رواية قيود العوف الفصل التاسع والثلاثون 39 بقلم ريتا

گعدت علىٰ ريحة الديتول وأيد تعصر بأيدي بخفة ، باوعت للي لازم أيدي شفتهة منار چانت دايرة وجهة وتباوع علىٰ باب الغرفة ..

ألتفت وفتحت عيونهة علىٰ وسعهن وضحكت الي باوعت لعيونهة حمر دم ومورمات ومكياج عرسها كله مموجود بوجهة گالت بصوت ملهوف...

-منار: جُمان گلبي شلون صرتي ماكو شيء يأذيج

تعبانة ماجاوبتهة لزمت گلبي الي بيه نغزات بشكل متكرر ردت أستوعب ليش اني هنا مو چنة بالعرس ؟ طبگت حواجبي ورجعت بذاكرتي شوية شوية داستوعب 

سرعان ما شهگتت وعطت بكل صوتي شلعت الكانيولا ونهضت طفرت منار اجت يمي تحچي وياي بس ماسمع شتگول بالي راح يم أمي صرخت بصوت بوجهة 

-جُمان: اميييي ويييين مناااررر

انعصر وجهة بلعت ريگ وگالت بصوت متلبك ..

-منار: ءءءاا .. جُمان

-جُمان: اميييي ويننن 

-منار: ما أعرف 

گالت الكلمة وبچت دمعت عيوني وهزيت راسي بشكل متكرر بوجهة ..

-جُمان: ولچ لا تگطعين گلبيي امي وين راحت شلون متعرفيييييين لعد وينهة اني شدسوي هناااا

-منار: وگعتي وگعتي جُمان أغمىٰ عليچ 

بقت صافنة بوجهي وتبچي عفتهة وركضت للباب أهرول ردت أطلع أنفتح الباب قبل ما افتحة صارت بوجهي رغد شافتني وگالت بخرعة ..

-رغد: جُمان وين رايحة بهذا وضعج 

-جُمان: رايحة لأمي وخرري رغد

گلت الكلمة ومديت أيدي أبعدها عن الباب حتىٰ أطلع بس بقت ثابتة بمُكانهة وما اتحركت ولا خطوة حطت عينها بعيني لزمت ايدي وگالت ...

-رغد: بس تعالي اگعدي شوية

-جُمان: وين اگعدد شبيييچ رغددد أريد اروح أشوف أمي وخررري عني عفية

-رغد: بس لا تعيطين جُمان مو زين عليج ماتشوفين وضعج ولهلسبب انتِ هنا ماتگدرين تطلعين وضعج ما مستقر

                                            

              

                    

-منار: فدوه تعالي جُمان لتأذين نفسج أكثرر 

كل وحدة لزمتني من جهة من أيدي واخذوني للسدية أمشي وما مستوعبة شبيهن ليش هيج ديتصرفن وياي ..

-جُمان: شبيچن شنو هلتصرفات ليش هيج دتتصرفن

-رغد: لأن مو زين عليج العصبية وألانفعال صحتج تعبانة

-جُمان: لا مابيه شيء زينة اني

گلت الكلمة ونهضت وگفت گبالي رغد قاطعة طريقي اتنهَدت وگالت ..

-رغد: مايصير تطلعين مايقبل الدكتور

-جُمان: مابيه شيء و أريد أشوف امي ماشفتهة بالعرس بعد وي منو لگيتوهة رايحة ؟

أشوف نظراتهن حزينة وكل وحدة تتنهد گبالي ويباوعن الي بحيرة ..

-جُمان: ليش مدتجاوبنيي ليش ساكتتتاتتت؟؟؟

-رغد: هسة الدكتور يجي ويشوفج گايمة ومشلعة كل شيء ومااايقبل 

-جُمان: رغد ليش جاي تتهربين من سؤالي ؟؟

باوعت لمنار نزلت راسها وعيونهة متكتلة بيها الدموع ..

-جُمان: جاوبيني انتِ منار متضمين عليه شيء باعي رغد دتدور وتلف حرام عليكم لتكذبون عليه احچولي

لزمت گلبي بتعب يخفق حيل وعندي وجع بصدري مابية أعلي صوتي حتىٰ أنفتح الباب رفعت راسي وشفت الحجية فاتت وجهة مشحوب لونه وتعبان شافتني وغيرت ملامحهة ابتسَمت واتقدمت ألي..

-جميلة: حبيبة يمة شلون صرتي 

ميلت راسي وباوعت محد وراهة حسيت نفسي ضاق هزيت راسي وحچيت بتعب وصوت مُرهق ..

-جُمان: زينة حجية ، لعد امي وين ؟

ماجاوبتني أنتهيت حسيت أخر ذرة صبر بقت عندي بس أسألهم أشكالهم تتغير وحدة تصفن بوجه الثانية .. 

عصرني گلبي عصر رجف لساني مجرد مافكرت بهذا الشيء هزيت راسي وعصرت أيدي مستحيل هذا الشيء يصير لا لا ... 

صارت عيني بعين منار الي عيونهة مغورگة دموع .. بلعت ريگ بصعوبة وطبگت حواجبي ..

-جُمان: مالگيتوها ؟

حچيت الكلمة ونزلت دمعتي فوراً .. شهگت وهي منزلة راسها راحت گعدت علىٰ الكُرسي وماسمع بس شهگتها 

سرت رجفة بجسمي مو طبيعية صارت واضحة لدرجة رغد وگفت گدامي لزمت أيديه تمسح عليهن و وجهة مصفر ومصدوم والحجية تريد تهديني وتوگف الرجفة ماكو ...

            

              

                    

دفعت رغد حييل وعطت ..

