رواية غرام الافاعي ( كاملة جميع الفصول ) بقلم هويدا زغلول

علي سفره كبيره كان قاعد المنشاوي معاه مراته 

وبنت مراته وزين ابن اخو وبعدها المنشاوي قال 

المنشاوي 

بجد متعرفش انا فرحان ازاي انك رجعت مصر ومش بس كده لا ناوي كمان انك تستقر 

وبعدها درت منيره مرات المنشاوي وقالت 

منيره 

قولي يا زين عمك كان بيقولي انك دكتور شاطر 

اوي واكيد يعني ناوي تفتح عياده هنا 

مش كده 

زين 

بصراحه طموحي اعلي من كده بكتير لا انا مش عايز افتح عياده انا بفكر ان اشتري مستشفي 

واكون انا المدير بتاعها 

وبعدها رحت نهي بنتها وقالت 

نهي 

مش شايف موضوع مستشفي ده كبير عليك شويه 

انت سنك صغير يعني 

زين 

مش بالسن بالشاطره والمجهود وانا بصراحه شايف 

إن اقدر علي كده 

وبعدها خرجت نادين بنت في عمر العشرين وكانت معاها اطباق وحطت طبق قدام منيره اللي زعقت فيها وقالت 

منيره 

هو انتي اي مش بتفهمي في الأصول خالص هو انتي 

مش عارفه المفروض تقدمي للضيف الاول 

نادين 

انا اسفه بس شوربه حضرتك بيكون فيها التوابل بتاعتك 

وبعدين قولت احط الطبق ده 

وبعدها قامت منيره من مكانها وبعدين قالت 

منيره 

هو انتي هتردي عليا الكلمه بكلمتها ولا اي 

اخلصي يلا غوري علي المطبخ مش عايزه كلام كتير 

كانت ماشيه و المنشاوي عامله

 يبص ليها وراحت منيره قالت ليه 

منيره 

جرا أي مش ناوي تكمل اكلك ولا اي عامر تبص عليها 

ولا ناوي تقوم من علي الاكل 

المنشاوي 

لا هاكل  

وفي الوقت ده قام زين من علي الاكل 

 وهو ساكت ووشه متغير ومنيره بصتله وقالت

منيره 

جراي ايه يا زين في ايه اكلك لسه زي ما هو انت مش ناوي تاكل ولا ايه

زين

 لا شبعت الحمد لله عن اذنكم انا هخرج اشرب سيجاره برا 

وفي الوقت ده المنشاوي حط المعلقه بعصبيه وقال

المنشاوي

 بطلي تتكلمي مع نادين بالطريقه دي هي مش شغاله عندك دي بنتي انتي سامعه ولا لا ومهما حصل مش هسمحلك تكسريها بالكلام قدامي بالشكل ده

منيره

 انا مش عايزه اسمع الكلمه دي خالص انت سامع ولا لا هو انت مالك فخور بيها ليه كده دي بنت الست اللي اتجوزتها وخانتك المفروض زي ما امها ماتت هي كمان تموت ونخلص منها بدل القرف اللي احنا عايشين فيه بسببها

المنشاوي قام مره واحده من علي السفره ووشه قلب وقال

المنشاوي

 بطلي كل شويه تتكلمي معايا في السيره دي انتي سامعه ولا لا انا مش كل ما احاول انسي تفتحيلي الجرح من اول وجديد حرام عليكي كفايه بقي اللي انا عشته بسبب الكلام ده

وبعدها ساب السفره ودخل المكتب بتاعه وقفل الباب بعنف ومنيره بصت لنهي وقالت وهي بتقرب منها

منيره

 اسمعي كلامي كويس زين ده فرصه ماتتعوضش الراجل غني ودكتور وشكله هيبقي ليه اسم كبير اوي بعد كام سنه وانا مش هسيب الفرصه دي تضيع من ايدك فاهمه ولا لا

نهي

 بس شكله انسان تنك يا ماما وحاسه اني مش هرتاح معاه ده حتي طريقه كلامه تحسسك انه شايف نفسه علي كل اللي حواليه

منيره

 والله العظيم ما يهمني ترتاحي ولا لا المهم تضمني مستقبلك والراجل ده لو مسك مستشفي زي ما بيقول هتبقي عايشه ملكه وانتي اصلا محتاجه واحد يصرف عليكي مش يكون بيعملك حلو وبس فكري في كلامي 

