رواية في ذمة الغريب الفصل الرابع والعشرون 24 بقلم كنوز

لو خبر منك يجينيِ

الناس تعدل من جديد

ضوهَ يبين من بعيد

مطر ينزل شمس تضحك

المشانق تنصب مرجوحة لاطفال الشهيد

الورد يطلع بل جماجم لوتجينيِ

واقدملك اعتذارِي وانكساريِ وكل حنينِي.

━━━━━━━━━ ⚖ ━━━━━━━━━

گبل لا يطبگ الباب نهضت بساع حشرت روحي حتى انزل وهو يدفع بيه لداخل السيارة گمت أهمش بـ إديه وأطگ بيه

خرمشت وجهه وعيونه كض راسي طگه بالباب حيل وكفر.. كلشي صار يدور جدام عيوني وصوت جيلة ثارت فززتني 

صارت صنتة .. درت راسي شفت جدة واگفة وبيدها التفكة صح ايدها ترتعش بس ضعف موش خوف 

​العلوية :: وعلي إذا ما تفوتون حال البت هسه اخلي طشاركم ماله والي

​أشر براسه لشرطي حتى يروح على جدة عباله هينة ويا وما أخذ خطوة وحدة صوبها.. رمت حدر رجليه 

​العلوية :: الآخرة بصدرك اذا تتگرب وعلي .. وأنت الاخر هد البت واخذ جلابك وامشي منا

​هد راسي وجر مسدسه من حزامه وراح صوب جدة وأنا استغليت الفرصة وركضت الها هم.. گبل لا يتگرب جرا واحد مدري شهمس بـ إذنه وأشرله ع الشارع

التفتت وين يعاينون.. إجه اللواء صاحب عمي حاكم من شفته چن ماي بارد نزل ع حرورة صدري إجه صوبنه..وگال 

​الواء :: السلام عليكم.

​ردوا عليه من ورا خشومهم، وجبيرهم مد ايده بـ جيبه يريد يطلع هويته، أشرله اللواء

اللواء :: اعرفكم جلاب منو.. مالها داعي 

​صم قبضة إيده حيل مغتاظ  عاين اللواء الهم واحد واحد شاف جدة بطرگ ثوبها واگفة وعبايتها واگعة بالعتبة من دفعوها.. مشه بخطوات رزنة جاب العباية وخلاها ع راسها و وجهه سؤاله الهم بنبرة حادة 

​اللواء :: عليمن جايين بله؟ ذكروني

:: رحمة ابراهيم ومتأكد هي هنا جانت واذا ما سلموها اخيسهم بالسجون 

اللواء :: تعرفوها انتوا لرحمة مو؟ اكيد عدكم صورتها بالمركز

​هز راسه إي. اشتدت حدة نبرة اللواء ونطق بصوت يرهب وأشرلهم براسه عليَّه 

اللواء :: لعد ليش ماخذين البنية وياكم هم عليها إلقاء قبض واني ما اعرف؟

​وگبل لا يجاوب النذل رفع إيده الواء وطگاه راشدي خلاه يصگ بسنونه بغضب... و طلع نقاله خابر 

اللواء :: دزلي دورية لبستان سيد غفار... لا تتأخر خمس دقايق اريدهم يمي 

​سد النقال ورفع إصبعه بتحذير وتهديد

اللواء :: ولا واحد بيكم يتحرك منا إذا ما خليتكم تبوسون أدين حتى ترجعون للوظيفة.. اني مو ستار

​أخذتني جدة دخلنا للبيت وجسمي لسه يرتجف مامستوعبة رب العالمين خلصني من بين اديهم طكيت ع وجهي حيل الوم نفسي لو ما طالعة لو ما جاية لهناه جا ما صار كل هذا بيه 

​براءة :: سجدة غدت نار چي عنبر رايحة للبيت. لبست عبايتها بعصبية وتتوعد الها 

سجدة :: اليوم إذا ما خليت جلدها أزرگ انا موش سجدة اريدن اعرف من نگول الها كلمة ليش ما تسمعها؟

​البنات كلهن خنسن بخوف منها وبعد حتى ما يتحركن خو رحمة بقت ممددة بفراشها حتى راسها ما شالته طلعت سجدة مثل الرعيدة بيدها خيزرانة وركعت الباب وراها

