رواية فصلية بديلة ( شموخ ) الجزء الثاني الفصل الثاني 2 بقلم ام ملكوت

••سالوني من هي الانثى ؟؟

فقلت هي من تقول : انا لا ابيع كرامتي حتى

وان ضوى التراب انوثتي 

فانوثتي ملك كرامتي وكرامتي تزيد بريق انوثتي••🎶🌉

_اي نقالي

_بله اشوفه 

_ليش

_هيج اشوف موديله 

_كول اريد افتشه وهاي هيه عليمن هل حجج

_ههه ذكيه ماشاءالله يعني اذا كتلج اريد افتشه تنطينياه

_طبعا لا

_ليش عندج بي شي

_اي عندي محادثات صديقاتي وصورهن وصوري شكو تفتشهن وتشوفهن وبعدين لو عندي شي ماجيبه وياي هنا واكلب بي كدامكم

_خرب عشيرج شني من عقل شايله انطيني النقال كتلج برنامج عادي ماله شغل بالصور والمحادثات 

_كول والله

_والله وروح جدي 

_تمام ولو ماصدك احد بس راح احاول اصدكك لان حلفت باسم الله

_اي يله انطيني..

انطيته النقال ومديت راسي اشوفه شيسوي باوعلي وضحك وهز راسه بحيره على سوالفي بقه يبحوش يدخل منا ويطلع منا دخل للواتساب وكتله..

_ها وين ليش دخلت هنا مو كلت مادخل عل برامج 

_اي اريد امسح فد محادثه اشوف ترجع بعدين لو لا جا شلون اجربه

_اي اشوه ريحت كلبي بس منين عرفت تسوي هل برنامج

_من صاحب المحل الاشتغل بي مبرمج ويعرف هل سوالف وجنت بس اباوعله وهو يطلع محادثات اليجيله وهاي اول مره اجربه وانزله بنقالج حتى اتاكد ان خطواتي صحيحه

_هاااا حلو زين علمني عليه

_شتسوين بي ولج 

_للاحتياط ههه

_لا احتياط ولا غيرهه سوالف كبار وخبراء هذا مو زين عليج

_لا حباب علمني

_اشش ماعلم هاج نقالج وكفيني شرج

_هسه صار شري توه تتوسل بيه انطيكياه

ضحك علي وطلع من المطبخ استفزني الخبيث مايقبل يعلمني .. اخذت نقالي وبقيت اكلب بالانستا لحدما اندك الباب وسمعت صارت هوسه مال سلام وحجي بره

كمت طليت من شباك وشفت زلم هواي وكلهه معكله شكلهم مو مريح .. رحت يم امي ومرت عمو بالصاله دخلهم بابا وعمو للديوان وسدو الباب كلهه لحضات وبدو يحجون واحد يرفع واحد

يكبس سوالف مفهومه وسوالف مو مفهومه لحدما سمعت صوت محسن ابن عمو برز من بيناتهم وصار هدوء فتره وصار حجي بصوت عالي وصياح والفهمته ان اخوانهه يردون يقتلونهه 

وشي كامت تركع بشي لحدما صار هدوء وبسبسه لزكت اذني بالباب اريد اسمع شي ماكو اخر شي مليت خليت وابتعدت ويه امي ومرت عمو رجعنه للصاله كعدنه وبقينه ننتظر ماطولوا هواي 

وطلعوا من الديوان وصلوهم بابا وعمو للباب ودعوهم وراحوا كلهم دخلوا والحيره على وجهم وعمو باقر يباوع لابنه بحيره وتسائل اخر شي سالتهم مرت عمو شصار وعمو حجه ويه محسن ..

سالفتهه بين العشاير وتشوهت سمعتهم انه مثلما حجيت بالديوان وعند كلمتي البنيه انه راح اتزوجهه واليجيب معدلهه بالباطل انه الراح اوكفه عند حده ..

سكت عمي ومرته حجت ويه ابنهه ..

_شنو يمه قصدك شصار احجولي شدخل محسن بهاي المشكله فدوا يا رجال احجيلي شكال محسن بالديوان وشنو المتاكد منه...

_البنيه بريئه وخلال الملفات والمحاثات الطلعهن محسن بنقالهه جانن كلهن بنفس اليوم والوقت يعني الشغله مفبركه من جهه شخص من قرايبهه

بس عكبيش عكب مانفضحوا كبال الناس كلهه وصارت روسهم بالكاع وهسه خوانهه يردون يتخلصون منهه على ابو سمعتهم تشوهت ومايفيد

ان جانت بريئه او لا ما جنهم همه الهملوهه وانطوهه نقال بهل عمر وهيه ماتعرف شي..

_يعني راح يتزوجهه محسن وبهل عمر ليش يمه وليدي بعدك تدرس انت وينك وين الزواج كله عمرك ١٨ سنه

_اي يمه شكو بيهه مو عمي شهم تزوج مرته الاولى الله يرحمهه بعمر ال١٨ وتدرين بيه شاغول وماعايزني شي وانه كد مسؤؤليه الزواج خلي كلبج متطمن يمه

_اي بس البنيه شنو هيه وشلونهه شكد عمرهه منو اهلهه تدرس لو لا هاي كلهه ماعرفهه يا يمه ناخذهه عل عمياوي

_احم يمه ولو هل شي غلط بس انه شفت صورتهه البنيه من رجعت محادثاتهه وحليوه مابيهه شي والعرفته عمرهه ١٥ سنه بكد شموخ بت عمي شهم 

_اووف يا يمه منين اجتلك هل سالفه هسه يله الحمدلله على كل حال مدامك مقتنع ومصر على هل زواج انه وياك بعد امك هيه الام شتريد غير ان تعرس لاولادهه وتشوف جهالهم قبل ماتموت

_اكص ايدي اذا ما تطلع صاحبه محسن هاي وسوو هل فبركه كلهه علمود يطونهه اله

_شنو مصلحته خوب يروح يتقدملهه

_مو يكلج البنيه عمرهه ١٥ سنه شلون يطونهه اله بعد بهيج عمر ويجوز عمامهه ناهين عليهه بعد ماتدرين انتي شيصير بالبيوت 

_يله جا اذا حبيبته ويريدهه الله يسعدهم سويه

_شوف حضي خيبه هاي مبينه شرنفص ومبربكه شكدوتهه ولعبت هل لعبه وركضت الزلم شحال احنه وعلي ثاني يوم تطردنه بطرك الدهداشه انه وياجن وكولي زهيره كالت 

_لا يمعوده شسالفه حتى لو هيه لوتيه مثلما تكولين شمالنه احنه غمات مثلا وتطردنه اذا انتي غمه انه لا بيت ابوي مثلما هو راح يصير بيت زوجهه شكو بعد تطردنه فرهود

_اي طبعا شحدهه تحجي وياي كلمه وعلي بس تجي اسوك عليهه سوك المط* قبل ماتسوك علينه جا شني قليلات احنه شنو...

تعجبت من تفكيرهه وكلامهه هزيت بايدي وكلت الله يعينج يمسكينه ماتدرين راح تطلعين من بين الذيابه تدخلين بين الافاعي .. اخذت صلاحيه ماي

وكلاص انتبهن علي وسكتن حطيت ثلج بالصلاحيه وطلعت وديتهه للصاله انطيت للموجودين وكعدت يم امي بقوا يسولفون بهاي السالفه بعد اذا صارت سالفه كلهه تلطش بيهه

كتلني الملل تالي ابوي كال امشينه كيفت كمت بسرعه عدلت ملابسي ورجعنه لبيتنه وبعدهه باسبوع مو اكثر عقدو وسوو حفله خطوبه وعرس بيوم واحد ورحنه وطلعت البنيه حلوه 

ودنفوشه وقصيره تجنن والمكياج محليهه اكثر رغم انه نفس مواصفاتهه بس حسيتهه احلى مني باوعت لروحي بالنقال وكلت انه من اخلي مكياج وبدله هم اصير هيج حلوه وكيوت ..

كرشت عن ملامحي ونفضت هاي الافكار من راسي ماريد افكر بالبدله والعرس نفس باقي الزعطوطات عبالي العرس بس بدله ومكياج وهاي هيه ....

فزيت من صفنتي بعد مرور هل سنتين برمشه عين وجنت دائما اسمع امي وخالتي حلى يحجون على بنات عمو باقر وشلون ناشبات ويه البنيه مرت محسن 

وهيه ساكته ومتحمله لحدما الله فرجهه عليهه وزوج الحيه احت محسن لواحد بغير محافظه وكل ٥ اشهر ياله تجي اسبوع وترجع وارتاح منهه بس خطيه الحمل هل فتره تعبهه وخاصه 

هيه بشهر السابع .. انكسر خاطري عليهه كل يوم وبهيج شوفات كاعد اكره الزواج اكثر واكثر كمت رحت كعدت يمهه وكتلهه..