وفي المكتب كان قاعد المنشاوي وبيفتكر اللي حصل زمان 

       فلاش باك

المنشاوي واقف في مكتبه وعامل يدور علي الورق وبعدين قال لمنيره اللي كانت واقفه معاه 

المنشاوي

 هو ازاي الورق ده اختفي انا فاكر كويس اوي اني كنت حاطه هنا بنفسي قبل ما اطلع من المكتب امبارح

منيره

 مفيش اي حد بيدخل مكتب حضرتك خالص وطالما الورق مش موجود يبقي اكيد حضرتك نسيت تجيبه من البيت

المنشاوي

 طب انا هروح الفيلا دلوقتي اشوف الورق هناك ولو لقيته هرجع بسرعه علشان الاجتماع ده مهم اوي ومينفعش يحصل فيه اي غلط

منيره

 طيب انا هاجي مع حضرتك حتي لو حضرتك اتأخرت انا اخد الورق وارجع علي الشركه بسرعه علشان الدنيا ما تبقاش متعطله

وبعدها فعلا ركبوا العربيه ووصلوا الفيلا والمنشاوي دخل المكتب بسرعه وبدأ يدور بعينيه وبعدها وقف مره واحده وهو شايف الملف قدامه علي المكتب

المنشاوي

 انا مش فاهم بجد ازاي نسيت اني ما اخدتوش الموضوع ده غريب جدا اصل انا متأكد اني

اخذته معايا قبل ما انزل

اعتماد 

مش وقته حضرتك الموضوع ده في اجتماع مهم لازم حضرتك تكون موجود فيه دلوقتي يلا بينا 

وبعدها كانوا خارجين من المكتب وكانت سنيه الشغاله  واقفه واول لما شافته قال 

سنيه 

 اي ده حضرتك هنا ازاي اقصد يعني هو فيه حاجه حصلت في الشركه ولا ايه

المنشاوي قبل ما يرد وقف مره واحده وهو سامع صوت راجل جاي من اوضه النوم وبعدها جري ناحيه الاوضه وسمع اعتماد مراته  وهي بتقول بخوف

اعتما

د الله يخليك يا حلمي بلاش تيجي الفيلا هنا تاني جوزي لو شافك هتحصل مصيبه كبيره خليك في البيت عندك وانا بعد كده هاجي اشوفك

وقبل ما تكمل كلامها الباب اتفتح بعنف واعتماد اول لما شافت المنشاوي وشها قلب وقالت

اعتماد

 المنشاوي اسمعني ارجوك الموضوع مش زي ما انت فاهم والله العظيم انا كنت هقولك علي كل حاجه

وفي اللحظه دي حلمي اول لما شاف المنشاوي جري بسرعه ناحيه البلكونه والمنشاوي كان واقف جسمه بيترعش من الصدمه وبعدها فتح الدرج بسرعه وطلع المسدس وهو بيزعق

المنشاوي 

يعني بعد العمر ده كله تخونيني في بيتي ومع اقرب الناس ليا والله العظيم ما هرحمك 

اعتماد كانت بتعيط وبتقرب منه وهي بتقول

اعتماد

 ابوس ايدك اسمعني والله الموضوع اكبر من اللي انت فاهمه وانا كنت غصب عني

لكن المنشاوي كان فقد اعصابه تماما وصوت ضربه النار ملي المكان واعتماد وقعت علي الارض وسط صريخها ومنيره كانت واقفه بره الاوضه مصدومه وحاطه ايدها علي بقها وهي بتقول بصوت واطي

منيره 

يا نهار اسود انت  قتلها بجد انت ازاي تعمل كده بس

 

المنشاوي كان قاعد علي الارض وجسمه كله بيترعش وعنيه ثابته علي اعتماد اللي كانت مرميه قدامه ومنيره قربت منه ببطء وقعدت جنبه وقالت

منيره

 ما ينفعش اللي حضرتك عملته ده احنا لازم نفكر هنعمل ايه دلوقتي قبل ما حد يعرف اللي حصل فوق هنا

المنشاوي

 هنبلغ البوليس وهتقوليلهم الحقيقه كلها هتقولي اني شوفتها مع راجل غريب في اوضتي وما حسيتش بنفسي وقتها

منيره حطت ايديها علي كتفه وقالت بصوت هادي

منيره

 طبعا انا مستعده اعمل اي حاجه علشان خاطرك بس فيه مشكله كبيره اوي محدش هيصدق الكلام ده فين عشيقها اللي كان معاها الراجل هرب ومفيش اي دليل عليه