​ترفة ::  شيخلصها  اليوم النوب ماكو احد هناك راح تودي جلدها لدباغ من صدك 

براءة :: مستاهلة خل اتوبها من هاي الطفگة ملتها ولو ابو طبع انشد عن سلامته 

​اندفع الباب فزينه.. رجعت سجدة وع وجهها ملامح تبشر بخير

براءة :: شكو إجه غفار مو؟

سجدة :: لا لواء ستار اجه و مكمل إجراءات قضية رحمة  والولد طالعين هم

​حمل ثگيل وانزاح گامن من الفرحة وحدة تردم ع الأخرى لملمنه الغراض حتى نرجع ورحمة ركضت لسجدة

رحمة :: وغفار وياهم طلع مو 

سجدة :: لا.. موش وياهم بس ان شاء الله راح يلگونه الولد 

رجعنه للبيت عنبر مدثرة و نايمة لوحدها بحجرة جدة ما تقبل تطلع ابد 

جانوا الولد بالديوانية همه و جدي و الواء يتناقشون بالقضية ترفة تروح يم الباب تريد تتصنت و تخاف ترجع راحت ع عنبر دفرتها برجلها 

ترفة :: ولج الجلبة هاي شغلتج كومي شوفيلنه الفتيلة شني خل نعرف شصار 

ما ردت عنبر جانت سجدة بيدها أوراق و قلم تريد تنطيها لقسيم وكفت صافنة مستغربة سكون عنبر حتى ترفة تعجبت كرفصت يم راسها تجر بالغطه تريد تطلع راسها وعنبر مجلبة ما تخليها 

ترفة :: ياااااع ولج صخام شمالج طفيتي امس جنتي تشتغلين و شحلاتج 

طال سكوتها و اهتزت اكتافها صوت شهكات خافتة تطلع جذبت انتباه الكل التمن عليها كلهن 

رحمة :: عنبر شو طلعي راسج شبيج منو وياج والله اگتله الج مثل ما گتلتلي فضيلة علمودي 

سجدة :: تطلعين راسج لو اذبن ماي بارد فوكج هسه 

كامت تبجي بصوت عالي تكريت سجدة بساع رفعت البطانية عنها غصب البت صايرة حمرة و أثر اصابع ع خدها 

سجدة :: ياهو طگاج جراح لو قسيم وعلي العب بيهم لعب اليوم 

هزت راسها لا تناشغ و شابگ سجدة حيل ضامة راسها بصدرها 

براءة :: اسم الله ولج شبيج قلقتيتي وعلي گومي تصنتي جيبي علوم توبة اذا احجي عليج والله 

بعدتها سجدة عنها مسحت دموعها و شريتها ماي 

سجدة :: صار شي من رجعتي للبيت لوحدج مو 

هزت راسها اي فرفحت تسولف و تهشك 

عنبر :: رجعت علمود جدة ردت اشوفنها وجان جدي هنا هو و ابوي و عمي فاضل و من طلعوا قنعت جدة حتى تمشي وياي 

سجدة :: اي 

عنبر :: و اجوا تفتيش ع رحمة نشدوني عنها وجي گلتلهم ما اعرفها رادوا ياخذوني طكاني ع وجهي و سحك ع ظهري ردت اموتن خوف وانا لوحدي 

غصت بالبجي سجدة لمتها لصدرها بساع تسكت و تهدي بيها و رحمة بجت و الذنب بعيونها خطية سمعت صوت قسيم طلعت اله بساع 

قسيم :: صيحي لرحمة خل تلبس عباية وتجي بساع 

صحت لرحمة كفكفت دموعها و طلعت اله جان اللواء واكف يمه طلعت رحمة سلمت عليه وانا بقيت واكفة ورا الباب 

اللواء :: هذا استثناء الكفالة صار عد قسيم باجر ان شاء الله تروحين تقدمين إفادة حتى تمشي القضية 