-جُمان: تلفون وتدورون عليه محد تگلي الصدُگ امي مموجودة محد لگاها وين راحت لعدد 

باوعت للحجية احتاريت شنو أسوي ماعرف شديطلع مني فقدت انهاريت وفصلت صارت تصرفاتي ممحسوبة كل عيطة تطلع مني تشگ صدري لزمت أيدها وحچيت بدموع ..

-بيبي وين امي ؟ وين مشفتيها وين راحت لعد فدوه دتكذبون عليه دتسوون بيه مقلب مو گدها اني لتختبروني بـ ماما 

يحچن وكل أصواتهم صارت بعيدة عني ما أسمع منهن شيء يمي بس صوتهن بعيد عن أذني لطمت علىٰ وجهي وطلعت من الغرفة أركض روحي فرفحت تخبلت 

انجريت من أيدي واتقيدت من الصدمة ماشوف الي گدامي وماركز بوجودة حسيت أحد يضرب بوجهي ..

-رغد: جُمان وين رايحة طالعة تركضين ويييين 

دفعت أيدها عني بس مقيدتني حيل واني مابيه قوة جسمي كله تعبان وصدري بيه وجع ..

-جُمان: وخررري عني رغددد وخرري أريد اشووف أمي أريد أروح الهاا 

-رغد: وين ترحين إلها وين وانتِ ماتعرفين مُكانهة

نترت روحي منها حيل عطت بصوت ..

-جُمان: أدورها وين تروح لعد وين موجودة بس انتوا مشفتوهة من عوف سوة حادث صارت خبصة

أدركت كلمتي لزمتها وگلت بخوف ..

-جُمان: عوف ؟ عوف وين شصار اله

-رغد: زين والله عوف بخير مابيه شيء

-جُمان: شلون مو صار حادث ؟؟

هزت راسها وگالت 

-رغد: والله هو بخير بعدين أفهمج بس تعاي رجعي للغرفة باعي صرتي ترجفين جسمج كله ينكث جُمان راح ينغمي عليج مرة ثانية ومو زين 

-جُمان: مو گلتلج لا مابيه شيء اذا ما أشوف امي ما أرجع لأي مُكان اتركي أيدي رغد أريد أروح الها باعي گلبي يأذيني اذا ماشوفها ما أرتاح 

-رغد: زين وين ترحين بس فهمينييي وين مموجودة

-جُمان: مموجودة شنو لعد وينهة أختفت رغد ليش دتحجين وعبالك امي مخطوفة ؟؟

رخت ملامحهة بوجهي غمضت عيونها جرت نفس وسكتت بهت وجهي وحچيت الكلمة بالغصب عني..

-جُمان: انخطفت ؟

-رغد: جُمان اهدأي 

            

              

                    

-جًُمان: لا لا ... اششششش 

لزمت گلبي وگعدت بالگاع عيوني صارت تفتح وتغمض لوحدهة لساني ثگل ثگل ماگدر احچي كلمة بعد شافتني وصاحت بصوت طلعت منار تركض وين راحت مادري اباوع وماگدر احچي شيء عيوني تتنقل بالوجوه بس 

أسمع صوت الحجية وصوت رغد بس ماگدر اجاوبهم ماعرف ليش صارت عندي هاي الحالة بس اتمنيت اصررخ بصوت بداخلي صرخةة مكتومة و وجع بس ماگدررر 

دموعي صارت تنزل بسرعة واهز راسي بهستريا وانتر نتر بأيديهم ماريد أشوف وحدة گدامي أريد امي بس ...

اتخبلت واتهسترت صرت أدفع وادفر بالي مقابيلي بدون ما أنتبه اله منو من كل كلبي ادفر وأدفع طلعت حرگة گلبي وصوتي المايطلع بحركتي ...

سمعت أحد يگول ..

-لا تقيدينها اتركيها ميصير جاي تزيدين وضعهة

غوشت عيوني حسيت علىٰ أحد شالني من الأرض ومشىٰ بيه ومستمرة ادفر واضرب بهستريا أسمع صوت الي يمي كُلهم بس ماگدر أركز وياهم حسيت ببزة صارت بجسمي وشوية ومنها باد و رخة كُل جسمي 

******

گعدت مقابيلهة الدكتور ضربها أبرة مُهدئة لأن فقدت و اتهسترت من شاف حالتهة الدكتور گال أنُ راح تتأذىٰ هيچ وتتضاعف حالتهة مع العلم الإبرة مو زينة عليها بس لأن حالتهة اتفاقمت حيل ... 

الحجية من شافت حالتهة شلون صارت تعبت كلش ودزتهة رغد للبيت ماقبلت تبقىٰ هنا لأن من تشوف وضع جُمان تنهار وياهة ..

مسحت وجهت وباوعت إلها نايمة اندگ الباب خفيف فتحتة رغد دخل قاسم باوع إلها وگال بتنهيدة ..

-قاسم: ها بوية شلون صارت ؟

-رغد: فزت وسألت علىٰ أمها شافتنة نلوف ونلوص افتهمت السالفة وخبصت الدنيا شافهة الدكتور وخاف علىٰ حالتهة انطاها ابرة مُهدأ ..

اتخوصر و وگف باوعلي وگال ..

-قاسم: ترحين وياي للبيت ترتاحين شوية وارجعج ؟

-منار: لا 

-رغد: منار روحي ارتاحي وسبحي وتعالي انتِ تعبتي جريتيها من أمس جرة وحدة 

-منار: شلون أرتاح واني ماعرف خالة امل وينهة وشصاير بيهة 

باوعت لجُمان وكملت كلامي ..

-منار: ومن تگعد ؟ شنگلهة نرجع ننطيها أبرة مُهدأ علمود حالتهة متنتكس لو نچذب عليها 

            

              

                    

بقىٰ شوية صفن بحالة جُمان شاف وضعهة صار يذب حسرات ويتنهد .. وگفت يمة رغد صارت تسألة تريد تاخذ جواب بس مايجاوبهة ومايشاركهة شيء ويكتفي بجوابة ..

