رواية دموع خرساء الفصل العاشر 10 بقلم ورود الخالدي

ماجد:::

رديت من بغداد لحوش ام غادة كبل خليتهن هناك ووصيت امها عليها صح كلبي مايطيني افاركها بس شسوي هذا حجي الدكتورة..ولازم امشي عليه لان الدكتورة فرحتني واطتني امل جبير..والصبر حلو من رديت لحوشنا امي وابوي تلكوني ابوي كال:

ها بويه شورديت وحدك وينها مريتك ؟؟

بويه ضلت يم اهلها دكتورتها تكول لازم تضل جم يوم هناك

امي كالت:

اي خلها هناك اذا زين الها باجر امشي انه وامل ومرت حامد نشوفها!

لا يمه لاتمشن الدكتوره تكول لحد يروح عليها خلوها وحدها منا لمن انطيكم خبر. 

مو خاف امها يضل بخاطرها على ابو عيال بتي محد وصل منهم..

لا يمه امها هم سمعت الدكتوره وتعرف وضعها!!

ها..خوش جا بكيفكم..

تغديت وطلعت للكاع اشوف شني ماشني صار على الزرعات واشوف صبيح شد المواطير لوبعده ضليت بالكاع للعصر..وتالي رحت تسوكت ومشيت على ام غاده..اول مافتت..

هله خاله هله بيك..

خاله..شلونها هسه..

حيل..زينه ماصدكت من شفتها البارحة تكلب بدفاتر اخواتها..وتكلهن ليش دفاترجن ما مرتبه..الف الحمد لله جاي تتحسن..

هااا..انتي هيج تشوفين..

ياااا وين جنا..كبل جانت موبس ماتحجي ..دائما كاعده وحدها وتتصفن خطيه هسه من حجت  كامت تهتم باخواتها..

الحمد لله..انتي فوتي ام غاده وانه بحجة ادخل المسواك هيج بس اشوفها من بعيد ما احاجيها..

اي تفضل بعد خالتك

من فتت..هيج سويت روحي ما منتبه خليت العلاليك جوه هي باوعتلي بس ماحجت شي ..انه بساع طلعت..مابطيت يمهم..

ثاني يوم مامريت ولاثالث يوم كلت ما امر هواي ما اريدها تهيس انه متعمد اجي..لان رابع يوم انه اخذها اردها لبغداد .وفعلا اخذتهاهي وامها للجلسه الثانيه بالدرب سمعتها هيج تحجي قليل ويه امها..حسها ناصي ومافرزنت حجيها لان من تحجي تشاور امها بس انه متونس على حجيها وكلما تصد عيني بعينها ارتاح احس خوفتها مني خفت شويه..ورحنا لدكتورتها وضلت يمها ساعة ونص طولت هالمره بس من طلعت من يمها شفت وجهها بشر..مبينه ترتاح من تكعد ويه الدكتوره بعدين انه فتت للدكتوره نشدتها..كالت:

لا..لا كولش متحسنه ..تحجي طبيعي وماعدها مشاكل بترتيب الجمل ..والتواصل وهذا معناه هي طبيعية بس محتاجين بعد جلسات حتى ارجع ثقتها بالناس.. وبيك انت شخصيا..

يعني شسوي هسه دكتوره..انه من اخذتها منج مامريت هواي يمها هيج من بعيد شفتها..يعني اضل هيج..

لا..طبعا لازم تتقدم خطوات جديده يعني تدخل تكعد يمهم وتحجي ..وتسولف كدامها ع الاقل ويه امها حتى تحس انت شخص مقرب..اللهم 

جا هي قابل ماتدري انه رجلها!!

تعرف بعقلها الباطن تعرف انت زوجها..وتعرف نوع علاقتك بيها بس بتفكيرها الوجداني انت شخص اذيتها جسديا وهي تحتاج وقت حتى ترجع ثقتها بيك..ا

صار دكتوره انه كلامج كله اسويه مادام يفيدها..

