رواية فصلية ولكن الفصل الثالث والعشرون بقلم سوزان ليث
ظل عمي على هاي الحاله تقريبا 4 ايام ولحد جنت اني ومحمد يمه بالردها وحياة جانت متقبل ترجع للبيت من شوف ردها فارغه تدخل لابوها شويه وتطلع بره توكف
فجاه عمي شهك شهكه فتح عيونه اني طفرت وكفت يمه لزمت ايده هو عصر ايدي حيل باع عليه وسلمها اني بالحظتها ظليت لازم ايده ومصدوم جان دكتور بالردها اجه ركض فحصه كال البقاء الله
انا لله وانا اليه راجعون
ظل محمد يبجي وكعد بالكاع اني حسيت رجلي ثكلت ماكدر اطلع شكول لحياة طلعت وكفت باب رده ادور حياة جانت واكفه ومنتجيه عالحايط ومدنجه راسها ظليت اباع عليه ومداكدر اتقدم شكللها وهي متامله ابوها يصير زين شكللها واني يوميا اكللها دكتور كال ديتحسن بس حتى اصبرها
رفت راسها شافتني بتسمتلي وجتي باتجاهي
حياة: من نام ابويه مستشفى واني جنت جسد من غير روح صعبه من شوفين الانسان الي تحبيه واعز الناس ابوج مريض وميحس بالي يمه صعبه شوفين ابوج الي سانده عليه عمرج كله هسه نايم وميحس بيج ابويه نام 4 ايام بس بهاي الايام كبرت سنين حتى البيت صرت ارجعله على كد النومه لان خالد ميقبل اظل جنت اجي من صبح وابقى اخير شي اطلع حتى الي موجودين عرفوني ولان رجل عمتي عده عرف بالمستشفى فساهلو ويانه
خالد دايما يطمني على ابويه جان دايما يرفع من معنوياتي معافني ولاعاف ابويه لحظه يرجع للبيت على كد يسبح ويبدل ويرجع
جنت افوت لابويه من تفرغ الردها حتى اشوف ابويه لان ردها بس زلم والي وياهم زلم خالد ميقبل افوت يكلي ميقبلون فمنتفرغ شويه يصيحني ادخل اشوفه لابويه اظل كاعد يمه امسح بوجهه واظل اكله بابا انطيك من عمري بس فتح عيونك الي لاظل مغمضها اشتاقيتلك
مره 4 ايام وباليوم 4 جنت واكفه بالممر وممنتبه رفعت راسي لكيت خالد واكف يباع عليه بتسمتله لان قبل شويه كلتله اريد ادخل كلي بس تفرغ اطلع ادخلج ففرحت لان حدخل اشوف ابويه مشيت لخالد
ها اكدر افوت
حياة اريد اكلج
شكو شبيك ابويه بي شي
طلع محمد من ردها يبجي باع عليه كلي حياة خالي راح من عدنا
اني بهاي اللحظه ظليت صافنه على محمد بدون اي ردت فعل نداريت على خالد ظليت اباع عليه
.. هذا محمد شبي ابويه وين راح
خالد: ظليت واكف كبال حياة والكلمه متطلع من عدي
.. ارتاح هسه هو بمكان احسن من هنا
حياة: ظليت مصدومه . شبيك خالد شنو رتاح
جتي عمتي مناك تصيح اخويه راح وتبجي وتلطم
اني هنا ظليت اصرخ اصرخ وخالد لازمني بس اني اصرخ بكل قوتي اكله لا ابويه ميروح ويعوفني ابويه ميعوفني ظليت اصرخ بدون دموع بس اعيط دفعت خالد وفتت للردها وره عمتي باوعت ابويه مغطين وجهه
رحت كشفت وخالد ورايه يريد يكومني بس اني اصرخ اكله
ليش مغطين وجهه ابويه يختنك شبيكم انتو هسه يكعد هو كلي شويه وكعديني بابا كوم تاخرت انت مو كلت كعديني ب4 كوم حبيبي
انت مو كلتلي ماعوفج حبيبي كوم ظليت حاظنته واحجي
خالد كلسع لازمني يريد يكومني
واني ادفر بخالد
عوفني خل اكعده تاخر هو كلي كعديني
خالد: حياة حرام الي دسوي والله حرام
حياة: وخر ابويه ميروح رحت كشفت رجله لزمتها كتله باع رجله حاره بعده عايش بعده والله بعده
جنت اعرف الي يموت رجله صير بارده لذالك من شفت رجل ابويه حاره عبالي بعد عايش ولان جنت مو بوعيي احجي مجرد اصرخ وحتى بدون اي دمعه مني
ظليت اني وعمتي نصرخ وعمتي ظلت تلطم وتبجي