_هلو جمانه شلونج

_هلا حبيبتي والله الحمدلله شوفه عينج ماكل عافيتي التعب

_اي الله يساعدج شمسوي بيج الحمل 

_اي والله يا شموخه هل شهر من الوجع ماكاعد تاخذ عيني نوم كاضيتهه بس متمدده لان الطفل نازل واللويات الاشوفهه الله لا يشوفهه لاحد متت ياخيه متت يمته اولد واخلص

_الله يهون عليج ويسهلج يروحي ماضل شي كلهه حسبه وقت غمضي عين وفتحي عين تلكين ابنج يمج باذن رب العالمين

_اي والله انشاءلله ياخيه

_بعد مارحتي للمدرسه ها 

_لا وين اروح اخذت انتساب عل اقل عندي مجال منا لامتحانات نهايه السنه ٤ اشهر جايبه ودارسه انه

_ها تكدرين 

_بيد الله والله ليش اجذب عليج

_هههه تردين اجي يمج ندرس سوه من تولدين او ابقى يم ابنج الزم عنج شغله بالبيت وانتي تدرسين براحتج شتكولين

_جا وانتي امتحاناتج

_انه كلشي دارسه باليومي قبل الامتحانات باسبوعين اكعد اراجع الحافضته

_هاا جا خوش والله تسوين فضل لو يجيبج عمي تساعديني هذن حمواتي كاضياتهه نوم ودراسه ماشايفتهن اصلا وعمتي شوفه عينج مره جبيره وزين اذا لزمت زيودي ربع ساعه 

_انشاءلله بس خل اشوف بابا وماما بالاول اذا قبلوا اجي يمج 

_تمام ساليهم ورديلي خبر 

_تمام ..

ابتسمت وبقيت صافنه على حالهه وهيه لازمه بطنهه وكوه كاعده ومكرشه ملامحهه بالم ذبيت حسره عليهه وكتلهه..

_خيه كومي ارتاحي لا تبقين كاعده اهلي عاذرينج 

_والله خيه بعد ماكدر تشنج ضهري من الكعده 

_روحي عمري لغرفتج ..

شفتهه متردده وتستحي عاد تشجعت وكلت للموجودين..

_من رخصتكم راح اخذ جمانه لغرفتهه بطنهه صارت توجعهه خطيه..

الكل: اي روحي مرخوصين عمي..

لزمتهه من ايدهه وكومتهه وديتهه لغرفتهه واجه ورانه محسن اجه عليهه لزم وجهه بثنين اديهه وسالهه بقلق..

_شنو شبيج جمانتي بعدج موجوعه 

_اي ضهري من اكعد يتشنج ويهيج علي بطني

_تردين اوديج للمستشفى لان زودتهه هل تشنجات صار من بدايه الشهر هيج

_لا كالت عمتي تشاليع لان الطفل كاعد يكبر ويتحرك ولاني بجر وصغيره هل شي طبيعي

_متاكدين ماكو شي يخوف

_لا تطمن ماكو شي انشاءلله 

_يله تمددي لا تبقين كاعده انه هنا بالصاله اذا تحتاجين شي ودي علي شموخ واذا زاد الوجع كليلي مو تغلسين ويصير شي عليكم يحيلي انتي

_انشاءلله ابو زيودي تسلم 

_ربي يسلمج ويسلم ابنه يارب..

ابتسمت اله وابتسم مادري شصار بيه حسيت بشعور ايجابي وحلو لمن شفت حبه وحرصه عليهه فعلا كد المسؤؤليه طلع باسهه براسهه والتفت شافني بالغرفه ومثل النحرج ابتسم بوجهي وكال..

_ديري بالج عليهه شموخه واذا تالمت شفتيهه تعاي كليلي تمام

_تمام ..

خله وطلع من الغرفه واجيت كعدت يمهه رفعت الغطه وغطيتهه بي تالي كالت اطلع الهه حلويات من الثلاجه الصغيره مالتهه كمت جبت الكالت عليه

خليته عل جربايه وطلعت ضيافه الي هاي ههه كمنه ناكل انه وياهه واحسهه شوي صارت احسن فتره وصاحتني امي اجت دخلت للغرفه تطمنت على جمانه وكتلهه..

_امي جمانه سوت انتساب وبعد ٤ اشهر امتحاناتهه النهائيه وره ولادتهه كتلهه اذا قبلت ماما وبابا اجي يمهه فتره اكضي شغله بالبيت عنهه واساعدهه

بابنهه على ماتخلص دراسه تالي ارجع للبيت ابدي اراجع انه لان دارسه كلشي باليومي شتكولين..

_اي يمه عادي بس خل نشوف ابوج خاف مايقبل هو يوم مايهدى اذا مايشوف بنيته كباله مو نوب تغيب عنه شهر 

_ماشي يمه اكول لابوج واحاول اقنعه اذا قبل تعاي يمهه ماعندي مانع 

_تمام امي شكرا 

_لا تشكريني من وقت ماعتقد ابوج يقبل تره

_انتي حبيبه كلبه تقنعينه واتقنعين عشيرته كلهه

_هههه فلشج ولج وين اكدر اقنعه انه

_علينه ام مرتضى ههه

_ههههه..

بقينه نضحك تالي عدلت حجابي وسلمت على جمانه وعمتي وبناتهه الثنين وطلعنه من البيت رجعنه لبيتنه دخلت وبوجهي لغرفتي ذبيت نفسي عل جربايه وراسلت رفا وردت علي بسرعه عبالك كاعده بالنقال..

💬هلو رفاوي

💬هلا عمري 

💬شنو هاي كاعده بالنقال

💬هههه لا جنت اراسل صديقتي

💬اي صديقتج مو

💬هسه مشيهه صديقتي شمالج عدو الحب

💬خليني عدو ولا محب للحب

💬ليش هو اكو احلى من الحب ولج

💬اي اكو الوضيفه الراتب السياره هذن كلهن احلى من الحب بالنسبه الي

💬يووع شكد ماديه

💬وانتي اووع شكد عاطفيه 

💬هههه عوفينه من العوع والاوع شنو صاير وياج شعجب راسلتيني

💬مشتاقتلج مايصير

💬لا مايصير كولي شكو

💬عابت ردت اسردلج قصه حب مو انتي تحبين قصص الحب 

💬اي كليلي بله قصتمن هل مره

💬ابن عمي ومرته ههه

💬اي كولي كلني اذان صاغيه

💬تمام شوفي قبل سنتين....

بقيت احجيلهه قصتهم ومن كل عقلهه تريد تنطيهه لصديقاتهه يكتبنهه ومدري وين يودنهه مو مهم .. كملت القصه وكالت..

💬ياااي تاثرت اكلج هذا ابن عمج ماعده اخو

💬اي عنده اكبر مني بسنه ليش

💬ماعندج رقمه

💬فلشج شتسوين بي

💬نتعرف على خلق الله مايصير

💬لا مايصير انجبي وثكلي اولاد عمي خط اخضر

💬هاا واولاد خالاتج خط اصفر وخوانج خط احمر عرفنه هل اسطوانه مال اشاره المرور

💬هههه اي عفيه شاطره

💬امداج

💬الا اكول باجر عدنه امتحان رياضيات ها 

💬اي خيه امتحان غضب باجر اخلص من الاحياء يطلع الرياضيات اخلص منه يطلع الكيمياء والفيزياء يبووو زوجوني ماريد امتحن

💬ها سحيله ان الضروك اذكرج بحالج شيصير بي من نزوجين

💬لا خيه هيه بس حجايتج مال سحيله رجعت عقلي لراسي مشكوره 

💬هههه يله جا روحي درسي وعوفي سوالف الحب والزواج مايوكلن خبز تره

💬تمام يله باي باي عدو الحب اللدود

💬باي سحيله ان الضروك

💬امداج

💬امداج انتي ولي يله..

طلعت من المحادثه وانه اضحك على عقلهه كلما يجي امتحان صعب تصيح زوجوني ماريد امتحن .. سديت النقال وكمت طلعت كتاب

الرياضيات والدفتر والملزمه والحاسبه كلشي طشرته عل جربايه وبديت ادرس ومشغله العقل اكس مربع منا للمغرب سمعت الاذان وكلت

خل اكوم اصلي ههه منين اجه الالتزام هذا لو لان بيهه رياضيات ..لا بس صدك ماتعاجز انه من الصلاة او الدراسه بس انسى مرات او انشغل عنهه ..

كمت توضيت وطلعت بالصاله يم اهلي عبالك صار سنين ماشايفتهم مو جم ساعه من ورا الرياضيات بست بابا بخده وكعدت يمه خله ايده على كتفي وكال..

_ها بنيتي وينج من الضهر لهسه 

_جنت ادرس رياضيات بابا صار بعقلي علامه تقسيم

_ههههاي يبعد حيلي هيج اريدج ترفعين راسي وتصيرين شاطره دوم

_وانه رفعه راسك انشاءلله حبيبي باباتي

_يبعد روحي بنيتي وحيدتي..

حضنته واجت امي لابسه المحرم وكالت يله نصلي كمنه كلنه سويه وكفنه نصلي دائما اسالهه ليش تحبين نصلي كلنه سويه تكلي هيج عشت بسلام

ببيت جدج اول ماتزوجت ابوج جانو كلهم يصلون سوه حتى رب العالمين يديم لم شملهم وماتفرقهم حلاوه الدنيا ..

كملنه صلاة ورحت اساعدهه بالعشه صبينه وتعشينه ترخصت منهم ورجعت لغرفتي ادرس منا لل١٠ طبكت الكتاب كلبت بنقالي شويه لل١٢ ونمت

للصبح كعدت ومر يومي بين اهلي ودراسه الرياضيات لحدما كملته كله وصار الليل طلعت ملابسي مغسولات كعدت كويتهن وقتت المنبه ب٦ ونمت لان ماعدي شي اراجعه درست كلشي والحمدلله ..

