رواية دموع خرساء الفصل الثالث 3 بقلم ورود الخالدي

ماجد::

مدري شلون غمضت عيوني وغفيت كعدت الفجر انه متعود اكعد من وكت حتى اذا مانمت  من وكت طلعت من غرفتي لكيت امي كاعدة..و بحضنها نويرة بتي ..دنكت وشلتها احبحب بيها صح بعدها زغيرة وماتحجي بس وكحة ..ماتخلي شي بمجانه ..من طلكت لليوم هي تنام بحضن امي حسبالها امها الماصدكت اطلكت كبل ذبتها وراحت عرست..اي عود تحرك كلبي حسبالها انه اهتم لو بعد الها ابالي مجان..المرة التتجاوز على امي وعلى ابوي ماالها مجان لابكلبي ولا ابيتي..امي صاحت على مرت حامد:

وين صار الجاي شني طلع باجة مو جاي..

اي عمه خلصت غير..مذلله العين حتى يصير طيب..

شني مخدرته على عود شخاط انتي. !!

شويه وامي كالت..

مو اسمع الباب تندك..

مرت حامد كالت:

ماسمعته لو احد يدك جا دك الجرص؟؟

ولج ياجرص غير الكهرباء طافيه من  امس. 

هااا صدك..

اي والله الباب تندك مني جاي من الفجر..يمكن احد من كرابة المرة البلديوانية..

انه طلعت امشي بالممر افكر ..يصير ابو زهره هذا اي يمكن هو..فتحت الباب ولنه راضي ابن صيهود سلم عليه ردت اكله تفضل تذكرت المرة بالديوانيه ..فتت بسرعة دكيت الباب..عليهن :

خويه ام غادة كاعدات..لولا.؟؟

بسرعة فكت الباب. 

كاعدات خاله..

من رخصتج..فوتن جوه..يم الحجية..وادم جاية علينا..

اي خالة دقيقتين..

فتت جوة كلت لامي:

يمه همن اديجن كومن لمن غراض الديوانيه هذا راضي ابن صيهود جاي على ابوي..

طمام عار شعده من الصبح بس المبربتات من وراهم..

وراحت هي ومرت حامد انه ضليت بالباب اسولف عليه شفتهن طلعن كتله تفضل..

فتنا جوه وره شويه اجه ابوي ضلو يسولفون طلع متعارك ويه ابو ويريد يطلع منهم وصاير مصايح ويريد ابوي يدخل..ابوي كالة..انه امرلكم بعد شوي..وطلع الزلمة فتت جوه لكيت امي ومرت حامد وام غادة وبناتها بالمطبخ كلهن كاعدات يشربن جاي بس غاده دايره وجهها ع الطباخ مدري ليش...فكلت لمرت حامد:

ام زيد ابوي بالديوانية ..هناك وديلة الريوك..

اي..صار..

بعدني ما طالع من المطبخ..سمعت..امي تحجي ويه ام غادة..

خيتي حاجيها خلها تتريك عيونها راحت من البجي ..شنسويله حيوان ومات من البرد..

التفتت..

شني المات يمه؟؟

خطية البلبل مالتها مات نص الليل..

مات نص الليل؟؟

امها كالت :

اي خاله هي جانت مكابلته..تشوفه يرجف ابد مانامت ..حتى طلعته من القفص دنته يم الصوبه .حتى ادفيه.مافاد مات بديها ومن الليل لهسه مكابلته ودموعها يصبن خطية مربيته من جان لحيمي 

من رخصتج خاله انه احاجيها..

رحت يمها..

غادة خويه شو شيلي راسج حاجيني 

شالت راسها ..عوينة ابو اصلي عيونها..رايحات من البواجي..كتلها..

شني راح تضلين تبجين ارواح بشر راحت محد بجه عليها..وهذا طير مااتحمل استبرد ومات وانتي بنيه جبيرة وتفتهمين صدك جذب..عيونج مورمات من البجي افه عليج خوية..

عود اني اريد اهدي عليها..شو هاي رأسا جرن عيونها اكثر ماتحملت اكابل عيونها الحلوات بساع كمت من يمها

كلت لامها..

خويه..انه..وابوي رايحين لبيت ابو زهرة نسولف عليه وانشالله خير..

والله خاله مراح تاخذون منه لاحق ولاباطل..

حك العلينه نروح ونسوي الصح..واذا ما اجه للدرب ذاك الوكت احنه نتصرف..

بكيفكم خاله

طلعت من يمهن تريكت انه وابوي وكبل على ييت ابو زهرة..كعدنا بالديوانيه مالته ابوي بده..

الله بالخير..

الله بالخير والعافيه ياهله وميه هله بابو راشد..

وبالمهلي ابوزهرة..يجوز مستغرب جيتنا من زمان مامتواصلين من اهد فاتحة المرحوم..

