رواية حرم الاسود الفصل الثاني والعشرون بقلم بتول ابو الليل
بعد گلبي اشتعل بلكت يشوفوك!
ينشاف الهوى من يصير دخـان....!🖤
.➛ ✿✿ ✿✿ ✿✿ ✿✿ ➛.
أليڤ : اكلج وين راح أيسر شو طلع بسرعه حته مكلي وين طالع.
رهف : والله ماعرف اصلاً شفته بس علئ العشه جان يمج بالغرفه
أليڤ : وشنوو قصدج عيني حابسته يمي بالغرفه غير زوجي وكاعد يمي وين يكعد لعد
رهف : لأ حبيبتي والله افتهمتيني غلط مو هيج جان قصدي بس كتلج مشفته وهوه يمج انتِ
أليڤ : اممم اي واضح
رهف : اتصلي عليه شوفي وين وكوليله يجيب وياه علاجي خلص ليوم لبارحه نسيت اوصي.
أليڤ : احنه نضل نصرف علئ العلاجات والله يالله
بقت رهف تباوعلها بحزن تقصد تسمعها هل كلام لأن اخوها يصرف فلوسه علئ العلاج عافتها وراحت اندك باب البيت راحت أليڤ فتحته جان جون صديق آرون دنك راسه وكال
جون : سلام عليكم
أليڤ : وعليكم السلام شلونك شخبارك
جون : بخير الحمدالله أيسر موجود؟
أليڤ : لٱ طالع عبالي وياك لعد وين راح شو حته محجالنه شيء
جون : يمڪن عنده شغل يلا اترخص اجي غير وقت
أليڤ : لاا ليش تفضل ادخل هسه يجي أيسر وعموو بغرفته متمدد اذا تحب اخلي يڪعد وياك
جون : لا عوفي تعبان خطيه اجي بغير وقت واڪعد وياهم اترخص خويه
أليڤ : براحتك عيوني
هز راسه بأي عافها وراح بقت تباوع وراه ابتسمت وسدت الباب دخلت للبيت
رهف : ها منوو
أليڤ : هذا جون صديق اخوج
رهف : هاا وشرايد
أليڤ : علمود اخوج جاي ومالكاه وراح
رهف : تمام
أليڤ : عندج بعد سؤال لوو اروح انام؟
رهف : شبيج أليڤ ليش هيج تحجين وياي مجنتي قبل هيج ليش متغيره مضوجتج بشي وماعرف احجيلي
أليڤ : ليش شمسويه هسه اني اشو حسره احجي كلمه تاكلوني وتبلعوني تحسسوني اني وحده غريبه وموو منكم وبيكم
رهف : لا حبيبتي والله اني اعتبرج اختي ومانسه وكفتج وياي سنه كامله اني عدكم مافد يوم قصرتي وياي بس احسج شويه ضايجه مني و ..
أليڤ : لاضايجه ولاشي انتِ تتحسين من كلشي.
رهف : تمام هذا الي اريده متضوجين لأن احنه موو بس بنات عمه اخوات وصديقاات
أليڤ : ايي
رجع اندك باب البيت باوعت أليڤ بستغراب لرهف
أليڤ : شنوو رجع جون؟
رهف : يمڪن اخوي موو جون روحي افتحي
أليڤ : أي يمڪن
راحت تفتح الباب فتحته انصدمت بالي تشوفه آرون شايل اليان بحضنه وهيه فاقده بقت فاتحه عيونها بصدمه.
آرون : ابتعدي عن الباب خليني ادخل
ابتعدت وهيه صافنه دخل بيها للبيت وهوه شايلها انصدمت اخته من شافتها اخذها خلاها علئ القنفه.
أليڤ : خيرر منوو هاييي وليش جايبها علييينه؟ ؟؟
آرون : هاي اليان
أليڤ : اي اعرفها نفس البنيه صديقتك الي تحضن بيك وداريك موو هيه نفسهااا ليشش جايبها لبيتي فهمنييي شديصير أيسررر فهمنييي
آرون : اول شيء اهدي واني افهمج كلشي صدكي ماڪوو أي شيء من الي بالج البنيه حيل مريضه هسه وموو مال نتعارك ڪدامها نحجي بغرفتنه تمام حبيبي.
