رواية جثة الوريث الفصل الثالث بقلم محمود الأمين
_ انا لاحظت ان الست فوزيه بتاخد جرعات زياده من علاج الزهايمر، وده طبعا غلط ولما ابنها تواصل معايا وقالى انها بدات تعمل حاجات غريبه وانها بتضر الناس اللي في البيت، اتاكدت ان العلاج الزياده ده عمل خلل في خلايا المخ، وخلاها مش متزنه
بس انا لما قولت الكلام ده للاستاذ كريم اللي تواصل معايا وقتها، قال انهم المسؤولين عن العلاج اللي بتاخده وان مستحيل ده يحصل
= طيب والتغير ده يا دكتور، يعني ممكن حضرتك تقولي امتى حضرتك اكتشفت ده؟
_ من شهرين تقريبا.. قبل وفاه الاستاذ سمير وانا حاولت اتواصل معاه كتير بس كل مره كان بيرد عليا الاستاذ كريم، ولما حاولت اكلم الاستاذ سمير على الشخصي مكنش بيرد علي وعرفت انه مشغول في الشركه الحاج سليم
= تمام يا دكتور.. انا بشكرك جداً انك جيت وشهدت الشهاده دي، وصدقني هي هتفرق معانا جداً في التحقيقات
....
مشي الدكتور شريف، وانا عرفت ان ممكن فعلاً عزيزه الخدامة تكون شافت الست فوزيه وهي بتكتم نفس سيف بالمخده، بعد كلام الدكتور اللي اكد ان الست فوزيه كانت بتاخد جرعات زياده من علاج الزهايمر، وده خلى عندها خلل في المخ وبتتصرف بشكل مش طبيعي
وبكده انا متاكد ان حد من عيال الحاج سليم هو اللي ورا كل اللي بيحصل.. بس يا ترى عمر ولا كريم.. ولا الاتنين مشتركين مع بعض؟
كنت عاوز اسمع باقي كلام عزيزة ولكن قررت اني اسمع الاول من عمر وكريم.. وخليت العسكري يدخلهم المكتب تاني
واول ما دخلوا المكتب.. وجهت كلامي للاستاذ كريم اللي ساكت من بداية التحقيقات
_ استاذ كريم.. حضرتك ساكت والاستاذ عمر هو اللي واخد الكلام كله، فانا عاوزك معايا كده في الكلام اللي جاي عشان افهم بس ايه اللي حصل بالظبط
= عمر اخويا الكبير، وعشان كده انا سايبه يتكلم بالنيابه عني بس لو حضرتك عاوزني اتكلم، تمام انا تحت امرك
_ تعرف الراجل اللي كان لسه عندي وخرج ده؟!
= ايوه اعرفه، ده الدكتور شريف اللي بيعالج والدتي من الزهايمر وهو المسؤول عن حالتها
_ عظيم يا استاذ كريم.. اهو الدكتور شريف ده بقى بيقول ان والدتكم كانت بتاخد جرعات زياده من علاج الزهايمر، وده عمل عندها خلل في المخ، وكل التصرفات اللي كانت بتحصل خلال الشهور اللي فاتت، كانت بتحصل بسبب الجرعات الزياده من العلاج
وهنا رد الاستاذ عمر وقال
= مستحيل يا فندم.. احنا عندنا في البيت اللي متابع حالة والدتي كويس وبيديها العلاج اول باول.. ومستحيل تأذيها، دي بتعاملها زي والدتها بالظبط
_ تقصد مين يا استاذ عمر؟!
= مرات اخويا.. سلمى وهي اصلا دكتورة، وكانت بتحضر ماجستير بره لما كانوا مسافرين هي وكريم
_ يعني مدام سلمى هي المسؤوله عن العلاج اللي بتاخده الست والدتك مش كده؟
= ايوه يا فندم
....
