رواية السكن الفصل السابع عشر بقلم غدير الحيدري
مساء الخير
عظم الله اجوركم بقدوم شهر محرم الحرام
واحسن الله عزائكم
والصلاة والسلام على رسولنا محمد وال بيته الطيبين الاطهار
قراءة ممتعة
•┈┈┈••✿❂✿••┈┈•
اصبحت افهم نزار قباني
حين قال في قصيدته المشهورة
(وعدتكِ أن لا أحبكِ، ثم امام القرار الكبير جبنت)
انا الجبان في عشقي
وانتِ وحدك من تستحقين هذا الحب
(خالد)
•┈┈┈••✿❂✿••┈┈•
طلعت من الغرفة
صارت بوجهي عطاء
كلت بخوف
زهراء: عطاء انااا خايفةةة
عطاء: شبييج زهراء شكو؟!
زهراء: مااعرف اجانيي حسين وتعاركت وياه حجيت كلام يمكن قهرة
عطاء: اي؟!
لزمت ايدها وانا ارجف
زهراء: هسة اتصلت علية، ح. حتى اعتذر منة جاوبني عادي بعدها ماادري شصار من انضربت الرصاصة سمعتة يصيح
عطاء فتحت عيونها مصدومة
عطاء: شكان يكول؟!
زهراء: خالد خالد
خلت ايدها ع حلكها
دمعت عيوني
زهراء: بعدين صار يصيح اسعااف ومستشفى وصارت هوسة وانسد الخط عطااااء شسوووي
كالت بخوف
عطاء: معقولة هو قتلة؟؟؟
زهراء: لالا صوتة مو مبين هيج
عطاء: الشارع مكلوب كلب راح انزل واشوف شكو
راحت عطاء
وانا بقيت ارجف بالشقة
احس كلبي مقبوض وخايفة
بعد شوي صعدت
رحت اركض الها
زهراء: هااا كولييي شصاير
عطاء: مااعرف جاي يكولون موكب سياسي وطالب مكتول
ضربت ع وجهي
زهراء: مكتووول يمةةةةة صدك مكتووول
عطاء: ماادري هوسة وهسة اجت الشرطة وفرقت العالم
زهراء: شلون هسةةة فهميني؟؟
عطاء: اتصليي ع حسين وافتهمي منة
صرت ارجف اكثر
اتصلت ع حسين
ما جاوبني
الخوف زاد بكلبي
اتصلت مرة ثانية رد
هوسة يمة
زهراء: الووو ها حسيين
حسين: هاا
زهراء: شنو هاي الهوسة بالشارع، شصار انت خو ما بيك شي
حسين: ماكو شيي خلاف بسيط بيناتنا وولد ويانة جتة رصاصة شدخ بأيدة
زهراء: يعني ما بيكم شي؟؟
اسمع واحد يصيح يمة
حازم: يا عاااار يا طايح الحظ ولككك هذااا مثل اخوووك
كال حسين بسرعة
حسين: لتخافون ماكو شي باي باي
سد الخط
باوعت ع عطاء
عطاء: ها شكال؟!
زهراء: يكول خلاف بيناتهم وولد وياهم مضروب والرصاصة شدخ بأيدة
عطاء: معناها خالد مضروب والسبب سراج الكلب
زهراء: سراج!
عطاء: الناس يكولون سياسي منو سياسي غيرة؟!
