رواية فصلية ولكن الفصل السابع والعشرون بقلم سوزان ليث
رحت يمه لزمت ايده .. تعرف كلبي راد يوكف من سمعت طلقات عبالي صار بيك شي
خالد: لتخافين مصار شي بس ردت اطشر راسه لعمج
حياة: خالد اذا صار شي بيك اني شسوي كلي منو الي يعني لا ابويه ولا امي ونوب انت هم ماكو والله اني اموت واخلص كمت ابجي
خالد: حضنتها كافي ياعيني دشوفيني كبالج مابيه شي ولج اني اليوصل صوبج اكص رجليه انتي بس الي افتهمتي
وسالفه ورث بس خل تخلص وتكطعين علاقتج ويه عمامج كلهم
محد اله دخل بعد بيج
حياة: ظليت مدنجه وساكته
خالد: حياة انتي تريديني
حياة: اكيد اريدك بس ماحب هيج الامور توصل
خالد: لعد انسي عمامج ذوله كلهم مصلحجيه انتي عبالج هذا عمج ميريد ورثه يعني هو ديسوي زين هذا يريدني اطلكج حتى يزوجج لابنه حتى يصير كلشي الهم
حياة: ظليت صافنه على خالد متفاجئه يعني كلامه لخالد دايما يطلع صح وعده نظره بناس يعرفهم زينين لو لا من البدايه كلي عمج هذا ماطيقه جنت اكول هذا لان ابنه حمزه ويضوج منهم
ثاني يوم صبح خالد كلي حروح عندي شغل كولي لعمتج تجي يمج والباب ماتنفتح
راح واني بديت اشتغل وانظف وعمتي جتي ويايه ساعدني ظلت تحجي دكلي اجري البيت احسن مامتروك بس اني جنت رافضه هاي الفكره هذا البيت هواي بي ذكريات عندي بكل مكان اذكر ابويه
احب كلشي بي خاصه وره ماعفته ورحت بيت خالد ماحس براحه الا هنا
خالد: طلعت من الصبح اتفقت ويه ابو محمد حتى نروح ننطي الفلوس لعمام حياة مقابل يتازلون وبعد ميطالبون بشي رحنا عليهم والمشكله عبالهم اني اشتريت الملاك من حياه ميدرون اني اسوي هيج بس حتى حياة لاظل حايره اعرفها متريد تبيع شي غالي عليها
وفعلا تنازلو وعماتها هم كالو مريدون شي بقى بس ابو حمزه
وصيت ابو محمد ميكول شي لحياة ويوصي مرته هم متوصل شي
رجعت لحياة جانت دنيا ظهر خطيه محضرتلي الغده ومنظفه البيت من دخلت للبيت ولكيتها شون تستقبلني بهاي اللحظه اتمنيت اني وياها عايشين بيت خاص بينا
اتغدينا وكملنا للمغرب رجعنا لبيتنا بطريق خابرني ابو سالم ابو رغد
كلي تعالي اريدك مشغله شيخ
وصلت حياة للبيت وطلعت على ديوانيه ابو سالم وعرفت منه ابو حمزه داز خبر يريد يكعد ويانا حيجيب عمامه ويجي بس ابو سالم وجهه ثكيل عليه ومن داطلع كلي نمرعليك بالليل رجعت للبيت شفت امي كاعده
خالة: هلا بهالطول الحلو
خالد: هلا يمه شونج .. رحت بست راسها
خالة: شمالك مو على بعضك
خالد: حجيت لامي السالفه كلها من البدايه لحد روحتي لابو سالم
خالة: وشنو نويت سوي
خالد: يمه حياة ماتركها لو تنكلب الدنيا ماتركها وخلي يخلوها ترجيه باذنهم
خالة: اي وليدي لا تعوفها هي مالها ذنب بكل سالفه وهي يتيمه سوده عليه مايصير يسون وياه هيجي
