رواية خيط وابرة الفصل العاشر بقلم شمس العراقية
لبنى ...
ـ مخليتها بحضني وشهكاتها بصدري لزمت نفسي وما بجيت كدامها كتمت بداخلي بس هضيمه لا من أمي عايشه حسينا بحنيتك علينا ولا من صرنا يتامى أم .
الصبح عفتها نايمه وگمت غسلت وهي وأبويه يتريكون بالمطبخ ، وأسمعها تحجي وياه ويجاوبها .
سميعه ـ عود أروح على صبيحه أخذ وياي لبنى غافر هالشهر يريد يسوي عزيمه لـ أصدقائه وتعرف البيت يريد تعزيلات وهي ما بيها لوحدها كلت أخذ لبنى تساعدني .
صباح ـ أي أخذيها شگو بيها وأخذي لينا هم وياج
ـ لا دخيلك هاي وكحه ما أكدرلها ما تنجرع بس لبنى گافي والله صبيحه هي ما قبلت وكالت كولي لأبو نور يله .
ـ لا أم غافر تستاهل وهنا كاعدات شمسويات على أقل يتعلمن باجر عكبه يتزوجن گلشي ما يعرفن علميهن سميعه على گلشي عالطبخ والخبز وشغل البيت هذن هم حسبة بناتج بعد ما يحتاج أوصيج عليهن لان أمهن الله يرحمها كظت عمرها مريضه ودوام وطلاب ما لحكت تعلمهن على شيء والبنت لازم تتعلم وراها زواج ومسؤوليه .
ـ أن شاء الله عيني تدلل أنت وبناتك
ـ فدوة لوجهج أصيله من يومج .
لبنى ـ ما كدرت أسمع أكثر لان تجاوزا حدهم لعبت نفسي ودخلت الغرفه وصفنت أي بابا توصي مرتك تعلمنا وما تدري بإمي معلمتنا على گلشي عالطبخ والخبز وكل أمور البيت والحياة ويا مساعده تحجي عنها لا والله تريدني خدامه لأختها .
رجعت بفراشي بعد النعس بعيوني بالليل نومتي ما أنتظمت وانفتح الباب شافتني كاعده .
سميعه ـ ماطولج كاعده ما تكومين شگو متمدده بفراشج جان هسه منظفه البيت ورانا روحه لبيت أختي هم ما ضل وگت ، يله أستعجلي لمملي شغلات البيت وأختج عوفيها نايمه مـا منها فايده مثل الفأره بس تفتر .
لبنى ـ طلعت وباوعت على لينا هو هم هيج على شنو مكعدتها خل تشبع نوم غطيتها وگمت نظفت وكملت ولبست عبايتي فوك دشداشتي وكفت البس شالي وكعدت نور .
نور ـ صباح الخير
لبنى ـ صباح النور .
ـ شنو وين رايحيين
ـ لبيت خالتج
ـ ها ، ماما هم يحتاج أروح وياكم.
ـ تربكي وريكي أخوج وبعدين بالعشره هيج لبسي ولحگينا .
ـ تمام .
لبنى ـ وطلعنا لبيت الحجيه وأستقبلتنا ، ضليت واكفه وهي تحجي ويه أختها باوعت البيت حيل حلو ومرتب
سميعه ـ لبنى المنظفات جوه الدرج اكو رف كامل كلشي تلكينه موجود شوفي شغلج والبيت كله غسلي
صبيحه ـ لا خليها أني وياج أنظف وهي تطبخ سمعت طبخها طيب .
سميعه ـ لا خل تنظف بعدها شابه وهسه نور هم تجي تعاونها شكو عليهن بعمرهن كومه أشتغلنا ششايفات من الشغل كاظياتها بس أكل ونوم .
لبنى ـ ما حاجيتها والحجيه دلتني على المنظفات وسويت خلطة بالسطل وبلشت أغسل وأجلف والبيت يلمع حتى يسوي واهس لتنظيف بس مع ذلك مقهوره هاي تاليتي .
وأني أنظف بالدرج وأجتني تحجي وتتأمر عليه
سميعه ـ على كيفج لاتسوين صوت غافر نايم يله أستعجلي وگملي وروحي البيت طبخي الغده .
لبنى ـ ماشي وكملت البيت وصلت الكراج غسلته وصلت المغاسل هي نظيفه بس الشغله تقهر هسه لو بيتك تنظفه ميخالف! تالي رفعت طارف ثوبي وبلشت أغسل وأريد أجيب الصونده وصادفني واحد
غافر ـ منو أنتِ! وشتســوين .
لبنى ـ هو تفأجئ واني المم بروحي وانزل بثوبي كبل ركضت الحمام الخارجي سديت الباب مقهوره شاف رجليه وسمعت صوته صار عالي بالبيت الله لاينطيج يخاله على هالموقف بعمري ما أنساه .
غافر ـ أني ليش ما عندي علم بوجودها حجيه شــنو هالشغل تشتغلينا من ورى ظهري .
سميعه ـ على كيفك وليدي غافر وأني جبتها وياي تساعدني وتساعد أمك ما بيها والبيت جبير ما شاء الله ينراد اله تنظيف وشغل .
صبيحه ـ خالتك جابتها تساعدني .
غافر ـ تساعدج! وما لكيتي الا هل اليتيمه! بله خالتي قبلتها مو أنتِ حاجه بيت الله شلون قبلتيها على نفسج تجيبينها تنظفلج وأني مو قبل يومين حاجيتج وگتلج أجيبلج وحده تنظفلج گلتي لا يمه وهسه شنو
سميعه ـ شگو بيها يا أبني وهي بنت رجلي مو غريبه ونعرفها وهم تتعلم وأبوها وافق وحالها من حال نور
غافر ـ لا خاله أذا أنتِ وعمي صباح تقبلونها تجي تنظف وتساعد أمي أني ما أقبلها على نفسي وتريد تتعلم علميها بيت أبوها مو بيت غريب عنها لاتنسين أني ما أقربلها
لو نور بيها مجال نكول خالتها وتساعدها ميخالف بس بنات الست قلق لا ما أقبلها أبد وأول وأخر مره أشوف هالموقف يمه أخر مره وباجر تجيج وحده تنظفلج وتسويلج التردينه بس مال تشتغلين من ورى ظهري هاي ما أرضى عليها .
سميعه ـ على بختك يمه غافر لاتسويها سالفه وشگو بيها أذا نظفت .
غافر ـ خاله فدوه لعينج شنــو شگو بيها ونوب أني ما أدري بله هاي سالفه سالفتجن من الصباحيات .
لبنى ـ ضليت متخشبه بمكاني وأجتني كامت تحجي عليه .
سميعه ـ شحاجيتله وأجانا متخبل ليكون گلتي أحنه مشغليجن لو شافج مدلعه ولج أحجي ششاف بيج ليش هيج أجانا عقله طاير إشسويتله .
لبنى ـ خاله أريد أمشي البيت جيبلي عبايتي .
ـ أحجي مو أحاجيج شحجيتله
ـ خاله گتلج أريد أولي للبيت لو أروح بطرك ثوبي والله
ـ شگوو تصيحين عاد من حورج وإذا شافج ، أوكفي هسه أجيبهن وأمشي ولي لبيت أطبخي الغده .
ـ راحت جابتلي عبايتي وطلعت وهو واكف بالطرمه جان يدخن ومزعوج واضح من نظراته ناحيتي حيل أستحقرت نفسي هو غريب وما رضى وأبوي بنفسه موافق ودزني ويه مرته، عمت عيني عليج يمه تعالي شوفي الموقف الوكعت بي بنتج .
دخلت البيت شمرت عبايتي وكعدت مزعوجه ولينا تسأل بيه صحت بيها عوفيني بحالي مو وگتج .
لينا ـ غير أفهم شبيج ، شصاير.
نور ـ ها رجعتي شكو شبيجن .
لبنى ـ ما حاجيتهن عفتهن دخلت الحمام وسمعت صوتها تحجي عليه وأستغربت نور ما سكتتلها .
سميعه ـ وين أختج شگو نكبرت بالحمام ما تجي تطبخ الغده ، ليكون نجرحت مشاعرج ست لبنى لو ضجتي لان شافج تنظفين وأنتِ مبهذله!
نور ـ شگو ماما لبنى شبيها.
سميعه ـ أبن خالتج ما قبل لبنى تنظف وكام يحجي على خالتج شو هاي أختج كامت تزاكط .
نور ـ ميخالف ماما على كيفج وياها وليش أخذتيها وياج تنظف وخاله مو على أساس تجيب وحده تنظفلها
لبنى شگو تنظفلها!
سميعه ـ لازم ما تردين أختج تنظف لخالتج وشگو بيها وأذا نظفتلها شو بيتها دگول مرايا والاثاث يلمع لمع
وشسوتله عاد مو حور تنظيفها وأبوج گال أخذيها وياج
لبنى ـ طلعت ولينا ساكته ما حجت وهذا سگوتها ما مرتاحتله ، كاعده اطبخ الغده وهي واكفه على رأسي تشرف عالطبخ كملت ورجعت الغرفه كعدت أخيط ولينا ساكته باوعتلها شبيج شو اليوم ما سمعت الج صوت
لينا ـ ليش رحتي نظفتي
ـ أبوج موافق
ـ حتى لـو ، شلون سمحتي لنفسج تنزلينها لسميعه وأمثالها وتنظفين الهن! وصرتي حالج حال الخدامه خاف ما تدرين وحالج حال الوحده الغافر يريد يجيبها لأمه تنظفلها ، ليش لبنى الأعرفه عنج أنتِ قويه ليش هالضعف منج .
ـ سدي الموضوع على أساس النا كلمه بهل البيت
ـ غافر شگال وشنو شافج ما فهمت عليها شحجت
ـ هيج بس ما رضى وخلص ، رجعت أخيط كملت ملابسها وانطيتهن لاختها ودزتلي الفلوس ولاحظت الفلوس مضاعفه دازتلي 25 أخذت والباقي رجعته الها وضلت تباوعلي ، بس عشره خياطها .
ـ لا بقي الباقي هي كالت 25 كلها لاترجعين منها وفوك ما دزتلج خياطتها وتتعزين وما تأخذين منين أجاج الكرم! دتأخذيها .
ـ لا خاله ما أخذ بس خياطتها عشرة الاف ، عفتها قبل لاتحجي ما اعرف ليش حسيت مقابل التنظيف دزتلي الفلوس
تجاهلت والتهيت بالخياطه وصرت أطور من خياطتي وأخيط لنور وحتى أمها وبنات عمتي حربيه هم كامن يدزلي يشوفن لينا ونور وعجبهن الخياط والتهيت أخيطلهن ما توقعت تكون الخياطه مقابل دراسه!
وبدأ موسم المدارس ورحنت ويه خالتي ونور يشترن ملابس وشفت أبويه شلون مهتم وأنطاها فلوس وبالجذب ما كال هاجن احنه مو بحاجته بس تجي حلوه
بس گال الها اشتري الهن ملابس يعني المصرف عدها هي تتحكم بينا .
وصلنا ونور تشلع الگلب ما يعجبها شيء ذوقها صعب أدور فيگات عكس لينا أخذتلها وصلت أريد أخذت اليه وگت دفع الفلوس گالت .
سميعه ـ شدعوه شمأخذه مو بس لأختج .
لبنى ـ لا اليه هم .
ـ لا الج لا رجعيهن ما يحتاج
ـ ليش خاله .