كعدت الصبح بدلت ورحت لدوامي اول مادخلت للصف انمدت رجل كبالي وعبرتهه حسيت بيهه قبل لا اشوفهه اصلا اعتقد من وره سماهر بدت حاستي السادسه تشتغل ههه.. 

عبرتهه ومشيت وسمعتهه طكت رجلهه بالكاع عود معصبه هيه ام عطوب .. نزعت جنطتي طلعت كتاب الفيزياء وبقيت اكتب بواجب يوم الخميس

المسائل واحل بيهن لحدما رن الجرس ودخلت ام الفيزياء اول ماسالتنه عن واجب يوم الخميس كبل كامت سماهر وكالت ..

_ست هاي شموخ ماكاتبه الواجب واجت هنا بالمدرسه كتبته

_نقلته من وحده من الطالبات لو شنو

_لا ست اجت هنا حلتهن

_سماهر ماما اهلج راح يجون اليوم مو

_اي ست ليش

_اريد اناقشهم بموضوع الفتنه مالتج هاذي وعدوانيتج ويه زميلتج شموخ

_ست بس هيه تكرهني

_خلاص تفضلي كعدي الحجي ضايع وياج انتي

_حاضر ست..

باوعتلي بعصبيه وهزت راسهه بوعيد فعلا مايفيد وياهه ها غير العين الحمره هزيت ايدي وخليت بالي ويه المدرسه اجت تمشي يمي وطلبت دفتري انطيته الهه باوعت للمسائل شويه وكالت..

_كلش زين شلون لحكتي تحليهن هنا

_اجيت من وقت للدوام حتى اكعد احلهن 

_وليش ماحليتيهن بالبيت

_بعد صار عندي ضرف ومنا امتحان رياضيات حليت قسم امس واليوم حليت قسم

_هاذهو جيد ..

خلت الدفتر عل رحله وسماهر تباوعلنه بترقب متانيتهه ترزلني لا والله ماعاشت التسببلي الرزاله وتفشلني .. درت عيني عنهه وبقيت اتابع ويه

المدرسه وكل شوي تلفت انتباهي سوالفهه ويه البصفهه ويتبسبسن لعب الشيطان براسي وردت افتن عليهن بس تعوذت الشيطان وسكتت مستحيل انزل مستواهن واصير فتينيه حتى لو عل غلط..

بس ربي مايقصر حشى انتبهت عليهن المدرسه وطردتهه هيه وصاحبتهه اول مره اشوف المدرسه هيج ضايجه من وحده من الطالبات فعلا الاخلاقه زفت مكروه بكل مكان وزمان ومتاكده هسه صايره حديث الساعه بغرفه المدرسات.. 

كملنه الدرس وثاني درس والثالث امتحنه رياضيات وكملنه باقي الدروس خلص بعدهه الدوام ورجعنه للبيت وهيج مرت امتحانات الشهر الاول والشهر الثاني سماهر بعدما اجه ولي امرهه وحجن وياه

المدرسات خله ونقلهه غير مدرسه افتكيت منهه ولو جانت مسويتلي جو بالمدرسه .. واخيرا ولدت جمانه بعمليه قيصريه خطيه لان الطفل جبير مدري

شنو كلولهه ومر شهر وقربت الامتحانات النهائيه وحجيت ويه بابا وكوه قبل اروح يم جمانه لليل ويرجعني هوه بيده عاد كلت ميخالف بعد احسن

هوه انه هم ماعرف انام بمكان بي ولد حتى لو ولد عمي .. صرت اروح يمهه من المدرسه يجي ياخذني محسن زوجهه ويرجعني بابا بليل ب١٢ .. صرت من

اجي لحدما اروح وانه مكابله ابنهه زيودي وكاعده وبس من تصيحلي مرت عمي اروح اساعدهه بشغله ومرات اروح اكعد بناتهه يساعدنهه لو شغله ماكدرلهه وغصب عليهن يكومن جا شني مخليات

امهن وحدهه عبالهن صغيره ويتامرن علي كلمن تكوم تسوي شغلتهه بيدهه هم شكبر الوحده ويعتمدن على غيرهن حتى بشربه الماي يوع شكد عجوزيات..

خلصت فرش البيت ويه مرت عمي سالتهه اذا تحتاج شي بعد كالت لا ورجعت لغرفه جمانه لكيتهه ترضع بزيودي ومخليه الكتاب كبالهه وتقره

ضحكت على شكلهه ورجعت بذاكرتي لمن عزمنه عمي باقر باسبوع عرسهم واجينالهم ...

دخلت لغرفتهه اني وامي ومرت عمي نشوفهه وكلش حلوه جانت مرتبه والمعطر والبروده تجنن بيهه بقت امي ومرت عمي يخطط شيحطن بزاويه الغرفه الفارغه والصايره نشاز وانه رحت يمهه وحجيت وياهه..

_هلو جمانه تعرفيني انه بنت عم محسن 

_اي عرفتج يروحي شفتج بعرسي شلونج 

_نحمد الله زينه انتي شلونج

_الحمدلله بخير

_شلونهه معنوياتج بالعرس والحياة الجديده

_والله خيه لا عل بال ولا عل خاطر جابوني من صفي لغرفتي

_هههه وياج حق خيه بعدج صغيرونه عل عرس الا بيا صف انتي 

_بالرابع حاليا

_ها يعني اكبر مني بسنه انتي 

_عمري ١٦ وانتي

_راح يصير عمري ١٥ بصف الثالث انه عبالي بكدي انتي

_حجيت ويه محسن قبل يومين عل دراسه وكال افكر 

_بس هاي ولج غير تلحين عليه وتخلينه يقبل غصب عنه شنو كتله وكال افكر شكد مايعات ويه

_هههه لا هو عاقل واكيد راح يفكر صدك

_ولا يفكر هو مادام كال هاي الكلمه معناهه ماقابل ولو قابل جان من بدايه كلج تمام مو صحيح

_هيج كولتج

_اي والله بعدين من يرجع جذبي عليه كليله مارديتلي خبر انه احب الدراسه واهلي حرموني منهه ولا تكسر بخاطري مثلهم ومن هل حجي وهو يقبل غصب عنه مدامج بعدج عزيزه 

_هههه والله عليج سوالف بس تصدكين هل حل حلو بله من يرجع اقنعه

_نقال عندج لو ...

_لا كال من استلم اجرتي من المحل مال نقالات اجيبلج واحد عل اقصاد

_تمام هاذهو اول ماتجيبينه اخذي رقمي من مرت عمي حتى نضل نتواصل واعلمج شويه كلاوات تره المره بدون الكلاوات ماتعيش 

وخاصه بهل عمر لازم تتعززين عل زلمه انه صح ماحب الزواج وسوالفه بس اعرف كلاوات التقنع الزلم رافكيني وماتندمين

_ههههه انشاءلله نشوف بله

_هههه انشاءلله..

تغدينه وشربنه جاي واكلنه حلويات وكعدنه نسولف تالي طشينه لبيوتنه احنه وبيت عمي شعلان يلي اشوفه بالسنه حسنه وبعد فتره راسلني رقم غريب عكدت حواجبي باستغراب وفتحت الرساله..

💬هلوو شموخ مو

💬اي نعم منو

💬اني جمانه عيني

💬يا هلا هاي يمته جبتي النقال

💬امس واليوم اول رقم خليته رقمج حتى كال محسن شلج بي وين عرفتي شموخ وتردين رقمهه اول رقم 

💬هههه اي وشكتيله

💬كتله استاذتي هاي ضل يضحك وكال شلون ثنين تجمعن 

💬والله صارت بطرف لساني هل حجايه واستحيت احجيهه

💬شمالج يحضي الزلمه مايحب الفاهيه يحب المره اللوتيه التاكله بلسانهه ترد عليه بس باحترام تناقشه برقي تتصرف باسلوب حلو حتى وهي

معصبه يحب المره التكدر تسيطر عليه لان بعقلهم ان همه محد تكدر تسيطر عليه الا اليحبونهه فاذا شاف مرته ماكلته بلسانهه الحلو وتسيطر عليه يسرسرح ويموت عليهه يضل 

💬هاي ماتحبين سوالف الزواج والحب وهيج تفتهمين بيهن شحال لو تحبيهن

💬لا انه احفظ بس الضروريات المعلومات التفيدني يعني ههه

💬ههههه لويته وعلي

💬بسم الله توج تزوجتي شبسرعه بكتي لسان محسن تحلفين كله وعلي

💬هههه جا شلون هاذ العشق

💬يمه منجن البنيات وينجن وين الحب خاله على كولت بيبي ههه

💬ههههه ضحكتيني وعلي خرب شكلج على هل سوالف

💬هههه والله بلوى انتن النسوان

💬جا انتي شنو ولج ولد

💬لا انثى شامخه انه 

💬والنعم هههههه

💬 ليش احسج غيرتي النعم بكلبج سويتهه والنعل

💬هههههه يس

💬ايا نذله 

💬ههههه لا اشاقه طبعا والنعم منج استاذتي

💬تشكرات تشكرات

💬هههههههاي انكلبت هنديه البنيه

💬اعجبج انه كلساع انكلب شكل

💬حربايه شنو

💬حربايه 

💬هههههه شلون صدفه

💬هههه اي والله ..

