رواية ضحية والدي الفصل العشرون بقلم يمهر حسين
ضربتني راشدي وكالتلي:مو على مزاجج غصبا عليج تعوفي ولج هذا جان خاطفج شبيج انتي.زين انتي مافكرتي بأبوي وبأمي تتخيلين يوافقون علي من سابع المستحيلات هالشي
نهى:مايهمني اني اريدو وهو يريدني صح جان خاطفني بس هو جان زين وياي وساعدني وهزمني ومتندم على الي سواه وياي
نهى:انتي اكيد تخبلتي ولج ياحب يابطيخ هس هم لو غير شخص جان شوي اقتنعت وصرت وياج بس هذا الشخص انسي سهى احسلج تنسي
كمت ابجي وكتلها ماكدر والله ماكدر احبه هواي ومتعلقه بي كلش وهو هم كلش يحبني لوبس تشوفيه وتكعدين وياه ماجان كلتي هيج
نهى:الشغله موشغله انسان زين اولا .الشغله اكبر من هيج يعني انتي شون تقبلين تسوين علاقه وياه وتبنين احلام بالهوى .شوفي سهى انتي اختي واني لومااريد مصلحتج ماكلج هالحجي عوفي من هس عوفي لان اذا طولتي وياه اكثر راح تتعلقون بعض اكثر ويصير من الصعب اكثر تعوفينو بعدين.من هاي اللحضه انهي كلشي دوسي على كلبج وانهي العلاقه
سهى:سهل تكولين هالكلام لان ماتحسين بالي كاعد احسو
نهى:اعرف صعب عليج هالشي بس صدكي اذا طولتي اكثر وياه راح يكون اصعب بعد بهواي.ماريد نحجي هواي وصوتنه يعله نامي هس ومن باجر اريدج تمسحين رقمو ولاتتواصلين وياه ابد
تمددت بفراشي وضليت ابجي ومخنوكه .كعدت الصبح عيوني وارمه من البجي كل مااذكر الكلام الكالتو نهى كلبي يلويني واحس اختنك ومكدر اعوفه رحت للدوام بالكوة .حالتي كلش صعبه ومالي خلك اي شي بدنيا بعد ماجنت احس الدنيا بس اليه هس احس ماكو مكان بيها ولااي شي يخليني مرتاحه كأنما هو الدنيا كلها .خلصت محاضرات وطلعت لكيته يم للباب.باوعت علي جان مبتسم وينتضرني من شفته كبل دموعي كامن ينزلن بالزايد اجه عليه
قصي:خير شبيج لبش تبجين؟
سهى:مخنوكه هواي
قصي:من شنو ..يمعودة احجي مو وكفتي كلبي
سهى:اووف اريد امووت
قصي: خررب.... هس شون يعني امشي خلي نفوت جوة نحجي
فتنه للجامعه وكعدنه بنفس المكان الي نكعد بي
قصي:يله فهميني شبيج.شنو مضوجج
سهى:البارحه من جنه نتراسل.خليت الموبايل عالشحن واني اخذتني النومه وكاعدة نهى وشايفه وقاريه كلشي
قصي:اي وبعد
سهى:كتلها كلشي ..وكالتلي عوفي الشي هذا مستحيل مايصير. وانت تعرف شنو اقصد وليش كالت هيج.
قصي: اي اعرف لاني واحد منهم اعرف
سهى: من البارحه لليوم ابجي
قصي:متوقع هيج شي من اختج او اهلج طبيعي
سهى:والحل شنوو.اكيد ماراح يوافقون عليك لنفس السبب
قصي:اني عندي استعداد اسوي اي شي يطلبو مني اذا يريحهم انسجن من باجر اروح اسلم نفسي .شيريدون اسوي ماعندي اعتراض
من كالي هيج كمت ابجي بالزايد
قصي:كافي لاتبجين ..باجر راح اجي لأهلج وأعتذر منهم واخطبج واكلوللهم اني مستعد لأي شي حتى يوافقون عليه.
سهى:كل عقلك دتحجي
قصي:اي والله
سهى:خايفه كلش .
قصي:ابد لاتخافين الي اريدو منح تكونين قويه واني يمج ماعوفج ابد
شوي ارتحت من حجيت وياه بس جنت افكر الباجر شلون راح يكون!!!