ـ رجعيهن مو وكته بالسوك أكعد احجيلج .
ـ ما أرجعهن أني ادفع فلوس شايله .
ـ أم خشم گلت رجعيهن المن مأخذتهن شو رجعيهن فضحتينا صوتي عالي من وراج .
ـ كلت ما ارجعهن ليش أرجعهن غير ملابس مدرسه حالي من حال أخواتي .
ـ بسيطه لبنى تعاندين أني الج أخذيهن بس فلس واحد ما أدفع .
ـ مشت ودفعت فلوس واجتي نور تحجي على أمها
ـ شكو ماما شبيج تصيحيين أحنه هم بالبيت
ـ أنتِ سگتيي أخواتج شلعن گلبي هاي لبنى بس أوصل البيت أذا ما كسرت مكينه على رأسها ولج كدام أبو المحل طلع لسانها شطوله وأني عبالي الفقيره
ـ شگو شبيها ، غير يأخذن ملابس يا ماما على كيفجن وياهن بس تصييحين .
ـ أمشي ولي من وجهي يله صيحيهن خل نحترك ينامن بالمحل ينامن ما شايفات سوك بس يگلبن
ـ لسانج ماما لسانج
لينا ـ شبيج لبنى شحجت وياج
لبنى ـ ما أدري لحالها والله كالت رجعي ملابسج ليش أرجعهن وأني ما رجعتهن تخبلت حتى فلوس ما دفعت
ـ هاي ناويتلج على نيه كشره تريد تبطلج ماطول كالت رجعيهن بس تأكل نعل
ـ لا فدوه والله ما أبطل
ـ ختولي يله نلحكهن شوفيها تسحب بنور وعافتنا
ـ للامانه بنتها ما ترضى على تصرفاتها
ـ منو يرضى عليها خفت شكلها شگد مكروهه ومسمومه ما تشوفين من سمها ولا واحد يطب عليها بس أختها حتى ابن أخوها كاطع رجله هم لاحظتي عليه أبد ما يجي بس مره مدري مرتين الا أبويه دز عليه بشغل !
ـ أي وأحنه شعلينا ليش أنتِ مهتمه لجيته خيرج
ـ لبنى يعني الواحد ما يحجي الا تخلين بيها النا والولد ما عندي شيء وياه وبعدين هو مرتبط بحالي لو بحالج
ـ مرتبط وشمدريج بي تحجين وياه
ـ لا وين صفا گالتلي يحب وحده غريبه
ـ شعلينا بي غريبه قريبه ولاتضلين بس تسألين وتجيج العين ويدكن وراج تنگه عوفي هاي السوالف ، يله نمشي هسه تلكيهن رايحات البيت وتطلع علينا سالفه وشيخلصنا من أبويه .
طلعنا ودورناهن ماكو ونور أتصلت هلا نور .
نور ـ أكولج عيني لبنى نافع راح يجي عليجن هاي أمي عندت الا تمشي والله حجيت وياها ميفيد خابرت نافع راح يجي عليجن بس أنتن وين بالضبط .
لبنى ـ لا ما يحتاج أحنه نرجع
لينا ـ ووين نندل
نور ـ لبنى أنتن وين بالضبط لان نافع بالسوك وصل
ـ وصفتلها المكان وحيــل نقهرت على شنو حقرت ويانا وأخذت بنتها ومشت لان ما رجعت الملابس والله لو ادري هيج تسوي فلا اجي وياها لسوك .
ـ هي حقيره ونور ما كالتلج نافع وين صار خاف ننخطف
ـ شمدريني ومنو يخطفنا ويبتلي بينا ، ضلينا واكفين وشفته اجه من بعيد هذا مو نافع
ـ أي هو .
نافع ـ أدري أنتن صغار تعوفن عمتي وتمشن لوحدجن ما تلمين أختج وتمشين وراهن .
لبنى ـ باوعتله بحقد يأكله ويأكله عمته
نافع ـ نزلي عينج ويله أمشن .
لبنى ـ مشينا وراه ووصلنا البيت ونزلت فدمقهوره گلبي مجمر من هالسالفه لكيتها تدردم وتحجي على نور .
سميعه ـ شكو خابرتي نافع مبتلي بيهن لو سايق الهن هنا ثولان وبس يتصفنن
نور ـ ماما كافي عاد هياتن راح أجن سويتي طلعه السوك سم علينا وأنتِ الصوج منج أنتِ عفتيهن هنا ما ضاعن من عدنا أدري بيج ردتي تسوين سالفه علمود بابا يرجع ويحجي عليهن وخليها أبالج والله أذا حجيتي لبابا أكوله امي عافتهن ومشت مو هنا ضاعن.
ـ ولج نويره توكفين ويه أخواتج ضدي
ـ أني ويه الحق لان مالهن ذنب وراحن السوك حالهن من حالي ليش هيج سويتي وياهن موخطيه خاف ربج .
لبنى ـ بس سمعت صوت ضربه ونور سگتت ودخلنا شفت نور لازمه خدها عرفت ضربتها دخلنا وما حجينا كبل للغرفه
لينا ـ بس أريد أعرف بابا شيحب منها شو هي حلوه صدك بس بدون اخلاق وما تعرف تتصرف حتى ويه بنتها أسلوبها زفت وبس ويه أختها زينه تحسينها معاديه وتكره الكل حتى أهلها متحبهم ولا تقبل نور توصلهم عفيه من نفسيه حامضه نفسيتها.
ـ ليش أحنه شمسوين الها أركض كدامها علمود أسلم من لسانها ومشاكلها تاليتها عافتنا بالسوك لما نور تخابر نافع جان لحد الان محد يدري عنا ، يله زين نور ما تشبه أمها .
ـ بس والله ما أسگتلها على سالفتها
ـ لينا ستري علينا الله يستر عليج أحنه مو گدها ما أريد مشاكل واخاف تكلبها علينا وتوكع برأسنا هاي ينخاف منها لان بابا ما يرفضلها طلب وبهل الاثناء دفرت الباب وصاحت بينا .
ـ شعدجن نمتن بالغرفه غيري ملابسج وطلعي سوي العشه لو تردين أني اطلخبجن لو انطيجن تتصفن بالسوك وتاليتجن ضعتن عبالك صغار
لينا ـ أنتِ ليش تردين مشكله گوه گوه .
ـ أنتِ سكتي الحجي مو وياج مو أختج الخوثه طلعي يله
لينا ـ هديني عليها والله أكتلها كتله أنسيها حليب أمها
لبنى ـ شتگتلين منها عوفيها ختولي ، طلعت سويت العشه واجه بابا وتعشينا وكمت أجيب الجاي وهي ضلت كاعده وكالتله عالموضوع ولفتها علينا وعلى اساس اني أجادلها ومعاركتها كدام ابو المحل ضليت مصدومه بيها
سميعه ـ بناتك أبداً ما يحترمن فضحني بالسوك وأنت كلت اشتري بس لينا لبنى لاتشتري وكتلها نكلبت عليه تريد تأكلني وتشربني كدام أبو المحل تحجي وما تحترم عبالك تحاجي جاهل والصراحه صباح بناتك عرمات ما ينعاش وياهن وتالي ضاعن خلف الله على نافع خابرته نور وراح جابهن .
صباح ـ وليش أخذتيهن أثنينهن شكو موليات كلت بس لينا تولي وياج هذيج شگو أخذتيها لبنى ولج لبنى تعالي
لبنى ـ ها بابا .
ـ شنو هالحجي السمعته ليش ما تحترمين بابا صغيره أنتِ بكد الثور موعيب كدام ابو المحل تردن تفضحني
وشكو تعوفن خالتجن أضل أعلم بيجن .
ـ بابا علمود ملابس المدرسه كالت رجعيهن وأني ليش رايحه السوك غير علمود اشتري واذا على فلوسهن اني دفعتهن كلت خاف ما شايله .
ـ مو هي بعازة فلوسج هي لو صرتي تخيطين خلاكين وصار عندج كم فلس شفتي نفسج على الاكبر منج وأني الكتلها لبنى ما تشتري ملابس
ـ ليش بابا
ـ لان ما تدرسين بعد مو مال دراسه هالسنه رسبتي سنة لخ شتطلعين ، أكعدي وسكتي دراسه ماكو
ـ بس بابا أني أريد أكمل دراستي ما أريد أتركها الله عليك بابا والله رسبت لان صادف وفاة أمي وما قريت زين والأسئله الوزاري جانت صعبه .
ـ گلت ما تدرسين وخلص
ـ ليش هيج حرام عليك بابا وأمي جان بنفسها أدرس وأتخرج ، كبل شمر أستكان الجاي أجه بالحايط جان شك وجهي لو لطف الله وصاح بيه
ـ حرمت لشتج ادبسزز من أنعل أبوج لابو أمج وياج
والله لو تموتين دراسه بعد ما تدرسين بس الصوج مو منج من أمج ما عرفت ترتبيجن كل أحترامات ما عدجن .
ـ طلعت ركضت الغرفه ابجي ولينا لحكتني قفلت الباب وهو يغلط ويفشر عليه وعلى أمي وترتبيتها ، بجيت بجي الا حسيت گلبي يريد يوكف على أمي وعلى دراستي اللي جانت بنفسي أكملها ولينا أدك بالباب كمت فتحته ونور تباوعلنا
لينا ـ ما تحجين شبيج شسوى الج ابويه ومرته الحيه
نور ـ انطيها مجال تحجي ، لبنى شبيج شكالج بابا خوما علمود السوك .
لينا ـ غير لو تحجي بس تبجي يمعوده فضيني وراي شغل
نور ـ شغل شنو شبيج خابصه نفسج خل نفهم منها
لينا ـ شغلي أريد اهلس عطوب أمج ما تسكتين على اساس ما تعرفين أمج وحقارتها والله أمج فدبربوك .
لبنى ـ أخذي الملابس الأخذتهن وأنطيهن لخالتي خل ترجعهن لابو المحل على شنو مشتريه بدلتين ما حاجه بعد ، نور كبل كامت بسرعه ولينا تباوعلي
لينا ـ هاي وين ولت وليش نرجعهن شبيج لبنى ما تحجين ابتلييت اليوم صرت نادرة وغسلت المواعين بدالج وعفتج يم صبيح ومرته متكوليلي شمسويلج شحجوا وياج
ـ بطلوني من المدرسه بعد ماكو دراسه ، كبل فتحت وطلعت خرب بس لاتتعارك لحكتها لينا ولج لينا تعاي
لينا ـ بابا االحجي السمعته صحيح لبنى تترك الدراسة
صباح ـ أي صحيح ليش عندج مانع
ـ أي عندي مانع ليش تبطلونها من دراستها
ـ بكيفي ويله لحكي أختج مالي خلكج
ـ بس لمرتك وبنتك عندج خلك بس النا ما عندك
ـ نجبي أدبسزز
ـ لبنى تكمل دراسه وما تبطل ، أمي ما درستها وتعبت عليها علمود توصل الثالث وتجون أنتوا تبطلونها مو على كيفكم هالحجي لبنى ما تترك دراستها .
ـ اشوفجن مستجلبات والله من أنعل أهلجن على هالتربيه ولج لينا طلعتي أنكس من أختج .
لبنى ـ راد يضربها ونور منعته وصار صياح وغلط بالكوه نور اخذتنا ودخلتنا الغرفه ولينا نفجرت ما تسكت صار جمر
لينا ـ لا من أمي جانت عايشه صرتلنا أب ولا من ماتت ومن نريد منك كلشي خلف الله عليك بس خلينا بحالنا لاتمارس علينا ابوبتك بظلم حسبي اللخ عليك أنت ومرتك الحيه .
