رواية ايام من رماد الفصل الأول بقلم احمد
سلام عليكم ورحمة الله وبركاته
وياكم دمعة البالغة من العمر 10 سنوات اعيش حياة تختلف عن هواي ناس من اجيت للدنيا لحد اليوم ما عرفت احد غير عائلتي
لا اعرف خوالي ولا عمامي ولا اعرف اطفال غيري ولا عندنا جيران جنت الطفلة الوحيدة بالمكان الي عايشة بيه
السبب انو عائلتي عايشين بكرفانات داخل منطقة تابعة لشركة بناء وبابا كان حارس عالشركة ولان ماعندنا بيت سكنا بالكرفانات
المساحة الخاصة بالشركة جانت الشركة بانية حايط حول المنطقة واحنا صايرين بطرف المساحة هاي والكرفانات يفصلن بيننا احنا والشركة
وضعنا من اسواء الاوضاع الي ممكن تعيش بيهن البنية لان بالوقت الي جان لازم اعيش طفولتي والعب جنت اشتغل علمود لا انضرب
خلي نرجع للوراء واحجيلكم عن عائلتي شوية علمود تاخذون نظرة عن حياتي
نبدي بالاب والي هو سامر عمرو حاليا 53 سنة رجال معقد وعندو المرة هي والنعال ولسانو زفر ويبيع ابو وامو بدينار
زوجة ابوي الاولى رحمة وهي اسم على مسمى من ارحم الناس بينا اني وخواتي ومستعدة تموت من الجوع اهم شي نشبع احنا عمرها حاليا 49 سنة
اولادها
الاول صفاء: عمرو حاليا 29 سنة وهو النسخة الاصغر والاسوء من ابوي وماعندو احترام لا لجبير ولا صغير ودوم يسوي مشاكل ويا العمال الي بالشركة
واكثر من مرة يتوسل بالمسؤولين عن الشركة علمود ما يطردوه بالشركة وبعد فترة يرجع يسوي مشكلة ونفس القصة تنعاد
الثاني براء: عمرو 27 وهو ابعد انسان عن البرائة والحنان انسان قاسي القلب بكل ما تعنيه الكلمة ويتلذذ بعذاب الناس المقابيلو
هو مثل بابا يموت عالفلس ومستعد يقتل لاجل الفلوس ويذبح نفسو بالشغل علمود ينطوه فلوس اكثر وما ينطي دينار لاحد لو يموت گدامو
الثالث مصطفى: وهو الملقب الوردة الي تنبت بين الشوك وهو احن الاولاد علينا اني وخواتو وامو ويشتغل ليل ونهار علمود يدبر مصرفنا احنا وهو
الملقب بصوفي وعمرو حاليا 25 ومن صغرو يشتغل لدرجة الي يشوفو يگول لاعب حديد من العضلات الي اكتسبهن بشغلو
حاليا يشتغل ويا لباخين واغلب الايام يبات وياهم لان شغلهم يكون بعيد عن البيت واحيانا خارج الشركة اذا توقفت الشركة
بنات ماما رحمة
الاولى سناء: عمرها 28 متزوجة واحد وحالتها بالضيم بس قياسا بحالتنا فهي افضل بهواي لذلك باقية عند زوجها
نشوفها بالسنة حسنة واحيانا اكثر من سنة تمر بدون ما نشوفها لذلك دورها معدوم بالقصة وما الها اي تأثير
الثانية منتهى: عمرها 24 سنة وتزوجت من جان عمرها 20 سنة وبعدها بسنة انتقلت لخارج العراق هي وزوجها وانقطعت اخبارها
بس الي نعرفو عن حياتها قبل ما تروح انها سعيدة كلش وزوجها بقمة الحنان وياها ورغم حزننا على فراقها من راحت بس سعيدين لراحتها
الثالثة وهي اخر العنقود اية عمرها 17 سنة وهي اقرب انسانة الي لان من انولدت وهي تحبني ومتعلقة بي وكبرت وتعلقت بيها
زوجة بابا الثانية اسمها نعمة: عمرها 40 سنة انسانة هادئة وما الها اذية على احد ومن شافت تعامل ماما رحمة وياها كلش حبتها
ورغم ضراير بس من سوء بابا صارن يحبن بعض لان يعرفن ان الخلاف بينهن ماراح يفيدهن بشي وبنفس الوقت ثنينهن حبابات
