رواية خطايا واجتثاث الفصل الرابع والخمسون بقلم نور البصري
أفعل كلّ شيء لكن لا تتجاوز على شرع الله الله وضع لكل شيء قانون وحرم خلط الأنساب فالنبتة حينما تزرع بغير أرضها لا تنموا وأن نمت لا تثمر فمصيرها تقتلع من الجذور لتكون حطبٍفتُحرق وقد تنتشر نارها ليحرق كل شيء ويحصد أرواح بريئة.»
بقلمي..
ـــــــــــــــــــــــ♡ــــــــــــــــــــــــــ
شـــــــــــــ♡ـــــــــــــــاكر
قفلت الباب وراي وبديت أقترب من هديل.. وآني مبتسم أحبها وما أگدر أعيش بدونها أعرف لـؤي.. لو رجع راح يخرب مشروع زواجي منها لازم أسبق الأحداث وأخلي الموضوع يوصل لنقطة اللا تراجع هي جانت فرحانة و تفتر بغرفتنا المستقبلية لحد ما ألتفتت وشافت نظراتي إلها نظرات مليانة برغبة جامحة.
باوعت للباب المقفول بدت تتوتر :
ــ شـاكر؟! ليش قفلت الباب؟ أأأ أفتحه يلة لا تباوعلي بهاي الطريقة رجاءًا
غارت عيوني بنظرة مخمورة بس مو بمسكر لا بخمرة العشق والحب رجفة أخذتني وآني أقترب منها وأهمس:
_ أحبج أنتِ كل حياتي مستحيل أخلي لـؤي.. يمنع حبنا صح أهابه بس حبي إلج أقوى من جر النفس يا هديل.
أعرف تصرفي هذا يناقض كل العادات والتقاليد اللي تربيت عليها ويناقض منطق مجتمعنا بزمنا حتى لو جان بيناتنا عقد شرعي يحللها إلي بس لازم ننتظر حفل زفاف وراى الدخلة يعني البنت حتى لو عاقدة وي خطيبها وتصير علاقة بينهم وعرفوا أهلهم أكو أحتمال البنت تصفى (تنقتل) ذاك من ذاك اليفهم هو زوجها أصلاً الحفل والوليمة مجرد إشهار آني جازفت وضربت التقاليد و عاداتنا عرض الحائط لأن أخاف من فقدانها تدنيت منها وهمست وآني ألزمها من جتفها:
ــ هديل ليش خايفة أكو وحدة تخاف من زوجها أنتِ زوجتي وحياتي وعمري أنتِ دنيتي.
رجعت لورى وبدت تعرك و حسيت توترها وخوفها وخجلها كالت بصوت يرجف:
ــ شاكر.. أخاف خلي نطلع ما يصير والله ترى وثقت بيك وأجيت وياك لهنا.
لزمت إيدها حيل يمكن وجعتها:
ــ وتردين أنطي فرصة للؤي.. يمنع زواجنا يظل يتمشكل بالبيت وهنا أبوي تعال أفسخ لا هديل.. نتمم زواجنا أفضل.
ردت حتى تثنيني:
_ كل عروس لازم تجهز نفسها يعني أمور خاصة بالنساء آني مو جاهزة.
ضحكت:
_ لوتية هذا الجمال كوله و الأناقة اللي تعودتها أكيد متعوفي روحج بدون أهتمام شخصي لعبي غيرها هديل و اليوم أتمم خليها برضاتج أحلا وأمتع إلنا أحسن ما أضطر أخذج بالقوة.
بدت تبجي خايفة ومصدومة حاولت توخر إيدي:
ــ شاكر أنت مو هيج أنت إللي حبيت أخلاقك وعفويتك ليش صاير هيج؟ عوف إيدي أنت دتأذيني!
لفيتها بحضني وهمست:
_ أنتِ إلي ملكي أو ما أسمح لأحد يحرمني منج.
ورى فترة كمت بدلت وهي تبجي:
ــ صرتي مرتي بعد و فنه اللي يمنع زواجنا يلة أرجعج لبيت أهلج نامي وأرتاحي لا تباوعيلي هيج ما سويت غلط أنتِ حلالي.
_ شكول لأهلي شكول لأمي لا هي عوايدنا ولا فعلنا هيج ولك خايفة أنقتل.
_ منو يوصلج ورجلج شاكر أنتِ مرتي.
وصلتها لبيتهم ولزمت إيدها أبوس بيها ببطيء جرت هي نفس وحاولت تسحب إيدها تلفتت محد بالشارع أخذتها لحظني وبستها بعمق ما مكتفي منها بس لازم أرجعها لأهلها مو مال أبيتها ليلة كاملة.
نزلت بساع وهي متوترة:
_ فدوة قنع أبوي نتزوج بساع فدوة لا تعوفني هيج.
_ روحي أرتاحي حبيبي شعوفج ولج غير أنتِ مرتي وأبوج حدز ناس تقنعه نعرس و كولشي حسب الأصول.
حركت سيارتي و رجعت للبيت مرتاح نفسياً وجسدياً هسة بعد منو ياخذج مني و بعد ما تممت و تذوقتها صرت متطلب لدرجة كمت يومية آخذها للبيت و هي بدت تتعود علية بس جانت متخوفة لازم نستعجل بالزواج
15 يوم بقينا على هذا الحال ورجع لـؤي بس محد حجاله الكل متوجس رد فعله وأوقات أشوف أهلي يخشونه وفارض شخصيته آني أحبه أخوي بس ما أكدر أعوف هديل لأن هو يكذب يدعي جان بعلاقة حب هو وياها.
_ كوة خوية يمتى رجعت؟
_ يكوي حيلك وين جنت؟
_ طالع وية جماعتي.
_ سويتلك إستثناء أنت رچيچ وينك وين الحرب..
أبتسم وجر خدي يشاقيني وسألته:
_ شبيك شو تعرج؟
_ تصوبت لا تخاف شضية بسيطة تطيب يالغالي.
ردت أگوله بس ما گدرت وأمي تخوزر بية هي مرت أبو متحبني شتترجون منها؟راح لـؤي.. لغرفته يرتاح وهي دفعتني:
_ وخر منا.. ارتاحيت هسة ولك شلون إلك نفس تجرح أخوك بحبيبته لو عرف شنو راح يكون موقفه ولك أنت سوالفك مو سوالف واحد متربي وما يسوى بيك التعب والربى والله مترددة أگوله أخاف ينقهر والله خطية الله لا يوفقك.. قشمرت أبوك ورحتوا عقدتوا هاي هديل.. ما أريدها تطب بيتي شوفلها غير هذا البيت مفهوم.
ضحكت أغثها:
ــ موجود بيتي ونعيش بيه وهي ملكة ببيتي وإذا أريد أجيبها لهنا ما تمنعيني نسيتي كل هاي البيوت بالأصل لمنو؟ كولها إلي ورثي من أمي المرحومة.
ذبيت القنبلة ورحت لغرفتي فريت قرص التلفون خابرت هديل :
ــ شبساع أشتاقيتلج يالطعم شفايفج برحي الجنوب..
حسيت أنفاسها وهي ساكته:
ــ ها مخلوسة شبيج؟
_ يمكن سـهيل.. أبن خالي شايفنا نروح لبيتنا هو بمنطقته لأن كايل لأمي وأمي أجت كتلتني.
ــ وليش تكتلج؟ وأنتِ مرتي بلة نريد نأثث البيت نصبغه على ذوقج.
ــ ما أعرف والله منعتني بعد أطلع وياك منا للزواج.
_ مو خوش بس نشوف حل معليج و هذا سـهيل.. آني إله منتبهله عينه عليج مال أفكسهن إله.
حولت السالفة للغزل وگولتلها:
ــ غلقي موضوع الخوف هسة.. وخلينا بغزلنا وإشتياقي إلج ترى آني ولا أشبع منج.
أستمريت أخذها بس هالمرة مو ببيت اللي بمنطقة سهيل گولتلكم أمي ملاكة وعندنا عمارات وشقق وأكو وحدة من الشقق فرغت ما أجرتها أثثت بالشقة فراش بالگاع لغرض حاجتنا وظليت على هالمنوال لشهرين لـؤي.. يلتحق بالإجازات ومن يرجع محد بالبيت بلغه
بديت أرتب لإجراءات الزواج لأن هديل.. بلغتني إنها حامل وتريد تسقط الطفل بس آني ما قبلت.
ــ لا حرامات قابل زانين لو أبن حرام هذا أبني نتزوج ومن تولدين نكول ولادة مبكرة كدام الكل.
رحت لأبوها كوتله آني مستثني وعندي كتاب غير قادر على حمل السلاح بعد أتزوج:
_ أنت تجي تحدد الزواج؟ وأبوك.
_ عمي الشغلة تخصني أبوي شعليه.
_ شلون يصير أبني الأصول والعادات
_ صار حالياً ملتهين بأخوي موجود و كل ما يجي لو متصوب لو مريض.
كذبت لأن هالمرة لـؤي.. ما بيه شي بس هاي الكذبة سببت إلي مشاكل والظاهر فاتتني أبو هديل من سمع بأخوي لـؤي هنا أعتبرها.. لازم يجون ويتحمدون بالسلامة سبق من تصوب ما حجيت هسة.. حجاني و للعصر وكبت العيطة جايين يتحمدون بسلامة لـؤي.. ومن باب التواصل.. وي أبوي وتقوية العلاقات بين العائلتين.
و صدف لـؤي گاعد بالصالة:
_ شلونك بوية لـؤي.. بس سمعنا بيك أجينا.
أستغرب:
_ شكو؟
باوعلي وباوع لأبوي اللي توتر والله كولنا توترنا بساع دون تفكير حجيت:
_ آآآ عمي أوصلكم لبيتكم.
_ شتوصل؟ تونة أجينا هم نتحمد على سلامة لـؤي.. وهم نتفق وي أبوك على الزواج وعقد المحكمة.
وكف لـؤي :
_ يا زواج؟ ياعقد أحد يفهمني يابة فهمني شصاير؟ شاكر.. يريد يتزوج ويتزوج منو؟
ظليت ساكت مدنك وأبوي تحم حم:
_ أبني لـؤي.. كولشي قسمة ونصيب و خطبنا لأخوك من شهرين وعقدناله على هديل.. كريمتهم.