بقيت احجي واسولف وياهه وبشرتني ان سوت الكلتلهه عليه وقنعته وقبل تكمل الرابع لان فتره نص السنه وصارت تروح وترجع بعد زواجهم باسبوعين وهيج كملت دراستهه وماضاع حلمهه بسبب اهلهه وقدرهه...

فزيت من صفنتي لمن خلصت رضاعه ابنهه وانطتنياه اخذته وطلعت بالصاله يم مرت عمي اخذته مني بقت تلعبه شويه وتبوس وتشمشم بي تالي اجه ابن عمي الثاني كعد يمنه واخذه بقه يلعبه همين لحدما تعب كال..

_هاج شميخه لكفي راح اشمره عليج

_يا شتشمر ولك طفل هذا مو لعبه

_نفس الشي

_اكعد راحه يمعود لا والله اكول لمحسن عليج بس يجي

_يله خطيه لخاطرج ماراح اشمره 

_لخاطري لو خفت 

_مو ترى اشمره وعلي

_لا لا اشاقه وياج انطيني الطفل خاله خل اخذه لامه احسلي تعال حبيبي زيودي خل نروح لماما هذا عمو وحش مايحبك

_بعيونج هاي العمصه

_بخشمك جنه راس جاكوش

_ترحيله فدوا

_يوووه شعده مهند 

_يامهند هذا انه احلى منه

_حماد نفسه يرادله رفسه

_انتي يرادلج رفسه

_اتجاوزك باخلاقي ماريد اتعارك عن اذنك

_شعدهه المثقفه..

كلبت عيوني ومشيت للساحه وعفته محترك كلبه بكثر ما استحي واتعقد من اولاد عمي شعلان الا اني متعوده ومناكر انه واولاد عمي باقر وساجد وعادي بيناتنه حتى نتكامش من الروس ..

ونهزه ينام واحب الطفل لمن ينام بحضني احس روحي مميزه ياربي هسه الا الواحد يتزوج ياله تنطي جهال خوب انطيني جاهل بدون ماعرس وياكلني الضيم وماما ماتقبل تجيبلنه اخت شلون بيهه ..

دخلت خليت الطفل بكاروكه دخل محسن يم جمانه وانه طلعت لغرفه مرت عمي تمددت وبقيت اكلب بنقالي لحدما اذن كمنه صلينه وتعشينه غسلت الماعين لمرت عمي

ورجعت العب بزيودي لحدما صارت ب١١ اجه بابا كعد يم عمي شويه تالي اخذني ورجعنه لبيتنه بقيت كاعده يم اهلي فد ساعه وكمنه ننام بعد

وهيج مرت الشهرين خلصت جمانه مراجعه وتشكرت مني ورجعت لبيتي وبديت انه هم اراجع حتى اهلي صرت ماشوفهم هواي وحيل اشتاقلهم منا صار شهرين مامفتمه منهم شي ونوب هذا شهر ونص راح التهي ادرس .. 

مرت فتره المراجعه واخيرا اجت الامتحانات النهائيه وخلصت والحمدلله ماعندي اغلاط وكل الاسئله كدرت احلهه حتى لو ابقى اخر وحده ياله اطلع اهم شي اجاوب صح .. 

خلصت فتره الامتحانات وكال بابا عمو ساجد اقترح نروح العائلتين للزياره كلش فرحنه واخيرا راح نطلع لمكان ونتحرر وخاصه الزياره ماعتقد اكو بشر

يعيش بالعراق ويحب الحسين واخيه العباس عليهم السلام ومايفرح بزيارتهم .. اتفقنا نطلع الاسبوع الجاي لبينما نرتاح من الدراسه مر اول يوم عطله براحه نفسيه وتحرر من الامتحانات والدراسه .. 

واليوم كعدت الضهر على صوت الآذان كمت شبعانه نوم كمت سبحت وبدلت ومشطت طلعت للمطبخ لكيت امي توه مطفيه الجدوره ماخلتني اكل شي

حتى ماتنكسر جوعتي سحبتني من ايدي للصاله دخلت واجيت لابوي وكتله بدلع..

_باباتييي شوف امي ماتخليني اكل وانه جوعانه 

_ليش يا امهه ماتخليهه

_شوف البربكه شوف تريد تاكل جبن وصمون كتلهه متأكلين لان تشبع ويفوتهه الغده 

_اي بس جوعانه انه بابا

_لا تتعايرين ولج شميخه لا اطر مكفاج بالمس هسه

_شوف بابا تريد تطكني

_اوووف اوووف شلعتوا بطني ضل دللهه ضل لحدما تخربهه علي وتسويلي جلطه

_ههههه لا اسم الله عليج سمائي تشاقه وياج بنيتج ماتشوفينهه تدلع

_اموت من التدلع وتسوي هيج قصدا

_هههه اي تريد تضحكج تعالي بعد بيتي بنيتي الجبيره 

_مااا شنو بابا انه بنتك الجبيره مو ماما

_لا بابا عذريني هل مره صدك سمائي هيه بنيتي الجبيره المدللهه قبلج ماسمحلج تعصبينهه

_ها هيج صارت اوكي ماحبك بعد لا تدللني غرت انه بعد ماحاجيك..

سويت نفسي زعلانه ورحت كعدت عل قنفه كبالهم واشوف امي وجهه طماطه مستحيه من عدنه لان كاعده يمه وحاضنهه حصرتني الضحكه بس حبستهه

ماريد اخرب زعلتي اخر شي شاورهه وهزت راسهه بتفهم يالله احس امي فعلا تصير طفلته لمن يدللهه ويدلعه ههه .. كمنه كلنه نصلي سويه كملنه وبقيت كاعده بمكاني زعلانه مارحت ساعدت مااما

مثل كل مره فتره وكمت للمطبخ اشرب ماي دخلت بدون صوت واشوفلك ذيج الشوفه بابا حاضن امي ورافعهه عن الكاع ويسولف وياهه

وخرت من الباب بسرعه واحس وجهي صخن من الخجل هاي شجابني انه هنا هسه وكت ماي انه البطرانه همزين ماكاطعت لحضه العشاق يبووو وااا فشله الفشله

هاي كل الاباء هيج يفشلون لو بس ابائي ههه .. رجعت للصاله وكعدت على زعلتي ويا عطشه ردي المكانج مانريد ماي بعد .. فتره واجو ثنينهم

جايبين صحون الاكل بيدهم باوعولي ونزلت عيوني زعلانه ومبرطمه تذكرتهم مساع واحس خدودي كبن نار واجالي صوت امي..

_ماما شموخ شبيج ليش وجهج احمر هيج اشو رفعي راسج 

_ها مابيه شي امي 

_شنو مابيج شي خدودج حمر ومصخنه..

حجت هيج لو ابتليت اجه بابا وكف فوك راسي ولزم وجهي وكال بقلق..

_شنو مصخنه باباتي شموخه اويج للطبيب

_لا بابا مابيه شي هسه تروح بس لان نعسانه 

_متاكده بابا

_اي بابا متاكده لا يضل بالكم شبيكم حتى الزعله راحت من الخرعه

_هههه يله اجليهه غير مره 

_افف يله جا شسوي بعد غير مره خليهه ازعل عود

_هههه يبعد حيلي وحيدتي

_اي وحيدتك ومساع تكول امي هيه بنتك الجبيره منين اجيتلك وحيدتك بعد

_بويه من لسانج وعقلج بويه ..

ضحكنه كلنه واخذني من كتفي كعدنه عل سفره انه منا وامي مناك وبالوسطه بابا ومرتضى وسلام خطيه يباوعون ويتحسرون بس امي مخبوصه

بيهم مرتضى شكبره تفلسله باكله وتخلي كباله وانه عندي بابا يفلسلي صايره احزاب بالبيت وماندري وسلام مكرود انه ملتهيه بي اوكله بيدي

وانومه يمي مرات من صغره وانه متعلقه بي لهذا السبب كبر وصار حنين هو اكثر شي علي من مرتضى.. 

كملنه اكل وكعدنه نكرز حب ونباوع مسلسل واحنه نتابع بنقالاتنه لل١٢ كمنه كلمن لغرفته بقيت اكلب بالانستا لحدما غفيت من وحدي وهيج مر الاسبوع واليوم اجو بيت عمي ساجد باتوا عدنه حتى باجر

نطلع للزياره سويه بقينه سهرانين وسوالف وضحك بين عمي وبابا واحنه النسوان ماخذين صفحه حسيت نفسي بس انه واحسان وسلام كاعدين بالمكان كلمن ملتهي بمعشوكه رغم واحد

بعيد عن الثاني بس العيون تتغامز وتاشر لو معلكه كلوب بعيونهم جان صارت نشره ضوئيه بس اطفي الضوه ههه.. صارت ب١٢ كالعاده طفينه كمت ويه امي طلعت فراش وفرشت لابوي وعمو ومرتضى

واحسان وسلام بالصاله واحنه نمنه كلمن بغرفتهه انه وجنان بغرفتي وامي وخالتي حلى بغرفتهه وطبعا اخذنه ساعه ثانيه سوالف منا ومنا ياله نمنه ب١ للصبح ...

كعدنه انه وجنان الصبح على صوت امي فتحت عيوني واشوفهه واكفه فوك راسي باوعتلي وكالت..