المنشاوي

 طب هنعمل ايه دلوقتي انا حاسس ان دماغي هتنفجر ومش قادر افكر

منيره 

انا هقدر اخلصك من الحوار ده كله بس المشكله الوحيده في سنيه الشغاله اللي تحت دي لو فتحت بقها بكلمه الدنيا كلها هتبوظ علينا بس متقلقش طول ما انا جنبك محدش هيقدر يوصلك لحاجه

المنشاوي فضل باصص ليها وهو ساكت تماما ومنيره قامت بسرعه ونزلت علي المطبخ وكان وش سنيه باين عليه الخوف اول لما شافتها وقالت

سنيه

 هو اي اللي بيحصل فوق يا استاذه منيره انا سمعت صوت ضرب نار وقلبي وقع من الرعب

منيره 

مش عايزه كلام كتير اعتماد هربت مع عشيقها وكان المنشاوي بيه بيحاول يخوفهم بس هما جريوا قبل ما يمسكهم

سنيه

 ازاي الكلام ده انا والله ما شوفت حد نزل من فوق ولا حتي باب الفيلا اتفتح

منيره قربت منها وبصت في عينيها جامد وقالت

منيره

 قولتلك مش عايزه رغي كتير انتي فاهمه ولا لا واللي سمعتيه تنسيه خالص كأنه ما حصلش

وبعدها فتحت شنطتها وطلعت رزم فلوس كتير وحطتها قدام سنيه وقالت

منيره

 خدي الفلوس دي واعتبريها نهايه الخدمه من النهارده انتي مش هتشتغلي هنا تاني وهتمشي دلوقتي حالا ومش عايزه اشوف وشك هنا مره تانيه

سنيه بصتلها بذهول وقالت

سنيه 

هو اي اللي بيحصل بالظبط يا استاذه منيره انا حاسه ان فيه حاجه كبيره مستخبيه وانتم خايفين اقولها

منيره مسكت دراعها بعنف وقالت

منيره

 اسمعيني كويس لو بتحبي نفسك هتاخدي الفلوس دي وتمشي وتنسي انك اشتغلتي هنا اصلا غير كده انتي اللي هتلبسي كل حاجه والبوليس اول ناس هيشك فيها هي الخدامه اللي كانت موجوده وقت الجريمه فاهمه ولا لا

سنيه اول لما سمعت كلمه جريمه وشها اصفر وقالت بخوف

سنيه جريمه ايه يا ساتر يارب هو الست اعتماد حصلها حاجه

منيره سكتت لحظه وبعدها قالت ببرود

منيره

 قولتلك ملكيش دعوه بحاجه خدي الفلوس وامشي من هنا حلا 

وسنيه  كانت مرعوبه ودموعها نازله من الخوف واخدت الفلوس ومشيت بسرعه وهي مش قادره حتي تبص وراها ومنيره فضلت واقفه شويه وبعدين طلعت تليفونها واتصلت بحد وقالت بصوت واطي

منيره 

عايزاكم تيجوا الفيلا حالا وفي شغل مهم جدا لازم يخلص الليله دي ومحدش يعرف عنه حاجه

وبعد حوالي ساعه دخل اتنين رجاله الفيلا ومنيره طلعت بيهم علي فوق ولما دخلوا الاوضه لقوا المنشاوي لسه قاعد جنب اعتماد وعنيه كلها دموع ووشه شاحب ومنيره قربت منه وقالت

منيره 

ما ينفعش حضرتك تكون قاعد كده احنا لازم نتصرف دلوقتي قبل ما الدنيا تبوظ فوق دماغنا كلنا

المنشاوي

 انا مش قادر استوعب اللي حصل دي كانت مراتي وعشت معاها عمر كامل ازاي كل حاجه انتهت في لحظه كده

منيره 

الندم دلوقتي مش هيفيد بحاجه احنا لازم ندفنها الليله دي حالا وبعدها تعمل محضر اختفاء علشان محدش يشك فيك ولا في اي حاجه

المنشاوي فضل ساكت وهو مش قادر يفكر ومنيره مسكت ايده وقومته من مكانه وبعدها الرجاله شالوا جثه اعتماد ونزلوا بيها الجنينه الخلفيه للفيلا وفي نص الليل كانوا بيدفنوها والمنشاوي كان واقف يبص للتراب وهو حاسس ان روحه بتتدفن معاها

وبعدها بكام يوم كان المنشاوي قافل علي نفسه الاوضه ومبقاش بيخرج خالص ومنيره دخلت عليه وهي شايله صينيه اكل وقالت