احسنت هسه تاخذها..واي علاج ما اريد تاخذ حتى المهدئات الي كتبتهن كلت لامها لتاخذ منهن لان هي بعد متحتاجهن..

مشكوره دكتوره

ورجعتها للحوش بس مارديت ضليت عدهم كلت لامها:

شني الليلة ماكو عشه..

يااا..شلون ماكو عشه ..اليوم نتعشه دولمه..

جاوينها دولمتج..شو مالها ريحة؟؟

ههههه بالثلاجه البارحة لفيتها..هسه اخليها ع النار ساعة وحدة ونتعشة..

وكعدت يمهم ضليت اسولف ويه البنيات وانشدهن ع الدراسه..هي هم ساكته خطيه بس تباوع علينا امها خلصت طبخ وكالت:

يله يبنات كومن نسوي عشه مرتب لماجد اول مرة يتعشه عدنا..

البنيات ركضن هي رادت تكوم كتلها:

ضلي مرتاحة يروحي هنه يصبن عشه..

لا..لا..غصون وشجون ميعرفن يثرمن زلاطة ينجرحن بالسجينه

اووف هيج حسها يسلم على روحي..كيفت..من حجت وياي وكامت..اي مبينه متحسنه هواي ماشفت بعيونها خوف من حاجتني هيج تحجي بهداوة...الف الحمد لله..وضليت رايح راد عليهم يوميه مرتاح شويه لان الامور زينه..منا لما رديتها البغداد امشي على حجي الدكتورة

 واسبوعين مضن معناتها صارن اربع جلسات ويوم عن يوم يفرق..كلش ارتاحيت من كامن تسولف ويه امها كدامي وتدرس اخواتها..صارت جيتي الهم طبيعي..بس هاااه..مو كلش تحجي وياي هيج حجايات قليله مطشرة..وره الجلسه الرابعه الدكتوره حجت وياي وكالت:

هسه احنه وصلنا المرحلة متقدمة بالعلاج..والمطلوب منك تخطي خطوات اكبر يعني تبدي تتقرب منها معنويا:

شلون يعني..دكتوره..

يعني تبدي تصادقها..صداقة خاصة..

شني اصادقها..هي مرتي..شلون اصادقها يعني؟؟

هههه..تصادقها مثل اي شاب معجب ببنيه ويمد الها حبل المودة ويبدي يتقرب منها ويصادقها الى ان يوصل لكلبها!!!!

ههه..والله دكتوره بصراحة انا ما اعرف اصادق بنات بعمري مامصادق بنيه..حتى مرتي الاوليه جانت من كرايبي وهيج عرسنا بساع بساع..ما اعرف اتودد للبنات واجر ناعم وياهن..

ههههه..معقوله شاب بعمرك مجانت عنده صداقات تجارب حب ..او علاقات عابرة.

لا والله دكتوره انه ما اتكرب لعرض العالم واصادق واتمعشك..عندي عرض واخاف عليه

الحقيقة فاجئتي اخ ماجد عموما الله يبارك بيك نادرا منلكة شباب مثلك بوقتنا الحالي..بس راح اقرب الك الصوره ..حتى اساعدك..اريدك تصادقها يعني تتقرب الها من خلال اهتماماتها يعني تحسسها انت مهتم بالاشياء الي هي مهتمة بيهن

اي ..هاي سهله..

ممتاز هسه الجلسه خلصت..تجبيها الي بعد ٣,ايام ارقامي عندك..اي تطور يصير بينكم تتصل بيه وتحجيلي شنو الي صار حتى على ضوء كلامك ابدي خطة العلاج الجديدة للجلسه القادمة..

وردينا من الدكتوره الدرب كله افكر بحجي الدكتوره..صارت ردتنا ويه الغده نزلتهن يم مطعم وتغدينا..سوه طلبت دجاج ادري بيها تحب الدجاج.. احنا كاعدين وحدنا بجناح عوائل اشرت لامها عود تعالي كعدي بمجاني وانه اروح يمها..كمت كعدت يمها شلعت لحمة من الفخذوكتلها..

