رواية تلميذ الجن الفصل الثاني والخمسون بقلم جمال الحفني
بعد ما أعلن حافظ العهد فوز شدام، رجع شدام بهدوء لمكانه، بينما كانت عيون كتير في القاعة لسه متعلقة بيه وبالخاتم اللي قلب مجرى النزال السابق, لكن ما كانش فيه وقت طويل للتفكير، لأن حافظ العهد غرس عصايته في الأرض مرة تانية وهو بيعلن عن آخر مواجهة في المرحلة الأولى من بطولة سيد التابعين, في اللحظة دي اتحرك ممثل اليمن وممثل روسيا ناحية منتصف الساحة، وكل واحد فيهم وقف قدام التاني على بعد عدة أمتار فقط، والهدوء اللي نزل على المكان كان غريب لدرجة إن أي صوت بسيط كان ممكن يتسمع بوضوح..
ممثل اليمن وقف بثبات وهو مركز عينيه على خصمه، كان واضح عليه إنه مستعد لمعركة طويلة زي أغلب النزالات اللي حصلت قبل كده، لكن ممثل روسيا كان واقف بشكل مختلف, لا بيستعرض قوة، ولا بيحاول يخوف خصمه، ولا حتى متخذ وضعية قتالية واضحة. مجرد واقف ساكت، وعينيه ثابتة على خصمه, الجن والمنفذين كانوا متوقعين قوته غير الطبيعية لإنه الجن الوحيد اللي مع منفذ روسيا, والمنفذ مبيكتفيش بجن واحد إلا لسبب!
رفع حافظ العهد عصاه وأعلن بداية النزال، لكن قبل ما العصا تكمل نزولها كان ممثل روسيا اتحرك بالفعل, الأرض تحت رجليه انفجرت وتناثرت منها قطع الحجر في كل اتجاه، وخلال لحظة واحدة اختفى من مكانه تماما, ممثل اليمن اتفاجئ، لأنه كان متوقع يبدأ بقياس قوة خصمه الأول زي ما حصل في أغلب النزالات السابقة، لكن ما لحقش حتى ياخد خطوة واحدة..
فجأة ظهر ممثل روسيا قدامه مباشرة، وقبل ما يستوعب اللي حصل كانت أول ضربة وصلتله بالفعل!
صوت الاصطدام دوى في الساحة كلها، وممثل اليمن اضطر يتراجع للخلف وهو بيحاول يمتص قوة الضربة, لكنه ما أخدش فرصة يثبت نفسه، لأن ممثل روسيا كان قدامه تاني في نفس الثانية تقريبا, وجه له ضربة جديدة، ثم ضربة بعدها، ثم هجوم ثالث ورابع، وكلهم جايين بسرعة خلت أغلب الموجودين يتابعوا المعركة بصعوبة, لأول مرة من بداية البطولة كلها كان فيه مقاتل فارض سيطرته الكاملة من أول ثانية، ومش مدي خصمه أي فرصة يفكر أو يرتب هجوم مضاد..
ممثل اليمن حاول أكثر من مرة يخرج من الضغط ده، حاول يبعد المسافة بينه وبين خصمه، وحاول يجبره على التراجع ولو خطوة واحدة، لكن كل محاولة كانت بتفشل قبل ما تبدأ, في كل مرة كان ممثل روسيا بيوصل له الأول، وكأنه عارف هيتحرك إزاي قبل ما يتحرك, ومع مرور الثواني بدأت علامات الإرهاق تظهر على ممثل اليمن، بينما خصمه كان لسه محافظ على نفس السرعة ونفس الدقة ونفس الهدوء والتركيز..