رجعت للبيت فتت بغرفته وبدلت بعدين فاتت نهى
نهى:ها سويتي مثل ماكتلج؟
سهى: لا
نهى:ليش
سهى:باجر راح يجي يخطبني ويعتذر من اهلي وشيريدون راح يسوي
نهى:هاي من كل عقلج دتحجين
سهى:اي من كل عقلي هو كالي هالكلام
نهى:والله ماعرف شكلج بس ماتوقع ابد يوافقون اهلي
جنت انتضر باجر يجي ومايجي احساس متضارب مرة قلق توتر خوف كلشي .نمت وكعدت الصبح جان يوم الجمعه صليت وقريت قران ودعيت انو اهلي يسامحونو ويوافقون علي ضليت ادعي.صارت الدنيا مغرب ودزلي رساله(حياتي بالساعه8 ونص راح نجي اني وكم شخص اجيبهم وياي)
احس كلبي كام يدك عالسريع وبس افتر معد اركز بشي رحت كلت لنهى هي الوحيدة تعرف وبس هي تدري بحالتي تعشينه وخلصنه صارت الساعه 8
كل ما اسمع حس اباوع من الشباك .رحت لنهى وكتلها:شتتوقعين يصير
نهى: والله اي شي ماكاعد اتوقع بس الله اليستر
اندك الباب ورحت اباوع اني ونهى من شباك غرفتي باوعنه عبدالله فتح الباب فات رجال شوي جبير بالعمر وواحد انوب لابس مثل شيخ الجامع بعدين فات قصي
نهى:هذا هو؟
سهى:اي اي هذا هو..اووف احس كلبي راح يطير
نهى: على كيفج بنفسج
نزلنه اني ونهى حتى نتصنت عليهم
بالبدايه سمعنا صوتهم يتسالمون واجه بابا سلم عليهم ضلو يحجون بالبدايه بغير مواضيع.رحت اني رحت للمطبخ اسوي جاي الهم .فجاة سمعت صوت بابا عله رحت ركض
بابا:هذا الشي مستحيل اني مانطي بنتي لواحد مثل هذا.واني هس بيدي اسلمو للقانون بكل عين وكحه يجي يخطب عندي شوف ياحج ناصر اني محترمك ومحترم انك ابيتي بس هاي السالفه اني ماسكت عليها
رجع الرجال كال لبابا: ياعبدالرحمن الولد موناكر غلطو وجاي يعتذر ومتندم وماعندو اي مشكله حتى اذا انسجن هو راد بنتك على سنه الله ورسوله
رجع ابوي يعيط وكلش اشتد النقاش بينهم وصوتهم عله
اخر شي بابا كال:حرمه ماانطي لويموت وهس اخابر الشرطه تجي تتصرف وياه.من كال هيج احس معد اتحمل ابقه ساكته فتت للاستقبال نهى حاولت تمسكني بس مكدرت .فتت متعصبه ودمي فاير كلت لابوي:اني اريدة وموافقه علي وحرام عليك هيج تسوي
عبداالله كبل اجه ضربني وطلعني برة من ضربني عبدالله قصي اجه على عبدالله وكاله لاتمد ايدك عليها ورجعت العركه صارت بين عبدالله وقصي.اني امي ونهى سحبني للغرفه وسدن الباب واسمع صوتهم متعاركين بعدين اجه بيكم مال شرطه واخذ قصي.
معد اكدر ضليت احجي وابجي واصيح على ابوي وعبدالله ماخليت شي ماحجيته.وامي ونهى يريدن بس يسكتني.فات عبدالله عليه وكال:اذا ماسكتي اكسر راسج واذا كلتي بعد اريدة ومدري شنو اموتج والله
سهى:انت ماتتدخل بحياتي ازوج الي اني اختارة فهممت لو لاا
اجه جرني من شعري ويضرب بيه بالكوة حجزنو امي ونهى عني طلع وقفلن الباب وهنه ضلن وياي بالغرفه
ماما:ادري هذا منين طلعنه فجاة احنه ماصدكنه خلصنه منهم .وانتي شون تفوتين عالزلم وهيج تكولين كل عقلج ننطيج لهيج واحد جان خاطفج
سهى:اي ارييييدة افتهموووو
ماما: ولج شصايرلج انتي صاحيه لو مخبله
سهى:اي اني مخبله موصاحيه واخذة يعني اخذة .يعني هوااي ابوي شايل همي خايف لاينطيني لواحد جان خاطفني من هذا سوى شي وكت انخطفت شوكلشي ماسوى هو كل همو ماينطي لان عداوة بينهم مو على مودي ابد
ضليت احجي ماسكتت من قهر كلبي
مدري شلون عدة هذا اليوم بالضيم والقهر والبجي والحسرات عدة.ثاني يوم الصبح كعدت اسمع ابوي يكول لعبدالله الشرطه طالبين سهى على مود ياخذون افادتها بس اني ماراح اخليها تروح لان شي اكيد راح تتنازل علي ويطلع اذا اجو الشرطه للبيت كوللهم اي سالفه ولاتخليها تطلع عليهم.