ودنيتها يم حلكها:

اي هاي لحمه الفخذ التحبينها..

اكلتها من ايدي تشجعت كمت اوكل بيها امها خطيه هم مكيفه جا تاكل من ايدي بسكته خلصنا غده وطلعنا بس كلبي مرتاح..اهيس كلشي تمام صح شويه شويه..وكلبي تعذب بس..وصلت وياها لخوش نتيجة..اليوم ردينا لحوش ام غادة ضليت يمهن للعصر ثاني يوم..فكرت بغير شي رحت اشتريت قفص جبير...لان طيورها من يوم الراحت يم اهلي امل مداريتهن مدري شعجب هي نستهن ومانشدت عنهن..رحت..اخذتهن واخذت القفص الجبير الجديد بس شافتهن بيدي اجت ركض..

اخذتهن من ايدي مكيفة بيهن بساع كالتلي:

همزين جبتهن اني بالي يمهن..؟؟

جا اذا بالج يمهن ليش مانشدتي عليهن اجيبهن الج لو اخذج الهن.

هااا..تاخذني الهن..

اي اخذج يبعد عمري..اخذج وياي..

لا..لا..هنا اضل بعد كم يوم يم ماما..احسن..

اي ضلي شكد ماتردين..ما مستعجلين...شوفي شجبتلج ..جبت قفص جبير..هذا القفص بعد مايكفيهن..

اي صح صار زغير عليهن..

بس ما اكدر اطلعن خاف يطيرن مني..

لا..لا ميطيرن اني هسه اشوفك شلون الزمهن بيدي.

مو هنه متعلمات عليج مايخافن منح انه يمكن يخافن مني..

فتحت الباب مدت ايدها طلعت واحد وكالتلي :

افتح ايدك ولزمة على كيف مو تلزمه حيل..

انه كلبي يضحك ماخذها بالسياسه بس فرحت من كضت جف ايدي وخلت الطير بيه..

اي هسه خليه بالقفص الجديد

وطلعتهن واحد واحد..وخليناهن بالقفص

اشرت لامها عود تاخذ البنات وتخلينا وحدنا..اخذتهن وكعدت بالصاله..انه بقيت يمها 

اكلج..اريدهن يتعلمن عليه مثلج شلون علمتيهن..عليج..

اي عادي يوميه ..انطيهن اكل والزمهن على كيف..يكومن وحدهن يطيرن ويجن عليك..

هاااهيج..والله زين تعرفين..احسن مني. 

اي مو اني من جنت زغيره احب طيور الحب والبلابل. 

هي ملتهيه تعدل الاكل مالتهن ماتحملت مديت ايدي على شعرها..خليته وره اذنها وكتلها:

وانه هم احبج..هواي..هواي احبج يغادة...يمكن ماتدرين شكد احبج.

سكتت كلت خاف ضاجت من الحجيته هديتها كتلها:

هاااضجتي يله ..جا اروح انه..

ردت اكوم كالت::

لا...لا مضجت ليش تروح..؟؟

يعني اضل يمج بعد شويه.

اي ضل ..موكلت لماما تتغده يمنه..

هاا..يعني ماتضوجين اذا اضل 

لا ليش اضوج..مو انت زوجي..وتحبني ليش اضوج منك؟؟

تبسمت بوجهها الحلو ورديت مديت ايدي على شعرها على كيفي وكتلها؛

جا اذا تعرفيني رجلج واحبج ليش انتي بديره وانه بديره..كلبي طك يبعد عمري..اريد هيج ..احطج بحضيني واغفه..ليس ماتجين وياي وغرفتج ضاله خاليه..وحشه بلاياج

ها..ارجع..تريدني ارجع هناك..

