رواية فصلية ولكن الفصل الأول بقلم سوزان ليث
حياة : اني حياة عمري 22سنه اني وحيده ابويه
امي توفت من جان عمري 13سنه
ابويه تعب وره وفاه امي لان جان كلش يحبها عمامي اصرو عليه يتزوج بس هو جان رافض لان جان يحب امي هواي ويخاف عليه من مرت الاب
ابويه مقصر ويايه بشي كل الي اريد جيبه الي ومجان يقبل احد من عمامي وعماتي يفتح موضوع زواجه ابد
كملت دراستي بس مكدرت اطلع معدل عالي بسادس لان بهذه الفتره ابويه تمرض حيل واني جنت اداري
دخلت معهد سنتين وكملت وكعدت بالبيت ابويه
احنا من الجنوب عائلتي اغلب مخلفه ولد يعني بكل عائله لو تلكه بنيه لو بس ولد لذالك ابويه جان رافض اشتغل وجان يكلي انتي ممحتاجه لوظيفه لان عائلتنا متمكنه وعدها اراضي واملاك
حياتي جانت كلش مريحه وجنت فرحانه بيها
لكن بيوم من الايام كلشي دغير وصارت حياتي شي اسود
******************************
خالد : اني خالد عمري 36 سنه اني اكبر اخوتي اني المسؤول عليهم بعد ما والدي توفى اني توليت العشيره وكل يحبني لان اني مارضى بظلم وياهو الي محتاج ماقصر وياه ولكل تقدرني وتحترمني عشيرتي من العشاير الكبار بالعماره
اني متزوج من عمري 19سنه ابوي زوجني من وكت وحملني مسؤوليه اهلي كلهم وجنت كدها وعمري ماشكيت .
بعد ولاده مرتي بطفلتنا الاولى توفت وجانت صدمه الي ومعرفت شون حكدر اربي امل بنتي وامها ماكو لكن اهلي مقصرو وياها
خالد : جنت طالع ويه جماعه للمعارض دنشوف سيارات
وره مكملنا قررت ارجع للبيت لان الاهل دينتظروني جنت موكف السياره عالسايد الثاني كبال المعرض دعبر عالسايد ذاك ردمتني سياره بسرعه ودعمتني وراها كلشي محسيت .
اول مفتحت عيوني لكيت اخوتي وعمامي كلهم يمي .
جان اكو وجع بظهري قوي كلش بحيث اول مكلت ظهري احسه مكسور
صاحو دكتور . اجه شافني وفحصني واني اصيح اكله ظهري ماكدر اتحرك من الوجع .
دكتور : حنظربك ابره مسكنه وحتنومك حتى ترتاح .
خالد : بعد ما ضرب الابره حسيت جسمي ارتخى ونمت بعد محسيت بكلشي .
علي :دكتور شون حالته فدوه كللنا
دكتور : والله الوضع ميبشر بخير صاير عده كسر بالعمود الفقري وهذا الشي حياثر على قدرته بالمشي ويصير شلل
حميد : دكتور شنو شلل سوي اي شي اله الله يخليك هذا شيخ عشيره والله الوادم تيهى بلاياه .
دكتور : اني ماريد اخوفكم من هسه لكن هو هسه رجله اليسره عده احساس بيها لكن اليمنى مابيها اي احساس اذا سوه العمليه حيكدر يمشي بس برجله الي بيها احساس
ورجل الثانيه لازم بعد 6 اشهر بسوي عمليه ثانيه للرجل الثاني وراه علاج طبيعي وانشاءالله يرجع
علي : دكتور سوي كلشي نودي بره نسفره للهند يكلون هناك خوش اطباء عدهم
دكتور : هاي العمليه خطره جدا ودقيقه اي غلط بيها نفقد اي امل بشفائه انصحكم تقررون بسرعه ماكو وكت.
خالد : فتحت عيوني لكيت علي كاعد عالكرسي ولازم موبايل وحسين نايم علقنفه . صحت اريد ماي علي كمز من مكانه اجه عليه .
علي : حمدلله عالسلامه اخوي هاي ماي بس لتحرك نفسك مو زين اشرب الماي بالقصبه
خالد : شكو صار مداحس بجسمي .
