رواية خيط وابرة كاملة جميع الفصول بقلم شمس العراقية
سميعه
ـ أغلى ما عند البنت شرفها هالكلام دائماً أسمعه من أمي وحتى أغلى من أهلها لان هو أساس وجودها وقيمتها بالمجتمع ...
وأمي من النوع التحجي فشك وحجتلنا بالصريح العباره عن العلاقه وشُــنو يصير بين الرجال والمره وضحت ونبهت وحذرت بنفس الوقت زرعت الخوف والرعب بداخلي تجاه كل رجال تشوفه عيني مجرد أشوف اي شخص أتخيل كلام أمي وتلعب نفسي وأستذكر نبرة صوتها وتحذيرها تجاه هذيج السالفه وشلون النفس تكون مشوهه للحرام وما تعرف صغيره أو كبيره ولازم نكون حذرين بكل الأوقات وما نأمن لأي أحد كان ومهما كانت صلة القرابه ...
سنين مرت وخلتني أسترجع بحياتي لنقطه الصفر
لـ أساس وجودي وحالي حال أي بنت قصتها مركونه ومغطيها التراب أو مدفونه بين القبور ومنسيه لمئات من القصص والحكايات أنتهت وما عرفت تحافظ على شرفها وشرف أهلها وأبوها وأخوانها وگلشي متصل بيها حتى سمعة أخواتها ...
أو المجتمع الكانت عايشه بي ما رحم طفولتها بيوم مشوؤم غير وقلب كل حياتي على رغم الحذر والخوف والرعب بداخلي من هالشيء بس!! ...
فرحانه بروحي وبشبابي واكفه اظفر ظفيرتي وأرتب بنفسي أنه من نوع أحب أكشخ وأهندم برويحتي وفزيت على صوت أمي وهي تصييح بإسمي
عطيات ـ ولج سميعه ما وليتي لحگتي أخوج جاسم على الغنم والهوايش ، سميعه ووجع وينج مو احاجيح .
سميعه ـ ها يمه دخلت عليه وباوعتلي وهزت رأسها وكفختني على رأسي وصاحت بيه .
ـ كم مره حجيت أنه وگلتلج مهدامج جوزي منه لاتضلين تلمعين برويحتج وتجلفين بهل الوجه وتجيبين العين عليج ، شو لبسي ربطتج وأخذي السطل وأتلكي الحلال حلبيهن وجيبيلي الحليب افورنه ، وأخيتج وين ولت ما تعرف تركد بكاعها .
ـ يم بيت عمي رزاق يم البنات .
ـ علتني هالبنيه كله من ابوج منطيها عين ، يله أمشي على شغلج .
ـ لبست ربطتي وشلت السطل الفافون وطلعت والدجاحات والوز والبط التمن عليه عبالهن جبت الهن علف ، دنگت شلت الوزه وأبوس بيها وهي تحبني وفقيره من دون الوز الباقي وهجم عليه الديج شو ولي منا شبلاك نكرصت عضني ودفرته برجلي وكام يصييح لم عليه كل الوز تالي عفته مال الوجع تكول اخذت روحه
وحاجتني صالحه مرت أخوي منعم
صالحه ـ يولي أفتحي الباب خل الوز يطلع عالكاع بعد وگت من هسه محبسينه هرجنا هرج بصوته .
ـ لا دخيلج ويروح على الزرع شيخلصني من أبوي حبيب وأخوي مشعان ورجلج منعم درجه ما تسد حلوكهم ، خل أروح على جاسم أتلكى الحلال أشوفنه وين صار .
ـ لـو گملتي من وگت تعالي عاونيني بالخبز
ـ ليش نهاوند ما تعاونج شنهي بس أنه بهل البيت وين موليه علامها اليوم مـا سمعت لها صوت
ـ بيت عمج خضير تعاون البنات بالخضره .
ـ بس أحنه نعاون ومحد يعاونه على صيت بيتنا مليان بنيات بكل شغيله دازين على بنات حبيب خو نهاوند دوشك مال شغل لبيت عمي رزاق .
ـ شلج بهل الحجي هاذ شو دمشي على الغنم بطيتي على جويسم هسه يكبن خبالاته ويضل يصييح يهرجنه ويهرج أبوج وأخوانج علينا وهالعونه مـا أريدنها عمي أنه أخبز وحيدي ، چا متعلمه عليج .
ـ يولي صالحه جنج زعلتي وخذيتي بخاطرج مني
ـ لا على شنو أزعل ديله أمشي على شغلج تعطلتي .
ـ عفتها ومشيت وضل أبالي وجهه جن خذت بخاطرها هالمسكينه الفقيره دومها تشتغل وهي ساكته أبد ما يوم سمعنا لها صوت لـو صارت مشكله بسببها ولا احنه عادينها جنه ، أنه أشوفنها حسبة أختي الجبيره
وهي تحبني وتحب الكل والكل يحبنها مدري ينقهرون عليها لان ما تخلف ما صارتلها خلفه قسمتها هيجي والا أهلي منو يحبهم وجوهم تتباجى بوجه الله وعباده .
وأنه أمشي وأهوجس بأغنيه تدك برأسي من أمس وما أحس الا قندرة أخوي تهف على رأسي طشر مخي الا خله اذني اطن من قوة ضربته مو ايد دكول ميجنة وكفت وافرك بيها وهو يصييح خبص الدنيا بصوته
مشعان ـ ولج الزرع الزرع الوز نبش أهل أهله أنه مو كلت المهجوم يضل محبس ياهو فگ الباب وسربتهن ، شنو شغلجن من فلك طرجن غضب على يومجن من بين البنات .
سميعه ـ دخيلك ربي ، الله يعين نسوانك عليك شون متحملاتك ما أدري ، نداريت واشوفن الوز مسربت أنه أخوك ياهو فك الباب!
يبــوي يا مصيبتج يا سميعه ركضت والركضه ركضه طفيته كله على صوب النهر وكفت خذيت نفس واجه مشعان يهف بدشداشته وشايل بإيده كصبه خفت منه لايضربني بس الحمدلله طف بيها الوز وغسل وجهه ومسحه بالشماغ وعاين عليَّ .
ـ أنه جم مره أحجي وأكولن الوز ما يطلع
ـ والله مو أنه فگيت الباب أصلا أنه ماشيه على جاسم أتلكى الحلال .
ـ جدي طلع من گبره وفك الباب من كطعية كطعته خفت هالجني الخايس .
ـ فلتت بريشاتي ، همزين الله خلصني منه ورجعت أمشي بين الزرع والهوا الحلو يلفح بوجهي وبربطتي
وريحة ماي النهر والنعناع ترست خشمي ،أمشي واخبط بالحشيش وشفتهم بعد عني بصوب الزرع
اخوي جاسم وولد أخوي مشعان من مرته الأولى
حربي وباقر حبيب عمته حيل يحبن دراسته دومه شايل كتابه حتى وهو سارح بالغنم وكلنا نصيحله سيادة الضابط لان حلمه عسكريه مثل عمي نوري الله يرحمه أستشهد بالحرب .
أمي ما تريده يصير ضابط تخاف عليه ولا أمه خطيه هم فقيره ولان هما بس هالأثنين ولد ما عدها غيرهم وما الها جلمه ويه أخوي بس شنسوي لمشعان بس يزامط بطولاته لما خبل الولد وخله يعشگها ويهواها .
وصلت وعاين لي وأبتسمت فدوه لهل الوجه .
باقر ـ ها عميمه جايه من وگت اليوم
سميعه ـ چا غير جديتك وابوك خبصوني الواحد يهج منهم ومن صوتهم ومن ساع حصلتلي كفخة بقندرة أبوك خله اذني لحد هسه تطن ، بيها الك أراده ربي طعمته بس هالويلاد الأثنين وما نطيته بنيات جان سكطعن .
باقر ـ هو هذا أبوي من يومه دمه حار وعصبي بسلامة عمره .
حربي ـ شنهي عميمه داگج الدكن چا نسيتي أخواتي من حربيه لو هذولاك ما محسوبين علينا وخلفة الولايه عز ودلال بويه حتى بالذچر ما ينجاب طاريهم .