خالد: يمه ناس كل تفكيرها بالفلوس وعبالهم اني مثلهم ينطوني جم فلس واعوفها ذوله حرام نسميهم بشر
عفت امي ورحت للغرفه لكيت حياة بالحمام
حياة: بعد ماوصلني خالد للبيت دخلت سولفت لخالتي الصار وخطيه ظلت تواسي بيه وتحجي ويايه
وراها كمت رحت لغرفتي نظفتها والهدوم غسلتهن فكلت ادخل اسبح قبل جيه خالد جنت مخلصه بس هيج واكفه جوه دوش كلش ارتاح من الماي يظل يجري فوك راسي
ماسمع الا صوت خالد يكلي
خالد: فتحت الباب عليها بهدوء دايما تنسى تقفل الباب شفتها واكفه جوه دوش ومغمضه عيونها وتحسيها سرحانه جوه الماي
كتلها .. مو زين اظلين سرحانه
حياة: تفاجئت بخالد ظليت اعيط اطلع شعدك هنا وظليت ارش ماي عليه يطلع بس هو كل عين هالكبرها عليه بدال مايطلع لكيته سد الباب وكام يتقدم عليه واني ظليت خالد شدسوي اطلع يمعود وظليت اغطي نفسي
ظل واكف يمي
كتله شتريد مني يعني وحده تسبح تدخل عليه ليش
خالد: كلت خاف تعبانه اساعدج
حياة: مااااااريد اطلع
خالد: باعي شون تعبانه دخل اساعدج
حياة: ههههه خالد لتحجي ويايه هيج اعرف غايتك بعدين
خالد: شنيه غايتي
حياة: ههههه اطلللللع ماريد
خالد: هسه شكومستحيه يعني مثلا مشايفج
حياة: اي خالد استحي اطلع عاد
خالد: يعني انتي عبالج من اتقرب يمج والا تخليني اطفي الضوه عبالج ماشوف شي
والله وداعتج كلشي حافظ بيج
حياة: اووو حطلع اني رحت اخذت المنشفه لفيتها على نفسي وطلعت وهو طبعا يمشي ورايه بكل هدوء
خالد: شعرج مبلل تعالي انشفى
حياة: ماريد اني انشفه فتحت الكنتور داشوف شي البسه خالد وكف كبال الكنتور صار بيني وبين الكنتور وظل يكلي
خالد: اريد اشوف
حياة: ششوف
خالد: اكو شغله تخصني هنا 😉
حياة: ههههه وخر ايدك خرب الباب مفتوحه هسه امل تدخل علينا
خالد: قفلتها من دخلت
حياة: جر مني المنشفه وذبها بالكاع ظل يباع عليه واني طبعا كلسع اريد اطلع شي البسه وهو لازم ايدي
خالد كافي خل البس اضوج هيج اظل
خالد: انتي بس الي كلشي بيج بس الي
حياة: جرني اله وحضني ظل دافن راسه بركبتي وظل يكلي
خالد: انتي الراحه الي مالكاها عد احد
حياة: بس راحتك مصلخه هسه
خالد: هههه اي مو رايدها بشغله تعالي
حياة: ظل يبوس بيه بكل قوته جنت احسه يريدني يدخلني بداخله هالكد مجان قوي ويايه
خالد: بس كدامج اصير ضعيف
حياة: هذا مو ضعف هذا حب اسمه
خالد: حياة لتركيني لتخليهم يفرقونا اموت بدونج
حياة: اسم الله عليج حبيبي والله اني الموت بدونك محد يكدر يخليني اتركك انت كلشي الي
خالد: مكايل هذا الحجي لاي احد انت بس الج اريد اكضي عمري كله وياج انت الي صيريلي عون بكبرتي
حياة: حبيبي انت سندي بعد ابويه وظهري الي استند عليه اول ماجيت هنا كلت معقوله الله ظلمني وجابني هنا واني مالي ذنب بس الله ميظلم احد واكيد كلشي يسويلياه بي خير الي وانت الخير الي الله نطانياه