وأخيرا قرر ممثل اليمن يغامر بكل شيء, جمع كل القوة اللي عنده في ضربة واحدة، واندفع للأمام بكل ما يملك من سرعة وقوة على أمل إنه يقلب مجرى النزال في لحظة واحدة لدرجة إن عدد من الجن الموجودين في المدرجات اعتقدوا إن اللحظة دي هي نقطة التحول، لكن اللي حصل بعدها أنهى كل شيء, ممثل روسيا مال بجسده مسافة بسيطة جدا، مجرد حركة صغيرة كفاية تخلي الضربة تمر بجواره، وفي نفس اللحظة مد قبضته وضرب خصمه ضربة واحدة مباشرة في منتصف صدره..
لثانية كاملة ساد الصمت..
ممثل اليمن اترمى عبر الساحة كلها وطار عشرات الأمتار قبل ما يرتطم بالأرض ويتدحرج فوق الحجر عدة مرات, حاول يقوم، حاول يسند نفسه على دراعه، ثم على ركبته، لكن جسمه ما استجابش, ظل لثواني بيقاوم السقوط قبل ما ينهار مرة تانية على أرض الساحة وسط صمت كامل من الحاضرين, ممثل اليمن مكانش ضعيف بالعكس, يمكن لو كان واجه أي ممثل تاني غير منفذ روسيا كان هيفوز عليه, لكن حظه كدا, حتى أنا على الرغم من إني زعلت على اللي حصل له إلا إني كان لازم أفرح لأنه هيخرج وشدام مش هيواجهه..
حافظ العهد راقب المشهد للحظات، ثم رفع عصاه عاليا وقال بصوت سمعه كل من في القاعة
"انتهي النزال"
في اللحظة دي رجع ممثل روسيا ناحية رايته بنفس الهدوء اللي دخل بيه النزال، وكأن كل اللي حصل من شوية كان مجرد مهمة بسيطة انتهت، بينما اكتملت أسماء المتأهلين للمرحلة الثانية, ممثل العراق، وممثل المغرب، وممثل روسيا، وشدام ممثل راية مصر..
مكانش فيه وقت للراحة بين المرحلة الأولى والتانية من النزالات, الجن العجوز طلع على المنصة وبنفس القرعة اللي أجراها للمرحلة الأولى أجرى بيها المرحلة التانية, ونتيجة القرعة كانت ممثل روسيا ضد ممثل مصر, والعراق ضد المغرب!
نزل شدام وممثل روسيا إلى الساحة وسط صمت غريب سيطر على القاعة كلها, بعد انتهاء المرحلة الأولى ما بقاش فيه أي مجال للصدف أو الحظ، وكل اللي واقفين دلوقتي أثبتوا إنهم من أقوى التوابع اللي حضروا الاجتماع.
شدام كان ماشي بخطوات هادئة كعادته، ملامحه ثابتة وعينيه متجهة لقدام، بينما ممثل روسيا نزل من الجهة المقابلة بنفس البرود اللي ظهر بيه من أول البطولة, لا ابتسامة ولا نظرة تحدي ولا حتى اهتمام باللي حواليه، كأنه داخل ينفذ مهمة يعرف نتيجتها من البداية...
وقفوا الاتنين في نص الساحة، والهواء بينهم كان تقيل بشكل غريب, حافظ العهد بص لهم للحظات طويلة قبل ما يرفع عصاه ويضربها في الأرض معلنا بداية النزال, وفي نفس اللحظة تقريبا اختفى الاتنين من أماكنهم..
دوى انفجار ضخم في قلب الساحة وارتفعت الحجارة والغبار في كل اتجاه, أول اصطدام بينهم كان عنيف لدرجة إن الأرض نفسها اتشققت تحت أقدامهم, وبعدها بدأت المعركة الحقيقية..
مرة يظهروا فوق أحد الأعمدة الحجرية، ومرة يختفوا ويظهروا في طرف تاني من الميدان، ومرة تتقابل ضرباتهم في منتصف الطريق فتخرج موجة صادمة تهز القاعة كلها, ما كانش فيه أي طرف قادر يفرض سيطرته بشكل كامل, كل ما ممثل روسيا يحاول يضغط على شدام كان الأخير يرد عليه بهجوم أقوى، وكل ما شدام يعتقد إنه لقى ثغرة في دفاع خصمه كان ممثل روسيا يثبت له العكس..