علي : خوي قدر الله ماشاءفعل الحمدلله انت بخير كلشي يتعوض
خالد : كلي صار حجالي علي عالصار واني كتفيت ساكت محجيت بس كلت الحمدلله . وره فتره سافرت للهند ويايه حميد وحسين اخوتي وهناك سويت الفحوصات ونفس الحجي الي كالو بالعراق الا عمليه وره فتره عمليه ثانيه .
دكتور الهندي كال بعد 3 ايام تدخل عمليه ولتخاف انت قوي ويعصر بزندي لان اني ضخم وطويل
**************
حياه : جان وكت غروب وابويه جان ديصلي واني بالمطبخ سمعت صوت الباب البره نهجم ركضت للطرمه شفته قصي ابن عمي
فتحت الباب كتله قصي شبيك تخبلت دك الباب هيج
قصي : وين عمي بسرعه خل يجي
حياة : شكو وكعت كلبي احجي صاير
قصي : حمزه داعم واحد وهسه وبالحجز وزلمه الي دعمه بالمستشفى
حياة: عزه بعيني خل اصيح ابويه . ركضت اصيح ابويه جان هسه مخلص صلاه وديريد يطلع كلي شكو كتله حمزه داعم واحد وهسه بالحجز ورجال داعمه بالمستشفى الحك قصي بره يريدك
ابو حياة : قصي صدك هذا الخبر
قصي : اي عمي . ابوي كلي اجي اكلك العمام مجمعين بيتنا
ابو حياة : امشي وليدي الله اليستر . حياه قفلي الباب عليج بنتي حتى اذا اتاخر لتقلقين .
حياة: راح ابويه واني ظليت بالي يمهم وماعرف شصار هناك وخفت على ابويه لان مريض وهو كلش يحب عمامي .
صارت ب 11 وابوي ماكو واني كتلني الخوف وماكو احد يطمني واخاف ادك على ابويه خاف كاعد ويه زلم
كلت ادك على قصي اشوف صار
دكيت عليه جاوبني
قصي : ها حياة خوماكو شي
حياة: قصي ابويه تاخر بعده يمكم
قصي : لا عمامي وابويه كلهم راحو للمستشفى عالرجال المدعوم طلع شيخ عشيره وعشيرته حاركه الجو عليه والكل واكفه باب المستشفى عبالك مظاهره
حياة: زين وحمزه
قصي : حمزه بالحجز بعد راح عليه خالي كمال ورعد ديشوفوه بس كالو حمزه جان يسوق سريع يعني غلطه حمزه مو ذاك الزلمه
حياة : قصي عفيه اني اخاف ابقى بوحدي ودنيا ليل ماكدر اطلع تعال اخذني بيت عمتي خاف ابويه يتاخر
قصي : لا حياه هسه خابرتهم كالو بطريق
حياة: ماشي لعد يله باي
وره مسديت تليفون كلبي كام يوجعني على حمزه لان حمزه مو بس ابن عمي احنا تربينا سوه ومن احنا صغار يكلون حمزه لحياة وحياة لحمزه وجنت خايفه عليه بعد مسمعت داعم شيخ عشير وكلت اكيد عشيرته محتسكت
صار ب 12 . ابويه فتح الباب وطب بس شكله تعبان كلش
حياة : ها بابا الله يساعدك
ابوحياة : هلا حبيبتي
حياة : بابا صار خابرت قصي كلي رايحين للمستشفى
ابو حياة : اي رحنا نشوف الي داعمه وطلع شيخ عشيره والوضع ميطمن عشيرته متتحجه والكل يغلي
حياة: بابا زين شونه الي داعمه خوما متاذي ؟
ابو حياة : اي سمعنا متاذي مكسور ظهره ويمكن نشل
حياة : عزه بابا خطيه
ابو حياة : كله من وره هذا حمزه كم مره ابوه محذر من السرعه شوفي هاي تاليتها وكعنا بصيبه شكبرها
حياة : بابا حبيبي لصير عصبي فدوه حكوم اجيبلك العشه حتى تاخذ دواك