واني مجلبه بابويه وكل ميريدون يغطون وجهه ماخليهم واعيط بيهم
ظليت مجلبه بي
واكله لتعوفني ماعندي غيرك منو الي كلكم عفتوني انت وامي رحتو منو ظل الي كوم لتعوفني حبيبي
خالد: حياة فقدت مجنت اكدر اسيطر عليها ومالومها هذا ابوها ظلت مجلبه باابوها وتصرخ وتحجي وياه ومتسمع من عدنا اي شي
بالكوه شلتها من يم ابوها وطلعتها بره وظليت حاظنها وهي بس تضرب بيه وتصرخ
وره ساعتين يله كدرت اخذ حياة وعمتها ارجعهم للبيت بس طريق كله حياة ساكته حتى دمعه منزلت احجي وياها مجاوب بس صافنه
وكلش خفت عليه حسيتها دخلت بصدمه وحجت كلمات خوفتني عليها بزايد بسياره
كلتلي ميعوفني هسه يرجع ياخذني هو كلي ماعوفج
ظلت تردد هذا الحجي
حياة : مجنت مصدكه ولا مستوعبه الي ديصير وكانما بحلم حتى ماعرف شون طلعت من مستشفى شون وصلت منو وصلني ماعرف شون هسه اني كاعده بالهول ماتي منو ذوله نسوان يمي مجنت كلش مستوعبه كانما اني بغير عالم
ليش ذوله نسوان كلسع وحده داخله تعيط شبيهم ذوله
عمتي اجتي يمي تحجي ويايه اباع عليه بس مداسمع الي تحجي مادري ليش بس كومتني من يم نسوان الي يبجون دخلتني للغرفه وخلتني امدد وغطتني غمضت عيوني وكلت باجر اكعد اشوف ابويه يمي كل هذا حلم ظليت مغمظه عيوني لحد منمت
خالد: كلش خفت على حياة رجعت للمستشفى لكيت اهل حياة كلهم جايبن ولان مات هو العصر مكدرنا نكمل مال دفنته فالا باجر فخلو بثلاجه لباجر مقبل ينطونيا
رجعت لبيت حياة ظليت واكفين بشارع وجنت مخابر حسين يجي ينصب الجادر الفاتحه ولان عمي اني اعتبره مثل ابويه جنت كلش حزين عليه ولان اعرف هذا امر الله تقبلت وكلت الحمدلله على كل حال
ابو محمد: شيخ خالد روح للبيت انت تعبت اليوم ارتاح ارجع الولد هنا يكملون واخوك خطيه مقصر
خالد: لا شدكول هذا عمي شون اعوفكم وارجع
ابومحمد: والله مامصدك راح
خالد: ارتاح الله يرحمه ماكو منه جان
ابو محمد اني وياه عشره عمر من جنا جهال سوه هذا اخويه ماحبه كده وهو جان دايما يكلي انتي اعز من اخوتي
خالد: الله يصبرك عمي ويرحمه برحمته
خابرتني امي
الو هايمه
هلا يمه بقيه بحياتج حبيب
وحياتج الباقيه
شونها مريتك
يمه شون تكون تعرفيها شون متعلقه باابوها نهارت ظلت تصرخ وممصدكه ابوها راح
-الله يكون بعونها ويصبرها رب العالمين على فراقه ديربالك عليه مسكينه ماعدها غيرك هسه انه باجر اجي اني والبنات
-اي يمه خلي حسين يجيبكم
يله يمه خاف عدك شغل اخذ راحتك مع السلامه
مع السلامه
ظلينا واكفين بين منصبو الجواد وحضرو الغراض وكلشي
ظلينا كاعدين باجادر واني بالي كله يم حياة ولان ماشفتها بعد ما وصلتها العصر وصيت محمد يسئل مرته امه على حياة لان ماكدر ادخل كله نسوان جوه
اجه كلي حياة نايمه اني شويه رتاحيت كلت خل تنام ترتاح احسن
ابو محمد ماقبل انام بالجادر ويه باقي الزلم ودانا للبيته اني وجم زلمه ويايه وخلانا نام بيتهم
اني نمت جنت تعبان فبسرعه غفيت كعدت على اذان الفجر كمت شفت ابو محمد كاعد عاد توضيت وصلينا جنت دننتظر صير بسته حتى نطلع للمستشفى حتى نكمل شغلات الجنازه
فطلعنا للمستشفه كملت شغلات الجنازه وعدي معارف كومه هنا كملت بسرعه اخذنا ابو حياة ودينا لبيته حتى يودعه
وراه اخذنا وطلعنا عالنجف وصلنا الحمدلله من وكت كملنا الدفنه ورجعنا اني رجعت للبيت سبحت وبدلت وطلعت رجعت للفاتحه
حياة: كعدت صبح واني اكول الي داعيشه حلم اكيد هسه اروح لغرفه ابويه اشوفه نايم بعده