جاسم ـ هذولاك جديتهم مهديه تطگنا بسحر تخلينا تطاوطح عبن مهديه المصكوعه وتشرب وتأكل ويه الشيطان ، مهديه أم السحوره والدم .
باقر ـ عم شنهي هالحجي هاذ
جاسم ـ انه شفتها والله بعيوني اليأكلها الدود
حربي ـ عوفه يحجي وحجايته صدك هذا مأخوذ عنه الحجاب يشوف الجماعة من هذاك الصوب وتلكي سوالف مهديه كلهن عنده .
سميعه ـ يم الزهره ، ولك جويسم يمت تبطل سوالفك شو دسكت خرطتني العافيه ، يله كافي هرج طف الغنم والهوايش خل نعاود القصر .
باقر ـ بس جدي حبيب كال بعد هسه الا يحوم الليل
سميعه ـ جدك لو يوكع بإيده يعوف الغنم سارحات للصبح متجوز ، يله أمشو ومشينا وجويسم شايل بأيده طلي هاذ والد جديد .
جاسم ـ اي انه ولدته هاذ صار أبني لان امه ماتت اي ماتت وعافته وما عنده أهل وأنه أصيرن أبوه وأمه هاذ أبني .
سميعه ـ چا الطلي صار أبنك يا جاسم شون طلابه جديده هاي شيفضها بعد والله يا جويسم يا خوفي تدخله القصر وبغرفتك وتجيفنا من ورى سوالفك.
ـ شبيج تحجين عليه خطيه صار يتيم عبن ما عنده أهل چا الطلي شبي أحسن منكم مو باقر
باقر ـ أي عم أحسن مني هم .
ـ لا مو أحسن منك أنت خوش ولد عبن أنه احبنك وتحبني وتشتريلي من الدكان
ـ فدوه لوجهك عم
ـ ما ناقشته لان بنص عقل ومريض وأنقهر عليه وشريد اهلي يسونه اله ما يرفضونه اله طلب لان مكسور خاطره .
طفيت الغنم وياهم وصلنا وكعدت بالكاع وحربي وباقر يجيبولي النعجه الحلابه وأنه احلب بيهن وأمي هم أجتي
وحضنت جاسم وتبوس بي .
الحجيه عطيات ـ غديت فدوه لهل الوجه الحلو شطيبه بوستك يرويحت أمك ، شحبنك أنت وأخيتك عريب .
جاسم ـ وأنه هم أحبنج چا عروبه يمت تجينا شتاكيت الها وشتاكيت لفروخها .
ـ والله يا يمه مدري يمت تجينا ، غير المغضوب زلمتها محمود يجيبها منو يجيبها غيره ، تالي أبن مهديه صار زلمتها والله وگت عروبه صارت جنتج يمهديه أخ من الوگت من يعكس بينا ويخلي الما كاعد بديوان يگابلني ويصير زلمه عليه وعلى بنيتي .
ـ محمود الخنيث
ـ بس صار زلمه والسبه ابوك حبيب رأس الفتيله
أمشي يمه جيبلي النعجه دأحلبها لاتهيج المواجع يبعد أمك ، خليك بنعجاتك شلك بوجع گلبي وسوالف تشيب الرأس .
سميعه ـ هزت رأسي ونزلت دموعها ومسحتها بشيلتها وتبجي وشفايفها ترجف وحربي وباقر صافنين عليها وتذكرت أختي عروبه اخر مره اجتنا قبل شهرين جان گاتلها ووجهه كله صاير ازرك وثاني يوم أبوي ردها اله وتعارك هو وأمي وذب الصوج بعروبه لان ما يحب البنيه تزعل والتزعل ترد البيت زلمتها بنفس اليوم .
بنات حبيب ما يزعلن هذه جانت جلمته!
كملت الحلب الغنم ويه أمي واجت أختي نهاوند أستلمت الباقي خذته مني وصفته بالوصله وخلته بالجدر تفوره على الحطب كعدت وگابلتها ، عاينتلي نهاوند دخليج لاتكوليلي كومي توني أستراحيت .
نهاوند ـ أي چا شعندج كاعده دكومي جيبيلي الحطب من الطعس وبدربج صيحيلي جاسم لو واحد من الولد يروح على دكان قادريه يجيبلي خمره جبن خلصنه .
ـ ولميعه وين چا ماكو بهل البيت بس سميعه من أنكصف عمرها
ـ هسه شلج غرض بسميعه سوي شغلج ومالج بالباقي ولاتخافين أمي حقانيه ، ذبت عليها العشه وتعرفين العشه شكثر متعب يريد نسوان محزمه لان كومة عيال تأكل الوجه تريدلها عشه زين .
ـ أذا هيج خوش كايمه ، جبتلها الحطب وشفت جاسم كاعد لوحده ولك جسوم شمالك تتصفن منو وياك
جاسم ـ خضير طگني ويكولن عليه أنه خبل المخابيل
ـ من عمى العماك يا خضير فلا تجني عقل مخلي عقلك ويه هالمسكين ، خيولي انت تعقل عليه وعلى كل عشيرته انت وين أكو منك عقلك ذهب صافي جاسم خوش جاسم ابن عطيات الزلمه الزين ، ضحك وضحكته ترست وجهه ، چا هيج وجهك فرح كوم روح على قادريه جيبلنا خمره جبن هي تعرفه وأنطي لنهاوند انه اروحن اسد على الدجاجات بالگن .
ـ أنه بأمرج وبإمر نهاوند .
ـ راح وشفت أمي واكفه هي وأخوي مشعان يسولفون وسمعت طارف السالفه تخص أختي عروبه ، عاينتلي وجهت كلمتها اليه .
ـ لمي الدجاج كله بالكن وسدي الباب زين لايأكلهن الواوي وبدربج علفي الوز والبط وربطي العجوله زين .
ـ على أمرج يمه ، مشوا للبيت وأنه دخلت المحبس مال الدجاج لميت كل كم دجاجه بگن وخليت شبابيك مشبجه مفتوحه يدخل الهن هوا ، وغوربت الدنيا وأنه بالمحبس اركض ورى الدجاجات هسه تعشـوا ونسوني وهاي لميعه نحسه ما تبقيلي عشه حتى لو يزود تذب حصتي أختي وأعرفنها .
دجاجه طلعت غاد الحوش ، وين وليتي تعالي ويه رفيجاتج من أهلس ريشاتج وأحمسج بالجدر وأتعشى بيج احد يلومني شو دمشي .
وأنه شايله الكصبه بإيدي واطف بيها هي والديج الملاكحها من أمداك عايف كومة دجاج ملاحك هالعوجه
احاجي وأطف بيها وطفرن من الحايط ووصلت الباب الخارجي اليطل على الكاع مالتنا الورى البيت لان مكان الحلال معزول عن البيت بمسافة صغيره بس قبل لا افتح الباب أنجر طارف ثوبي فزت رويحتي ودب الخوف بجسمي وبلحظتها قبل لا أخلص رويحتي واشوفن شگو ومنو وراي إنقمت حلكي يإيد متينه وخشنه! وإنكطع نفسي ونجريت غاد وأنه ارفس وادفر بي واريدن صوتي يطلع جن الموت حاصرني من كل صوب جسمه هبت عليه أكبر مني ما كدرت افلت رويحتي لان بسرعه لف الحبل على ذراعي وصم حلكي بالشماغ وجضعني بالكاع بالخرابه تاركينها للحطب والمطال ...
وأني ارفس وادفر بي بس جن حايط ما يحس وبرأسه شيء موزين لان كام ينزع ملابسه وتخبلت من انهبد جسمه فوكي واعيط وايده على حلكي بكل قوته كطع عني حتى نفسي بيني وبين الموت شعره وريتني بهذاك اليوم ميته .
وجع المر عليه ما مر على حره ، ساعه أنه أنازع الموت جواه وحاولت أفلت رويحتي وما أخلي يدنس شرفي بس ما كدرت له ضخم حيل ضربني وخذاني بالقوه ودمرني وكل هذا هو ملثم والمكان أظلم هندس ما كدرت اشوفن شيء من وجهه ومنو هالنذل السلب مني أعز ما أملك ولوث شرفي بنجاسته .