وره متعشينا دخل ابويه لغرفته دينام واني دخلت لغرفتي مددت وظليت افكر بالي حيصير وشون حيطلع حمزه من السجن وظليت افكر لكد ما غفيت
كعدت صبح كمت غسلت ورحت شفت ابويه كاعد يقرا قران رحت للمطبخ سويت ريوك وكملته صحت بابا وكعدنا نتريك
وره الريوك خابر عليه عمي ابو حمزه وكله الكعده اليوم العصر ويه جماعه الي مدعوم ابنهم
للعصر ابويه بدل وطلع وصلني بيت عمتي كلي خاف اتاخر برجعه
ظليت بيت عمتي لليل وابويه ماكو كتلها لعمتي خابري شوف صار بس عمتي مقبلت كالت من يكملون كلت لابو محمد يخابرني
صارت بالعشره ابو محمد رجل عمتي دخل علينا وياه ابويه
عمتي جانت عده بس ولد 2 واحد مزوج واحد بعد صغير
عمتي : ها ابو حياة بشر صار
ابو محمد : يابه دكومي حضري العشه جوعانين
عمتي : اي صار محضرته بس اصب
كعدنا عالعشه وعمتي سئلت ترى مظل عندي صبر شصار
ابوحياة : رحنا عليهم والله زلمهم الكبار يتفاهمون بس الصغار كلسع واحد كايم هاد علينا
عمتي: وتالي شقررو
ابو حياة : كالو ننطيهم عطوه لحد ميشوفون حاله شيخهم شونه لان حيسفروا للهند يتعالج
عمتي : زين وحمزه يظل بالحجز
ابو محمد : لا باجر حيرحون يتنازلون بس شرطو اي شي يقررو يتنفذ
عمتي : خير ان شاءالله
حياة: طبعا هاي الايام جان حياتنا متوتره وابويه كلش تعبان يوميه طلابه وسالفه وعمي خابر ابويه كله باجر العصر كعده ونشوف شقررو
كعدت صبح ب تسعه لكيت ابويه بالحديقه وصافن حسيته بغير دنيا
طلعت عليه كتله الحلو بيش صافن بسلا دتحب
ابو حياة : والله دافكر بالي حيصير اليوم
حياه : بابا حبيبي لتفكر هواي صايره هاي سوالف وهو قدر بعد
ابو حياة : ادري باباتي لكن هذا شيخ عشيره والكل تحبه وتحترمه
يعني اذا صار شي بي ميقبلون الا دم بالدم
حياة : بابا لتفكر وبعدين مو كلت هو سافر للهند يتعالج واني سامعه هناك طب زين عدهم
ان شاءالله يشفى
ابو حياة ان شاءالله
طبيت المطبخ سويت ريوك وكعدنا نتريك وراها ابويه فات يسبح وطلع وراح للجامع
اني كمت نظفت وخليت الغده عالنار سويت فاصوليا وتمن وسلكت دجاجه وقطعتها وكليتها وسويت زلاطه
بالوحده ونص اجه ابويه وياه عمي ابو حمزه وقصي
ابو حياة : حياه صبي الغده بنتي
حياة : صبيت الغده وكعدنا ناكل وظلو يحجون بالي حيصير اليوم بالفصل
وراها كامو عمي وقصي طلعو ابويه كام كلي بال3 كعدين لان ب 4 كعده
صارت ساعه 3 كعدت ابويه وراها بدل وطلع اني ظليت بالبيت وشويه جتي عمتي يمي
عمتي كلش تحبني وهي الي ساعدت ابويه بتربيتي ويه اعتبرها امي
كلش احبها
بتسعه اجه ابويه للبيت بس وجهه ميتفسر ابد دخل علينا سلم ودخل للغرفه حتى مكدرنا نسئل صار
عمتي : خل ادخل اشوف ابوج كلبي كام يلعب خاف اكو شي وانتي حضري العشه حتى ياخذ دواه
حياة : اي عمتي صار .كمت للمطبخ خليت الاكل يحمى رجعت داريد افوت على ابويه سمعته يحجي ويه عمتي يكللها