فكرت ما الح عليها بالرجعة..كتلها:

لا ما مستعجل بس هيج روحي ..مشتاكة اخليج بحضني من زمان ما ماخذج بحضني..يبعد عمري..

تبسمت..كلبي طار كلت خلني احضنها هلبت تأمن بحضني..

ادنيت علي كيفي وخليتها بحضني هيه ساكته..بس كلبها يدك بساع شلت ايدها وحبيتها كتلها:

شني هاي..شو كلبج يدك..حيل..بس حتى انه من احضنج كلبي يكوم يركض..يمكن لان احبج هواي

حبيت راسها وكتلها 

وعلي من احضنج اهيس الدنيا هاي الخلقها ربج كلها بيدي..

وخرت شويه عني وباوعت بعيوني ودمعت كالت:

اني اعرف

.اعرف كولش زين انت تحبني عبالك اني جاهله..لو ما افهمك..اعرف اني مريضة واعرف انت صابر عليه..ودتعاملني مثل الطفلة ودتعالجني بس شأسوي مو بيدي كل هذا مو بيدي والله

لا..لا ابد ما اريد عيونج الحلوات يبجن وانتي هسه مو مريضة ابد والله لامريضة ولاشي بس مرات بنادم يمر بظرف صعب يأثر عليه.

اي الدكتور هم هيج تكولي انتي مو مريضة..

شفتي حتى دكتورتج الحبابه هم نفس كلامي تكول!!

اي صح..

دتعالي ..تعالي بحضني بعد..ولاتخافين مني ولج انتي روحي..واعز من روحي والله

خليتها بحضيني وما اكلكم يمكن الوكت احسه وكف بعد مايمشي من هي بحضني..خطية تدري بروحها مريضة وتعرف كلش زين شبيها مابيها..ذكيه ونبهه وعقلها جبير..بس بنفس الوكت..تريد بعد ..وكت اكثر حتى تصير زينه..

امها كالت:

تعالو تغدو..

وكعدنا نتغده وره الغدة طلعت بره خابرت الدكتورة من فرحتي وسولفتلها كلشي هي هم كيفت..وكالت:

ممتاز..تقدم ممتاز..هسه عليك..تخليها..تحن لحياتها وياك لازم اهلك يتواصلون وياها..حتى تفكر ترجع وياك للبيت..

اي دكتوره صار..رحملله والديج وروح ابوي مامصدك غادة ترد وياي..غير اذبحلي عجل لوجه الله بس تعتب حوشنا!!

شوف اني كتلك تجيبها الي بعد ٣,ايام وهسه اكولك لا لازم تتاجل الجلسه الجايه على ضوء هالتطور..اريدك تجيبها بعد متقنعها ترجع وياك للبيت حتى..اني اعرف شلون..اقنعها بالتواصل وياك..بخصوص علاقتكم الزوجية..

يعني شوكت اجيبها.

احنا على تواصل واني اكولك الوقت المناسب الي تجيبها الي..

خوش..

وسديته..

رديت العصر..لاهلي كلت لامي:

يمه باجر ترحين انتي وامل على مرتي بس هااا يمه ما اوصيح سالفه حلوة جلمة دافيه ..هيج تسولفين عليها يمه مجانج خالي وليش عايفه رجلج نايم وحده..من هالحجي وانه وياجن اكعد وانشوفها شتكول..؟؟

يمه شني نتوسل بيها ترد قابل احنه مأذينها شو محد حاجي وياها..واذا سولفت عليها شفتهم منها قابل هي تحجي!!

هههه..اي يمه غادة تحجي وحسها مثل حس الحمامة..

ياااا ولك انت تضحك على شيباتي..منين تحجي.. غير هيه خرسه؟؟

لا يمه مو خرسه جانت مريضة خطيه وعالجتها وطابت؟؟

تحجي صدك..جا غير اذبحلكم ذبيحة..لوجه الله اذا صدك؟؟

يمه انه ناذر كبلج بس ترد للحوش اذبحلي ذبيحة لوجه الله..وعلي..

