رواية سلاح الجريمة الفصل الرابع بقلم محمود الأمين
عوض السيد حسين... كان بيشتغل في شركة مقاولات كبيرة عنده 30 سنة، وكان عايش مع والدته اللي توفت من شهر تقريباً وكان عندها كانسر والعياذ بالله
عوض كان خاطب بنت اسمها ولاء ولكن فسخت خطوبتها عليه قبل وفاه والدته باسبوع، والسبب هو ان عوض اترفد من الشركة اللي كان شغال فيها، وطبعا هي اتخلت عنه رغم الظروف اللي عنده.. وحاول عوض انه يرجع الشركة ولكن المدير وقتها اللي اسمه عادل النجار رفض يرجعه، وطردوا
ومن يوم وفاة والدته وعوض مختفي تماماً.. حتى الناس استغربت لما لقيته مش موجود في بيته لما راحت تعزيه في والدته
...
قفلت ملف التحريات وانا بفكر.. وبصيت لسعد وقولتله
_ملف التحريات متذكرش فيه اي حد من المجني عليهم، فانا كده معنديش غير الدبله، اللي لو قبضت عليه بسببها هقدر احقق معاه، ولكن ازاي علاقته بالمجني عليهم متذكرتش
هو انا المفروض كده ايه؟!.. ابني سيناريو من دماغي عن اللي حصل معاه وعشان كده هو قرر يقتل الناس دي
= حضرتك عندك حق يا فندم، بس يعني احنا ممكن نعرف المستشفى اللي كانت بتتعالج فيها والدته، ولو طلعت نفس المستشفى اللي كان شغال فيها الدكتور سليم وجدي، وفرد الامن حسن عطا يبقى كده قطعنا نص المشوار، وبعد كده هنعرف ايه دخل موظف البنك محسن سالم بالموضوع
_ طيب وانت مستني ايه يا سعد؟!.. مستني ان انا اطلب منك ده، تعرف والنهاردة، ولو اتاكدت عندك المعلومة يبقى لازم نعرف الدور على مين؟!.. متنساش اني لقيت ورقة في المحفظه اللي كانت في الاسانسير.. كان مكتوب فيها 3 اسامي التلاتة دول ماتوا، بس رقم اربعة وخمسة كان عليهم علامه استفهام، وده معناه ان في اتنين لسه هيتقتلوا
= تمام يا فندم، النهارده هعرف كل حاجه ان شاء الله
...
مشي الرائد سعد، وانا فعلاً بفكر في السيناريو اللي ممكن يكون حصل.. وبتخيل لو اتأكدت المعلومة اللي عندنا يبقى بنسبة كبيرة
البنت اللي كانت خطيبته، وصاحب الشركة اللي كان شغال فيها هما الاتنين اللي عليهم الدور
وبعد حوالي خمس ساعات.. دخل عليا الرائد سعد واتكلم وقال
_ زي ما توقعنا يا فندم.. والدة عوض كانت في نفس المستشفى، ولكن طردوها هي وابنها بسبب انه معرفش يسدد الفلوس المستحقه عليهم
= واكيد فرد الآمن حسن عطا، هو اللي طلعه بره.. والله اعلم ايه اللي حصل وقتها... اصل ده فرد آمن بيشوف شغله وبيتبع التعليمات فاكيد معملش فيه كده عشان بس طلعه هو والدته من المستشفى.. كل الاسئلة دي اللي هيجاوب عليها شخص واحد وهو عوض واللي لازم دلوقتي نعرف هو بيخطط عشان يقتل مين؟
_ طيب وحضرتك شاكك في الضحايا اللي جايين.. ممكن يكونوا مين؟!
= خطيبته وصاحب الشركة.. واحنا لازم نفتح عينينا كويس اوي يا سعد، عشان نقبض عليه قبل ما يرتكب الجريمة الرابعة.. اظن انك فاهمني كويس، كل جريمة بيرتكبها الشخص ده هو فشل لينا.. ولو قبضنا عليه مش بعيد نترقى الترقية المتأخرة دي
...
بعد حوالي 48 ساعة وصلنا بلاغ عن صوت تكسير وصراخ جاي من شقة في مصر الجديدة.. وان الجيران بتحاول تكسر الباب اتحركنا على مكان البلاغ ولما وصلنا عرفنا ان الشقه بتاعة ولاء سعيد، ودي البنت اللي كانت خطيبة عوض وسابته قبل وفاه والدته، ورغم كل الرجالة اللي كانت واقفة بس محدش عرف يفتح الباب او يكسروا
وده لان عوض حاطط حاجات ورا الباب عشان يمنع حد يفتحه، حاولنا كتير والموضوع كان صعب.. وصوت الصراخ اللي جوه كان سكت
ولقيت الرائد سعد بيقول
_ صوت البنت اختفى يا باشا تفتكر خلص عليها؟!
= ربنا يستر يا سعد
...