منيره

 انا اسفه اني جيتلك كده بس بجد مش عاجبني الوضع اللي حضرتك فيه ده اي حد مكانك كان هيعمل اللي انت عملته

المنشاوي

 بس انا لازم كنت اسمعها لازم كنت اعرف انا عملت فيها ايه علشان تخوني بالطريقه دي بجد انا مش قادر افكر في حاجه غير اللي حصل

منيره

 انت ما لكش ذنب في حاجه هي اللي خانت العشره وخانت ثقتك فيها وانت انسان مكسور ومجروح ومحتاج حد يقف جنبك

المنشاوي 

وكمان نادين راجعه من المدرسه الداخليه النهارده وانا مش عارف هقولها ايه لما تسألني علي امها

منيره 

السر ده ما ينفعش حد يعرفه غيري وغيرك ولازم تفكر بعقلك شويه وتقولها ان امها سابت البيت ومشيت وخلاص

وبعدها قامت من مكانها وحاولت تهديه وبعد كام ساعه كان المنشاوي قاعد في الجنينه سرحان وفجأه سمع صوت نادين وهي بتجري عليه وتحضنه

نادين

 ازيك يا بابا عامل ايه ما تعرفش انت واحشني ازاي وماما عامله ايه بجد موضوع المدرسه الداخلي ده مضايقني جدا

المنشاوي حضنها ودموعه كانت هتنزل بالعافيه وقال

المنشاوي

 حصل مشاكل بيني وبين ماما وهي سابت البيت ومشيت وانتي دلوقتي كبيره ولازم تقدري الموقف

نادين كانت بتحاول تمسك دموعها وقالت

نادين

 بس راحت فين يعني وماما بتحبك اوي ويستحيل تعمل حاجه تزعلك بالشكل ده

المنشاوي

 مش كل اللي بنشوفه بيكون حقيقي المهم اطلعي غيري هدومك وارتاحي من السفر

نادين 

طلعت وهي مخنوقه ومش فاهمه حاجه ومنيره قربت من المنشاوي وقعدت جنبه وقالت

منيره

 انا مش هسمحلك تأذي نفسك اكتر من كده انا لازم افضل جنبك ومعاك لحد ما تقوم من اللي انت فيه

المنشاوي بص لها وقال

المنشاوي 

هو انتي ليه بتساعديني اوي كده رغم كل اللي حصل

منيره بصت في عينيه وقالت بهدوء

منيره 

ما تعرفش انا بحبك ازاي وبجد زعلانه عليك من قلبي وانت لازم تفوق لنفسك وتعرف انك ضحيه مش مجرم

ومع الوقت المنشاوي بدأ يتعلق بيها ويحس انها الوحيده اللي واقفه جنبه وبعد شهور اتجوزها وعاشت هي ونهي في الفيلا الكبيره ومن يومها بدأت منيره تظهر وشها الحقيقي مع نادين وكانت كل يوم تعذبها بطريقه جديده وتحسسها انها غريبه في بيت ابوها 

              باك 

وفي الجنينه كانت نادين ماسكه كتاب وبعدها راح زين جنبها  ومسك الكتاب وقال

زين 

اممم من كتاب في علم النفس شكلك مثقفه اوي 

مش كده 

نادين قربت منه وبعدها قالت 

نادين 

لو سمحت هات الكتاب وبعدين وانت مالك انت 

زين 

شكلك بجد متعلمه طب ايه اللي خلاك تشتغلي شغلنا اللي انت شغلاها دي وازاي تسمحي اصلا لمنيره انها تتكلم معاكي بالطريقه دي 

نادين 

هو انت على طول كنت عايش بره ليه وسافرت امتى يعني شكلك صغير مش كبير يعني اكيد عارف عمك كويس وفاكرو على العموم لو انت مش عارف انا مين انا هقول لك انا بنت المنشاوي مش شغاله عنده 

وبعدها زين  هيتصدم الكلام اللي سمعه وبعدين هيقول ليها 

زين 

معقول الكلام ده ازاي يعني وبعدين انا سافرت مع بابا وانا عمري كان 13 سنه كانت مامتك حامل فيكي صحيح هي فين مامتك انا كنت عارف ان عمي متجوز واحده غير العقربه اللي جوه دي 