_يله يمه بناتي كومن بدلن حتى نطلع ابوج راح يجيب تكسي ويجي كون يلكانه مبدلين

_اي ماما بس بعد وكت الساعه ب٥ الفجر

_اي هم ياله نطلع على مانوصل انشاءلله هناك صايره دنيا الضهر كومن هسه غسلن وبدلن وصلن الفجر وطلعن بالصاله لا ترجعن تنامن وتحصللجن رزاله من ابوج

_ماشي يمه كايمه ..

وخرت الغطه عني وكمت انه وجنان دخلت بالاول انه سبحت ونشفت وطلعت بدلت ملابس الطلعه قميص طويل وبنطرون ونسقت الحجاب والجنطه

اسود اخذت عبايتي الجابهه الي امس بابا كلش مكيفه بيهه رغم ماعرف البسهه لان مايدخلونه نزور اذا مالابسين عبي .. 

خليتهه بجنطه صغيره هيه ومالت جنان هناك من نوصل نلبسهن قبل لا ندخل للأمام.. اخذت نقالي وشاحنتي وسماعاتي بالجنطه مالتي رشيت عطر

عفت جنان تبدل وطلعت بالصاله كعدت لكيتهم كلهم مبدلين ما عدا وكالعاده مرتضى بعده يفير بشعراته عبالك رايحين عرس مو زياره..

المهم كملنه كلنه واجه بابا جايب سيارتين تكسي وحده صعدنه بيهه احنه ووحده صعدو بيهه عمو ساجد ومرته وجهاله تحركت السيارتين ورحنه

للكراج نزلنه وهوسه كلهه تصيح نفر كربلاء نفرين نجف واللخ.. جان موسم زياره الاربعين قريب وهواي زيارين بهل وقت كلهه الناس وصلت من المشايه ..

ركبنه بمنشئه جانت كلش عاليه *العالي الله* صعدت واباوع للناس جوه عبالك مدري وين صاعده كلش عجبتني بحكم اني احب الاماكن المرتفعه ..

على ماكملت السياره بالزوار تحركت مرت ساعتين وامي وخالتي حلى مبدعات بالاكل اشكال جايبات طلعن لفات ولبن وككو وعصاير وبقينه ناكل كلما نجوع ..

وانه رغم التكسيره بس متونسه لان اول مره اصعد منشئه التهيت اباوع للناس والشوارع حلوه من مكان عالي ماحسيت على الوقت الا وصلنه وكال بابا يله ننزل هنا..

نزلنه اخذنه جنطنه وكفلنه تكاسي صعدنه بيهن ورحنه قريب مرقد الامام علي عليه السلام دخلنه لفندق حجزنه غرفتين عوائل وصعدنه الدرج دخلنه للغرفه وذبينه روحنه تعبانين ..

كمت اخذت ملابس بابا وديتهن للحمام وكتله يكوم يسبح خطيه مارتاح بالسياره شفته عل اقل يسبح يطلع التعب منه .. دخل سبح وبدل وطلع تالي امي دخلت سبحت ووراهه احنه دخلنه بدلنه ملابس

جديده لبست عبايتي وطلعت عبايه جنان وطلعنه من الغرفه قفلناهه وتلاكينه احنه وبيت عمو ساجد انطيت العبايه لجنان ونزلنه كلنه سوه نزور ونصلي

الضهر بعدنه توه دخلنه للصحن والناس ازدحام كوه فتنه من يمهم وحده متمكسه بيد الثانيه حتى لا نضيع بين الناس بس عبث كوه زرنه وطلعنه بره بالصحن صلينه تالي طلعنه للمطعم تغدينه وبابا كال نروح لكربلاء فرد مره هناك ننام تالي نزور الامامين المغرب عاد وفقوا الكل وطلعنه من النجف بعدما لمينه ملابسنه .. اخيرا بعد ساعتين طريق اخذنالنه غفوه بيهه وصلنه لكربلاء ونزلنه بالفندق سبحنه ونمنه ساعتين ارتاحينه تالي طلعنه المغرب زرنه وتعشينه وافترينه بالمحلات اليم الصحن اخذنه انه وجنان سوارات ومحابس وهل سوالف ولفت انتباهي سوالف بابا وهو يكول لعمي..

_يا ساجد جماعتي بالحشد كالوا الوضع مو زين وداعش بده يزحف عل محافظات الوسطى 

_هاي شنو مو علساس سيطروا عل وضع بالجنوب وراح تنتهي هل سالفه

_شبيك انته خويه داعش اصلا منتشر بكل المحافظات بس يردون يصفون العراق من اعلى محافظه لاخر محافظه ولو يردون بحركه وحده يفجرون العراق كله

_هاي مو خوش خبر ياخويه خلصوا شبابنه خلصوا وهمه مامخلصين حتى لو جريديه جان خلصوا هسه

_اولاد الحرام هواي خويه واذا يموت واحد منهم يطلع بداله الف مثل الدود غير 

_الله ينصرنه وينهيهم على اهون سبب

_امين يارب ..

كملوا سوالف وكالوا يله نروح للمطعم حجت امي وكالت ان مابينه حيل نمشي ندور مطاعم وماتاخذ راحتهه هيه وخالتي بالمطعم عاد رجعونه للفندق وبابا وعمو ومرتضى راحو يجيبون عشه ويرجعون ..

كعدنه نكلب بالشغلات الجبناهن انه وجنان ونلبس بيهن وكل وحده تبدل شغلاتهه بشغلات الثانيه هيج احنه من الصغر .. شويه واجه العشه تعشينه كلنه تالي بيت عمو ساجد راحو لجناحهم واحنه بقينه بجناحنه 

عباره عن غرفه جبيره بيهه ٤ جرابي وحمام وممر بي كنتور صغير للملابس كلش مريح بس الجرابي ماكفن عاد اخذت سلام يمي نومته وهو كيف ههه .. غطيته زين ونمنه للفجر طلعنه حتى نزور ونصلي 

والجو بارد ومغيم يجنن وصوت الاذان يشرح الصدر وناس ازدحام واحد يمشي بصف الثاني بس كلهه لحظات وتحول هل جو الجميل الى دخان اسود وتخلخل لاذني صوت الانفجار ماعرف يمي كبالي بعيد قريب كل العرفته اني ضيعت ايد امي وشفت الناس صارت هوسه وتصارخ كلهه تركض رفعت

راسي وشفت دخان الانفجار بعيد يم ضريح الامام الحسين عليه السلام و امي بعد عني مسافه تتلفت وتصيح باسمي رحت يمهه ردت الزم ايدهه وصار انفجار ثاني بس احسه اقرب وقتهه رغم قوه كلبي بس القوه لله ماكدرت

اسيطر على خوفي صرت اركض ويه الناس واريدلي مكان احتمي بي واصيح يالله تالي اصيح بابا ماكو فص ملح وذاب اهلي بين الناس بقيت اركض لحدما شفت نفسي طالعه بشارع عام 

بعيد عن الصحن حيل بقيت امشي واتلفت بعيوني ادور الاستعلامات واخيرا لكيتهه ودخلت بس مالكيت احد بقيت كاعده وابجي وانده لامي وابوي

رغم عل لحضات مرت علي مثل الكابوس بس شي بداخلي مطمن او مايريد يفكر حتى ان ممكن اهلي صار بيهم شي لان مجرد الفكره كفيله بان تدمرني

تمامآ ضليت فتره مخليه ايدي على اذاني وادعي ربي ينجي اهلي ويجمعني بيهم صار هدوء وطليت من باب المحل مالت

الاستعلامات واشوف المكان يصفر كل بشر مابي وكان نهايه العالم ماجنه المكان جان مكتض بالناس قبل كم دقيقه .. طلعت وبقيت امشي شويه واركض شويه مثل التايه وهوه انه تايهه ومتيهه

اهلي .. بقيت اركض واتلفت وكلما تغوش الدموع عيوني امسحهه بايدي يلي كلهه تراب صارت وسودت من الدخان .. وصلت لنقطه مسدوده وبس سيارات الاسعاف والاطفاء ماكو غيرهم شفت عائله من بعيد مره

لازمه بناتهه بعمري وتبجي رحتلهه اركض على امل ان تتصل على اهلي او توديني للشرطه يودوني الهم لان اعرف وكلبي يكلي اهلي مابيهم شي وجانو بعيد عن الانفجار

يجوز راحو لمكان امن وبعدين يجون ياخذوني اي اكيد مايعوفوني اهلي انه مابيهم شي ربي حافضهم الي متاكده .. وصلت يمهه ولزمت ايدهه وبقيت ابجي واحجي..

_فدوا خاله وديني لاهلي خاله اهلي ضيعتهم ومادري وين راحو بالهوسه خاله حبابه انه بيتي مو هنا واهلي ماهمه فدوا وديني الهم

_ولج خاله كلهه تيهت اهلهه وانه منهم وليدي العزيز مادري وين راح بالهوسه واكفه هنا على امل يجيبونه او يطلع من وحده تعالي اوكفي يمي بلكي يجي واحد من اهلج يدورج هنا..