وأشر لأبوها وأمها اللي مفاهمين شبينا تحولنا أعصاب وتوتر.
صرخ لـؤي:
_ على جثتي يابة على جتثي يتم هذا الزواج على جثتي لا أحركم بناري ليش هيج يابة مو أبنك الجبير آني.
ألتفت لأهل هديل:
_ شوفوا ولكم الزواج ما يصير زين يلة طلعوا برى وكفونا شركم لا أهجم هذا البيت واللي بيه على روسكم.
طردهم ما تحملت فشلني كدامهم لزمته وضربته بوكسي و أول مرة أتجاوز على أخوي وهم طلعوا وما فاهمين شكو؟ وأبوي لا تبعهم لا طيب خاطرهم ألتهى بينا.
لـــــــــــــ♡ــــــــــــــؤي
أنهضمت وأنخذلت وهذا أسوء يوم بحياتي.
لزمت جتف أبوي وآني أرجف:
_ دخيل الله بس كولي ليش يابة آني شمسوي وتكرهني وتفضل شاكر علية.
دار وجهه وما قبل يحجي:
_ باوعلي لا أحرك هذا البيت عليكم لا أحركم بناري.
ركضت أمي وهي تحضني تبوس بيه تطيب خاطري:
_ تولي يمة.. لا تضوج على هديل هاي وحدة طماعة وباجر يكتشف طمعها و يندم أنت الله يحبك بعدها عنك من باجر أدورلك أحسن مرة وتناسبك.
نترت إيد أمي بعصبية ولأول مرة أتجاوز على أمي:
ــ عوفيني إلمن خلفتيني لهذا الضيم أبوي يفرق ما عبالك أبنه خطب حبيبتي لأخوي هاي قطيعة رحم يابة شلون تقبلها شلون و نفسي بيها شلون أگدر أعتبرها أختي ومرت أخوي وما أباوعلها ليش تكرهني اليوم لازم أعرف السبب.
_ ما أكرهك آني ربيتك وتعبت عليك وأنت أصلك أبن وادم شيوعية.
بلحظتها ركضت أمي بخوف وخلت إيدها على حلگه وهي تتوسل بيه:
_ لا حجي فدوة لا حجي خطية.. ليش تحجي.
_ دوم أكولج لازم يعرف لازم حتى ما يتعدى حدوده شوف لـؤي عوف شاكر ياخذها وأعتبر هذا جزاء تكفلي الك.
طابوكة وأحسها ضربتني براسي الدنيا دارت بية وصرت ما أشوف طريقي طلعت أترنح بصدمتي ما مستوعب التفتت:
ــ من هيج ما تحبني ضامها بگلبك وما تبين بس تصرفاتك تفضله علية حرام عليك ظلمتني لأنه أبنك أبن صلبك تفضله ياخذها وآني لازم أنجب أسكت وألا أطلع ناكر فضلك علية بس يابة راح تندمون كولكم لو ما متكفلني أحسن لو شامرني بملجأ و لا هيج تحرمني الأحبها ومنو يأخذها أخوي.
جان شاكر.. يباوع بصدمة:
_ يابة لـؤي.. مو أخوي خاف تشاقى.
عفتهم ما سمعت الرد شسمع وشسمع
بيومها رجعت للشرب للي جربته بفترة مراهقة وتركته تبت عود هسة رجعتله رحت لبيت أهل هديل.. أدك ببابهم حيل:
_ هديل.. فتحي الباب.
أدك الباب وطلعلي أبوها وعركة فزعوا خوالهم سـهيل.. وإخوانه التموا علية ودگوني كتله ظليت نايم على وجهي بالشارع للصبح محد من أهلي سأل ويني.. وين أختفيت وشنو صار بية محد دورني بيومها عرفت مالي أي قيمة أون من الوجع والضرب اللي أكلته بس بسيطة يا يابة أنت أساس دماري ومثل ما حرمتني من اللي أحبها راح أحرمك من أغلى شي تملكه وي الأذان كدرت أنهض شوي وعيت من السكر مشيت للسيارة صعدت وآني أعاتب الله بكلمات لو تنكتب هنا تستغفرون من كمية التجاوز والألحاد ذبيت الصوج بالكل حتى بالله صرت أحس منبوذ ألمن مبقيني لو موتني وي أهلي
دنكت على الاستيرن وكعدت أبجي بكل حرقة و كل قهر :
ــ طلع مو أبوي ولا أمي طلعت منبوذ يتيم من هيج تعامله وياي مختلف أبد ما حبني.
رجعت للبيت اللي مو بيتي وللأهل اللي مو أهلي لكيته واكف بالحديقة قلق.
_ وينك كعدت الصبح وأنت ماكو ما راجع أذكر الله حتى لو مو أبنا ربيناك ومعزتك من معزة شاكر.. هذا أخوك الصغير المفروض أنت تفديه تضحيله ومتخلي يضوج لأن يحبها والمفروض أنت بيدك تأخذه و تخطبله البنية.
يعاتبني من كل عقله.. عتاب دون أي منطق وعتاب ما معقول لهاي الدرجة لازم آني أضحي علمود شاكر ليش ومشاعري؟! ما جاوبته عفته و دخلت للبيت وآني أفكر بالعقوبة اللي راح أعاقب أبوي عليها وأعاقب شاكر وحتى هديل.. أبتسمت بخبث أجه الوقت اللي تتحملون بيه نتائج تهميشي وتهميش مشاعري اللي دستوا عليها.
انفتح الباب وأجت أمي:
_ لـؤي.. أنت شارب أبوك يكول ريحته شارب بس ما حاسبته لأن مقهور تجاوزت عنه هاي المرة.
_ مالكم علاقة بية مو أبنكم شعليكم ههههههه.
ضحكتي مال واحد مقهور.
_ ياا يمة شنو شعلينا أنت أبنا وربيناك كبل لا هذا الطايح الحظ ينولد هو خبيث على أمه تذكر شلون جانت وياك ووياي مغرورة خبيثة قبلت تهجم بيت وتدخل ضرة وعدها خباثة تستحوذ على أشياء الغير باكت مني حمود وخلته يعشقها أبنها عليها رغم بي فهاوة وفطارة بس خبيث.
ضحكت:
ــ إذا فاهي وفطير سوى هيج لو جان نچر شيسوي ينهبنا عوفيني يمة تعبان وراي باجر ألتحق.
أبتسمت و بگلبي أخطط آني الك شاكر أنت اللي بديت وبعت الخوة لأجل مرة أراويك وجهي الثاني خسرتني.
لغيت أستثنائه بأتصال تلفوني وبلغت أبوه :
ــ أبنك يلتحق ويدافع عن الوطن حاله حال أولاد العالم ماكو ريشة على رأس أبنك.
ردني: أنت شنو تكول تريد تذب أخوك للنار أخوك ترف مو مال حروب.
_ هذا الموجود يابة للأسف أعذرني أنرفض إستثنائه والترف خلي يطلعله جلد زلمه حوك ويقاتل.
عفته يرزلني ويتوعد:
_ أبن الكلب حقير لو صار شي عليه ما أسامحك أبد.
إلتفتت عليه:
_ تحبه؟! شكد تحبه؟ آني هيج جنت أحبه أكثر من حبك إله بس أنت علمته بدلالك الجميع يتخلى عن ما يتمنوه بس حتى شاكر المدلل الترف يرضى غروره مع الأسف عليكم.
لليل عاد أندك باب غرفتي جنت مشغل مسجل و أسمع أغنية أم كلثوم وذبيت حركتي بالعرك صارت علني أعترف قبل أشرب بالبوكات حب فضول بمراهقتي بس تالي تركت من كبرت ودخلت كلية ضباط وهسة مرجعتله لازم (بيك) بإيدي وأباوع إله وآني أصيح:
_ لا تـدخل.
عرفته هذا شاكر گمت قفلت الباب لأن ما أريد أشوفه كرهته لأن هنت عليه ونسى آني أخوه وفضل علية مرة نزلت دموعي بحرگة وقهر بس الغضب داخلي نار تسعر ولابد ما تحرگج يا هديل
أبتسمت بشر الوحش والمجرم اللي بداخلي وهم اللي صنعوا
صوت شاكر من ورى الباب:
_ خوية ليش زعلت مو تعرف أحبها والله سويت هيج حتى لا تمنعني خوية دونها أموت.
همست:
_ وموتتهم روح شاكر.. الخوة أنكطعت بينا أصلا ماكو خوة مع الأسف والله عليكم مع الأسف يابه حمود والله مهضوم منكم كولكم.
_ خوية ما عبالي هيج تاخذ موقف كلت يعصب مثل كل مرة يضربني يرزل يزعل فترة ونرجع خوية آني متورط البنت حبلت لازم أتزوجها كدام العالم خوية ما أريد أروح للجبهة مو كفو حرب تعرفني آني لا قوي بنية ولا شي خوية هاي بدل ما تفرحلي وتزفني بيدك.
عليت صوتي وعليت المسجل وآني أردد وي أُم كلثوم متجاهل شاكر اللي عصب وظل يرفس بالباب:
_ خوية أفتحلي ما أعرف تزعل مني ممعودني أنت العلمتني أخذ اليعجبني أنت الدللتني خوية أنت والله أنت آني أغلب وقتي يمك منك تعلمت ما أترك غايتي.
ما رديت ظليت أشرب بغرفتي و أغني وي أم كلثوم:
ردد: رجعت تشرب كوله مني كوله من وراي محسبت هيج تاخذ موقف كلت يزعل فترة ونرجع وبيده يزفني.
أستمريت أردد وي أم كلثوم لمن أيس وراح
(غصبت روحي على الهجران
وأنت هواك يجري بدمي
وفضلت أفكر بالنسيان لمن بقى النسيان همي)
ألتحقنا وشبعته غم وعقوبات حتى بيوم أجه حضني يبجي يتوسل:
_ خوية كافي والله ما أتحمل رجعني لأهلي.
_ اليوم نقتحم وأنت أخوي البطل اللي بالخطوط الأمامية وهاا أي تخاذل أو تراجع ترى أكو مفرزة إعدامات واگفة بالمرصاد للي يفر لو يدير وجهه عن القتال.
