رواية أحببت من لايبالي الفصل الخامس والخمسون بقلم مجهول
براء : ااه يمه راح اموت لحكيليي
ناديه : لزمت ايدها ولج يمه هانت ضغطي على نفسج شويه
ساره : حبيبتي دفعي اكثر حتى يطلع الطفل حاولي تكونين اقوه
براء : بدموع كافي الله يخليكم مااريد اجيب خلص كافييي اااه زيييين وينننننك
زين : واكف بره واسمع صياحها ... يا الله دخليك صبرها وسهل ولادتها ... اباوع ابويه واخواني اجو همه ونسوانهم ... شعدهم اجو
جميله : بسرعه وينها وينها
زين : جوه .... دخلن البنات واحنه بقينه بره
جهاد : اهدئ ابني شبيك متوتر
زين : هاا لا ما متوتر عليمن اتوتر
محاسن : دخلنه للردهه ماقبلن نبقه طلعت اني وبقن بس شمس وجميله .... كعدت على جهه طلعت قراني من الجنطه وكعدت اقرالها قران حتى تسهل ولادتها سوده عليه شحالها صارت خاصه هي صغيره ما تتحمل
ساره : يله براء دفعي اكثر اي عفيه عليج اي
براء : ضاغطه على ايد امها ااااه ساعة السوده الي تزوجت بيها وساعة السوده الي سويت بيها هالصخامه وحبلت ... باوعت لامها صارخه اااااه كله من وراكممممممم ليييييش عرستوني اااه لو باقيه بدون زواج احسلي .... شكول عليك زييين كلللللللله من وررااااااك انت السبب
شمس : حاطه ايدها على حلكها تضحك
براء : تبجي ... لتضحكيييييين فتهمتييييييي ااااه زين حبيبي وينك راح اموت
جميله : هسه مو جنتي مختلفه عليه شو كلبتي
براء : ااااه معلييييييج انتي .... كله من وراج انتي
جميله : شنو قابل نمت وياج لو زين
براء : اااه اي صحيح كله بسببه
مريم : سكتي عنها جميله ماتشوفيها شلون كامت تخبص بالحجي
براء : ولك ماما اطلععع مو طيحت حظي اااااه ياربي ليش دومي مشلوعه كلب
ساره : براء مايصير تحجين هيج .... هاي الولاده جاا شعبالج يله دفعي الله يخليج
براء : دفعت اقوه ... يارب بجاه فاطمه الزهراء سهلها عليه ااااه
_____________________
قصي : تقرب منها .... ابتعد مخترع باوعلها صاح لج هاي شنووووو ؟
ديمه : صعدت الجرجف على جسمها ودموعها تنزل
قصي : ديمه فهميني السالفه انتي شلون ... شلون بعدج بنيه وان...
ديمه : قاطعته بهدوء رجاءا اسمحلي .... قصي اني وسامر ماصار بيناتنه اي زواج فعلي
قصي : بب بس انتي مزوجه من تلث سنوات شلون ماكو زواج فعلي
ديمه : بدموع سامر جابو بيوم الحنه شهيد جان المفروض يوصل بليله الحنه حتى عرسنه يصير ثاني يوم ... بس شاء القدر انو يستشهد قبل لا نزوج بيوم واني ضليت محافظه على نفسي اله وعمري مافكرت انو ازوج نهائيا ... بس بس بجت تالي صبري واحترامي لروحه والي جنت اعتبرها اطهر روح طلع والله جنت مستعده ابقه طول حياتي بدون زواج جنت واهبه نفسي اله ومن تالي يطلع مزوج وعنده طفله واني اني طلعت لا شيئ ياقصي
قصي : تقرب ماسح دموعها كافي لاتبجين هذا الموضوع ينسد وديربالج اسمع اسم سامر على لسانج اعتبري صفحه وانطوت من حياتج ... خلينه نبدي من جديد ديمه خلي ندفن الماضي هنا ونبدي صفحه جديده
ديمه : باوعتله اجذب عليك اذا اكلك اكدر ... صعب قصي حيلل صعب اني اكدر اتقبلك ولا كأن جان اكو رجال بحياتي اعرف كلامي ممكن يأذي مشاعرك بس اني مااحب اخدعك واجذب عليك
قصي : شد على ايدها ... اني ماكتلج هسه اتقبليني اني اريد نصير اصدقاء خلي علاقتنه تكون صداقه وبالتدريج نكدر نمشي بحياتنه اني مامستعجل عليج كل الاريده انو تبقين وياي ... بوس اديها موافقه نصير اصدقاء
ديمه : هزت راسها
قصي : مد ايده وهسه اعرفج عليه ياحلوه اني اسمي قصي قاتل قلوب الفتيات وانتي
ديمه : ابتسمت بهدوء ... اسمي ديمه
____________________
ساره : يله براء دفعي اكثر عفيه اكثر
براء : رخن رجليها طايحات بتعب بعد مااكدر
ساره : ولج يموت الطفل لا تنزلين رجليج .... دفعي حبابه الله يخليج اخذي نفس ودفعي
براء : بدموع ما اكدر
ناديه : ضغطت على ايدها ولج يمه يله يله براء رفعي رجليج ودفعي يله يمه يله
مريم : براء بنيتي الله يخليج تحملي شويه
براء : رفعت رجليها .... اااه
مريم : صلو على محمد وال محمد
براء : اااااااااه
ساره : اي عفيه مابقه شي يله
براء : اف اف اااه ياربي خلصنيي
ساره : يله براء يله راح يطلع
جميله : دفعي اكثر حاولي تضغطين على نفسج يله حبيبتي تحملي شويه
براء : ياالله .... ااااااااه
ساره : طلعته الحمدلله
براء : سمعت صوت بجي نزلت رجليها مغمضه عيونها
ساره : يمه شلعتي كلبي يابراء .... شالته انطته للممرضه روحي ويه بيبيته بدليله وتعالي
ناديه : تباوعله وعيونها يلمعن ... بعد كلبي نورت الدنيا
مريم : ابتسمت شلعت كلب امك يبيبي نورتنه يحبيبي
جميله : الف مبروك بروئه
شمس : الحمدلله على سلامتج حبيبتي
براء : همهمت ... مابيها حيل تحرك اصبعها حتى الطفل نسته من الالم
جميله : طلعت ويه ام محمد
وحده من النسوان الي بالردهه : اكلج عيني من رخصتجن هذا الطفل ليش هيج ابيض شو ابن بتي مو هيج لونه .... خاف ابنكم بي شي لا سامح الله
جميله : عمه بعينج انشالله .... لا عيوني منيله ابيض ازرك اجلح يلعب النفس بس اني اكلج يجوز انتي تحسي ابيض لان ستوه طالع
المره : يجوز
_________________
سجاد : اكعد زين تره شلشتنه شجاك
لؤي : عوفه سجاد حقه مرته جاي تصارع جوه حتى تجيب مو سهله
زين : بكلبه يمكن ختم القران .... شاف ساره طلعت هي وامه والبنات ... هاا بشري
