رواية سلاح الجريمة الفصل الثالث بقلم محمود الأمين
انا كنت متوقع اني هلاقي في المحفظة، بطاقه تخص القاتل او اي حاجه تدلنا على شخصيته.. ولكن المحفظه كانت فاضية ومفيهاش غير ورقة، والورقة دي كانت مكتوب فيها كذا اسم
حسن عطا فرد الامن اللي اتقتل، محسن سالم موظف البنك
سليم وجدي وده اكيد الشخص اللي عليه الدور
وبعدين في علامتين استفهام على رقم اربعة ورقم خمسة
وده معناه ان القاتل لسه قدامه 3 اشخاص هيرتكب في حقهم جرايم قتل.. وكان لازم نتحرك ونرجع على المكتب عشان نعمل تحريات عن سليم وجدي ونعرف مين الشخص ده وبيشتغل ايه؟
واتحركنا فعلاً من العمارة على المكتب.
واحنا في الطريق اتكلم الرائد سعد وقال
_ طيب كلام دكتور الطب الشرعي رغم انه غريب شوية، ولكن لو ركزت يا باشا فعلاً.. الجريمة الاولى القاتل استخدم العصايا الخاصة بفرد الامن.. والجريمة التانية استخدم القلم الخاص بموظف البنك.. بس اللي هيجنني ان حسن عطا كان فرد آمن على مستشفي ايه الربط اللي بينه وبين محسن سالم موظف البنك
= وده اللي هيجنني يا سعد، واكيد القاتل ده مش بيقتل عشوائي.. اكيد ده شخص واعي وعارف هو بيعمل ايه كويس ومخطط لجرايمه.. ولازم نحترم دماغه ونتعامل معاه بنفس ذكائه عشان لو اتعاملنا كانها جرايم بتحصل كده وخلاص يبقى عمرنا ما هنقبض عليه
_ تفتكر يا باشا مين هو سليم وجدي؟!.. ممكن الاسم التالت يكون في ربط ما بينه وما بين حد من الناس اللي اتقتلت لحد دلوقتي
= اتمنى والله يا سعد.. وان شاء الله التحريات تيجي بفايدة
...
رجعنا على المكتب وبدأ فريق البحث الجنائي التحريات، عن سليم وجدي كنت عاوز اعرف مين الشخص ده وبيشتغل ايه؟
عاوز أوصله قبل القاتل ما يوصله.. وفي الوقت ده وصل تقرير الطب الشرعي الخاص بجثة حسن عطا فرد الآمن والتقرير مقدمش اي حاجة جديدة ممكن نمشي وراها!
سبب الوفاه هو نزيف داخلي بالجمجمه نتيجة لضرب المجني عليه على رأسه بآلة حادة احدثت النزيف واستمر لساعتين.
...
بصيت للرائد سعد وقولتله
_ التقرير مفيهوش جديد، والمعمل الجنائي مقدرش يحدد اي حاجة عشان الجزاره مش هي مسرح الجريمة، ده غير ان الجثه كانت يعتبر متجمده على الاخر وفي حاله تيبس.. وده تم تفسيره انه عدى على قتله 12 ساعه كامله
= اكيد التقرير الخاص بالجثه التانية، هيفيدنا متقلقش.. ده غير ان فريق البحث الجنائي مش شغال بس على اسم سليم وجدي، في تحريات بتتعمل عن محسن سالم برضو، واكيد مش هنعتمد بس على كلام الشاهد المهندس عبد الله.. اكيد في حاجات محدش يعرفها عن محسن سالم
_ تمام يا سعد، وان شاء الله نوصل للي عملها في اقرب وقت
...
بعد 24 ساعة دخل عليا الرائد سعد وهو بيقول
_ ده التحريات اللي تخص محسن سالم موظف البنك.. مكتوب فيها نفس الكلام اللي قالوا المهندس عبد الله ولكن في برضو بعض الحاجات اللي مذكرهاش
محسن كان شغال في بنك وكان ماسك قسم القروض، يعني هو الشخص اللي بيطلع على الملفات الخاصه بالعملاء وبيقول مين يستحق قرض ومين لا.. سواء كان الشخص ده هيفتح مشروع او هيسدد بيه حاجة.. وكان معروف عن محسن في البنك انه شخص مرتشي ودايما كان بيجي على الناس الغلابة وكان بيرفض قروضهم، الحجة بتاعته انهم مش هيعرفوا يسددوا القروض دي
= ايوه انا استفدت ايه برضو يا سعد.. كل التحريات اللي على الشخص ده بتثبت انه كان شخص مش كويس، ولكن اكيد اللي خلص عليه لي موقف شخصي معاه، ولو دورنا هو رفض لكام واحد قرض، ده احنا كده هندخل في دوامة ودايرة واسعة مش هتخلص
...