ابو حياة: مقبلو الا بهذا الشرط ومدنعرف شنسوي
عمتي : يعني مو حياخذون فلوس شيسون بعد بالفصليه
ابوحياة : اخو شيخ هو الي كال عالفصليه حتى شيوخ الي كاعدين مقبلو على تصرفى بس هو كال لو فصليه لو دم يصير للرجاب
عمتي : احنا ماعدنا سوالف مال فصليه وين كاعدين بيا قرن احنا
ابو حياة : ام محمد اني خايف ليظلون مصرين عالفصليه وماكو احد ترى بس حياة بنات عمها مزوجات والي باقيات صغار بعدهن
عمتي : لا ابو حياة ان شاءالله ميصير هيج يمه بنتي مانطيها فصليه
حياة: وره مسمعت ابويه وعمتي احس اكلت ضربه على راسي واصلا ماعرف شي يعني فصليه شنو اني شدخلني بهالموضوع
هواي اسئله براسي
وره سبوعين جانت دنيا ليل واحنا بيت عمامي واحد بصف ثاني كلنا بنفس الفرع
جنا كاعدين اني وابويه نتفرج تلفزين وسمعنا رمي كلش قريب علينا ووراها اصلا صار على بيتنا هم
اني كمز على ابويه حظنته وابويه نام فوكايه منعرف صار
وراها هدت
ابويه راد يطلع بره اني لازمه دشداشته واكله بابا لتطلع الله يخليك والله ماعندي غيرك
ابو حياة : حبيبتي لتخافين ماكو شي
حياه : اني ظليت ابجي وارجف ماعرف شنو صار شفت ابويه دخل للغرفه اخذ سلاحه ويريد يطلع واني ماخلي واحلف بي
هو سوده عليه شافني ارجف وابجي لازمني وخلاني على صدره وظل يلعب بشعري ويكلي لتخافين ماكو شي فضت
اني كتله لتطلع خابر عمامي شوف شكو
رحت اجيب تليفونه ندكت باب قصي يصيح عمي ابو حياة
ابويه فتح الباب لقصي
لكيت قصي شايل سلاح واكف اني هنا نهاريت ماعرف شكو الكل شايل سلاحه
ابو حياة : قصي خوما احد تاذى من الولد
قصي : عمي محد متاذي جنا كلنا بالبيت سياره هي ماشي رمت عالبيوت وطلعت ابويه يكول ذوله اهل الشيخ الي دعمه حمزه ديذكرونه بالفصل
واظاهر معرفو بيتنا فرمو على بيتكم وبيتنا وعمامي البقيه
ابو حياة : لاحوله ولا قوه الا بالله خاف شيخهم مات
قصي : عمي مادري عمام جمعو بيتنا واني عرفت انت متكدر تطلع تخاف على حياه فجيت اكلك
ابو حياة : قصي ودي حياه لعمتها واني حروح لبيتكم
حياة : جنت واكفه واني ارجف وماعرف شديحجون ابويه وقصي وراها قصي كلي لابسي عباتج داخذج بسرعه اني جبت عباتي لابستها ورحت لعمتي رحت ركض حظنتها وابجي وهي تهدي بيه وتكلي كافي مصار شي الحمدلله يله حبيبتي
كتلها اني خفت على ابويه لو جان واكف بالباب ورامين ذوله جان سويت اني لو ابويه صار شي وابجي كلتلي حبيبتي همه يعرفون لدالك شافو ماكو احد ورمو حتى يخوفونا بس
وراها عمتي اخذتني ونومتني بالغرفه
كعدت صبح شفتها ب بثمانيه فزيت ركض طلعت على عمتي بالمطبخ
عمتي : صباح الخير حبيبتي
حياة: صباح نور عمه . وين ابويه ؟
عمي: : لتخافين ابوج اجه بارحه بالليل دياخذج بس لكاج نايمه ففرشتله ونام هو هم وصبح طلع هو وابو محمد على ابو حمزه دشوفن شحيسون
تعالي خل نتريك
