رواية فصلية ولكن الفصل السادس عشر بقلم سوزان ليث
خالد: جنت بس اريدها تهتم بيه كمت اطلب منها شغلات حتى اخلي تتنرفز وتحاجيني بس هي ماحجت شي لو تعرف شكد مشتاق لحضنها وريحتها قبل مانام كتلها .. باجر حضري نفسج بالعشره نطلع
حياة: وين
خالد: شعليج انتي حضري نفسج ومن توصلين تعرفين
حياة: ماروح لعد
خالد: يولي شبيج حتى امي حتجي ويانا
حياة: اي وين
خالد: باجر من نوصل تعرفين وعفتها ونمت
حياة: هذا شبي من صدك هذا تصرفاته القياديه اتخليني اعصب منه
طلعت على خالتي ردت اعرف وين دياخذنا بس خاله كالت مادري ومنطتني جواب اصلا مثل ابنها
ثاني يوم كعدت على صوت خالد يصيحني
خالد: حياة كومي يله ساعه بالتسعه
حياة: فتحت عيوني شكو
خالد: مو كتلج باجر نطلع بالعشره كومي عاد
حياة: اخذتلي صفنه 😕 كمت رحت غسلت وطلعت كتله غير اعرف وين حروح حتى اعرف شلبس
خالد: لابسي احلا شي عدج
حياة: اي حلبس بدله 😒
خالد: اذا عدج لبسي 😉
حياة: طلعت هدومي ودادخل للحمام ابدل جان يكلي
خالد: متبدلين هنا ترى كلشي شايف 😉
حياة: لتافيت عليه ونطيته نظره 😒 عفته ودخلت بدلت وطلعت هو جان مو بالغرفه بس الغرفه متروسه عطره خرب يغسل بي
عاد خليت مكياج خفيف بالبدايه بعدين كمت اطوخ بي بس هيج حتى اضوجه ولفيت شالي وكملت وطلعت شفت خالتي مكمله
صباح الخير
خالة: اصباح النور ها كملتي
حياة: اي خاله
خاله: ماتتريكين
حياة: لا ماشتهي
امل: شنو هالكشخه عيني
حياة: انتي هم حتجين ويانا
امل: طبعا هو يصير بدوني
حياة: غمزتلها وين حروح
امل: 😁 بعدين تعرفين
حياة: ادري شنو سر هو شنو سالفتكم صدك جذب
امل: ههههههه لا بس ابويه لو عرف كايلتلج يكتلني والله
حياة:اي شون تخافين عساس
امل: هههههه ارجف
خالد: ها كملتو يله ترى مظل وكت عود كلتلكم بالعشره
خالة: اي يمه كملنا منو حيروح ويانا من الولد
خالد: يمه حسين حيجي يله امشو بره منتظر
حياة: رحنا صعدنا بسياره وجان خالد ديسوق وحسين بصفه واني وامل وخاله ليوره وهذا خالد كلسع يباع عليه بالمرايه ويضحكلي
يربي شبي هذا
المهم يعني هو وامل اكثر اثنين جانو فرحانين بطلعه اني طبعا صح مسويه نفسي ممهتمه اعرف وين رايحين بس جنت حموت واعرف
ظلينا نمشي وخالد اجه اتصال بس المهم سمعته يكول اي شويه ونوصل انت وصلت اي اي هسه عشر دقايق ونوصل
يربي منو هذا نوب الي دينتظرنا وكلسع اباع على امل اكلها دكولي وين حروح
امل: هسه نوصل وتعرفين 😁
حياة: باعي اذكرج بيها عود بسيطه
امل:😁
وصلنا لبنايه المهم وكفنا سياره بالكراج وونزلنا فدنعبر الشارع خالد كلي
خالد:عرفتي احنا وين
حياة: لا وين
خالد: دقري هاي
حياة: قريت لافته ظليت صافنه شعدنا هنا
خالد: دخل ندخل
حياة: يعني من عرفت اني بالمحكمه ظليت ماعرف شكو كومه افكار جايتني ظليت بس اريد اعرف ليش احنا هنا المهم طبينا ظلينا نمشي باوعت ابويه كاعد على مسطبه وبصفه عمتي شفتهم طبعا بلا وعي رحت يمهم ظليت متفاجئه ذوله شديسون هنا
ابويه شافني جان مبين عليه فرحان كلش لحد الان اذكر شكله شون جان فرحان حبيبي رحت سلمت عليهم وخالتي سلمت على ابويه وعمتي وراها حسين كال
