رواية فصلية لظالم الفصل الثاني بقلم زينب نور
كبرت وفات يوم وراح يوم صار عمري ١٨ سنه وهنا لازم اقرر ويه منو اروح وابقى عايشه عنده اهل بابا لو ابقى عد ماما اني اصلا جنت بدون حجي ماما لان مجانت تقبل تكول الي على سوالفهم تكول انتي صغيره ميصير تتعلمين الحقد بس اني من جنت اروح الهم وماما تروح وياي متقبل اروح وحدي جنت اشوف تعاملهم ويه ماما شلون جان يختلف ويكرهونها ويحتقروها وجانت تتحمل علمودي لحد منرجع للبيت لبغداد
فأكيد وبارادتي اختاريت ماما بوكتها تخبلو وضاجو ومقبلت وكالو للقاضي انو أمها جابرتها تحجي هيج واحنه منخلي بتنه تتربى عد الغريب احنه شيوخ ومنقبل بهذا الشي وخاف تروح تقصر أمها عليها شي وبعد اااو كومة حجي كالو
عاد اني كلت للقاضي انو اني وافقت بكامل ارادتي وبدون غصب او جبر احد وبكامل قناعتي واني بلغت السن القانوني محد يكدر يجبرني على شي تخبلو همة شلون هيج تحجين وبالإضافة الى انو اني جنت محجبه حتى ماما بس من تروح ويايه لبيت اهل بابا بس تخلي على رأسها
كالوله شوف تربيتها شلونها الها حتى معلمتها الانحراف ما معلمتها على الدين ماكو حجاب
رد القاضي كال الحجاب ما اله دخل بالانحراف هذا اولا قناعه للمراه وثانيا شي حضاري وثقافي فيبقى بكيف البنيه هذا الشي
ضلو يجادلون والقاضي انزعج كاللهم ترة انهي القضية وارفع بيكم للسجن على هذا تعاملكم شلون تريدون تعيش البنيه عدكم لعد
كتله سيدي بالإضافة تره اني اكمل دراستي لان همة عدهم هذا الشي ميصير وميقبلون بي فاني عادي ترة اكمل واخذ شهادتي كال من حقج هذا الشي
اباوع عليهم كلهم يخوزرون بيه وضايجين من عندي عاد انتهت الجلسة واني موافقه على انو أعيش ويه ماما ولازم أضل على شرطهم انو كل فتره اروح عدهم وازورهم
من طلعنه جدو ابو بابا مرضى وغلط عليه وكام يحجي عليه وكال عود انتي بت العزيز مرديت عليه ولا حاجيته خلينه وطلعنه
رغم هذا ماما كالتله تفضل عمو غداكم يمنة كاللها ما أريدج ولا اريد غداج خفيتي وبليتي مجاوبتة خلينه وصعدنة بالسياره ماما الي تسوق وعدها سياره اني كمت أتدرب بالجديد
وصلنه البيت وماما فرحانه كلش وجدو وبيبي كيفو وبوسوني ماما جان عدها خوان اثنين واخت وحدة يعني همة اربعه
جدو كال على هاي المناسبه نطلع نتعشى بالمطعم طلعنه كلنه احنى وخوالي وبيت خالتي تعشينه بالمطعم خوالي جانو كل واحد بيت وحد بس بصف بيت جدو جان بيت جدو بالكراده
عاد مرت الأيام واني اروح كل فترة لبيت جدو اهل بابا كوة لان جانو همة يخابروني يكولون جدج وحبوبتج همة يكولها هاي الكلمة يعني بيبي يريدون يشوفونج ومن جانو يتمرضون هم اروح من صير عدهم مناسبة يعزمون لازم اروح وبالقوة والإجبار مم ماما اروح تكول علمود ليحجون عليج
من جنت اروح جنه بليل ننجمع بالديوان عدهم عمامي واهاليتهم وعماتي واهاليتهن اسمعهم يكول كل واحد وحده بت اخونه احمد النه ما تطلع للغريب وجانو ولد عمي يباوعون عليه واحد من ولد عمي يصيحلي الشكرة ما ارد عليه
جانو يعتبروني متكبرة ومغرورة عادي شيكولون خلي يكولون ميهموني وأكثر من مرة يفتحون ويايه موضوع الحجاب واترك لبس البنطرون
واني اجاوبهم بالرفض كيفي وكت ميعجبني عود البسه اما بالنسبه البنطرون هذا الشي راجع اليه
أنوب تعلمت السياقة وأخذت اجازة سوق تخبلو وولد دكعمي يحجون عليه شلون تجين لبيتنه ولعدنه تسوقين سياره وبيهم يجون لبغداد علمود ياخذوني واني ما اقبل
ومن اروح يوكفولي مكان بعيد عن القريه علمود ياخذوني للبيت واني اعاند ما اقبل اروح وياهم أضل اسوق لحد ما اوصل البيت
جانت ماما دائما تروح ويايه ابد متعوفني وحدي اروح ان الطريق طويل من بغداد للجنوب من اتعب هية تسوق بدالي لحد ما ارتاح
جنة اني وياها مثل الصديقات مو بنت وامها هيه تاخذ رايي وأني هم كذلك بكلشيت حتى طلعاتنة سوه
بيوم جنه كاعدين دك التلفون مالتي باوعت رقم عمي فتحت خط بعد السلام والكلام كال حبوبتج مريضه ومو زينه كلش تكولخلي زمرد تجي اريد اشوفها خاف اموت كتله انشالله عمو هاليومين انشالله اجي
رد بساع كال لا لتتاخرين باجر من الصبح اطلعي من بغداد وتعاي تعجبت هاي اول مرة يكول الا اليوم من اكوللهم هالاسبوع عادي ميعارضون
كال امج هم تجي وياج كتله اي اكيد كال هله بيها يله باجر ننتضرج عود تعاي كتله انشالله سديتة منه وسولفت لماما كالت عود باجر نروح
ثاني يوم طلعنه من الصبح جان ماما بالطريق تكول شو ابد ممرتاحة وأحس كلبي يوجعني كتلها اسم الله عليج ماما حبيبتي تريدين نرجع كالت لا كملي لا يكومون يحجون