عدها ابن واحد اسمو ميزر عمرو 22 ماعرف شحجي عنو لان ماكو وصف بالدنيا يوصف قذارتو انسان عندو رغبتو فوق كلشي
اكثر من مرة ينلزم بمراقص وويا بنات حرام وفلوس شغلو وتعبو يذبهن كلهن على هيج سوالف واغلب الايام يبات خارج البيت
امو حاولت تحتويه هواي وتنصحو بس ما يفيد لان كبر بعد وفقدت السيطرة عليه اخير شي عافتو والتهت ويا بناتها والي هن
سوسن عمرها 20 سنة طالعة على امها هادئة وحبابة كلش وهي الي تهتم بي اني واية وهي راعية البيت وماكو بندارتها وطيبتها
حاليا مخطوبة واهل الولد اتفقو ويا بابا بس يخلص الولد دراستو يتزوجها وحسب كلام مصطفى ان الولد كلش حباب وخلوق
طبعا هو ما يعرفها بس لقائهم صار بالصدفة جان بوقتها يشتغل بالشركة لان عطلة عندو وجانو هو ومصطفى جايين عالشركة بالليل
طالعين يشترون من المحلات ومن رجعو جنا اني والبنات بوحدة من العمارات الي على طريقهم نشتغل وثنينهم ما يدرون بينا
ففجأة طلعت سوسن وصارت هي وياهم وجه بوجه والولد شافها وورا فترة اجى هو واهلو خطبوها وصار صديق ونسيب مصطفى بنفس الوقت
الثانية رانيا عمرها 19 سنة وهي اغرب انسانة ممكن تقابلها مرة تكون غيورة مرة حبابة مرة حقودة مرة مسكينة
صايرة مزيج بين الاوصاف بس بكل احوالها ما تاذي احد ومن تكون نفسيتها مرتاحة كلش تنحب گعدتها وسوالفها
البنت الثالثة هي سارة عمرها 15 سنة هاي هي خبلة العائلة حياتها عبارة عن خبال وضحك وضاربة الدنيا كلها بعرض الحايط
لا يهمها وضعنا المعيشي ولا الحالة الي احنا بيها ولا تفكر بالمستقبل وجملتها المشهورة هي (الحياة وحدة اضيعها بالحزن ليش)
الزوجة الثالثة لبابا هي ماما
اسمها هدى: وجان عمرها 20 سنة هسا تگولون شنو معنى جان عمرها
ماما تزوجت بابا وهي بعمر 19 سنة وما جانت تعرف بابا بهذا السوء بس تورطت بعد وحملت بي وانجبرت تبقى وياه
حسب كلام ماما رحمة خلال وجود ماما ابد ماراحت على اهلها ومافد يوم تكلمت عنهم ومايعرفون هي بنت منو اصلا
الوحيد الي يعرف هو بابا ومحد يسألو لان محد يحب يحجي وياه اساسا وما يعتبرون هالشي هذا مهم
المهم انو ماما عاشت ويا زوجات بابا وجانن كلش يحبنها ويعزنها ومن حملت بي جان حملها كلش متعب وكلش تأذت
هن جانن شايلاتها على كفوف الراحة بس هالشي ما يكفي جانت تحتاج دكتورة تشرف على حالتها بس بابا مستحيل يصرف عليها
مصطفى جان كل فترة ياخذها لدكتورة ويصرف كل فلوسو عالدكتورة والعلاجات وما تتحسن حالة ماما الى ان اجى وقت الولادة
اجاها الطلق بالليل ومصطفى نايم ويا جماعتو بالشغل وبابا ما قبل ياخذها لا هو ولا اخواني بحجة تعبانين خلي تتحمل للصبح
اخير شي تدهورت حالتها كلش وبين ما نقلوها للمستشفى ما تحملت وتوفت بالولادة وگدرو الاطباء ينقذوني بمعجزة
من جابني بابا للبيت ماما رحمة سمتني دمعة لان اخير شي شافتو من ماما دموعها وهي تصرخ من الالم وبعدها اخذوها وتوفت
اعرف تاهت عليكم الشخصيات لذلك هاي قائمة الشخصيات باختصار
الاب سامر 53
الزوجة الاولى رحمة 49
الاخ الاكبر صفاء 29
الاخ الثاني براء 27
مصطفى 25
سناء 28
منتهى 24
اية 17
الزوجة الثانية نعمة 40
ابنها ميزر 22
سوسن 20
رانيا 19
سارة 15
دمعة 10
حياتي كلها عشتها بالشركة والشركة قبل ما انولد هي موجودة لان كلش جبيرة وتحتاج هواي وقت لحد ما يخلصوها