باوعلي مصفن محتار ممصدك ممتعود مني هيج متعود الأخ اليحميه بدمه هسة يدفعه للموت ظل يبجي وينحب يتوسل ما يريد يموت:
_ لازم أرجع و أزوجها حامل خاف أهلها يحسون وتنقتل خوية على بختك فدوة بكولشي عاقبني الا الموت.
بس آني قررت وقفلت باب گلبي:
_ كولشي تسوي أسامحك بيه ألا الغدر والخيانة والخذلان يا عضيد ألا هاي عقوبتها عندي نهائية..
بين دخان الحرب و أضراب النار
أنتصرنا بهاي المعركة وتراجع قطاعات العدو للخلف وحررنا أحدى المناطق الكانت محتلة وبدينا نطهر الأرض من الجرحى
أجت أوامر قتل الجرحى وتمشيط الأرض أمشي وبيدي السلاح أمشط بيه الأرض من أي جريح من جنود العدو وياي كتيبتي دتمشي و دنكت أخذت سلاح واحد من جنود العدو الميتين و ألتفتت بساع وجهته على شاكر وضربته طلقة بنص ظهره ألتفت علية بساع على حرورة صوابه وشھك يبجي من الألم دومه ضعيف شخصية فطير وحب يخلي راسه براسي الخاين
رفعت السلاح و بنص گصته إيدي ترجف ودموعي تصب إي آني اللي قتلت أخوي قتلت الغدر والخيانة بإيدي كولشي أسامح بيه إلا الغدر يا شاكر إلا الغدر.. ظلت عيونه مفتوحه وهو يوكع شهيد غدري بي مثل ما غدرني غدرته آني بس غدرته غدرة موت ظليت واكف أشهك أبجي.
لمن نزيت بخوف على صوت خليل:
_ قتلت أخوك؟
خليل أعلى رتبة مني مقدم بذاك الوقت وبعدين صعد لمراكز حساسة:
_ لا مو آني (شهكت بنحيب) واحد من العدو غدره ألتفت إله وعدمه براسه هياته سيدي شوف قتلت القتله.
باوعلي بصدمه وسكت ما أعتقد أقتنع بحجتي بس بلغ بالاسلكي:
_ سيدي طهرنا المكان بس خسرنا شهيد أثناء التطهير وأكو عدنا ايضًا شهداء آخرين.
ــ أسمه الملازم شاكر حمود لطيف.
جان يباوع ويخزرني بس ما أعرف ليش سكت واستمر يعدد أسماء شهدائنا
أباوع على شاكر ودموعي تصب:
_ سيدي عوفني وي أخوي.
_ ليش تريد تحظنه شنو اليدفع قابيل يقتل هابيل لابد سبب قوي.
جريت نفس:
_ غدرني.
_ هسة آني خليل اللي يمثل الغراب اليعلمك شلون تطمطم الموضوع وتدفنه أنت مكانك مو هنا أنت لازم بمكان ينفع الوطن رجل قوي ما يرف گلبه حتى لأخوه.
جان خليل حلقة وصل حتى أصعد وكان صمته لغايات حتى أصير بين إيدهم وتحت طوعهم
سحبنا شهدائنا ومنهم شاكر ورجعت بإيدي أسلمه لأبوه رغم عادل و عدنان كالوا هم يتكفلون الموضوع خاف ما أكدر و فضلوا ما أنزل بس عاندت هي هاي اللحظة اللي أشمت بيها من حمود وأشوف إنكساره بشاكر.. شاكر اللي خلفه ورى دهر من السنين وهو ينتظر تقر عينه بخلفة.
وصلت للبيت والتابوت على السيارة والعلم محاوطه طلع أبوي و أمي وهم بصدمه:
_ وين أخوك وهذا الشهيد منو؟ أنت جاي بمأمورية تسلم شهيد ومريت بينا؟
_ جبتلك شاكر أستشهد عزيزك.
أشرت بقسوة للجنود تنزل التابوت وحمود ظل يرجف ووكع على ركبه يصفك أيد بإيد رجفه أخذته وشهكات مختنك كوة يحجي يضرب التابوت بيديه وينحب يبجي:
_ مو موصيك على أخوك شلون طاوعك گلبك تجيبه شهيد.
فتح التابوت يدور بصوابه باوعلي وصرخ:
_ أنت أنت القتلته بوية شاكر تسمعني
يلزم وجهه و يتلمس معانيه وعيون شاكر المفتوحة وحلكه بصدمة تعابير تبين يعرف قاتله منو مو مجرد عدو غريب.
_ مو غريب كتالك يوليدي ولك عزيزي سنين أنتظرك تجي هيج أدفنك ولك ضامك أنت تدفني وليدي.
صوت ريم.. وصرختها وهي تكعود يم أبوي بجيها وحزنها رغم بعدها صغيرة وطفلة بس الحزن ما يعرف صغير وكبير ووكع أبوي على تابوت أبنه على الجثة مغمي عليه وريم حضنته وصرخت :
ــ لحكوني مات أبوي... ولك يابة شبيك؟
صرخت أمي وهي تحضنه:
_ حمود حمود.
واكف بدون مشاعر أباوع إلهم كأنما مشهد مسرحي تراجيتي اردد داخلي وآني قابض أيدي حيل أهمس بداخلي بصوت مكتوم محد يسمعه بس روحي وروح شاكر.
«بإيدي قتلت أخوي الي كضيت عمري أحميه تاليتي بإيدي أنهيه.» شاع الخبر والفاتحة قراءة قرآن و أجونا ناس
و أبوي.. تمرض بفراشه بس يرجف ومصخن:
_ كتلت أخوك يا لـؤي بوية شاكر.. بعد ما أشوفك.
شلت آني الفاتحة وأستقبال المعزين
وآخر يوم بالفاتحة أبوي طلع للعالم مكسور مهموم مريض عيونه تخوزرني بشك بس ما متيقن فسكت و طلعت للحديقة وأشوف هديل.. لابسة أسود طلعت من مجلس قرآن وعزاء النساء.
صحت:
_ هديل.. ماكو البقاء بحياتك أو أعزيج آني ترى أعرف بيج حامل يا سكط حبلتي قبل الزواج ههههههه شلون راح تواجهين الأهل ترى شاكر.. توسلني أعفو عنه ولازم تتزوجون بساع لأنج حامل هههههه هاي حوبتي شفتي.
_ ما تخلو منك والله.. الله ينتقم منك.
صوت يرجف وراي صوت أبوي:
_ بوية هديل.. أنتِ حامل؟
دنكت تبجي:
ــ لو عرفوا أهلي مدري شسوي رحت طبيبة أريد حبوب أجهض طردتني كالت ممنوع شرعاً وقانوناً قتل روح حجي أنقذني ودبرني.
باوعلي بحدة:
ــ تعقد على البنت لبين ما تولد تطلك و أصلاً العقد باطل لأنها حامل وعدتها وضع الطفل بس شكلياً عقد حتى تسجل الطفل وينسب النا وتطلعله جنسية بعدها الله وياها تبقى بحمايتي لمن يكبر الطفل هذا أبن شاكر أبن العزيز.
حجاها وبجى:
ــ والله بوية شاكر تمنيت يسجل بإسمك بس الفضيحة والعالم شتكول علية تالي عمري أبن حمود لاعب ببت العالم.
_ ههههه لـؤي حمال الحطب مات شاكر وألم وراه خيسته وجيفته.
_ ترد فضل العائلة عليك تستر شاكر بكبره ما أريد العالم تكول حبل خطيبته.
باوع لهديل:
ــ السويتوه ممقبول شلون أباوع بوجه العالم.
بدت الناس تطلع وتسلم علينا هديل راحت لجهة النساء والتهينا بالعزاء قررت أرفض وأفضحهم هههههه كافي أصير لـؤي.. حمال الحطب بيوم أجاني معصب:
_ رحت خطبتها وكلت لأبوها هديل لولدي إذا شاكر راح يأخذها لـؤي تدري كال أربعينية ما فاتت وتعرس لـؤي..
كوتله أي ما أكرر الصار وي شاكر أنت جنت متخوف من شاكر لا تترمل بنتك بس هسة لـؤي يختلف عن شاكر عاند ما ينطي لعسكري بعد أصلاً راد يفسخ من شاكر لأن سمع ألتحق بس الولد أستشهد هنا مقبل وأصر على الرفض عاد أضطريت أخذه برى و أصارحه وفسرتله الحمل حلال و الزواج مو شرط حفل المهم أكو عقد وكل الناس تعرف عاقد بس عقول العالم وصمة عار تعتبر حبلت بالخطوبة لذا أخوه يسترها لبين ماتولد ويتسجل الطفل تعارك وياي وضارب بنته.. وكال أمها مريضة تعرف تكول لأخوانها ننفضح بين الخوال اللي رفضت بنتي ولدهم لخاطر أبنك هو طماع سكته بفلوس وقبل.. لذا اليوم تعقد وتجي يمي تعيش بحمايتي وأنت تأجر بيت تشتري بيت بعد ما أريدك يمي كافي الشك يأكل بية بس ساكت ما متأكد أولاً وثانياً حتى الطفل أكدر أجنسه لنسبنا دون فضيحة
_ ما أقبل شسوي.
_ هنا أطلعك من أسمي ونسبي وترجع لنسبك الشيوعي حضرة النقيب.. أنت بحكومة تكره الشيوعي وأبناء الشيوعية يعني تخيل أرفع أسمي منك كل حصانه ما ألك تنبذ و ما تصعد مناصب اللي تطمح ألها وتدمر تنبذ من الحكومة ويجوز حتى يعتقلوك.
فكرت بكلامه هذا خبيث يسويها:
ــ تمام موافق..
ما أكدر أتخلى عن أسمه ولا عن عشيرته ألها نفوذ بالدولة جبير و صعب أترك هذا الأسم الي يمهدني لمناصب عليا جانت مقايضة الطفل يجنس مقابل أبقى أحمل أسمه وعشيرته اللي بيها نفوذ ومراكز مهمة بالدولة باجر أستفاد منه
تم العقد و هديل سكنت بيت أبوي وآني أجرت بيت لونستي صار هاجس النقص داخلي يترجم كل النسوان ما تستحق حبي ومشاعري مجرد ونسة وغريزة وحشية داخلي أهين واذل شكو مرة كرهت النسوان من ورى هديل اللي خدعتني وراحت لأخوي صرت أعتبرهن وسيلة ملذات وسيلة صعود مناصب كائنات ما تستحق الحياة بكرامة كائنات للعبودية ما يستحقن حبي وصرت أدمر كلمن أشوف بعيونها حب أو أعجاب إلي هنا أعتبرها تريد مني غاية ما تحبني لألي تريد أتعلق بيها حتى تعوفني تروح لغيري للي أكثر مال أو نفوذ أسبقهم آني و أعذبهم أشوف بكل مرة هديل.