أليڤ : لاااا موو تمام هسه تفهمني ليش جبتها واذا مريضه عدها اهل يعالجونها احنه العدنه حايرين بيهم وبعلاجهم عايزين ضيم ملجأ للفقراء احنه لوو ميتم مجاي افهم.
آرون : أليڤ الزمي حدج واحجي عدل لاتنسين التحجين عليهم اهلي اشك حلكج قسم بالله اذا تمسيهم بحجايه.
أليڤ : اني مليت منك ومن هايي تصرفاتك الي ماتنجرع ماخليتلي أي مكانه بحياتك ولا اعتبار كولي ماريدج وفضني شڪوو تحرك بكلبي هيييج.
آرون ; بابا شبيج انتِ تخبلتي شنوو ماريدج غير مرتي وحبيبتي شفتهمتي من الموضوع هسه انتِ وحكمتي البنيه مريضه تخيلي تڪونين مكانها مراح تحتاجين لمساعده
أليڤ : لاتقارني بيها اني ماخلي زلم غريبه تساعدني لوو اهلي لوو انتَ زوجي هيه شتصير منك وتساعدها هاا فهمني بنت عمك بنت خالك.
رهف : شبيها هيه ليش متڪعد
آرون : مريضه خويه حالتها حيل تعبانه ولازمها راحه احجيلكم كل السالفه بس انطوني شويه مجال وخلونه نهدئ ومانصيح ونفضح نفسنه كدام العالم عيب
أليڤ : هههه شوف منوو يحجي بالفضايح لوو تخجل من العالم ماجيت للبيت وانتَ شايل بنيه بحضنك وڪدام مرتك.
آرون : استغفرالله شبيج انتِ صدك تحجين واعيه علئ نفسج بابا كتلج مريضه وفاقده شلون انزلها اسحلها سحل غير اشيلها.
أليڤ : ايي شايفني جاهله كدامك هذيج المره عبرتها هل مره ماسڪت والله هسه طلعها من بيتنه هسسسه
آرون : اليان وحده من العائله وراح تعيش ويانه وماتطلع لوو شما يصير تتقبلونها اهلاً وسهلاً ماتتقبلونها هذاك الباب.
أليڤ : يعني تطردني عليها موو؟
آرون : أليڤ حبيبتي بويه شبيج ليش هل تصرفات ماتعرفيني شنوو وعيونج الاحبهن ماڪوو شي بينه معتبرها اختي سوتلي فضل كلش جبير وساعدتني بموضوع كلش مهم وهسه هيه محتاجه مساعده ومريضه ومالها احد ابوها وامها ميتين يعني ماعدها شخص يوڪف وياها واني الوحيد الي اكدر اساعدها بس اخليها تتحسن شويه وتطلع من البيت ماتبقه طول عمرهاا ويانه
أليڤ : ماڪوو غيرك يساعدها ألا انتَ خطيه مگطوعه من شجره لاعمام لاخوال شايفني طفله وتضحك عليه لوو شنوو بالضبط فهمني
آرون : لوو اڪو شخص مجان جبتها علينه ثقي بالله كم يوم بس تتحسن تروح منا متبقه وياج لاتخافين
أليڤ : ماريدها ولا راح اتقبلها بيتي خلي هل شيء بالك.
عافتهم وراحت لغرفتها مسح وجهه بتوتر وڪعد يم اليان تقربت اخته بالكرسي يمه تباوعله بتسأل.
رهف : احجيلي شبيها ليش هيج حالتها.
آرون : اخوها يشربها مخدرات ومخليها واصله لمرحلة الادمان والجنون.
رهف : اسم الله دخيلك ربي ليش شيريد منهاا.
آرون : علمود الفلوس ابوها مسجل الهاا ورث وسووها مدمنه مخدرات ومجنونه بس حته ياخذون حصتها.
رهف : انتَ منين تعرفها وتعرف حياتها احجيلي اني شاكه بوضعكم وحقها أليڤ تضوج ترا جايب بنيه بحضنك كدامها شتريد منهاا تسوي تفرح.
آرون : تدرين هايي البنيه التحجون عنهااا بسببها ابونه طلع من السجن وبسببها اني هسه كاعد وياكم ومامسجون.
رهف : شقصدك مجاي افهم.
