رواية السكن الفصل الخامس عشر بقلم غدير الحيدري
......
دقيقة واحدة
تفصلنا بين الخوف والأمان
دقيقة واحدة
لها الأثر على اجسادنا بمدى الأزمان
وانا وددت لو تمنحيني دقيقة..
......
كعد بصعوبة
تراجعت للخلف
كال بثقل
عبدالله: دقيقة وحدة بس، خلي احجي وياج
كلت بخوف
روناك: شتريد مني!؟
عبدالله: انا مو عاق، ولا مو خوش ادمي لا تصدكين كلامهم
روناك: وانا شعلية؟! ليش تكول هالكلام
كام وكف
وانا رجعت لورة
رفع ايدة وكال
عبدالله: لتخافين، مااسويلج شي انا تعبت هواي حتى اظهر بمظهر حلو كدامج، ما ردت اظهر بهالشكل
اشر ع نفسة
فتحت عيوني مصدومة
كال
عبدالله: ما شربت هواي، بس شوي حتى انسى
كان يأشر بأيدة ويحجي
كلت بعصبية
روناك: تنسى شنوو؟! انت شمسوي بروحك
عبدالله: لا تصدكيهم، صدكيني
تجرأت ومشيت الة
وكفت كدامة وكلت
روناك: ومنو انت؟! ومنو هم؟! وليش اتعب نفسي حتى اصدكك او اصدككم؟ انا هنا غريبة واهلنا يكولون يا غريب كون اديب
ابتسم
وكال بهدوء
عبدالله: انا الغريب هنا، انتي مرحب بيج، ببغداد وبالبيت وبكلبي
فزيت بخوف
ابتعدت عنة وكلت
روناك: اقرف منك، وخليها ببالك ماكو شي يجبرني ابقى يمكم، حتى ابوية
اجيت اطلع
كال
عبدالله: ما بقى شي وحتى ابوج يصير نفس هذا
التفتت
شفتة يفر بمحبس بأيدة
عقدت حاجبي
روناك: انت مو صاحي، غباء مني احجي وي واحد سكران
طلعت واسمعة يكول
عبدالله: ما تسمعين الحقيقة غير من السكران، اول مرة بحياتي احجي الحقيقة
نزلت بسرعة
وكلبي يخفق بقوة
انا شصعدني فوك؟!
صار لازم افكر بشكل جدي
حتى اترك المكان هنا
واروح اسكن بغير مكان..
......
طلع حتى يشرب ماي
شافني كاعد بالبلكون
و يمي كومة جكاير
وصافن
كال
حازم: انت ما مستوعب الوقت؟! ترا ساعة ٤ الفجر
باوعتلو وكلت
خالد: مو نعسان
حازم: الهالات وصلت للحيتك
ابتسمت
خالد: مابية شي
اجة وكعد يمي
كال
حازم: مو كلت اول وحدة تشوفها راح تحبها؟ بشرني شصار حبيت؟!
باوعتلو ببرود
خالد: اي حبيت
ضحك وكال بحماس
حازم: ايي يا الله هاي الاخبار الحلوة منو هي؟!
خالد: بنت عمي
كال بصدمة
حازم: ها؟!