-ترجع والله وترجع شعرة وحدة ما ممسوسة منها ولو صار علىٰ أم جُمان شيء هذا شاربي ازينة غايتهم مو أذيتها غايتهم احنة 

-رغد: هذا الحچي ماياكل قاسم شنو الي يردونة منكم انطوه ألهم وفضوها ؟

صفن بوجهة هـز راسة وضحك .. 

-قاسم: شنو هيتة ؟

نهضت وگفت گدامة وحچيت بحدة ..

-منار: وتبقىٰ خالة أمل مخطوفة يمهم وهية مرة مريضة ؟ لا تشوف ولا تمشي ؟ مانعرف شيسوون مايسوون بيها وانتوا ماهامكم وماتقبلون تنطونهم الي يردونة مقابل سلامتهاااا ؟

-قاسم: مانحقق مطلبهم اي بس نعرف شلون نرجعهة

-منار: يلة لعد ؟ يلة من البارحة مالها أثر ؟؟

-قاسم: نگدر نطلعها من حلگ السبع وبدقائق بس شنو الفايدة ؟ راح ننطي أرواح ناس هواي راح نضحي بناس بريئة وبالأطفال وراح تبقىٰ هاي العصابات تفتر وتكثر والناس راح تنمرد وتروح بالرجلين 

-منار: والحل ؟؟

-قاسم: مو كل شيء ينحچي منار

ضحكت وحديت بكلامي أكثر عليه صرت أعلي بصوتي بدون إدراك مني من حرگة گلبي ..

-منار: هههههه والله محد وصلنا لهاي المرحلة غير الشيء الي منعرفة ومينحچي وشغلكم الله يستر السرة الجاي منو راح ينخطف بسبب شغلكم ونزاهتكم الي تهمكم أكثر من عوائلكم 

-رغد: منار 

-قاسم: لا خليها تكمل ليش يبقىٰ بگلبها 

-منار: مايفيد حتى لو أكمل راح يجيب نتيجة كلامي تهتم اله ؟ چان اهتميت من گلت الك گلبي مامرتاح گلبي يلعب راح يصير شيء بس چنت تگلي لا واني أعرف وشفت الحيرة بعيونك بس عديتهة ونسيت  لأن وثقت بيك

-قاسم: بعدني گد كلامي وعند كل كلمة حچيتهة لو رجعت ام جُمان ممسوسة بكلمة حتىٰ ألج حق عليه بس محد يگدر يخاطر بالناس والعوائل والأعراض بسبب فعلتهم القذرة وهو هو هذا الي يردونة 

-منار: يله رجعهة لعد ليش بعدك واگف يمي ؟

جاوبني بجمود وگال ..

-قاسم: اجيت أشوف البنية واتطمن علىٰ صحتهة 

-منار: تطمنت قاسم ؟ شفت صحتها شلون وردية وتخبل باوعلهة نايمة مرتاحة ماعندهة شيء تفكر بيه ومن تگعد نگلها امچ بالبيت موجودة نضحك عليها بكلمتين وتفض 

            

              

                    

احتقن وجهة وگال ..

-قاسم: شبيچ انتِ ؟

-منار: سلامتك بس ام صديقتي مخطوفة من أمس ماكو شيء ؟

-قاسم: لا حول ولا قوة إلا بالله 

-رغد: كافي قاسم روح كمل شغلك لا تتعاركون بنص المستشفىٰ شبيكم ؟

عفتهم ورحت گعدت علىٰ الكرسي بقىٰ واگف ويباوع الي صفن بوجهي أتصل تلفونة جاوبة وطلع بسرعة.. دمعت عيوني أخذت نفس صرت افرك بصدري واباوع لجُمان ..

وگفت گدامي رغد وگالت .

-رغد: أعرف وحاسة شعورج هسة بس مايستاهل تحچين وياه بهاي الطريقة الله يعلم بالضغط الي عليهم وبالشيء الي مانعرفة منار الي مايحچونة ومانعرفة اعظم

ألتفت عليها ورديت ..

-منار: ليش اتلگاه بالأحضان ترديني ؟

-رغد: ماتعرفين شغلهم وشگد ياخذ منهم هيج موضوع وقت مو صبغ الساعة حتىٰ يرجعونهة بيهة تصير عندهم مراحل وتنرسم خطط إذا مو هيچ يصير الدم للركب !! 

-منار: يعني انتِ چنتي تعرفين ؟؟

-رغد: بشنو أعرف ؟

-منار: بالتهديدات الچانت توصلهم وبحرق بيت جُمان ؟

-رغد: شنو ؟؟ شجاي تحچين منار ؟ منين جبتي هذا الحجي

-منار: بربج رغد لتسوين نفسج متعرفين شيء وانتِ تعرفين بكل خطوة يخطونهة أخوانج 

وگفت يمي وجحظت عيونها وگالت بأستغراب ...

-رغد: ما أعرف بشيء منار شجاي تحچين انتِ ؟؟

-منار: والله هذا الي سمعتة 

-رغد: هسة تسولفيلي شنو الي سمعتي وشنو موضوع التهديدات ؟!

چانت تحچي بطريقة جدية و واضح عليها فعلاً ماتعرف بشيء اتنهدت وبديت اسولف الها الي سمعتة والي گالة قاسم بقت مصدومة تباوعلي بصدمة وگالت ..

-رغد: هذا الحچي شوكت ؟

-منار: قبل عرسي بـ ٣ أيام 

حطت أيديها علىٰ راسها ونزلتة صافنة بالأرض..

