رواية جثة الخرابة الفصل الثاني بقلم محمود الأمين
الشخص ده ولا واحد من التلاتة المشتبه فيهم، والراجل اللي بلغ واللي كان اسمه كارم قال ان المستاجر اللي اجر منه الاوضه اسمه لطفي السيد عماد..طبعاً واضح انه اسمه مركب فقولتله
_ انت بتقول ان الراجل ده مش من المنطقه عندكم مش كده؟!
= ايوه يا باشا ده واحد غريب اول مرة اشوفه.. جالى وطلب يأجر الاوضة خمس ايام
_ طيب تمام وعملت عقد ايجار على كده يا عم كارم؟!
= عقد ايجار ايه يا باشا؟!.. بقول لحضرتك خمس ايام بس
_ وايه يعني افترض قعد في الاوضه وقالك انا قاعد هنا وضع يد، كنت هتخرجه ازاي؟!
= لا يا باشا ساعتها كان ليها مليون طريقة، انا اه ابان راجل غلبان بس في المشاكل اعجبك اوي يا باشا
_ لا والله.. طيب تمام بس على الاقل اكيد صورة بطاقة الشخص ده؟!
= في الحقيقه يا باشا لا، ولا صوره بطاقه ولا عقد ايجار.. اصل الزبون ده كان مقرش
_ كان ايه؟!.. يعني ايه مقرش؟
= يعني دفع كتير، ده اداني في الخمس ايام 5000 جنيه، يعني اليوم حسبوا على 1000 جنيه هكلمه انا بقى في صورة بطاقه وعقد ايجار
_ طيب انت عارف انك باللي عملته ده.. لو ثبت ان هو اللي عمل كده في البنت هتبقى شريك معاه في الجريمة، عشان القانون بيلزمك انك تعمل عقد ايجار وتاخد صوره البطاقة بتاعة المستأجر.. لكن ما شاء الله انت فخور باللي عملته وكإنه انجاز
...
وطلبت من العسكري يركبوا البوكس لحد اما نشوف ايه حوار الدم اللي في الاوضة واللي بنسبة كبيرة هيطلع الدم ده يخص سلمى، وبعد اقل من 10 دقايق وصل فريق من المعمل الجنائي للاوضة الخاصه باللي اسمه كارم واتخدت عينة من الدم اللي في الارض، واترفعت البصمات اللي كانت في الاوضة
وبعدها اتحركت ورجعت على مكتبي.. وطلبت من الرائد اشرف انه يجيب اذن باستدعاء الاستاذ حسين المدرس اللي كانت سلمى عنده قبل ما تختفي، وكمان يطلب من فريق البحث الجنائي عمل تحريات عن شخص اسمه لطفي السيد عماد ولكن في البداية يجيب الاستدعاء بتاع الاستاذ حسين
كنت عايز اتكلم معاه وحاسس انه يعرف حاجة او على الاقل ممكن يساعدنا
...
وفعلا بعد كام ساعة كان واقف قدامي الاستاذ حسين عبد السلام المدرس اللي بيدي دروس خصوصية للطلبة.. ولكن من اول ما شوفته وانا مش مرتحله
_ انت الاستاذ حسين مش كده؟!
= ايوه.. انا الاستاذ حسين عبد السلام
_ انت عارف انت هنا ليه يا استاذ حسين؟!
= اكيد عشان الطالبه سلمى اللي اتقتلت وهي راجعه من الدرس بتاعي.. انا متابع الاخبار وعارف كل حاجة بتحصل
_ ما شاء الله عليك.. طيب كده انت هتوفر عليا كتير، علاقتك بالطالبات بتكون عامله ازاي يا استاذ حسين؟!
= مش فاهم السؤال.. ممكن حضرتك توضح؟
_ على حسب التحريات في بنت قبل كده اتهمت حضرتك انك كنت بتقرب منها زياده عن المعتاد وده اللي خلي البنت تخاف وتكلم اهلها وتقولهم اللي حصل.. وساعتها اتعمل ضدك محضر ولكن كل البنات شهدوا في صفك وقالوا عليك بني ادم محترم
= طيب حضرتك اتكلمت وجاوبت على نفسك، البنات شهدوا في صفي وقالوا ان صاحبتهم كدابة
_ دي الحاجه الغريبة اللي انا مستغربها، كل البنات تشهد في صفك مفيش ولا واحدة تاخد صف صاحبتها وتدعمها حتى لو كانت كدابه مش شايف ان ده غريب شوية؟
= هو حضرتك جايبني هنا عشان تكلمني في حاجه انا طلعت منها براءه اصلا، ولا عشان البنت اللي اتقتلت واللي انا برضه مش فاهم انا ايه علاقتي بالموضوع.. انا علقت بيهم بتنتهي بمجرد ما بيخرجوا من الدرس وبيتوجهوا لبيوتهم، انا ما ليش دعوة بيهم
_ اكيد الكلام ده مفهوم يا استاذ حسين روح دلوقتي ولكن ممكن نستدعيك تاني في اي وقت
..
