رواية فصلية ولكن الفصل الرابع عشر بقلم سوزان ليث
دخلت للغرفه رحت بدلت ملابسي لابست بجامه بس خالد جان ماكو وراها رحت مددت ونمت من تعب وتكمز وركص ورجلي احسها تون عليه من الوجع نمت بسرعه حتى ملحكت افكر بشي
خالد: طلعت بره رحت يم الولد جابو نراكيل وجاي وظلينا سوالف وحجي لحد نص الليل وراها عفتهم ودخلت جوه رحت للغرفه شفت حياة نايمه ويمكن لويوكع يمها صاروخ متحس بدلت التراك وغسلت ونمت.
حياة: صبح كعدت ساعه بثمانيه بالكوه كمت لو ممنبه تليفون جان بقيت نايمه بس جان لازم اكوم من وكت لان خالتي كلتلي لازم اروح ويه ايه للصالون كعدت جان بعد خالد نايم كمت غسلت وبدلت وحضرت هدومي الي اللبسها للعرس وطلعت اصلا لكيت حسين ينتظرني حتى روح من طلعت كلتلها خاله اني نسيت اكول لخالد حروح ويه ايه للصالون اابارحه لان نمت قبله ميجي
خالة: معليج يمه اني اكله روحو يله ب 12 حتى تكمل من وكت البارحه ظاله للظهر بصالون عاد اليوم خل يخلصوها من وكت
حياة: طلعت جان خالتي صيحني
خالة: يمه حياة عود لتخليهم يخلولها مكياج هواي البارحه كومه خاليلها
حياة: اي خاله اصلا هي حلوه بكل الاحوال
حسين : يله حياة خل نروح كبل الازدحام
حياة: طلعت رحنا على ايه اخذناها ورحنا للصالون وجانت ويانه اختها جبيره وصلنا للصالون تقريبا بتسعه ونص ظلينا لل 11 وهمه كلشي ممسوين بالاخير اخت ايه حجت عليهم وكلتله اذا لحد هسه ممسوين شي ليش خليتونا نجي من وكت المهم بدوا يسون باايه بس كتلها للي دسويلها مكياج ريده خفيف لان هي وجهه ناعم واصلا ايه كلش فقيره تستحي تكللهم بس هي شافتني حجت بتسمتلي حسيتها تريد احد يحجي
بدو باايه والله كملت طلعت لعابه جنن وراها لبسناها البدله ورجعو سوو تسريحه طلعت كلش حلو
اني خلولي مكياج بس طلبت مكياج العيون يصير ظلاله اسود وبي ذهبي ويه ملابسي وبدلت لان بعد مالحك بالبيت ابدل لان صارت ب 4 واحنا بصالون وخالتي كلسع تخابر علينا واصلا بيومها الصالون كومه عرايس بي
اني لابست فستان اسود طويل ومن الصدر بي ذهبي بس فستان مال محجبات لابست شالي دكلنا حسين كال اني بره المهم طلعنا ايه هي وبدلتها بكوه صعدناها للسياره وسياره عاليه اووو بس حسين جان مبدل وقاط طالع كشخه وكلش حلو طالع وصلنا ايه للبيت ورجعنا احنا لبيتنا فتت للبيت هوسه والكل جاي وزفه بالخمسه تطلع اني كبل سلمت رحت للغرفه جان خالد ماكو رحت خليت غراضي جتي خالتي عليه
خالة: هلي يمه تاخرتو
حياة: والله خاله كومه عرايس اليوم تعرفين خميس كل ديتزوج
الا اخت ايه كامت تحجي يله بدو بيها
خالة: اكلج يمه ترى خالد كلتله راحت ويه ايه للصالون كام يحجي ليش مكايلتله بس اني كتله متدري اني صبح كتلها روحي وانت جنت نايم حتى ليحجي عليج
