رواية دموع خرساء الفصل الخامس 5 بقلم ورود الخالدي

ماجد:::

صعدت امل وانه متانيها برة..تعطلت عليه فتت شفتها نازلة من الدرج..

ها..امل وينها غادة 

هسه تنزل وراي

شني كلتيلها ماجد يريد يحجي وياج

لا ماكلتلها ماجد كلت خاف ماتجي لو امها تسمعني من احجي وياها

جاشكلتيلها ؟؟

كتلها امي تريد تحجي وياج تانيتج برة بالحوش..

ها خوش عفيه عليج بس تنزل جيببها بره وروحي!

اروح شني جا انت موكتلي ضلي ويانه وتنوعيلنا من بعيد؟؟

افه ولج تخافين عليها مني..ولج انه ماجد ..شني قابل شسويلها؟؟

ماجد صح انت اخوي..وماتطلع منك العيبة ..بس كلبي ما مطمن ..ماجد خطية البت حبابة وخرسه حتى ماتكدر تحجي اذا صار شي..بعد اختك خليني يمكم..

امل..تحجين صدك انتي ولج صدك مامأمنه بخوج؟؟

ماجد مو..

راح اطلع بره وروح راشد دقيقتين ما اتعطل حجايتين عندي وياها وبس واذا تعطلت عن الدقيقتين عود طلعي ورانه

خوش..

طلعت بره كلبي يركض ادري الجاي اسوي غلط بس شبيدي ما اكدر انام الليلة اذا ماحجيت وياها...ماكو شويه وشفتها طلعت ادور على امي اجيت من ورها لزمت ايدها التفتت..بساع رادت تخلص ايدها ماكدرت لازمها حيل جريتها وكفتها بسد حايط الديوانيه حتى محد يشوفنه هي ادفع بيه حسبالها عندي شي مو زين بسرعة كتلها:

يواشج على هونج خيتي غادة لاتخافين..

انه لازم ايدها حيل واهيس ايدها بيدي صارت جمر مدت ايدها الثانيه حتى خلص ايدها لزمت اديها اثنينهن بجفوف اديه..

كتلج لاتخافين غاده بس جلمتين اريد احجيهن واريدج تسمعيهن مني..

خطيه شفتها رجفت يمكن كلبها راح يوكف من الخوف..كسرت خاطري ..ودموعها بساع صبن رغم الضوه البره مو قوي بس عيونها كبار ولمعه الدمعة صارت بعيني كتلها..

هسه تالي شلون..خليني احجي يابعد اخوج دنكت تباوع لاديه عود هدني كتلها:

اي اهدج والله هسه اهدج قابل شعندي وياج بس كون ماتشردين مني بس اسمعيني رحمه لاهلج..

هزت راسها عود اي اسمعك..

ها يعني اهدج ماتشردين مني؟؟!!

هزت راسها ردود يعني اي ما اشرد؟؟

خوش راح اهدج..

هديت اديها..ادنت لوره طخت بحايط الديوانيه انه ادنيت يمها حتى هي تسمعني لان ما اريد اعلي حسي..الدنيا ليل وحس الليل مسموع كتلها:

شوفي يغادة وخلي ابالج كل حجاية اكولها انه صادك بيها وحك اسم الله الرافع هاي السبع سماوات..من عرفتج لهاي الساعة ما فكرت بيج دقيقة وحدة بنيه عاطلة..لا وروح اخوي وداعة امي وابوي وشبابي 

واشرتله على سدري..وكلت

وحك هذا النفس اليصعد بسدري..ماعندي نيه دغش  لان انه مو فويسد ولاناقص غيرة وناموس حتى افكر بعرض العالم بنيه عاطلة  هم عندي عرض واخاف عليه وكبل ما اخاف على عرضي اخاف من غضب الله..ومو بس انتي ..لا والله عرض العالم كله عندي واحد وخط احمر هيج تربيت هيج رباني ابوي..وعلمني من زغري فلا يروح بالج بذاك الراي..وتضلين شايلة بكلبج خوفة..مني لو...تبطلين تأمنين بيه..صح كبرتي بعيني من طردتيني لان تأكدت انت نشميه..وشريفه ومربايه بس بنفس الوكت عزة عليه روحي من امس واليوم النار شابه بكلبي والوم بروحي واكل بيها اكل..والف حسبه صارت ابالي..ماغمضت عيني ولا دقيقة ..شاهد الله ولا راح يغمضلي جفن اذا ما اتأكد انتي افتهمتيني وكلبج صفه من يمي..