طلعت من الغرفه لكيت جم مره لابسين اسود اني ماهتميت ظليت امشي لغرفه ابويه فتحتها ومتنفتح ظليت احاول افتح بيها ومتنفتح ظليت ادك عليه جتي عمتي عليه لزمتني
ام محمد : يمه شتردين كليلي
حياة: داشوف ابويه بس ماعرف ليش قافل الباب ظليت ادك عالباب
ام محمد : ولج كافي لاسوين هيج لاتحركين كلبي عليج هم كافي حركت كلبي على اخويه
حياة: مهتميت لكلامها ظليت ادك الباب واحجي بابا افتح اني حياة
ام محمد: حياة حبيبتي باعي اني القفلتها باعي هذا المفتاح ماكو احد جوه حبيبتي لاظلين سوين هيج
حياة: اخذت المفتاح من عمتي وفتحتها وظليت افتر بالغرفه مثل المخبله مثل وحده مضيعه شي وددور عليه مجنت كادره استوعب ابويه راح رحت كعدت على جربايته وظليت امشي ايدي على مخدته اتخيله هو نايم واني العب بوجهه
ظليت بالغرفه لحد ما عمتي جتي عليه ركض حياة جابو حابو تعال يله
اني كمزت من مكاني كل فكر جابو وهو عايش فركض وكفت بالهول شويه. ودخلو تابوت للهول خلو بالكاع اني هنا ظليت اباع عليه اخاف اوصل يم تابوت محسيت على نفسي غير اصرخ اصرخ ونسوان مجلبه بيه ومظل شي شعري ملخته وجهه كلشي دمرت مجنت بوعيي اكدر استوعب شويه اصدك هاهيه مات وشويه اكول لا
وراها اخذو واني وراها ظليت اصرخ اصرخ لحد مافقدت ماحسيت وراها بشي حسيت على عمتي شمر عليه ماي ومرت محمد تشممني عطر حسيت بس ظليت ماكدر اكوم احس نفسي مشلوله
خالد: رجعت للفاتحه محمد كلي حياة متخربطه ومدتستوعب ابوها مات وبس تصرخ .. اني تخبلت بس ردت ادخل اشوف حياة بس كلي كلها نسوان ماكدر ادخل. ظليت واكف بالفاتحه بس بالي كله يم حياة لان اعرف هي شدتحس هسه اجتي اجي وامل وايه للفاتحه وصيت امل تبقى يم حياةعالاقل طمني عليها
لاظل بهذا القلق
حياة: مرت فاتحه ابويه واني مجرد اكعد يم نسوان اصرخ اصرخ وهاهيه مداكدر ابجي شكد حاولت ابجي اريد اطلع حركه كلبي بس دموعي احسهن مموجودات شكد حاول ابجي ماكدرت ميته قهر وبصدري نار بس مداكدر ابجي
شكد حاول افكر بابويه واذكر سوالفنا وايامنا بس ماكو دموع مجنت اعرف مصدومه بس يجوز اثر الصدمه هيج صار بيه ماعرف
خلصت فاتحه واني ماشايفه خالد لان حتى مجان اكو شي بالي غير ابويه
خالد: لما جنت اسئل على حياة يكلولي لاتاكل ولاتشرب بس صافنه وحتى عمتها حجت ويايه دكلي دمعه مانزلت من عينها خفت ليصير بيها شي خلصت الفاتحه واني ماكدر اشوفها رابع يوم انتهى كلشي فرحت حتى اشوف حياة لان حتى نسوان بيتهم قلت بقو بس كرايب
فكلت لابو محمد يسويلي طريق حتى اشوف حياة
حياة: جنت كاعده بغرفه ابويه جتي عمتي عليه كلتلي شيخ خالد بالاستقبال يريد يشرفج
اني هزيت راسي وطلعت رحت للاستقبال
فتحت الباب
خالد : فتحت الباب ودخلت حياة صايره هالكدوتها وذبلانه دخلت وصلت يمي اني كمت وكفت
البقيه بحياتج
حياة: اني ظليت واكفه كباله بس كلي بقيه يحياتج حسيت شي حار نزل على خدودي دموعي حضني خالد واني طكيت من البجي اشهك وابجي اشهك وابجي اكله عافني ابويه كسر ظهر سندي راح
خالد: حاظنها وهي تبجي .. ولج اني سندج وره ابوج لادكولين هيج بس هي ظلت تبجي واني عفتها تبجي لان هاي حسره صارت عده
ظليت حاظنها بالنص ساعه وهي على فد بجيه وشهكه
الكل اجه وكف يم باب الاستقبال وظلو يبجون ويه بجي حياة وكلامها الي خناجر بصدري وخاصه من كالت راح سندي مظل الي احد كلهم عافوني
