رواية فصلية بديلة ( شموخ ) الجزء الثاني الفصل الرابع بقلم ام ملكوت
- كملت صب الاجبان ورحت شفت البيضات استون طلعتهن خليتهن بصحون وكصكصتهن رشيت شويه ملح عليهن وطفيت النار عن الطماطه فرغتنه ورتبت الصحون عل ميز مالت الاكل
وهمه صاروا واحد وره اللخ يجي كلنه كعدنه تركينه سويه وطشينه كلمن راح لدوامه اسراء وعبير لوضايفهن وراهب وبان لجامعاتهم بقيت
بس انه وخالتي بالبيت غسلت الماعين وطلعت راحت هيه تكمل نومتهه وانه هم رجعت للغرفه شبعانه نوم دخلت وشفتهه فارغه وهدوء ونقال ماعندي ملل
خليت وفتحت التلفزيون على امل ان تطلعلي مسلسله حلوه التهي بيهه .. كلبت شويه وطلعلي مسلسل تركي رغم ماحب التركي بس بعد شنسوي
بقيت اباوعله وانه مامفتهمه شي واصل مدري ليا حلقه تالي خلص وطلع فيلم مصري لياسمين عبد العزيز كلش احبهه هل ممثله الوحيده هي اباوع
مسلسلاتهه وافلامهه جان الفيلم شايفته من قبل رجعت عدته لحدما نعست كلش طفيت التلفزيون ونمت فتره وكعدتني اسراء فتحت عيوني وكالت..
_كومي شموخه غسلي حتى تتغدين وتاخذين علاجج
_بيش الساعه هسه
_ب٣ الظهر
_شنوو
فزيت من مكاني فتحت عيوني بصدمه وباوعت للساعه شفتهه صدك ب٣ الظهر جا هاي شكد نايمه معقوله جايات البنات ومسوين غده وانه مادري ولا
حسيت بيهن هزيت راسي ب اي لاسراء وكمت للحمام غسلت وجهي ولبست حجابي وطلعت للصاله لكيتهم ملتمين كلهم عل سفره تحمحمت وحجيت..
_احم عذريني خاله اخذتني النومه جان كعدت سويت وياج غده
_لا يمه معذوره وانه متعوده اسوي الغده وحدي لا تخلين بالج وياي
_اي بس ولو جان بقيت يمج ساعدتج بالاكدر عليه
_ميخالف بنيتي تعالي هسه كعدي اكليلج لكمه حتى تاخذين علاجج ماريد منج غير ان تكونين سالمه وبخير
_تسلمين خالتي حبيبتي ..
رحت كعدت يمهه وتغدينه شبعت كلت الحمدلله لمن كلهم خلصوا وكمنه شلنه الماعين واخذتهن اسراء خلتهه بالغساله وانه رحت لميت الطايح
بالكاع من الاكل ورشيت معطر جو بيهه وسديت باب الكلدور المطل عليهه ورحت توضيت وصليت قضاء وطلعت ردت اروح للمطبخ وصاحتني خالتي من الصاله ..
_خاله شموخه تعالي يمي كعدي لا تضلين تفترين بعدهه رجلج ماطايبه لا تتاذه
_اي خاله بس خلي اشرب دواي واجي يمج
_ماشي بنيتي ..
عفتهم ورحت للغرفه شربت العلاج وفرجت سنوني ورجعت للصاله كعدنه كلنه سويه بس بان راحت نامت كعدت بين اسراء وعبير وبقت تكلب بالانستا وتوريني القنفات والبردات وغيرها وهي تكول..
اسراء : اريد اغير ديكور البيت احسه صار قديم وعتيك شتكولن
عبير : اي صحيح يرادله صبغ وفراش جديد هماتين
شموخ : احسه حلو هيج ودافي بس بكيفكم بعد
اسراء : لااا ماغير بي هواي بس النواعم ارضيات قنفات اغيرهن بردات همين وهاي الامور شفت هسه قنفات نازلات موديل جديد يجنن اريد ابدل هذولي بيهم واجيب الفراش والبرده نفس اللون انسقهم يعني
عبير : تمام انتي اشتغلي الصاله وانه اشتغل نواعم الغرفه مالتنه
اسراء : تمام اتفقنا بس خلي ينتهي حضر التجوال ونروح للسوك ونشتري الاثاث
عبير : تمام
بقن يتفقن على الالوان والتنسيقات واجه راهب شايل بيده فايل احمر كعد مقابيلنه يم خالتي وكال بصوت عالي..
_ايييه واجيتلكم اليوم بقضيه ثانيه
واسراء : اي بله كول احب قضاياكم انه
راهب : سمعوني وركزوا وياي لان بعدين راح اطرح الاسئله
الكل : تمام
راهب : شوفو راح اطلق عل شخصيات باسماء الحروف ركزوا هنا عدنه قضيه قتل وسرقه عدنه اب وام راح ارمزلهم بالحروف x للاب و o للام
وعدنه هذا الابن الاكبر نرمزله A ساكن قريب اهله يلي همه x o المغدورين والمشتبه بي الاول وعدنه الابن الاصغر z يلي ساكن بغير محافظه وهو
المشتبه بي الثاني هسه تكولون شدخل الابناء بقتل الاهل انه اكلكم شدخل خل احجيلكم من بدايه قصتهم..
عدنه هنا A متخرج وكاعد وساكت متزوج وعنده ٥ اطفال وجان ياخذ مصروفه دائما من امه او ابوه يعني بحيث كل شهر ينطونه اهله مصرف اله ولجهاله ٣٠٠ الف تقاعد الام كله لهنا تمام ..
_اما الاخ الاصغر عنده سرطان الكلى ويداوم بالجامعه وكذلك ياخذ مصروفه من ابوه ٢٠٠ الف كل ذهر يوصله هنا الربط بينهم وبين السبب الاول
للاشتباه ان الاخين يكنون العداوه لاهلهم يعني نكدر نكول بالشهر مرتين او اكثر يتعاركون ويتناقشون بامور المصرف وان مايكفي وقبل الحادثه باسبوعين الاب طرد ابنائه هذولي الثنين
وبقت يمهن فقط بنتهم التبلغ من العمر ١٨ سنه نرمزلهه ب S تداوم سادس وهي الناجيه الوحيده منهم السردت القصه هاذي .. بعدما طردهم الاهل
وقطعوا عنهم المصرف وطبعا السبب مجهول لحد الان .. الاخ A بقى يفر اقاربه ويتوسلهم يشغلونه عدهم او ينطونه فلوس يعيش جهاله ولكه شغله
واشتغل بس للاسف صار وياه حادث وانكطمت ايده اليمنى انتبهوا ايده اليمنى وكعد الاخ A بالبيت وسكت وصارت الناس تتصدق عليهم هذا المشتبه بي الاول ..
اما المشتبه بي الثاني الاخ Z هذا مرضه زاد عليه وبيوم راح لاهله وطلب منهم يتبرعوله بكليه منهم بحجه ان همه كبار صاروا بالعمر وهوه بعده شاب
بس كذلك الاهل رفضوا لسبب مجهول هماتين وبقه متعلعل بمرضه .. وهو الشخص التوجهتله اصابع الاتهام اكثر وهسه راح نعرف الاسباب..
حاله وفاة الاهل X O ..
1- الام مضروبه براسهه بقطعه بوري حديد وماخوذ من جسدها الكلى والقلب بطريقه احترافيه .
2- الاب مضروب سجين وكذلك ماخوذ منه الرئتين والكبد وماخوذ بطاقاتهم المصرفيه والفلوس يلي بالخزنه..
يعني باختصار مشرحينهم بطريقه ثبتهه الطب العدلي انها مثاليه مو شخص عادي وسارقين كلشي ممكن ان يطلع فلوس .. اما اسباب الاشتباه هسه نلخصهم بنقاط للتوضيح اكثر ..
1- الاخ A محتاج فلوس وبسبب طرد ابوه اله اضطر يتذلل للناس واشتغل وخسر ايده بسبب شغله وهذا راح يكن الحقد والانتقام اتجاه اهلهه اكثر واكثر
2- الاخ Z بي مرض السرطان ويحتاج كليه وسبق وطلب كليه من اهله بس رفضوه وهذا سبب يخلي يكن الهم العداء ويحاول ياخذ اليريده منهم
بالاجبار وخاصه ان هو طالب جامعي مختص بطب التشريح يعني (احترافي تشريح) وهذا الشي اليثبت ان الاحترافيه باخذ اعضاء الاهل ممكن يكون من ايده
هسه كلولي منو تظنون اكثر مشتبه بي ..
اسراء : اذا تكول الاخ Z مختص بالتشريح معناهه احتمال 50% يكون هو المجرم
_وليش مو 100%
اسراء : لان الشخص المتعود عل سجين والتشريح مايضرب الضحيه بوري حديد يكدر بكل بساطه يضربهم بسجين نفس الاب صحيح
_مو شرط لان من المكان ان خاضوا حرب مقاومه قبل ما ينقتلون واحتمال اضطر يضرب امه بحديده لمن حاولت تشرد منه
اسراء : صحيح بس هذا يبقى احتمال..
