رواية نورة الفصل العاشر بقلم ام مصطفى
ولجج نور اسسس
-شبيكم ليش كتلو فاضل لان يصلي ويصوم مثل الامام الحسين
-بابا هذا الكلام مال كبار مااريد اسمعه منج
ولا تدخلين
فاضل مات وراح للجنه
كولي الله يرحمة
وادعيله
-بس اني احبه مااريده يموت
كمت ابجي
وامي تسكت بيه
-نور ماما حرام تبجين عليه هو شهيد راح
والله سبحانه وتعالى
يكول في كتابه العزيز
بسم اللهالرحمنالرحيم
( وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ)
صدق الله العظيم
فاضل شهيد وراح للجنه هناك
واريد اكولج شي
هذا الكلام مااريد تحجي يم اي احد
زين حبيبتي
لان الي قتلوا فاضل يقتلون ابوج
تقبلين بابا يقتلوه
-لا مااقبل
-لعد لا تحجين يم اي واحد بهذا الكلام
-ان شاءالله ماما
طلعت امي واني بقيت ابجي
وتذكر كلامه وشكد جان يحبني
يكلي انتي شطوره
بسرعة تحفظين وتفتهمين
وينطيني فلوس
ويكول لعمتي
هاي نور هواي احبها
لان احس عقلها جبير بسرعة تفتهم
...
امي خديجه راحت لبيت عمتي
واخذتني وياها
طبيت يمهم
لكينة عمتي تقره قران
من شافتنه صدقت وكامت باوستنه
امي شبكتها وضلت تبجي
عمتي كعدت تبجي
شويه وسكتت كالت رادوا الشهاده
ونالوها
هنيالهم راحوا شهداء للجنه
وضلت تسولف عليهم
شويه واجت خالتي احلام وياها امل وعلي
سلمت وهم كعدت تبجي
صاحت علي تعاي ولج
حضنتني وباستني شلونج
هالبت دكولين اجي امر اشوف امي
امي كالت الها هي تبجي ع فاضل من الصبح لهسه
اندارت علي عمتي
-عمت عيني عليه شكد جان يحبها
هي هيج كالت واني كمت ابجي عبالك جبيره وافتهم
وضلن كلهن يبجن وياي،
رجعنا للبيت
بس اني تمرضت كلش وصخنت
وامي اخذتني للدكتور
بس مافادني العلاج
وبس ابجي من وجع راسي
عمتي اجت شافتني
امي كالت الها من قهرتها ع فاضل تمرضت
كامت تبجي
خايب يمه فاضل بت خالك راح تموت ويموت خالك وراها
وينك يمه تعال برد كلبها
بالليل واني نايمه شفت بالحلم
فاضل بحديقه جبيره كلش وحلوه
واشجار فواكه داير مدايره
شافني وباسني
ومسح ع راسي وكطع عنب من الشجره
ووكلهن الي
فزيت من الحلم فرحانه لان شفته
رحت ندهت امي يمة يمة
-ها يمة اسم الله بيج شي
-لا يمة بس جوعانه اريد اكل
-ياا صلاواة ع محمد تردين تاكلين
كايمه اسويلج احسن ريوك
كعد ابوي شنو بيش الساعه
كالتله راح ياذن الفجر كوم فدنوب حتى تصلي
نوره كعدت جوعانه
-اي سويلها بساع والصخونه راحت منها
-والله مالزمتها نسيت من فرحتي
اجت امي خلت ايدها ع كصتي
كالت
-رايحه الصخونه يوجعج شي
تحسين بشي
-لا بس جوعانه ماما
-هسه اكوم اسويله
راحت تسوي
وابوي توضأ وفرش مصلايته يقره قران
طكت بيض، امي وسوت جاي
وخبز حمته ع الصوبه
كالت اتريكي بين مااصلي
كتلها يمه تحلمت بفاضل
-يمه شتحلمتي
-شفت فاضل كاعد بحديقه جبيييره
وبيها اشجار محمله فواكه
شافني تقرب مني باسني ومسح ع راسي
بعدين گطع عنب وانطاني
اكل اكلي
كلش طيب العنب
يمةة اريد عنب
امي هيج سمعت لو انفجرت بجي
اجه ابوي شكو
-خلي تحجيلك حلمها
حجيته لابوي
كال بالعافيه عليه صايم مصلي
رجب شعبان ورمضان صايمهن كلهن
والايام العاديه يصوم اثنين وخميس
والناس كلها تحبه ماعده اذيه ع احد
ولا يوم اغتاب احد
ولا ضوج احد ويحب كل الناس
هي تلوگله الشهاده
ثوب ومفصل عليه
اكلي بنيتي لو بالصيف جان جبتلج عنب
بس احنه شتاء
واكيد طعم عنب الجنه الي اكلتي منه مو مثل عنب الدنيا
الله يبارك بيج بنتي ويجعلج من الصالحات المؤمنات
كامت امي تصلي، وابوي هم
واني اكل وفرحانه بشوفته
من الصبح امي اخذتني لعمتي
وحجيت الحلم الها
وعمتي حضنتني وتبجي
.
وتمر الايام والسنين
اني خلصت ابتدائي صرت صف اول متوسط
بقيت يم امي خديجه
ومرات اروح لامي احلام
شكد تحاول تقربني يمها
حتى ابقى عدها بس اني تعلمت ع اهلي
صح احب خواني
بس بسرعه اضوج تعلمت ع الهدوء
والوحده
صرت انطوائيه
اجي من المدرسه انام گبل
واكعد ادرس
امي مرات تروح لبيت جدي
اكولها لا مااروح ابقى بالبيت وحدي
اني جنت شاطره
وامي احلام دوم توصي بالدراسه
دكولها لامي خديجه اهم شي دراستها
اريدها تكمل مو مثلي من خلوني اترك الدراسه
وشفت الضيم
هسه جهالي اريدهم يكملون دراسه
خصه البنات مااريد ازوجهن صغار وينكسر ضهرهن
اريد يكمل دراسه
يله يزوجن
امي خديجه دكلها اني هم هيج اريدها
تكمل دراستها ..