زهراء: ماادري هسة تجي حبيبة ونفهم
بهالاثناء دخلت حبيبة
عيونها مليانة دموع
وتمشي ع كيف
رحت اركض الها
زهراء: حبيبة لتخافين هذا المضروب واحد ثاني مو حازم مو هو
اباوع الها تبجي
وما تصدر اي ردة فعل
اجت عطاء تركض
لزمتها وحبيبة فجأة انهارت بحضنها
وصارت تبجي بقوة
اول مرة اشوفها هيج
كعدت يمها وكلت بخوف
زهراء: حبيبة حبيبة احجي عفية شبيج
عطاء: يمة اسم الله حبيبة شكو
صارت تضرب ع وجهها وتكول
حبيبة: انفصل انفصل حازمم انفصل بسببيييي
عطاء: شنوووو! شجاي تحجين
لزمتها وكلت
زهراء: حبيبة شنو هالكلام؟! احجيلي شصاير
باوعتلي وهي تبجي
حبيبة: اتهمني يكلي خاينة، يكلي ما تستاهلين حبي، عافني حازم عافني
اخذتها لحضني وهي تشهك
باوعت لعطاء وعيوني مدمعة
سحبتها مني عطاء
واخذتها للمغسلة
غسلتلها وجهها وصارت تصيح
عطاء: اصحييي شبيج؟! اصحييي
حبيبة: عطاء انا والله مااريدة ينفصل عطاء انا احبةة
عطاء: ادري بس احجي الصاير وخلي نتفاهم
كعدت بالكاع
وصفنت
......
بعدة حازم عني
وهو يكول
حازم: وخر ايدك عنهااا
كال معتز بعصبية
معتز: انت منو؟ وبصفتك شنوو وتبعدني عن حبيبتي!
باوعلي حازم والغضب مدفون بداخلة
حازم: حبيبة منو هذا شنو هذا الخريط الجاي اسمعة؟
كال معتز بعصبية
معتز: كوليلة منو انيي كوليلة ع ايام حبنا واتصالاتنا وشلون نلتقي سوة
فتحت عيوني مصدومة
وحازم ضربة بوكس
وبلشت العركة!
الطلاب كلها تباوع
وتدخلوا الامن فاككوهم
صارت هوسة جبيرة
اخذونا للعمادة
ترزلنا هواي صار حجي هواي مو حلو بحقنا
وقرروا يفصلون حازم!
حاولت احجي وي الدكاترة
وتوسلت بيهم
ووعدوني ان يساعدوني
طلع حازم ولحكتة
اصيحة وما يرد
لزمت ايدة
ترك ايدي وعيونة حمرة من الغضب
ضغط ع معصم ايدي
وكال بعصبية
حازم: ليش ما كلتيلي عندج علاقة سابقة ها؟!
حبيبة: بس اسمعني، انا مااريد تفهمني غلط
حازم: عاجبج فضيحتنا هسة؟! فرحتي من انفصلت اسبوع بسببج؟! فرحتي من راحت علية الامتحانات؟!
دموعي توكع
وانا اتوسل بي
حبيبة: حازم والله انت فاهم غلط
تقرب مني وكال بغضب
حازم: انا ما اطيقج، ومن اليوم هذا حدنا انتي بطريق وانا بطريق انا ابن اوادم ما تليق بية خفيفة وام علاقات مثلج
وعافني وراح..
......
عطاء: هو هيج كلج؟!
صارت تبجي وتكول
حبيبة: اي اي بس هوو مجروح مني وكال هييج
جريتها من زندها
وكلت بعصبية
زهراء: اللي يكلج اليوم خفيفة وانتي مو ع ذمتة باجر عكبة يكلج الطفل اللي ببطنج مو ابني من تصيرين مرتة
فتحت عيونها مصدومة
عطاء: من اليوم اعتبري صفحة وانطوت بحياتج، روحي احجي وي الدكاترة حتى ما ينفصل، سوي اللي عليج وبس ومن بعدها لا تعترفين بي ابد
زهراء: وهذا معتز الكلب
صارت تبجي وتكول
حبيبة: ما يهمنييي ما يهمني انا اللي يهمني حازم وطلعت ما اهمة
باوعتلها بحزن
حالتها تكسر الكلب
حبيبة حبت حازم هواي
بس حازم ساء الظن بيها
راحت لسريرها
غطت نفسها وصارت تبجي
طلعت ضوية من الغرفة
خايفة ووجها اصفر
كالت
ضي: بنات شكو، شبيكم ليش تبجون وشنو صوت الرصاص هذا؟!