عبير: واحتمال يكون الاخ A لاني اثق ان مشاعر الحقد والانتقام تعمي الانسان وتسيطر عليه رغبه بالقتل حتى لو جانوا اهله
_بس الاخ A ايده اليمنى اليستخدمهه مبتوره والضربه جانت قويه مو ضربه عميه بالايد اليسرى
شموخ: احتمال تكون الاخت S المشتبه بيهه الاكبر
_شلون استنتجتي هل فرضيه
_لان احداث القصه ناقصه بيهه اسباب طرد الاخين وسبب رفض الاهل ان ينطون كليه لابنهم يعني حسب تصرفات الاهل ويه ابناءهم استنتج انهم
يحبونهم ولهذا السبب ينطونهم فلوس تقاعدهم ولا تصدك اكو اباء تحب اولاده وتصرف عليهم من ان تبخل عليهم بكليه وهمه كبار بالعمر يعني شايف الدنيا وعايف
_بس شدخل الاخت S
_هيه يلي دخلهه اولا افادتهه وسرد القصه بيهه نقص وتحسهه متناقضه .. صح ممكن يكون الاخين يكنون العداء للاهل وممكن يكونوا كرهوهم
وحقدوا عليهم بعدما طردوهم وتازمت حالتهم بس هذا الشي مايعني ان يتجراون ويقتلون شخصين ومو اي شخصين وانما اهلهم يلي ربوهم وتعبوا وصرفو عليهم حتى اخر يوم بحياتهم زين سؤال
_تفضلي
_انت شنو تخصصك
_ضابط تحقيق
_عدكم تقنيه البصمات والأدلة مو
_لا غير قسم مختص بعلوم الادله الجنائيه همه يلي يطلعون هل شغلات واحنه نحقق مع المجرمين فقط مع ان هل اختبار ماله دخل باختصاصنه بس بعد واجب ولازم نحله
_اي هاي هيه انحلت القضيه معناهه
_شلون
_مجرد مايطلعون البصمات على الجسم والبيت يعرفون منو المجرم
_طلعوهم والبصمات متواجده للمشتبهين
_زين بأي مكان تواجدت البصمات
_على اديهن الضحيات ويده الباب والقنفه والكاع
_يعني هسه انه اذا لزمت ايد اسراء واجه شخص ثاني لزم ايدهه بس لابس كفوف معناهه راح تضل بس بصماتي عليهه
_صحيح
_وهذا دليل ثاني مايثبت ان الاخين مشتبه بيهم
_تمام نشخط عليه
_هسه حجه الغياب اخذتوا افادات وتسجيل كامرات البيت والجامعه
_جانوا غايبين همه الاثنين الاخ A يلي مافارك بيته طوال الشهر جان بيوم الحادث طالع والاخ Z كذلك جان غايب عن جامعته وعن المجمع السكني بهذاك اليوم
_والاخت S وين جانت
_حسب ماتكول انها جانت ببيت صديقتهه بهذاك الوقت بس اشك بهل شي
_وشنو يثبت هل شي
_افاده صديقتهه وكامره بيتهم لمن دخلت وياهه ولمن طلعت من عدهه جانن قبل الحادثه بساعه وبعدها بساعه سبحان الله
_ههه شنو هم اكو هيج صدف بالحياة قبلها بساعه وبعدها بساعه يعني المايفتهم هم يكول هذا تخطيط
_صحيح شكيت بهل شي بس بيت صديقتهه مابي باب ثاني تطلع منه وهي دخلت قبل الحادث وبعدها طلعت من نفس الباب
_عادي الدرج موجود اكدر اصعد واطفر من السياج شكو بيهه
_يعني هسه نخلي الاخت S بالواجهه وتكون المشتبه بي الاول
_اي اسباب الاشتباه بيهه هواي ومنها..
1- انت كلت انها عايشه ويا الضحايا دائما فهي تعرف كلشي يخصهم وتعرف الرقم السري للخزنه وتعرف ارقام حسابات المصرف مالتهم وتعرف المبالغ التحتويهن
2-حجه غيابهه ضعيفه واكبر غلط يرتكبه المجرم لمن يحاول يتذاكى هيه حسبالهه اذا وقتت دخلتهه وطلعتهه من البيت بفرق نفس الساعه ماراح نفكر بهل شي ونكول ليش ساعه بالضبط شنو هل صدفه والضبط بالوقت
3- اما الام والاب باعتقادي وهذا مو دليل بس فرضيه ان همه ياخذون فلوس التقاعد كلهه وينطوهه للاخين اما الاخت مالهه شي رغم انها رح
تداوم جامعه عن قريب ولازم تتجهز من ناحيه الملابس والكتب والملازم والمصرف اليومي وغيرها فاكيد تحتاج هواي فلوس عل اقل يكفونها تعيش بيهن اربع سنوات بالجامعه
4- فلوس التامين راح يبقن الهه بحسب ان الاخ الاول متزوج والاخ الثاني حالته خطره رغم ان هل احتمال ضعيف بس يبقى سبب احتياطي
5- وقت الجريمه انت كلت راحت لصديقتهه بهذاك اليوم بذات رغم انها طالبه سادس والامتحانات على الابواب وطالب السادس بهل وقت ما يطل
على الشمس اصلا فشلون رايحه عند صديقتهه تتونس ومنو كال صديقتهه صادقه بافادتهه اكو شخص من اهلهه يثبت صحه كلامهه
راهب: امها عايشه وياهه وكالت انها فعلا اجت النه
_وكالت بالضبط انها بقت عدهم منا لمرت ٤ ساعات
_لا كالت انها طلعت من البيت وره ما دخلت الاخت S للبيت بكم دقيقه
_اكو الهه تسجيل بالكامره يثبت هل شي
_لا مالهه اثر لا لدخلتهه ولا لطلعتهه
_خلاص القضيه مبينه وواضحه وضوح الشمس واعتقد ان حدسك وجهك لهل ادله بس بقيت مصر على النقاط النطوهه الك بالاختبار وخلوك تمشي عليهن
_لحضه خلي اكتب النتيجه واشرحلج عنه
_تمام..
انتبهت على الموجودين جانوا صافنين علي مسوين نفسهم مصدومين صفكت اسراء بفهاوه وضحكت على شكلهه وخاصه لمن كالت..
_انتي اييه يشيخه دانتي داهيه
_ههههه فلشج شركت بالماي
_هههه صحه صحه بس لا والله جديات حسيت نفسي عشت اجواء الجريمه من شفتكم متكابلين وواحد يرفع وواحد يكبس عبالك داخله غرفه تحقيق
_الوك اصير محققه ها
_اي والله احلى محققه تصيرين تجرينهم جر الحصن
_هههه لا حاليا كاعد افكر اصير مهندسه نفس ماما
_والله تصدكين كاعد احس بيج هيبه الضباط وقوه سيطرتهم وذكاءهم انصحج روحي لهل قسم
_ماعرف بعد اشوف خلي اخلص سادس واقرر
_شلون حلتهه برمشه عين يمه منج خوفتيني طلعتي مو سهله
_هههه مو لهل درجه ذكيه بس دائما اكول خوفك من الخانس هيه من بدايه القصه لفتت انتباهي وكلت وين جانت لمن اهلهه انقتلوا وانه الاعرفه طالب السادس يضم راسه بالغرفه معقوله من كثر التركيز ماسمعت صوت اهلهه لو شنو
_ههههه اي صحيح بس همه لواته هذول المدرسين ينطونهم شرح للقصه ويحددون المشتبه بي وكم نقطه عنهم حتى يشوشون بالهم ويريدون الطالب هو يكتشف الناقص بالقصه والمجرم الحقيقي بيهه
_اي صحيح حسيته مثل الرياضيات ينطون معادله بيهه اكثر من قانون واكثر من خطوه وسرد والنتيجه وحده وتكون دائما غير متوقعه وبما اني احب الرياضيات فهاي الامور بسرعه تخرط مشطي على كولت السوريين
_اي والله الحق وياج
راهب: يله كملت تعالي اشرحلج عن هل اختصاص
_تمام
كمت رحت بصفه بس بعيده عنه شويه لزم ورقه وقلم وبقه يكتب وصار يقسم الاختصاص لعده اقسام ويشرحلي صار كل قسم اسمه واختصاصه ووين يتوظف وشلون وشنو معدله وقسمه
بالاعداديه لحدما كمت واحس هل شغله عجبتني من هواي نواحي بيهه بس اعتبرتهه كشي حلو وحماسي وحلمي الثابته عليه هو الهندسه .. طبك الدفتر وكال..
_انه اختصاص ضابط تحقيق الزمهم دك ولطم اذا توظفت واحقق وياهم
_هاا بس يعني مالك شغل بالقضايا ماتعب روحك كبل تحقق وياهم ويعترفون
_بالضبط
_همم حلوو بالتوفيق انشاءلله
_ويوفقج شموخنه ..
صفنت بوجهه لمن كال شموخنه وابتسم لمعت عيونه بنضره حب وتقشعر بدني لفيت عيني عنه واجت على عبير الجانت تباوعلنه غمزتلي وركصت حواجبهه مبتسمه علينه خزرتهه وكمت من يمه رحت للمطبخ اشرب ماي ولحكتني ..
_احم احم شموخنه انطيني ماي وياج
_هاا تردين كتله حاضر من عيوني
_عههه لا لا نتشاقه على كيفج نتشاقه
_هههه تمام يله هل مره سماح..
ضحكت على سوالفهه شلون تريد تشابكني ويه اخوهه كوه وتسوي حب بيناتنه ويع حب ويني وين الحب انه للحضه صفنت واجه على بالي بابا
وماما ومرتضى وسلام شلونهم هسه جنان شلونهه اشتاقيتلهم هواي ياربي اجمعني بيهم على اهون سبب يارب لا تحرمني منهم دخيلك..
