رواية كان اخي الجزء الثاني الفصل الثامن بقلم مجهول
ضربت على صدري من كالي هيج
رحت بدون وعي عالموبايل اخابر علي وايدي ترجف اتصلت يكلي مغلق او خارج نطاق التغطيه هيين فقدت اني حسيت متت معد اكدر اجر النفس ولا اتحرك جامدة بمكاني
حسين:-كاعد اتصل باصدقائه هناك لو مغلق لو محد يجاوب
سميه:-يايماااه ياااوليدي ...راح هيثم راااح
طلعت نور و هبه:-شكو شصايررر
سميه:-اخوووج ياهبه اخوووج
هبه:-يمااااااه شاكو شبي هيثم عفيه شبي شاكو
عمتيض وكعت بالكاع
احس معد اشوف مثل الخيال بس اذكر عمتي واكعه وهبه تعيط فوكها وحسين ونور يحاولون يكعدوها ..اجه حسين عليه :-ملك ملك اصحي اصحي ...
ملك:-وديني وديني علي ..كمت على حيلي
حسين:-خررب ابوي وينه..صيحت بعلو حسي على حسين
ملك:-ودييييييينييي عليييي اريددد اررروووح اشووفه
حسين:-وين تروحين انتي الدنيا مكلوبه
ملك:-بالجهنم ماعليه بالقران اروح وحدي
طلع حسين واني طلعت وياه بدون اي وعي حتى حجاب مالبست اله هبه اانطتني حجاب.. رحنه على ابو فهد شغل السيارة جان يجي ابن عم هيثم نزار هم سامع بالخبر وصعد ويانا وطلعنه. كل الطريق ابجي وادعي اتمنى بس احد يتصل يكول مابي شي هيثم اي شي المهم انه بخير حتى تردلي روحي ..احسس الطريق صار شطوله معد نصل اتصل خالي على حسين وكاله اني هم بالطريق من سمعت اجيت...وصلنه باوعت هوسه جبيرة واستعافات وبيكمات شرطه والمكان نصه مشعول اباوع بين الوجوه اريد بس اشوف وجه هيثم او المحه بس انو بخير وعايش.نزل حسين ونزار وابو فهد وكالي ابقي بالسيارة..راحو يم شرطه وشباب وكافين كام يحجي وياهم بقو يحجون اباوع على حسين خله ايديه على راسه...تخبلت هين اني معد اكدر اريد انزل من السيارة ماكدر احس تجتفت او بالاصل مااريد انزل خايفه لااسمع شي مو زين ..بس بقيت بمكاني ودموعي صب بدون توقف وجسمي يرجف..اجو صعدو بالسيارة
ملك:-حسين كلي شاكو عفيه لاتقبي عليه
نزار:-الانفجار صاير بدايه المدخل والمكتب الي يشتغل بي هيثم وربعه يم المدخل.الشرطه يكولون اخذوهم بالاسعاف للمستشفى بعد مايعوفون هس رايحين للمستشفى...من كال هيج بقيت ابجي والطم كل الطريق رجع خابر خالي حسين كاله تعال للمستشفى لان ماخذينهم هناك.لاتروح للدائرة..ماصدكت على الله وصلنه المستشفى..نزلنه عالسريع شفنه المستشفى مكلوب هم مليان شرطه وموضفين كلهم على نفس الموضوع...حسين شاف واحد هم موضف بالدائرة ويه هيثم يعرفه ايده مشدودة وجهه اصفر كاعد عالمقاعد راح حسين علي وسأله على هيثم .رد كال:- جنه كاعدين بالمكتب وعمار وهيثم كالولي روح جيب الاستمارات الي بالطابق الثالث صعدت اني صرت بالطابق الثالث جان يصير الانفجار وكعت ماعرف شنو صار وراها بس صحيت اني هنا والباقي كلهم جابوهم هنا اسأل الشرطه الواكفين هناك
رحنه عالشرطه وسألهم حسين ..واحد من عدهم كال:-اني شلتهم بيدي اثنين ماتو لان محروكين واي نفس مابيهم و3 عايشين اخذوهم للعمليات بالطابق الثاني..كمت ابجي واحجي