ومر الوكت ولا أحد من هلي فگدني وكال خل اشوفن هالبت وين صارت! .
أبتعد وفك الحبل عني وجر شماغه من حلگي ومشى ومشيته مال واحد مأمن! بقيت منسدحه عالكاع ورويحتي تلوب والوجع ينهش بيه ، مديت ايدي وشفت الدم وبجيت وما بيه حيل اشيلن جسمي وأكوم الوجع يذبح وكل وجعي بصوب والأخذه مني بصوب اخذ مني شرفي ووجودي ، شرفي اللي أمي توصي بينا كل صبح ومسيه شگولن الها شحجي شصخم بروحي
حاولت أسند روحي وأكومن ما بيه حيل وظهري مشخط من الكاع ومن اظافره كأنما متعمد يترك أثر هالنذل هالخسيس حسبي الله عليك كون تتلكاها بأخواتك
فزيت على صوت أمي تصيح يإسمي وبجيت وكتمت صوتي أويلي على حالج سميعه أويلي تعالي عطيات وشوفي شصار بنتج ....
عطيات ـ ولج يمه سميعه وين غطيتي سميعه يمه الزهره ، ولج سميعه ، سميعه ولج يمه شبيج .
سميعه ـ وگفت يم الباب وجهت ضوء البيدها صوبي وعاينت زين ووكعت ولطمت على صدرها وركضت عليه تتلمس بيه وجرتني من شعري وتحجي بصوت مخنوك واني أبجي .
ـ منو سوه بيج هيج ولج أحجي يمصخمه البين شون هيج يصير بيج شون ، يصخام وجهج يعطيات ولج سميعه حاجيني يمه .
ـ حجيت وأني الم برجليه وهي تعاين اليه وتبجي ودمي بين أيديها وختمت كلامي والله يمه غصب عني والله وشوفي ظهري شوفي ، دارتني وشافته وشهگت وركضت على الباب حسيتها خايفه وسمعت صوتها وهي تحاجي حربي!
عطيات ـ جده حربي أريدك توكف ويه جديتك .
سميعه ـ مدري شحجت وياه وأجتني لبستني شون ما جان وهي تبجي تغطي دمي بالتراب بإيديها وواست الكاع ورفعتني ولمتني جوه ثوبها وتجر بيه يمه تكولين لأبويه يذبحني
ـ سكتي ولج يمه سكتي خليني حايره بهل المصيبه الوكعت على رأسي بهل المغربيه فدواتنك ربي خلصني وطلعني منها ربي دخليك ،دخيلك ، يا يمه يا أم الحسن أوكفيلي بهل الشده ناخيتج يا أم الحسن .
تمشي وتتعثر وتندعي بالله وتنخي بأهل البيت سلام الله عليهم ، الا أن وصلنا وعاينت على الحفره مالت الوز مشعان حفرها الهن ويترسها ماي يخليهن يسبحن بيها علمود لايوصلن النهر ويطفرن على الزرع وما احس غير شمرتني بنص الحفره وغطستني بيها غصب وراسي بنص الماي الوسخ وأطالب النفس الطلابه راح أموتن يمه ، ترفعني من الماي وترجع تغطسني الى أن نرفعت وكعت على الحافه وصوت حربي يحجي عليها .
حربي ـ شتسوين حبوبه تردين تموتينها! .
عطيات ـ عوفني يحبوبه عوفني .
سميعه ـ رفعتني بقوه وخذتني البيت أني والطين والماي الوسخ على جسمي وتسحل بيه وكلهن تلگوني يسألون بأمي وهي ساكته وحاجاهم حربي وگال الهم .
حربي ـ لكيناها أني وحبوبه واكعه بالحفره مالت الوز واكعه على وجهه زين ما مختنگه تلحكنها الها .
منعم ـ كله منك يا مشعان هاي سوالفك جم مره كتلك طمم هالحفره وخلهن يولن على النهر لو ميته ، مال الكطعيه الكطعت هالجني الخايس هاذ .
مشعان ـ وهي شوداها عالحفره ثوله وعميه متشوف دربها زين وتراها الحفره ما تغرك الوز اليسبح بيها مو عاد تغرك أوادم! بس كولوا هي ثوله .
لميعه ـ عمى شوادج عليها اي والله عاد هي فاهيه
سميعه ـ بس هي من أخواتي تحجي ومحد سگتها ودخلتني أمي الحمام وقفلت الباب وترست الطشت ماي وشكت هدومي واني الم واغطي بجسمي وضربتني راشدي فرت وجهي فر .
عطيات ـ وخري إيدج خليني أنظف وسخج وحسج ما أريدن أسمعلج صوت
سميعه ـ كتمت صوتي وعبرتي وجرتني من شعري وكعدتني بالكاع وتكب الماي البارد على جسمي وتفرك بجسمي بقوه احسها تصلخ جلد من جلدي وتفرك بالليفه قوي لما تعبت وصاحب أختي .
عطيات ـ نهاوند مال الوجع نهاوند .
نهاوند ـ ها يمه .
ـ ووجع اليوجعج يا يمه وينج ، جييلي سطل التايت والنفط من البرميل .
ـ شتسوين بالنفط يمه
ـ أحرك بي أهاليتي ،ولج يمه ما تولين عن وجهي وتصمين حلكج وتجيينه من أنعل أبوج لابو أهله لابو الساعة الكشره الشفتهم بيها ..
ـ أي يمه على أمرج
ـ ترسي السطل زين
ـ نهاوند راحت وأمي باوعتلي وأنه دنگت رأسي وأغطي بجسمي الملوث الى أن اجتي نهاوند وناوشتها التايت والنفط وخذته منها وكعدت تغسل جسمي بنفط وتفرك بالليفه واني مخنوكه وجع وريحه وقهر وضيم كلبي أبدأ ما انسى هذا اليوم وما أنسى قساواة گلب أمي وأيديها الخشنه وهي تجلف بيه ضوكتني وجع الشفته مرتين وأكثر وقبل لاتكمل ضغطت على بطني حيل وضلت تضغط بكل قوتها ما اعرف ليش هيج سوت وتضغط اني الوب بين أيديها .
جلفتني بالنفط وبعدها بالتايت وكومتني للغرفه وصاحت نهاوند تنظف الحمام ، وشافتني صالحه وكالت
صالحه ـ عمه ليش غسلتيها بالنفط ريحته خنگتنا خطيه ، وقابل شبيها .
عطيات ـ والزفره مالت ماي الوز الوسخ شيوخرها من جسمها ، صالحه ميلي من وجهي وردي الباب وراج .
سميعه ـ لبستني وعطرتني من عطرها وكعدت تمشط بشعري وما ينمشط من التايت صار حطب وتجر بالمشط قوي واني كاتمه الوجع وساكته واذا أميل راسي تجرني من أذاني وتفر رأسي الى أن كملت وغطتني وجابتلي علاج وأعشاب ريحته مو طيبه وشربتني غصب
عطيات ـ شربي كله شربي حتى لو ريحته ما تنجرع شربي علمود لاتحبلين .! وهاج هاي هم شربيها .
ـ يمه ريحته تكتل
ـ شربي وأنخمدي بفراشج وأذا وحده من أخياتج تحاجيج مـا تجيبيين طاري الصار وياج ، بينج وبين نفسج ما تحجين ، سرج تأخذينه لگبرج ، بطنج ما تتأمن على سر ديري بالج سميعه ،أفصم ركبتج اذا عرفت بيج حاجيه .
ـ هزيت رأسي وهي تعاين لي وأبالها الف حسبه توديها وتجيبها وتحجي بين نفسها
ـ والله ما فاتت جلدج يمهديه وما أنساها الج والأ أضوكج وأشربج من نفس الكاس مو أنه التندگين بيها وتخلين رأسج برأسي ، أنه عطيات بنت كتيبه اللي كل نسوان العرب تتراجف منها ومن أسمها ، أني الج يا بنت زكيه .