صباح ـ اليوم أموتج اذا ما ربيتج من جديد أصبريلية
لينا ـ مربيه الحمدلله أمي ربتني أحسن تربيه صارتلنا أم وأب بغيابك يا أبونا عمت عيني عليج يمه ماتت وخلتنا على أيد مرتك .
لبنى ـ كوه سكتتها وهي تبجي وجهه صاير أحمر رجعت عاطتت بعلو صوتها من ورة الباب
لينا ـ دمعة لبنى ان شاء الله تحرك كلبج يسميعه والله جنت حاسه وشاكه بيج ناويه على لبنى نيه كشره ورجلج ينفذلج التردينه علمود تصيرلج خدامه الج ولأختج
جنت اسمع بمرت الأب حقيره بس مثل حقارتج ونذالتج ماشفت بربوك أم السحوره ساحرتله والله ثاولته .
نور ـ كافي عاد عيب عليج يا سحر تحجين عنا شوي أحترمي والتحجين عنها أمي .
لينا ـ من أنعل أبوج لأبو أمج وياج أمشي اطلعي منا محد رايد منج تصييرين حنينه علينا وأمج سميعه شتطلعين أكيد أنكس منها .
لبنى ـ فتحت الباب وطلعت ما حاجيتها بس تباوعلي
لينا ـ ليش ما حجيتي دافعتي عن مستقبلج دراستج هاي وأمي دوم توصينا بيها هيج أحسن تكعدين تكابلين خلقتها تضلين خدامه من طاح حظج وحظ هالفقر العندج .
ـ شتردين أسوي حجيت وكالت ما تحترم
ـ هذه مو أحترامات هذه ضعف شخصيه زباله ابقي هيج ابقي تاليتج ممسحه لنعالاتهن وبنتها تدرس وتتخرج وجامعات راقيه وأنتِ تبقيج تغسلين وتكوين الها وكولي لينا ما كالت شاربي هذا ينحلف بي ازينه والله ، والا ازينه شو الاب ما مباوع بخلقتي ولا يدري عني على شنو عايفته واستحي من العيب من أحط العيب وأدفرهن بي على شنو لازكه بالمشقرات وبنته نور الوجه يلمع لمع تحير شتخلي وتجمل بروحها .
ـ ديري بالج تحفين وجهج لو تلعبين بخلقتج، ما علينا بيها شتسوي تسوي عدها أم تحاسبها وأمي كالت الا تتخرجن من السادس يله تخلن خيط على وجهجن لاتصيرين مثلهن العيب عيب وجهج عوفي لينا لاتطلعين حقدج منهن وتنسين نفسج وتربيتج أحنه مو ملثهن .
ـ لا أريد أعيش مثلهن بلكي يكعد حظي مثل حظهن الام رجلها يباوع على حلكها والبنت الكل يركض وراها الا احنه ضالين بس نباوع ونتحصر وشابعين دك نعل .
ـ لينا لاتخلين بالي يمج ترة ما ناقصه ودراسه اني بعد ما أريدها دام بس مشاكل وهي خلتني برأسها اخاف ترجع عليج وتبطلج عوفيها فدوه لعينج الله ما كاتبلي
ـ خل تندك بيه والله أحطها وأنام عليها وأنعل والديها
ـ لينا شهل الألفاظ
ـ ما تسكتين لا اطبگج أنتِ وياها والله افوخ گلبي بيجن .
ـ عفتها وبعد ما حجينا بهذا الموضوع بس لينا صارت حيل تدقق وتتنبه على كل تصرف من أبويه على نور وميثم وهي بس تباوع وتهزلي براسها والقهر راتب أمي هو يستلمه وكمت كلشي ما أشوف منه وما حجيت لينا خفت تصير مشاكل واني فلوس الخياطه كافي عليه هاليطلعن نعمه لان لينا للسان وما تسكت
بدأ الدوام ونور مخبوصه ملازم ومهوسه واهلها كلهم وياها لان سادس واني شاركت فرحة لينا قدر الامكان احاول اخليها ما تحس بالنقص .
أبويه يوصلهن ومرات غافر ولينا بس اول أيام تروح ويه نور بعدين لزمت خط ويه صفا تروح وياها وهي وياها صداقه عكس نور ما يتوالمن سوه وأني ضلت غصه بصدري من أباوعلهن لابسات وكاشخات وخالتي خابصه نفسها وتتأمر عليه غسلي نظفي طبخي روحي تعالي
ومن غافر يروح دوامه تأخذني بيت أختها انظفلها واطبخ وأجمدلها لامانه الحجيه زينه وكلش حبابه بس اني شعور انه اني خدامه ياكل بيه .
كملت شغلي وهي كاعده تسبح حجيه كملت شغلي وطبختلج الغده هم بس التمن نصيت النار مالته يتهدر
صبيحه ـ الله يرضى عليج ، لبنى بنيتي أوكفي هسه اجيج
لبنى ـ راحت واجتي شايله فلوس خلتهن بإيدي حجيه ما اخذهن والله
صبيحه ـ لخاطري اعتبريهن هديه مني الج ولأختج ما رايحه السوك جان أخذتلجن حاجه بيهن .
لبنى ـ بالكوه غصبتني وأخذتهن ورجعت البيت تعبانه
وتلكتني خالتي سميعه .
سميعه ـ كملتي شغلج طبختي الغده
ـ اي خاله كملت گلشي
ـ اي فوتي على خالج أجه عليجن .
ـ خالي!
ـ اي خالج مو عدجن خال والله زين تذكر عنده بنات أخت من ماتت أمجن ما شفت وحده من خالاتج وصلتجن مدري شعجب اليوم مندل الدرب .
ـ اي الف هلا بي ، دخلت وشفته عبالك أمي كبالي تقدمت سلمت عليها والدمعه بطارف عيني سألته على جديتي وخالاتي وصدمني قهر من كال
بهجت ـ والله من زمان أريد أجي عليجن بس جديتج كسرت ظهرنا من وفاة المرحومه وهي تعبانه وعالاطباء ما خليت لا شمال ما وديتها محد وكع على علتها ورجليها ما تعينها ، وفاة المرحومه أثر عليها
لبنى ـ أختنكت عليها جانت حيل زينه علينا جاوبته خالي والله محد كال النا وخالتي خابرتنا كم مره ما جابت طاري والله ما ندري ما بيها غير العافيه يارب .
ـ الله يعافيجن خالي وهي تسلم عليجن رادت تجي بس رجليها ما تعينيها واني اسأل صباح عليجن ، شلونجن أختج شلونها ، صدك خالي سمعت مبطله ليش خالي مو حرامات وأمجن تعبت عليجن وتوصي بيجن
ـ خالي كلشي قسمه ونصيب الحمدلله .
ـ يعني أنتِ مالج نفس بالدراسه لو أهلج بطلوج حاجيني يبعد خالج لاتخلين بالي عدجن اني والله ملتهي وكلها برأسي ما الحك أحك رأسي والبيت مليان والتهيت وما سألت عنجن حقجن عليه بويه
ـ لا أني خالي ولايضل بالك علينا وطمن جديتي وخالاتي أحنه بخير ،كام وحضنته وباسني ومسح دمعتي .
ـ اشوف بيج المرحومه أنتِ نسختها وردت من أبوج اخذجن وياي بس كال غير مره هو يجيبجن عود تعالن وياه ماشي خالي لان جديتجن تريد شوفتجن سلميلي على لينا وديري بالج على نفسج وعليها .
ـ أن شاء الله خالي ، ودعته وراح الله وياه واجتي لينا سولفتها الها وضاجت
لينا ـ يمكن اذا اشوف جديتي أموت لان من ريحة أمي
وأحنه من يوم الأجينا محد ودانا ولا احنه رحنا وهي طلعت مريضه .
لبنى ـ تحجي وبالي يم كلام خالي وتذكرت قبل أمي جانت تنطي من راتبها لجديتي لان خالي ما يلحك ولده كومه عنده سبع ولد واربع بنات وأمي جانت زينه عليها علاجها والاطباء من راتب أمي التنطي الها لازم أحاجي ابويه وأكوله هذا حق وهي أمها ومريضه بإمس الحاجه اله ، المن ضامه شو صار كم شهر يستلمه ولا يگولي ربع ما مشوفني من راتبها اني مو بحاجته بس على أقل ادز منه لجديتي .
العصريات عفت لينا تدرس ورحت عليه كاعد بالاستقبال لوحده شفته هادئ اليوم وهي جانت بالحمام كلت خل استغل الفرصه وأحجي وياه عالراتب! بابا كاعد أريد أحجي وياك بموضوع! .
صباح ـ أي بابا تعالي أكعدي .
لبنى ـ بابا اليوم خالي بهجت جان يمنا .
ـ اي خالتج گالتلي وشبي
ـ ما بي شيء بس سولفلي على وضع جديتي وصحتها تعبانه ومن بعد وفاة أمي حيل تعبت ، ودخلت خالتي سميعه جابت الجاي وتصبه وكت جاي هسه ونفس الوقت ما ردت احجي كدامها.
ـ أي وشونها هسه
ـ بعدها تعبانه وموديها الدكتور .
ـ أي الله يشافيها ما حجيتي شنو موضوعج بابا!
ـ لا بابا بعدين
سميعه ـ أخاف عدكم سالفه وأنه قاطعتكم مدري كلت اجيبلك جاي .
صباح ـ لا ما قاطعتي أحد ، اي بابا احجي شتردين
لبنى ـ خل أحجي شيصير يعني ، بابا علمود راتب أمي
ـ شبي!
ـ قبل جانت تنطي من راتبها لجديتي وهسه جديتي مريضه وتحتاج مصاريف كلت لو ندزلها خطيه مريضه وخالي يوميه موديها دكتور وهو هم عنده عائله .
ـ وأنتِ من كيفج أجيتي لو خالج دازج يريد من الراتب
سميعه ـ وأنه أكول شعجب اليوم مندل الدرب ويسأل على بنات أخته اثاري علمود الراتب جان استحى .
لبنى ـ لالا لا والله مو هو كالي اصلا ما جابلي طاري خطيه بس يسأل علينا أني من كيفي كلت ندزلها .
صباح ـ صايره حنينه على خوالج وشايله هم خالج ومصاريف وما شايله هم أبوج اشتغل واحط بحلوكجن وجايه تردين راتب أمج همزين ما عندج راتب جان ذليتنا
أمشي لا اهفج بهل الكتاب والراتب موزعه ثواب أهاليتي غير أصرف منه عليجن وحدتجن بگد البعير
كووومي .
لبنى ـ عاط بيه وطلعت من الاستقبال وشگد ضجت منه راحت بنفسي يوم اروحله وما يقهرني كمت احسه ما يحبنا ...
وسميعه ضلت تحوص شلون حاجيته عالراتب الحجايه بلحگها بس سگتت ما حجت كدامه والصبح بس لينا وميثم راحوا المدرسه وكفت اغسل مواعين الريوك اجتي.
سميعه ـ شگد أمهات فنود تردن راتب لجديتجن شو أمجن وماتت شتسون بالراتب .
لبنى ـ بس هذا حق
ـ حق من أمج جانت عايشه وهسه ماتت وأنتن ضليتن وتردن ليكون عبالج جنتن عايشات براتب امجن .