حسين: هسه خل اشوف الولد مال البارحه كال افوتكم بسرعه
حياة: يابه احد يفهمني شكو ترى اني مثل الاطرش بزفه
طبعا الكل يضحك واني اباع عليهم بالي شي بس مداكدر اصدكه
خالد: كلتيلي بعد ماامن بيك
حياة: ظليت اباع عليه عزه شبي هذا يحجي كدامهم
خالد: وكلتيلي كمت اخاف منك
حياة: 😕
خالد: ملكيت غير هذا الحل حتى اثبتلج اني رايدج ويايه العمر كله
حياة: شنو يعني
حسين : يله يله مادام ماكو احد عد القاضي
حياة: اني باوعت على خالد بنظره شنو لزم ايدي وكلي امشي
عمتي ام محمد: يابه دكلولها وجهها صار اصفر سوده عليه هسه حتى القاضي عبالها مخصوبه
حياة: خالد اجه يمي ودنج راسه كلي
خالد: ملكيت غير هذا الحل حتى اثبتلج اني شكد احبج
حياة: يعني شنو حتثبت عقد زواجنا بالمحكمه
خالد: اي يله امشي
حسين : يابه كلكم حدخلون ترى ميقبل بس همه يدخلون
حياة: متصورون شكد جنت فرحانه بهذا اليوم مجنت ابد ابد متوقعه يجيبني للمحكمه حتى يثبت زواجنا بوكتها حسيت خالد انسان ثاني من صدك ماعرف حسيته يحبني ويخاف عليه ويريد بس يرضيني حتى لو هذا الشي سواله مشاكل دخلنا للقاضي القاضي جان كلش حباب سئلني على اسمي واسمه وظل يشاقينا وره مكملنا طلعنا من غرفه القاضي جان عمتي طش جكليت علينا ابويه اجه بوسني وكلي هسه رتاحيت
عمتي وخالتي وامل كلهم باركولي خالد اجه عليه باس راسي كلي هسه انتي مرتي رسميا
جنت فرحانه كلش بحيث امشي واوزع ابتسامات للكل
وراها خالد كال روح مطعم نتغده فودانا مطعم طبكنا ميزين وكعدنا كلنا حتى ابويه وعمتي بيومها ابويه كعد بصفي من جهه ومن جهه ثانيه خالد ظليت اباع عليهم من صدك حسيتهم سندي بالدنيا ومثل ماابويه ميرضى عليه احد يقهرني ويكسرني بهذا اليوم خالد ثبتلي حبه الي وميريد احد بعد يسمعني كلمه
طلبنا غده فطلبت كباب اني وخالد هم بس خالد يعوف ماعونه ويجي ياكل من ماعوني وكلسع شامرلي حجايه بذني بس جنت متونسه كلش واكيد وره مكملنا ابويه وخالد عراك على منو يدفع الحساب ابويه يكله اني وميصير وخالد يحلف وميصير بالحرام اني وظلينا هيج لحد ماابويه بزع من خالد وعافه يدفع
عمتي ام محمد : والله الا شويه واكوم اني ادفع الحساب صارلهم ساعه هيج
خالة: ههههههه بعد خالد منو يعانده من يكول كلمه يسويها يسويها
حياة: كملنا غده وراها خالد كله لابويه تعال ويانا للبيت بس ابويه مقبل وكله غير مره بس خالد مرجعنا للبيت ودانا للكونيش كعدنا هناك بس خالتي كالت تعبت واريد ارجع عاد كمنا رجعنا للبيت
ايه اجتي باركتلي وساره هم جتي باركتلي بس جاوبتها من وره خشمي
وطبعا الي عرفته علي مقابل على خالد لان ثبت زواجنا بالمحكمه بس خالد لا صمه على حلكه واصلا خالدمن يكول شي الكل ينفذه
المهم دخلت للغرفه وظليت واكفه عالمرايه اباع على نفسي ومبتسمه دخل خالد عليه
خالد: ذيج الفتره الفاتت واني افكر شون اخلي حياة ترجع ثقتها بيه وملكيت غير حل اثبت زواجنا بالمحكمه حتى تعرف اني شكد احبها واريدها صح اني من البدايه جنت افكر بهذا الشي بس هسه اجه وكته وحتى اخليها يمكن تامن بيه وحتى بعد محد يكدر يسمعها حجايه لان الكل حيعرف صارت زوجتي فعليا