رحمة :: رحم الله والديك عمو ما اعرف شلون اشكرك ع وكفتك هاي 

اللواء :: هسه تركي الشكر ع جهة نزار من تهجم عليج للبيت قمتي دعوة عليه 

:: لا والله 

:: من دز جماعة تهجموا ع اهلج و ضربوا اخوج اهلج قاموا دعوة عليه 

:: لا والله ما قمنه اي دعوة عليه 

اللواء :: عاشت اديكم شنو منتظرين يگتلكم ياله تتحركون 

صفنت رحمة بعدم فهم و قسيم اغتاظ هم ما يحب الفهاوة 

قسيم :: يعني داس حرمة بيتكم و طگج و نوبة الآخرة هم داسوا بيتكم و تعدى ع اهلج بالضرب تدرين لو قايمين دعوة تصير وحدة بوحدة و يتنازل 

رحمة :: اهلي ناس فقرة ماعدنه خبرة بهيج أمور ومحد نبهنه و ابويه و أخوية خطية حايرين بيه 

دكدك اللواء ع جتف قسيم و كال 

اللواء :: انت تعرف شتسوي قسيم تروح للمستشفى تحسب تقرير حالة اخوها و تخليهم يرفعون دعوة ترفقهن وياه القضية 

هز قسيم راسه اي و بعدين طلعوا الولد حتى يدورون ع غفار 

للمغرب وماكو خبر ولا رجعوا الولد سجدة خابرت ع قسيم ما رد قنعناها تخابر جراح عبن لو بنص الموت يرد عليها وكلمه ملتمين عليها شلون الذبان من يغوغي 

سجدة :: هاا جراح بشر شو طلعتوا مستعجلين وبعد رديتوا علينا 

:: ماكو شي 

:: يعني اكو جراح لا تضم عليَّه اخوي بيه شي لكيتوا 

:: لكينه سيارته مبيوعة ع اهل الصناعي تفصيخ وهسه الولد المشتريها جابوا للمركز يحققون وياه حتى نعرف ياهو بايعها اله 

:: موش غريب السواها اكيد 

:: عمار و مالك ثنينهم طلع عليهم القاء قبض ان شاء الله لصبح احنه عارفين خبر عنه 

رحمة :: احس شي ضايع مني فراغ وسط گلبي صار و ثقل غريب جلجل ع روحي شلون غيمة سودة و ظلمت فوگي 

لزمت السبحة بيدي اردد و استغيث برب العالمين و الامام علي ع انتبهت ع موبايل جان صامت اكو رقم يتصل بس غريب 

هو اصلاً مو موبايلي موبايل غفار گلت خاف رقم احد من معارفه خليته يتصل وكمت تصلي و دموعي تصب اريد خبر عنه 

براءة :: اجه أبوج كملي صلاتج و تعالي

سمعت براءة تحجي وياي كملت و گمت بلهفة اله اماني ثنين اهلي و غفار وبهل الايام فقدت الاثنين ركضت اله وهو گام خطية الي 

شبگته ابجي من كل گلبي وهو يمسح ع راسي و يبوسني 

ابراهيم :: خلصت بوية هانت ما ظل شي 

رحمة :: شلونك يابه والله مشتاقة الك كومة كل يوم يمر عليَّه وما اشوفك بيه كأني عمية بيه 

حسيت ع مهدي يجر بدشداشتي ابتعدت عن ابوية شلت شبكني يبوسني طلع من جيبة مصاصة 

مهدي ::جبتلج مصاصة ام الديج ترجعين ويانه مو أزاد كلي رحمة زعلانة عليك وراحت 

رحمة :: لا حبيبي وليدي انت ما ازعل عليك 

مهدي :: يعني راح ترجعين ويانه 

هزيت راسي اله لان اعرفه ما راح يسكت سئلت ابوي ع عروة 

رحمة :: لعد عروة وين ليش ما اجه وياك 

ابراهيم :: طلع وياه الولد يدور ع سيد غفار من الصبح و ماندري الشرطة عرفت مكانج الا من خابر اليوم و عرف 

رحمة :: اي جدو هاشم ما قبل اكول الكم حتى لا تقلقون 

من گال الي عروة طالع وياهم فرحت و رفعت راسي بيه رغم التهينه وما گلت الهم غفار مختفي مدري منين عرف و راح وياهم جابت براءة جاي و ضيافة الهم 

اجه جدو هاشم كعدوا يسولفون واني اخذت مهدي سلم ع البنات خجلان و نرجس اخذته يلعب وياها و انطته العابها طبيت للغرفة 