نادين ضحكت وقالت 

معقول الكلام ده انت اقعدت معاها ساعه عرفت انها عقربه لا شكلك شاطر اوي 

زين 

مش رديتي على سؤالي يعني انا بسالك مامتك راحت فين وازاي عمي يتجوز واحده زي دي 

نادين 

غير الحوار ده انا مش بحب اتكلم في الموضوع ده خالص 

بعدها قربت عليهم نهى وقالت 

نهي 

هي مش ماما قالت لك بلاش موضوع الكتب والقرايه دي انت ما بتسمعيش الكلام ليه انت غاويه  كل شويه انها تبهدلك يعني

نادين 

انتي ايه إللي بتعملي ده انتي مالك انتي اقرأ ولا ماقراش 

نهي 

انتي بقا اللي عايزة تجيبي لنفسك الكلام انا هخلي ماما تيجي لك بقا وهي اللي تتصرف معاكي 

زين 

في ايه يا نهي هو ايه إللي حصل لده كله نادين معملتش حاجة غلط عشان تاخدي منها الكتاب بالطريقة دي 

نهي بتزعق 

انت بتدافع عنها كمان يا زبن دي واحده معندهاش كرامه وعامله نفسها هانم وهي ولا حاجه 

نادين 

هي مين دي اللي ولا حاجة انتي ناسيه انكم هنا في أبويا وانتو اللي هنا قاعدين عندنا 

وخرجت منيرة من جوه وقالت 

منيرة 

هو ايه يا نهي انتو مالكم بتزعقوا ليه كده 

نهي 

تعالي ياماما شوفي الخدامه دي بتقول إيه عني انا وأنتي قال ايه ده بيتها واحنا قاعدين عندها هي اصلا اول لما شافتني اتخانقت معايا يا ماما 

زين 

انتي كدابه يا نهي علي فكرة عشان انتي اللي بدأتي الأول نادين كانت قاعده في حالها وانتي اللي جيتي وجريتي شكلها 

نهي 

بقا انا كدابه يا زين شوفتي يا ماما هما الاتنين متفقين عليا اكيد الهانم هي اللي قالت له يقول 

زين 

وهي هتقولي فين وأنتي لسه واقفه قدامنا متحركناش اهو 

منيرة 

بااااس خلاص اسمعي يا بت انتي موضوع الكتب والقرايه اللي انتي عماله شغاله فيه ده تنسيه خالص انتي سامعه ولا لأ 

نادين 

وهي القرايه اللي انا بقراها مضيقاكي في ايه مش فاهمة انا وبعدين انا بذاكر مش بقرا كده وخلاص 

منيرة 

والله يعني انتي بتذاكرى طيب اهوووو وادي الكتاب اللي انتي بتذاكري منه 

ومسكت الكتاب وقطعته نصين ونادين عيطت وقالت 

نادين 

حرام عليكي انتي عملت كده ليه انتي مش عارفه المادة دي صعبه اد إيه 

زين 

انتي ليه عملتي كده علي فكرة مكانش ينفع ابدا اللي حصل ده 

منيرة 

انا بقا مزاجي كده وعملت اللي علي مزاجي وانتي بقا يا حلوه قابلي اللي جاي يلا بينا يا نهي ندخل جوه 

وسابت نادين منهارة وخدت نهي ودخلت جوه وزين قالها 

زين 

متزعليش نفسك يا نادين انا لما عمي يرجع هحكي له كل حاجه حصلت وهخليه يحط حد للحكايه اللي حصلت دي 

نادين بدموع 

وانت فكرك يعني يا زين بابا هيعملها ايه ده ولا كأنه هيسمع حاجة ويمكن يجي عليا انا أنا عارفة كويس اللي هيحصل ايه 

زين 

طيب شوفي الكتاب ده ممكن نجيب غيره منين وانا اجيب لك واحد غيره 

نادين 

ده لازم يتجاب من الجامعة ومش عارفه هل هيرضوا يدوني واحد غيرة ولا لأ ممكن دكتور المادة مايرضاش 

زين 

متقلقيش انا هتصرف ومش عايزة تزعلي أبدا 

وقعد زين يبص لها بحزن وجوه عند منيرة  كانت في اوضتها وعماله بتتمشي بعصبيه وهي ماسكه التليفون وبعدها اتصلت بالمنشاوي واول لما رد قالت بصوت كله غضب

منيره

تعالي بقا دلوقتي الحق بقي وشوف بنتك اللي مش عارف تربيها دي عملت ايه النهارده

المنشاوي

في ايه يا منيره اهدي وفهميني ايه إللي حصل 

منيره

بنتك اتخانقت مع نهي وقالت لها ده بيت ابويا وانتو قاعدين فيه وكانت عايزه تطردنا من البيت كمان قدام زين ابن اخوك 