خطية هي بس تباوع بعيونها..حتى..مارمشت بس تسمعني ورديت كتلها..

احجيلج هيج ع المكشوف كل الي اجه ابالي من جنا كاعدين بحوشكم..وبصراحة اكلج انتي حلوة..اي والله كلش..كلش حلوة..وعيني ماشافت بعمري كله..حسن مثل حسنج انه معترف...بس..مو بيدي ربج خلالنا عيون حتى نشوف بيهن الحلو والمو حلو..وانتي احلى شي شافته عيني من صرت وتصورت غصبا عليها عيوني ..ضلت تفرزن معانيج..بس والله..هيج بس بعيوني..ماعندي اي نيه امد ايدي على شعرة من راسج الحلو..اي يغادة مو انه الافكر امد ايدي على شي موحلالي..ولا الي حق بيه..انه اعجبج نشمي وابن اصول والعيبه ماتطلع مني..

هي هزت راسها على كيفها..كتلها..

شني يعني ما افتهمت..انتي افتهمتي الكلته الج..وهاي هيه..بعد ما بكلبج..شي من يمي

هزت راسها يعني اي..كتلها

الحمد لله رحملله والديج..بس بعده كلبي مامرتاح..عيونج بعدهن ..مغيمات من يمي..اي يغاده..عيونج تسولف واعرفج اذا مقتنعه لو بعدج..

دنكت كتلها. 

لا ادنكين رفعي راسج وتبسمي بوجهي حتى اصدك كلبج صفه وانه هم كلبي يرتاح..

رفعت راسها وتبسمت ..كتلها:

اي هسه ارتاح كلبي وهود..هسه اكدر اغمض عيوني..روحي روحي يغادة نامي..وحسبيها عليه جا نزلتج من فوك..وهبطت كلبج تره ادري مو صح انزلج من فوك بهالساعة بس شسوي ..ماكدرت انام اذا ماتسمعيني..

عافتني ومشت..بساع فاتت وصعدت الدرج رحتلها فدوة المعدلة المأدبة..

فتت الغرفتي بالي ارتاح وكلبي هود تمددت بفراشي..وعيونها كبالي ما فاركن بالي ولهسه اهيس..دفو اديها بيدي..ودكات كلبها بجفوف اديه..هسه انه لشوكت اضل..اعاند بروحي  باوعت على جفوف اديه الجانن كاضات اديها وكلت لروحي..ولك انت تضحك على روحك يماجد..انت عاشكها..لا تضل تزاغل ويه روحك..البت هيج..ناكعه بروحك..ههه..تتشرد من شوفتها..وانت راكس بعشكها من راسك لساسك..شني جا خرسه..تريد تتشرد من عشكها واذا خرسه هو الكلب من يعشك يعرف خرسه..يعرف عميه..كبل يعشك..مايهمه شي هي الروح لو هوت بعد ماينكدر عليها وانت هاويها لا والله ميت عليها..دشوف روحك مثل السمجة المتزوهرة من امس واليوم جفنك ماغمض لان...تهيس فكرها راح بعيد وهسه يله برد كلبك من حجيت وياها وترست عيونك بسمتها ولك تحجي صدك جذب انت عمي دبطل هالجذب واعترف لروحك..انت حبيتها وعشكتها وهاي هيه..