رجعت للغرفه تمددت وبقيت صافنه افكر باهلي لحدما مر الوقت برمشه عين صارت الساعه ب٦ وهيج وقت الجو يصير يجنن بين المغرب والعصر
كمت لفيت حجابي وطلعت بالحديقه وضرب بوجهي هوى بارد ويشرح الصدر كعدت عل مرجوحه بقيت اهز بيهه خفيف والهوى يضرب
بوجهي غمضت عيوني وتخيلت نفسي طايره والهوى يلعب بشعري من كل ناحيه فزيت من خيالي على صوت حمحمه فتحت عيوني وشفت راهب واكف كبالي تحمحمت وكلت..
_احم تفضل محتاج شي
_اكدر اكعد يمج
_اي تفضل..
ابتعدت صرت بحافه المرجوحه وهو بالحافه الثانيه كعد بعيده عنه لان المرجوحه جبيره توسع ٣ اشخاص باوعتله وشفته صافن بالجو ومسوي
نفس حركتي مغمض عيونه ومبتسم اول مره انتبه على ملامحه هيج حاده وجديه نفضت افكاري ورجعت اباوع للسما وحجه..
_شلون صرتي جروحج التئمن لو
_اي الحمدلله كاعد يشفن
_هاذهو الحمدلله تعرفين عنوانكم بالضبط بميسان
_مو بميسان عايشين قبل كم سنه انتقلنه للبصره
_ووين بالضبط بالبصره
_بالتنومه قريب ابو الخصيب
_منطقتكم زراعيه لو شنو
_لا شوي بعيده بس عدنه هناك ارض زراعيه يحوونهه ابوي وعمامي كل يوم
_هم رايحتلهه من قبل شايفه شكلهه او شايفه شي مميز قريب منهه
_اي رايحتلهه والشي المميز بيهه ان بيهه فزاعه اعرف شكلهه لان انه سويته ويه عمي ساجد قبل فتره
_زين عمامج هم بالبصره
_لا عمي الجبير بميسان بس يجي كل فتره للارض يشوف احوالهه وعمي ساجد بابو الخصيب وعمي الوسطاني بالعماره وغالبا منشوفه
_يعني اذا ردت اروح اسال عليهم وين اتوجه ليا عم
_لعمو باقر لان عمو ساجد موجود ويه اهلي ومادري اذا راح نلكاهم بالبيت او لا وعمو شعلان ماندل منطقتهم وين بالضبط
_تمام
_اي صدك عمو باقر شيخ عشيره ال^^^^ بميسان ومعروف يعني بس تسأل عليه يدلونك
_حلوو لعد ثبتنه على همج الشيخ باقر
_اي كلهم الشيخ باقر ابن الشيخ محمود وهمه يودونك اله بس يمته تروح
_جماعتي يكولون الوضع تقريبا راح يستقر يعني منا لكم اسبوع يفتحونه الحضر مايضل وبعد احنه نشوف طريقنه بهل قضيه
_هاا اوكي
_زين انتي تردين ترحين لعمامج كبل لو حابه تسالين عن اهلج هنا بالاول
_ماعرف تكدر تساعدني بهذا الشي
_اي اكيد
_تمام جا ندور عليهم ونسال بالاول وان مالكينه الهم اثر نروح لعمي باقر
_تمام اتفقنا
هزيت راسي ب اي واجه صوت خالتي من وراي التفتت وشفتهه اجت باتجاهنه وكفت يمنه وكالت..
_بنيتي شموخه ترحين وياي
_وين خاله
_هنا لجيرانه صديقتي اسير عليهه شويه ونرجع
_تمام خاله هسه ابدل واجي..
ردت اكوم وكال راهب موجه الكلام لامه..
_يمه همه مو عدهم شباب شلون تاخذيهه وياج
_ماما شنو قابل راح ياكلونهه الشباب وهمه اصلا مايضلون بالبيت تعرفهم كل اليوم طالعين بالشوارع
_ولو يا امي مايصير البنيه مايعرفونهه ويجوز تتقيد اذا شافتهم
_هسه هيه البنيه قابله انت شدخلك ولك رهبان خلي اروح احضر نفسي لا تغورب الدنيا
_تمام يوم بس ديري بالج عليهه
_يا شلون غير اخليهه بعيوني
_تسلم عيونج
_تعال ولك اشو انت مكثر هل سوالف على شموخ اشو من اخذ خواتك وياي ماتحجي شنو تغير بالنسبه لشموخ
_لااا شتغير واصلا انه ماتعجبني روحه خواتي الهم بس شسويلهن قابل يسمعن كلامي هنه
_لا بس شغلتك مو خاليه مامرتاحتلك انه
_لا غلطانه كل سالفه ماعندي الحمدلله
_اي نشوف تاليهه يله خل اروح لا اتاخر عل مره
_تمام الله وياكم..
:- راحت من يمي وانه صفنت بكلامهه معقوله هيج مبين علي اهتمامي بيهه اي بس انه حتى خواتي اضوج لمن يرحن لبيتهم وعدهم شباب وشموخ
صارت باعتبار وحده من خواتي .. المهم خلي اتصل على اوس اشوفه يجي لا اليوم .. اخذت نقالي دخلت على رقمه واتصلت رن شويه ورد علي..
_هاا رهبانو
_ها سهومي شني اليوم ناوي تطلع لا
_اي نطلع انه ماطلع غير يصير بيه جرب من كعدتي بالبيت
_هههه يله تمام لعد وره الصلاة ب٧ ونص هيج مروا علي تمام
_تمام هاذهو
_اي شلونهه سهم
_ااااخ بويه كلبي
_صلي على محمد يمعود شكو جريت حسره
_موتتني هل سهم موتتني
_هههه بس لو اعرف وين طحت بيهه
_بالجامعه القريبه مره رحت ويه حمزه وشفتهه وعساني لا شفتهه علكت كلبي بعيونهه من هذاك اليوم
_عاد حلوه خوش بنيه لو ماعليهه الوسفه
_بعين الكل عاديه بس بعيني غير يبااا غيرررر
_هههههاي خوش ساحلتك سحله بعد ايدي
_وبعد وبعد شكلي راح اضل مسحول وتاليتي عند ام عباس تلكاني اسويلهه سحوره
_ههههااي والله كلشي اترجى منك انت لو خليت شي براسك تاخذه تاخذه
_الا هاي لك رهبان ماكاعد اعرف شلون اتعامل وياهه تدري صار من بدايه الدوام اتانيهه بالباب واباوعلهه وهي ولا كأني موجود تباوعلي بنص عين وتدور وجهه مني عبالك كخه كبالهه
_جا اذا هيج خويه معناهه البنيه فعلا خوش بنيه ومربايه لا تضيعهه من ايدك من وره سوالفك التافهه
_غير اضيع لو ضاعت من ايدي
_الله يلم شملكم جا شبيدي عليك هو هذا الينسحل تصير عله بكلبه
_انشاءلله ربي يشوفني بيك يوم وتنسحل مثلي
_لا يا ناقص ليش ولك
_لك اول مره شخص ينسحل ويحب هل شعور حتى السبه تطلع من حلكهه حلوه
_هههه الله يشفيك ويهدي سرك خويه انت خلصان ماباقي بيك حال
_اي والحسن
_يله جا روح كمل سحلتك بعيد عني خل ادخل اتوضه راح ياذن
_تمام خويه تمام يله باي
_الله وياك..
:- سديته منه ورفعت راسي شفت امي وشموخ وبان متوجهات للباب يردن يطلعن راحت عيني على شموخ وحسيت وكأن بس هيه موجوده برزت
بيناتهم مثل ورده حمره بين وروده بيضه ضاربتهه الشمس وصايرات خدودهه حمره والابتسامه تذوب الروح والله شكلنه راح ننسحل على كوله اوس ..
كمت دخلت جوه البيت شفتهه صارت ب٧ الا واذن دخلت توضيت وطلعت فرشت مصلايتي ووكفت اصلي كملت وكعدت اقره دعاء العهد مثل كل يوم مر وقت وبقيت كاعد على المصلايه احس بارتياح
لمن انام او اتغطى بيهه فتره وكمت لميتهه ورجعتهه لمكانهه ورحت لغرفتي بدلت ملابسي شسورت شعري لبست برجلي ورمش علي اوس
رشيت عطر بسرعه وطلعت ويه طلعتي دخلن امي والبنات اجت عيني بعين شموخ وشفتهه مو على بعضها بسرعه تراود ببالي ان شخص منهم
محاجيهه تضايقت سولفت شويه ويه امي تالي عفتهم وطلعت من البيت انتظرت شويه واجه اوس ركبت السياره وطلعنه انتبه علي متضايق وسالني شبيه..
_شكو صاير شي وياك ليش ماد البوز
_ماصاير شي
_دحجي شكو صاير شي بالبيت
_هيج سالفه شاك بيهه مو يمك
_تمام براحتك
_اي وين راح نروح
_نفس كل مره نروح للهنديه تالي للكوفي
_والله مشتهي اروح للعلقمي خرب شرفهم الانجاس ماخلوا الناس بحالهه
_جا شبيدنه ياخوي مكتوب البلاء على هل محافضه من زمن الحسين عليه السلام
_والله احسك مو على بعضك دحجي وفضهه
_ماكو شي امي اليوم اخذت البنات للجيران وكتلهه لا تاخذين شموخ عدهم ولد بس ماسمعت مني وهسه من رجعن جانت البنيه مو على بعضها
ومتضايقه شاك ان واحد من عدهم حاجي او مسوي شي غلط وياهه طلعت مستعجل وكلت من ارجع للبيت اسالهه حتى اطلع بروحهم لو واحد منهم دايسلهه على طرف
_ها #رهبانو بدت ثاني خطوه اتجاه السحله بدت الغيره
_لا مو شغله غيره بس البنيه امانه عدنه مالازم اسمح لاحد بان يضايقهه مادامهه يمنه
_اي صحيح بس انت هم على كيفك اذا طلع الشاك بي صح لا تتسرع وتسوي شي تندم عليه اتصل علي وانه اجي اسحلهم وياك
_هههه شهل تناقض دخيل ربك
_اي جا كلشي يوكف يم عرض الناس والبنيه امانه عدكم يعني عدنه كلنه شلون نخلي واحد ياذيهه
_كفوو وسبع تنعام منك
_بعد روحي
وصلنه لشط الهنديه جان فارغ ومابي بشر بس احنه وكم شاب كاعدين بالمكان فرشنه وكعدنه احنه ال٤ كلمن لزم نقاله يكلب بي ونسلس حب
تالي سولفنه عن الجامعه والواجبات طبعا بالواجب الينطي الاستاذ يكون كلمن محتفظ بالمعلومات لنفسه ومحد يفتح الموضوع هذا خارج الجامعه ..