كالت عطاء بعصبية
عطاء: الكلب سراج حبيبج، السياسي الماكو منة بنظرج، هجم ع صديقة وضربة طلقة مستوعبة؟!
فتحت عيونها مصدومة
وخلت ايدها ع حلكها وراحت تتقيأ
كلت
زهراء: بس حسين ما كلي سراج السبب
عطاء: صدكيني هاي الدكات الناقصة ما تطلع غير من سراج
دخلت للغرفة
حاولت احجي وي حبيبة
لكن كانت تبجي
انقهرت عليها هواي
كعدت ع سريري
وباوعت لعطاء
كانت كاعدة بالبلكون وصافنة
تذكرت كلام حسين عنها
الطير المكسور جناحة هي عطاء
صارلي اشهر وياها وما انتبهت
ماكدرت اشوف حب عطاء لحسين
انا وحسين فعلا اخوة
ونتشابه هواي
ثنينا ما كدرنا نلمح هذا الحب
وحسين عاف الدنيا كلها
وراح ع ضوية!
فعلا المظاهر خداعة
طلعت برا
كعدت يم عطاء
صارت تمسح بدموعها
كلت
زهراء: ليش تبجين
كالت بخنكة
عطاء: ابجي نيابة عنا كلنا، وابجي ع كلشي
دموعها توكع بغزارة
كالت
عطاء: ابجي نيابة عن كل انسان احتاج امة يمة وما لكاها، ع كل حلم ضايع، ع كل امنية مقتولة، ع كل بنية حبت ووثقت وضيعت شرفها بغباء، ابجي ع سوء الظن بين كل ثنين، ع الحب اللي يموت قبل لا يلكة فرصة حتى يكبر، ابجي ع كل بنية تدوس ع كلبها ومشاعرها حتى ترضي اهلها ومبادئها، ابجي ع اللي مو كادر يحب بأمان
كالت بخنكة
عطاء: ابجي ع اللي تحب من طرف واحد وما تحصل نظرة، ع اللي خلصت عمرها وهي مالها وجود، ع الانسان الضايع بالحرام ومضيع الوياه، ع الغبي المايكدر يختار صح، على اللي تغربت واجت لمكان مو مكانها، وع المخدوع عمرة كلة، ع اللي اهلة موجودين وعاش عيشة اليتيم
اشرت ع نفسها
وشهكت
عطاء: ابجي عليكم وعلية
اخذتها لحضني وهي تبجي بقوة
صرت ابجي وياها
وهي تكلي بخنكة
عطاء: زهراء تعبت والله تعبت، زهراء احب الكل ومحد يحبني، زهراء اهلي ما يميزوني، انتو ما تشوفوني ضوية صديقة عمري، اختي واعز من اختي ما تسمعني، تتهمني بالغيرة منها
صرت امسح بدموعها
كالت بغصة
عطاء: سويت كلشي حتى يشوفني انعمت عيونة من يمي وشافها وما شافني
كلت وانا ابجي
زهراء: غبيي اخوية حسين غبي
ميلت راسها وكالت
عطاء: بس انا ما كلت حسين
زهراء: وانا ادري بدون ما تكولين، انا ادري
ضميتها الي
كلت
زهراء: انتي اكثر طير بينا حر، يطير بكل براءة وما مكسور جناحة وعمرج ما كنتي زاجل
باوعتلي وكالت
عطاء: ضوية ما رفضتة، بس ما نطتني فرصة انطيها الرسالة
زهراء: ضوية ما تناسبنا، حسين انخدع بالغلاف
عطاء: بس ضوية ماكو منها
كلت بخنكة
زهراء: انتي الماكو منج، انتي اللي تفكرين بالكل، شايلة هم الكل وتحبين الكل
لزمت ايدي وكالت
عطاء: زهراء تحبي؟!