وبنفس الوقت هواي تتوقف الشركة بسبب نقص التمويل لدرجة انو مرة توقفت 3 سنين جرة وحدة لحد ما اخذو تمويل من الدولة
وتعرضت لوقفات هواي الي بالاشهر والي سنة والي ايام حسب الضروف وطول ما الشركة موجودة معناها بابا حارس بيها واحنا نبقى عايشين بيها
انا وخواتي وماما رحمة وماما نعمة نشتغل بالشركة علمود نجمع فلوس بس شغلنا يختلف عن شغل العمال من ناحية الوقت
هم يشتغلون بالنهار والساعة 4 ينتهي وقتهم ويروحون لكرفاناتهم او بيوتهم حسب هم وين ينامون واحنا نبدي ورا المغرب
من تصير الدنيا ظلام ياخذنا بابا او واحد من اخواني لوحدة من العمارات الي بعيدة عن العمال نشتغل بيها حسب طلب الشركة
مرات ننضفها من الجص مال اللبخ او نعدل الارضية قبل ما يصبوها او ندخل رمل او سيراميك او ندخل جص علمود ثاني يوم يشتغلون بيهن العمال
ورغم هالشغل هذا يهد حيل الزلم الخشنة بس احنا النسوان انجبرنا عليه وتحملناه علمود نكسب فلوسنا بالحلال وبدون توسل لبابا او احد
ورغم مصطفى جان رافض فكرة شغلنا بس ماجان يگدر يسوي شي لان فلوس شغلو گوة تكفي مصرفو واكلنا وهواي مرة ينقص على نفسو علمودنا
بس نبقى بحاجة مصرف للبيت وللملابس وذني الاشياء مايگدر مصطفى يدبرهن هن والاكل ويعرف بابا وباقي اخواني ما يهمهم
حتى من حجى ويا ماما رحمة علمود نعوف الشغل گالت قابل ناكل ونبقى عريانين فمجبورين نشتغل ولا تخاف الي ما نگدر عليه نعوفو
ماما رحمة باكثر من مرة جانت تريد تعوف بابا بس جانو اولادها وبناتها صغار وما گدرت تعوفو ومن اجت نعمة زادت الطين بلة
صارت ماما رحمة تخاف على بناتها وعلى ماما نعمة ورجع بابا جابلها ماما واجينا اني وبنات ماما نعمة فبقت علمودنا وعلمود اية
بالنسبة لشغلنا يتعامل بابا ويا الشركة على مبلغ العمل ومن يستلم الفلوس ياخذ حصتو منهن وينطي الباقي لماما رحمة
وماما رحمة تضمهن يمها علمود تصرف علينا منهن وكل فترة ياخذها مصطفى او مرات قليلة كلش ياخذها بابا للسوگ وتجيب احتياجاتنا
ولولا الله ثم ماما رحمة جان خسرنا الدنيا والاخرة وماعرفنا من الدين شي بس هي جانت دائما حريصة انو ما نضيع فرض ابدا
من جنا نشتغل ونرجع للبيت فورا نغسل وننام من التعب لان نشتغل للفجر وهي اول وحدة تگعد على صلاة الظهر بدون اي منبه
وتگعدنا كلنا علمود نصلي ونرجع نكمل نومتنا والعصر هم نگعد نصلي ومرات ننام ورا العصر ومرات لا حسب التعب
بابا واخواني من يتريگون ويطلعون ما يرجعون للبيت ويعرفون اذا اشتغلنا نكون نايمات وماكو احد يخدمهم فيبقون بالشغل
الكرفانات الي جنا عايشين بيهن عددهن خمسة وصايرات على شكل حرف U ثنين يمين وثنين يسار ووحدة بالوسط والفراغ صاير باتجاه الحايط مال سياج الشركة
والي بين الكرفانات جان يعتبر الحوش مالنا ومقسمين الكرفانات بيناتنا وحدة للبنات ووحدة لماما رحمة ووحدة لماما نعمة ووحدة للولد
والخامسة صايرة قسمين نص مطبخ ونص حمام وتواليت بس الحمام والتواليت بابهن من صفحة والمطبخ من الصفحة الثانية
اذا اريد احجي عن سوء بابا واخواني احتاج ملايين الكلمات اعبر بيهن عن الخوف والذل الي عشناهن بسببهم ويمكن هالعدد من الكلمات ما يكفي