حياة: والله البارحه نمت قبله وهو جان بره كاعد يم الولد وصبح جان نايم .. زين وينه شو ماكو هو
خالة: يمه طلع مدري وين خابري كليله الزفه بالخمسه
حياة: اي هسه اخابره
خالة: حروح اكمل لبسي
حياة: دكيت على خالد جاوب
الو هلو شونك
هلا بيج همزين ذكرتي تخابريني وين انتي
اني بالبيت قبل شويه رجعت انت وين
وماعندج رجال دكليله حروح مو
والله جنت نايم وخالتي كالت اني اكله
واني شعليه بخالتج دطلعي مره ثانيه بدون علمي شوفي شسوي بيج
ماشي اخر مره .. انت وين خالتي دكول بالخمسه زفه
هسه راجع بطريق جنت يم حلاق
اوكي يله لتتاخر
يله باي
طلعت صعدت لامل داشوفها جانت تبدل ومخبوصه كلش
عادي خليتلها مكياج خفيف كلش لان دكول ابويه يشوفني يحجي عليه بس اني كتلها عرس وميحجي
اني الوحيده الجنت مكمله لبس ومكياج
المهم نزلت خالتي كالت اجه خالد بالغرفه
رحت للغرفه جان بالحمام عاد حضرتله ملابسه شويه وطلع بس بالمنشفه
حياة:هلو شونك
خالد:هلا
حياة:حضرتلك ملابسك
خالد: هاي شمسويه بوجهج
حياة:شبي
خالد: شنو شبي البارحه بالبيت ومجنتي خاله هلكد هسه حنطلع خاله هلكد
حياة: محلو ☹️
خالد: ولج يابه كلتلج محلو بس ماترهم طلعين هيج وشوفج الوادم
حياة: يعني غير عرس
خالد: حياة انتي حلوه بدون هذا الخريط روحي غسليه يله
حياة: عزه شغسله شويه ونطلع
خالد: ماكو طلعه وهيج وجهج
حياة: خالد حباب
خالد: لا حباب ولا شي روحي مسحيه قلليه شنو هذا اسود فوك عيونج بت الوادم
حياة: ظليت اتافف واحجي وهو ولا يمه رحت خففت من ظلال وقللت الحمره
خالد: صح هي طالع تخبل بس شون اخليها اطلع هيج خرب غير اموتها بدلت اني وكفت بصفه وهي كاعده تخفف الي بوجها بس تباع عليه بحقد
حياة: كلش ضجت منه اي كلشي ميقبل اسوي ونوب ولا عبالك كعد يعدل ويرتب بنفسه وطلع يخبل ومزين طالع كيكه بس جنت حاقده عليه وراها نداريت عليه هيج زين
خالد: باوعت عليها اي زين
حياة: اكلك احنا ويه منو نصعد
خالد: اني حاخذ امي وانتي وامل ويايه
حياة: ماشي لعد حطلع حتى اكول لامل
طلعت شفت امل كتلها ابوج يكول احنا نصعد وياة
امل: لا حياة بربج ماريد اصعد ويه ابويه
حياة: ليش
امل: ولج ابويه حتى اغاني محيشعل ونظل طريق كله لتباعين لصفكين والله معليه اصعد ويه البنات بالكوستر
حياة: خرب لو ادري مكايلتله هههههه
صارت الزفه فطلعنا كلنا حاول افلت من خالد حتى اروح ويه امل بس مكدرت شافني وصاحني
خالد: ولج وين رايحه مو كتلج تصعدون ويايه
حياة: مو امل حتصعد بالكوستر فاني كلت اروح وياها
خالد: دشوفي الكوستر مقبطه تعال صعدي وياي يله صعدت ليوره وجنت انتظر خالتي تجي حتى تصعد بعدين اجه خالد كالي تعالي صعدي ليكدام امي حتصعد يم حسين
نزلت صعدت بصفه وهو يسوق ومثل مكالت امل مشاعل لا اغنيه لايخليني اصفك