خالد: شكد حلو من تنسين نفسج
حياة: عزه بعيني وخر خل البس شلت الخاولي لفيته على نفسي
وتقرب مني ظل يمشي ايده على خدي وبده يبوس بي جان الباب تندك وتنفتح بسرعه بحيث خالد مالحك يوخر من عدي
اني اصلا تفاجئت بالباب انفتحت عبالي مقفوله
طلعت ايه طبعا ايه ظلت اتمتمت بالحجي وحجت هي مدنجه راسها شيخ خالد يردوك وطلعت بسرعه
نداريت على خالد انت مو كلت مقفوله الباب
خالد: شمدريني حيفوتون علينا هيج خل اروح اشوف منو يريدني
وانتي لابسي شنو هاي لاظلين هيج
حياة: 😱 صالي ساعه اتوسل بيك اريد البس
طلع خالد اني لابست ومشط شعري وكملت وطلعت طبعا دادور على ايه سئلت امل كلتلي شفتها صعدت فوك
صعدتلها دكيت الباب فكلتلي ادخل
دخلت جان شوفني بسرعه جتي عليه
ايه: حياة والله مادري شيخ خالد بالغرفه والله العظيم صرت بنص هدومي خرب بيه شون فتحت الباب
حياة: ههههههه خرب والله ايه عرفت بيج هسه هيج صاير كلت خل اصعدلج
ايه : والله العظيم بعد مانزل شون اشوف وجهه الشيخ والله احس نفسي حجيب
حياة: عزه ايه كافي حتموتيني ضحك كل ماذكر شكلج وشون جنتي مصدومه
ايه : خوما حجه عليه الشيخ خالد الله عليج
حياة: لا يابه ماحجه شبيج صير بارقى العوائل تذكرين من دخل عليكم هو وانتي وحسين هسه ندارت الدنيا وانتي دخلتي علينا
ايه: والله بس دخلت عليكم اجتي بالي من دخل علينا كلت ربي ليش دايما انحط بهيج مواقف
حياة: ههههه يله مصار شي والمفروض اني الستحي خالد اليستحي مو انتي
ايه: غير غرفتكم وتاخذون راحتكم بيها
حياة: يله عادي لاظلين هنا نزلي اني حنزل اوكي
ايه : اني حبقى هنا لحد ماجيب
حياة: هههههه يله باي حنزل
نزلت جوه لكيت رغد واهلها جايين وطبعا جان صوت عالي بس مادخلت عليهم رحت للمطبخ شفت امل كتلها شكو
امل: مادري شو امها من دخلت لحد الان ماسكتت
حياة: خالد وين
امل: مادري بالاستقبال يمكن ابوها واخوها جايين
وراها راحو حتى رغد مابقت راحت ويه اهلها
جنت اني وامل واكفين اجتي علينا خالتي وكالت لامل تلحكها لغرفتها
امل ظلت تباع عليه ومبين الخوف عليها راحت واني رحت للاستقبال ماكو صوت دكيت الباب
خالد كال ادخلو ماكو احد
خالد: لما طلعت من الغرفه كلولي ابو سالم وسالم بالاستقبال يردوني رحت عليهم سلمت وكعدت طبعا ابو سالم وجهه ثكيل عليه كلش
كتله خير عمي شبيك
ابو سالم : والله ياشيخ خالد الي سمعته مايبشر بخير
خالد: خير صاير
ابوسالم: اني ححجي هذا الحجي والكاعدين ماكو احد بيهم غريب هذا اخو المره وهذوله اخوتك
خالد: احجي ابو سالم مرخوص
ابوسالم: جا بنتي جيبها عدي واعرف منها انت ذابها ذبه الجلب لاتسئل عليها لا دكللها شمحتاجه لا عادل بينها وبين ذيج فصليتك
خالد: حرمتي لادخلها بسالفه وماهي فصليه هاي زوجتي شرعا وقانونا
ابو سالم : اذا هيج دافع عليها ليش مدافع على بنتي شناقصها عنها