عقدت حاجبي
زهراء: لمنو
عطاء: لخالد، شفتج انهاريتي من سمعتي بي مضروب
ابتسمت وكلت
زهراء: فهمتيني غلط
عطاء: شلون؟
زهراء: رغم هو اذاني بس احسة ما يقصد، او يمكن هو انسان عانى من ظروف قاسية خلتة يتصرف هالتصرف، اللي احسة تجاهة هو شفقة مو حب، انا ما اتمنى ان اي بشر يتأذة وبس
كالت بحزن
عطاء: وشلون اذا عرفتي بي يحبج؟
زهراء: مراح يحبني تطمني، انا صح اؤمن بالحلال والحرام بس افهم شعور كل بنية تجاه الحب
عطاء: شلون
تنهدت
زهراء: كل وحدة بينا تحب تحصل اهتمام وحب ونظرات ومشاكسة احيانا بس هنا لازم يتدخل العقل ويختار الشخص المناسب وهو مو مناسب، انا متأكدة من نفسي ما احبة لان ما انزلقت بأي منزلق رتبة الي كنت دائما اشوف الاختلافات اللي بينا وانظر لحالتي وهو هم اكيد راح ينظر للاختلافات ويبتعد واساسا هو مبتعد يعني فهم الاختلاف
عطاء: واذا هو ما يفكر نفس تفكيرج؟
زهراء: ساعتها راح يظلم نفسة هواي، الزرع الماراح اجني ثمارة ليش ازرعة؟
عطاء: الحب بأيد البشر؟
زهراء: العقل تحت سيطرة البشر، وانا اعرف الهدف اللي جاية لهنا علمودة
....
شلون اذا كنت انسان خالي من الاهداف
وحددج هدف من اهدافة المهمة؟!
كأنما لاعب حصل ع فرصتة الاولى بصعوبة
ويحتاج يثبت نفسة بملعب الحياة
وعندة ركلة جزاء
اما تصيب
او تخيب
معقولة وياج تخيب!؟
فزيت ع صوت حسين
وهو يكول
حسين: الحمد لله ع سلامتك خوية
ابتسمت
خالد: الله يسلمك، عاشت ايدك ما قصرت لو ماانت اموت
حسين: احنا اخوة، ما سويت غير واجبي
دخل حازم للغرفة
وكال بعصبية
حازم: طايح الحظ هذا بعد ما يفوت للشقة
خالد: منو تقصد سراج؟
حازم: اي نعال
حسين: غير افهم شصاير وليش تصرف هيج؟
حازم: احجيلي انت شصار
.....
كنت راجع من الجامعة
وبراسي الف سالفة
مقهور من اللي يصير وياية
وصلت للسكن
شفت خالد واكع بالكاع
و٢ بوديكارد فوكاه
وسراج يضحك من بعيد
واحد بيهم موجه السلاح ع خالد
وخالد مغمى علية
انصدمت
واحس الدم جمد بجسمي!
ضربة رصاصة
كان متعمد يضربها بأيدة
واجت شدخ يعني ما طخت العظم
صرت اصيح
وهمة ركضوا للسيارة
وسراج انهزم وياهم
اجيت ع خالد وانا اصيح
التموا العالم
شلناه بسيارة واحد من ذول السواق
واجينا للمستشفى
الحمدلله اصابتة ما كانت خطيرة
خيطوا الجرح ونطوا مسكن الام ومهدئات
ومقويات لان فقد دم
وبعدها اجة سراج
وصار يتوسل بية ويترجاني
سراج: اناااا والله معبالي هيج تكبر الشغلة، انا بس عبالي اخوفكم ما عبالي راح يتأذى خالد هيج، وما كتلهم اضربوا همة تصرفوا من يمهم
تركتة ما جاوبتة
لحد ما اجة حازم
وتهجم علية
وضربة بقوة
كوة فاككناهم
وسراج انهزم من المستشفى
.....