وبعد ما مشي الاستاذ حسين، دخل عليا الرائد اشرف وفي ايده وورق واتكلم وقال
_ للاسف يا فندم الموضوع حيطه سد كالعادة.. عملنا تحريات عن لطفي السيد عماد والشخص ده متوفي من سنتين
= كنت متوقع ده، وحاجة من الاتنين يا اما فعلاً الشخص ده ميعرفش المستأجر وطمع في الفلوس زي ما هو قال، او الشخص ده بيكذب علينا ويعرف المستاجر ده عز المعرفة وكان عارف برضه هو هيعمل ايه؟.. ولكن خلينا منستعجلش ونشوف تقرير المعمل الجنائي هيقول ايه، والبصمات اللي في المكان دي تخص مين؟
...
فضلت مستني 48 ساعة لحد ما ظهر تقرير المعمل الجنائي والبصمات وزي ما كنت متوقع بالظبط الاوضة بتاعة كارم واللي كان ماجرها لواحد مجهول الهوية هي مسرح الجريمة فعلاً، والدم اللي كان على الارض هو دم سلمى، اما بالنسبه للبصمات فالبصمات الموجودة في الاوضة كانت بصمات سلمى بس.. وعشان كده طلبت من الرائد اشرف بيجيب كارم من الحجز عشان اتكلم معاه.. وبعد خمس دقايق كان واقف قدامي وقولتله
_ بص يا كارم الكلام اللي انت قولته مدخلش ذمتي بمليم، من الاخر كده انت عارف مين المستأجر بس خايف تتكلم
= وهخاف اتكلم ليه؟.. انا حكيت اللي عندي يا باشا
_ طيب طالما مصمم كده، فانا عاوز اقولك ان الاوضه بتاعتك واللي كنت مأجرها لشخص مجهول جاب بنت صغيره لسه في حدود ال 13 سنة واعتدي عليها(ج) وهتك عرضها، والبنت دي لقينا جثتها في الخرابة فدلوقتي قدامك انك يا تتكلم وتقول مين هو المستأجر ده.. يا الا هلبسك القضية كلها لوحدك.. قولت ايه؟
...
كارم سكت وكان بيفكر في كلامي وده اللي خلاني اتاكدت انه فعلاً عارف حاجه وخايف.. ولكن رجع وقال نفس الجملة انا قولت اللي عندي يباشا، وده اللي خلاني احبسه لحد ما نشوف اخر التحقيق ده هيوصلنا لفين؟!
وفي الوقت ده وصلني مكالمه من المستشفى وكان الدكتور بيبلغني ان حالة المقدم شاهين اتحسنت وانه بقي قادر يتكلم دلوقتي.. فاتحركت انا والرائد اشرف على المستشفى وقابلناه وسلمنا عليه ولما حسيته قادر يتكلم وبيسأل عن القضية قولتله
_ في كذا واحد مشتبه فيه يا شاهين باشا، وللاسف اخوك صبحي واحد منهم
= اخويا صبحي.. لا مستحيل يعملها انا عارف انه مجنون وانه بيتعالج بس ده بيحبني ومستحيل يأذيني انا بأكدلك
_ للاسف اخوك صبحي هربان من المستشفى من فترة، ومحدش عارف هو فين؟... وانت راجل قانون يا شاهين باشا وواثق انك لو عرفت مكانه هتبلغنا ده لو يعني عاوز حق بنتك يرجع
...
ومشيت انا والرائد اشرف بعد ما اطمنا عليه ورجعت على مكتبي ووقتها لقيت واحد مستنيني ومعاه بنت صغيرة وطلب مني يتكلم معايا وانه عنده معلومات مهمة بخصوص الجريمة اللي بحقق فيها.. دخلته المكتب وقعدنا وعرفت انه صاحب السوبر ماركت اللي في نفس الشارع اللي فيه الخرابة واسمه اسماعيل وقال انه شاف الشخص اللي كان ماشي ورا البنات وكان بيحاول يضايق البنت دي، والكلام ده في اليوم اللي اختفت فيه
وقبل ما الراجل يتكلم ويقول ده مين؟!
الباب خبط ودخل الرائد اشرف وهو بيقول ان المساجين بيزعقوا وبيضربوا في بعض وبيطلبوا حضرتك تروح على الحجز وشكله في مشكله كبيرة.. استاذنت من الاستاذ اسماعيل دقيقه وهرجعله وروحت على الحجز اللي كانت فيه المشكله وطلبت من العسكري يفتح الباب واول ما دخلت الحجز شوفت اللي مخلي المساجين بيصرخوا.. وهنا كانت الصدمه..
