رواية عشقتة حتي اذلني الفصل التاسع بقلم نوران
مودة :
رجعنا لبغداد وبديت اشتاق واحن بس لازم انسى مسكينه علياء اخرب حياتها وخصوصا من اشوفها تداري خضير وتحبه والغريب هو هم يبينلها الحب وما يكسر بخاطرها ابد ليش يريدني اذا ما عنده مشاكل وياها خلي ينساني وبعد ابد ما اروح الهم التهيت بالبيت وشغله خصوصا اهلي كلهم موضفين وطلاب وبس اني ابقى بالبيت ما يفوت يوم ما اتصل على غدير وما انساها ابد بحيث تكلي حتى امي ما تسأل بكدج وخطيه تفرح باتصالي علاقتها بجعفر على حالها وهاي الهم شهرين من اتزوجوا وهي تراوح بمكانها ما اكدر الومهاعلى اختيارها واقسى وياها بالكلام بس كله الذنب منها ابويه ما جبرها ولا احد جبرها بس هي اختارت اتصلت عليها وكالت هي وجعفر يجون وبديت احضر اللي تحبه وتشتهي وحضرتلهم غرفه الهم عسى هنا يقربون اكثر ويفشل من اهلي يطلع من الغرفه بالليل كملت الغداء واجا بابا ومن عرف غدير جايه فرح وراح جاب اكل من المطعم كل اللي تحبه كلنا ندريها تحب الاكل وصلوا ومن دخلت جفلنا بيها عيونها رايحه وجهها شاحب وضعفانه كلش بعد السلام وارتاحوا شويه واجوي باقي اهلنا تغدينا واحنا ميتين من شوقنا الها ولسوالفها غدير حلوة المعشر لطيفة اللسان ما يمل اللي يكعد يمها تحجي بهدوء وحجاياتها موزونه وحلوة ودائما سريعة البديهة وحاضرة النكته عدها دائما تضحكنا بس بنفس الوقت قلب ابيض محد شايله وروح طيبه بهذا اليوم كلنا عرفنا هاي مو غدير ساكته واكلها قليل كلش واللي انتبهت عليه جعفر كاعد يمها ويبين مهتم لان كل شويه يكول الها اكلي وهي تاكل لكمه ووياها صفنه طويله
اريد اساعدها وما عندي اي حل غير احجي ويه احد من اهلي يشوف جعفر ليش هيج يسوي وياها بس هي ما تقبل بتدخل احد وخصوصا امي ما تريدها تحجي على جعفر
كملنا الغداء وراحوا للغرفه مالتهم واني رجعت اغسل مواعين واعزل المطبخ وانتظر غدير تطلع وماكو طولت جوه واني كاعده على نار اريد نسولف واشوفها اكثر اعرف اخبارها
وره ساعه طلعت بس مبينه شبعانه بجي رحت اخذتها وصعدنا لغرفتي اول ما دخلنا وانفجرت بالبجي وحضنتني اريدها تسكت حتى افتهم منها ما تقبل تسكت
-شبيج يا عيني مو خبلتيني شنو اللي صار
-مودة اريد ابقى هنا جعفر ميريدني
-لج شبيج غدير شنو هالحجي اعتبريه ما يكدر انت مو اول وحدة حبيبتي هالكلام ميصير بعدكم بالبدايه
-بس هو مو طايقني وما يواطني وين ما اصير هو بغير مكان تلاكيه وفوك هاي يكولون مغيرته عليهم وطلعوني مو خوش ادميه
-حبيبتي غدير طولي بالج ابقي يمنا فد يومين ارتاحي ومن تشوفين نفسج مستعدة يجي ياخذج
-ما يقبل يريدني ارجع وياه
-غدير تره خبلتيني شنو مره تكولين ميريدني ومره ما يقبل تبقين هنا
-هو اني افتهم منه شي حتى افهمج