حياة : كعدت نتريك وراها كتلها لعمتي حروح لبيتنا بس هي مقبلت كالت ابوج كلي تبقين هنا هو يجي ياخذج
كمت ساعدت عمتي نظفت بدالها وهي سوت الغده
طبعا عمتي عايشه هي ورجله وكرار ابنها الصغير . وابنها محمد مزوج وعايش بيت وحد بس مرته صديقتي واحبها كلش
(بيت ابو حمزه )
ابو حياه : ابو حمزه شدكول انت اني شون انطي بنتي فصليه
ابو حمزه : والله ادري شبيدي اني كلهن مزوجات وباقيات صغار كلي ياخوي شسوي اني
ابو حياة : هاي بنتي الوحيده اجوي اشكال خطبوها ومقبلت اني هسه انطيها فصليه
ابو محمد : ابو حياة اهدء يمعود ليصعد ضغط ماتك
ابو حمزه : اخوي كلي انت حل واني اسوي
ابو حياة : ماكو روح على اهل الولد نتفاهم وياهم ونكللهم بناتنا صغار مو مال زواج بس حياه محد يجيب طاريها
حياة : اجه ابويه وابو محمد بس ابويه هالمره صدك حسيته تعبان وماله خلك يحجي شي كعدت يمه اكله بابا شبيك مو على بعضك
ابو حياة : حبيبتي مابيه شي بس لان بارحه منايم زين بس جيبيلي ماي اشرب
حياه : رحت جبت ماي وزعت عليهم وراها رحنا اني وعمتي نحضر الاكل والعصر ابويه راحو هو ورجل عمتي لعمامي حتى يرحون لاهل الولد
ظلينا كاعدين واجه بالي اسئل عمتي شنو يعني فصليه
عمه شنو يعني فصليه . عمتي استغربت لسؤالي
عمتي : ليش سئلين ؟
حياة : عمه سمعتكم انتي وابويه تحجون ودكلون فصليه وماكو غير حياه
عمتي : عمه ماكو شي حبيبتي سامعه غلط
حياة : عمه مسمعت غاط كليلي
عمتي : عمه هذا حجي يعني مو صحيح ولا اكيد بس مجرد كلام
حياة: اي عمه كليلي يعني شنو فصليه
عمتي : عمه الفصليه زواج بس هذا زواج مابي اي حقوق وهاهيه
حياة : يعني شنو مابي حقوق
عمتي : عمه شمدريني العرفه حجيته
حياة : وره كلام عمتي ظليت افكر يعني معقوله ابويه يزوجني وينطيني فصليه اصير وكلسع اكول لا بابا يحبني ميسويه وبعدين اني شعليه ينطيني هو اني الي دعمت ابنهم
رجع ابويه اخذني ورجعنا للبيت بس ابويه وجهه ميتفسر
وراها دخل للغرفه ومحجه شي ويايه ابد
لثاني يوم صبح جنت بالمطبخ داسوي ريوك شفت عمتي جايتنا وكالت يله سويلي ريوك وياكم اتريك
كعدنا نتريك واباع على ايويه ميحجي شي وعمتي مو على بعضها ابد
كملنا ريوك بس ابويه ماكل شي بس شرب جاي
وراها كعدت اشتغل بالمطبخ سمعت عمتي صيحني
رحت شفتها هي وابويه كاعدين كلتلي كعدي خل نحجي وياج
عمتي : حياة تعرفين انتي شون احبج اني وانتي بنتي مو بت اخويه
حياة: اي عمه اعرف شكو ترى خوفتوني
عمتي : لا حبيبتي ليش تخافين قابل شكو بس اكو موضوع دنحجي بي وياج .
ابو حياة : حياة باباتي تعرفين انتي وره متوفت امج اني صرت الام والاب الج وحاولت كدر المستطاع ماحسسج بفقدان الام
حياة: اي حبيبي بابا بس ليش هذا الحجي ؟
ابوحياة : حياه اهل الزلمه الي دعمه حمزه يردون 100 مليون وفصليه تزوج شيخهم
حياة: اي بابا واني شعليه .