ـ باوعتلي ومن الخوف منها گبل غمضت عيوني وكل لشتي تتراجف نظراتها ترعب وتدب الخوف بمساكن الروح ، ضلت نايمه لثاني يوم كومتني غصب رغم موجوعه بس ما رضت أضلن نايمه .
ـ أبوج بس يسأل عليج مو مال تضلين مخموده لايحس بيج شيء كرع رأسي ، كومي عاوني أخياتج وأوكفي وكربي صوبي أفحصج كبل لاتطلعين
ـ قفلت الباب وتمددت وفحصتني ودفعتني .
ـ من يمت المهجومه أجتج
ـ أنطيتها الموعد وطلعت من يمها وشفت أبوي كاعد هو وأخوي منعم يتريكون صبحت عليهم وأخذت لفه من ايد صالحه وطلعت أكلتها برى مخنوكه ما أكدر اعاين لأبوي وأخوي ، نزلت دمعتي يـا خسيس سوه بيه هيج هم ينام مرتاح وهو كاسرله گلب ومدمر روح حسبي الله عليك وين ما تكون .
معقوله تكون مهديه! الها أيد يالسالفه! لااا هي أمي تكرههه وشيصير تذبه الصوج بمهديه وبناتها وهما مو يمنا علمود تضرنا لو تضر أمي ، لا هذا الحقد وسم قديم ومتوارث من أمهاتهن بسبب عداوه وثأر ودم أمهاتهن .
يا ترى الأحفاد هم يتوارثون هالعدواه والحقد؟ ...
ضلييت أيام أنه كوه مصبره رويحتي ونسليت من القهر وثوبي صار عليه عباه من الضعف وأمي دوم صافنه وعينها ما تفارك خيالي وكامت ما تخليني أروحن لزرع لو اتلكى الغنم والحلال تخافن عليه من المصيوب الكسرني الما معلوم منهو يا سليمه هذا !!
وخلت حربي هو يتولى مجاني ، وتحسب بالايام ويوميه تسألني على الشهريه ابالها الف حسبه توديها وتجيبها وانه اهجس ميته انه متت من هذاك اليوم نسلب مني شرفي وروحي الحلوه الجنت عايشه مثل هالبنوات وفرحانه برويحتي عساها بحظك وبختك وكون تتلكاها وتتعثر بخطيتي ....
مرت الأيام وأمي الخوف يختض برويحتها وعينها على سيارة أبوي الشيخ يمت يطلع من القصر ونفس الوقت تعاين عليه وأنه أتهرب بروحي منها نظراتها التصوب وتجتل عبالك جدي سبع الله يرحمه .
ودخل علينا مشعان يمشي سريع ومخبوص وملابس الدوام هو مهندس وخطاط معروف والكل تهابه وتحترمه خوش زلمه .
الحجيه عطيات ـ ها يمه مشعان علامك مستعجل .
مشعان ـ لا هيج حجيه بس صارت السالفه عوجه ولازم تنحل بساع دامها بعد حاره .
ـ شنهي من سالفه هاي يا يمه خلتك تدخل مدرعم
ـ طلابه من العشيره ودزوا علينا نحضرها ، يله اغير ملابسي واروح ويه أبوي ، وهبيه لحكيني بدشداشه
وهبيه ـ على أمرك عيني
سميعه ـ باوعتلي ودنجت رأسي وهمست بصوت ناصي وگالت .
الحجيه عطيات ـ دام أبوج وأخوج رايحين لطلابة ، أحنه هم نروح نحل طلابتنا!
ـ ليش يمه
ـ أكل العيش يا يمه ، ما الج شغل أنلطمي على حلكج وأنه احلها ودزيت خبر على أختج عروبه بلكي مكصوف العمر زلمتها يجيبها ليا ، كون ما تتأخر عليه ويروح علينا الوگت وأتكبع بمصيبتج ومهديه تركصلينا بجفيه .!!
ـ سگتت ومشعان طلع وأخذ وياه أبنه الجبير حربي يعني يگولون اله أبو حربي ، ودخلت علينا لميعه عصبيه وعيونها بكصتها وكامت تصييح وتوجه كلامها ليا .
لميعه ـ والله خوش كاعده كعده عوزج جاي ، يمه ما يصير عايفه الشغل والحلال بس عليه وهي الخاتون كاعده شبيها ما تكوم تعاوني بالشغل.
الحجيه عطيات ـ صوتج ما يعلى يالملسونه والشغل بيتج مو عند العالم وصخم الله جذبج الكاع فلاليح لازمتها ، بس الحلال أنتن وانه وياجن أساعدتجن ، لو تعلمتي على اخواتج لازمات كل الشغل وأنتِ ما منج فايده بس تعرفين تولين بيتج عمج رزاق .
ـ يمه شسالفه ترى بيت عمي وربينا سوه
ـ رجلج اكسرها اذا شفتج موليه نوبتن الثانيه وخضير ابن عمج رزاق بگد البغل صاير مو محسوب عليج زلمه شگو تفترين بحوشهم كدامه ،أنجعمي كبال عيني لا احرم عليج الطلعه .
ـ على أمرج حجيه عطيات .
سميعه ـ غمتني ومشت وسمعنا صوت سياره وهورن جن احد أجانا توني كمت اشوفن منو ضربتني على رجلي ومنعتني اكوم ، ودخلت علينا عروبه وتلگتها أمي حضنتها وتبوس بيها وتشم وتحضن من يوم يومها تحب وتفضل عروبه علينا كلنا حتى أكثر من صبيحه أختي الجبيره .
عروبه ـ فدوه لوجهج يمه ، أي شونكم كالوا أمج دازه عليج خير يمه صاير شيء والله وكع گلبي .
الحجيه عطيات ـ گومي وياي للحجيه زياره ونأخذ ويانا أخيتج سميعه ولهدت فلوس نسكت زياره بيهن!
ًـ چا السالفه بيها لهدت فلوس تخوف! أحجيلي يمه شبيها سميعه خوفتيني .
ـ أنتِ لحالج تفهمين بس خل نمشي گبل لايرد أبوج وأخوج ويأكلون رأسي وين جنتن وين جنتن على الاقل أتحجج بيج على صيت تردين خلفه والزك السالفه .
ـ اي من عيوني بس محمود ما كتله يمه أخافن يضل يحجي عليه اذا عرف ، خو تعرفينه خبل وطباگاته ما ينحملن .
ـ أنه الأعرفنه ، وعرج الخبال مستارثه من سليمة الگبور أمه مهديه من عساه لا اله أم بجاه سيدي ومولاي .
ـ چا شون
ـ وعمى العيون اليصيبه وجابج لعندي والباقي ما اله شغل بي ، وشيسوي قابل يطگج غير اسگطه وعلي .
سميعه ـ سگتت ونزلت رأسها وواضح شكو بگلبها .
الحجيه عطيات ـ أشوفنج خنستي ولج ، بس لا هالمغضوب رجع يضربج مو ، حاجيني ولج يضربج مو
ـ أي وأمس ضربني ومحد من أمه وأخواته خلصني خلف اللهَ على صباح سحبني من جواه جان خلص عليه .
ـ جعل أيده الكسر هو وأمه وأخواته حشى گلب حربيه
دام رجع لخبالاته والله ما تروحين وما تصيرين اله مره مو كعد بالديوان وگابل ابوج وأخوانج وحلف وتعهد ما يمد أيده عليج ، بس بيت ياسين دواهم عندي .
ـ يمه عوفيهم الله يطول بعمرج
ـ الله لايطول بعمري أذا خليتج جنة لمهديه ، أريدها من الله وأطلگج منهم منيتي هاي وأجتي على رجليها
ـ يمه صارت بعد
ـ ولج لعد محمود من زلمج أخ يالقهر نحسب عليج زلمه وخذاج والله أبن عمج من عمى العماه هو وأبوج الشيخ ، شايخ على اهل بيته من خفت هيج شيخ
ـ هسه عوفج مني واحجيلي شنهي السالفه
ـ غير يرتاح گلبي ساعة الأشوفجن بيها مرتاحات بس منين ومهديه كاظة عبايتها وتفتر على السحارات ودرب أمها الأستارثته وكبرته ، بس الظاهر جديتج كتيبه الله يرحمها ما كطعت رأس الحية زين !