آرون : اليان بنت صاحب الشركه الي بسببها ابوي انسجن وهيه الي ساعدتني وخلتني اطلعه ونقذتني من ادين الشرطه هذاك اليوم
رهف : عزاا صدك تحجي شلوون ثقت بيك وشلوون قبلت طلع بابا وين عرفتها انتَ مجاي استوعب شيء.
آرون : السالفه طويله كلش غير يوم افهمج كلشي اريده منج هسه هوه تخلين اليان يمج بالغرفه لأن ماعدنه مكان زايد بالبيت
رهف : اي عادي خليها يمي اڪيف تبقه وياي سوالفها حلوات
آرون : ترا هسه مريضه وما واعيه علئ تصرفاها ابد لاتحاولين تتقربين يمها ومن تكعد تجيني وتكوليلي.
رهف : تتعافه انشالله ماتبقه علئ هاي الحاله
آرون : انشالله ..ابوي وين شو ماڪوو.
رهف : اعتقد نام هسه لأن هوه من وكت راح لغرفته تمدد
آرون : شرب علاجه. ؟
رهف : أي شربه ورا العشه
آرون : وانتِ
رهف : خلص العلاج اليوم وگلت لأليف تخابرك يمڪن نست
آرون : صدك تحجين مخلصه ومتكوليلي غير تحجيلي حته اجيبه وياي باجر الصبح اطلع واجيبه هسه الصيدليات كلها عزلت.
رهف : عادي حبيبي حته لو متجيبه انتَ هم ماعندك فلوس واحنه كل يوم لازم ناخذ علاجات وهيه غاليه ڪلش.
آرون : واني علمود شنوو اشتغل واتعب غير عليكم اريدكم تبقون بصحه وعافيه انتم عائلتي.
رهف : ياعمري انتَ الله يخليك النه ويحفظك ربي من ڪل مكروه
آرون : حبيبتي يلا راح اخذ اليان اخليها يمج واروح اراضي هاي المجنونه هل ايام مادري شبيها تصرفاتها موو طبيعيه صايره تشتلع الگلب ومتسمع مني ابد.
رهف : هههه خطيه تغار عليك راضيها لاتخليها ضايجه.
آرون : هوه اني شمسوي هسه احبها والله اكثر من روحي وماريد ازعلها بس شسوي اليان خطيه هسه بحاجتي واني وعدتها اوكف وياها بأي شيء وبس اريدها تتحسن حالتها ترجع لبيتها وتحاسب الكل علئ تصرفاتهم .
رهف : اي والله خطيه زين سويت من جبتها علينه خليها هنا منا لحد متتعافه.
هز راسه بأي دنك عليها شالها واخذها لغرفة اخته دخلها بالغرفه مددها علئ السرير غطاها زين وكعد علئ طرف السرير يباوعلها
آرون : مع الاسف علئ هيج اخوه دمرج وتعذبج ياريتج لو جنتي اختي اخليج بنص عيني حيل ضايج علئ وضعج اليان ماتوقعت اشوفج بهل حاله ابد وين ضحكتج وسوالفج وين هسه شكلج وضعج بس لاتخافين اني وياج ماعوفج ولٱ راح اسمح لأي بشر يأذيج
نايمه ومتدري شنوو يحجي ابتسم بهدوء عافها وطلع من الغرفه راح علئ غرفة مرته أليڤ دخل للغرفه جانت كاعده وتبجي كعد يمها سحبها لحضنه دفعته بقوه
أليڤ : وخر عني دير بالك تلمسني من باجر اروح الاهلي.
آرون : تكدرين تفارگيني؟
أليڤ : أي اكدر ع اساس انتَ هسه ميت عليه المكان الي ميبقالي بيه كرامه مابقه بيه دقيقه.
آرون : شبيج بابا صدك تحجين شنوو ميبقالج كرامه شحده الي يقلل من قيمتج وكرامتج واني موجود وعيونج البنيه مريضه ويتيمه مالها احد وهيه ساعدتني واني مديون الهاا واذا علئ موضوع لفلوس لاتخافين اني اشتغل وكلشي تردينه اوفره الج لاتهتمين لشي ابد
أليڤ : ماريدها تبقه ويانه هاي البنيه مخليه عينها عليك واكص ايدي اذا ماطلعت تمثل وموو مريضه جذابه اعرف هل نماذج كلش زين وانتَ موو طيب گلبك بسرعه صدكتها.