-رغد: ألىٰ متتتى نبقىٰ تحت هيچ وضعية 

-منار: ليش صارت هلسالفة قبل ؟ 

-رغد: اي وانخطف عوف بوقتهة بقىٰ أكثر من شهر مخطوف ومحد يعرف عنة شيء وحتىٰ بعد خطفة بقت التهديدات تمطر مطر علينا لدرجة اضطرينا نسافر ونغير مُكانة كله لحد مارجع 

            

              

                    

-منار: مستحيل !

-رغد: وغيرنة البيت والمنطقة كلها وبوقتهة حتىٰ أصدقائهم والناس الي تعرفهم ما انطيناهم عنوانة وشددوا الحراسة علينا بشكل مو طبيعي چانت طلعتنا وفوتتنا بالتواسيل 

-منار: عيشتيش ؟

-رغد: مو بيدهم وما يخضعون رغم كل الخطر والمواقف الي مرينة بيهه ماچانوا يخضعون لأي واحد أساسًا انخطف عوف بسبب مُهمة شال بيها فاسدين هواي

-منار: وهسة نفس الشيء جاي ينعاد ؟؟ 

-رغد: هذا الخايفة منة أعرف اخواني مايطخون ومو بسهولة أحد يوصلهم بس شلون وصلوا لخالة أمل وليش هية بالذذذات !!؟

-منار: مو گتلج حتىٰ بيتهم حرگوووه 

-رغد: بيتهم شيء ثاني هذا التهديد چان لعوف 

-منار: وخطفهة ؟؟

-رغد: ضغط حتىٰ عوف ينفي المعلومات وينسحب من المُهمة 

-منار: إذا تهمة جُمان لخاطرهة ينسحب ؟؟

-رغد: شتسولفين ؟ مو بهلسهولة !!

-منار: مثل حچي اخوانج بالضبط إنتوا ليش أنانييين ؟؟

-رغد: مو أنانية بس انسحابه شبه مُستحيل لو أتم لو تفشل مُهمتة 

سكتت واني افور فور ميهمني لا مهمتة ولا يهمني شغلهم كل الي يهمني وأفكر بيه خالة و وضعهة وين هية هسة شجاي يسوون بيهة انعصر گلبي وآني أفكر..

-رغد: الي ماجاي يستوعبة عقلي شلون غفلنا عنها شلون گدروا ياخذونهة بدون مانلاحظ بدون مانشوف حتىٰ صوتهة ماسمعناه ماصاحت علىٰ أحد بينة إذا انخطفت ؟

-منار: مافهمت شنو الي تقصدينة ؟ 

صفنت وگالت ..

-رغد: حادث عوف ؟ خطفهة صار بنص الحادث وبنص الهوسة يعني مخططين لهذا الموقف متعمدين حتىٓ يشوشونة ويطشرونة وتسهل عمليتهم !! 

-منار: محد شوشنة وشتتنة وطشرنة غير الطفل الي اجانة وكذب علينا 

بلعت ريگ وحطت أيد بأيد صارت تمسح بيهن نفخت وگالت ..

-رغد: هذا نفسة هو الي سحب كرسيهة وطلعهة ومحد حس عليه وهو طفل شلون تشك بيه وتعرف كذب عليها حتىٰ تحس بيه وتخاف وتصرخ بس شلون گدر يسحبهة ؟

أتقربت منها بقيت صافنة لثواني وحچيت ..

-منار: لعد الطفل أساس كُل شيء !! هو الي اجة كذب علينا وطفرنة وهو الي نشر الخبر وسوة الهوسة من خلالة هو صارت كل الهوسة هاي والخبر الكذب أنتشر بيناتنة ولم الناس كُلهم بمُكان واحد !

            

              

                    

لزمت راسها وصارت تفتر وتفرك بيه ... 

-رغد: أحس دخت دختتت طفل !! گدر يعبرها علىٰ مجموعة آمن كاملة موجودة وصارت عملية أختطاف من خلالة بدون ما أحد يحس بشيء !! 

جمدت بمُكاني وبقيت ساكتة ماجاي أعرف أحچي شيء 

-منار: حتى الطفل صار لعبة بأيديهم يستخدمونهة ضد الناس لمصالحهم 

صفنت شوية وگالت ..

-رغد: لالا حتىٰ لو ماتعبر علىٰ أخواني وچانت أكو جهة أمنية موجودة بالعرس مستحييل هلطفل يگدر يطلع خالة أمل لوحدة 

-منار: يعني شلون ترىٰ دخت رغد !!

-رغد: يعني هذا الطفل هو الي سهل العملية وهو الي سوىٰ الهوسة كلها بس أكو واحد من الحضور هو الي ساعدة هَو الي كمل وأخذ خالة أمل 

دخنة انسطرنا وكل وحدة تحچي شكل ومانعرف نوصل لحل الشكوك ترستنا ترس رغد كل شوية تصفن وتگول شيء وتحلل بيه

واني ماعرف أحس مثل الأطرش بالزفة لو أربط لو ما أربط مرت ساعات وگعدت جُمان چانت هادئة وهذا الي خوفنة ملامحهة جامدة وكلمة ماطلعت منهة 

تباوع بالوجوه وساكتة شاف حالتهة الدكتور گال أنُ وضعها مستقر تگدرون تطلعونهة ساعة واجت الحجية و وياها مصطفىٰ 

ما انصدمت من شفتة لأن عرفتهم بهيج وضع حتى بالحراس والأمن مايأمنون لو همة لو صديقهم مصطفىٰ وبس .. 

وصلنا للبيت دخلت أمشي بتعب مانايمة ومامرتاحة من أمس بس ماتاخذ عيني نوم ولا اگدر فتت وراهة للغرفة گبل راحت للجنطة فتحتهة طلعت ملابس خالة أمل وحضنتهم وأخذت زاوية صافنة بيها 

رعبني شكلهة خفت حسيتهة مو طبيعية ماتحچي وماعندهة ردة فعل بس تصفن وتشمشم بالملابس 

توترت وقلقت عليها رحت گعدت مقابيلهة انسحنت روحي من ركزت بوجهة حچيت بصوت هزيل ..