هزيت راسي بتفائل ومسحت دموعي حسيت صار عندي امل ان فعلا هسه ومن بين الدخان يطلع واحد من اهلي وياخذني بقيت انتظر بالساعه ياله

طلع شخص فزيت بفرح بس خاب ظني لمن شفته غريب عني وراحت هاي المره تركض عليه تحضن

بي وهو مجرح ووجهه مسود من الدخان وضايعه ملامحه حجه ويه ابو الاسعاف وتطمن على حالته وامرنه الشرطي نفرغ المكان ونروح منا صاروا يدفعون بينه خفيف حتى نطلع من يمهم وينقلون جثث الضحايا وما كلت لا

درت وجهي ورحت قبلهم مشيت رافضه فكره ان ممكن واحد من اهلي يطلع من بيناتهم وافقده خليني مالكاهم هسه بس مايطلع صاير بيهم شي لا سمح الله 

اجت هيه وابنهه وبناتهه وراي وكفت يمهم وهو اجت عينه علي وتمعن النظر بعيوني وهوه عاكد حواجبه باستغراب ويباوعلي ويباوع لامه بعيونه الحاده تنهدت امه وكالتله..

_يمه هاي البنيه ضاعت من اهلهه بالانفجار وخليتهه يمي بلكي يجون ياخذونهه بس هسه شلون والشرطي يريدنه نروح منا

_ماعدهه رقم واحد من اهلهه ما شايله نقال..

سالهه وباوعلي بتساؤل تذكرت جنطتي لمن انطيتهه لامي تخلي بيهه فلوسهه وتخليهه عدهه جان بيهه نقالي ودفتر ملاحظات بي

رقم بابا ومرتضى غميت كصتي وبقيت ابجي وانه ايدي على وجهي اجت المره وسالتني عن الرقم او النقال وكتلهه..

_لا خاله محافظه رقم احد من اهلي ونقالي بجنطتي عند ماما بقه شلون هسه ماراح يلكوني بعد مو اهلي ماشوفهم بعد

_لا خاله اهدي هسه نروح لمركز الشرطه وهمه يشوفولج صرفه بلكي يدكون اسمج بالحاسبه ويطلعون عنوانج

_اي خاله فدوا وديني للشرطه وديني خليهم يرجعوني لاهلي حبابه اكيد هسه كلبهم نار علي

_اي بنيتي امشي يمه راهب خلينه ناخذهه لمركز الشرطه بلكي يلكون اهلهه مدامهم بعدهم هنا..

شفته هز براسه وهوه عاكب حواجبه بحيره ويباوعلي بنظرات ماعرفت افسرهه ولا جان الي اهتمام افسرهه حتى 

تنهدت ولزم ايد امه ورحنه نمشي من المكان مسافه طويله ياله لكه مركز للشرطه دخلنه واحس رجلي صارت خيوط

من الرعبه ومشي هل مسافه كلهه بس ماهمني غير اهلي بالي يمهم شلون بيهم هسه اكيد يدورون علي وامي تبجي خطيه وبابا تعبان شصار بحاله لمن ضعت منهم يارب يكونون رايحين للشرطه علي والكاهم ..

دخلنه للمركز بامل وراح الولد ابنهه يحجي ويه الضابط هوه وامه وانه بقيت واكفه يم البنات وابجي بدون صوت اجت وحده منهن ضلت تمسد على كتفي وتكول..

_على كيفج ويه نفسج عمري هسه يلكون اهلج لا تخافين وحتى لو ما لكوهم فتاكدي ابوج راح يجي للمركز وينطي خبر عنج وهمه بعدين يتصلون علينه

_اريد بابا والله خايفه عليهم لا يصير بيهم شي وخايفه مايلكوني بعد اموت بدونهم انه ماتحمل افارك بابا لو ماما حبابه خليهم ينطون خبر بكل المراكز حتى اذا يسال بابا يتصلون عليكم

_اي هوه هيج راح يسوي راهب انتي بس اهدي هسه همه يتصرفون ..

مسحت دموعي وبقيت اباوعلهم وهمه يتناقشون ويه الشرطي هناك ياله اجو علينه لزمت ايد المره وسالتهه بقلق..

_ها خاله لكوهم اهلي مو راح يتصلون عليهم فدوا احجي و ريحيني

_لا خاله للاسف يكول هواي مفقودين بهل انفجار ويكولون الشبكه العامه تعطلت بسبب الصار ومايكدرون يوصلون لمعلومات اي شخص حاليا 

_لا يالله جا شلون راح اضل بالشوارع هاي هيه بعد اهلي ماشوفهم 

_لا اسم الله لا تكولين هيج بنيتي تعالي ويانه هسه وانتي بامانتنه وبحمايه الله وحمايتنه لحدما يهدا الوضع ونرجع مره ثانيه للمركز وهمه يطلعون

معلومات اهلج ويرجعونج انتي بس خلي إيمانج بالله جبير وتوكلي عليه وانشالله كلشي ينحل بعدين

_بس خاله خاف مالكاهم بعد شلون اعرف الوضع يمته يهدا يعني اذا بقه هواي هيج شلون 

_مثلما كتلج صدر البيت الج والعتبه النه تنورينه والف هلا بيج لحدما الله يفرجهه وساعتهه اختيارج تردين ترحين تردين تبقين اعتبري البيت صار بيتج ها خاله شكلتي

_ماعرف خاله بس انه ماعرفكم واخاف..

_يله بنيتي مسحي دموعج وتفائلين بالخير يجيلج انشاءلله كلهه فتره كم يوم ماتحسين الا رجعتي لاهلج

_انشاءلله خاله انشاءلله..

مسحت دموعي ورفعت راسي لكيت ابنهه وبناتهه يباوعلي بعطف خلينه وطلعنه من المركز اجرو تكسي وطلعنه لبيتهم

رغم خوف اتجاهم بكلبي بس لمن شفت اسلوبهه بالكلام هيه وبناتهه تطمنت وحمدت ربي لان وداني لهيج ناس طيبه وتخافه ..

مسافه الطريق وصلنه وانه صافنه بزماني وبالي يم اهلي وادعي ربي كون ماصاير عليهم شي احس نفسيتي تحطمت وكلبي صار ياذيني عليهم ..

وصلنه لبيت حديقته جبيره بس البنيان صغير مو جبير ومبين من اثاثه الخارجي فخم ونازك.. نزلنه من السياره ودخلنه للبيت وانه امشي متردده افكر ان ارجع للمركز بس اخاف لان كله زلم وانه ماعرف شبيه

من اول ما الله خلقني عندي رهاب من الزلم وخاصه لو جانو متجمعين .. توكلت على ربي وسلمته امري ودخلت للبيت التفتت علي المره بعدما شغلوا الاضويه وكالت..

_تفضلي خاله البيت بيتج 

_مشكوره خاله..

لزمت ايدي ودخلتني وانه القلق والتوتر كاتلني كعدتني بالصاله وراحت وكفت يم ابنهه تلمس بوجهه وتحجي بغصه..

_سوده بوجهي يمه شصاير بحالك بس كونك مامتاذي بمكان ثاني وليدي

_لا يمه بس وجهي وايدي لان عثرت وانه اركض

_تعال وليدي خل اضمدلك جروحك حبيبي

_ماكو داعي يوم هنه ينشفن وحدهن ويطيبن

_لا ابد والله ماخليك لا تصيرلك عدوا وتتمرض تالي وين اروح وانطي وجهي اني اشو تعال وياي..

اخذته من ايده ودته للمغسله غسلت جروحه من الدم واخذت علبه من الثلاجه واجت عل قنفه كعدته وبقت تعقم بزلوغ وجهه وايده صفنت واجو

اهلي بعيوني وتذكرت خوفهم علي كلما صار بيه شي بسيط وشلون يعتنون بيه ولا بابا من يصيحلي وحيدتي غوركت عيوني وبجيت بصمت

درت وجهي عنهم ماحب احد يشوفني ابجي وبعمره محد شاف دمعتي وهسه نزلت دمعتي مهضومه كدام الغريب .. عفتهم وكمت طلعت بره

وكفت بالساحه احاول اشم هوى ماكو انعدمت الحياة من روحي وجسدي لاول مره احس نفسي فعلا وحيده وتايهه وماعرف شراح يصير بيه وانه

_لا تسوين هيج بروحج اهلج بامان انشاءلله وبخير وماتحسين الا كم يوم لمن يهدا الوضع ابوج يجي ياخذج وترجعين لبيتج واهلج

_مو سهله علي مفاركتهم محد يحس بالوجع الحاسه بي وانه هنا ماعرف اذا اهلي راح يلكوني لو لا مجرد ما افكر اني

ماراح اشوفهم مره ثانيه اتخبل ويفرفح كلبي وانه ماعرف منطقتنه بالضبط ولا اعرف الطريق الهه شلون كليلي شلون بيه والله ماعيش بدون صوت امي وحضن ابوي والله 

_خلاص حبيبتي فاهمتج والله بس لازم تحمدين ربج وتشكرينه على كل حال وبدال البجي والقهر ادعي ربج يكونون اهلج بخير وما لاحهم شي من

الانفجار ان يكونون بعيدين وبخير احسن مما يكونون لا سمح الله بيهم شي او مفقودين

_لا اسم الله بيه الشر ولا بيهم انشاءلله يارب يكونوا بخير ماريد شي بس يكونون بخير وارجع التقي بيهم مره ثانيه 

_انشاءلله يروحي يله اخذي نفس وتعالي ندخل جوه بارده الدنيا لا تتمرضين

_ماشي ..