-حبيبتي ابقي هنا لا تطلعين من الغرفه لا يشوفوج اهلنا واني راح احجي وياه تبقين شكم يوم ترتاحين
طلعت وعفت غدير ورحت لجعفر ولكيته كاعد بالحديقه يدخن طلعت بره يمه واخذتله عصير بس شافني سألني عنها
-شلونها هسه ما هدئت
-لا جعفر شنو سالفتكم انت ما انجبرت تاخذ غدير شنو هالاسلوب اللي تعاملها بي
-مودة المسألة بيناتنا وهي تعرف وضعي زين واني بالبيت ماراح اخلي احد يحاجيها لو يضوجها بعد بس خليها ترجع وياي وتشيل فكرة اعوفها ما اعوفها اني
-شنو هالانانيه جعفر غدير بشر ومو اي بشر انت تدري بيها قبلت بيك بس لان شافت ابونا مهموم وما رادته ينقهر فكافي قرر اذا تريدها هسه اخليها تمشي وياك واذا تخليها على هذا حالها لا والله ما اقبل بأذيتها غدير ما باقي بيها شي مثل ما كان واني اقترح تعوفها عدنا هاليومين ترتاح واني اتصل بيك
ضل بيومها جعفر وبات عدنا بس غدير تكعد بابعد مكان عنه اهلنا انتبهوا وامي سألت غدير شنو الي صاير بينهم جاوبتها من يمي انه مشكله صغيره بينهم وغدير راح تبقى عدنا شكم يوم لان جعفر عنده شغل
رجع جعفر لبيتهم وبقت غدير يمي ويا فرحتي بيها النهار كله نسولف واحاول اضحكها وانسيها الهم وكل ما يجي ذكر جعفر تغير الموضوع اخير شي قنعتها تتصل بي ونشوف رده
غدير
وصلت لاهلي كنت تعبانه كلش ومنهاره اهلي خطيه فرحانين بيه بس اني ضايجه من جعفر بقينا شويه وياهم وهاي مودة محضرة غرفه النا بالبيت وحدنا ضحكت على افكارها من دخلت لكيتها مخليه سريرين ابو النفر سويه وفارشتلنا فرشه مال ماما حلوة دخلنا للغرفه وجعفر قفل الباب وتقرب مني اني هنا ما رايدته ولا طايقته ولو بيدي اندمه عاللي سواه ويايه خلال هالشهرين تقرب اكثر واخذني بحضنه دفعته قوي
-غدير هاي ليش
-مو انت اللي ما تريدني اني ما اريدك كالوا الي مريض وقبلت بيك وكلت اني وهو وبيناتنا وممكن يتقبلني شويه شويه ويحبني وبنيت احلام وامال وتالي صحيتني على رفض وابعاد
-غدير اني صح جاي اسولف وياج وسويت اللي ترديه مو معناتها تتجاوزين مريض شنو استحي اني زوجج لا تخليني اندم مسويلج مقام وقدر وانطيتج اكثر مما تستحقين
عليت صوتي اكثر
-اي كالوا مريض وانت فعلا مريض اهلك يكولوها وكل اللي حواليك اخاف ما سامعها اسمعها مني انت واحد مريض وخلص ما اريدك وماكو بيني وبينك غير ورقه خلصني منها وطلقني
بعدني دا اسولف اجاني راشدي فر راسي دفعته قوي وضليت ادفع بي ضربني ثاني بعمري محد ضاربني شكد حاولت اتصنع قوة ما كدرت نزلت دموعي ودنكت حضني قوي لصدره وضليت بحضنه فتره طويله وكل شويه يبوسني ويعتذر-غدير اني ما اقبل على الكلام اللي سمعته كله وراح احسب نفسي وياج تعادلت اني اذيتج بفعلي وانت اذيتيني بكلامج ادري بروحي سويت شغلات تدل اني مريض بس اخر شخص ممكن يسمعني هالكلام انت لان تريدين الصدك ما اكول احبج لان لساني ما متأكد بس الج مكان بروحي وما اسمح الج تتركيه تعالي بحضني نامي