حازم: دخلي اشوفة لأسوي نصييين
كلت ببرود
خالد: سامحتة
حسين: شلون؟! تسامح النذل هذا
خالد: سراج مو رجال، ولا يكدر يصير رجال، انت ضربتوا هواي وانا هالمرة هم ضربتوا، حس نفسو ضايع بينا وما يكدر يواجهنا راح يستنجد بأبو وانت فهمك كفاية
بقوا صافنين
كلت
خالد: انا كل اللي اريدو هسة امي
حازم: توكل ع الله وكول يا الله
كلت وعيوني مدمعة
خالد: احس الحياة هواي داتقسى علية واحسني احتاج امي
حسين: احنا يمك اذا نكدر نسوي شي ما نقصر
خالد: رجعوني للسكن، المستشفى تخنكني ريحتها
حازم: يابة لازم يكمل المغذي
كلت بخنكة
خالد: الريحة هاي تذكرني بمرض امي وموتها، صح كنت صغير بس ما فاركت خشمي هاي الريحة
حسين: كوم نروح للسكن
حازم: بوية لا تسمع كلامة هذا مخبل
حسين ساعدني حتى اكوم
وحازم راح صاح للدكتور
الدكتور ما كان مقتنع
وقعت وطلعت ع مسؤليتي
اخذنا العلاج ورجعنا للسكن
نومني حسين ع السرير
غمضت عيوني
احس حرارة الدموع تحرك بية
كال حازم
حازم: خالد ابوك هواي متصل عليك الظاهر سامع بيك متصاوب
ابتسمت وطاحت دمعة من عيني
حازم: انا لو اموت ما يهتم، متصل علية حتى يرزلني لان كاونت حرمتو
باوعت لحسين
حسيتة مقهور علية
اخذت الموبايل من حازم
اتصلت ع ابوية
اول ما فتح خط
بلشت اسمع انواع الشتائم
كنت ساكت وما اجاوب
لحد ما كال
: يعني لحم جتافي من امك امك ال
قاطعتوا وكلت بغضب
خالد: الا امي لا تجيب طاريها
كال بغضب مدفون
: خالد كمل امتحاناتك وتعال ويصير خير
سد الخط بوجهي
شمرت الموبايل ع جهة
اباوع لحسين مرة يباوع علية
مرة يباوع ع حازم
حسين: صدك حازم انت مو عبالك هواي انهاريت ع سراج؟
حازم: يستاهل
خالد: اتصلت عليك هواي قبل متصير هالحادثة بس ما جاوبت
كال ببرود
حازم: بس تصير انت بخير الملم جويلاتي وارجع لهلي
خالد: كملت امتحانات؟
حازم: لا، انفصلت
حسين: شنوووو؟ ليش شصاير
حازم: ارتاح خالد لان انت تعبان، حسين عندك شغل روح وانا ابقى يم خالد ومااريد احجي بالموضوع
باوعت ع حسين
وهو باوعلي بأستغراب
حسين: انت بخير حازم
حازم: اي بخير لا تقلق، راح اتمدد بمكانك حتى اتطمن ع خالد
حسين: ماشي اذا احتاجيتوا شي خابروني، لتسوون عشة انا راح اجيب مشاوي علمود خالد
ضحكت
خالد: ثاني احلى حب بالعالم هو حبك الي الاول مااكلك عنو
حسين: دنجب انجب صاير دوشك مال كتل
خالد: تكتلون بية واحبكم هههههه
طلع حسين وهو يضحك
وانا باوعت ع حازم
احسة منهار
خالد: روح لشغلك ولا تبقى هنا، انا بخير
حازم: لا مااكدر اعوفك
خالد: زين ع الاقل اتصل ع الرجال وبلغة بظرفك
حازم: انعل ابوهم لابو اليشتغل يمهم
كلت بأستغراب
خالد: حازم هاي شبيك؟ حتى لو تصير مشاكل بينك وبينها وهذا الشي يصير عادي بين اي ثنين، صاحب الشغل شعلية؟ حتى لو كان من طرفها؟ هسة انا مستقبلا يجي واحد يشتغل يمي ويسبني بسبب بنتي..