صارت عيني ع موبايل اخذت توي فتحته صارت رسالة الاشعارات طالعة بوجهي 

" انا غفار ردي "

من الرجفة وكع من ايدي اطشر دنكت الممه و رجعت البطارية بساع و اصيح للبنات 

:: هذا غفار والله غفار جان يتصل عليه وما ادري بيه كل مرة ارفضة 

رجعت بساع اتصلت ع رقم جاوب صوته تعبان بثگل ينطق الكلمة 

:: رحمة 

:: اي اني وين انت بس گلي هسه اجيك والله 

:: يمج واحد من الولد قسيم وين اتصل عليه ما يرد 

:: لا كلهم طلعوا يدورون عليك خطية ابويه هنا و جدي 

اجه جدو هاشم بلهفة فتحت مكبر صوته وهو كال لجدو ع مكانه طلع بغير محافظة 

براءة :: شودا لغير محافظة و سيارته هنا لگوها 

العلوية :: المهم سالم حبوبة خل يجي و نفهم منه... مدت ايدها الي بمعنى ساعديني انهض گومتها بستع... اصليلي ركعتين شكر لله و لام البنين رجعوا سالم 

البيت انترس فرح بس صوته جان كفيل يرجع شكو امل جان ضايع 

براءة :: صار الصبح و لسوا ما اجوا گالوا الدكتور يجي ياله يطلعوا  مدري يا ابن حرام مصوبه و ماخذ سيارته و هويته و النقال و عايفه لوحده  و لاگينه الغنامة ماخذينه للمستشفى و خطية الشرطة مجلبة بيهم موقفينهم الا بعد ما صحى غفار و برائهم 

لضحى سمعت صوت سيارات و هوسة طلعت اركض لمحت غفار نزل و ساندينه عون و قسيم چن نسمة هوى باردة لامست روحي بعز تموز 

ركضت حافية اله شبكته وهو حباني من راسي 

براءة :: البيت ما ينجهب بغيابك وعلي 

ابتسم تعبان من الطريق حتى كلام گوه يحجي بثگل دخلوا الولد تلگته سجدة وگفت گباله دموعها تنزل بلا كلام تخاف تتگرب اله جي جان مغتاظ منها تخاف لا ينفرها 

هد قسيم وهو تگرب الها جراها لصدره وهو ضجت بالبواجي 

سجدة :: والله من غبت ظلينه بلا سگف ليلي بطوله ما نمت خفت تروح وانت زعلان مني 

حباها من راسها يمسح دموعها مال بوجه كضاه عون بساع يسنده 

غفار :: اعتذر يا روح اخيج وعلي ما زعلان منج انا سجدة لا تظلين تفكرين خوش 

هزت راسها اي جال بعيونه علينا ترفة واكفة بعيد هي و سدرة يسحتن بس عنبر تكربت 

عنبر :: حمد الله ع سلامة والله لو تدري شصار ا.. 

عكد جبينه وانتبه الها بس عمة إصالة صمت حلكها و جراح خزرها انسحبت بساع عيونه تفتر بالبيت عرفته يدور ع رحمة مدري شهمس اله قسيم ياله ارتحت عگدة جبينه 

اجوا زلم هواي يشوفونه صار البيت هوسة وكل شوية جاي رحمة استحيت تطلع من جابوا وهسه گامت تلوب تطلع توصل الباب و ترجع تتگرضم 

رحمة :: شنو ذولة ما يرحون تره عيب يجون للمريض اول يوم لازم يخلون اهله يشوفوا وهو يرتاح 

سجدة :: بعد هاي عادات و تقاليد و من المحبة يجون يشوفوا تردين اصيحة الج تشوفينه 

رحمة :: لا شسوي بيه اني بس انتن خطية خواته تردن تشوفنه تطمن عليه 

ابتسمت عليها سجدة طلعت نقالها كتبت رسالة وهي تضحك ع رحمة شوية واجه عون ساند غفار وياه وياه ما صارت عيونه ع رحمة شرق وجه فتح اديه الها وهي ركضت اله 

شبگته وهو شماها و حباها من راسها همس بوجع 

غفار :: بعمري كله ما خايف بكد خوفي بهل الايام المرت... خفت اموتن وانا ما مأمن عليج اموتن گبل اجيبن البراءة الج.. ابتعد عنها حاوط وجهه بجفوفه.... جفت اموتن وانا ما شايف عيونج 