-منار: جُمان گلبي ليش ماتحچين ؟ ليش ماتسولفين احچي كلمة ؟؟

حطت عينهة بعيني بس ملامحهة جامدة ماكو ردة فعل اتخبببلت خفت أكثر من شفتهة هيچ 

-منار: بس حاچيني بس سوي حركة بوجهج اي شيء بس ريحي گلبي لا تسوين هيچ

نزلت عيونهة ببرود ولمت الملابس لحضنهة وتكرفصت أكثر بالزواية حطت راسها بين رجليهة ولمت نفسهة 

نهضت روحي بسرعة طلعت من الغرفة فتت لغرفتي الي ماشايفتهة وما منتبهة الهة مجرد فتت غيرت ملابسي بيها وطلعت أخذت تلفوني الي چنت ناسيتة علىٰ الميز 

            

              

                    

إتصلت علىٰ قاسم مرة مرتين ماجاوب فرت فور أريده يجاوبني ماكو ميرد 

شمرت التلفون وردت أطلع أرجع إلها شبيهة ليش هيچ صارت حالتهة ليش ماتحچي ليش ماعندهة ردة فعل وباردة عكس اول ماعرفت گلبببت المستشفىٰ وخبصتهة هسة ماكو ماكو ردة فعل ...

بس رجعت گعدت علىٰ الچرباية أفكر بهلمصيبة وشلون راح تنحل شلون راح تطلع منها خالة أمل شلون راح تنتهي ماعرف محد يبرد گلبي بحچاية محد يحچي منهم شيء

حچيهم سطحي مُبهم مامفهوم ماتعرف منه شنو الموضوع وشنو جاي يسوون كل الي يگولة " ترجع "

بس شوكت وشلون مادري وهذا الي مفورني شوية وأتصل تلفوني أخذتة فتحتة بسُرعة اجاني صوتة 

-قاسم: ها منار 

حچيت بفزع وخوف ..

-منار: عوف وين ؟

-قاسم: شصار ؟

-منار: خلي يجي قاسم جُمان حالتهة تعبانة غريبة وتخوفني وماعرف شلون أتصرف وأتعامل وياهة ميفيد أريده هو يجي يحچي وياهة

-قاسم: عندة أجتماع مهم هسة منار 

من حرگة گلبي عطت عليه بصوت ..

-منار: ماكووو هييچ ماكووو الله ياخذنييييييي ويفكنيييي

سديت التلفون وشمرتة وأحس گلبي صار نار رجعت يمهة للغرفة شفت الحجية گاعدة گدامهة وحاطة أيدها علىٰ راسهة ورغد تباوع بحيرة 

-رغد: بعدهي مصدومة 

-منار: موتتني سحنت گلبي شگد حچيت وياهة مترد 

-جميلة: وين أخوتج عندي حچي وياهم

-منار: خابرت قاسم گال عندهم شغل

ضربت علىٰ رجليهة وگالت ..

-جميلة: يا شغل المايخلصص

-رغد: يمة چا منو جاي يشتغل علىٰ قضية خالة أمل ؟؟

-جميلة: والله علىٰ يوم يوگفون گلبي يوم واحد متصوب ويوم واحد مخطوف ويوم واحد متهدد وانا گلبي خلص بعد مو حمل المصايب هاي 

سكتنة اثنينة وكل شوية تذب حسرة باوعت لرغد وگالت ..

-جميلة: گومي يمة گومي سويلهة شيء تاكلة راح تموت البنت من أمس بدون اكل وخلصتهة مستشفيات گلبها خلص .

******

-وين وصلت بيهة ؟

-عوف: للنهاية . حالياً جوة أيدي كل المعلومات عنهم وأعرف صغيرتهم وچبيرتهم و اليوم رجعت فتحت ملف جديد بخصوصة 

            

              

                    

-حلو الامور طيبة 

-عوف: مو طيبة حبيبي الهدف انه والإنسانة الي تم اختطافهة مالها يمي ويمة هلگد هاي نقطة اضافية بالملف .

-نعم 

ألتفت الي وأشر بحاجبة بمعنى سجل . 

-مصطفىٰ: تم سيدي 

أخذ الملفات صار يگلب ويقرأ بيهن ومنبهر أبتسم بوجهة وگال ..

-الأدلة والإثباتات الي بأيدك عليهم قوية هاي تطحنهم طحن بس لا تنسىٰ سيادة الرائد هذا النوع من العصابات مو سهل القبض حتىٰ رغم أمتلاكك هيچ معلومات 

-عوف: سيدي لو يعرفون ماراح ينمردون ما احتاروا شلون يوگفوني ويخلوني أنسحب واسقط الأدلة وصلت بيهم يأذون ناس بريئة أعرفهم بس حتىٰ يخلوني اوگف عنها

-محسوبة عليهم هاي وحسابها چبير كلش .. رئيس العصابة شنو أسمة گلتلي ؟ 

-عوف: حامد ******* الاسم الكامل سيدي ، شخص قوي و اله سلطة ونفوذ وأغلب الأشخاص الي تم اللقاء القبض عليهم چانوا جوة رجليه يشتغلون ..

-وصاير **** الگ** يا وسفة 

-عوف: أكثر من مرة اجة اسمة وتجي عليه معلومات بس بكل مرة تختفي الملفات وتطمطم وتنسد القضية ولا من عرف ولا من درة 

-لا يا ن*** وين واصل هذا ؟

-عوف: سيدي حامد يمي شغلتة لأن أساسًا كل شيء اله يمي وإنه الي رايد اللزمة عندي وياه حساب معدل ..