ـ أي ليش
ـ ماما راتب أمج يله جان لبس وكشخات وملابس دوام وعزايم هي والمعلمات وأنتِ تكولين تنطي منه لجديتي وأكيد تذكر أخواتها هو راتب شيصير وامجن جانت صرافه ووينه راتبها لو معكبه بيت ملك لا قطعة كاع لا ذهب بطرك هالراتب
والعيشه أبوج جان فاتح بيتيين ومبتلي بالعيشه كهرباء وماءمصاريف البيت كلها منين لو تعب أبوجن ما تذكرنا بس شايله هم خالج صدك ما يغزر بعينجن كلشي .
ـ ما حاجيتها وأحس زايده منها تتدخل بشيء ميخصها
ـ ديله كملي شغلج وماطول غافر ما موجود تروحين تنظفين وتعزلين الها
ـ أن شاء الله
ـ ديله أني رايحه كدامج .
ـ هزيت رأسسي وگمت كملت شغل البيت وشغل وغسلت الكراج واباوع على أيديه جامدات كمت ما أحس بيهن عصرتهن بثوبي وذبيت جواريبي ناكعات وكعدت يم الصوبه متت برد واسمع صوتها أجتي عافتني تكعد بنور من النوم اليوم ما راحت المدرسه باوعت ساعه ١١
سميعه ـ وأنتِ شوكت تكملين شغلج
ـ كملت شغلي خاله
ـ وينه شو ما اشوف شيء عالطباخ والغده خاتون
مو كتلج كملي ولحكيني
ـ ما أدري عبالي أنتِ تسوين
ـ ليش يابه اني مبتليه بيجن اطبخ وانفخ وشنو شغلج أنتِ وأختج ، كومي طبخي هسه تجي اختج فاكه حلكها تريد زقنبوت ، يله وشكو مشغله الصوبه وين النفط
ـ لكيتها مشتغله يمكن أبويه من طلع ناسي يطفيها تقربت طفتها وطلعتها برى تنظفها ، كمت طلعت اللحم وطبخت الغده وهي لبست عبايتها وهم مشت لبيت اختها وكعدت نور .
نور ـ اكو ريوك
ـ لا اكو غده
ـ امي وين
ـ يم بيت خالتج .
ـ اي عدهم عزيمه يمكن
ـ عزيمه مال شنو
ـ ما اعرف أصدقاء غافر بالدوام بس هالعشه مو عالغده
ـ ما ادري ، رجعت دخلت غيرت ملابسي واجتي تهف بعبايتها كالت
ـ عود أحسبي حسابج أنتِ ونور العصر تروحن بيت ام غافر تساعدنها بالعزيمه غافر عازم أصدقائه
ـ مشت بدون ما اكول لا ما اروح ليش الي حق ارفض اروح وغصبا على راسي ، مسويتنا خدم لاختها وابنها وعزايمه عود ادز وياي نور وهي تكظيها بس لازمه موبايل وكلشي براسي من تنظيف وطبخ والاب بس صوره واجهيه كدام المجتمع عمت عيني عليج يمه .
العصر طلعنا اني ونور وهي ويانا وصلنا بس الحجيه موجوده ابنها ما موجود ، بس دخلت هي اخذت نور واختها طلعن يتسوكن عافني بالبيت ، استغفرت ربي وبلشت تنظيف وغسل وسمعت صوت سياره طلعت شفت غافر ينزل المسواك شكد عيب يربي شكول عليج سميعه على عالموقف هذا ، هسه شيكول عليه وهو هذيج المره تعاركن وياهن والله منا الهن اني شگوو .
لبست شالي وطلعت صار بوجهي .
غافر ـ الحجيه وين
ـ طلعن لسوك هسه يجن ما رد عليه دخل البيت وشال موبايله وطكيتها ركضه لبيتنا ، شلون ولد اخلاق من يوم يومه محترم نفسه ولا يباوع ، هم النا حق نباوع اله لا يبو احنه بنات قلق مو بنات سميعه .
وصلت البيت لكيت لينا كاعده تدرس
لينا ـ ها كملتن
لبنى ـ اي
ـ لعد شو لوحدج شعجب ما الحجيه عزمتج عالعشه
ـ شسوي بالعشه يمعوده، تمددت يمها واباوعلها تدرس لينا شدي حيلج فدوه لاتصيرين مثلي وترسبين يلكونها حجه ويبطلونج
ـ الله كريم ، شعجب ما تحاجين عمتي حربيه وتقنع أبويه ويخليج ترجعين تكملين
ـ الامر بيد أبويه ومرته لا عمتي حربيه ولا غيرها واني هم من ماتت امي ما ضلي واهس بدنيا كلها مو عاد دراسه درسي انتي وما عليج مني اني راحت عليه .
ـ شفتي نور لازموا الها مدرسين خصوصي ودورات وكلهم مخبوصين بيها من العطله واني فلوس الخط محد انطاهن ابويه كلما اروحله وجه يبجي خلف الله على الحجيه ام غافر شافتني هذاك اليوم وانطتني ٢٥ ويمكن هذا تعبج لان تشتغلين وتنظفين الها يعني مو مجاني .
ـ الله كريم تفرج عوفج من هالسوالف ، وسمعنا صوت نور دخلت علينا عصبيه
نور ـ هاي انتي هنا وينج يمعوده امي خبلتني دمشي دزتج عليج تطبخين هسه بلشت الهوسه خاف ما تدرين
لبنى ـ شمدريني انتن عفتني ومشيتن واجه غافر واستحيت منه ورجعت البيت
ـ شكو قابل حسبة اخوج يله تعالي ما ضل وكت .
ـ مشينا وصلنا همزين غافر طالع مدري شجاني عيوني كامت ادور عليه وكلما ينفتح باب الحوش يفز كلبي واباوع وتذكرته أخر مره شلون عصب عليهن ما يرضى أشتغل وأباوع على نور لازمه الموبايل وتبستم رايحة بعالم ثاني .
الحجيه ـ الله يرضى عليج يمه شلون شغل حلو عفيه يمه عفيه .
نور ـ واني خاله
ـ أنتِ سكتي لاتحجين ما منج فايده
ـ ليش خاله مو اشتغلت شو هيچ
ـ شسويتي يمه نفضتي الج مخدتين ، خلف الله عالموبايل ماخذ كل وكتج كومي ساعدي أمج تنزل الفراش من فوك
نور صعدت وأني ورجعت كملت شغلي ودخل غافر يضحك صوته واصل لعندي ولاحظت صوت وياه مديت راسي ولد شباب طوال وسمر عبالك أخوان كبل سديت الباب واسمع الحجيه تهلي وترحب بيهم يمكن اقاربها وانفتح الباب ودخل واحد كبل صديت وجهي خله صناديق صوغه بالمطبخ وكف بالطرمه وصاح عالحجيه
وطلعت عليه مستعجله وصوتهم واصل العندي
باقر ـ عميمه يمج خطار ليش ما حجيتي
صبيحه ـ لا يمه ماكو أحد
ـ چا منو هاي البنيه ما شايفها عندج گبل شنهي عندج بنيه وضامتها علينا عميمه!
الحجيه ـ منو يا بنيه، منين عندي البنيه ونوب ضامتها من دهر فرك يا عمه .
ـ هاي الجانت واكفه أول ما دشينا البيت شبيج عميمه!
ـ أخاف نور بنت عمتك
ـ لا شسالفه ترى اعرفها
ـ ها هاي بنت قلق ضرة عمتك اجتي تساعدني .
ـ ما مدري أنه كبل دخلت عبالي ماكو احد الاعرفه بيتج فارغ طرك غافر .
ـ اي والله يا عمه خلف الله على عمتك تجيب نور وبنات ضرتها ويجن يمي يساعدني خوش بنات الله يستر عليهن.
ـ اي ما شايفهن أنه
ـ اي ما طالعات
ـ چا عمتي سميعه وين ما تجي نسلم عليها
ـ عمتك فوك هسه تنزل ، فوت استريح عمه
ـ عميمه جاي جاي
ـ اي هسه تدلل .
ـ اجتي وكامت تصبلهم جاي وأخذتلهم ونزلت نور وكفت تعدل بشالها ومتلهفه شكو شبيج
نور ـ اجوو مو
ـ اي ليش
ـ هيج هيج ، وديتوا الجاي لو بعدكم
ـ اي الحجيه اخذتلهم
ـ خرب عبالي اني اودي
ـ أستغربت تصرفاتها وكفت تراسل وعينها عالباب واجتي خالتي كبل عافت الموبايل ودخلت عليهم سمع صوتهم يرحبون بيها العرفته من نور يصيرون ولد خالها يعني أخوان نافع حربي وباقر .
نور ـ كملتي طبخ لو بعدج
لبنى ـ لا بعدني ليش
ـ هيج سألت أساعدج بشيء هاي أمي خبصتني خليني اسوي وياج شيء مهم اشارك تأكل راسي اذا ما اشتغل .
ـ ما عندي شيء بس اكو مواعين عالسنك غسليهن وكفت تغسل كملتهن وراحت وأجه نافع من برى خرب هم اجه قبل لايدخل الاستقبال اجه باوع داخل المطبخ
نافع ـ شسوين أهنا شنو جايه لوحدج
لبنى ـ لا ويه خالتي ونور وياي .
ـ شو ماكو أحد وينهن
ـ خالتي بالأستقبال دخلت تسلم على ولد أخوها ونور راحت هسه تجي .
ـ راح الاستقبال وطلع اله هذا الأجه أول مره وحجه ويه الحجيه تسلام مباوس هو وياه سلام حار وبحنيه حاضنه بتك أيد ويطبطب على أكتافه ويضحك وياه ويباوعلي جكارته بلحگه عيونه صارت عليه ،گبل رديت الباب سريع ولاحظت عليه لابس ملابس عسكري برتبه .
أشتغل وخياله گبالي يبين من ورة الجام المضلل بعده بالطرمه ، واسمع صوته يحجي عالموبايل .
ـ اي سيدي ، لا سيدي اللواء الرابع أن شاء الله أني أبلغك أي الرائد عمران مسؤول عليهم .....
لبنى ـ وأنفتح الباب نافع شايل الاستكانات خلاهن عالسنك وكال.
نافع ـ چاي چاي .
لبنى ـ اي هسه ضل الباب مفتوح وعيونه وحده عالموبايل وحده عاالباب قلقني توني رديت الباب اجه نافع .
نافع ـ وين صار الجاي .
لبنى ـ هسه بس أحمي برد واجتي نور سلمت عليهم طبيعي وگفت تسألهم على خوالها ونافع هم ضل واكف وياهم حسيتها علاقتها سبورت وياهم اي غير ولد خالها .
صبيت الجاي وصحت نور الجاي وأجه نافع أخذه مني وهو يسولف ويه نور انطلق وياها ونافع صاح عليهم بعصبيه .
نافع ـ باقــــر الجاي برد ، نور أمشي ساعدي أختج
لبنى ـ أسمه باقـر! وأني شعليه بإسمه ورجعت كملت الطبخ وأجتي الحجيه وخالتي ومبين عجبهن الطبخ وسمعت من خالتي كلمه حلوه .
سميعه ـ الله يبيض وجهج على هالطبخ بهاي صدك فالحه
صبيحه ـ أي ما شاء الله طبخها طيب وأنتِ خيتي دومج ما مقصره ما ادري شلون اجازييج .
سميعه ـ صدك جذب أم غافر أنتِ عزيزه وغاليه أهلي كلهم عيوني الج شسويلج مقصره..