آرون : لا حبيبتي البنيه مريضه متجذب وحالتها كلش موزينه حقج تحجين هيج لأن ماتعرفينها بس هيه خوش بنيه وماتفكر مثل تفكيرج تعتبرني اخوها احنه مثل الاخوه
أليڤ : هههه اخوه وين اكوو اخوه بهل وكت جذابه تحبك اعرفها شكوو تحضن بيك هذيج. اليله
آرون : ههههه وانتِ شذكرج بهذيج اليله هسه
أليڤ : ليش تضحك مسويه نكته عرفت السالفه صدك وضحكت موو تدري بيها تريدك موو
آرون : شيلي هل فكره من راسج ماكوو شي بينه وحته اذا هيه تحبني اني ماحبها مابدلج بألف وحده انتِ تارسه عيني
أليڤ : أي اضحك عليه بهذا الكلام
آرون : ليش اضحك تعرفيني اموت عليج حبيبت الطفوله انتِ
رفعت عيونها بملل ضايجه سحبها لحضنه يبوس بخدودها خله ايده جوه شعرها ودنك يبوس شفتها فزو علئ صوت صراخ اليان
أليڤ : شكوو منوو يعيط
كام آرون يركض طلع من الغرفه راح علئ غرفة اخته جانت اليان كاعده لامه رجليها علئ صدرها ولازمه شعرها بثنين اديها وتهز براسها بجنون
اليان : طلعووووني منوو انتم منوو اريددد الحبوووب اررريده.
رهف : اهدي حبيبتي شبيج
اليان : رووووحي منااا روحيي ماريدكم ماااريد شي منكم خلووني وحدي عووفوني بابااااا باباااا
آرون : رهف أليڤ اطلعو من الغرفه بسرعه
أليڤ : اوووف منك أيسر اوووف عايزين مجانين احنه شهل وضعيه هاييييي
عافتهم وطلعت راحت اخته طلعت سد الباب وتقدم نحوها جانت مدنكه وتبجي وتهز براسها خله ايده علئ شعرها رفعت راسها تباوعله عيونها مثل الدم.
آرون : اليان باوعيلي هذا اني تذكريني موو
اليان : بابا بابا
ضحكت بنص دموعها وكامت حضنته بكل قوتها وهيه تبجي وتشهك بقه متجمد ماعرف شلوون يتصرف
اليان : بابا انتَ رجعت جنت اعرف متعوفني شوف والله مازعلك بعد ماضوجك منيي لاتروووح لاتعووووفني
لزمها من كتافها وكعدها علئ السرير رجع شعرها ورا اذنها كعد علئ ركبه ولزم اديها
آرون : لاتخافين اني وياج ماعوفج اهدي كافي بجي يلا اهدي.
اليان : بس وحده والله اموت اذا ماشربها راسي راح ينفجر ماكدر مااااكدررر راااح اموووت وييينها وييين شمرتوهن اريددد الحبووووب اريده جييييبه الييييي
صارت تضرب علئ وجهه وتبجي كعد يمهاا يلزم باديها دفعته بقوه وكعته من السرير
اليان : وخررر وخرر لاتتقرب يمييي كلكم تكرهوني ليششش متنطوووني الحبووب وينه يالله راح راسي راسي.
آرون : كااافي اسكتي انتِ تعرفين الحبوب هذا شنوو ولج راح يموتج
اليان : بس وحده فدوة راسي راح ينفجر والله
آرون : اهدي شويه واني هسه انطيج حبايه
اليان : ههههه تنطيني موو
آرون : أي انطيج بس لازم تهدين وتبطلين بجي وعياط.
هزت راسها بأي تقرب يمها كعد مسح دموعها بيده يباوع لعيونها.
آرون : كومي وياي غسلي وجهج يلا
اليان : الحبايه
آرون : احنه شتفقنه لازم تبطلين بجي وتسمعين كلامي حته انطيج الحبايه
اليان : موو سكتت فدوة انطيني يلا
آرون : كومي وياي
كام ومد ايده الهاا باوعت الايده بخوف بلعت ريكها ولزمت ايده اخذها للحمام غسل وجهه بيده ومسحه بالمنشفه رجعها للغرفه خلاها تتمدد علئ السرير دار وجهه يريد يبتعد لزمت ايده
اليان : وين وين رايح لاتعوفني بابا فدوة والله مازعلك بعد اسمع كلامك كله.