-ما اريد
-شنو ما تريدين اني لو حضني
-كل شي ما اريد عوفني يم اهلي
-ما اعوفج وترجعين ويايه
-ما ارجع
-ها
زاد البجي وعله صوتي
-اي ما ارجع وياك انت ما تريدني واني ما اريدك
-منو كال
-انت من اول يوم شفتني كلتها ولساني احسها خايف من كلام الناس وتريدني ارجع وياك مو
-سدي حلكج غدير
-لا ما اسكت هاي الحقيقه انت ما تريدني بس اهلك واهلي يجبروك تتحملني
عييطت عليه وعفته وركضت طلعت وبعد ما ردت احتك بي وفعلا بقيت يم اهلي وايام حلوة تونست بيها عدهم بس ناقصني شي وابويه كل يوم والثاني يسألني ها يابه شوكت يجي زوجج عليج ويسمع بيه انه المرأه مكانها يم رجلها لاول مره احس اني ما انتكي لهنا وابويه ما يريدني هو ما بين هالشي بس هي مسألة احساس وفوك كل هذا مودة كل يوم والثاني تسمعني كلام تريد تذكرني بجعفر وبالاخير جابت موبايلي وجبرتني اتصل عليه اوى رنه رد عليه بصوت ملهوف شنو هذا نفسه جعفر
-الو هلا غدير
-هلو
-شلونج اخبارج اهلج شلونهم
-زينين الحمد لله
استمر فتره يحجي واني ساكته واجاوب بس على كد سؤاله
سكتنا فتره وهو ساكت اني ما كدرت احجي شي بعد
-ها غدير نضل ساكتين لو تحجين
-ها ما ادري
-شنو ما ادري يلا اني اسولف مشتاقلج
-شنو
-شبيج هههه مشتاقلج وميت من الشوق اجي لو بعد تبقين
-ها
-راح نكضيها ها وشنو اليوم كولي اجي
-بكيفك
-هههه بكيفك وبصوت ناصي يعني لا تجي مو
-لا مو هيج
-جا شلون مو مرمرتيني احجي
-جعفر اي تعال بس ما ارجع اني وياك هسه
-ليش لان مريض وتخافين اغير كلامي
-لا والله اووف جعفر اسفه والله
-لا تعتذرين كتلج تصافينا اني ضوجتج وانت رديتيها
مودة:جعفر تعال اخذها وخلصني عاد موتتني شكد فاهيه اي تريدك تعال
غدير :لج اش اسكتي
تعاركنا اني وهي لان كل المكالمه حاطه اذنها ويايه تسمع شنحجي ضربتها وكفختني ونسينا اللي عالخط
جعفر:الووو ها غدير شنو فاتحه سبيكر
-لا هاي مودة كاعدة تتسمع
-طرديها شعدها يمنا هههه
مودة: ايا خاين صارلي ساعه اتوسل بيها تتصل عليك تالي هاي جزاتي
-هههه غدير كولي لمودة واحد يسلم عليها
انداريت على مودة فاتحه عيوني وهي تخربطت امورها وانهزمت اختي واعرفها وهسه اكيد عدها شي بس وين تروح مني الا اعرف كل شي
-جعفر منو الواحد
-معلينا بيهم لساها يمج
-لا طلعت تركض جعفر منو الواحد
-ههههه عوفيها بعد احسن شلونتخليها تتسمع النا بالله ردت افلت وياج بالكلام وهي تسمعه مو عيب
-......
-ها سكتي يلا ميخالف ماتريديني احجي هيج
-.......
--يمعوده وين صرتي تره ما حجينا شي ويايه انت
-اي
-همزين عبالي غفيتي هسه اجي لو لا
-بكيفك
-لا كولي تعال حتى اجي
-......