ملك:-بس عفيه خما هيثم وياهم..رجع كالي:- والله ماعرفهم اني ماعرف ياهو هيثم بالضبط
حسين:-امشو خل نصعد بالطابق الثاني ننتضر الدكتور يطلع..صعدنه واني بهذا الوكت مابيه اي حيل احس الدنيا ضلمه واريد نور ماكوو...صعدنه فوك بالطابق الثاني كالولنه هنا غرفه العمليات اكعدو بالمقاعد ..بقينه كاعدين وندعي كل مايمر واحد حسين يسأله بس محد يعرف وهم اكو عوائل كاعدين ويانا نفس الحاله اجه ضابط وياه اثنين شرطه راح نزار وحسين وشباب هم عليهم سألوهم على اسماء الي ماتو والي عايشين
رجع كال:-الي ماتو مانعرف منو بالضبط لان محروكين ننتضر اهلهم يجون ويشوفوهم والي بالعمليات اي اسمائهم يمنه عرفناهم عالباجات .كلها كامت تكول منو ومنو كولولنه الاسماء ...بهاي اللحضه اني ماضل بيه قطرة دم اريده يكول ومااريده .حسين يباوعلي وعيونه حمرر... طلع الضابط باجات من جيبه وقره الاسماء
كال:-عماد عبد الجبار وهيثم محمود وياسين عبدالله هذوله بالعمليات هس ادعولهم
من قره اسم هيثم كبل باوعت على حسين ورحت حضنته من دون ماادري بنفسي من الفرحه ماصدكت انه عايش رجعلي دمي.وبهاي الاثناء اكو عوائل اسماء ولدهم مووياهم يعني ماتو بقو يصيحون ويبجون ..اوووف شون حياة بخبر تموتك وبخبر ترجع تحييك..بقينه ننتضر العمليه تخلص
حسين خطيه كبل خابر على خالي وكاله هيثم بالعمليات
..ورى ساعتين طلعو 6 دكاترة..وكلنه رحنه نركض عليهم ونسألهم
الدكتور:-سوينالهم العمليات 2 منهم حالتهم بعدة خطره مو مستقره وواحد زين تجاوز مرحله الخطر.كال هيج وراح... بعدين طلعولهم من العمليات 3 مددين عالسديات باوعت هيثم وياهم وراسو مشدود بلفاف وجهو اصفر ..متت بجي من شفته .بس بقيت احمد الله انه عايش .ورى شويه اجه خالي وعمتي..خطيه عمتي شحالها بهالساعات القليله وجها نكلب ومتغير...بقينه لليل بالمستشفى..طلعن ممرضات طلبت منهن اشوف هيثم..كالن مايصير.بقينه الى ثاني يوم اجه الدكتور طلبنه منه نشوف هيثم.قبل وماكال شي فات هو وفتنه وراه..عمتي من شافت هيثم رجعت تبجي.الدكتور كال اذا تبقين تبجين راح اطلعكم برة لان راح يتأذى المريض هيج..فحص حالته .وسألنا كلناه شنو وضعه هس.كال:-الضربه مأثرة على راسه ماكدر اكللكم شي هس اله ننتضر كم يوم.مرت الايام واني بالمستشفى ويه عمتي اروح للبيت اشوف فجر واخلي عند هبه ونور.ونرجع اني وعمتي للمستشفى حتى نبات هناك وخالي وحسين هم ويانا ...مرر تقريبا 3 ايام واجه الدكتور هم فحصه وكال:- ابنكم داخل بغيبوبه قويه
تخبلنه من مال هيج
عمتي:-شوون يعني بغيبوبه هاي صارله اسبوع هيج
الدكتور:-..الغريب انه المريض اي استجابه ماكو ..يعني ماعندة ردة فعل .الوياه الي سوينالهم العمليه هس زينين تحركو وفتحو عيونهم بس هو اي حركه ماكو..حيل خفنه من كال هيج
ملك:-ادري شنو يعني وضعه بهيج حاله شتسووله
الدكتور:-مانكدر نسوي اي شي غير انه ننتضر اي حركه منه...والغيوبه مامعلوم يجوز يوم ويصحه ويجوز شهر ويجوز اكثر.الله اعلم انتو ادعوله...
ملك:-اكدر المسه عادي
الدكتور:-اي عادي ...اني اترخص منكم..