تخبلت من سمعتو كال هيج ومعد اعرف شسوي كمت افكر اروح بنفسي للمركز انهزمت الضهر من البيت بدون مايدرون كلت لنهى رايحه لصديقتي شوي وارجع
رحت بتكسي للمركز وصلت حجيت ويه ضابط سألته على اسم قصي اذا موجود يمهم لو لا كالي اي يمنه كتلع اني اريد اتنازل كالي لازم يم القاضي بالمحكمه تتنازلين كتله وين الكي القاضي كالي الاحد باجريجي.رجعت عالسريع للبيت الحمدلله محد حس بيه .اجه ثاني يوم الاحد بحجه اروح للدوام رحت عالمركز الضابط كالي نص ساعه بعد للمحكمه انتضرت نص ساعه وفتت للمحكمه واجه القاضي وجابو قصي شفته جان تعبان شوي.تفاجأة من شافني .تنازلت عنه وكلت هوالي هزمني دونو اقوالي والقاضي انطاه افراج بس مايطلعو اله بعد مايكملون اجراءات كم ساعه هيج
طرت من الفرح من انطاه افراج.ماكدرت ارجع للبيت لان يحسبوني بالدوام رحت للجامعه .خلصت دوام ورجعت للبيت. بدلت ونمت كعدت المغرب باوعت عالموبايل اجتني رساله من قصي(حياتي اني طلعت هس وبخير.بس اريد اشوفج ضروري)
فزيت من فراشي من الفرح من شفت رسالته
صارت الدنيا ليل نزلت للمطبخ اعاون امي كام يحجي ابوي بالموبايل فجاة صاح وناداني
بابا:انتي صحيح رايحه متنازله بالمحكمه؟
سهى:اي
بابا:وووولج كلببيه شووون هييج تسووين حيوووانه
عبدالله كبل اجه عليه شبعني كتل ومحمد وامي يحاجزوه عني ماينحجز موتني ضرب
بابا:بعددد طلعه من البيت ماكووو حتى دواووم بعد ماكووو.اذا طلعت كلكم مسؤلين
حبسوني بالبيت لاطلعه ولادوام واخذو الموبايل مني بقيت شهر على هاي الحاله الليل اكضي بجي والنهار ملل ونوم من القهر كلش ايام صعبه ماتنجرع ماضل عندي شي يونسني اويلهيني . عدنه جيرانه حايط على حايط بنتهم بعمري تعرف كلشي صار وياي وتعرف اني احبه ويحبني واهلي ميقبلون وحابسيني مرات اخذ الموبايل مالها واخابرة او اراسله منو.من نتخابر اني مكدر حتى احجي بس ابجي وهو يضل يهدي بيه يكلي ماعوفج ابد
مررت اياام وبدو يخلوني اروح لادوام على مود بس انجح حتى ماتروح عليه السنه.كمت اداوم وانطيته خبر اني كمت اداوم .اروح للدوام واشوفه هناك .ارتاح كلش من اشوفه وهو هم يكلي اليوم الي ماشوفج او اسمع صوتج مامحسوب من عمري.بذات يوم رجعت من البيت وامي تلكتني
ماما:اليوم راح يجون ناس يخطبوج
سهى:شنوو.من هس كولولهم موموافقه البنت ولااريد اشوف وجوهم
ماما:شنو هذا الحجي عيب استحي قابل تضلين ماتزوجين يعني
سهى:بلي اتزوج قصي وبسسس وحاولو تستوعبون هالشي
ماما: راح تتعبين اذا تضلين مخليتو هيج ابالج .شوفي هذول خوش ناس وخوش ولد ومكمل دراسه
ضلت تحجي امي وياي يفوت من هين الحجي ويطلع من هين
اجو باليل واهلي وافقو اسمع ابوي يكول احنه موافقين بس بقت البنت
اجت امي صاحتني كدام النسوان يريدن يسمعن رأيي
كتلهن اني موموافقه ومافكر بالزواج ابد
تفاجئن وضاجن من هيج كلت ورى شوي راحو