" يله كومي لبسي عبايتج نولي على زياره هسه بالساعه ما تحلنا تضل بس تهرج فلك فلكها شكثر تلغي
سميعه ـ لبست عبايتي وطلعنا على زياره ووصلنا بيتها ودخلني الغرفه وعافني بيها واجتي لابسه عصابه برأسها عبالك جبل تخوف وكعدت تفحص بيه وجعتني حيل فركست رويحتي لما كملت فحص .
زياره ـ لبسي وأمشي وراي ، لاتخافين نظيفه .
سميعه ـ ومشيت وياها على أمي وعروبه وكعدت تحجيلهن وعروبه تباوعلي وتبجي كعدت يمها حضنتني
زياره ـ تعجبيني يا عطيات شغلج بالمكان غاسله رحمها غسل من النجاسه لاتخافين نظيفه مثل الورد بس لما كسرتها المصخمه
الحجيه عطيات ـ وهذيج يمت تنزل عليها .
زياره ـ هسه أنطيها عشبه وأنزلها بساعتها كلشي موجود عندي بس لاتنسين يريد فلوس
ـ فلوسج موجود يا زياره ، سوي شغلج وتدللي .
سميعه ـ كملنا وردينا القصر بس وصلت عفتهن ولليل تلاغوا هي وأبوي علمود أختي عروبه لان محمود اجه يأخذها وأمس جلبت بيها ما تقبل تمشي ومعزمه الا تطلگها منه وتخلص من مهديه حتى لو حساب خراب بيت عروبه!
حبيب ـ چا هي بكيفج تطلگينها من زلمتها وراها ثلاث بنات بس الظاهر أنتِ تسودتني وتخبلتي على عمرج يعطيات .
عطيات ـ أي أنه مسودنه مسودنه من ساعة شلت بنيتي وخليتها بحلك مهديه .
ـ وشبيها مهديه
ـ شبيها مو ، حبيب أنتَ زين تعرف بسوالفهن وسحورتهن ليش تغشم روحك بس شسويلك عاندتني وعاند بعيطات سويت اللي برأسك وزوجتها لمحمود .
ـ زوجتها لأبن أخوي چا جرمت خما جرمت وهاذ أبن عمها كسار رأسها
ـ گتلي أبن عمها من عمى العماك أنت وأبن أخوك شلت خطيتها وخليتها مكفخه اله كل يوم والثاني دازها النا مزوركه انه ما جايزه من بنتي لايوم يهبطها بمنيه ويجتلها والله اجتلكم كلكم وراها والله .
ـ عطيييات أكسر رأسج وعلي أرمي عليج اليمن وأطلگج وما الفيج بالقصر بعد لو تطلع كتيبه من گبرها واسويها وأنه حبيب وتعرفين منو حبيب!
ـ وأنه هم تعرفني بنت منو؟ أنه بنت كتيبه يا حبيب چا نسيت كتيبه أم السجاجيين نسيتها لو اذكرنك وأنه گلشي ولا أحد يكرب صوب بزري وخلك بعيد عن عروبه ومحمود تكلعه من حياتها مثل ما دخلته .
ـ چا هيج صارت يعطيات تخلين رأسج برأسي
ـ أمشي يمه أمشي
ـ عطيات أحاجيج لاتمشين وأنه أحجي عطييات.
مشعان ـ بويــــا كافي يرحم أهلك كافي بسكم عاد أنتوا مو صغار ، واحد منكم يهدي شو أمشي وياي لديوان ونكعد وكل طلابه يلتكي الها حل .
عطيات ـ لا يمه يمشعان ابوك طلايب قصره ما يلتكي الها حل بس طلايب الاوادم كاظ عبايته ويفصل فصول ومشكله اخيتك عصت عليه
منعم ـ يمه بسج عــــاد .
سميعه ـ مشعان أخذ أبوي لديوان وطلعوا ومنعم اخذ أمي لغرفتها وعروبه تباوعلي ودمعتها على خدها
نهاوند ـ فوتي الغرفه خيتي فوتي الله كريم ربج ما يكطع .
عروبه ـ البنات نامن .
لميعه ـ اي أنه نومتهن .
سميعه ـ دخلت الغرفه نامت بصفهن وتبجي وهي كاتمه صوتها وكعدت نهاوند يم رأسها تسكت بيها وتحضنها ولميعه عوجت حلكها شبيج أنتِ الثانيه
لميعه ـ أمج صدك ما تخاف الله ، أكو ام تهجم بيت بنتها بيدها ما كالت هذن البنات شنو حالهن لـو أمهن تلطگت لـو ما تفكر بيهن بس هامها شون تنتقم من عمتي مهديه .
سميعه ـ من يمت مهديه صارت عمتج اشوفنجن تلعبين بالنار ، خاب ما تسكتين لاتجي امي وتسمعج
ـ اي ضلن ورى أمجن ضلن تاليتنا كلنا نعجز بهل القصر من ورى سوالف أمي هاي التطلك ويجوز صبيحه تجي زعلانه لان سمعة اختها تأثر عليها نسيتن رجلها جوارين بيت عمي ياسين .
عروبه ـ لميعه صمي حلگج وأسكتي .
سميعه ـ مشت وهي ساكته زين ما ردت ، وانه هم نمت أصلاً مالي خلك لهل المشاكل كافي عليه مشكلتي .
ومر كم يوم وأجه محمود هرج البيت بصوته وخذاها غصب عنا كلنا وأمي حاولت ما تخليها بس مشعان منعها تتدخل ومشت عروبه والوجه طافي وتباوع بالوجوه مثل التودع! .
وضلت أمي تعن وتون على عروبه ما مرتاحه لمشيتها دوم تحجي وتگول .
عطيات ـ خايفه يجي يوم وأسمع خبر موزين عنج يا يمه لان المر الجرعتي عند مهديه ما جرعتها حره شدعي على أبوج كسر أيديه ورجليه ويهدد يطلگني چا اذا تطلگت أخواتج حالهن من حالج وأعرفن شنو يدور برأسه .
سميعه ـ باوعت على أختي لميعه كأنما شاكه بيها تحب صباح! لميعه تهربت من نظراتها وانه لحكتها شفتي أمي شون تعاين لج
ـ وأنه شكو
ـ نسيتي صباح مسويه روحج ما تدرين .
ـ يمه الزهرة على شنو انساه ليش هو يغيب عن بالي علمود انساه ، أسم الله علينا وعلى عشگننا
ـ أنتِ ما تفكرين ما تشوفين حال عروبه شحالها وصباح اخو محمود شيطلع أكيد أنكس منه .
ـ وأني شعليه من حال عروبه وهي ما تعرف تلم بيتها وزلمتها وملاحكه أمج وعدواتها هي ومهديه لومنها اصم أذاني والتفت على زلمتي وبناتي ومالي شغل بمشاكلهن وماضيهن ويه أمهاتهن وبعدين ابن عمها شبي أبن العم يبزز .
ـ والله شعندج خلك
ـ والله أنه لومو مشاكل عطيات ومهديه ، صباح ما أعوفنه لو هاي تنطبك على هاي ما عشكته لاجل أعوفنه علمود أمج وهذا أبن عمي ومتأكده من أبوي يوافق على زواجنه
ـ أمشي على شغلج هسه مو وگت عشكج وسوالفج
ـ تغارين لان محد يحبج عازله نفسج على شنو عشتوا
ضامه نفسسي
ً ـ سدي حلگج ومن تكملين لا تروحين على بيت عمي رزاق أمي ما تقبل .
ـ لو نضل على أمج نحتصر ، شطلعت هاي خاب ما تسكتين .
سميعه ـ مـا حاجيتها ومشت وأختي التؤام وأعرفنها البرأسها تسوي عناد ورأسها يابس وكلما أمي تحاجيها وتمنعها من بيت عمي رزاق لان خضير عيونه تلحكها هي ما تسمع كلام وتولي الهم وخضير اشك بي يريدها بس هي تريد صباح أبن عمي ياسين ويحبها وتحبه من زمان من دور بعدهم صغار من جانوا ساكنين يمنا بالقرية بس من درسوا وتعينوا انتقلوا كلهم للولايه وهناك أستقروا ويجون علينا بالمناسبات والعطل .