بعد زهكت كتله ادري هذا عرس لو شنو لا تقبل تشعل اغنيه لا تقبل اصفك شنو لو صاعده بالكوستر احسن
خالد: مو عرفت ليش تردين صعدين وياهم حتى ظلين دبجين
حياة: باوعت عليه يربي شون وياة مديت ايدي شغلت المسجل صح الاغاني مسوي واهس بس عادي المهم اكو موسيقى
وكلسع خالد دنجي حنفوت سيطره لتباعين
لحد موصلنا لبيت ايه نزلنا دخلنا زفه واخذنا ايه شافتني امل كلتلي ولج تعالي ويانه بالكوستر ونسه اني كلت خل افلت وياها ظليت امشي للكوستر ماسمع الا خالد يصيح
خالد: وين يولي رايح سياره هنا
حياة: نداريت عليه يربي .. ها جنت ادور عليها عبالي وره الكوستر رجعت صعدت ليكدام ورحنا للمصور نزلو اخذو صور بس مقبل انزل وياهم
وراها كملو تصوير فريناهم شويه بس ونسه وخالد كلسع يكسر على سياره حسين
قبل منوصل للبيت جان اكو ازدحام شويه فنزلو بشارع الولد يركصون والله ونسه صح بس اني بسياره بس حاولت اونس نفسي
وصلنا للبيت فتنا فالولد بقوا يدكون ويركصون بشارع دخلنا احنا هم كمنا نركص بس خطيه ايه جان وجهه اصفر كعدت يمها وظليت احجي وياها لتخافين حسين يحبج بس هي جان كلش خايفه وذكرتني بنفسي من اجيت هنا شون جنت ارجف رجف بس فرق هي تعرف الي زوجته وتحبه واني حتى اسمه مجنت اعرفه
وراها اجه حسين وتالي زفيناهم لغرفتهم وحسين جان ممصدك وفرحان كلش
وحتى الناس راحو كلهم بس خالاته وخواته بقو يمنا تالي اني دخلت بدلت وطلعت احضر العشه للعرسان فجنت بالمطبخ سمعت خالتي هلهلت وخالاته كلهن كامن يهلهلن فرحت للهول شفت حسين جوه لابس دشداشه بيضه وكلش فرحان اظاهر كمل عزه اني خجلت وبكلبي اكول شبسرعه هسه صعدو رجعت للمطبخ
فجان خالد بره دخل
خالد: شكو شو هلاهل
حياة: اني بس ابتسمتله هو افتهم وراح يم خالتي
وراها رحت كلت لخالتي كتلها جهزت العشه الهم اصعد كالت اي فدوه صعديه
فصعد دكيت الباب شويه وايه فتحت الباب بس جانت كلش مستحيه مني اني نطيتها الصينيه ونزلت محبيت اخجلها اكثر
كعدت جو حضرنا العشه جان خالد جايب من بره جاهز ففرشنا سفره وكعدنا ناكل والكل يسولف ويضحك كمنا عاد لملم فرحت داقدم جاي فجان خالد كاعد وبصفه خالته ديسولفون فاني جيت داقدم لخالته جان دكول لخالد يله انت شوكت نفرح بيك وتباع عليه وتضحك عاد هو كلها عن قريب وباع عليه وغمزلي 😉 اني ظليت مدنجه وماعرف شحجي كملت وجيت كعدنا يمهم وسوالف وضحك بعدين تاخر الوكت عاد كل اني طبيت لغرفتي
بدلت ورحت مددت فات خالد عليه بيده سبحه ويهز بيها ويباع عليه جان اجه مدد ونام على عكسه ويفرك بالسبحه ويحجي
خالد: اي دنشوف شوكت الله يفرجها
حياة: باوعت عليه حسيته ديذبلي بسامير .. شكو شبيك
خالد: لا داكلج زوجت اخويه الاصغر مني وخلصت
حياة: اي ان شاءالله تفرح بجهاله ..