اي والله انه هم ملتهي وما احظر فواتح الوادم حتى نتلاكة ياخذني الليل ويجيبني الليل اي هي هاي الدنيا..

افوت بسالفتي كبل حتى ما..يطول الحجي..انه جاي بخصوص مرت اخوك رحيم وبناتها..

شبيه مرت رحيم..

اكيد ماتدري شبيها..لان ماتمر عليها ..ولا تجي على بالك؟؟

ابو راشد تره انه سويت العليه وزايد

شلت فاتحة اخوي..على اربعة وعشرين حباية وجبتهن يمي معززات مكرمات..

انت جبتهن لو هنه اجنك من العوز؟؟

ادري بيها..مرت رحيم حلسه ملسه..مثل الحيه واكيد فرت راسك بالحجي عمي كفيلك الحسين شلناهن على روسنا. 

لا تحلف بالحسين انه ماجاي احلفك وما الي سلطة احلفك انه جاي اكلك بنات رحيم بزرك..وعيبه بحقك..الصار بيهن..

عيبه شني ليش هنه شمسويات..كلي واروح اذبحهن وعلي؟؟

شني تذبحن ..شمسويات هنه يعني فوك الضيم العايشات بيه..انت عندك علم عنهن شكلن اشربن..اشلبسن ويامن طلعن..مني يصرف عليهن..عندك علم امس الحوش طاح على روسهن وامهن تركض بالمطر تفزع بالوادم؟؟

يطبهن مرض جانن يمي مدللات..هنه جسحن نعمتهن ..امهن تحاسبني على حلالي وتريد مني ملايين..انه منيلي بويه بركبتي كوم لحم..وانه عظم واحد لاعندي اخو ولا ابن جبير يشيل حملي..عني..كعدهن يمي ياكلن ويشربن حالهن حال بناتي وماحجيت..يوميه طالعة بفلم..بناتي تفشخن بناتي انضربن..مرتك تكتل بناتي ..وبناتك يغافلني ويكتلن بتي الخرسه..انت تصدك بكالات النسوان هاي التهجم بيوت..؟؟؟

ابو زهرة خصم الحجي. الراح راح واحنه ولد اليوم..كتلك بيتهن طاح على روسهن..انت بكيفك اجيبهن يمك بينما تعدل حوشهن..لو..

بعده ابوي مامكمل حجي هو كطع كلامة:

اعدل حوشهن شني هنه منيلهن حوش..هذا حوش ابوي..وزين مني مكعدهن بيه وخاف حسبالك رحيم اله حصه تره رحيم باع حصته من كاع ابوي وحته هذا الحوش الكاعدات بيه هم باعة وانه حطيت العندي والماعندي حتى الم فلوس واشتريتهن مضاعف من بيت دغفل..هسه يردني ابنيلهن حوش عمي تره انه كلشي ما عندي لافلس ولاعانه كوه معيش عيالي..

وهسه الحل شني..؟؟

ماعندي حل خلهن يردن لبغداد لخالاتهن المعدلات وهناك يعيشن..انه ماعندي ابنيلهن حوش..

اهيس حجيه مثل الجيلات بكلبي فكلت لابوي :

من رخصتك بويه..

اي بويه كول..

خزرته..وكتله..

ابو زهرة..هسه شني..مشكلتك..فلوس البنيان يعني؟؟

اي فلوس البنيان عمي ماعندي منين اجيب ابوك لو اسلب انه..!!!!

سهله هاي احنه نعدل حوشهن..اذا..انت شايل ايدك منهن؟؟

تعدلون الحوش تفلشونه شلي لازم انه..عمي ماعليه بيهن رحيم ومات..وحتى من جان عدل مابيه لافود ولانفع عليه..اسمه..اخو وبس..

هاي هيه..يله بويه حك العلينه سويناه..

ابوي كام هو..ادنه..يم ابوي كاله:

ماتطلع غداك يمي..

ابوي شاف وجهي انكلب منه بساع لزم ايدي يدري بيه ساعة الساعة اهفه طراك..اخرب وجهه..فكالة..

مستعجلين..نتغدة يمك عالجايات..

وطلعنا من يمه.. بس صعدت السياره ابوي كال:

شبيك وجهك يتكالب شني تريد اطك الزلمة ابيته..يواشك يبويه..شفته شلون..يبجي اباب العباس يصيح ماعندي وهو ياكل مال الله ومال عبادة..,!!!!!!!

بويه لو مخليني افوخ كلبي بيه

اي حتى يكول داسو بساطي وطكوني ونصير مكصة للوادم..

بويه حرك كلبي..

ميخالف ..بعد ابوك حك العلينه سويناه..احنا نعدل حوشهن في سبيل الله..ونشوف زايدتهن وناكصتهن..

بكيفك بويه..