خالد: انه مامقصر وياها مثل الداسوي ويه الاولى داسوي ويه الثانيه بشنو قصرت
ابوسالم: ها زين لعد من تاخذ الاولى تفرفرها بغداد جا غير تاخذ ثانيه هم
خالد: وانت ماكلت انه ليش اخذت حرمتي وعفت الثانيه يم اهلها ماسئلتها شمسويه وانه ماجنت ناوي احجي لخاطرك بس مادام هيج السالفه لازم تعرف
ابوسالم : نوب بنتي المسوي شمسويه واني اكسرها
خالد: حرمتي تصعد للسطح فوك هي تصعد تقفل الباب عليها من العصر للمغرب هي فوك ودك بالباب ومحد يفتحلها ودنيا شتاء مخافت من الله
وموكعه بين بنتي وبين حرمتي وكايلتلها ذيج حجت عليج ومالفه حجي عليها
كل ماشوف حرمتي الاولى ظل شبعها حجي ومغثه ولعبالك حرمتي الاولى تحجي ودكلي لاتفتح حلكه ولاتحجي وكل ماشافتني ظل دكلي عليها خطيه وخطيه لاتظلمها لاسويلها
وهي شون تقابل الحسنه مالتها من يوم دخلت الهذا البيت هي مشاكل 24 ساعه ويه الحجيه وحرمت حسين حتى حرمت حميد كامت ماتجي ولاجيب جهالها من وره حجيها وتصرفاتها واكثر من مره حجيت وحذرت وهي دزيد بسوالفها
سالفه ثانيه تاخذ من امي فلوس دكللها مو خالد ماينطيني واني مامقصر وياها بشي كلشي الي تريد اجيبه والفلوس اخليها عالميز قبل ماطلع من الغرفه اكول خطيه خاف تستحي دكلي
ماجه خطار عدنا الا شفتها كاعده وتشكيلهم مني
كله هذا واني اكول ميخالف لخاطر ابو سالم خل اسكت بعدها صغيره تتعلم بس صارلها شهور هنا وهي دصير اسوء
ابوسالم: بنتي هسه طلعت هي العايله وياك
خالد: مامصدك تعرفني اني ماجذب لو على كص ركبتي
ابوسالم : ماشي بويه هي اصلا البنيه ماتريد ترجع هنا اخذلها بيت وحد وكعدها بي واخلص من هاي المشاكل
خالد: والله ابو سالم تعرفني اني شكد اعزك واريد خاطرك بس مال اطلعها بيت وحد خل تنساها تريد تعيش هنا اهلا وسهلا متريد ظلت يمها
ابوسالم: يعني هيج تبيع نسبنا
خالد: لا حشى الي يبع نسبكم على عيني وراسي بس اني مايمشي كلام حرمه عليه
ابو سالم : هذا اخر كلام
خالد: ماعندي غيره
طلع ابو سالم وهو زعلان مني بس اني بوكتها ارتاحيت كلش من يوم الزوجت رغد وهي شايشه عالبيت كله بس مشاكل وامانه الله حياة عمرها ماشكت منها مع العلم هي دايسه بطنها
وره شويه ندكت الباب دخلت حياة شفتها كتلها تعالي
حياة: خالد شكو ليش صوتكم عالي وحتى ام رغد مدري شبيها بس تحجي بصوت عالي
خالد: ناس على باطل بالكوه يردون يسون نفسهم على حق
حياة: يعني شنو
خالد: عوفج من هالسوالف كومي صبيلي جاي راسي حينفجر
حياة: اي ماشي رحت صبيتله جاي واخذته ظل يشرب ويباع عليه
خالد: اعرف محتخليني الا تعرفين السالفه
حياة : هههههه اي 😅
خالد: رغد تريد تكعد بيت وحد
حياة: اي وين حتكعدها
خالد: محكعدها كتلهم تريد تكعد هنا اهلا وسهلا متريد مو بلازم
حياة: وشكال ابوها