سكتت
بعدها كلت
خالد: اشعل صفحتو هو وبنتي الكلب الابن الكلب
حازم: خالد نام وريحني، يمكن العلاج اثر عليك
خالد: احنا اخوة، وما نضم ع بعض
حازم: طلعت نفس ما كتلي
خالد: شكتلك
حازم: مو زينة وطلعت فعلا
اشرت ع روحي وكلت
خالد: انا كتلك مو زينة؟
حازم: ناصبة علية مسويتني لعبة عدها
خالد: منين جبت هالكلام؟
حازم: اليوم اجة واحد بطول الباب وصار يحجي كأن يعرفها من زمان
رفعت حاجبي
وهو صار يسولف
احسو يحجي وهو منهار
انقهرت علية
خالد: انت غبي؟
حازم: خالد حالتك تكفي لا تخليني اكوم اعجنك
خالد: شلون تسمح لنفسك تتجاوز عليها هيج؟
حازم: هاي حقيقتها
خالد: لا تكول كلام تتندم علية بعدين، حبيبة عدها علاقة سابقة وهذا الشي مو من حقك تحاسبها علية ومو المهم الماضي المهم انت
كام وكال بعصبية
حازم: المهم انا مسويتني عامل يم ابوها وهي براحتها حتى..
قاطعتوا وكلت
خالد: حازم انت مو بوعيك ومقهور، بس اليحب من صدك ما يتجاوز هالتجاوز
حازم: انا دائما احس روحي يمها قليل، واليوم اكتشفت ان هي لا شيء
خالد: ما دام هي مو زينة ليش ضربت الولد وانفصلت؟
حازم: عقاب الها والة
خالد: والله ما عاقبت غير روحك
حازم: وين تريد توصلني؟
خالد: اذا تحبها من صدك اسمعها وتفاهم وياها، لا تعيش بفراغ الفراغ مو حلو
حسيت بألم بأيدي
اخذت علاجات
وحازم يدخن ويشرب جاي
خالد: كل الناس تعشق النهايات السعيدة، بس اليترك اثر بداخلنا هو الألم، كوم مااحب اشوفك تعبان
حازم: انا شجابني ع الحب ها؟ كفيلك العباس انا جاي ادرس واشتغل واحصل شهادة وابقى طول عمي اداري امي المريضة، انا شجابني ع شلعان الكلب
ابتسمت
خالد: هذا الكلام مو انت تكولو
حازم: جا منو
خالد: من اول يوم اجيت لهنا لحد هذا اليوم، حتى ملامح وجهي نسيتها ع كد ما ضربت وانضربت، بس ليش؟
حازم: غير انت غبي رحت سامحت سراج
تنهدت
خالد: خلي عضلات وجهي ترتاح، تعبت من الضرب
حازم: خلي عضلات قلبك ترتاح مو؟
ما رديت
حسيت نفسي نعست
عرفت العلاج هو السبب
نمت
وما حسيت الا ع صوت حازم يصيح
حازم: وك انتتتت الك عين تجي لهنااا؟ يا ساقطط
حسين: حاااازم كافييي عوفة
سراج: والله العظيم معبالي حيسوون هيج عبالي بس يضربوه
حازم: يعنييي انت جاي تخوفنا عود؟!! دحمد ربك ان احنا متحملينك
عدلت كعدتي بصعوبة
وصحت
خالد: حااازم، كافي
اجة سراج للغرفة
وهو يكول
سراج: انا صح جبتهم حتى اخليهم يم الباب يحرسوني بس ما كتلهم يضربوك رصاصة
كلت ببرود
خالد: يحرسوك من منو سراج؟
سكت
خالد: احنا هنا احن من اهلك عليك، منو الما يخاف عليك بينا؟ انا وحسين شبعنا بوكسات من اول يوم لحد هسة جبت اهلي علية؟ اولا احنا اهل ثانيا انا زلمة اواجه بنفسي ما استنجد بأهلي
دخل حازم للغرفة
كال
حازم: من اليوم يا سراج لا تحاجينا ولا نحاجيك
خالد: ما وصلت لهنا، نتزاعل اي بس ما تكاطعت الدنيا
حازم: تريدة يخلص علينا؟ بووية هذا ما يتأمن
خالد: مالنا دخل بي، يسكر يديح لو ينام بباب الشقة محد يودي لغرفتو هاي حياتو وهو حر بيها