ساره : الف مبروك دكتور والحمدلله على سلامة المدام
جميله : زين الطفل يجنن يجنن
زين : ابتسم بفرح وينه وينه وبراء شلونها
ساره : ودينا بايد بيبيته نبدله ونجيبه الكم اما والدته لا الحمدلله عال العال بس شويه ارهاق عدها من الولاده انشالله شويه وننقلها لغرفه خاصه مثل ما طلبت انت
زين : هز راسه مبتسم الف الحمدلله
سجاد : حضنه الف مبروك زيوني يتربى بعزك انشالله
لؤي : حبيبي زيوني تستاهل كل الخير
حسن : يتربى بعزك حبيبي
زين : الله يبارك بيكم يوم الالكم
جهاد : كام بوسه الف مبروك يتربي بعزك ؟
زين : ابتسم
مريم : بعد كلبي يمه الف مبروك
زين : باس راسها .... شويه ورحنه للغرفه الخاصه نشوف حبيبتي فتحت الباب ودخلت لكيتها سانده جسمها على المخده ووجها اصفر
براء : يمه احس روحي متت يمكن اكبر الم شفته بحياتي هو اليوم اباوع البنات اجن بوسني
محاسن : مبروك بزونه
براء : بتعب الله يبارك بيج
زين : كعد يمها باس راسها هامس الحمدلله على سلامتج يروحي
براء : ابتسمت الله يسلمك حبيبي ... اباوع وين ابنه شو ماهو
زين : هسه دقايق ويجيبو
مريم : يمه زين تره ماكو داعي تحجز غرفه لمرتك هنا
زين : ليش ؟
مريم : يمه مرتك ستوها جايبه وبعدها تعبانه وانت تعرف هاي مستشفى بيها اشكال والوان تروح تنعدي بمرض لاسامح الله لو تتمرض من وحده
زين : ميخالف خلي تصير الصبح واني اجيبها واجي ماتشوفين الساعه بال3 الصبح مو مال نطلع هسه
ساره : السلام عليكم
الكل : وعليكم
ساره : تعالي دخلي الطفل
براء : اباوع طبت امي شايه بايدها شي صغير ملفوف ... الكل كام التم عليها
محاسن : ياا فدوه شلون صغير
حسن : لك زين ابنك مبين صكوك من هسه
زين : ضحك
سجاد : نباوعله فتح عيونه شويه .... لك هذا فص عينه شكبره
مريم : ضربته اللهم صل على محمد وال محمد عينك بارده عليه شجاك ولك
سجاد : هسه شحجينه
لؤي : ابد كلشي ماحجيت بس ركعته بعينك وهو ستوه اجه
براء : زين انطيني ياا اريد اشوفه
زين : هسه خلي جده يكبر باذنه واجيبه الج
ناديه : تقدمت هاك عمه حبيبي شيل ابنك
زين : بالبدايه يشيله جده
جهاد : كام من مكانه وكف كبال ناديه باوع للطفل النايم .... الله يحفظك من كل شر يا جدي ... شاله على كيفه تقرب من اذانه وكبر بيها ... باوع لزين شراح تسمي يا ابو ؟
زين : باوع لبراء ياسين ابو ياسين
سجاد : راح تسمي ياسين
زين : هز راسه
سجاد : شهالاسم حرام عليك مال رجال جبير مو مال طفل
زين : ببرود يعني الطفل مايكبر شكد غبي انت ... كام وكف يم ابو .... اباوعله شلون صغير نورت الدنيا ياروح ابوك ... شلته على كيفي اخاف عليه لا يوكع اخذته ورحت يم امه خليته بحضنها
براء : اباوعله عبالك لعابه كولش صغيرون ... نزلت دموعها اروحلك فدوه يا ماما متتوقع شكد جنت منتظره جيتك نورت حياتي ياعمري انت باسته على كيفها
جهاد : يله بويه امشونه نرجع للبيت تره باجر وراكم هوسه لاتنسون اخوكم اليوم عرسه وباجر صباحيته خلينه نرجع يله
مريم : اني ابقه هنا خو مو يبقه زين وحده ويه براء مايكدر يساعدها بالطفل خليني هنا روحو انتو
ناديه : مريم روحي اني باقيه يم بتي مااروح وشتحتاج اني موجوده انتي رجعي لاتنسين وراج شغل هواي منا لباجر
مريم : هيج كولتج
ناديه : اي .... راحو الكل وبقه بس زين وناديه ويه براء
زين : كام عمه اني رايح اشرب جاي اجيبلج شي وياي
ناديه : لاعمه تسلم بس جيب وياك ماي ولو زحمه
زين : صار عافهم وطلع
براء : تباوع للطفل وما مصدكه انو هذا ابنها وهي صارت ام من هاللحظه
ناديه : بابتسامه تدرين نظرتي الج من اجيتي للدنيا بعد معاناة جانت هيج ماتتصورين شكد جنت سعيده
براء : اخذت ايدها بايستها اروحلج فدوه يااحسن ام بهالدنيا
ناديه : مسحت على شعرها .... شويه واجه زين
زين : كعد تفضلي عمه
ناديه : باوعت للساعه ... كامت انتو اخذو راحتكم
زين : وين رايحه
ناديه : ماعندي شي اريد اقره قران بهدوء بالمصلى اذا احتاجيتني رمش عليه واني اصعدلكم
زين : براحتج عمه تحبين اوصلج لبيتكم اذا تعبانه
ناديه : لا عليمن لا تعبانه ولاشي يله من رخصتكم
زين : يباوعلها شلونج
براء : عيونها على ياسين ... صرت زينه من شفت ياسين
زين : ماعندج اعتراض على الاسم اذا اكو اسم ابالج ماعندي مانع نغيره
براء : باوعتله لا عاجبني مادام انت سميته خلص وعلى فكره حبيت الاسم
زين : همس تدرين اجه كلبي يوكف من سمعت صوت صياحج
براء : اسم الله عليك
زين : باس شفتها ... حبيبي ذبل وجهه من التعب
براء : حركت خشمها على خشمه كولشي يهون لخاطر ابني
زين : باوع بعيونها واخذ شفايفها بهدوء بايسها
براء : بادلته ببطئ ... ضلو فتره لحد ما فزو على صوت بجي ... ابتعدو
زين : اباوع الافندي كعد ... هاي شوفي بعده اله اول يوم وبده يخرب عليه
براء : اباوعله يباوع يالوجوه ... يروحي اروح فدوه لهل الوجهه .... زين ليش كام يبجي
زين : رضعي خاف جوعان
براء : شلون ارضعه ؟
زين : غمزلها معقوله ماتعرفين
براء : احم اقصد اطلع
زين : شنو ماشايفه واطلع درضعي حرام عليج ابني جوعان
براء : فتحت الصايه وطلعت صدرها كزبر جسمها من حست بحلك الطفل الدافي يحاوط صدرها ... اباوعله سوده عليه جوعان ... شالت راسها شافت زين يباوعلها .... زين
زين : هاا
براء : عيونك
زين : شبيهن شنو حرام نباوع غير سالفه هاي لانضوك ولا نلمس وانوب ممنوع نباوع