صفنت بالقضيه مالت البارحه الحليناهه انه وشموخ وتذكرتهه شلون جانت مركزه ولمن تسال تباوع بجديه بعيونها الحاده ولا حركات اديهه لمن شرحت الاسباب وثبتت التهمه على الاخت بكل
بساطه وكأنهه متمرسه وتعرف بهاي الشغلات .. اخذتلي صفحه صافن بيهه وافكر شنو صاير وياهه ببيت الجيران حتى هيج اجت متضايقه شيخلص هل كعده وارجع للبيت اسالهه ..
:- جنت فرحانه بأن راح اشوف ناس واطلع من جو البيت بس نغصت علي روحتي ويه خاله وفاء فرحتي بسبب ابنهم لمن دكينه الباب وطلعلنه شاب يكبرني
تقريب السنتين هيج سلمنه وسالنه عن صديقه خالتي وكال تفضلوا وهو عيونه يصفن بيهه علي .. بالاول اعتبرت نضرات مال استغراب لان غريبه
وماشايفني ويه خالتي وفاء من قبل بس اشو هذا زودتهه فرد مره يباوع بكل تفاصيل جسمي حتى ماعرفت ارفع راسي .. دخلنه للبيت ولاكتنه المره بالبوس والهلا دخلتنه وضيفتنه وسالت خالتي علي وكلتلهه..
_منو هاي البنيه الحليوه ام راهب
_هاي بنت اختي اجت تدرس يم البنات بعد مثلما تدرين ماضل غير شهر ونص للدوام
_ياا فدوا اشو ولا ادري عندك بنت اخت
_اي هاي بنت اختي البعيده عنه ماتعرفينهه
_هاا تمام اي شلونج انتي شنو احوالج صار فتره مفتقده زياراتج
_بعد تعرفين يا خيه الوضع وباقيه بهل بيت مكابله البنات وكاعده
_اي والله حقج من بعد الانفجار الصار ماتهنينه بشي حتى بلكمتنه والحمدلله ربي ماوصلنه الضر ويصبر الفقدوا عزاز
_الحمدلله على كل حال اي شلونهه خطيبه ابنج يمته ناوين تعرسون
_والله يلح علي صار هل اسبوع يريد يعرس كتله بيا وضع وتعرس بطران انت جان يكلي ماسوي حفله سكتاوي بله عليج ام راهب انه ازوج ابني جبيري سكته بله يا ام تقبلهه لابنهه
_وياج حق خيه بس خطيه زوجي يجوز مايريدون عرس هو وخطيبته بعد هو عرسهم وبكيفهم..
ضلن يحجن على اكثر سالفه اكرهه وهي العرس وتفاصيله لعبت نفسي كلت لخالتي راح اطلع بره اشم هوى وكمت للمطبخ مقابيلنه شربت ماي وطلعت بالساحه بقيت واكفه والعب باوراق الشجره
وصافنه باهلي وكلشي بيه محتاجهن بهاي اللحضه شعور انك تعيش بعيد اهلك وانت ماتعرف وينهم وشصاير وياهم يذبح ماكاعد اكدر اسيطر
على دمعتي كلما تذكرتهم نزلت دمعه مهضومه من عيني واجالي صوت ولد من وراي التفتت بسرعه وشفته نفسه الفتحلنه الباب ساند نفسه عل باب
ويباوعلي بخبث .. مسحت دمعتي بسرعه ومشيت ردت ادخل ولزم ايدي نترتهه منه وخزرته وحجيت بصوت مسموع..
_هي انت شكو تلزم ايدي اعرفك تعرفني
_على كيفج ام خدود ماسوينه شي قابل شسويت انه بستج لو كرصتج
_صدك ماتستحي يا نذل يا بلا تربيه
_اششش صوتج لا يعلى علي فاهمه انطيتج عين الضاهر وانتن البنات هاي سوالفجن تجن للولد برجلجن ومن يسويلجن شي تضلن تتعززن
_الضاهر خواتك حاجياتلك عن طريقتهن هاي
_الزمي لسانج لج ساق**
باوعلي وفاتح عيونه بعصبيه وقابض ايده عود هوه معصب غلط علي وماتحملت جبته براجدي فر اذاناته على اثره طلعت خالتي وامه لزمنه وبعدنه واحد عن الثاني خالتي لزمت كتفي وكالت بصوت ناصي..
_شكو خاله شصاير ليش ضربتي شسوالج الولد
_حقير وبلا تربايه هيج اريد اكول رب اليوكف كبالي ويلزم ايدي ويحجي كلام اكبر من راسه يكون بلا تربيه هذا وجان يحتاج هل راجدي حتى يتادب
_ولج خاله ببيت الناس احنه جان سكتي واحنه بعدين نكول لامه وهي ترزله عيب يا يمه تمدين ايدج على ولد..
حجت خالتي بصوت شبه مسموع يعني سمع الحجته ضحكت باستهزاء ورفعت راسي باوعتله باشمئزاز وكتله ببرود ..
_والله خالتي وياهه حق شكو اوصخ ايدي واضرب واحد جاهل مثلك خوب اكول لامك وهي تجر اذانك وتبولك وتنام ..
قبض ايده وراد يجي علي ولزمته امه واخوه الجبير يله طلع تالي حجت المره ويه خالتي وكالت شصاير رديت عليهه انه وكتلهه..
_اعتقد سمعتيني يا خاله ابنج الضاهر الشوارع مسحت منه كل يلي تعبتي حتى تعلمينه اله ويحتاج تعب مره ثانيه خلي قبلما يفكر يلمس بنيه
او يغلط وياهه بالحجي يخلي الله وخواته بين عيونه وهل مره يجوز مرت براجدي بس المره الثانيه يجوز تصير عشاير لو تعرض لبنيه وحجت لاهلهه وابنج يروح بوله بشط
_يا يمه ولك شلون تسوي هيج مو البنيه خطار عدنه هيج وصلت وياك تهين خطار امك وتصغرها كدام الناس .. خيه ام راهب عذريني اروحلج فدوا والله مادري بابني عنده هيج سوالف وحقج انتي وهاي البنيه على راسي عذريني خيه
_معذوره يبعد اختج معذوره انه مستحيه منج واعتبري السوته شموخ هو رد اعتبار الهه وخلينه نسد السالفه هنا تمام خيه
_اي هاذهو وهذا النذل ابني انه اعرف شغلي وياه
_اخذي راحتج خيه احنه رايحين للبيت صار دنيا غروب واذن بعد
_الله وياج خيه وعذريني وعيديهه الله عليج لا تكطعين بيه بسبب الصار اليوم
_انشاءلله خيه يله اودعناكم
_مودعه بالله
اجت باست خالتي وهي تتاسف منه واباوع على ابنهه الجبير خازر اخوه النذل ومتحلف بي حل ويا بكلشي يسوونه حتى يتربى هل خنيث ..
طلعنه من البيت انه وياهن مشينه مسافه ودخلنه لبيت خالتي ولاكانه راهب ضل واكف يحجي ويه خالتي وانه بالي مو يمهم روحي طاكه اكره ماكره هيج نماذج وحضي مايخلي ايامي فارغه من عدهم ..
دخلنه جوه وبوجهي لغرفتي حصرتني البجيه لمن تذكرت بابا لو موجود هسه جان ما اخذلي حقي وطيح حضه ..دخلت للحمام ونزلت دموعي حاره
على خدي ندهت لبابا بكلبي اكثر من مره ودمعتي على خدي.. باوعت لنفسي بالمرايه واثار الحادث بعدهن بوجهي قليل
طايبات غسلت وجهي اخذت نفس وطلعت بره واجتلي اسراء لزمتني من كتفي ووجهي بحنيه وكالت...
_حبيبتي شموخ شنو صار بالضبط ليش سويتي مشكله ويه ابنهم
_لا لانهه اصلا مافهمت شصار بالضبط بس تحرش بيج وضربتي وهاي هيه
_تعالي نكعد واسولفلج
_تمام يله تعاي..
كعدنه عل جربايه شربت ماي وسولفتلهه كل الصار وهيه ضاجت حيل من امهه وبقت تحرك بدمهه وتحجي وهيه متحسره..