اني هنا حظنتها بكل قوتي وكتلها اني يمج اني ماعوفج
خليتها تفرغ كلشي بداخلها لحد محسيتها تعبت وخرتها من على صدري وكعدتها بصفي ظليت لازم ايديها وهي دموعها بس تنزل
حياة: والله مامصدكه مامصدك راح والله كانما حلم وكلسع اكول هسه اكعد
كلسع اكول هو بره هسه يجي
كلسع اكول نايم وحيكعد بس انتظر وماكو هو ماكو
حجيت كلشي لخالد حسيت نفسي رتاحيت كلش لان جان بصدري نار مشتعله
خالد: جريتها وخليتها على صدري ظليت امسح براسها وابوس بي واهدء بيها
وهي لازمه دشداشتي وتحجي ودموعها مصدكن ينزلن
ظلن يجرن
حياة: فات على وفاه ابويه سبع ايام بالظبط جان اليوم سبعه فسوينا غده ووخيرات وزعنا هم واني حالتي مدتتحسن مجرد تقبلت هو ماكو بس بكل دكه باب اكول بالكي ابويه هذا كل مافتح باب غرفته اكول بالكي الكاه جوه عمتي ماتركتني لحظه ظلت يمي حتى من انتهت الفاتحه والكل راح هي ظلت يمي وخالتي هم جتي من بغداد ظلت يمي خالد جان يروح ويجي عليه ماتركني ابد
خالد: لما فات على وفاه عمي اسبوع تقريبا وراها كلت لابومحمد حرجع حياة لبيتي ماكدر ابقيها هنا وحدها
ابو محمد كلي تخلص السبعه وراها الله كريم عود كللها
حياة : وره السبعه بيومين خالد اجه عليه للبيت
خالد : شونج
حياة: الحمدلله
خالد: ليش هيج ذبلانه عمتج دكلي لاتاكل لاتشرب هاي انتي حياة هيج سوين انتي الصلين وصومين وتعرفين كلام الله وكلنا على هذا الطريق هيج مسويه بنفسج
حياة: والله ماشتهي اكل مالي نفس
خالد: حبيبتي ماترهم بعد ظلين هنا وحدج
حياة: ليش
خالد: بويه شون ظلين وحدج بهذا البيت مو عدج بيت غير تظلين يم رجلج
حياة: لا مماريد اجي اريد ابقى هنا
خالد: حياة ماترهم حبيبتي عمتج الى متى ظل وياج هم لازم ترجع لبيتها وانتي هم ترجعين لبيتج
حياة: هذا بيتي
خالد: اكيد هذا بيت ابوج بيتج هو بيت رجلج
حياة: ماريد ارجع وسد الموضوع
خالد.': بقت حياه معانده متقبل ترجع ويايه للبيت هذا الشي كلش جان زاعجني منها ومجنت اكدر اجبرها على هذا الشي ابد خليتها عليى راحتها
حياة : ظليت مصره مارجع وياه ماريد يشوفني هسه ماعندي احد ليش هيج كل ماريد ارتب حياتي تتخربط وماكدر اسيطر على شي
جنت كاعده وعمتي اجتي يمي
عمتي : حبيبتي احجيلي شنو المضوجج من خالد ومتقبلين ترجعين وياه
حياة: ممضوجني شي بس ماريد ابتعد من عنا
عمتي : منو كال حتبتعدين كل متردين هو حيجيبج
حياة: جنت ناويه بعد مارجع لخالد حتى ابويه جان يدري على هذا الشي
عمتي: بس هسه كلشي تغير لازم تعرفين وين تردين تبقين هوا ها الي متى يوم يومين لشوفيهم هسه كلسع جااييج ترى جم يوم وتبقين وحدج بهذا البيت بطرك روحج يولي لتخسرين زلمتج ماكو منه
حياة: ظليت ساكته ماعرف شحجي
عمتي : ولج هاي فاتحه ابوج هو كام بيها تعرفين لو لا اخوته مسوو الي سواه واخوته هنا كل واحد يذب شغله على الثاني ولج ماكو احد يحن عليج منهم اذا حنوو اكيد عدهم شغله يستفادوها منج
حياة: معليه بيهم اني اني اكد اعيش بوحدي معليه بيهم
عمتي : ولنفرض طلكج رجلج ورجعتي هنا من حيخليج طلعين وطبين وانتي مطلكه ها منو ولج اول ناس يحجون عليج عمامج لج اخوتي واعرفهم الزين البيهم راح ماظل احد وراه
حياة : ظليت صافنه على كلام عمتي اعرف هذا الحجي كلش زين بس مجان اكدر اسوي غير اوافق وارجع لخالد بس هذا الشي اصعب من الاول احسه صار مو بيتي خابرت خالد وكلتله .......