لبنى ـ حضنتها وكامت تبجي وسمعتها تحاجيها وتمسح بدموعها وعبرتها ترس صدرها
سميعه ـ صايرين زلم وباقر سوده عليه صاير عسكري وحربي يمه فدوه لطوله من يومه شيخ العكال شحلاته عليه ، كبروا يصبيحه وأنه اليوم يله شفتهم شفتيهم شون يهلون ويرحبون بيه عبن تربية وهبيه مو أمي .
صبيحه ـ الكبار كبروا يسميعه وباقر جانت أمنيته يصير عسكري وصار وحربي درس وكمل وصار مهندس وفاتح مكتب وشركه مقاولات وجاي يشتغل ويطور من نفسه واذا على الحنيه هما حنينين من يومهم وأنتِ بسلامتج كطعتي عالكل عاقبتي كل أهلج من شوفتج هما مالهم ذنب بالسالفه كلها .
ـ سدي السالفه مو وگتها وهذا نافع مـا يرضى أحد يجيب طاري حبوبته أضمن اليجيب طاريه يخلي طلقه برأسه داهنه مخه .
ـ أبن حبوبته هذا ، يله تعالي ما ضل وگت علينا هسه يجون أصدقائه شوفيلي بنتج وين تجي تعاونه .
لبنى ـ راحت صاحتها وأخذت موبايلها ضمته بصدرها ودخل غافر يحجي هو والحجيه هادئ ورزن وكلامه حيل حلو مريح لسمع .
غافر ـ ها حجيه اليوم زادتج ينحجي بي
صبيحه ـ على بختك أمي يا يوم فشلتك
ـ كفو منج حجيتنا ، شسويتوا شـنو باقيلكم
ـ خير من الله ، أنت الك الصافي لاتشيل هم
ـ ماشي حجيه ، ها ست نور شنو مساعدتج سولفيلي شطبختي علمود اتلاحك الوضع وأعالجه .
نور ـ غافر أزعل منك والله ليش قابل جديده على عزايمك ، ماما سمعتي أبن أختج .
غافر ـ بس ولا مره طبختي يله العزيمه التجي أنتِ تطبخينها متفقين
نور ـ عادي أتعلم شنو ينراد اله الطبخ علم فهم مو ماما
سميعه ـ اي ماما ، دشتغلي بعدين نتفاهم على سالفة الطبخ .
غافر ـ يحجي ويداهر بنور ولكيت نفسي أثرم بالسلطه وعيني تباوعله خطف وگبل خالتي وكفت كدامي فتحت عيونها على وسعهن وكالت بصوت ناصي وصاكه على سنونها
سميعه ـ عيونج أطلعهن من مكانهن أذا شفتج تباوعين إله نزلي عينج وثرمي .
لبنى ـ حيل فشلت منها وهو طلع نافع صاحله وبعد محد وصل ونور كملت غسل وتتوسل بإمها عالموبايل وأنطته الها وضلينا بس أني وياها .
سميعه ـ لاترفعين ركبتج فوك لاتنكسر وأنه الاكسرها وعينج أفكسها والتباوعيله محجوز گلبه لنور وهو وياها واحد يحب الثاني ويحاجيها عالموبايل بعلاقة حب وأنه أدري ومتفقين وبس تخلص السادس يتزوجون وشفتي بعيونج شلونها علاقتهم ما يحتاج أحجيلج أكثر ودرب العشك لاحگه عليه ويمه بعدج بسم الله مفلفله عالرجال لو أنتن مثل أمجن تموتن على الزلمه وريحته .
لبنى ـ سگتت من طلع باقـر وباوعلنا وصاح عليها
باقـر ـ عميمه أريدج بسالفه .
سميعه ـ أي عميمه جايتك وهذا هم باقـــر أبن أخوي مشعان من مرته الجبيره ضابط هم شيلي عينج عنه ما يأخذون غريبه ، ثكلي نفسج ورزيها ترى شايفتج لاعبالج شايله عيني عليج أنتِ وأختج ولو عبالجن أمجن ماتت وبكيفجن لا حسيب ولا رقيب ،يله عينج بالكاع وكملي شغلج تلحكين على سوالف التوجع الرأس وتهجم بيوت ركدي گلبج وبطلي خفه ما ناقصه فضايح .
لبنى ـ ضليت مصدومه بتفكيرها هاي شبيها والله أني الصوج مني راضخه الها وجايه وخابصه نفسي واطبخ وهي ما مأمنه بيه وتحجي عليه ، عفت من أيدي وجريت عبايتي والدمعه بطارف عيني وأباوع لنور تراسل وتبتسم عود عندي گلب وأنعجب لا والله
وصدك كلمتها من گالت لاترفعين ركبتج وتنكسر! الناس مو ناسي ولا هذا ثوبي شحابني عليهم وبعد ما أوصل وشتريد تسوي خل تسوي دام حاجزته لبنتها خل تعلم بنتها الطبخ ليش اني مبتليه ، ما ضجت لان بينهم علاقه لا والله بس ضجت من تفكيرها وقساوة تفكيرها بيه وبإختي .
طلعت وهي وأبن أخوها واكفين يحجون عبرتهم وطلعت النار بصدري بس أريد أوصل البيت ، دفرت الباب ولينا فزت وعافت الموبايل شجنتي تسوين ويامن تحجين
لينا ـ وجع لبنى شكو شبيج وكعتي گلبي عبالي أبويه
ـ ليش عفتي الموبايل
ـ عفت الموبايل لان بابا ما ما يقبل اصلا راد يسحبه مني گالي من تخلصين مدرسه اخذه منج
ـ ليش
ـ غير سليمه مرته ترسته ودزته عليه لحكتني على هالمهجوم هو شبي بس نتراسل اني وصفا وكم وحده من صديقاتي من مدرستنا القديمه .
ـ أي ديري بالج لان مخليتنا برأسه وتراقبنا
ـ من هي ، شگو ليش مخنوكه تردين تبجين وجهج صاير جوب من كثر ما منفوخ ومحمر .
ـ حجيت الها ، يعني تصدكين أم تدري بنتها تحب وعادي وطبيعي الامر وتنطيها الموبايل مأمنه بيها وبنتها تفتر بالبيت وتسولف هي وياه!
حاحيني لينا تصدكين بهيج شيء أحس أوفر ماكو هيج أم طايح حظها .
ـ لا أكو هي مو حجتلج بلسانها بعد على شنو مصدومه .
ـ هاي كواده علني ترى عيب وأذا أبن أختها يضل رجال غريب وبكل صلافه تكول أني أدري بيهم .
ـ بالعاده تگوليين شعلينا بيهم مالنا شغل لاتتدخلين خلينا بعيدين ، أشوفج هسه تأثرتي بالموضوع
ـ شلون ما اتأثر نسيتي نور أختي
ـ لا ما نسيت بس عادي أحجيلي أني هم أختج
ـ شحجيلج بعد أكثر من الحجيته ليش أكو شيء ينحجي
ـ أنتِ معجبه بغافر ونصدمتي بكلام سميعه مو
ـ لا
ـ بلي ، لبنى باوعيلي عادي وأذا نعجبتي أنتِ هم دم ولحم من حقج تحبين وتنحبين
ـ لا أبداً والله على هالسالفه لعبت نفسي من الحب وصدمتي بخالتي حيل جبيره لعبان نفس شلون تقبلها على نفسها ترة الأم شيء مقدس حتى لو وحيدتها ومدللتها مفروض أكو حدود بينها وبين بنتها على هالحجي نور گلشي مباح الها اذا أمها عدها علم .
ـ گلشي توقعي ، هيج ناس گلشي توقعي منهم علمود لاتنصدمين وتلعب نفسج أذا بيوم اذا شفتي موقف مقزز ومقرف
ـ ليش شايفه شيء
ـ لا يعني على كلامج عن سميعه .
ـ تمام ، وأنتِ هم أذا منعجبه بنافع شيلي من رأسج خلي الله ساتر علينا فدوه لعينج أبد لاتخلين أبالج هالسوالف بس دراستج ثم دراستج
ـ لا والله من كل عقلج ترى مفتهمه الموضوع غلط والله نافع حاسبته أخوي وهيج بالشقه حجيت وتغزلت بشخصيته أما حب وخرابيط أبد والله وبس تريد تكره نفسها تحبلها واحد مثل نافع خبل يمه دخيل الله
ـ بعد ما يحتاج أوصيج ، يله رجعي كملي دراستج
ـ بس أراسل صفا .
ـ تمام ، تمددت تعبانه شگد نقهرت على روحي أتعب وهي هذا تفكيرها بيه ، بعدني ما غفيت وأنفتح الباب بقوه الا فزيت
سميعه ـ وين وليتي طلعتي تهفين بعبايتج وتمايلين بخصرج عبالج ما أعرف دروبج عود زعلتي من كلامي أمشي ورانا كومه مواعين خوش خاتونه ونايمه .
لبنى ـ ما أروح بعد وأنتن كافي أني نظفت وطبخت حتى سلطه والمقبلات حضرتها .
ـ شنو داده ما سمعت شگلتي مو أنه أمشي على كيفج شوفي انه ماشيه لان اصدقائه وصلوا وأنتِ حدج ربع ساعه وتلحكيني يا ويلج ما تجين وراي .
ـ طلعت ولينا عينها بالموبايل وتتصفح بالها مو يمي صحت بيها راح أنام خاف أبويه يجي ويسأل كوليله طبخت وكملت واجتي .
ـ ماشي عيني نامي أني أكوله وما عليج منها ختولي شفتيها شلون تحجي وتهرفل بروحها وكل كشختها بهل الجبه وتعوج بلحكها شكد اكره واحد يغير أصله لا مدنيه على وجه ولا ريفيه على وجه تجيب وتخبط .
ـ راح أنام طگ رأسي منها
ـ نامي أني أتصرف .
ـ نمت وعفت گلشي وشتسوي خل تسوي كافي عاد طگت روحي منها وأني الصوج مني محترمتها وهي مو مال أحترام بنتها ما تحترمها مو عاد أني وكلما أتذكر كلامها أشبع قهر وأحقد عليها ونفس الوقت مصدومه بيها وبإختي نور طلعت كل هل المراسلات وطبات وطلعات علاقة حب ويه غافر والأم تدري نعيش ونشوف ...
________________
لميعه
ـ يكولون المكتوب عالجبين تشوفه العين واني هاي حالتي انكتب عليه ابقى بلايه زواج وبلايه ظنا والحمدلله
ومرتاحه مكظيتها شغل أنه وصالحه ووهبيه مثل الخوات نروح ونرد القصر نفس كل يوم واكظ مخدتي وأنامن وقبل جنت من يجيني أفكر ويوميه اصفط افكاري وأعاتب ناسي بيني وبين روحي بس هسه مر بينا العمر وما ضل واهس نفس گبل والعمر اله حوبه ضاع شبابي وأنه على ذمة واحد خبل وبنته صارت بطولي وولده زلم وأنه معلكه بهل الزواج وما أريدن بعد كلشي غير يطلكوني منه ويودوني الحج اريدن أحج بيت الله هاي أمنيتي ما عندي أمنيتات بعد هلي كتلوا وحطموا كل أحلامي وأمنياتي كلشي راح بوكته وزمني خلصته بالظلم والظلايم .