المنشاوي سكت لحظه وبعدها قال بعصبيه

المنشاوي

ازاي تعمل كده هي اتجننت ولا ايه معقوله نادين تعمل كده 

منيره

واكتر من كده كمان يا حبيبي دي بقت تتكلم معايا بطريقه وقحه وكل شويه ماسكه كتب وقاعده تقرا وكأنها دكتوره الجامعه مش بنت عايشه في خير ابوها دي طولت لسانها عليا انا وبنتي 

المنشاوي

موضوع القرايه ده سيبيه دلوقتي يا منيرة وبعدين انتي عارفه انها بتحب المذاكرة أوي 

منيره

لا مش هسيبه يا منشاوي انا من زمان بقولك التعليم ده مش هيعملها حاجه غير انها هاتشوف نفسها علينا البنت دي لازم تطلعها من التعليم وتخليها تقعد في البيت احسن لها انت سامع ولا لأ 

المنشاوي

مش هينفع يا منيره دي وصلت سنه مهمه ومينفعش اقطع تعليمها بالشكل ده انتي بتقولي ايه بس 

منيره ضحكت بسخريه وقالت

منيره

وليه يعني هي هتبقي دكتوره ذره مثلا دي واحده طول النهار قاعده سرحانه في الكتب ومش نافعه في حاجه تانيه وبعدين انت مش شايف انها بقت تتحداني في كل حاجه وكمان حطت بنتي في دماغها 

المنشاوي

يمكن انتي بتشدي معاها زياده يا منيره ما انا عارف اسلوبك معاها عامل إزاي 

منيره

انا لو بشد معاها فانا بشد معاها عشان مصلحتها لكن انت عمرك ما بتشوف غير انها ملاك مع انها بتكرهني انا وبنتي وبتستني اي فرصه عشان توقع بينا وبينك انت لازم تتصرف 

المنشاوي اتنهد وقال

خلاص لما ارجع هفهم منها ايه اللي حصل ونشوف هنعمل ايه 

منيره

لا يا حبيبي المره دي مينفعش تعدي بالساهل كده دي لازم تحط حد للبجاحه بتاعتها دي قبل ما تتكبر اكتر من كده علينا 

المنشاوي

طيب يا منيره لما ارجع هاشوف الحكايه دي بنفسي خلاص بقا انا عندي شغل دلوقتي وفي اجتماع مهم كمان شويه يلا سلام 

وقفل معاها وهو حاسس بصداع شديد اما منيره فابتسمت بخبث وهي بتحط التليفون وقالت لنفسها

منيره

كده اللعبه ابتدت يا نادين وشوفي بقي هتعملي ايه لما ابوكي يقف ضدك ااه ما هو انا لازم اعمل اللي في دماغي 

وفي الجنينه كان زين لسه واقف مع نادين اللي كانت بتحاول تمسح دموعها وبعدها قالها 

زين

بصي انا هجيبلك الكتاب ده مهما حصل ومش عايزك تشيلي هم حاجه ابدا يا نادين ماشي 

نادين

ليه مهتم اوي كده دي مش مشكلتك اصلا دي مشكلتي انا يا زين ولما بابا يرجع لازم يحط لي حد بقا لاني تعبت 

زين

انا بعمل كده عشان اللي بيحصل معاكي ده غلط وواضح انك مستحمله فوق طاقتك كمان وملاحظ كده من اول لما رجعت 

نادين بصت بعيد وقالت

نادين

انا اتعودت خلاص يا زين ومبقاش فارق معايا اهم حاجة اخد شهادتي وبعدين ربنا يحلها من عنده 

زين حس بحزن جواه وهو شايف الوجع في عينيها وبعدها قال

زين

طيب انا هخرج شويه ولما ارجع هكون لقيت حل للكتاب

نادين هزت راسها وسابت المكان وهي مخنوقه اما زين فركب عربيته وراح عند صاحبه كريم اللي كان قاعد في الشقه اول لما دخل قال

كريم

يا اهلا بالدكتور العالمي تعالي اتفضل ليك وحشه والله ايه يا عم شكلك داخل متعصب كده ليه خير

زين رمي المفاتيح علي الترابيزه وقال

زين

مش قادر استوعب اللي شوفته في البيت عند عمي ده يا كريم معقوله اللي بيحصل ده 

كريم

هو ايه ده اللي معقوله هو في ايه حصل عند عمك 

زين قعدوقال

مرات عمي وبنتها بيعاملوا بنت عمي معامله صعبه اوي والبنت ساكته ومكسوره بشكل يوجع القلب لا وكل ده ومستحمله اللي محدش يستحمله 