مرت الدقائق والقتال بيزداد عنف, الشقوق انتشرت في أرض الساحة، وقطع ضخمة من الحجر اتكسرت وانتشرت في كل مكان, عدد من الجن الموجودين في المدرجات بطلوا يتابعوا بعينيهم أصلا، لأن سرعة المعركة بقت أكبر من إنهم يلاحقوها, لكن الجن القدامى كانوا مركزين بكل انتباه، لأنهم فهموا إنهم بيتفرجوا على واحد من أقوى النزالات اللي حصلت في بطولة سيد التابعين من سنين طويلة..
وفي لحظة من اللحظات نجح شدام في توجيه ضربة مباشرة لخصمه أجبرته يتراجع عدة خطوات للخلف, ولأول مرة منذ بداية البطولة كلها ظهر تغير بسيط على وجه ممثل روسيا, ما كانش غضب، لكنه كان اعتراف إن خصمه مش مجرد تابع قوي، بل خصم يستحق القتال بجد..
ابتسم شدام ابتسامة خفيفة أول ما شاف التراجع ده، واندفع للأمام من جديد, الضربات بقت أسرع أعنف أدق وكل ثانية كانت بتمر كانت بتستنزف الطرفين أكتر..
لكن مع الوقت بدأ فرق الخبرة يظهر, ممثل روسيا ما كانش أقوى بفارق كبير، لكنه كان هادي أكتر ودقيق في اختيار لحظاته سواء الهجومية أو الدفاعية، وكمان أقدر على الحفاظ على قوته..
لحد ما اللحظة اللي قلبت المعركة..
شدام اندفع بهجوم عنيف بعد ما ظن إنه أخيرا كشف دفاع خصمه, كانت فرصة مثالية لإنهاء النزال, المسافة اختفت بينهما خلال لحظة، وقبضة شدام كانت في طريقها مباشرة نحو صدر ممثل روسيا, لكن قبل ما توصل اتحرك ممثل روسيا حركة خفيفة ووجه ضربة بخبرة ناحية أسفل فك شدام!
الضربة أصابته بقوة!
شدام اترفع عدة أمتار للأعلى وبعدها وقع على الأرض وساد الصمت..
كان شدام مرمي على أرض الساحة وسط الحجارة المكسرة والتراب المتناثر في كل اتجاه، والضربة الأخيرة اللي تلقاها من ممثل روسيا كانت عنيفة لدرجة إن أغلب الموجودين اقتنعوا إن المعركة انتهت خلاص, الغبار كان لسه متعلق في الهوا، وآثار الاصطدام كانت واضحة في الأرض اللي اتشققت واتكسرت تحت جسمه, أما ممثل روسيا فكان واقف على بعد عدة أمتار وهو بيبص ناحية خصمه بنفس الهدوء والبرود اللي ظهر بيهم من أول ما دخل البطولة، وكأنه كان مستني الجن العجوز يعلن النتيجة وبس..
وفعلا رفع الجن العجوز عصاه ببطء، وبص ناحية شدام نظرة أخيرة قبل ما يفتح بقه عشان يعلن نهاية النزال ويعلن تأهل ممثل روسيا للنهائي..
لكن قبل ما ينطق أول كلمة، حصل شيء غريب خلا الصوت يختفي من القاعة كلها دفعة واحدة, في البداية ظهر نور خافت جدا تحت جسم شدام، نور ضعيف بدأ يزيد شوية بشوية، ومع كل ثانية كانت بتعدي كان بيبقى أوضح وأقوى!
بعد لحظات قليلة بقى واضح للجميع إن النور مش جاي من الأرض ولا من المشاعل، لكنه خارج من شدام نفسه, الجن العجوز مكملش كلامه، واتجهت كل العيون ناحية الساحة، وحتى منفذ روسيا نفسه عقد حاجبيه لأول مرة من بداية البطولة وهو بيحاول يفهم اللي بيحصل قدامه!
