رواية من الجنون للعقلانية الفصل الثالث بقلم تقى مصطفى
_خلصتي كدة ولا في حاجه تانيه؟
_لا خلصت مفيش.
_طيب انا كنت عارف اصلا كل حاجه من البداية.
_ايه!!
_اه كنت عارف كل حاجه من الاول،فاكراني مش هعرف انتي كل أسبوع بتتأخري فين ولا ايه؟!
و بعدين اتكلم زيي وهو بيقلدني
_المستر بيأخرنا عشان الحصة مهمه.
ضحكت جامد بعلو صوتي راح ضحك هو كمان و كمل
_مش عارف انا ايه المستر اللي بتروحيله اربع ايام في الأسبوع دة و كل مرة حصته مهمه؟!
بعد شوية هديت من ضحكي و قولتله
_لا بس بجد عرفت ازاي؟
راح مسك السلسلة اللي في رقبتي و قالي
_عرفت بدي فاكرة جبتهالك امتى؟
______________________________
Flash Back
_ليان انا جبت لك هدية.
_بجد يا زين ايه هي وريني بسرعة!
طلع سلسلة من ورا ضهره كان شكلها تحفة على
شكل قلب بينك جميل و حواليه طائر الفلامنجو
لونها أحمر و السلسلة بتاعتها مطلية دهب عامله
زي الاستانلس ستيل كدة و شكلها كلها على بعض حلوة اوي بجد.
سأل بفرحة و حماس طفولي
_عجبتك؟
رديت بفرحة مماثلة ليه
_تحفة يا زين بجد حلوة اوي.
_طب تعالي البسهالك بقى.
لبسهالي و بعدين بصلي و ابتسم وهو بيقول بحنيه
_البسيها علطول و متقلعيهاش تاني بقى لحد ما نكبر،اتفقنا؟
_اتفقنا مش هقلعها ابدا.
Back
______________________________
_ايوة مش فاهمه برضو انت عرفت منين؟
_يا ليان دة انتي اللي عداكي من ابتدائي ظلمك و ظلمنا معاكي على فهمك ده.
_يا زين بجد مش فاهمه حاجه.
_يعني هي من زمان بس فيها جهاز تتبع صغير انا رابطه بموبايلي عشان اعرف اوصلك.
_بس ازاي احنا كنا صغيرين على حسب ذاكرتي.
_ليان دة و انا في اعدادي يعني من عشر سنين
بس انتي اللي كنتي صغيرة اوي في ابتدائي
باين أو أصغر كمان.
_اه يعني انت بتراقبني كل ده يا استاذ جاسوس؟
_اه براقبك عشان طول عمري من وانا صغير وانا بخاف عليكي.
_برضو مش مبرر يخليك تفضل مراقبني.
عدل قعدته قدامي و قال بجدية نوعا ما
_نتكلم جد شوية بقى؟
_طبعا اتفضل.
_انا مش عاجبني مستواكي في المذاكرة خالص.
_يا زين ما انا اعترفت لك في العربية.
_ليان انا مش بتكلم على الفيزياء و بس انا بتكلم
عموما مش عاجبني مستواكي،طب ايه مش عاوزة
توصلي لحلمك و تبقي مهندسة قد الدنيا شبهي
و نشتغل سوا؟
_عايزة اوصله طبعا بس الثانوية العامه دي صعبه
اوي يا زين مش حكاية دراسيا و ماديا بس لا كمان
نفسيا انا بدأت اتعب و لسة مبقاليش غير اربع شهور بس في ثانوية عامة دي.
_يا لولو انا عارف انها سنه صعبه و ضغط عليكي و على كل اللي في ثانوية عامة بس الحلم كبير و يستحق تتعبو عشان تحققوه.
_بصي لو الحاجة اللي انتي عاوزاها جاتلك
بسهولة من غير ما تتعبي عشان توصليليها ممكن
تفرطي فيها بسهولة إنما لو تعبتي عشان
توصليليها هتقدريها كويس و هتخافي انك
تخسريها أو تضيع منك،فهمتي؟
هزيت راسي بالموافقة ف كمل كلامه بعد ما اخدني في حضنه
_دلوقتي احنا لسة في أول السنة يعتبر عدى منها
بس اربع شهور ف انتي ك بنوته شطورة هتحاولي
تلمي اللي مش معاكي و المدرسين اللي هييجو
ليكي كمان و تركزي على حلمك و بس مش على
حاجه تانيه ووعد مني مش هتلاقي غير كل تشجيع
مني من اول دلوقتي لحد اخر السنه، موافقه؟
_موافقة.
مد إيده قدام وشي و هو بيرفع حاجبه بجدية
_ديل؟
_ ديل يا زيزو.
______________________________
_يلهوي بقى انتي صعبة كدة ليه؟!
قولتها و انا بعيط و بحاول احل مسئلة الفيزياء اللي قدامي و مش ظابطة معايا خالص.
جه زين من برة خبط على الباب
_ليان انتي كويسة انا سامع صوت عياطك من برة؟!
_لا يا زين مش كويسة سيبني في حالي بقى.