أتصلت وي خليل العرفني على ناس أستفاد منهم ومشيت بطريقهم ردت أذل هديل وأستفاد منها حاولت أشغلها ترفه عن مسؤولين يفيدوني بالمنصب
هي جانت عنيده وبس ولدت بنتها لحت ننفصل لأن زواج باطل تم وهي حامل ببنت زوجها شاكر ومكملت عده لذا يبطل العقد أصلاً تنفصل دون ما تنتظر موافقتي حتى الحجي ساندها وهددني يزيلني من نسبه لأن لازم كدام الناس آني اللي أطلق حتى يبين كولشي طبيعي والزواج طبيعي.
أباوع للطفلة بحقد هاي بذرة خيانة أخوي الي هاي نتيجة إثنين غدروني الغدر مؤلم ظليت أشهر أعاني من نظرة شاكر.. آخر نظرة قبل لا أعدمه براسه أعرفه تعلم يفين وآني ألملم وراه وما توقع كد حبي إله كد مشاعر الحب والخوة الجنت أعامله بيها كولها تحولت إلى كره لأن أجتثني ما حسب لمشاعري ولا هنت عليه أعتبرت علاقتهم خيانة لازم تجتث من الجذور أجتث كولشي إله علاقة بخيانتهم
بنتهم كرهتها من أول يوم أنولدت بي وكرهت أسمي اللي أندرج وي أسمها
كم مرة فكرت أشمرها بالزبل لو أنطيها كلما أشوفها أشوف آني شكد مغفل ومشى المي من جواتي ما أحسب عمرها أحسب حتى أشهر حمل أمها بيها وي كل سنة تكبر تكبر وياه نار الأحساس بالخذلان والأستغفال
ظلت كم شهر ورى الولادة اللي يجي ميصدك بنتها سبيعية لأن مدنفشة ومبينة كاملة شهور الحمل بيها تسعة
بس تزوجت أمها حامل بشهرين بعقد شكلي وباطل بس حتى يجنسون الطفلة عيشت هديل هاي الشهور السبعة الحبلت بيهم و شهور بقائها ورى ما ولدت ماجدة وأصدمكم آني سميتها ماجدولين مدمن جنت قصص ترجمة المنفلوطي وبالذات هاي القصة بس الحقيرة سجلتها بإسم ماجدة.. بالجنسية.
وأقترحت عليها انطيها آخر فرصة:
ــ مستعد يا هديل.. أنسى خيانتج إلي وأتقبلج أنتِ والطفلة وأربيها بس أبقي وياي آني أحبج حبي إلج دمار وأعصار تنبذيه مصير النبذ كوارث تدمر ناس و تمحي ناس أولهم بنتج.
باوعت وأستهزات بية:
_ أنت شنو وأحبك يالمهتلف ولك كولنا ندري قتلت أخوك بس صاير تعرف ناس كبار وتهددنا بيهم شوف عيوني تطلك والحجي قرر ننفصل متلوكلي.
_ سمعيني زين لا تخليني أخلي رجال الحكومة تلعب بيج يا سكط آني رفعت منج من أقترحت نصحح العقد ونعيش بسلام و إلا ألا أخلي....
سكتت وكملت ورى شوي:
ــ لا تخلين حبي ألج يتحول إلى صراع وحرب تاكل الأخضر واليابس.
_ خب دروح تورطت جنت مراهقة وعجبتني شنو هاي لزكة لطشت ولي مني ما أريدك مو بالقوة.
_ بس إذا فلتي من أنتقامي يا هديل أعرف شلون أثأر منكم وانتقامي راح يتعداج إلى أعزاز كلبج أتركج تعانين طول عمرج للموت وهذا أقوى إنتقام وعقوبة أبدية ألج.
ضحكت :
_ دروح شكد تهوبز دخيل الله يلة راويني العندك.
لاعبت الطفلة أطك طك بالسبابة و الإبهام وهي تلتفت لمصدر صوتهن وتضحك.
ــ نفس العيون الفطيرة هاي بنتج مو عليج أنتِ ماكرة توكعين زلم وتدوسيهم هاي أشوف بيها شاكر.
درت وجهي و عيوني مدمعة وغصة داخلي كلما أتذكر شاكر:
_ هاي ثمرة خيانتكم تبقى وتكبر بس وعد مني ههههههه راح تشوفينها سبب دمارج.
_ تلعب بأعصابي مو؟ تخوفني عود خب دروح ههههه أكو الأكبر منك عمراً ومكانة يحميني بس مترددة أنت و أخوك كرهتوني الحب أنت أناني مستبد و أخوك رغم فطير بس دمر حياتي من تمم خلاني أعرف ماكو حب نقي مع الأسف سنين الجامعة وعشق حب الجامعة راح أحمي بنتي من أخطائي و أربيها ما توكع وكعتي.
الزواج باطل وشكلي وطلاق تم رغم أصلًا ماكو زواج لأن تم العقد وهي بعدتها على أعتبار كدام العالم متزوج بنت بنوت كانت مخطوبة مات خطيبها ولأنها بنت بنظر الناس ما عليها عدة أبوي تجاوز المعقول حتى ما أنتظر تمر أربعين أبنه حتى اليجي يسأل ينكر لا هي خطيبة لـؤي مو شاكر متوهمين وصل جنونه بأبنه انو يقنع العالم آني الخطيب و تزوجنا سكتاوي دون عرس بسبب الظروف والحرب ولازم ألتحق الحرب ذروتها وأحتمال أطول بالأجايز وحجج.
حتى بيوم لزمني سـهيل أبن خالها:
_ الأفضل تبتعد هاي مال خطيبتك الك مو لشاكر وبسبب ظروف البلد من حرب أستعجلتم زواج مشيها على غيري.
أبتسمت وقتها أغثه:
_ حضرة المقدم أنت انسان تشتغل بالأمن شعرفك بالجبهة واليصير من عواصف الموت هو آني وهديل.. على علاقة حب بس أبوي أستعجل خطبها لغيري وأهلها كد الحال وافقوا تعرف أبوها يشتغل بالموانيء عامل بس من مات أخوي تعرف فعلاً حرب خسرتها مرة يم أخوي ما اخسرها ثاني وهنا صرت وحيد أهلي تتوقع أبوي يرفضلي طلب.
_ ولا مرتاحلك عمومًا حياتها وهي اللي قررت مرتين أختيارها غلط.
تركني وراح وقتها أنتبهت من صفنتي اليوم هم شفته وشمتان بيه ما أستمر زواجنا ويلمح هو راح ياخذها وينتظر العدة تخلص ويتزوجها و بلغها تفكر وضحكت بداخلي على كلمة عدة أصلاً ما بينا زواج كولشي جان خداع وخيوط يحركها أبوي ردت أعترف وأصدمه بس خفت يحجي لهديل و للعالم عن ماضيي أبن شيوعين و أخسر مكانتي سكتت وهذا زاد بداخلي نار الغضب والاستغفال أصير دمية يحركها الرباني بس لأن يحس هو متفضل علية خلاني أتعلم وأطمع بالمناصب وأطيع مخططه واسكت حتى لا أخسر أسمه و النفوذ إلي يفيدني
جان سـهيل.. يتحداني وموتني غيض ساكت ما أفجر الحقيقة وأخليه ينفرها بس مصالحي أهم تعرفون الصار هديت عليها أقنعها ترجع ورفضت وتزوجت سـهيل.. عناد بية هي خاينة بنظري وماكو مرة خاينة تتوب.
هـــــــــــــــ♡ ـــــــــــــديل
الحب صار بنظري شي ماله أي وجود تجربتي وي شاكر أنطتني درس أربي بنتي ما تغلط أغلاطي تحولت لأم مستبده ما لگيت حل أخلص بيه من لـؤي ومن شره وساديته إلا بإنو أستند على ظهر قوي شخص أكبر منه مكانة ورتبة وبعناد بيه تزوجت سـهيل وإنتو تعرفون الصار بزواجي سـهيل.. و ظل مشكك ليش بالبداية انخطبت لشاكر وبعدين تزوجت لـؤي ورجعت أنفصلت جنت أبررله وأگول إنو السالفة جانت بسبب أبوي هو اللي راد نسبهم ودمر حياتي لأن لـؤي سادي ما كذبت فعلاً جان أبو نسوان ويشرب ويضربني.
أبــــو شــاكر
ضحيت حتى أحفظ ماي وجه أبني وهو بقبره.. يمكن أكون أخطأت بس أبني الله يرحمه تجاوز العادات والعالم ما ترحم جنت متأكد راح يسمون بنته بنت حرام رغم بعقد شيخ شرعي والناس بمجتمعنا متنظر للزواج بمجرد عقد شيخ وورقة لا لازم حفل ووليمة هنا زواج بس مجرد عقد لا
أنتهزت فرصة أغلب الناس ما يعرفون بالضبط منو من ولدي الخطب ولدي ما إلهم علاقة قوية بالجيران كل همهم المناصب والدولة لو باقي شاكر عايش يمكن صار شي جبير بالدولة بس بعد أستشهد مغدور شكي بلؤي.. جبير بس دليل ماكو ولا واحد شهد الأ أنو ديطهر أرض اللي تحررت من العدو وانغدر على أيد العدو.
كعدت كتبت وصية رسمية ثبتت بيها كل أملاك وفلوس شاكر الله يرحمه و تنتقل لحفيدتي ماجدة.. بعد وفاتي مع هبة مالية من حر أملاكي الخاصة و سلمت الوصية لسفانة.. وطلبت منها تظمها و تنفذها وفي حال وفاتها خصيت ريمة.. تنفذ الوصية و ترجع الأمانة لأهلها وترد حق ماجدة.. من تركة أبوها شاكر ومن الهبة اللي عينتها لحفيدتي.
