رواية ضلم ابي كاملة جميع الفصول بقلم جمانه السعيدي
قصه من ضمن القصص الي اجتني عن ضلم الآباء للأبناء
اعتقد هاي ااكثر قصه حزينه تحجي بهذا الموضوع
ساره مواليد ٨٠
ابوي موضف وامي ربت بيت
عندي اخ ازغر مني باربع سنوات واخت زغيره
ابوي انسان ضالم عصبي واناني ومتحكم ما يتفاهم ابد
بدت معاناتي الحقيقيه بعمر ١٢سنه
لمن خلصت سادس ابتدائي
نجحت للأول متوسط
اني جسمي خشن وابين ااكبر من عمري
بس ولله عقل طفله وكلشي مااعرف
بعطلة اخير السنه من نجحت للأول متوسط
امي تمرضت
امي طول عمرها تعبانه ودائما تشكي
ابوي مجان يدير بال المرضها ولا عمره فكر ياخذها للطبيب
يطمن عليها
يريد منها طبخ وتنظيف وعناية بلجهال
وياويلها اذا رجع ومالكا غاسله ملابسه
ومحضره الاكل ما يتفاهم ايده والضرب
مايعرف مريضه تعبانه ماتكدر يريد البيت على اخر حبايه
مااعرف امي من شنو كانت تشكي لان محد فكر ياخذها للطبيب ويشوف علتها شنووو
كتلكم ابوي عصبي وبخيل اناني
اما اهل امي امها وابوها ميتين وأخوانها كلمن ملتهي بحياتها محد يذكرها لو يسئل عنها
هواي جنت اشوف امي تبجي ومقهوره
بس اني زغيره مااعرف شلون اتصرف
المرض سيطر على جسمها
تكعد بليل تبجي من الوجع وابوي ماله شغل بيها
الحد ما كعدنا بيوم من النوم
ابوي كعد ولكا امي نايمه مو مثل عوايدها كل يوم
تكعد من الفجر وتحضر ملابس بابا للدوام
تحضر الريوك وتروح تكعده
اليوم ابوي كعد وامي نايمه
اجا يكعدها صاح عليها بعصبيه
ابوي... شو نايمه اليوم كومي راح الوكت عليه
ماردت علي امي
رجع زمخ بيها بصوت عالي كلنا كعدنا على هذا الصوت
.ابوي...انتي ما تسمعين مو احجي وياج
ضربها برجله
جمانه السعيدي
بس امي ما تحركت من مكانها
دنك عليها حركها بايده جسمها بارد وصاير مثل الخشبه
دنك عليها خله راسه فوك صدرها ما تتنفس
رجع ليوره مثل المصدوم
يريد يستوعب الموقف
امي ميته الله اعلم صار كم ساعه ميته
كعد على ركبه وبقه صافن مايعرف شلون راح يتصرف
كلنا نباوع علي وعلى امي
اختي الزغيره متعلمه تنام بحضن امي
قربت وخلت راسها على صدر امي
تمددت وخلت راسها على صدر امي
كلشي ما تعرف المسكينه
اني ومصطفى بقينا واكفين بصف امي
ما نعرف امي ليش ما جاوبت ابوي
رغم احنا نعرف هيه تخاف منه مجرد ما يصيح عليها بصوت
تطفر من مكانها
خمس دقايق واحنا وواحد يباوع بوجه الثاني
شال الغطى بابا وغطى وجه امي وسحب اختي الزغيره
وكال هاج شيليها
ساره...دنكت شاتها كامت تبجي تريد امي
طلع بابا راح جاب عمي واجا
ساره...سمعته يكول ميته اجيت اكعدها لكيتها ميته
عرفت امي خلاص مراح تكعد مره ثانيه
بابا... ساره اخذي اخوانج للغرفه الثانيه
دخلت للغرفه كعدت اختي بحضني ومصطفى تمدد بصفي
وعمي راح جمع الاهل والاقارب حتى ياخذون امي
للمستشفى يفحصوها ويطلعون شهادة وفاة
اجت زوجت عمي كعدت ويانا
نسوان اقاربنا بدن ينظفن البيت هنا وزوجت عمي
ونزلن فراش جديد
وبدن يعيطن حتى الناس تعرف امي ماتت
٣ ايام الفاتحه اني حايره بااختي
اما مصطفى راح وياا بابا يستقبلون عزا الزلم
ماكنت اسمع من النسوان غير كلمة خطيه بناتها بعدهن زغار
هاي الطفله الزغيره منو الها على اختي نور
بقت زوجت عمي وكم وحده من اقاربنا بيتنا للسبعه
يستقبلن عز النسوان
وكل وحده تدخل البيتنا تسئل عن مصيرنا
ووين يرحن بناتها
منو يبقى بيتها ويدير باله على بناتها
خطيه زغار
ااكو بيهن يقترحن على زوجت عمي تاخذنا بيتها
زوجت عمي رفضت هذا المقترح
كالت ابوهن موجود وهو يدير باله عليهن
لو يزوج ويجيب وحده تهتم بيهن