خوش ..يمه بالليل نروح ليش باجر!!

هههه..شبيج استعجلتي..كتلج باجر..

لايمه..الليلة اروح ..اريد اسمع حسها..شو جنك تكص علي وتضحك على شيباتي!!

ههههه..خوش بالليل نمشي  

ومشينا بالليل امي..مامصدكة..غادة من سلمت عليها..عوزها شويه وتبجي وكعدت تسولف وياها..ويه امها:

يمه غادة شو جنج وريده يبعد عمتج ليش عايفة غريفتج خاليه..ورجلج نويم وحده..مايصير وحتى مايصلح بعدج عروس..يعمه..

هاا..اي...اي عمه ارجع ان شالله..؟؟

واحنا شرايدين غير رجعتج..خطية وليدي..عريس وماتهنه؟؟

غادة باوعتلي..وكالت:

ارجع عمه..كم يوم وارجع. 

حتى الشايب هم محتام عليج يكول مجانها خالي جنتي..خطية ماله خلك جا اجه وياي بس ضغطة يصعد هالايام

ام غادة كالت:

عده العافيه الحجي..

الله يعافيجن. 

ورديتهن للحوش ثاني يوم..هم رحتلها اخذتلها ريوك كباب وكعدنا وحدنا ناكل سوة لان امها كالتلي تاخذ البنات يمتحنن..واتانيهن بره للعشره وهاي خوش فرصه اضل يم مرتي..خلصنا ريوك وسوتلي جاي كبل ما اشربه كتلها:

شني اليوم ماتجين بحضني!!

اي اجي بس اشرب جاي..

لا تعالي بحضيني لاحك عالجاي؟؟

اجت بحضني شبكتها..وحبحبت شعراتها الحلوات:

افيش الليل كله شابك المخدة واحبحب بيها..شوكت تجين..تنامين بحضيني ليلية..

كضيت وجهها باثنين اديه..وكتلها:

هااا غادة تمشين وياي الليلة..؟؟شكلتي يبعد جبدي!!

مثل الفترن عيونها..كتلها

اذا بعدج ماهاويه ترجعين ضلي ما..الح عليج!!

تبسمت:

اي..ارجع..ارجع وياك..

حبيتها بكصتها وشبكتها حيل هي ساكته مثل المرتاحة بحضني..بعدنا نسولف..وامها واخواتها..اجن..

كلت لامها:واحنا واكفين بالباب

الليلة اخذها وياي..

هااا..قبلت تروح وياك يعني قنعتها..

افه..انه ما اقنعها..اكيد رضت وقنعت..

اي صلوات على محمد وال محمد

وبالليل اخذتها وياي..اهلي مكيفين بجيتها واكثر واحد فرحان من سمع حسها ابوي خطيه من فرحته..كل شويه وصلى على محمد..

واجت الساعة المباركة..تعشينا..وكعدنا بغرفتنا..

نعسان يبعد روحي تعاي بحضني خلنا انام

اي..جيت..

شبكتها ونمت فرحان..ومشرغد من الفرحة ومن الفجر ذبحتلي ذبيحةووزعتها ع الوادم لوجه الله وعلي وخابرت الدكتوره سولفت  عليها كلشي..هم كيفت وكالت:

 باجر اريدكم يمي بالعيادة وماكو داعي تجي امها تعال بس انت وهي..

صار دكتوره..