-هذا الشيء خطر عليك سيادة الرائد

-عوف: أعرفلة سيدي أعرف شلون اجرجرة 

باوع أله وهز راسة ألتفت ألي وگال ..

-سجل يمك م.أ مصطفىٰ 

-مصطفىٰ: تم سيدي 

-الكاميرات الخارجية للفندق ؟ 

-مصطفىٰ: مفقود 

-نقطة 

-كاميرات الشوارع الي مقابيل الفندق ؟

-مصطفىٰ: سيدي مفقود 

-نقطة وجواها خطين .

حط اللابتوب گدامة وگال ..

-عوف: عندك قبل ماتصير الحادثة بـ5 دقائق الوضع طبيعي وگدامك الكل متونس والكاميرات مشتغلة وتسجل طبيعي بعدهة طفت كل الكاميرات الخارجية للفندق من كل الجهات وما انمسح اي تسجيل بقت التسجيلات محفوظة ؟

            

              

                    

-محسوبة 

-عوف: أكيد ، لأن انطفت فعلة فاعل و انحفظ التسجيل لغاية و حتىٰ قبل ماتصير هوسة الحادث وتلتم الناس 

-مصطفىٰ: يعني سيدي بهاي الحالة دخلت أشخاص معروفة مو غريبة يگدرون يتلثمون أو يدخلون بزي مامعروف وماتطفىٰ اي كاميرا ؟ 

-جائز جداً ..

-عوف: هذا الموضوع يمي انه الي إلي أتحرىٰ وأعرفهم وأعرف منو ورة الهوسة وخبصة الناس الي صارت بس هسة سيدي الي رايدة بمساعدتك بالتخطيط لمُداهمة بدون خسائر .. 

رفعت راسي صفنت باوعت للضابط صفن بوجهة وگال ..

-شبه مستحيل تكون ماكو خسائر للأطراف بهيچ مُداهمة سيادة الرائد ؟

-عوف: ماكو مستحيل سيدي .. أريد بأقل وقت مُمكن أطلع المحروسة والقي القبض وما أخسر ولا بشر من الموجودين ..

ضحك بتعجب وگال.. 

-زين شلون ؟

-عوف: هسة أفهمك بالي مخطط إله ... 

"الباقي لا انا أعرفة ولا مصطفىٰ ينطي كلمة زيادة بأختصار انطردنا 🥳" 

*****

باوعت للساعة بـ ١٠ بالليل طلعت للصالة شفت صافنة بالسگف گعدت يمهة فزت وحچيت ..

-منار: وين راحت الحجية ؟

-رغد: نامت تعبت حيل من حالة جُمان بقت گاعدة گبالها وتتوسل بيهة تاكل لگمة لو تحچي كلمة بس ماكو فايدة 

ضحكت بحزن وحچيت ..

-منار: مو حقهة ؟ امچ گبالج وبلمحة بصر تختفي وماتعرفين مُكانهة وين وشصاير بيهة رغد اني مجرد ما أفكر گلبي ينمرد 

-رغد: هذا العراق العظيم منار من تشتغلين علىٰ فساد غيرج تتهددين وتنضرين وتوصل حتى أحيانًا تخسرين ناسج 

-منار: يقتلون ؟

-رغد: صديق عوف قتلوا بنتة بس لأن رفض يخضع ألهم 

حطيت أيدي علىٰ گلبي وشهگت ..

-منار: يمةةة 

-رغد: واتخبل لحد هسة يسولفون عليه مو بوعية من يوم الي قتلوهة وخسر مهنتة 

-منار: يمة دخيلك ربي 

-رغد: وهو بالاستخبارات وصعب كلش أحد يوصل أله لو يوصل لعائلتة بس وصلوا 

            

              

                    

بعدنة جاي نسولف وانفتح الباب عدلت حجابي بسرعة فات قاسم وفات وراه عوف ركزت بأشكالهم التعبانة و وبشرتهم المشحوب لونهة واضح عليهم التعب وقلة النوم ..

-عوف: هـآ بوية الله يساعدهم 

-رغد: الله يساعدك حبيبي 

-قاسم: شلون صارت ؟

-رغد: نفس الشيء 

وجهت نظري لعوف الي من سمع كلام رغد جر نفس وزفرة بقوة أتوجه للغرفة فتح الباب ودخل بقىٰ الباب مفتوح اتقدمنة اني ورغد وگفنة بالباب 

چانت علىٰ نفس وضعيتهة متكرفصة ولامة نفسها بالزواية وحاطة ملابس خالة علىٰ صدرها ونايمة ..

أتقرب گعد يمهة حچة بأسمهة فزت ورفعت راسها أول ماسمعت صوتة باوعت إله لثواني بچت وگالت إله بصوت مبحوح وبالگوة ينسمع ..

-جُمان: عوف 

-عوف: عينة وعينة جُماني 

بسرعة ذبت نفسهة بحضنة بقة مصدوم وجامد من حركتهة صارت تبچي وهي متعلگة بياختة ماينسمع بس صوت بچيهة ..

انعصر گلبي عصر متت عيوني دمعت من حالتهة أعرف مو بوعيهة بس أعرف تحبة وترتاح اله وعرفت بس هو الي تحچي وياه ..

حچت وهي حاطة راسهة بصدرة وتشهگ من البچي ..

-جُمان: أخذوا امي عوف أخذوها حنتوش ومديوي أخذوها مثل ما أخذوني 

تحچي وتشهگ بكل كلمة تگولهة چان منطينة ظهرة بس أسمع صوتة وهو يحچي وياهة بنبرة متروسة حنية .. 