الحد ما خلصت السبعه وبعد ما شفنا اي وحده من اقاربنا
البيت خلا علينا
ابوي نام بلاستقبال
واني و اخواني نمنا بغرفة امي
اختي الزغيره بليل ما قبلت تنام
باايام الفاتحه كانت تلعب ويا الجهال واني عيني عليها
بليل تتعب وتنام من وكت
ماكانت منتبهى الفقد امي
بس من البيت صار خالي بس احنا بي
بليل ستفقدت امي وكامت تبجي عليها
لان متعوده تنام بحضن امي بقت تبجي اليل كله
اكعد اسكتها ما تقبل تنام
للصبح تعبت من كد البجي نامت على وجها
اول ماخليت راسي على المخده ونمت
اجاني ابوي
ابوي....كومي شو نايمه كومي حضري الريوك
كمت امشي ومغمضه عيوني هلكد ما نعسانه
خليت القوري على النار
وطلعت خبز وجبن
ابوي...شبيج وجه ألبومه من الصبح
ساره...نور بس تبجي اليل كله وماكدرت انام
صاح عليه بصوت
ابوي... روحي اريد ريوك كاعده تتشكا من الصبح
ساره...خدرت ااجاي وجبته هاي اول مره اخدر جاي بحياتي
جمانه السعيدي
ابوي....شنو هذا الجاي يلعب النفس
طبعا اني بعمري كله ما مخدره جاي ولا مقربه على الطباح
لزمني من اذني ونزل راسي للكاع
ابوي.... اصبه على راسج
شنو هذا يلعب النفس جاي ما تعرفين تخدرين
ضربني راشد شمرني مترين
كمت ابجي
ابوي...كومي لا بارك الله بيج مكابلتني من الصبح
انعل الساعه السوده الي خلتني اتصبح بهيج وجه من الصبح
ساره......ابد ما قدر اني زغيره وكلشي مااعرف
طفله يتيمه لا حول ولا قوه
لا يعاملني وكانما وحده جبيره
يعاملني مثل ما يعامل امي بلضبط
طلع للدوام وبقيت اني محتاره بلبيت واخواني
اخاف اقصر بشي لا بابا يضربني
نضفة البيت وغسلت الاختي وغيرت ملابسها
وريكتها هيه ومصطفى
غسلت المواعين وغسلت ملابس اخواني
الحد مارجع بابا من الدوام
هو دخل للبيت وما شاف اكو جدوره على الطباخ
وهو هجم عليه
ابوي...وووين الغده
ساره...مااعرف اطبخ
ابوي...شنو ما تعرفين تطبخين ازغر منج وكلشي يسوون
ساره...ولله مااعرف
جاب الجدر وركعه براسي وبقه يضربني بقوه
شلون ما طابخه
ساره...... مااعرف اطبخ
مايقبل يقدر اني زغيره وبعمري كله ما طابخه
كعدت وكمت ابجي لازمه راسي وابجي
ابوي...كومي لا تكعدين كومي اطبخي غده
يله بسرعه عشر دقايق كون الاكل جاهز
ساره...مااعرف ولله مااعرف
ابوي...شنو ما تعرفين قابل هو علم
كمت من الخوف غسلت التمن وخليت ويا ماي وخليته على الطباخ بدون تنكيع ولا خليت الماي يفور
وجبت عدس وخليت على ماي وبهارات صفره وخليته على النار وبقيت واكفه
مااعرف يمتى يستون لو شلون
شفت التمن خلص الماي الي بي طفيته
والعدس فار طلع مثل الابيض فوك طفيته وخليت ملح
صبيت الاكل وجبته
هو شاف الاكل التمن حب والعدس بدون طعم
شال الصينيه ولبسها براسي
ابوي....شنو هذا من ااكل التمن حب والعدس بعده
ما مستوي
سا ه.......كتلني كتله خله جسمي ازرك من الضرب
راح جاب بيض طك بلدهن ااكل هو واخواني
وما بقالي شي
جاي يعاقبني على الطبخ
اني اصلا ماكدر ااكل هلكد ما بجيت ونقهرت
دخل للاستقبال ونام
واني بقيت حايره بااخواني
بليل كال كومي حضري عشه
ساره....شسوي عشى
ابوي...كلي بذنجان وبتيته
كعطعت البتيته والباذنجان وخليت دهن وكعدت اكلي
شي مستوي وشي محترك
من خلصت باوع الدهن بلماوعون ااكثر من الاكل
وهو نزل عليه غلط وحجي هلكد ماوحجا عليه
بقيت بدون عشى
ااكل هو واخواني وابد مافكر بيه
واني بقيت بدون غده وبدون عشى
من خلص وراح ينام رحت ادور بلكت باقي شي منهم
ااكل لان مصارين بطني تتكطع من الجوع
كلشي مالكيت ماكلين الاكل كله
طلعت خبزه ولكيت شويه جبن باقي من الصبح