ابو حياة : بتردد اعرف حبيبتي مالج علاقه بس . بس انتي الوحيده الي ممكن صير فصليه لان بنات عمامج مزوجان وباقيات صغار اطفال بعدهن
حياة: بابا شنو ذنبي اتحمل شي اني ممسويته ؟
عمتي : حبيبتي محتتحملين بالعكس حتزوجين شيخ عشيره بس اسمه كافي الكل تحلف براسه ويكلون عليه خوش زلمه ويخاف الله
حياه : نداريت على ابويه . بابا اني وحيدتك شون تقبل بهذا الشي
ابو حياة : والله مقابل والله فكرت اخذج واهج بس ذوله اهلي وناسي اذا صار بيه شي منو الج غيرهم
حياة: بابا انت مو دكلي انتي اهلي وناسي لو ماما عايشه جان قبلت بهذا شي . وراها شفت ابويه احواله كلش موزينه وتخربط وكمت اعيط وعمتي دكلي خابري على محمد يجي بسرعه يجوز ضغطه صعد لو سكره
خابرت محمد اجه ركض واجه قصي هم وحمزه وشالو ابويه وراحو للمستشفى مقبلو اروح وياهم اني ظليت ابجي واكول كله صوجي اني اني خليته يتخربط لو يصير بي منو الي ياربي ظليت ادعي واكول ياربي رد ابويه سالم مابي شي والله اوافق اصير فصليه اصير اي شي بس بابا يرجع
وعمتي كعدت تبجي يمي ودكلي لتبجين هسه يجيبوا مابي شي
وره ساعه اجوي جايبي وبكوه يمشي كعدوه واني ظليت نايمه بحظنا وابجي اكله بابا الله يخليك لتعوفني
هو ظلي يمسح على راسي ويكلي مابيه شي كافي بجي ضغطي صعد بس ونزلوا الي كافي مابيه شي
ورها جوي عمامي على ابويه يشوفوا بعد مسمعو متخربط
صبح كعدت شفت ابويه بعد نايم بس ظليت اباع عليه واكول الحمدلله هو يمي
وراها كعدت ظليت افكر شحسوي واكول كله صوج حمزه كله من وره دلع زايد محد يكدر يحجي وياه وظليت ادعي على حمزه يموت ونخلص منه
وراها كعد ابويه وسويتله ريوك وكلتله بابا اريد اكلك شي
ابو حياة : اي حبيبتي كولي
حياة : بابا بعد الي صار البارحه ومن شفتك تخربطت وحسيت صدك حبقى لوحدي مجرد هالفكره خوفتني اني ماريد صير مشاكل وطلايب
ابو حياة : حبيبتي اني الحمدلله مابيه شي
حياة : ادري بابا الحمدلله بس اني اعرف لو رفضت سالفه الفصليه عمامي حيزعلون منك واني اعرف همه شنو بالنسبه الك ويجوز الصار البارحه يتكرر ومنلكه احد يساعدنا
لذالك بابا اني موافقه اصير فصليه
***********
الهند
.......
خالد بعد مسويت العمليه وراها تاذيت كلش هواي دخولي للحمام صعب هواي شغلات صعبه ورجلي وحده منهن ميته ماحس بيها ابد
كرهت حياتي وطلعت دنيا من عيني اني بعد مجنت اركض منا ومنا هيج يصير حالي اخوتي متركوني ابد ظلينا بالهند شهر تقريبا وراها دكتور كال وره 6 اشهر عمليه ثانيه علمود رجل الي متتحرك واصلا عمليه نسبه نجاحه مو هوايه
صار وكت رجعتنا للعراق رجعنا على مطار البصره وراها رحنا للعماره وصلنا للبيت والكل واكف اهلي واصدقائي وجماعتنا كلها جوي يسلمون عليه وتحمدولي سلامه اني جنت تعبان بس بنفس الوكت مردت احد يحس اني قل مني شي ظليت اسولف واضحك واحجي
وراها ماراحو كلهم كعدنا اني والولد دنحجي سويتوا ويه الولد الي دعمني وتفاجئت من كلولي تفقو 100 وفصليه اني صرت عصبي عليهم كتلهم لكم اني جنت ارفض بكل فصل سالفه الفصليه هسه اني الي اسويها ظليت اهوس عليهم واحجي وارزل