باوعت بطرف عين
خالد: وليش منصدم؟
حازم: ووين كانت عنك بنت عمك؟ سالفة جديدة هاي
خالد: احبها من زمان
كال بأنزعاج
حازم: كنت تكلي ما تحب وتتشكالي بحالك بس اقسم بالله انت هسة جذاب وما تحب بنت عمك
جريتو من ياختو
وكلت
خالد: دحك يول، لا تبلينا
حازم: هااا كتلي ما ابليك، ملعون
اخذ مني جكارة
وصار يدخن
كلت
خالد: شلونو شغلك الجديد؟
حازم: جاي اتعلم وخوش شغل بس المحيرني شي واحد
خالد: شنو
حازم: ع الطالعة والنازلة ابو الشغل ينطيني فلوس
ضحكت بأستهزاء
خالد: وانت شتسوي
حازم: مرة اخذ مرة ارفض بس هو ميقبل ارفض
خالد: ابقى ع طبعك واياك تنغر وتصير طماع، هذا المصكوع يريد يختبرك حتى يشوف انت نفسك عزيزة لو استغلالي
صفن وانا كلت
خالد: وبنفس الوقت يريدك تجمع فلوس وترتب وضعك وتخطب الحبيبة
كال حازم بأنزعاج
حازم: لا اله الا الله، بوووية لا تكول اسمها، كلي اي شي بس مو اسمها
خالد: ووجع اليوجعك، ما كايل اسمها، بعدين شسويلك اذا هي اسمها حبيبة؟
حازم: تقبل اكول اسم حبيبتك؟!
خنكتو وهو ضحك
حازم: ها ها، بس ع كيفك مااعرف اسمها
خالد: سد حلكك
حازم: تخيل اروح اسألة شنو اسم اختك
كلت بغضب
خالد: المن؟!
حازم ارتبك وكال
حازم: لابن عمك، اي لأبن عمك اسألة
كمت وكلت بأنزعاج
خالد: يابة عوفني بحالي، ولا تدخلوني بأفرع ضيقة
دخلت للغرفة
اباوع لحسين نايم
حسيت بالخنكة
تمددت ع سريري
طلعت ملزمتها من جوة المخدة
وصرت اتذكر
خليت الملزمة ع ستولها
وما اخذتها..
زين ليش مااخذتيها؟!
ليش عفتيها يمي تاكل بية اكل
فركت وجهي
وجهج هو اول وجه اشوفو بسنتي الجديدة
بس بعدين؟!
اذن
وحسين كعد من النوم
باوعلي وكال
حسين: ها، شنو ما نمت؟
خالد: بلي قبل شوي فزيت من النوم
حسين: ممبين عليك نايم
وراح حتى يتوضى
ساعة وحدة ما نمت من هالليل
ومااعرف تاليتها
كمت صليت
وبعدها تمددت بسريري
حسين بلش يراجع
عندو امتحان
انا اليوم ماعندي امتحان
بقيت اتكلب
احاول انام
ما كدرت
اسمعهم وهمة يبدلون
حتى يرحون للدوام
ما اعرف شلون غفيت
فزيت ع موبايلي يدك
اباوع هذا ابوية
فتحت خط
خالد: هلا يابة شلونك
: هلا بيك، شنو اخبارك
خالد: الحمدلله بخير انتو شلونكم
: بخير بخير، احنا بالطريق جايين لبغداد انا وخالتك واختك
خالد: خير يابة خو لا بيكم شي
: لا يابة ماكو شي، جايين نشتري لاختك كم شغلة منا وعود نلتقي اليوم، تعال للمنصور نتغدة هناك
وغلق الخط
جايين يشترون لأختي
وبعدين يفكرون يشوفوني
كمت سبحت وبدلت
بعد وقت هواي
سويت ريوك
اباوع لسراج طلع من الغرفة
حضرتلة ريوك وياية
كعدنا حتى ناكل
خالد: صاير نشيط اليوم
كال بأنزعاج
سراج: رايح للحلة لأهلي
خالد: وامتحاناتك؟
سراج: كم ساعة وارجع، اخيرا ابوية تذكر عندة ابن
تذكرت ابوية
وكلت
خالد: يعني تصالحتوا؟
سراج: نتصالح يوم ونتعارك اشهر
خالد: وشلون تخفي الاثار اللي ع وجهك؟ لو عادي يشوفك هيج؟
تلمس وجهو وكال
سراج: والله لأطيح حظك يحسين
خالد: هو ليش ضربك اول امس؟
كال وهو يضحك
سراج: كنت راجع ومنسم ع الاخر، وهو من شافني صار يضرب بية ويكلي ليش فايت للبيت بحذائك
خالد: هو ضربك لان سكران، زين انت شعندك سكران بالنهار
تقرب الي وكال بهدوء
سراج: قضيت وقتي وي بنية عبالك جاية من الجنة
ابتعدت عنو وكمت
وانا اكول
خالد: طيح الله حظك، استغفرالله ربي هذا زنا يا غبي
سراج: دروووح انت ما تعرف تونس روحك
دخلت للغرفة وانا منزعج
ناقصني انزعاج النوب
بدلت وطلعت برا
صرت افتر بالشارع
اباوع ع عمارتهم
يا ترى بأي شقة ساكنة هي؟!