رحمة :: كلشي ما اريد والله حتى برائتي بس انت ابقى يمي مستقوية بيك اني 

ابتسم الها گرب وجهه راد يحبها وعون تنحنح عقج وجه عليه و أخذه و رجعوا.. رحمة بقت جامدة بمجانها ايدها ع حلگها بخجل سجدة أشرت للبنات بساع طشن سوينه روحنه ملتهين لا شفنه ولا سمعنه 

رحمة :: دورت عليه بالغرف ماله إثر ردت اطمن عليه عود لان الصبح ما شفته بس شوية واخذوا صعدت فوك هم ماكو و وين يكدر يصعد 

براءة :: هاا رحمة اشوفنج تايهه تردين شي 

:: اي غـ... لا ما اريد شي.. شريد قابل لالا كلشي ما اريد دا اتحرك شوية كعدت هواي اي ما اريد 

صميت خلكي بيدي ان شدا احجي شخربط من فشلتي شردت للغرفة و تغطيت بالبطانية حتى راسي سمعت الباب نفتح مدت سجدة راسها وگالت 

سجدة :: رحمة كاعدة لو نمتي 

:: لا بعدني كاعدة 

:: جا خوش غفار بالورشة ومن الصبح ما مغير الضماد روحي سوي اله خطية 

كمزت من فراشي بساع ادردم ضايجة 

:: بالورشة واني اليه ساعة ادور عليه حتى هو مصوب ما يستجن بمكان 

ابتسمت بوجهي واني أدركت كلامي بساع نفيت 

:: تره ما جنت ادور عليه علمود شي ردت اكول اله الحمد لله ع سلامة 

:: اي ادري بيج الصبح ما شبعتي منه 

:: اي والله 

طگتها ضحكة واني ضربت ع حلگي شدا احجي اني شو زحتها فرد مرة وصايرة ما استحي.... طلعت البنات كاعدات بالهول يباوعن تلفزيون 

مشيت ع أطراف اصابعي لا يشوفني فشلة من تخطيت الهول ركضت للمطبخ اخذت صحن الفطائر حضرته اله لكفت عباتي و ماعوني بيدي و ركضت

جان گاعد بره  محضر جاي ع جمرية من شافني ابتسم و طبطب ع مكان يمه مشيت كعدت يمه سند راسه ع كتفي 

غفار :: فهمج قسيم ع قضيتج ان شاء الله محسومة لصالحج 

همهمت اله  تعكرت ملامحه بوجع من عدل كعدته عدلت المخاد ورا ظهره دار راسه الي طال النظر حسيت حرارة بوجهي صارت من نظراته وهمس بصوت هيمان 

:: يا حلاة العمر لو تكضي سنينه بس وياج

حسيت گلبي ابتسم من جوه بس الكلام يضيع بحضوره ما اعرف شنو اجاوبه باوعت ع سما النجوم تلالي بسوادها و الجو حلو نسمات هوى تنعش الروح 

:: رحمة 

:: ممم

:: انتِ هم مثلي تفكرين و تخططين للمستقبل لو بس انا ميت بيج

:: حتى اني

عدلت كعدته بساع من تجاوبت وياه وكلما يتحرك يأن بوجع وبلا شعور أيدي تروح ع جرحه تمسح عليه ابتسم بحماس وكال 

:: نكعد أبيت صغير انا وياج

:: لا نكعد أبيت لصغير صح بس كدامه كاع هيج فارغه و نزرعها و خضار

;; و بناتنه يلعبن كدامنا وانا اشتغل بالورشة وانتِ تتمشين جدامي 

:: لنت شكم طفل تريد 

:: و هواي فد عشره خمسطعش بنيه يشبهنج 

:: شنووووووووو

:: شمالج فزيتي انا اعاونج بيهن 

:: شنو تعاوني قابل مصنع اني لو كل سنة اخلف ثنين هم ما الحك ع هذا العدد 

:: ماعليج نلحك 

:: ماكو هم ثنين وبس 

رفع ايده حاوط كتفي قربني عليه أكثر جر الفروة خلاها ع اكتافنا ثنينه

:: احب الأطفال رحمة لا تحرميني منهم هيج اريد بناتي يترسن الحوش منين ما اندار اشوف غزالة صغيرة تشبهج 