كريم

طب وعمك عمل ايه في الحكاية دي 

زين

ولا حاجه تقريبا مش شايف حاجه او يمكن شايف وساكت وده الاسوأ كمان 

كريم

غريبه اوي منك يا زين ده انت عمرك ما اهتميت بمشاكل حد بالطريقه دي ايه يا دكتور خلاص بقيت بجد بجد ولا ايه هههههه 

زين سكت لحظه وبعدها قال

زين

بص يا كريم هو انا مش عارف انا ليه مهتم بيها كده بس يمكن عشان البنت رقيقه زياده عن اللزوم تحس انها لو اتكلمت جامد هتتكسر كده بنت كده غير اللي اي بنت انا شوفتها 

كريم ضحك وقال

اوبااا الدكتور وقع ولا ايه يا جدعااان هههههه 

زين بصلو بغيظ وقال

زين

متخليش دماغك تروح لحاجه تانيه انا بس متضايق من الظلم اللي شوفته واقع عليها وخلاص 

كريم

طيب سيبك من كل ده وقولي مشروع المستشفي وصل لفين دلوقتي وناوي تعمل ايه 

زين 

اهو اديني بدور علي مستشفي تكون حالتها كويسه واقدر اشتريها واعملها بشكل مختلف انا مش عايز مجرد مستشفي وخلاص انا عايز مكان يبقي معروف في مصر كلها واكتب اسمي عليها من برة 

كريم

وانت معاك فلوس بقا للخطوه الكبيره دي يا معلم ولا إيه 

زين

ايوه الحمد لله انا اصلا كنت بحوش طول السنين اللي فاتت وبابا سايب لي جزء كبير من شغله بره وكمان عندي خطه استثمار قويه وربنا يسهل وانجح 

كريم

واضح انك ناوي علي حاجه تقيله اوي يا زين 

زين

انت عارفني يا كريم انا طول عمري بكره الفشل ومش هرجع مصر عشان افتح عياده صغيره واقعد مستني العيانين انا عايز اسم يبقي ليه قيمه كبيرة 

كريم

بس خلي بالك النجاح مش كله شغل وفلوس وان لبدنك عليك حقا برضوا 

زين رفع حاجبه وقال

تقصد ايه

كريم

اقصد انك اول مره من زمان تتكلم معايا عن بنت بالشكل ده  يبقا تبدأ تفكر فيها كده وتفكر في ارتباط 

زين سكت شويه وبعدها قال

زين

يا كريم انا الفكرة عندي من ناحية نادين انها مختلفه عن اي حد شوفته تحس انها عايشه وسط افاعي فعلا وكل واحد مستني يلدغها 

كريم

خلاص تبقي حاول تساعدها بدل ما تقف تتفرج عليها واقف جنبها 

زين بص قدامه بشرود 

زين

وده اللي بفكر فيه يا كريم انا ناوي اعمل كده فعلا 

وفي الليل رجع المنشاوي البيت وكان وشه متغير اول لما دخل لقي منيره ونهي قاعدين ولما شاف نادين نازله من علي السلم قال بصوت عالي

المنشاوي

تعالي هنا يا نادين

نادين وقفت وهي متوتره وقالت

نادين

في ايه يا بابا

المنشاوي

انتي ايه اللي عملتيه في نهي النهارده ده يا بنت 

نادين اتصدمت وقالت

زهو انا عملت ايه انا معملتش حاجه دي هي اللي جات تتخانق معايا وطنط منيرة قطعت لي الكتاب اللي كنت بذاكر فيه 

نهي قامت بسرعه وقالت بتمثيل

نهي

شوفت يا ماما اهي بتكدب اهو قدام عمو عشان هو يزعق معايا انا 

منيره قربت من المنشاوي وقالت

منيره

انا قولت لك البنت دي بقت بتتجرأ علينا بشكل كبير اوي يا منشاوي وانت لازم تحد لها حد 

نادين بصتلهم بوجع وقالت

نادين

انتو ليه بتكدبوا عليه كده انا كنت قاعده بذاكر في حالي وهي اللي جت واخدت الكتاب من ايدي وفضلت كمان تزعق معايا 