طلبت منهم ينتظروا بره.. ودخلت عزيزة الخدامه عشان اسمع منها باقي الشهادة
وقولتلها
_انتي قولتي كلام مهم.. ان الاستاذ سمير اللي توفى من شهر واللي هو والد سيف مات مقتول.. رغم ان التحريات اللي عندي بتقول ان هو مات في حادثة.. فانا عاوزك واحده واحده وتحكي ايه اللي حصل
= انا هقول اللي سمعته بودني يا باشا، ومحدش يعرف اني سمعته، خوفت اتكلم يحصلي حاجة.. دي ناس بتعمل كده في اللي منها، اومال هيعملوا فيا انا ايه؟
من يوم ما رجع الاستاذ كريم ومراته والدنيا اتغيرت، وعشان اكون صريحه الحاج كان بيعامل سمير احسن معامله بس عشان سمير هو اللي كان شايل الشغل كله، وعمر كان بيساعد ولكن مش بنفس اللي بيعملوا سمير.. لكن كريم كان مش بيتكلم مع الحاج والحاج مش بيتكلم معاه، ولو اتكلم معاه دايما بيحرجه قدام مراته وبنته، وشخصيه كريم كانت ضعيفه يا باشا، مكنش بيعرف يرد وده كان بيضايق مدام سلمى مراته
لحد ما في يوم الاستاذ سمير كان رايح بالعربية بتاعته اسكندرية ولكن العربيه كانت عطلانه، فاتصل الاستاذ كريم بواحد يجي يصلح عربيه الاستاذ سمير.. ويومها سمعتها وهي بتتفق مع جوزها ان الراجل اللي جاي ده هيقطع الفرامل بتاعة العربية
سمعت مدام سلمى وهي بتتفق مع الاستاذ كريم.. اللي كان رافض على فكره وقال لا ولكن كالعاده سمع كلامها
وبعد ما اتحرك الاستاذ سمير بالعربية ومفيش نص ساعة، وصلنا خبر انه عمل حادثه واتنقل للمستشفى وللاسف مات، قبل ما اهله يوصلوا المستشفى.. العربية اتقلبت بيه
_انتي متأكدة من كلامك ده؟.. لو طلعتي بتكدبي عليا او مخبية حاجة هزعلك يا عزيزة
=والله يباشا.. اللي بقوله لحضرتك هي الحقيقة
....
بعد ما سمعت كلام عزيزة.. طلبت من العسكري يدخل مدام سلمى لوحدها عشان احقق معاها
_ مدام سلمى.. حضرتك كنتي المسؤولة عن العلاج اللي بتاخده الست فوزيه حماتك مش كده؟
= ايوه يا باشا.. انا فعلا اللي كنت مسؤولة عن العلاج
_ طيب تمام اوي.. انتي كنتي بتدي جرعات زيادة من العلاج للست فوزية وده اللي خلاها مش متزنه في الايام الاخيرة وبتعمل تصرفات غريبة
= الكلام ده محصلش.. انا بديها الجرعه بتاعتها بالظبط
_ طيب سؤال تاني.. مين اللي جاب الميكانيكي اللي صلح العربيه بتاعه الاستاذ سمير يوم وفاته؟!
= على ما اتذكر يعني جوزي كريم، ايوه هو اللي جاب الميكانيكي
_ الميكانيكي اللي قطع الفرامل واللي اتسببت في وفاه الاستاذ سمير بالاتفاق معاكي انتي وجوزك.. وقبل ما تقولي محصلش.. الراجل دلوقتي في القسم بيتحقق معاه، والظابط لسه مكلمني من هناك والراجل اعترف عليكي انتي وجوزك.. فالاحسن ليكي تعترفي بكل حاجه وصدقيني لو اعترفتي ده بيخفف من عليكي وجايز الحكم يتخفف
= ايوه انا اللي عملت كده، انا اللي زودت جرعه العلاج، وانا اللي خليت كريم يتفق مع الميكانيكي على قطع الفرامل، وانا اللي قتلت الحاج سليم الصياد.. انا اللي عملت كل حاجه يا باشا
_ لا واحده واحده كده واحكي من البداية.. ده اعتراف خطير ده، احكي وانا سامعك
= طول عمره بيفرق ما بين عياله، اللي يشتغل في الشركة يبقى ابنه وياخد الفلوس اللي هو عاوزها ويتبسط، واللي عنده حلم بعيد عن المملكه بتاعته.. يبقى مش كويس ويتعامل معامله وحشه ويتذل قدام مراته وبنته.. من قبل ما نسافر انا وكريم ومعامله الحاج سليم وحشة.. ودائما بيعامل كريم على انه قليل
سمير كان هو اللي على الحجر كانت بتتحققله الحاجه من قبل ما يفكر فيها، وعمر عرف اللعبة ماشية ازاي وقرر يدخل هو كمان تحت جناح ابوه واشتغل في الشركة، لكن الحاج سليم كان عارف ان عمر بيعمل كل ده عشان الفلوس، مش عشان بيحب ابوه وبيحب الشغل