لما كلت لامي على الي دافكر بي صورت حتعارض بس فرحت كلش وكالت ياريت وحتى امل جانت كلش فرحانه بهذا الشي بس كلتلهم اسوي لحياة مفاجئه ولحد يكللها وفعلا وصلنا للمحكمه وهي متعرف وين رايحه واني جنت مخابر ابو حياة وكلتله كلش فرح وظل يشكرني وتفقت وياه حتى يجي للمحكمه
لما عرفت حياة جان وجها يضحك وهذا الي جنت اريده اريدها تبقى فرحانه ويايه مو خايفه مني وماعدها اي ثقه بيه هي مالها اي ذنب بالي صار هي بنيه ومن حقه تفرح وتصير حالها حال باقي البنات
دخلت على حياة للغرفه لكيتها واكفه تباع على المرايه رحت وكفت وراها وحضنتها وطبكتها على صدري ونزلت راسي على اذنها
.. احبج
حياة: ظليت بتسمه واباع عليه بالمرايه
خالد: ترى بعد المفاجئات مخلصن
حياة: ههههه عزه بعد شنو ترى ممتعلمه على هاي التصرفات
خالد: وانتي شفتي بعد حياتنا حظل مفاجئات بس مفاجئات حلوة
حياة: نداريت عليه وخليت ايدي على ركبته .. خالد
خالد: عيونه
حياة: شكرا
خالد: على شنو
حياة: لان اليوم جنت كلش فرحانه شايف من صير فرحتك من كلبك طالعه اني اليوم جنت فرحانه من كل كلبي شكرا لان فرحت ابويه متعرف جان شون شايل همي وشون جان مهموم اليوم انت ريحته
خالد: حياة تعرفين حتى اذا هذا الشي مصار اني احبج واريدج اني سويت هذا الشي حتى اكول للعالم كلها ولكم هاي مرتي محد يحجي وياها كلمه بعد
حياة: حضنته حضنه حسيتها حضنه الامان يمكن اول مره احسها بس من صدك حسيت خالد سندي وظهري
لليل واني افتر بالبيت واحس نفسي فد شخصيه واريد بس زينه وايات يعرفن لو يجن حتى اكللهم
صح هذا الشي مو فد شي يعني ياما ناس عاقده بالمحكمه وينفصلون يعني هذا مو فد شي بس ويايه جان هذا الشي يختلف لان الكل يكول عليه فصليه والي يكلي ديه هواي جنت اسمع حجي كل ميجون عمات خالد وكرايبه جنت ماكدر افتح حلكي بس هسه لا اني مرت الشيخ خالد😎
لليل جنا كاعدين بالهول جان حسين فات على ايه كلها تعالي اريدج راحت شويه واجتي ايه خلت طبله كدامي وكدام خالد وشويه واجتي جايبه كيكه خلتها عالطبله دخل حسين كللنا ميصير زواج بدون كيكه
كلش فرحت هو حسين من كيفه رايح جايب كيكه وكاتب زواج سعيد
حياة: شكرا حسين والله كلش فرحت
حسين : لايابه والله لو بيدي اجيبلكم مزيقه
خالد: زين شنو حنظل نباع عليها
امل: بابا اوكف الله عليك خل اجيب تليفوني اخذلكم صور
خالد: ولج ماشبعتي صور من صبح طكطكينا صور
امل: بابا خلي ايدك على حياة يله 📱
حسين: ديله عساس انتي مصوره
امل: احسن منك
حسين: وانتي قبل يومين يله عرفتي تليفونج بي كامره اماميه
امل: بابا صيح بعمو حسين
خالد: ديله عاد اخذينا معليج بي
حياة: ظلت امل تاخذنا صور بس خالد ابد مكللها كافي جان خالها على راحتها
حسين: بلازحمه صور شوكت تطلع
امل: باجر ان شاءالله
عمو حسين جان خليت حرف بابا وحياة عالكيكه حتى هاي متعرف بيها
حسين : باع الفيكات
بعدين كطعنا كيكه واكلنا بس علي وساره جانو بغرفتهم وخوبن علي كالب خلقته حتى مباركلي