مسحت دموعي ودخلنه جوه اخذتني كبل لغرفتهن هيه وخواتهه وجانت عباره عن غرفه جبيره حيل وبيهه ٣ جرابي وكنتور جبير ومرتبه وحلوه

اخذتني من ايدي للحمام دخلتني وراحت جابتلي ملابس من عدهه رغم هيه اكبر مني بكم سنه مبينه بس رشيقه وانه سمينه شوي فملابسهه

يصيرن علي انطتني تراك من عدهه اخذته ودخلت للحمام سبحت وبقيت فتره جوه الدوش لحدما هدات شويه من البجي نشفت وبدلت وطلعت

شافتني واجت اخذتني من ايدي كعدتني عل جربايه وراحت جابت المشط والشسوار احس نفسي صرت طفله كبالهه

لان تاخذني وترجعني وهي لازمه ايدي كلش انحرج من شخص يعاملني هيج بس هل مره غير جنت فعلا محتاجه الحنيه والعطف بهذا اليوم .. اجت رادت تنشف شعري وكتلهه وانه اخذ الشسوار من ايدهه..

_لا انطيني انه انشف شعري 

_تكدرين

_اي اكدر متعوده انشفه بحدي

_تمام لعد ..

اخذته منهه وراحت بره هيه التفتت شفت خواتهه كلمن كاعده على جربايتهه وملتهيه بنقالهه تذكرت هاي حالتي ببيت اهلي نهاركله لازمه نقالي وكاعده ..بقيت اشسور بشعري ولفت انتباهي لمن وحده منهن كالت بشهكه..

_ولج عبير تعاي شوفي هاي شكد ضحايا بانفجار اليوم ميتين ٢٥٠ شخص و٤٠٠ بيهم حروق خطره دخيلك ياربي الله لا ينطيهم الظالمين..

ماعرف من حجت هيج ليش لزمت كلبي واختنكت للحضه خطر ببالي ان اهلي بيهم شي او صاير بيهم شي لزمت كلبي يخفك حيل ودعيت ربي بخوف

وقلق ان مايكون صاير شي باهلي نزلت دمعتي ومسحتهه بسرعه لمن تذكرت امي من شافتني مره كاعده بالحديقه المغرب ضايجه وابجي بدون سبب وكالت..

_ماما شموخه لا تبجين بدون سبب وتكعدين وحدج هاي العاده تجيب النحس وسوء الحظ ولا سمح الله يصير شي بواحد من اهل البيت لو بقيتي تبجين هيج وحدج 

_لا مابجي ماما منو كال ابجي 

_انه امج واعرف عيونج لمن تبجي ولمن تضحك وانتي يبين بيج البجي بسرعه لمن عيونج وخشمج يصيرن حمر وتورم

_اي شويه بجيت لان اريد اخت وحاسه بالوحده

_اعرف يا امي شنو البخاطرج وبكلبج بس شبيدي عليج لو اكدر جان جبتلج اخت بس بعد ربج ماكاعد يقسملنه يجوز هذا حد خلفتنه

_يعني انتي تردين تجيبيلي اخت ماعندج مانع

_وليش يكون عندي مانع رزق من ربي هذا بس احجي هيج حتى ماتضوجون اكلكم انه ماريد حتى ابوج مايضل يفكر ويقلق بهاي السالفه

_مثلما كتلج بنيتي هل شي رزق من ربج ويمته مايريد ينطي النه نصبر والله كريم بعد

_تمام جا راح اضل ادعي بكل صلاة ان ربي يرزقج بنيه وتصيرلي اخت وتونسني

_هههه اي بنيتي ادعي ولا تبجين بعد ماريد اشوف دموع وحيدتي بعد والا اكول لابوج وبعد انتي ابتلي بي

_هههه لا مابجي بعد مدام صار بيهه بابا من اختنك اضل ادعي ربي ينطيني اخت مابجي بعد

_اروحلج فدوا بنيتي العزيزه تعالي لحضني بعد امج تعالي..

ابتسمت ورحت لحضنهه وبقت تمسد على ضهري وشعري لحدما هدات ....

فزيت من صفنتي على اثر شخص ينده باسمي رفعت راسي وشفتهه اسراء بتهم الجبيره نفسهه ماده راسهه من باب الغرفه وتصيحلي باوعتلهه بتسائل وكالت..

_تعالي يله حبيبتي خلي نتغده صار ساعه اصيحلج

_ها مو ماسمعتج من صوت الشسوار

_اي ماشوفين اجيتلج كلت اكيد هسه ماتسمعني يله خلي حجابج على راسج وتعالي وياي 

_بس ماشتهي والله عذروني

_ماكو عذر تجين تتغدين ويانه مانعرف ناكل وشخص جوعان بالبيت يله تعالي ..

اجت علي اخذت الشسوار من ايدي ولفت شعري ورفعته بقراصه وجابت حجابي انطتنيا لفيته على راسي ورحت وياهه مستحيه ماعرف

اكل ويه شخص غريب انه اولاد عمي شعلان الماشوفهم غير كل سنه استحي اسلم عليهم مو نوب ناس غربه ولو همه ماحسسوني انهم غربه

عبالك قرايبي ويعرفوني وكاعده عدهم اخذت ايدي المره الجبيره خالتي وكعدتني يمهه خلت صحن تمن ومركه وزلاطه كبالي وكالت..

_تفضلي بنيتي اكليلج لكمه سندي بيهه طولج لا توكطعين علينه وين انطي وجهي بهل ليل وماكو مستشفيات فارغه

_حاضر خاله..

رفعت راسي باوعت لابنهه راهب كبالي كاعد اجت عيني بعينه ونزلتهه استحي اكل كباله مدري شبيه تقيدت اديه فرد مره هو حس علي وكام وكالت امه..

_ها يمه وين ماكلت شي

_احم لا يوم شبعت الحمدلله راح اروح انام لان تعبان كلش

_تمام يمه واذا تجوع كعدني او وحده من خواتك خلي تسويلك لكمه 

_انشاءلله يوم يله تصبحون على خير

_أجمعين وليدي نوم الهنى يارب..

طلع من الصاله ياله جريت نفس وكدرت امد ايدي اكلت لكمتين غير عن عادتي لمن اكعد عل اكل ماكوم الا اخلص صحني فراك اهلي من اول ليله

سلب مني العافيه .. كلت الحمدلله وكمت والبقيه هم كامو محد اله نفس ياكل اكثر من لكمتين .. شلت الصحون ويه البنات وانه بالي مشغول بغير

عالم موجود يم اهلي حتى اليحجي وياي ماسمعه الا وره لحضات وديت الصحون للمطبخ واجيت اغسلهن وكالت اسراء..

_لا حبي عوفي من ايدج روحي ارتاحي انه هسه اغسلهم بالغساله

_ها يا غساله

_ههه غساله الصحون عمري شعبالج راح اخليهن بغساله الملابس واجلفهن

_اي والله هيج خطر بالي نسيت اكو اختراع اسمه غساله صحون

_شعجب عاد الناس كلهم يستخدموها 

_احنه عائله صغيره وجم ماعون يضلن انه او امي نغسلهم مانحتاج الغساله

_احنه نسيبنه الجبير الكفو جابلنياهه لمن جانت عائلتنه جبيره والماعين تصير هواي حتى ماينشلع افادنه منهن كال هاي بدال اختكم هيه تغسللكم بعد ههه

_ههه بس عائلتكم صغيره 

_لا بعد جان عندي اختين اكبر من عدنه وعمتي ورجلهه جانو عايشين ويانه لحدما قبل سنه استاجروا بيت وطلعو من عدنه وخواتي قبل ٣ سنوات ثنينهم تزوجو اخوان وعاشو ببغداد واحنه بقينه يم امي

_هاا يعني انتو ٥ بنات وولد واحد 

_اي حبي راهب وحيدنه ماكو غيره

_تدرين انه هم وحيده اهلي بس عندي خوان ثنين واح اكبر واحد اصغر مني

_هنيالج وحيده انه قبلي ثنين ووراي ثنين وصايره بالوسط هههه

_ههه حلو هيج بالعكس انه ميته عل اخت والح على امي تجيبلي اخت وماتقبل

_ليش امج شكد عمرهه 

_بعدهه توه ياله ٣٧ سنه عمرهه

_يااا صغيره امج كيوته

_ههه اي حتى شكلهه كيوته لو تشوفين صورهه قبل تكولين واكف العمر عدهه ماتكبر بس بابا بالعكس لان اخذته جبير بالعمر فهسه صار شايب بعد حيلي حيله

_تحبينه 

_ابوي قطعه من روحي لا والله روحي كلهه هوه وانه بنيته وحيدته المدللة

_يبعد عمري الله يلم شملكم ويجمعكم عن قريب ويفرح كلبكم

_امين يااارب ..

عثرت بغصتي وعيوني دمعت لمن حجيت عن اهلي اشتاقيتلهم هيج وقت كاعد اغسل ماعين ويه امي ونخلص ونضل نكرز حب ونباوع مسلسل رغم حياتنه جانت بسيطه بس حلوه ومليانه دفو وحب .. 

عفت اسراء تخلي بالماعين بالغساله ورحت للثلاجه طلعتلي بطل ماي وطلعت بره بالساحه جانت اكو مرجوحه والحديقه بيهه ورد وخضار عل جوانب وطريق من مرمر جاي من الباب البره لباب البيت

الداخلي بيوتهم مال مثقفين ومرتب يعني كعدت عل مرجوحه وبقيت اباوع للخضار فتره مو طويله وثكلت عيوني وغفيت هناك وفزيت على صوت

خشن ينده علي يا بنيه فتحت عيوني وشفته راهب كبالي فزيت من مكاني وكفت كباله وكتله..