خالد: ماقبل اكيد وطلع زعلان فوك مابته العايله
حياة: خالد خل ارجع اني لبيت ابويه وخل هي ترجع هنا هي اكيد تريد تطلع من ورايه
خالد: انت مخبله
حياة: لعد شحسوي كلي
خالد: معليج هي تنحل
رجعت لامل شفتها ماكو صعدت لغرفتها لكيتها تبجي رغد كايله لامها على سالفتها ويه احمد وامها كايله لخالتي عود معيرتها باامل وخالتي مكسفه احوالها
حياة: عدت نقريبا اسبوعين هيج واني جنت هاي الفتره كلش تعبانه وبس انام الظهر انام اكعد بسته المغرب وبالليل ارجع انام من وكت وصبح بالكوه اكوم حتى خالد كام يكلي مالحك احجي وياج بس تنامين جنت مستغربه لنفسي ماعده شهيتي الي صارت مفتوحه ماشاءالله
مره جان عدنا خطارخاله خالد الجبيره مريه جبيره فجنت كاعدين دناكل فاني مجلبه بطرشي بس اكل بي
فهي انتبهت كلتلي يولي شبيج بس تاكلين طرشي خاف حامل
اني كتلها لا خاله اني احبه
فخالتي كلتلها الله يسمع منج وتطلع حامل وهي هالايام بس تنام
خاله خالد كلتلها هاي حامل اخذيها مني بس اذا طلعت حامل الي البشاره
خالتي كلتلها اطلبي كلشي اذا طلعت صدك
اني ظليت صافنه عليهم ومبتسمه بسرعه سوني حامل المهم ماخذت حجيهم لان همه ذوله نسوان الكبار كل سالفه وكالو حامل
بالليل اجتي خالتي للغرفه كلتلي
خاله: حياة يولي خاف صدك حامل انتي وماتدرين بنفسج
حياة: والله خاله مادري بس ماعتقد
خاله: ماتاخرت عدج الشهريه
حياة: خاله اصلا هي ممنتظمه خاصه وره وفاه ابويه ظلت تجيني وره موعدها ب10 ايام هيج
خالة: يعني هي ماجايتج صارلها شكد
حياة: كتلها محاسبه شكد والله اخذت صفنه احسب كتلها يعني ويه اليوم يصير 16 يوم متاخره
خالة:اللهم صل على محمد وال محمد .. وين الله واهل بيته طلعين حبله
حياة: مجرد هذا الكلام وشعور انتي حامل حلو شون اذا طلعت صدك حامل
فخالتي كلتلي باجر روح نحلل دم يبين اذا اكو حمل لو لا مضبوط
اني ظليت الليل كله لازمه بطني اكول معقوله حامل واندار اباع على خالد هو نايم جان اكول اذا عرف حامل شيسوي
ثاني يوم صبح كتلها لخالتي خل روح نحلل كالت اصبري العصر روح محد مفتح هسه بالكوه صار العصر المهم خالتي كالت لحسين يذبنه يم المختبر طبعا خالد ميدري اني رايحه احلل كلتله رايحه ويه خالتي دسوي تحاليل الها كلت خاف اكله ونوب افشل ماكو حمل وينقهر
فحللت واني كاعده انتظر وبس ادعي اطلع حامل يعني ام المختبر كلتلي 5 دقايق ويطلع هاي ال5 دقايق احسهن صارت سنه
اخذت التحليل منها قبل مافتحه كتلها شنو
كلتلي مبروك حامل
اني هنا مجنت ماكدر اوصف مشاعري فرحتي حيصير طفل عدي من خالد طلعت خالتي كامت كالت ها بشري
كتلها خاله حامل هي اخذتي بحظنها خطيه كامت تبجي ونوب اني مدري ليش كمت ابجي وياها
الكاعدين دينتظرون سئلو خالتي كلولها صارلها شكد مزوجه عبالهم صارلي سنين لان فرحتنا جانت اوفر كلش خالتي كلتلهم بعدها عروسه