خالد: اي ان شاءالله .. حياة الى متى نظل هيج
حياة: شبينا ليش
خالد: معاجبج صيرين مرتي فعليا
حياة: ظليت اباع عليه
خالد: تعرفين من دخلت وشفت حسين نازل وشون فرحان اخذ الي يحبها حسدته كلت انياله
حياة: خالد تعرف اني هم حسيت بحساس البارحه بالحنه وتخيلت هاي حنتي واني وياك دنركص و اليوم من شفت ايه بالفستان العرس شنو حسيت بداخلي حسيت بيني وبينها فرق كلش جبير هي طلعت من بيت ابوها بزفه وهوسه وناس كلها فرحانه ويدها بيد الي تحبه وهي لابسه البدله
واني طلعت من بيت ابويه واني دموعي على خدي طلعت مجلبه بيد ابويه واني خايفه واحس نفسي ماكدر اتنفس وكانما عايشه كابوس
تعرف احساس صير فصليه
خالد: حياة لدكولين على نفسج فصليه ولج انتي مو فصليه
حياة: لعد شنو اني
خالد: ولج انتي مرتي والله من يوم الي جيتي لهذا البيت واني عمري محسيتج فصليه
حياة: بس ناس لو بعد 100 سنه يظلون يكلون عليه فصليه
خالد طول عمري احلم اللبس البدله واحضر العرسي واسوي هواي شغلات بس تالي كلش مسويت من الي حلمت بي
خالد: تقربت عليها جريتها نومتها على صدري وبست راسها
وداعتج لاحقق كلشي حلمتي بي وعد مني
حياة:اني بتسمت كلتله بشقه يعني حتخليني البس بدله مثلا
خالد: وداعت عيونج لاشتريلج احلى واغلى بدله
حياة: هههه وانت تلبس قاط
خالد: لا عاد مو قاط البس لبسي مال شيوخ شكو بي
حياة: مممم خالد اني شنو بالنسبه الك
خالد: جريت حصره وحجيت .. الراحه الي مالكاها عد احد غيرج
حياة والله عمري وحياتي ماحسيت نفسي متلهف على احد مثلج حتى اني طالع اشتاقلج وارد ارجع بس حتى اشوفج
حياة: صعدت راسي عليه بتسمتله ... احبك .. كلتها بدون ماتردد او اخجل حسيت نفس اريده يعرف بالي جوايه اله
خالد: اويلي واخيرررا حجيتيها والله دمرتيني يله كلتيها
ولج اني ميت بيج واعشقج وذايب بيج
حياة. جنت فرحانه كلش من داسمع هذا الحجي منه واحسن نفس ممصدكه وظل كلسع يكلي تحبني تريديني واني جنت اجاوبه بدون تردد لان جنت ماريد اضيع دقيقه بدونه احبه واحبه شخصيته حنيته عصبيته غيرته كلش بي احبه
ظلينا ليل كله نسولف ونحجي ومخلينا شي بكلبنا محجينا لبعضنا لاول مره حسينا تقربنا من بعض عرفت الي بداخله وعرف الي بداخلي اله نمت واني على ايده
وره سبوع سوينا سبعه مال حسين وهم جانت كلش حلوه وتونسنا بيها لليل اني جنت بالمطبخ ودالملم ويه ساره ماشوف ومن صدك جنت كلش تعبانه لان من صبح شغل وهوسه فاجتي زينه كلتلي حياة سوي عشه لان اني وايات ملحكنا نتعشه اني جنت تعبانه ولعبانه نفسي منها ومن ايات من صدك هلكد مجانو مكرهيني بعيشتي بسوالفهم كتلها والله من نصبنا العشه ضلينا نصيحكم ونسوي وانتو خاتلات بغرفه خالتي
ساره كلتله اني حسويلكم عشه لان حياة خطيه تعبت
زينه : لا اشو هي سوي شنو معاجبها مثلا
حياة: ظليت ساكته محجيت بس هي جتي جرتني من ايدي ودارتني عليها