حسيت ع روحي
ومشيت
خفت لا يجي حسين ويشوفني
مو ناقصني قهر
اخذت تكسي
ورحت للمنصور
كعدت بكوفي وصرت انتظرهم
احاول ارتب الفوضى اللي بدماغي
بس ما كدرت
اتصل علية والدي
ورحت للمطعم
سلمت علية وبست راسو
وسلمت ع زوجتة ردتلي ببرود
واختي نفس تصرفات امها..
كعدت يم ابوية
وصار يسولف وياية ع الدوام
خالد: الحمدلله كلشي بخير
: خو ما احد يضايقك او عندك مشاكل وي احد
خالد: لالا ابد كلهم خوش ولد وماكو منهم
: زين شنو هالاثار اللي ع وجهك، متضارب وي احد؟!
تذكرت عركتي انا وحسين
علمود زهراء
كلت
خالد: لالا يابة هاي تزحلكت بالشقة ووكعت وشوي الوكعة قوية
: غير تنتبه
خالد: صارت بعد
كالت زوجة ابوية
: من يوم يومة شراني وابو مشاكل
ابوية غلس ع كلامها
وانا سكتت
سألني ابوية
: ماكو وياك شباب من الانبار
خالد: لا يابة كلهم من الجنوب، نجف ناصرية بابل
: هاا وشلونهم وياك خو ما يأذوك
خالد: كتلك يابة خوش شباب حتى يحبوني وانا احبهم يعني متفاهمين وابد ما نسولف بالطائفية
تدخلت زوجة ابوية
وصارت تحجي وياه علمود بنتها
وانا سكتت
رجع ابوية كلي
: مقربين منك لو بس صداقة دراسة
خالد: لا مقربين وعلاقتنا حلوة، حتى قررت اقضي العطلة وي صديقي حازم من الناصرية
: وشغلك
خالد: اجي واشوفو وارتب وضعي عادي
تدخلت زوجة ابوية من جديد
وقاطعتنا وصار تحجي وياه علمود بنتها
جابولنا الاكل
وبلشنا ناكل
خالد:يابة جرب هاي القيمة النجفية، دائما ناكلها بالسكن
: الظاهر انت هواي مختلط وي جماعتك
ابتسمت
كالت زوجة ابوية بخبث
: مو غريبة بعد كم يوم يكلك اريد اتزوج وحدة شيعية
احس الدم جمد بجسمي
وعركت..