_امي شبيهه مو جانت وياج الزمه والوي اذانه لهل سك* شلون يعتدي على بنت من بناتنه ولو امي واعرفهه بارده بهيج مواقف بس بان شمالهه بيهه تطلع لسانهه بس علينه
_لا تضوجين نفسج حبي بعد سالفه خلصت وراحت وانه شموخ تدريني ماسكت اخذت حقي مربع منه
_كفوو منج وعلي عجبتيني احب البنيات القويات فديتهن ام خدود ريانات
_هههه فداج الكون حياتي
_يله كومي خلينه نصلي ونسوي عشه ثنينه سوه شرايج لو تردين ترتاحين
_لا شعدي ارتاح خليني اكوم وياج اصلي والهي نفسي بالعشه بلكي اتعلملي طبخه طبختين منج
_تمام يله لعد كومي توضي وطلعي تلكيني فارشه المصلايات
_تمام حبي
.
.
:- كمنه انه وجماعتي من مكانه وطلعنه تعشينه بالمطعم ورحنه للكوفي كضيناهه اركيله وجكاير منا لصارت ب١٢ تقريبا دفعنه الحساب وطلعنه متوجهين كلمن لبيته ذبوني
بالبيت ودعتهم وراحوا دخلت وقفلت باب البيت وتوجهت للمطبخ دخلت شربت ماي وردت اسد الباب بس كلت خل اتاكد اخاف وحده من خواتي بره تشر ملابس او شي طلعت افتريت بالحديقه
مالكيت احد ردت ارجع ولفت انتباهي خيال اسود باوعت بتركيز وشفت شخص واكف يم الحايط القصير وره الحديقه .. رحت يمه بهدوء ظنا مني
انه حرامي او فد شي وصلت يمه وعكس على سواد شعرها كلوب البستان القريب بضوه خفيف صفنت بيهه لحضات مسحور بمنظرها التفتت علي
وفزت وفزيت وياهه لزمنه كلبنه سويه وواحد باوع للثاني فتحت عيونهه مستوعبه حجابهه مو على راسهه التفتت عنهه وهيه رفعت حجابهه على راسهه وحجت بعصبيه..
_شجابك هنا وره البيت شدلاك بيه واجيت وكفت وراي
_ردت اسد باب المطبخ وكلت خلي اتاكد اخاف شخص بره وشفتج هنا عبالي وحده من خواتي واجيت اصيحلهه تدخل
_اففف وين يروح الواحد ياربي حتى هنا ماكدر اختلي بروحي
_متضايقه من عدنه
_هاا لااا مو من عدكم وانما ماتخلوني اضوج او ابقى وحدي تقلقون علي وانه متعوده اختلي بروحي دائما بدون محد يسال عني
_وقلقنه عليج يعجبج لو يخنكج
_شسالفه راهب افهمني مامتضايقه انه منكم بالعكس ونستي وياكم بس مرات من اتضايق احتاج مكان اختلي بي هاي السالفه ومابيهه
_صدك ردت اسالج مساع بس طلعت مستعجل
_على شنو
_ليش رجعتي من بيت الجيران متضايقه اكو شخص حجه وياج او ضايقج
_لا محد ضايقني بس ضلن يحجن بسوالف العرس وغيرها وحسيت بملل هيه هاي
_وليش هسه انتي متضايقه ومختليه بروحج
_مشتاقه لاهلي مامتعوده افاركهم هيج
_ماضل شي انشاءلله اليوم طلعت والحضر كاعد ينشال يوم بعد يوم كلهه ايام وترتاحين من عدنه وترجعين لاهلج
_لا بالعكس راح اشتاقلكم هواي وافتقد سوالفكم وقضاياك
_هههه تحبين الالغاز والقضايا
_ماعرف بيهن بس احب الالغاز الاكدر احلهن
_تردين انطيج كم قضيه تحليهن الي ونشوف ذكاءج حقيقي لو صدفه من حليتي اخر قضيه
_تمام انطيني عل اقل التهي بيهن عن التفكير والقلق
_تمام باجر انشاءلله الصبح اطلعلج الملفات مالت القضيه لان ضامهه بالمخزن ارتبهن الج وانتي حليهن ووريني
_اوكي انشاءلله
_يله هسه بعدج تردين تبقين مختليه بروحج لو ندخل
_لا ندخل بعد صار نص الليل
_يله ندخل ..بس سؤال انتي جايه هنا بنص الليل وضلمه وتراب ووره البيت ماتخافين تطفر عليج بزونه تخرعج تكرصج حشره تاذيج يجي حرامي ويخطفج هاي ماخطرن ببالج من وكفتي هل وكفه
_لا لمن اكون متضايقه مايخوفني لا حرامي ولا بزون ولا حشره حتى الموت اصير احبه واريد يجيني باللحضه الاختنك بيهه
_اسم الله عليج عمرج طويل انشاءالله
_تسلم
_يله روحي لغرفتج خل اسد الباب تصبحين على خير
_اجمعين ..
:- راحت دخلت للبيت وانه سديت باب المطبخ قفلته ودخلت اخذت صلاحيه ماي ورحت لغرفتي خليتهه عل ميز وذبيت ملابسي بقيت بالشورت دخلت جوه البطانيه ولزمت نقالي دخلت
عل انستا وصرت اكلب بي لحدما نعست خليته عل شحن وتمددت على ضهري غمضت عيوني واجه بالي منظرها الذوبلي كلبي تنهدت وحجيت بكلام تخلخل من اعماقي ..
"" اااه يا تلك العيون التي يشاع ضيها بين الظلمات__
اما تلك الخدود التي يزهر بها ورد الياسمين__
واما تلك السيوف الجارحه التي تتمايل على اهدابها الناعسه __
واما تلك الخصلات الليليه التي تهوى وترتفع متلاعب بها الهواء __
كيف لي ان اصف كل هذا في الكلمات ترى انك من سيوف الاهداب والى حرحاره القدمين__
تنبضين بجنون الجمال وشغف القوه وازل الحرب والسلام __
فيا ازل الحب والحرب وشغف فؤاد الاقوياء قد صنعتي في مخيلتي هلالك في السماء وخيوط لك غزلاء__
:- ابتسمت وغمضت عيوني مستسلم لذيج الخيوط الليليه والسيوف الحربيه الي هاجمت كلبي بهاي اللحضه واحتلته لباقي حياته .. مرت ايامي وانه
اتصارع بالحرب ويه قلبي القبل يستسلم للعدو رغم الاذيه يلي يعرف راح تجيله .. صرت البيت مو دائما اكعد بي صرت عايش ايامي بين ثنين ..
بين انجذابي لجمال طلتهه وبين عذابي بفكره بعدهه صرت اشرد خوف من ان اخضع بهل حرب وتستحل كياني وكلشي بيه وتاليهه تبتعد عني وترجع لاهلهه وترفض وجودي من الاساس وياهه بهيج عمر بس شسوي بعد...
.
.
:- مر كم يوم عل حادثه هاي ودزتلنه المحكمه اشعار بالحضور للمحكمه بيوم معين همه حددوه وكلنه محامي انه وراهب وحجيناله الصار كله والصدمه لمن كال..
_ترى القضيه اخذت مجرى ثاني بدال ماجانت قضيه خطف هسه صارت جريمه قتل
راهب: يعني شنو هسه شموخ متهمه بجريمه ق تل
_اي للاسف ولازم يكون عدنه اثبات انها دافعت عن نفسهه مو ق تلته قصدا
_وشلون نثبت هل شي
_عدكم سجل المكالمه بينك وبين اختك وبين صديقك وعمه الضابط وعدكم بلاغ االخطف القدمتوه للشرطه بوقت سابق
_اي كل هذولي موجودين بس هذن ادله ثانويه مو ماديه
_اي واحتمال تنحكم حتى لو قدمنه هل ادله
_ماكو طريقه
_اكو طريقه ثانيه بس حرام
_شلون يعني
_لازم تنكر افادتهه الكالتهه بالمستشفى ونكلهم جانت تحت تاثير المهدئ وماتعرف شتكول
_وليش هل شي حرام
_لانها راح تقسم بالمحكمه على كلامهه هذا
_وتالي يعني مأيوس منهه هاي الطريقه
_للاسف نعم
شموخ : زين استاذ مانكدر نحورهه
_شلون يعني
_مثلا عادي اغير افادتي واحلف بدون حرام
_وشلون هاي بله
_احجيلهم الصار فعلا بس بغير طريقه
_احجيلي بله الصار
_الصار اني عفت خالتي ورحت ركبت تكسي حتى يوديني للكراج بس ابو التكسي تذكر ان عنده موعد ويه شخص وهو يريد يلف السياره صادف كومه البلوك الجانت مسفطه وخبط بيهه وصار الصار وبعد مارجع وعيي حاولت اكعده بس ماكعد واضطريت انزل ادور ناس تنقذه بس للاسف
اغمى علي اول ماشفت راهب وماكدرت اكله عل رجال وبعدها هو اخذني للمستشفى وهو مايدري بيه مسويه حادث ولا يدري بوجود ابو التكسي فما لحكنه عليه وبقى يحاول يبقيني صاحيه ومانام
وانه من الصدمه فكرت ان بسببي سوه الحادث لان خليته ياخذني للكراج رغم الحضر ولان ماكدرت انقذه بالوقت المناسب وبقيت اهلوس اني قتلته وهيج منا لوصلنه للمستشفى وتكون خلصت القضيه
_ هممم من تحجيهه بهاي الطريقه تبين مقنعه وهيج يكون السايق هو مسوي الحادث وانتي ضحيه بس عدنه مشكله ثانيه
_وهيه
_ الموقع يكول انكم جنتو رايحين لمنطقه مهجوره برضاتج ويا مارايحه للكراج
_عادي بنيه صغيره وغريبه عل منطقه انه وماقره البشر واعرف اذا جان رايد يوصلني للكراج لو يخطفني هيج راح يشكون بي خاطفني بدون ماحجي حتى
_تمام خلينه نثبت على هاي الافاده بالاول واذا لكيت شي ارجع اناقشه وياكم
#راهب: تمام استاذ شكرا الك
شموخ : شكرا الك
_لا العفو واجبي واساسا المجرمه ذكيه ماشاءالله فرت القضيه وفرت راسي وياهه عبالك كاعد ويه محققين
راهب : منيلهه مجرمه يمعود بس وياك حق تنفع تصير محققه على ذكائهه هذا
_اي فعلا هيج ذكاء مرغوب بين المحققين انصحج روحي لهذا الاختصاص
شموخ : انشاءلله افكر واشوف
_اي فكري احسه يلولكج المهم عن اذنكم هسه رايح انه ادرس بقيه القضيه
#راهب : الله وياك استاذ تعبناك
_تعبك راحه #ابو_الرواهب
:- طلع من البيت وراهب باوعلي لحضه وكال..
_منين جبتي هل فكره هاي واحنه توه نتناقش بيهه
_ماعرف بسرعه خطرت على بالي من بين هواي افكار
_بهل سهوله
_سهلهه تسهل صعبهه تصعب
_كفوو والله
_ههه شكرا..
ابتسم ورحت للغرفه مالت البنات كعدت يم اسراء وسالتني بترقب..
_هاا شكال المحامي شراح تكولون بالمحكمه باجر
_بعدنه مامقررين شنسوي بس ثبتنه على افاده وحده وان احجيلهم الصار كله
_وتكليلهم انج كلبتي السياره بيكم قصدا
_لاا شسالفه حتى اروح بيهه سجن مؤبد غير
_جا شراح تكولين
_شوفي راح نحور السالفه واكول ......
سولفتلهه عن خطتنه وشلون راح نفرهه للسالفه وهيه عيونهه تبتسم اخر شي خلت اديهه على اكتافي وكالت بطريقه تمثيليه..
_شموخ هل تقبلين الزواج بي
_لماذا
_احب ان يكون شريكي ذكيا شجاعا قويا
_ولكني امراة
_اووه نعم للاسف اذا هل تقبلين الزواج باخي لتصبحي اختي قانونيا
_نوو يععع
_ههههه
_هههههه
ضحكنه وعبير وبان ماتن ضحك على هل مسرحيه السويناهه تالي سحبتني كعدت يمهه واخذت نقالهه تكلب بالقنفات يلي بالانستا طلعت تخم تركوازي وابيض وورتنياه تاخذ رايي وكالت..
_شريك شرايج اجيب هذا التصميم واللون احسه راح يفتح لون الصاله
_ههه اي حلو مميز
_شرايج اجيب هيج نوعيه من البردات قماشهه مو كلش ثخين لان الصيف بالطريق وبرداتنه كلهن ثخان عبالك بطانيه
_اي صحيح راح تجيبين بلون القنفات مو
_اي اجيب تركوازيه
_وبس
_اي بس جا شنو
_ماتطلع حلوه نسقيهه ويه فجه اوف وايت بالوسط تنحط والفجتين على الجوانب تركوازي شتكولين
_اي هم حلو ويكشف عنهن تمام لعد راح اجيب مثلما كلتي هسه خل ندزهم للبيت وانشاءلله يكونون موجودات تم الارسال شكرا شريكتي
_العفو ههه شسويت قابل
_يفدوا للقابل
_هههه والله عليج سوالف هنيالج على روحج
_عبالي راح تكولين هنياله الياخذج
_لا يعع شلج بي مايستاهلج
_هههه عشتي
_هههه والله
دزت القنفات والبردات لابو البيج ورد عليهه وره دقايق وطلعن موجودات وراح يجيبوهن الهه بعد يومين شحن وعبير كذلك وصت جرابي كبار وجدد
لغرفتهن وعرضت هذن للبيع بالسوق المفتوح وخلال يومين جهزن الصاله والغرفه وكلش حلوات ومرتبات صارن ماعرف ليش بس احنه النسوان
نموت عل تغيير والتسوق خاصه بالاثاث .. جبت المزهريه الجنت اسوي بيهه خليتهه عل طبله بوسط الصاله واجيت يم اسراء الصافنه بجمال انجازهه ..
_عاشت ايدج عل وردات شموخنه الصاله صار بيهه روح
_ههه ايدج العايشه انتي هم عاشت ايدج الاثاث يجنن وحيل مريح
_انتي العايشه عمري والله لو ما الظروف جان دخلت تصميم داخلي
_هههه يلوكلج والله
_هيج رايج
_اي حولي اختصاص عادي
_يوووه يرادلي فلوس يابو فلوس وبالاخر لو اتعين لو اضل خليني بوظيفتي الحاليه والهندسه خليهه هوايه وشغله ثانيه الي المحتاج اثاث مرتب يتصل على الرقم التالي ههههه
_ههههه
مرت الايام عاديه وصار وقت المحاكمه اتفقنا نكول نفس الافاده لان مو مستاهله اروح اكضي جم سنه بالسجن وانه كلشي مامسويه بحجه ان دليل ماكو
لو خوش ادمي ماحجي شي وبنفسي اروح اسلم روحي بس مو شخص عار مثله حلال بي الموت ..
طلعت من الحمام واسراء انطتني من ملابسهه مالت الطلعه لبست ولفيت حجابي وطلعت انه وياهه وراهب والمحامي وصلنه للمحكمه وبقينه
ننتظر القاضي كلهه دقايق ودخل وكف كل يلي بالقاعه وبدت الجلسه المدعي العام جاب افادتي بالمستشفى ويريد يلزمهه علي والمحامي ماقصر
كله ان اخذوهه وهي بحاله تخدير مامعترف بيهه وهيج اسقط القاضي افادتي الاولى وطلب المدعي يستجوبني كمت على المنصه وصار يسالني ..
_انتي #شموخ_شهم_محمود
_اي نعم
_شكد عمرج
_١٦ سنه 🌷
_بيا صف
_ثالث متوسط
_وين تسكنين
المحامي : اعتراض سيدي القاضي هل اساله مالهه علاقه بالقضيه
القاضي : قبل الاعتراض
المدعي العام : انتي كلتي انج رايحه لاهلج ولهذا السبب سالتج عن مكان سكنج حتى اتاكد من افادتج
#شموخ : ساكنه بالبصره واجيت انه واهلي هنا للزياره قبل الاربعين بكم يوم وضاعوا اهلي مني بالانفجار ولهذا السبب ابتعدت عنهم فتره طويله وعشت ببيت خالتي وفاء يعقوب
_ وشلون امنتي بناس غربه وكعدي وياهم
_اي بنيه بهيج موقف تضطر تروح ويه ناس ماتعرفهم وماتبقى بالشوارع
_وليش مارحتي لمركز الشرطه بقيتي
_عندي اندروفوبيا ماكدرت ابقى بالمركز
_جا شلون ركبتي تكسي وشلون عشتي ببيت وفاء يعقوب وابنهه موجود
_عندي فوبيا من تجمع اكثر من رجل غريب ماعندي مانع ويه شخص واحد او شخصين
_تمام احجيلي بهذاك اليوم شنو صار وياج وليش طلعتي بدون ماتكولين لخالتج وفاء
_بهذاك اليوم رحنه ندور على اهلي بالمستشفيات والمراكز ومالكيت الهم خبر فجنت مقرره من الليل ان اذا مالكيتهم اخذ سياره من الكراج توديني لميسان لبيت عمي باقر
_وليش ماتصلتي باحد منهم
_ماحافظه رقم
_كملي
_وبعدها تجرات وركبت تكسي وكتله يوديني للكراج واحنه بالطريق تذكر عنده موعد مهم ولف السياره بسرعه بدون مايشوف بصفه وماعرف شلون وانصدمنه بالبلوك وبعد فتره رجعلي وعيي وانه مادري شصار ولا شسوي ولمن شفت السايق مدمه حاولت اكعده ماكعد ولا رد حاولت
بكل قوتي اطلع من السياره رغم الجروح البيه وصدمه راسي بس لحتى انقذه بس للاسف ماكدرت بمجرد ماطلعت عل شارع العام بعد ساعه من المشي المتقطع انهد حيلي واغمى علي اولما شفت راهب جاي باتجاهي ..
_ليش ماكتيلهم ينقذون السايق ولزمتي الصمت عن وجوده بخطر
_كتلك اغمى علي بمجرد ماشفت راهب ماكدرت انطق بعدها غير بهلوسات كل الاتذكره اني جنت مفكره السايق مات لان مارجعت عليه ولا كدرت انقذه صرت الوم بنفسي واكول مات بسببي ..
_تذكرين شكد رقم السياره
_لا لان من دخلت انه مستعجله ومن طلعت جنت بحاله مزريه مانتبهت على رقمهه
_زين ليش كلتي كلبت السياره بينه
_ماعرف جنت اهلوس بيومهه من الصدمه وخليت كل اللوم بيه اول مره اتعرض لحادث سياره ماعرف شكول بوقتهه وصوت الجلاب والعوي باذني خفت حيل وضربه السياره سببتلي ارتجاج ورضوض بالمخ يعني اكيد اضل اهلوس واكو شاهد على هل شي
_لحضه لحضه يا سياره ضربتج
_لمن صار الحادث اول مانضرب راسي بسياره بعد ياسياره استاذ
_شلون ماعرف بالبلوك بله اوصفيلي شلون صار الحادث شلون انكلبت السياره
_ ماتذكر تماما شنو الصار بس اتذكر لمن رجع ليوره وفر الستيرن وانضربت بالبلوك بعد شلون انكلبت وشلون صار الحادث من بره ماعرفت ورغم هوه لزم بريك بس مالحك جانت المسافه قريبه
وانه شمرت روحي نايمه عل كرسي حتى ماتضربني بلوكه هيج فكرت بلحضتهه ومن بعد ما ضربت راسي ماحسيت على شي كلشي صار غواش بعيني
_زين تذكرين بشنو حجيتي ويه الطالب راهب وشنو كلتي بافادتج
_ لا ماتذكر الا القليل لان فقدت السيطره على عقلي ولساني ورغم اباوع واحجي وياه بس ماتذكر الحجيته وحتى لمن اجو الشرطه اخذوا افادتي ماتذكر شنو حجيت بالضبط
_شلون عرفتي نفسج تهلوسين
_لان كتلك اتذكر اني حجيت ويه راهب وويه الشرطه بس ماعرف شحجيت وكان اذاناتي جانت ماتسمع الكلام اليطلع من لساني وكان جنت نايمه بس كاعده بنفس الوقت لساني يحجي من وحده ماكدرت اتحكم بي ولا اسمع الحجي اليطلع مني
_زين تدرين ان افادتج هاي تختلف عن افادتج بالمستشفى
_اي اعرف
_ومنو كلج ان افادتج غلط ولازم تغيريهه
_صح كلولي اني اعترفت وحجيت اشياء بافادتي انه مامسويتهه بس محد كلي او جبرني اغير افادتي وانه هذا كلامي فقط الاتذكره وبعد الحادث ماتذكر اي شي حجيته او سويته ..
_يعني جنتي تعرفين بافادتج قبل ماتطلعين من المستشفى لو بعدهه
_لا بعدهه بايام وماعرفت منا لاجه اشعار حضور المحكمه وبوقتهه تفاجات بي لان الاعرفه انه مامسويه شي ليش يستدعوني للمحكمه فطلبت من راهب ان يحجيلي الصار وياي وهو حجالي عن مضمون افادتي الاولى
_تمام اريد اطلب شاهد عيان سيدي القاضي تكدرين تتفضلين شموخ
باوعت لراهب باستغراب وهو كذلك باوعلي ونزلت متردده منو هل شاهد ومنين جابه ماعرفت الا لمن دخل شخص جنه مجرم مسلبج وضعيف وسنونه فرك يشبه هذاك النذل تماما ..
صعد على منصه الشهود وساله المدعي العام..
_انت هلال ماحود مو
_نعم سيدي
_شتصير من المغدور سراب
_صديقه وشريكه
_بشنو تشتركون جنتوا
_سيدي نخطف بنات نغتص*** وو
_وو شنو
_نق تلهن او نبيعهن سيدي
_وين تبيعوهن
_على دور الدعاره
_بيوم الحادث شنو كلك صديقك المغدورقصص ماي هوبس
_دزلي رساله كاتب بيهه ان خوش شافله صيده اجتله برجليهه للمكان وكال راح اجيبهه حضروا المقر
_وبعدهه
_بعدهه ضلينه ننتظره انه وكم واحد من جماعتنه بالساعتين وماكو رجعنه اتصلنه عليه نقاله مغلق طلعنه موقعه عن طريق السياره ورحناله وشفنه الشرطه هناك جماعتي شردوا وانه انكمشت وتحولت للتحقيق
_زين تعرف اذا جان عنده موعد مهم بهذاك اليوم او لا
_ماعرف سيدي بس
_بس شنو
_سيدي جان عند بنته موعد ويه الدكتور بيومهه ولازم هو ياخذهه
_اي دكتور
_اخصائي الامعاء الدكتور ^^^^
_ولغه الحجز بهذاك اليوم لو كال اروح
_لا سيدي كال اروح هو ابد مامفوت موعد لبنته لان ماعدهه بس هوه يوديهه بيبيتهه مره جبيره بالعمر ويادوب تكدر تطبخلهه
_شكد عمرهه الطفله وشنو مرضهه
_٤ سنوات سيدي وبيهه سرطان المعده
_وجان يبيع البنات علمود يوفرلهه العلاج
_لا سيدي
_لعد شنو
_هذا الشغل بدينه بي من قبلما تجي بنته وهاي البنيه بنت وحده من البنات الغتصبهن بس ماتت بولادتهه واخذهه هوه رباهه وتعلق بيهه بس لمن كبرت كم سنه كاله الدكتور ان بيهه سرطان المعده وهل شي وراثي يعني ورثته من امهه
_يعني امها جانت بيهه سرطان المعده واغتصبتوهه
_اي نعم سيدي
_وجنتو تدرون
_اي سيدي هيه كالت لسراب انهه مريضه بيومهه عبالنه تحجي هيج حتى نعوفهه ومانسويلهه شي
_هيج وصلت وياكم الوحشيه الحيوان ماسوه سواياتكم انزل والكك يوم انتو بهاي القاعه
_حاضر سيدي..
نزل من المنصه وكلبشوه الشرطه وطلعوه بقه القاضي يتناقش بالصار والقى حكمه وكال..
_حكمت المحكمه للمدعي عليها شموخ شهم محمود بالبراءة وسيتم اطلاق سراحها بغرامه تكلف ١٥٠ الف دينار عراقي رفعت الجلسه..
غمضت عيوني وتنفست براحه فتحتهن وشفت المدعي العام كبالي نزل يم اذني وهمس..
_اعرف بدلتي افادتج بس شكري ربج هلال حجه مصايب سراب وشفته مايستاهل ادافعله وهيج خليتج تنفذين بريشاتج لهذا نصيحه مني التزمي
بالفوبيا مالتج وابتعدي عن جنس ادم ان جان سايق او دكتور او شمهما جان لان شكلج راح تغلطين اكثر بالمستقبل ويجوز مايصير اكو هلال يطلعج منهه بعد..
ابتعد عني وانه اباوعله بقوه واتنفس غضب ابتسم باستهزاء غمزلي وراح اجه راهب علي من فوك الحاجز وحجه بقلق..
_شنو حجه وياج هذا مارتاحيتله
_يكلي ادري بيج جذبتي بافادتج وطلب هلال حتى ابينلج ان ماحجيت شي لان ماريد ادافع لواحد مجرم مثل سراب
_مالج شغل بي حتى لو يعرف ماعنده اثبات انج جذبتي لهذا السبب طلع حجته بهلال
_اي اعرف يولي اصلا ماخليت بالي وياه اعرف هيج نماذج تريد كوه يبين لخصمهم انهم اذكياء وهمه اغبى منهم ماكو
_عفيه عليج خوش جاوبتي اليوم وعلى شرف هل مناسبه عازمكم على عشه
_لا شكرا الك مايكفي خسرت فلوسك عل محامي والكفاله بعد تريد تعزمني
_كلشي يرخصلج
رفعت راسي باوعتله باستغراب وهو ضحك وحك راسه باحراج ماعرف بشنو يفكر مرات يسوي تصرفات غريبه اتجاهي احسه يهتم زايد المهم طلعنه من المحكمه رجعنه للبيت وكنالهم بالصار
وتطمنوا لان ماتحاكمت ظلم وعدت على خير وطبعا للاحتياط صمت ٣ ايام لان جذبت رغم ماخلوني اقسم بس تحسبا .. وبعدها بكم يوم مثل كل باقي الايام طلعت من الغرفه بعدما كملت
صلاتي شفت عبير لازمه سله الملابس وتمشي مدري وين رايحه بيهه رحت للصاله وقبل لا ادخل سمعت خالتي واسراء يحجن بالصاله وخالتي تكللهه..
_يوم اسراء الولد صح غلط وياهه بس هو اجه واعتذر وكال انه حبيتهه وطالب ايدهه كتلهم البنيه تريد تكمل تكلي عادي تكمل عدنه عند رجلهه كتلهه
بعدهه صغيره تكلي احسن البنيه تزوج وهي حرثه وضلت تلح علي احجي ويه اهلهه وكلما شافتني سالتني حتى صرت ماوريهه وجهي واشرد شراده منهه
_يولون هذا عنده غايه من هل سالفه مدام شموخ ضربته ورزلته تلكي ضماهه الهه ويريد ينتقم عباله هيج احنه اغبياء وغشمه ننطي البنيه حتى لو جانت غريبه شموخ عزيزه على كلبنه ومانورطهه ويه واحد سزز نفس هذا وبعدين شلون احنه نقبل ننطيهه واهلهه مامعروف وين اراضيهم شتكول علينه البنيه عمي سكتي لا تحجيلهه ولا تجيبين طاري لا تكول متضايقين مني نوب
_لا يمه شلون اكلهه هاي انه احجيلج من ضيمي من هل مره هوه انه ردت افشلهه واعاركهه بس استحيت اكلهه ابنج هيج وهيج بقيت احجي وياهه باحترام ولطف بلكي تفك ياختي بس عبث يايمه مرمرت كلبي صارلهه ٣ ايام ونوب تكلي راح اجيب مشيه واجي اطلبهه منكم يعني تريد تجيب زلم وتفضحني بين العربان
_لا والله شنو مثلا تهدد هيه اذا ماقبلتوا اخذهه غصب لو افشلكم كدام الناس حلوه هاي
_والله يايمه ماضنيت توصل بيهه لهل مواصيل والمشكله البنيه ماكدر افتح وياهه هيج موضوع وماريدهه تسمع بهاي السيره وخاف تجي المره وتحجي وياهه نتفشل يايمه كدام البنيه معناهه
_لا يمه ديري بالج تحاجينهه ترى شموخ تكره ماتكره سالفه الحب والزواج دخيلج لا تضايقين البنيه وتشرد بليله ضلمه من عدنه
_لا يمه شمالني تخبلت مدامج هيج تكولين ابد بعد ولا افكر اكلهه بهيج سوالف وهاي صاحبتي بس اشوفهه اكلهه حاجيت البنيه ورفضت هيه واهلهه وخليهه تسكت عني
_اي يمه يولون ناس سزز فوك شينهم يهددون وهيه بعد لا تماشينهه هاي المره طلعت منافقه وجذابه تولي
_لا تولي انه من شفتهه حجت هيج كلت هاي ماتفيد كابلتني وهددتني وتحجي مو كانهه تطلب لا عبالك كاعد تامرني
_اي يوم اكو هواي نسوان بالديره شوفيلج وحده زينه وصادقيهه وروحي ورجعي عليهه الا هاي
_لا عندي ام اوس صاحبتي من الشباب اروح وارجع عليهه ضليت
_اي هاذهو جا بعد على شنو متضايقه على صاحبتج هاي
_مامتضايقه عليهه بس متضايقه على روحي يمه وثقت بيهه وصادقتهه وعبالي خوش مره وطلع كل البلى بيهه مثل مانكول خذلتني وماحب اليخذلني انه
_ميخالف حبيبتي همزين انكشفت هسه ولا بعدين تسويلج سالفه ماتعرفين تطلعين منهه
_على كولتج الحمدلله على كل حال
_الحمدلله..
