه يسحب نفس دنكت راسي واني احس الارض دور بيه شويه واجه ولد بالبلم مالته اشرله آرون اجه علينه
صعد آرون ومدلي ايده لزمت ايده وصعدت اخاف من هيج شغلات واتخيل نفسي اوكع مره ثانيه تحرك البلم صرخت وجلبت بدشداشة آرون
_رااااح نوووكع نزلنييي ماريد اروووح نزلنييي فدوووة
لف ايده علئ ظهري من ورا وسحبني يمه دنك راسه عليه يهمسلي بهدوء.
آرون : لاتخافين مانوكع تمسكي بيه واني ماعوفج الاخر نفس
الزمت دشداشته حيل واني ارجف طول ماهو يتحرك البلم اني مجلبه بآرون
كال آرون نريد نروح للدكتور اخذنه اله هم مكانه مثل مكان ام جواهر هور وبيوت من كصب وحيوانات
آرون : بس انتظرنه مانطول عليك هسه نرجع.
هز راسه بأي نزل آرون ومدلي ايده لزمته العبايه وكعت بالبلم انطانياها الولد اخذها منه آرون ورجع لبسنياها
آرون : خليها علئ راسج بويه
_ماعرف البسها
آرون : الزميها منا بايدج وهيه تثبت علئ راسج.
انطاني اطرافها من الصفحين لزمتهن لزم ايدي ومشينه سالنه علئ الدكتور دلونه علئ مكانه رحنه لبيته.
جان واكف بالباب يحجي ويه حجيه ويشرح الها عن العلاج شلون تاخذه
آرون : سلام عليكم
الدكتور : وعليكم السلام حبيبي اهلا وسهلاً
آرون : الدكتور ابو زهراء؟
الدكتور : أي وصلت
آرون : عندي زوجتي مريضه مرتفعه حرارتها بس تشوفلي وضعها.
باوعتله بطرف عيني مصدك نفسه هذا زوجته والله يالله
الدكتور : ادخلي بابا جوه
دخلت للغرفه بيها سرير وداير مداير ادويه وعلاجات.
شويه ودخل هوه وآرون جاب مقياس الحراره شاف شكد حرارتي شاف النبضات مالتي
راح علئ الادويه طلع حبوب وابر واجه نحوي.
الدكتور : مدي ايدج بابا اشكلج كانونه
هزيت راسي بأي مديتله ايدي شكل كانونه ضربلي ابره بيها وجعتني ايدي حيل غمضت عيوني ولزمت ايد آرون.
آرون : علئ كيفك دكتور جاي تأذيها
الدكتور : والله جاي اسوي بهدوء بس الابره دهنيه وتأذيها
الدكتور يضرب بالابره وآرون يمسح علئ ايدي حته يمشي العلاج.
خلص الدكتور وسد الكانونه انطاني 2 ابر وحبوب وشراب
دفع آرون فلوس وطلعنه من عنده يمشي كدامي آرون واني حايره بالعبايه كل ساعه وكعت من راسي وطلع شعري.
دار وجهه عليه يباوعلي ضحك ورجع يمي شالها خلاها علئ راسي لزم ايدي وكال
آرون : مالابسه عبايه من قبل
_ولا مره
آرون : واضح
_آرون عفيه خلي نكعد ماكدر امشي رجليه ماكدر احركهن بعد
آرون : هسه بس شويه ونصعد بالبلم.
_ماكدر والله رجليه ترجف
آرون : اشيلج؟
_لاااااا.
آرون : براحتج يلا امشي علئ كيفج مابقه شيء ونوصل.
مشينه مسافه رجعنه صعدنه بلبلم لزمت ايد آرون حيل خليت راسي علئ كتفه واني متغطيه بالعبايه ودايخه
هوه لاف ايده عليه حته ما اوكع دخت من الابر والعلاج نعست وغفيت علئ كتف آرون
فزيت علئ صوته يكعدني فتحت عيوني بتعب
آرون : يلا ننزل وصلنه
هزيت راسي بأي واني افرك بعيوني نزل كدامي مدلي ايده لزمت ايده سحبني عليه وشالني
انصدمت من تصرفه لفيت ايدي علئ ركبته واني متوتره.
آرون : ادري بيج دايخه وماتكدرين تمشين
_لا اكدر نزلني امشي مشي
:: علاجكم خويه
آرون : اخذي من ايده
اخذته واني شايلني آرون ابتعد عن الشط راح الولد مشه مسافه بيه
_نزلني عفيه اريد امشي
آرون : ماشي
نزلني علئ الارض بقيت اعدل بالعبايه علئ راسي واني متوتره.
آرون : يلا
_وين
آرون : للبيت غير.
هزيت راسي بأي مشينه سويه رجعنه لبيت صبيحه شافتني جواهر من بعيد اجتني تركض خطيه.
جواهر : ها خيه شلون صرتي سألت امي عليج كالتلي رحتي للدكتور مصخنه
_شويه احسن
جواهر : تعاي
اخذت العلاكه مال العلاج من ايدي ولزمت ايدي تمشيني.
آرون عافني وراح مشه كدامنه وصلت للغرفه كعدت بالباب صار الغروب غابت الشمس.