براء : ابتسمت بخجل
_____________________
صباحا الساعه 10 صباحا
قصي : يله ديمه تعالي
ديمه : بهدوء اي اجيت شلت الجنطه وطلعت
قصي : اخذ الجنطه منها ... يله حبيبتي اخذها وطلعو متوجهين للبيت وصلو استقبلهم الكل بالهوسات والمباركات .... طبي جوه
ديمه : اي ... دخلت لجوه لكيت النسوان بالصاله سلمت عليهن .. السلام عليكم
مريم : وعليكم السلام شلونج
ديمه : الحمدلله .... اجن البنات بوسنها ... سلمت على الكل وصعدت ويه البنات لغرفتها
سجاد : اي قصي شسويت ماسويت البارحه دبرتها
قصي : طبعا ليش يرادلها سؤال
حسن : لاتحمه رحمه للكعبه تره الدنيا صيف
زين : ضحك
قصي : هاا شو تضحك وجهك منور اليوم
لؤي : جاا غير زدنه فرد البارحه
قصي : اي مرتي زادت فرد زين شعليه
حسن : لك مرته البارحه جابت يعني زدنه فردين مو واحد
قصي : باوع لزين عليك الحمزه ... كام من رخصتكم كوم خلي نشوف انتاجك كوم
زين : كام وياا طالع من الاستقبال
حميده : هلهلت بعد كلبي يابيبي مرتك وجها خير علينه من خذناها سوتلنه الفرحه فرحتين
قصي : باسها هو هذا الحجي اني ليش احبج لان حجيج مثل الورد ... يله زين تعال خلي نصعد
زين : اي .... صعدو فوك لان ماكدرو يخلوها تبقه جوه ماكو مكان جوه او غرفه للكعده وهم حتى تخلص من الهوسه دكو الباب ودخلو لكو الكل متجمع بالغرفه
نور : كامت الف مبروك زيوني طبعا ابنك نسخه منك شلون جمال
دارين : اي والله نسخه منك
براء : خزرتهن
زين : اعتقد باول ايام ماتبين ملامحه المن يشبهه شلون طلع يشبهني وهو عمره بس يوم ؟
براء : ابتسمت حيلل حتى يبطلن
زين : اباوع الطفل بحضن حجيه خوله
خوله : ماشاءالله دير بالك عليه بيبي تره ابنك بعده ترف وامه نفسه (للي ميعرف معناها يعني هستوها جايبه )
زين : انشالله مابيهم غير العافيه
قصي : الحمدلله على سلامتج بروئه ماتشوفين شر
براء : ابتسمت الله يسلمك
قصي : تعال نجمه جيبي الطفل خلي اشوفه
نجمه : اخذته من حضن خوله واجتي وكفت بنصهم هو وزين ... شوفه قصي شلون صغير
نور : ياا وين صغير ما تشوفين خدوده
خوله : صلِ على نبيج اعوذ بالله من عينج حتى الطفل ماخلص
نور : هسه شكلت اني حجيه
خوله : هي جاي تحجي على حجمه رسن طفرتي صحتي عده خدود استغفر الله هذا الطفل بعده ستوه اجه وكامو يركعو عيون
دارين : لا بيبي يجوز هو طالع على امه
قصي : ابتسم ماشاءالله رغم ملامحه مو كلش واضحه بس احسه يخبل شسميتو
نجمه : ياسين
قصي : نورتنه ياسين السرسري انشالله اربيك مثل مريم وعلى ايدي
زين : رحم والديك تربيه ومنك مانريدها
قصي : ليش وين اكو مثل تربيتي
خوله : والنعل منك ومن تربيتك
قصي : اشكرج حجيه هي هاي اخلاقج
خوله : انجب لك شبيها اخلاقي
قصي : زي العسل على كوله المصريين
نجمه : قصي كِيس (المس) بشرت ياسين شوف شلون ناعمه
نجمه : قصي كِيس (المس) بشرت ياسين شوف شلون ناعمه
قصي : لمس خده اي الله يحفظه الك خويه ويتربى بعزك انشالله
زين : تسلم ويوم الالك
قصي : ابتسم انشالله ... رجعه لنجمه ونزلو
__________________
هاله : كاعده بغرفتها صارلها شهور من البيت ما طالعه وحتى ممنوعه انو تكعد ويه اهلها لا هي ولا خواتها .... رفعت راسها شافت امها دخلت للغرفه هاا
ام حسين : كعدت اليوم ابوج بلغي اكلج انو عرسج راح يصير بعد شهر من اليوم
هاله : بعصبيه شنو عرسي وبعدين هو بكيفكم ... اشو تصرفون من يمكم ولا جن اني صاحبه القرار كافي تره جزعتوني
ام حسين : اني ماعليه تردين ذاك ابوج روحي حاجي لاتضلين تدردمين هنا خلي براسج خير وطلعي كليله اني مااريد ازوج
هاله : اكله ليش مااكله وبعدين تعاي منو عريس الغفله الي تقدملي
ام حسين : وليد
حلا : لحظه يا وليد
صفا : وليد الي يشتغل صانع عد ابويه
ام حسين : اي
حلا : صدك تحجين انتي تردون تطون اختي لواحد مثل هذا
هاله : كامت بسرعه طالعه من الغرفه فتحت باب الاستقبال ودخلت لكت ابوها كاعد .... بعصبيه اني ما موافقه وموضوع الزواج من هذا ابن الفكر ينرفض كافيي خاف الله تردوني اني هاله اخذ هذا المكحف لا والله مو بكيفكم مو انتو الي تدمرون حياتي فتهمتووووو
ابو حسين : صفن بوجها كتيلي احنه ما نخاف الله
هاله : اي.... ستوها نطقت وماحست غير راشدي ينزل على خدها بقوه
ابو حسين : بنبره كلها كرهه ... من رحتي اني وخواتج شوهتي سمعت بتج عمج ماخفتي من الله ومن حلفتي على كلام الجذب ماخفتي من الله جايتني تردين واحد يخاف الله بيج .... لج انتي وحده ساقطه ذره اخلاق ماعدها جر شعرها
ام حسين : الله عليك كافي ابو...
ابو حسين : انتي لاتدخلين ... رجع شد على شعرها لج اني لو منج ويصير كل هذا بيه وتنكشف سوالفي المكسره كلها ... اطم روحي ومااراوي واحد وجهي بس انتي وحده ماعندج كرامه وماتستحين والمثل يكول " ان لم تستحي افعل ما تشهي " سمعي ولج وليد خطبج مني واني ردتها من الله حتى اخلص منج
صفا : بس بابا وليد مزوج
ابو حسين : انتي تنجبين وصوتج مااسمعه فتهمتي ادبسزز .... وانتي الثانيه حرف مااسمع منج توافقين وغصباً ما عليج فتهمتي
هاله : يعني هو جبر
ابو حسين : اي جبر وهسه يله ولييي
هاله : دخلت لغرفتها تبجي الله لايوفقج يابراء كله بسببج ياحقيره عساج انشالله تسقطين ويموت الطفل وانتي هم تموتين وياا ياكلبه يا كح....