بعد إكمال الجذور نكول النبتة اللي ينمو جذرها أعوج تنتهي بالقطع وهذا اللي صار جانت ماجدة نبتة نتيجة أخطاء الأهل نبتت وأنسبت لغير ألاب الحقيقي وهذا إجتثاث من الجذر وتلاعب بالنسب اللي حرمه الله يعني كرر بحفيدته اللي سواه بنسب لـؤي.. إله وما اكتفى أمها بعدة ترمل زوجها للؤي حتى لو صوري بس حرام مكملت عدتها التنتهي بولادة البنت
كبرت ماجدة.. وتوالت الاجتثاثات لحد ما انقطعت بعنف من حقوقها ونكران نسبها كوارث حتى تحولت لشجرة وسيلة أنتقام محترقة من لـؤي.. وحرقت وياها هواي ناس.
يعني هذا خطأ أبو شاكر يزوج بكيفه بدون إكمال عدة الأرملة و ينسب بكيفه ويوصي بوصايا ما تنفذت الأب بنى داخل بيته صراع البقاء للأقوى و أستمر الصراع لينتقل بين ريمة وماجدة.. بعد ما جان صراع بين شاكر ولـؤي.. ونتائجه المأساوية عرفناها.
مــــــــــــــ♡ــــــــــــــاجد
مصدوم بلي سمعته و ماجدة.. ظلت مدنگة أباوع لدموعها كولش أنقهرت شنو من عائلة يتلاعبون بالأنساب وبالورث الظاهر جان أكو صراع خفي وغيرة بين لؤي وشاكر والظاهر شاكر.. جان متعلم يأخذ كولشي يريده حتى لو على حساب الأصول والعادات
رد ماجدة قهرني تباوع لعمتها بتوسل:
_ يعني هسة آني شنو؟ وبنت منو حلال حرام زين كل هذا الصارلي وأنتم ساكتين بحظ وبخت منو؟ عمة بلة جدي دقة قديمة ما تقبل أبنه المدلل يفين و يفضحة بقبره أنتِ شلون قبلتيلهم.
_ آني عرفت متأخر جنت طفلة أصلاً ما عرفت بالحقيقة إلا قبل لنهرب بشهر ما أذكر التفاصيل بس أمي هي اللي سولفت حتى تنقلي الأمانة ترجع خافت تموت بالطريق جانت حاسة هي بعد الصار صار وآني هاجرت وأنتِ اختفيتي و إحنا اعتبرناج متي و تصرفت بالأمانة.
مسحت وجهها وباوعت إلي بتوتر:
_ هسة تخابر تطلع أبني مو؟
باوعتلها ببرود مستفز شنو بسهولة:
_ أطلعه بس ترجعين حقوق هاي المسكينة.
ترددت:
ــ آني حجيت حتى تطمنون ترى من رجعت من الخارج ورجعتي مؤقته مديونين وأجيت أبيع كولشي أسدد الدين.
ردت الفاهية ماجدة:
ــ بالعافية عليكم أخذوا كولشي بس أريد أسمي ونسبي هذا أهم من كل مال دنيا.
هنا وكفت :
ــ لا والله يرجعون كل حقوقج أصلًا هاي ما ترجعلج الأسم حتى لا تطعنين بورثهم لأن إلج ورث أبوج اللي أخذوه وأنتِ تحجبيهم ومن كلامها مبين عدها وصية وسندات رسمية تثبت أحقيتج شوفي يا أم سند.. أنتِ هنا أكلتي مال يتيم و ترجعين كولشي لا ترى بيناتنا المحاكم.
صوت نقالي باوعت الدائرة:
_ ألو..نعم؟ شنو؟ منو هذا بلة اوك يصير خير لحظة آني جايكم.
سديته و باوعت لماجدة:
_ أرتاحي واخذي علاجج أكيد هملتيه ببيت.. أختج شمحصل من اقاربج بس البلاوي وأنتِ أم يزن.. قضيتنا ما أنتهت.
كلتها وطلعت مستعجل دركب السيارة هي وراي هم أجاها أتصال توترت و باوعتلي بحدة..
_ هسة جاية...
ليلة واحدة من الدفء كشفت لي كم كانت سنواتي عجافاً وصوت رصاصة واحدة في الصباح.. كان كفيلاً بأن يوقف دقات الزمن
ـــــــــــــــــــــ♡ ــــــــــــــــــــ
مـــــــــــــــــــــــاجدة
ظليت بس بعيوني أباوع ماجد.. أجاه أتصال وفز طلع مستعجل وعمتي هم أجاها أتصال وطلعت مستعجلة وحدي كاعدة وآني ما أعرف شأكول بعد هم رجعلي شعور البرود معقولة وصلت لمرحلة ما أهتم كد ما تشبعت بالمصايب والإجتثاث؟ ولج جيجي السمعتيه أغرب من الخيال.
أخذت نقالي وعبالك القضية متخصني بصمة بكروب صديقات العمر:
_ شلونكم بنات؟ حزروا آخر بلاوي ماجدولين شني؟
باوعت فوك طلعلي سـؤدد.. تسجل بصمة
تم الإرسال:
_ خير منو هاي ماجدولين؟ ياااا خية ماجد.. خاينج وي لين.
رديتها أضحك بس بنبرة ضحكتي بجية مكتومة :
_ صجيجة مو هيج ماجادولين أسم بنية عود على أساس أسمي بس أمي غلست فسمتني ماجدة.. يمكن جانت تسمع ماجدة الرومي وهي تزعبل وي والدي الشهيد المغدور.
دزت سـؤدد.. صورة إلها وهي منططة عيونها ومقربة الكامرة على خشمها عزة عابتلج سـؤدد.
سـؤدد:
ــ أبوج النجس البعثي طلع شهيد ومغدور مو دافنينه سوى شلج بيها.
_ أهووو صجيجة غبية أفهمي أبوي طلع شهيد مغدور شلون غباء عندج.
ردت ببصمة عفطتلي عزة شنو هاي النوب والنبي هاي ما عدها أنوثة:
_ هذا زيج الج ولأبوج الشهيد عذرًا المحروق بجهنم.
_ سـؤدد.. ركزي وياي دكولج طلع أبوي شهيد ومغدور عابت غبية وصجيجة لفتج ترى آني هسة أمر بحالة بين عقل مـريم الطاكات خيوطه وبين عقلج اللي بي فطارية وضحك وهو بنص أزمة نفسية و مأساوية صعبة.
_ مدافهم وشجاب عقلج المجيم لعقلي بين عقولنا حبي سنوات ضوئية بين مجرات الكون.
_ صجيجة غير تنطي مجال أحجي أم طفكه.
_ هاي الصجيجة منين متعلمتها؟ مو الج هاي سوالفي مو سوالف مثقفين.
جانت تشاقى أبتسمت على كلامها ولا كأنما صاير شي.
رجعت تسألني:
ــ منو هاي ماجدولين؟ عزة حبلتي والنبي هذا الخفت منه وطلعت بيج بنية و حتسموها ماجدولين.. حتى تصيرون مـاجد ومـاجدة وماجدولين.
بعد صدمتي وكلام سـؤدد.. اللي طلعني شوي من رد فعلي البارد بس لزمتني موجة فطارية قوية ضحكت ضحكة من غير توقف شهكت صافنة بحظي وتحول الضحك إلى بجي بنفس الوقت خابرت سـؤدد.. مكالمة فيديو بالكروب ما جاوبت ظليت أضحك وأبجي بنفس الوقت.
ولكم ضاع عمري وآني مغفلة شسويت بحياتي وهيج أتعاقب.
دزت رسالة بالخاص:
_ ماجدة جاوبي المكالمة البنات قلقانات عليج شو ولا جنج طبيعية دجاوبي وفتحي كاميرا خلي نفتهم شبيج المعزه شمسويلج؟ ولا أرتاح لرجلج.
فتحت مكالمة كاميرا وياهن ضربت شيلان.. وجهها:
_ يا يا شبيج؟ الدموع أربع أربع.
سؤدد:
_ أحجي خية أحجي تعلمت على مصايبج مو شي جديد شنو اللي مبجيج ومخلي عيونج وخشمج يصبن صب.
عوع عابت سـؤدد.. حتى الماله خلك يبطل يضوج ويبجي من وراج أخذت كلينس مسحت عيوني ووجهي:
_ ماكو شي بس طلعت ماجدولين أسم يحبه رجل أمي المزور ههههههههااااي
مريم:
_ طبكن لا تكولولي لا أكلكم هاي سوالف المخابيل مارة علية وأشمها شم.
سؤدد:
_ ولجن هلا مـريم.. عفية أنطيني صبر خليني أفهم بنيتي شبيها؟ ولكم هاي بنيتي والنبي اللي يأذيها أمه ما ولدته أحجي مويجد شسوالج؟ ضربج؟قهرج؟ مممممم أغتصبج ولكم بنيتي بيها شي رجلج شمسويلج؟
_ لا بالعكس حباب لا كولشي تذبيه براسه.
ردت سؤدد:
ــ أووي براسه هو عاد شلون راس عليه ولسان معذرب.
_ أهووو سـؤدد.. أحجي لو لا؟!
_ عمي أحجي وفضينا.
ظليت أسولف خيط بيط وحدي:
_ آني سامعة بحرب الثمانينات ناس تتأسر وترجع نسوانها متزوجين عليهم نسوان ثانية بس مال الواحد ورى 36 سنة يكتشف أبوه مو أبوه وأمه مو أمه لا هاي أمه إي أمه طلعت صح بس الأبو غلط.
سؤدد: فهمتم شي؟
شيلان مريم بنفس الوقت:
_ لا ما فهمنا شي.
_ سكتن خليني أفهم أول عود فهمن بعدين يلة ماجدة.. ركزي وغردي خلي نفهم شنو هذا الخرط ولج شبيج؟ قلقت أحسج بصدمة مو طبيعية.
_ إي لأن هيكل حياتي طلع مو طبيعي أبوي طلع أبن حلال ونص مو بس أبن حلال.
_ يا صلوات منو أهله؟ حتى من أشتمه أشتمه بعد بالمسميات والعشائر بعيد عن الشقى المفروض تواصليهم شوفي خاف إلج ورث..