زينه : شنو معاجبج جاوبيني
ساره : يابه شبيج زينه صلي عالنبي ترى منستاهله هيج تعيطين
زينه : لا والله الا اشوفها شنو معاجبها ترى هذا بيت ابويه وانتي هنا فصليه يعني حالج حال الخدامه
حياة: اني متحملت جاوبتها : زينه احترمي نفسج والله لاكول لخالد على سوالفج هذا
زينه: وشنو تهدديني والله اني الي اكله عليج واخلي يربيج
حياة: والله اني متربايه احسن من عدج افتهمتي
زينه : ولج يعني اني ممتربايه والله لاكول لخالد
طلعت زينه وروحي للهول خالد كاعد واخوانه كلهم وعماتها وفوتي لخالد ابجي وكوليله حياه تريد تطردني ودكلي انتي ممتربايه تقبلها اخويه ياابن امي وابويه هيج دكلي والله بعد ماجيكم وهسه اروح لبيتي اظاهر هذا البيت صار مو بيت ابويه
حياة: اني بالمطبخ وداسمع حجيها لان عالي وظليت صافنه هاي شدكول عزه بعينها منو طاردها
خالد: اهدي شبيج منو طاردج معاش الي يطردج من بيت ابوج طلعت كمت اصيح حياة حيااااااة
حياة: اني بالمطبخ وسمعت خالد يصيح عليه بصوت قوي اني رحت بسرعه رحت عليه هو جان واكف يم بابا الهول وشكله عصبي كلش
خالد: حياة انتي طارده زينه
حياة: لا والله مطاردتها
زينه : ولج يعني اني جذابه خالد اسئل ساره وايات هنا شاهدات عليها
حياة: اني جنت متاكده انو ايات حدكول اي طردتها بس مصورت ساره حتطبك وياهم وتشهد ضدي
ظليت صافنه اباع على ساره ومصدومه عزه ولج اني طردتها
خالد: اني من شفت ايات وساره شهدن على حياة مجنت اعرف شسوي فشلت كدام اخوتي وعماتي ظليت اباع على حياة شون سوي هيج جريتها ورحت للغرفه
حياة: جرني للغرفه واني احس حينفجر من العصبيه دفعني وسد الباب كل قوته
خالد: ولج شون طردين اختي من بيت ابوها
حياة: والله مطاردتها وداعت ابويه مطاردتها
خالد: ولج ايات وساره شهدن عليج
حياة: اني ابجي واحجي والله ياخالد مطاردتها هي ايات اصلا اكيد حتطبك ويه زينه ضدي
خالد: زين عوفج من ايات وساره شعدها وياج تشهد ضدج ة
حياة: والله مادري وداعت ابويه مطارده احد
خالد: باعي تلمين هدومج وتروحين لابوج زين ماريد اشوف وجهج وعفتها وطلعت
حياة: اني ظليت ابجي واشهك ليش محد ممصدكني والله مطردت احد شويه دخلتلي امل شافتني دابجي جتي عليه
امل: ليش طردتي زينه متعرفيها شون بس تريد عليج ذله
حياة: والله مطردت احد ايات وساره شهدن كذب وداعت ابويه مطردت احد
امل: ليش ساره طبكت ويه زينه
حياة : ولج مادري والله حتخبل اني شكد زينه وياها تالي هيج سوي
امل : دكافي ياعيني الله ياخذ حقج منهن
حياة: كمت لازمت تليفون خابرت ابويه كلتله تعالي ابويه كلي حدزلج قصي ياخذج اني بعيد يجوز اتاخر
امل ظلت تحجي ودكلي ولج لطلعين هنا يريدن بس يطلعوج ويفرقوج عن ابويه بس اني جنت مصدومه باخالد وين حبه الي
لابست عباتي وكعدت انتظر قصي شويه ودك عليه كمت طلعت شفت خالتي دتجي عليه
خاله: ولج وين رايحه
حياة: خاله رايحه لبيتنا خالد ميريدني وهو كلي روحي