والدي كال
: لالا خالد حرمتو موجودة، ما نزوجو غير وحدة من ثوبنا بعدين ما مجبورين نجيبلو وحدة من غير مذهب مو خالد!؟
هزيت راسي بمعنى اي
واحس اختنكت
زوجة ابوية تباوعلي بمكر
كالت
: شمدريني شباب هالوكت مدري شلون يفكرون، يروح حتى يدرس شو يرجع وهو مستچتل ع الزواج لا وما يختار وحدة من ثوبو، يدور وحدة تختلف عنو
ذبيت الخاشوكة
وشربت ماي
احس السم والغضب صعد لراسي
اباوعلها تسولف هي وابوية وبنتها
ويضحكون
عائلة كاملة متكاملة
ما ناقصهم غير ان انا اكوم واختفي
رمشت ع حازم
وحازم اتصل علية
حازم: ها خالد خو ما بيك شي
كلت
خالد: ها صدك؟ يلا هياني جاي
حازم: نيالي، هاي شجاي تحجي يمعود مرمشلي وانت عندك محل وانا فكري تريد اخلص رصيدي عليك دولي
سد الخط بوجهي
باوعلي ابوية
: خير يابة خو ماكو شي
خالد: لا بس صديقي اتصل علية علمود الامتحان ولازم اروح
كمت وابوية كال
: بس ما كعدنا هواي
خالد: ما بقى شي ع العطلة اكمل واجي ان شاء الله
مد ايدة بجيبة
وطلع فلوس ونطاني
كلت
خالد: لا يابة عاشت ايدك مااحتاج
: اعزم اصدقائك ع العشة وبلغهم سلامي
اخذت الفلوس منة
واحس بالخجل
زوجة ابوية تخزر بية خزر
كالت
: بعد نريد نشتري اغراض
عرفتها ضايجة من الفلوس اللي اخذتها
ودعتهم وطلعت من المطعم
كأنما سجين وتحررت
اجرت تكسي ورجعت للسكن
طول الطريق احس روحي مخنوك
واتذكر كلام زوجة ابوية
وصلت للشقة
لكيتهم نايمين
دخلت للمطبخ وصرت ادور بالجدورة
طابخين تمن وقيمة
ابتسمت وصبيت الي
وكعدت اكل
اجة حازم للمطبخ
كان متحضر حتى يروح للشغل
كال
حازم: ادري متستحي انت ترمشلي؟ هو غير خلصان رصيدي بسبب الحب
خالد: يمعود ردتك تتصل حتى اخلص من اهلي
حازم: عجب اجوك؟
خالد: ايي، لا تتأخر اليوم ابوية كلي اعزمهم ع العشة بمطعم
ضحك حازم وكال
حازم: كل يوم خلي يعزمنا ههههه
كمت للغرفة
لكيت حسين نايم
دك موبايلة
اباوع للأسم (البيت ز)
ابتسمت وخفق كلبي
عرفت هاي زهراء
حسين بسابع نومة
بس لازم يرد عليها
اخاف بيها شي!
رحت لسريري وغطيت نفسي
وسويت نفسي نايم
وصرت اصيح
خالد: اهووووو دجاوب ع الصخام مالتك، حسسسين
كعد من النوم وهو مخترع
حسين: شكوو، شبيك منجلب
فتح موبايلة وطلع برا يحجي وياها
وخرت الغطة عني
وباوعت للسكف
شيصير لو تتصل علية؟
تتصل علية بصفتي منو؟!
دخل حسين للغرفة
كال
حسين: شبيك انجلبت وتصيح ها؟!
خالد: غاط بالنومة وموبايلك يدك وانت منكبر كول اكو ناس نايمة
راح يبدل ويكول
حسين: همزين كعدتني كان راح علية الشغل
كلت
خالد: تعال من وكت حتى نطلع نتعشة برا، ابوية وصاني اعزمكم ع عشة
حسين: عاشت ايدة، والله اهل الغربية كرماء
خالد: ويحبوكم
حسين: دنام احسلك
خالد: لا شبعت نوم خلي اكوم ادرس باجر عندي امتحان
كمت بدلت
وانتبهت سراج ماكو
كلت
خالد: هاي شلون حنتعشة برا بدون سراج
حسين: ليش وين انكلع؟
خالد: راح ع اهلة
حسين: عوفة خلي يولي بعد احسن
خالد: لا خطية
حسين: يمعود بعد ساعة تلكاه جاي
طلع حسين
وبلشت ادرس
وفعلا اجة سراج
اباوعلة وجهة احمر ومقهور
طلعت برا
خالد: خير شو عصبي
سراج: ماكو شي
خالد: شبسرعة رجعت
سراج: ما ينكعد وياهم، نطاني هالفلوس وطردني
اباوع يضم الفلوس جوة السرير
مبلغ هواي
كعد ع السرير وصار يكول
سراج: هااا ليش من شفت ابن فلان عبرتة ومسلمت علية، هااا ليش بالجامعة تجيني شكاوي منك، هااا شلون تكول انت مرحلة ثالثة ومن اسأل عنك يكولون اولى
كلت وانا مستغرب
خالد: يول والله الحق وياه، اكو واحد يضم عن ابو دراستو؟
سراج: واكو اب ما يعرف بدراسة ابنة
رحت للمطبخ
سويت جاي وصحتلو
خالد: تعال اشرب جاي ولتضوج
اجة وهو يكول
سراج: اللي ردتة اخذتة
خالد: شخذت؟!