طلعنا اجه حسين اخذنا خالتي كلتله هو خطيه فرح وباركلي وجان يوكف يم ابو حلويات كال هذا الخبر ميصير بدون حلويات نزل جاب باكيتات حلويات
رجعنا للبيت خالتي طبت واني وراها امل كاعده كلتلها ولج امل حيصير عدج اخو
امل ظلت صافنه شويه بعدين استوعبت اني حامل خطيه هم فرحت وكلتلي بعد مسوين شي لحد مجيبينا ولي العهد
فجنا كاعدين خابرت خالد جنت بس اريد اكله بس ردت اشوف ردت فعله خابرته كلي جاي بطريق
خالد: رجعت للبيت لكيت حسين بالباب سلم عليه ومبتسم ومبين فرحان شبي هذا طبيت جوه امل وايه يباعن عليه ويضحكن شبيهم ذوله شو الكل فرحان
دخلت لامي سلمت وحياة يمها هم تباع عليه ومبتسمه امي بس شافتني كامت عليه بوستني ودكلي مبروك يمه
ظليت اباع عليه شكو صاير
كلتله حياة حامل
ماكد اوصف الفرحه الي جنت بيها من سمعت امي دكلي حياه حامل باوعت على حياة كتلها صدك حامل
حياة: اي حللت وطلعت حامل
خالد: تقربت على حياة كتلها متاكده يعني كلولج حامل
حياة: اي والله حامل
اول مره اشوف خالد عيونه كلها دموع اجه عليه وظل كلسع يكلي انتي حامل مثل مامصدك جان يلزم راسي ويبوسني وظل يحاول يمسح بدموعه
وكعد يمي وكلسع يكلنا والله مامصدك حيصير عدي طفل
امل كلسع دكله بابا لتخليني اغار منه من هسه بشقه تحجي
بس هو يكلها انتي فرحتي الاولى
من صدك جانت احلا اللحظات الي عشته
عرفت بعدين خالد دافع لعمامي فلوس حتى يتنازلون عن نصيبهم بالورث واني عرفت وردت ارجعله الفلوس الدفعها بس هو ماقبل ياخذها وظل يكلي مادام اني موجود ماكو اي شخص يضوجج
صدك هو سندي وظهري حتى عمي ابو حمزه دافعله فلوس حتى بعد مايدخل بيه وبااملاك ابويه
بهاي الفتره ايه جابتنا خالد الصغير حسين سماه على خالد لان يعتبره ابوه ثاني هو الي رباه
جان صغير كلش وماكدرت اشيله بس شويه لان الكل يصيح عليه من يشوفوني داسوي شي دللوني كلش الكل جان خايف عليه وعلى الطفل الي بطني
كل هالفتره ورغد ماتقبل ترجع للبيت وخالد رافض ياخذلها بيت وحد شكد حجيت وياه وخالتي هم بس جان رافض كلش لحد مابوها كال لخالد طلكها اذا ماتريدها لاتخليها هيج معلكه
خالد حاول اكثر من مره يرجعها بس هي جانت رافضه بالاخير طلكها
مجنت زعلانه عليها ابد يمكن من وره تصرفاتها مخلت احد يزعل عليها
صرت حامل 6 اشهر وخالد ميقبل يخليني اسئل الدكتوره ميريد يعرف نوع جنين
بس بطني جانت جبيره خالتي دايما دكلي انتي بيج بنيه صايره حلوه كلش وناس دكلي بيج ولد وماكومعرفت
امل نخطبت لاحمد بعد معانات ويه خالد يله قبل واحمد جان مجهز كلشي بحيث بسرعه زوجت كلش فرحتلها وكلش حسيت بغيابها بعرسها ظليت ابجي ياهو اليشوفني يكلي انتي مرت ابوها المفروض تفرحين خلصتي منها بس اني مجنت معتبرتها بت رجلي ولاهي معتبرتني مرت اب هي اختي واكثر