__________________
زين : صارت الدنيا عصر والكل راح لبيته صار البيت هادئ ... كلمن خذه مرته وصعد ... اني هم خلي اصعد يم مرتي ... صعدت فوك فتحت الباب ودخلت عبرت الصاله وطبيت للغرفه بهدوء اباوع براء محلله ياسين (موخره الكماط) وكاعده ومخليته بحضنها تباوعله بدون صوت ... هاا كاعده
براء : باوعتله هاا حبيبي الله يساعدك
زين : كعد يمها باس شفايفها ويساعدج حبيبتي ... باوعلها ليش محللته
براء : ماادري عجبني اشوفه هيج ... لزمت رجليه شوف زين رجليناته شلون صغار
زين : ابتسم مبوسهن ... ما تتخيلين شكد فرحان احس روحي ما مصدك اني صرت ابو لا وابني نايم كبالي
براء : ضحكت شوف شمسوي بحلكه وهو نايم فدوه
زين : باوعله ههه خرب هذا مبرطم من هسه
براء : اروحله فدوه هو وبرطومته دنكت مبوسته ... يمه بعد كلبي ابني حبيبي شوكت يكبر واضل اللعبه رفعت راسها لكته يباوعلها بهدوء شبيك ؟
زين : همس حيلل لايكلج دور الام
براء : ابتسمت خاله راسها على صدره استنشقت عطره اني احبك هواي
زين : باس راسها واني اموت عليج بس دصيري زينه وشوفي شسوي ما تتخيلين شكد متحلف بيج
براء : باوعتله ليش شسويت
زين : صارلج اربع اشهر حارمتني واني صابر وساكت
براء : يعني شسوي غير هاي اوامر الدكتوره
زين : دنك عليها ... ياهو الاحسن اني لو الدكتوره
براء : همست انت طبعا
زين : طخ خشمه بخشمها متاكده
براء : هممم
زين : اخذ شفايفها مبوسهن بعمق .... جر شفتها ممتصها بقوه وايده تتحرك على ظهرها
براء : بادلته وايدها على ركبته تتلمسها
زين : امتص لسانها وابتعد عنها مجبور
براء : ابتعدو عن بعض مباوعين لياسين الي فاتح عيونه ويباوعلهم مغندب
زين : لك هذا طالع على دبسزز على عمامه من هسه عاجبته الشغله ويباوعلها بتركيز
براء : باوعتله ضاحكه هههههه
____________________
بعد مرور ثلاث اشهر
قصي : كاعد بالمكتب اشتغل على الاوراق طبعا صار تلث اشهر من تزوجت ديمه ماحسيت بيهن كد ما مرتاح وسعيد ديمه انسانه جدا واعيه وفاهمه بحيث جبرتني اعتمد عليها بكلشي ما اكدر اسوي شي اذا ما اخذ رائيها كمت احسها الجزء الواعي مني ... طبعا علاقته بعدها اكو بيها حواجز من ناحيتها احسها شويه بارده او تستحي بس اني احاول اخليها تتعود عليه ومتاكد راح تحبني بيوم من الايام .... سمعت الباب تندك .. دخلت حبيبتي طبعا تداوم بالشركه ويانه واني ما مانعت بهالشي بالعكس اشجع المره الناجحه
ديمه : مرحبا استاذ تفضل شوف هذني الاوراق ووقع عليهن
قصي : كام جرها عليه حاوط خصرها ... مرحبا ياروحه للاستاذ شهالطله الحلوه الي دخلت علينه
ديمه : باحراج قصي وخر انت هنا مديري مايصير تسوي هيج بالشغل
قصي : باس خدها حبيبتي سواء بالشغل اوالبيت اني قصي نفسه ما اتغير وانتي هنا وبالبيت مرتي يعني اسوي الي يعجبني والي اريده
ديمه : قصي وخر لايطب احد فجاءة وعيب
قصي : بوسيني واعوفج
ديمه : قصي رجاءا عوفني ورايه كومه شغل عندي ملف كامل لسه ما منزلته على الحاسبه خلي نكمل شغلنه واروح
قصي : كلامي واضح وغير قابل للنقاش اكو بوسه اكو طلعه ماكو بوسه نبات هنا
ديمه : باوعتله قربت شفايفها باسته بخده ... بهدوء يله عوفني
قصي : باس شفتها مو تدللين ... عاف خصرها يله تعاي كعدي خلي نكمل الشغل
ديمه : كعدت وبدو يشتغلون
قصي : تدرين راح اموت من الجوع شوكت نرجع للبيت ونتغده ومااريد اكل شي من بره لان صاير اضوج من الاكل الجاهز
ديمه : سانده ايدها على المكتب .... ليش ما تريكت شكد توسلت بيك الصبح
قصي : ماجنت مشتهي اكل
ديمه : ابتسمت كايمه
قصي : وين ؟
ديمه : لحظه هسه جايه ... طلعت شويه واجت بأيدها علبه فتحتها تفضل صحيح متواضعه بس طيبه
قصي : باوع شنو هاي
ديمه : لفه اني من جنت طالبه ولليوم ابد ما اشتري شي من الحانوت او الكافتريا دائما لو اشتري من الليل واخده وياي لو اسوي شي بسيط لروحي اكله اذا اجوع من اداوم
قصي : اخذ وحده هاي شوكت سويتيهن
ديمه : كل يوم اسوي بالليل واخلي بحافظه بس انت متدري ... يله اكل انشالله تعجبك لفتي المتواضعه
قصي : وانتي
ديمه : اني سويت ثنين اكلت وحده قبل ساعتين وهسه هاي الثانيه صارت الك تفضل
قصي : اخذها .... اكل منها طيبه هاي لفة شنو
ديمه : بهدوء انت اكل وماعليك لفة شنو
قصي : اكلها كلها عاشت ايدج جنت ميت من الجوع
ديمه : عوافي يله اني كايمه اكمل الشغل حتى نطلع
قصي : باسها شكرا حبيبتي
ديمه : بهدوء عفوا
__________________
براء : كاعده تعزل الغرفه وعايفه ياسين يم نجمه ... كملت تعزيل وطبت تسبح
نجمه : كاعده تباوعله هي والبنات
محاسن : عود ليش مغندب
جميله : لج صار ساعه اسوي حركات بوجهي لمن نكلبت قرقوز وهو ولا يمه
محاسن : يسوني حبيبي شوو باوعلي حلال ديييي ههه ولك اضحك
مريومه : ماما ياثين ليش مايلعب ويانه
جميله : بعده صغير حبيبتي من يكبر يلعب وياكم انتي وايفان
ايفان : ماما اطي جبس ياكل
شمس : لا حبيبي مايصير يختنك ديربالكم تطو شي
نجمه : شبيج محاسن تباوعين للطفل هيج خرعتي
محاسن : يكولون الحامل اذا باوعت على صوره شي يطلع ابنها يشبهله واني اريد ابني يطلع تشبهله
نجمه : وشدراج راح يطلع ولد
محاسن : عادي اذا طلعت بنيه اكون جاي احجزلها رجل من هسه
شمس : هههه خرب يومج
نجمه : تره كرعتينه تحسسيني بس انتي حامل ركدي شويه وخفه لهلوجه
مريم : خليها يمه شعليج بيها فرحانه بروحها بعد كلبي الله يتمملها بالخير
محاسن : على الاقل اني عرست وحامل هسه مو مثل وحده بايعه ثكل وماتقبل تزوج ومن تالي الرجال يبطل عليها ويفركش العرس
نجمه : لا تخافين حبيبتي ما يفركش بالعكس هو يريدني اكمل وبعدين مابقه شي للسنه وتخلص وعود اتخرج ونزوج
محاسن : بالمشمش
مريم : يسوني بيبي حبيبي شو باوعلي
ياسين : يباوع بالوجوه يدور على امه
مريم : باسته شلون بينه ويه زين الصغير احنه يعني مالكيت غير هالطبع تورثه يا بيبي
ياسين : صافن عليها
محاسن : هههه لك لا تباوع هيج بالعباس راح اعضعضه