المهم اكلنا كيك وشربنا عصير وظليت اني وامل نتفرج صور بعدين حسين وايه صعدو لغرفتهم فخالتي صاحتني لغرفتها
فرحتلها بكلبي كلت خالتي كل مصيحني وحدنا تحجيلي شغلات تخجلني بيها
فدخلت عليها جانت كاعده عالجربايه كالت تعالي يمه كعدي بصفي
رحت كعدت يمها
خالة: يمه هسه انتي صرتي مرت خالد كدام الدنيا كلها وبعد ترى محد يكدر يحجي كلمه ويه مرت الشيخ والله خالد من كلي كلش فرحتلج لان انتي تستاهلين كل الخير
حياة: تسلمين خاله
خالة: وترى بعد كافي انتي وخالد طولتوها وعرضتوها هسه بعد ماكو شي يمنعكم حتى ياخذج
حياة: والله عرفت حدكلي هيج.. ظليت مبتسمه واكللها الله كريم
خالة: كون الله يفرحني بيكم وجيبنا وليد يشيل اسم خالد بجاه ال البيت
حياة: ان شاءالله
خالة: هاج يمه هاي ادري يمكن حدكليلي هاي سوالف قديمه بس يمه مايصير عدنا الا هيج
حياة: انطتني قماش ابيض مثل الوصله نوب ظليت مصدومه عزه يعني هالمره حصرتني خاله
اخذت منها الوصله منا وبطني كامت تلويني وتوجعني منا
وظلت تحجي وتعلمني وصتني نصلي قبل منبدي وكومه سوالف من صدك جانت مثل ام الي
طلعت من غرفتها رحت لغرفتي ظليت ماعرف شسوي طلعت قميص نوم اباع عليه عزه بس اللبسه يعني اكله لخالد يله تعال اخذني لا والله ماكدر عزه استحي
ظليت شويه سبحت ولبسته وتعطر وتحضرت بس جانت مشاعري مختلطه خجل وخوف وكلشي جنت كاعده جربايه انتظره يجي بس ماكو ونوب كلسع واحس باب حتنفنخ وبطني تلويني
خالد: دخلت للغرفه شفت حياة كاعده متحضره الي كانما عروسه متحضره لعريسها ظليت اباع عليها واني اتقرب منها كعدت بصفه
..
حياة: يمه من دخل للغرفه عبالك اول مره نصير وحدنا بغرفه ظلت بطني توجعني كعد بصفي
خالد: الله بالخير
حياة: الله بالخير
خالد: شونج
حياة: زينه
خالد: لزمت ايدها بستها بعدج خايفه مني
حياة: لا
خالد: اكيد مخايفه مني ابد
حياة: يعني خوف عن خوف يختلف
خالد: ههههه مو كلت يدج ثلج صايره طلع من الخوف
جريتها حضنتها وبست راسها
حياة: خالد
خالد: عيونه
حياة: اموت عليك
خالد: اويلي يابه شسوي هسه اني ولج اعشق كلشي بيج
حياة: خالد علي ليش ضايج لان زواجنا صار رسمي
خالد: معليج بي انت هو يومين ويرجع ترى هذا عماتي يحركوا عباله مادري
حياة: خالد يعني محيصير مشكله وياك لان زوجنا
خالد: ولج منو الي يسوي مشكله والله افرك حلك اي واحد يحجي ويايه كلمه بعد ماله حق اي شخص يحجي ويايه كلمه
بعدين عكب باجر نطلع لبغداد
حياة: صدك شنسوي
خالد: مو كلتلج مفاجئه اصلا مردت اكلج على روحه بغداد بس كلت خطيه حتى تحضر هدومها
حياة: هههه وشكد نظل
خالد: ماعرف يجوز يوم يومين شهر شوكت منمل نرجع
حياة: هههه زين وين روح لبغداد يم بسمه
خالد: وشعلينا بسمه رايحين لبغداد حتى نظل سوه شايفه اذا رحنا لبسمه يجوز ماشوفج بعد من وره جهالها
حياة: هههه يعني خالتي وامل ميجون
خالد: لا بس اني وياج
حياة: بس خاف امل ضوج
خالد: لا مضوج بعدين هي تدري وهي كلتلي ماجي روحو وحدكم
حياة: يعني بس اني وياك 😊
خالد : اي😉
بعدين شكو لابسه هذا الثوب خفيف كومي بدلي لابسي شي ثخين بارده الغرفه