اكلك امشنا لبيت  صيهود خلنه نشوف سالفته ويه راضي

بويه اوصلك الهم انه اريد امر للسوك نص ساعة وارد عليك

شعندك بالسوك من الصبح..

بويه اريد اروح اشتري بلبل لهاي البت الخرسه خطية طيرها مات ومن امس تبجي عليه..

ابوي طكها بضحكه:

هههههههه..هابويه لعبت. !!؟؟؟؟؟؟؟؟؟

شني لعبت بويه.؟؟!!!.لا يروح بالك بعيد انت تعرفني كلش زين..ماعندي هالسوالف...بس بويه خطية كسرت خاطري تفرفح جنها فرخه جاهله..دموعها يصبن هيج بلا حس؟؟

ههههه...كلبك رجيج يبعد ابوك..بس هي تكسر خاطرك وهاي هيه؟؟؟؟!!!!

اي بويه جا قابل شني يعني؟؟

بويه..مو بت ..تسودن هذا عمري الطويل ماشفت بت بهالحسن...الله يستر عليها وروح اخوك راشد لو مو خرسه من الصبح ازفها الك..

شالسالفه بويه..بساع تزفها الي.

كتلك لوماخرسه...بس ياحيف خرسه خطية..

هسه شني اخذك لبيت صيهود

اي بويه..بس لاتتعطل علية تره مالي خلك وانت تعرفه صيهود هرميل ويورم راسي بهرملته

صار بويه

وصلت ابوي لبيت صيهود ورحت للسوك مال الطيور دورت على بلابل لكيت اشكال..حرت شجيبلها اذا اجيبهن كبار..خاف ماتريدهن لان مامعلمات عليها واذا اجيبهن لحيميات خاف يموتن عدها وهم تضل تفرفح باوعت لكيت زوج توه بيضهن مفكس كلت اي اشتريهن امهن وياهن هم تزقهن وهم تربيهن غادة وتعلمهن عليها..

خليت البلابل بالسيارة..ورحت لابوي جبته من بيت صيهود ورديت فتت للهول كلهن كاعدا بالصالة واسمع امي تسولف ويه حامدبالتليفون:

ليش يعطلوك اسبوعين..

ابوي اخذ منها التليفون وكام يحجي ويا ومن حجيهم عرفت حامد وحدته متحركة وراح ينزل بعد اسبوعين..همه يسولفون وانه ادور عليها بعيوني..ماهيه يمهن..بس ام غادة وبناتها التوم كاعدات..ابوي خلص من التليفون واطا لامي وكعد يسولف ويه ام غادة:

بويه ابو زهرة شايل ايده منجن بس ..لاتشيلين هم..انتي حوشجن نعدله ونرتبه وانتن ضلن هنا يمنه معززات مكرمات منا لما يخلص..حوشجن وتردن..ومناك وغادي اي شي تردنه ماترحن لامنا ولا منا..انه متكفل بيجن..

والنعم منك حجي....الله يرزقك ويجزيك خير الجزاء..

عفتهم يسولفون رحت للمطبخ مالكيتها وين كاعدة ما ادري شو ماهيه بالحوش. كله..كلت خاف بالديوانيه راحت نامت لان..ما نايمه من امس..كلت اروح اجيب البلابل جوه ومن تكعد انطيهن الها..طلعت جبتهن بعدني ..امشي بالدرب..شفت باب الديوانيه مفتوح ومن بعيد شفتها كاعدة مكابلة القفص بيه الطير الميت..كلت خلني اخذلها القفص افرحها..وصلت الباب الديوانيه دكيتها وفتت بيدي القفص هي شافتني وشافت القفص بيدي بس ردت تباوع ع قفصها ادنيت كعدت يمها تبسمت كتلها:

شوفي شلون بلابل حلوات جبتلج

ما شالت راسها..

ادنيت جريت القفص اليمها وخليت القفص الجبته كتلها:

شوفي غادة خويه هذا البلبل مات بجيتي لو مابجيتي بعد مايرد شني البجي قابل يرجع الموته..شو شيلي راسج شوفي هاي الصوره المعلكة

..شالت راسها ورجعت باوعتلي حسبالك تكلي شبيها الصورة كتلها:

شوفي هذا..الولد الشاب..البصوره شوفي شلون بطل..هذا اخوي راشد الله يرحمه استشهد..يعني مات وراح عن الدنيا.. انه بجيت وامي بجت وابوي لهسه يبجي كلنا بجينا بس راح..بعد مارد..البجي ما يرجع الراح..وانتي اذا بجيتي عيونج الحلوات ذني يتعبن..وتتمرضين..وكلشي ماتحصلين بس القهر..هذا البلبل المات راح ادفنه..وذني البلابل جبتهن الج هنه وامهن..وابوهن انتي ربيهن وعلميهن عليج..يكومن يحبنج..ويكبرن بايدج..