ولما سافرنا انا وكريم وخلفت البنت لقيته بيحن لاهله وعاوز يرجع كنت رافضه بس لما صمم ورجعنا.. لقيت حماتي عندها زهايمر كانت مقرفة وبتعمل تصرفات تضايق وانا مش مضطرة استحمل ده، لا وايه انا كمان المسؤوله عن علاجها.. وكنت عارفه ان زياده الجرعة هتأذيها ولما عملت كده فعلاً.. كانت هتولع في البيت وده اللي خلي عمر وكريم يدخلوها دار رعاية ولكن الحاج سليم خرجها، وبعدها بكام يوم سمعت سمير وهو بيتكلم مع ابوه وانه رافض موضوع انه يكتبله كل حاجة، كنت هتجنن لما سمعت كده وطلبت من كريم يتصرف ولكن كالعاده جبان ولما جات الفرصة الميكانيكي يقطع الفرامل واللي عاوزاه حصل ومات سمير
لحد اليوم الاسود اللي اجتمع بينا واعلن عن الوصيه.. واللي اتفاجئنا كلنا انه كاتب كل حاجه باسم سيف ابن سمير كانه عارف ان احنا اللي عملنا كده في ابنه؟
ويومها بحثت عن كذا نوع سم لحد ما وصلت لسم الزرنيخ وعرفت بيستخدم ازاي؟!.. واستغليت اليوم اللي عزيزه الخدامه فيه هي اللي بتعمل الاكل.. وحطيت في طبق سيف نسبة كبيرة من السم
ولكن اللي حصل من الست فوزية خدمنا كلنا وخلانا نتهمها ان هي اللي عملت كده، ودي حاجه حصلت بالصدفه انا مكنتش مخططه لده اصلا
واللي خدمنا اكتر هو اللي حصل من المحامي الاستاذ سامي اللي رفض يطاوع الحاج في اللي هو عاوزه، مش عشان بيحبنا ولا خايف علينا عشان ابوه الاستاذ وجدي كان ليه نسبه في الشركة، وسامي كان فاكر ان الحاج هيعوضه، وبعد ما مشي الاستاذ سامي دخلت انا على الحاج سليم واول ما شافني اتكلم وقال
_انتي ايه اللي دخلك هنا؟.. واللي انتي ماسكاه في ايدك ده؟
= انا نفسي اسالك سؤال وتجاوبني عليه.. ليه بتعمل في ولادك كده، ليه بتعامل كريم كده؟ هو ابنك زيهم على فكرة، ليه دايما مميز سمير عنهم.. وحتى لما سمير مات كنت عاوز تكتب كل حاجه باسم ابنه وتحرم باقي عيالك من الميراث.. ولما مات عاوز توزع الورث على الجمعيات الخيرية.. ليه كل ده؟
_انتي جايه تعدلي عليا يا جربوعه انتي، وتقوليلي اعمل ايه ومعملش ايه، فلوسي وانا حر اوديها مطرح ما انا عاوز، واه انا مش بحب كريم عشان جبان ودلدول وانا عارف ان انتي اللي ممشياه، وزمان اتجوزك غصب عني.. انا مكنتش عاوزك تكوني مراته بس تعملي ايه هو طول عمره بيحب الرمه اللي شبهوا
=ياااه.. للدرجة دي بتكرهني
_ ايوه بكرهك.. واتفضلي اطلعي بره بقى عشان ورايا حاجات عاوز اخلصها، ويا ريت تاخدي جوزك وبنتك وتسافروا مره تانية، انا مش عاوزكم في بيتي
...
كلامه كان كله كره وغل من ناحيتنا كان معايا حبل خشن في ايدي وانا من البدايه داخله وعارفه انا هعمل ايه، قربت ناحيته وهو باصص في الورق ولما اخد باله اني بقرب من الكرسي كان هيزعق ولكن قبل ما يتكلم كنت لفيت الحبل حوالين رقبته حاول يخلص نفسه فزقيت ايده اللي اتخبطت في المكتب وضفره اتكسر.. كان بيحاول يمسك اي حاجه يضربني بيها وقدر يمسك فنجان القهوه ولكن وقع منه والسر الالهي طلع.. وخرجت من الاوضه براحه زي ما دخلت.. وبعدها كلنا جرينا مع صوت صرخه عزيزة الخدامة.. اللي كانت تاخد فنجان القهوه الفاضي ووقتها شافت المنظر
خلصت كلامها وانا مش مصدق ان في شخص بالجحود اللي عندها ده، كل ده كره وحقد وغل جوه بني ادم، ممكن الحاج سليم يكون ظلم ابنه اه..بس معقول توصل لكل ده؟!
...
الاستاذ كريم ومدام سلمى اتحولوا للمحكمة.. والميكانيكي اللي انا ضحكت على مدام سلمى وقولتلها انه اتقبض عليه واعترف لما اتحرينا عنه وعرفنا انه توفى قريب بجلطه في المخ
المحكمه لسه محكمتش على الاتنين.. ولكن كل المحامين بيقولوا ان سلمى هتاخد اعدام.. وكريم ممكن ياخد 15 سنة وممكن القاضي يعتبروا انه شريك ومحرض في جريمة قتل سمير وياخد اعدام هو كمان
لو انت القاضي هتحكم عليهم بايه؟.. وهل شايف ان الظلم اللي تعرضله كريم ممكن يوصل البني ادم انه يقتل؟
...
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