آرون : هسه راح اجيب الحبايه واجي
اليان : هههه ايي ايي اريدها
آرون : يلا خليج هنا لاتسوين أي تصرف غلط واني ماطول شويه واجيج
هزت راسها بأي عافها وطلع من الغرفه سد الباب وراه جان ابوه واخته كاعدين بالصاله
رحيم : هاا بويه شلونها لبنيه
آرون : حالتها كلش صعبه راح انطيها علاج مهدئات بس شويه ترتاح علمود اخذها لدكتور اخصائي يخصص الهاا علاج يخليها تتعافه من المخدرات
رحيم : حسبي الله عليهم ليش يشربون البنيه مخدرات ماضل رحم بگلوب العالم
آرون : اخوانها اكبرر حقراء علئ وجهه الارض.
رحيم : لاتدخل بيهم يابويه هستونه گلنه يالله
آرون : مادخل بيهم بس اليان خط احمر مستحيل اسمح الهم يأذونها تبقه يمي منا لحد ماتتعافه وتتخلص من هل مرض.
رحيم : خايف عليك بويه لايأذونك هذول الناس ماعدهم رحمه
آرون : لاتخاف حبيبي مايكدرون يسوون شيء همه كل همهم الفلوس واخذوها شريدون بعد اكثر البنيه تبقه يمي اصلاً همه يكيفون تروح من حياتهم يريدون بس يتخلصون منهاا.
رهف : خطيه والله حالتها كلش صعبه عمري ماشفت اخوان يكرهون اختهم ياريت لوو كل العالم مثلك
آرون : هاي الناس كل همها الفلوس عاميه عيونها متفكر بضمير وانسانيه ابد.
رحيم : أي والله
آرون : خليني اخذ الها العلاج
عافهم وراح جاب علاج مهدائات الاعصاب ورجع للغرفه جانت كاعده علئ الارض لامه رجليها علئ صدرها ومخليه راسها بين رجليها
سد الباب وراح صب كلاص مي واخذ الحبايه وراح يمها
آرون : اليان كومي هاي الحبايه
رفعت راسها تباوعله عيونها كلهن دموع باوعت الايده ابتسمت كامت بلهفه اخذت الحبايه كبل شمرتها بحلكها وشربت مي بلعت ريكها بتوتر.
اليان : موووو هيييه ليششش تجذب ويين الحبايييه وييين موو هاي الحبايه مو هيييه
لزمته من قميصه تصيح شويه وحست بدوخه من العلاج.
ارون : اششش اهدي يلا تعاي رتاحي
اليان : اريد الحبايه اريدها بابا لاتعوفني لاتروح.
غمضت عيونها بتعب مددتها علئ السرير غطاها بالبطانيه وكعد يمها يمسح علئ شعرها بيده
آرون : اعالجج والله وارجعج اقوه من قبل اخليج دفعينهم الثمن غالي تنتقمين من الكل
وخصوصاً النذل تيمور بيدج اخليج دخلينه السجن هل انسان حرام يبقه عايش بين الناس.
محاسه علئ شي كام من مكانه دخل للحمام غسل وتوضه راح علئ المكتبه الي بالغرفه شال القرآن باسه وكعد يم راسها
فتح القرآن يقرا بيه ويردد الايات بصوت هادئ وحلو.
...
اريانا : كلام شذر صدمني كلش بقيت صافنه بوجهه تيمور هوه وجهه صار ينطي الوان من شافني لازمه الجهاز. مالـته بيدي.