ضحكت:
ــ هو شخرب حياتي غير طمع بني آدم بالفلوس.
ردت مـريم:
_ الفلوس تعمي النفوس عن تجربة أحجي ما أرتاحيت بحياتي لمن رجعت أملاك المرحوم زوجي الأول لأخوه وبس أخذت حصتي ثمن التركة رغم هو تنازلي ولكم فد راحة نفسية شسوي بالفلوس اللي عمت نفوس بني آدم وخسرت ياسر أبني بسببها شسوي بفلوس سابقًا يجوز مشكوك بمصدرها قبل ليتوب.
_ لعد أسوي مثلج بلكت أرتاح.
سؤدد:
_ مـريم.. نقطينا بسكوتج على قول المصريين غير نفهم الفرخة شبيها؟! ووضعج مختلف عن ماجدة.. يلة يمة أحجي مو لوزاتي طاحن أريد زبدة
شيلان:
_ بقبق بيق شنو ماجدة.. صارت فرخ دجاجة؟ النوب تريد زبدة شنو هي بقرة.
سؤدد:
_ خايبة سكتي شفهمج بلهجة خوالنا عربيتج تفهم الدارج حرفياً مو مجازي مثلنا ماجدة.. المايك إلج غردي حبي شبيج تبجين وهسة تضحكين وكلامج متوتر ما مرتبط؟
مـاجدة :
_ شوفن أبوي مو أبوي.
سؤدد:
_ أدري بيج موضوع إزالة النسب مضايقج وهذا رد فعل أنو تنكرين أبوج ملعون الجلوة يستاهل السب والشتم قبل لخاطر جدج ما أشتمه من أنعل أبوه لأبو العرفج بيه.
_ ولج سكتي لوك لوك خلي أفهمكم مدام شوي الضبابية اللي بعقلي بدت تزول من خابرتكم بسبب صدمتي اليوم أكبر من كل صدمات حياتي تعرفن أمي؟
ضحكت سؤدد:
_ ست هديل منو ميعرفها؟ شبعتنا خمسينات من جنت بالمدرسة يمعودة يا أم الغيرة خبز أمي ما غزر ولج طبخاتنا والكبب غير أدزلها رشوة تنكة تمر لو كيمر لو لبن عرب من بيبي إلي تجيب صوغات لأمي كله ميغزر بيكم ناس بعثيين ميجي بعينكم.
باوعتلها إذاعة أنفتحت غير تسكت بس فاتني هذا أسلوبها اللي تعلمت عليه سنين من أتوتر تلهيني ولو ما هي ما تخطيت الصار وجان بقيت مريضة نفسياً بمراكز الصحة النفسية:
_ المهم طلعت أمي مخطوبة لشاكر... عمي اللي طلع مو عمي وقبله تحب لـؤي أبوي اللي طلع مو أبوي وكل هاي الفريرة لأن جدي يريد أبنه كدام العالم ملاك بريء دون خطايا ولكم أجتثني من الجذور حتى أبنه يبقى ملاك بنظر العالم ما فكر بعواقب السواه ومشت بيهم السنين تورط وتالي لـؤي.. كبر بالمناصب اللي هو دخله إلها هو خلق الوحش والوحش بطش بيه وبذريته و حتى حفيدته ولكم جنت عايشة بغابة بقطيع مستذئبين البقاء للأقوى واللي يبطش هو قائد القطيع الملاك الوحيد اللي بحياتي تعرفون منو؟
ردت سـؤدد.. أم طفكة:
_ أكيد مـاجد.. النوب شلون ملاك تخليه عالجرح يلتهب صجيجة.
_ ههههه عوفي الزلمة بحاله شلزكتيله يمكن أحسن شغلة سواها بحياته من عرفته لسة كشفلي مؤامرة.
مـريم:
_ كملي وخية أطلب منج طلب تفهمينا شبيج وشصاير أخذيني على كد عقلي عبن العالم صايرة تاخذني كد عقلي وسمعة عقلي أصلاً ضاعت حتى لو أريد أرجعها على كولة عـون.. اليوم لازم حنيتي للخبالات بعد عندج خيوط مطشرة ما التمن.
ماجدة:
_ مـريم.. عوفج منج ركزن بقضيتي وخليني أكمل ضيمي.
شيلان:
_ غير لو يمي من شعرج الزمج خايبة أحجي شكو فرفحتينا!
_ الملاك الوحيد اللي جان بحياتي هو بابا سهيل.. وجان مغفل هم مثلي أكيد ما يعرف خفايا القضية كل اللي يعرفه أنخطبت لشاكر أستشهد تزوجت أخوه حتى قبل أربعينية خطيبها عائلتيش يلة الحزن بالقلب هههههه كوله حتى يلمون موضوع خطايا شاكر.. اللي هو أبوي أي لا تصفنن بوجهي طلعت بنت شاكر حمود لطيف هو مالك المصانع وعقارات ووووو ثروة مطنطنة صرت ما أثق بدوافع جدي اللي عشقته وآمنت ووثقت ومن مات حيل حزنت عليه
صرت ما أفهم شلون أستاذ فاضل مكمل دراسته مو جاهل وأكول شلون المثله يوكع بخلط أنساب لمرتين مو هاي ذمة يحاسب عليها؟ صرت أشك بروحي وأتخيل أمور من وراهم معقولة طمع بأموال أبنه؟ شنو اللي يخليه يسكت ماكو معجزة تكعده من قبره وأعرف دوافعه من غير ما أخمن شنو دوافعه القويه كولش وهيج يجتثني معقولة كل هذا حتى شاكر.. أبوي يبقى نقي ملاك ونعم التربية والأخلاق خوش يربي أبو شاكر معقولة هذا هدفه أووف لعد ولؤي.. ولو هذا دوم أسمع جدي يعارك جدتي أم ريمة.. ويكولها لؤي.. طغى بسبب دلالج وتربيتج
ولكم دخت ماتت أجوبة اسألتي وي الماتوا وماتت الحقيقة والدوافع وياهم للأسف وما بقى إلا توقعاتنا نخمن السبب أي آني ماجدولين اللي سماني عدوي وقاتل أبوي.. وأمي اللي نكرت الأسم وحولته لماجدة.. آني اللي ما ارتاحيت بحياتي وعشت وي ناس بلا ذمة وضمير آني بذرة خيانة أثنين وغدرهم بلؤي.. آني وسيلة أنتقام لـؤي بالجميع وحتى ضحايا مالهم ذنب ماجد أخواته سهيل ذولي أحترقوا بنار جهنم أسمه (كلشي يدخل حياة هديل وبنتها ينتهي بدمار أنتقام لؤي) وختمها عوقني آني اللي قتلت قاتل أبوي وطبقت الآية (وبشر القاتل بالقتل ولو بعد حين) آني اللي عمتي ما نفذت وصية جدي وتريد تاكل ورث أبوي إلي وما تنفذ حتى الهبة من ورث جدي.
حجيت الهم كل القضية وهم لزمتهم صفنة المطي اللي لزمتني وضحكة الصدمة بس سـؤدد تجاوزت الصدمة:
_ بس يروح سواد الليل ترفعين قضية إثبات نسب وراها قضية أستعادة كل ورثج وطز بيهم وباللي خلفهم لا تسكتين عن حقج وبطلي فطارية وفقارية وطاح حظج.
_ أستغفر الله يارب ولمن تغلطين علية هو حظي طايح من گاعة.
_ صويحبتي الفاهية وأعرفج راح تتنازلين عن ملك مقابل الأسم يردوج لخانتهم لذا غلطت مقدماً وفنج ترضخين القانون وياج جكة إبرة تحليل DNA إثبات صلة بينج وبين عمتج هنا تنهي القضية وتحجبين عمتج أصلاً من ورث وأملاك شاكر اللي أخذتهن الطماعة أشوف أنتصار تكول عارضين حتى البيوت للبيع وهم من كم سنة يتحركون على الملك بس جان عقبة عدهم المحامي رجلها رافض الفكرة هسة شلون قنعوه ما أعرف والله سمعت يستقرون بدول الخليج وبس المحامي يريد يدخل السياسة والأنتخابات لذا أقتنع يبوك أموال اليتيمة تفيده يصعد مناصب و ينطي رشاوي وإلا من السقوط جان بيعوهن بس ربج ولطفه عليج خلا عراقيل لبين رجعتج حتى محد يتصرف بالملك.
_ شسوي بالورث؟ خلي يرجعون أسمي هاي هي عوافي عليهم طمعهم بالورث.
وسعت عيونها سؤدد وذكن هم مصدومات من برودي:
_ شهالفهاوة والبرود؟ وتلوميني أغلط أشتمج لو تزعلين؟
_ أزعل.
_ بعد ما أغلط على أبوج الفاهي القشمر إلي أمج المادية قشمرته وخلت الأخوان تتكاتل من وراها بس راح أغلط على لـؤي الحقير من أنعل ربيب جدج البعثي أوف بعد ما نكدر نكول نعلاً على أهلج الحزبيين.
صوت باب حديقة بيت فضائل أنفتح وانسد وصوت صعدة درج توترت
باوعت للساعة عزة 3 ساعات مكالمة ولا حسيت بالوقت:
_ باي رجع رجلي يلة ما أريد مواجهة وياه حنام.
_ إي شردي هسة أنتِ ماجدة اللي أعرفها فهاوة وجبن.
سديته وطفيت نت وركضت للجرباية وتدثرت عود نمت فتح الباب ودخل إجة للغرفة أباوع من زرف سويته باللحاف هيج كد العين أخذ اله داخليات وراح للحمام أهو ناوي يبات هنا؟ إلمن بايت يمي يا حظي شمحصلين منك بس الهجر؟ روح لذيج وفكني.
أسمعه معصب ويشتم ويسب:
_ من أنعل أبوكم لأبو الخلفكم يا حرامية!
هو يشتم وآني أحس ديشتم أهلي و أنقهرت منه وأكوله بگلبي:
ــ أنعم الله عليك شلت روس الموتى بهالليل عليمن على فلوس؟ تولي بس ساعدني أرجع أسمي باجر لازم أحاجيه هو رجل أمني وبلكت عنده واسطة أرجع أسمي.