طلع سراج من الغرفة
وراح لغرفتو الثانية
حسين اجة يمي
كال وهو مستغرب
حسين: اول مرة احس كلبك طيب، شعجب سامحتة؟
خالد: الذنب مو ذنبو، انا تعاركت وي اهلي وكنت مو بوعيي وماكدرت ادافع عن نفسي، انا لو بكامل قوتي اسحلو وياهم
ربت ع كتفي
حازم جاب السفرة للغرفة
حازم: هنا خلي ناكل
حسين: حتى الزفارية تروح وياية باجر للامتحان
حازم: حسين لا تضل تعلق روحي واصلة لخشمي
حسين: ووجع لا تبقى تشمر بالحجييي
باوعت لحسين
واشرتلو بمعنى عوفو
نزلت كعدت يمهم
وبلشنا ناكل
خالد: وسراج؟؟
حازم: يولي ياكل بوحدة فلوس ابو هواي
طلعت بالماعون كباب وتكة
وكمت
حازم كال بعصبية
حازم: وييين رايييح
خالد: ششش ولا كلمة
رحت لغرفة سراج
خليتلو الاكل ع الميز
ورجعت لغرفتي
كال حسين
حسين: اذا اكرمت الكريم ملكته واذا اكرمت اللئيم تمردا
خالد: اكثر من هالتمرد ماكو هههه
كملنا اكل
ايدي توجعني
كعدت ادرس
هواي قنعوني اخذ اجازة
بس كنت مصر ان امتحن
الليل كلو كاعد
درست هواي
حسين ما عندو امتحان
مرة يكعد مرة ينام
صليت الفجر
اباوع لحازم كاعد بالبلكون
طلعت علية
حازم: فوت جوة الجو بارد يلتهب جرحك
خالد: عندك امتحان اليوم؟
حازم: لا بس اروح حتى احجي وي الدكاترة لان قرار الفصل مو رسمي
خالد: حازم انا شفت حبيبة كاعدة وياك
باوعلي بغضب
خالد: اقصد يعني عرفتها، وشفتها ضمن مجموعة بنات
كال بعصبية
حازم: لشنو تريد توصل؟؟
خالد: كنت بالقاعة واجو ع ااا.
حازم: ع منو؟؟
خالد: ع اخت حسين، انا ما دحكت بس انتبهت عليهن ان هنة صداقتهم قوية، صح اكو اختلاف بين بيئة اخت حسين وبيئة حبيبة بس صدكني حبيبة لو انسانة مو زينة زهراء ما تقرب الها
رفع حاجبو وكال بغضب
حازم: هاااا افهم من كلامك زهراء مقياس للشرف موو؟؟
صكيت اسناني وتمالكت اعصابي
خالد: وطي صوتك لا يسمعنا اخوها
حازم: خايف منة يسمعك؟؟ هسة انا من كلامك افتهم انت عينك ع منو؟ ع زهراء لو ع حبيبة؟
كلت بنفاذ صبر
خالد: لا اله الا الله، يابة انا احجيلك الشفتو، وانا رايدلك الخير
حازم: انا هم اريدلك الخير، عوفني بحالي، وهااا خلي اكلك شي اخت حسين طلعها من راسك ما ينطوها الك
رمشت وانا احاول استوعب قوة الكلام
كلت ببرود
خالد: وانا ما ذابح نفسي عليها، ان كانت هي بنت سيد فأنا ابن شيوخ وما تطيح عيني عليها
كمت وكلت
خالد: انا ما اخذ غير من الغربية، ولا تسمعني كلام حتى ما ينتهي اللي بينا
دفرتو ومشيت
وهو صاح
حازم: طايح حظ، عوود تتلاكة الوجوه
دخلت للغرفة
حسين فز من النوم
كال
حسين: شبيكم مثل الردادة والنواحة
خالد: ماكو شي
حسين: شبي حازم يصيح
خالد: مجلوب
كام صلى
وانا تمددت ع سريري
احس بوجع بأيدي
واتذكر كلام حازم
مو همة الما ينطوها الي
انا المو رايدها
وهي مو غصب
يحشروها بية حشر
وخرت الغطة
وعدلت كعدتي
حسين يباوعلي
كمت شفت الجدول
بعدلي امتحان واحد عدا هالامتحان
هانت
انا اعرف شلون اطلعج من راسي..