وتخبلت بزايد من سمعت علي رامي على بيت الولد
وراها اجتي امي عليه دكلي . يايمه هدي نفسك يابعد عيني والله مصدكت اشوفك ليصير بيك شي كتلها يمه شون قبلتي بسالفه الفصليه تعرفيني ماقبل بهاي سالفه
كلتلي يايمه شبيدي اني همه زلم وصرفو وكتلهم خالد اذ سمع محيقبل
علي : اخوي هذا اقل شي عقاب على الي سوا ابنهم المستهتر والله لو بيدي ميكفيني دمه
خالد : كلي هسه هاي بت الناس الي حتجي المن نزوجها كلولي الك لو الحميد واثنينكم مزوجين لو لحسين الي خاطب بت عمك كلي المن ولد عمك تعرفهم ادبسززيه محد بيهم كفو انطي مره
علي : خوي لا ني ولا غير اني كتله فصليه للشيخ خالد
خالد : لا انت تخبلت وليدي لك شيخ خالد ياخذ فصليه لك اني
امي : عيني لتعصب ساعه السوده عليك علي
خالد يابعد امك انت شيخ الشباب وناس كلها تحلف بيك اذا انت محتاخذ فصليه ولد عمك محيصدكون مريه وبلاش انت محترضى على بت الناس
اخذها انت وره كم شهر ردها ياعيني لاهلها بس خل نكسر الشر
خالد : سمعت حجي امي صحيح ولد عمي واعرفهم ساقطين وهي مهما يكون مالها ذنب ظليت ساكت وكتلهم يصير خير
وصحت حسين يوديني للغرفه لان تعبان اخذت دوه ونمت
كعدت صبح صحت على حسين يجيني لان اني ماكدر اكوم ولا امشي الا اسوي عمليه ثانيه
اجه حسين طلعني بره وجابولي ريوك اجتي امل بنتي تريكت ويايه وكلسع حاظنتني
اجه علي كال اهل الولد الي دعمك خابروا وكالو العصر نجي نفضها ويجيبون الفصليه وياهم
خالد : ظليت اباع ماعرف شحجي شكول كتله خير ان شاءالله
**************
حياه : بعد ماوافقت ابويه نطى فلوس لعمتي وكللها روحي جهزيها واي شي تريد تشتري
طلعنا اني وعمتي بس اني ماكو شي عاجبني ونفسيتي صفر واحس مخنوكه كلش وبس واحد يكلي شبيج ابجي
وراها ظلت عمتي تفرني وتشتريلي كلابيات ودشاديش شالات فساتين احذيه هواي شغلات وحتى هي من عدها شترتلي شغلات
رجعنا للبيت كعدنا اني وياها نصفط بالغراض وظل بفكري اني الي عمري كله احلم بفارس احلامي وتالي حاخذ عجوز اني طبعا مجنت اعرف هو شكد عمره شنو اسمه كلشي ماعرف منه
وره يومين ابويه اجه كلي العصر حناخذج لبيت رجلج
اني حسيت ضربه براسي وماعرف احساسي وكتها خوف ومقهوره علي نفس لو على ابويه الي كظه عمره يربي بيه ويداري احاسيس محلوه وتخوف
اجتي عمتي عليه كلتلي خل روح للصالون احفلج ونشسور شعرج اني مقبلت بس بعدين كلتلي لظلين هيج ولتعتبرين نفسج فصليه لج انتي اخذتي شيخ عشيره اعتبري صار عدنا وفاه ومكدرنا نسوي عرس
لج اني لو اعرف حيجي يوم هيج ياخذون من عدنا فصليه جان بقيت بلازواج جان بالكي اخذوني اله
اني بوكتها صدك ضحكتني
وراها رحنا للصالون حفيت وسشورت وخلتلي مكياج خفيف وظليت اباع على نفسي اني مقهوره كلش بس عمتي ظلت ترفع معنوياتي وكلسع دكلي هذا الجمال كله طلع عدنا ومندري وضحك بيه وراها رجعنا للبيت
اجتي للغرفه يمي