رحت على هيثم اباوعله نص وجهه يبين من اللفاف والاوكسجين والصوندة الي بخشمه كمت اخلي ايدي على وجهه والمس بي
ملك:- هيثم شوكت تكعد عفيه لاتطول والله مشتاكتلك حيل مااريد ارجع للبيت ولاللغرفه لان انت ماكو..بقيت اسولف وياه بصوت ناصي وابجي وعمتي تبجي وياي..مرررت فترة وحنه على هاي الحاله ارجع للبيت احس البيت كبر واكثر شي اكره الغرفه بمدي ماافوت عليها تخنكني..اريد بس ارجع للمشفى عالاقل احس نفسي قريبه علي ويمي . احس بأمان اكثر تجي مرات هديل للمشفى وخواتي واخوتي كلهم يجون يشوفونه ويروحون..صار تقريبا شهر وهو على هاي الحاله..فبيو خابرتني صديقتي كالت النتائج طالعه بي لازم نروح للمدرسه ناخذهن...رحت ثاني يوم للمدرسه واخذت النتيجه.باوعت درجاتي كلهن بال90 بس درجه وحدة88.بجيت من شفت نتيجتي مافرحت تمنيت هيثم يشوفهاا اكيد جان فرحت لو هو وياي...اخذت النتيجه ورجعت ويه صديقتي كل الطريق ابجي وصبت البيت بدلت وشفت فجر هم سبحته ونيمته .اخذت النتيجه ورجعت للمشفى ..صارت بيتي الثاني وبدون حتى مااكول لاحد بس اروح على ابو فهد ويوصلني لان العيله صارو يعرفون وين اروح...رحت علي وشايله النتيجيه بيدي مسكت ايدة وكمت ابجي ضلييت اله ما هلكت احجي وياه اريد بس يحرك شي من جسمه او يفتح عينه ماكو.رحت للدكتور سألته على حالته كالي:- اي تحسن ماكو نفس الشي.بالزايد حبطت ...ورى فترة بطني كامت تكبر وصارت بارزة...اخذت فجر وجبته للمشفى مدري ليش جبته وياي هو لاراح يشوفه ولاشي بس حتى هو يشوف ابوه خطيه....مليت من هاي الوضعيه حيل .... مر تقريبا 9 اشهر وواجه موعد ولادتي واني حته مااعرف شنو بطني ولاجان هاممني هالشي جنت بالمشفى ويه عمتي جنت اعرف بهاليومين موعد ولادتي وعمتي جانت تكلي ابقي بالمشفى اخاف يصير عندج طلك حتى عالاقل يمج الدكتورات..فبذاك اليوم حسيت بوجع قوي باوعت شفت نفسي مليانه مي.عرفت هاذا مي الراس.عمتي جانت نايمه كعدتها وكتله هيج وهيج كبل اخذتني على صاله الولادة..وولدتني قابله ولادة طبيعيه احس متت من الوجع بس ماصيحت حتى بهاي اللحضه جنت ادعي لهيثم انو يكعد ويصحى. .الحمدلله عدت على خير.واول ماولدت كبل نمت من التعب بدون حتى مااشوف المولود كعدت ورى شوي باوعت عمتي وهبه ونور وهديل فوكي
هديل:-الحمدلله على سلامتج وسلامت ابنج ياغاليه
ملك:-الله يسلمج...وين الطفل ماشفته
هديل:-باوعي يمج..باوعت الطفل يمي نايم وحيل صغير
ولد مو؟
عمتي:-اي ولد..بس الدكتورة كالت بنيته ضعيفه ....لان ماجنتي ديرين بالج على نفسج بهاي الفترة
ورى شوي فات خالي وحسين سلمو عليه
عمتي:-راح ناخذج للبيت هناك ندير بالنه عليج
ملك:-وهيثم شون؟
عمتي:-مانخلي وحدة يوميه اني اجي اشوفه وابو وحسين يجون
اخذوني وياهم واني ابجي ماريد اروح...اصلا ماجنت اريد اولد لان اعرف راح ابقه بالبيت وماكدر اروح اشوفه ... بقيت بالبيت تقريبا شهرين ولي هس ماسمينا الولد اني ماقبل احد يسمي اله يكعد هيم كلما يريدون يسموه اكوللهم اصبرو بلكي يكعد هيثم وهو يسمي..كمت اكوللهم اريد اروح للمشفى. كل مااريد اروح مايخلوني يكولولي وين تروحين وانتي انفاس وابنج صغير لازم ترضعيه...خليت حسين يجيبله حليب وبطل على مود مايتعود على صدري لان ماكدر ابقه بالبيت لازم اروح لهيثم...جابله حسين بالبدايه مايقبل يشرب من البطل بس عودته علي..وصيت نور وهبه علي.وطلعت للمشفى عمتي ماقبلت بس مادحكت عليها رحت علي وشفته كبل حضنته احس مشتاكتله موووت..كمت احجي وياه واكله ابنا صار عمره شهرين وانت ماكعدت شوكت تكعد ماتكلي...اووف مر تقريبا من يوم الانفجار الى هس سنه و8 اشهر وهيثم على هاي الحال بيوم رجعت باليل للبيت ...من صدك جانت الدنيا طالعه من عيني.. الساعه 11 عمتي جانت تقره قران ..