وغمضت عيوني ونمت مرتاح كعدت الفجر لكيت امها وامي يتريكن تريكت ..وطلعنا ..وبالدرب امي كالت:

يمه شو اليوم ساكت لاحجاية ولا رواية شني مصكور..لو مريض..؟؟

هههه..شني يمه كل مره من اطلعج وياي اضل اهوس واليوم ساكت..

لا كل مره من نطلع..نسولف نحجي اليوم سكته شيخلصة الدرب البغداد

يخلص..يمه هو العمر خلصان ضلت ع الدرب..

جا اذا ماتسولف شغللنا حسيني..

اي ..اشغلج ادللي حجية..

وشغلت سيد جاسم الطويرجاوي رحمة الله على روحه 

وصلنا لبغداد ورحنا للمدرسه بساع استلمنا الوثايق اخذت امي وام غادة..للكاظم ع هم زرنا..وطلعنا امي كالت:

خلنا نمر للسوك ناخذ...هدوم لنويرة ولفروخ حامد..تدري بيها مرت حامد تتلكاني شجبتي وياج لفروخي..

فتنا للسوك امي اشترت هدوم للفروخ وخذت دشداشه وحجابات لامل..وام غاده بس تباوع..اي خطية ماعدها فلوس تشتري لبنياتها..خليت امي التهت تكلب بالهدوم..وطلعت..٦حمر..اطيتهن لام غاده..كالت:

شنو ذني بعد خالتك؟؟

اشتري لبنياتج صوغة منا..ولا تحجين شي..

بس خاله..؟؟

كتلج اشتري للبنات ولا تفشليني.؟؟

مشكور بعد خالتك

وشفتها فاتت..للمحل البصف المحل الواكفين بيه..ما ادري شتسوكت امي خلصت مشتره وكالت:

يااااا...جاوينها ام غادة:

هسه تجي راحت تشتري غراض البناتها!!

ياااسودة بوجهي ..وانه ..ترست العلاكة حتى ماكلتلها خيه..خلنا نشتري للبنات  شي شياتين وادري بيها ماعدها خطية. 

لا يمه عدها..شفتها طلعت فلوس ..كتلها معتازة شي..كالت لا عندي فلوس وراح اشتري لبناتي

هااا..اي همزين..انت حجيت..انه مدري شمالني حلكي..تلايم حته ما نشدتها شي

بعدنا نسولف..واجت ام غادة شايلة علاكتين..وردينا للسيارة..

من وصلنا للحوش بناتها التوم تلكنها طلعتلهن تراكات وقمصان مال مدرسه...كيفن بيهن...انه هم كيفت من شفت البنات مكيفات بالهدوم خطية يتيمات..ماعدهن احد يفرحهن..وشفت غادة نزلت..اي هسه كلبي اشتغل من شفتها نزلت من فوك..اي شلون مايشتغل كلبي  من يشوف العشك..ماله..امها..كالت..

يله يمه نروح للبيت..

وتشكرت من امي..ومني امي كالت ضلن تعشن بس هي مارضت...

طلعن للحوش انه لحكتهن  كلت اوصلهن..وصعدن وياي..صارت كعدتها وراي هيه واخواتها وامها بصفي..هيج كوه كضيت روحي حتى عيوني ماتجي بعيونها..ومن وصلتهن نزلن البنات راحن يركضن وهي وامها يمشن وشفت امها تفتح بالقفل بس عيني يمهن حركت التفتت..شفتها التفتت عليه..اي..العافيه التفتت عليه بعد شريد من ربي.💖💖💖💖

رديت لغرفتي مرتاح وكلبي بارد..الايام تمر كلشي ماكو صافية دافيه...وانه كل اسبوع اخذلهن مسواك القاسمه الله...جنت اتعمد اذب المسواك وارد حتى ما اشوفها بس هسه بالعكس كمت ادور حجج..حتى اضل واكف دقيقتين بالباب مره اكل لمها عطشان ومرة اريد ماي ابرد سيارتي ومرة اتحجج انشد عليهن هيج بلكت..مرة تمرك من يم الباب واشوفها مرن اسبوعين تلاثة كلبي طك متت على شوفتها شبيدي احبها...وكتلني الشوك..بس ماكو ماشفتها ولامرة طلعت كلت مايخالف الايام جاية هواي..ومرة جنا كاعدين نتغدة ودك تليفون ابوي شاله..