أعاين على ولد أخوي ما مقصرين ويانا وباقر فدوه لطوله يداوم ضابط ومن ينزل يروح يتسوك النا ملابس عبي تكرم نعالات وقنادر وجواريب
صاير هو يروح وقبل جان ياخذ حبوبته وياه وأمه ما يأخذها حربي ما يرضى أدش السوك وزلوم المنطقه وخلك الله كلها تعرفنا
وأمي يا أمي ما بقى حيل الاولي تجينا المغربيات تشوف الفلح هي وابوي حبيب وينطون اليوميات
وتعب الفلاليح ويباوعون عالحلال الهوايش والغنم جثيره خير الله ، والزرع منعم متكفل بي هو ولد اخوي ما يصيرلهم مجال من دوامهم يعانون عمهم.
عدنا حوي طماطه وكاعدين نحوي وصالحه شايله صره ملح وتملح بهل الطماطه وتأكل!
وملامح الكبر بينت عليها تجاعيد ايديها من تنزع الجفوف لكن بقى حب منعم الها ما تبدل ولا غيره الزمن وصبر عليها واشترى راحه باله وبالها وكلشي رزق من رب العالمين الله .
تحجي ويه وهبيه واني اذاني تطنن يمهن
صالحة ـ اكلجن انه اهجس روحي نكظانه مابيه حيل شغل راح أتمدد بالجويه وغطني بعبيجن
لميعه ـ خير خيه شبلاج شو حالج ماعاجبني تلهمين بالملح والطماطه وتاكلين وهي مكافحه لاتروحين تسممين .
صالحه ـ انه ارد اكللجن واخاف سالفتي جذبيه واتفشل منجن ومن عمتي .
لميعه ـ كولي يصالحه شنهي سالفتج .
وهبيه ـ خير شبيج خيه شبلاج .
صالحه ـ أنه أهجس روحي حبله مدري هي سليمه ترد تنكطع عليه وكبرت بعد انه مدري اهجس اكو ظنا! بطني اتلمس بطني واحس بيها ظنا .
وهبيه ـ كولي يالله يا عيني قابل طبيتي بالعمرين ذاك اليوم طبيتي بالاربعين ماكو هسه هي ما تنكطع هاي نادراً وحده تنكطع عليها من وكت والله اني دوم أمي تكلي شعجب ما ياخذونها لشريفه بت الحسن سلام الله عليها كتلها يمه اني مالي دخل عمتي من تزوجت اخذتها مره تطببننا ومره لجده زياره وكالت مابيها خلفه وعمتي بعد ما راجعت بيها .
لميعه ـ خيه تحجين صدك لو تغشمرين ويانه ان جان ماحبلتي وانتي عمرج ١٧سنه هساع تحبلين سكتي سكتي ليسمعنا احد ويتمضحكً علينا بسالفتج أنه احجي وياها هيج اخافن تتأمل واني املها بزايد وتنجبح على وجهه من القهر ويطلع كلشي ماكو بس للصدك اني فرفح كلبي وعلى كبرتك يمنعم يا أخوي يصيرلك بزر يا فرحتي واكعدن اداري لو اداريها ويصير عدنا جاهل بالقصر بعد ما فرغ من الكل وبالشهر مره يلتمن خواتي وأشوفن ظناهن .
عاينت عليها هي ساكته طلعت صرة ثانيه بيها ليمونه حامضه وتحط ملح وتمطك صوت تمطكها قلقني
هفيتها بالصطل دنامي نامي ومن ارجع أگولن لامي عليج وعلى سالفتج
صالحه ـ لا لميعه اني أخافن احجي بس كلت اكوللجن
اخاف تأخذني على زياره وتفحصني واصيرن مضحكه جدام النساوين مثل هذيج المره بس والله اني صار فتره وهالعوارض عليه بس ساكته ان زادات رحت وان نقصت بقيت على حالي ما اروحن .
لميعه ـ والله مدري شكلج أخذي غراضج وردي للقصر وان سألتج امي كولليها سني وجعني ونامي بين ما نجيج أنه ووهبيه .
ـ ها هيج تكولين .
ـ ضليت حايره بيها ووجهه مصفر وتلفانه تاكل حامض وخيار تملح وتأكل اخافن بيها ضغط
وهبيه ـ والله صالحه حبله اني باقر هيج جانت نساوتي
لميعه ـ والله مدري انشلش بالي عليها وكملنا شغل وردينا للقصر الغدا جاهز امي مكمله كلشي وحربي يكسر ثلج يحط باللبن ويسحن ريحان ويخلي .
حربي ـ عميمه عمتي صالحه شني مريضه اوديها للطبيب
لميعه ـ لا ما بيها شي سنها يوجعها .
حربي ـ يلا اروح اجيبلها علاج عندي بالسياره حب وجع راس .
ـ راح جابلها وهي خلته جوه المخده ونامت وجيه منعم وهم حدر للغرفه عليها وطول يلا طلع حاير ودايخ وما كظا الاكل شويه وكام وأمي بس تصفن عليهم كملت المواعين ورحت بسدها أميميتي شلونج
الحجيه عطايات ـ لميعه شعندج من سالفه كتيهن بزري وأعرفنه صويلحه شنهي من سالفه سالفتها وخانسه أنه اخذ بيه الوكت وكبرت بس عكلي ما زر بعدني ما تعبر عليه سالفه.
لميعه ـ يمه صالحه يمكنها حبله
ـ هي كالت لو من يمج تحجين هالحجي .
ـ لا هي كالت بس ما متأكده وتخاف منج
ـ كومي اندهيها بساع
ـ رحت حجيت وياها وهي كوه تمشي ومستحيه الدمعه بطارف عينها وحاجتها أمي
الحجيه عطايات ـ أن جان هالكلام صدك يصالحه نذر عليه لاذبح عجل واوزع عالعرب كلها وان جان جذب ولعبه من لعبات بطنج لـ أزوج منعم عالتالي الوكت واحرك كلبج
لميعه ـ كعدت تبوس بايد أمي وتبجي وتتوسل بيها
صالحه ـ عمه فدوه لأسمج لا تزوجينه والله اني اهجس روحي حبله ربي يعلمني .
الحجيه عطايات ـ يصويلحه من جان رحمج أحضر وبشبابه ما حبلتي عد ما طكيتي الاربعين تحبلين شيبتج بيضه يصالحه .
ـ عمه رزق الله ما يندرى شوكت يفتح بطني واحبل .
ـ ربي لا تفشلني ربي دعيتك جثير وردتها منك ربي
اردن اشوفن بزر منعم كبل لا الله ياخذ امانته واخاف اظلم هالمسكينه واكسر كلبها .
دخيلك يا أبو فاضل نخيتك جثير لا تردني خايبه
لميعه ـ أمي ضلت تدعي وتنخي وللعصر أخذتها عصريه على زياره واخذت فلوس كالت ان جان هالخبر صكد اشتري جكليت من محل سويلم واوزع بالدرابين
واخذت لهدت فلوس بشاره لزياره .
ويمكن فرحنا اكثر من اللازم وهي دموعها عشره عشره تخاف لا يطلع جذب وتتفشل كدامجهم وامي تزوج منعم عدما كبرت ويحترك كلبها
منعم كاعد عالمكينه وباله مشدوه حتى ما طلع للكراب وابويه كاعد عالقرويله وحربي كاعد بسده الشيخ الكبير والصغير هوايه يشبههه بس ياريت ما يطلع نفس اطباعه وظلمه إلنا .
راحن واحنا عالواهس كعدنا نتاني الدرب ما طلعنا للخضره ومرت وحده من الفلاليح كلنا إلها ما نطلع اخذت صاحباتها وراحن ووهبيه كالت لحربي
وهبيه ـ يمه وليدي سنايدي ول يمه العجل روح شربه مي شويه نوب جديتك تذبحه .
حربي ـ خير يمه شبي العجل شنو مريض وتذبحه حبوبه
وهبيه ـ لا يمه حبوبتك ناذره نذر شويه نوب تعرفه
لميعه ـ راح ورجع كعد ويحجي ويه جده وأنه وياها نفتر سويناها عجاجه بنعالاتنا ومنعم هم صار مكوك ومعجج ويانا
وعاط بينا أبويه .
حبيب ـ يولن اركحن بكاعجن هساع تجي .
لميعه ـ حتى ابوي هم يدري ويمكنه لو ما هيبته ورجال جان هم افتر ويانه وعجج ومر الوكت ولمحنا أمي واجتي من راس الفرع تهوس وتدبج والجهال المنطقه كلها تراكض وراها وتطشر بهالجكليت والفرح زار ديارنا
الحجيه عطايات ـ هلاهل بصوت الفرح وهي تكول صبرت وصبرها عند الله ما ضاع واليوم بطنها بالفرحة صار يلمع شعاع
لميعه ـ تطشر بالجكليت والجهال تهوس وهي تبجي
وامي تبجي وتسولف النا
الحجيه عطايات ـ والله انه تكلي حبله واني ما صدك واكولن ربي هيج واشوفن جهال منعم وتطلع حبله دخيلك بابو فاضل وكلت الا هساع اخذها انوبه للولايه واتاكد بزايد بس زياره كالت حبله وعليها ثلاثه خنت حيلي تخاف تحجي ، يمه لميعه جيبلي ماي ريجي نشف
لميعه ـ ركضت جبتلها مي تشرب واخذت الكاع طول بعرض تدبج وحاضنه منعم خطيه فرحان ودمع بعينه ابويه فرحان باس رأسها لصالحه وباركلها وطش خبر الفرح وامها وخوانها اجوي وشايلين طليان أثنين
واجتمعن امي وامها ويدبجن فرحانين وحربي وخوانها ذبحوو العجل والطليان وزعوا للقريه والعرب كلها وجاسم يفتر يجمع جكليت ويرجع يطشه ودزينا خبر لمشعان ونافع وام غافر ونهاوند وكلهم أجو والقصر نترس وكلها التمت علينا فرحانين بهل الخبر وأمي مخليه صالحه بسدها ما تخليها تجيس شيء تخاف عليها ومنعم رجع شباب ولد اخوي يضحكون وياه ويدارهونه .
ـ ها عمي راح يصيرلنا أبن عم
لميعه ـ وضل الفرح زاير ديارنا سبع ليالي أمي ما خلت جكليت بالولايه ما نكلته وجابته وزعته ويوميه المغرب تطش لهل الجهيل ما خلت جاهل ما فرحته حتى فلوس وزعت على فرحتنا بخبر حمل صالحه عكب هالعمر ، الله على كلشي قادر ومنعم صبر عليها والله عوضه على صبره .
وشفت نافع وغافر موجودين واكفين هما وحربي وباقر يسولفون ولاحظت نويره ماهي وياهم شعجب ما جابها وياه المكموع هذا يجوز لحدهساع ما يحاجيها لو معاقبها زلم ما ينحال عليكم ولا يندرى عنكم .
دگيت عليها جم مره محد يرفع الخط وين وأنفتح الو نوره وينج ما تنطين حس ، شنهي ما تسمعيني نويره يا فلك أخافن جهازها عاطل ما يسمع صوت
نور ـ بابا ، هلا خاله شلونج .
لميعه ـ شنهي سمعتج گلتي بابا ، شبي أبوج
ـ هو فتح عليج الخط
ـ منهو أبوج يا فلك ، دهر صابج نوره شلون تخلينه يفتح الخط وهو شعنده ملكوف عالجهاز ويفتح خط من كيفه منهو رايد منه ، يعني هسه ابوج سمع صوتي
ـ اي
ـ لا دخيل بختج كولي جهازج عاطل
ـ يجوز عباله وحده من عماتي
ـ نوره أنتِ ما تجذبين بس ابوج متعمد جان استحى
ـ ما سلم عليج
ـ لا ما سمعت شيء بس انه ارطن وكوليله لايفتح الخط بعد والله بعد ما ادك عليج واخابرج وانه افتكدتج وكلت خل اشوف حالها .