المنشاوي

والله طيب لما عملت كده انتي بقا جالك الجراءة انك كنتي عايزة تطرديهم من البيت كمان انتي اتجننتي في عقلك يا بنت 

نادين باستغراب 

لا لا طبعا انا مقولتش كده خالص ومحصلش والله ده هي اهانتني وقالت لي اني ولا حاجه 

منيره

يا سلام بقي يعني بنتي هي اللي غلطانه وانتي البريئه المكسوره يا حبيبتي شوف البنت وكهنها عامل إزاي 

نادين

ايوه يا طنط منيرة عشان ده اللي حصل فعلا من نهي بنتك ومن حضرتك انتي كمان 

منيره بصت للمنشاوي وقالت

منيره

شايف بترد عليا كلمه بكلمه ازاي دي لو اتسابت كده هتركبنا كلنا ومحدش هيقدر عليها انت لازم تتصرف دلوقتي حالا 

المنشاوي بغضب 

وانتيبقا طبعا عملتي كل ده وزين  كان موجود وكمان كان بيدافع عنك صح 

نهي

اه طبعا يا حبيبي اصلها لعبت عليه وعملت فيها دور الضحية الغلبانه المسكينة 

نادين علت صوتها 

انتي بجد إزاي انسانه كدابه اوي كده حرام عليكي علي فكرة 

المنشاوي ضرب الترابيزه بايده وقال

المنشاوي

باااس صوتك ما يعلاش هنا يا نادين انتي سامعه ولا لأ 

نادين عيونها اتملت دموع 

انا كنت متوقعه انك هتعمل كده برضو وتسمع لها هي وبنتها لانك حضرتك عمرك ما سمعتني اصلا مهما قولت انت هتصدقهم هما وتكدبني انا 

المنشاوي اتضايق من كلامها لكنه حاول يداري وقال

المنشاوي

انا مش عايز مشاكل في البيت ده مفهوم ولا لأ انتي تقعدي هنا بأدب وتلزمي حدودك في التعامل مع طنط منيرة ونهي 

منيره استغلت اللحظه وقالت

منيره

وعلشان المشاكل تخلص لازم البنت دي تبعد عن التعليم وتسيب الجامعه دي خالص وتقعد تهتم ببيتها احسن واهو تتعلم لها حاجة للزمن تنفعها لما تتجوز 

نادين بصتلها بصدمه 

يعني ايه اسيب تعليمي ده اللي هو ازاي يعني 

منيره

يعني اللي سمعتيه انتي من هنا ورايح مش هتروحي الجامعه دي وتنسيها خالص وتقعدي في البيت وبس 

نادين جريت عند ابوها وقالت بدموع

نادين

لا لا بابا بالله عليك متعملش فيا كده وتسمع كلامها انا مليش غير دراستي ارجوك يا بابا بلاش دي خالص انا نفسي أكمل 

المنشاوي سكت وهو باصص لدموعها ومنيره قالت بعصبيه

منيره

شوف اهو الدلع ده اللي بوظها طبعا بعد الدمعتين دول هتصعب عليك مش كده برضو 

نادين

انا مش مدلعه انا بس عايزه اكمل حياتي ودراستي زي اي واحدة في الدنيا 

المنشاوي اخد نفس طويل وقال

المنشاوي

خلاص يا نادين محدش هياخد قرار دلوقتي سيبكم من الحكايه دي دلوقتي هنبقا نشوفها بعدين 

منيره

يعني ايه يا منشاوي الكلام ده 

المنشاوي

يعني قولت خلاص لما افكر كويس هبقي اشوف الموضوع ده يا منيرة واشوف هل هي فعلا تستحق تكمل ولا لأ 

نادين بصتله بخوف وهي مش مطمنه اما منيره فكانت بتضغط علي اسنانها بغيظ وبعدها قالت

منيره

براحتك بس متجيش بعد كده تندم لما البنت دي تقلب البيت فوق دماغنا كلنا لما تفضل تخرج كده رايحه جايه وكمان تتفرعن علينا 

وبعدها منيرة سابتهم  واخدت نهي معاها وطلعوا فوق ونادين فضلت واقفه تبص لابوها بحزن شديد وقالت له 

نادين 

يعني انت برضو ناوي علي ايه يا بابا انا معرفتش 

المنشاوي 

انا قولت مش  هتكلم في حاجة دلوقتي أنا طالع ارتاح 

 وسابها وطلع وهو تايه ومحتار بين كلام منيره ونظره بنته اللي مليانه وجع وخوف ومش عارف يعمل إيه

الفصل الثاني من هنا