ياهله وميت  هاله بويه ام غادة!!!

وسكت اشويه ورد كال..

انه ابوك يا..راشد شبيج تبجين يبويه!!

من كال تبجين كلبي تاه مني خفت صاير شي الها لو لغادة لو للبنيات..ضل ابوي يسمعها وبعدين كال:

والله عرفته هذا دوني وعار وكلشي يطلع منه بس هين يبويه كلشي ينحل لاتبجين وتخوفين البنات انه جايكم برجلي..ذبي حمولج عليه يبويه لاتشيلين هم!!

وسكت وكال:

افه هذا الناقص يغلبني ..وروح راشد انعلج والديه..

وسد التليفون انه ماصبرت بسرعة كتله:

شبيها ام غادة بوية؟؟؟

شبيها يبويه اكو غير هذا العار ابن العار حماها؟؟

شعده وياها بويه وليش تبجي شني متجاوز عليها يعني طاكها لو طاك وحده من البنات؟؟

لا بويه ماطاكهن

جاشني؟؟

هي تسولف تكول كاعدين بأمان الله واجه ابو زهرة لاسلام ولا كلام ..فات جوة وضل يعاين ع الحوش وعالبينان انوب افتر من برة وردعلينا يكول الكاع انه بعتها بضمنها هذا الحوش وانتن لزوم اطلعن بكيفجن تردن ادورن يمي ابيتي لو انه اروح ااجرلجن بيت ابغداد يم خوالجن..

شني الكاع بايعها شني يطلعن هذا تسودن؟؟

لا بويه مو تسودن هذا دوني وطماع شاف البيت انبنه طمع بيه كال ابيعة هو والكاع يجيللي خوش مبلغ ..ويمكن مابايعة يريدة..وعنده غرض ثاني منه..

وفلوسي وتعبي والبنيات اليتيمات وين يرحن؟؟

هذا ..طابخها زين يكلك الكاع كاعي والحوش حوش ابوي ورثي وحلالي..واحنا يبويه من رحنا عليه رحنا بطرك ارواحنا لا ويانا شاهد ولا احد يشهد بحجيه من كال فلشو وابنو ..وهسه القانون ويا وحتى اذا نكعد للحك هم ينكر ويكول ما كايللهم يفلشون ويبنون بكاعي!!

غير ادفنه..وحك..علي!!

عفت الغدة وكمت روحي شاغت مني ردت اروحله هسه اكتله وافوخ كلبي بس ابوي عرفني اغتاضيت..بساع كلي:

اكعد ..اكعد يبويه كمل غداك خلني افرها براسي وانه ابوك مايعصه عليه شي هسه افوتله ابلتيقه..اخلي يحبحب بالادين..

ادري ابوي يريد يهدي عليه ومايريدني اطلع..وانه هم لزمت روحي كوه لان ابالي غير شي وسمعته يكول:

العصر اخذ ام غادة وبناتها لشيخهم..وهناك يصير الحجي..

بكيفك بويه..

خليت ابوي فات لغرفته والامور هدت فتت الغرفتي بس شني كلبي مجمر ومايبرد كلبي اذا ما الزم ابو زهرة واكضي بيه التوبه

طلعت بسكته ما اخذت سيارتي عفتها بره حتى ابوي مايشك انه طالع من غرفتي ويلحكني..انه اعرفه ابو زهرة ..هسه بالكراج لازم سره على خط بغداد لان عنده اوباما....يشتغل عليها على الخط..رحت للكراج لكيته كاعد يم السواق يشرب جاي هو شافني بساع تخردل وكام

كتله بساع:

ولك نعيم هذا يابيت التريد تبيعة وتهجول اليتامه الكاعدين بسده...