المشاعل بدأت تهتز بشكل غريب، وألسنة النار اللي فيها بقت ميلة كلها ناحية شدام كأنها بتنجذب ليه, الحجارة الصغيرة المنتشرة حواليه بدأت ترتفع سنتيمترات قليلة عن الأرض، وأنا لقيت نفسي واقف من مكاني من غير ما أحس!
وفجأة صوابع شدام اتحركوا حركة خفيفة جدا..
لكنها كانت كفاية تخلي أكتر من جني يقف من مكانه!
بعدها بدأ يرفع رأسه ببطء شديد، ومع كل سنتيمتر كان بيرفعه كان النور اللي خارج من جسمه بيزداد قوة, بدأت علامات تتحفر على دراعه ورقبته ولما الحفر انتهى راحت تظهر بوضوح تحت جلده ثم اتحولت لخطوط فضية لامعة كأن حد بيرسمها بالنور!
ولما فتح عينيه أخيرا، كل اللي في القاعة اتصابوا بالذهول, شدام اتغير بالكامل, اتحول من طور لطور تاني خالص, ملامحه وجسمه وعضلاته وكل حاجه فيها اتغيرت, هو نفسه مكانش عارف إيه اللي حصل, لكنه كان منتشي وهو بيبص على جسمه وبيستكشفه من أول وجديد, وبعد لحظات من الذهول افتكر إنه كان في نزال والمفروض يكمّله..
بدأ شدام يقف على رجليه ببطء، والغريب إن كل آثار التعب اللي كانت واضحة عليه من لحظات اختفت بالكامل, الدم اللي كان نازل من جانب فمه وقف، وأنفاسه رجعت منتظمة، وكتفيه اللي كانوا واقعين من الإرهاق رجعوا مستقيمين من جديد, كان واقف في وسط الساحة وكأن الضربة اللي أسقطته من شوية ما حصلتش أصلا, لكن الحقيقة كانت أوضح من كده بكتير اللي واقف دلوقتي ما كانش نفس شدام اللي وقع على الأرض من دقائق!
في المدرجات، واحد من الجن الملازم للمنفذين همس بصوت مرتجف
"مش معقول, ده الطور التاني!؟"
جني تاني رد عليه وهو مش قادر يبعد عينه عن الساحة
"أنا افتكرت إن المرحلة دي اندثرت من زمان!"
أما الجن العجوز فكان باصص على شدام بصمت كامل، ولأول مرة من بداية البطولة ابتسم..
وفي اللحظة دي حصل شيء خلى القاعة كلها تحبس أنفاسها..
النور اللي كان مغطي جسم شدام كله بدأ ينكمش فجأة، وكل الطاقة اللي كانت منتشرة حواليه رجعت لجواه في لحظة واحدة, اختفت الهالة, اختفى الوهج ثانية واحدة بس ساد فيها هدوء مطلق وبعدها شدام اختفى!
ممثل روسيا نفسه اتسعت عينه وهو بيلف رأسه بسرعة يمين وشمال, للمرة الأولى في البطولة كلها فقد أثر خصمه بالكامل, حاول يحدد مكانه، حاول يحس بطاقته، حاول يلاقي أي علامة تدله عليه، لكنه ما شافش أي حاجة!
وفجأة حس بقوة غريبة ظهرت من وراه!
ممثل روسيا لف جسمه بسرعة، لكنه كان متأخر, شدام في اللحظة دي كان ارتفع عدة أمتار عن الأرض وهو رافع قبضة إيديه الاتنين ونازل بيهم بكل قوته على جسم ممثل روسيا, وفي اللحظة التالية محدش شاف حاجه, لإن قوة الضربة نتج عنها ذرات غبار حجبت الرؤية للحظات, وفي النهاية شوفنا شدام بيرجع مكانه وممثل روسيا مغمى عليه من أثر الضربة..