وبعد محاولات كتير كسرنا الباب.. واول ما دخلنا لقينا كل حاجه في الشقة كانت متكسرة.. ولقينا البنت قاعده على الارض بتعيط وبتترعش وبتشاور على الحمام وبتقول انها حبسته جوه، وعلى الارض كان في علبه برفان مكسوره.. وواضح ان البنت اتعرضت لصدمه عصبية لانها كانت بتكرر نفس الجملة كان عاوز يقتلني بعلبة البرفان.. جمله غريبة لو اي حد سمعها
فتحنا الحمام بحرص والغريبة ان عوض سلم نفسه بكل سهولة محاولش يقاوم او يعمل اي رده فعل عدواني
واخيرا قدرنا نقبض على الشخص اللي ارتكب كل الجرايم دي، وبعد اقل من ساعة كان واقف قدامي في المكتب باصص في الارض بيجز على سنانه وقبل ما اتكلم.. اتكلم هو وقال
_ليه مسبتنيش أكمل؟.. كان فاضل اخر اتنين وبعدها كنت هاجي اسلم نفسي، كان لازم هما كمان يموتوا.. ليه حرمتني من باقي حقي؟
= اسيبك تقتل الناس؟!.. هو ده حق انك تقتل الناس ده حقك؟.. لا انا عاوزك تفهمني بس انت عملت ده كله ليه؟!.. قتلت تلاتة ولسه كنت هتقتل اتنين كمان، كل ده ليه؟ انا عاوز اسمع منك يمكن افهمك وقتها.. واللي عاوز افهمه أكتر.. ليه كنت بتنوع سلاح الجريمة حسب شغل الشخص، هي طريقه جديده بصراحه وانك استخدمتها.. دي حطت قدامي علامات استفهام كتير وكنت عايز افهم
_ اكتشفت ان امي عندها كانسر، وفي الوقت ده كنت شغال في شركه مقاولات كبيرة، حياتى مستقرة وعايش مبسوط ولكن مرض امي هدني.. وعرفت ان ممكن تعمل عملية ولكن العمليه كانت بفلوس كتير وقتها لجأت لصاحب الشركة وطلبت سلفة كبيرة، وطلب يقابلني وكنت فاكر انه هيقدر ولكن اكتشفت انه بيتريق عليا عشان المبلغ الكبير اللي انا طالبه
وطلب مني يا اما ارجع اكمل شغلي يا اما امشي من الشركة، بصراحه اتعصبت عليه وطردني من الشركة ووقتها لقيت نفسي في الشارع مش عارف اتصرف ازاي؟!.. ولما التعب زاد عليها نقلتها لمستشفى خاص وروحت البنك عشان اخد قرض بضمان البيت اللي احنا عايشين فيه.. موظف البنك وقتها استهزء بيا وبظروفي ولقيته بيمضي في خانه الرفض وقال عليا اني شخص نصاب، كنت بعيط قدامه عشان يرضى بس يديني الفلوس عشان عملية امي ولكن هو رفض، ولما رجعت المستشفى اترجيت الدكتور ان يعمل العمليه لامي وانا هتصرف في الفلوس وقتها قال انه مش هيستخدم المشرط الصغير بتاعه غير لما تتسدد الفلوس كلها، كنت مش متحمل حسيت ان كل اللي حواليا.. حيوانات مش بني آدمين انفجرت في وقتها وفضلت ازعق، وقتها لقيتهم بيطلعوا امي من اوضتها وبيطردونا احنا الاتنين.. وفرد الامن اللي كان واقف على بوابه المستشفى، شتمني انا وامي فاضل يزقني بالعصايا ويقولي امشي من هنا
حتى البنت اللي انا حبيتها وكنت فاكر انها هتقف معايا في المره قبل الحلوه، باعتني واتخلت عني وقالت اني مش هقدر اتجوزها عشان اترفدت من الشغل.. ومفيش اسبوع وامي ماتت
عشان كده قررت انتقم منهم وكل واحد بحاجة هو بيستخدمها
فرد الامن بالعصايا.. الدكتور بالمشرط.. موظف البنك بقلمه.. واللي كانت خطيبتي كنت هدبحها بازاز علبة البرفان
اما الاخير فكنت هولع فيه هو وشركته اللي فرحان بيها واللي شايف نفسه بيها على خلق الله
= انا بعد ما سمعتك مش عارف اتعاطف معاك ولا لا.. انت تعرضت لظلم وكل اللي حواليك خذلوك، ولكن ده مش معناه انك تقتل.. انت قتلت نفس وده عقابه عند ربنا كبير وكل اللي هقدر اساعدك بيه انك تتحول للجنه نفسية وساعتها ممكن يحولوك للمستشفى لان الناس دي قدرت تحولك لمريض نفسي، ورغم انك قتلت انا شايف انك متستحقش الاعدام.. اللي يستحق الاعدام بجد الناس اللي اتعدم من قلوبها الرحمة
...
خلصت كلامي مع عوض اللي فعلاً اتحول للجنه نفسية واقرت انه بيعاني من اضطراب نفسي وانه لازم يتحجز في المستشفى 45 يوم لحين الفصل في حالته.. مش عارف مصير عوض هيكون ايه؟
لو عليا شايف انه حرام يتعدم رغم انه قتل.. لو انتوا مكاني هتحكموا عليه بايه؟
...
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