جواهر : رايحه اسويلج لگيمه تاكلينها
_ماجوعانه والله
جواهر : لأ خيه مايصير عدج علاج غير تاكلين حته تشربينه موزين عليج.
هزيت راسي بأي عافتني وراحت اباوع علئ آرون واكف علئ جرف الشط ويدخن
لشوكت ابقه هيج اني شوكت اخلص من هل موضوع ورجع لبيتي.
شمرت العبايه والشال لان خنكت روحي بيهن ماعرف البسهن عدل.
اجت جواهر فرشت حصيره كدام باب الغرفه وجابت اكل مسويه تمن وروبه ودجاجه مال عرب شوي وزلاطه وخبز
راحت صبيحه علئ آرون تجيبه يتعشه ساعدت اني جواهر بالصب هيه تصب واني اخلي بالصواني
صينيه الي اني وآرون وصينيه جواهر وامهاا.
اجه آرون كعد مقابيلي شلت الصينيه خليتها كدامه وكعدت يمه.
صبيحه : اكلي يمه حته تشربين دواج
هزيت راسي بأي فلس آرون من الدجاجه لحم وخلالي علئ التمن باوعتله وبتسمت يحسسني طفله وماعرف اكل
آرون : اكلي بويه حته تشربين علاجج.
هزيت راسي بأي تعشينه سويه صبولنه لبن حيل عجبني لبنهم بي طعم طيب.
شلت الصواني ويه جواهر ماخلتني اغسل وياها شكد توسلت بيها ماقبلت كالت انتِ مريضه
رجعت كعدت وياهم انطاني آرون علاجي حبايه وشربت من الدواء.
خله ايده علئ جبيني يشوف حرارتي نزلت لوو بعدها
آرون : زينه احسن من العصر
صبيحه : أي والله يمه خوش يطي دوه هذه الدكتور.
آرون : اي صح
صبيحه : انه رايحه اصلي ضلو كاعدين انتم.
هز راسه بأي عافتنه ودخلت للغرفه تمدد آرون خله المخده يمي وخله راسه عليها.
رفع راسه يباوعلي اني كاعده واباوعله ابتسم وكال.
آرون : راسي يوجعني ممكن بس تلكينه الي
_خاف ماتقبل؟
آرون : مساعده شبيج موو ليوم نقذتج من الموت.
_ليش ماجبت علاج من رحنه هسه عرفت روحك مريض ..!
آرون : جنت خايف عليج مامفكر بنفسي
_اووي عيني شكدد حنين لعد
آرون : كلي حنان ومشاعر.
رفعت عيوني بملل باوعلي بنظرات برائه عود دلكي راسي سحبت نفس قوي وتقربت يمه خليت ايدي بشعر راسه وبقيت احركهن غمض عيونه هوه
_آرون
آرون : هممم
_نمت شنوو
آرون : خليتيني انعس
_انتَ هم مصخن اشو راسك حار
مديت ايدي علئ جبينه كاب نار ومحاس علئ نفسه
_آرون كووم انتَ مصخن
آرون : هسه اصير زين
_شتصير زين جسمك صاير نار.
آرون : رجعي ايدج خليها براسي حته انام ورتاح
_لا شوف راح اجيبلك من علاجي اشرب من عنده تمام
هز راسه بأي كمت بسرعه دخلت للغرفه اخذتله علاج ومي ورحت عليه لكيته نايم خليت ايدي علئ كتفه
_آرووون اكعد هاك اشرب علاج
فتح عيونه حمر كعد علئ حيله اخذ من ايدي وشرب انطيته من الشراب هم
رجع تمدد بقيت كاعده يمه واني متوتره وخايفه عليه
ليش خايفه مادري احس نفسي متعوده عليه شلون واحد يقربلي واني وياه مكان جديد علينه.
خليت ايدي علئ جبينه بعده حرارته مرتفعه كلش كمت اخذت طاسة مي ورحت لصبيحه طلبت منهاا وصله قماش
اشرتلي علئ البوفيه فتحتها واخذت شال ورجعت عليه
ابلل طرف الشال واخلي علئ جبيني يصير الشال حاااار.
بقيت هوواي اسويله كمادات اجت كعدت يمي جواهر.
جواهر : خطيه لأن شمر روحه وراج تمرض
_أي والمشكله حرارته مجاي تنزل ابد.
جواهر : جا هوه ليش ماضرب ابره
_مادري بيه هسه يلا حس بنفسه مريض
جواهر : خطيه والله
_شسوي شلون اخلي حرارته تنزل
جواهر : شربي من علاجج بلكت يصير زين.
_شربته ومفاد.
جواهر : چا هسه يصير زين لاتخافين هذا الدكتور ينطي خوش علاج
_انشالله
جواهر : انتِ تحبينه. ؟
_اني لاا اكيد بس لأن ساعدني وجاي اساعده خطيه.
جواهر : چا هوه مبين يحبج هواي يهتم بيج وحته شمر روحه وراج وانطاج نفس منه كدام العرب كلهاا .
_انطاني نفس شقصدج
جواهر : هههه خيه يجوز يسمعنه عيب منه
_لا نايم احجي شنوو قصدج
جواهر : غير مابيج نبض وباسج من حلكج وانطاج نفس منه ..