ااكلت ورحت اريد انام
بدت اختي تبجي
تريد امي تنام بحضنها
خليتها بحضني مااتقبل تنام
شلته وكمت افتر بيها ما تقبل تنام
طاحن اديه منها
تعبت كلش يله نامت
نايمه وماااحس غير واحد ضربني برجلي
طفرت ابوي يريد ريوك
كمت اركض واتعثر منا لمن وصلت للمطبخ
مااعرف اخلي القوري لو اطلع خبز
خليت القوري ورحت لكيت بس خبزه وحده باقيه
طلعتها هاي الفتره كلها زوجت عمي تخبز ودزلنا خبز
من ماتت امي لليوم
خدرت الجاي وأخذته وطلعت الجبن
صبيت الجاي
ابوي....شنو هذا من جاي شكد راح تبقين ثوله الخاطر الله
هاي ما طلعت عيشه
اتريك وطلع
كعدت اخواني ريكتهم
اخذت اخواني ورحت الزوجت عمي
بس شافتني استغربت
جمانه السعيدي
ام علاء.....هااا خير
ساره...ابوي يريدني اطبخ اني مااعرف اريدج تعلميني على الطبخ
وخبزنا اليوم خلص
ام علاء....ميخالف اني راح اجيكم واعلمج
على الطبخ
بس الخبز شلون بعدج زغيره اخاف عليج من التنور
ساره...اتعلم شويه شويه
ام علاء...اخذي اخوانج ورجعي للبيت
واني راح اجي وراج اطبخلكم غده وانتي ابقي
واكفه يمي وتعلمي طبخ
ساره.....شلت اختي ورجعت للبيت اني ومصطفى
ساعه هيج واجت وراي زوجت عمي جايبه خبز وجايه
فتحت الثلاجه وطلعت هلقاسمه الله
وبدت تطبخ وتعلمني
من رجع ابوي وخليت الاكل كدامه
ابوي اليوم انتي طبختي
ساره....ام علاء اجت علمتني على الطبخ وكالت كل يوم اجي اعلمج
ابوي...اي زين احسن ما طبخين وحدج والاكل محد ياكله
كل يوم الساعه ١١ تجي ام علاء وتطبخ كدامي
اركز وياها شلون تطبخ واتعلم
بعد اسبوع وااحد كتلها اني اطبخ وانتي باعي عليه
من كملت طبخ وشافتني شلون حافظه
كالت عفيه هاي هيه
كمت اطبخ وحدي
طبخي معقول زين مو كلش مضبوط بس راح اتعلم شويه شويه واعرف اخدر جاي
ام علاء بدت تقصر ويانا بلخبز قررت اتعلم اعجن اخبز
كمت اعجن بلبيت
مصطفى يشيل نور واني اشيل العجين واروح عليها
حتى اتعلم الخبز
اول يوم العجين مفصص
ثاني مره طلع فطير
ثالث مره ناسيه الملح وكل خبزه تخليها بلتنور توكع من التنور
بعدين كمت اعرف اعجن
بس اخاف اخلي ايدي بلتنور
شويه شويه لمن تعلملت
صحيح مو خبز درجه اولى بس ماشي الحال شلت كل المسؤليه وحدي
مسؤلية بيت كامل شايلتها
اربع أشهر واني اطبخ وانظف وشايله مسؤليه اخواني
واي خط مني ابوي ينسى كل حسناتي
ومايذكر بس الاخطاء
كبل ايده والضرب والاهانه والغلطه ما تنزل من السانه
حتى اختي واخوي ما يحترموني
بسبب طريقه تعامل ابوي وياي
يغلطون عليه ويضربوني مثل ماهو يسوي وياي
اجت المدرسه وصديقاتي كلهن قدمن للمتوسطه
وابوي ساكت
اشترا ملابس وجنطه وقرطاسيه المصطفي
واني كلشي ماكوووو
جمانه السعيدي
بيني وبين نفسي كلت يمكن نساني
ساره....بابا صديقاتي كلهن قدمن للمتوسط
ابوي...وانتي شنو تردين اداومبن
ساره...ليش مااداوم
ابوي....طبعا مااداومين لان انتي مسؤله عن هذا البيت
ساره....يعني شنو
ابوي...ماكو دوام انسي المدرسه
ساره....اني مراح اقصر ارجع من الدوام اخلص شغل البيت
ابوي... اس ولا كلمه اني كلت ماكو دوام يعني ماكو دوام
هاي اختج زغيره وين تبقى
بعدين شنو مدرسه شراح نستفاد من المدرسه
ساره...فدوه بويه بروح امي خليني اقدم
ابوي....اس ولا كلمه فهمتي لولا المدرسه انسيها خلاص
هذا البيت مسؤليتج
انسي شي اسمه مدرسه
ساره...سكتت مااكدر اناقشه
لان هو ماعنده اسلوب للنقاش غير الضرب
آثار الضرب بعدها على جسمي
اني لا حول ولا قوه كلشي مااكدر اسوي
حكم عليه ابوي اشيل مسؤلية بيت كامل
واني بهذا العمر