عمتي : حياة حبيبتي انتي حتبدي حياتج الزوجيه ماريد يكلون عليج كلام مو حلو اريد يكلون تربيه واخلاق اريد ترفعين راس ابوج يمه
حتى اذا قهروج اسكتي الله ياخذ حقج منهم وان شاءالله يطلعون اوادم يمه وتحبيهم ويحبوج
حياة: عمه اني خايفه
عمتي : حبيبتي هذا طبيعي لان حتعيشين ويه ناس متعرفيهم وحتركين اهلج وكل ابنيه تحس هيج بس احنا منعوفج نجي عليج ونسئل وانتي هم تجينا
حياة : عمه يعني يخليني اجيكم
عمتي : دمعه بعيونها اي حبيبتي هو اذا حبج حيكوم يسوي كلشي الج ياعمه ماريدج طلعين سرج انتي ورجلج بره غرفتج دايما حافظي عليه واهتمي بيه وبيتج رجال اذا شاف اهتمام يكوم يجلب بي
حياة:ظليت ساكته وافكر بكلام عمتي شون تحجي وتريح الواحد وكلت اهم شي ابويه زين وبالكي الي حيزوجني يطلع حباب
وراها كمت لابست فستان طويل لونه ابيض وبي حزام رفيع اسود ولبست شال وردي صح طلعت عبالك عروس
نزلت ابويه شافني ظل يباع عليه ويبجي واول مره اشوفه يبجي بعد من صدك هنا حسيت دنيا ابد متسوه وركضت حظنته وظليت ابجي وهو يكلي اسف باباتي مجان بيدي شي اكدر اسويه
وراها بسته من كصته وحبيت اقلل من القهر ماته وابين مزعلانه كلتله لا عبالك حتخلص مني يوميا يمك وهالمره اني ورجلي وضحكت وهو باسني وظل يوصي بيه
اجه عمي اخذنا اني وابويه لبيت الشيخ هو بمنطقه قريبه علينا ظليت
طريق كله افكر شون حعيش وياه شون حكدر اكمل حياتي
وصلنا لبيت الشيخ لكينا زلم هواي يم البيت واغلبيه بيدهم اسلحه
نزلنا واني لازمه ايد ابويه واحس نفسي حوكع كلسع طبينا بطرمه
باوعت هاي شطولها حديقه كلش جبيره عبالك بستان اجوي زلم سلمو على ابويه وعمي ودخلنا جوه بصاله جبيره كلش واني كعدت بصف ابويه وظليت مدنجه وابويه ظل يحجي ويسولف وياهم بعدين
اجه ولد كال اجه السيد حيعقد اني كمت ارجف فات السيد وكعد وراها بدقايق نفتحت الباب شفت كرسي متحرك فات بس مكدرت اشوف وجهي ابد بس من فات حسيت الصاله كلها صارت عطره وطبعا كرسي متحرك هو يحركه يعني من هذا الحديث فات سلم وعلى ابويه وعمي وكعد يسولف وياهم وراها الشيخ عقدنا وكمل وابويه ندار عليه
كلي مبروك حبيبتي باسني بس اني مكدرت احجي ش وراها كام ابويه واني كمز وياه مجلبه بي وراح سلم على شيخ خالد وكله حياة امانه عدك هاي وحيدتي وماعندي غيره
هو كاله ان شاءالله اكون كد الامانه وهذا بيتها صار وراها ابويه يريد يطلع واني وراه امشي مجلبه بيده
ندار عليه كلي حبيبتي اني حروح اني هذا صار بيتج رجال مبين خوش زلمه واني باوع على ابويه بس بعيني كومه حجي
وراها سمعت شيخ خالد كال حسين فوتها لجوه واني بالكوه عفت ايد ابويه ورحت ويه الولد وماعرفه منو اصلا
**********
خالد :اجوي اىاهل البنيه جايبين البنيه وياهم اني جنت بعدني ممبدل فطبيت عليهم لكيتهم كاعدين فتت سلمت عليهم
شفت بنيه لابسه ابيض مدنجه وكاعده بصف ابوها ومجلبه بي بوكتها من صدك حسيتها بنتي امل ومن جلب بيه وكلش نقهرت عليها لان حسيتها خايفه كلش وراه عقدنا وابوه سلم علينا وهي مجلبه بي وراها صحت على حسين ياخذها جوه