دك تلفونه نزيت مكاني من صاح بعصبية:
_ شوف أنت محامي بس خلي الله بين عيونكم.
يحجي وجر اللحاف من علية ظليت أرجف من صياحه وأجت عيني بعينه أشرلي أكعد:
_ أكعدي نايمة؟ يا برودج ذول بيت عمتج عصابة إذا ما ندمتهم فلا أطلع آني مـاجد.. ولج وصلت أتهدد.
بخوف كوتله:
_ خوما يأذوك.
باوعلي وجر نفس:
_ ما يكدرولي.
_ زين أنت طلعت شسويت؟ وهيج راجع عصبي!
بدأ يسولفلي....
ماجد:
ــ رحت للدائرة لكيت أبو يزن وياه واحد معروف بمحافظتي وإله مركزه العالي بس مو علية ولا على معارفي سهلة يصير خير آني إلهم المشكلة يحجي معلك وتركته بواهسه وسايرتهم ولج آني من مرة عزمنا الحجي وشفته ما ارتاحيتله تذكرين؟
صفنت هزيت راسي لا عزة غمني يااا شعلي إذا أنت جاي واج نار وأعصاب تطلعها بية.
_ هاي ما تذكرين لأن وقتها فتحتي أذاناتج وحلكج الفاهي شقى سوالف وياه وقتها ما تقبلت وغرت عليج هسة تذكرتي.
ألا أغثه:
_ لا ذاكرتي مو مثلك ما شاء الله أنت ذاكرة قوية
ركز بية ورد متنرفز:
_ ناقصني بس الحسد دخليني أكمل سالفتي
_ كلي آذان صاغية كمل!
_ بهاي بيها الخير المهم أكمل ظل أبو يزن يحاجيني بأمر:
_ هسة تتنازل شلون تعتقل شخص بريء بتهم كيدية؟
_ كيدية يا أبو يزن.
هنا واسطته تدخل:
_ طبعا كيدية لوتعترض؟
_ سيدي؟ أصلاً تعدى على زوجتي ومن حقي أرفع قضية ضده.
(ما جبت طاري مخدرات آني بس كدام ريمة للتخويف لأن أدري هيج تهمة تنكشف كذب بالتحقيق وتالي تنكلب ضدي وأطلع ضابط مرتشي أتهم شخص بريء حتى أبتزهم بفلوس)
_ تتنازل إذا تخاف على منصبك وترقيتك الجاية بالجدول مال ترقيات بهاي الفترة.
_ ترقيتي تأخرت سيدي بسبب عقوبة جانت علية.
_ وأكيد ما تريد تتأخر بعد الترقية وتحصل عقوبات وأحتمال فصل من الدائرة.
باوع هذا الشخص اللي جالس ضابط برتبة عقيد وهو من معارفي باوعلي بنظرة أستهجان:
_ سيدي أكيد مـاجد.. يتنازل.
باوعلي العقيد بنظرة ولك أستجن نظرته عرفت شيريد يوصلي أسايرهم وبعدين أنطيهم قاضية.
شوي دخل عسكري :
_ مرة تريد مقابلتكم تكول هي أم يزن اللي أتصلتوا تحضر.
كال العقيد:
_ خلي تتفضل.
دخلت تخوزرني والعقيد يضغط أتنازل وهذا المسؤول الكبير بالمحافظة يهدد
تنازلت ووقعت تنازل ببلد الفاسد هو صاحب الكلمة والحق بس هاي مو نهاية هاي أأمنهم لمن أكبصهم حيل أنقهرت وحسيت إهانة لمهنتي شخص تعدى ضرب مرتي وكدامي ومكدر أعاقبه بالقانون ناس متخاف الله تنكر بتهم حتى يبوكون ورثها ربي ترضاها؟
العقيد كال أبقى بقيت وهم وقعوا ووقعت غلق محضر وأخذوا أبنهم وراحوا ولا بعينهم ولا بحذاهم.
باوعلي العقيد أبتسم:
_ ذول مو قليلين شر شوف لو ما متنازل بس تطلع منا يأذوك منا أول أمن نفسك بنفوذ أقوى منهم حتى ميندكون بيك شوف ماجد لا تلعب وي الحيتان دون درع هذا المحامي يلمح يدخل العملية السياسية و الانتخابات وحجالي قبل جيتك تاريخه النضالي وشلون كدر يهرب من النظام.
_ عود ما أعرف تاريخهم ههههه سيدي هاي العائلة لو بيدي أحرقهم بتيزاب وهيج كدامي أشوف لحمهم يموع للعظم لأن ناس ما تخاف الله كسروا عظم بكل عين وكحة هاي المرة عمة مرتي.
حجيتله أهم ملابسات القضية:
_ سهلة بس تعرف دوائرنا جرجرة وإذا عند رجلها نفوذ بالدولة قضيتك تبقى سنين بالمحاكم.
_ ربك موجود ما خاب من توكل على الله وحاشاه يقبل بالظلم.
_ آمين.
كتب ورقة وختمها:
_ تروح للعاصمة لهذا الشخص بس هو يكدر يوكف بوجه ذول الحيتان بس كوله توقع حتى تحليل إثبات نسب يزوروه حتى يأمنلك التحليل دنصحك خلي كل الأحتمالات.
_ وين أنطي وجهي وشسوي إذا بلد أهم مؤسساته فساد؟ هذا حق بنت أنظلمت من داخل بيتي وخارج بيتي مو لأن مرتي وأشكيلها بس كلمة حق تنكال ولازم يرجع الحق لأصحابه سيدي ناس ما تخاف الله تداخل أنساب وتنكر أنساب إذا الأهل هيج شترجى من العمة بس أگول حسبي الله ونعم الوكيل سيدي آني عندي نفوذي وناس واصلة بالدولة راح أطرق كل الأبواب بس يبقى باب الله هو الفرج وينصف هاي اليتيمة.
وخليت وطلعت معصب بكراج السيارات منتظريني.
صاح المحامي:
_ لا تنبش قبور الموتى إذا تريد تعيش
باوعتله من فوك لجوة بعصبية واحتقار:
_ دتهددني هذا تهديد صريح لضابط؟
_ وشنو يعني؟
_ شوف قبل جنت أشوفك إنسان حقاني صاحب مبدأ لا تخلي النسوان تغير مبدأك سبق أبو شاكر المغفور له وگع بخطأ بسبب مرة مرتين مرة سبب أم ريم ومرة حتى يستر أبنه اللي وگع مصيدة طمع هديل فأنت صاحب أولاد وخلي الحلال والحرام بين عيونك بس هذا أكوله إلك ترى الحق يبان لو لآخر نفس بعمري إلا أثبت نسب مرتي مستحيل أبقيها تحمل أسم قاتل وبعثي نجس سلام.
أشرت بيدي يم راسي بعلامة السلام وركبت سيارتي وطلعت قهري بيها أسوق بسرعة شلون ناس ما يخافون الله!
باوعتلها وهمست:
_ هذا الصار توقعي قضيتج تجر أشهر وهاي نعمة أذا أشهر.
_ عوفهم الله موجود بس ليش ما نتفق وياهم يرجعولي أسمي مقابل يأخذون ورثي.
رفعت إيدي أريد أركعها طراك بس أستخطيتها:
_ ولج ثول ما بعده ثول من عقلج يوافقون صفقتج التافهة أصلا يخلون أحتمال بس تاخذين حقج بالنسب ترفعين قضية أستعادة ورث لا تصيرين غبية الفلوس فلوسج شعلية ما عندي طمع الحمد لله ماخذ حقوقي كسجين سياسي وكذوي شهداء وعندي محلات بمولات مال ملابس ماركات ومحلات ملابس رياضية مخلي بيها عمال.
_ يعني بطلت من البالات.
_ إي تطورت بشغلي مخلي عمال بمحلاتي لأني دوام ممتفرغ بس أروح أشرف وأحاسب الوارد.
_ الله يرزقك وآني قنعانة شسوي بالورث بس أريد أسمي
_ ما يعترفون بيج الأفضل تحاربين لكولشي لا تصيرين ضعيفة الشخصية والعالم تبوك بورثج وحقوقج تمنيتج مثل هاي الهبشة سـؤدد جان ما خفت عليج دخيل الله شكد فهاوة فول.
وكفت:
ــ شوي وأرجع من رجعت طـيف.. ما تلكتني.
_ خاف نامت.
_ هو أريد أشوفها وأوصيها بشغلات تهتم لأكلج وجهج وجه يابس.
_ يااا أصلا النسوان تتمناه وجهي فك محدد طبيعي معندي شحوم ولغود و جسمي العالم تجوع روحها حتى توصله.
هزيت أيدي بس لفت نظري جسمها صاير صدوك يخبل رغم نحيله بس متناسقة ومفاتنها بارزة بأنوثه ضيكت نظري الفاهية شلون تنبهني لعد شكد فطيرة بنت شاكر أبن أبو شاكر رحت لبيت فضائل جوة قافلة بابها دكيته فطلعت بنتي وفضائل ركض:
_ بابا وين رحت شفت سيارتك بالكاميرا رحت ورى ساعات رجعت عبالي رحت بيتك.
_ رحت بشغلة.
ظلت تكلب بعيونها وتتمضحك تتمسرح علية جنها بزونة منا خمنت تعرف لأن تتختل بعيونها.
_ سولة التصنت ما بطلتيه مو بسببه طلكت القبل فيروزة.
ضحكت :
ما سويت خير لمياء تصاحب عليك ودك سوالف نقالات ليلية من أنت خفر وأنت بنفسك فتشت نقالها وثبتت تهمتها ما كذبت همزين مجابتلي أخو جان ورطة و الوراها تبوك منك وتنطي لأخوها المكبسلجي و توعده بيه تقنعك تزوجني ياه لو ما آني ذكية عليك و سجلتلها وصورت شلون تبوك ومكالماتها سجلتهن جان ما صدكت لأن جانت كدامك تسوي روحها فاضلة
أحمد الله عندك بنية تحميك وتحمي أموالك وشرفك لا تضيعة النسوان.
_ و هم بطلي هاي السولة ما أحبها بالمرة
شبكتني:
_ بابا أحبك يمتى تطلك فيروزة الوحيدة مدألزم دليل عليها أنت باباتي ملكي والله لوما تزوج وتبقى يمي أحسن.
