رواية فصلية ولكن الفصل السادس بقلم سوزان ليث
كتله شيخ خالد مكعد ولا تحرك ورديت حجيت شيخ هم متحرك لزمت ايده ولاول مره وحركتها وصحت شيخ خالد
فزت من نومه كلي
خالد: ها شكو
حياة: ماكو شي لتفز بس خالة كالت اكعدك لان تريدك
خالد: هسه شويه واجي
حياة: طلعت رحت لخالة كتلها هسه يجي
شويه واجه علينا للهول سلم وكعد يمنا كلها
خالد : ها حجيه كلولي رايدتني
خالة: اي يمه تعال سولفلي شكو ماكو بغداد شو اجيت تغديت ونمت
خالد : والله يمه جنت تعبان ومنتهي لو ممكعديني جان جريتها للصبح
خالة: سوده عليه يمه كومي امل صبي جاي لابوج هسه سويته
خالد : اي والله صبيلي وجيبيلي باكيت جكاره بالغرفه عالميزه
امل : صار بابا
حياة: شويه وجتي امل صابه جاي لابوها ونطته باكيت جكاير
وظل هو وخاله يسولفون على بغداد وعلى بسمه
شويه ودخل حسين بيدا علاكات
حسين : هاج هاي الج ام لسان
امل : اي والله تسلم تعيش وجيب
حسين : هاج خيتي هاي الج
حياة: يا شنو هالزحمه شكرا
حسين : لايابه رحمه
خالة: ها حسين جتك وحده ثانيه كمت اجيبله
حسين: اي مريت للاسواق وسئلتهم شتردن بس حياة مقبلت تحجي عاد اني جبتلها بكيفي
حياة: كلش فرحت من شفت حسين جايبلي علاكه ماليها شغلات صح هو شي بسيط بس فرحني وحسيت باحد مهتم بيه بهذا البيت
خالد: ماعرف ليش من شفت حسين جايب علاكه ونطاها لحياة ضجت منه مع العلم اعرف حسين مقصد شي بهذا التصرف
وظليت اباع على حياة حسيتها فرحت بيها ظليت خازرها بدون سبب
امل : حياة بله خل اشوف شو علاكتج اكبر من علاكتي
حياة: ههههه هاج باعي
امل: عمو حسين ليش مجايبلي فستق من هذا
حسين : لج انتي مو متحبي
امل: لااحبه روح جيبلي منه
حسين : امشي ولي شيطلعني
حياة: هاج اخذيه ماريده اني مو كلش احبه
امل : شبيج اني هم ماحبه بس داضوجه
حياة: ههههههه عدج سوالف كومي ... اجتي امل دنت يمي همست باذني
امل: شبي ابويه هيج خازرج
حياة : مادري والله شفته بس معبالي عليه
امل: خاف غار عليج
حياة: ههه دولي
خالد : كومن سوه زقنبوت وعوفن هالسوالف الماصخه
حياة: دنسولف ويه امل ونضحك فزينا خالد عاط علينا
كمنا ركض للمطبخ نضحك على نفسنا شون فزينا كمنا طلعنا كبه وبتيته وعدنا باقي من غده تمن برياني هم حمينا
شويه واجه حسين علينا
حسين : امل شبي ابوج شو بس يرزل
امل : مادري والله جنا مشبعان نوم
حسين : وج هسه كلي دخلت سياره بالكراج كتله لا هسه اتعشه وادخلها شو خرطني رزايل هههههه
امل: هههههه عزه يكمل العشه واصعد لغرفتي انفذ بجلدي
حياة: هههههه جبانه
امل: ولج غير مشايفته من يرزل وياها كفخه ظل اذنج سوي طن
حياة: ههههههه لا يولي يجوز تعبان خطيه من رحت اكعدا جم مره صحت عليه يله حس
حسين : اي هو تعب من طريق واصلا مدري شبي من طلع من دكتور هو وعلي ضاربين صفنه اثنينهم
امل: ليش انت مدخلت وياهم