مريم : حتى براء تطيح حظج ذاك اليوم خطيه زين اجه ياخذه للمستشفى عباله صاير عنده طفح جلدي مايدري بيكم تعضعضون بخدوده انتي والمخابيل الي وياج ماتشوفين الطفل يتخبل منكم
نجمه : شوفن شراح اسوي بي ... ياسين براء راحت بعد ماتجي عافتك وراح ... كامت تنعه وبعددد ما ترييييدك
ياسين : برطم معلن عن اشعار نزول دموعه
نجمه : وزين بعد ما يحبببك راحتتتت براء
ياسين : كام يبجي
محاسن : شالته الله يطيح حظج ليش بجيتي كافي حبيبي لاتبجي كافي ختولي حقيره ... شلته وطلعت افتر بي حتى يسكت طبعا طول هالتلث اشهر اني حيلل تعلقت بياسين خاصه هو فارض نفسه بتصرفاته وحركاته يجبرك جبر تحبه ... شفته ابد ما سكت دخلت جوه لكيت براء ستوها تنزل
براء : يااا شبي نزلت بسرعه
محاسن : اباوعله ذب روحه على امه ههه
براء : تعال يروحي شالته شبي حبيبي منو وياا شو مماتي من وياج انتي
جميله : هاي نجمه الخبيثه كلتله براء راحت وهو كام يبجي
براء : كعدت وخلته بحضنها نجمه الوكيحه بجت هالعيون الحلوه .... كامت تناغي انتي تبجين على ماما هاااا انتي تحبين ماما انتي ههههه يمه اروح فدوه لهلضحكه بوسته
مريم : ولج براء لا تحاجي بصيغه البنات
براء : ما اعرف ليش خاله بس احب احاجي هيج
نجمه : خرب يومج صار ساعه نلعبه وهو لابسنه وبس اجيتي انتي نشركك حلكه
براء : اذا انتو تعضو وتصفكو راشديات شلون تردو يحبكم ... والله نجمه اذا تضوجي بعد ما احاجيج حرام عليج ولو هو صوجي ما اتوب اخلي يمج
نجمه : يعني فوكاها
براء : طبعا الج الشرف ابني يكعد يمج بس جماله كافي يخليج كاعده بس تباوعيله
نجمه : همزين زين ومحطوط بس ذاك ضعيف وجبير هذا سمين وصغير اي اختلاف ماكو ينعل يومج حتى العيون مثل ابو
براء : نزلت الشاله على صدرها مرضعه ياسين .... ليش علساس انتي احلى من زين
نجمه : لا بله ... بنات ياهو الاحلى اني لو زين
جميله : الحق ينكال اكبر جريمه يشبهوج انتي بزين شجابج عليه جنج عريف بالشرطه
نجمه : والله ما تستحين ... يمه ياهو الاحلى اني لو زين
مريم : ثنينكم حلوين
نجمه : لا الله عليج بروح ابوج منو الاحلى
مريم : شوفي يمه خلي احجيها بالعدله زين احلى واحد بيكم سواء جنتي انتي او اخوانج ... زين من ناحيه الشكل كرجال احلى واحد
براء : حركت حواجبها ... هاا عندج شك بعد
نجمه : والله كلكم انحيازيين حتى هاي الحقيره الي جانت صديقتي المقربه هسه عافتني وصارت ويه رجلها
محاسن : هي هاي العايزه افضلج على سجاد امشي لج
البنات : حييييل
براء : اندك الجرس اخذت ياسين وصعدت فوك ابدله وانزل .... فتحت باب الغرفه ودخلت خليت ياسين على الجربايه ورحت طلعتله ملابس اجيت نزعته الي لابسهن بوست بطنه وركبته اموت على ريحته حبيبي صار عمره تلث اشهر واني وزين شايفي وما مصدكين بحيث ميوكع بالكاع اربعه وعشرين ساعه بحضن زين وطبعا متعلق بي بشكل مو طبيعي بحيث بس ياسين يسمع صوت زين يخبص روحه ومن حسن او سوء حظي طلع نسخة ابو الثانيه من ناحيه الشكل والاطباع بحيث اذا واحد يشوفه تلقائيا يكول هذا ابن زين اربعه وعشرين ساعه مغندب ميضحك غير بس ويايه ويه ابو ... وزين مكيف عليه وياسين افندي مينام اذا مو بحضن ابو اجي الكاهم متحاضنين ونايمين واني افقد من اشوفهم بهيج منظر .... فزيت على ضربه من رجله هاا ولك
ياسين : يضحك
براء : شهكت تضربيني ولج اله اكلج .... عضعضت زروره وبطنه على كيفي حتى ادغدغه ادبسزز اله اكلهن ههههههه
زين : دخل للغرفه تعبان من الشغل ... سمع صوت ضحك جاي من الغرفه ابتسم داخل للغرفه
براء : رفعت راسها شافته كامت حاضنته الله يساعدك حبيبي شلونك
زين : حضنها بقوه مستنشق عطرها
براء : شبيك حبيبي
زين : تعبان شويه ... باس شفايفها لا تخافين حبيبي ماكو شي ... ابتعد عنها مباوع لياسين ههه اليوم كاعد ومنتظرني
ياسين : يسوي حركات بايده
براء : ابتسمت يريدك تشيله
زين : شاله بوس خدوده ... هاا حبيبي اليوم ماصارلي مجال اسال عليك ولد الكلب عافو كلشي عليه
براء : تطلع بالملابس حبيبي لتتلفظ هيج الفاظ كدامه
زين : هسه قابل فشرت شبيج انتي
براء : اجتي وكفت على اطراف اصابعها بايسه خده ميخالف مااريده يتعلم على هالالفاظ
زين : باس شفتها مو يدلل الحلو
براء : ابتسمت عود هستوني حجيت
زين : عوفينه من هالسالفه اكلج طلعيلي ملابس خفيفه علما اسبح
براء : حاضر
ياسين : يلعب بلحيته بتركز
زين : ضحك شلون بيك راح ازينها من وراك
براء : طلعت الملابس .... طب اسبح حبيبي واطلع صلي حتى ننزل
زين : هاج اطيته الها ودخلت اسبح
براء : باست خده بقوه تعال نلعب اني وياك
_____________________
روان : كاعده بغرفتها تبجي
ناديه : شبيج
روان : الله يخليج حاجي ابويه ومحمد حتى يحاجوني والله تعبت راح يصير سنه همه مايقبلون يحجون وياي
ناديه : شسوي يايمه حاجيتهم هواي ابوج رغم حاجه براء وهي نوعا ما تقبلت الموضوع بس هو لسه ياكل بروحه على صار ومحمد مايقبل يحاجيج لان يكول من وراج هو صدك بنات عمج لو ما انتي شاهده ماجان صدكهن
روان : بدموع غلطت ياعالم غلطت وتندمت على اغلاطي كافي اني سنه كامله اتعاقب ... سامحوني الله يخليكم كمت احس روحي وحده منبوذه كافي عقاب مو حتى حوبة براء طلعت بدراستي اني هسه مكمله بمادتين من وره القلق والتفكير ... لزمت ايدها اني مستعده اسوي اي شي بس خلي يسامحوني انتي تدرين بيه شكد احب بابا شلون ترديني اصبر كل هالمده وهو ميحاجيني
ناديه : كومي وياي ... اخذتها وطلعت نازله لغرفتهم فتحت الباب ودخلت
غيث : هاا وين جنتي
ناديه : غيث اريد اطلب منك طلب
غيث : اذا اكدر عليه من عيوني
ناديه : اريدك تحاجي روان
غيث : مستحيل بعد الي سوته باختها اسامحها اني روحي لسه ما مسامحها وشايل هم من اموت شكل لربي بعد الي سويته ببنتي
ناديه : الله يخليك سامحها صارلك سنه مكاطعها انت واخوها وهي تعاقبت على الي سوته
غيث : ناديه كلت ما...