تستمر القصة أدناه
الحمد لله سنه ع سنه انجح بديت اكبر
وملامحي وانوثتي تبرز اكثر خصوصا اني بيضه وصاحبة عيون كبار
اشبه امي احلام
خلصت متوسطه ورحت للاعداديه
هنا بدوا يجون هواي خطابه علي
بس امي قافله ابد ماازوجها اله تخلص دراسه
تطرد من بعيد الي يتقدملي
طبعا عندي صديقات اثنين حنين واسراء
حنين قريبه علينا كلش
واسراء لا قريبه ع الاعداديه
كلش حبابات وخوش بنات
مره طلعت وي حنين للمكتبه
جان احس واحد يمشي ورانه
وين منروح درت وجهي شفته
هذا شعده
-تعرفينه انتي
-اي هذا اسلام ابن ابن عم ابوي
الي همه جيرانه يمنا
مثل مكلت دربونتنا نصها ساده واقارينا
كلهم بيها
اسلام ايصير ابن ابن عم ابوي ضياء
بيتهم يمنا بس اني مااختلط هواي ولا ادخل هواي يمهم
نوبات امي تدزني الهم بشغله
لو بالماسبات
اسلام طبعه ثگيل وعصبي واكبر مني بثمان سنين
تعجبت من تصرفه هذا
شكو يمشي وراي
حنين كالت شعده يمشي ورانه
كتلها خلي يولي شعلينا بيه احنه
دخلت للمكتبه اشتريت ملازم قرطاسيه ورجعت لا گاني يم باب بيتنه يتبسم بوجهي
سلمت عليه وفتت اني وحنين لبيتنا
كالت اكولج عندج شي وي هذا
-لا والله كلش ماعندي
بس ابن عمي
-لج لعد شعنده لاحكنه
-مااعرف والله
ضلينا بوكتها نسولف
وهي دكلي مبين معجب بيج
-ولج يا معجب هو هذا عصبي وبس يصيح ومعقد حتى ميحجي وي احد
-واذا يعني ميحقله يحب
-لا مااصور لان ماشيفه شي منه
هاي اول مره يصدر منه هالتصرف
اكولج خلي نقره
بلكت اخلص من هذا الغضب الرابع
كلش،صعب موتني
-اي صح صعب بس يرادله قرايه
كعدت اقره
بس حيل كرهت الرابع
موتني صعب ولعبت نفسي من الدراسه
وامي تلح علي اقري واقري
كتلها متت مو من القرايه
اصلا اني ماعدي شي بس اقره
ضجت وروحي طلعت
ليل نهار بس اقره
اريد اطلع من وحدتي
مرات اروح لامي احلام
بس مااتاقلم وي اخواني وارجع
واضوج
بدت امتحانات نص السنه
وشكد اقره بس مدا استوعب شي
لحد مارسبت طلعت باربعه
امي تخبلت وكامت تلطم
شلون ترسبين
واهاي اول مره هيج كل سنه اني شاطره
مااعرف شجاني كرهت المدرسه
وكرهت حياتي هم شلون اقره ومااجاوب
عاد كلت لامي بعد مااداوم لو شيصير
وهي تخبلت
-تبطلين من المدرسه والله ولا اخليج
-مااريد كوه خوما كوه
-ولج يمه ليش،هيج دكولين
شبيج شجاج انحسدتي مو جنتي شاطره
وعين الله عليج شجاج
-مااريد المدرسه
ومااداوم بعد
ابوي اجه سمع ضل يحجي علي
كتلهم مااريد ومااداوم
شكد لحوا علي ماكو فايده
تركت السنه
بعد شهر صار السقوط
وسقط صدام
جانت فرحة شكبرها عدنه
خصوصا امي احلام الي منتظره رجعت ابوي داوود بفارق الصبر
وكل مايجون الاسرى دكول بلكت اجه
بس مااجه ولا خبر منه
من صار السقوط كلت بلكت يرجع
بس ماكو مااله اثر
بقت سنين منتظرته وماعده علينا وتخيط وتحف وعيشت اخواني
ولا يوم اشتكت كل املها يرجع ابوي داوود بس ماكو مارجع
من صار السقوط ودخلوا الامريكان علينا
شي جديد علينا
من نشوفهم نتعجب
كاموا يمشون بدبابتهم بشوارعنا
والجهال تركض وراهم وتهوس
وصار هرج ومرج
ناس تنهب المؤوسسات الدوله
وناس تحميهن
وصار االقتل بفلس
والحزبيه اكثرها شردت
بيوم كاعدين وتفاجئنه بكاظم اخو فاضل
ابن عمتي
راجع للبيت
الامريكان فاتحين السجون ومطلعيه
ماصدكنا عدل
ابوي طار من الفرح
وعمتي مامصدكه عمرها
يمةة كاظم صدك عدل بعد
عشر سنوات تطلع عدل
بوكتها بسرعه رحنه يمهم
وعمتي تحضن بيه وتبوس
بس خطيه طلع شويه بعقله من التعذيب
سئلوه ع فاضل كال عدموه كدام عيوني
طبعا طش الخبر بعشيرتنا
والتمينا كولنا وناس تبارك النه تجي
بقينا يم بيت عمتي
فرحانين برجعته
اسلام هم هناك
كلما يشوفني يتبسم
بس اني مااعيرله اهميه
ادير وجهي منه
وللحكاية بقيه
ام مصطفى