سراج: الفلوس اكيد وهذا الملف
عقدت حاجبي
خالد: شبي هذا الملف؟
سراج: سوالف اختلاس واشياء تعبانة راح اضمها يمي حتى ابعد نظر عنها، طبعا هذا بتصريح الوالد
فريت ايدي
صبيت جاي وكعدت اقرة واشرب
كال
سراج: يكلي انت مو مهم، السياسيين ما يهتمولك ولا يخافون منك ويدرون بيك تافه محد يجي يمك ونطاني اخطر ملف عنة
تنهدت
خالد: يابة انتو السياسيين ما تنحزرون
كام حتى يطلع
والملف بأيدو
كلت
خالد: وين رايح
سراج: للشقة شوي واجي ليش
خالد: لا تشرب تعال من وكت عازمكم ع عشة
سراج: خوش زين كتلي
طلع وانا بقيت وحدي
يا ترى زهراء شرادت من اخوها
اكيد محتاجة شي واتصلت علية
اذن المغرب
كمت صليت
بعدها اجو الشباب من برا
تحضرنا وطلعنا
سراج: نروح بسيارتي
حسين: مااصعد بمال حرام انا
حازم: انت ولك منيلك هالسيارة
سراج: يمعود شامرها يم شقتي احسها مو كد المقام
خالد: دخلصونا عاد شلون نولي
كال حسين بأنزعاج
حسين: بتكسي وع حسابي
حازم: يمعود هي سيارة دخلي نصعد قابل شحيصير
باوعت لداخل السيارة ما بيها شي
خالد: ما شفت مشروب كلشي ماكو اصعدوا
سراج: عابت هالشكول مسوين روحهم شرفاء
صعدت انا يمو
وحازم وحسين كعدوا ورا
حسين: الله اليعلم كم مرية دايح بيها بهالسيارة
سراج: الله وكيلك كومة
حازم: دركز وسوق عدل لا تكلبنا
خالد: وين تاكلون
سراج: ابووو نؤاااس
كال حسين بعصبية
حسين: والله لو تطلع روحك مااروحلة، كلة حفلات وسكارة
حازم: دكول يا الله
حسين: اهوو انا شطلعني
سراج: اكوول حسين ليش ما تلف عمامة
نترت بي
خالد: سد حلكك يول ولا تدخل بي، عيب وحرام هالحجي
حازم: اووو مجاي اعرفك خالد
خالد: انا هم مااروح لابو نؤاس
حازم: دشوفلنا مطعم زين نتزقنب بي كلها استشرفت هسة
التفتت علية وكلت
خالد: هاا شو تحجي هيج، دحك يول لازم ما تزيغ عينك منا منا نريد نزوجك
حسين: شو ماادري شوكت العرس
خالد: ورا الفاينل وسراج مو معزوم لان ما يحب الحلال
سراج: عازمنا ع حساب ابو ويريد يسممنا اهوو
وصلنا للمطعم ودخلنا
كعدنا ع طاولة
وطلبنا اكل
حازم: شووف العالم عايشة وانا اصبح بوجوهكم ووجه ابو وديع
حسين: ع طاري ابو وديع يريد يزيد الايجار يسوي ٢٥٠
باوعت ع سراج
كال
سراج: لحد يباوعلي، الفلوس الجبتها يا دوب تكفي هدايا للمعجبات
حسين: وشنو اللي تستفاد منة من تنطي هدية؟