خالد: ولج كعدي يايمه ستهدي بالرحمان
حياة: خاله وداعت ابويه اني مطردت احد من البيت وداعت ابويه
خالة: ظلت ساكته متعرف شتحجي
مقبلت اطلع ابد بس اني جنت من صدك مقهوره من خالد اكثر واحد
سلمت عليها وطلعت من باب المطبخ لكيت ساره كتلها باعي ماكلج غير حسبي الله ونعمه الوكيل بيج وعفتها وطلعت لكيت حسين ظل وين ماوين مطلعين ومن هاي سوالف بس اني ماقبلت طلعت ركبت ويه قصي وداني لللبيت والله طريق كله ابجي وادعي على زينه من حركت كلبي
خالد: طلعت من البيت وره مشكله بس احس نار بداخلي ركبت سياره وظليت افتر بشوارع وره نص الليل رجعت لكيت امي كاعده بالمطبخ اول مشافتني
خالة: ولك يمه ليش هيج سويت خليت مرتك تطلع بالليل
خالد: ظليت اباع على امي كتلها حياة طلعت
خالة: ولك خايب انت مو كايللها روحي لبيت ابوج ماريدج
خالد: ظليت ساكت اذكرت اني حجيتها بوقت عصبيه
خالة: يايمه باجر روح رد مرتك ولك انت ماتعرف زينه وسوالفها
خالد: يمه اعرفها بس حتى ساره شهدت
خالة:ولك يمه والله ماعرف شكلك بس مهما يكون روح رجع مرتك لتخلي سالفه تكبر
خالد: الله كريم يمه عفته ورحت لغرفتي طبيت اووو رحت مددت اباع ماكو حياة يوميا هي هنا سولف وتضحك وتنام على ايدي ظليت ادخن واحس راسي حينفجر
حياة: رحت لبيتنا جان ابويه طالع فرحت لبيت عمتي اول مشافتني هي عرفت متعاركه وكعدت حجيتلها صار بس هي ظلت تحجي وبعد متروحين وكافي من يوم الي زوجتي وانتي متعذبه ومشفتي يوم حلو ظلت بس تريد تواسيني
ا جنت احس نار بصدري اريد اعيط اروح املخ زينه وايات وساره هلكد ممختنكه منهن شويه اجه ابويه محجه شي بس اخذني وياه ورحنا للبيت شافني بس ابجي وكلش مختنكه خطيه كعد يحجي ويايه ويكلي اعرفج مدكولين هيج وانتي تربايتي واني مصدكج
بس فاجئني ابويه جان يدري بسالفه كلها
ابو حياة: اصلا من خابرتيني جنت ادري بسالفه كلها لذالك حتى مكلتلج ليش دتبجين من خابرتي
حياة: شمدريك
ابو حياة: شيخ خالد خابرني وحجالي كلشي واصلا اني ماقبلت كتله حياة من سابع المستحيلات هيج تصرف بس هو اظن يعرف اخته لان هو خابرني ديعتذر مني لان دزج الي بس جان يريد يهدء الوضع بالبيت
حياة: لا بابا لا يهدء ولاشي هو حتى مصدكني جان يكلي اني اني سندج اني الي احميج بس طلع كله بس حجي اني لا ريد ارجعله ولاشي هاهيه خلي اخته وبت عمه يفيدو
ابوحياة: يا عيني خليت بمكانه جان كاعدين اهله كلهم وتجي اخته تبجي دكله مرتك تريد تطردني ويجيب اثنين يشهدون كليلي جان بيده وكل كاعد يسمع ويشوف
حياة: بابا ماريده بعد اصلا هو كلي ارجعج لابوج هاهيه بعد
ابو حياة: دكومي هسه روحي غسلي وجهج وروحي نامي والله كريم
خالد: اجذب لو كلت مرتاح نار جانت بصدري وظليت ليل كله واكثر من مره الزم تليفون اريد ادكلها واعوفه بس ليش ساره شهدت ضد حياه لو بس حاجيه عكسهم جان عرفت شسوي بزينه وايات