باوعتلي يمكن دقيقة هي تباوع بعيوني حسبالك تريد تقنع روحها بحجيي..انه روحي راحت..ماجني بهالدنيا..صفنتها بعيوني تذبح ذبح  من يمي دنكت واستحيت من عيونها..

دنيت القفص يمها وكتلها..

شوفيهن حلوات وقويات...مايموتن بساع بس ديري بالج عليهن..

فرحت من مدت ايدها ع القفص رادت تفتح الباب كتلها::

لا..لا..مو هسه تفتحين الباب خلهن يتعلمن ع المجان لان وكحات ومستغربات هسه..هنه عدهن اكل يوم يومين وطلعي بس افراخهن علميهن شويه شويه عليج..لان امهن قويه بساع تشرد منج بس تكضينها..

هزت راسها..يعني اي..

هي التهت بيهن وانه شلت القفص ردت اطلع من يمها توني مشيت خطوتين اجت ركض وكفت كبالي شفتها تبسمت..مدري شتحجي بعيونها..

ها غادة ما اعرف شتردين تكولين..

تبسمت اشرت عليه..

شبيه انه ليش تأشرين عليه..

النوب اشرت علي روحها وعليه وتبسمت ..اشتعل ابوي اشتعل جدي اشتعلو اجدادي كلهم من سابع ظهر..شني هاي البسمه..العلى شفتها شتريد تكلي..حرت بيها مدري بشفتها مدري ..ابسمتها..دنكت احس كصتي تصب عرك..من المستحة كتلها:

خويه ما اعرف شتردين تكولين..

رجعت اشرت عليه وع القفص وعليها يمكن افتهمت كتلها..

شني يعني تتشكرين مني على مود البلابل..

هزت راسها...يعني اي..

كتلها.

لا تشكريني ولا شي شالسالفه مايسون..شكر..وشتريدن اطلبي مني انه مثل اخوج الجبير..

هزت راسها..يعني اي..

عفتها وطلعت بساع كلبي يركض..ووجهي..يمطر عركان وحالتي حالة..جني راكض من الكوت للحلة..🤭🤭🤭🤗🤗🤗

رجعت كعدت يم ابوي  بعدهم يسولفون عالبيت والبنيان اشوف مرت حامد كلبت جهرتها..وفاتت للمطبخ..هاي شبيها....من خلص ابوي حجي فات لغرفته اسمع مرت حامد ادردم..

شو عمي يبني بيوت للوادم الغرب ومن كاله حامد اريد.. ابني غرفة من برة بصف غرفتي للفروخ ينامون بيها مارضة..يكول الحوش يخرب وهاي صرفيات زايده

امي كالت:

شني ..حامد يبني بصف غرفته حتي يصير الحوش زواية.بصف زوية....اكلج شوامج هم كل ماتجي تكول فروخهم ينامون يمهم شني هذا جاي جديد الفروخ الزغار ينامون بصفحة وامهم بصفحة

عمه كلها الناس هيج تسوي..مايصير الفروخ ينامون يم ابوهم وامهم..الدنيا مو مثل كبل وتريدين الناس تنام كلهابغرفة وحده..

خاف تردين تعزلين ولج؟؟عود انه اكول بت اخوي العاقلة تشيل زايدتي وناكصتي..شو طلعتي ادورين عزال!!

عمه لاشغله عزال ولاشي..بس ردت غرفة زغيرة للفروخ...شني تغشمين روحج انتي؟؟

هااا...هو حامد وينه وانتي ادورين غرف اجازته كلها سبع تيام عمت عين امه...مانلحك نشوفه عود من يجي البيت جبير عريض ونومي فروخج وين ماجان همه طيرين قابل عندج عشر فروخ عشتو؟؟

بكيفج عمه..

خطية المرة من يمها حست بالثكل كالت:

خيتي الظاهر احنا سببنالكم مشاكل بجيتنا.

انه طفرت..

شالسالفة خويه..هنه..يدورن المناكر الحجي مو يمج..انتن مالجن علاقة تره يوميه الحجية وجنتها مقاله شكل..

خليتهن التهن وجريت ام زيد على صفحة..

هسه وكتها..تسولفن جدام المرة صدك..نسوان نص عقل شني ..ادردمين عمي يبني للغرب..هي هاي حجاية..يابت الاصول؟؟

شو جاي عليه شني انه حايط النصيص..ماكلت شي غلط كلت البيت جبير ..وحامد راد غرفة بصف غرفتنا للفروخ ..

سدي حلكج..فاطمة عيب هالحجي عدجن..سالفة سولفنها بسكته مو كبال المرة الخطار..روحي كعدي يمهن وبطلن مناكر..

اي ابطل..بس من يجي حامد..هو يسولف بمجاني مو باجر تكولون تاكل براس رجلها حتى تعزل..

الفصل الرابع من هنا