واجه ابوي يكلي:توافقين يعني توافقين وبعد3 ايام هم راح يجون ونحدد مهر
سهى:بابا اني موموافقه وياريت ماتجبروني اطردهم بنفسي اذا جو
ضربني راشدي من كلت هيج .ورجعت امي هم فوكاها تكلي وافقي وخوش ناس ومدري شنو
كمت احس الدنيا كلها تخنكني صرت اكره البيت واهلي وكلشي .رحت ثاني يوم للدوام وشفت قصي وكتله على الصار وياي .تخبل وكام يحجي ويغلط ويسب مات قهر لان هيج اهلي ديسسون وياي.كل هذا ديسوونه بس حتى انسه قصي
قصي:سهى انتي تحبيني؟
سهى:اي هواي
قصي:نجوم السما اقررب لابوج ولاهلج كلهم اذا فككر يزوجج غيري او يبعدج عني.وعيونج هااي الي تعبت من البجي وعيوونج اخذج ونزوج بس اصبري رجعت للبيت .وامي تلكتني
ماما: ابوج دز خبر للجماعه الي خطبوج كاللهم البنت موموافقه
سهى:صدك
ماما:اي صدك لعد شتريدين يتساحى وينفضح وكت يجون وتخربطين بالحجي كدامهم
سهى:اي احسسن
فرحت كلش من حسيت انهم لازم يقتنعون انو ماازوج على كيفهم
مررت ايام واشهر .ورجع قصي دز جماعه انوب لابوي بلكي يقبل.وهم صارت عركه وماقبل .واني بكل مرة ماعندي غير دموعي ابرد عن كلبي بيهن
تعبت هوااي وقصي هم تعب بس ماستسلمنه ابد
مرت سنتين على هاي الوضعيه وكل مرة يجي يتقدم وابوي ويرفض وتجيني خطابه وارفض على مودة .كل المنطقه صارت تعرف بهالشي .اهلي رافضين من جيهه واني وياه متمسكين بعض من جيهه ونلتقي بالسر من دون ميعرفون جانت الاغنيه المشتركه بينه ودايما نسمعها هي(اتمنى روحي تصير طير وتجيكم وتضل حد ماموت تفتر عليكم)
خابرني بيوم قصي وكالي اليوم راح احاول هم مع ابوج وراح اجي واجبيب وياي ناس.كتله انشالله خير مع العلم فاقدة الامل مثل كل مرة .جانت نهى عدنه والدنيا عصر اجه وجاب ناس وياه اني ضليت بغرفتي مانزلت ورى نص ساعه هيج فاتت عليه نهى تضحك وتكول:وللج كوومي انزليي ابوي وااافق اكوومي شعندددج هين
ماكدر اوصف شعوري من الفرحه بجيت بس هالمرة دموع فرح سجدت كبل من سمعت الخبر وشكرت ربي لان حققلي الي اريدة بعد معاناة كلشش طويله
نزلت اركض باوعت امي تضحك وتكلي وافق ابوج راحو وطلع ابوي وياهم.كمت خابرت على قصي بس اريد اعرف شون هيج وافق ابوي .خابرته ورد جان صوته يضحك هو هم مومصدك مثلي.
تمت الخطبه على خير بعد كل هاي المعاناة والحمدلله تزوجنه وهس عدنا بنت اسمها نور وولد اسمو عبد السلام.هاي هيه قصتي بدون تزويد او مبالغه.واريد من كل اثنين يحبون بعض لاتستسلمون ابد ولو كلها تصير ضدكم لايهمكم هالشي ابد احله شي يصير مع الانسان من يتزوج الي يحبه صدكوني ماكو احله من هالشعور تعبنه هواي اني وقصي وتأذينه بس ماكطعنه الامل ولاتنسون الدعاء.وشي اكيد النصيب هو الاساس يعني شون ممكن اعرف قصي وازوجه الي جان بيوم مشترك على خطفي سبحان من يغير الاحوال....
اتمنى تنطوني رأيكم بالقصه وبالنهايه.....
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