روان : دخلت للغرفه ماما عوفينه اني وبابا اريد احجي وياا
غيث : امشي طلعي بررره
روان : مااطلع
ناديه : عافتهم وطلعت
غيث : باوعلها ورجع كعد على القنفه متجاهل وجودها
روان : كعدت يم رجليه بابا الله يخليك سامحني والله نشلع كلبي واني اطلب السماح ... حباب بابا بعد ما اكدر اتحمل بعد والله لو تضربني وحتى تبطلني من المدرسه ولا تقاطعني كافي الله يخليك
غيث : ماتكدرين تتحملين الي جاي يصير وياج بس كدرتي تتحملين الجذب والتلفيق الي لفقتي على اختج
روان : بدموع بابا والله اني تندمت على عدد شعر راسي وحتى براء سامحتني وعلاقتي بيها صارت احسن بميت قاط عن قبل
غيث : براء غبيه لو منها اني ما اسامحج لو يبقه اخر يوم بعمري
روان : حباب بابا سامحني والله مستعده كلشي اسوي اذا تريد حتى ادين براء ورجلها ابوسهن بس في سبيل تسامحني انت ومحمد
غيث : باوعلها .... المشكله لو شكد ماتبجين احسج جذابه وما اتاثر بدموعج
روان : باست ايده والله اني تغيرت انسى روان القديمه الي جانت غبيه و تغار ... حباب سامحني بابا دنكت ابوس رجلك
غيث : جرها موخرها عن رجليه حضنها كافي لاتسوين هيج
روان : حضنته ودموعها ينزلن .... والله اسفه بابا والله
غيث : باس راسها خلص كافي لاتبجين
روان : بدموع يعني سامحتني
غيث : اي سامحتج ... اذا ربج الاكبر مني ومنج يسامح اني مااسامح
روان : ابتسمت والله اني احبكم كلكم بابا حتى براء كمت اموت عليها
غيث : مو بس انتي كمتي تحبيها حتى اني صارت روحي بيها وبابنها
ناديه : ابتسمت من بين دموعها .... الله يصفي كلبوكم
__________________
ديمه : نايمه وشافت بالحلم جن هي واكفه بمكان وحدها واجه واحد من بعيد ملامحه ما واضحه لحد ما تقرب تباوع .... هذا سامر اجه تقرب وكف كبالها وجهه نص ابيض يشع نور ونص اسود قبيح
سامر : شلونج ديمه
ديمه : بدموع ليش سويت هيج ويايه .... ليش خدعتني سامر شنو سويتلك حتى تخوني شنو الي بدر مني حتى تخدعني وتروح تزوج عليه هاا احجي
سامر : يبجي الله يخليج لاتشيلين بكلبج عليه كافي ابريلي الذمه من كل وكلبج ماجاي ارتاح بكبري احس اكو جبل نايم على صدري وهذا الجبل هو عتابج وكلامج عني
ديمه : اني باريتلك الذمه من زمان
سامر : يبجي لا مو من كلبج اكو جزء منج بعده شايل عليه انتي ما كادره تسامحيني من كل وكلبج
ديمه : مسحت دموعها انت شتريد مني هسه
سامر : ابريلي الذمه لا تكرهيني عوفيني بحالي وعيشي حياتج اذا ضليتي تكرهيني الله ما يسامحني .... اني جاي اتعذب بسببج ... احلفج بالروح الي بيج
ديمه : بدموع شنو قصدك
سامر : تعرفين عن قريب وهسه ديمه اذا جنتي تحبيبني سامحيني استحلفج بالله تحليليني
ديمه : ضلت ساكته
سامر : وجهه بده يطغه عليه السواد .... كام صرخ سامحيني ديييييمه
ديمه : فزت مخترعه نفسها يصعد وينزل ودموعها تجري كامت تبجي بصوت عالي
قصي : كعد على صوتها ... باوعلها شبيج حبيبتي ليش تبجين
ديمه : تبجي قصي شفت شفت سامر وجهه محترك بسببي يكلي ماجاي ارتاح بكبري من وراج ... والله ياقصي باريتله الذمه ليش جاي يتعذب
قصي : حضنها كافي ياعمري لاتبجين ... اكيد مكوبسه
ديمه : بدموع لا قصي مو كابوس هذا ... اني متاكده هو لو ما متعذب ما جان اجاني بالحلم قصي تلث سنوات ولا مره زارني بحلم هاي اول مره يجيني
قصي : تنهد كلامها عنه يضايقه بس يعرف هي مو قصدها شي .... مسح على شعرها كومي خلي نصلي ونقره قران وانتي هم اقريله الفاتحه واهديها اله ... يله كومي باس راسها كومي حبيبتي
ديمه : هزت راسها وكامت ... توضو و وكفوا صلو ... كعدت تقره قران ... هدتله سوره البقره وكامت
قصي : ارتاحيتي شويه
ديمه : حضنته ... شكرا قصي وجودك بحياتي نعمه جبيره ماتندمت من وافقت عليك صدك نعمه الصديق والزوج انت لو واحد غيرك ما جان انتقبل هالشي
قصي : اني اعرف قصدج ودارس شخصيتج مثل ما دارس روحي ادري بسامر طلع من كلبج بعد ما تزوجتيني مو لخاطري بس ادري بيج تخافين الله ومستحيل تخونيني ولو حتى بالتفكير وهذا الشي الي خلاني احبج لانج واضحه وطاهره
ديمه : شدت على حضنه الله يحفظك الي يا احسن صديق بهالدنيا
قصي : حضنها وباس راسها ... انشالله الايام تثبتلج اني احسن زوج هم
ديمه : همست واثقه من هالشي
________________________
الساعه ال 11 صباحا
زين : طلعت من غرفه العمليات ورحت للمكتب بطريقي شفت وجهه لو يصيبني زهايمر ما انسى ... حسين بس وضعه شحاله مدري شبي ... صعدت الكمامه على وجهي وعبرته ... شفته راح يركض على الاقسام الي فوك ... سالت الموظف هذا شبي ؟
الموظف : منوه
زين : هذا الي مر منا
الموظف : هاي بته متخربطه
زين : هاا عدها العافيه انشالله ... عفته ورحت لمكتبي بدلت وكعدت اخذ استراحه من العمليه
___________________
سجاد : الوو هاا حبيبتي اني طالع هسه من الشركه
محاسن : خير حبيبي خو ماكو شي مو بالعاده تطلع
سجاد : اي عندي جم شغله اريد اشوفها عد اهل الديكورات من اطلع اخابرج حتى تبدلين عاجبني اليوم نطلع نتغده بره اني وياك والطفل صار هواي ما طالعين سوه
محاسن : اي والله اجتي بوكتها هالطلعه مخنوكه من البيت وطالعه روحي
سجاد : اي اعرف حبيبتي يله اني اروح اكمل شغلي واخابرج يله باي
محاسن : الله وياك
سجاد : رحت كملت شغلي وره حوالي ساعه ... طلعت خابرتها وصلت للبيت رمشتلها طلعتلي
محاسن : باسته شلونك حبيبي
سجاد : هله حبيبتي .... حرك السياره وين حابه مرتي وجهالي يتغدون اليوم
محاسن : اي مكان اهم شي اكل
سجاد : اي والله .... اخذتها لمطعم معروف هنا ... وصلنه وكفت السياره ونزلنه اخذنه طاوله وكعدنه اجه النادل ... شتحبين تاكلين
محاسن : اريد دولمه ومقلوبه وتمن ومركه فاصوليه وره الغده اريد كنافه