ـ بخير لايضل بالج سادس وملتهيه رأسي مو صافي حتى موبايلي عايفته اريد اجيب معدل زين
ـ الله يسهلج يخاله وما يضيعلج تعب ، بس شعجب ما اجيتي وياهم عيوني تدور عليج بينهم بس فرس النار جاي وأنتِ ماكو .
ـ عليه حصار من الكل
ـ منهو محاصرج أحجيلي نويره شنو مگدر خلكج يبعد خالتج .
ـ ماما وبابا وبيت جدي وأخر شيء نافع سوالف هواي خاله بعدين من يصيرلي مجال أخابرلج وأحجيلج هسه بابا موجود .
ـ يمت ما تردين أنه أسمعج ونافع شونه وياج
ـ بعدين خاله احجيلج هو يمكم مو
ـ اي يمنا اجه هو وغافر وخالتج صبيحه ، والله شغلتي بالي ينوره
ـ لاتشيلين همي أذا صارلي شيء توصلج أخباري بسرعه
ـ نوره لاتخوفيني عليج
ـ لايضل بالج خاله بخير بس نفسيتي تعبانه من السادس ومن الضغوطات واذا احجي هسه ابجي فخليها بعدين من اشوفج .
ـ لا السالفه ينراد أنه أجيج خل تكظي هالهوسه ويركد حمل صالحه انه اجيج على بيت خالج مشعان ومناك تعالي عليه
ـ أن شاء الله خاله هلا بيج احبج هوايه
ـ وانه هم احبنج يبعد خالتج وراحت وضل بالي يمها حسيت رويحتها مهتضمه أكيد حاجيين عليها لوموزينين وياها والله لو نوره بنتي فلا ازعلها يمه اغديلها فدوه لعمرها .
الله يريح بالج وكلبج ينوره ما تدرين شكثر شايله همج وهم نافع لاتنكسر گلوبكم حاطه أيدي على گلبي لا صبيح يكسر گلبك ينافع ويأخذ ثأره من أهلك مربع وأنت مالك ذنب بسوالف الماضي يارب لاتوجع كلبي بيهم وأجمعهم وفرح گليبي بيهم ...
#خيط_وأبرة
#الحلقه_العاشـرةج2
#الكاتبه_شمس_العراقيه❀
لينا ...
ـ كل ظني الحياة حلوه بس على ظلم أبويه النا كرهني بكلشي حلو بالاخص لبنى ضلت دراستها غصه بروحها
ماكو عداله ولأ أنصاف داىﻤاً وابداً سميعه وبنتها..
هالفتره التهييت بدراستي ومرات أروح على صفا أتونس وياها وأغير جو وأرجع صح سوالفها ما تدخل العقل وما تخاف من أحد وعدها دروب وسوالف بس كل ظني هيج شخص فارغ وما يطلع من أيدها شيء بس طلعت العكس تصدمني بسوالف اضل فاتحه عقلي
صفا ـ شبيج ترى گتلج بس معجبه بي بس ما حاجيه وياه ليش تخليني أتندم لان حجيتلج
ـ شگد تتندمين واضح صفا واضح
ـ لينا لاتسوينها سالفه جايتج تساعديني اخلي ينتبهلي مو تضلين صافنه بوجهي .
ـ مالي شغل وبعدين هو شكله مرتبط ما لكيتي الا تنعجبين بالمدرس عوفي لايسويلج سالفه .
ـ يا سالفه غير يعرفنا وأني حبيته وقفلت عليه وأروح ادورلي حجه أحجي وياه أنتِ ما منج فايده خوافه لو أنتِ منعجبه بي جان ساعدتي نفسج بس أني أدكين ثكل برأسي .
ـ عافتني ولليل راسلتني ها بشري
ـ لينا طلع صوته مو حلو وما يعرف يحجي نصدمت بي
ـ هههه شبسرعه جبتي وحصلتي رقمه وهاا طلع مونفس المواصفات البالج حيل تستاهلين
ـ يا مواصفات ليون لعبت نفسي شنو هاي كرهني بالزلم ، اثاري بس مهدامه حلو طلع مسويلنا فخ ههه ما عجبني كلش .
ـ هههه أحسن
ـ روحي خليني بصدمتي من هالمكموع
ـ عفت الموبايل وصفنت بالفراغ العافته أمي حيل مشتاقتلها ولبنى صايره كل وقتها بس شغل سميعه مسويتها خدامه وتشتغل وهي ساكته ومن تجي تلزم مكينتها تحجي بس قليل .
يوم عطله والصبح جو حلو كعدت بالمرجوحه مخنوگه وملل ونور تقرأ عالسطح وتباوعلي تجاهلتها ولا أحسها أختي مغروره وبعيده كل البعد عنا صح الها مواقف حلوه بس بعيده بهواي أمور ما نتشابه بيها .
ندك الجرس وطلعت الباب جنت ما منتبه على نفسي ما لابسه شال فتحت الباب رجال يطلع عمره بالأربعين
ـ السلام عليكم أبو نور موجود
ـ لا والله ليش عمو
ـ أني المختار أبو مسار أجيت على أبو نور علمود النفط
ـ من يجي أكوله أن شاء الله ، هز رأسه ومشه وقبل لا أسد الباب باوعلي وصفن عليه ، گبل سديته ورجعت ونور صاحت بيه
نور ـ أشلون تفتحين الباب وتحجين وياه منو هذا الرجال
ـ منو يفتحه قابل ، هذا المختار مال المنطقه أجه على بابا عافتني ونزلت من الدرج مثل مصروعه شگو نصرعتي
ـ تعاي ولج ليش وگفتي تحجين وياه وترى شفتج!
ـ نور شبيج غير الرجال سألني وجاوبته لو عبالج كلها مثلج وششفتي مني عابتلج شو ودخري .
ـ أحترمي نفسج ششايفتني بسيطه أني الج لينا اثاري هم طلعتي داهيه وعندج سوالف .
ـ شگد مكروه يا سوالف تحجين عنها شبيج نــور
ـ والله سألي نفسج لا عبالج أني غشيمه وتعبر عليه سوالفج أنتِ وصفا وهذيج نافع وراها أنتِ منو وراج لبنى يله ملتهيه تخيط وبابا ذا أحجيله يمكن يذبحج
ـ بابا تخبلتي ليش هو شگوو .
ـ المدرس التركضين وراه وتردين تحصلين رقمه
ـ تذكرت صفا خرب سوالفها وخرابيطها وكعت برأسي
ـ ها صفنتي ، شوفي لينا هالسوالف عوفيها ترى ما ينولج الا شرها
ـ كامت تنصح أنصحي نفسج بالأول نسيتي لو أذكرج وين جنتي تنحصرين
ـ ليا أدبسزز
ـ عفتها ودخلت الغرفه وراسلت صفا وينج وين مكبوره
صفا ـ بالبيت وين يعني شكو شبيج مفجوعه عليه
لينا ـ صديقاتج البرابيك فاضحتج يالرعنه وأنتِ مثل الدثو وين مل تجين تسولفين ياهي تحجين وياها كلمتين تصداقينها أمداج .
ـ شصاير تعاي أتصال
ـ أتصلت حجت كلمتين وسمعت صوت نافع أمشي ولي اليمج عربيد واليمي حيه .
ـ هسه راح يولي خبصنا بصوته بس نــور اني أعلمها تستشرف برأسنه أم الفواين خلف الله على نافع مگلبها
ـ صفا انجبي
ـ ليش شحجيت
ـ غلط ما أريد وما أقبل تحجيين عليها مهما يكون أختي
ـ ونافع أخوي شو ما اكول وهما اثنينهم كواويد
ـ سدي موضوعهم واكص لسانج اذا تجبين طاري نور لاتنسسين نافع يموتج
ـ شجيب طاريها شبيه تخبلت غير يعدمني بس كدامج حجيت والله اسمها ما اكدر اجيب طاري مو عاد حبهم
ـ تمام .
ـ وهي على شنو جابت طاري المدرس وجان كلتي الها طلع مو ذوقنا وصوته يلعب النفس وما يعرف يحجي
ـ سولفت الها عالمختار
ـ ها هذا ابو مسار اي شبي شعنده جاي عليكم
ـ جاي على بابا وطلعتله لو تورطت شو هاي كبل انفجرت بوجهي وجابت طاري المدرس! أمداه ذوقج عبالها أني
ملاحكه المدرس .
ـ يله ما صار شيء مره أنتِ مره أني ولبسيها ختولي
ـ لا بينا نحل الموضوع بس أجيت اكولج أنتبهي على نفسج نور تسكت بس نافع اذا وصله خبر ما يسكتلج
ـ ادري تعلميني بي ، صدك باجر العصر تعالي علينا كلها راح يرحون القريه ضليت بس اني وزهور جيبي لبنى وتعاي
ـ ها والله أني هم أريد اطلع خل اشوف لبنى وأساساً هي ضايجه صارلها كم يوم
ـ فقيره وحبابه زهور كلش حبتها ، يله انتظرج عندي الج كومة سوالف
ـ شعندج سولفي
ـ تجين ونحجي بس الموضوع يخبل الا بشدة!
ـ تحجين بالشدات لازم أمورج طاكه
ـ كلش وأن شاء تطگ اكثر بس تعاي واسولفج .
ـ تمام وباليل بلغت أبويه على المختار وثاني العصر ما كذبت خبر گوه قنعت لبنى نروح
لبنى ـ منو يودينا وأذا ولدهم موجودين ونترزل مثل هذيج المره احلف حتى أنتِ ما توصلين.
لينا ـ ميثم يوصلنا وصفا كالت كلهم رايحين القريه أمانه لبنى خل نمشي بس محبوسين والله طگيت
ـ يله أمشي تحضري
ـ وطلعنا لبيت عمتي وميثم ماكو ولا سميعه بس نور تقرأ خل نروح وحدنا ترى أندل .
ـ أمشي عاد كمتي تندليين
ـ شگو شبيج ليش حسيتج ضجتي من سميعه
كالتلج غافر ونور يحبون بعض ، أنعجبتي بي مو
ـ بمنو
ـ غافر
ـ لا بس ضجت شلون أمها تدري وطابه طالعه عليهم هذا مدوخني وجديتي مهديه البارحه الصبح اجتي وهنا جانن بيت غافر وضلت تحجي عليهن صدمتني بسوالف
ـ يا سوالف تعالي أحجيلي
ـ لاتصيرين ملكوفه اني صوجي حجيتلج
ـ شحجتلج جديتي
ـ هيج ما حجت شيء بس ناويه تزوج نور لمصطافي!
ـ أيععع السلبوح يصير رجل نور يمه
ـ ما ادري كلامها يوحي تحجي من كل عقلها وراحت وخالتي ما اجتي عليها ولا اني تدخلت ولا عليه .
ـ الله يستر اذا جديتي مهديه تدخلت ومشينا وشفت المختار صار قريب علينا وعيونه عليه أستحيت منه خرب هذا هم أجه وكال
ابو مسار ـ السلام عليكم
لينا ـ وعليكم السلام ، رديت السلام ولبنى جرتني وتكرص بيه وهو كال
ـ العفو البارحه اجيت على بيت ابو نور وأنتِ طلعتيلي تقربيله؟ وبلغتج علمود النفط .