_شنو شتريد ليش اجيت يمي 

_اسم الله ماردت شي بس شفتج نايمه هنا وكعدتج تدخلين جوه لان بارده هنا

_ها اي لا مو بارده راح ادخل انه عن اذنك

_تفضلي اختي..

اخذت بطل الماي ورحت دخلت جوه وانه كلبي من الفزه بعده يخفك غميت كصتي لان حجيت هيج وياه هسه عبالك مدري شسوالي اي هوه شماله

هيج واكف كبالي ومنزل وجهه مقابيلي جنه منحرف اووف .. لاكتني اسراء طالعه من الصاله وهيه منعسه وكالت..

_هاي من الصبح لهسه انتي بره وانه عبالي دخلتي للبيت

_ يااا عمرييي تعالي نامي يمي عل جربايه هسه اشرب ماي واجي يمج انه تمام

_لا مايصير جربايتج ماتكفي بس كليلي عل فراش وانه اطلعلي افرش بالكاع 

_لا مايصير تنامين بالارض انه انام بالارض وانتي عل جربايه خاف ماترتاحين

_لا مو هيج بس انتي خاف ماترتاحين

_لا معليج بيه انه ماعدي مشكله تنامين بصفي 

_بس

_بدون بس يله دخلي نامي على ماشرب ماي واجي متت عطش

_تمام..

دخلت لغرفتهن لكيتهن كلهن نايمات ضلمه وبس ضوه الشمس داخل من وره البرده مالت الشباك رحت تمددت وشفتهه واسعه تكفيلنه ثنينه ومنا النعسه

بعيني بعدهه تغطيت بالبطانيه ونمت لليل فويت مخروعه شفت الساعه ب١٢ مادري رجع الوقت لو انه نايمه من العصر باوعت من الشباك ضلمه والبنات نايمات والمشكله عيوني ثكال وكوه فاتحتهن تنهدت بحيره وحسيت بجوع بس تعاجزت اطلع اكلي شي عاد رجعت نمت ما كعدت الا على صوت خالتي وهي تحجي ويه اسراء وعبير وتكول...

_ها يمه اسراء عبير ماترحن لدوامجن صارت ب٧ ونص

اسراء : لا يوم اليوم منطين عطله لكل الدوائر بسبب الصار البارحه من باجر نكدر نداوم

_وانتي عبير يمه غير بالصحه انتي ولازم يحتاجونج هسه

عبير : اي امي هسه راح ابدل ماعندي شي اخذ سيارتنه واروح ماتحتاجينهه انتي مو

_لا ماحتاجهه اخذيهه اليوم وديري بالج بنيتي لا تدخلين بين الازدحام كلشي يصير تره الوضع بعده خطر

_انشاءلله امي

_يمه اسراء شلونهه البنيه شموخه انشاءلله نامت زين البارحه

_اي خطيه نامت يمي عل جربايه 

_خطيه من اباوعلهه اشوف نفسي بيهه لمن ماتو اهلي اسم الله على اهلهه وبقيت وحيده من عم لعم يشمروني وعشت غريبه بين اهلي وناسي

لحدما ربي فرجهه علي واخذت ابوجن وانشاءلله ربي يفرجهه عليهه ويلم شملهه باهلهه يارب

_انشاءلله يارب ..

كلت بكلبي امين ورجعت غمضت عيوني ونمت فتره وكعدتني اسراء عل غده كتلهه ماشتهي استحيت اكوم اكل وياهم مادري ليش بس همزين ماخلتني بجوعتي من امس عاد ماعافتني الا لمن شافتني كمت اغسل دخلت للحمام غسلت واجت انطتني فرجه ومعجون

جديدات خاصه بيه ورجعت طلعتلي ملابس منهه ودخلت سبحت وحسيت روحي شوي ارتاح جسمي من تعب الطريق عكس نفسيتي وروحي التعبن بيوم وليله .. نشفت وبدلت وطلعت نشفت شعري وكالت ..

_لا تلبسين حجاب راهب رايح للجامعه ماموجود 

_هاا تمام

_يله تعالي يمه فديت الخديدات ماتنطيني شويات منهن

_اخذيهن مسوياتلي عله

_ليش ولج

_مو خدود عبالك كلوب مال اسعاف بسرعه انفضح من وراهن ان بجيت او فرحت او استحيت كبل يشتغل كلوب احمر بيهن

_ههههه يروحيي شكد كيوت رغم احس شخصيتج تبين جذابه وقويه بس خدودج تبينج كيوت ولذيذه كرشت عليهن بعد

_اي مو اكلج اخذيهن

_لا خليهن الج انخلقن الج هذولي الخديدات الريانه

_الله يرزقج مثلهن

_هههه امين يله ولج خلي نطلع لا تعيط بينه امي 

_تمام يله..

طلعت وياهه بدون حجاب لكيتهم كاعدين بالمطبخ عل ميز مالت الاكل ويتغدون عكس امس لمن تعشو بالصاله كعدت وياهم وتغدينه الاكل طيب رغم ماشتهي ومسدوده نفسي بس ريحته فتحت

رجعت للغرفه كعدت وخليت حجابي على راسي شويه واجت الاخت الصغيره اسمهه بان لزمت نقالهه وكعدت تكلب بالاخبار وانه صافنه بزماني واهلي مرت ساعتين تقريبا واجت عبير من دوامهه

دخلت سلمت علينه واخذت ملابسهه وراحت للحمام .. همه ٣ بنات اسراء الجبيره حاليا واكو اكبر منهه ثنين متزوجات اسراء موضفه بدائره حكوميه عل محاسبه وعبير تشتغل محلله

بالمستشفى وبان مرحله اولى جامعه وراهب اكبر منهه بسنه مرحله ثانيه جامعه يعني باختصار كلهم اكبر مني ماكو شخص بعمري بهل بيت .. 

طلعت عبير من الحمام وهيه لافه المنشفه على شعرهه وتمددت عل جربايه وهي تجر نفس كوه وتكول لبان ...

_يبوو تعب تعب اليوم المستشفى صايره حرب بيهه وكأن الجرحى كلهم بهل مستشفى متكومين ماكو غيرهه كوه خلوني ارجع ..

_ماعرف والله هواي ناس مرو علي بس ماسمعت ان اكو شخص سال عن وحده باسمج 

_زين بالجرحى ماشفتي واحد من اهلي لا سمح الله يكون مجروح وجاي لهاي المستشفى 

_ماعرف والله هيه المستشفى صايره حرب يعني حتى لو يمر اسم واحد من اهلج علي ماتذكره ومانتبهله من كثر الناس الموجودين 

_زين حبابه اكدر اروح وياج ادورهم باجر لو مايقبلون

_اي عادي اكلهم اجيتي تدورين على اهلج بس ماعرف اذا ماما تقبل اخذج وياي او لا

_انه اخذ اذنهه واكلهه راح اروح وياج وارجع وياج اذا ما لكيت اهلي 

_تمام حاجيهه وحضري نفسج باجر اخذج وياي ندورهك بالمستشفيات

_تمام شكرا الج كلش شكرا

_العفو حبيبتي انتي..

ابتسمت ورحت لبست حجابي زين وطلعن للصاله لكيتهه كاعده ويه اسراء وراهب ترددت بس تالي رحت كعدت يمهه وحجيت بصوت ناصي وياهه...

_خاله اري اخذ اذنج واروح باجر ويه عبير للمستشفى ادور بلكي اهلي سائلين عني او لا سمح الله موجودين بين الجرحى 

_اي خالتي حبيبتي ليش لا انه وياجن اروح باجر لان ما اامن عليج ترحين ويه عبير وتضلين هناك وحدج وانه هم عندي معارف بالمستشفى اسالهم واشوف بله

_تمام خاله شكرا الج كلش

_العفو بنيتي ماطلبتي شي انتي

_يله عن اذنكم ارجع يم البنات انه

_اخذي راحتج حبيبه..

عفتهم وكمت ردت اطلع وسمعتهه حجت لراهب قصص ماي هوبس  واسراء عن روحتنه باجر رحت للغرفه وانه بداخلي انزرع امل كلت لعبير عن موافقه خالتي وبقيت

كاعده وادعي ربي يفرجهه علي شفت عبير كامت توضت ولبست محرم الصلاة حتى تصلي تذكرت اني ماصليت لا امس ولا اليوم جنت معتمده 

على امي او ابوي يذكروني ويخلوني اكوم اصلي .. رحت توضيت واجيت بقيت كاعده منتظرتهه لحدما كملت رادت تشيل المصلايه وكتلهه ..

_حبي عبير عادي اصلي بمحرمج

_اي عادي حبيبتي ليش لا تفضلي

_شكرا عمري

_ العفو حياتي..

اخذت المحرم منهه لبسته ووكفت اصلي خنكتني العبره وبقيت اصلي وابجي وكان روحي كاعد تشتكي همهه لخالقهه كملت صلاة ودعيت ربي

يرجعني لاهلي وكلت يارب اوعدك التزم بصلاتي ومافوت منهه ولا فرض وحتى المطلوبه اصليهن بس كون ترجعني لاهلي يارب .. 

رغم عمري بس كلبي كلب طفله ضيعت اهلهه ومستعده تسوي كلشي حتى يرجعون اهلهه ..

كمت من المصلايه وكالن عبير وبان تقبل الله رديت عليهن ولفيت المصلايه رجعتهه لمكانهه وكمت طلعت بره اشم هوى شويه ..