بدلت وطلعت للدوام
شفت حازم ينزل ع الدرج
دفرت رجلة ردت اطيحة
عثر وكال بعصبية
حازم: وحق نحر الحسين راح اشوفك شي مشايفة
عبرتو ومشيت
وانا اخزر بي
دخلت للقاعة
زملائي يتحمدولي بالسلامة
رديت من كفة خشمي
وكعدت حتى امتحن
دخلت زهراء للقاعة
كالعادة
قالب ثلج ويمشي
لو تنحرك الدنيا ما تصدر اي ردة فعل
غلست عنها
دخلت طالبة ويانة للقاعة
طخت نفسها بالستول مالتي
ووكعت اغراضها
باوعتلها وكلت
خالد: اعذريني كان جبتها الج بس متصاوب بأيدي، وانتي مرة ثانية انتبهي لا تخلقين صدف
صارت تباوعلي بكراهية
واباوع لزهراء تراجع وتبتسم ابتسامة خفييفة
تنشاف بالمجهر
تضحك ع كلامي؟
.......
عطاء: لاااا اضحك ع روحي، مسحولة وياج من الصبح علمود واحد قلل ادب وياج وما صدكج
كالت حبيبة بغضب
حبيبة: عطاء انا ما جبرتج تجين وياية، انتي كلتي مااعوفج وحدج
عطاء: امشي امشي خلي نفوت للمقرر نحجي وياه بلكي يصير حل
دخلنا للمقرر
وصادفنا حازم طالع منة
حبيبة دموعها بعينها
وحازم يباوعلها بغضب
وانا اباوع لثنينهم
طول عمري طرف ثالث
والله سالفتي تضحك
سلمت حبيبة ع المقرر
وبلشت تحجي وياه
وتترجاه وتبجي
حسيتة انقهر عليها
اخذها للعميد وانا انتظرتهم برا
شوي وطلعت تبتسم
والمقرر كال
: صيحولنا الطالب حازم عاطف
كلت الها بلهفة
عطاء: بشري شصار
حبيبة: مراح يفصلوه، راح يوقع تعهد وبس
عطاء: اييي الحمدلله
شوي واجة حازم
حبيبة تبتسم وتمسح بدموعها
وهو يباوعلها بغضب
وقع وطلعنا
مشينا انا وياها
وانا اكول
عطاء: يلا هاي وانحلت، بقت بس تتصالحون وتفهمي ع سوء الفهم وهو يعتذرلج عن كلامة
كالت حبيبة بفرحة
حبيبة: اي اي، بس هسة خلي تهدأ الوضعية بعدين احجي وياه
قبل ما نوصل للسكن
ما حسيت غير حازم اجة بسرعة
جر حبيبة من ايدها
عيونة حمرة وشكلة يخوف
كال بغضب
حازم: كومة توسلت بالمقرر وما تراجعوا عن فصلي، شسويتيلهم وتراجعوا؟؟
اباوع لحبيبة ترجف
عيونها مليانة دموع
شدها بقوة وكال
حازم: ما صدكوا بية لان ما عندي امكانياتج مو؟؟
فتحت عيوني مصدومة
وحبيبة كالت بخنكة وصدمة
حبيبة: انت شجاي تحجي؟!
ابتسم بأستهزاء وكال
حازم: شنطيتيهم واقتنعوا؟ ههه واضح بعتي نفسج برخص
دفعها وراح
وانا مصدومة من كلامة
اباوع لحبيبة انهارت
ووكعت بالكاع
صرخت
عطاء: حبييييبةةةةة......