حسين : لا شكو زفه عدنا اني ظليت بره بسياره لان ماكو وكفه
امل: دروح اسئل عمو علي شوف شكو
حسين : سئلته كلي ماكو شي
اجتي خاله علينا بالمطبخ ولجن وين العشه مو كام يعيط
حياة: اي خاله كمل يله تعالو
خالة: خلي رجلج بصينيه وديلهياه بالحديقه يريد ياكل هناك
امل: يمه ابويه من ياكل بالحديقه يعني عصبيه فول صايره
خالة: خلي لسانج بحلج وسكتي انتي
يله حياة استعجلي
حياة: اي خاله كملتها للصينه حوديها .. طلعت للحديقه شفته يدخن صافن مدري شبي كلت يجوز ضايج من حجي الدكتور
رحت خليت الصينيه عالميز ولتافيت دارجع للمطبخ جان يكلي
خالد : شكو اخذتي العلاكه من حسين
حياة: ظليت صافنه عليه يعني شنو ليش اخذتيها
خالد : شبيج صافنه مو دالغي وياج
حياة: مو خطيه متعني وجايب
خالد : ها خطيه
حياة: اني كلتله ماريد شي هو جايب من كيفه والله
خالد : شوفي اي واحد يجيبلج شي منا وجاي متاخذين منه افتهمتي واذا عرفت ماخذا شي لاكسر ايدج فهمتي
حياة: هزيت راسي اي ونداريت داروح كلي
خالد : اذا ردتي شي كليلي اني اجيبلج انتي مسؤوله مني مو من حسين
حياة: ظليت اباع عليه مستغربه منه اصلا اول مره يكلي انتي مسؤوله مني
هزيت راسي اي وكتله تحتاج شي بعد كلي لا بس جيبيلي ماي
رجعت للمطبخ جبتله ماي وديتلهياه كلي
خالد : تعالي اكلي ويايه
حياة : مو هناك دينتظروني
خالد: محد دينتظرج يله كعدي
حياة: جريت الكرسي وكعدت كلي يله اكلي كعدت اكل كظيتها بس زلاطه لان هي اقرب ماعون عليه
خالد : مو حشبعين كافي زلاطه اكلي كبه بتيته
حياة: اخذت كبه وكمت اكل كلت خل افتح موضوع وياه
كتله شونها بغداد باع عليه وكلي
خالد: سلم عليج
حياة: بتسمت وكتله صالي هوايه مرايحه
خالد : ليش منو عدج بغداد
حياة: بيت اهل امي خوالي خالاتي
خالد: ها يله مره جايه اخذج ويايه شوفيهم
حياة: صدك
خالد : اي بس بشرط
حياة: شنو
خالد: وره العشه سويلي جاي مهيل يعدل الراس
حياة: ماشي تدلل.
حياة: كملنا عشه واخذت صينيه ورحت للمطبخ لكيت امل دتغسل اماعين وتاشرلي براسها على حديقه وتضحك
طبعا افتهمت تقصد لان تعشيت وياه بره كتلها ولي ماكو شي هو كلي كعدي اكلي وخفت ليرزل وكعدت
امل: هههههه واني شكلت قابل
حباة: مو اعرف حتفهمين غلط
امل : لا لا مافتهم غلط هههههه
حياة: خرب محد يخلص من لسانج خل اسوي جاي احسن
امل: سوت بيبي بس صبي
حياة: ماشي
صبيت ورحت وديت لخالد اخذ مني وكلي شبسرعه صار
حياه: لا مو خاله جانت مسويه
خالد : ها يعني بعدج ممسويه شرطي
حياة: عود باجر صبح اسويلك احسن جاي
خالد : ماشي بويه نشوف بس اذا معجبني شون
حياة: لا لا يعجبك
خالد : خل نشوف
حياة : ظليت اباع عليه شون يشيل الاستكان ونفس الايد الجكاره خرب فديت هالرجوله
فتنا كعدنا بالهول وياهم جتي امل كعدت بصفي
امل: تعالي ناكل الحبشكلات بالهول الفوك نشوف فلم شي وحدنا
حياة: اي يله امشي كمنا نطلع