أبوي عنده أخوان ثلاثه عمي نوري استشهد وعمي رزاق ساكن بصفنا كانما بيت واحد ونزرع ونحصد سوه وكاعنا سوه هو زين علينا وخلفته بس بنات وولد وحيد هو خضير وابوي حيل يحبه وحاله من حال أخواني .
وعمي ياسين هم جان ساكن يمنا بس درسوا ولده وتعينوا وبسبب المشاكل بين أمي ومهديه شالوا للولايه واستقروا هناك عنده ثلاث ولد صباح ومحمود وقادر ..
محمود عسكري ، وقادر يداوم بالزراعه وصباح معلم .
وعدها أربع بنات نوريه وسحاب وفايزه وحربيه جنتنا زوجة مشعان الثانيه ساكنه بالولايه ابوي عنده بيت جبير ومكعدهم هناك والرايح والجاي والعنده شغله يكظيها هناك ويرتاح يمهم وعكبها يرد العرب .
إمــا أحنه ثلاث أخوان مشعان ومنعم وجاسم مشعان متعين مهندس وخطاط معروف ومنعم لا ما كمل دراسه وجاسم عقله مو كامل ما دخل مدرسه اصلاً .
وخمس بنات ، الأولى أختي الجبيره أسمها صبيحه متزوجه قريب من بيت عمي ياسين وزوجها غريب الحمدلله أسمه كاظم واخوي مشعان هو اللي زوجها لواحد من اصدقائه مدري شون أقتنعوا وأنطوا للغريب وزوجها عسكري وعندها بس ولد واحد أسمه غافر ومن بعده ما صارلها خلفه حاولت وعالجت قمستها من الدنيا هيج بس غافر .
نفس الوقت هم قريبه بكم فرع من بيت مشعان الساكنه بي حربيه وجهالها بالولايه .
وأختي عروبه زوجة محمود ابن عمي ياسين ونهاوند ما متزوجه وأني وأختي التؤام سميعه ولميعه ...
اخواني الجبير مشعان متزوج نسوان أثنين الجبيره بنت خاله خلف منها بس حربي وباقر وبعدها ما صارلها ورد ابوي زوجه حربيه صارت القسمه كصه بكصه عروبه لمحمود وحربيه لمشعان أما أخوي منعم متزوج بس ما يصيرله خلفه صارله عمر ولا يرضى يتزوج زوجته اسمها صالحه غريبه من العرب .
وجاسم كاسر خاطر الكل واولهن أنه فقير وعلى نياته وحظه من دنيا هيج ...
وعندي عمات أثنين متزوجات نظيره ، حسيبه .
وتمر بينا الأيام وأحساس أمي ما يخيب وفعلاً تحقق ورجعت النا عروبه جنازه وما تحجي بس تبجي وفاتحه عيونها على وسعهن وتباوع بالوجوه عبالك ما اشوفنه وساعه ساعه تعيط وتصرخ بعلوا صوتها تشيل القصر بصراخها ومشعان وأمي يحاولون وياها ويسگتون بيها ما تنلزم كأنما شيء خانگها لان تأشر بإيدها وتتوسل بمشعان يساعدها بس محد من عدنا فهم عروبه شبيها بس أمي وأمي أبوي مسيطر عليها وعلينا ...
عطيات ـ ولج يمه حاجيني شنو اليوجعج فهميني سليمه ضربج مو ، ولك مشعان أخافن ضربها على رأسها وسكطها أختك موزينه.
مشعان ـ كله من أبوي تعالي لزميها لما أولي اجيبلها علاج شيء يسكن عليها وجع رأسها ، كسر يكسر إيدك يا محمود كلها تجني عقل الا هو .
عطيات ـ يمه بنيتي يمه ، سوده بوجه أمج ، شدعي عليك حبيب شدعي ، وجع رأسها وضيم گلبها كله منك كله من أيدك ، حسبي الله عليك من أب دمرت بنيتك ، يمه عريب يمه بنيتي يمه طريتي گلبي كون الوجع يندار بإمج
وضلت على هالحال عروبه يوم زينه وشحلاتها وتفتر بالقصر وملاحكه أمي وامي تحضن بيها وتقرأ على رأسها وفرحانه بطولها مثل حمامه معششه على بناتها ويوم لا والله حالها يكسر الخاطر تصييح وتعيط من راسها وجع ما يهدأ أبداً وتهلوس وتجر بشعرها تصير شبه الخبله من ضيم رأسها الاشياء التشوفها وتشكي منها تكوم تملخ بنفسها ...
كامت أمي تأخذها على شيوخ وساده ومشعان وياها رغم أبوي ما راضي وعارض لان يأمن بهل السوالف ويكول عليها بدعه وخرافات بس مشعان هو تكفل ومشى ويه أمي .
ومن ترجع فرحانه بروحها وتكول انه صرت زينه وتدور على بناتها وأمي تعاينلها وتبجي يارب يتلطف بحالها
الحجيه عطيات ـ يمه مشعان بس أنت التكدر لابوك أخافن محمود يجي يردها وياه ، اريدن منك تطرده وتوكف ابوك عند حده كافي يا يمه ما جايزه من اخيتك وشوفة عيونك ما خلينا شيخ وسيد يعتب علينا ما خذيناها اله
مشعان ـ يصير خير حجيه ، يله أنه أمشي .
الحجيه عطيات ـ وين تمشي
ـ لبيتي يمه أشوف جهالي هسه تلكين حربيه تفور وتحجي عليج .
ـ لا ما تحجي ولا تگول وحربيه خوش حربيه ولا جنها بنت مهديه سلملي عليها جثير وبوسلي جهالك ودير بالك على نافع شوي حرك وحربيه اعرفها ما تسگتله .
ـ الملسون ابو المصايب والله موكف البيت على دك رجل واخواته شابع بيهن تكفخ شكدوته ومن هسه صاير زلمه عليهن مدري عليمن طالع .
ـ ميخالف يمه ميخالف جاهل شمفهمه وطالع على أبوك حبيب عليمن يطلع جده منو يله يمه توكل ودير بالك تضرب نافع ازعل منك ها ، لاتعلمون جلده على الضرب ويستخنث ، خلوا زلمه من كاعه مثل اخوانه حربي وباقر ، الله يحفظهم .
ـ أن شاء الله حجيه ،وهبيه تردين شيءمناك أجيبلج وياي
وهبيه ـ لا يا عيني أريدن سلامتك وسلملي على حربيه
مشعان ـ الله يسلمج ويعزج أم حربي يله فيمالا .
وهبيه ـ درب السلامة .
الحجيه عطيات ـ وهبيه يمه شوفي ولدج وين وتعالي عاونيني نفوت نسبحها بلكي ترتاح شو بس تعن جنها مصخنه شتكولين.
وهبيه ـ على كولتج عمه نسبحها يله عمه گومي وياي
سميعه ـ راحن يسبحنها وانه ضليت كاعده وأعاين على بناتها الثلاثه فقيرات مثل أمهن وخذتني صفنتني لحالي من ساعة اجتنا عروبه انه ملتهيه وأمي شالت عينها عني والتهت بيها بس باقيه غصه بروحي ..
نساعد الفلاليح بحصاد موسم البصل وصحت على لميعه شاليات من يمج واذا خلصن وصي جاسم يجيب من البيت البارحه جابوا وياهم .
لميعه ـ وأنه اشتغل عند الخلفوج ما تكومين أنتِ وجاسم ساعه ادزه ما يرد ، يخلي رأسه بالجدر يضل يترس بكرشه ما لكيتي الا هالمخبل أدزه .
جاسم ـ أنه مو مخبل اي مو مخبل أنتِ خبله مو أنه
لميعه ـ خاب من تسگت لاتضل ترطن برأسي فلك فلكك كون .