-غدير وتالي شلون يلا جاوبي اجي اخذج
-اي
-هههه والله ما سمعتها زين كوليها بصوت شويه اعلى
-اي
-يلا هسه جاي
-لا وين هسه الوقت تأخر ولحد ما توصل الدنيا ليل كلش على باجر
-ها تخافين عليه يلا اوك على باجر
-يلا اني اروح
-ابقي ويايه خلينا شويه
-ههههه جعفر تدري دا اشوف نفسي تونا كاعدين نتعرف واحد عالثاني
-مو زين يعني ميخالف نتعرف اسمي جعفر عمري ٢٧ سنه موظف واريد نتزوج شنو ردج
-ما ادري
-يبووو الطم وما ادري وما اعرف يلا باجر اخذ موافقتج مواليوم من نرجع لغرفتنا اريد تلبسين البنفسجي نفسه
-ليش باجر نرجع ما نبقى بعد
-هههه ولا دقيقة تبقين يلا هسه روحي مع السلامه اكمل شغلي واني اتصل عليج بالليل
-مع السلامه
سديته وطلعت طايره لمودة اريد اعرف شبيها وشكد لحيت عليها ماقبلت تحجي شي اما بداخلي جنت اني اركص فرحانه بالتغيير والتقارب بيناتنا صح انقهرت لان ضربني بس انمسح كل شي بكلمات قليله بس معناها بقلبي كبير وشلون اصبر وانتظر لباجر هسه يعني الا الواحد يتزوج هالبعد ميصير اقرب ويجي هسه يرجعني للبيت صح خجلت وما كلت مشتاقه بس اني جنت ميته من الشوق
صار الليل واني كعدت احضر بملابسي وبنفسي حتى ارجع والفرحة ما تنوصف مودة بس اللي تدري بالموضوع كانت مودة تحضر العشاء واني وياها بالمطبخ كعادتنا دائما اندك الباب واحمد طلع من باب الاستقبال يشوف منو اني كنت واكفه عالسنك والباب يصير مقابيلي سمعت احمد يرحب بأحد بالباب فتحت شويه البردة ومن فرحتي ما اعرف شسوي ورحت لزمت مودة واهز بايدها
- لج اجا وهي مستغربه عليه
-منو اللي اجا لحد ما فهمتها ضحكت كالت اي روحي عليه
-لج اريد ابدل شعري مرتب
-كل شي ما بيج روحي اله
-اي
ركضت دا اطلع
-لج تعالي خزيتينا ابويه واحمد كاين عيب تخذي ماي وياج وادخلي وخلي شويه هيبه لنفسج مو تضلين فاهيه اثكلي شويه
-دروحي هي وكت اتيكيت وبريستيج خليها الج هالسوالف صدك تعالي ما اعوفج الا تكولين منو هذا المغامر اللي اقترب لمودة اللي هي مثل الهة اغريقيه كوه تتحرك وتسولف
ضربتني وطردتني واني اضحك وصدك سويت اللي كالته دخلت بهدوء بس ما عرفت عيوني شلونهن اكيد فاضحاتني سلمت وكعدت بعيد عنه شويه وكال الهم اريد اسبح لان طلعت من الدوام واجيت وابويه كال حضريله الحمام رحت اركض شويه ولحكني كنت بالغرفه ودخل وقفل الباب
-عزه جعفر عيب اهلي
-لج زوجج قابل صاحبج طفرلج من الحايط اسكتي
-لا الله عليك عيب ينتبهون عفيه لستحي من بابا
-بابا هو كال اخذ راحتك واني اريد اخذ راحتي
حاوطني بايديه واني بس ادفع بيهن اخلص من وحدة الثانيه تلتف من غير مكان روحي لابت وجعفر مستمر بحركاته اخر شي استسلمت لحضنه وضعت وضيعت الاول والتالي يا خجل يا مستحى عزه ما خليت مكان بوجهه ما طبعت بي حمرتي لحد ما وعيت وهو متونس ويضحك شفته ردت انجلط عزه بعيني ابد ما مفضوح حبي لجعفر وكلش طبقت نصائح مودة ههههه
هاي بداية حياتنا وهاي كانت المره الاولى اللي نتقارب اني وجعفر وما اتصور اني اكدر بعد اسيطر على مشاعري وياه لو اصده وصار كل حياتي