حسين: ها وين كمتن اكيد عدجن مصيبه
امل: دايما ظالمني انت كلنا نصعد فوك نتفرج فلم
حسين : ها يله صعدي اسمحلج
امل: ماريد احجي ابويه كاعد ليرزلني
صعدنا فوك وشفنا فلم مصري مال محمد فؤاد رحله حب ظلينا نتفرج وناكل شغلات جايبها حسين
شويه واجه حسين كعد يمنا وكام يكرز ويانا
خالد : وره العشه كعدنا نحجي اني وعلي والحجيه وسئلت امي شو اختفو ذوله
خاله: يمه فوك كلهم ديتفرجون فلم مدري شنو
خالد : حسين هم فوك
خالة: اي يمه تريد اصيحه الك
خالد : لا يمه صيحيلي حياة
حياة: كاعدين نتفرج وسمعت خاله صيح عليه رحت يم درج كتلها ها خاله كالت تعالي رجلج يريدج نزلت رستا رحت للهول كتله صحتني
خالد : اي جنتي سوين
حياة: جنا نتفرج فلم فوك
خالد: تعالي اريدج تغسليلي فشي باجر اريد البسه
حياة: ماشي
رحنا للغرفه كلي فتحي الكنتور فتحته اشرلني على دشداشه نظيف ومكويه كلي غسليها واكويها
كتله نظيفه هاي ومكويه
خالد : لا مو لبستها وعلكتيها وهي ممغسوله
حياة: ماشي هسه اغسلها .. رحت للحمام كلت اغسلها بيدي ميحتاج غساله غسلتها ورحت بره اشرها ورجعت عليه هو جان بعد عالكرسي وبيده تليفون كتله بعد اكو شي اسويه
خالد : اي هاي الخانه مال كنتوري مخربطه اليوم داخذ تيشيرت ونكلبن كلهن
حياة: باوعت عليه وحسيته بس يريد يشغلني
فتحت الكنتور كعدت اصفط بهدومه وهو ورايه بس احسه نظراته عليه
خالد : ماعرف شبيه خليت امي صيح حياة واني ماريد منها شي بس يمكن من سمعت حسين يمهم فوك ضجت وكمت اصخرها وظليت صافن شبيه اني اغار من اخويه خرب ارجع لوعيك شيخ شنو سالفتك انت
حياة: كملت سديت كنتور وهويباع عليه كتله كملت اكو شي بعد اسويه
خالد: انتي شحسوين
حياة: حصعد اكمل الفلم
خالد: صيحي امل تعالو تفرجو هنا
حياة: ظليت صافنه ومستغربه تصرفاته هذا شبي كتله مو خاف نضوجك
خالد: لا اصلا اني مجايني نوم
حياة: صعدت لامل وهي على نفس كعدتها كتلها تعالي ننزل جوه نتفرج
امل: ليش
حياة: مادري ابوج كلي تعالو تفرجو جوه
امل : هو شبقى من الفلم انت وين مختفيه
حياة: لج ابوج كام يطلعلي شغل من جوه الكاع
امل : دكعدي هو شويه وحيخلص
حياة: كعدت كلت خل اكمله وانزل وحسين جان ماكو من رجعت لان بهيج وكت يخابر خطيبته
خلص الفلم جانت اصلا لقطات الاخيره كمت شلنا جياساتنا وزبل ونزلت وامل راحت لغرفتها تنام
فتت للغرفه لكيت خالد على نفس كعدته
خالد: ها شو تاخرتي
حياة: اصلا الفلم خلصان مجان باقي بي شي
خالد: ها شحسوين
حياة: كتله محسوي حفرش وانام
خالد : نعسانه
حياة: اي .رحت طلعت بجامه عريضه من كنتور وفتت للحمام لبستها وطلعت فرشت بس هو كبالي شون حنام كتله انت محتنام
خالد : لا منعسان نمت هواي الظهر . باوعت عليها لابسه بجامه يمكن اول مره انتيه عليها على جسمها
حياة : ظليت واكفه وبكلبي اكول شبي هذا اليوم نظراته غريبه.