بيوم جان عندي مرجعه عد الدكتوروجنت بسابع بس جنت تعبانه بشكل مو طبيعي حركتي بالكوه اتحرك ماعده احس ثكل كلش جبير بطني طبعا خالد محلفني ماسئل دكتوره شنو بيه ولد لو بنيه وخالها امانه عليه حتى ماسئل
فجان عندي مراجعه داكللها للدكتور كلش داتعب وثكل كلش احسه على مثانتي
فكلتلي هذا طبيعي لان توام
اني كتلها اني حامل بتوام ندارت عليه كلتلي ليش مكايلتلج
كتلها لا مكايلتلي فكلتلي مستحيل اني من اشوفه توام اكول ومدري شنو بس اني بوكتها ظليت بس فاتحه حلكي مبتسمه معقوله وكلسع اسئل دكتوره صدك بيه توام
فكلتلي والله توام والي مبين هذا ولد بس ثاني ممبين كلش ساد رجله
كلش فرحت من عرفت رجعت للبيت خالتي طبعا جانت ويايه وبوكتها حسيتها طايره من الفرحه من عرفت بيه توام
رجعت كلتله لخالد كلش فرح ونوب كلتله واحد بيهم ولد بس ثاني ممبين ظل يحجي عليه يكلي مو كلتلج ماريد اعرف بس ظل فرحان واصلا زاد دلالي البيت كله كل ميطلع احد يجيبلي ملابس للجهال لو يجيبولي اكل الي ههههه
صرت بتاسع صرت عباره عن بطن شكد جنت اكل بس ماسمنت
وخاصه بنهايه حملي تعبت كلش يعني خاصه من جانو يتحركون احس بطني تريد تنشك بس جنت فرحانه دكتوره كلتلي الا عمليه ماكدر اجيب طبيعي فحددت يوم اسويلي العمليه الكل راح ويايه للمستشفى خالد بهذا اليوم العصبيه تقرا الف عده ياهو اليجي كباله يرزله ماحسيت بشي اني دخل حسيت نفسي غمضت وفتحت لكيت نفسي جايبه والكل فوك راسي بس
حتى الالم الي حسيت بيها وره مافكني البنج كلشي هان عليه ونسيته من جابولي جهال وشفتهم خالد جان طاير من الفرحه
واني جنت فرحانه كلش لان صار عدي ولد اثنين ميشابهون لان كل واحد بجاره على كد التعب الي شفته على كد البجي الي عشته من اول مازوجت خالد على كد القهر الي عشته كلشي نسيته من شفتهم كبالي وخالد كلسع يشيل واحد يكبر باذنه سمينا واحد مصطفى وثاني ياسر
جانو كلش وكحين خاصه من صار عمرهم سنتين جانو تقريبا نفس العمر ويه خالد ابن حسين يكتلون ابن حسين خلودي الصغير جنت ماقبللهم واكتلهم لان يكتلوه لان جان فقير على امه وابو طالع صبح كله هايجين بالبيت وخالد يدافعلهم وبالليل اثنينهم يجون يمي وخالد يغار منهم لان ينامو يمي مرات احس عليه بالليل يشيلهم كل واحد بجربايته ويجي يحظني عندي 3 جهال مو اثنين
الحمدلله على كل حال الله عوضني خير مهما ضاقت بيكم الدنيا وحسيتو نفسكم بعد متتحملون اكثر الله حيفتحها عليكم ويفرجها
الحمدلله مناقصني شي غير ابويه كلش مفتقدته واتمنى هو موجود
نصيحه كل شخص ابوه وامه عايشين داروهم وسمعو كلامهم والله اذا راحو حتتندمون على كل لحظه مو وياكم الله يحفظ الجميع❤️
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