تيمور : ءأحم شبيج ليش لازمه الجهاز شكوو
_الف مبروك راح تصير أب
تيمور : أب؟
_شذر حامل
عقد حواجبه مستغرب شمرت الجهاز علئ السرير وطلعت من الغرفه بدون ماحس دموعي نزلت علئ خدي
ليش ابجي من شنوو ماعرفت تيمور كلشي كلشي متوقع منه اني بعيني شفتهم سويه
لحكني تيمور يركض لزم ايدي دفعته من صدره بقوه وصرخت بوجهه
_اييييدك دير بالك تلمسني واحد نذل الله ياااخذك تيمووور الله ياااااخذك اكرهككك يااااحقيررر يانكسسس رووووح لحبيبتك روووح اطمن علئ ابنك والله اذا مافضحتك انيييي الغبيه ولك انييي الحقيره شلوون لحد هسه ساااكته علئ هاي تصرفاتك. هاي ومعبرتهن كلشي
اني اعرف كلشي مع هذا ساكته ليششش فهمني ليششش لأن اخاف من كلام الناس،بس هسه لاااا انتَ تجاوزت كل الحدود وخلص صبري خلصت طاقتي ماكدر اتحملك بحياتي بعدد مستحيل اتقبلك تيموور مستحيييل
تيمور : بس اسمعيني اراينا وعيونج ماكـ ..
_اسكت اسكتتت مااااريد اسمع أي شيء منك انيي ادري بعلاقتكم واعرف صاير شيء بينكم مع هذا انجبرت اكون مرتك وتقبلت الوضع بس هسه لاا اختلف الوضع كلش صاار الموضوع جدي وبيه طفل طلكني وتزوجها لوو تخليني اروح واحجي كدام الكل عن علاقتكم وابنكم ابن الحرام قسم بالله هل مره افضحك كدام العالم كلها واخلي سيرتك علئ كل لسان.
غمض عيونه بقهر رجع باوعلي بتركز سحب نفس قووي وكال
تيمور : ماطلكج ولاراح تحجين شيء ثقي بالله موو ابني جذابه موو ابني هذا اني اعرف نفسي زين صح ماجذب عليج جنت اكضي وقت وياها بس مواصل الموضوع للنومه ابددد وغلاتج عندي مامتقرب منهاا اعرفها واعرف سوالفها بس دواها عندي اني اعرف شلون اخليها تدفع الثمن غالي.
_ميهمني ابد ثق بالله متهمني لٱ انتَ ولا هيه تعرف ليش ابجي هسه و ليش محترك گلبي موو لأن احبك لاا بس لأن خليتني لعبه بين اديك لأن تضحك علئ البنات تلعب علئ وحده وتزوج وحده ثانيه لأن ماجه شخص وكفك عد حدك بس لاتفرح خلصن ايامك واني بيدي الي راح ادمرك الحب موو دائما يفوز مرات يدمر الشخص واني الي راح ادمرك هل مره لأن المثلك حرام يبقون عايشين بينه
تيمور : اريانا حبيبتي لاتخلينها تلعب بعقلج محد غيرج بگلبي حبي الج ماينوصف لبارحه جنه متفاهمين لاتخلينها تنزع علاقتنه واني ليوم وعد اجيبلج الاثبات انو هل طفل موو ابني ولامتقرب منهاا اني بس ليوم ثقي بكلامي والله العظيم موو ابني.
_طلكني هذا الشي الوحيد الي اريده منك حالياً ماريد اثبات ولاريد شيء منك انتَ منتهي بالنسبه الي ولبارحه ماتفاهمنه اني جنت موو واعيه وغبيه شلون اخلي انسان وصخ وقذر مثلك يتقربلي.
تيمور : اريانا بس اسمعيني
مارديت عليه عفته ورحت لغرفة اليان دخلت بيها وقفلت الباب گلبي يدك بسررعه وكارهه روحي شلوون لبارحه خليته يتقرب مني هل انسان نكس والله احس عنده وصاخه موو طبيعيه حقد وكرهه بداخله مينوصف گلبه خالي من الرحمه والضمير
درت وجهي اباوع ماكوو اليان بالغرفه ابتسمت بنص حزني وقهري الحمدالله يعني اخذها آرون
رحت بسرعه اخذت جهازي واتصلت علئ آرون ساعه بـ 10 الصبح
آرون : الوو
_صباح الخير
آرون : صباح النور
_شلونها اليان يمك هيه موو.