سجاد : اباوع للنادل ضل فاك حلكه ... شبي هذا سجل الي طلبته واني نزلي مشاوي ودليميه وو .. باوعلها وعود اذا ما كفاني اكل وياج ... هسه هاهي لو تردين شي بعد
محاسن : لا هذا كافي
سجاد : يله روح ورجاءا لا تتاخر
النادل : راح استغفر الله مفاجيع ذوله شنو ماشايفين طلبو اكل مال عشر نفرات صدك هذا الي عده فلوس مايعرف وين يوديهن
_____________________
زين : كاعدين نشتغل على تقرير ... ودخلت اسراء كالبه وجها على غير العاده
علاء : شبيج اسراء ليش تبجين
اسراء : مسحت دموعها وكعدت خطيه هاي قبل فتره اجو رجال ومرته بتهم متخربطه ... خطيه دخلو الدكاتره فحصو الطفله طلعت عضله القلب عدها كلش ضعيفه وهمه مايدرون ... وعلى حسب الي سمعته هسه الطفله جانت تلعب مدري تركض انوب واكعه على ساعه و كايمه تصيح من كلبها عبالهم شو شبيها جابوها للمستشفى ما متحمله الطفله ميته بسرعه لان صغيره وكلبها ما متحمل
باسل : خطيه شكد عمرها
اسراء : ست سنوات وشلون بنيه هي ... انوب الامايه تكسر الكلب ملخت روحها تملخ لمن تخربطت خطيه كسرت كلبي تكول بس هاي عدي وراحت والابو كام يصيح انتو كتلتوها كلب المستشفى كلاب لمن طلعو الامن بره
علاء : خطيه الله يصبر كلبهم مو سهله عليهم
زين : بهدوء شنو اسم المريضه ؟
اسراء : اعتقد بنين لان شفت الدكتورات ملتمات يحاجنها باسمها حتى يهدئنها بس لا حياه لمن تنادي حاضنه بتها وتنحب وتبجي
زين : تنهد عرفه حسين من اسم مرته ... اللهم لا شماته هاي تالي الي يأذي بالعالم الله يطلعها باعز ماعنده الله يصبره لو مهما يكن يبقه الضنه غالي وعزيز دخليك الهي لا تشوفني يوم مثل هذا بابني ولا بأي واحد عزيز عليه
________________________
بعد مرور سنه
قصي : الوو هاا ادم وين صرتو صار ساعه منتظريكم .... دكللها لهلغبره كافي لبخ ما طالعه لمكان عام شايفين وجهج المخربط ونعرفج على حقيقتج
ادم : احترم نفسك .... ما اسمحلك تحجي على مرتي هي بالحالتين جبار اقصد حل...
نجمه : ضربته على ظهره اني جباار بسيييييطه يا اادمممم انيييي اعلمك والله اله اكل لخالتييي عليييك
ادم : شبيج حبيبتي اقصد جمالج جبار كد ما حلوه مو قصدي على جبار العراقي
قصي : ههههه نام يم امك اليوم
ادم : هو شكلها هيج ... يله روح احنه جايين
قصي : خوش الله وياك ... حس بادين تلتف على خصره
ديمه : باست ركبته ويامن جنت تحجي
قصي : ويه ادم ... دار وجهه عليها ... شهالجمال هذا خفي على كلبي يمعوده
ديمه : ابتسمت
قصي : حضن خصرها شنو رائيج ناخذ جوله سريعه قبل لا ننزل
ديمه : اكعد قصي وبطل هالسوالف
قصي : تدرين اني احبج هواي
ديمه : حضنته واني اعشقك قصي انت الشخص الوحيد الي يستاهل هيج مكانه بكلبي ... بسببك اني رجعت ديمه القديمه
قصي : باس خدها ... احمد الله واشكره الف مره لان لكيت انسانه مثلج بحياتي
ديمه : رجعت باسته ... وابتعد شايله بتهم اي صار عدهم بنيه قبل شهر وسموها .... قمر
قصي : جيبيها .... لك صدقه لهلكمر قمر واسمج عليج وانوب تشبيهين امج اويلييي
ديمه : ههههه
____________________
براء : كاعده بغرفتنه العب ياسين الي كبر وصار عمره سنه وتلث اشهر ... يمه فدوه لكلبه دنفوش ويخبل بحيث الدنيا مخبوصه بي وطبعا هو يتعزز بعد كلبي .... لج سنو هالجمال هذا سنو يمه الوح فدوه لهل الخديدات الحلوه هاي
ياسين : يناغي ... اب ا ابا
براء : تنهدت مشتاق لابا يحبيبي ... ابتسمت يله اليوم يجي باباتنه من السفر ويلعب ويانه .... طبعا زين صارله شهر خارج العراق تطوع هو وجراحين ثنين من الوطن العربي يسوون عمليه خطره بالخارج وعلى مسؤليتهم وهو جان من ضمنهم وطبعا العمليه جانت جدا خطره هواي اطباء رفضو يخاطرون ويسووها لاي شخص وزين راح قبل بشهر حتى يدرس حالة المريض هو والاطباء وجان حالف اذا فشلت هالعمليه هاي راح يترك الطب بس بفضل الله نجحت العمليه ولسه اذكر بيومها انكلبت الدنيا وطلعو زين بالتلفزيون وكرمو كواحد من احسن الجراحين العرب بالعالم ( حقيقه ) واليوم هو موعد رجوعه العصر واني كلبي راح يطك عليه مشتاقتله هواي ..... طبعا نسيت اذكر شغله امتحنت سادس وهسه منتظره النتيجه والي راح تطلع اليوم هم العصر اففف حيلل متوتره
________________
زين : وكف التكسي كبال بيتهم ... صار شهر هو بعيد عنهم ... سلمو عليه الحرس
الحرس : الحمدلله على سلامتك دكتور
زين : بهدوء الله يسلمكم ... دخل لجوه دك الباب فتحله الباب ايفان ... ابتسم
ايفان : صاح اجه عمو زين .... طلعو الكل مستقبلي
مريم : حضنته شلونك يمه بعد كلبي مشتاقتلك
زين : الحمدلله حبيبتي انتي شلونج
مريم : الحمدلله حبيبي
جهاد : سلم عليه دومي اكول عليك رفعت راسي مافديوم ماتندمت من خليتك تسوي الي براسك
زين : ابتسم تربيتك يابه
الولد : حضنو وسلمو عليه
نجمه : زيوني حبيبي الحمدلله على سلامتك
زين : ابتسم الله يسلمكم تصدكون شتاقتيلكم
قصي : جذب
زين : والله تخيل اني اشتاقلكم
البنات : شلونك خويه
زين : الحمدلله
حسن : مو علساس تجي العصر
زين : البارحه حجزت تذكره الصبح واليوم وصلت ابكر من العصر .... باوع لسجاد الي لازم ولده الي ملطخين ككو ضحك ... لك شنو هاي حتى ذوله طالعين عليك بس ياكلون
سجاد : شايل ولده ... جهاد وزياد ... التوائم ... على الاقل ولدي ضعاف وادادي بيهم من دكتور لدكتور حتى يسمنون وماكو مو مثل ابنك حتى ركبه ماعنده من السمن
مريم : لك وتالي وياك عوف الطفل بحاله
جميله : صدك ما كلنه لبراء خلي اصعد اكلها
زين : اوكفي اني صاعد لحد يكلها ... عافهم وصعد كبل لفوك وكلبه يريد يطلع من مكانه صار شهر بعيد عنها وهو مامتعود على هالشي بعدها عنه مرض نفسي اله ... وصل للغرفه فتح الباب على كيفه ودخل لكاها كاعده بالصاله هي وياسين يلعبون يباوعله لنبض كلبه كاعده بالكاع ولابسه اوفر قصير
عادي العب وياكم