هااا..وانت هسه شني جاي تحاسبني على حلالي؟؟

هسه صار حلالك من انبنه ..حله بعينك ولك انت مابكصتك كطره حيه وغيره..

انجب..لا تغلط ولاتخليني ادوفك هنا دوف!!..شلك غرض ابيتي وبكاعي ابيعهن احركهن شني بويه انت شريجي وانه ما ادري

هاي المن انجب ..تحجي وياي ولك ابو ثرب..دتعال انت الجبتها الروحك وهسه اعلمك انه شلي غرض..

كضيته من زيجه اول ما..ركعته كله على خشمه تخردل وخشمه كام يجري دم كضوني السواق دفعتهم وكتلهم:

وحك نحر الحسين اليدنه اله ..امده فوكاه..

واستلمته بوكسات وجلاليق والسواق كلهم دايرين يردون يخلصونه مني ..بس انه معرد بيه كلبي مورم عليه..وخير شي..خنكته ..كلب عيونه مات بيدي اله شويه دفعوني منه وكام يكحكح النذل ..عفته ومشيت انوب التفتت..

احمد ربك خليتك عدل ..وعلي والسمه علي اذا تندك ..بهاليتيمات وامهن..احسب روحك...مو من اهل الدنيا ..والكل يسمعني وشاهد علية

وعفته ورديت للحوش ادري بيه راح يشتكي ..لان جبان..مايهمني خلني اخذلي جم شهر بالسجن المهم فوخت كلبي بي..ماكو ساعتين وابوي..فات علي للغرفة:

ولك شسويت يمدهور ..مقدم..علي خابرني وكلي هذا مشتكي عليك..ومتهمك رايد تكتله ومخلي ربعه كلهم شهود..

اي بويه ..رحتله فوخت كلبي بيه واذا ماجاز منهن اكتله..موت  ومايهمني..

ولك تسودنت انت تريد تخلينه مكصة للوادم شني تكتله تايهلك هو..هسه خابرني جبيرهم وكاومني. 

شوف يودي كوامة يشتكي..مايهمني كتلك بويه..

شني انت تعصاني..ولك مو كتلك اكعد واسكت وانه احلها..

بويه هذا بادي نوم..ياخذ الحوش البنيته وتعبت عليه ويهجول هاليتمات وانه اشتم الهوه لا عمت عيني..على جنازتي..ياخذ الحوش منهن والله

بويه كتلك انه احلها..ليش..تتصرف من راسك شني انه مالي جلمة عليك بعد هاي هيه طفرت من الماعون انته..

بعدني اريد ارد..عليه والدوريه اجت للباب..بساع اخذوني..للمركز ابوي اجه وراي هو وعمامي ..حجو ويه الضابط..كلهم القاضي مجاز..واليوم خميس راح يضل للاحد الجاي..مايهمي حتى لو انسجنت هاي هيه برد كلبي منه..ضليت بالسجن ابوي اجه بالليل  للمركز كالي..

لاتضل تزبد وترعد وتتهدد .سد حلكك خلني اطلعك.حجيت ويه الضابط والضابط كتب..مشاجرة عاديه والاحد اطلعك بكفالة..وذيج الساعة اتصرف ويه ابو زهرة..نكعدله ونشوف حلها!!

بويه ما اكعدله ابيتي تعرف شني ما اكعدله ابيتي؟؟

ولك ..ضاربه ومهدده..وماتريد تكعدله للحك شني انت مسوي..سنينه وحدك؟؟

اي كتلك لا اكبر راسه ولا يدوس فراشي..يريد يكعد نكعد عد طرف ثالث...وذيج الساعة انه اعرف شلون اخذ حكي..

شني حكك الحك هسه مركب براسك..غير انت المعتدي. 

هذا العندي بويه. 

خوش نكعد ابيت حجي نايف ونشوف تاليها..

هاي هيه..

راد يروح كتله:

بويه بروح راشد مر على ام غادة..وسولف وياها..هدي على الحرمة خطيه..

ولك شني انت تعلمني ع الحجي..

لا بويه العفو