آرون : الحمدالله وضعها بعده ممستقر لبارحه هواي بجت وعيطت وانطيتها علاج مهدئات ونامت وهسه اني بالشغل وصيت اختي ومرتي عليها الصبح
_الحمدالله ياربي كولي شلوون طلعتها؟
آرون : بعد ماتصلتي عليه وگلتي ساعه وادخل بقيت قريب من البيت مرت الساعه واجيت للباب الخلفي لكيته مفتوح دخلت بهدوء مجان موجود أي شخص
دخلت من المطبخ وصعدت فوك ماعرف غرفتها وين بس شفت المساعده اخذت صينيه اكل لغرفتها
لحكت المساعده بس ماخليتها تحس عليه دارت وجهه حست اكو شخص وراها بس ختلت ماشافتني
دخلت للغرفه خلت الاكل ع ميز وطلعت اني اول ماطلعت دخلت للغرفه جانت اليان نايمه وماحاسه علئ أي شيء
رحت عليها شلتها وطلعت من الغرفه تاكدت محد طالع يلا نزلت بيها
المساعده جانت بالمطبخ بقيت هواي خاتل انتظرتها تطلع يلا كدرت اطلع واخذتها لبيتنه.
_اووف الف الحمدالله فدوة لاتخلي أي شخص يعرف مكانها اهتم بيها وخلي ترجعلها صحتها لازم ترجع اليان وتحاسب الكل.
آرون : انشالله.
_من ترجع للبيت اتصل عليه اريد احجي وياها او افتح كام اشوفها.
آرون : ماشي
سد الخط خليت ايدي علئ گلبي مرتاحه واخيراً امنت علئ اليان بعد ماعندي شيء اخاف منه صار الوقت انو افضح تيمور علئ حقيقته
ليوم عازم الكل علئ الغده مناسبه زواجنه راح اخليك تتمنه الموت ولا هل لحظه راح افضحك كدام اعمامك واخوالك واهلي واخلي سيرتك علئ كل لسان اصبرلي يا تيمور.
رحت للحمام غسلت وجهي من الدموع وفتحت الباب ونزلت جوه جان الكل كاعد علئ الطاوله تيمور يخابر برا
تقدمت نحو الباب اريد اسمع شنوو يحجي ويه منوو جان يكول.
تيمور : لعبتي ويه الرجال الغلط قسم بكل ايات القرآن اذا ماخليتج تبجييييين دم اصبريلي وشوفي شلون راح اتصرف.
اكيد يحجي ويه شذر رجعت للصاله كعدت مكاني اباوع لساهر بحقد جنت اشوفه مختلف عن اخوانه شويه مؤدب طلعو كلهم مثل الشي.
قصي : عزمت اعمامي الكبار؟
ساهر : اعتقد تيمور عزمهم اني ليوم اروح اشتري الذبايح واجيب الطباخ وانتَ عليك الضيافة.
قصي : هوه وينه تيمور
ساهر : بالحديقه يخابر
جنان : انتِ روحي للسوك اشتري فستان يكون مناسب للعزيمه.
_ميحتاج اني لابسه اسود مايفرق ان كان مرتب او لا
جنان : لا يفرق راح يجون اهلي ماريد يشوفون جنتي مبهذله اخذي السايق او اطلبي فستان يكون مرتب.
مجاوبتها بقيت ساكته شويه واجه تيمور كعد علئ الكرسي باوعلي بنظرات برائه عود نزلت عيوني علئ الاكل.
تيمور : ساعه وتلتم العالم علينه خلصو وروح جيب الطباخ بسرعه.
ساهر : ماشي
جنان : عزمت اخوالك اني لبارحه عزمت بس خالاتك.
تيمور : خابرت الكل لبارحه
جنان : أي زين
تيمور : اريانا حبيبتي اعزمي صديقاتج اذا عندج.
مجاوبته مكتفيه اكلت شويه وكمت من الاكل رحت للمطبخ اشرب مي ماحس غير شخص حضني من ورا فزيت وخفت عرفته تيمور حاولت ادفعه ماكدرت قديني بكل قوته نزل راسه يم رگبتي وهمس
تيمور : اريانا اموت اذا تجاهليني حته لوو تعاركيني عادي المهم تحجين والله مامسوي شيء هل مره صدكيني بس هل مره ثقي بيه.
مجاوبته بقيت ساكته مستحيل يجي يوم وثق بيه هل انسان حقير وخبيث.
تيمور : حقج تضوجين اني غلطان واعتذر بس ليوم اخليج تعرفين اني ماغلطان بشي والله هيه السوت هل لعبه كلها عبالها تفلت مني.