تخيلو 10 سنين عشتهن كل كم يوم تصير عركة بالبيت مرة بين الولد والبنات مرة بين بابا وزوجاتو مرة بين بابا والولد مرة بين الولد وامهاتهم مرة بين بابا والبنات
ومن يتعاركون ناس تصرخ على ناس والبنات شابعات كتل من بابا واخواني واني من الخوف من تصير مشكلة اختل بالكرفانة مالتنا وما اتدخل
ومن جنت صغيرة جانو ياخذوني وياهم من يطلعن النسوان للشغل علمود ما ابقى لحالي من جنت طفلة اگضي الوقت نوم
ومن كبرت شوية وصرت امشي والعب تجهزلي ماما رحمة فراش وتاخذو وياها من انعس تحطني بالفراش وتخليني نايمة لحد ما يرجعن
ومن وصلت تقريبا 7 سنين صرت اتعاند ويا ماما رحمة عالشغل لان جنت معتبرتو لعب واريد اشارك وياهم حالي حال اي طفل بهيج موقف
فمن يدخلون رمل اجيب قوطية صغيرة يعبونها الي وادخلها واذا سيراميك تنطيني ماما رحمة سيراميك الحمام 30×30 تكون صغيرة وخفيفة وادخل وياهم
وكل ما تقدمت بالعمر وتعلمت عالشغل يزيد الحمل شوية واصعب شي جان الشغل من نتوقف فترة طويلة كلش ونرجع نشتغل
اول ما نخلص نكون ميتات من التعب گوة نوصل البيت ونگضي النهار كلو نوم ومن نشتغل كم يوم نرجع لنشاطنا القديم
بالنسبة لبابا فجان عندو كرفانة قريبة من الادارة (كرفانة الحارس) يوصلنا للشغل ويروح ينام بيها واحنا نندلها اذا احتاجيناه نصيحلو
ومرات اذا ينجبر يبقى ويانا من نرجع يناملو كم ساعة ويروح للشركة وهيج مگضيها بس نادر كلش نحتاجو بالشغل
والسبب انو ماما رحمة دائما تاخذ منو تفاصيل الشغل بالكامل قبل ما نبدي وبوجودها حتى هو يعرف انو ماراح نحتاجو
وبالنسبة لزيارات ماما رحمة او ماما نعمة لاهلهن فجانن يروحن من ماكو شغل ومايروحن سوا لان اني ابقى لحالي
وهالشي بسبب بابا يگول ممنوع تروح لبيت غريب عنها حتى من جنت طفلة وماعرف هالشي حرص او اكو غير سبب
لذلك جانن تروح دائما ماما نعمة بالبداية ومن ترجع تروح ماما رحمة واني ابقى ويا الي تبقى ورغم كلش احب اروح وياهن بس مستحيل بابا يغير رايو
بالمناسبة ثنينهن اسميهن ماما لان من انولدت هن وياي ولان خواتي يسمنهن ماما فتعلمت منهم واساسا ماكو احد يستاهل هالكلمة اكثر منهن
مرة من المرات جنا الليل كلو نشتغل ورجعنا للبيت هلكانات من التعب گوة نمشي لان دخلنا رمل وسيراميك هواي لان مستعجلين عليهن
اول ما وصلنا الكرفانات جان براء هسا گاعد من النوم يريد يروح لشغلو باوع علي گال حظريلي ريوگ اريد اطلع لشغلي
باوعت لماما رحمة وهزتلي براسها بمعنى سويه وفضي الموضوع لان اي رد او تبرير راح يكون عذر الو علمود يسويلنا مشكلة من الصبح
رجعت للمطبخ واني كارهة نفسي فوگ التعب يجي هذا يتأمر علي بديت احظر الريوك الي هو عبارة عن اجبان وبيض وخبز وجاي
گلت بصوت ناصي مكسرات ايديه استاذ براء الا صخيمة تسويلو ريوگ عابتلو حتى ما يستاهل الريوگ دينار واحد مو صارف من جيبو
انداريت وراي وانصدمت ببراء واگف وراي وسمع كل الكلام الي حجيتو بقيت بمكاني واباوعلو بخوف وگلبي يدگ الف دگة بالدقيقة
صرت اگول بگلبي يارب ما سمعني يارب ما يأذيني بس براء وما ادراك ما براء ابعد انسان عن البرائة ويريد اي حجة للمشاكل
دخل للمطبخ وسكر الباب واني بلعت ريگي من الخوف وتراجعت لحد ما ضهري لزگ بالحايط مال الكرفانة وهجم علي براء