غمزلة وكال
سراج: حبيبي من انطي هدية تأكد ان اخذ مقابل كدامها ومو اي مقابل، شي ثكيل طبعا
حسين: اعوذ بالله
نزلولنا الاكل
وبلشنا ناكل
حازم: شلون كانت الطلعة وي اهلك؟
كلت وانا اكل
خالد: متت جوع
سراج: ليش ما نزلولك اكل؟
اشرت ع الطاولة
خالد: منا لهناك اكل، بس السم حاضر
حازم: تقصد زوجة ابوك
خالد: شوف خلي اشرحلك الحالة، ابوية كاعد هنا، وزوجة ابوية واختي بذاك الطرف وانا هنا، بس ثق بالله احسهم عائلة كاملة متكاملة ومتكتلين ع جهة واحس نفسي زيادة
ضحكت وكلت لحسين
خالد: بالمناسبة، سألني ابوي عن اثار الضرب وكتلو وكعت
حسين: وليش محجيت الحقيقة؟
خالد: لا انت تقصد تأذيني ولا انا اقصد الاذية
حسين: صاير تخوف انت
حازم: خالد خوش خالد
كملنا اكل
وحسين راح ع الكاشير وطلب اكل سفري
استغربت لان وصة ع اكل من جديد
بعدين تذكرت اختة يمكن يريد ياخذلها
بعدها طلعنا وصرنا نفتر بشوارع بغداد بالسيارة
كال حازم
حازم: ولو من رخصة حسين نريد نفتح اغاني ونغير جو
حسين: انت من الله ما خفت تخاف مني
حازم: يمعود اغنية وحدة بس
سراج: حسام منزل أغنية جديدة اسمعوها
فتحلنا اغنية "ذبي العباية"
خليت ايدي ع وجهي
وصرت اضحك بدون مااخليهم ينتبهون
وحازم يركص لورة وكل شوي ضاربني ع ركبتي
حسين: شهالتفاهة صدك تحجي
حازم لح وياية
التفتت علية وكلت
خالد: تعال دشاورك حتى تسمع
قرب راسة
كلت
خالد: تسمع ذبي العباية واللي تحبها شعرها طالع هههههاااا
صاح
حازم: سراج سدةةةة
سراج: ووجع شبيك
خالد: هههههااا مبي شي
حازم: صاعد وي بومتين يلعبون النفس، سدة يلا سدة
وصلنا للسكن
وحسين راح يتمشى للعمارة اليمنا
بقيت اراقبة
صار يتصل بعدها طلعتلة زهراء
كلبي فز وانا اباوع من بعيد
مخلية عبايتها ع راسها
ولازمتها من يم وجهها
نطاها الاكل وهي تضحك
وهو يرزلها ويكللها فوتي بسرعة
حسيتة راح يشوفني
طلعت الفون بسرعة
نطيتة ظهري
وبلشت احجي
حتى اوهمة ان هو اتصال
وصل يمي
وسويت نفسي ما منتبه علية
وكلت
خالد: اعذريني كنت طالع وي الشباب ومكدرت اجاوبج، اي اليوم فاتحت ابوية وكتلو مااريد غير وسن
صعد حسين
وانا تنهدت بتعب
ووخرت الفون عن اذني
وسن منو؟!
والله انا جذاب اصلي
صعدت فوك
شافني حازم
كال
حازم: ليش تأخرت
خالد: كنت احجي وي وسن
حازم: وسن منو؟
.....