حياة: خرب حظي الفشله الفشله خرب كله من وره خالتي .. اي حكوم رحت ركض طلعت بجامه ورحت للحمام بدلت وطلعت لكيته مدد واني جنت خاله الوصله جوه المخده هو موخرها وخالها عالميزه عزه شفتها خرب حظي هاهيه افتهم افتهم شريد باوعلي كلي اليوم تنامين هنا وياشر على صدرة رحت يمه واني الفشله شكبرها عزه بعيني ماعرف فشلني مدري مفتهم اني ليش لابسه هيج رحت يمه ومددت نومني على ايدة جان يكلي
خالد: اعرف بيج فرحانه اليوم مردت اسويلج شي او اتقربلج خاف باجر تتندمين ودكولين لو ممسويه هيج ويجوز تحمدين الله لان مصار شي
حياة: عزه ديذكرني بكلامي من كلتله احمد الله واشكره مصار شي بينا
خالد زعلان لان حجيت ذيج المره هيج
خالد: اعرف جنتي مقهوره مني مزعلت بس اريدج سوين هالخطوه وتكونين مستعده الها مو لان عقده بالمحكمه حسوين هيج
حياة: ظليت ساكته .. خالد عمري محتندم على شي اسويه وياك
خالد: بستها من راسها تعرفين شون كامش نفسي عليج فلتحجين هيج حجي حتى لا اهجم عليج
حياة: ظليت ساكته
ظلينا ليل كله نسولف ونحجي وعبالك صارلنا سنين مزاعلين بكلشي حجينا كومه مواضيع حجينا بيها بيها الي ضحك وبيها الي تقهر وبيها الي نتعاند بيها اني وياه كومه كلام
خالد: نامت حياة على ايدي ظليت اباع عليها وممصدك نفسي اني هيج احب انسان لهدرجه هاي لدرجه مستعد اسويله اي شي حتى يرضيه
ثاني يوم كعدت فجنت داشتغل اجه لخالتي اتصال بس خالتي ظلت تصيح وتحجي بتليفون خاله مقبلت تحجي شي بس اكيد عرفت الخبر من امل لان مستحيل تعوف بيبيتها ومتعرف فعرفت منها زينه مخابره وكايمه تحجي على فوك مايذبها ويتركها راح زوجها بالمحكمه وهاي جزاتها لان طردتني فوك ميكسر راسها وحجي حجي كومه وعاف بت عمه وديركض وره هاي ام سحور فد حجي يعني كلش يغث بس اني جنت بتسمه من دتحجيلي امل لان مادام هيج دتحجي يعني ضايجه ومقهوره واني هذا الي اريده كتلها لامل شبسرعه وصل الخبر لزينه زوجنا
امل: لو علي لو ساره
حياة:اوي عوفج منهم باعي ليش متقبلين تجين ويانا باجر
امل: يمعوده ماريد انتو عرسان ورايحين اني شكو
حياة: يعني مو علمود باجر جمعه 😉
امل: لا والله اصلا كلي ماجي باجر
حياة: عينج بعيني
امل: اهووو اي واني انتظر جمعه جمعه حتى يجي ترديني اعوفه واروح لبغداد
حياة: اي اعترفي من البدايه مو دكليلي عرسان ومدري شنو
لليل جنت بالغرفه جان خالد يدخل كلي
خالد: ها حضرتي غراضج ترى باجر من صبح نطلع
حياة: لا بعدني ليش ساعه بيش نطلع
خالد: نطلع فبسته حتى نوصل من وكت
حياة: زين انت شتريد اخذلك ملابس
خالد: دجيبي جنطه جنت اخذها ويايه لبغداد تكفينا اثنينا
حياة: رحت جبتها وجيت المهم طلعت اني لابستين مال طلعه وخليتها واخذت بجامه ويايه وشغلات هو يباع عليه واني اصفط الهدوم واعدلهن بجنطه
خالد: بس ذني حتاخذين
حياة: اي ليش ميكفن
خالد: لا اذا احتاجيتي شي مناك نشتري بس جنج نسيتي هذا الجنتي لابسته البارحه مخليتيه 😉
حياة: ظليت اعدل بجنطه وبتسمه عرفته يقصد قميص النوم
عاد رحت طلعت واحد خليته وهو طلع ملابسه هم خلاها فكملنا غراضنا كلها .....