لينا ـ اي أني بنته وگلتله كال خل يجي باليل هو يتواجد
ـ ان شاء الله أخذوا راحتكم .
ـ مشه ولبنى شبعتني تكفخ خرب راسي اريده والله اريده ، صار عندي أرتجاج بالمخ على كيفج ترى أيدج ثكيله .
ـ منو هذا تحجين وياه وامشي نرجع البيت حتى بيت عمتي ماكو وفواكاها تسلم عليه بكل صلافة عين استهترتي كلش طلعت عينج .
ـ بس وخري ايدج منا العالم ، وخل نمشي وأحجيلج والله قابل ما تعرفيني ما عندج ثقه بيه
ـ منو هذا
ـ سولفت الها لما وصلنا وقطعت السالفه وهي تتوعدلي عفتها يم زهور وطفرت اني وصفا فوك لازمه لحم ايدي خرب لبنى اكلت لحمي .
ـ شبيها
ـ سولفت الها عالمختار
ـ هذا المختار مو خالي!
ـ عابتلج صفا لاتسيئين الظن بالناس الرجال اجه علمود شغل ويه أبويه .
ـ أي وأني شحجيت قابل بس الأمانه حلو شايفته صح جبير أربعيني بس مرتب وما متزوج بس العالم تگوله أبو مسار يكبرون من شأنه لان خوش زلمه صاحب وكفات والمنطقه كلها تحمد منه بس يكولون يحب النسوان هههه ما ادري نافع يسولف عليه لان نفس الطينه غراب يكول عن غراب وجهك اسود .
ـ اي شعلينا
ـ ترى خوش صيده إذا تصدينا
ـ صفا لاتنزلين عالترابي شنو هو سمجه اصيده
ـ مثل ما اني وكعتلج على صيده تسوه والله تسوه
ـ تعاي أحجيلي يا صيده ولچ
ـ شوفي السالفه وما بيها اتعرفت على واحد من الشمال يشتغل بمصفى نفط ساكن بالشمال لج لو تشوفين المصايف حتى للخارج يسافر شلون حلو ومرتب وكشخه فول
"روح منا تعال منا أربعة أيام على مدى متواصل نحجي
ـ ليا خاينه شو ما حجيتلي وشوكت لحكتي تتعرفين عليه مو جنتي كاتله نفسج عالمدرس غضب على يومج ما تستقرين أنتِ .
ـ كل خل أضبطه وأحجيلج المهم محجيتله اني من يا مكان ولا يا محافظه ولا بنت منو ولا كلشي حقيقي كله مفبرك وجذب وأبلاش
ـ ها عود أنتِ ليش محجيتي اذا أنتِ نيتج يحبج وتحبينه
لج أخاف يطلع ملعب وسرسري اقلها اني مانطي لزمه على روحي على أقل أذا أعوفه أني مرتاح بال .
الله مادري يا عيني بس ديري بالج صفا تره الدنيا مو أمان لاتغدر بيج وتفين حظج تروحين بالرجلين والله نافع ما يسمي عليج كبل جك والفاتحه
ـ أنتِ بس لا تلطمين وتبجين بوجهي أنه بخير
ديتصل عليه خل أحجي وياه واجي أكملج .
ـ راحت تحجي وياه بصوت ناصي وتتموع بصوتها خلتني بوسط أفكار ترعب حتى روحي واني شلي دخل أسوي خير تطلع مو أدمي مو نصحت نور طلعت اني موخوش أدمي
بس هاي صفا تخوف خل انشوف تاليتها والله ما ادخل بيها تاليها توگع الشغله برأسي واطلع اني ام دروب والفاينه وبنتهم البزون المغمضه .
ـ ولج شحجيلج عنه هذا واكع على وجهه جفي
ـ وأنتِ صفا
ـ شبيه
ـ تضحكين على الولد لو تضحكين على نفسج لو تضحكين عليه وبعدين توكع برأسي مثل سالفة المدرس وصلت نور والله يستر ما توصل نافع
ـ لا ختولي عوفيها والله هاي تغار ميته محد يصادقها بس تصادق الولد
ـ اكسر حلكج صفا وبعدين شُـــنو تصادق الولد الزمي حدج لا اخلي سنونج بإيدج
ـ شبيج حميتي على كيفج لا تنفجرين ، أقصد نافع وغافر وباقر علاقتها سبورتيه وياهم وهما واحد دكول حايط أنه اختهم ما أكدر انطلق بالكلام وياهم
ـ يجوز لان ربت وياهم
ـ أكولج أنه اختهم مو مثلها ، بس هي هيج شخصيتها محبوبه من قبل الزلم تنحب للامانه يعني بس هي ما تحب أحد بس نفسها ونافع!
"متشوفين ما عدها ولا صديقه وعلاقتها بالبنات سطحيه صح يعرفن نافع وغافر يوصلونها ويشمرن الها كلام بس ما تنطي لزمه عليها أبد مـا تحجي لوحده ما تأمن بإحد نهائي .
ـ وشبيج أنتِ صديقاتج البرابيك فضحنج
ـ لا أكيد وحده بيهن خاينه هي الوصلت الكلام لنور لو تنطيها فلوس تراقبنا أني وياج وهي ونافع نفس طينه عوذه هذولي إذا ينجمعون والقران يكرهوني بعيشتي .
ـ هسه عوفينا من نـور وخلينا بهذا التعرفتي عليه
ـ أي شبي يحبني وأني اشوف مدى صدق كلامه والله كريم
ـ نيتج شلونها وياه
ـ اذا يحبني ومستعد يحارب الدنيا علمودي اي ليش لا وهم اتزوج أخذ واحد وأعيش حياتي حالي من حال هالبنات اسافر اشوف الدنيا شبيها ما بيها مو كافي سجن بهل البيت .
ـ بس أنتِ ما محتاجه كلشي
ـ يمعوده لينا غير حياتنا سجن ترى بس بالاسم ساكنين بالولايه ما طالعين ولا شايفين الولايه شبيها حدنا المدرسه وكبل المدرسه .
وأكبر طلعه النا نفتر بالسياره وناجح يضحك علينا بعلاكة حلويات حتى ما يخلينا ننزل يمعوده احنه هم عايشين مثل البنات دروحي شوفيهن شلون عايشات لبس وكشخات وطلعات وسفر لخارج وأحنه السوك أمي تروح تجيبلنا شغلاتنا شايفه هيج شيء حصار خليني أتزوج وأخلص
ـ خرب بعقلج صفا بعدج صغيره وينج وين الزواج شهل الافكار طلعتي كاتله نفسج عالزواج ونسيتي وراج دراسه ومستقبلج ينتظرج تلحكيين عالزواج .
ـ لا حبيبي ماكو مستقبل ينتظرني بس اخلص السادس أكعد بالبيت حالي حال أخواتي ماكو كليات وجامعات حلم أبليس بالجنه اصلاً رادوا يبطلوني من الأول متوسط بس أمي توسلت بيهم كالتلهم خلوها تأخذ شهادة السادس ولو تزوجت رجلها يدرسها ما الكم شغل بالف بوسة رأس يله قنعوا
ـ أي أخذي شهادة السادس والزواج بعدين
ـ يا بعدين لينا ما تسكتين خليني احصل رجال لا اروح أصير مثل عمتي لميعه ضلت بالدار خدامة للنسواوين ولحكتها زهور اكبر من نافع ومحد أجاها لو ضمياء لو زينب لحد الان ولا وحده من أخواتي تزوجت وهي عمتي لميعه اجاها واحد خطيه يسولفون عليه خوش زلمه بس أبويه ما موافق وهذيج وينها تداري حبوبه
وحايره بعزايم وفصول جدي حبيب .
ـ خطيه قهرتيني عليها سامعه عنها جانت حبيبة بابا قبل مو صح
ـ اي قصتهم تقهر هما أهلي ظلام يهود متشوفيني بس اريد اخلص منهم
ـ لا هيج تكولين ماكو أهل يكرهون ظناهم وكلشي يسونه لمصالح اولادهم واهلج يحبونج ومدللينج ليش تخربين نفسج بهل السوالف والولد شتعرفين عنه ما تخافين يطلع ابن حرام ويسويلج سالفه ، فكري صفا أنت عندج كومة أخوان وكلهم ما شاء الله واصلين والهم أسمهم اي غلطه تسوي ما تسوي ، احسبي حسابهم صفا عوفي هذا الولد خيولي .
ـ لاتخافين عليه أني اعرف الاصيل من أبن الحرام
ـ شمدريج شلون تعرفينه
ـ شعليج أعرفه ، من أسلوبه من كلامه
ـ مبين خاتمتهم على ايدج غضب عليج صفا ولاتخافين
ـ ما مسويه شيء أخاف منه اريد أعيش شكو خانكيني
ـ استغفرالله شلون أكوم أنوم هالمزهريه برأسج وأخنكج خنكه زينه كبل يم مُنكَر ونكير وبعدين كولي أهلي خانكيني من خنكج الموت .
شو كومي ما وراج بس الخراب راح تخربيني وياج خل اكوم اولي على لبنى هسه الكاها محضرتلي كتله زينه .
ـ تعاي أذا عنده أخوه أصيده الج شتكولين
ـ صفا لعبتي نفسي بالزلم شايله مصيدتج وتصيدين بيهم ، زلم جيس حب وما اريد اخذي هو وأخوه يفيدونج أني أنصاد ما أصيد بعده ما جاي اليصدني وكمت ارمش بعيوني .
ـ انجبي كامت تلوص خفت هالعيون يا مسودن يصيدج
ـ شعليج لاتحجين عليه ما أقبل عليه هذا زوجي المستقبلي .
ـ أمداج أنتِ وياه .
ـ ضحكنا ونزلنا ولكيت لبنى لازمه رأسها شبيج
ـ ضغطي رأسي راح يموتني ، شعندج نمتي فوك
زهور ـ لينا ديري بالج على أختج تعبانه خطيه .
لينا ـ تمام عيوني وطلعنا ونمشي صادفنا نافع طبك سيارته ودگلنا هورن صرعنا .
نافع ـ شعدجن تفترتن أعوفجن بيت عمتي الكاجن بيتنا ما تلمين اختج وتكعدين شكو مسربتات ودايحات من لبيت لبيت .
لينا ـ لبنى باوعتله بحقد وروحها مايعه وهو صاح بيها
نافع ـ نزلي عينج لا اطلعها يله صعدن اوصلجن .
لينا ـ لبنى مشت هو يصييح علينا خل نصعد متشوفينا تخبل
لبنى ـ من خبال يخبله ما سمعتي كلامه مثل السم امشي هياته البيت شكو خايفه منه وبس تشوفينه تنثولين ، تحركي كدامي وبعد رجلي أكسرها وما اجي وياج أني مـا أتوب من الرزايل .
لينا ـ مشينا البيت وهو بعد ما شفنا راح البيت بعد أحسن يضل بس يحجي علينا وتذكرت صفا رسلت الها رساله أخوج نافع أجه ديري بالج
صفا ـ ها تمام مشكوره حبيبي .
لينا ـ وصلنا البيت وطلعت جديتي مهديه من بيتنا هي وعمتي نوريه ويحجن بصوت عالي عزه شصاير ويحجن حجي ما ينحجي وأبويه يصييح عليهن ويتوسل بيهن يريدهن يسكتن ويدخلهن البيت وعلى صوتهن وطلعوا الجوارين وكلها تباوع عليهم لبنى شگووو