براء : نزلت اللعبه مباوعه لمصدر الصوت ... شافته واكف بهالته المعتاده والي تخربط كيانها ... كامت بسرعه حضنته ودموعها تنزل .... حبيبي شوكت اجيت
زين : حضنها رافعها عن الكاع .... اااخ افييييش ياعطرج شهر كامل اني ما شامه اجيت اموت واني بعيد عنج وعن ياسين والله
براء : تستنشق عطره لعد اني شكول
زين : شلونج
براء : شالت راسها مباوعتله من شفتك صرت زينه
زين : اخذ شفايفها بدون سابق انذار متذوق رحيقها
براء : بادلته واديها محاوطه ركبته
زين : يعزف على شفايفها عبالك اول مره بحياته يبوسها
براء : ضلو يتباوسون لفتره طويله لحد ما ابتعدو
زين : خله راسه على راسها شتاقيتلج هواي
براء : اني اكثر والله
زين : ابتعد مباوع لياسين الي كام يركص
ياسين : ابا ابا
زين : شاله وحضنه يروحلك فدوه الابا
ياسين : حاضنه باديه الصغار
زين : كطفه بالهوى لك مشتاقلك سرسري
ياسين : يضحك
زين : لك اغدي فدوه لهلضحكه
براء : اباوعله مبين عليه التعب سوده عليه ... تسبح وننزل
زين : حضنها اي والله
براء : صار مشيت كدامه اطلعله ملابس
زين : يباوعلها حبيبي
براء : هاا
زين : غمزلها مو جن بغداد كبرانه بغيبابي
براء : متفوتك فايته
زين : ابتسم بخبث طبعا
براء : ههه طلعتله ملابس دخل سبح وطلع نزلنه وره شويه وكعدنه سوه اباوع العائله كلها ملتمه وكلب على كلب ... طبعا ناقصتنه حجيه خوله الي هسه بالعمره .... طبعا بهالسنه صارت هواي اشياء منها انو محمد اخويه خطب حنان ومحاسن طلعت حامل بتوم وجابت جهاد وزياد وديمه هم قبل فتره جابت بنيه وهسه نجمه حامل ..... وطبعا نازك سمعنه بيها تزوجت ابن عمها الشيخ وشافت حياتها بعيد عنا .... اما اهل ابويه فوضعهم مزري هاله بت عمي عايشه بضيم ضيم وقهر من رجلها وكل يوم طلابه وبنات عمي الثانيات نفس الشي وحسين لسه متخبل على بنته الي راحت اااه على كد ما تاذيت بسببهم على كد ما نقرهت عليهم ونور بتي عمي لسه ماتزوجت وغسان خده موضفه من الشركه ودارين رجعت لاربيل .... صارت عيني على زين الي كاعد وخال ياسين المغندب بحضنه روحي كاعده وحاضنه كلبي يمكن اعظم حب شفته بحياتي هو حبي لزين مستحيل احب انسان بهالكون بكده
زين : حرك شفايفه .... احبج
براء : همست اعشقك ياروحي
_________________
بعد مرور شهرين
براء : اجيت من الكليه ... نزلني السايق لان اليوم تاخرت وزين ماكدر يجيني .... دكيت الباب طلعتلي ديمه
ديمه : هلوو حبيبتي شلونج
براء : الحمدلله عمري انتي شلونج
ديمه : تمام دخلي
براء : دخلت لكيت ياسين كاعد والجهال داير مدايره ... صحت اني اجيت
ياسين : شال راسه مباوعلها ... ضحك
براء : شلته هله هله بعد كلبي حضنته ييييمه افييش
محاسن : شنو هاي براء ابنج مخرمش زياد شاخطله خده اطلبج فصل تره
براء : ياا باوعتله ولك
ياسين : عفس وجهه دره الحجي عليه
براء : مسحيها بوجهي سوده عليه
محاسن : عادي حبيبتي اشاقه وياج شبيج
براء : اخذت ياسين وصعد .... طبعا قبل فتره طلع معدلي الحمدلله طلعت 87 ورحت كليه علوم وهاي صارلي شهر مداومه ... دخلت للغرفه لكيت زين يصلي ... السلام عليكم ... كعدت ياسين بالكاع ونزعت عباتي وحجابي
زين : كاعد يسبح كمل صلاه لمس السجاده وكعد وفتح اديه
براء : كامت كعدت بحضنه وحضنته
زين : شلونج حبيبتي
براء : باسته الحمدلله
زين : شلون جان يومج بالكليه
براء : تعب محاضرات ومحاضرات هلكت والله
زين : هاي لان بعدج بالبدايه بعد فتره تتعودين
براء : انشالله
زين : باش شفايفها يله كومي بدلي وصلي
براء : اي كمت نزعت جبتي ودخلت للحمام سبحت بسرعه ووكفت اصلي .... كبرت وبديت كملت وره فتره وكعدت اقره الدعاء الي من جبت ياسين لليوم ما فارك لساني ... اللهم إني أستودعك زوجي و أنت خالقه وخالق فأنت تعلم ما بقلبي وأني لا أقدر على العيش بدونه، اللهم أبعد عنه كل شر ولا تريني فيه سوء أو مكروه يارب العالمين، اللهم اهدي لي واهدني إليه، اللهم أهديه لبيتنا ولأولادنا واجمعنا دائماً على الخير وابعد عنا كل شر، اللهم إني أعوذ بك من وساوس الشياطين بيننا ولا تجعل الدنيا أكبر همنا .... اباوع اجه ياسين كعد بحضني بكلبي يارب دخيلك احفظلي زين وابني واحفظ عائلتنه وبيت خالو من كل شر ..... اشكرك الهي رزقتني بانسان مثل زين يحبني ويصوني وماقصرت وياي لو اكعد اشكرك طول حياتي ما اكفي شعرايه من النعم الي رزقتني بيها ... بست التربه ... اباوع لياسين هم باسها هههه ... كملت صلاه وكمت نيمت ياسين بعد ما رضعته
زين : ابتسم شايف ابنه نايم بوسه .... صاح براء
براء : هاا حبيبي
زين : تعاي
براء : اجتي يمه هااا
زين : تعاي خلي اشاورج بشغله
براء : طخت براسها ... لا زين لا اني تعبانه
زين : دتعاي شبيج بس اسولف وياج
براء : لا اعرف سوالفك
زين : انتي مو مال احترام شالها ودخل للغرفه حتى يسولف براحته
براء : زيبييببببن
زين : هههههههه
********************
ولهنا تكون نهايه روايتي احببت من لا يبالي .... براء البنيه الانعزاليه والمتقوقعه والي عانت هواي بحياتها من ظلم واتهامات باطله وتنمرات من العالم حبت زين الانسان الصعب المغرور الي شايف نفسه والي ..لا يبالي لشيئ بهالدنيا شائت الاقدار انو تجمعهم سوه لتصنع قصه حب بيناتهم مبنيه على اساس طاهر ونقي .... عانو هواي من مشاكل بحياتهم بس بفضل الله كدرو يتخطوها ومازالت اكو بعض العراقيل الي تحدث بحياة اي زوجين بالعالم والي مو صعب على براء وزين انو يتخطوها
ياريت اكون كدرت اوصل حياه ابطال روايتي ومشاعرهم واحاسيسهم الكم بصوره حلوه وسلسله واتمنى اكون كدرت اوصل لكلوبكم
ستمتعت هواي بوحودي وياكم والي ما زاد روايتي غير جمال وسعاده واعتذر اذا ضايقت واحد بيكم سواء بقصد او بدون قصد .... احبكم ...
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