اخذتها ثاني يوم هم ضلت يم الدكتوره وحدها بس هالمرة طولت بالساعتين..بعدين انه رحت وحدي يم الدكتوره:

شوف اريدك هسه من تطلع من العيادة تاخذها لمطعم..او تزورها..او للسوك يعني تغيرون جو..حتى تحس بامان اكثر وياك واريدك لطيف وياها ضحكة سالفه تشتريلها شغلات بسيطة يعني من هالامور..بعدين من ترجع للبيت اريدك تلمح مجرد تلميح..هااا..بحاجتك الها ..يعني مو تقرب فعلي مجرد تلميح خفيف..وتنتظر الى ان هي تبادر بالتقرب منك يعني هي الي تظهر رغبتها بالعلاقة؟؟

شني هاي..ما اصدك هي تبادر وتدنه عليه شوجنها صعبه وماتتصدك؟؟

مثل مجاي اكولك تنتظر الى ان هيه تبدي بالتقارب ومن تبدي يجي دورك انت..وشكد متكدر حاول تكون هاديء ولطيف ولمستك خالية من الخشونه لازم تكون الخطوةاو العلاقة الاولى..بعد العلاج بغاية الهدوء والشفافية..يعني بكلمة اوضح على كيفك وياها وطول خلكك شكد متكدر

صار..صار دكتوره..

وطلعنا من يمها انه هم اخذتها زورتها ..الكاظم..ع وبعدين كعدنا تغدينا بمطعم ناكل ونسولف..وبعدين كتلها..

خلنا نمشي للسوك ناخذصوغة للبنيات ولاختي امل ..

ورحنا للسوك اشترينا هدوم للبنات..وفتنا على الملابس النسائية اخذت دشداشه لامي ولامل..وشفتها تباوع على هدوم مال نوم خفيفات كتلها..

هاي يروحي عاجبج..؟؟

لا..لا بس جنت اتفرج..

اي بس تتفرجين صدك قابل المن تشترينه وتلبسينه قابل انه استاهل تلبسيلي..احمر وخفيف لا يابوي..ما استاهل..انه..

هااا...لا..لا لتكول هيج عفيه ليش متستاهل..يله اشتري..اشتري الي..

ههه...صار..

خطية بساع استلمت حجاياتي..وطلعنا ردينا للحوش..كعدنا العصر يم اهلي وبالليل ضلينا وحدنا..انه سبحت وبدلت لان تعبان من الدرب وهي هم خذت ..هدومها وسبحت وردت وكعدت تمشط بشعرها الحلو..كتلها:

شني شو ماكدرتي الهدوم الجبناهن لو ماتردينهن..

هااا..اي..بعدين البسهن..

براحتج حسبالي اشوفهن عليج انتي بيضة والاحمر ياكل ويشرب وياج يله انام احسلي..

والتفتت خليت ايدي على وجهي عود زعلت وراح انام..هيست بيها من فتحت الكنتور بس ماتحركت تانيت شراح تسوي..ماكو يمكن دقيقتين وهيست بيها كعدت بصفي وكالت:

ماجد الدكتور تكولي اذا تردين اطيبين وتعيشين ويه زوجج بسعادة لازم انتي تبادرين بالمحبة والتقرب..

ميلت ايدي شفتها لابسه ذاك الثوب الخفيف الاشتريته الها..بس شطالعه سبحان رب السموات تذبح اخذت روحي ومنا انه عاشكها عشك ماصاير اصلا مسودني عشكها والشوك ذابحني بس صبرت على روحي وكتلها..

اي حجيها تمام..وشني المانعج..؟؟//

بصراحة اني ..اني استحي..منك..يعني شلون ابادر والله مافهمت..

كعدت علي حيلي وادنيت يمها ولزمت اديها كتلها:

مستحية مني..لو خايفه مني..وحده منهن..؟؟

بس ماحجت دنكت ..كلت خلي..اسحب المستحة منها بديت اغني..

جاوبني تدري الوكت بوكاته غفلاوي

موش انت نبعة عشك بالحسن متغاوي

ليش المعاتب كلف..والشوك سكتاوي

جا وين اودي الحجي..واتعاتب ويامن؟؟

اخ..جاوين اودي الحجي واتعاتب..ويااااامن؟؟

سكتت هي طربت على حسي وكالت بساع:

كمل فدوة..فدوة كمل..

مرن فخاتي الصبح..سألني وين هواي..