-عوف: اشش عيناي جُمان حيلي كله انتِ لا تخليني أشوفج بهيج حالة 

-جُمان: جيب إلي أمي عوف جيبها لتخليها يمهم يخلونهة بغرفة ظلمة ويضربونهة يأذوووونهة يأذووون أمي 

حچت الكلمة وغطت وجهة بأيديها وبچت بصرريخ ، اتخببل ماخلة كلامة ماحچاها وياهة وهي تزيد بالبچي مد أيده بعد ايديها عن وجهة وگال ..

-عوف: أرجعها ألج ولحضنج وداعة عيونج باچر امج يمج جُمان وداحي الباب إذا باچر ما شفتيهة گبال عينچ ما اتسمىٰ عوف 

گال الكلام والضحكة أخذت مسراها بوجهِي ارتاحيت وشهگت من الفرحة باوعت لرغد الي مرجعهة ظهرهة علىٰ الباب وعاصرهة وجهة والدموع متكتلة بعينهة 

 وگعت الدموع من عينها وگالت بضحكة وگالت ..

-جُمان: ترجعلي أمي ؟

            

              

                    

-عوف: أقدم روحي واجيبهة الج والله 

-جُمان: أخاف سوو بيها شيء خاف أذوها 

-عوف: لا لا جُمان لا تفكرين هيج 

-جُمان: ليش أخذوها ؟ مو لزمتهم انتَ مو انسجنوا شلون لعد أخذوا امي شيردون منها بعد مو كافي الي سوو بيه 

تحچي وتشهگ وتغصغص بالكلام الي تگولة الدموع ترست ملابسهة ترس و وجهة صار أحمر..

-عوف: جُمان اروحلج فدوه كاافي مو گتلج باچر ارجعها ألج باچر امج گبال عينج بس لا تسوين هيچ بنفسج لا تأذين نفسج مو زين علىٰ گلبج 

-جُمان: أريدها 

مد أيده مسح دموعهة و مسح خدهة وعبالك جاي يتعامل وية طفلة و فعلاً وضع وحالة جُمان چان مثل الطفلة ماتعرف شنو تحچي حتىٰ بس تبچي وتشهگ ومتعلگة بياختة ماتريدة يعوفها گال إلها بهدوء ..

-عوف: مو كافي بچي ؟

-جُمان: بعد ما ابچي بس راح تجيب الي امي ؟

-عوف: اجيبهة والله 

-جُمان: بعد ما ابچي 

-عوف: وتنهضين وياي تاكلين ؟

هزت راسهة بـ الرفض گال إلها..

-عوف: لخاطري 

گال الكلمة وبچت بوجهة بسرعة اتنهد وگال ..

-عوف: يا ماي عيوني ليش تبچين جُمان حيلي باد كله گدامج 

-جُمان: عوف 

-عوف: ها يبعد رويحتة شنو تردين ؟

-جُمان: أمي هم أكلت عندها علاج ؟

حطيت أيدي علىٰ حلگي ونزلت دموعي گعدت بظهر الباب ابچي بصمت متت وانتهيت أريد دموعي تسكت ماكو موتتني جُمان موتني وضعهة 

ماگدر اوصف شعوري واني اشوفهة هيج بس روحي انمردت مرد .. صدمتهة وخوفهة كُله يذكرني بكلامهة من چانت توصفلي حالتهة والي مرت بيه من انخطفت 

حسيت كل شيء رجع عليها كل شيء صار إلها جاي تتخيلة يصير وي أمها والأسوء أنُ هي متخيلة نفسهم رجعوا خطفوا خالة أمل 

مسحت وجهي من شفتة لازم أيدها وطلعهة من الغرفة بس تمشي بالگوة وهو لازمهة خفت يصير شيء رحت وراهم وگفهة يم المغسلة فتح المي وغسل إلها وجهة مرتين 

أشر الي علىٰ الخاولي بسرعة رحت انطيته اله اخذه نشف الها وجَهة وأيديها ..

            

              

                    

-عوف: شنو تردين أسوي الج ؟ اكلة تحبينهة تاكلينهة ؟

-جُمان: ماريد شيء

-عوف: مايصير شنو أتفقنا قبل شوية ؟

اتنهَدت وبقت تباوعلة وگالت ..

-جُمان: أريد مخلمة بيض وطماطة

-عوف: أختيار موفق أسويها واخليج تاكلين اصابعج وراها اليوم يلة للمطبخ گدامي

ضحكت بخفة وأخذها دخلت للمطبخ گعدهة علىٰ الكُرسي وطلع الطماطة والبيض والطاوة وگعد يسولف وياهة ويكسر بالبيض ..

اجت رغد بأيدهة كاسات مي شافتة أبتسمت وگالت ..

-رغد: لو ندري من زمان جايبين عوف وطالعين من الموضوع احنَة أثاري احنة لا نقدم ولا نأخر 

-منار: بكثر مانقهرت وانعصر گلبي بگد ما فرحانة وأني أشوف تعاملة وياهة وشلون تستجيب إله عبالك أب وبنتة ..

-رغد: هذا أسلوب عوف مو وي اي شخص جُمان عندة لا تصعد ولا تنزل للأسف أكتشافي لهلشيء متأخر بس ماشفت أخوي يحب أحد ويهتم أله بكثرهة ..

ألتفت إلها وحچيت ..

-منار: صحيح الي گالة عوف رغد ؟ صدگ باجر ترجع خالة أمل ؟

رفعت أكتافها بعدم معرفة وگالت ..

-رغد: ماعرف منار بس عوف مايحچي حچاية مو گدها وحسب الي عرفتة من قاسم أنُ هاي القضية حَتىٰ استخبارات من بغداد اتدخلوا بيها يعني عوف ما سكت ولا ترك الموضوع لحظة 

كملت كلامهة وهي تباوع إله ..

-رغد: من أمس مانايم لليوم شوفي وجهة شلون تعبان وعيونة شلون صايرة حمر من التعب ومامهتم لتعبة لخاطرهة 

-منار: ألي يهون هذا الموضوع ..