نهاوند ـ شنهي هالحجي هذا جم مره منبهه عليج ما تكولين عليه خبل كدامه يضل بس يبجي ليش تكسرين بخاطره ، أنتِ كلبج صخره ما تحسسين غضب على يومج من بنيه، شو أمشي ساعدي البنات أنه رايحه أجيب لاخلف الله عليج .
سميعه ـ راحت نهاوند للقصر تجيب وأخذت وياها جاسم يمشي ويبجي ويمسح بطارف دشداشته ويباوع على لميعه لان كسرت بخاطره ودومها تگوله خبل وهو يضوج ويبجي من أحد يكوله خبل ، هو نص عقل ونص عين وحده من عيونه طافيه من الولاده هيج الله خلقه مكسور الخاطر وأهلي كلهم يحبونه وما يزعلونه الا لميعه مخليه عقلها وياه لان تشوف الكل مدلله وهي تريد الدلال الها لان أبوي هواي يحبها ومدلله وعزيزة گلبه .
أنه سميعه ولميعه وهواي نتشابه بس الفرق البينا عيونهه واكو فرق بس الكرايب مو كلها تميزننا بس أهلي وأبوي وأمي يعرفون سميعه من لميعه بالأخص أبوي يعز لميعه أكثر مني مدري هي لوكيه وتتحايل . .
" رجعت أشتغل وأعاين على لميعه بس تصييح وتأمر على فلاليح ، كمت جريتها على صفحه وصحت بيها لميعه عوفي الاوادم تشتغل شكو واكفه وتحجين عليهن تراهن بشر مثلهن مثلج .
لميعه ـ ترى منطين فلوس مو تراب كاظياتها بس سوالف وهذا حلال أبوي الشيخ تعبان بي وگلبي يوجعني عليه
ـ دام گلبج يوجعج أشتغلي حالج من حالهن واظن أمي وصت وگالت تشتغلن وياهن وتكظن الشغل وتردن القصر وگبل لانمشي كالتلج اذا ما تردين تطلعين للكاع أبقي بالقصر أنتِ عزمتي الا تمشين ويانا .
ـ أنه أم الأنه وأم الشغل وأذا ماكو أحد يوكف فوك رؤوسهن ما يشتغلن يضل بس يسولفن ونص النهار يطير ، تعلميني بيهن علمود تطول الايام بالشغل وتكثر يوميتهن ، شو دمشي على شغلج مالج شغل بيه .
ـ دفعتني ومشت فلا تصيرلج جاره لا والله تبقين جاموسه ، رجعت اكمل شغلي ومر الوكت واجانا جاسم يضحك ويصفك بإيديه هذا شبي
لميعه ـ خير جاسم شنهي علومك
جاسم ـ عمي ياسين اجو وجابوا كيك كيك هلكثر كيك طيب وشربت اي كيك طيب الكيك .
لميعه ـ صدك تحجي ولك ،هلا بيهم هلا أشبع اليوم كيك يجويسم ، سميعه أنه رايحه القصر تجين وياي لو تضلين
سميعه ـ أجتني ملهوفه وتعدل بربطتها وين تمشين بعدنا ما مكملين شغلنا شكو راده القصر من هساع .
ـ يا شغل يمعوده أنتِ هم بطرانه هذولي بيت عمي ياسين خل أروح اسلم عليهم .
ـ وأذا بيت عمي ياسين
ـ شبيج أنتِ مثل أمج ما تحبن أحد
ـ لا ليش منحب أحد ، بس گولي أجه صبيح وأخذ عقلج وخلاج ما تندلين دربج من وين
ـ عليش ضايجه ليكون ناهب مالية أهلج ، لو أنتِ هم مثل أمج ما تخليني أتنفس وأشوفنه وأترس عيني من شوفته لو لان أبن مهديه خاب ما تفگين عني .
ـ تعرفين السبب عليش تغشمين بنفسج
ـ أهوووو فگينا عاد أنه رايحه جاسم تعال وياي أنطيك من الكيك .
ـ راح وياها يضحك وكعدت وأبتسمت عليها كل عقلها أمي تعيد الأمجاد والغلط مرتين وترجع تنطي مره لمهديه هي عروبه أبوي أنطاها لمحمود وتعض أصابعها ندم مو عاد لـ صباح وأمه مهديه .
رجعت گملت شغلي وأنه أشتغل فزيت على صوت أخوي منعم أجه من صوب الكاع وبإيده الكرك وخضير أبن عمي رزاق يصييح عليه ، خير يا ساتر شگو .
خضير ـ الحك يمنعم ، قادر ومحمود أجو والشر بين عيونهم وعمتي عطيات دزت عليك گالت خل يجي بساع جنهم ناوين عالمشاكل يا أبن عمي .
منعم ـ قادر وأخوانه مال أطمهم بهل الكاع وأفتك منهم ومن مصابيهم من ساعه السوده الصار بينا نسب شگول عليك يبوي على هالزيجه هاي ، أمشي ولك أمشي .
سميعه ـ لا السالفه چايده كلها مشت عليش بس أنه ضليت ، لحكتهم وصلت وأشوفن مهديه واكفه باب الطرمه وتحجي وبصفها بنتها حربيه كاظتها وتفازع لان مهديه ما مسميه بالرحمٰن ، على عكس أمي بارده برودة الكاع ، كاعده ونافع أبن مشعان بحضنها ويغم بجديته مهديه من فلك فلكك كون ولا جن تكون جديته .
جاوبتها أمي عطيات
عطيات ـ خلصتي حجيج يا مهديه .
مهديه ـ لا يعطيات ما خلصت وأنه سالفتي وياج وحد عن اللي جايه عنه ، جايه أخذ بنات أبني شنهي نسيتي أني جديتهن وهنا حفيداتي لو هم تردين تحرميني منهن مثل أمج حرمتني من أمي ويتمتني عن صغر .
ـ البنات عند أمهن محد يأخذهن من حضنها وطلبج مرفوض يمهديه ما الج شيء عندي من تصير بنتي زينه دزي أبنج على عمه ويأخذهن .
ـ البنات مكانهن بيت أبوهن وجدهن ويمشن وياي أن رضيتي وأن ما رضيتي ، يله جده نورس نرجس نبأ أمشن وياي يجده مكانجن بيت ابوجن .
ـ على جثتي البنيات ما يمشن لا هنا ولا عروبه
ـ بنتج عندج وبناتنا عدنا من يرد عگلها لرأسها دزي علينا نأخذها ، يله يجده .
سميعه ـ تعالت الأصوات والبنات يبجن ومجلبات بإمهن وعروبه بنص روح من وجع رأسها تباوع لأمي وتبجي تالي حجت بصوت مخنوك
عروبه ـ يمه أنه ماشيه ويه بناتي ما أكـدر على فراكهن أنه عايشه علمودهن .
عطيات ـ وين تمشين يالغمه تردين تموتيني ناقصه عمر شو أمشي ردي لغرفتج وبناتج طول ما خشمي يشم الهوا محد يأخذهن من حضنج وأنه أمج .
سميعه ـ عروبه لفت عبايتها وكظت أيد بناتها وتريد تمشي وأمي جرتها صوبها وگفت بوجه مهديه والشر بين عيونهم وحده تتوعد للثانيه .
عطيات ـ أخذي ولدج وكسري الشر وشوفينا مكفاج خلي الشر نايم لاتهيجين مواجع راكده يمهديه .
مهديه ـ مو أنه مهديه بنت زكيه أذا عفتلج البنات
حربيه ـ يمه أستهدي بالرحمٰن ، عمه فدوات أغديلج على كيفجن كولن يالله وعروبه مريضه المره بيا حال وتون من رأسها وأنتن أمالخ بينجن .
مهديه ـ واكفه وياهن على أمج من موت الكرفج من بين البنات ، بس يصير خير وحفيداتي اليوم ما يضلن بهل القصر ويباتن عندي وأشوفن كلمة منو التمشي
سميعه ـ دگت عوجيتها وشدت العزم ومشت عصبيه وأمي كاظه عروبه والبنات وما تخليهن يمشن وعروبه وكعت يم رجليها تبوس بيها وتبجي .