سمعني جلمة فرح..وبمشيتك بهداي

تعبان  كلبي شكثر..وانت العطش والماي

جاوين اودي الحجي واتعاتب ويااااااامن؟؟

سكتت انه هي تلهفت وكالت..

الله..الله ماجد ...صوتك شكد حلو..

ها حسي حلو همزين بيه شي حلو تحبينه!!!!

لا مو بس صوتك حلو..عيونك هم حلوات..شعرك حلو..وشواربك..وجسمك هم حلو..

حجت ذني الحجايا وهي تخلي ايدها مره على شعري ومره على شواربي ومره على سدري بعد ماتحملت..

هالله هالله طلعت انه حلو وانه مادري..

اي انت كولش حلو..وكولشي بيك محبوب..

ها يعني تحبيني يغاده..

كتلك من زمان اني احبك..بس..

وانت احلى نجمه ضوت بسماي..انت عيوني هذن..لاشوف بيهن دربي والله..

ادنيت حبيتها على كيفي..استحت مني رديت حبيتها ردود من عيونها ومن خدودها ومن ركبتها وبالاخير صارت شفتها الي ..وماهديتها منا لما راحت باديه وصارت الي..بهداي هيست هي ماخايفه بالعكس شبكتني بالاخير وخلت راسي بحضنها..كتلها:

ها يروحي خوما تعبتج..

لا..لا انت حباب..ويايه كولش.

الحمد لله شفتي يروحي انه ما اخوف انه حباب وما آذيج..

اي صح..

وخليتها بحضني نمت مرتاح الف الحمد لله جزت على خير..وبعد ماتخاف مني..الصبح خابرت دكتورتها..

كالت:

ها اخي شنو الجديد

دكتوره ما اكدر اسولفلج كلشي بس رحملله والديج..

الف مبروك بس مو هاي هيه لازم تجيني بعد مره او مرتين...نستكمل جلسات العلاج..ومن يومها والامور تمام هي الي وانه الها احبها وتحبني وعايشين احلى عشاك..وكملت الدكتوره علاجها ووره سنه ونص ربي رزقني منها بولد مثل الورد..والف الحمد لله والشكر..على نعمة الصبر الي اطانياها..وعلى نعمة المحبة الجنيتها من ورة صبري..ماقصر ربي جبر بخاطري..وريح بالي..

انتهت💖💖💖💖

احبتي ..تتمحور احداث الرواية حول موضوع خطير وهو التحرش.بالقاصرات..واثره النفسي والاجتماعي على ضحايا التحرش..فالتحرش له اثار..نفسية خطيرة تلاحق الضحية لسنين طويلة..اذا كان  صادرا من اشخاص غرباء..فما بالكم..ان كان التحرش يصدر من اقرب الناس مثل الاب اوالاخ..اوالعم..او الخال..سيكون اثره..جسيما وفادحا في نفس الضحية..حفظ الله اولادنا واولادكم من هذه الامور والتصرفات البغيضة المحرمة شرعا..وقانونا وعرفا..

كما ان الرواية تطرقت الى امر اخر وهو الفكرة الخاطئة المأخوذة عن ابن الريف فمعظم..النساء يفكرن ان الشاب الريفي شخص متخلف وهمجي..لكن الحقيقة ليست كذلك..فمعظم شباب الريف..يحملون سمات متفردة وهي التربية الصحيحة..والقرار ..الحكيم..والصبر..والقيم الاخلاقيه النبيلة اضافة الى ان اكثر شباب الريف لديهم تحصيل دراسي ممتاز..ونظرة ثاقبة..وقدرة على معالجة مختلف المشاكل..

الامر الثالث هو وصية مني انا الكاتبة لكل الامهات الانتباه على بناتهن..والتقرب منهن..ومعرفة كل مايدور في عقل البنت خصوصا في فترة الطفولةو المراهقة..حتى تمتد جسور الصراحة بين الام وابنتها وتتمكن من الحفاظ عليها من عبث النفوس الضعيفة

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم