رواية جثة متفحمة الفصل الرابع بقلم محمود الأمين
الدكتور عزت نصار معندوش السكر اصلا.. يعني ايه؟
رجعت تاني اتصلت برئيس المباحث وقولتله
_ انت لقيت الورقة دي فين؟
= كانت في الاحراز.. واثناء الفحص لقينا الورقة دي، والورقه بتشمل تحاليل شاملة عملها الدكتور عزت نصار قبل الحادثه باسبوع، والتحاليل بتقول انه مش مصاب بمرض السكر اصلا، فازاي اتصاب بغيبوبة سكر يوم الحادثة
_ فعلاً.. ومعنى الكلام ده ان الدكتور عزت ضحك علينا، وفهمنا ان هو كان في المستشفى وقت وقوع الجريمة او قبلها بكام ساعة كمان، عشان يبعد عن نفسه الشبوهات
=منا قولت ان الموضوع مش صدفه، اصل حوار ان نفس الشخص اللي نقله المستشفى يبقي هو نفس الشخص اللي عمله العملية دي.. مستحيل تحصل
_ بس احنا بنتعامل مع واحد مش غبي، اكيد مظبط الورق في المستشفى على انه كان موجود هناك وقت وقوع الجريمة، ولكن احنا هنعمل اللي علينا ولازم نفحص الدفاتر في المستشفى، وهنخليه يعمل تحليل سكر قدامنا ودي اللي هتقطع الشك باليقين.. وهتخليه يعترف على كل حاجه عملها
بس في حاجه كمان، من شوية جالى بواب العماره اللي فيها شقه الدكتور عزت نصار، البواب قال ان الدكتور النفسي بتاع مدام صابرين.. اللي اسمه كريم السيوفي كان بيتردد على شقه مدام صابرين في الوقت اللي جوزها مش بيكون موجود فيه، وبيطول وبيقعد بالاربع ساعات فوق.. ودي حاجة هتخلينا نشك في الدكتور كريم انه كان على علاقة بمدام صابرين
= طيب حضرتك هتعمله اذن استدعاء، ولا نعمل عنه تحريات في البداية
_ اكيد عاوز اعمل عنه تحريات، عاوز اعرف مين الشخص ده قبل ما اقعد معاه، عشان يكون قدامي كتاب مفتوح وميعرفش يتهرب من اي حاجة
****
عملنا تحريات عن الدكتور كريم السيوفي زي ما طلبت مننا النيابة، ونتيجة التحريات مكنش فيها اي حاجه تدين الشخص ده غير موضوع مدام صابرين.
مدام صابرين كانت بتتعالج عند الدكتور كريم السيوفي وكانت حضرت جلستين بس، وبعدها ارتكبت الجريمه اللي في حق بنت اخوها.. ولكن في شهاده الدكتور كريم قدام النيابة قال ان مدام صابرين بتتعالج عنده من زمان وده اللي خلاه يكتب تقرير في صالح مدام صابرين واللي اعتبرتها النيابة انها غير مسؤوله عن تصرفاتها وعشان كده طلعت من الموضوع براءه.. فالسؤال ايه يخلي الدكتور كريم يعمل كده؟!
وبعتنا التحريات للنيابة.. اللي اكيد هتستدعي الدكتور كريم للتحقيق معاه
*****
لما وصلتني التحريات كنت مستغرب، وعشان كده استدعينا الدكتور كريم السيوفي.. والراجل كان عندنا في نفس اليوم
_ دكتور كريم ده تحقيق رسمي، وحضرتك مشتبه بيه في جريمة قتل واحدة كانت بتتعالج عندك وهي مدام صابرين
= معلش انا مالي بموضوع مدام صابرين، مدام صابرين كانت بتتعالج عندي زيها زي اي مريضة، وعرفت بخبر وفاتها زي اي حد
_ حسب شهاده البواب قال ان انت كنت بتتردد على شقه مدام صابرين في غياب جوزها، فهل ده كان بيحصل فعلاً؟
= محصلش قبل كده، الراجل ده بيكدب انا عمري ما زورت مدام صابرين في بيتها
_ يعني الراجل ده بيكذب؟!
=انا معرفش هو قال كده ليه؟!.. وبصراحة مستغرب جداً
_ طيب في سؤال تاني.. على حسب التحريات انت كذبت على النيابة في موضوع مدام صابرين لما قتلت بنت اخوها اللي عندها حساسيه من الشطة، واقوالك قدام النيابة ان مدام صابرين كانت بتتعالج عندك من زمان، ولكن التحريات قالت ان مدام صابرين كانت خدت عندك جلستين بس، فهل من جلستين قدرت تحدد ان مدام صابرين غير مسؤول عن تصرفاتها؟!
= تحريات حضرتك غلط يا فندم، مدام صابرين اتحجزت في المصحه اللي انا بشتغل فيها وانا كنت الدكتور المسؤول عن حالتها، ولكن جوزها كان رافض يقول انها في المصحة وقال انها سافرت بلد عربي.. وحضرتك لو رجعت للتحريات هتتاكد من كلامي، وبعدها جتلي فعلاً العياده جلستين وبعدهم حصلت الجريمة.. فانا عارف انها غير مسؤوله عن تصرفاتها وعشان كده شهدت بالكلام ده
...
رجعنا للمباحث واتأكدنا فعلاً من كلام الدكتور كريم السيوفي.. وعشان كده تم الافراج عنه
وبعدها استدعينا الدكتور عزت نصار
_ ها يا دكتور عزت، صحتك عامله ايه دلوقتي.. لسه بتجيلك غيبوبه السكر؟
= لا انا دلوقتي احسن
_ طيب يا دكتور عزت.. ايه رأي حضرتك انك معندكش سكر اصلا
وان موضوع ان جالك غيبوبه سكر ده، كله كذب في كذب
=ها.. حضرتك بتقول ايه؟!.. انت قصدك ان انا كداب، انت مش عارف انا مين؟.. انا الدكتور عزت نصار
_ لا ما انا عارف انك الدكتور عزت نصار، بس حضرتك اللي ناسي انك قدام نيابة ومطلوب منك انك تتكلم عشان تنقذ نفسك، رواية غيبوبة السكر طلعت كدبة مع الاسف، وسجلت في دفاتر المستشفى ان اللي جابك هو ابراهيم عيد، الشخص اللي انت اتفقت معاه على كل حاجة، وكان لو اتقبض عليه او استدعيناه كان هياكد كلامك وهيقول انه لاقيك في الشارع وتعبان ووداك المستشفى، وطبعا طبخت الموضوع مع زمايلك في المستشفى وظبطت الدفاتر وكل حاجه بقت تمام.. وفي بلدنا طالما الورق تمام.. يبقى الدنيا كلها تمام
ولكن حضرتك نسيت انك كنت عامل تحاليل شامله قبل اسبوع من جريمة قتل مراتك.. التحاليل دي كانت باستثناء تحليل السائل المنوي ووقتها انت كنت فاكر نفسك مش بتخلف
وسبحان الله التحاليل دي كان في الاحراز اتاخدت من الشقه اثناء فحصها في جريمة قتل مراتك مدام صابرين، والمباحث لما فحصتها بعتتلي
فانا عاوزك تحكي الحكايه من اولها.. عاوز اعرف قتلت مراتك ليه وازاي.. وقتلت ابراهيم ازاي؟.. عاوز اعرف كل حاجة
= حاضر يا باشا، انا هتكلم
الموضوع بدأ لما عرفت ان صابرين بتروح للدكتور النفسي اللي اسمه كريم السيوفي، كانت بتكلموا على النت وبشوفها بتضحك بتكون مبسوطه وهي بتكلمه، ولكن لما اكلمها انا تقلب وشها عليا.. وفي يوم كنت في المستشفى بخلص شويه شغل ورايا، ولقيت الناس بتباركلي، مكنتش فاهم على ايه؟
ولكن اكتشفت ان مراتي حامل وانها كشفت في المستشفى عند الدكتوره المسؤولة عن قسم النساء والتوليد، حامل ازاي وانا مش بخلف.. عرفت انها بتخوني وكنت عارف هي بتخوني مع مين؟
فضلت افكر هعمل ايه وهتصرف ازاي؟!.. لحد يوم الجريمة كنت خلاص رتبت كل حاجة وقررت اواجهها في البداية جايز تعترف، ولكن لما واجهتها اتهمتني بالجنون وطلبت الطلاق، نزلت ضرب فيها زي المجنون وكنت مخطط اني هولع فيها وعملت ده فعلاً، وبعدها نزلت من سلم الطوارئ بس اكيد البواب شافني وانا طالع، وقتها هددته انه لو قال انه شافني هقتله هو وعيلته كلها
ووقتها لجأت لابراهيم الشخص اللي انا عملتله العمليه الشمال، وطلبت منه اني محتاجه في شهادة وانه هيشهد قدام النيابه انه وداني المستشفى وانا مغمى عليا.. وظبطت كل حاجه في المستشفى وكنت فاكر ان الموضوع كده خلص.
ولكن الاستاذ ابراهيم طلب فلوس زياده.. وهددني اني لو مدفعتش هيروح قدام النيابة وهيشهد ضدي، وكنت عارف انه كلب ومش هيشبع فزقيت عليه ناس من عينته وبجرعه زياده من الهباب اللي بيتعاطاه خلصت عليه وخليتهم شوهوا الملامح ورموه في الصحرا، لكن الاغبية سابوا معاه البطاقه والمحفظه بتاعته.. ولما لقيت نفسي هتكشف خلاص، قولت اروح احلل واشوف النتيجة خصوصا اني كنت بتحسن، ووقتها الدكتور اكد اني ممكن اخلف، وقولت بالتقرير ده هخلي النيابة تحس ان ندمان ظلمتها بعد ما ماتت، ولكن مكنتش اعرف اني بلبس نفسي زيادة
ولما لقيت الموضوع بيعك زيادة.. اديت شوقي البواب قرشين عشان يجي النيابة ويشهد انه شاف الدكتور كريم بيتردد على بيتي، كان هدفي اني البسه موضوع العلاقة مع مراتي وبكده هيلبس هو جريمة القتل
وبعد كل ده.. اتكشفت برضو، واضح ان الحقيقه لازم تبان في النهاية
_ تعرف يا دكتور عزت، انا عرفت ليه زمان ابويا كان بيقولى ان الشك ده مرض وربنا يعين اللي يتصاب بيه.. مشكلتك كانت في مرضك بالشك، واللي خلاك قتلت مراتك وقتلت واحد تاني وراها، تخيل انك لو كنت هديت وروحت عملت التحليل واتاكدت انك بتخلف وقتها.. كان زمانك عايش مع مراتك حياه كويسة بس عيب الانسان التسرع
....
اتقبض على شوقي بتهمه الشهاده الزور واتحبس ولسه هتحدد لي جلسة
واتحكم على الدكتور عزت نصار بالاعدام.. كنت عارف حكم المحكمة رغم اني كنت بتمنى انه يطلع شخص تاني غير الدكتور اللي بيعالج الناس من اوجاعها.
...
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