لزمت اديه بقوه وبعدتهن عني عفته وطلعت من المطبخ بدون ماجاوبه صعدت لغرفة تيمور اخذت فستان وطلعت رحت لغرفة اليان
الحمدالله ليوم تيمور انشغل بموضوع شذر وماتذكر اليان ابد
دخلت للحمام لبست فستان اسود وربطت شعري خليت ترطيب لوجهي وشويه تنت.
خليت عطر احس ليوم راح اخلص من تيمور واعيش حياتي من جديد.
اباوع بالمرايه علئ نفسي وافكر شلون راح اكشفه اندك باب الغرفه خفت كلش منوو اجه لايعرفون اليان موو هنا شلون هسه
رحت بسرعه فتحت الباب جانت شذر ضحكت من شافتني.
شذر : مبروك عروستنه الحلوه
_الله يبارك بيج عيوني
شذر : اليان موجوده؟
_لا نايمه وتيمور كال لادخلون عليها.
شذر : اي عادي تعالي انزلي امي وخالتي جوه سلمي عليهن.
_اي طبعاً
طلعت من الغرفه وسديت الباب نزلت كدامي هيه قفلت باب اليان واخذت المفاتح خليته بصدري لازم اخلص شغلي قبل لايكشفون موضوع اليان.
نزلت جوه جانت جايه ام شذر و عمت تيمور الثانيه صفاء وآيلا بتها هذني بكل عزا لطامات دائما يجن سلمت عليهن وكعدت وياهم
آيلا : مبروك حبيبتي
_الله يبارك بيج يوم الج
آيلا : تسلمين
صفاء : اليان وين لعد؟
جنان : مريضه ونايمه بغرفتها
صفاء : صاعده اشوفها.
_لا خاله عوفيها خطيه هسه نامت شويه تعبانه شوي وروحي شوفيها.
صفاء : اوك
بقينه كاعدين لازم ماخلي بشر يوصل غرفتها شويه وصلو اعمام تيمور واهلي حته اخوي مسلم جاي لان عازمينهم.
رحت سلمت علئ ماما وعفاف واخواتي هم جايات.
كلها العالم اجت البيت انترس ترس جابو طباخ صارت ساعه بـ 2 يلا جهز الغده وصبو للعالم.
كاعده ويه البنات دخل تيمور للبيت اشرلي بيده انو اجي شافته اختي كرصتني من ايدي بخفه
نسرين ; كومي رجلج يريدج
هزيت راسي بأي كمت علئ حيلي ورحت عليه راح للمطبخ هوه جان واكف بالباب منتظرني من دخلت لزم ايدي دفعت ايده اباوعله بغضب.
تيمور : اعمامي راح يدخلون يباركولج الله يخليج اريانا لاتفتحين الموضوع بس ليوم انطيني صبر والله اشرحلج كل الموضوع.
_تمام
ابتسم بفرح لزم وجهي بثنين اديه وباس راسي بهدوء ركز بعيوني بحب ميعرف بيه ليوم راح اخلي سيرته ع كل لسان وافضحكه فضيحه.
تيمور : يلا راح اخليهم يدخلون
هزيت راسي بأي بقه يباوعلي بمبتسم سحب نفس قوي وكال
تيمور : احبج والله.
مجاوبته عفته ورجعت للصاله كعدت ويه امي واخواتي شويه ودخلو اعمام تيمور الكبار واخواله 2 هم زلم كبار وابوي واخوي مسلم هم دخل.
كمت علئ حيلي واني متوتره وبطني توجعني تباركولي واحد واحد سلمت عليهم من بعيد
_عمي اريد احجي وياكم موضوع.
الكل استغرب تيمور وجهه صار اصفررر وباوعلي بنظرات عتب هز راسه بـ لاا درت وجهي عنه باوعت لعمه الجبير وكلت
_عمي ابو زيد اني مثل بنتك موو انتَ من زمان تعرفني وتعرف اهلي.
ابو زيد : اي بويه ونعم منج ومن اهلج اجاويد.
_اريد احجيلك كل الحقيقه لأن انتَ الوحيد الي تكدر تساعدني هسه اني ماتحمل الوضع ابد خلص الموضوع مينسكت عنه.
حازم : شكو بابا صاير شيء
مسلم : اريانا شبيج
_تيمور عنده علاقه ويه بنتك شذر من زمان قبل لانتزوج وهسه هيه حامل منه