:: اي بنات ثنين كلش كافيات  

:: كتلج انا اعاونج بيهن 

:: هذا بس حجي  من يجن اظل وحدي حايرة و اسهر و اربي 

:: إذا خلفت كلامي وياج بعد لا تخلفين 

صفنت وهو ضحك يكمل كلامه وعيونه تلمع يتأمل الحلم 

:: اريدهن كلهن بنات و شعرهن طويل و اسويلهن كصايب بأيدي 

ابتسمت اتخيل وياه جانت لحظات حلوة بس القدر جان اله رأي ثاني 

عنبر :: مرت الايام و الاشهر الهدوء رجع لسلف فطرس طلع و براءة باقي آخر جلسة و تنتهي قضيتها كلها 

مرمر گاعدة تثرم لحم لدولمة وانا مگابلتها اريدها تغفل واخذ من الحم لجلبة خطية جايبة ورا بيتنه وعدها جهال خو ما تظل ع خبز 

صاح الها ابوي راحت الها اسمعه يتغزل بيها اخذتني رجلي الهم جان ابوي محاوط خصرها و بيده الآخرة يمشي اصابعه ع خدها بساع صديت وجهي 

:: انا شوادني وراها والله عيب امداني اي والله 

استغليت الفرصة كصيت من هبرة من الحم من هاي الزينة و ركضت انطيتها لجلبة و طلعت من البيت كله حتى 

تسرسحت ع بيت عمي حاكم جدي و حبوبتي كاعدين بالمشراكة بالشمس جدي بيده آية و حبوبتي تمشط شعر نرجس كوة مروة تسويها كصايب ترفة گاعدة مخلية فطرس يخطط دفترها 

فطرس :: هسه انا لو تزوجت و اجتني بنت راح تحبونها هيج لو تصير كخة ع ابوها المگرود 

هاشم :: انت بالذات بس تجيك بت من المستسفى أخذها اربيها انا 

فطرس :: هاي شنهي  ولك هويشم طلعت هيج تحبني وانا ماعرف 

:: موش سالفة محبة بس انت ما تتامن بنت و عندك شتطلع شعارة عليك والسابع ظهر ندخل جهنم من وراك 

:: هسه طلعت انا كاولي جا عليمن صليت الصبح لو ما انا أذن سلف مال شياطين كلها نايمة 

:: هاي جدام حبوبتك لو ظليت ع حالك هذا زين و تصلي و عفت مكسراتك انطيك الدشداشة البيضة 

:: و الجلب اللي مجلب الدشداشة البيضة 

:: لسانك فطرس وانت بس جر عدل كلشي تريده يجرالك 

:: شوف هاشم يكولون اكعد اعوج واحجي عدل خل نتفق من هسه حتى لا تكول هاي وين حجيك ذاك 

:: اي بله سولف خل اشوفن حجيك العدل شلونه 

:: اصومن و اصلي و اغظ النظر و اختم القرآن بالحضرة هو صح لأجل مصلحة حتى اخذ الدشداشة البيضة بس الهم ماشي ع صح موش 

:: اي كمل وين تريد توصل 

:: نعنانة خارج قوس وياها ما انعدل لا هي ولا حيدر لا يصيرون جدام وجهي تره ذيج الساعة تنگلب ملحد عليهم 

:: عندك وياه عمتك انت شنهي المضوجك منها 

:: بعدني ما متأكد خل اتأكد الا اطلعها من السلف بالقندرة 

:: كوم من جدام وجهي فطرس انت لو ينزل الك وحي هم ما اتنعدل 

:: نغثيت ع بنتك مو بس أخذها الدشداشة البيضة أخذها والا اكشخ بيها جدام عيونكم و افگسها 

 راد يطلع شاف نرجس ابتسم بخبث كضاها نرجس كعدها بحجره ياخذ وياها صور  و هو يحب خدها و يلعب بشعرها و يدز لقسيم خلا حرك نقالاتنا بالاتصالات بصمات و مكالمات 