الرائد سعد يا دوب خرج من المكتب ولقيته راجع تاني بعد 10 دقايق واتكلم وقال
_ عرفنا مين هو سليم وجدي يا باشا؟!
= مين يا سعد اتكلم بسرعة؟
_ سليم وجدي دكتور جراح شغال في مستشفى كبيرة، والمفاجأة انه شغال في نفس المستشفى اللي كان شغال فيها حسن عطا فرد آمن.. وده اول ربط ما بين جريمة وشخص مهدد بالقتل، وجبت لحضرتك عنوانه كمان
...
اتحركنا على عنوان الدكتور سليم وجدي وكنت بتمنى اننا نلحقه، وان القاتل ميكونش وصله.. وصلنا قدام عمارة في المعادي كانت عمارة فخمة وشيك، وكان موجود امن على العمارة سألنا عن الدكتور سليم وعرفنا انه عايش في الدور الرابع ولما بلغناهم باللي عندنا طلع معانا فرد امن لحد الشقه وخبط ولكن محدش رد، رغم ان عربيه الدكتور سليم موجوده تحت العمارة، فاضطرينا نكسر الباب.. واول ما دخلنا لقينا الدكتور سليم على الارض وللاسف كان ميت.. في كذا طعنه في جسمه وجنبه على الارض مشرط، من اللي بيستخدموه الدكاتره في العمليات
وهنا افتكرت كلام الدكتور الطبي الشرعي اللي قال ان القاتل بيستخدم الحاجات اللي ممكن تكون اذته كآداة جريمة ينفذ بيها جرايمه.. في الوقت ده بدأت الجيران تتجمع والكل كان مخضوض من منظر الدكتور سليم وجدي.. طلبت من الرائد سعد ميخليش حد قدام الباب لحد ما يوصل رجاله الطب الشرعي والمعمل الجنائي.. لكن في الوقت ده سمعت واحد من الجيران كان واقف بره وهو بيقول داين تدان واللي عملته اتردلك
خرجت بره الشقه وكان شاب في اوائل التلايتنات وكان بيعيط بحرقه وعمال يكرر في نفس الكلام والناس بتهديه.. وكنت لسه هسأله انت بتقول كده ليه؟
فلقيت واحد بيقولى ده عزت ساكن معانا هنا في العمارة، والدكتور سليم وجدي موت مراته وابنه بالغلط في عملية من العمليات اللي بيعملها ومن ساعتها وهو مكتئب وحالته صعبة.. فاعذره يباشا غصب عنه، حاسس انه بموت الدكتور حقه رجعله
...
في الوقت ده وصل رجاله الطب الشرعي والمعمل الجنائي، وساعتها دكتور الطب الشرعي بصلى بصة معناها شوفت ان كلامي طلع صح
وبعدها بدأ يفحص الجثة، ورجالة المعمل الجنائي بدأت تفحص مسرح الجريمة.. لحد ما واحد من رجاله المعمل الجنائي نده عليا وكان ماسك في ايده دبله رجالى.. كنت فاكر انها دبله الدكتور سليم ولكن لما بصيت عليها ودقتت النظر كان مكتوب عليها اسم عوض
بصيت للرائد سعد اللي كان لسه واقف مستني مني اسم الشخص اللي على الدبله وقولتله
_ لازم نعرف مين عوض ده؟!.. بنسبه كبيرة عوض ده هو القاتل، لازم نعرف هو مين وبيعمل كده ليه؟!.. ويا ترى الدور على مين؟
= تمام يا فندم... هنعرف اكيد؟!
...
وبعد ما تم فحص الجثة ورفع البصمات.. عرفت ان القاتل استخدم نفس الماده اللزجه اللي رشها في وش الدكتور وبعدها ضربه بالمشرط كذا ضربة في اماكن متفرقة لحد ما خلص عليه
اتنقلت الجثه للمشرحه واتقفلت الشقه ورجعت على مكتبي
وبدأت التحريات عن صاحب الدبله.. عاوز اعرف هو مين؟
وبدأنا نعمل تحريات واسعه عن شخص اسمه عوض اتعامل مع فرد الامن حسن عطا، ومع موظف البنك محسن سالم ومع الدكتور سليم وجدي
وبعد تحريات دامت 72 ساعة دخل عليا الرائد سعد وقال وصلنا يا باشا للشخص اللي اسمه عوض واللي تعامل مع التلاتة المجني عليهم وده ملف التحريات اللي اتعملت عن الشخص ده
فتحت ملف التحريات وبدأت اقرأ.. واتصدمت لما عرفت السبب اللي عوض بيقتل عشانه وبالطريقه دي.. والسبب ده كان.