أختبرتها:
_ و أمج مو ردتي أرجعها.
_ جيجي فقيرة تقارنها بالعصابة اللي تزوجهن وأمي بالأمان مدام ما تأذي عمتوو فضولة.
_ روحي بابا أريد أحاجي عمتج واللي يصنت الله يذبه بالنار.
خلت أيديها على أذنها ومرة حلكها مرة عيونها:
_ أوكي أبو طيوفة لا أسمع لا أرى لا أتكلم هاي هاي كابتن رايحة أنام نعست.
راحت و تبعتها أتأكد ما خاتلة وتصنت.
جريت فضائل بكل عنف وخزرتها بقسوة:
ــ لا عبالج ساكت ملتهي بقضية جيجي و عمتها راح أصفي سنين الماضي و أحاسب على كل سنة مرت بعمري وآني أتهم وأظلم شخص بريء جايج الدور إلا أطلع حليب أمي من خشمج بس أتأكد ألج أيد بلي صار.
هي من خزرتي رجعت شاردة لورى:
_ اليوم شبيك؟ منو يمك منو أحذاك وزتك أم طيوفة علية هي هاي سوالفها وأنت هم جنك بردت عن أنتقامك وعن ثارك وعن رحمة الما نعرف عايشة ميتة لو خاف متعارك وي مرتك ذيج وجاي للفوك تفرغ بيها شحنات الغضب بس نظرة من عيونها سحرتك وأجيت علية هاد.
ظليت أخوزر:
ــ خلي بس أعرف ألج دور ولو بسيط آني ألج أطلع ضيم گلبي بيج.
رجعت للمشتمل دخلت وركعت الباب بكل قوتي أستغربت هاي شردت وختلت وين راحت دورت الغرفة ماكو بس أنتبهت لنزلة الجرباية مرفوعة من جانب كعدت على ركبي ودنكت رفعت النزلة وعيون تلمع تطالعني تتراجف
لهاي الدرجة عانيتي إضطهاد أي حركة باب عنيفة أي صياح أي دخول للبيت بقوة تظل ترجف تنهار لو تبجي لو تخاف.
ردت أنصب عليها بس مو مال أجازف وعيونها تباوع برعب إلي:
_ طلعي أشوف دتلعبين وياي ختيلان؟! لزمتج.
مديت إيدي وجريتها بساع لخفة وزنها شعرها مبلل سابحة و متعطرة لابسة برمودة بناتية تصلح لطـيف.. مو لمرة متزوجة أباوعلها و حسيت مشتاق ورغبتي بيها زادت بس كتمت:
_ تاليها وياج؟ من ركعة باب ختلتي جوه الجرباية لو جايج بهمة و.... ؟ عمي وراج حرب لا عبالج أهلج ناس خيرين ترى يردونج تبقين بنت مجرم بعثي حتى ما ينطوج أملاكج!
ردت بخوف:
_ عوافي ما أريد فلوس وملك بس أسمي لأهلي أريد أُنسب.
صحت بيها وجريتها من زندها طخت بصدري دفعتها حيل:
_ لا تصيرين فاهية وفقيرة! شنو عوافي؟ دأكولج حندخل حرب وراح أسوي المستحيل صيري مرة حوك وكدها لا تالي تفشليني وتضيعين اللي أسويه زين؟
ظلت تبجي:
_ لا تصيح علية لا تصيح.
ظلت تبجي ولأول مرة أكسر الحاجز وأحضنها وآني أشمها مشتاق أويلي ولج أويلي يا سنين الهجر مرت أويلي شلون ظلمتج؟ شلون صرت غبي؟ ولكم هاي العيون والفهاوة ما تخون! شجاني وهيج ظلمتج فوك ما الزمن ظلمج وأنتِ ببطن أمج؟ ردت أحجيلها هذا بس ما كدرت بقى داخلي أكابر
حسيتها ترجف عبالك بنت وحسيت بخجلها..
لزمت حنجها شردت مني وغمضت فهمست:
_ أنتِ خايفة؟ خجلانة؟ أجيبلج بطل مي...
حجيتها وضحكت وذاكرتي وين راحت أبتعدت لورى على مقعدها كحفت و هي تنتفض متوترة كالت:
_خليه بطل المي إلك يبردلك گلبك.
ضحكت وآني أريد ألزمها مكدر بعد:
_ لا صرت ما أحتاج لبطل المي صارت عندي زلاطة.
أستحت ودنكت فهمست وآني أوخر كل تفكيري ما ألها رغبة بيه وباقية يمي لأجل طيف.
ظليت بس أباوع:
_ الأفضل تنامي أروح أسبح أبرد گلبي اللي نار.
باوعتلي بثول:
_ لا تتمرض.
بگلبي عتبت من أمداج دلمحلج ثول وهاي الفاهية غباء فول لا هواي ربحنا القضية هزيت إيدي دخلت الحمام سبحت و بدلت الداخليات:
_ ليش ما فارشتلي؟ ترى تعبان أريد أخمد.
_ ها..
هزيت إيدي لا حول ولا قوة إلا بالله.
رحت جبت مندر ولحاف فرشتلي بالكاع أخذت مخدة تمددت وآني مخلي رجل فوك رجل و أهز رجلي بالهوا معصب من الوضع كوله تمددت هي عالجرباية من صفحتي ومدت راسها تباوع إلي وآني بالكاع.
تخزرني:
_ شمدريني تبات هنا؟ مو عندك مرة بدلتني بيها؟
غمضت عيوني متجاهل العتب بكلامها معقولة تغار علية وتحبني بعد كل هاي السنين لعد ليش من ردتج هسة أبتعدتي من لمحت تسوين روحج غبية مفهمتي يارب كون الحب باقي بقلبها؟ وتسامحني جرحتها ونبذتها يا الله شلون نظرة لعيونها تكفي تصرخ بالبراءة والشرف بس يمكن الله خلاني أختبار وفشلت بي مع الأسف.
مغمض بقيت بس أبتسمت وهي همست:
_ ليش تبتسم؟
فتحت عيوني:
_ نامي هههههه.
_ يا النوب يضحك؟ شنو اللي يضحك؟ توك ترعد معصب أبو بطالة المي تذكر
_ نامي مادة راسج علية جنج فارة وشبيها بطالة المي صحة وعافية وغسيل كلية مجاني دشاكسيني ديري بالج لا أفترسج دتتحركشين بية هههه
رجعت سألت:
_ ليش ما بتت يمها؟ شمعنى أجيت هنا؟
ركزت بعيونها وهمست:
_ شعليج هههههه؟ ابأت وين ميعجبني عفتي موضوعج المهم وجلبتي بمكان بيتي!
مـاجدة:
شجاني اليوم ما أكدر أنام؟ معقولة رد فعل من الصدمة؟
حسيت كانولا اللي بعدها بيدي توجعني كعدت فازة:
_ عندي إبرة نسيت ما أخذتها.
_ عاشت إيدج أخذيها هسة.
كمت حليت محلول الإبرة ضغطته بالكانولا:
_ باجر لازم تتبدل الكانولا أحسها أذتني أو أشيلها هسة وباجر أخلي جديدة ترى طبت أشيلها وكافي إبر.
_ ماكو هيج حجي دنجبي وتكملي علاج عود ممرضة ومهملة!
تمددت أريد أنام منعسة كولش:
_ مـاجد!
_ همممم خلينا ننام.
غمضت عيني وهمست:
_ بردت منو يدفيني؟
حيل أستحيت من روحي لا مو هيج ترى ورى هالسنين بقى حاجز وأكو خجل وأكو لازم مستحى يعني يعتبر غريب سنين مبتعدين وفترة زواجنا قليلة حتى ما لحكت أشيل الخجل وتفرقنا.
_ أقصد تعودت جوكم بديت أحسه بارد قبل جان حار لا تفهم غلط بس شغل الهيتر هذا قصدي.
مـاجد:
فتحت عيني تحبني؟ تصرفاتها تدل تموت علية و مشتاقتلي رغم اللي سويته شنو من گلب ولج شلون ضيعتج وانحرمت منج سنين؟ درت ظهري ما جاوبت مو كره بيها بس حسيت كره لروحي حسيتها نامت كمت لفراشها أتمعن بيها أويلي حليانة النوب فوك ما هي حلوة.
وزني الشيطان أتلمس واخذ راحتي شوي فتحت عيونها:
_ شتريد شدسوي؟!
_ أباوع ممتلكاتي و أتمعن مسوي حرام؟!
سكتت وحسيتها تضغط روحها على الفراش مغمضة خجلانة تهرب من بعد مكدر لهنا وحدي أحتويتها بحضني بكل قوة أطلع ضيم السنين وأشتياق ليالي البعد وهجير المشاعر الي بهاي اللحظات ألتهبت..
كعدت قبلها ورى الحمام طلعت مبتسم مرتاح عبالك هموم السنين كولهن نفضتهن بليلة وي حبيبة القلب فزت وغطت وجهها باللحاف ضحكت:
_ أين تفرون ههه لا صدوك يلة عمري صحصحي راح أروح للعاصمة.
_ اليوم؟ مـاجد.. خلي تولي فدوة والله أخاف عليك فدوة ممرتاحة.
ــ الحرب تحتاج بيادق قوية يا جيجي وحربنا هنا وحدنا نخسرها وي ذول الحرامية مستعد كولشي أسوي ولا أخسر حربي هاي.
بدل عسكري و تعطر وهو يباوعلي رجع نزع:
_ هااا شنوو
_ بعد وقت تمتوعة تصبيرة طريقي بعيد للعاصمة.
ضحكت مستحية أحس كأنما عروس جديدة بأيامها الأولى تستحي و بعدها ممتعودة هو هذا حاجز السنين المرت تركت فجوة ومن أمس بدينا نحاول نتجاوزها وراها هم سبح بدل وطلع
شوي وأطلاق ناري لطمت خدي
_ يمة راح زلمتي يمة نفذوا التهديد
كوة أركض وردت أوكع من الدرج تلاكيت وي فضائل فتحت الباب وظلت تصرخ وتلطم لا يا رب ما أريد أتحمل خطايا وذنوب لا مريد أخسره ساعة السودة اللي عمتي أجتني و حجت كولة مني ومن قضيتي خسرت رجلي...