قسيم :: لك هدها لا اجيك هسه اطيح حظك هدددها لا تجيسها 

فطرس :: جنتي و حر بيها من هسه حاجزها اله تربي ع ايدها 

اجر بيها منه هو شابگها وهي هم شابگته تحبه

::  ولك فرفح هدها 

أخذها منه جدي و قسيم يحلف بيه ما يخلي احد من الولد يجيسها متخبل عليها حاسبها جبيرة و يغار عليها 

طلع للگاع شاف غفار يشغل بسيارته يريد يطلع راح اله 

فطرس :: انا موش متفضل عليكم و مسوي الكم خير مغططكم لهامتكم 

غفار :: غرد لا دوخني بل مقدمات مالتك فطرس 

:: اريدن العلوية 

غفار ترك كلش بيه و ندار عليه عيونه طالعه من مجانها بغضب 

غفار :: روح منا فطرس ما اريدن أمد ايد عليك و بيتنه بعد لاتدخله خوش 

فطرس :: خو اجيتك بالعين و اغاتي وما قبلت باجر لا تعتب عليه ع اي تصرف يبذر مني شعرة و من شاربك أخذها وعلي 

تعاركوا واحد طك الاخر بوكس لو ما جدي صاح بيهم راح غفار طلع و فطرس مشه لبيتهم شفت خباز طالع ركضت احوشن بيه 

براءة :: گاعدة ادرس بـ امتحان باجر بالحديقة اروح و ارد فتحت الباب عنبر عبايتها كلها طين عبالي واحد طاگها و امرغلها بالطين  

اعاين الابتسامة شاگة حلگها وهي بس واحد يجيسها تگلب البيت صوبين صارت عيني ع اديها كلهن طين و باگة خباز بيدها اجتني تتلوك 

عنبر :: براءة أخيتي الما جابها ابوي اللي احبنها واموتن عليها و ع گولت جدي مغمسة بماي روحي 

براءة :: گولي سويلي حميسة خباز و فضيها 

ما اشوف اله كضتني بـ اديها اللي كلها طين من جتافي و حبتني من راسي 

;:  اموتن عليج وعلي أميرة عمي حاكم 

::  ووين كلج طين ميلي عني 

صحت و دفعتها ليغاد دشداستي صارت كلها طين و ماي انفض بيها واصيح عليها 

:: شفتي شلون دمرتي ثوبي 

::  نزعيها انا اغسلها الج قابل غسلتها ع بعير 

تحجي و كضت أيدي خلت الخباز بيها و تدفعني صوب المطبخ بدلت ثوبي و غسلت الخباز زين و نكعته بماي و ملح هم 

وهي طبت للحمام تغسل رجليها و اديها من الطين اجاني علي يشمشم فرگ وحدة بالآخرى بحماس 

علي :: بوووية الريحة جابتني من راس الشارع لهنا 

براءة :: دجذب جذبة معقولة هو خبار شوصل ريحة لشارع 

::  انا اجذب انااا 

جاب خبزة و غمسها بيه ياكل ويعاين للحمام كلها تعرف بس عنبر  تموت ع خباز و هي و علي گوامه اذا شافته ياكل تمد ايدها بحلگه و تطلع اللگمة 

براءة :: ولك كافي شخليت الها اكلتهن كلهن 

علي :: خل تولي تاكل زهر مر 

كضيت ايده گوه من الجدر بعد ما غرف الخباز كله بالخبزة مالته 

براءة :: اسم الله عليها... ولك علي ولك ما بقى بالجدر بس البصل شيخلصني من لسانها 

جاي احجي وياه وهي اجت تضحك تلاشت ابتسامتها من شافته كاض خبزته و ياكل من جدر... دارت عيونها ع جدر جدر امي الفافون جان ع مجمدة شالته و گبل لا يشرد هطرته ع ظهره خلته يتلوى من الوجع ركضت الها

براءة :: يااا ولج انخسف ظهره يا يمه مات الولد شخلصنه من سجدة 

ما انطته مجال هو يركض وهي تهبد بيه بالجدر انهز لشارع وكف جدامها يلوج و يمطك 

علي :: بوووي بعمري ما ضايگ هيج خباز يمكن جي ما تعبان بيه موش عمة

برطمت مستهظمة شلون نوكل حگها دارت عليَّه عيونها مغوشة بالدمع تعتابني بنبرة صوتها 

عنبر :: هي هاي الأمانة براءة تخلينه ياكل تعبي وانا اليه ساعة غاطة نصي بالطين و احوشن وهو يجي ع حاضر يتزقنب 