اسمع بكلامهن وكوه متحمله وكفتي بمكاني رحت للمطبخ شربت ماي وانه احجي ويه روحي بعصبيه..
_شمفكر روحه هل عار حتى يخطي هيج خطوه بشنو فكر لمن خله امه تطلبني من خالتي اااخ لو يطيح بيدي الا اذبحه واشرب من دمه خرب شكله همين ..
رجعت الكلاص لمكانه بعصبيه وطلعت للساحه اشم هوى غمضت عيوني ورفعت راسي والهوى يضرب بوجهي فتحت عيوني واشوفه كدامي لهل نذل
فوك سطح بيتهم منتجي عل حايط ويباوعلي جنت لابسه حجاب ماهمني بس استغليت هل شي فرصه ورحت اصيح عليه يم السياج باعلى صوتي
لميت العالم عليه وعلى اثر صياحي طلعوا خالتي وراهب والبنات اجه ركض علي لزم زندي عصره بعصبيه وكال ..
_شكو شصاير ليش تصيحين لميتي الناس علينه
_شوفه هذا ابن الجيران شافني بره وبقه واكف يباوعلي همزين لابسه حجاب جان الله اعلم شنو شاف..
انه حجيت هيج وهو نطت عيونه شرار مختلط بغضب رفع راسه وشافه بعده واكف مصدوم مايعرف شسالفه تركني وطلع ركض لبيتهم دك
الباب وهو يصيح ويغلط عليه خالتي طلعت وراه تلطم على خدهه تصيح انفضحنه والبنات يردن يفهمن شسالفه وانه كتلهن يراقب بينه من فوك السطح تخبلت عبير لانهه قبل شوي جانت بره تشر
ملابسهه ولابسه برموده صارت هيه الثانيه تدك على وجهه وكول تصخمنه صارت شي تركع بشي شفت النذل طفر على سطح الجيران وطلعت بالشارع صحت لراهب..
_راهب هذاك هوه طفر على سطح الجيران الحكه بسرعه
_دخلي جوه رايحله
دخلت للبيت وهو راحله يركض وصار مطافر من السياجات صار مثل الفاره هذاك من مكان لمكان يطفر وراهب يركض وراه لحدما ضاعوا من نضرنه
راحت خالتي تدور عليه بين البيوت هيه واسراء واخو الجبير للنذل .. سدينه الباب ودخلنه جوه احنه وكلت لعبير تتصل عل شرطه تشتكي عليه
مالازم نسكتله وهو يراقب بنات الناس عاد ماكالت باطل بسرعه اتصلت على شرطه وانطتهم معلومات عنه حتى بلكي يلحكونه لا يسوي بي شي راهب باوعتلهه بعدما سدت المكالمه وكتلهه..
_لا تخافين شيسوي مثلا راهب يلزمه ويودي للشرطه
_ايباااخ شتحجين انتي وج هذا راهب بهيج سوالف ماينعرف يصير كلشي الا احنه يصير مثل الضبع ياكل الاخضر واليابس لو واحد يمس طرفنه ادعي ربج ان مايلزمه والا كولي راهب جرم بيه ودخل سجن
_هاي شنو اشو مامبين عليه هل عصبيه كلهه دائما اشوفه هادئ ولطيف
_اي جا شتردينه يزمخ علينه ويصيح ههه
_ههه لا بس ماعرف الشخص العصبي مبين عليه من تصرفاته بس هو ابد
_عصبيته ماتنشاف من خلال التصرفات وانما بالاحساس تكدرين تحسين بي بنضره من عينه اذا جان عصبي لو لا
_هنا مادري مامباوعه بعيونه بصراحه
_انشاءلله يارب ماتشوفين بحياتج غير عيونه
_اووو عبير رجعنه على نفس السالفه هاي
_هههه اتقشمر وياج شبييج
_اي صدكتج
_هههه يله بله كاعدين نضحك والحاله كسفه
_انشاءلله مايصير شي لا تخافين
_انشاءاللہ
ضلينه ننتظر فتره مو طويله سمعنه صوت سياره الشرطه بالمنطقه بقت فتره واختفى كلنه اكيد هسه اخذوه شويه ودخلت خالتي واسراء حالتهن حاله وكلهن تراب رحنه عليهن ركض وكالت اسراء ..
_الله واكبر ربي كافر وطايح بمسلم حتى احنه ماضل بينه حيل همزين اجت الشرطه فكوه منه
_شنو شصاير بس لا سوه شي براهب هل نذل
_تهي بهي يا سوه بي شي ولج غير جنزه هسه اخذوهم الشرطه ثنينهم لان اعتبروهه مشاجره شارع كنالهم عمي هوه طل على حرمه بيتنه هو العايل ماكو لان راهب ضربه اعتبرت مشاجره
_خالتي اخذيني للمركز الودوهم اله اريد احجي وياهم بلكي يتركون راهب لان مايصير يبات ليله بالسجن بحكم جامعته ومستقبله
_اي ولج خاله صدك شلون راحت من بالي كومي يمه شموخه لبسي ملابسج وخلينه نروح لا يروح مستقبل الولد شربه ماي كومي خاله وانتي يمه عبير حتى تاخذينه بالسياره بنيتي
_اي خاله كايمه ..
_حاضر امي
رحنه بسرعه انه لبست الصايه مالت اسراء ولفيت حجابي عدل وعبير كذلك لبست صايه وحجاب وطلعنه لبست برجلي ورحنه بسيارتهه للمركز
مسافه ووصلنه نزلت ومالكينه بس ثنين ضباط همزين والا جان شردت حجت وياهم خالتي وصاحتلي انطي افادتي او شهادتي المهم احجيلهم الصار .. حجيت كلشي وطبعا لازم ازود شويه حتى
يادبونه كتلهم اكثر من مره شفته وعبالي يدرس او فد شي بس تالي شفته يباوع لاختي عبير وطلعت عليه وهو فعلا لمن طلعت وشفته جانت عبير توهه داخله يعني اكيد شافهه ..
سجل اقوالي وانطانه ورقه مال كفاله كفلته خالتي وطلعوه هو شافنه واجه علي يركض وحجه من بين سنونه..
_شتسوين هنا شموخ ليش اجيتي
_اجيت انطيهم افادتي حتى يطلعونك مايصير تبقى هنا وانت...
_شلج شغل بيه ان طلعت او لا طبني مرض المن اجيتي لهيج مكان وكله زلم
_ماكو بس ثنين ماصار شي وراجعين احنه ماضالين
_امشوا يله كدامي يمه لا تسمعين كلامهه بعد وتجيبيهه لهيج اماكن مره ثانيه
_يمه جا غير خفت عليك وهيه وياي مارايحه ويه غيري
_ميخالف يوم البنيه بيهه فوبيا احسن تطيح عليج
_لا اسم الله عليهه انشاءلله ماتنعاد وانت هم يايمه الزم روحك شويه لا تسويهه كلش اذا لزمت بنادم ماتفكه الا تطلع دمه
_يولي هل عار يستاهل الصار بي ولو ما انتن جان عرفت شغلي وياه معدل ومن باجر اودي كوامه لعشيرته هل ناقص ماريده يمي بعد وعلي ابو الحسنين الا اشيله بليله ضلمه ومايندل دربه يضل
_ولك يمه عوفك منه فدوا اروحلك مراهق وطايش وبعد السويته بي مايتجرا يباوع لبيتنه بعد
_حجي لسان هذا يوم هذا مدامه دخل مركز شرطه بعد مايخاف من شي يزيد ماينقص تالي المهم عوفينه من هل سالفه هسه خلونه نرجع للبيت اريد اسبح متت من الطين
_تمام يمه يله امشي
رجعنه للبيت ومر اليوم كالعاده وثاني يوم ماجذب راهب راح دك بيتهم هو وجماعته ووده كوامه لاهله وعشيرته وبعد اسبوع الكعده ماصار اسبوع هذا
بسرعه مر عبالك يومين واجت الناس والشيوخ خيره واحنه بالجاي والماي صب وودي لحدما مرت ساعتين او اكثر وطلعوا اجه راهب للصاله وكف مسح وجهه من العرك بالكلينكس وكال...