دخل بخضة اول ما لقاني بعيط على المكتب جه بسرعة ناحيتي
_ايه يا لولو بتعيطي ليه يا حبيبي؟
_مش عارفة احل مسئلة الفيزياء يا زين انا فاشلة.
_بس يا بنتي ايه الدراما دي انتي عارفه مش ظابطة معاكي ليه؟
_ليه؟
_عشان مش بتحبي المادة حبي المادة وانتي هتلاقيها سهله.
_انت بتهزر يا زين بجد؟!
_لا والله مبهزرش،طب بلاش دي صليتي العصر؟
_لأ لسة.
_طب قومي صلي العصر و ان شاءالله لما ترجعي هتلاقيها بقت سهله و هتعرفي تحليها.
قومت اصلي زي ما زين قالي و رجعت تاني و زين قعد جنبي
_يلا حليها و انا هشوف هي صح ولا لأ.
حليتها ووريته
_كدة صح؟
_هو الناتج صح بس القانون غلط،هو القانون دة موجود في الدرس؟
هزيت راسي برفض
_يبنتي انتي هتشليني يا حبيبتي انتي بتألفي قانون جديد و تحلي عليه لأ و المصيبة انه صح.
_يا زين مش عارفه احفظ القانون اعمل ايه؟
_ما هي دي في حد ذاتها مصيبة يا نور عيون زين،
تعالي هشرحهولك و أمري لله.
قعد يشرحهولي و الصراحة الواد شرحه حلو اوي
مطلعش مدرس ليه وريحنا بدل اللفة اللي احنا
فيها دي.
بعد شويه لقينا ماما داخله بتقولنا ان المستر بتاعي
جه و زين قالها ثواني و هيطلعني و لما خرجت
سألني
_هو المستر اللي برة دة بتاع ايه؟
_فيزياء.
_اللي انا قاعد اشرحلك قوانينها دي؟
هزيت راسي بالموافقة ف راح قالي
_يلهوي الطم، طب هو عارف بحوار تأليفك للقوانين ده؟
هزيت راسي برفض من غير ما انطق.
_ اممم ما لازم ميعرفش دة هيعمل منك بوفتيك يا
حبيبتي لو عرف.
_زين طب ما تيجي تقعد جنبنا و هو بيديني
الحصة تحسبا لأي حاجه ممكن تحصل يعني.
_و مالو اجي اقعد جنبكم معنديش مشكلة،يلا
قدامي يا آخرة صبري.
______________________________
بعد شوية
_يا ليان دي مش القوانين اللي احنا واخدينهم انتي جبتي الناتج دة منين و القانون غلط؟
قالها المستر وهو بيحاول يمسك اعصابه عشان قبل
كدة لما اتعصب عليا عيط له في الحصة.
بصيت على زين اللي هو تعالي الحقني اعمل اي
حاجه لقيته باصصلي و كاتم ضحكته المستفز البارد
كائن التلج اللي امي جابتهولي دة.
_ما هو انا مش عارفة احفظ القانون يا مستر.
_امال جبتي الناتج صح منين؟
_ألفت قانون جديد.
_لا والله؟
_اه والله.
_يارب ارحمني عشان مرميش حد دلوقتي من فوق السور دة.
_هو انتي بتذاكري الفيزياء ازاي يا ليان؟
شاورت على زين
_زين بيذاكرهولي.
_دة انا هشعلقك انتي وزين دلوقتي.
لقينا زين اتكلم
_انا مالي انا طالبتك عندك اهي شعلقها براحتك.
_اه يا ندل.
المستر فطس ضحك و راح قالي
_شوفتي سلمك من قبل اول قلم حتى.
_اخوكي دة؟
_بيقولو.
ضحك تاني و قال من بين ضحكه
_يعني ايه بيقولو يعني هو مش اخوكي؟
_بص يا مستر هما بيقولو انه اخويا بس عشان مبقاش كدابة انا معرفهوش.
المستر فطس ضحك مرة تانيه
و زين بصلي
_ندلة بحق و حقيق يعني و ربنا ما انا سايبك.
______________________________
بعد مرور كام شهر
طلعت من لجنة امتحان الفيزياء بتاعي اللي كان
آخر يوم لقيت زين مستنيني برة قدام المدرسة
وواقف جنبه مستر الفيزياء بتاعي ايه اللي جابه
هنا دة؟
روحت عندهم و المستر كان ماسك في إيده بوكيه
ورد لقيته بيديهولي اخدته منه و بصيت لزين بعدم
فهم ف قالي
_بصي يا لولو مستر مراد ما صدق انك خلصتي
امتحانات و جه طلب ايدك من بابا عشان يعجنك
على تأليف القوانين دة براحته و العيله كلها في
البيت مستنين رأيك ها قولتي ايه؟
_وانت هتسلمني ليه كدة يا زين بكل سهوله هتخليه يعجني؟!
_و انا مالي يا قلبي هدخل ما بينكم ليه دة هيبقى
جوزك ان شاءالله،خليه يعجنك براحته مليش دعوه
بيكي.
ضحكت انا و مستر مراد و قولتله و انا بهز راسي يمين و شمال بيأس منه
_ندل بحق و حقيق يعني.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