براءة :: انا هسه اطلع و احوشن الج هلكد و اسوي الج والله يله مسحي دموعج صدك جذب تبجين ع خباز 

عاينت ع جدر امي انخسف بيدها لطمت ع وجهي 

براءة :: عززا ولج عنبر جدر امي مال عرسها انخسف 

عنبر :: وهي وينها امج والله مسوية بيكم خوفة حتى وهي موش موجودة تتراجفن 

راحت تمشي جدامي خطوتين والثالثة رجعت اخذت الجدر مني تكلب بيه و ابتسمت بشر 

:: جيبي من اروحن للمدرسة باجر امر ع خوالج انطي الها هلبت الله يرتفع الضغط و تنجلط و تموت 

طبت ثرمت زلاطة و طلعت طرشي احمر و ربعت تاكل و حاطة الجدر بصفها و گالبته ع خسفة تصور بيه و تدز لأمي عن طريق بنت خالي حتى تشوفه الها و دزت بصمة الها 

عنبر :: شوفي لعمة فضيلة گلها جدر عرسج نخسف و راح نخلي لدجاجات ياكلن بيه و لا تنسين صوري ردة فعلها و دزيها اللي 

عزلت شوية خباز لعمتي انعام هم تحبه بس تمرضت سودة عليَّه مالها حيل الطبخ بعد خليت الصحن بصينية و خليت طرشي و خبز حار لبست عباتي و طلعت الهم

بابهم بس مردود دكيت عليه و ندهت عليها ماكو صوت فتحت الباب شوية البوب مفتحة وهي مالها احد ما تطلع ابد طبيت و اشوفن 

فطرس حاشر عمتي انعام ويا الحايط و خانگها بثنين اديه مدري شيحجي وياها وهي عيونها ناطة من محاجرها من الخنگ شراينها كلها بارزة و شفتها زرگة ذبيت الصينية من ايدي و ركضت اريدن ادفعنه عنها 

براءة :: شجاي اسوي ولك هدها راح تموت هدها 

اصيح و اطگ بيه ع ظهره وهو مبتسم بوجه عمتي بتشفي ولا جن اطكن بيه هداها وكعت رأيحة روحها تشهك النفس كوه ركضت جبت الها ماي گبل لا اوصلها اخذ الكلاص مني ركعه بالحايط 

::  انا من شني حذرتج هذيج النوبة براءة 

تكرب مني نظراته غريبة تخوف ردت انهزم سد الطريق بجسمه 

:: لا تتكرب وعلي اصيحن و ألم الولد عليك هسه 

جراني حتى عباتي طاحت من راسي صارت ع جتافي ضاغط بقبضة ايده ع زندي حيل حسيت اصابعه طبگت ع عظم 

:: موش گتلج بيت انعام ما توصلينه و رجلج تخطي دربه.. كلت لو ما گلت 

من خوفي هزيت راسي اي أكثر من مرة 

:: گلت 

::  جا شعندج ركعتي كلمتي عرض الحايط و اجيتي وجايبة الها سم وياج هم 

:: ميل عني انت موش ولي أمري حتى اسمع كلامك 

:: حگج انا موش ولي امرج 

هداني راح لصينية الجبتها قسم من الخبزة و شال خباز بيها واجه دحسه بحلك عمتي غصب و بـ اصابعه يدفع الكمة حيل لبعلومها 

:: وخر شمالك تسودنت وخر راح تخنكها 

من شفته ما يهتم لكلامي مستمر يخنگ بيها عدلت عباتي ع راسي ركضت وانا اهدد بيه 

::  تهدالي اذا ما اصيحن لغفار اخلي يكسرك اليوم 

ركض وراي جراني من ايدي رجعني لمجاني احسن أيدي نخلعت من الجتف كرفص كدامي 

:: صايرة ما تسمعين حجاية وانا اكولن عليج براءة العلوية الحبابة 

يحجي ومبتسم مثل المجنون بوجهي شال راسه يعاين لمكينة الخياطة مال عمتي ضحك أكثر وجر المكص مال الخياط جبير 

:: هسه انا شسوي حتى اتوبج من الجية لهنانة ...