حبيبة: ماادري
عطاء: اصبري هسة نفهم
صعدت زهراء
واحنا ننتظرها بباب الشقة
شايلة بأيدها علاكة وتضحك
كلت
عطاء: شبيج تضحكين
زهراء: فوتوا هذا حسين متنغصلي بالأكل لان طالعين لمطعم
حبيبة: ياااا والله كلي حازم عازمهم هذا الانباري ع عشة
عطاء: وحسين وياهم؟!
حبيبة: اي شنو الغريب
عطاء: همة مو تعاركوا؟
ضحكت حبيبة وكالت
حبيبة: عيني جذابين
عطاء: واضح جذابين
جبت صينية وخليتها بالكاع
طلعنا الاكل وبلشنا ناكل
زهراء: ضوية وين؟
عطاء: متقبل تكعد نايمة
زهراء: هاكم ضمولها
طلعنالها اكل ع جهة
صارت تضحك زهراء وتكول
زهراء: مو شافني حسين هيج؟ صار يكلي يا ادبسزز غير تلبسين حجابج عدل عبالك فقمة وطالعة من الماي
حبيبة: ههههههههه
عطاء: انا لو بدالج اطلع بالتراك بس اخلي شال ع راسي وهو ليل منو يشوفني
زهراء: والبواب الواكف برا مو زلمة؟
عطاء: هههههه والله سوالفج حلوة
كملنا اكل
وكعدنا ندرس
ما كدرنا ننام
باجر كلنا عدنا امتحان
اباوع ع ضوية تدرس وايدها ترجف
ووجها اصفر
حاولت انسيها بس ما تنسى
بالنهاية اللي صار مو قليل
للصبح بدلنا وطلعنا للدوام
شفت حسين وتجاهلتة
صح فز كلبي
لكن بلشت ادرك حجم الاختلاف بينا..
كملنا امتحان
اباوع لروناك تتصفن
كعدت يمها وكلت
عطاء: روناك انتي بخير؟!
جاوبت ببرود
روناك: عطاء اكو مكان يمكم بالسكن؟
عطاء: اكو طالبة تريد تسكن يمنا؟! منو هي
باوعتلي والدموع تارسة عينها
روناك: اني
فتحت عيوني مصدومة
عطاء: خير روناك شبيج
روناك: احس نفسي مخنوكة عادي نطلع منا؟!
عطاء: تمام امشي للسكن
روناك: لالا مااريد السكن، اريد مكان مبي ناس مبي حيطان
اخذتها وطلعنا
كعدنا بحديقة
اجت ورانا حبيبة وزهراء
حبيبة: هاي شبيكم صار كومة اصيح عليكم مسمعتوا؟!
عطاء: روناك تعبانة ورادت نكعد هنا
حبيبة: روناك شبيج؟!
صارت تبجي
اخذتها لحضني
زهراء كالت
زهراء: بنات مو راهمة كعدتنا هنا امشوا للسكن ونفتهم شبيها
كعدت حبيبة كدام روناك
ولزمت ايدها
حبيبة: احجيلي احد مأذيج
كالت وهي تبجي
روناك: اجة سكران للبيت وهو يكول الج مكان ببغداد وبالبيت وبكلبي
عطاء: شنووو!!
حبيبة: اصبري عطاء روناك احجي من البداية
بلشت تحجيلنا
واحنا مستغربين ومصدومين من اللي نسمعة
روناك: الليل كلة ما كدرت انام خايفة، ع الرغم هو ما لحكني ولا سوة شي واليوم الصبح طلعت من وكت حتى انهزم منة
عطاء: انا اكول اتصلي بأهلج واحجيلهم كلشي
جاوبتني زهراء
زهراء: فكري بمنطقية اكثر، ابوها راح يتعارك وي عمتها وتسبب مشاكل وتتفاشل وي الناس اللي هي ساكنة يمهم
عطاء: خو ما تضيع نفسها، انتي ضامنة هذا ما يعتدي عليها؟!