عروبه ـ يمه فدواتج خليني أمشي ويه عيالي لايضل بالج عليه وأذا على وجع رأسي تعودت عليه أنه أصير زينه بس مال أعوفن بناتي لا يمه رجلي على رجلهن هنا هاي الروح التصعد وتنزل أني طلعت من بيت مهديه بطركهن ما اريدهن ينكسرن مثل كسرتي .
الحجيه عطيات ـ ولج يروح أمج وين أخليج تمشين تردين أدزج للموت مرتن ثانيه ، أنه ما صدكت طلعتج من هذاك البيت وخلصتج من سحورتهن .
ـ سويتي اللي عليج خليني أمشي يمه
ـ ولج بس صبري عليه لما أقنع أبوج وأخذج لشيخ حمود وأتطيبين وبناتج خلهن هساع يمشن وأنه بأيدي أرجعهن لحضنج ومالج شغل وأنه أمج طول ما أنه عايشه محد يحرمج منهن .
ـ لا يمه لا ما أعوفن بناتي ما أعوفهن .
سميعه ـ حضنتهن وتبجي وأجه محمود تقدم لاسلام لا كلام يجر بيهن من حضنها وهي حاضنتهن ما حشم أحد وأمي جرت عروبه وحاضنتها وتبوس بيها وعروبه تصرخ على بناتها .
محمود ـ أمشن يله ، شلعتي كلبي من ساعة الاخذتج نوب وصلت بيج تشلعين كلبي على بناتي .
الحجيه عطيات ـ الله يشلع كلبك ويمررك دنيا أخره مثل ما مررمرتني على بنتي أنت وأمك ،اخذ بنات وولي .
عروبه ـ وانه يمه
الحجيه عطيات ـ تبقين عندي
عروبه ـ مـا أعوفن بنات خليني أولي عوفيني يردن يموتني خل أموت وأفتك من هالعيشه بس ما أعوفهن
سميعه ـ نفضت نفسها ولبست عبايتها ولحگت محمود وأمي تصييح وراها وحربيه لازمتها
عطيات ـ لاتكسرين ظهري بروحتج ولج يمه عروبه بس سمعي من أمج طاوعيني يولي يمه وبناتج ما يطيرن ولج عروبه ردي گلبي ناكزني عليج أخافن تروحين وبعد ما أشوفنج .
حربيه ـ عروبه ردي وبعدين أنه أحاجي محمود وأقنعه يومين ويردهن الج بس هسه بعده تعبان توه نازل من الدوام وعصبي ودمه حار كسري الشر وردي لخاطر أمج ما تششوفينها شحالها عليج . .
عروبه ـ ما أكدر يحربين ما أكدر وسامحيني يمه بس بناتي ما أعوفهن أنه عايشه علمودهن ، حربيه ديري بالج على أمي .
سميعه ـ عروبه مشت وهي تبجي وأمي وكعت بالكاع وتصييح عليها
عطيات ـ ولج عريب ولج يمه عروبه كسرتي ظهري بروحتج يمه المن ماشيه على الرجال ما منا فايده لو عالعيال سحورتهن تنكز بينهن على بختج يمه عروبه .
سميعه ـ سمعنا صوت منعم وتعاركوا بينهم وتدخل عمي رزاق وفازعهم وفضت ومشوا وصعدت عروبه بصف بناتها وتباوع لمنعم وتبجي ومنعم يصفك بإيده بقهر ومشوا وراحت عروبه وعيونها علينا تباوعلنا واحد واحد ...
دخلنا البيت وحربيه حارت بإمي وتغسل الها وأمي ملخت نفسها تضرب على رجليها بقهر ودخل منعم هز رأسه مقهور على حالها .
منعم ـ كله من رأس أبوي ومشعان هذا نسب كصه بكصه لعد هيج أحسن أخذوها غصب على خشمونا .
عطيات ـ أمشي جيبلي أبوك يروح يجيبها ولك واحد منكم يلحگها ويرجعها أختكم مريضه مريضه أختكم تعبانه مو مال أخليها عند مهديه .
منعم ـ نروح نجيبها وبعدين أبوي يردها بنفسه الهم مو كم مره زعلت وكلنا اله طلگها ما رضى وبإيده يرجعها لمحمود الفگاگه لعد هذا رجل عروبه ، بنيه أجلعها شيخه ازوجها لواحد زايعته الكاع وأمه حاكمته من أمداه الوكت خلانا أنسايب الزبايل .
لميعه ـ شويه أحترم لما بنتهم جنتكم شهل الغلط هذا ما تحشمون أحد .
منعم ـ ما تسكتين لا أجيبج بعجل أنومج بكاعج أمشي أنكبري من وجهي لا اطعس وجهج اشوهلج هالوجه بي طشت لحم . .
سميعه ـ ضلينا مكابلين أمي وهي تتوسل بمنعم يروح يرجعها لما دخل علينا أبوي ومشعان واضح عليهم مزعوجين .
حبيب ـ شگو هارجتنا وفاضحتنا يوميه بصوتج أنتِ وبنتج شنهي محد مزوج بناته لعمامهن بس أنه ،أبتلت بلوه خوما بلوه تضلين مناحر أنتِ ومهديه
والبنيه زوجتها لأبن عمها مو علمود يرد الثأر بينج وبين مهديه ، البكلبج شيلي لا أشيل رأسج عطييات
وخلي البنت تعيش ويه زلمتها وبناتها لا تهجمين بيتها بسوالفجن ومناحرجن الما يخلص العمر كظه ومشاكلجن ما تكظي .
عطيات ـ يا حبيب أنه أم وما جايزه من بنتي وأشمرها للموت بحلك مهديه وبنتك مريضه يا رجال بنتك مريضه رأسها يأذيها البنت متعوبه يمت تحس بنتك وبضميها وضيم هالزواجه الگشره الكسرت بيها رگبتها وشلت بيها خطيتها .
حبيب ـ أم على عيني ورأسي بس أنه ما شلت خطية أحد والبنت مصيرها بيت زلمتها ومنو يرضى بيها كوليلي منو يرضى بيها ، خلف الله على أبن عمها رضى بيها فوك زينيته نكوم أحنه نصير موخوش أوادم ، سگتي يا مره وكظي لسانج وخلي بنتج تعيش حياتها يوميه مسويلتنا طلابه ويه بيت أخوي .
ـ شنهي يا حبيب شنهي منو يرضى بيها ليش بنتي شبيها وأبن عمها يتفاضل عليه ويأخذها شقصدك يحبيب أشو حجايتك ثكيله وتوجع الگلب .
ـ قصدي واضح عروبه من يومها خبله ووجع رأسها من خبالها ، خلي بنتج عايشه عد زلمتها ولاتهجمين بيتها
ـ بنتي مو خبله ووجع رأسها من سحورتهن أنه من زوجتها بنتي صاحيه اصحى منكم ، عروبه جانت توزع عقل للما عنده عقل وهذا أنت أبوها وتگول عنها هيجي شخليت للغريب لو لان جاسم خبل
سميعه ـ باوعت لجاسم وبجت وجاسم نزل رأسه وطلع برى ومشعان لحگه وأبوي صاح بيها بصوت عالي .
حبيب ـ أي بنتج خبله لان الخبال متوارثته وجاسم هم جان مثلها صاحي ومن كبر تخبل لاتلزكين السالفه بعلج العيب ببنتنا .
وعروبه سالفتها تنسد وتضل بيت زلمتها وعلى بناتها وتجي لبيت أبوها زياره وأنتِ تحشمين روحج وتكظين لسانج عن مهديه وبيت أخوي ياسين لا يصير شيء لا يعجبج ولا يعجب خلفتج كافي صرتي جده وأحفادج تارسين البيت يمت تعقلين وتبطلين مشاكل وطلايب أنتِ ومهديه لو أنتِ مثل أمج كتيبه ما تكعد وتركد بكاعها الا تحني أيدها بالدم
سميعه ـ كمل حجايته وجن ضربها طلقه وخلها ومشى ينفض بعبايته باوعت وراه وگالت .
عطيات ـ أسمعني يحبيب أذا عروبه صارلها شيء للموت لساني ما يلتوي على لسانك وخطية بنيتي بركبتك يحبيب ...