-رغد: مادام گال باچر ترجع يعني عندهم شيء راح يصير باچر 

-منار: ما أعرف ليش من أسمع هيج أخاف وصرت أخاف بالزايد من صارت سالفة الخطف صرت أتخيل كلشي وما أستبعد اي شيء يجي ويخطر ببالي .

جاي نحچي وفات قاسم طبگ الباب بصوت قوي صفنت يمتىٰ طلع ؟ مو قبل شَوية اجة وي عوف ؟ باوعت لأيدة بيها أوراق باوعلي وفات للغرفة 

فرت فور من شفتة هيچ شبي عالسني ؟ حتى مايحچي وياي بسرعة رحت وراه دخلت للغرفة وطبگت الباب حيل چان جاي يطلع ملابس أله من الكنتور ألتفت باوعلي وشح نظرة 

            

              

                    

-منار: شبيييك أستاذ قاسم شبيييك ؟ 

ماجاوبني فتحت عيوني علىٰ وسعهن رحت وگفت گبالة وحچيت ..

-منار: مو جاااي احچييي ويااااك ؟؟؟

اتنهد وگال ..

-قاسم: بوية شتردين 

-منار: ليش متجاوبني من احچي وياك ؟؟

-قاسم: حتى ماتچفصين زيادة

-منار: اچفص ؟ هسة صرت اچفص لأن محترگ گلبي علىٰ ام صديقتي ؟ 

سد باب الكنتور وحط عينة بعيني وگال 

-قاسم: وياهو مامحترگ كلبة من الي صار ؟ ياهو مرتاح ؟ ياهو شايف الراحة شايفتنة ساكتين منار ؟ 

-منار: مو هيچ قصدي أعرف ماساكتين عن شيء 

-قاسم: چا شنو قصدج بعد روحي ؟

صفنت بوجهة وبلعت ريگ ماجاي افتهم تصرفاتي وشبيه ..

-قاسم: صايرة رعنة 

-منار: ميخالف 

-قاسم: بس عاذرج أعرف الموقف الي انتِ بيه شنو خلاج تحسين 

-منار: والله ؟

-قاسم: اي 

اخذت نفس وگلت اله ..

-منار: عوف گال لجُمان باچر امج ترجع لحضنج 

رجع فتح الكنتور وماعرف شنو جاي يبحوش بيه ..

-قاسم: اي 

-منار: شنو اي ؟ شلون يعني باچر ترجع شراح تسوون ؟

-قاسم: ليش بعد روحي اذا اگلج شراح نسوي شتسوين مثلاً ؟

-منار: ماسوي شيء بس ريح گلبي ليش كل مرة من احچي وياك متحچيلي شيء وتخليني بين نارين بسبب هاي ردودك اني افور واتخببل قاسم من حقي أعرف 

-قاسم: ولچ بوية مو كل شيء ينحچي وماتستفادين شيء إذا عرفتي 

-منار: ميخالف احچيلي خلي أعرف باچر شراح يصير 

-قاسم: تؤ تؤ نمنموم ممنوع

شگد حچيت وياه شگد لحيت وگعت وذرة من لساني فحطت وتعبت وماكو فايدة ماجاوب علىٰ اي شيء مينطيني اي رد ..

أخذت نفس بللت شفتي شفتة گعد بالگاع وفتح الحاسبة گعدت گدامة وگلت اله..

-منار: تدري جُمان عبالها الي عندهم خالة أمل نفسهم الي خطفوهة 

رفع راسة باوع الي بحيرة وگال بتنهيدة ..

-قاسم: أذاني وضعهة اليَوم 

-منار: لزمت عوف وتگُله راح يأذونها مثل ما أذوني راح يضربونهة 

-قاسم: استغفر الله

-منار: إذا عرفت الموضوع كله مو مثل ماهية متوقعتة شنو راح تسوي والأكبر من هذا بعدنة مستمرين دنكذب عليها عينك عينك مدننكر ولا نحچي الحقيقة ؟

كملت كلامي وحسيت غصة صارت ببعلومي ..

-منار: بحياتي متوقعت بفد يوم راح أصير بهيچ موقف أعرف كُل شيء سمعت وسكتت اباوع بعيونهة وأشوف حالتهة وشلون خايفة وما أتجرأ اگلها هذول مو نفس العصابة الي خطفتج هذول غيرهم وغايتهم شيء ثاني 

-قاسم: اذا گلتي إلها هذا الشيء وهية بهلوضع راح يتفاقم الموضوع راح تكره عوف وتحسة هو سبب كل شيء خصوصاً جُمان عندها أمها الهوىٰ الي يصعد وينزل راح تشوف الموضوع من زواية مختلفة تماماً وهية بهذا الوضع 

حطيت أيدي علىٰ وجهي وحچيت بحيرة ..

-منار: أعرف ولهلسبب ساكتة بس جاي أحس ثقل علىٰ گلبي من اباوع الها وهي تفكر هيج انقهرر اموت بس شلون وبيا طريقة راح اگدر اگلهة الي خطفوا امچ مو نفسهم الي تفكرين بيهم الي خطفوا أمج عصابة ثانية إلهم ثأر وي عوف وبسببة انخطفت خالة أمل وبسببهم احترگ بيتكم وانتِ متعرفين بشيء 

كملت كلامي وماسمع غير صوت شيء وگع و أنكسر بباب غرفتي نغزني گلبي رجف جسمي باوعلي قاسم ونهض بسرعة ونهضت وراه فتح الباب باوعت صرت ارمَش بعدم استعياب من شفت جُمان واگفة بالباب تباوع بصدمة وعيونهة تصب دموع و الگاع متروسة گزاز ...

الفصل الاربعون من هنا