جاوبت حبيبة بهدوء
حبيبة: مراح يعتدي
عطاء: ومنيلج هالثقة
حبيبة: الولد محترم بس اهلة هيلك، بعدين لو يريد يعتدي ترا هي صعدت الة برجلها
زهراء: لا انتي منطقية ولا عطاء منطقية
كالت حبيبة
حبيبة: انتو مستوعبين ان عبدالله يحبها
كالت زهراء بأنزعاج
زهراء: دكافي حبيبة، شهالنقص العاطفي العندج كلشي شفتي وكلتي حب
حبيبة: برأيكم انا كلامي غلط ومو منطقي بس انا الوحيدة اللي كلامي صح، السكران يحجي عن اللي بداخلة وانا اشك هذا مو ابن عمتج
كلت بأنزعاج
عطاء: لاااا حبيبة هيج زودتيها
مسحت ع وجهها وكالت
حبيبة: هذا الوجه جاي تشوفوا؟ اتفلوا بوجهي اذا طلع كلامي جذب، عبدالله يحبج لا اصلا مهووس بيج ومراقبج من زمان وهو مو ابن عمتج
زهراء: جا شنو قرابتة للعائلة؟
حبيبة: عبدالله ابن محمد بس مو ابن ناز
صفنت ع كلامها
وتذكرت كلام عمتي ع زوجها
كلت
روناك: عمتي تكول عن زوجها ان هي تندمت تزوجتة بس انا مااشوف اكو شي يستدعي الندم
حبيبة: حتى الجلبة تحن ع طفلها بس عمتج ما تحن عذرا للتشبيه بس عمتج مو امة وتثبتلج الايام
كالت زهراء بأستغراب
زهراء: وهو منين جايب هالمعلومات؟ قابل يشتغل بالاستخبارات؟
حبيبة: ترا روناك ما مخلية شي ما ناشرتة ع الفيس مالتها ويكدر بكل بساطة يبحث عنها ويعرفها ويعرف كل تحركاتها من نشرها تخيلي هي ناشرة جنطة سفر وكاتبة
"To Baghdad" ويمها كلب مكسور من جاية لهنا واصدقائها معلقين الها راح نشتاقلج هاي شنو معناها؟؟
كلت بأستغراب
عطاء: وانتي شمدريج بهالحجي
حبيبة: طلعتلي بأقتراحات الفيس وشفت صفحتها، وشفتة هو متابعها وع فكرة هو غني وعندة فلوس هواي وحتى السهرات مالتة مال طبقة برجوازية
زهراء: استغفر الله
كالت حبيبة بأستهزاء
حبيبة: بس هو يعيل بصراحة
عطاء: شلون
حبيبة: لو امي امي اقصد لو امي امة ااا
زهراء: لوو امة امج فضينا عاد
حبيبة: اييي لو امة امي بدل مااشرب عرك اشرب قاصر واموت شهالعيشة الزفرة هاي
كالت زهراء
زهراء: بابا هذا كلامج معناه انتحار والانتحار حرام
حبيبة: تعبير مجازي، ششايفتني منتحرة؟
عطاء: غيروا الموضوع وفهموني شلون هسة
حبيبة: حبي وراح يعيشج عيشة الملكات وطز بأهلج وعمتج
كالت روناك بعصبية
روناك: حبيبة هي مو مال شقة
زهراء: هسة فهمت شنو معنى ان للانسان نصيب من اسمة، يعني ع كد ما اسمها مليان حب هي هم تشع حب
عطاء: انا اكول تعالي انتقلي يمنا
حبيبة: ماانطي سريري تفرشين دوشك وتنامين بالكاع
كالت زهراء بأستغراب
زهراء: بنات بنات، ذاك النزل من السيارة مو نفسة!!
باوعنا كلنا بصدمة
واباوع لروناك وجهها صار اصفر
هذا شعندة لاحكها لهنا؟
وماذا بعد؟!