واني بس افتر مثل المجنونه احس ايست من حالته واكول مستحيل بعد يصحى ويرجع للبيت .ردت اسوي شي بنفسي واخلص..ارجع اباوع على فجر وابني ومكدر اسوي شي اكول يجوز يصحى بأي لحضه واخاف اتندم....صعدت عالسطح جانت الدنيا كمره باوعت عالسما وكمت ادعي بحياتي ماحسيت بقرب من الله بكد هاي اللحضه..دعيت وكلت:يارب تعبت واحس بعد ماتحمل وانت تكول بكتابك.لايكلف الله نفسا اله وسعها.ياربي اني هذا حدي .نفسي بعد ماتتحمل اكثر لو تشافي هيثم وتريحني لو تاخذ روحي واخلص ...بقيت عالسطح مانزلت بس ادعي فجاة حسيت براحه فضيعه مانساها ابدد..صدق الله بقوله(الا بذكر الله تطمئن القلوب) اطمئنيت حيل سمعت الجامع اذن رحت صليت ونمت ..كعدت الصبح هم ورحت للمشفى حسيت نفسي احسن من كل يوم هم بقيت اباوعله واحجي وياه بس هم ماكو استجابه رجعت العصر للبيت على مود الجهال خطيه اشوفهم لو ماهم اصلا ولاارجع للبيت..هم رجعت ثاني يوم وكعدت يمه واباوعله وابجي..كمت وكفت يم الشباك واباوع عالمكان سمعت صوت كبل باوعت شفت هيثم كاعد يرمش تقربت علي كام يفتح عيونه شوي شوي....انثولت هنا اني
صدق الله عندما يقول(وأذا سألك عبادي عني فأني قريب اجيب دعوة الداع اذا دعاني )
كمت اسولف وياه:-هيثم تسمعني دنشوفني انت..احس يريد يحجي بس مايكدر..رحت عالممرضه كتلها فتح عيونه راحت للدكتور وصاحته اجه الدكتور وشافه..هيثم بهاي الاثناء عيونه مفتحه بس موكلش
الدكتور:-تسمعني؟
هز راسه هييثم....اني معد اعرف شنو اسوي هو فتح واني رجعتلي الحياة..اريد امسك الموبايل تااخابر معظ اعرف بالكوة لكيته بالجنطه خابرت على حسين كتله هيثم فتح عيونه..خطيه حسين مو مصدك يكلي كل عقلج تحجين ...فجاة سده عرفت انه جاي
ملك:-ها دكتور شونه هس
الدكتور:-نكدر نكول الحمدلله لان فتح هاي معناها انه بخير
ملك:-زين راح يكدر يحجي لو لا
الدكتور:-اي طبعا كلشي ممارسه انتو هم ساعدوه
بقه الدكتور يحجي ويه هيثم ..هو بس يهز راسه او مرات يرمش...
اجت عمتي وخالي وحسين مومصدكين شافوه مفتح كلهم كامو يبجون..اني رحت بصفحه وسجدت سجدت شكر لان استجابلي الله
مر اسبوع واحنه نحاول ويه هيثم..بعدين كام يحرك ايده ويسولف بس شي قليل يوم عم يوم يتحسن ويصير احسن..بهاي الاوقات اني احجي وياه واسولفله كلشي وهو يسمعني....كتله اني ولدت بس عقد حاجبه حسيت مثل مستغرب. يمكن لان مايدري هو صايرله هالمدة بالمشفى..مر اسبوعين وكام يحجي حيل زين...اول شي كاله اني شكد صارلي هنا؟
كلناله سنه و8 اشهر. ماصدك حيل تفاجأة...اجه حسين شايل فجر وابنه الي لي هس بدون اسم..حسين كال لهيثم تعرفه منو هذا
هيثم:-اي...ابني .شنو سميتو
ملك:-ماسميناه ماقبلت احد يسمي اله تكعد انت..بس هس مادام كعدت راح اسمي اني (فرج) لان الله فرجها علينه...بعد كم يوم كام يتحرك ويوكف على حيله ويحجي يعني حيل زين صار..الدكتور كال عادي يطلع من المشفى وضعه حيل زين....اخذناه ويانا للبيت ....اول مافات للبيت بس يباوع بعيونه للبيت مثل مستغرب او مومصدك انه كل هاي المدة عايف البيت ...اني وهبه وهديل دموعنه بس تجري ....ورى ما رجع للبيت واحس رجعت الفرحه للبيت والابتسامه للكل..كمت احجيله كلشي من يوم الحادث الى ماصحه وطلعت النتيجه وشوفته اياه هو بس يسمعني ومبتسم
اني مثل المخبله كل شوي مثل اصفن او التهي بشي ارجع اروح احضنه ..طبعا هاي من رجع هيثم للبيت قبل 5 اشهر من هذا الوكت يعني ب2019 بشهر 3 يوم4
والى حد هذا اليوم الحمددلله هو بخير واني لو ابقه كل عمري احمد الله ماييكفي لان رجعلي هيثم للبيت..
هاي قصتي لهنا وتنتهي اتمنى تكون عجبتكم ولو ضايقتكم لان البارتات قصيرة وجان اكو تأخير بالنشر....يتبع مع قصص جديدة ومشوقه ايضا
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
